BTV NEWS

ករណីបុរសម្នាក់ឡើងលើផ្លូវល្បឿនលឿនPK54 យកដែកដាក់ទទឹងផ្លូវត្រូវបានសមត្ថកិច្ចនគរបាលស្រាវជ្រាវបង្រ្កាបបានហើយ

អង្គភាពប្រឆាំងអំពើពុករលួយបានធ្វើកោសល្យវិច័យទូរស័ព្ទជាង ៨០០គ្រឿង និងភស្តុតាងមួយចំនួនទៀតដែលសាលាដំបូងរាជធានីភ្នំពេញប្រគល់ឱ្យ

នគរបាលរាជធានីភ្នំពេញ ស្រាវជ្រាវឃាត់ខ្លួនក្មេងទំនើង ៩នាក់ ពាក់ព័ន្ធករណីវាយប្លន់យកម៉ូតូ

អាវុធហត្ថរាជធានីភ្នំពេញ បង្ក្រាបគ្រឿងញៀនជាង ៦គីឡូក្រាមឃាត់ខ្លួនមនុស្ស ១១នាក់

សន្តិសុខ និង សង្គម

ការស្លាប់ពីជំងឺគ្រុនឈាមនៅប៉េរូ កើនឡើងលើសបីដង ដោយសារបម្រែបម្រួលអាកាសធាតុជំរុញកំណើនមូស

ការស្លាប់ដោយសារជំងឺគ្រុនឈាមដែលបង្កឡើងពីមូសខ្លាខាំ បានកើនឡើងច្រើនជាងបីដងនៅក្នុងប្រទេសប៉េរូ រហូតមកទល់ពេលនេះ នេះបើយោងតាមទិន្នន័យពីរដ្ឋាភិបាលរបស់ប្រទេសអាមេរិកខាងត្បូង ដែលកំពុងតែបង្កើនកិច្ចខិតខំប្រឹងប្រែងទ្វេដងដើម្បីទប់ស្កាត់ការរាតត្បាតដែលបានវាយប្រហារតំបន់ក្រីក្រខ្លាំងបំផុត។ក្រសួងសុខាភិបាលរបស់ប៉េរូបាននិយាយថា គិតត្រឹមថ្ងៃព្រហស្បតិ៍(១១ មេសា) មានអ្នកស្លាប់ដោយសារជំងឺគ្រុនឈាមចំនួន ១១៧ នាក់ដែលបានចុះបញ្ជីនៅឆ្នាំនេះ បើធៀបនឹងចំនួន ៣៣ នាក់ក្នុងរយៈពេលដូចគ្នានៃឆ្នាំ២០២៣។ ករណីសង្ស័យក៏មានច្រើនជាងបីដងដែរ រហូតទៅដល់ប្រហែល ១៣៥.០០០ ករណី។រោគសញ្ញាទូទៅរួមមាន ចង្អោរ កន្ទួល និងឈឺចាប់រាងកាយ ខណៈពេលដែលទម្រង់ធ្ងន់ធ្ងរដ៏កម្រ គំរាមកំហែងដល់ទារក និងស្ត្រីមានផ្ទៃពោះ អាចបណ្តាលឱ្យមានការហូរឈាមខាងក្នុង និងអាចស្លាប់បាន។រដ្ឋាភិបាលរបស់ប្រធានាធិបតីប៉េរូ លោកស្រី ឌីណា បូលូអាតតេ (Dina Boluarte) ក្នុងសប្តាហ៍នេះបាននិយាយថា ខ្លួនបានអនុម័តលើ «ក្រឹត្យស្តីពីភាពអាសន្ន» ដែលអនុញ្ញាតឱ្យមានវិធានការសេដ្ឋកិច្ចវិសាមញ្ញ ដើម្បីជំរុញផែនការដើម្បីទប់ទល់នឹងការផ្ទុះឡើងនៃជំងឺនេះ ដែលអ្នកជំនាញនិយាយថាកាន់តែធ្ងន់ធ្ងរឡើងដោយសារបម្រែបម្រួលអាកាសធាតុបានជំរុញកំណើនមូស៕

ក្រុមបាតុកររាប់រយនាក់ តវ៉ាជំរុញឱ្យរដ្ឋាភិបាលអ៊ីស្រាអែល សម្រេចបាននូវកិច្ចព្រមព្រៀងចំណាប់ថ្នូរ

ក្រុមបាតុកររាប់រយនាក់ បានប្រមូលផ្តុំគ្នានៅទីក្រុង តែលអាវីវ (Tel Aviv) កាលពីយប់ថ្ងៃព្រហស្បតិ៍ (១១ មេសា) ដើម្បីបន្តដាក់សម្ពាធលើរដ្ឋាភិបាលអ៊ីស្រាអែល និងគណៈរដ្ឋមន្ត្រីសង្គ្រាមឱ្យឈានដល់កិច្ចព្រមព្រៀងជាមួយក្រុមហាម៉ាស លើការដោះលែងចំណាប់ថ្នូរ ដោយភ័យខ្លាចថាពេលវេលានឹងអស់សម្រាប់អ្នកដែលនៅសេសសល់ក្នុងការឃុំខ្លួន។រដ្ឋាភិបាលអ៊ីស្រាអែល បានប្រឈមមុខនឹងសម្ពាធកើនឡើងពីក្រុមគ្រួសារនៃចំណាប់ថ្នូរអ៊ីស្រាអែល ចំនួន ១៣៣ នាក់ ដែលនៅតែត្រូវបានគេជឿថាត្រូវបានឃុំខ្លួននៅក្នុងតំបន់ហ្កាហ្សាស្ទ្រីប ដែលគ្រប់គ្រងដោយក្រុមហាម៉ាស ខណៈកិច្ចចរចាសម្របសម្រួលដោយសហរដ្ឋអាមេរិក អេហ្ស៊ីប និងកាតា មិនទាន់ទទួលបានកិច្ចព្រមព្រៀងជាក់ស្ដែងមួយ។ក្រុមហាម៉ាស កំពុងទាមទារឱ្យបញ្ចប់ការវាយលុករបស់អ៊ីស្រាអែល ការដកកងកម្លាំង និងការអនុញ្ញាតឱ្យប្រជាជនភៀសខ្លួនប៉ាឡេស្ទីន នៅតំបន់ហ្កាហ្សា ត្រឡប់ទៅផ្ទះរបស់ពួកគេវិញ។ អ៊ីស្រាអែល ចង់ធានាការវិលត្រឡប់របស់ចំណាប់ថ្នូរ ប៉ុន្តែនិយាយថាខ្លួននឹងមិនបញ្ចប់សង្រ្គាមទេ រហូតទាល់តែក្រុមហាម៉ាសត្រូវបានបំផ្លាញ ឬពុំមានកម្លាំងវាយប្រហារ ហើយថាខ្លួននៅតែគ្រោងនឹងវាយលុកទីក្រុងរ៉ាហ្វា ភាគខាងត្បូង ដែលមានជនស៊ីវិលភៀសខ្លួនជាងមួយលាននាក់កំពុងជ្រកកោន៕

អាមេរិក ប្រាប់បុគ្គលិកខ្លួននៅអ៊ីស្រាអែល កុំឱ្យធ្វើដំណើរទៅក្រៅក្រុង ស្របពេលអ៊ីរ៉ង់គំរាមសងសឹក

សហរដ្ឋអាមេរិក បាននិយាយកាលពីថ្ងៃព្រហស្បតិ៍ (១១ មេសា) ថាខ្លួនបានដាក់កម្រិតបុគ្គលិករបស់ខ្លួននៅក្នុងប្រទេសអ៊ីស្រាអែល និងសមាជិកគ្រួសាររបស់ពួកគេពីការធ្វើដំណើរផ្ទាល់ខ្លួននៅខាងក្រៅទីក្រុង តែលអាវីវ (Tel Aviv) ហ្សេរុយសាឡឹម (Jerusalem) និង បេអឺសេវ៉ា (Be'er Sheva) ស្របពេលមានការគំរាមកំហែងរបស់អ៊ីរ៉ង់ ក្នុងការសងសឹកប្រឆាំងនឹងសត្រូវក្នុងតំបន់។អ៊ីរ៉ង់ បានប្តេជ្ញាសងសឹកចំពោះការវាយប្រហារតាមអាកាសកាលពីថ្ងៃទី០១ ខែមេសា លើបរិវេណស្ថានទូតរបស់ខ្លួនក្នុងក្រុងដាម៉ាស ដែលបានបង្កើនភាពតានតឹងបន្ថែមក្នុងតំបន់ដែលតានតឹងរួចទៅហើយនោះដោយសង្រ្គាមហ្កាហ្សា។ស្ថានទូតអាមេរិក បាននិយាយនៅក្នុងការដាស់តឿនសន្តិសុខនៅលើគេហទំព័ររបស់ខ្លួន កាលពីថ្ងៃព្រហស្បតិ៍ថា «ជាការប្រុងប្រយ័ត្ន បុគ្គលិករដ្ឋាភិបាលសហរដ្ឋអាមេរិក និងសមាជិកគ្រួសាររបស់ពួកគេត្រូវបានដាក់កម្រិតក្នុងការធ្វើដំណើរផ្ទាល់ខ្លួននៅខាងក្រៅតំបន់នានានៃទីក្រុង តែលអាវីវ ដែលរួមទាំងតំបន់ ហឺសលីយ៉ា (Herzliya) ណេតាន់យ៉ា (Netanya) និង យ៉េហ៊ូដា (Yehuda), ទីក្រុងហ្សេរុយសាឡឹម និងទីក្រុងបេអឺសេវ៉ា រហូតដល់មានការជូនដំណឹងបន្ថែម»។ប្រធានាធិបតីអាមេរិក លោក ចូ បៃដិន (Joe Biden) បាននិយាយកាលពីថ្ងៃពុធថា អ៊ីរ៉ង់ កំពុងគម្រាមបើកការវាយប្រហារដ៏សំខាន់មួយនៅអ៊ីស្រាអែល ហើយថាសហរដ្ឋអាមេរិក នៅតែប្តេជ្ញាចិត្តចំពោះសន្តិសុខរបស់សម្ព័ន្ធមិត្តខ្លួន។ នៅពេលសាកសួរអំពីការដាស់តឿនសន្តិសុខ អ្នកនាំពាក្យក្រសួងការបរទេសលោក ម៉ាធូ មីលឡឺ (Matthew Miller) បានលើកឡើងថា អ៊ីរ៉ង់ បាននិងកំពុងធ្វើការគំរាមកំហែងជាសាធារណៈលើអ៊ីស្រាអែល៕

ចំនួនអ្នកស្លាប់ប៉ាឡេស្ទីន ពីការវាយប្រហាររបស់អ៊ីស្រាអែល នៅហ្កាហ្សា កើនឡើងដល់ជាង ៣៣.៥០០ នាក់

ក្រសួងសុខាភិបាលហ្កាហ្សា បានរាយការណ៍កាលពីថ្ងៃព្រហស្បតិ៍ (១១ មេសា) ថា ការវាយប្រហាររបស់អ៊ីស្រាអែល ដែលកំពុងបន្តលើតំបន់ហ្កាហ្សា បានសម្លាប់ជនជាតិប៉ាឡេស្ទីន ៣៣.៥៤៥ នាក់ និងរបួស ៧៦.០៩៤ នាក់ទៀត ចាប់តាំងពីជម្លោះប៉ាឡេស្ទីន និងអ៊ីស្រាអែល បានផ្ទុះឡើងនៅថ្ងៃទី០៧ ខែតុលា ឆ្នាំ២០២៣ មក។ ក្រសួងបាននិយាយនៅក្នុងសេចក្តីថ្លែងការណ៍មួយថា ក្នុងអំឡុងពេល ២៤ ម៉ោងកន្លងមកនេះ កងទ័ពអ៊ីស្រាអែលបានសម្លាប់ជនជាតិប៉ាឡេស្ទីនចំនួន ៦៣ នាក់ និងមនុស្ស ៤៥ នាក់ផ្សេងទៀតរងរបួស។យោងតាមទីភ្នាក់ងារសារព័ត៌មានប៉ាឡេស្ទីន កងទ័ពអ៊ីស្រាអែល បានទម្លាក់គ្រាប់បែកយ៉ាងខ្លាំងក្លាទៅលើជំរំជនភៀសខ្លួន នូសៃរ៉ាត់ (Nuseirat) និងតំបន់ជុំវិញនៅកណ្តាលហ្កាហ្សាស្ទ្រីប តាំងពីយប់ថ្ងៃពុធ ដែលបណ្តាលឱ្យមនុស្សយ៉ាងហោចណាស់ ៥ នាក់ស្លាប់ និងជាច្រើននាក់ទៀតរងរបួស។ទីភ្នាក់ងារព័ត៌មានចិនស៊ិនហួ ចេញផ្សាយកាលពីថ្ងៃព្រហស្បតិ៍ថា កងកម្លាំងអ៊ីស្រាអែល បានទម្លាក់គ្រាប់បែកលើលំនៅឋាន សាលារៀន និងវិហារអ៊ីស្លាម ក្នុងចំណោមកន្លែងផ្សេងទៀត ហើយកងកម្លាំងជើងគោករបស់ប្រទេសនេះ បានកាន់កាប់ទីតាំងនៅភាគខាងជើងនៃជំរំជនភៀសខ្លួន នូសៃរ៉ាត់។នៅក្នុងសេចក្តីថ្លែងការណ៍ដែលចេញផ្សាយនៅថ្ងៃដដែលនោះ កងទ័ពអ៊ីស្រាអែលបាននិយាយថា ខ្លួនបានធ្វើប្រតិបត្តិការយោធានៅភាគកណ្តាលហ្កាហ្សា កាលពីយប់ថ្ងៃពុធ ដោយផ្អែកលើព័ត៌មានចារកម្ម ដោយមានគោលដៅបំផ្លាញហេដ្ឋារចនាសម្ព័ន្ធពាក់ព័ន្ធរបស់ក្រុមហាម៉ាស៕

ពូទីន៖ រុស្ស៊ីត្រូវតែវាយប្រហារទីតាំងថាមពលអ៊ុយក្រែន ក្នុងការឆ្លើយតបទៅនឹងការវាយប្រហាររបស់ទីក្រុងគីវ

ប្រធានាធិបតីរុស្ស៊ី លោក វ្ល៉ាឌីមៀ ពូទីន បាននិយាយកាលពីថ្ងៃព្រហស្បតិ៍ថា រុស្ស៊ីត្រូវតែមានកាតព្វកិច្ចបើកការវាយប្រហារ ដែលបានបង្កការបំផ្លាញធ្ងន់ធ្ងរលើទីតាំងថាមពលអ៊ុយក្រែន ដើម្បីឆ្លើយតបទៅនឹងការវាយប្រហាររបស់ទីក្រុងគីវ ទៅលើគោលដៅជាច្រើនរបស់រុស្ស៊ី។មេដឹកនាំវិមានក្រឹមឡាំង ត្រូវបានដកស្រង់សម្តីដោយទីភ្នាក់ងារសារព័ត៌មានរុស្ស៊ី ដែលកំពុងនិយាយទៅកាន់សម្ព័ន្ធមិត្តរបស់លោកប្រធានាធិបតីបេឡារុស លោក អាឡិចសានឌ័រ លូកាសេនកូ(Alexander Lukashenko) បន្ទាប់ពីការវាយប្រហារកាលពីពេលយប់ដែលបានបំផ្លាញរោងចក្រអគ្គិសនីដ៏ធំមួយ នៅជិតទីក្រុងគីវ និងបានវាយប្រហាររោងចក្រថាមពលនៅក្នុងតំបន់ជាច្រើនរបស់អ៊ុយក្រែន។លោកប្រធានាធិបតី បាននិយាយថា ការវាយប្រហារនេះគឺជាផ្នែកមួយនៃដំណើរការ គ្មានយោធាអ៊ុយក្រែន ជាគោលបំណងមួយដែលលោកបានលើកឡើងនៅពេលលោក បានបញ្ជូនទាហានរុស្ស៊ីចូលទៅក្នុងប្រទេសអ៊ុយក្រែន កាលពីខែកុម្ភៈ ឆ្នាំ ២០២២។លោកនិយាយថា រុស្ស៊ី បានទប់មិនធ្វើការវាយប្រហារបែបនេះនៅក្នុងរដូវរងារ ដោយគិតគូរអំពីមនុស្សធម៌។ លោកបាននិយាយថា «អ្វីដែលលោកចង់និយាយគឺថា យើងមិនចង់បន្សល់ទុក ស្ថាប័នសង្គម គ្មានអគ្គិសនីប្រើប្រាស់នោះទេ ដូចជាមន្ទីរពេទ្យ និងកន្លែងជាច្រើនផ្សេងទៀត។ ប៉ុន្តែលោកបាននិយាយថា ការវាយប្រហាររបស់អ៊ុយក្រែន ភាគច្រើនទៅលើរោងចក្រចម្រាញ់ប្រេង នៅក្នុងតំបន់ជាច្រើនរបស់ប្រទេសរុស្ស៊ី ក្នុងប៉ុន្មានសប្តាហ៍ថ្មីៗនេះ បានជំរុញឱ្យទីក្រុងមូស្គូឆ្លើយតប។

ទាហានមីយ៉ាន់ម៉ា បានដកថយទៅកាន់ស្ពានព្រំដែនថៃ ក្រោយការប្រយុទ្ធគ្នាអស់ច្រើនថ្ងៃ

យោងតាមអ្នកនាំពាក្យក្រុមប្រដាប់អាវុធជនជាតិភាគតិច និងប្រព័ន្ធផ្សព្វផ្សាយក្នុងស្រុក បានោឱ្យដឹងថា បុគ្គលិកយោធាមីយ៉ាន់ម៉ា ប្រមាណ ២០០ នាក់បានដកខ្លួនចេញទៅកាន់ស្ពានតភ្ជាប់ពីភូមិព្រំដែន មីយ៉ាវ៉ាឌី (Myawaddy) ទៅកាន់ប្រទេសថៃ នៅថ្ងៃព្រហស្បតិ៍ (១១ មេសា) នេះ បន្ទាប់ពីមានការវាយលុកជាច្រើនថ្ងៃនៅក្នុងតំបន់ដោយក្រុមឧទ្ទាមប្រឆាំងរបបសឹក ខណៈប្រជាជនជាច្រើនកំពុងតម្រង់ជួរចាកចេញពីព្រំដែនខាងមីយ៉ាន់ម៉ា ឆ្ពោះទៅថៃ។រដ្ឋាភិបាលដែលគ្រប់គ្រងដោយយោធារបស់សហភាពមីយ៉ាន់ម៉ា កំពុងប្រយុទ្ធជាមួយក្រុមឧទ្ទាមប្រដាប់អាវុធនៅជួរមុខជាច្រើន ហើយបានទទួលរងនូវការបរាជ័យជាច្រើននៅក្នុងតំបន់ព្រំដែន។ ការដកថយរបស់ទាហានរដ្ឋាភិបាលនៅ មីយ៉ាវ៉ាឌី ដែលនៅជាប់នឹងសហគមន៍ មេសុត (Mae Sot) របស់ថៃនេះ បង្ហាញពីការបាត់បង់សក្តានុពលនៃច្រកព្រំដែនដ៏សំខាន់មួយផ្សេងទៀតដែលមានផ្លូវល្បឿនលឿនដោយផ្ទាល់ទៅកាន់ផ្នែកខ្លះនៃភាគកណ្តាលមីយ៉ាន់ម៉ា។លោក ស ថនី (Saw Taw Nee) អ្នកនាំពាក្យនៃក្រុមសហភាពជាតិ ការ៉ែន (KNU) ដែលជាក្រុមប្រឆាំងរដ្ឋាភិបាលដឹកនាំការវាយលុកនៅ មីយ៉ាវ៉ាឌី បាននិយាយថា នៅថ្ងៃព្រហស្បតិ៍នេះ ទាហានរត់ភៀសខ្លួនប្រហែល ២០០ នាក់ត្រូវបានប្រមូលផ្តុំនៅច្រកព្រំដែនចូលទៅក្នុងប្រទេសថៃ។ សារព័ត៌មានក្នុងស្រុក ឃីតធីត (Khit Thit) បានរាយការណ៍ថា អាជ្ញាធរថៃកំពុងពិភាក្សាជាមួយទាហាន ដើម្បីសម្រេចថាតើត្រូវផ្តល់កន្លែងភៀសខ្លួនឱ្យពួកគេ ឬយ៉ាងណា។អគ្គនាយកអន្តោប្រវេសន៍នៅតំបន់ មេសុត បាននិយាយថា មនុស្សជិត ៤.០០០ នាក់បានឆ្លងចូលទៅក្នុងភូមិព្រំដែនថៃក្នុងរយៈពេលប៉ុន្មានថ្ងៃចុងក្រោយនេះ ដោយកើនឡើងពីចំនួនប្រហែល ២.០០០ នាក់ក្នុងពេលធម្មតា៕

សម្ដេចធិបតី៖ នៅពេលខាងមុខ វិស័យអចលនទ្រព្យនៅកម្ពុជា នឹងងើបឡើងវិញ

សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្ដីនៃកម្ពុជា មានប្រសាន៍បញ្ជាក់ថា រាជរដ្ឋាភិបាលកំពុងយកចិត្តទុកដាក់ដោះស្រាយបញ្ហាវិបត្តិអចលនទ្រព្យជូនទាំងប្រជាពលរដ្ឋ និងម្ចាស់បុរីនានា ហើយនៅពេលខាងមុខវិស័យអចលនទ្រព្យនៅកម្ពុជា នឹងងើបឡើងវិញ។សម្តេចធិបតី នាយករដ្ឋមន្ត្រីកម្ពុជា មានប្រសាសន៍បញ្ជាក់បែបនេះ ក្នុងឱកាសងអញ្ជើញ ជាអធិបតីពិធីសម្ពោធកសិដ្ឋានចិញ្ចឹមគោយកទឹកដោះគិរីសួគ៌ ស្ថិតភូមិឱភាសាំង ឃុំកណ្តឹង ស្រុកបាទី ខេត្តតាកែវ នៅព្រឹកថ្ងៃទី១១ ខែមេសា ឆ្នាំ២០២៤នេះ។សម្ដេចធិបតី បានថ្លែងថា រាជរដ្ឋាភិបាលមិនដេកមើលទុក្ខលំបាករបស់ប្រជាពលរដ្ឋដែលមានបញ្ហានៅតាមបុរីនានានោះទេ។ រាជរដ្ឋាភិបាលបានខិតខំប្រឹងប្រែងដោះស្រាយឱ្យម្ចាស់គម្រោងអាចបន្តដំណើរការទៅបាន ហើយដោះស្រាយជូនប្រជាពលរដ្ឋជាអតិថិជនឱ្យទទួលបាននូវអ្វីដែលបានទិញពីបុរីនោះ។សម្តេចធិបតី បានបញ្ជាក់ថា វិស័យអចលនទ្រព្យរបស់កម្ពុជានឹងមានស្ថានភាពល្អប្រសើរឡើងវិញនាពេលខាងមុខ។ សម្ដេចបញ្ជាក់ថា វិបត្តិសេដ្ឋកិច្ចបានធ្វើឱ្យប៉ះពាល់ជាសាល ក្នុងនោះក្រុមហ៊ុនបរទេសជាច្រើន ក៏ត្រូវបានបិទឬបិទសាខាផងដែរ បញ្ហាទាំងនេះ កើតឡើងតាំងពីវិបត្តិជំងឺរាតត្បាយកូវីដ-១៩ វិបត្តិសេដ្ឋកិច្ចសាកល រួមនឹងសង្គ្រាមនៅលើពិភពលោកផ្ទួនៗបន្តគ្នា។ក្នុងឱកាសនោះ សម្តេចធិបតី នាយករដ្ឋមន្រ្ដីបានបញ្ជាក់ថា រាជរដ្ឋាភិបាលបាននឹងកំពុងខិតខំប្រឹងប្រែងធ្វើឱ្យសេដ្ឋកិច្ចរបស់ប្រទេសកម្ពុជា ល្អប្រសើរឡើងវិញ ដូចកាលពីមុនវិបត្តិកូវីដ-១៩៕អត្ថបទ៖ វ៉ន ដារ៉ា

រលកកម្ដៅដ៏ក្ដៅកំពុងវិលត្រឡប់ជាថ្មីគ្របដណ្ដប់លើតំបន់អាស៊ីអាគ្នេយ៍

ការស្លាប់របស់កុមារតូចដោយសារកម្ដៅខ្លាំង បានបង្ហាញពីហានិភ័យនៃជំងឺទាក់ទងនឹងអាកាសធាតុនៅទូទាំងប្រទេសម៉ាឡេស៊ី។ ក្នុងសប្តាហ៍ដូចគ្នានោះ វៀតណាមបានប្រកាសដាក់រដ្ឋក្នុងភាពអាសន្ន បន្ទាប់ពីសីតុណ្ហភាពហក់ឡើងខ្ពស់ខុសពីធម្មតា ដោយសារតែភាគរាំងស្ងួតទូទាំងវាលស្រែចំការនៅភាគខាងត្បូងប្រទេស។ ហើយក្នុងប្រទេសហ្វីលីពីន សាលារាប់រយកន្លែងបានផ្អាកការសិក្សានៅក្នុងថ្នាក់រៀនផ្ទាល់បន្ទាប់ពីសីតុណ្ហភាពប្រចាំថ្ងៃបានកើនលើសពី៤២ អង្សារសេ។ ក្រុមអ្នកវិទ្យាសាស្ត្របានព្រមានថា កម្ដៅដ៏ក្តៅបានត្រលប់មកវិញនៅក្នុងតំបន់អាស៊ីអាគ្នេយ៍ ជាតំបន់មួយដែលងាយរងគ្រោះបំផុតចំពោះបម្រែបម្រួលអាកាសធាតុ។ ហើយការហក់ឡើងសីតុណ្ហភាពដ៏ក្ដៅនេះ នឹងមិនងាយបាត់ទៅវិញក្នុងពេលឆាប់ៗនេះទេ។យោងតាមអ្នកជំនាញខាងអាកាសធាតុលោក ម៉ាស៊ីមីលីអាណូ ហេរ៉េរ៉ា (Maximiliano Herrera) បានប្រាប់ទូរទស្សន៍ CNN ថា ទីជម្រករបស់ប្រជាជនជាង ៦៧៥ លាននាក់នៅទូទាំងប្រទេសចំនួន ១១ក្នុងតំបន់នេះបានមើលឃើញសីតុណ្ហភាពឡើងដល់កម្រិតខ្ពស់បំផុតមិនធ្លាប់មាន ទោះបីជាកម្ដៅបានស្រុតចុះតិចមែន និងសំណើមគ្មានមេត្ដា។លោក Herrera បាននិយាយថា ប្រទេសថៃបានរងការវាយប្រហារយ៉ាងធ្ងន់ធ្ងរបំផុត ដោយបន្ថែមថា ការព្យាករណ៍កម្ដៅនៅទីនោះគឺធ្ងន់ធ្ងរខ្លាំងណាស់។ លោកបន្តថា សីតុណ្ហភាពនៅទូទាំងប្រទេសបាននឹងកំពុង បំបែកកំណត់ត្រាឥតឈប់ឈរ អស់រយៈពេល១៣ ខែ ហើយកម្រិតកម្ដៅ និងសំណើមគឺមិនប្រែប្រួលឡើយ។ លោកថាទំនោរគឺជៀសមិនរួច។ តំបន់នេះត្រូវតែត្រៀមខ្លួនសម្រាប់កម្ដៅដ៏គួរឲ្យខ្លាចសម្រាប់ខែមេសា នេះ និងភាគច្រើននៃខែឧសភា។នៅថ្ងៃទី៣ខែមេសា នៅពេលប្រទេសថៃបានឈានចូលដល់រដូវប្រាំងប្រចាំឆ្នាំរបស់ខ្លួន ក្រុងបាងកកបានកំណត់សីតុណ្ហភាពប្រហែល ១០៩ អង្សាហ្វារិនហៃ ដែលជំរុញឱ្យមនុស្សជាច្រើនស្នាក់នៅក្នុងផ្ទះ ដោយតម្រូវឲ្យប្រើម៉ាស៊ីនត្រជាក់ជាចាំបាច់។នៅក្នុងប្រទេសសិង្ហបុរី សាលារៀនមួយចំនួន បានប្រាប់ឲ្យសិស្សស្លៀកសម្លៀកបំពាក់ត្រជាក់ៗ និងសម្លៀកបំពាក់សម្រាប់ហាត់កីឡា រហូតមានការជូនដំណឹងបន្ថែម ដោយសារកំណើនសីតុណ្ហុភាពឡើងខ្ពស់ក្នុងរយៈពេលប៉ុន្មានសប្ដាហ៍ថ្មីៗនេះ ៕

ប្រជាជនម៉ូស្លីមទូទាំងពិភពលោកប្រារព្ធពិធីបុណ្យ Eid al-Fitr ក្នុងស្រមោលទុក្ខវេទនារបស់ពលរដ្ឋហ្កាហ្សា

ប្រជាជនម៉ូស្លីមជុំវិញពិភពលោកបានប្រារព្ធពិធីបុណ្យ អេត អាល់ ហ្វីត(Eid al-Fitr)កាលពីថ្ងៃពុធ ទី១០មេសា សប្ដាហ៍នេះ ដែលជាថ្ងៃបញ្ចប់នៃខែដ៏វិសុទ្ធបុណ្យរ៉ាម៉ាដាន។ ប៉ុន្តែព្រឹត្តិការណ៍នេះ ត្រូវបានគ្របដណ្ដប់ដោយវិបត្តិកាន់តែធ្ងន់ធ្ងរនៅក្នុងដែនដីហ្កាហ្សា និងការវាយលុកដោយយោធារបស់អ៊ីស្រាអែល ដែលគេរំពឹងទុក នៅក្នុងទីក្រុង រ៉ាហ្វា(Rafah) បន្ទាប់ពីសង្គ្រាមរយៈពេល៦ខែមកនេះ។អ៊ីស្លាមសាសនិកម្នាក់នៅក្នុងរដ្ឋធានី Nairobi របស់ប្រទេសកេនយ៉ា បាននិយាយថា យើងមិនគួរភ្លេចបងប្អូនរបស់យើងនៅប៉ាឡេស្ទីនទេ។ពួកគេត្រូវបានទទួលរងការឈ្លានពានដោយអយុត្តិធម៌ និងអំពើហិង្សាជាច្រើន ខណៈពិភពលោកកំពុងអោបដៃឈរមើលដោយស្ងៀមស្ងាត់។ ក្នុងសារថ្ងៃឈប់សម្រាក លោកប្រធានាធិបតីតួកគី Recep Tayyip Erdogan បានផ្ញើការគាំទ្រទៅកាន់តំបន់ហ្កាហ្សា ដែលលោកបានហៅថា ការបង្ហូរឈាមលើមនសិការនៃមនុស្សជាតិ។នៅខាងក្នុងដែនដីហ្កាហ្សា ហែកហួរដោយសង្រ្គាម មានភាពសប្បាយរីករាយតិចតួច អមដោយទឹកភ្នែក។ ប្រជាជនប៉ាឡេស្ទីននៅក្នុងជំរំជនភៀសខ្លួន ចាបាលីយ៉ា(Jabaliya) ក្បែរទីក្រុងហ្កាហ្សា បានកាន់ទុក្ខមនុស្សជាទីស្រឡាញ់ក្នុងចំណោមមនុស្សជាង៣៣.០០០នាក់ ដែលត្រូវបានសម្លាប់នៅក្នុងការវាយលុករបស់អ៊ីស្រាអែលជាការសងសឹកទៅនឹងការវាយប្រហារដ៏សាហាវរបស់ក្រុមហាម៉ាសកាលពីថ្ងៃទី ៧ ខែតុលា ចូលក្នុងទឹកដីអ៊ីស្រាអែល។នៅប្រទេសឥណ្ឌូណេស៊ី ជាប្រទេសមូស្លីម ដែលមានប្រជាជនកាន់សាសនាអ៊ីស្លាមច្រើនជាងគេលើពិភពលោក ជិតបីភាគបួននៃចំនួនប្រជាជនកំពុងធ្វើដំណើរ វិលត្រលប់ទៅស្រុកកំណើតសម្រាប់ការប្រារព្ធពិធីបុណ្យប្រចាំឆ្នាំដែលអ្នកស្រុកស្គាល់ថាជាបុណ្យ មូឌីក (mudik)។នៅទីក្រុងប៊ែរឡាំង ប្រទេសអាល្លឺម៉ង់ ក្រុមអ្នកថ្វាយបង្គំបានឆ្លុះបញ្ចាំងពិភពលោក ដែលមកពីប្រទេសបេនីន ហ្គាណា ស៊ីរី អាហ្វហ្គានីស្ថាន និងទួរគីជាដើម។នៅក្នុងប្រទេសប៉ាគីស្ថាន ដែលជាប្រទេសមានពលរដ្ឋកាន់សាសនាអ៊ីស្លាមភាគច្រើន ជាទីដែលមាន៩០%នៃប្រជាជន២៤០លាននាក់កាន់សាសនាអ៊ីស្លាម បានប្រកាសថ្ងៃឈប់សម្រាកទូទាំងប្រទេសរយៈពេល៤ថ្ងៃចាប់ពីថ្ងៃអង្គារដល់ថ្ងៃសុក្រទី១២មេសាសប្ដាហ៍នេះ ។នៅប្រទេសម៉ាឡេស៊ី វិញ ក្រុមអ៊ីស្លាមសាសនិកដែលបានចូលរួមពិធីបួងសួងថ្ងៃពិធីបុណ្យ អេត អាល់ហ្វីត កាលពីថ្ងៃពុធទី១០មេសា បានបន់ស្រន់ឲ្យរឿងល្អៗកើតឡើងដល់ពួកគេ និងការអាណិតអាសូរដល់ពលរដ្ឋនៅក្នុងដែនដីហ្កាហ្សា កំពុងប្រារព្ធពិធីបុណ្យ ក្រោមស្រមោលសង្រ្គាម៕

មនុស្ស៥នាក់ ត្រូវបានចាប់ខ្លួនពីបទបាញ់ប្រហារនៅទីក្រុង Philadelphia អំឡុងពិធីបុណ្យមូស្លីម

យោងតាមស្នងការនគរបាល លោកខេវិន ជេ បេតធេល(Kevin J. Bethel) បានិយាយថា នគរបាលបានចាប់ខ្លួនមនសុ្សចំនួន៥នាក់ បន្ទាប់ពីការបាញ់ប្រហាររវាងក្រុមជាគូប្រជែងពីរក្រុម នៅជិតការប្រមូលផ្តុំប្រជាជនមូស្លីម ដើម្បីអបអរថ្ងៃចុងបញ្ចប់នៃបុណ្យរ៉ាម៉ាដាន កាលពីថ្ងៃពុធ នៅទីក្រុង Philadelphia រដ្ឋ ភេនស៊ីលវ៉ានៀ (Pennsylvania) សហរដ្ឋអាមេរិក។ការបាញ់ប្រហារនេះ បានកើតឡើងនៅជិតទីលាន ក្លារ៉ា មូហាម៉ាដ(Clara Muhammad) ជាកន្លែងដែលមនុស្សប្រហែល ១.០០០នាក់កំពុងប្រមូលផ្តុំ។ លោក Bethel និយាយថា មនុស្ស ៤ នាក់ដែលត្រូវបានចាប់ខ្លួនកំពុងកាន់អាវុធ ហើយម្នាក់ត្រូវបានបាញ់ដោយនគរបាល ត្រូវចំស្មា និងជើង។លោកបាននិយាយបន្ថែមថា មានការបាញ់កាំភ្លើងប្រមាណជា៣០គ្រាប់ ហើយយុវជនអាយុ២២ឆ្នាំម្នាក់ និងអនីតិជនអាយុ១៥ឆ្នាំម្នាក់ ត្រូវបាននគរបាលបាញ់ ប៉ុន្តែស្ថិតក្នុងស្ថានភាពមានស្ថិរភាព។ លោកស្នងការនិយាយថា ការស៊ើបអង្កេត នឹងពិនិត្យមើលលើហេតុផលនៃជម្លោះដែលបានកើតឡើងក្នុងអំឡុងពេលការជួបជុំជាសាធារណៈ ក្នុងពិធីបុណ្យ Eid al-Fitr ។ស្នងការនគរបាល លោក Kevin J. Bethel បាននិយាយទៅកាន់អ្នកសារព័ត៌មានថា បក្សពួកពីរក្រុមទំនងជាកំពុងបាញ់កាំភ្លើងតគ្នានៅក្នុងឧទ្យានមួយកន្លែង ហើយមន្រ្តីនគរបាលបានឃើញមនុស្ស ៤ នាក់រត់ចេញពីកន្លែងកើតហេតុ។

បណ្ដាញសង្គម

ព័ត៌មានថ្មីៗ

ក្រសួងឧស្សាហកម្មបង្កើតនូវឱកាសថ្មី សម្រាប់ការពង្រីកខ្លួនរបស់សហគ្រាសក្នុងតំបន់

ហនុមាន ប៊ែវើរីជីស ចាប់ដៃគូជាមួយ AI FARM គាំទ្រយុវជនកម្ពុជាក្នុងការអភិវឌ្ឍបច្ចេកវិទ្យា រ៉ូប៉ូត តាមរយៈ BATTLEBOTx All Star Championship

ប្រព័ន្ធលូមេធំមួយកន្លែង រីកកកស្ទះដោយកាកសំណល់ប្រើប្រាស់ និងមែកឈើ អាជ្ញាធរខណ្ឌពោធិ៍សែនជ័យចុះកាយផ្ទាល់ដៃដល់ក្នុងប្រអប់លូ

រដ្ឋបាលខណ្ឌដូនពេញបានបំពាក់ គ្រឿងឥស្សរិយយសមេដាយការងារនិងប័ណ្ណសរសើរ ដល់មន្រ្តីរាជការរដ្ឋបាលខណ្ឌ

ម្ចាស់ក្សត្រី ទុនគូ ពូតេរី អ៊ីនតាន់ សាហ្វីណា ប្រធានអឌ្ឍចន្ទក្រហមម៉ាឡេស៊ី យាងដល់កម្ពុជា ដើម្បីបំពេញទស្សនកិច្ចផ្លូវការ

លោក Trump ចាប់ផ្ដើមយុទ្ធនាការឃោសនាបោះឆ្នោត ខណៈបក្សសាធារណរដ្ឋប្រឈមការប្រកួតប្រជែងតឹងតែង

ប្រធានាធិបតីឥណ្ឌូនេស៊ី តែងតាំងរដ្ឋមន្ត្រីការបរទេស និងឧស្សាហកម្មថ្មី ជាការរុះរើគណៈរដ្ឋមន្ត្រីដ៏ធំ

លីបង់ពឹងផ្អែកលើការបណ្តុះបណ្តាល AI ទ្រង់ទ្រាយធំ ដើម្បីស្តារសេដ្ឋកិច្ចឡើងវិញ

ខ្មាន់កាំភ្លើងសម្លាប់មនុស្ស ៧នាក់ លើរថយន្តតូរីសនៅតំបន់ភាគខាងលិចប្រទេសស៊ីរី

សត្វដំរីព្រៃចំនួនពីរក្បាលត្រូវបានជួយសង្រ្គោះ ក្រោយធ្លាក់ចូលស្រះទឹកមួយកន្លែង ស្រុកអូររាំង ខេត្តមណ្ឌលគិរី

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877