BTV NEWS

កម្ពុជាបើកកិច្ចពិគ្រោះយោបល់លើការគ្រប់គ្រងហិរញ្ញវត្ថុ និងទ្រព្យសម្បត្តិរបស់រដ្ឋបាលថ្នាក់ក្រោមជាតិ

ក្រុមហ៊ុនមកពីតំបន់មជ្ឈិមបូព៌ាមួយចាប់អារម្មណ៍លើការវិនិយោគវិស័យជាច្រើននៅកម្ពុជា

តម្លៃគ្រាប់ស្វាយចន្ទីបានហក់ឡើងខ្ពស់ដែលមិនធ្លាប់មាន នៅក្នុងរយៈពេល ៥ ឆ្នាំចុងក្រោយនេះ

ខេត្តកំពុងស្ពឺមានរោងចក្រកំពុងដំណើរការជិត ១.៤០០ កន្លែង និងផ្តល់ការងារជាង ៤៥ ម៉ឺនកន្លែង

សេដ្ឋកិច្ច និង កសិកម្ម

ក្រសួងធ្វើអង្កេតសេដ្ឋកិច្ច និងសង្គមកិច្ចដើម្បីយកទិន្នន័យតាមដានគោលនយោបាយជាតិ

ភ្នំពេញ៖ ក្រសួងផែនការ កំពុងធ្វើការអង្កេតសេដ្ឋកិច្ច សង្គមកិច្ចឆ្នាំ ២០២៣ លើគ្រួសារប្រជាពលរដ្ឋជាង ១ ម៉ឺនគ្រួសារនៅទូទាំងប្រទេស ដើម្បីទាញយកទិន្នន័យប្រើប្រាស់សម្រាប់តាមដានគោលដៅឆ្នាំ ២០៣០ ប្រែក្លាយកម្ពុជា ទៅជាប្រទេសមានប្រាក់ចំណូលមធ្យមកម្រិតខ្ពស់ និងបប្រើប្រាស់ទិន្ន័យនេះសម្រាប់គោលដៅអភិវឌ្ឍជាតិសំខាន់ជាច្រើនទៀត។ នេះបើតាមការបញ្ជាក់របស់លោកជំទាវ ហង់ លីណា ប្រតិភូរាជរដ្ឋាភិបាលទទួលបន្ទុកអគ្គនាយកវិទ្យាស្ថានជាតិស្ថិតិ។លោកជំទាវមានប្រសាសន៍ថា ការធ្វើអង្កេតនេះមានលក្ខណៈទូលំទូលាយ និងមានតារាងសំណួរចំនួន ១១ ផ្នែកគ្របដណ្ដប់លើផ្នែកជាច្រើន និងផ្តោតសំខាន់លើចំណូល បំណុល ទីតាំងភូមិសាស្រ្ត ចំណេះដឹង ការងារ ការសិក្សា រួមនឹងចំណុចជាច្រើនទៀត។ លោកជំទាវបន្តថាទិន្នន័យអង្កេតនេះ គឺមានសារៈប្រយោជន៍សម្រាប់ប្រើប្រាស់ជាទិន្នន័យ តាមដានគោលដៅយុទ្ធសាស្រ្ដអភិវឌ្ឍជាតិឆ្នាំ ២០៣០ ប្រែក្លាយកម្ពុជា ជាប្រទេសមានប្រាក់ចំណូលមធ្យមកម្រិតខ្ពស់ និងគណនាអាត្រាភាពក្រីក្រ និងប្រើប្រាស់ក្នុងគោលដៅបង្កើតគោលនយោបាយនានា។សូមជម្រាបថា ការអង្កេតសេដ្ឋកិច្ច សង្គមកិច្ច បានចាប់ផ្តើមនៅកម្ពុជាតាំងពីឆ្នាំ ១៩៩៣ មកម្លេះ ក្រោមជំនួយពីដៃគូអភិវឌ្ឍន៍។ បច្ចុប្បន្នអង្កេតនេះបាននឹងកំពុងអនុវត្តរៀងរាល់២ឆ្នាំម្ដង ក្រោមថវិកាទាំងស្រុងរបស់រាជរដ្ឋាភិបាលកម្ពុជា។ ខណៈគិតត្រឹម ៦ខែឆ្នាំ២០២៣នេះ មន្រ្តីជំនាញបានចុះសម្ភាសន៍ និងសម្រេចបានការងារមួយចំនួនរួចហើយ៕អត្ថបទ៖ គឹមហុក

ធនាគារកណ្តាលពិភពលោក បានទិញមាសក្នុងកំណត់ត្រាខ្ពស់បំផុតនៅឆមាសទី១នេះ

ក្រុមប្រឹក្សាមាសពិភពលោកបាននិយាយកាលពីថ្ងៃចន្ទថា ធនាគារកណ្តាលពិភពលោកបានទិញមាសចំនួន ៣៨៧តោននៅក្នុងឆមាសទីមួយនៃឆ្នាំនេះ ដែលជាកំណត់ត្រាខ្ពស់ចាប់តាំងពីឆ្នាំ២០០០មក ពេលកំណត់ត្រាមាសបានចាប់ផ្តើម។របាយការណ៍និន្នាការតម្រូវការមាសចុងក្រោយរបស់ក្រុមប្រឹក្សាបង្ហាញថា តម្រូវការមាសសកលនៅក្នុងឆមាសទីមួយនេះ បានកើនឡើងចំនួន៥ភាគរយដល់២.៤៦០តោន។ ក្នុងចំណោមនោះ ការបញ្ជាទិញរបស់ធនាគារកណ្តាលត្រូវបានគេរាយការណ៍ក្នុងកម្រិតខ្ពស់បំផុតគឺចំនួន ៣៨៧ តោន។ តម្រូវការដុំមាស និងកាក់មាសមានចំនួន៥៨២តោន ខណៈដែលការប្រើប្រាស់គ្រឿងអលង្ការមាសបានកើនឡើងដល់ចំនួន៩៥១តោន។យោងតាមរបាយការណ៍នោះបានឲ្យដឹងថា តម្រូវការមាស និងកាក់មាសរបស់ប្រទេសចិនបានកើនឡើងចំនួន៣៣ភាគរយបើធៀបនឹងឆ្នាំមុន ដល់ចំនួន១១៥តោន ដែលស្មើនឹងតួលេខ២០ភាគរយនៃចំនួនសរុបទូទាំងពិភពលោក។ លោក Wang Lixin នាយកគ្រប់គ្រងនៃក្រុមប្រឹក្សាមាសពិភពលោកនៅក្នុងប្រទេសចិនបាននិយាយថា ប្រទេសដែលមានសេដ្ឋកិច្ចអភិវឌ្ឍន៍ រួមទាំងប្រទេសសិង្ហបុរី និងសហភាពអឺរ៉ុបបានក្លាយជាអ្នកទិញមាសដ៏សំខាន់ ជំនួសឲ្យប្រទេសកំពុងអភិវឌ្ឍន៍ជាច្រើន។របាយការណ៍នេះបាននិយាយថា ឆមាសទីមួយនៃឆ្នាំ២០២៣នេះ ក៏បានរាយការណ៍ពីការផលិតរ៉ែមាសរួមគ្នាចំនួន១.៧៨១តោន ដែលខ្ពស់ជាងពីរភាគរយធៀបនឹងកំណត់ត្រាមុនដែលបានកត់ត្រាកាលពីឆ្នាំ២០១៨៕

កម្ពុជាគ្រោងនាំចេញជ្រូករស់ទៅកាន់ប្រទេសវៀតណាម ឆ្លើយតបនឹងតម្រូវការទីផ្សារក្រៅប្រទេស

ភ្នំពេញ៖ កម្ពុជាកំពុងគិតគូរជំរុញការនាំចេញជ្រូករស់ ទៅកាន់ប្រទេសវៀតណាម ខណៈទីផ្សារនៅប្រទេសនោះបានកំពុងងើបឡើង ដែលនឹងជួយរក្សាស្ថិរភាពតម្លៃជ្រូករស់ក្នុងស្រុក ដែកកំពុងស្រុតចុះ។លោក ស្រ៊ុន ពៅ ប្រធានសមាគមអ្នកចិញ្ចឹមសត្វជ្រូកនៅកម្ពុជា បានថ្លែងលើកឡើង នៅថ្ងៃទី ២ ខែ សីហា ឆ្នាំ ២០២៣ នេះថា ជុំវិញការផ្គត់ផ្គង់ជ្រូករស់ និងសាច់ជ្រូកនៅលើទីផ្សារ នាប៉ុន្មានឆ្នាំចុងក្រោយ ផលិតកម្មចិញ្ចឹមជ្រូកនៅកម្ពុជា បានឆ្លើយតបតាមតម្រូវការទីផ្សារ បានគ្រប់គ្រាន់ ដោយកម្ពុជាលែងមានការនាំជ្រូករស់ចូលពីប្រទេសជិតខាងទៀតហើយ ស្របពេលការចិញ្ចឹមជ្រូកក្នុងស្រុកមានការរីកចម្រើន និងមានកសិដ្ឋានតូច-ធំ ជាច្រើនបានដំណើរលើផលិតកម្មផ្នែកនេះ។ចំណែកតម្លៃលក់វិញ លោក ស្រ៊ុន ពៅ លើកឡើងបន្តថា សម្រាប់ទីផ្សារក្នុងស្រុក តម្លៃជ្រូករស់នាពេលកន្លងមកបានហក់ឡើងដល់ ៩ ៣០០ រៀល ក្នុងមួយគីឡូក្រាម តែមកដល់បច្ចុប្បន្នតម្លៃនេះបានធ្លាក់ចុះ, ដែលការធ្លាក់ចុះនេះ ព្រោះនៅក្នុងរដូវវស្សាប្រជាពលរដ្ឋមួយចំនួនធំ ជាពិសេសប្រជាពលរដ្ឋនៅតាមជនបទ ពួកគាត់អាចរកត្រីសាច់សម្រាប់ផ្គត់ផ្គង់ការហូបចុកបានមួយចំនួនធំ។ សមាគមបានសង្កេតឃើញថា តម្លៃជ្រូករស់នៅប្រទេសវៀតណាម កំពុងមានសម្ទុះងើបឡើង ក្នុងនោះដើម្បីជួយដល់កសិករ បច្ចុប្បន្នក្រសួងស្ថាប័នពាក់ព័ន្ធកំពុងជួយសម្រួលលើបញ្ហាទាំងនេះ ដើម្បីជំរុញការនាំចេញជ្រូករស់ទៅកាន់ប្រទេសវៀតណាម។ជុំវិញការនាំចេញជ្រូករស់ទៅប្រទេសវៀតណាមនេះ, លោក ស្រ៊ុន ពៅ បានបញ្ជាក់ថា ថ្មីៗនេះ កសិករអ្នកចិញ្ចឹមជ្រូក ក៏ដូចប្រជាពលរដ្ឋមួយចំនួន មានការយល់ច្រឡំ អំពីការនាំជ្រូកពីប្រទេសជិតខាងចូលមកកម្ពុជា ។ ចំពោះបញ្ហាទាំងនេះ គឺក្រសួងស្ថាប័នពាក់ព័ន្ធរបស់កម្ពុជា គឺបានអនុញ្ញាត ឲ្យក្រុមហ៊ុននាំចេញជ្រូកពីប្រទេសថៃ ឆ្លងកាត់ប្រទេសកម្ពុជា ឆ្ពោះទៅកាន់ប្រទេសវៀតណាម ដោយមិនមែននាំចូលទីផ្សារកម្ពុជានោះទេ៕ អត្ថបទ៖ សុន រ៉ាឌី

ក្រុមហ៊ុន Meta ចាត់វិធានការដើម្បីបញ្ចប់ការចូលប្រើព័ត៌មាននៅក្នុងប្រទេសកាណាដា តាមច្បាប់ស្តីពីការបង់ប្រាក់ឱ្យអ្នកបោះពុម្ពផ្សាយ

អាមេរិក៖ ក្រុមហ៊ុន Meta បាននិយាយកាលពីថ្ងៃអង្គារថា វេទិការបស់ Meta ទាំងអស់បានចាប់ផ្តើមដំណើរការដើម្បីបញ្ចប់ការចូលប្រើព័ត៌មាននៅលើបណ្ដាញសង្គម Facebook និង Instagram សម្រាប់អ្នកប្រើប្រាស់ទាំងអស់នៅក្នុងប្រទេសកាណាដា ជាឆ្លើយតបទៅនឹងច្បាប់ដែលតម្រូវឱ្យក្រុមហ៊ុនអ៊ីនធឺណិតយក្សជាច្រើនបង់ប្រាក់ឱ្យអ្នកផ្សាយព័ត៌មាន។ច្បាប់ស្តីពីព័ត៌មានអនឡាញដែលត្រូវបានអនុម័តដោយសភាកាណាដានឹងបង្ខំឱ្យវេទិកាអនឡាញដូចជាក្រុមហ៊ុន Google ដែលជាបុត្តសម្ព័ន្ធរបសក្រុមហ៊ុនមេ Alphabet និងក្រុមហ៊ុន Meta ចរចាកិច្ចព្រមព្រៀងពាណិជ្ជកម្មជាមួយអ្នកផ្សាយព័ត៌មានកាណាដាសម្រាប់មាតិការបស់ពួកគេ។នៅក្នុងយុទ្ធនាការប្រឆាំងនឹងច្បាប់ ដែលជាផ្នែកមួយនៃនិន្នាការសកលកាន់តែទូលំទូលាយដើម្បីធ្វើឱ្យក្រុមហ៊ុនបច្ចេកវិទ្យាបង់ប្រាក់សម្រាប់ព័ត៌មាន ទាំងក្រុមហ៊ុន Meta និងក្រុមហ៊ុន Google បាននិយាយកាលពីខែមិថុនាថា ពួកគេនឹងបិទការចូលប្រើព័ត៌មាននៅលើវេទិការបស់ពួកគេនៅក្នុងប្រទេសនេះ។ ច្បាប់របស់ប្រទេសកាណាដាគឺស្រដៀងគ្នាទៅនឹងច្បាប់មូលដ្ឋានដែលអូស្ត្រាលីបានអនុម័តក្នុងឆ្នាំ២០២១ ហើយបានបង្កការគំរាមកំហែងពីក្រុមហ៊ុន Google និងក្រុមហ៊ុន Facebook ក្នុងការកាត់បន្ថយសេវាកម្មរបស់ពួកគេ៕

រយៈពេល៧ខែ ភ្ញៀវទេសចរទស្សនាក្នុងតំបន់អង្គរ សម្រាប់ឆ្នាំ២០២៣ ជាង២លាន៦៤ម៉ឺននាក់

សៀមរាប៖ មន្ដ្រីជំនាញផ្នែទេសចរណ៍ នៃអាជ្ញាធរជាតិអប្សរា បានឱ្យដឹងថា លំហូរភ្ញៀវទេសចរជាតិ និងអន្ដរជាតិ បានទៅទស្សនារមណីយដ្ឋានអង្ករ ក្នុងរយៈពេល៧ខែឆ្នាំ២០២៣នេះ មានចំនួនជាង២លាន ៦៤ម៉ឺន៣ពាន់នាក់ មានការកើនឡើងគួរឱ្យកត់សំគាល់ជាងឆ្នា២០២២ បើប្រៀបធៀប និងរយៈពេលដូចគ្នា។លោក សេង សុធារ៉ា ប្រធាននាយកដ្ឋានអភិវឌ្ឍន៍ទេសចរណ៍ វប្បធម៌អង្គរ និងសារមន្ទីរ បទកដ្ឋានបេតិកភណ្ឌ នៃអាជ្ញាធរជាតិអប្សរា មានប្រសាសន៍នៅថ្ងៃទី០១ខែសីហា ឆ្នាំ២០២៣នេះថា ក្នុងចំណោមភ្ញៀវទសចរជាតិ និងអន្ដរជាតិជាង៦៤ម៉ឺន៣ពាន់នោះ មានលំហូរភ្ញៀវទេសចរខ្មែរ ចំនួន២លាន ២០ម៉ឺន៣ ៦៩៦ នាក់ និងភ្ញៀវទេសចរអន្ដរជាតិទិញសំបុត្រចូលទស្សនាអង្គរ មាន៤៣ម៉ឺន៩ ៣៦៥នាក់ ខណៈដែលឆ្នាំ២០២២កន្លងមក មានភ្ញៀវបរទេសមកទស្សនាតំបន់អង្គរត្រឹមតែ៨ម៉ឺន៣៨៥៤ ប៉ុណ្ណោះ។លោក បានបន្ដថា ក្នុងរយៈពេល៧ខែ ចាប់ពីថ្ងៃទី១ខែមករា ដល់ថ្ងៃទី៣១ ខែកក្កដាឆ្នាំ២០២៣នេះ មានអ្នកទេសចរសរុបចំនួន២លាន ៦៤ម៉ឺន៣ ០៦១ នាក់។លោក បានបន្ដថា ចាប់ពីខែកញ្ញា ឆ្នាំ២០២៣ខាងមុខនេះ ភ្ញៀវទេសចរអាចនឹងកើនឡើង ខណៈដែលរាជរដ្ឋាភិបាល បើឱ្យដំណើរការព្រលានយន្ដហោះអន្ដរជាតិសៀមរាបអង្គរនៅពាក់កណ្ដាលខែតុលាខាងមុខ។ពាក់ព័ន្ធនឹងចំនួនភ្ញៀវ យើងសង្ឃឹមថា នឹងមានការកើនឡើងនៅក្នុងខែ៩ រហូតដល់ចុងខែធ្នូ អត្រាចំនួនភ្ញៀវមានការកើនឡើងនូវភ្ញៀវទេសចរអន្ដរជាតិព្រោះបើយើងប្រៀបធៀបភ្ញៀវទេសចរ៧ខែកាលពីឆ្នាំ២០២២ កន្លងមក មានតែ៨ម៉ឺននាក់ជាង ដល់ឥឡូវនៅឆ្នាំ២០២៣ មានរហូតជិតទៅដល់៤៤ម៉ឺននាក់ មានការកើនឡើងប្រហែលជាង៤រយភាគរយ។យោងតាមសេចក្ដីប្រកាសព័ត៌មានគ្រឹះស្ថានអង្គរ បានបង្ហាញថា នៅក្នុងខែកក្កដា ឆ្នាំ២០២៣ ចំនួនភ្ញៀវចរបរទេស និងចំណូលដែលទទួលបានពីការលក់បណ្ណចូលទស្សនារមណីយដ្ឋានអង្គរ មានចំនួន៥ម៉ឺន៣៥៩៦នាក់ បើធៀបរយៈពេលដូចគ្នានឹងឆ្នាំ២០២២ កើនឡើងជាង១២៤ភាគរយ។ ចំណូលថវិកា២លាន៤៣ម៉ឺន៩៩២៧ដុល្លា បើបរៀបធៀបនឹងឆ្នាំ២០២២ កើនឡើងជាង ១៥៤ភាគរយ។ ចំណូលមូលនិធិមន្ទីរពេទ្យគន្ធបុប្ផា សម្រាប់ខែកក្កដា ឆ្នាំ២០២៣ ចំនួន១០ម៉ឺ៧១៩២ដុល្លារ។សេចក្ដីប្រកាសដដែល បានបន្ថែមថា ក្នុងរយៈពេល៧ខែឆ្នាំ២០២៣នេះ ចំណូលពីការលក់សំបុត្រចូលទស្សនាអង្គរ សម្រាប់ភ្ញៀវទេសចរអន្ដរជាតិ មានចំនួន២០លាន ៣១ម៉ឺន ៧៣៤៥ដុល្លារ កើនឡើងជាង៥រយភាគរយក្នុងរយៈពេលដូចគ្នានៃឆ្នាំ២០២២កន្លងមក ខណៈដែលភ្ញៀវទេសចរអន្ដរជាតិទិញសំបុត្រមានចំនួន៤៣ម៉ឺន៩៣៦៥នាក់ កើនឡើងជាងឆ្នាំ២០២២ជាង៤រយភាគរយក្នុងរយៈពេល៧ខែនេះ។សេចក្ដីប្រកាសព័ត៌មាន បានបន្ដថា ចំណូលមូលនិធិមន្ទីរពេទ្យគន្ធបុប្ផា រយៈពេល៧ខែក្នុងឆ្នាំ២០២៣មានចំនួន៨៧ម៉ឺ៨៧៣០ដុល្លារ។ចំណូលពីការលក់បណ្ណនៅប្រាសាទកោះកែរ សម្រាប់ខែកក្កដា មានចំនួន១០៥៩០ដុល្លារ និងរយៈពេល៧ខែមានចំនួនជាង១០ម៉ឺនដុល្លារ។ចំណូលពីការលក់សំបុត្រទូករយៈពេល៧ខែឆ្នាំ២០២៣ មានចំនួន៣២ម៉ឺន៨៦៦៨ដុល្លា៕

រដ្ឋលក់មូលបត្របំណុលមានទំហំទឹកប្រាក់សរុប១៨៤ប៊ីលានរៀល គិតត្រឹមខែមិថុនាឆ្នាំនេះ

ភ្នំពេញ៖ មូលបត្របំណុលរបស់រដ្ឋ ដែលបោះផ្សាយដោយធនាគារជាតិនៃកម្ពុជា គិតមកដល់ត្រីមាសទី១ ឆ្នាំ២០២៣នេះ បានបោះផ្សាយមូលបត្របំណុល ចំនួន ១១ លើក មានទំហំទឹកប្រាក់សរុបជាង ១៨៤ ប៊ីលានរៀល ឬស្មើនឹងប្រមាណ ៤៤លានដុល្លារ។ធនាគារជាតិនៃកម្ពុជា បានបង្ហាញរបាយការណ៍ប្រចាំឆមាសទី ១ និងទិសដៅឆមាសទី ២ ឆ្នាំ២០២៣ នៅថ្ងៃទី ៣១ ខែ កក្កដា ឆ្នាំ ២០២៣ ការបោះផ្សាយមូលបត្របំណុលរបស់រដ្ឋ ដែលធនាគារជាតិនៃកម្ពុជា ជាភ្នាក់ងារបោះផ្សាយ និងទូទាត់មូលបត្ររដ្ឋ នៅលើទីផ្សារដំបូង ដែលមានគ្រឹះស្ថានធនាគារ និងហិរញ្ញវត្ថុជាអ្នកចូលរួមជាវ បានចាប់ផ្តើមពីខែកញ្ញា ឆ្នាំ ២០២២។ គិតនៅក្នុងឆមាសទី ១ ឆ្នាំ ២០២៣ ការដេញថ្លៃមូលបត្ររដ្ឋ នៅលើផ្លែតហ្វម (NBCP) មាន ៦ ដង មានទំហំប្រាក់ ១១២ ប៊ីលានរៀល។សូមបញ្ជាក់ថា ការបោះផ្សាយមូលបត្ររដ្ឋបន្ទាប់ពីបានផ្អាកមួយរយៈ រាជរដ្ឋាភិបាលបានសម្រេចបោះផ្សាយមូលបត្ររដ្ឋឡើងវិញ ក្នុងគោលបំណងរួមចំណែកអភិវឌ្ឍទីផ្សារហិរញ្ញវត្ថុកម្ពុជា និងកេណ្ឌប្រមូលមូលធនក្នុងស្រុកជាប្រាក់រៀល ដើម្បីប្រើប្រាស់ក្នុងការវិនិយោគរយៈពេលមធ្យមនិងវែង។ ជាក់ស្តែងនៅឆ្នាំ ២០២២ មូលបត្ររដ្ឋត្រូវបានបោះផ្សាយចំនួន ៥ លើក តាមរយៈការដេញថ្លៃនៅលើផ្លែតហ្វម (NBCP) មានទឹកប្រាក់ចំនួនជាង ៧២ ប៊ីលានរៀល ត្រូវប្រមាណជាង ១៧ លានដុល្លារអាមេរិក ទាបជាងការគ្រោងទុក ក្នុងចំនួន ១,២ ទ្រីលានរៀល ឬ៣០០លានដុល្លារអាមេរិក។ ការបោះផ្សាយមូលបត្ររដ្ឋ គឺជាជំហានយ៉ាងសំខាន់ក្នុងការរួមចំណែកអភិវឌ្ឍន៍ទីផ្សារហិរញ្ញវត្ថុក្នុងស្រុកបន្ថែមទៀត ក៏ដូចជាការលើកកម្ពស់ការអនុវត្តនយោបាយរូបិយវត្ថុ ផ្អែកលើយន្តការទីផ្សារ តាមរយៈការបង្កើតឧបករណ៍រូបិយវត្ថុមួយដែលគ្មានហានិភ័យ ការផ្តល់ជាឧបករណ៍សម្រាប់ប្រើជាប្រាតិភោគ (សិទ្ធប្រត្យក្សមួយប្រភេទ ដែលប្រគល់ទៅឲ្យម្ចាស់បំណុល) ដើម្បីទទួលបានហិរញ្ញប្បទាន ជាប្រភពទុនដែលមានស្ថិរភាព ធៀបនឹងប្រភពទុនក្រៅប្រទេស និងជួយជំរុញការប្រើប្រាស់ប្រាក់រៀលនៅកម្ពុជា៕អត្ថបទ៖ សុន រ៉ាឌី

គ្រឹះស្ថានធនាគារ និងមីក្រូហិរញវត្ថុ ផ្តល់ឥណទានជាង ៥៥ ប៊ីលានដុល្លារ នៅក្នុងឆមាសទី១ឆ្នាំនេះ

ភ្នំពេញ៖ នៅក្នុងឆមាសទី១ ឆ្នាំ២០២៣ វិស័យធនាគារបានផ្តល់ឥណទាន មានទឹកប្រាក់ជិត ៤៦ ប៊ីលានដុល្លារអាមេរិក កើនឡើងជិត ១២ ភាគរយ ខណៈវិស័យមីក្រូហិរញ្ញវត្ថុ បានផ្តល់ឥណទានអតិថិជនមានចំនួនជិត ១០ ប៊ីលានដុល្លារអាមេរិក កើនឡើងជិត ១៥ ភាគរយ។ក្នុងរបាយការណ៍ប្រចាំឆមាសទី១ និងទិសដៅឆមាសទី២ ឆ្នាំ២០២៣ វិស័យធនាគារ, ទ្រព្យសកម្មរបស់គ្រឹះស្ថានធនាគារ កើនឡើងជិត ៩ ភាគរយ ដល់ជាង ២៨៣ ទ្រីលានរៀល ត្រូវប្រមាណជិត ៧០ ប៊ីលានដុល្លារអាមេរិក ។ ចំណែកឥណទានត្រូវបានផ្តល់ទៅកាន់វិស័យសំខាន់ៗក្នុងសេដ្ឋកិច្ចរួមមាន៖ ការជួញដូររាយ ការទិញផ្ទះជាកម្មសិទ្ធិផ្ទាល់ខ្លួន ការជួញដូរអចលនទ្រព្យ ការជួញដូរដុំ សំណង់ កសិកម្ម រុក្ខាប្រមាញ់ និងនេសាទ ការឱ្យខ្ចីជាបុគ្គល កម្មន្តសាល សណ្ឋាគារ និងភោជនីយដ្ឋាន។ប្រាក់បញ្ញើ បានកើនឡើង ៦,៤% មានទំហំទឹកប្រាក់ជិត ១៦០ ទីលានរៀល ត្រូវជាង ៣៩ ប៊ីលានដុល្លារអាមេរិក ក្នុងចំនួនជិត ១៤ លានគណនី។ចំណែកវិស័យមីក្រូហិរញ្ញវត្ថុវិញ, ទ្រព្យសកម្មគ្រឹះស្ថានមីក្រូហិរញ្ញវត្ថុបានកើនឡើងជាង ១៦ ភាគរយ ក្នុងទំហំទឹកប្រាក់ជិត ៤៨ ទី្រលានរៀល ត្រូវប្រមាណជិត ១២ ប៊ីលានដុល្លារអាមេរិក ដែលក្នុងនោះឥណទានអតិថិជន បានកើនឡើងជិត ១៥ ភាគរយ ក្នុងទំហំទឹកប្រាក់ ៤០ ទី្រលានរៀល ត្រូវប្រមាណ ៩,៧ ប៊ីលានដុល្លារអាមេរិក, ដោយមាន ២,២ លានគណនី។ ទាក់ទិនឥណទានទាំងនេះ បានផ្តល់ទៅកាន់វិស័យសំខាន់ៗក្នុងសេដ្ឋកិច្ចរួមមាន៖ អង្គភាពគ្រួសារ ពាណិជ្ជកម្ម និងជំនួញ កសិកម្ម សេវាកម្ម ដឹកជញ្ជូន សំណង់ កម្មន្តសាល និងផ្សេងៗ ។ ទន្ទឹមនេះ វិស័យមីក្រូហិរញ្ញវត្ថុបានទទួលប្រាក់បញ្ញើ ២០ ទី្រលានរៀល ត្រូវប្រមាណ ៤,៩ ប៊ីលានដុល្លារអាមេរិក ស្មើនឹង ២,៧ លានគណនី៕អត្ថបទ៖ សុន រ៉ាឌី

ការកើនឡើងទុនបម្រុងអន្តរជាតិ បានបង្ហាញនៃការឡើងសកម្មភាពសេដ្ឋកិច្ចក្នុងស្រុក

ភ្នំពេញ៖ ក្នុងឆមាសទី១ ឆ្នាំ២០២៣ ទុនបម្រុងអន្តរជាតិមានចំនួនជាង ១៨ ប៊ីលានដុល្លារអាមេរិក បានកើនឡើងប្រមាណ ៣,២% ធៀបនឹងចុងខែ ធ្នូ ឆ្នាំ២០២២ ដែលការកើនឡើងទុនបម្រុងនេះ ជាលទ្ធផលនៃការកើនឡើងចំណូលពីការវិនិយោគក្រៅប្រទេស ថ្លៃមាស និងប្រាក់បញ្ញើរបស់រាជរដ្ឋាភិបាល និងគ្រឹះស្ថានធនាគារ និងហិរញ្ញវត្ថុនៅធនាគារជាតិនៃកម្ពុជា។ធនាគារជាតិនៃកម្ពុជា ក្នុងរបាយការណ៍ប្រចាំឆមាសទី១ និងទិសដៅឆមាសទី២ ឆ្នាំ២០២៣ នៅថ្ងៃទី ៣១ ខែកក្កដា ឆ្នាំ ២០២៣ លើកឡើងថា ការកើនឡើងទុនបម្រុងនេះ ជាលទ្ធផលពីការកើនឡើងចំណូលពីការវិនិយោគក្រៅប្រទេស ថ្លៃមាស និងប្រាក់បញ្ញើរបស់រាជរដ្ឋាភិបាល និងគ្រឹះស្ថានធនាគារ និងហិរញ្ញវត្ថុនៅធនាគារជាតិនៃកម្ពុជា។ កម្រិតខ្ពស់នៃទុនបម្រុងអន្តរជាតិនេះ បង្ហាញពីលទ្ធភាពរក្សាបានស្ថិរភាពអត្រាប្តូរប្រាក់ ទំនុកចិត្តលើរូបិយវត្ថុជាតិ មូលដ្ឋានសម្រាប់ការខ្ចីក្រៅប្រទេស ព្រមទាំងផ្តល់ការការពារគ្រប់គ្រាន់សម្រាប់បំពេញតម្រូវការសន្ទនីយភាពទប់ទល់ នឹងវិបត្តិខាងក្រៅ។ការវិនិយោគទុនបម្រុងអន្តរជាតិ ត្រូវបានអនុវត្តដោយមានភាពបត់បែន ហើយហានិភ័យនៃការវិនិយោគ ត្រូវបានគ្រប់គ្រង និងតាមដានយ៉ាងហ្មត់ចត់ និងគោរពតាមសេចក្ដីណែនាំការវិនិយោគរបស់ធនាគារជាតិនៃកម្ពុជា ដើម្បីធានាបានការគ្រប់គ្រងទុនបម្រុងអន្តរជាតិប្រកបដោយសុវត្ថិភាព សន្ទនីយភាព និងទទួលបានចំណូលសមស្រប។សូមបញ្ជាក់ថា ដើមឆ្នាំ ២០២៣ នេះ ធនាគារជាតិនៃកម្ពុជាបានធ្វើបច្ចុប្បន្នកម្ម សេចក្ដីណែនាំការវិនិយោគ ដោយបានកែសម្រួលសមាសភាគនៃចំណែកទុនបម្រុងវិនិយោគ និងរូបិយប័ណ្ណ ដើម្បីឆ្លើយតបនឹងកំណើននៃតម្រូវការសន្ទនីយភាព និងលទ្ធភាពខ្ពស់ក្នុងការចាប់យកឱកាសពីការប្រែប្រួលនៃអត្រាការប្រាក់នៅលើទីផ្សារ ។ ទន្ទឹមនេះ ធនាគារជាតិនៃកម្ពុជា បានបន្តយកចិត្តទុកដាក់លើការបង្កើនការវិនិយោគលើសញ្ញាបណ្ណបៃតង (Green bonds) និងសញ្ញាបណ្ណ ដែលពាក់ព័ន្ធនឹងបរិស្ថាន សង្គម និងអភិបាលកិច្ច ដែលបោះផ្សាយដោយស្ថាប័នហិរញ្ញវត្ថុអន្តរជាតិធំៗ នៅប្រទេសចិន កូរ៉េខាងត្បូង ជប៉ុន និងនៅតំបន់អឺរ៉ុប៕អត្ថបទ៖ សុន រ៉ាឌី

វិស័យឧស្សាហកម្មរួមចំណែកក្នុងផលិតផលក្នុងស្រុកសរុប រំពឹងកើនឡើង ក្នុងងឆ្នាំ២០២៣

ភ្នំពេញ៖ វិស័យឧស្សាហកម្ម រួមចំណែកក្នុងផលិតផលក្នុងស្រុកសរុប (GDP) រំពឹងកើនឡើង ក្នុងឆ្នាំ២០២៣នេះ ដោយគាំទ្រដោយការហូរចូលនៃគម្រោងវិនិយោគផ្ទាល់ពីបរទេសកាន់តែច្រើន។ឯកឧត្តម ហេង សុគង់ រដ្ឋលេខាធិការ និងជាអ្នកនាំពាក្យក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍ បានលើកឡើងថា ច្បាប់វិនិយោគថ្មី កិច្ចព្រមព្រៀង FTA និងកិច្ចព្រមព្រៀង RCEP នឹងជួយកម្ពុជាទាក់ទាញវិនិយោគពីបរទេសកាន់តែច្រើន ដែលនឹងចូលរួមចំណែកជំរុញកំណើនសេដ្ឋកិច្ច ដែលវិស័យឧស្សាហកម្មរួមចំណែក ក្នុង GDP ឆ្នាំ២០២៣នេះ។ឯកឧត្តម ថ្លែងថា៖ “បន្ទាប់ពីងើបឡើងពីវិបត្តិជំងឺកូវីដ១៩ ជាសកល យើងឃើញថា កំណើនវិនិយោគបានកើនឡើងជាបន្តបន្ទាប់ ហើយក្នុងឆ្នាំ២០២៣នេះ យើងគិតថា កំណើននៃវិស័យឧស្សាហកម្មរបស់យើង អាចកើនឡើងរហូតដល់ ៣៩ភាគរយ ចូលរួមចំណែកទៅលើ GDP”។ឯកឧត្តម បញ្ជាក់ថា កំណើននៃលំហូរចូលនៃវិនិយោគគឺដោយសាររាជរដ្ឋាភិបាល បានបង្កើតនូវលិខិតបទដ្ឋានគតិយុទ្ធជាបន្តបន្ទាប់ ដើម្បីជំរុញ និងលើកកម្ពស់ធុរកិច្ចនៅកម្ពុជា ជាពិសេសការទាក់ទាញនូវការវិនិយោគិនឱ្យបានកាន់តែល្អប្រសើរ។សូមបញ្ជាក់ថា ក្នុងរយៈពេលឆមាសទី១ឆ្នាំ២០២៣ ក្រុមប្រឹក្សាអភិវឌ្ឍន៍កម្ពុជា បានអនុម័តគម្រោងវិនិយោគថ្មី និងគម្រោងពង្រីកការវិនិយោគ ចំនួន ១១៣គម្រោង មានដើមទុនសរុប ប្រមាណ ១,១ ពាន់លានដុល្លារ។ប្រទេសចិនឈរលើកំពូងតារាងវិនិយោគផ្ទាល់ពីរប្រទេសនៅកម្ពុជាដោយមានគម្រោងវិនិយោគមានតម្លៃទុនសុបជាង៧០០លានដុល្លារ តាមពីក្រោយដោយវិនិយោគមកពីប្រទេសវៀតណាម ថៃ កូរ៉េខាងត្បូងជាដើម៕ អត្ថបទ៖ វណ្ណៈ

ប្រព័ន្ធធនាគារបានដើរ តួនាទីយ៉ាងសកម្ម ក្នុងការលើកស្ទួយសកម្មភាពសេដ្ឋកិច្ច និងរក្សាស្ថិរភាពហិរញ្ញវត្ថុ

ភ្នំពេញ៖ ធនាគារជាតិនៃកម្ពុជាបាន លើកឡើងថា ស្ថិរភាពនៃប្រព័ន្ធធនាគារបានដើរ តួនាទីយ៉ាងសកម្ម ក្នុងការលើកស្ទួយសកម្មភាពសេដ្ឋកិច្ច និងរក្សាស្ថិរភាពហិរញ្ញវត្ថុ ក្នុងបរិការណ៍ដែលសេដ្ឋកិច្ចកម្ពុជា កំពុងទទួលរងឥទ្ធិពលពីការថមថយ នៃសកម្មភាពសេដ្ឋកិច្ចពិភពលោក។ឯកឧត្តម ជា ចាន់តូ ទេសាភិបាលធនាគារជាតិនៃកម្ពុជា ថ្លែងលើកឡើងបែបនេះ នៅក្នុងការបើកសន្និបាត បូកសរុបលទ្ធផលការងារប្រចាំ ឆមាសទី ១ និងទិសដៅការងារឆមាសទី២ ឆ្នាំ២០២៣ របស់ធនាគារជាតិនៃកម្ពុជា នៅសណ្ឋាគារសុខា ខេត្តព្រះសីហនុ នាថ្ងៃទី ៣០ ខែ កក្កដា ឆ្នាំ២០២៣ ។ឯកឧត្តម លើកឡើងថា បើទោះបីជាលក្ខខណ្ឌហិរញ្ញវត្ថុសកល កំពុងស្ថិតក្នុងស្ថានភាពរឹតត្បិត ហើយធនាគារនៅសហរដ្ឋអាមេរិកចំនួន ៣ បានដួលរលំកាលពីដើមឆ្នាំ ២០២៣ ដែលបានបង្កការព្រួយ បារម្ភនៅលើទីផ្សារហិរញ្ញវត្ថុអន្តរជាតិ ក៏ប្រព័ន្ធធនាគារកម្ពុជានៅតែរក្សាបានភាពធន់និងរឹងមាំ។ទន្ទឹមនេះ ការរក្សាស្ថិរភាពថ្លៃនយោបាយរូបិយវត្ថុ និងអត្រាប្តូរប្រាក់ ធនាគារជាតិនៃកម្ពុជា ត្រូវបាន អនុវត្តប្រកបដោយភាពបត់បែន និងប្រុងប្រយ័ត្នខ្ពស់។ សន្ទនីយភាពត្រូវបានបញេ្ចញទៅក្នុងទីផ្សារ និងស្រូបយកមកវិញ តាមរយៈឧបករណ៍នយោបាយរូបិយវត្ថុនានា ផ្អែកលើការប្រែប្រួលនៃតម្រូវការជាក់ស្តែង ក្នុងគោលដៅធានាឱ្យគ្រឹះស្ថានធនាគារ និងហិរញ្ញវត្ថុ មានសន្ទនីយភាពគ្រប់គ្រាន់ សម្រាប់ផ្តល់ឥណទានក្នុងអត្រាការប្រាក់មួយសមរម្យ និងបញ្ចៀសសម្ពាធទៅលើអត្រាប្តូរប្រាក់ផងដែរ។ ទន្ទឹមនេះ ក្នុងស្ថានភាពដែលតម្លៃប្រាក់ដុល្លារអាមេរិក នៅលើទីផ្សារអន្តរជាតិមាននិន្នាការកើនឡើង ប្រាក់រៀលត្រូវបានរក្សា ឱ្យមានស្ថិរភាពក្នុងកម្រិតជាមធ្យម ៤.០៩៤ រៀលក្នុង ១ ដុល្លារអាមេរិក ប្រហាក់ប្រហែលនឹងគ្រាដូចគ្នាឆ្នាំមុន សំដៅការពារអំណាចទិញ របស់ប្រាក់រៀល ក៏ដូចជាប្រាក់ចំណូលរបស់ប្រជាពលរដ្ឋងាយរងគ្រោះ ។ ជាមួយគ្នានេះ ការពង្រឹងការប្រើប្រាស់ប្រាក់រៀលឱ្យកាន់តែទូលំទូលាយ នៅតែជាការងារចាំបាច់ ដើម្បីកាត់បន្ថយឥទ្ធិពលពីកត្តាខាងក្រៅ មកលើកម្រិតថ្លៃនៅកម្ពុជា និងពង្រឹងប្រសិទ្ធភាពនយោបាយរូបិយវត្ថុ ក្នុងការគ្រប់ គ្រងស្ថិរភាពថ្លៃ និងជំរុញកំណើនសេដ្ឋកិច្ចឱ្យកាន់តែមានប្រសិទ្ធភាព ។ ការប្រើប្រាស់ប្រាក់រៀលក្នុងសេដ្ឋកិច្ចច្រើន ក៏អាចជួយគរពូនទុនបម្រុងអន្តរជាតិ ឱ្យកាន់តែខ្ពស់ជាងកម្រិតបច្ចុប្បន្នថែមទៀត ដែលនឹងពង្រឹងជំនឿទុកចិត្តរបស់វិនិយោគិន និងសាធារណជន មកលើស្ថិរភាពសេដ្ឋកិច្ច និងហិរញ្ញវត្ថុ កម្ពុជាឱ្យកាន់តែរឹងមាំ៕ អត្ថបទ៖ សុន រ៉ាឌី

បណ្ដាញសង្គម

ព័ត៌មានថ្មីៗ

ថៃទម្លាក់បណ្ដឹងប្រមាថព្រះមហាក្សត្រ ប្រឆាំងនឹងសាស្ត្រាចារ្យជនជាតិអាមេរិក

អ្នកការទូតជាន់ខ្ពស់របស់ចិន គាំទ្រការទូតនុយក្លេអ៊ែររបស់អ៊ីរ៉ង់ មុនកិច្ចពិភាក្សាជុំថ្មីជាមួយអាមេរិក

អ៊ីស្រាអែលអះអាងថា ខ្លួនបានវាយប្រហារគោលដៅរបស់ក្រុមជ្រុលនិយមនៅប្រទេសស៊ីរី

ទីភ្នាក់ងារ UN ៖ ចំនួនជាង ៩០% នៃទារកនៅតំបន់ហ្កាហ្សា មិនទទួលបានអាហារូបត្ថម្ភជាមូលដ្ឋាន

ក្រុមកាកបាទក្រហមនឹងអមដំណើរទាហានកុងហ្គោចេញពីទីក្រុង Gomaគ្រប់គ្រងដោយក្រុមឧទ្ទាម ទៅកាន់ទីក្រុង Kinshasa

សមាជិកសភា៖ សភាឥណ្ឌូនេស៊ី នឹងផ្តល់សច្ចាប័ន លើព្រំដែនសមុទ្រជាមួយវៀតណាម

UN៖ មនុស្សយ៉ាងតិច ៥៤២នាក់ ត្រូវបានសម្លាប់ នៅក្នុងតំបន់ North Darfur ប្រទេសស៊ូដង់ ក្នុងរយៈពេល ៣សប្តាហ៍

ពលរដ្ឋអ៊ុយក្រែនសង្ឃឹម តែនៅប្រុងប្រយ័ត្នចំពោះកិច្ចព្រមព្រៀងរ៉ែជាមួយសហរដ្ឋអាមេរិក

ក្រុមឧទ្ទាមហ៊ួទីរាយការណ៍អំពីការវាយប្រហារលើទីតាំងរបស់អ៊ីស្រាអែល នៅទីក្រុង Tel Aviv និងAshkelon

ជនជាតិភាគតិច Druze នៅប្រទេសស៊ីរី ចាប់កាន់អាវុធ ដើម្បីការពារទីក្រុងរបស់ពួកគេ ប្រឆាំងនឹងក្រុមឥ ស្លាមនិយម

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877