BTV NEWS

ឃាតកម្មសម្លាប់មនុស្ស ២នាក់រួចយកសពទៅកប់ចោលនៅខណ្ឌជ្រោយចង្វារ កម្លាំងសមត្ថកិច្ចរាជធានីបង្ក្រាបជនសង្ស័យបាន ៤នាក់

គណៈបញ្ជាការឯកភាពរដ្ឋបាលក្រុងកំពង់សោម ចុះត្រួតពិនិត្យរដ្ឋបាលចំហរ រកឃើញជនបរទេស ២៦នាក់ ពាក់ព័ន្ធករណី Online Scams

ចៅក្រមស៊ើបសួរសម្រេចឃុំខ្លួនមន្ត្រីនគរបាល-អាវុធហត្ថខេត្តកំពត និងអ្នកទទួលផលចោរកម្មសរុបចំនួន ៤៧នាក់

អាជ្ញាធររាជធានីភ្នំពេញ បន្តប្រតិបត្តិការបោសសម្អាត Online Scams ត្រួតពិនិត្យ ៨០ ទីតាំងទៀត និងផាកពិន័យម្ចាស់ទីតាំងរស់នៅប្រមូលផ្ដុំចំនួន ៤ទីតាំង

សន្តិសុខ និង សង្គម

ក្រុមសង្គ្រោះ ប្រើយន្តហោះដឹកអ្នកដែលជាប់គាំងនៅតំបន់ភ្នំ បន្ទាប់ពីគ្រោះរញ្ជួយដីនៅកោះតៃវ៉ាន់

ក្រុមអ្នកជួយសង្គ្រោះរបស់កោះតៃវ៉ាន់ បានបញ្ជូនឧទ្ធម្ភាគចក្រទៅនាំយកមនុស្ស ដែលជាប់ខ្លួននៅតំបន់ភ្នំ ហ័រលៀន (Hualien) នៅថ្ងៃព្រហស្បតិ៍ (០៤ មេសា) នេះ រយៈពេលមួយថ្ងៃបន្ទាប់ពីការរញ្ជួយដីកម្រិត ៧,៤ រ៉ិចទ័របានអង្រួនកោះនេះ និងសម្លាប់មនុស្សយ៉ាងហោចណាស់ ៩ នាក់។ ចំនួនអ្នករងរបួសបានកើនឡើងលើសពី ១.០០០ នាក់ ដោយបុគ្គលិកប្រហែល ៥០ នាក់ដែលកំពុងធ្វើដំណើរទៅកាន់សណ្ឋាគារក្នុងឧទ្យានជាតិមួយ នៅតែបន្តបាត់ខ្លួននៅឡើយ។កម្មករបានចាប់ផ្តើមរុះរើអគារដែលរងគ្រោះដោយរញ្ជួយដីនៅតំបន់ ហ័រលៀន ខណៈដែលយានអេស្កាវ៉ាទ័រ ត្រូវបានគេមើលឃើញរុញកម្ទេចថ្មចេញពីអគារដែលរងការខូចខាត ហើយកម្មករត្រូវបានគេឃើញខួងនៅលើជញ្ជាំងផ្នែកខាងក្រៅនៃអគារដែលបានផ្អៀង។ការរញ្ជួយ ដែលជាគ្រោះធម្មជាតិខ្លាំងក្លាបំផុតក្នុងរយៈពេល ២៥ ឆ្នាំរបស់តៃវ៉ាន់នេះ បានវាយប្រហារក្នុងជម្រៅ ១៥,៥ គីឡូម៉ែត្រកាលពីព្រឹកព្រលឹមថ្ងៃពុធ (០៣ មេសា) ខណៈដែលមនុស្សម្នាកំពុងត្រៀមខ្លួនដើម្បីទៅធ្វើការ និងទៅរៀន ដោយផ្តោតលើតំបន់ជនបទភាគខាងកើត និងមិនសូវមានប្រជាជនរស់នៅនៃតំបន់ ហ័រលៀន។ក្រុមមន្ត្រីឧតុនិយមតៃវ៉ាន់ បានចាត់ចំណាត់ថ្នាក់ការរញ្ជួយដីកាលពីថ្ងៃពុធនៅតំបន់ ហ័រលៀន នេះថាជារញ្ជួយ «កម្រិតកំពូលលេខ ៦» ឬកម្រិតខ្លាំងបំផុតទីពីរនៅលើមាត្រដ្ឋានចាប់ពីកម្រិត ១ ដល់កម្រិត ៧ របស់ខ្លួន៕

UN៖ អំពើហិង្សាដោយក្រុមជនអន្ធពាល បង្កផលប៉ះពាល់ធ្ងន់ធ្ងរដល់មណ្ឌលថែទាំសុខភាពហៃទី

ទីភ្នាក់ងារមនុស្សធម៌របស់អង្គការសហប្រជាជាតិ បាននិយាយកាលពីថ្ងៃពុធ (០៣ មេសា) ថា មណ្ឌលថែទាំសុខភាពជាច្រើននៅក្នុងតំបន់រដ្ឋធានី ព័រអូប្រាំង របស់ប្រទេសហៃទី នៅតែបន្តរងផលប៉ះពាល់យ៉ាងធ្ងន់ធ្ងរដោយអំពើហិង្សាកំពុងបន្ត ដោយរឹតបន្តឹងបន្ថែមទៀតដល់ការទទួលបានការថែទាំផ្នែកសង្គ្រោះជីវិតសម្រាប់ប្រជាជនទាំងនៅក្នុង និងជុំវិញរដ្ឋធានីហៃទីមួយនេះ។ការិយាល័យសម្របសម្រួលកិច្ចការមនុស្សធម៌ (OCHA) រាយការណ៍ថា ក្រុមប្រដាប់អាវុធកាលពីសប្តាហ៍មុនបានប្លន់មណ្ឌលថែទាំសុខភាពចំនួនពីរ គឺមន្ទីរពេទ្យ ឌែលម៉ាស-១៨ (Delmas 18) និងមណ្ឌលសុខភាព សង់ម៉ាតុង (Saint Martin)។ ការិយាល័យ OCHA ក៏រាយការណ៍ពីការលួចកាលពីសប្តាហ៍មុននៅឱសថស្ថានចំនួន ១០ កន្លែងក្នុងរាជធានី ដែលធ្វើឱ្យកាន់តែពិបាកសម្រាប់ប្រជាជនក្នុងការទទួលបានថ្នាំដើម្បីសង្រ្គោះជីវិតរបស់ពួកគេ។ទោះបីជាមានការលំបាកក៏ដោយ ក៏កិច្ចខិតខំប្រឹងប្រែងឆ្លើយតបរបស់អង្គការសហប្រជាជាតិនៅតែបន្ត។ ទីភ្នាក់ងារ OCHA បាននិយាយថា កម្មវិធីស្បៀងអាហារពិភពលោកកាលពីថ្ងៃអង្គារ បានចែកចាយអាហារក្តៅដល់មនុស្សជាង ២៧.០០០ នាក់នៅទីក្រុង ព័រអូប្រាំង។ យោងតាមតួលេខ OCHA បានបង្ហាញថា គិតត្រឹមថ្ងៃទី ៣១ ខែមីនា មនុស្សជាង ៣៦២.០០០ នាក់ត្រូវបានផ្លាស់ទីលំនៅនៅក្នុងប្រទេសហៃទី ហើយមនុស្ស ១៦០.០០០ នាក់ក្នុងចំណោមពួកគេស្ថិតនៅក្នុងតំបន់ទីប្រជុំជន ព័រអូប្រាំង៕

ក្រុមហាម៉ាស ប្រកាន់ខ្ជាប់នូវជំហរបទឈប់បាញ់របស់ខ្លួន ដែលចង់ឱ្យអ៊ីស្រាអែល ដកទ័ពចេញពីហ្កាហ្សា

ប្រធានក្រុមហាម៉ាស លោក អ៊ីស្មែល ហានីយ៉េ (Ismail Haniyeh) បាននិយាយកាលពីថ្ងៃពុធ (០៣ មេសា) ថា ចលនាអ៊ីស្លាមនិយមប៉ាឡេស្ទីនរបស់លោកក្នុងសង្គ្រាមជាមួយអ៊ីស្រាអែល កំពុងប្រកាន់ខ្ជាប់នូវលក្ខខណ្ឌរបស់ខ្លួនសម្រាប់បទឈប់បាញ់នៅតំបន់ហ្កាហ្សាស្ទ្រីប ដែលរួមទាំងការដកទ័ពរបស់អ៊ីស្រាអែល និងការសម្រេចបាននូវកិច្ចព្រមព្រៀងផ្លាស់ប្តូរអ្នកទោសប្រកបដោយកិត្តិយស។ក្រុមមន្ត្រីអ៊ីស្រាអែល បានទៅបំពេញទស្សនកិច្ចនៅអេហ្ស៊ីប កាលពីដើមសប្តាហ៍នេះក្នុងកិច្ចខិតខំប្រឹងប្រែងជាថ្មីដើម្បីធានាបាននូវកិច្ចព្រមព្រៀងមួយ ប៉ុន្តែមន្ត្រីប៉ាឡេស្ទីនម្នាក់ដែលជិតស្និទ្ធនឹងកិច្ចខិតខំប្រឹងប្រែងសម្រុះសម្រួលនោះបាននិយាយថា មិនមានសញ្ញាណាមួយនៃការវិវត្តទៅមុខនោះទេ។ការដោះដូរដែលប្រមុខក្រុមហាម៉ាសសំដៅទៅលើនោះ អាចនឹងជាការដោះលែងអ្នកទោសប៉ាឡេស្ទីនពីពន្ធនាគារអ៊ីស្រាអែល ប្ដូរនឹងចំណាប់ថ្នូរអ៊ីស្រាអែលដែលត្រូវបានឃុំឃាំងដោយពួកសកម្មប្រយុទ្ធនៅហ្កាហ្សា ចាប់តាំងពីការវាយលុកដ៏ឃោរឃៅ ដែលដឹកនាំដោយក្រុមហាម៉ាស នៅថ្ងៃទី០៧ ខែតុលា លើអ៊ីស្រាអែល។អ៊ីស្រាអែលនិយាយថា ខ្លួនចាប់អារម្មណ៍តែលើបទឈប់បាញ់បណ្ដោះអាសន្នដើម្បីដោះលែងចំណាប់ថ្នូរប៉ុណ្ណោះ តែក្រុមហាម៉ាសនិយាយថា ខ្លួននឹងអនុញ្ញាតតដោះលែងចំណាប់ថ្នូរជាផ្នែកមួយនៃកិច្ចព្រមព្រៀងដើម្បីបញ្ចប់សង្គ្រាមជាអចិន្ត្រៃយ៍។ ក្នុងចំណោមមនុស្ស ២៥៣ នាក់ដែលត្រូវបានក្រុមហាម៉ាសចាប់ខ្លួនក្នុងអំឡុងពេលការវាយឆ្មក់កាលពីថ្ងៃទី០៧ ខែតុលា ដែលបង្កឱ្យមានសង្រ្គាមហ្កាហ្សានោះ មានមនុស្ស ១៣៤ នាក់នៅតែស្ថិតក្នុងការជាប់ឃុំឃាំង នៅក្នុងតំបន់ហ៊ុមព័ទ្ធប៉ាឡេស្ទីននេះ៕

សាលារៀនជិត ៤.០០០ កន្លែងនៅហ្វីលីពីន ប្តូរទៅរៀនតាមអនឡាញ ដោយសារអាកាសធាតុក្ដៅខ្លាំង

រដ្ឋាភិបាលហ្វីលីពីន បាននិយាយកាលពីថ្ងៃពុធ (០៣ មេសា) ថា អាកាសធាតុដ៏ក្តៅគគុកបានបង្ខំឱ្យសាលារៀនចំនួន ៣.៩៥៤ កន្លែងនៅទូទាំងប្រទេសហ្វីលីពីន អនុវត្តវិធីសាស្រ្តរៀនតាមអនឡាញជាជម្រើសដើម្បីការពារសិស្សានុសិស្សពីសន្ទស្សន៍កម្ដៅដ៏ខ្ពស់នេះ។នាយកដ្ឋានអប់រំរបស់ប្រទេសហ្វីលីពីន (DepEd) បាននិយាយថា សាលារៀនជាច្រើនបានជ្រើសរើសឈប់រៀនក្នុងថ្នាក់ដោយផ្ទាល់ ដូច្នេះសិស្សអាចសិក្សាពីលំនៅឋានរបស់ពួកគេជំនួសឱ្យការទៅសាលារៀន និងជៀសវាងការប៉ះពាល់នឹងអាកាសធាតុក្តៅ។នាយកដ្ឋានអប់រំបាននិយាយថា សាលារៀនទាំងនោះដែលមានអ្នកសិក្សាជាង ១,៣ លាននាក់នៅក្នុងតំបន់ចំនួន ១១ រួមទាំងតំបន់ មេត្រូ ម៉ានីឡា (Metro Manila) ផងដែរ។ ក្រសួងសុខាភិបាលក៏បានព្រមានសាធារណជនពីជំងឺដែលទាក់ទងនឹងកម្ដៅ ដែលកាន់តែរីករាលដាលជាមួយនឹងសីតុណ្ហភាពក្ដៅខ្លាំងស្ទើតែទូទាំងប្រទេស។ប្រព័ន្ធផ្សព្វផ្សាយក្នុងស្រុកបានរាយការណ៍ថា សីតុណ្ហភាពសន្ទស្សន៍កម្ដៅឡើងខ្ពស់រហូតដល់ ៤៥ អង្សារសេ ត្រូវបានកត់ត្រានៅក្នុងខេត្តមួយចំនួនចាប់ពីថ្ងៃទី ២៨ ខែមីនា ដល់ថ្ងៃទី០១ ខែមេសា ហើយលក្ខខណ្ឌអាកាសធាតុបែបនេះនឹងនៅតែបន្តក្នុងរយៈពេលប៉ុន្មានថ្ងៃទៅមុខទៀត៕

ហ្វាំងឡង់៖ ការធ្វើបាបក្នុងសាលា ជាហេតុផលជំរុញពីក្រោយការបាញ់ប្រហារដោយក្មេងជំទង់វ័យ ១២ ឆ្នាំ

នគរបាលហ្វាំងឡង់ បានបញ្ជាក់កាលពីថ្ងៃពុធ (០៣ មេសា) ថា «ការសម្លុតធ្វើបាប» ដែលកើតឡើងទៅលើជនសង្ស័យក្នុងការបាញ់ប្រហារ គឺជាកត្តាជំរុញទឹកចិត្តមួយនៅពីក្រោយសោកនាដកម្មបាញ់ប្រហារនៅក្នុងសាលារៀន ដែលបានកើតឡើងកាលពីថ្ងៃអង្គារ (០២ មេសា) នៅទីក្រុង វ៉ានតា (Vantaa) ជាយក្រុងក្បែររដ្ឋធានី ហែលស៊ិនគី។នៅក្នុងសេចក្តីប្រកាសព័ត៌មានមួយ នគរបាលបាននិយាយថា ជនសង្ស័យដែលជាសិស្សថ្នាក់ទី៦ មានអាយុ ១២ ឆ្នាំ បានប្រាប់នគរបាលថា ខ្លួនធ្លាប់មានបទពិសោធន៍ត្រូវគេធ្វើបាបនៅក្នុងសាលា ហើយមូលហេតុនេះត្រូវបានផ្ទៀងផ្ទាត់នៅក្នុងការស៊ើបអង្កេត។ ជនសង្ស័យ ដែលជាសិស្សសាលា វៀតូឡា (Viertola) ក្នុងទីក្រុង វ៉ានតា បានបាញ់សម្លាប់ក្មេងប្រុសម្នាក់ និងបណ្តាលឲ្យក្មេងស្រី ២ នាក់រងរបួសយ៉ាងធ្ងន់ធ្ងរដោយប្រើកាំភ្លើងខ្លីមួយដើម ហើយអ្នកទាំងបួននាក់នោះសុទ្ធតែជាមិត្តរួមថ្នាក់ដែលមានអាយុដូចគ្នា។បច្ចុប្បន្នជនសង្ស័យត្រូវបានសមត្ថកិច្ចកសាងសំណុំរឿងបញ្ជូនទៅកាន់អាជ្ញាធរមន្ទីរសង្គមកិច្ចដើម្បីចាត់ការតាមផ្លូវច្បាប់។ នៅក្រោមច្បាប់ហ្វាំងឡង់ បុគ្គលដែលមានអាយុក្រោម ១៥ ឆ្នាំមិនត្រូវទទួលទោសព្រហ្មទណ្ឌទេ។ ជាលទ្ធផល ជនសង្ស័យមិនអាចឃុំខ្លួន ឬដាក់ពន្ធនាគារឡើយ ដូចមានចែងក្នុងសេចក្តីប្រកាសព័ត៌មាន។សាលា វៀតូឡា ដែលមានសិស្សប្រហែល ៨០០ នាក់នៅទូទាំងអគារបួនដាច់ដោយឡែកពីគ្នានេះ ខ្វះប៊ូតុងស្នើសុំជំនួយសង្គ្រោះបន្ទាន់នៅក្នុងអគារភាគច្រើនរបស់ខ្លួន រួមទាំងទីតាំងនៃការបាញ់ប្រហារផងដែរ។ យោងតាមរបាយការណ៍របស់ប្រព័ន្ធផ្សព្វផ្សាយ សិស្សានុសិស្សត្រូវពឹងផ្អែកលើទូរស័ព្ទដៃផ្ទាល់ខ្លួនរបស់ពួកគេ ដើម្បីស្វែងរកជំនួយក្នុងអំឡុងពេលកើតហេតុ៕

ប្រធាន WCK៖ អ៊ីស្រាអែល បានកំណត់គោលដៅជាប្រព័ន្ធ និងដោយចេតនា លើបុគ្គលិកជំនួយ

មេចុងភៅដ៏ល្បីឈ្មោះ លោក ហូសេ អាន់ដ្រេស (Jose Andres) បានប្រាប់សារព័ត៌មានរ៉យទ័រ ក្នុងបទសម្ភាសន៍ដ៏រំជួលចិត្តមួយកាលពីថ្ងៃពុធ (០៣ មេសា) ថាការវាយប្រហាររបស់អ៊ីស្រាអែល ដែលបានសម្លាប់បុគ្គលិកផ្ដល់ជំនួយស្បៀងអាហាររបស់ខ្លួនចំនួន ៧ នាក់នៅតំបន់ហ្កាហ្សា បានដាក់គោលដៅលើពួកគេ «ជាប្រព័ន្ធ» «វាយប្រហាររថយន្តម្ដងមួយៗ» និង «ដោយចេតនា» ខណៈលោកបានច្រានចោលការអះអាងរបស់អ៊ីស្រាអែល ដែលថានោះគឺជាកំហុសឆ្គងអចេតនា។ថ្លែងតាមរយៈវីដេអូ លោក អាន់ដ្រេស បាននិយាយថា ក្រុមសប្បុរសធម៌ផ្ទះបាយកណ្ដាលរបស់ពិភពលោក (WCK) ដែលលោកបានបង្កើត មានទំនាក់ទំនងច្បាស់លាស់ជាមួយយោធាអ៊ីស្រាអែល ហើយពួកគេដឹងពីការចល័តរបស់បុគ្គលិកជំនួយ រួមទាំងកងកម្លាំងការពារ IDF បានដឹងយ៉ាងច្បាស់អំពីទីតាំងរបស់ក្បួនរថយន្ត។ លោកបានអំពាវនាវឱ្យមានការស៊ើបអង្កេតលើឧប្បត្តិហេតុនេះដោយរដ្ឋាភិបាលសហរដ្ឋអាមេរិក និងដោយប្រទេសកំណើតរបស់បុគ្គលិកជំនួយទាំងអស់ដែលត្រូវបានសម្លាប់។បុគ្គលិកផ្តល់ជំនួយទាំងនោះត្រូវបានសម្លាប់ នៅពេលដែលក្បួនរថយន្តរបស់ពួកគេត្រូវបានវាយប្រហារភ្លាមៗបន្ទាប់ពីពួកគេបានត្រួតពិនិត្យការដឹកស្បៀងអាហារចំនួន ១០០ តោនដែលនាំយកទៅកាន់តំបន់ហ្កាហ្សាតាមសមុទ្រ។ យោធាអ៊ីស្រាអែលបានសម្តែង «ការសោកសៅយ៉ាងខ្លាំង» ចំពោះឧបទ្ទវហេតុនេះ ហើយលោកនាយករដ្ឋមន្ត្រី បេនចាមីន ណេតាន់យ៉ាហ៊ូ (Benjamin Netanyahu) បានហៅឧប្បត្តិហេតុនោះថាជារឿងអចេតនា។យោងតាមអង្គការសហប្រជាជាតិ យ៉ាងហោចណាស់មានបុគ្គលិកមនុស្សធម៌ចំនួន ១៩៦ នាក់ត្រូវបានសម្លាប់នៅហ្កាហ្សាចាប់តាំងពីខែតុលាមក ហើយក្រុមហាម៉ាស ពីមុនបានចោទប្រកាន់អ៊ីស្រាអែលថាបានកំណត់គោលដៅលើទីតាំងចែកចាយជំនួយ៕

នាវាដឹកជំនួយតាមច្រករបៀងសមុទ្រហ្កាហ្សា ត្រឡប់ទៅប្រទេសស៊ីបវិញបន្ទាប់ពីបុគ្គលិកNGO ត្រូវបានសម្លាប់

នាវាមួយគ្រឿង ក្នុងចំណោមនាវាដឹកជញ្ជូនជំនួយទៅកាន់តំបន់ហ្កាហ្សា បានត្រឡប់ទៅកំពង់ផែក្នុងប្រទេសស៊ីបវិញកាលពីថ្ងៃពុធ បន្ទាប់ពីការស្លាប់បុគ្គលិកផ្តល់ជំនួយប្រាំពីរនាក់របស់អង្គការសប្បុរសធម៌ World Central Kitchen មានមូលដ្ឋាននៅសហរដ្ឋអាមេរិក។មន្ត្រី បាននិយាយថា ជំនួយដែលពុំទាន់បានប្រគល់ ត្រូវបានរៀបចំដោយអង្គការ World Central Kitchen (WCK) និងអង្គការសប្បុរសធម៌ Open Arms របស់ប្រទេសអេស្ប៉ាញ បានត្រឡប់ទៅវិញ បន្ទាប់ពីអង្គការ WCK បាននិយាយថា ខ្លួននឹងផ្អាកការងារនៅក្នុងដែនដីប៉ាឡេស្ទីនដែលត្រូវបានកាន់កាប់។បុគ្គលិកអង្គការ World Central Kitchen ទើបតែបានរើចេញជំនួយស្បៀងអាហារចំនួន ១០០ តោនពីនាវាដែលធ្វើដំណើរពីប្រទេសស៊ីប នៅពេលនោះអ៊ីស្រាអែល បានវាយប្រហារក្បួនរថយន្តរបស់ពួកគេពេញមួយយប់កាលពីថ្ងៃចន្ទ ទី១ មេសា នៅក្នុងការវាយប្រហារតាមអាកាស។នាវារបស់អង្គការ Open Arms ដែលបានមកដល់កំពង់ផែ Larnaca របស់ប្រទេសស៊ីប កាលពីថ្ងៃពុធ គឺជាផ្នែកមួយនៃក្បួននាវា ដែលរួមមាននាវាផ្ទុកទំនិញ បានកំណត់ពេលចេញដំណើរកាលពីថ្ងៃទី ៣០ ខែមីនា។ មន្ត្រីប្រទេសស៊ីប បាននិយាយថា មានតែនាវាដឹកជំនួយមួយគ្រឿងប៉ុណ្ណោះដែលត្រូវបានរើចេញ ហើយជំនួយដែលនៅសល់ចំនួនពីរភាគបីបានបញ្ជូនត្រឡប់ទៅវិញ។អង្គការ WCK បានធ្វើការងារដ៏សកម្មនៅក្នុងតំបន់ហ្កាហ្សា ចាប់តាំងពីខែតុលា ដោយនាំមកស្បៀងអាហារតាមផ្លូវគោក និងក៏ចូលរួមក្នុងការទម្លាក់ជំនួយពីយន្តហោះផងដែរ។កាលពីខែមីនា អង្គការនេះបានបើកដំណើរការច្រករបៀងសមុទ្រក្នុងការដឹកជញ្ជូនជំនួយ ទៅតំបន់ហ៊ុមព័ទ្ធហ្កាហ្សាពីប្រទេសស៊ីប។

អ៊ីស្រាអែលបានប្រើ AI ដើម្បីកំណត់គោលដៅក្រុមហាម៉ាសចំនួន ៣៧.000 កន្លែង

យុទ្ធនាការវាយប្រហាររបស់យោធាអ៊ីស្រាអែល នៅតំបន់ហ្កាហ្សា បានប្រើប្រាស់មូលដ្ឋានទិន្នន័យដែលដំណើរការដោយ AI ដែលមិនបានបង្ហាញពីមុននៅក្នុងដំណាក់កាលមួយ បានកំណត់គោលដៅសំខាន់ៗ ចំនួន ៣៧.000កន្លែង ដោយផ្អែកលើការតភ្ជាប់ជាក់ស្តែងរបស់ពួកគេទៅនឹងក្រុមហាម៉ាស នេះបើយោងតាមប្រភពចារកម្មដែលពាក់ព័ន្ធនៅក្នុងសង្គ្រាម។បន្ថែមពីលើការនិយាយអំពីការប្រើប្រាស់ប្រព័ន្ធ AI របស់ពួកគេ ដែលហៅថា Lavender ប្រភពចារកម្ម បានអះអាងថា មន្ត្រីយោធាអ៊ីស្រាអែល បានអនុញ្ញាតឲ្យជនស៊ីវិលប៉ាឡេស្ទីនមួយចំនួនធំត្រូវបានសម្លាប់ ជាពិសេសក្នុងអំឡុងពេលប៉ុន្មានសប្តាហ៍និងខែនៃជម្លោះនេះ។សក្ខីកម្មមិនធម្មតារបស់ពួកគេ ផ្តល់នូវការយល់ឃើញដ៏កម្រដល់បទពិសោធនផ្ទាល់ខ្លួនរបស់មន្ត្រីចារកម្ម អ៊ីស្រាអែលដែលបាននិងកំពុងប្រើប្រព័ន្ធAI ដើម្បីជួយកំណត់គោលដៅ ក្នុងអំឡុងពេលសង្គ្រាមរយៈពេល៦ខែ។ការប្រើប្រាស់ប្រព័ន្ធ AI ដ៏មានឥទ្ធិពលរបស់អ៊ីស្រាអែល នៅក្នុងសង្គ្រាមរបស់ខ្លួនលើក្រុមហាម៉ាស បានចូលទៅក្នុងទឹកដី ដែលមិនអាចកំណត់បានសម្រាប់ការជំរុញសង្គ្រាម ដោយលើកឡើងនូវបញ្ហាផ្នែកច្បាប់ និងសីលធម៌ និងការផ្លាស់ប្តូរទំនាក់ទំនងរវាងបុគ្គលិកយោធា និងម៉ាស៊ីនទាំងអស់នេះ។

ការសង្រ្គោះបន្ទាន់នៅតែបន្ត ខណៈពលរដ្ឋតៃវ៉ាន់ស្នាក់នៅក្នុងជំរំតង់ ក្រោយលំនៅឋានរងការខូចខាតក្នុងការរញ្ជួយដី

ក្រុមការងារសង្រ្គោះបន្ទាន់កំពុងប្រញាប់ប្រញាល់ ក្រោយគ្រោះរញ្ជួយដីកម្រិត៧,៤ រ៉ិចទ័រ វាយប្រហារតំបន់តៃវ៉ាន់របស់ប្រទេសចិន កាលពីព្រឹកថ្ងៃពុធ និងបណ្ដាលឲ្យអគារខ្ពស់ៗជាច្រើនរងការបំផ្លិចបំផ្លាញធ្ងន់ធ្ងរ។ អ្នកក្រុងហ័រលៀន ត្រូវបានស្នាក់នៅខាងក្រៅ ក្រោយការញ្ជួយដីដ៏ខ្លាំងក្លាបានកម្ទេចលំនៅឋានរបស់ពួកគេ។ ប្រជាពលរដ្ឋភាគច្រើន ដែលមិនហានស្នាក់នៅខាងក្រៅផ្ទះ ត្រូវបង្ខំចិត្តស្នាក់នៅក្នុងជម្រកបណ្ដោះអាសន្នក្រោយលំនៅឋានរបស់ពួកគេរងការបំផ្លិចបំផ្លាញ។ នៅពេលមេឃងងឹតចូលមកដល់ មនុស្សមួយចំនួនត្រូវស្នាក់នៅខាងក្រៅក្នុងជំរំតង់ និងជម្រកផ្សេងទៀត។ទន្ទឹមនឹងនោះ បុគ្គលិកសង្គ្រោះបន្ទាន់ជាច្រើននាក់ កំពុងព្យាយាមវាយកម្ទេចអគារដែលរងការខូចខាត ដែលចាត់ទុកថាមិនអាចជួយសង្គ្រោះបាន។ ប្រជាពលរដ្ឋភាគច្រើន នៅក្នុងទីក្រុងនេះ បានតៀមខ្លួនជម្លៀស នៅពេលរលករញ្ជួយវាយប្រហារក្រុមអ្នកសង្រ្គោះដែលកំពុងធ្វើការពេញមួយថ្ងៃដើម្បីរំដោះប្រជាពលរដ្ឋជាប់ខ្លួននៅក្នុងកម្ទេចថ្មអគារ ។ ក្រុមអ្នកសង្រ្គោះបានរកឃើញស្ត្រីម្នាក់នៅក្នុងអគារអ៊ុយរ៉ាណូស ដែលគ្មានសញ្ញាថាអាចនៅមានជីវិតរួចទៅហើយ។ យោងតាមមជ្ឈមណ្ឌលប្រតិបត្តិការសង្រ្គោះបន្ទាន់ក្នុងតំបន់ ការរញ្ជួយដីនេះបានឆក់យកជីវិតមនុស្ស៩នាក់ និង១.០១១នាក់ រងរបួស គិតត្រឹមម៉ោង២២ ថ្ងៃពុធ ៣មេសា ម៉ោងនៅកោះតៃវ៉ាន់៕

អ្នកស្លាប់ឡើងដល់៩នាក់ ៥០នាក់បាត់ខ្លួន និងជាង១.០០០នាក់របួសក្នុងគ្រោះរញ្ជួយដីខ្លាំងបំផុតក្នុងពេល២៥ឆ្នាំ នៅតៃវ៉ាន់

ការរញ្ជួយដីធ្ងន់ធ្ងរសបំផុតរបស់កោះតៃវ៉ាន់ក្នុងរយៈពេលយ៉ាងហោចណាស់ ២៥ ឆ្នាំចុងក្រោយនេះ បានសម្លាប់មនុស្ស៩នាក់កាលពីថ្ងៃពុធនិងជាង១.០០០នាក់ បានរងរបួស ខណៈកម្មករ៥០នាក់ ដែលកំពុងធ្វើដំណើរតាមរថយន្តក្រុងទៅកាន់សណ្ឋាគារក្នុងឧទ្យានជាតិមួយ បានបាត់ខ្លួន។អគារមួយចំនួនបានផ្អៀងនៅតំបន់ភ្នំ ដែលមានប្រជាជនរស់នៅតិចតួចក្នុងទីក្រុង ហ័រលៀន(Hualien) នៅជិតចំណុចកណ្តាលនៃការរញ្ជួយដីកម្រិត ៧,៤ រ៉ិចទ័រ ដែលបានវាយប្រហារនៅឆ្នេរសមុទ្រប្រហែលម៉ោង ៨ ព្រឹក និងបង្កឱ្យមាបំណាក់ដីដ៏ធំ។លោក លី ឡាំង សឹង (Lee Lung-Sheng) អនុប្រធានស្តីទីនៃនាយកដ្ឋានពន្លត់អគ្គិភ័យ ប្រចាំទីក្រុងហ័រលៀន បាននិយាយថា អគារអ៊ុយរ៉ាណូស (Uranu)នៅពីក្រោយខ្នងយើង គឺជាកន្លែងដែលរងការខូចខាតយ៉ាងធ្ងន់ធ្ងរបំផុត។ នេះជាអគារមួយដែលមានកម្ពស់៩ជាន់។អភិបាលក្រុង ហ័រលៀន លោក ស៊ូ ជិន វៃ (Hsu Chen-Wei) បាននិយាយថា អ្នកស្រុក និងអាជីវកម្មទាំងអស់នៅក្នុងអគារដែលស្ថិតក្នុងស្ថានភាពគ្រោះថ្នាក់ត្រូវបានជម្លៀសចេញ។ អភិបាលក្រុងរូបនេះ បាននិយាយថា ការងាររុះរើ និងកម្ទេចចោលកំពុងចាប់ផ្តើមលើអគារចំនួនបួន។មន្ត្រីឧតុនិយមបាននិយាយថា រលករញ្ជួយដីជាង ៥០ លើក ក្រោយការរញ្ជួយដីត្រូវបានកត់ត្រា។ការរញ្ជួយដីបានវាយប្រហារនៅជម្រៅ ១៥,៥ គីឡូម៉ែត្រ ស្របពេលមនុស្សកំពង់ធ្វើដំណើរទៅធ្វើការ និងសាលារៀន ដោយបានចេញការព្រមានពីរលកយក្សស៊ូណាមិសម្រាប់ភាគខាងត្បូងប្រទេសជប៉ុន និងហ្វីលីពីន ដែលក្រោយមកត្រូវបានដកចេញវិញ។ការរញ្ជួយដីនៅជិតច្រាំងសមុទ្រភាគខាងកើតកោះតៃវ៉ាន់ ត្រូវបានឲ្យធ្វើឲ្យញ័រ នៅទូទាំងកោះនេះ និងផ្នែកខ្លះរបស់ប្រទេសចិន និងជប៉ុន កាលពីព្រឹកថ្ងៃពុធទី៣មេសាសប្ដាហ៍នេះ ៕

បណ្ដាញសង្គម

ព័ត៌មានថ្មីៗ

អេស្ប៉ាញរកឃើញមនុស្សស្លាប់ខ្ពស់បំផុតពាក់ព័ន្ធនឹងកម្តៅក្នុងខែឧសភា ចាប់តាំងពីឆ្នាំ ២០១៥

អគ្គិភ័យ និងការខូចខាត បានកើតមាននៅអាកាសយានដ្ឋានគូវែត ក្រោយការវាយប្រហាររបស់អ៊ីរ៉ង់

ឥណ្ឌាអនុម័តមូលនិធិជាង ១ពាន់លានដុល្លារ ដើម្បីជួយក្រុមហ៊ុនអាកាសចរណ៍ ស្របពេលប្រេងយន្តហោះឡើងថ្លៃ

ក្រុមអ្នកតាំងលំនៅនិគមន៍អ៊ីស្រាអែលវាយប្រហាររថយន្តដឹកគ្រួសារប៉ាឡេស្ទីននៅតំបន់វ៉េសប៊ែង

ឈីលីកម្ទេចបណ្តាញលាងលុយកខ្វក់ដែលមានការជាប់ពាក់ព័ន្ធនឹងក្រុមឧក្រិដ្ឋជន Tren de Aragua

អរិភាពនៅតំបន់ឈូងសមុទ្រឡើងកម្តៅជាថ្មី ខណៈកិច្ចប្រជុំសន្តិភាពអាមេរិក-អ៊ីរ៉ង់ជាប់គាំង

កូដកម្មជុំវិញកំណែទម្រង់ការងារ ធ្វើឲ្យប៉ះពាល់ដល់រថភ្លើង ជើងហោះហើរ និងសាលារៀននៅព័រទុយហ្គាល់

ចិនច្រានចោលអំណះអំណាងការងារដោយបង្ខំ ជាការឆ្លើយតបនឹងសំណើពន្ធអាមេរិក

វិមានក្រឹមឡាំង៖ រុស្ស៊ីនឹងបន្តវាយប្រហារអ៊ុយក្រែនជាប្រព័ន្ធ ក្រោយការវាយប្រហារដ្រូននៅទីក្រុង St Petersburg

អ្នកវិទ្យាសាស្រ្តព្រមានថា បាតុភូតអែល នីញ៉ូ អាចនឹងវាយប្រហារតំបន់ភាគខាងត្បូងប្រេស៊ីលក្នុងឆ្នាំនេះ

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877