BTV NEWS

កម្ពុជាបើកកិច្ចពិគ្រោះយោបល់លើការគ្រប់គ្រងហិរញ្ញវត្ថុ និងទ្រព្យសម្បត្តិរបស់រដ្ឋបាលថ្នាក់ក្រោមជាតិ

ក្រុមហ៊ុនមកពីតំបន់មជ្ឈិមបូព៌ាមួយចាប់អារម្មណ៍លើការវិនិយោគវិស័យជាច្រើននៅកម្ពុជា

តម្លៃគ្រាប់ស្វាយចន្ទីបានហក់ឡើងខ្ពស់ដែលមិនធ្លាប់មាន នៅក្នុងរយៈពេល ៥ ឆ្នាំចុងក្រោយនេះ

ខេត្តកំពុងស្ពឺមានរោងចក្រកំពុងដំណើរការជិត ១.៤០០ កន្លែង និងផ្តល់ការងារជាង ៤៥ ម៉ឺនកន្លែង

សេដ្ឋកិច្ច និង កសិកម្ម

គណៈកម្មាធិការជាតិជំរុញចលនាភូមិ១ ផលិតផល១ ចង់ឃើញផ្សារទំនើបដាក់លក់ផលិតផលក្នុងស្រុកច្រើន

ភ្នំពេញ៖ ផលិតផលភូមិ១ ផលិតផល១ បានហូរចូលទីផ្សារទំនើបៗក្នុងរង្វង់ ៨០ ភាគរយ ខណៈដែលផលិតផលប្រមាណ ២០ ភាគរយ ត្រូវបានគណៈកម្មាធិការជាតិជំរុញចលនាភូមិ១ ផលិតផល១ កំពុងជំរុញលើកទឹកចិត្តដល់ម្ចាស់ផលិតកម្មឲ្យអនុវត្តយកស្តង់ដារ ដើម្បី ជំរុញនាំចូលទៅកាន់ផ្សារទំនើបឲ្យកាន់តែច្រើន។ឯកឧត្តមបណ្ឌិត សួង ណយ អគ្គលេខាធិការរងគណៈកម្មាធិការជាតិជំរុញចលនាភូមិ១ ផលិតផល១ នៃទីស្រ្តីការគណៈរដ្ឋមន្រ្តី បានលើកឡើងថា ជុំវិញការផលិត និងវេចខ្ចប់របស់សមាជិកភូមិ១ ផលិតផល១ បច្ចុប្បន្នទទួលបានជោគជ័យក្នុងអាជីវកម្មជាច្រើន នៅក្នុងដំណើរការផលិត ក៏ដូចជាការចែកចែកទំនិញនៅតាមទីផ្សារផងដែរ ដោយតាមរយៈនេះបានបង្ហាញឲ្យឃើញពីការរីកចម្រើន នឹងមានការរំពឹងខ្ពស់ថា នៅពេលខាងមុខ ផលិតផលខ្មែរ របស់សមាជិកសហគមន៍ នឹងមានអ្នកស្គាល់កាន់តែច្រើន និងលក់ដាច់កាន់ តែច្រើនថែមទៀត។ជុំវិញទីផ្សារនេះ, ឯកឧត្តមបណ្ឌិត បន្តថា ពាក់ព័ន្ធអ្នកបញ្ជាទិញសម្រាប់នាំចេញវិញ ពួកគេតែងតែដើរមើលទំនិញផ្សេងៗនៅ តាមទីផ្សារ ប្រសិនផលិតផលទាំងនោះមានដាក់លក់នៅលើទីផ្សារ ច្បាស់ជាផលិតផលមានសក្តានុពល ឬមានការគាំទ្រ។ មកដល់បច្ចុប្បន្ន គណៈកម្មាធិការជាតិ ជំរុញចលនាភូមិ១ ផលិតផល១ បានប្រមូលផ្តុំផលិតផលបានប្រមាណ ៦៨០ មុខទំនិញ ហើយក្នុងនោះការចូលជាសមាជិក នឹងបានកើនឡើងជាបន្តបន្ទាប់ ហើយរំពឹងថា នៅពេលខាងមុខ គណៈកម្មាធិការជាតិជំរុញចលនាភូមិមួយផលិតផលមួយ និងមានសមាជិក រាប់ពាន់ក្រុមហ៊ុន/សហគ្រាស ហើយមានផលិតផលកាន់តែច្រើនថែមទៀត សម្រាប់ការលក់នៅលើទីផ្សារ៕អត្ថបទ៖ សុន រ៉ាឌី

ចិនគ្រោងវិនិយោគប្រាក់១,៤៤ពាន់លានដុល្លារសម្រាប់ការផលិតរថយន្តអគ្គិសនីនៅក្នុងប្រទេសថៃ

ចិន៖ ក្រុមហ៊ុនផលិតរថយន្តអគ្គិសនីរបស់ចិនកំពុងហូរចូលទៅក្នុងប្រទេសថៃ ដោយសន្យាវិនិយោគក្នុងទំហំទឹកប្រាក់១,៤៤ពាន់លានដុល្លារអាមេរិក ក្នុងការសាងសង់រោងចក្រផលិតរថយន្តនៅក្នុងទីផ្សារផលិតរថយន្តធំបំផុតរបស់ប្រទេសនៅអាស៊ីអាគ្នេយ៍មួយនេះ ដែលធ្លាប់បានវាយលុកទីផ្សារយ៉ាងខ្លាំងដោយក្រុមហ៊ុននានារបស់ជប៉ុន។ រលកនៃការវិនិយោគថ្មីនេះត្រូវបានគាំទ្រដោយរដ្ឋាភិបាលរបស់ប្រទេសថៃ ដែលបានដាក់ចេញនូវការលើកទឹកចិត្ត និងផ្តល់ការប្រឹក្សាដល់ក្រុមហ៊ុនចិន ដោយមានគោលដៅផ្លាស់ប្តូរប្រហែល ៣០% នៃផលិតកម្មរថយន្តប្រចាំឆ្នាំរបស់ប្រទេសនេះទៅជារថយន្ត អគ្គិសនី ឬEV នៅឆ្នាំ ២០៣០។ ក្រុមហ៊ុន Great Wall Motor របស់ប្រទេសចិន បានវាយលុកដំបូងលើទីផ្សារប្រទេសថៃកាលពីឆ្នាំ២០២០ នៅពេលខ្លួនបានទិញរោងចក្រពីក្រុមហ៊ុន General Motors ដែលនឹងចំណាយប្រាក់ ចំនួន២២,៦ ពាន់លានបាត ស្មើរនឹង ៦៤៧,៣៨ លានដុល្លារ ដោយក្លាយទៅជាមជ្ឈមណ្ឌលផលិតកម្មក្នុងតំបន់សម្រាប់រថយន្ត EV និងរថយន្តកូនកាត់ឬ hybrid។ ក្រុមហ៊ុនផលិតរថយន្តនេះនឹងចាប់ផ្តើមផលិតរថយន្ត Ora Good Cat EV ដ៏ពេញនិយមរបស់ខ្លួននៅក្នុងប្រទេសថៃនៅឆ្នាំក្រោយ ហើយក៏កំពុងនាំយកក្រុមហ៊ុនបុត្រសម្ព័ន្ធរបស់ខ្លួនផងដែរគឺ MIND Electronics, HYCET និង Nobo Auto ដែលផលិតគ្រឿងអេឡិចត្រូនិច ប្រព័ន្ធបញ្ជូនថាមពល និងកន្លែងអង្គុយ។ គូប្រជែងរបស់ចិន SAIC Motor ដែលជាម្ចាស់ក្រុមហ៊ុន MG Motor និងមានភាពជាដៃគូជាមួយក្រុមហ៊ុនថៃ Charoen Pokphand Group បានបើកដំណើរការរថយន្ត EV ដំបូងរបស់ខ្លួននៅក្នុងប្រទេសនេះកាលពីឆ្នាំ ២០១៩ ។ ក្រុមហ៊ុនបាននិយាយកាលពីខែមេសាថា ខ្លួនកំពុងវិនិយោគ ៥០០ លានបាត ដើម្បីពង្រីករោងចក្រដែលមានស្រាប់របស់ខ្លួនសម្រាប់គ្រឿងបន្លាស់របស់រថយន្ត EV និងការផលិតអាគុយ៕

កម្មករកាត់ដេរសង្ឃឹមប្រាក់ឈ្នួលអប្បបរមាកើនឡើងថែមទៀត នៅឆ្នាំ២០២៤ខាងមុខ

ភ្នំពេញ៖ កម្មករកម្មការិនី សង្ឃឹមថា ប្រាក់ឈ្នួលអប្បបរមានឹងអាចនឹងដំឡើងទៅមុខទៀត ដោយសារការដឹកនាំដ៏ល្អរបស់ប្រមុខរាជរដ្ឋាភិបាលសព្វថ្ងៃនេះ ដែលលោកតែងតែគិតគូរជាប់ជានិច្ច។នៅក្នុងកិច្ចសម្ភាសន៍ជាមួយទូរទស្សន៍ព័ត៌មាន ប៊ីធីវី នៅព្រឹកថ្ងៃតី៧ កក្កដា ឆ្នាំ២០២៣នេះ ក្រុមកម្មករនិយោជិតនៅរោងចក្រកាត់ដេរសំលៀកបំពាក់មួយ ស្ថិតនៅសង្កាត់ចោមចៅ ខណ្ឌពោធិ៍សែន រាជធានីភ្នំពេញ បាននិយាយថា ប្រាក់ឈ្នួលអប្បបរមាតែងតែមានការដំឡើងជារៀងរាល់ឆ្នាំ ទោះបីជាជួបវិបត្តិធ្ងន់ធ្ងរដោយសារកូវីដ១៩ យ៉ាងណាក្តី ក្រោមការដឹកនាំរបស់សម្តេចនាយករដ្ឋមន្រ្តីតេជោ ហ៊ុន សែន នៅតែទទួលបានការយកចិត្តទុកដាក់បំផុតពីគ្រប់ភាគីពាក់ព័ន្ធ។ពាក់ព័ន្ធការប្រជុំប្រាក់ឈ្នួលអប្បបរមាក្នុងវិស័យកាត់ដេរនេះ លោក អាត់ ធន់ ប្រធានសហភាពការងារកម្ពុជា (CLC) បានលើកឡើងថា ការងារនេះគ្រប់ភាគីពាក់ព័ន្ធ ត្រូវជជែកគ្នាជារៀងរាល់ឆ្នាំ ទោះបីជាការឡើងដល់កម្រិតណា ច្រើនឬតិច ដាច់ខាតត្រូវតែបន្ត។ ប៉ុន្តែអ្វីដែលលោកចង់ស្នើបន្ថែម គឺការជំរុញឲ្យមានការពង្រីកនូវវិស័យផ្សេងទៀត ព្រោះកន្លងមកក្រសួងការងារ និងបណ្តុះបណ្តាលវិជ្ជាជីវៈក៏បានបញ្ជាក់ដែរថា វិស័យផ្សេងទៀតក៏មានបញ្ហាប្រាក់ឈ្នួលដែរ ដូច្នេះទាមទារត្រូវមានការយកចិត្តទុកដាក់ដូចគ្នា។សូមបញ្ជាក់ ប្រាក់ឈ្នួលអប្បបរមារបស់កម្មករនិយោជិតក្នុងវិស័យវាយនភណ្ឌកាត់ដេរ សំលៀកបំពាក់ ស្បែកជើង និងផលិតផលិតផលធ្វើដំណើរ និងកាបូប បានកើនពីចំនួន ៤០ដុល្លារអាម៉េរិកក្នុងឆ្នាំ១៩៩៧ រហូតដល់ចំនួន ២០០ដុល្លារអាម៉េរិក ក្នុងឆ្នាំ២០២៣នេះ៕ អត្ថបទដោយ ឈិត បូរ៉ាវី

មីក្រូហិរញ្ញវត្ថុផ្តល់កម្ចីឥណទានកើនឡើង ១ ៥០០លានដុល្លារ គិតត្រឹមខែមិថុនាឆ្នាំ២០២៣

ភ្នំពេញ៖ គ្រឹះស្ថានមីក្រូហិរញ្ញវត្ថុនៅកម្ពុជា គិតត្រឹមឆមាសសទី១ ឆ្នាំ២០២៣នេះ បានផ្តល់ប្រាក់កម្ចីឥណទាន មានកំណើនក្នុងរង្វង់ប្រមាណ ១ ៥០០ លានដុល្លារអាមេរិក កើនឡើង ៤ភាគរយ ធៀបនឹងរយៈពេលដូចគ្នាកាលពីឆ្នាំមុន ខណៈប្រាក់បញ្ញើសន្សំបានកើនឡើងក្នុងរង្វង់ ២ ០០០ លានដុល្លារអាមេរិក កើនឡើង ៣.៧ ភាគរយ ។លោក សុខ វឿន ប្រធានប្រធានក្រុមប្រឹក្សាភិបាលសមាគមមីក្រូហិរញ្ញវត្ថុកម្ពុជា លើកឡើង នៅថ្ងៃទី ៦ ខែកក្កដា ឆ្នាំ ២០២៣ នេះថា ជុំវិញដំណើរនៅក្នុងវិស័យមីក្រូហិរញ្ញវត្ថុ ក្នុងពេលបច្ចុប្បន្ន គឺមានសុខភាពល្អប្រសើរប្រកបដោយបរិយាប័ន្ន ដោយបានផ្តល់សេវាហិរញ្ញវត្ថុជាផ្លូវការជូនប្រជាជន និងអាជីវកម្ម ព្រមទាំងបានរួមចំណែកកាត់បន្ថយភាពក្រីក្រ និងរុញកំណើនសេដ្ឋកិច្ចរបស់ប្រទេស។សូមបញ្ជាក់ថា បើយោងតាមរបាយការណ៍ប្រចាំឆមាសទី១ និងទិសដៅឆមាសទី២ ឆ្នាំ២០២២ របស់ធនាគារជាតិនៃកម្ពុជា ចំពោះវិស័យធនាគារ និងមីក្រូហិរញ្ញវត្ថុ បានផ្តល់ឥណទានសរុបចំនួន ៥១,៥ ពាន់លានដុល្លារ ដល់អតិថិជន សរុប ៣,៣ លានគណនី ក្នុងនោះគ្រឹះធនាគារបានផ្តល់កម្ចីចំនួន ៤២,២ ពាន់លានដុល្លារ មាន ១,៤ លានគណនី ខណៈគ្រឹះស្ថានមីក្រូហិរញ្ញវត្ថុ បានផ្តល់កម្ចី ៨,៨ ពាន់លានដុល្លារ ដោយមានអតិថិជន ១,៩ លានគណនី៕អត្ថបទ៖ សុន រ៉ាឌី

ធនាគារជាតិនៃកម្ពុជា រំពឹងថា សេដ្ឋកិច្ចកម្ពុជាឆ្នាំ២០២៣ មានកំណើន ៥,៥ ភាគរយ

ភ្នំពេញ៖ ធនាគារជាតិនៃកម្ពុជា ព្យាករសេដ្ឋកិច្ចកម្ពុជាក្នុងឆ្នាំ ២០២៣ នេះ នឹងមានកំណើន ៥,៥ ភាគរយ ជាមួយនឹងកម្រិតអតិផរណាទាបប្រមាណ ២ ភាគរយ ។លោកជំទាវបណ្ឌិត ជា សិរី ទេសាភិបាលរងធនាគារជាតិនៃកម្ពុជា លើកឡើងក្នុងសិក្ខាសាលា ស្តីពីការផ្សព្វផ្សាយរបាយការណ៍ហិរញ្ញវត្ថុ ស្ថានភាព ស្ថិរភាពហិរញ្ញវត្ថុឆ្នាំ ២០២២ នៅថ្ងៃទី ៦ ខែ កក្តដា ឆ្នាំ២០២៣នេះថា ហានិភ័យសក្តានុពលចម្បងៗមានប្រភពពីកត្តាខាងក្រៅ ដោយសារការបើកចំហរសេដ្ឋកិច្ច ក៏ដូចជាការពឹងផ្អែកខ្លាំងរបស់សេដ្ឋកិច្ចកម្ពុជាលើវិស័យខាងក្រៅ សម្រាប់កំណើនសេដ្ឋកិច្ចកម្ពុជា។ដោយហានិភ័យមួយមានដូចជា៖ ការអូសបន្លាយនៃភាពតានតឹងរវាងរុស្ស៊ី និងអ៊ុយក្រែន និងការរឹតបន្តឹងនៃស្ថានភាពហិរញ្ញវត្ថុអន្តរជាតិ ដែលប៉ះពាល់ដល់ការរំពឹងទុកនៃការនាំចេញ និងការវិនិយោគចូលមកកម្ពុជា។ ក្រៅបញ្ហាខាងលើ គឺមានការអូសបន្លាយក្នុងទីផ្សារអចលនទ្រព្យរបស់ប្រទេសចិន ដែលអាចបង្អាក់កំណើនវិនិយោគក្នុងវិស័យអចលនទ្រព្យនៅកម្ពុជា និងការកើនឡើងអត្រាការប្រាក់ឥណទាន ដែលបណ្តាលមកពីការកើនឡើងអត្រាការប្រាក់លើទីផ្សារអន្តរជាតិ ដែលនាំឱ្យកំណើនឥណទានថយចុះ ហើយចំណាយលើការខ្ចីខ្ពស់ជាងមុន អាចកាត់បន្ថយការវិនិយោគក្នុងស្រុកផងដែរ។ទន្ទឹមនឹងហានិភ័យខាងក្រៅ, ហានិភ័យសក្តានុពលខាងក្នុង ក៏ត្រូវយកចិត្តទុកដាក់ និងតាមដានផងដែរ ដែលក្នុងនោះអាចកើតមានឡើងពីវិស័យអចលនទ្រព្យ។ ជាក់ស្តែងក្នុងរយៈពេលប្រមាណ ១ ទសវត្សរ៍មុនពេលវិបត្តិកូវីដ-១៩ វិស័យអចលនទ្រព្យនៅកម្ពុជា មានការរីកចម្រើនយ៉ាងឆាប់រហ័ស។ ប៉ុន្តែការធ្លាក់ចុះសេដ្ឋកិច្ចពិភពលោក និងក្នុងស្រុក ដោយសារវិបត្តិកូវីដ និងការងើបឡើងក្នុងស្ថានភាពមិនប្រាកដប្រជា បានធ្វើឱ្យតម្រូវការក្នុងវិស័យនេះធ្លាក់ចុះជាលំដាប់។ ស្ថានភាពនេះទាមទារឱ្យមានការតាមដានយ៉ាងប្រុងប្រយ័ត្ន ជាពិសេសលើការផ្តល់ឥណទានទៅកាន់វិស័យអចលនទ្រព្យ ព្រមទាំងពង្រឹងកិច្ចសហការយ៉ាងជិតស្និតរវាងអាជ្ញាធរពាក់ព័ន្ធ ដើម្បីគ្រប់គ្រងហានិភ័យដែលអាចកើតមានឡើង និងឥទ្ធិពលរាលដាលទៅកាន់វិស័យទៀត៕ អត្ថបទ៖ សុន រ៉ាឌី

កម្ពុជានាំចេញអង្ករបាន ៣៣ម៉ឺនតោន ទទួលចំណូល ២២៩លានដុល្លារ នៅឆមាសទី១ ឆ្នាំ២០២៣

ភ្នំពេញ៖ នៅក្នុងឆមាសទី១ នៃឆ្នាំ២០២៣ ប្រទេសកម្ពុជាបានសម្រេចការនាំចេញអង្ករបានចំនួន ៣៣ម៉ឺនតោន ដែលគិតជាទឹកប្រាក់មានចំនួន ២២៩.២៣លានដុល្លារសហរដ្ឋអាមេរិក។ នេះបើតាមសេចក្ដីប្រកាសព័ត៌មាន របស់សហព័ន្ធស្រូវអង្ករកម្ពុជា ដែលBTV ទទួលបាននៅថ្ងៃទី០៧ខែកក្កដា ឆ្នាំ២០២៣។សហព័ន្ធស្រូវអង្ករកម្ពុជាបានបញ្ជាក់ថា ក្នុងរយៈពេល ៦ខែ នៃឆ្នាំ២០២៣ ប្រទេសកម្ពុជាបានសម្រេចការនាំចេញអង្ករបានចំនួន ៣២៩,៦៣៣តោន ទៅកាន់គោលដៅចំនួន ៥២លើពិភពលោក ដោយក្រុមហ៊ុននាំចេញចំនួន ៥០ ដែលក្នុងនោះទៅកាន់ប្រទេសចិន និងតំបន់រដ្ឋបាលស្វយ័តចំនួន ១៣៨,៣៦៤ តោន គិតជាទឹកប្រាក់មានចំនួន៨៨.៩៦លានដុល្លាសហរដ្ឋអាមេរិក ទៅកាន់ប្រទេសនៅក្នុងទ្វីបអឺរ៉ុបចំនួន ២៥ បានចំនួន ១២២,១១៧ តោន គិតជាទឹកប្រាក់មានចំនួន ៨៦.៦៧លានដុល្លាសហរដ្ខអាមេរិក ទៅកាន់ប្រទេសសមាជិកអាស៊ានចំនួន ៤បរិមាណចំនួន ២៨,១១០ តោន គិតជាទឹកប្រាក់មានចំនួន ១៨.៨៧លានដុល្លាសហរដ្ឋអាមេរិក និងទៅកាន់គោលដៅផ្សេងៗ នៅអាហ្វ្រិក មជ្ឈឹមបូព៌ា -ល-និងចំនួន២១ គោលដៅបានបរិមាណចំនួន ៤១,០៤២ តោន គិតជាទឹកប្រាក់មានចំនួន៣៤.៧៣លានដុល្លាសហរដ្ឋអាមេរិក ។សូមបញ្ជាក់ថា ក្នុងឆមាសទី០១នេះ ទីផ្សារក្នុងប្រទេសអាស៊ានមានតម្រូវការកាន់តែច្រើនឡើងរួមមាន ហ្វីលីពីន និង ព្រុយណេ។ ក្នុងនោះដែរអង្ករក្រអូបគ្រប់ប្រភេទចំនួន ៨៥.០៨% អង្ករសគ្រាប់វែង ១១.៣៤% អង្ករសគ្រាប់ខ្លីចំនួន ០.១៤% អង្ករចំហ៊ុយ ២.៤២% អង្ករសរីរាង្គចំនួន ១.០២%។ចំណែកការនាំចេញស្រូវទៅកាន់ប្រទេសជិតខាង ចំនួន ២ ២២៤ ៩១៣ តោន គិតជាទឹកប្រាក់សរុបនៃការនាំចេញស្រូវចំនួន ៥៧៨.៦៧ លានដុល្លារសហរដ្ឋអាមេរិក ដែលក្នុងនោះចំនួន ៥៥% ឆ្លងកាត់ការស្នើសុំការបញ្ជាក់ឯកសារនាំចេញពីអាជ្ញាធរមានសមត្ថកិច្ច៕

គម្រោងរោងចក្រកាន់តែប្រសើរនៅកម្ពុជា ជំរុញការនាំចេញផលិតផល សំលៀកបំពាក់ ស្បែកជើង ទៅទីផ្សារអាមេរិក

ភ្នំពេញ៖ ឯកអគ្គរដ្ឋទូតសហរដ្ឋអាម៉េរិកប្រចាំកម្ពុជា លោក ផាទ្រីក មូរហ៊្វី (W.Patrick Murphy) លើកឡើងថា គម្រោងរោងចក្រកាន់តែប្រសើរនៅកម្ពុជា (Better Factories Cambodia) ដែលជំរុញឱ្យការបញ្ជាទិញពីទីផ្សារសហរដ្ឋអាមេរិកកាន់តែមានកំណើន កំណើននេះគឺកើនទាំងបរិមាណផលិតផលវាយនភណ្ឌ សំលៀកបំពាក់ ស្បែកជើង និងបន្ថែមនូវការនាំចេញផលិតផលកាបូប និងសម្ភារធ្វើដំណើរទៀតផង។ឯកអគ្គរដ្ឋទូតសហរដ្ឋអាម៉េរិកប្រចាំកម្ពុជា លោក ផាទ្រីក លើកឡើងបែបនេះ ក្នុងជំនួបជាមួយនឹង ឯកឧត្តម អ៊ិត សំហេង រដ្ឋមន្រ្តីក្រសួងការងារ និងបណ្តុះបណ្តាលវិជ្ជាជីវៈ កាលពីថ្ងៃទី៥ ខែកក្កដា ឆ្នាំ២០២៣។កម្ពុជាបានខិតខំទាញបានផលប្រយោជន៍ពីពាណិជ្ជកម្មកម្ពុជា-អាមេរិក បានចំណាត់ថ្នាក់ជាប្រទេសទី៤ ដែលនាំចេញទៅទីផ្សារអាមេរិក និងជាប្រទេសចំណាត់ថ្នាក់ទី៣ ដែលទទួលអត្ថប្រយោជន៍ប្រព័ន្ធអនុគ្រោះពាណិជ្ជកម្ម (GSP) ពីសហរដ្ឋអាមេរិក។ក្នុងជំនួបនោះផងដែរ ភាគីទាំងពីរបានពិភាក្សាលើការពង្រឹងកិច្ចសហប្រតិបត្តិការសំដៅពង្រឹងពង្រីកទំនាក់ទំនងកម្ពុជា-អាមេរិកឱ្យកាន់តែមានលក្ខណៈគ្រប់ជ្រុងជ្រោយ ដើម្បីបង្កើនវិនិយោគទុនរបស់ខ្លួននៅកម្ពុជាក្នុងវិស័យជាច្រើនទៀត។ទន្ទឹមនឹងនេះ ភាគីទាំងពីរបានពិភាក្សាលើអនុសាសន៍មួយចំនួន ដូចជាករណីពលកម្មកុមារ អំពើជួញដូរមនុស្ស ការធ្វើអធិការកិច្ចទីភ្នាក់ងារបញ្ជូនពលករ ដើម្បីធានាសិទ្ធិ និងផលប្រយោជន៍ស្របច្បាប់របស់ពលករ ការធានានិរន្តរភាពនៃក្រុមប្រឹក្សាអាជ្ញាកណ្តាល និងការបន្តធ្វើឱ្យប្រសើរឡើងនូវសិទ្ធិសេរីភាពអង្គការវិជ្ជាជីវៈ និងបន្តអនុលោមភាពស្របតាមបទដ្ឋានការងារអន្តរជាតិដែលប្រទេសកម្ពុជាបានផ្តល់សច្ចាប័ន។តាមរបាយការណ៍ ពីការិយាល័យស្ថិតិសហរដ្ឋអាមេរិក កម្ពុជាបាននាំចេញទំនិញមានទឹកប្រាក់ប្រមាណ ១២,២ពាន់លានដុល្លារ ទៅកាន់ទីផ្សារសហរដ្ឋអាមេរិក ក្នុងឆ្នាំ២០២២ កើនឡើង ប្រមាណ ៤០ភាគរយ ធៀបនឹងឆ្នាំ២០២១។ទំនិញសំខាន់ៗដែលប្រទេសកម្ពុជា នាំចេញទៅសហរដ្ឋអាមេរិក មានដូចជា ផលិតផលសំលៀកបំពាក់ ស្បែកជើង ផលិតផលធ្វើដំណើរ នៅក្រោមប្រព័ន្ធអនុគ្រោះពន្ធ MFN និង GSP៕អត្ថបទ ឈិត បូរ៉ាវី

កម្ចីឥណទានប្រើប្រាស់ចំគោលដៅ នឹងជួយបង្កើនចំណូលដល់ជីវភាពក្នុងគ្រួសារប្រសើរឡើង

ភ្នំពេញ៖ មន្រ្តីជាន់ខ្ពស់ធនាគារជាតិនៃកម្ពុជា លើកឡើងថា ការខ្ចីប្រាក់ពីបណ្ដាគ្រឹះស្ថានធនាគារ និងមីក្រូហិរញ្ញវត្ថុ ដែលមានច្បាប់ត្រឹមត្រូវមិនមែនជារឿងអាក្រក់នោះទេ ក្នុងនោះប្រសិន បើកម្ចីទៅប្រើប្រាស់ចំគោលដៅ មិនត្រឹមតែមានលទ្ធភាពក្នុងការសងត្រឡប់នោះទេ ថែមទាំងជួយបង្កើនចំណូលដែលអាចជួយដល់ជីវភាពក្រុមគ្រួសារបានល្អប្រសើរផងដែរ។លោកជំទាវបណ្ឌិត ជា សិរី ទេសាភិបាលរងធនាគារជាតិនៃកម្ពុជា លើកឡើងក្នុងកម្មវិធីជំនួបជាមួយអ្នកសារព័ត៌មាន ក្រោមប្រធានបទ៖ ការត្រួតពិនិត្យស្ថិរភាពប្រព័ន្ធហិរញ្ញវត្ថុ នៅថ្ងៃទី ៥ ខែកក្កដា ឆ្នាំ២០២៣ សាលាបច្ចេកទេសធនាគារ (CBS) ថ្ងៃទី៥ ខែកក្កដា ឆ្នាំ ២០២៣ នេះថា ជុំវិញការខ្ចីប្រាក់របស់ប្រជាពលរដ្ឋនៅតាមគ្រឹះស្ថានធនាគារ ក៏ដូចគ្រឹះស្ថានមីក្រូហិរញ្ញវត្ថុ ធនា គារជាតិនៃកម្ពុជា តែងតែបញ្ជ្រាបចំណេះដឹងដល់ប្រជាពលរដ្ឋក្នុងការប្រើប្រាស់កម្ចីចំគោលដៅ ពីការកម្ចីពីធនាគារ និងគ្រឹះស្ថានមីក្រូហិរញ្ញវត្ថុបានត្រឹមត្រូវ ដោយមានការថ្លឹងថ្លែងឲ្យបានច្បាស់លាស់ ដើម្បីយកប្រាក់ទាំងនោះប្រើប្រាស់ឲ្យមានតម្លាភាព ពោលគឺការប្រាក់ទៅអាចរកចំណូល និងមានលទ្ធភាពសង់ត្រឡប់។ លោកជំទាវបណ្ឌិត បន្តថា ទាក់ទងបញ្ហានេះ ធនាគារជាតិនៃកម្ពុជា បានចែករំលែកចំណេះដឹងអំពីផ្នែកហិរញ្ញវត្ថុបន្ថែមទៀតដល់ក្រុមអ្នកសារព័ត៌មាន ក្នុងគោលបំណងដើម្បីផ្សាយបន្តប្រាប់ដល់ពលរដ្ឋ អំពីការដាក់ប្រាក់សន្សំតាមធនាគារ និងហិរញ្ញវត្ថុ ដែលផ្ដល់ទាំងសុវត្ថិភាព និងការប្រាក់ ពោលគឺចៀសជាងការខ្ចីលុយមានការប្រាក់ខ្ពស់ពេក និងគ្មានច្បាប់ត្រឹមត្រូវ ដែលអាចបង្កជាហានិភ័យ។ លោកជំទាវបណ្ឌិត ជា សិរី បានបន្ថែមថា ជុំវិញការខ្ចីនេះ ធនាគារជាតិនៃកម្ពុជា តែងតែលើកទឹកចិត្តប្រជាពលរដ្ឋឲ្យសន្សំលុយ តាមរយៈគ្រឹះស្ថានមីក្រូហិរញ្ញវត្ថុ និងធនាគារផ្លូវការ ដោយមានការចុះកិច្ចសន្យាត្រឹមត្រូវ ក្នុងនោះចំពោះការសន្សំលុយនៅធនាគារពាណិជ្ជ នឹងទទួលបានការប្រាក់ទៀតផង។ សម្រាប់បញ្ហានេះ ប្រសិនបើកម្ចីទៅលើការរកស៊ី ដើម្បីបានចំណូល បង្កើនចំណូល ហើយមានលទ្ធភាពសងត្រឡប់ទៅកាន់ម្ចាស់បំណុល នោះការជំពាក់ ឬខ្ចីលុយគេជារឿងល្អ ក៏ប៉ុន្ដែប្រសិនបើការខ្ចីលុយយកទៅប្រើប្រាស់ខុសគោលដៅដូចជា ឡើងស៊េរីទូរស័ព្ទ, ទិញម៉ូតូ ឬឡានថ្មី ទាំងនេះជាហានិភ័យ បង្កគ្រោះថ្នាក់ឈានដល់ការជាប់បំណុលវ័ណ្ឌក៕អត្ថបទ៖ សុន រ៉ាឌី

សេដ្ឋកិច្ចកម្ពុជា រំពឹងសម្រេចបានអត្រាកំណើនក្នុងរង្វង់ ៦,៦% នៅឆ្នាំក្រោយ

ភ្នំពេញ៖ សេដ្ឋកិច្ចកម្ពុជាសម្រាប់ឆ្នាំ ២០២៤ ត្រូវបានព្យាករថា នឹងសម្រេចបានអត្រាកំណើនក្នុងរង្វង់ ៦,៦% ដោយសារការរំពឹងទុកការត្រឡប់ទៅរកភាពល្អប្រសើរឡើងវិញនៃតម្រូវការខាងក្រៅ និងការងើបឡើងវិញនៃទំនុកចិត្តវិនិយោគ និងពាណិជ្ជកម្ម ស្របពេលដែលសកម្មភាពធុរកិច្ចក្នុងស្រុក នៅបន្តរក្សាបាននូវនិន្នាការកំណើនល្អជាវិជ្ជមាន ។ក្រសួងសេដ្ឋកិច្ច និងហិរញ្ញវត្ថុ បានបង្ហាញក្របខណ្ឌគោលនយោបាយហិរញ្ញវត្ថុ និងគោលនយោបាយហិរញ្ញវត្ថុសាធារណៈ សម្រាប់ការរៀបចំសេចក្តីព្រាងច្បាប់ ស្តីពីហិរញ្ញវត្ថុសម្រាប់ការគ្រប់គ្រងឆ្នាំ ២០២៤, ជុំវិញវិស័យសេដ្ឋកិច្ច ក្នុងឆ្នាំ ២០២៣ នេះ សេដ្ឋកិច្ចកម្ពុជាត្រូវបានប៉ាន់ស្មានឡើងវិញថា នឹងសម្រេចបានកំណើនក្នុងអត្រា ៥,៦%, ដោយអនុវិស័យគាំទ្រកំណើនមានការប្រែប្រួល បើធៀបនឹងការរំពឹងទុកកាលពីដើមឆ្នាំ ។ ចំណែកសេដ្ឋកិច្ចកម្ពុជាឆ្នាំ២០២៤ វិញ ត្រូវបានព្យាករថា នឹងសម្រេចបានអត្រាកំណើនក្នុងរង្វង់ ៦,៦% ស្របពេលការអនុវត្តក្របខណ្ឌយុទ្ធសាស្ត្រ និងកម្មវិធីស្តារ និងជំរុញកំណើនសេដ្ឋកិច្ចកម្ពុជា ក្នុងការរស់នៅជាមួយកូវីដ១៩ តាមគន្លងប្រក្រតីភាពថ្មី សម្រាប់ឆ្នាំ ២០២១-២០២៣ ។ទន្ទឹមនេះ, ការបន្តអនុវត្តគោលនយោបាយអភិវឌ្ឍន៍វិស័យកសិកម្មឆ្នាំ ២០២១-២០៣០ និងការដាក់ពង្រាយអ្នកជំនាញកសិកម្ម នៅគ្រប់ឃុំទូទាំងប្រទេស ដើម្បីជួយប្រជាកសិករ នឹងជួយជំរុញកំណើន ជារួម តាមរយៈការធ្វើទំនើបកម្មកសិកម្មកម្ពុជាឱ្យកាន់តែមានភាពប្រកួតប្រជែង, បរិយាបន្ន និងភាពធន់ទៅនឹងការប្រែប្រួលអាកាសធាតុ ។ចំណែកវិស័យឧស្សាហកម្ម ក្នុងឆ្នាំ ២០២៣ នេះ រាជរដ្ឋាភិបាលរំពឹងថា នឹងសម្រេចបានកំណើន ៥,០% ដោយសារការថមថយកំណើនអនុវិស័យកាត់ដេរ និងការបន្តកំណើនទាបនៃអនុវិស័យសំណង់ ខណៈដែលអនុវិស័យកម្មន្តសាលមិនមែនកាត់ដេរនៅបន្តរក្សាបានកំណើនល្អប្រសើរ ។ សម្រាប់ឆ្នាំ ២០២៤ វិញ, វិស័យឧស្សាហកម្មនេះ ត្រូវបានព្យាករថា សម្រេចបានកំណើនក្នុងអត្រា ៨,៥% ទ្រទ្រង់ដោយកំណើនល្អប្រសើរនៃអនុវិស័យកាត់ដេរ និងកម្មន្តសាលមិនមែនកាត់ដេរ ខណៈដែលអនុវិស័យសំណង់បន្តសម្រេចបានកំណើនទាបជាងនិន្នាការមុនវិបត្តិជំងឺកូវីដ-១៩ ។ដោយឡែកវិស័យសេវាកម្មវិញ ត្រូវបានព្យាករថា នឹងបន្តនិន្នាការកើនឡើង ក្នុងអត្រា ៨,១% ក្នុងឆ្នាំ ២០២៣ និង ៦,៩% ក្នុងឆ្នាំ ២០២៤ ដោយការបន្តកើនឡើងនូវសកម្មភាពក្នុងអនុវិស័យសណ្ឋាគារ និងភោជនីយដ្ឋាន និងសេវាកម្មគាំទ្រផ្សេងទៀតដូចជា អនុវិស័យលក់ដុំ-រាយ និងអនុវិស័យដឹកជញ្ចូន និងគមនាគមន៍ ខណៈដែលអនុវិស័យអចលនទ្រព្យរំពឹងថា នៅបន្តសម្រេចបានកំណើនទាបជាងនិន្នាការធម្មតា៕អត្ថបទ៖ សុន រ៉ាឌី

ដំណើរសេដ្ឋកិច្ចនៅកម្ពុជាមានសភាពជាប្រក្រតី នៅអំឡុងយុទ្ធនាការឃោសនាបោះឆ្នោត

ភ្នំពេញ៖ ធនាគារជាតិនៃកម្ពុជា លើកឡើងថា លំហូររូបិយវត្ថុ ការវិនិយោគ ក៏ដូចជាធ្វើពាណិជ្ជកម្ម មានដំណើរការធម្មតា អំឡុងពេលយុទ្ធនាការឃោសនាបោះឆ្នោត ដែលប្រការទាំងនេះបង្ហាញឲ្យឃើញនូវមោទនភាព អំពីស្ថិរភាពនយោបាយ និងសុខសន្តិភាពពេញលេញនៃប្រទេសកម្ពុជាទាំងមូល។លោកជំទាវ ជា សិរី ទេសាភិបាលរងនៃធនាគារជាតិនៃកម្ពុជា បានលើកឡើង នៅថ្ងៃទី ៤ ខែកក្កដា ឆ្នាំ២០២៣នេះថា ប្រសិនមានព្រឹត្តិការណ៍អ្វីកើតឡើង ទោះបីមិនមានការប៉ះពាល់ដល់រូបិយវត្ថុក៏ដោយ អ្នកវិនិយោគ ជាពិសេសប្រជាពលរដ្ឋដែលដាក់ប្រាក់បញ្ញើរ តែងតែមានសភាពជ្រួលជ្រាល ដើម្បីដកប្រាក់យកទៅទុកផ្ទាល់ខ្លួន។ បើតាមការសង្កេតមើលឃើញជាក់ស្តែង ជាពិសេសនៅពេលមានការបោះឆ្នោតនៅអណត្តិមុនៗ បញ្ហានេះតែងតែកើតឡើង ប៉ុន្តែនៅក្នុងប៉ុន្មានអាណត្តិចុងក្រោយនេះ គឺកិច្ចដំណើរសេដ្ឋកិច្ចនៅកម្ពុជាមានសភាពជាប្រក្រតី ក្នុងនោះលំហូរសាច់នៅក្នុងសេដ្ឋកិច្ច មានចរន្តជាធម្មតាផងដែរ។លោកជំទាវ ថ្លែងបន្តថា ជាក់ស្តែងនៅក្នុងអាណត្តិនេះជាដើម បរិយាប័ន្នរូបិយវត្ថុ ការវិនិយោគ និងការធ្វើពាណិជ្ជកម្មផ្សេងៗ មានលំហូរសាច់ប្រាក់ចេញ-ចូលជាធម្មតា ដែលប្រការទាំងនេះបានបង្ហាញឲ្យឃើញនូវមោទនភាព សុខសុវត្ថិភាព ស្ថិរភាពនយោបាយរបស់កម្ពុជា ដែលបញ្ហាទាំងនេះ បានផ្តល់នូវបរិយាកាសវិនិយោគ ការរកស៊ីទទួលទានផ្សេងៗបានដំណើរការទៅដោយរលូន ពោលគឺមិនមានប៉ះពាល់ដល់លំហូររូបិយវត្ថុ ឬចរន្តនៃសេដ្ឋកិច្ចនោះឡើយ។ទាក់ទិនបញ្ហានេះដែរ,លោកបណ្ឌិត ហុង វណ្ណៈ ជំនាញសេដ្ឋកិច្ច នៃវិទ្យាស្ថានទំនាក់ទំនងអន្តរជាតិនៃរាជបណ្ឌិតសភាកម្ពុជា មើលឃើញថា ជុំវិញព្រឹត្តិការណ៍ចេញឃោសនារកសំឡេងឆ្នោត របស់បក្សនយោបាយក្នុងអណត្តិនេះនៅកម្ពុជា ក្នុងនោះពាក់ព័ន្ធស្ថានភាពសេដ្ឋកិច្ច ពាណិជ្ជកម្ម ការវិនិយោគ ទេសចរណ៍ និងការនាំចេញ-ចូលជាដើម មានសភាពប្រក្រតីជាធម្មតា, ពោលគឺជុំវិញការធ្វើពាណិជ្ជកម្ម វិនិយោគ ក៏ដូចជាទេសចរណ៍នេះ ពួកគេសម្លឹងមើលអំពីស្ថានភាពយោបាយ និងការអភិវឌ្ឍនៅកម្ពុជារួចជាស្រាច់ ទើបពួកគេហ៊ានចេញ-ចូល ជាក់ស្តែងដូចនៅក្នុងពេលនេះជាដើម វិនិយោគិនបានបន្តវិនិយោគបណ្តាក់ទុនរកស៊ីទទួលទានជាធម្មតា៕អត្ថបទ៖ សុន រ៉ាឌី

បណ្ដាញសង្គម

ព័ត៌មានថ្មីៗ

មេបញ្ជាការ តំបន់ប្រតិបត្តិការសឹករងកំពង់ឆ្នាំង នាំយកអំណោយរបស់ សម្តេចធិបតី និងលោកជំទាវ ឧបត្ថម្ភដល់គ្រួសារប្រជាពលរដ្ឋ ដែលរងគ្រោះដោយភ្លើងឆេះផ្ទះ

យោធាអាមេរិកបង្កើតតំបន់យោធាថ្មី តាមបណ្តោយព្រំដែន ជាមួយប្រទេសម៉ិកស៊ិក

មនុស្ស ៦នាក់ បានស្លាប់ និងរាប់សិបនាក់ រងរបួស ក្នុងការរត់ជាន់គ្នា ក្នុងប្រាសាទមួយ នៅប្រទេសឥណ្ឌា

ខ្មាន់កាំភ្លើង បានសម្លាប់មនុស្ស បីនាក់ នៅភាគខាងត្បូងដែលញាំញីដោយជម្លោះនៃប្រទេសថៃ

ជនជាតិវ៉េណេហ្ស៊ុយអេឡា ១៧៤នាក់ផ្សេងទៀត ដែលត្រូវបាននិរទេសចេញពីអាមេរិក បានមកដល់ទីក្រុងការ៉ាកាស

សម្ព័ន្ធអារ៉ាប់ និងអ៊ីរ៉ាក់ ថ្កោលទោសការវាយប្រហាររបស់អ៊ីស្រាអែល នៅជិតវិមានប្រធានាធិបតីស៊ីរី

អ៊ីរ៉ង់និយាយថា ខ្លួននឹងមិនអត់ឱនចំពោះវិធីសាស្ត្រផ្អែកលើការគំរាមកំហែងនិងសម្ពាធរបស់អាមេរិកទេ

លីបង់ ព្រមានក្រុមហាម៉ាស ប្រឆាំងនឹងការបំផ្លាញអធិបតេយ្យភាព និងសន្តិសុខជាតិ

អ៊ីស្រាអែល បានបើកការវាយប្រហារតាមអាកាសលើដ្ឋធានី ខេត្តភាគកណ្តាលនិងភាគខាងលិចរបស់ស៊ីរី

សន្និសីទប្រចាំឆ្នាំលើកទី២ សមាគមគ្រូពេទ្យវះកាត់ជំងឺរោគស្ត្រីអង់ដូស្កុបពីកម្ពុជា

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877