BTV NEWS

កម្ពុជាសហការជាមួយបណ្តាប្រទេសជាដៃគូរបង្ក្រាបករណីដឹកជញ្ជូនគ្រឿងញៀនឆ្លងដែនក្នុងឆ្នាំ២០២៥ ទទួលបានលទ្ធផលល្អ

នៅឆ្នាំ២០២៥ មន្ទីរប្រឆាំងបទល្មើសគ្រឿងញៀនបង្ក្រាបបទល្មើសគ្រឿងញៀនជាង ៩ពាន់ករណី ឃាត់ខ្លួនជនសង្ស័យជាង ២ម៉ឺននាក់ និងចាប់យកសារធាតុញៀនជាង ៧តោន

រដ្ឋបាលរាជធានីភ្នំពេញ បង្ក្រាបទីតាំងហ្គេមអនឡាញខុសច្បាប់ក្នុងខណ្ឌចំការមនឃាត់ខ្លួនជនជាតិឥណ្ឌូណេស៊ី ២៤នាក់

សមត្ថកិច្ចចម្រុះបង្ក្រាបករណីបង្ខាំងមនុស្ស និងឆែកឆេរទីតាំងសង្ស័យ Online Scam សង្គ្រោះជនរងគ្រោះម្នាក់ និងឃាត់ខ្លួនជនសង្ស័យជាជនជាតិបង់ក្លាដេសដូចគ្នាចំនួន២នាក់នៅខណ្ឌសែនសុខ

សន្តិសុខ និង សង្គម

ក្រុមគ្រួសារជនរងគ្រោះបាក់ស្ពាននៅអាមេរិក ជំរុញឲ្យបន្តកិច្ចខិតខំប្រឹងប្រែងស្វែងរកអ្នកបាត់ខ្លួន

បងប្រុសរបស់ជនអន្តោប្រវេសន៍អាមេរិកកណ្ដាលម្នាក់ ដែលកំពុងបាត់ខ្លួន នៅក្នុងហេតុការណ៍បាក់ស្ពាន ក្នុងទីក្រុងបាល់ទីម័រ (Baltimore) បានស្នើសហរដ្ឋអាមេរិក កាលពីថ្ងៃព្រហស្បតិ៍ ទី២៨មីនា ឲ្យបន្តស្វែងរកសាកសព ក្រោយក្រុមអាជ្ញាធរ និយាយថា ពួកគេនឹងផ្អាកប្រតិបត្តិការសង្រ្គោះ ព្រោះតែស្ថានភាពគ្រោះថ្នាក់ខ្លាំងពេកនៅក្នុងសមុទ្រ។ លោក ម៉ាទីន សូហ្សូ (Martin Suazo) ជាបងប្រុសរបស់បុរសជនជាតិហុងឌុយរ៉ាស់ លោកម៉េន័រសូហ្ស៊ូ (Maynor Suazo) ដែលបានធ្លាក់ចូលក្នុងទឹកត្រជាក់ស្ទើរកកនៅទន្លេ ផាតាបស្កូ( Patapsco) នៅពេលនាវាដឹកទូកុងតឺន័រ បានបុកសរសរបង្គោលទ្រស្ពាន ហ្វ្រង់ស៊ីស ស្កុត ឃី (Francis Scott Key Bridge) បានអំពាវនាវឲ្យក្រុមអាជ្ញាធរអាមេរិក កុំបញ្ឈប់ការស្វែងរក។ លោក ម៉ាទីន បានប្រាប់សារព័ត៌មាន Reuters កាលពីថ្ងៃព្រហស្បតិ៍ថា យើងនៅតែរង់ចាំទាំងភាពជឿជាក់ និងសង្ឃឹមថា ពួកគេនឹងរកឃើញសាកសពប្អូនប្រុសរបស់លោក។ លោកម៉េន័រ វ័យ៣៩ឆ្នាំ មកពីទីក្រុង អាហ្សាកូលផា(Azacualpa) ក្នុងប្រទេសហុងឌុយរ៉ាស់ ភាគខាងលិច និងបានរស់នៅក្នុងសហរដ្ឋអាមេរិក រយៈពេល១៨ឆ្នាំ ហើយ ។ ក្រុមអ្នកមុជទឹកកាលពីថ្ងៃទី២៧ខែមីនា សប្ដាហ៍នេះដែរ បានស្រង់សាកសព២នាក់ ក្នុងចំណោមកម្មករ បាត់ខ្លួន៦នាក់។កម្មករ៤នាក់ ដែលជាផ្នែកមួយនៃក្រុមការងារជួសជុលផ្លូវលើស្ពាននោះនៅតែបាត់ខ្លួននៅឡើយ និងត្រូវបាន សន្មតថាបានស្លាប់ហើយ៕

ក្រុមបាតុករ រំខានដល់ការរៃអង្គាសប្រាក់របស់លោកBiden លោកObama និងលោក Clinton

ប្រធានាធិបតីសហរដ្ឋអាមេរិក លោក Joe Biden និងអ្នកកាន់តំណែងមុនមកពីគណបក្សប្រជាធិបតេយ្យ លោក Barack Obama រួមទាំងដោយអតីតប្រធានាធិបតី លោក Bill Clinton និងក្រុមរៃអង្គាសល្បីៗបានមកចូលរួមក្នុងព្រិត្តិការណ៍រៃអង្គាសប្រាក់កាលពីថ្ងៃព្រហស្បតិ៍ ដែលអ្នករៀបចំបាននិយាយថា រៃអង្គាសប្រាក់បានជាង ២៥លានដុល្លារសម្រាប់យុទ្ធនាការបោះឆ្នោតឡើងវិញនៅសហរដ្ឋអាមេរិក របស់លោក Biden ។ លោក Biden បានមកដល់ជាមួយលោក Obama តាមយន្តហោះ Air Force One កាលពីរសៀលថ្ងៃព្រហស្បតិ៍ ហើយលោក Clinton បានចូលរួមក្នុងការពិភាក្សាមួយ ដែលសម្របសម្រួលដោយពិធីករលោក Stephen Colbert ក្នុងកម្មវិធី «The Late Show» នៅសាលតន្ត្រី Radio City នៅចំពោះមុខភ្ញៀវរាប់ពាន់នាក់។ ប៉ុន្តែកម្មវិធីរៃអង្គាសប្រាក់ ត្រូវបានរំខានជាបន្តបន្ទាប់ដោយការតវ៉ានៅក្នុងសាលដ៏ធំ ខណៈអ្នកចូលរួមបានក្រោកឡើងដើម្បីស្រែកនៅក្នុងកិច្ចពិភាក្សានោះ ដោយសំដៅលើការគាំទ្ររបស់លោក Biden ចំពោះអ៊ីស្រាអែល ក្នុងសង្គ្រាមជាមួយក្រុមហាម៉ាស ដែលបានសម្លាប់មនុស្សជាង ៣០.០០០នាក់ នៅតំបន់ហ្កាហ្សា។ លោក អូបាម៉ា បាននិយាយថា លោក Biden មាន «ភាពច្បាស់លាស់ខាងសីលធម៌» លើបញ្ហាប្រទេសអ៊ីស្រាអែល ហើយមានឆន្ទៈស្តាប់គ្រប់ភាគី នៅក្នុងការជជែកដេញដោលនេះ និងស្វែងរកមូលដ្ឋានរួម។ នៅពេលដែលបាតុករម្នាក់នៅខាងក្នុងសាលមហោស្រព បានរំខានលោកអូបាម៉ា អតីតប្រធានាធិបតីរូបនេះ បាននិយាយតបវិញភ្លាមៗថា «អ្នកមិនអាចគ្រាន់តែនិយាយ និងមិនស្តាប់នោះទេ នោះហើយជាអ្វីដែលភាគីម្ខាងទៀតធ្វើ»។លោក អូបាម៉ា បាននិយាយថា យុទ្ធនាការបោះឆ្នោតថ្មីរបស់លោក Biden មិនមែនគ្រាន់តែជាករណីប្រឆាំងលោក Trump ប៉ុណ្ណោះទេ ប៉ុន្តែជាករណីវិជ្ជមានសម្រាប់លោក Biden ដែលបានពង្រីកការថែទាំសុខភាព។ លោក Clinton បាននិយាយថា តួលេខសេដ្ឋកិច្ចរបស់លោក Biden បានវ៉ាដាច់រដ្ឋបាលរបស់លោក Trump យ៉ាងខ្លាំង។ លោក Clinton ជឿជាក់លើការរក្សាបានតួលេខនេះ ហើយលោកBiden ធ្វើល្អសម្រាប់អាមេរិក ហើយសមនឹងទទួលបានអាណត្តិមួយទៀត។សំបុត្រសម្រាប់ចូលរួមព្រឹត្តិការណ៍របស់លោក Biden កាលពីថ្ងៃព្រហស្បតិ៍ នាំមកនូវការភ្ញាក់ផ្អើល ដល់កិច្ចខិតខំប្រឹងប្រែងបោះឆ្នោតថ្មីរបស់លោក មានតម្លៃចន្លោះពី ២៥០ ដុល្លារទៅ ៥០០.០០០ ដុល្លារ នេះបើយោងតាមសមាជិកគណបក្សប្រជាធិបតេយ្យម្នាក់ដែលដឹងអំពីផែនការនេះ។មនុស្សជាង ៥ពាន់ ត្រូវបានគេរំពឹងថាចូលរួមព្រឹត្តិការណ៍នេះ ដែលពុំមានការចាក់ផ្សាយតាមទូរទស្សន៍នោះទេ ប៉ុន្តែយុទ្ធនាការនេះមានផែនការបង្ហោះឃ្លីប នៅលើប្រព័ន្ធផ្សព្វផ្សាយសង្គម។

អ៊ុយក្រែន៖ ការបាញ់មីស៊ីលប្រឆាំងនឹងកងនាវាសមុទ្រខ្មៅរបស់រុស្ស៊ី ទទួលបានជោគជ័យលើសពីការគិតទៅទៀត

អ៊ុយក្រែន បានអះអាងថា ការវាយប្រហារនៅចុងសប្តាហ៍របស់ខ្លួនលើកងនាវាចរណ៍សមុទ្រខ្មៅរបស់រុស្ស៊ីទទួលបានជោគជ័យជាងអ្វីដែលខ្លួនបានបង្ហាញពីមុន ជាមួយនឹងការខូចខាតដល់នាវាពីរគ្រឿងបន្ថែម ទៀត។កងទ័ពជើងទឹកអ៊ុយក្រែន បាននិយាយកាលពីថ្ងៃអាទិត្យថា ខ្លួនបានវាយប្រហារលើនាវាដែលកំពុងចត ពីរគ្រឿងរបស់រុស្ស៊ីគឺ Yamal និង Azov នៅក្នុងតំបន់គ្រីម៉េដែលកាន់កាប់ដោយរុស្ស៊ី ក្នុងការវាយប្រហារមួយ កាលពីថ្ងៃសៅរ៍។ប៉ុន្តែនៅក្នុងការធ្វើបច្ចុប្បន្នភាពកាលពីថ្ងៃអង្គារ កងទ័ពជើងទឹក បាននិយាយថា ខ្លួនក៏បានធ្វើឲ្យខូចខាតដល់នាវាពីរគ្រឿងផ្សេងទៀតគឺ «នាវាចារកម្ម Ivan Khurs និងនាវាចូលចតដ៏ធំ គឺ Konstantin Olshansky»។ក្រសួងការពារជាតិអ៊ុយក្រែន បាននិយាយថា មីស៊ីលប្រឆាំងនាវា Neptune ដែលផលិតក្នុងស្រុក ត្រូវបានប្រើ ដើម្បីវាយប្រហារលើនាវា Konstantin Olshansky។នាវានេះ ត្រូវបានរឹបអូសពីអ៊ុយក្រែន ក្នុងឆ្នាំ ២០១៤ នៅពេលដែលប្រទេសរុស្ស៊ី បានបញ្ចូលឧបទ្វីបគ្រីម៉េជាឧបសម្ព័ន្ធរបស់ខ្លួន ដូចដែលលោក Jake Epstein មកពីសារព័ត៌មាន Business Insider បានរាយការណ៍ពីមុននោះ។សារព័ត៌មាន The Moscow Times បានរាយការណ៍ថា អ្នកនាំពាក្យរបស់កងទ័ពជើងទឹកអ៊ុយក្រែន បានពណ៌នានាវានេះថា «មិនអាចដំណើរការ» បន្ទាប់ពីការវាយប្រហារ កាលពីចុងសប្តាហ៍។សារព័ត៌មាន Business Insider មិនអាចបញ្ជាក់ដោយឯករាជ្យពីការវាយប្រហារនោះទេ ហើយខ្លួនក៏មិនច្បាស់ថា នាវាទាំងនោះ ស្ថិតនៅក្នុងរដ្ឋអ្វីដែរ។

រុស្ស៊ី៖ ភស្តុតាងបង្ហាញពីទំនាក់ទំនងរវាងពួកភេរវករដែលវាយប្រហារទីក្រុងមូស្គូ ជាមួយអ៊ុយក្រែន

គណៈកម្មាធិការស៊ើបអង្កេតរុស្ស៊ី បាននិយាយកាលពីថ្ងៃព្រហស្បតិ៍ (២៨ មីនា) ថាខ្លួនបានរកឃើញភស្តុតាងដែលចងភ្ជាប់ក្រុមភេរវករក្នុងការវាយប្រហាររបស់សាលប្រគុំតន្រ្តី ក្រូកាស (Crocus) នៅជាយក្រុងមូស្គូ ដែលសម្លាប់មនុស្សលើសពី ១៤០ នាក់ ជាមួយ «ក្រុមអ្នកជាតិនិយមអ៊ុយក្រែន» ខណៈអាមេរិក ហៅការអះអាងនេះថាជារឿងផ្ដេសផ្ដាស។គណៈកម្មាធិការបាននិយាយនៅលើបណ្ដាញផ្ញើសារតេលេក្រាម ថា «បន្ទាប់ពីធ្វើការស៊ើបអង្កេតលើក្រុមភេរវករដែលត្រូវបានឃុំខ្លួន សិក្សាឧបករណ៍បច្ចេកទេសដែលរឹបអូសពីពួកគេ និងការវិភាគព័ត៌មានអំពីប្រតិបត្តិការហិរញ្ញវត្ថុ មានភស្តុតាងបង្ហាញពីទំនាក់ទំនងរបស់ពួកគេជាមួយនឹងអ្នកជាតិនិយមអ៊ុយក្រែន»។គណៈកម្មាធិការនេះបាននិយាយថា ខ្លួនបានបញ្ជាក់ពីទិន្នន័យដែលបង្ហាញថា ភេរវករបានទទួល «ចំនួនទឹកប្រាក់ដ៏ច្រើន និងរូបិយប័ណ្ណគ្រីបតូពីអ៊ុយក្រែន ដែលត្រូវបានប្រើក្នុងការរៀបចំឧក្រិដ្ឋកម្ម»។គណៈកម្មាធិការនេះក៏បានបញ្ជាក់ផងដែរថា ជនសង្ស័យម្នាក់ទៀតដែលជាប់ពាក់ព័ន្ធក្នុងគម្រោងហិរញ្ញប្បទានភេរវករ ត្រូវបានគេកំណត់អត្តសញ្ញាណ និងឃាត់ខ្លួន។អ្នកនាំពាក្យក្រុមប្រឹក្សាសន្តិសុខជាតិអាមេរិក បាននិយាយថា ក្រុមមន្រ្តីរុស្ស៊ី ហាក់ពូកែវោហាសាស្រ្តក្នុងការឃោសនាផ្ដេសផ្ដាសជាខ្លាំងជុំវិញបញ្ហានេះ៕

កម្លាំងនគរបាលក្រុងបូកគោ ឃាត់ខ្លួនក្រុមស្ទាវបង្ហោះម៉ូតូ៨នាក់ អប់រំ និងធ្វើកិច្ចសន្យាបញ្ឈប់សកម្មភាពទាំងនេះ

កំពត៖ កម្លាំងនគរបាលនៃអធិការដ្ឋានក្រុងបូកគោ កាលពីថ្ងៃទី២៨ ខែមីនា ឆ្នាំ២០២៤ បានឃាត់ខ្លួនក្រុមក្មេងស្ទាវចំនួន៨នាក់ បន្ទាប់ពីពួកគេបានបង្ហោះម៉ូតូប្រសេចប្រសាចលើដងផ្លូវជាតិលេខ៣ ស្ថិតក្នុងសង្កាត់បឹងទូក បង្កភាពភ័យខ្លាចដល់ពលរដ្ឋ និងភ្ញៀវទេសចរកំពុងធ្វើដំណើរ។ មន្ត្រីនគរបាលក្រុងបូកគោបានប្រាប់ឱ្យដឹងថា កាលពីវេលាម៉ោង១១ និង៣០នាទីព្រឹកថ្ងៃទី២៨ ខែមីនា សមត្ថកិច្ចបានទទួលសេចក្តីរាយការណ៍អំពីសកម្មភាពក្រុមក្មេងបង្ហោះម៉ូតូក្នុងភូមិរលួស សង្កាត់បឹងទូកបង្កការភ័យខ្លាចដល់អ្នកដំណើរទៅមក។ ភ្លាមៗ សមត្ថកិច្ចក៏ចេញដេញតាមរហូតឃាត់ខ្លួនក្រុមក្មេងស្ទាវទាំងនោះបាន៨នាក់ រួចនាំមកអធិការដ្ឋានដើម្បីបំពេញសំណុំបែបបទ។ ប្រភពដដែលបានបញ្ជាក់ថា ក្រុមយុវវ័យទាំងនោះមានអាយុចាប់ពី១៣ឆ្នាំដល់១៨ឆ្នាំ ដោយ៧នាក់មកពីខេត្តព្រះសីហនុ និងម្នាក់ទៀតមកពីខេត្តត្បូងឃ្មុំ។ ផ្អែកតាមបទបញ្ជារបស់លោកឧត្តមសេនីយ៍ទោស្នងការខេត្តកំពត ក្រោយពីសាកសួររួច មន្ត្រីនៃអធិការដ្ឋានក្រុងបូកគោបានអប់រំណែនាំ និងឱ្យធ្វើកិច្ចសន្យាបញ្ឈប់បង្កអុកឡុកតាមទីសាធារណៈបន្តទៀត។ សមត្ថកិច្ចបានបន្តថា ក្នុងចំណោមនោះ ៣នាក់មកពីខេត្តព្រះសីហនុត្រូវបានអនុញ្ញាតឱ្យអាណាព្យាបាលធានាយកទៅលំនៅស្ថានវិញ។ ចំណែក៥នាក់ទៀតគឺបន្តឃាត់ខ្លួនបណ្ដោះអាសន្ននៅអធិការដ្ឋានក្រុងបូកគោ ២យប់ទើបអនុញ្ញាតឱ្យអាណាព្យាបាលធានាយកទៅលំនៅស្ថានវិញ៕

ការតវ៉ារបស់ក្រុមអ្នកបើករថយន្តក្រុងនៅទីក្រុងសេអ៊ូល បានបញ្ចប់ក្រោយរដ្ឋាភិបាលយល់ព្រមដំឡើងប្រាក់ខែ

ក្រុមអ្នកបើកបររថយន្តក្រុងនៅក្នុងទីក្រុងសេអ៊ូល បានបញ្ចប់ការតវ៉ារយៈពេលមួយម៉ោង កាលពីថ្ងៃទី២៨មីនា បន្ទាប់ពីកិច្ចព្រមព្រៀងមួយ ត្រូវបានសម្រេច រវាងសហជីពរថយន្តក្រុងរបស់រដ្ឋធានីកូរ៉េខាងត្បូង និងបុគ្គលិករបស់ខ្លួន ស្ដីពីការដំឡើងប្រាក់ឈ្នួល ហើយការបញ្ចប់កូដកម្មនេះ បានធ្វើឲ្យចរាចរណ៍រដ្ឋក្នុងរដ្ឋធានីមានប្រជាជនជាង៩លាននាក់ បានធូរស្រាលឡើងវិញ។ រដ្ឋាភិបាលក្រុងសេអ៊ូល បាននិយាយថា សហជីពការងាររថយន្តក្រុងសេអ៊ូល និងបុគ្គលិក របស់ខ្លួន បានព្រមព្រៀងដំឡើងប្រាក់ឈ្នួល៤,៤៨% បន្ទាប់ពីការចរចា ទន្ទឹមនឹងប្រតិបត្តិការដឹកជញ្ជូនសាធារណៈបានត្រឡប់ទៅរកសភាពដើមវិញក្រោយការព្រមព្រៀង។ ដើមឡើយក្រុមសហជីព បានស្នើឲ្យមានការដំឡើងប្រាក់ខែជិត១៣% ។ កូដកម្មទ្រង់ទ្រាយធំ ធ្វើឡើងដោយក្រុមអ្នកបើកបររថយន្តក្រុងរបស់រដ្ឋធានីនេះ គឺជាលើកដំបូងក្នុងយៈពេល១២ឆ្នាំ ។ រថយន្តក្រុងនៅក្នុងរដ្ឋធានីសេអ៊ូល ត្រូវបានប្រតិបត្តិការលើប្រព័ន្ធដឹកជញ្ជូនសាធារណៈជាអ្វីដែលបណ្ដាក្រុមហ៊ុនឯកជនគ្រប់គ្រងរថយន្តក្រុង ខណៈបង្កើតធនបម្រុងដ៏ច្រើន និងត្រូវបានត្រួតពិនិត្យដោយរដ្ឋបាលក្រុងរបស់រដ្ឋធានីសេអ៊ូល ដើម្បីធានាការផ្ដល់ជូនសេវាដល់ប្រជាពលរដ្ឋ។ មុនពេលឈានដល់កិច្ចព្រមព្រៀង អភិបាលក្រុងសេអ៊ូល លោក Oh Se-hoon បានសន្យាឲ្យមានការសម្របសម្រួលភ្លាមៗ។ លោកថា រថយន្តក្រុងទាំងនោះគឺជាជើងរបស់ប្រជាពលរដ្ឋ ជីវិតរស់នៅប្រចាំថ្ងៃរបស់ពួកគេ ពិតជា ពឹងផ្អែកលើរថយន្តក្រុងទាំងអស់នោះជាចាំបាច់។ កូរ៉េខាងត្បូង ក៏កំពុងជួបប្រទះផងដែរនូវការតវ៉ាដែលនៅតែបន្តពីសំណាក់ក្រុមវេជ្ជបណ្ឌិត ខណៈ ក្រុមគ្រូពេទ្យកំពុងហាត់ការរាប់ពាន់នាក់ បានដើរចេញពីការងារប្រឆាំងទៅនឹងផែនការរដ្ឋាភិបាលក្នុងការបង្កើនចំនួននិស្សិតពេទ្យចូលរៀននៅសាលាពេទ្យ៕

សហគមន៍រដ្ឋ Kaduna ស្វាគមន៍សិស្សសាលានីហ្សេរីយ៉ា ដែលត្រូវបានរំដោះមកវិញ

សិស្សសាលានៅប្រទេសនីហ្សេរីយ៉ា ជាង ១០០នាក់ ដែលត្រូវបានចាប់ពង្រត់ ត្រូវបានស្វាគមន៍ការត្រឡប់មកលំនៅឋានវិញ ដោយសហគមន៍មូលដ្ឋានរបស់ពួកគេនៅក្នុងរដ្ឋ Kaduna ភាគពាយ័ព្យ កាលពីថ្ងៃព្រហស្បតិ៍ បន្ទាប់ពីត្រូវបានរំដោះដោយកងទ័ព។ ហ្វូងមនុស្សដ៏ច្រើន បានមកប្រមូលផ្តុំគ្នានៅក្នុងទីក្រុង Kuriga ដើម្បីសាទរការវិលត្រឡប់មកវិញរបស់ពួកគេ។យោធាបាននិយាយថា កងទ័ពប្រទេសនីហ្សេរីយ៉ា កាលពីថ្ងៃអាទិត្យ ទី២៤ ខែ មីនា បានជួយសង្គ្រោះសិស្សសាលា និងបុគ្គលិក ដែលត្រូវបានចាប់ពង្រត់ដោយខ្មាន់កាំភ្លើងពីសាលារៀនមួយកន្លែងនៅភាគខាងជើងរបស់ប្រទេសកាលពីដើមខែនេះ ខណៈការរំដោះនៃធ្វើឡើងប៉ុន្មានថ្ងៃមុនថ្ងៃកំណត់ដើម្បីបង់ប្រាក់លោះចំនួន៦៩០.០០០ដុល្លារ។ កាលពីថ្ងៃច័ន្ទ ទី២៥ ខែមីនា សិស្សសាលាដែលត្រូវបានដោះលែង បានមកដល់វិមានរដ្ឋាភិបាលរដ្ឋ មួយថ្ងៃបន្ទាប់ពីការរំដោះរបស់ពួកគេត្រូវបានប្រកាស។ការចាប់ពង្រត់សិស្ស ចំនួន២៨៧នាក់ កាលពីថ្ងៃទី ៧ ខែមីនា នៅក្រុង Kuriga គឺជាការចាប់ពង្រត់ទ្រង់ទ្រាយធំលើកដំបូងនៅក្នុងប្រទេសដែលមានប្រជាជនច្រើនបំផុតនៅទ្វីបអាហ្រ្វិក ចាប់តាំងពីឆ្នាំ ២០២១មក ដែលនៅឆ្នាំនោះសិស្សជាង ១៥០នាក់ ត្រូវបានគេចាប់ពង្រត់ពីវិសាលាទ្យាល័យមួយកន្លែងក្នុងទីក្រុង Kaduna។ការចាប់ពង្រត់សិស្សសាលា នៅក្នុងប្រទេសនីហ្សេរីយ៉ា បានចាប់ផ្តើមជាងមួយទសវត្សរ៍មកហើយ នៅពេលដែលក្រុមជីហាដ Boko Haram បានចាប់ពង្រត់ក្មេងស្រីចំនួន ២៧៦នាក់ ពីសាលារៀនមួយក្នុងទីក្រុង Chibok នៅភាគឦសានរដ្ឋ Borno ហើយរហូតមកដល់ពេលនេះក្មេងស្រីមួយចំនួននៅមិនទាន់ត្រូវបានដោះលែងនៅឡើយ។ការចាប់ពង្រត់ធ្វើឡើងដោយក្រុមជនអន្ធពាលឧក្រិដ្ឋជន ទាមទារប្រាក់លោះ បានក្លាយទៅជារឿងស្ទើរតែរាល់ថ្ងៃ ជាពិសេសនៅភាគខាងជើងប្រទេសនីហ្សេរីយ៉ា ដោយក្រុមគ្រួសារ និងសហគមន៍ ត្រូវតែសន្សំប្រាក់ដើម្បីបង់ប្រាក់លោះ ដែលជារឿយៗបង្ខំពួកគេឱ្យលក់ដីស្រែចំការ គោក្របី និងគ្រាប់ធញ្ញជាតិ ដើម្បីទទួលបានការដោះលែងមនុស្សជាទីស្រឡាញ់របស់ពួកគេ។

ប្រជាពលរដ្ឋហ្ស៊កដានី បន្តការតវ៉ាជិតស្ថានទូតរបស់អ៊ីស្រាអែល នៅក្នុងទីក្រុងអាម៉ង់

ពលរដ្ឋហ្ស៊កដានី រាប់រយនាក់នៅតែបន្តចេញតវ៉ានៅជិតស្ថានទូតរបស់ប្រទេសអ៊ីស្រាអែលនៅក្នុងរដ្ឋធានីអាម៉ង់ (Amman) កាលពីថ្ងៃព្រហស្បតិ៍ទី២៨មីនា បង្ហាញការគាំទ្រដល់ប្រជាពលរដ្ឋប៉ាឡេស្ទីននៅតំបន់ហ្កាហ្សា។ ក្រុមអ្នកតវ៉ា បានស្រែកពាក្យស្លោក កាន់បដា និង ក្រវីទង់ជាតិប៉ាឡេស្ទីន និងហ្ស៊កដានី អំឡុងតវ៉ាប្រឆាំង សន្ធិសញ្ញាសន្តិភាពរបស់ប្រទេសហ្ស៊កដានី ជាមួយអ៊ីស្រាអែល។ សន្ធិសញ្ញាសន្តិភាពរបស់ប្រទេសហ្ស៊កដានី ជាមួយអ៊ីស្រាអែល គឺគ្មានការគាំទ្រឲ្យបានទូលំទូលាយ ក្នុងចំណោម ប្រជាពលរដ្ឋជាច្រើន ដែលមើលឃើញថាជារឿងធម្មតា ប្រៀបដូចជាការក្បត់ចំពោះសិទ្ធិរបស់អ្នកស្នេហាជាតិប៉ាឡេស្ទីន។ ស្ថានទូតអ៊ីស្រាអែល ជាទីដែលក្រុមអ្នកបានប្រមូលផ្ដុំគ្នា បានក្លាយជាចំណុចក្ដៅរយៈយូរនៃការតវ៉ាប្រឆាំងអ៊ីស្រាអែល ចំពោះភាពវឹកវរនៅក្នុងតំបន់ហ្កាហ្សា និង ដែនដី ប៉ាឡេស្ទីនដែលត្រូវបានកាន់កាប់ដោយប្រទេសអ៊ីស្រាអែល។ កាលពីថ្ងៃចន្ទដើមសប្ដាហ៍នេះកងកម្លាំងនគរបាលបង្ក្រាបកុបកម្ម បានប៉ះទង្គិចគ្នាជាមួយក្រុមបាតុរអំឡុងហែរក្បួនតវ៉ាទៅកាន់ស្ថានទូតអ៊ីស្រាអែល ប្រចាំក្នុងរដ្ឋធានីអាម៉ង់ ។ កងទ័ពអ៊ីស្រាអែល បានបើកការវាយប្រហារតាមអាកាស និងបាញ់ផ្លោងក្នុងតំបន់ហ្កាហ្សា ឥតសំចៃដៃដែលបានសម្លាប់ពលរដ្ឋប៉ាឡេស្ទីនជាង៣២.០០០ នាក់៕

ការកើនឡើងនៃករណីជំងឺគ្រុនឈាមដ៏ច្រើននៅទ្វីបអាមេរិក បង្កឱ្យមានការប្រកាសអាសន្នបន្ទាន់

ប្រធានអង្គការសុខភាពទ្វីបអាមេរិក (PAHO) បាននិយាយកាលពីថ្ងៃព្រហស្បតិ៍ (២៨ មីនា) ថា ករណីជំងឺគ្រុនឈាមនៅអាមេរិក បានកើនឡើងខ្លាំងក្នុងរយៈពេល ៣ ខែដំបូងក្នុងឆ្នាំនេះ ដែលជាកំណើនបីដងនៃចំនួននៃការឆ្លងដែលត្រូវបានរាយការណ៍ក្នុងរយៈពេលដូចគ្នាកាលពីឆ្នាំមុន ដែលជាសញ្ញាប្រកាសអាសន្នសម្រាប់តំបន់រងហានិភ័យ។ប្រទេសប្រេស៊ីល អាហ្សង់ទីន និងប៉ារ៉ាហ្គាយ គឺជាប្រទេសដែលរងគ្រោះដោយជំងឺគ្រុនឈាមខ្លាំងបំផុត នៅក្នុងអ្វីដែលក្រុមមន្ត្រីទីភ្នាក់ងារ PAHO បានពណ៌នាថាអាចជាការផ្ទុះឡើងដ៏អាក្រក់បំផុតនៅក្នុងទ្វីបអាមេរិក រហូតមកដល់បច្ចុប្បន្នសម្រាប់ជំងឺមេរោគដែលឆ្លងដោយមូសខ្លានេះ។អង្គការសុខភាព PAHO ដែលជាទីភ្នាក់ងារអង្គការសហប្រជាជាតិ បានបញ្ជាក់ពីករណីជំងឺគ្រុនឈាមជាង ៣,៥ លានករណី និងការស្លាប់ជាង ១.០០០ នាក់នៅឆ្នាំនេះ គិតត្រឹមខែមីនា នៅទូទាំងទ្វីបអាមេរិក។ ប្រជាជនប្រហែល ៤ ពាន់លាននាក់ ឬប្រហែលពាក់កណ្តាលនៃចំនួនប្រជាជនពិភពលោក រស់នៅក្នុងតំបន់ដែលមានហានិភ័យនៃការឆ្លងជំងឺគ្រុនឈាម នេះបើយោងតាមទិន្នន័យពីមជ្ឈមណ្ឌលគ្រប់គ្រង និងការពារជំងឺរបស់សហរដ្ឋអាមេរិក។រោគសញ្ញានៃជំងឺគ្រុនឈាមរួមមាន គ្រុនក្តៅ ឈឺក្បាល ក្អួតចង្អោរ កន្ទួលលើស្បែក ក៏ដូចជាការឈឺចាប់សាច់ដុំ និងសន្លាក់។ ករណីគ្រុនឈាមភាគច្រើនត្រូវបានគេឃើញជាធម្មតានៅចន្លោះខែកុម្ភៈ និងឧសភា ដែលជាចុងខែរដូវក្តៅរបស់អឌ្ឍគោលខាងត្បូង៕

អ្នកបើកកប៉ាល់ បានប្រើវិទ្យុទាក់ទងស្នើសុំជំនួយពីទូកអូស មុនពេលកប៉ាល់បុកស្ពាន បាល់ទីម័រ

អ្នកបើកកប៉ាល់ដឹកទំនិញ ដាលី ដែលបានបុកស្ពានផ្លូវហាយវេមួយចូលទៅក្នុងកំពង់ផែក្រុង បាល់ទីម័រ (Baltimore) របស់អាមេរិក បានប្រើវិទ្យុទាក់ទងស្នើសុំជំនួយទូកអូស ហើយរាយការណ៍ពីការបាត់បង់ថាមពលនៅលើនាវាប៉ុន្មាននាទីមុនហេតុការណ៍បុកកើតឡើង នេះបើយោងតាមក្រុមមន្ត្រីសុវត្ថិភាពសហព័ន្ធបាននិយាយកាលពីថ្ងៃពុធ (២៧ មីនា) ដោយសំអាងដល់សំឡេងពីឧបករណ៍ថតទិន្នន័យ «ប្រអប់ខ្មៅ» របស់កប៉ាល់។ប្រធានក្រុមប្រឹក្សាសុវត្ថិភាពដឹកជញ្ជូនជាតិក៏បាននិយាយផងដែរថាស្ពាន ហ្រ្វង់ស៊ីស ស្កុត ឃី (Francis Scott Key) ដែលជាសរសៃឈាមចរាចរលើកំពង់ផែដែលត្រូវបានសាងសង់ក្នុងឆ្នាំ ១៩៧៦ ខ្វះខាតរចនាសម្ព័ន្ធវិស្វកម្ម ដែលធ្វើឱ្យស្ពាននេះកាន់តែងាយរងគ្រោះបង្កជាការដួលរលំដ៏មហន្តរាយ។ការយល់ដឹងថ្មីអំពីគ្រោះមហន្តរាយដ៏ធ្ងន់ធ្ងរនេះបានកើតឡើងរយៈពេលមួយថ្ងៃបន្ទាប់ពីកប៉ាល់ដឹកទូកុងតឺន័រដ៏ធំរបស់សិង្ហបុរី ឈ្មោះ ដាលី (Dali) បានបើកចេញពីកំពង់ផែ បាល់ទីម័រ ឆ្ពោះទៅប្រទេសស្រីលង្កា បានរាយការណ៍ថាបាត់បង់ថាមពល និងសមត្ថភាពក្នុងការធ្វើដំណើរ មុនពេលបុកបង្គោលជំនួយនៃស្ពាន។ផលប៉ះពាល់បាននាំឱ្យផ្នែកភាគច្រើននៃស្ពានបានបាក់ធ្លាក់ចូលទៅក្នុងទន្លេ ផាថាបស្កូ (Patapsco) ស្ទើរតែភ្លាមៗ ដោយបានកាត់ផ្ដាច់ផ្លូវដឹកជញ្ជូន និងបង្ខំឱ្យបិទដោយគ្មានកំណត់នៃច្រកកំពង់ផែ បាល់ទីម័រ ដែលជាច្រកដ៏មមាញឹកបំផុតមួយនៅលើឆ្នេរសមុទ្រភាគខាងកើតរបស់សហរដ្ឋអាមេរិក៕

បណ្ដាញសង្គម

ព័ត៌មានថ្មីៗ

លោកZelenskyy៖ អ៊ុយក្រែនអាចបញ្ជូនអ្នកជំនាញ ប្រសិនបើដៃគូមជ្ឈិមបូព៌ាជួយធានាបទឈប់បាញ់របស់រុស្ស៊ី

លោក Rubio៖ អាមេរិក នឹងមានចំណាត់ការកាត់បន្ថយការកើនឡើងតម្លៃប្រេងសម្រាប់ពលរដ្ឋអាមេរិក

មេដឹកនាំអាមេរិកឡាទីន ថ្កោលទោសការវាយប្រហាររបស់អាមេរិកនិងអ៊ីស្រាអែលលើអ៊ីរ៉ង់ អំពាវនាវឱ្យមានដំណោះស្រាយដោយសន្តិវិធី

ជនភៀសសឹកបង្ហាញក្តីឈឺចាប់ពីការឈ្លានរបស់ថៃស្របពេលអគ្គលេខាធិការអង្គការហ្វ្រង់កូហ្វូនីចុះសួរសុខទុក្ខ

ចំនួនអ្នកស្លាប់ក្នុងការវាយប្រហាររបស់អ៊ីស្រាអែលនៅលីបង់ឡើងដល់ជាង៥០នាក់ ក្នុងសង្គ្រាមថ្មីជាមួយក្រុមហេសបូឡា

កម្មករអាហ្សង់ទីន បដិសេធកំណែទម្រង់ការងាររបស់លោក Milei ថា «មិនស្របតាមរដ្ឋធម្មនុញ្ញ»

បារាំង នឹងបង្កើនក្បាលគ្រាប់នុយក្លេអ៊ែរ និងអនុញ្ញាតការដាក់ពង្រាយយន្តហោះនុយក្លេអ៊ែរដល់សម្ព័ន្ធមិត្តអឺរ៉ុប

អ៊ីរ៉ង់និយាយថា នឹងវាយប្រហារនាវាណាមួយដែលព្យាយាមឆ្លងកាត់ច្រកសមុទ្រ Hormuz

ប្រមុខការទូតកម្ពុជា និងអគ្គលេខាធិការអង្គការអន្តរជាតិហ្រ្វង់កូហ្វូនី អញ្ជើញចុះសួរសុខទុក្ខពលរដ្ឋភៀសសឹកកំពុងស្នាក់នៅវត្តធម្មរង្សី ក្នុងស្រុកក្រឡាញ់ ខេត្តសៀមរាប

កូរ៉េឈ្នះអ៊ីរ៉ង់ឡើងឈរលើគេក្នុងពូល A ការប្រកួតបាល់ទាត់នារីជើងឯកអាស៊ីនៅអូស្រ្តាលី

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877