BTV NEWS

កម្ពុជាសហការជាមួយបណ្តាប្រទេសជាដៃគូរបង្ក្រាបករណីដឹកជញ្ជូនគ្រឿងញៀនឆ្លងដែនក្នុងឆ្នាំ២០២៥ ទទួលបានលទ្ធផលល្អ

នៅឆ្នាំ២០២៥ មន្ទីរប្រឆាំងបទល្មើសគ្រឿងញៀនបង្ក្រាបបទល្មើសគ្រឿងញៀនជាង ៩ពាន់ករណី ឃាត់ខ្លួនជនសង្ស័យជាង ២ម៉ឺននាក់ និងចាប់យកសារធាតុញៀនជាង ៧តោន

រដ្ឋបាលរាជធានីភ្នំពេញ បង្ក្រាបទីតាំងហ្គេមអនឡាញខុសច្បាប់ក្នុងខណ្ឌចំការមនឃាត់ខ្លួនជនជាតិឥណ្ឌូណេស៊ី ២៤នាក់

សមត្ថកិច្ចចម្រុះបង្ក្រាបករណីបង្ខាំងមនុស្ស និងឆែកឆេរទីតាំងសង្ស័យ Online Scam សង្គ្រោះជនរងគ្រោះម្នាក់ និងឃាត់ខ្លួនជនសង្ស័យជាជនជាតិបង់ក្លាដេសដូចគ្នាចំនួន២នាក់នៅខណ្ឌសែនសុខ

សន្តិសុខ និង សង្គម

ចំនួនអ្នកស្លាប់ជនជាតិប៉ាឡេស្ទីន នៅតំបន់សង្រ្គាមហ្កាហ្សា ឡើងលើសពី ៣២.៨០០ នាក់

ក្រសួងសុខាភិបាលដែលគ្រប់គ្រងដោយក្រុមហាម៉ាស បាននិយាយនៅក្នុងសេចក្តីថ្លែងការណ៍មួយកាលពីថ្ងៃចន្ទ (០១ មេសា) ថា ចំនួនអ្នកស្លាប់របស់ប៉ាឡេស្ទីន នៅតំបន់ហ្កាហ្សាស្ទ្រីប បានកើនឡើងដល់ជាង ៣២.៨០០ នាក់។យោងតាមក្រសួងបានឱ្យដឹងថា កងទ័ពអ៊ីស្រាអែលបានសម្លាប់ជនជាតិប៉ាឡេស្ទីនយ៉ាងហោចណាស់ ៦៣ នាក់ក្នុងរយៈពេល ២៤ ម៉ោងកន្លងមក ដែលនាំឱ្យចំនួនអ្នកស្លាប់សរុបកើនឡើងដល់ ៣២.៨៤៥ នាក់ និងរបួសដល់ ៧៥.៣៩២ នាក់ចាប់តាំងពីជម្លោះប៉ាឡេស្ទីន-អ៊ីស្រាអែល បានផ្ទុះឡើងកាលពីថ្ងៃទី០៧ ខែតុលា ឆ្នាំ២០២៣។កាលពីថ្ងៃចន្ទ យោធាអ៊ីស្រាអែលបានចេញសេចក្តីថ្លែងការណ៍មួយដោយនិយាយថា ក្នុងរយៈពេលពីរសប្តាហ៍កន្លងមកនេះ កងទ័ពរបស់ខ្លួនបានធ្វើប្រតិបត្តិការយោធាដាក់គោលដៅលើមន្ទីរពេទ្យ អាល់ស៊ីហ្វា (Al-Shifa) ដោយបានសម្លាប់បុគ្គលិកយោធាជាង ២០០ នាក់ និងចាប់ខ្លួនប្រហែល ៥០០ នាក់ផ្សេងទៀត។ នៅថ្ងៃចន្ទផងដែរនោះ កងពលតូច អាល់កាសាម (Al-Qassam) ដែលជាស្លាបប្រដាប់អាវុធនៃក្រុមហាម៉ាសបាននិយាយថា បុគ្គលិកយោធារបស់ខ្លួនបានបើកការវាយប្រហារដោយគ្រាប់រ៉ូកែតទៅលើទាហានអ៊ីស្រាអែល និងរថយន្តយោធានៅក្រុង ខាន់ យូនីស (Khan Yunis) ហើយបានចូលរួមក្នុងការប៉ះទង្គិចជាមួយកងកម្លាំងជួយសង្គ្រោះអ៊ីស្រាអែល ដែលបណ្តាលឱ្យទាហានអ៊ីស្រាអែលរងរបួសជាច្រើន៕

អង្គការសហប្រជាជាតិ បន្តផ្តល់ជំនួយបន្ទាន់ដល់ប្រទេសហៃទី

អ្នកនាំពាក្យអង្គការសហប្រជាជាតិ បាននិយាយកាលពីថ្ងៃចន្ទថា អង្គការសហប្រជាជាតិ និងដៃគូរបស់ខ្លួន បន្តធ្វើការងារជម្នះគ្រប់ឧបសគ្គដើម្បីផ្តល់ជំនួយបន្ទាន់ប្រចាំថ្ងៃដល់ប្រជាជនដែលរងផលប៉ះពាល់ដោយអំពើហិង្សានៅក្នុងរដ្ឋធានី ព័រ អូប្រាំង ប្រទេសហៃទី។លោក Stephane Dujarric អ្នកនាំពាក្យរបស់អគ្គលេខាធិការអង្គការសហប្រជាជាតិ លោក Antonio Guterres បាននិយាយថា កម្មវិធីស្បៀងអាហារពិភពលោក (WFP) អាចផ្តល់អាហារជាង ២៨.០០០កញ្ចប់ ដល់ប្រជាជនដែលត្រូវបានបង្ខំឱ្យភៀសខ្លួនចេញពីលំនៅឋានរបស់ពួកគេដោយសារតែអំពើហិង្សា។ទោះបីជាមានអសន្តិសុខរីករាលដាលក៏ដោយ អង្គការកម្មវិធីស្បៀងអាហារពិភពលោក(WFP) រាយការណ៍ថា ខ្លួនបានផ្តល់ជំនួយស្បៀងអាហារដល់បុរស ស្ត្រី និងកុមារប្រមាណ ៤៨០.០០០នាក់នៅទូទាំងប្រទេស ចាប់តាំងពីដើម ខែមីនា មក។ លោកនិយាយថា កិច្ចខិតខំប្រឹងប្រែងទាំងនេះ អាចធ្វើទៅបានដោយសារដៃគូនានាក្នុងតំបន់ រួមទាំងអង្គការមិនមែនរដ្ឋាភិបាលរបស់ប្រទេសហៃទី អាជីវកម្មក្នុងស្រុក និងអង្គការកសិករហៃទី។ក្នុងរយៈពេលមួយខែកន្លងទៅនេះ ដៃគូមនុស្សធម៌របស់អង្គការសហប្រជាជាតិ បានផ្តល់ទឹកស្អាតជាង ២,៣លានលីត្រទៅកាន់មជ្ឈមណ្ឌលជម្លៀសប្រមាណ២៩កន្លែង ដែលបានផ្តល់ប្រយោជន៍ដល់ជនភៀសខ្លួនប្រមាណ ៦០.០០០នាក់ ហើយដៃគូផ្នែកសុខាភិបាល ក៏បានផ្តល់ឱសថ និងផ្តល់ជំនួយផ្លូវចិត្តដល់អ្នកទាំងឡាយណាដែលមានរបួស។លោកបាននិយាយថា វិស័យសុខាភិបាលរបស់ប្រទេសហៃទី បានរងផលប៉ះពាល់យ៉ាងធ្ងន់ធ្ងរដោយអំពើហឹង្សាកាលពីខែមុន ដោយយ៉ាងហោចណាស់ពាក់កណ្តាលនៃមណ្ឌលសុខភាព នៅក្នុងរដ្ឋធានីត្រូវបានបិទ ឬដំណើរការក្រោមសមត្ថភាពធម្មតា។នៅទូទាំងប្រទេស មនុស្សជាង ៣៦០.០០០នាក់ បានភៀសខ្លួនចេញពីលំនៅឋាន ដែលក្នុងនោះ ១៦០.០០០នាក់ ស្ថិតនៅក្នុងទីក្រុងព័រអូប្រាំង។ សាលារៀនជាង ១.០០០កន្លែង ត្រូវបានបិទទ្វារនៅទូទាំងប្រទេស។ ទន្ទឹមនឹងនោះ តម្រូវការមនុស្សធម៌ និងផែនការឆ្លើយតបសម្រាប់ប្រទេសហៃទី នៅតែបន្តខ្វះមូលនិធិយ៉ាងធ្ងន់ធ្ងរ ដោយទទួលបានមូលនិធិតិចជាង ៧ ភាគរយ នៃមូលនិធិ ៦៧៤ លានដុល្លារអាមេរិក ដែលត្រូវការ។

UN ត្រៀមបេសកកម្មទៅកាន់មន្ទីរពេទ្យ Al Shifa តំបន់ហ្កាហ្សា បន្ទាប់ពីអ៊ីស្រាអែលដកកងទ័ពចេញ

អ្នកនាំពាក្យអង្គការសហប្រជាជាតិ បាននិយាយកាលពីថ្ងៃចន្ទថា អង្គការសហប្រជាជាតិ កំពុងរៀបចំបេសកកម្មទៅកាន់មន្ទីរពេទ្យ Al Shifa ក្នុងតំបន់ហ្កាហ្សា បន្ទាប់ពីការដកខ្លួនរបស់កងទ័ពអ៊ីស្រាអែលចេញពីបរិវេណនេះ។ លោក Stephane Dujarric អ្នកនាំពាក្យរបស់អគ្គលេខាធិការអង្គការសហប្រជាជាតិ បាននិយាយថា យើងកំពុងរៀបចំផែនការបេសកកម្មទៅកាន់មន្ទីរពេទ្យនេះឱ្យបានឆាប់តាមដែលយើងអាចធ្វើទៅបាន ដើម្បីជួយប្រជាជនឱ្យទទួលបានការយកចិត្តទុកដាក់ផ្នែកវេជ្ជសាស្ត្រ និងដើម្បីវាយតម្លៃស្ថានភាពមន្ទីរពេទ្យ។ បេសកកម្មនេះ ធ្វើឡើងខណៈយើងបានឃើញរបាយការណ៍ថា កងកម្លាំងការពារជាតិអ៊ីស្រាអែលចាកចេញពីបរិវេណមន្ទីរពេទ្យAl Shifa ។ អ្នកនាំពាក្យរូបនេះ បាននិយាយថា អង្គការសុខភាពពិភពលោក (WHO) កំពុងរង់ចាំការកាត់បន្ថយជម្លោះ និងការធានាបានសុវត្ថិភាពសមស្របពីរដ្ឋាភិបាលអ៊ីស្រាអែល។ ទន្ទឹមនឹងនេះ នៅមន្ទីរពេទ្យ Al Aqsa តំបន់ហ្កាហ្សាភាគកណ្តាល ក្រុមអង្គការសុខភាពពិភពលោក កំពុងបំពេញបេសកកម្មមនុស្សធម៌នៅទីនោះ នៅពេលដែលជំរំតង់មួយកន្លែងនៅក្នុងបរិវេណមន្ទីរពេទ្យ ត្រូវបានវាយប្រហារដោយការវាយប្រហារតាមអាកាសរបស់អ៊ីស្រាអែល។ មនុស្ស៤នាក់ ត្រូវបានគេរាយការណ៍ថាបានស្លាប់ និង១៧នាក់ផ្សេងទៀតរងរបួស ។ លោក Dujarric និយាយថា ទីភ្នាក់ងារអង្គការសហប្រជាជាតិទទួលបន្ទុកជនភៀសខ្លួនប៉ាឡេស្ទីន (UNRWA) បាននិយាយថា ពុំមានការផ្លាស់ប្តូរគួរឱ្យកត់សម្គាល់ចំពោះបរិមាណនៃការផ្គត់ផ្គង់ជំនួយមនុស្សធម៌ចូលទៅកាន់តំបន់ហ្កាហ្សា ឬដំណើរការប្រសើរឡើងសម្រាប់ការចូលទៅកាន់ភាគខាងជើងឡើយ ។ចាប់ពីថ្ងៃទី ១ ដល់ថ្ងៃទី ៣០ ខែមីនា រថយន្តដឹកជំនួយចំនួន ១៥៩គ្រឿងជាមធ្យម បានឆ្លងកាត់តំបន់ហ្កាហ្សាក្នុងមួយថ្ងៃ។ ចំនួនច្រើនបំផុត គឺកាលពីថ្ងៃព្រហស្បតិ៍សប្តាហ៍មុន ដែលរថយន្តដឹកជំនួយ ២៦៤គ្រឿង បានចូលទៅក្នុងតំបន់ហ្កាហ្សា។ លោកបាននិយាយបន្តថា នេះនៅតែមានកម្រិតទាបជាងគោលដៅប្រតិបត្តិការ នៃរថយន្តដឹកជំនួយចំនួន ៥០០ គ្រឿងក្នុងមួយថ្ងៃ។

ទាហានអ៊ីស្រាអែល ដកខ្លួនចេញពីមន្ទីរពេទ្យហ្កាហ្សា ដោយបន្សល់ទុកកម្ទេចថ្ម និងសាកសពជាច្រើន

កងកម្លាំងអ៊ីស្រាអែលបានចាកចេញពីមន្ទីរពេទ្យ អាល់ស៊ីហ្វា (Al Shifa) ក្នុងទីក្រុងហ្កាហ្សា កាលពីថ្ងៃច័ន្ទ (០១ មេសា) បន្ទាប់ពីប្រតិបត្តិការរយៈពេលពីរសប្តាហ៍ដោយកងកម្លាំងពិសេស ដែលបានឃាត់ខ្លួនជនសកម្មប្រយុទ្ធប៉ាឡេស្ទីនរាប់រយនាក់ដែលសង្ស័យ និងបានបន្សល់ទុកនូវសំណល់កម្ទេចកម្ទីនៃអគារដែលត្រូវបានបំផ្លាញ ព្រមទាំងសាកសពជាច្រើន។ក្រុមមន្ត្រីប៉ាឡេស្ទីនបានហៅការវាយឆ្មក់លើមន្ទីរពេទ្យព្យាបាលអ្នកជំងឺរងរបួសធ្ងន់ធ្ងរនេះ ថាជាឧក្រិដ្ឋកម្មសង្គ្រាម ខណៈដែលក្រុមមន្ត្រីអ៊ីស្រាអែលបាននិយាយថា កងកម្លាំងពិសេសបានធ្វើការវាយប្រហារតាមគោលដៅប្រឆាំងនឹងមូលដ្ឋានរឹងមាំរបស់ក្រុមហាម៉ាស ដែលមានចេតនាដាក់ទីតាំងក្នុងចំណោមជនស៊ីវិលដែលងាយរងគ្រោះ។យោងទៅតាមយោធាអ៊ីស្រាអែលបានឱ្យដឹងថា ប្រជាជនប៉ាឡេស្ទីនចំនួនប្រហែល ៦.២០០ នាក់ ធ្លាប់បានជ្រកកោននៅក្នុងបរិវេណនោះ ដែលជាទីតាំងមួយក្នុងចំណោមទីតាំងផ្សេងទៀតនៅភាគខាងជើងហ្កាហ្សា ដែលមានការផ្គត់ផ្គង់អគ្គិសនី និងទឹកមួយចំនួន។លោក អ៊ីស្មែល អាល់ថាវ៉ាបតា (Ismail Al-Thawabta) នាយកការិយាល័យប្រព័ន្ធផ្សព្វផ្សាយតំបន់ហ្កាហ្សា របស់ក្រុមហាម៉ាស បាននិយាយថា កងកម្លាំងអ៊ីស្រាអែល បានសម្លាប់ជនជាតិប៉ាឡេស្ទីនចំនួន ៤០០ នាក់នៅក្នុង និងជុំវិញមន្ទីរពេទ្យនោះ រួមទាំងវេជ្ជបណ្ឌិតស្ត្រីម្នាក់ និងកូនប្រុសដែលជាវេជ្ជបណ្ឌិតផងដែរនោះ ហើយបានបញ្ឈប់សកម្មភាព និងប្រតិបត្តិការរបស់មន្ទីរពេទ្យទាំងមូល៕

ចំហេះព្រៃដ៏ច្រើនកន្លែងមិនធ្លាប់មាន បានវាយប្រហារវេណេស៊ុយអេឡា ក្នុងអំឡុងពេលគ្រោះរាំងស្ងួត

យោងតាមទិន្នន័យដែលបានចេញផ្សាយកាលថ្ងៃចន្ទ (០១ មេសា) បានឱ្យដឹងថា ប្រទេសវេណេស៊ុយអេឡា កំពុងទប់ទល់នឹងចំហេះព្រៃដ៏ច្រើនសន្ធឹកសន្ធាប់មិនធ្លាប់មាន ខណៈគ្រោះរាំងស្ងួតដែលជំរុញដោយបម្រែបម្រួលអាកាសធាតុបានលេបត្របាក់ប្រទេសតំបន់ព្រៃអាម៉ាហ្សូនមួយនេះ។យោងតាមទីភ្នាក់ងារស្រាវជ្រាវ អ៊ីនប៉េ (Inpe) របស់ប្រេស៊ីល ដែលឃ្លាំមើលទ្វីបអាមេរិកខាងត្បូង បានឱ្យដឹងថា ផ្កាយរណបបានចុះបញ្ជីចំណុចចំហេះជាង ៣០.២០០ កន្លែងនៅក្នុងប្រទេសវេណេស៊ុយអេឡា ចាប់ពីខែមករា ដល់ខែមីនា ដែលជាកម្រិតខ្ពស់បំផុតសម្រាប់រយៈពេលនោះ ចាប់តាំងពីកំណត់ត្រាបានចាប់ផ្តើមក្នុងឆ្នាំ ១៩៩៩ មក។នោះរាប់បញ្ចូលទាំងចំហេះព្រៃនៅព្រៃអាម៉ាហ្សូន ក៏ដូចជាព្រៃឈើ និងវាលស្មៅផ្សេងទៀតរបស់ប្រទេស។ ក្រុមអ្នកស្រាវជ្រាវបាននិយាយថា ចំហេះដែលបង្កើតដោយមនុស្ស ដែលតែងតែធ្វើឡើងដើម្បីបោសសម្អាតដីសម្រាប់កសិកម្ម កំពុងរីករាលដាលដោយមិនអាចគ្រប់គ្រងបាន ដោយសារសីតុណ្ហភាពខ្ពស់ និងភ្លៀងធ្លាក់ទាបនៅភាគខាងជើងអាមេរិកខាងត្បូង ក៏ដូចជាកង្វះផែនការបង្ការជាដើម។នៅក្នុងប្រទេសវេណេសុយអេឡា ក្រុមពន្លត់អគ្គិភ័យប្រហែល ៤០០ នាក់បានប្រយុទ្ធនឹងចំហេះដ៏ធំមួយនៅថ្ងៃឈប់សម្រាកបុណ្យអ៊ីស្ទ័រ (Easter) នៅចុងសប្តាហ៍ ដែលគំរាមកំហែងដល់ឧទ្យានជាតិ ហិនរី ពីទៀ (Henri Pittier) ដែលជាតំបន់ឆ្នេរអភិរក្ស មានព្រៃឈើកម្រ នេះបើយោងតាមសេវាឧទ្យានជាតិ៕

ជនអន្តោប្រវេសន៍៤៨០នាក់ ត្រូវបានជួយសង្គ្រោះនៅឆ្នេរសមុទ្រប្រទេសលីប៊ី កាលពីសប្តាហ៍មុន

អង្គការទេសន្តប្រវេសន៍អន្តរជាតិ (IOM) កាលពីថ្ងៃចន្ទ បាននិយាយថា ជនអន្តោប្រវេសន៍ចំនួន ៤៨០នាក់ ត្រូវបានជួយសង្គ្រោះនៅឆ្នេរសមុទ្រប្រទេសលីប៊ី កាលពីសប្តាហ៍កន្លងទៅនេះ។អង្គការ IOM បាននិយាយនៅក្នុងសេចក្តីថ្លែងការណ៍ថា ចាប់ពីថ្ងៃទី ២៤ ដល់ថ្ងៃទី ៣០ ខែមីនា ឆ្នាំ២០២៤ ជនអន្តោប្រវេសន៍ចំនួន ៤៨០នាក់ ត្រូវបានស្ទាក់ចាប់ ហើយបានបញ្ជូនត្រឡប់ទៅកាន់ប្រទេសលីប៊ីវិញ។អង្គការ IOM បាននិយាយថា ជនអន្តោប្រវេសន៍ ដែលត្រូវបានជួយសង្គ្រោះរួមមានស្ត្រី ២៦ នាក់ និងកុមារ ៥ នាក់ ហើយសាកសពជនអន្តោប្រវេសន៍ពីរនាក់ត្រូវបានស្រង់យកមកវិញ។ជនអន្តោប្រវេសន៍សរុបចំនួន ៣.៧៩១នាក់ ត្រូវបានជួយសង្គ្រោះ ខណៈ១២០នាក់ បានស្លាប់ និង ២៥៣នាក់ផ្សេងទៀត បានបាត់ខ្លួននៅឆ្នេរសមុទ្រលីប៊ី។ជនអន្តោប្រវេសន៍គ្មានឯកសារជាច្រើននាក់ ដែលភាគច្រើនមកពីទ្វីបអាហ្រ្វិក បានជ្រើសរើសឆ្លងកាត់សមុទ្រមេឌីទែរ៉ាណេ ទៅកាន់ឆ្នេរសមុទ្រអឺរ៉ុបពីប្រទេសលីប៊ី ដែលទទួលរងភាពចលាចលចាប់តាំងពីឆ្នាំ ២០១១ នៅពេលដែលអតីតមេដឹកនាំចុងក្រោយ លោក មួម៉ាហ្គាដាហ្វី(Muammar Gaddafi) ត្រូវបានផ្ដួលរំលំ។រដ្ឋមន្ត្រីក្រសួងមហាផ្ទៃប្រទេសលីប៊ី លោក Emad al-Tarabelsi កាលពីពេលថ្មីៗនេះបាននិយាយព្រលយពាក្យថា ក្រសួងគ្រោងនឹងធ្វើមាតុភូមិនិវត្តន៍ជនអន្តោប្រវសេន៍ខុសច្បាប់ជាង ២០.០០០ នាក់ក្នុងឆ្នាំនេះ។

ម៉ិកស៊ិក ជម្លៀសប្រជាជនរបស់ខ្លួន៣៤នាក់ ចេញពីប្រទេសហៃទី គេចពីវិបត្តិអំពើហិង្សា

ប្រទេសម៉ិកស៊ិក បានជម្លៀសប្រជាជនរបស់ខ្លួនចំនួន ៣៤ នាក់ ដែលមានបំណងចាកចេញពីប្រទេសហៃទី ខណៈអំពើហឹង្សារបស់ក្រុមជនអន្ធពាល បានរាលដាលនៅក្នុងប្រទេសតំបន់សមុទ្រការ៉ាអ៊ីបមួយនេះ។ កងទ័ពជើងទឹកប្រទេសម៉ិកស៊ិក បានចែករំលែកវីដេអូបង្ហាញពីឧទ្ធម្ភាគចក្រ ចុះចតនៅចំណតឧទ្ធម្ភាគចក្ររបស់ស្ថានទូតសាធារណរដ្ឋដូមីនីក ក្នុងទីក្រុង ព័រ អូប្រាំង ដើម្បីទទួលយកប្រជាជនម៉ិកស៊ិក ដែលរួមមានអនីតិជន៧នាក់។ឧទ្ធម្ភាគចក្រ បាននាំយកអ្នកជម្លៀសខ្លួនទៅកាន់នាវាមួយគ្រឿងរបស់កងទ័ពជើងទឹក ដែលដឹកជនជាតិរបស់ខ្លួនត្រឡប់ទៅប្រទេសម៉ិកស៊ិកវិញ។ រដ្ឋាភិបាលប្រទេសម៉ិកស៊ិក បាននិយាយនៅក្នុងសេចក្តីថ្លែងការណ៍ថា ប្រតិបត្តិការពិសេសនេះត្រូវបានដាក់ពង្រាយ ដោយសារតែអាកាសយានដ្ឋានអន្តរជាតិ របស់ប្រទេសហៃទីត្រូវបានគ្រប់គ្រងដោយខុសច្បាប់ ដោយក្រុមប្រដាប់អាវុធ។ការចាកចេញរបស់ជនជាតិបរទេសពីប្រទេសហៃទី បានកើនឡើងនាពេលថ្មីៗនេះ ខណៈអនាគតនយោបាយរបស់ប្រទេសនេះ ស្ថិតក្នុងភាពមិនប្រាកដប្រជា ដោយក្រុមជនអន្ធពាលប្រដាប់អាវុធ បានពង្រីកការគ្រប់គ្រងរបស់ពួកគេនៅរដ្ឋធានី និងនៅតំបន់ដាច់ឆ្ងាយបន្ថែមទៀត។ ជម្លោះនេះ បានសម្លាប់មនុស្សរាប់ពាន់នាក់ និងរាប់សែននាក់បានភៀសខ្លួន ហើយការវាយប្រហារជាបន្តបន្ទាប់ រួមមានទាំង ការវាយឆ្មក់ទៅលើប៉ុស្តិ៍នគរបាល និងអាកាសយានដ្ឋានអន្តរជាតិ នាំឱ្យមានការផ្អាកជើងហោះហើរពាណិជ្ជកម្មជាច្រើនជើង។

នាវាដំបូងគេ បានឆ្លងកាត់ផ្លូវទន្លេជាបណ្តោះអាសន្ន បន្ទាប់ពីការបាក់ស្ពាននៅទីក្រុង Baltimore

យោងតាមឆ្មាំល្បាតឆ្នេរសហរដ្ឋអាមេរិក បាននិយាយថា នាវា ថាក់បូត គ្រីស្តាល់ ខូសថ៍(Tugboat Crystal Coast) ដែលមានផ្ទុកប្រេង គឺជានាវាដំបូងគេ ដែលធ្វើដំណើរឆ្លងកាត់ផ្លូវទន្លេដែលទើបបង្កើតថ្មី ជាបណ្តោះអាសន្ន នៅទីក្រុង Baltimore បន្ទាប់ពីការបាក់រលំស្ពាន Key Bridge ។ នាវានេះ ធ្វើដំណើរទៅកាន់មូលដ្ឋានទ័ពអាកាស Dover ដោយមានផ្ទុកប្រេងឥន្ធនៈ។ផ្លូវឆ្លងកាត់គ្រាអាសន្ន មានទទឹង ២៦៤ ហ្វីត និងជម្រៅ ១១ហ្វីត ត្រូវបានសម្អាតកាលពីថ្ងៃចន្ទ ដើម្បីអនុញ្ញាតឱ្យនាវាសំខាន់ៗឆ្លងកាត់តាមដងទន្លេ Patapsco ជុំវិញបំណែកបាក់បែកនៅកន្លែងគ្រោះមហន្តរាយស្ពានបាក់។ផ្លូវទឹកជម្រៅ១៥ហ្វីត ទីពីរ ត្រូវបានគេរំពឹងថានឹងបើកក្នុងពេលឆាប់ៗនេះដើម្បីអនុញ្ញាតឱ្យនាវាសមុទ្រចូលទៅកាន់កំពង់ផែ Baltimore រួមជាមួយនឹងផ្លូវទឹកទីបីដែលមានជម្រៅកាន់តែជ្រៅជាងនេះ។អភិបាលរដ្ឋ លោក Wes Moore បាននិយាយកាលពីថ្ងៃច័ន្ទថា ថ្ងៃនេះជាព្រឹត្តិការណ៍ដ៏សំខាន់មួយនៅក្នុងដំណើរការនៃការចាប់ផ្តើមទាញយកបំណែកស្ពានចេញ ដោយចាប់ផ្តើមបើកបណ្តាញផ្លូវទឹក។ លោក ដាវីដ អូ ខន់នែល (David O'Connell) ប្រធានក្រុមឆ្មាំល្បាតឆ្នេរអាមេរិក ដែលជាអ្នកសម្របសម្រួលនៅកន្លែងកើតហេតុរបស់សហព័ន្ធ ទទួលបន្ទុកការឆ្លើយតបរួមចំពោះការបាក់ស្ពាន បាននិយាយនៅក្នុងបទសម្ភាសន៍ផ្តាច់មុខជាមួយប្រព័ន្ធផ្សព្វផ្សាយ CBS News ថា បណ្តាញផ្លូវទឹកជំនួយត្រូវបានគ្រោងនឹងបើកនៅតាមបណ្តោយភាគឦសាននៃផ្លូវទឹក និងមួយខ្សែទៀតនឹងដំណើរការតាម បណ្តោយភាគខាងត្បូង។

រដ្ឋាភិបាលអ៊ីស្រាអែល អនុម័តច្បាប់បិទសារព័ត៌មាន Al Jazeera ជាបណ្ដោះអាសន្ន

សភារបស់អ៊ីស្រាអែល បានអនុម័តច្បាប់មួយកាលពីថ្ងៃចន្ទ ដោយត្រួសត្រាយផ្លូវ ដើម្បីបិទបណ្តាញព័ត៌មាន Al Jazeera ដែលមានមូលដ្ឋាននៅប្រទេសកាតា ក្រោមច្បាប់អនុញ្ញាតឲ្យមានការហាមឃាត់ បណ្តោះអាសន្ននៃបណ្តាញព័ត៌មានបរទេសដែលរដ្ឋាភិបាលចាត់ទុកថា ជាការគំរាមកំហែងដល់សន្តិសុខជាតិ។នាយករដ្ឋមន្ត្រីអ៊ីស្រាអែល លោក បេនចាមីន ណេតាន់យ៉ាហ៊ូ (Benjamin Netanyahu) បាននិយាយថា លោកនឹង «ចាត់វិធានការភ្លាមៗ» ដើម្បីអនុវត្តច្បាប់ប្រឆាំងនឹងសារព័ត៌មាន Al Jazeera ដោយចោទប្រកាន់បណ្តាញព័ត៌មានដែលផ្តល់មូលនិធិដោយប្រទេសកាតាថា បានគាំទ្រការវាយប្រហារថ្ងៃទី៧ ខែតុលារបស់ក្រុមហាម៉ាសប្រឆាំងនឹងអ៊ីស្រាអែល និងបម្រើជាភ្នាក់ងារសម្រាប់អង្គការភេរវកម្មដែលកំណត់ដោយសហរដ្ឋអាមេរិក។លោកណេតាន់យ៉ាហ៊ូ បានបង្ហោះជាភាសាហ៊ីប្រូ (Hebrew) នៅលើបណ្តាញសង្គមXថា៖«បណ្តាញសារព័ត៌មានភេរវកម្ម Al Jazeera នឹងលែងចាក់ផ្សាយពីអ៊ីស្រាអែលទៀតហើយ។ ខ្ញុំមានបំណងធ្វើសកម្មភាពភ្លាមៗដោយអនុលោមតាមច្បាប់ថ្មី ដើម្បីបញ្ឈប់សកម្មភាពរបស់បណ្តាញសារព័ត៌មាននេះ»។ សារព័ត៌មាន Times of Israel បានរាយការណ៍ថា ច្បាប់នេះ បានអនុម័តដោយសភាអ៊ីស្រាអែល ដោយមានសំឡេងគាំទ្រ៧១សំឡេង និងសំឡេងប្រឆាំង១០សំឡេង នៅក្នុងការអានលើកទីពីរ និងទីបីរបស់ខ្លួននៅក្នុងកិច្ចប្រជុំពេញអង្គនៅក្នុងសភា។ ការសម្រេចឲ្យបិទបណ្តាញសារព័ត៌មានបរទេសនេះដែលចាត់ទុកថាជាការគំរាមកំហែងសន្តិសុខជាតិ អាចអនុវត្តបានតែ៤៥ថ្ងៃប៉ុណ្ណោះ ប៉ុន្តែអាចបន្តជាថ្មីសម្រាប់រយៈពេល ៤៥ ថ្ងៃទៀត។ ច្បាប់នេះ នឹងផុតកំណត់នៅថ្ងៃទី៣១ ខែកក្កដា។ទាំងអ៊ីស្រាអែល និងសហរដ្ឋអាមេរិក សុទ្ធតែរិះគន់ចំពោះការតាមយកព័ត៌មានរបស់សារព័ត៌មាន Al Jazeera លើអ៊ីស្រាអែលយ៉ាងទូលំទូលាយ និងការរាយការណ៍អំពីសង្រ្គាមរបស់អ៊ីស្រាអែលប្រឆាំងនឹងក្រុមហាម៉ាស ចាប់តាំងពីការវាយប្រហារថ្ងៃទី៧ ខែតុលា។ រដ្ឋមន្ត្រីការបរទេសអាមេរិក លោកអង់តូនី ប្ល៊ីនខិន (Antony Blinken) បានអំពាវនាវឲ្យរដ្ឋាភិបាលកាតាកាត់បន្ថយការញុះញង់ប្រឆាំងនឹងអ៊ីស្រាអែលនៅក្នុងការផ្សាយរបស់សារព័ត៌មាន Al Jazeera អំពីផលវិបាកនៃការវាយប្រហារខែតុលា។ប៉ុន្តែរដ្ឋបាលលោកបៃដិន បាននិយាយថា ខ្លួនមានការព្រួយបារម្ភចំពោះការអនុម័តច្បាប់របស់អ៊ីស្រាអែល។

ការតវ៉ានៅក្រុងហ្ស៉េរុយសាឡឹមបង្ហាញពីកំហឹងប្រឆាំងនឹងលោក Netanyahu លែងរង់ចាំដល់សង្គ្រាមចប់ទៀតហើយ

បាតុកម្មដ៏ធំនៅមុខសភា(Knesset)និងការិយាល័យរដ្ឋាភិបាលកាលពីយប់ថ្ងៃអាទិត្យនៅក្នុងទីក្រុងហ្ស៉េរុយសាឡឹម និងតេល អាវីវ គឺជាអ្វីមួយដែលប្រៀបបានទៅនឹការតស៊ូដ៏ធំប្រឆាំងនឹងកែប្រែប្រព័ន្ធតុលាការកាលពីឆ្នាំមុន។ នេះគឺជាការប្រមូលផ្ដុំគ្នាដ៏ច្រើននិងការរួមកម្លាំងដ៏ធំ ដែលជាទូទៅ អ្នកបោះឆ្នោតសម្រាប់គណបក្សអ្នកកណ្តាលនិយម មេរ៉េតស៍ និងការងារ (Meretz and Labor) ត្រូវបានគេមើលឃើញនៅក្នុងបាតុកម្ម នៅពេលដែល សភាបានលុបចោលស្តង់ដារសមហេតុផលរបស់តុលាការជាន់ខ្ពស់កាលពីរដូវក្តៅឆ្នាំមុន។ នេះគឺជាការតាំងចិត្តដូចគ្នា ប្រឆាំងនឹងនាយករដ្ឋមន្ត្រី ដែលធ្លាប់ព្យាយាមលុបបំបាត់លទ្ធិប្រជាធិបតេយ្យ ហើយឥឡូវនេះបានដឹកនាំសង្គ្រាមដែលនាំឲ្យមានបញ្ហាកាន់តែស្មុគស្មាញ ដោយមានចំណាប់ខ្មាំង ១៣៤ នាក់នៅតែត្រូវបានឃុំខ្លួននៅក្នុងដែនដីហ្កាហ្សា។ សម្រាប់បាតុករដ៏ច្រើន ដែលបានសម្រុកទៅកាន់ផ្លូវកាបលែន(Kaplan)នៃទីក្រុងហ្ស៉េរុយឡឹម (Jerusalem)ដូចជាទឹកបាក់ទំនប់ពីទីក្រុងស៊ីណេម៉ា(Cinema)ឆ្លងកាត់សភា ទៅកាន់បណ្ណាល័យជាតិថ្មី គឺជាប្រភេទនៃការជួបជុំគ្នាឡើងវិញ បន្ទាប់ពីការផ្អាកអស់រយៈពេល៦ខែ។ទោះយ៉ាងណា មានការខ្វែងគំនិតគ្នាមួយចំនួនរវាងបាតុកម្មប្រឆាំងនឹងការកែប្រែប្រព័ន្ធតុលាការ និងសកម្មភាពដ៏ធំប្រឆាំងលោក Netanyahu និងរដ្ឋាភិបាលរបស់លោក កាលពីថ្ងៃអាទិត្យ។ ទីមួយ នៅក្នុងការតវ៉ាប្រឆាំងនឹងផ្លាស់ប្ដូរអ្នកនយោបាយកំពុងស្ថិតក្នុងតំណែងដោយមិនត្រូវបានអញ្ជើញឲ្យនិយាយនៅលើឆាក។ ទីពីរ ដោយសារកាលៈទេសៈ បន្ទាប់ពីគ្រោះមហន្តរាយថ្ងៃទី ៧ ខែតុលា របៀបវារៈទាំងមូលបានផ្លាស់ប្តូរ ជាមួយនឹងការដោះស្រាយ និងកំហឹងបន្ថែម។ ការកែប្រែច្បាប់ គឺកើតចេញពីការចរចា។ ឥឡូវនេះបញ្ហាគឺការរំដោះចំណាប់ខ្មាំង វិបត្តិកើតចេញពីការលើកលែងការកេណ្ឌកម្លាំងបុរសជ្វីហ្វជ្រុលនិយមអូសតូដុកមិនឲ្យចូលបម្រើយោធា ការប្រព្រឹត្តរបស់អ្នកនយោបាយ និងការអំពាវនាវដោយទទូចឲ្យរៀបចំការបោះឆ្នោតថ្មី និងទាមទារឲ្យលោក Netanyahu លាលែងពីតំណែង៕

បណ្ដាញសង្គម

ព័ត៌មានថ្មីៗ

ហ្គាសឡើងថ្លៃ ពេលក្រុមហ៊ុន QatarEnergy ផ្អាកការផលិតឧស្ម័នធម្មជាតិ LNG ក្រោយការវាយប្រហាររបស់អ៊ីរ៉ង់

WHO៖ មន្ទីរពេទ្យ នៅទីក្រុងតេអេរ៉ង់ ត្រូវបានជម្លៀសចេញ បន្ទាប់ពីមានការផ្ទុះក្បែរនោះ

សមាជិកយោធាអាមេរិកទី៤ ត្រូវបានសម្លាប់ អំឡុងប្រតិបត្តិការកំពុងបន្តមាននៅអ៊ីរ៉ង់

យន្តហោះអាមេរិកចាកចេញ ក្រោយអេស្ប៉ាញ បញ្ជាក់ថា មូលដ្ឋានមិនអាចត្រូវបានប្រើ ដើម្បីវាយប្រហារអ៊ីរ៉ង់ទេ

«អង្គការហេឡែន ខេលល័រ អន្តរជាតិ បេ្តជ្ញាបន្តសហការជាមួយកម្ពុជា ដើម្បីចូលរួមចំណែកក្នុងការលើកកម្ពស់អាហារូបត្ថម្ភ និងសន្តិសុខស្បៀង»

ឆ្មាំអ៊ីរ៉ង់៖ ការិយាល័យរបស់លោក Netanyahu និងទីស្នាក់ការកណ្តាលមេបញ្ជាការកងទ័ពអាកាស ត្រូវបានកំណត់គោលដៅ

CENTCOM៖ យន្តហោះចម្បាំងអាមេរិក ៣គ្រឿង ត្រូវបានប្រព័ន្ធការពារដែនអាកាសគុយវ៉ែតច្រលំបាញ់ទម្លាក់

កងទ័ពអ៊ីស្រាអែល៖ «ការវាយប្រហារទ្រងទ្រាយធំ» ថ្មី នៅ «ចំណុចកណ្ដាលទីក្រុងតេអេរ៉ង់» បានចាប់ផ្ដើម

ហាងបិទទ្វារ ដងផ្លូវមានសភាពស្ងប់ស្ងាត់នៅទីក្រុងតេអេរ៉ង់ បន្ទាប់ពីការស្លាប់របស់លោក Khamenei

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877