BTV NEWS

ឃាត់ខ្លួនជនពាក់ព័ន្ធ Online Scams ជាង ៦៥០នាក់ នៅបាវិត ភាគច្រើនជាជនបរទេស

ជនជាតិវៀតណាមសរុប ៣៤នាក់ ត្រូវបានបណ្តេញចេញពីកម្ពុជា តាមប៉ុស្តិ៍នគរបាលច្រកទ្វារព្រំដែនអន្តរជាតិបាវិត ខេត្តស្វាយរៀង

កាស៊ីណូ ស៊ីលវើរ ស្តារនៅក្រុងបាវិតត្រូវបានព្យួរអាជ្ញាប័ណ្ណបន្ទាប់ពី រកឃើញមានជាប់ពាក់ព័ន្ធនឹងការឆបោកតាមប្រព័ន្ធបច្ចេកវិទ្យា

ឃាត់ខ្លួនជនបរទេសជាង១០០នាក់ ពាក់ព័ន្ធការឆបោកតាមប្រព័ន្ធបច្ចេកវិទ្យា ក្នុងអគារខនដូរ១កន្លែង នៅសង្កាត់បឹងសាឡាង ខណ្ឌទួលគោក

សន្តិសុខ និង សង្គម

ជនអន្តោប្រវេសន៍៤៨០នាក់ ត្រូវបានជួយសង្គ្រោះនៅឆ្នេរសមុទ្រប្រទេសលីប៊ី កាលពីសប្តាហ៍មុន

អង្គការទេសន្តប្រវេសន៍អន្តរជាតិ (IOM) កាលពីថ្ងៃចន្ទ បាននិយាយថា ជនអន្តោប្រវេសន៍ចំនួន ៤៨០នាក់ ត្រូវបានជួយសង្គ្រោះនៅឆ្នេរសមុទ្រប្រទេសលីប៊ី កាលពីសប្តាហ៍កន្លងទៅនេះ។អង្គការ IOM បាននិយាយនៅក្នុងសេចក្តីថ្លែងការណ៍ថា ចាប់ពីថ្ងៃទី ២៤ ដល់ថ្ងៃទី ៣០ ខែមីនា ឆ្នាំ២០២៤ ជនអន្តោប្រវេសន៍ចំនួន ៤៨០នាក់ ត្រូវបានស្ទាក់ចាប់ ហើយបានបញ្ជូនត្រឡប់ទៅកាន់ប្រទេសលីប៊ីវិញ។អង្គការ IOM បាននិយាយថា ជនអន្តោប្រវេសន៍ ដែលត្រូវបានជួយសង្គ្រោះរួមមានស្ត្រី ២៦ នាក់ និងកុមារ ៥ នាក់ ហើយសាកសពជនអន្តោប្រវេសន៍ពីរនាក់ត្រូវបានស្រង់យកមកវិញ។ជនអន្តោប្រវេសន៍សរុបចំនួន ៣.៧៩១នាក់ ត្រូវបានជួយសង្គ្រោះ ខណៈ១២០នាក់ បានស្លាប់ និង ២៥៣នាក់ផ្សេងទៀត បានបាត់ខ្លួននៅឆ្នេរសមុទ្រលីប៊ី។ជនអន្តោប្រវេសន៍គ្មានឯកសារជាច្រើននាក់ ដែលភាគច្រើនមកពីទ្វីបអាហ្រ្វិក បានជ្រើសរើសឆ្លងកាត់សមុទ្រមេឌីទែរ៉ាណេ ទៅកាន់ឆ្នេរសមុទ្រអឺរ៉ុបពីប្រទេសលីប៊ី ដែលទទួលរងភាពចលាចលចាប់តាំងពីឆ្នាំ ២០១១ នៅពេលដែលអតីតមេដឹកនាំចុងក្រោយ លោក មួម៉ាហ្គាដាហ្វី(Muammar Gaddafi) ត្រូវបានផ្ដួលរំលំ។រដ្ឋមន្ត្រីក្រសួងមហាផ្ទៃប្រទេសលីប៊ី លោក Emad al-Tarabelsi កាលពីពេលថ្មីៗនេះបាននិយាយព្រលយពាក្យថា ក្រសួងគ្រោងនឹងធ្វើមាតុភូមិនិវត្តន៍ជនអន្តោប្រវសេន៍ខុសច្បាប់ជាង ២០.០០០ នាក់ក្នុងឆ្នាំនេះ។

ម៉ិកស៊ិក ជម្លៀសប្រជាជនរបស់ខ្លួន៣៤នាក់ ចេញពីប្រទេសហៃទី គេចពីវិបត្តិអំពើហិង្សា

ប្រទេសម៉ិកស៊ិក បានជម្លៀសប្រជាជនរបស់ខ្លួនចំនួន ៣៤ នាក់ ដែលមានបំណងចាកចេញពីប្រទេសហៃទី ខណៈអំពើហឹង្សារបស់ក្រុមជនអន្ធពាល បានរាលដាលនៅក្នុងប្រទេសតំបន់សមុទ្រការ៉ាអ៊ីបមួយនេះ។ កងទ័ពជើងទឹកប្រទេសម៉ិកស៊ិក បានចែករំលែកវីដេអូបង្ហាញពីឧទ្ធម្ភាគចក្រ ចុះចតនៅចំណតឧទ្ធម្ភាគចក្ររបស់ស្ថានទូតសាធារណរដ្ឋដូមីនីក ក្នុងទីក្រុង ព័រ អូប្រាំង ដើម្បីទទួលយកប្រជាជនម៉ិកស៊ិក ដែលរួមមានអនីតិជន៧នាក់។ឧទ្ធម្ភាគចក្រ បាននាំយកអ្នកជម្លៀសខ្លួនទៅកាន់នាវាមួយគ្រឿងរបស់កងទ័ពជើងទឹក ដែលដឹកជនជាតិរបស់ខ្លួនត្រឡប់ទៅប្រទេសម៉ិកស៊ិកវិញ។ រដ្ឋាភិបាលប្រទេសម៉ិកស៊ិក បាននិយាយនៅក្នុងសេចក្តីថ្លែងការណ៍ថា ប្រតិបត្តិការពិសេសនេះត្រូវបានដាក់ពង្រាយ ដោយសារតែអាកាសយានដ្ឋានអន្តរជាតិ របស់ប្រទេសហៃទីត្រូវបានគ្រប់គ្រងដោយខុសច្បាប់ ដោយក្រុមប្រដាប់អាវុធ។ការចាកចេញរបស់ជនជាតិបរទេសពីប្រទេសហៃទី បានកើនឡើងនាពេលថ្មីៗនេះ ខណៈអនាគតនយោបាយរបស់ប្រទេសនេះ ស្ថិតក្នុងភាពមិនប្រាកដប្រជា ដោយក្រុមជនអន្ធពាលប្រដាប់អាវុធ បានពង្រីកការគ្រប់គ្រងរបស់ពួកគេនៅរដ្ឋធានី និងនៅតំបន់ដាច់ឆ្ងាយបន្ថែមទៀត។ ជម្លោះនេះ បានសម្លាប់មនុស្សរាប់ពាន់នាក់ និងរាប់សែននាក់បានភៀសខ្លួន ហើយការវាយប្រហារជាបន្តបន្ទាប់ រួមមានទាំង ការវាយឆ្មក់ទៅលើប៉ុស្តិ៍នគរបាល និងអាកាសយានដ្ឋានអន្តរជាតិ នាំឱ្យមានការផ្អាកជើងហោះហើរពាណិជ្ជកម្មជាច្រើនជើង។

នាវាដំបូងគេ បានឆ្លងកាត់ផ្លូវទន្លេជាបណ្តោះអាសន្ន បន្ទាប់ពីការបាក់ស្ពាននៅទីក្រុង Baltimore

យោងតាមឆ្មាំល្បាតឆ្នេរសហរដ្ឋអាមេរិក បាននិយាយថា នាវា ថាក់បូត គ្រីស្តាល់ ខូសថ៍(Tugboat Crystal Coast) ដែលមានផ្ទុកប្រេង គឺជានាវាដំបូងគេ ដែលធ្វើដំណើរឆ្លងកាត់ផ្លូវទន្លេដែលទើបបង្កើតថ្មី ជាបណ្តោះអាសន្ន នៅទីក្រុង Baltimore បន្ទាប់ពីការបាក់រលំស្ពាន Key Bridge ។ នាវានេះ ធ្វើដំណើរទៅកាន់មូលដ្ឋានទ័ពអាកាស Dover ដោយមានផ្ទុកប្រេងឥន្ធនៈ។ផ្លូវឆ្លងកាត់គ្រាអាសន្ន មានទទឹង ២៦៤ ហ្វីត និងជម្រៅ ១១ហ្វីត ត្រូវបានសម្អាតកាលពីថ្ងៃចន្ទ ដើម្បីអនុញ្ញាតឱ្យនាវាសំខាន់ៗឆ្លងកាត់តាមដងទន្លេ Patapsco ជុំវិញបំណែកបាក់បែកនៅកន្លែងគ្រោះមហន្តរាយស្ពានបាក់។ផ្លូវទឹកជម្រៅ១៥ហ្វីត ទីពីរ ត្រូវបានគេរំពឹងថានឹងបើកក្នុងពេលឆាប់ៗនេះដើម្បីអនុញ្ញាតឱ្យនាវាសមុទ្រចូលទៅកាន់កំពង់ផែ Baltimore រួមជាមួយនឹងផ្លូវទឹកទីបីដែលមានជម្រៅកាន់តែជ្រៅជាងនេះ។អភិបាលរដ្ឋ លោក Wes Moore បាននិយាយកាលពីថ្ងៃច័ន្ទថា ថ្ងៃនេះជាព្រឹត្តិការណ៍ដ៏សំខាន់មួយនៅក្នុងដំណើរការនៃការចាប់ផ្តើមទាញយកបំណែកស្ពានចេញ ដោយចាប់ផ្តើមបើកបណ្តាញផ្លូវទឹក។ លោក ដាវីដ អូ ខន់នែល (David O'Connell) ប្រធានក្រុមឆ្មាំល្បាតឆ្នេរអាមេរិក ដែលជាអ្នកសម្របសម្រួលនៅកន្លែងកើតហេតុរបស់សហព័ន្ធ ទទួលបន្ទុកការឆ្លើយតបរួមចំពោះការបាក់ស្ពាន បាននិយាយនៅក្នុងបទសម្ភាសន៍ផ្តាច់មុខជាមួយប្រព័ន្ធផ្សព្វផ្សាយ CBS News ថា បណ្តាញផ្លូវទឹកជំនួយត្រូវបានគ្រោងនឹងបើកនៅតាមបណ្តោយភាគឦសាននៃផ្លូវទឹក និងមួយខ្សែទៀតនឹងដំណើរការតាម បណ្តោយភាគខាងត្បូង។

រដ្ឋាភិបាលអ៊ីស្រាអែល អនុម័តច្បាប់បិទសារព័ត៌មាន Al Jazeera ជាបណ្ដោះអាសន្ន

សភារបស់អ៊ីស្រាអែល បានអនុម័តច្បាប់មួយកាលពីថ្ងៃចន្ទ ដោយត្រួសត្រាយផ្លូវ ដើម្បីបិទបណ្តាញព័ត៌មាន Al Jazeera ដែលមានមូលដ្ឋាននៅប្រទេសកាតា ក្រោមច្បាប់អនុញ្ញាតឲ្យមានការហាមឃាត់ បណ្តោះអាសន្ននៃបណ្តាញព័ត៌មានបរទេសដែលរដ្ឋាភិបាលចាត់ទុកថា ជាការគំរាមកំហែងដល់សន្តិសុខជាតិ។នាយករដ្ឋមន្ត្រីអ៊ីស្រាអែល លោក បេនចាមីន ណេតាន់យ៉ាហ៊ូ (Benjamin Netanyahu) បាននិយាយថា លោកនឹង «ចាត់វិធានការភ្លាមៗ» ដើម្បីអនុវត្តច្បាប់ប្រឆាំងនឹងសារព័ត៌មាន Al Jazeera ដោយចោទប្រកាន់បណ្តាញព័ត៌មានដែលផ្តល់មូលនិធិដោយប្រទេសកាតាថា បានគាំទ្រការវាយប្រហារថ្ងៃទី៧ ខែតុលារបស់ក្រុមហាម៉ាសប្រឆាំងនឹងអ៊ីស្រាអែល និងបម្រើជាភ្នាក់ងារសម្រាប់អង្គការភេរវកម្មដែលកំណត់ដោយសហរដ្ឋអាមេរិក។លោកណេតាន់យ៉ាហ៊ូ បានបង្ហោះជាភាសាហ៊ីប្រូ (Hebrew) នៅលើបណ្តាញសង្គមXថា៖«បណ្តាញសារព័ត៌មានភេរវកម្ម Al Jazeera នឹងលែងចាក់ផ្សាយពីអ៊ីស្រាអែលទៀតហើយ។ ខ្ញុំមានបំណងធ្វើសកម្មភាពភ្លាមៗដោយអនុលោមតាមច្បាប់ថ្មី ដើម្បីបញ្ឈប់សកម្មភាពរបស់បណ្តាញសារព័ត៌មាននេះ»។ សារព័ត៌មាន Times of Israel បានរាយការណ៍ថា ច្បាប់នេះ បានអនុម័តដោយសភាអ៊ីស្រាអែល ដោយមានសំឡេងគាំទ្រ៧១សំឡេង និងសំឡេងប្រឆាំង១០សំឡេង នៅក្នុងការអានលើកទីពីរ និងទីបីរបស់ខ្លួននៅក្នុងកិច្ចប្រជុំពេញអង្គនៅក្នុងសភា។ ការសម្រេចឲ្យបិទបណ្តាញសារព័ត៌មានបរទេសនេះដែលចាត់ទុកថាជាការគំរាមកំហែងសន្តិសុខជាតិ អាចអនុវត្តបានតែ៤៥ថ្ងៃប៉ុណ្ណោះ ប៉ុន្តែអាចបន្តជាថ្មីសម្រាប់រយៈពេល ៤៥ ថ្ងៃទៀត។ ច្បាប់នេះ នឹងផុតកំណត់នៅថ្ងៃទី៣១ ខែកក្កដា។ទាំងអ៊ីស្រាអែល និងសហរដ្ឋអាមេរិក សុទ្ធតែរិះគន់ចំពោះការតាមយកព័ត៌មានរបស់សារព័ត៌មាន Al Jazeera លើអ៊ីស្រាអែលយ៉ាងទូលំទូលាយ និងការរាយការណ៍អំពីសង្រ្គាមរបស់អ៊ីស្រាអែលប្រឆាំងនឹងក្រុមហាម៉ាស ចាប់តាំងពីការវាយប្រហារថ្ងៃទី៧ ខែតុលា។ រដ្ឋមន្ត្រីការបរទេសអាមេរិក លោកអង់តូនី ប្ល៊ីនខិន (Antony Blinken) បានអំពាវនាវឲ្យរដ្ឋាភិបាលកាតាកាត់បន្ថយការញុះញង់ប្រឆាំងនឹងអ៊ីស្រាអែលនៅក្នុងការផ្សាយរបស់សារព័ត៌មាន Al Jazeera អំពីផលវិបាកនៃការវាយប្រហារខែតុលា។ប៉ុន្តែរដ្ឋបាលលោកបៃដិន បាននិយាយថា ខ្លួនមានការព្រួយបារម្ភចំពោះការអនុម័តច្បាប់របស់អ៊ីស្រាអែល។

ការតវ៉ានៅក្រុងហ្ស៉េរុយសាឡឹមបង្ហាញពីកំហឹងប្រឆាំងនឹងលោក Netanyahu លែងរង់ចាំដល់សង្គ្រាមចប់ទៀតហើយ

បាតុកម្មដ៏ធំនៅមុខសភា(Knesset)និងការិយាល័យរដ្ឋាភិបាលកាលពីយប់ថ្ងៃអាទិត្យនៅក្នុងទីក្រុងហ្ស៉េរុយសាឡឹម និងតេល អាវីវ គឺជាអ្វីមួយដែលប្រៀបបានទៅនឹការតស៊ូដ៏ធំប្រឆាំងនឹងកែប្រែប្រព័ន្ធតុលាការកាលពីឆ្នាំមុន។ នេះគឺជាការប្រមូលផ្ដុំគ្នាដ៏ច្រើននិងការរួមកម្លាំងដ៏ធំ ដែលជាទូទៅ អ្នកបោះឆ្នោតសម្រាប់គណបក្សអ្នកកណ្តាលនិយម មេរ៉េតស៍ និងការងារ (Meretz and Labor) ត្រូវបានគេមើលឃើញនៅក្នុងបាតុកម្ម នៅពេលដែល សភាបានលុបចោលស្តង់ដារសមហេតុផលរបស់តុលាការជាន់ខ្ពស់កាលពីរដូវក្តៅឆ្នាំមុន។ នេះគឺជាការតាំងចិត្តដូចគ្នា ប្រឆាំងនឹងនាយករដ្ឋមន្ត្រី ដែលធ្លាប់ព្យាយាមលុបបំបាត់លទ្ធិប្រជាធិបតេយ្យ ហើយឥឡូវនេះបានដឹកនាំសង្គ្រាមដែលនាំឲ្យមានបញ្ហាកាន់តែស្មុគស្មាញ ដោយមានចំណាប់ខ្មាំង ១៣៤ នាក់នៅតែត្រូវបានឃុំខ្លួននៅក្នុងដែនដីហ្កាហ្សា។ សម្រាប់បាតុករដ៏ច្រើន ដែលបានសម្រុកទៅកាន់ផ្លូវកាបលែន(Kaplan)នៃទីក្រុងហ្ស៉េរុយឡឹម (Jerusalem)ដូចជាទឹកបាក់ទំនប់ពីទីក្រុងស៊ីណេម៉ា(Cinema)ឆ្លងកាត់សភា ទៅកាន់បណ្ណាល័យជាតិថ្មី គឺជាប្រភេទនៃការជួបជុំគ្នាឡើងវិញ បន្ទាប់ពីការផ្អាកអស់រយៈពេល៦ខែ។ទោះយ៉ាងណា មានការខ្វែងគំនិតគ្នាមួយចំនួនរវាងបាតុកម្មប្រឆាំងនឹងការកែប្រែប្រព័ន្ធតុលាការ និងសកម្មភាពដ៏ធំប្រឆាំងលោក Netanyahu និងរដ្ឋាភិបាលរបស់លោក កាលពីថ្ងៃអាទិត្យ។ ទីមួយ នៅក្នុងការតវ៉ាប្រឆាំងនឹងផ្លាស់ប្ដូរអ្នកនយោបាយកំពុងស្ថិតក្នុងតំណែងដោយមិនត្រូវបានអញ្ជើញឲ្យនិយាយនៅលើឆាក។ ទីពីរ ដោយសារកាលៈទេសៈ បន្ទាប់ពីគ្រោះមហន្តរាយថ្ងៃទី ៧ ខែតុលា របៀបវារៈទាំងមូលបានផ្លាស់ប្តូរ ជាមួយនឹងការដោះស្រាយ និងកំហឹងបន្ថែម។ ការកែប្រែច្បាប់ គឺកើតចេញពីការចរចា។ ឥឡូវនេះបញ្ហាគឺការរំដោះចំណាប់ខ្មាំង វិបត្តិកើតចេញពីការលើកលែងការកេណ្ឌកម្លាំងបុរសជ្វីហ្វជ្រុលនិយមអូសតូដុកមិនឲ្យចូលបម្រើយោធា ការប្រព្រឹត្តរបស់អ្នកនយោបាយ និងការអំពាវនាវដោយទទូចឲ្យរៀបចំការបោះឆ្នោតថ្មី និងទាមទារឲ្យលោក Netanyahu លាលែងពីតំណែង៕

រដ្ឋមន្ត្រីប៉េរូ ៦ រូបលាលែងពីតំណែង បន្ទាប់ពីនគរបាលឆ្មក់ចូលឆែកឆេរនិវេសនដ្ឋានប្រធានាធិបតី

រដ្ឋមន្ត្រីចំនួនប្រាំមួយរូបរបស់ប្រទេសប៉េរូ ត្រូវបានជំនួសតំណែងកាលពីថ្ងៃចន្ទ (០១ មីនា) បន្ទាប់ពីពួកគេបានលាលែងពីតំណែងភ្លាមៗ ស្របពេលមានរឿងអាស្រូវនយោបាយថ្មីពាក់ព័ន្ធនឹងនាឡិកាប្រណីតដែលកំណត់គោលដៅលើប្រធានាធិបតីប៉េរូ ដោយតម្រូវឱ្យមានការរុះរើគណរដ្ឋមន្រ្តី និងបន្ថែមភាពប្រែប្រួលថែមទៀតដល់នយោបាយដ៏រង្គោះរង្គើរបស់ប្រទេសអាមេរិកខាងត្បូងមួយនេះ។ការលាលែងពីតំណែងភ្លាមៗនេះ ដែលរួមទាំងរដ្ឋមន្ត្រីក្រសួងមហាផ្ទៃ ធ្វើឡើងបន្ទាប់ពីការស៊ើបអង្កេតមួយជុំវិញការចោទប្រកាន់ពីការប្រព្រឹត្តខុសច្បាប់ដោយប្រធានាធិបតី លោកស្រី ឌីណា បូលូអាតតេ (Dina Boluarte) ដែលកំពុងត្រូវបានស៊ើបអង្កេតជុំវិញនាឡិកាម៉ាក រ៉ូឡិច (Rolex) ស៊េរីខ្ពស់ជាច្រើនគ្រឿងរបស់លោកស្រី។នគរបាល និងក្រុមរដ្ឋអាជ្ញាបានឆ្មក់ចូលនិវេសនដ្ឋាន និងការិយាល័យរបស់មេដឹកនាំរូបនេះកាលពីចុងសប្តាហ៍ ដើម្បីស្វែងរកភស្តុតាងនៃប្រភពដើមនៃនាឡិកា Rolex យ៉ាងហោចណាស់បីគ្រឿង។ លោកស្រី បូលូអាតតេ បានបដិសេធថាខ្លួនមិនបានធ្វើខុសអ្វីឡើយ ហើយបានទទូចថាលោកស្រីទិញនាឡិកាដោយថវិកាផ្ទាល់ខ្លួនប៉ុណ្ណោះ។រដ្ឋមន្ត្រីក្រសួងមហាផ្ទៃ លោក វីកទ័រ តរ៉េស (Victor Torres) បានប្រកាសពីការសម្រេចចិត្តចុះចេញពីតំណែងកាលពីថ្ងៃច័ន្ទ ដែលត្រូវបានបន្តដោយការលាលែងពីរដ្ឋមន្ត្រីអប់រំ និងរដ្ឋមន្ត្រីកិច្ចការនារី ព្រមទាំងការលាលែងពីគណៈរដ្ឋមន្ត្រីចំនួនបីរូបបន្ថែមទៀត។ អ្នកទាំងអស់នោះបានសម្តែងការគាំទ្រចំពោះលោកស្រី បូលូអាតតេ ដោយរដ្ឋមន្រ្តីម្នាក់ក្នុងចំណោមនោះបានហៅការឆ្មក់ឆែកឆេររបស់នគរបាលនេះថាថារឿង «មិនចាំបាច់» និង «ហួសហេតុ»៕

ឯកអគ្គរដ្ឋទូតអ៊ីរ៉ង់ ប្រចាំស៊ីរី ប្តេជ្ញាសងសឹកនឹងការវាយប្រហាររបស់អ៊ីស្រាអែល លើស្ថានទូត

ឯកអគ្គរដ្ឋទូតអ៊ីរ៉ង់ប្រចាំប្រទេសស៊ីរី លោក ហូសេន អាកបារី (Hossein Akbari) បានសន្យាថា អ៊ីរ៉ង់នឹងឆ្លើយតបចំពោះការវាយប្រហាររបស់អ៊ីស្រាអែល ទៅលើស្ថានទូតអ៊ីរ៉ង់ក្នុងរដ្ឋធានី ដាម៉ាស នៃប្រទេសស៊ីរី កាលពីព្រឹកថ្ងៃចន្ទ (០១ មេសា) ជាមួយនឹងកម្លាំងស្មើគ្នាដូចដែលអីស្រាអែលបានប្រើ។យន្តហោះចម្បាំងអ៊ីស្រាអែល ដែលត្រូវបានសង្ស័យ បានវាយប្រហារតាមអាកាសលើស្ថានទូតអ៊ីរ៉ង់ ក្នុងប្រទេសស៊ីរី កាលពីថ្ងៃចន្ទ នៅក្នុងការវាយប្រហារដែលអ៊ីរ៉ង់បាននិយាយថា បានសម្លាប់ទីប្រឹក្សាយោធារបស់ខ្លួនចំនួន៧ នាក់ ដែលរួមមានមេបញ្ជាការជាន់ខ្ពស់បីនាក់ ហើយនោះបានក្លាយជាការកើនឡើងដ៏ធំនៅក្នុងសង្រ្គាមរបស់អ៊ីស្រាអែល ជាមួយសត្រូវក្នុងតំបន់។ឯកអគ្គរដ្ឋទូតអ៊ីរ៉ង់រូបនេះបានចេញការព្រមានថា អ៊ីរ៉ង់នឹងមិនបណ្តោយឱ្យសកម្មភាពរបស់អ៊ីស្រាអែលប្រព្រឹត្តទៅដោយពុំមានចម្លើយតបឡើយ ហើយនឹងសងសឹកដោយកម្លាំងស្មើគ្នានេះ។ រដ្ឋមន្ត្រីការបរទេសស៊ីរី លោក ហ្វៃសាល ម៉េកដាដ (Faisal Mekdad) ដែលបានទៅដល់កន្លែងកើតហេតុ បន្ទាប់ពីការវាយប្រហារដោយមីស៊ីលនោះ បានថ្កោលទោសឧបទ្ទវហេតុនេះថា ជារឿងអយុត្តិធម៌។ក្រសួងការពារជាតិស៊ីរីបាននិយាយថា ការវាយប្រហារដោយមីស៊ីលនេះបានកើតឡើងនៅម៉ោងប្រហែល ៥:០០ ល្ងាច (ម៉ោងក្នុងស្រុក)។ អ៊ីស្រាអែល បានកំណត់គោលដៅជាយូរមកហើយលើការដំឡើងយោធារបស់អ៊ីរ៉ង់ នៅក្នុងប្រទេសស៊ីរី និងក្រុមប្រយុទ្ធតំណាងរបស់ខ្លួន ប៉ុន្តែការវាយប្រហារកាលពីថ្ងៃចន្ទនេះ គឺជាលើកដំបូងហើយដែលអ៊ីស្រាអែលវាយប្រហារបរិវេណស្ថានទូតអ៊ីរ៉ង់ដ៏ធំដោយផ្ទាល់បែបនេះ៕

មជ្ឈិមបូព៌ា ឈានដល់ស្ថានភាពដ៏គ្រោះថ្នាក់ជាថ្មី ក្រោយពីមានការវាយប្រហារទៅលើស្ថានកុងស៊ុលអ៊ីរ៉ង់

ការវាយប្រហារលើស្ថានកុងស៊ុលអ៊ីរ៉ង់នៅទីក្រុងដាម៉ាសកាលពីថ្ងៃចន្ទ អាចជាការកើនឡើងដ៏គ្រោះថ្នាក់បំផុត នៅខាងក្រៅតំបន់ហ្កាហ្សា ចាប់តាំងពីការចាប់ផ្តើមនៃសង្រ្គាមហាម៉ាស-អ៊ីស្រាអែលជិត៦ខែកន្លងទៅ។ប្រទេសស៊ីរីនិងអ៊ីរ៉ង់ បានស្តីបន្ទោសអ៊ីស្រាអែលចំពោះការវាយប្រហារតាមអាកាសដែលបានបំផ្លាញអគារកុងស៊ុល ដោយបានសម្លាប់លោក ម៉ូហាម៉េដ រីហ្សា រ៉ាហ៊ីឌី (Mohammed Reza Zahedi) មេបញ្ជាការកំពូលនៃកងឆ្មាំបដិវត្តន៍អ៊ីរ៉ង់ (IRGC) និងមន្ត្រីមួយចំនួនទៀត រួមទាំងមេបញ្ជាការជាន់ខ្ពស់ម្នាក់ទៀតគឺ លោកម៉ូហាម៉េដ ហាឌី ហាជី រ៉ាហ៊ីមី (Mohammad Hadi Haji Rahimi)។ មន្ត្រីអ៊ីស្រាអែល មិនបានធ្វើអត្ថាធិប្បាយជុំវិញឧប្បត្តិហេតុនេះទេ។ការវាយប្រហារនេះ គឺជាការវាយប្រហារចុងក្រោយបង្អស់របស់អ៊ីស្រាអែលនាពេលថ្មីៗនេះ នៅក្នុងប្រទេសស៊ីរីដែលសំដៅទៅលើក្រុមIRGC និងក្រុមសកម្មប្រយុទ្ធលីបង់ហេសបូឡា(Hezbollah) ដែលគាំទ្រដោយអ៊ីរ៉ង់ ។ រហូតមកដល់ពេលនេះ ការវាយប្រហារ មិនបានបង្កឲ្យមានការឆ្លើយតបនៅខាងក្រៅផ្នែកនៃការប៉ះទង្គិចគ្នារយៈពេលជាច្រើនខែ នៅតាមព្រំដែនរបស់អ៊ីស្រាអែលជាមួយប្រទេសលីបង់នោះទេ ទោះបីជាមានការគំរាមកំហែងម្តងហើយម្តងទៀតពីប្រទេសអ៊ីរ៉ង់ និងថ្នាក់ដឹកនាំរបស់ក្រុមហេសបូឡា ដើម្បីឆ្លើយតបទៅនឹងការវាយប្រហាររបស់អ៊ីស្រាអែលក៏ដោយ។ទោះយ៉ាងណាក៏ដោយ ឧប្បត្តិហេតុកាលពីថ្ងៃចន្ទ អាចជារឿងយកមកធ្វើជាលេសចុងក្រោយ។ តាមលក្ខណៈបច្ចេកទេស ស្ថានកុងស៊ុលរបស់អ៊ីរ៉ង់ គឺជាទឹកដីអធិបតេយ្យភាពរបស់អ៊ីរ៉ង់ ដែលធ្វើឲ្យវាក្លាយជាការវាយប្រហារខ្លាំងបំផុតលើទឹកដីអ៊ីរ៉ង់ ក្នុងរយៈពេលជាច្រើនឆ្នាំ ហើយលោកហ្សាហ៊ីឌី គឺជាគោលដៅដ៏សំខាន់បំផុត ចាប់តាំងពីអតីតប្រធានាធិបតីអាមេរិក លោកដូណាល់ ត្រាំ ( Donald Trump) បានបញ្ជាឲ្យសម្លាប់លោកឧត្តមសេនីយ៍ កាសែម សូឡេម៉ានី ( Qassem Soleimani) របស់ IRGC នៅទីក្រុងបាកដាដក្នុងខែមករា ឆ្នាំ២០២០។

ភ្លៀងធ្លាក់ខ្លាំង បង្កឲ្យមានទឹកជំនន់ និងបំណាក់ដី នៅទីក្រុង Edolo ប្រទេសអ៊ីតាលី

ភ្លៀងធ្លាក់ខ្លាំង បានវាយបោកបក់នៅទីក្រុង Edolo ប្រទេសអ៊ីតាលី ក្នុងតំបន់ Val Camonica កាលពីថ្ងៃចន្ទ បណ្តាលឱ្យមានទឹកជំនន់ និងបំណាក់ដី។ក្រុមអ្នកពន្លត់អគ្គីភ័យរបស់ប្រទេសអ៊ីតាលី បាននិយាយនៅក្នុងសេចក្តីថ្លែងការណ៍ថា មនុស្សយ៉ាងហោចណាស់ ១៥ នាក់ត្រូវបានជម្លៀសចេញពីតំបន់នោះ។វីដេអូដែលចេញផ្សាយដោយអង្គភាពសេវាសង្គ្រោះបន្ទាន់ បានបង្ហាញពីផ្លូវទឹកពេញហៀរ និងលំហូរដីល្បប់ ហូរធ្លាក់តាមផ្លូវថ្នល់ក្នុងទីក្រុង Edolo ។ប្រព័ន្ធផ្សព្វផ្សាយក្នុងស្រុកបានរាយការណ៍ថា ក្រុមអ្នកពន្លត់អគ្គីភ័យ និងក្រុមការពារស៊ីវិល បានអនុវត្តបេសកកម្មចុះសិក្សា រួមជាមួយមន្ត្រីភូមិសាស្ត្រក្នុងតំបន់ ដើម្បីវាយតម្លៃហានិភ័យជលធរណីវិទ្យា សម្រាប់ផ្លូវថ្នល់ ដែលតភ្ជាប់ ទីក្រុង Edolo ទៅកាន់ទីក្រុង Aprica ។ សេចក្តីរាយការណ៍ និយាយថាផ្លូវថ្នល់នេះ នៅតែត្រូវបានបិទ រហូតដល់ថ្ងៃអង្គារទី២ ខែ មេសានេះ។

ក្រុមបាតុករអ៊ីស្រាអែលរាប់ម៉ឺននាក់ នៅតែបន្តការតវ៉ានៅខាងក្រៅសភា ទាមទារឲ្យរៀបចំការបោះឆ្នោតឥឡូវនេះ

មនុស្សរាប់ម៉ឺននាក់បានធ្វើបាតុកម្មនៅទីក្រុងហ្ស៉េរុយសាឡឹម(Jerusalem)កាលពីថ្ងៃចន្ទទី១ មេសា នៅក្នុងការតវ៉ាលើកទីពីររយៈពេលបីថ្ងៃប្រឆាំងនឹងរដ្ឋាភិបាលរបស់លោកនាយករដ្ឋមន្ត្រី Benjamin Netanyahu ព្រមទាំងប្រឆាំងនឹងការលើកលែងដល់បុរសជ្វីហ្វជ្រុលនិយមអូសតូដុក (ultra-Orthodox Jewish) ពីការចូលបម្រើយោធា។ ក្រុមបាតុករ រួមទាំងក្រុមមួយចំនួនដឹកនាំក្បួនបាតុកម្មដ៏ធំ ដែលបានធ្វើឲ្យកក្រើកប្រទេសអ៊ីស្រាអែល កាលពីឆ្នាំ ២០២៣ កន្លងទៅ បានរៀបចំការប្រមូលផ្តុំនៅខាងក្រៅសភា (Knesset) ដោយអំពាវនាវឱ្យមានការបោះឆ្នោតជាថ្មី ដើម្បីជំនួសរដ្ឋាភិបាលបច្ចុប្បន្ន។ ក្រុមអ្នកតវ៉ាក៏ចង់បានការស្មើគ្នាភាពគ្នាបន្ថែមទៀតនៅក្នុងបន្ទុកនៃការបម្រើកងទ័ពដែលចងជនជាតិអ៊ីស្រាអែលភាគច្រើន។សារព័ត៌មាន N12 របស់អ៊ីស្រាអែលកាលពីថ្ងៃអាទិត្យបាននិយាយថា បាតុកម្មថ្ងៃដំបូងទំនងជាការតវ៉ាជាសាធារណៈដ៏ធំបំផុតចាប់តាំងពីសង្គ្រាមនៅក្នុងដែនដីហ្កាហ្សាបានចាប់ផ្តើម។ គេហទំព័រព័ត៌មាន ហាហ្សាតស៍ (Haaretz) និង យីណេត (Ynet) បាននិយាយថា ការតវ៉ានេះ បានទាក់ទាញមនុស្សរាប់ម៉ឺននាក់ចូលរួម។ខុទ្ទកាល័យរបស់លោក Netanyahu បានប្រឈមការរិះគន់យ៉ាងខ្លាំងជុំវិញការបរាជ័យផ្នែកសន្តិសុខដែលនាំឲ្យមានការវាយប្រហាររបស់ក្រុមហាម៉ាសលើភាគខាងត្បូងប្រទេសអ៊ីស្រាអែល សម្លាប់មនុស្ស ចំនួន ១.២០០ នាក់ និងជាង ២៥០ នាក់ត្រូវបានចាប់ធ្វើជាចំណាប់ខ្មាំងចូលទៅកាន់តំបន់ហ្កាហ្សា កាលពីថ្ងៃទី៧ខែតុលាឆ្នាំ២០២៣ កន្លងទៅ៕

បណ្ដាញសង្គម

ព័ត៌មានថ្មីៗ

មនុស្ស ២នាក់ស្លាប់ និងច្រើននាក់របួសនៅកូរ៉េខាងត្បូង បន្ទាប់ពីរថយន្តមួយគ្រឿងបើកបំបុកចូលផ្សារតាមចិញ្ចើមផ្លូវ

ឯកឧត្តមឧបនាយករដ្ឋមន្រ្តី ហ៊ុន ម៉ានី អញ្ជើញជាអធិបតីដ៏ខ្ពង់ខ្ពស់ក្នុងពិធីបិទសិក្ខាសាលាពិគ្រោះយោបល់លើកទី២ ស្តីពី «ការអភិវឌ្ឍផែនការការងារ ACCSM និង ACCSM+3 ឆ្នាំ២០២៦-២០៣០»

ប្រធានាធិបតីប៉េរូ លោក Jeri ត្រួតពិនិត្យការកម្ទេចអាវុធដែលរឹបអូសបានជាង៨.២០០ ដើម

ប្រមុខសហភាពអាហ្វ្រិក៖ គ្មានអំពើប្រល័យពូជសាសន៍នៅនីហ្សេរីយ៉ាទេ ក្រោយការគំរាមកំហែងយោធារបស់លោកTrump

UN ជំរុញឱ្យមានច្រករបៀងមនុស្សធម៌ ដើម្បីជួយជនស៊ីវិលដែលជាប់ខ្លួននៅក្នុងទីក្រុង el-Fasher ប្រទេសស៊ូដង់

លំនៅឋានជាច្រើននៅកោះតៃវ៉ាន់រងការបំផ្លិចបំផ្លាញពីភ្លៀងធ្លាក់ខ្លាំងនិងបំណាក់ល្បាប់ដោយសារព្យុះទីហ្វុង Fung-wong

ទួរគី ស៊ើបអង្កេតពីមូលហេតុនៃការធ្លាក់យន្តហោះយោធា ដែលបានបណ្តាលឲ្យមនុស្ស២០នាក់ស្លាប់

លោកTrump សរសេរលិខិតទៅប្រធានាធិបតីអ៊ីស្រាអែល សុំឱ្យលោកលើកលែងទោសដល់លោក Netanyahu

ប្រមុខអង្គការសុខភាពពិភពលោក និយាយថា វិបត្តិអាកាសធាតុ គឺជាវិបត្តិសុខភាព

បណ្ដាញទឹកនៅទីក្រុងតេអេរ៉ង់រីងស្ងួត ខណៈវិបត្តិទឹកកាន់តែធ្ងន់ធ្ងរនៅទូទាំងប្រទេសអ៊ីរ៉ង់

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877