BTV NEWS

ឃាត់ខ្លួនជនពាក់ព័ន្ធ Online Scams ជាង ៦៥០នាក់ នៅបាវិត ភាគច្រើនជាជនបរទេស

ជនជាតិវៀតណាមសរុប ៣៤នាក់ ត្រូវបានបណ្តេញចេញពីកម្ពុជា តាមប៉ុស្តិ៍នគរបាលច្រកទ្វារព្រំដែនអន្តរជាតិបាវិត ខេត្តស្វាយរៀង

កាស៊ីណូ ស៊ីលវើរ ស្តារនៅក្រុងបាវិតត្រូវបានព្យួរអាជ្ញាប័ណ្ណបន្ទាប់ពី រកឃើញមានជាប់ពាក់ព័ន្ធនឹងការឆបោកតាមប្រព័ន្ធបច្ចេកវិទ្យា

ឃាត់ខ្លួនជនបរទេសជាង១០០នាក់ ពាក់ព័ន្ធការឆបោកតាមប្រព័ន្ធបច្ចេកវិទ្យា ក្នុងអគារខនដូរ១កន្លែង នៅសង្កាត់បឹងសាឡាង ខណ្ឌទួលគោក

សន្តិសុខ និង សង្គម

អឌ្ឍចន្ទក្រហមប៉ាឡេស្ទីន៖ កងកម្លាំងអ៊ីស្រាអែល ឡោមព័ទ្ធមន្ទីរពេទ្យនៅហ្កាហ្សា ២បន្ថែមទៀត

សង្គមអឌ្ឍចន្ទក្រហមប៉ាឡេស្ទីន (PRCS) បាននិយាយថា កងកម្លាំងអ៊ីស្រាអែល បានឡោមព័ទ្ធមន្ទីរពេទ្យចំនួន២បន្ថែមទៀត នៅក្នុងតំបន់ហ្កាហ្សាស្ទ្រីប ដោយបរិយាយថាមានការបាញ់ផ្លោង និងការបាញ់ប្រហារដ៏ខ្លាំងក្លា។ រយៈពេលជាច្រើនខែនៃជម្លោះនេះ ការប្រយុទ្ធគ្នា នៅតែមានសភាពខ្លាំងក្លានៅឡើយទូទាំងតំបន់ហ្កាហ្សា ទោះបីមានសម្ពាធពីអន្តរជាតិលើអ៊ីស្រាអែល និងកិច្ចខិតខំប្រឹងប្រែងឲ្យមានបទឈប់បាញ់ និងការដោះដូរចំណាត់ថ្នូរក៏ដោយ។ ប្រភពខាងលើបាននិយាយកាលពីថ្ងៃអាទិត្យថា មន្ទីរពេទ្យ Al-Amal និងមន្ទីរពេទ្យ Nasser ក្នុងតំបន់ហ្កាហ្សាភាគខាងត្បូង ត្រូវបានកងកម្លាំងអ៊ីស្រាអែលឡោមព័ទ្ធ។ ទូរទស្សន៍ CNN បានជួបក្រុមអាជ្ញាធរមន្ទីរពេទ្យដើម្បីទទួលបានព័ត៌មានលម្អិតបន្ថែមទៀត និងបានសុំការអត្ថាធិប្បាយពីកងកម្លាំងការពារជាតិអ៊ីស្រាអែល ។ មន្ទីរពេទ្យទាំង២ ត្រូវបានឡោមព័ទ្ធដោយកងកម្លាំងអ៊ីស្រាអែលក្នុងសង្គ្រាមដែលបានអូសបន្លាយរហូតមកដល់ពេលនេះ។ យោធាអ៊ីស្រាអែល នៅតែកំពុងគ្រប់គ្រងមន្ទីរពេទ្យ Al-Shifa ដែលជាមន្ទីរពេទ្យធំជាងគេបំផុតនៅហ្កាហ្សា បន្ទាប់ពីបានវាយឆ្មក់កាលពីសប្ដាហ៍មុន។ កងកម្លាំង IDF របស់អ៊ីស្រាអែល ក៏បានប្រកាសផងដែរថា ទាហានរបស់ខ្លួនម្នាក់បានស្លាប់ក្នុងកាប្រយុទ្ធគ្នានៅតំបន់ហ្កាហ្សាភាគខាងជើង ដែលនាំឲ្យចំនួនអ្នកស្លាប់ក្នុងចំណោមកងទ័ព ចាប់តាំងពីចាប់ផ្ដើមប្រតិបត្តិការ បានកើនឡើងដល់ ២៥២នាក់៕

កញ្ចប់ជំនួយត្រូវបានទម្លាក់ពីលើតំបន់ហ្កាហ្សា ខណៈការប្រយុទ្ធនៅតែបន្តមាន

កញ្ចប់ជំនួយត្រូវបានទម្លាក់ពីលើយន្តហោះ នៅតំបន់ហ្កាហ្សា នៅថ្ងៃសៅរ៍ (ទី២៣ ខែមីនា) នេះ ខណៈដែលអ៊ីស្រាអែលបានគំរាមបើកប្រតិបត្តិការយោធាដ៏ធំមួយ នៅក្នុងទីក្រុងរ៉ាហ្វាភាគខាងត្បូង ដែលនៅកៀកនឹងតំបន់ឆ្លងកាត់ព្រំដែនជាមួយអេហ្ស៊ីប ដោយការគំរាមនេះបានធ្វើឡើង ទោះបីជាមានការអំពាវនាវជាអន្តរជាតិប្រឆាំងនឹងប្រតិបត្តិការនេះក៏ដោយ។ខណៈដែលក្តីសង្ឃឹម ដើម្បីមានបទឈប់បាញ់ក្នុងអំឡុងខែដ៏ពិសិដ្ឋនៃបុណ្យរ៉ាម៉ាដានរបស់អ្នកកាន់សាសនាឥស្លាម បានរសាត់បាត់ទៅ ហើយស្ថានភាពមនុស្សធម៌នៅហ្កាហ្សា កាន់តែធ្ងន់ធ្ងរឡើងៗ សហរដ្ឋអាមេរិក និងប្រទេសផ្សេងទៀត បានព្យាយាមប្រើប្រាស់ការទម្លាក់ពីលើអាកាស និងតាមនាវា ដើម្បីផ្តល់ជំនួយសង្គ្រោះបន្ថែមទៀត។ប៉ុន្តែភ្នាក់ងារមនុស្សធម៌និយាយថា មានប្រហែល ១ភាគ៥នៃបរិមាណផ្គត់ផ្គង់ដែលត្រូវការប៉ុណ្ណោះ បានចូលដល់តំបន់ហ្កាហ្សា ហើយមធ្យោបាយតែ១គត់ ដើម្បីបំពេញតម្រូវការនៅក្នុងតំបន់ឆ្នេរនេះ គឺការពន្លឿនការដឹកជញ្ជូនឲ្យបានបឆាប់រហ័សតាមផ្លូវ។អគ្គលេខាធិការអង្គការសហប្រជាជាតិលោក Antonio Guterres ត្រូវបានគេរំពឹងថា នឹងធ្វើទស្សនកិច្ចនៅព្រំដែននៃប្រទេសអេហ្ស៊ីបជាមួយតំបន់ហ្កាហ្សា នៅថ្ងៃសៅរ៍នេះ ដើម្បីរំលឹកឡើងវិញនូវការអង្វរកសុំឲ្យមានបទឈប់បាញ់ ដែលអាចនាំមកនូវភាពធូរស្រាលដល់ដែនដីដែលត្រូវបានបំផ្លិចបំផ្លាញដោយសង្រ្គាមជាង ៥ខែ រវាងអ៊ីស្រាអែល និងក្រុមហាម៉ាស៕

ហេតុអ្វីបានជាក្រុម ISIS-K វាយប្រហារសាលមហោស្រព នៅទីក្រុងមូស្គូ?

មន្ត្រីអាមេរិកម្នាក់បានប្រាប់សារព័ត៌មាន Reuters ថា សហរដ្ឋអាមេរិកមានចារកម្មគាំទ្រដល់ការអះអាងរបស់ក្រុមរដ្ឋឥស្លាម (ISIS) នៅប្រទេសអ៊ីរ៉ាក់ និងស៊ីរី ដែលប្រាប់ថា ខ្លួនទទួលខុសត្រូវចំពោះការបាញ់ប្រហារបង្ហូរឈាមនៅឯកន្លែងប្រគុំតន្ត្រីមួយ នៅជិតទីក្រុងមូស្គូរបស់រុស្ស៊ី កាលពីថ្ងៃសុក្រ (ទី២២ ខែមីនា)។នេះគឺជាព័ត៌មានខ្លះៗអំពីមែកធាងរបស់ក្រុមនេះ នៅអាហ្វហ្គានីស្ថាន ដែលគេស្គាល់ថា ជា ISIS-Khorasan (ISIS-K) និងហេតុផលជម្រុញចិត្តរបស់ក្រុមនេះ ក្នុងការវាយប្រហារលើប្រទេសរុស្ស៊ី។ក្រុម ISIS-K ដែលត្រូវបានគេដាក់ឈ្មោះតាមពាក្យចាស់សម្រាប់តំបន់ដែលរួមបញ្ចូលផ្នែកខ្លះនៃប្រទេសអ៊ីរ៉ង់ តួកម៉េនីស្ថាន និងអាហ្វហ្គានីស្ថាន បានលេចឡើងនៅភាគខាងកើតអាហ្វហ្គានីស្ថាន កាលពីចុងឆ្នាំ២០១៤ ហើយបានបង្កើតភាពល្ពីល្បាញយ៉ាងឆាប់រហ័ស ដោយសារអំពើឃោរឃៅបំផុតរបស់ពួកគេ។ ក្នុងនាមជាមែកធាងសកម្មបំផុតមួយក្នុងតំបន់របស់ក្រុមសកម្មប្រយុទ្ធ ISIS ក្រុម ISIS-K បានជួបប្រទះនូវការធ្លាក់ចុះសមាជិក ចាប់តាំងពីមានការកើនឡើងខ្ពស់បំផុត នៅឆ្នាំ២០១៨។ ទាំងកងកម្លាំងតាលីបង់ និងសហរដ្ឋអាមេរិកសុទ្ធតែបានរួមចំណែកធ្វើមានការបាត់បង់យ៉ាងធ្ងន់ធ្ងរនេះ។ ក្រុម ISIS-K នេះ មានប្រវត្តិវាយប្រហារជាច្រើន ក្នុងនោះរួមទាំងការវាយប្រហារប្រឆាំងវិហារឥស្លាម ទាំងក្នុង និងក្រៅប្រទេសអាហ្វហ្គានីស្ថាន។ នៅដើមឆ្នាំ២០២៤ នេះ សហរដ្ឋអាមេរិកចាប់បានទំនាក់ទំនងដែលបញ្ជាក់ថា ក្រុមនេះបានបំផ្ទុះគ្រាប់បែក ២គ្រាប់នៅក្នុងប្រទេសអ៊ីរ៉ង់ ដែលបានសម្លាប់មនុស្សជិត ១០០នាក់។ កាលពីខែកញ្ញា ឆ្នាំ២០២២ ក្រុមសកម្មប្រយុទ្ធ ISIS-K បានអះអាងទទួលខុសត្រូវ ចំពោះការបំផ្ទុះគ្រាប់បែកអត្តឃាត នៅស្ថានទូតរុស្ស៊ី ក្នុងទីក្រុងកាប៊ុល។កាលពីដើមខែមីនា ឧត្តមសេនីយ៍ជាន់ខ្ពស់របស់អាមេរិកប្រចាំនៅមជ្ឈិមបូព៌ា បាននិយាយថា ក្រុម ISIS-K អាចវាយប្រហារផលប្រយោជន៍អាមេរិក និងលោកខាងលិច នៅខាងក្រៅប្រទេសអាហ្វហ្គានីស្ថាន «ក្នុងរយៈពេលមិនដល់ ៦ខែ និងដោយគ្មានសញ្ញាព្រមានជាមុនសូម្បីតិចតួច»។ចុះហេតុអ្វីបានជាក្រុមនេះវាយប្រហាររុស្ស៊ី? ទោះបីជាការវាយប្រហារដោយក្រុម ISIS-K នៅរុស្ស៊ី កាលពីថ្ងៃសុក្រ (ទី២២ ខែមីនា) គឺជាហេតុការណ៍គួរឲ្យភ្ញាក់ផ្អើលយ៉ាងខ្លាំងក៏ដោយ ក៏អ្នកជំនាញបាននិយាយថា ក្រុមនេះបានប្រឆាំងនឹងប្រធានាធិបតីរុស្ស៊ីលោក Vladimir Putin ក្នុងប៉ុន្មានឆ្នាំថ្មីៗនេះ។ លោកវេជ្ជបណ្ឌិត Colin Clarke មកពី «Soufan Centre» ដែលជាក្រុមស្រាវជ្រាវមានមូលដ្ឋាននៅទីក្រុង Washington សហរដ្ឋអាមេរិក បាននិយាយថា៖ «ក្រុម ISIS-K ទទួលបានការចាប់អារម្មណ៍នៅរុស្ស៊ី ក្នុងរយៈពេល ២ឆ្នាំចុងក្រោយនេះ ដោយសារការរិះគន់ជាញឹកញាប់ ចំពោះលោក Putin នៅក្នុងការឃោសនារបស់ខ្លួន»។ ចំណែកលោក Michael Kugelman មកពីមជ្ឈមណ្ឌល Wilson ដែលមានមូលដ្ឋាននៅទីក្រុងវ៉ាស៊ីនតោនដែរនោះ បាននិយាយថា ក្រុម ISIS-K «មើលឃើញប្រទេសរុស្ស៊ីថា មានពាក់ព័ន្ធនៅក្នុងសកម្មភាពដែលគៀបសង្កត់ប្រជាជនម៉ូស្លីមជាប់ជានិច្ច»៕

ក្រុមអ្នកជួយសង្គ្រោះបោសសម្អាតគំនរបាក់បែក ក្នុងសាលប្រគុំតន្ត្រី នៅក្រុងមូស្គូ បន្ទាប់ពីមានការវាយប្រហារ

ក្រុមអ្នកជួយសង្គ្រោះ បានបន្តប្រតិបត្តិការបោសសម្អាតគំនរបាក់បែក និងស្វែងរកសាកសព ក្នុងសាលប្រគុំតន្ត្រី នៅទីក្រុងមូស្គូ នាថ្ងៃសៅរ៍ (ទី២៣ ខែមីនា) នេះ បន្ទាប់ពីមានការវាយប្រហារ ដែលបណ្ដាលឲ្យមានអ្នកស្លាប់ច្រើនបំផុត។ដោយដកស្រង់ទិន្នន័យបឋម គណៈកម្មាធិការស៊ើបអង្កេតរបស់រុស្ស៊ី បានឲ្យដឹងនៅថ្ងៃសៅរ៍នេះថា យ៉ាងហោចណាស់មនុស្ស ៩៣នាក់ត្រូវបានសម្លាប់ និងរាប់រយនាក់រងរបួស នៅក្នុងការវាយប្រហារមួយ កាលពីថ្ងៃសុក្រ (ទី២២ ខែមីនា) នៅជិតទីក្រុងម៉ូស្គូ ហើយបានព្រមានថា ចំនួនជនរងគ្រោះត្រូវបានរំពឹងថា នឹងកើនឡើងបន្ថែមទៀត។គួរបញ្ជាក់ថា ខ្មាន់កាំភ្លើងក្នុងសម្លៀកបំពាក់បន្លំខ្លួន បានបើកការបាញ់ប្រហារដោយអាវុធស្វ័យប្រវត្តិលើអ្នកទៅមើលការប្រគុំតន្ត្រីក្បែរទីក្រុងមូស្គូ កាលពីថ្ងៃសុក្រ ជាហេតុការណ៍វាយប្រហារមួយដែលត្រូវបានពួកសកម្មប្រយុទ្ធរដ្ឋអ៊ីស្លាមអះអាងថា ជាស្នាដៃរបស់ខ្លួន៕

សហរដ្ឋអាមេរិក៖ ខ្លួនបានអនុវត្តការវាយប្រហារស្វ័យការពារប្រឆាំងនឹងមូលដ្ឋានរបស់ក្រុមហ៊ួទី

ទីបញ្ជាការកណ្តាលរបស់សហរដ្ឋអាមេរិក (CENTCOM) កាលពីថ្ងៃសុក្រ (ទី២២ ខែមីនា) បាននិយាយថា កងកម្លាំងសហរដ្ឋអាមេរិកបានអនុវត្តការវាយប្រហារស្វ័យការពារប្រឆាំងនឹងកន្លែងស្តុកអាវុធក្រោមដីរបស់ក្រុមហ៊ួទីចំនួន ៣កន្លែង នៅក្នុងតំបន់ដែលគ្រប់គ្រងដោយក្រុមឧទ្ទាមរបស់ប្រទេសយេម៉ែនមួយនេះ។ការវាយប្រហារនោះបានកំណត់គោលដៅលើសមត្ថភាពដែលត្រូវបានប្រើប្រាស់ដោយក្រុមហ៊ួទី ដើម្បីគំរាមកំហែង និងវាយប្រហារលើនាវាកងទ័ពជើងទឹក និងនាវាពាណិជ្ជកម្មនៅក្នុងតំបន់។ នេះបើតាមសេចក្តីថ្លែងការណ៍មួយ ដែលបង្ហោះនៅលើបណ្ដាញសង្គម X។ជាមួយគ្នានេះ CENTCOM ក៏បានឲ្យផងដែរថា នៅក្នុងការវាយប្រហារស្វ័យការពារនេះ កងកម្លាំងរបស់ខ្លួនបានបំផ្លាញយានដ្រូន (UAV) ចំនួន ៤គ្រឿង ក្នុងតំបន់ដែលគ្រប់គ្រងដោយក្រុមហ៊ួទីរបស់ប្រទេសយេម៉ែននេះ។គួរបញ្ជាក់ដែរថា ក្រុមហ៊ួទីបានធ្វើការវាយប្រហារនៅក្នុងតំបន់សមុទ្រក្រហម ដោយក្រុមសកម្មប្រយុទ្ធមានសម្ព័ន្ធភាពជាមួយអ៊ីរ៉ង់មួយនេះ និយាយថា ជាសាមគ្គីភាពជាមួយប៉ាឡេស្ទីននៅតំបន់ហ្កាហ្សា ហើយការវាយប្រហារនេះ បានរំខានដល់ការដឹកជញ្ជូនទូទាំងពិភពលោក ដែលធ្វើឲ្យក្រុមហ៊ុនត្រូវចំណាយពេលយូរ និងថ្លៃជាងមុន ដោយសារប្ដូរផ្លូវធ្វើដំណើរទៅជុំវិញអាហ្វ្រិកខាងត្បូង។CENTCOM បាបបន្ថែមទៀតថា អំឡុងពេលនៃការវាយប្រហាររបស់សហរដ្ឋអាមេរិកលើយានដ្រូននោះ ក្រុមសកម្មប្រយុទ្ធហ៊ួទី បានបាញ់មីស៊ីលប្រឆាំងនាវាចំនួន ៤គ្រាប់ចេញពីតំបន់ដែលពួគគេគ្រប់គ្រងឆ្ពោះទៅកាន់សមុទ្រក្រហម ប៉ុន្តែការបាញ់ប្រហារនោះមិនបណ្ដាលឲ្យមានការរងរបួស ឬការខូចខាតអ្វីឡើយ៕

ហ្វីលីពីនចោទប្រកាន់ចិនពីការវាយប្រហារដោយកាណុងបាញ់ទឹកលើនាវាផ្គត់ផ្គង់

ប្រទេសហ្វីលីពីនបានចោទប្រកាន់ឆ្មាំសមុទ្រចិនថា បានរារាំងនាវាផ្គត់ផ្គង់ហ្វីលីពីន និងបង្កការខូចខាតដល់នាវានេះ ដោយប្រើកាណុងបាញ់ទឹក នៅព្រឹកថ្ងៃសៅរ៍ (ទី២៣ ខែមីនា) នេះ នៅម្ដុំតំបន់ថ្មប៉ប្រះទឹកដាច់ស្រយាល និងមានជម្លោះ ក្នុងសមុទ្រចិនខាងត្បូង។យោធាហ្វីលីពីនបានឲ្យដឹងថា ការវាយប្រហាររយៈពេលជិត ១ម៉ោង បានកើតឡើងនៅតំបន់ថ្មប៉ប្រះទឹក Second Thomas Shoal ជាកន្លែងដែលនាវារបស់ចិនបានប្រើកាណុងបាញ់ទឹក ហើយបានបុកជាមួយនាវាហ្វីលីពីន ដែលជាហេតុការណ៍ប្រឈមមុខដាក់គ្នាដដែលៗ ក្នុងប៉ុន្មានខែថ្មីៗនេះ។យោធាបានបញ្ចេញឃ្លីបវីដេអូ ដែលបង្ហាញពីនាវាពណ៌ស ម្តងហើយម្តងទៀត បានបាញ់ទឹកដោយប្រើកាណុងបាញ់ទឹកដាក់នាវាមួយផ្សេងទៀត ដែលបើកក្បែរគ្នានោះ។ ចំណែកឃ្លីបវីដេអូមួយទៀតបានបង្ហាញពីនាវាពណ៌ស ២គ្រឿង បាញ់ទឹកក្នុងពេលដំណាលគ្នាដាក់នាវាតែមួយ។បន្ថែមពីលើនោះ យោធាក៏បានចេញផ្សាយឃ្លីបមួយទៀតដែលបង្ហាញពីនាវាពណ៌សដែលមានអក្សរ «ឆ្មាំសមុទ្រចិន» បើកកាត់នាវាពណ៌ប្រផេះដែលត្រូវបានកំណត់អត្តសញ្ញាណថា ជាទូកផ្គត់ផ្គង់ហ្វីលីពីនឈ្មោះ Unaizah May 4 (UM4)។ដោយមិនបានពិពណ៌នាអំពីកម្រិតនៃការខូចខាត ឬថា តើមានអ្នករបួស ឬស្លាប់ដែរ ឬអត់នោះ យោធាបានឲ្យដឹងនៅក្នុងសេចក្តីថ្លែងការណ៍មួយថា៖ «ទូកផ្គត់ផ្គង់ UM4 បានរងការខូចខាតយ៉ាងធ្ងន់ធ្ងរនៅម៉ោងប្រហែល ៨:៥២ព្រឹក (ថ្ងៃសៅរ៍ ទី២៣ ខែមីនា) ដោយសារតែការបន្តប្រើកាណុងបាញ់ទឹកពីនាវាឆ្មាំសមុទ្រចិន»។អ្នកនាំពាក្យឆ្មាំសមុទ្រចិន លោក Gan Yu បាននិយាយនៅក្នុងសេចក្តីថ្លែងការណ៍មួយថា ក្បួននាវាហ្វីលីពីន «បានឈ្លានពានចូលក្នុងតំបន់នេះ បើទោះបីជាភាគីចិនបានព្រមានម្តងហើយម្តងទៀត និងការគ្រប់គ្រងផ្លូវក៏ដោយ« ដោយលោកបន្ថែមថា ចិនបានអនុវត្ត «ការគ្រប់គ្រង ការរារាំង និងការបណ្តេញចេញស្របតាមច្បាប់»៕

ប្រតិកម្មរបស់ពិភពលោកចំពោះការវាយប្រហារសាលប្រគុំតន្ត្រី Crocus នៅទីក្រុងមូស្គូ

យ៉ាងហោចណាស់មនុស្ស ៦០នាក់ បានស្លាប់ និង ១៤៥នាក់បានរងរបួស បន្ទាប់ពីខ្មាន់កាំភ្លើងបានបើកការបាញ់ប្រហារទៅលើអ្នកទៅមើលការប្រគុំតន្ត្រី នៅទីក្រុងមូស្គូ និងបានបំផ្ទុះគ្រឿងផ្ទុះ ដែលបានធ្វើឲ្យមានអគ្គិភ័យយ៉ាងធំ នៅក្នុងការវាយប្រហារបណ្ដាលឲ្យមានអ្នកស្លាប់យ៉ាងច្រើនបំផុតមួយ នៅប្រទេសរុស្ស៊ី ក្នុងរយៈពេលជាច្រើនទសវត្សរ៍។ប្រទេសរុស្ស៊ីកំពុងស៊ើបអង្កេតថា តើអ្នកណានៅពីក្រោយការវាយប្រហារ នៅកន្លែងប្រគុំតន្ត្រី Crocus ដែលបានកើតឡើងក្នុងខណៈដែលហ្វូងមនុស្សកំពុងអង្គុយដើម្បីមើលការប្រគុំតន្ត្រីរបស់ក្រុមតន្រ្តីរ៉ុកជើងចាស់ Picnic កាលពីថ្ងៃសុក្រ (ទី២២ ខែមីនា)។ ក្រុមជ្រុលនិយម ISIL (ISIS) បានអះអាងទទួលខុសត្រូវចំពោះការវាយប្រហារនេះ ដែលត្រូវបានថ្កោលទោសដោយមេដឹកនាំពីជុំវិញពិភពលោក។អ្នកនាំពាក្យរបស់អង្គការសហប្រជាជាតិ (UN) លោក Farhan Haq បានលើកឡើងនៅក្នុងសេចក្តីថ្លែងការណ៍មួយថា លោក Antonio Guterres «ថ្កោលទោសយ៉ាងខ្លាំងក្លាបំផុតចំពោះការវាយប្រហារភេរវកម្មថ្ងៃនេះ នៅឯសាលប្រគុំតន្ត្រី នៅខាងក្រៅទីក្រុងមូស្គូ ហើយលោកបន្ថែមថា លោកអគ្គលេខាធិការអង្គការសហប្រជាជាតិ «សូមចូលរួមរំលែកទុក្ខទៅកាន់ក្រុមគ្រួសារនៃសព និងប្រជាជន និងរដ្ឋាភិបាលនៃសហព័ន្ធរុស្ស៊ី»។ចំណែកក្រុមប្រឹក្សាសន្តិសុខ UN ក្រៅពីថ្កោលទោស ក៏បានគូសបញ្ជាក់ពីភាពចាំបាច់ក្នុងការធ្វើយ៉ាងណាត្រូវចាប់ខ្លួន និងនាំទៅកាត់ទោស ទាំងជនល្មើស អ្នករៀបចំ អ្នកផ្តល់ហិរញ្ញប្បទាន និងអ្នកឧបត្ថម្ភនៃអំពើភេរវកម្មដ៏គួរឲ្យស្អប់ខ្ពើមនេះ។ ក្រៅពីស្ថាប័នកំពូលរបស់ពិភពលោកទាំង២ នេះ បណ្ដាមេដឹកនាំជាច្រើនរូបផ្សេងទៀត ក៏បានចូលរួមថ្កោលទោស និងចូលរួមរំលែកទុក្ខផងដែរ ដែលមានដូចជាអ្នកនាំពាក្យក្រសួងការបរទេសអាហ្វហ្គានីស្ថានលោក Abdul Qahar Balkhi ប្រធានាធិបតីគុយបាលោក Miguel Diaz-Canel ប្រធានាធិបតីបារាំងលោក French President Emmanuel Macron នាយករដ្ឋមន្ត្រីអ៊ីតាលីលោកស្រី Giorgia Meloniនាយករដ្ឋមន្ត្រីឥណ្ឌាលោក Narendra Modi អ្នកនាំពាក្យសេតវិមានលោក John Kirby រដ្ឋមន្ត្រីការបរទេសវេណេហ៊្សុយអេឡាលោក Yvan Gil ក្រសួងការបទេសអាល្លឺម៉ង់ និងក្រសួងការបរទេសជប៉ុនជាដើម៕

ព្រះនាង Kate នៃដែនដីវ៉េល បង្ហាញពីការពិនិត្យរោគសញ្ញាមានជំងឺមហារីក

ព្រះនាង Catherine Middleton ជាព្រះនាងរបស់ដែនដីវ៉េល របស់ចក្រភពអង់គ្លេស កាលពីថ្ងៃសុក្រ បានប្រកាសថាព្រះនាងមានជំងឺមហារីក ហើយកំពុងស្ថិតក្នុងដំណាក់កាលដំបូងនៃការព្យាបាល ដោយស្នើសុំ ពេលវេលាសម្រាក និងឯកជនភាព ខណៈព្រះនាងត្រូវបំពេញការព្យាបាល។ព្រះនាង Kate ដែលត្រូវបានគេស្គាល់ជាទូទៅ បានមានបន្ទូលថា ការរកឃើញជំងឺមហារីក បន្ទាប់ពីការវះកាត់ពោះវៀនដោយជោគជ័យកាលពីខែមករា គឺជាការភ្ញាក់ផ្អើលយ៉ាងខ្លាំង ប៉ុន្តែព្រះនាង មានសុខភាពល្អនិងរឹងមាំ ជារៀងរាល់ថ្ងៃ។ព្រះនាងមានព្រះជន្ម ៤២ ព្រះវស្សា មិនបានបង្ហាញពីលក្ខណៈពិតប្រាកដនៃជំងឺមហារីកនោះទេ ប៉ុន្តែបានពណ៌នារយៈពេលប៉ុន្មានខែចុងក្រោយនេះ ចាប់តាំងពីព្រះនាងបានចូលមន្ទីរពេទ្យថា ពិបាកមិនគួរឱ្យជឿ សម្រាប់ព្រះនាង និងគ្រួសាររបស់ព្រះនាង។ព្រះនាង បានមានបន្ទូលនៅក្នុងសេចក្តីថ្លែងការណ៍តាមវីដេអូ ដែលថតកាលពីថ្ងៃពុធថា នៅក្នុងខែមករា ព្រះនាងបានធ្វើការវះកាត់ពោះវៀននៅទីក្រុងឡុងដ៍្រ ហើយនៅពេលនោះ វាត្រូវបានគេគិតថា ស្ថានភាពរបស់ព្រះនាងមិនមែនជាជំងឺមហារីកទេ។ការវះកាត់បានទទួលជោគជ័យ។ ទោះបីជាយ៉ាងណា ការធ្វើតេស្តបន្ទាប់ពីការវះកាត់បានរកឃើញថាមានជំងឺមហារីក។

សង្គ្រាមក្រុមជនអន្ធពាលនៅហៃទី ជំរុញឱ្យមានភាពអត់ឃ្លានដល់កម្រិតអាក្រក់បំផុតក្នុងកំណត់ត្រា

អង្គការអន្តរជាតិបាននិយាយកាលពីថ្ងៃសុក្រថា ជិតពាក់កណ្តាលនៃប្រជាជននៅប្រទេសហៃទី កំពុងជួបការលំបាកក្នុងជីវិតរស់នៅរបស់ពួកគេ ខណៈអំពើហឹង្សារបស់ក្រុមជនអន្ធពាល បានរាលដាលពាសពេញប្រទេស ដោយតំបន់ជាច្រើនស្ថិតលើមាត់ជ្រោះនៃគ្រោះទុរ្ភិក្ស។ ពួកគេនិយាយថា អតិផរណា និងការប្រមូលផលបានតិច បានជួយជំរុញប្រទេសហៃទី ធ្លាក់ចូលក្នុងកម្រិតអសន្តិសុខស្បៀងធ្ងន់ធ្ងរបំផុតក្នុងកំណត់ត្រា។លោក Jean-Martin Bauer នាយកកម្មវិធីស្បៀងអាហារពិភពលោកប្រចាំប្រទេសហៃទី បាននិយាយថា ការកើនឡើងនៃភាពអត់ឃ្លានកំពុងបញ្ឆេះវិបត្តិសន្តិសុខដែលកំពុងធ្វើឱ្យប្រទេសនេះរង្គោះរង្គើ។ យើង ត្រូវការវិធានការបន្ទាន់នៅពេលនេះ ដែលកំពុងរង់ចាំការឆ្លើយតបក្នុងកម្រិតពុំមែនជាជម្រើស។ការបែងចែងដំណាក់កាលសន្តិសុខស្បៀងដែលរួមបញ្ចូលគ្នា អង្គការមួយដែលកំណត់ទំហំត្រូវបានប្រើប្រាស់ដោយអង្គការសហប្រជាជាតិ និងរដ្ឋាភិបាលនានា ដើម្បីវាយតម្លៃភាពអត់ឃ្លាន បាននិយាយនៅក្នុងរបាយការណ៍ថា ប្រជាជនប្រហែល ៤,៩៧ លាននាក់ក្នុងចំណោមប្រជាជនប្រហែល ១១,៥ លាននាក់ កំពុងប្រឈមនឹងវិបត្តិ ឬកម្រិតកាន់តែធ្ងន់ធ្ងរនៃអសន្តិសុខស្បៀង។ប្រទេសតំបន់សមុទ្រការ៉ាអ៊ីបមួយនេះ បានធ្លាក់ចូលក្នុងអំពើហឹង្សា ចាប់តាំងពីក្រុមជនអន្ធពាលជាគូប្រជែង បានបើកការវាយប្រហារជាបន្តបន្ទាប់ក្នុងខែនេះ រួមទាំងការវាយឆ្មក់លើប៉ុស្តិ៍នគរបាល និងនៅអាកាសយានដ្ឋានអន្តរជាតិ។ ជម្លោះនេះ បានសម្លាប់មនុស្សរាប់ពាន់នាក់ និងរាប់សែននាក់ទៀតបានរត់ភៀសខ្លួន។មេដឹកនាំតំបន់ កំពុងព្យាយាមបង្កើតក្រុមប្រឹក្សាអន្តរកាលមួយ ហើយនាយករដ្ឋមន្ត្រី លោក អារីយ៉ែល ហង់រី(Ariel Henry) បានសន្យាថា នឹងលាលែងពីតំណែងនៅពេលដែលក្រុមប្រឹក្សាត្រូវបានបង្កើតឡើង។ អង្គការកម្មវិធីស្បៀងអាហារពិភពលោក (WFP) បាននិយាយថា ប្រទេសហៃទីបច្ចុប្បន្ននេះ កំពុងទទួលរងនូវកម្រិតអសន្តិសុខស្បៀងធ្ងន់ធ្ងរបំផុតរបស់ខ្លួនក្នុងកំណត់ត្រា។

រុស្ស៊ី និងចិន ប្រើសិទ្ធវ៉េតូ សេចក្តីសម្រេចរបស់UN ដឹកនាំដោយសហរដ្ឋអាមេរិក ស្តីពីបទឈប់បាញ់នៅហ្កាហ្សា

ក្រុមប្រឹក្សាសន្តិសុខអង្គការសហប្រជាជាតិ កាលពីថ្ងៃសុក្របានបដិសេធសេចក្តីសម្រេចដឹកនាំដោយសហរដ្ឋអាមេរិក ដែលអំពាវនាវឱ្យមានបទឈប់បាញ់នៅតំបន់ហ្កាហ្សា និងកិច្ចព្រមព្រៀងចំណាប់ថ្នូររវាងអ៊ីស្រាអែល-ក្រុមហាម៉ាស បន្ទាប់ពីរុស្ស៊ី និងចិន បានប្រើសិទ្ធវ៉េតូចំពោះវិធានការនេះ ជាចំណាត់ការមួយដែលអ្នកនាំពាក្យសេតវិមាន លោក John Kirby និយាយថាភ្ញាក់ផ្អើលខ្លាំង។ សេចក្តីសម្រេចនេះ អំពាវនាវឲ្យមានបទឈប់បាញ់ភ្លាមៗមានរយៈពេល៦សប្តាហ៍ ដែលនឹងការពារជនស៊ីវិល និងអនុញ្ញាតឲ្យមានការដឹកជញ្ជូនជំនួយមនុស្សធម៌។ ក្រុមប្រឹក្សាដែលមានសមាជិកចំនួន១១រូប ក្នុងចំណោមសមាជិកទាំង ១៥រូប បានបោះឆ្នោតគាំទ្រសេចក្តីសម្រេចនេះ។ ភាគច្រើននៃក្រុមប្រឹក្សា បានបោះឆ្នោតគាំទ្រសេចក្តីសម្រេច ប៉ុន្តែ រុស្ស៊ី និងចិនបានសម្រេចប្រើសិទ្ធិវ៉េតូរបស់ខ្លួន។ ឯកអគ្គរដ្ឋទូតសហរដ្ឋអាមេរិក លោកស្រី Linda Thomas-Greenfield បាននិយាយទៅកាន់ក្រុមប្រឹក្សាសន្តិសុខថា ប្រទេសទាំងពីរមានហេតុផលមើលឃើញតែភាពអាក្រក់ និងថាជារឿងតូចតាច ដោយនិយាយថា ពួកគេប្រឆាំងសេចក្តីសម្រេចជាធម្មតា ព្រោះត្រូវបានតាក់តែងដោយសហរដ្ឋអាមេរិក និងបានរិះគន់ប្រទេសទាំងពីរការមិនថ្កោលទោស ការវាយប្រហារកាលពីថ្ងៃទី៧ ខែតុលា របស់ក្រុមហាម៉ាស លើប្រទេសអ៊ីស្រាអែល។ឯកអគ្គរដ្ឋទូតរុស្ស៊ីលោក Vassily Nebenzia បាននិយាយថា សេចក្តីសម្រេចនេះ មានលក្ខណៈនយោបាយខ្លាំង ហើយមានភ្លើងខៀវដ៏មានប្រសិទ្ធភាពសម្រាប់អ៊ីស្រាអែល ដើម្បីធ្វើប្រតិបត្តិការយោធានៅទីក្រុងរ៉ាហ្វា ជាទីក្រុងមួយនៅភាគខាងត្បូងតំបន់ហ្កាហ្សា ដែលមានប្រជាជនប៉ាឡេស្ទីនជាងមួយលាននាក់ បានជ្រកកោននៅក្នុងតង់បណ្តោះអាសន្ន។ សហរដ្ឋអាមេរិក ចង់បានការគាំទ្រពីក្រុមប្រឹក្សាសន្តិសុខសម្រាប់បទឈប់បាញ់ដែលត្រូវបានផ្សារភ្ជាប់ទៅនឹងការដោះលែងចំណាប់ថ្នូរ ដែលចាប់ខ្លួននដោយក្រុមហាម៉ាសនៅក្នុងតំបន់ហ្កាហ្សា ដោយបានប្រើសិទ្ធវ៉េតូលើសេចក្តីសម្រេចបទឈប់បាញ់ចំនួនបីលើក ដែលបានដាក់ចេញដោយក្រុមប្រឹក្សា។ កាលពីថ្ងៃសុក្រ គឺជាលើកទីមួយហើយ ដែលទីក្រុងវ៉ាស៊ីនតោនបានគាំទ្រឯកសារ ដែលមានពាក្យថា« បទឈប់បាញ់» ដែលបង្ហាញពីភាពតឹងតែងនៃជំហររបស់រដ្ឋបាល លោក Biden ចំពោះប្រទេសអ៊ីស្រាអែល។ ក្រុមអ្នកការទូតនិយាយថា ក្រុមប្រឹក្សានឹងកោះប្រជុំឡើងវិញនៅព្រឹកថ្ងៃសៅរ៍នេះ ដើម្បីបោះឆ្នោតលើសេចក្តីសម្រេច ដែលព្រាងដោយសមាជិកជាប់ឆ្នោតរបស់ក្រុមប្រឹក្សាសន្តិសុខ។

បណ្ដាញសង្គម

ព័ត៌មានថ្មីៗ

គ្រូបង្រៀនប៉ះទង្គិចជាមួយនគរបាលនៅទីក្រុង Mexico City ទាមទារការបង្កើនមូលនិធិអប់រំ

ប្រធានទីភ្នាក់ងារ UNRWA ព្រមានថាការផ្តល់ជំនួយដល់តំបន់ហ្កាហ្សាត្រូវបានរារាំងដោយការរឹតត្បិត និងគម្លាតមូលនិធិ២០០លានដុល្លារ

ពលរដ្ឋខ្មែរនៅក្រៅប្រទេស ថ្កោលទោសទង្វើអមនុស្សធម៌ភាគីថៃបាញ់ប្រហារមកលើពលរដ្ឋខ្មែរនៅភូមិព្រៃចាន់

ប្រទេសកាណាដា ឈានទៅរកការកសាងទំនាក់ទំនងពាណិជ្ជកម្មឡើងវិញជាមួយឥណ្ឌា ក្រោយភាពតានតឹងជាច្រើនឆ្នាំ

ការវាយប្រហាររបស់អ្នកតាំងលំនៅជនជាតិអ៊ីស្រាអែលលើវិហារអ៊ីស្លាមនៅWest Bank ធ្វើឲ្យមានការថ្កោលទោសពីអន្តរជាតិ

BBC សុំអភ័យទោសលោក Trump ជុំវិញការកែសម្រួលសុន្ទរកថា និងច្រានចោលការអះអាងបរិហារកេរ្តិ៍

គ្រូបង្រៀននៅប៉េរូ ប៉ះទង្គិចជាមួយនគរបាលក្នុងទីក្រុងលីម៉ា ដោយទាមទារប្រាក់ឈ្នួលខ្ពស់ជាងនេះ

ប្រទេសបង់ក្លាដែស នឹងធ្វើប្រជាមតិលើកំណែទម្រង់លទ្ធិប្រជាធិបតេយ្យនៅថ្ងៃបោះឆ្នោត

មនុស្ស ១៤០នាក់ បានស្លាប់នៅប្រទេសនេប៉ាល់ ក្នុងមហន្តរាយធម្មជាតិនៃរដូវមូសុងឆ្នាំ២០២៥នេះ

១០ខែឆ្នាំនេះ កម្ពុជានាំចេញទំនិញទៅអាមេរិកមានទឹកប្រាក់កើនដល់ជាង ១០ពាន់លានដុល្លារ

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877