BTV NEWS

អ្នកតាមដានព្រឹត្តិការណ៍សង្គម និងប្រជាពលរដ្ឋ កោតសរសើររាជរដ្ឋាភិបាលក្នុងការបោសសំអាតការឆបោកតាមអនឡាញ

កម្ពុជាសហការជាមួយបណ្តាប្រទេសជាដៃគូរបង្ក្រាបករណីដឹកជញ្ជូនគ្រឿងញៀនឆ្លងដែនក្នុងឆ្នាំ២០២៥ ទទួលបានលទ្ធផលល្អ

នៅឆ្នាំ២០២៥ មន្ទីរប្រឆាំងបទល្មើសគ្រឿងញៀនបង្ក្រាបបទល្មើសគ្រឿងញៀនជាង ៩ពាន់ករណី ឃាត់ខ្លួនជនសង្ស័យជាង ២ម៉ឺននាក់ និងចាប់យកសារធាតុញៀនជាង ៧តោន

រដ្ឋបាលរាជធានីភ្នំពេញ បង្ក្រាបទីតាំងហ្គេមអនឡាញខុសច្បាប់ក្នុងខណ្ឌចំការមនឃាត់ខ្លួនជនជាតិឥណ្ឌូណេស៊ី ២៤នាក់

សន្តិសុខ និង សង្គម

រដ្ឋមន្ត្រីហ៊ួទី៖ នាវាចូលក្នុងដែនទឹកយេម៉ែន ត្រូវតែទទួលបានលិខិតអនុញ្ញាតជាមុន

រដ្ឋមន្ត្រីក្រសួងទូរគមនាគមន៍ហ៊ួទី លោក Misfer Al-Numair បាននិយាយកាលពីថ្ងៃចន្ទថា នាវាទាំងអស់នឹងត្រូវទទួលបានលិខិតអនុញ្ញាតពីអាជ្ញាធរកិច្ចការដែនសមុទ្រដែលគ្រប់គ្រងដោយហ៊ួទីរបស់ប្រទេសយេម៉ែន មុនពេលចូលទៅក្នុងដែនទឹកយេម៉ែន។ក្រុមសកម្មប្រយុទ្ធហ៊ួទី បានធ្វើការវាយប្រហារដោយយានដ្រូន និងមីស៊ីលម្តងហើយម្តងទៀតប្រឆាំងនឹងការដឹកជញ្ជូនពាណិជ្ជកម្មអន្តរជាតិ នៅឈូងសមុទ្រ Aden ចាប់តាំងពីពាក់កណ្តាលខែវិច្ឆិកា ដោយនិយាយថា ពួកគេកំពុងធ្វើសកម្មភាពក្នុងសាមគ្គីភាពជាមួយប៉ាឡេស្ទីនប្រឆាំងនឹងការវាយលុករបស់អ៊ីស្រាអែល នៅតំបន់ហ្កាហ្សា។ការវាយប្រហារស្ទើរតែរាល់ថ្ងៃ បានបង្ខំឲ្យក្រុមហ៊ុនបង្វែរទិសដៅដ៏វែងឆ្ងាយ និងចំណាយច្រើន នៅជុំវិញទ្វីបអាហ្វ្រិកខាងត្បូង ហើយបានបង្កការភ័យខ្លាចថា សង្រ្គាមអ៊ីស្រាអែល និងក្រុមហាម៉ាស អាចបង្កអស្ថិរភាពដល់មជ្ឈិមបូព៌ាកាន់តែធំឡើង។ សហរដ្ឋអាមេរិក និងអង់គ្លេស បានវាយប្រហារទៅលើគោលដៅរបស់ក្រុមហ៊ួទី ជាការឆ្លើយតប។ដែនទឹកដែលរងផលប៉ះពាល់ដោយបទបញ្ជាយេម៉ែន លាតសន្ធឹងពាក់កណ្តាលផ្លូវចូលទៅក្នុងច្រកសមុទ្រ Bab al-Mandab ទទឹង២០គីឡូម៉ែត្រ (១២ម៉ាយ) ជាមាត់ច្រកតូចចង្អៀតនៃសមុទ្រក្រហម ដែលតាម រយៈនោះ ប្រហែល១៥ភាគរយនៃចរាចរណ៍ដឹកជញ្ជូនរបស់ពិភពលោកឆ្លងកាត់តាមផ្លូវរបស់វាទៅកាន់ឬពីព្រែកជីកស៊ុយអេ (Suez Canal)។ទូរទស្សន៍ Al Masirah TV ដែលជាបណ្តាញព័ត៌មានទូរទស្សន៍សំខាន់ដែលគ្រប់គ្រងដោយចលនា ហ៊ួទី ដែលមានសម្ព័ន្ធភាពអ៊ីរ៉ង់នៅប្រទេសយេម៉ែន បាននិយាយថា (យើង) បានត្រៀមខ្លួនជាស្រេច ដើម្បីជួយសំណើសុំការអនុញ្ញាត និងកំណត់អត្តសញ្ញាណនាវាជាមួយកងទ័ពជើងទឹកយេម៉ែន ហើយយើងបញ្ជាក់ថា នេះ គឺចេញពីការព្រួយបារម្ភចំពោះសុវត្ថិភាពរបស់ពួកគេ នេះបើតាមការបញ្ជាក់របស់ លោកAl-Numair។ ក្រុមហ៊ុន HGC Global Communications ដែលមានមូលដ្ឋាននៅទីក្រុងហុងកុង បាននិយាយកាលពីថ្ងៃចន្ទថា យ៉ាងហោចណាស់ខ្សែកាប្លិ៍ទំនាក់ទំនងក្រោមទឹកចំនួន៤ ដូចជា Asia-Africa-Europe 1, Europe India Gateway, Seacom និង TGN-Gulf ត្រូវរងការខូចខាត កាលពីសប្តាហ៍មុន នៅក្នុងសមុទ្រក្រហមដោយពុំបានបញ្ជាក់ពីមូលហេតុទេ។

អង្គការសុខភាពពិភពលោក៖ កុមារស្លាប់កាន់តែច្រើនព្រោះអត់អាហារ នៅក្នុងតំបន់ហ្កាហ្សាភាគខាងជើង

ប្រធានអង្គការសុខភាពពិភពលោក បាននិយាយថា កុមារកាន់តែច្រើនកំពុងស្លាប់ដោយសារភាពអត់ឃ្លាននៅក្នុងតំបន់ហ្កាហ្សាភាគខាងជើង ។ លោក Tedros Adhanom Ghebreyesus បាននិយាយថា ដំណើរទស្សនកិច្ចរបស់ទីភ្នាក់ងារនេះកាលពីចុងសប្ដាហ៍ទៅកាន់មន្ទីរពេទ្យអាល់ អាវដា (Al-Awda)និងមន្ទីរពេទ្យកាម៉ាល់ អាដវ៉ាន់ (Kamal Adwan)គឺជាលើកដំបូង ចាប់តាំងពីដើមខែតុលាមក។ នៅក្នុងសារបង្ហោះលើបណ្ដាញសង្គមលោកបានសរសេរថាកង្វះអាហារនាំឲ្យកុមារ១០នាក់បានស្លាប់ ហើយកម្រិតកង្វះអាហារូបត្ថម្ភ ខ្ពស់បំផុត ស្របពេលដែលអគារមន្ទីរពេទ្យនានាត្រូវបានបំផ្លាញ។ ក្រសួងសុខាភិបាលគ្រប់គ្រងដោយក្រុមហាម៉ាស នៅក្នុងតំបន់ហ្កាហ្សា បានរាយការណ៍កាលពីចុងសប្ដាហ៍មុនថា កុមារ១៥នាក់បានស្លាប់ដោយសារកង្វះអាហារូបត្ថម្ភ និងជាតិទឹកនៅមន្ទីរពេទ្យកាម៉ាល់ អាដវ៉ាន់។ ទីភ្នាក់ងារសារព័ត៌មានផ្លូវការវ៉ាហ្វា(Wafa) បានរាយការណ៍កាលពីថ្ងៃចន្ទសប្ដាហ៍នេះថា កុមារទី១៦បានស្លាប់ កាលពីថ្ងៃអាទិត្យនៅមន្ទីរពេទ្យមួយក្នុងទីក្រុងរ៉ាហ្វាភាគខាងត្បូង ។លោក Tedros បានរាយការណ៍ថា មានកម្រិតកង្វះអាហារូបត្ថម្ភធ្ងន់ធ្ងរ កុមារកាន់តែច្រើនកំពុងស្លាប់ដោយសារអត់ឃ្លាន កង្វះប្រេងឥន្ធនៈ ស្បៀងអាហារ និងការផ្គត់ផ្គង់វេជ្ជសាស្ត្រធ្ងន់ធ្ងរ អគារមន្ទីរពេទ្យនានាត្រូវបានបំផ្លិចបំផ្លាញក្នុងតំបន់ហ្កាហ្សាភាគខាងជើងជាទីដែលមនុស្សប្រមាណ៣០ម៉ឺននាក់កំពុងរស់នៅដោយសល់អាហារ ឬទឹកស្អាតតិចតួច ៕

អ្នកតវ៉ា ទាមទារឲ្យប្រធានាធិបតីឈីលី កាត់ផ្តាច់ទំនាក់ទំនងជាមួយអ៊ីស្រាអែល ជុំវិញសង្គ្រាមនៅហ្កាហ្សា

ក្រុមអ្នកតវ៉ា នៅប្រទេសឈីលី កាលពីថ្ងៃចន្ទ បានទាមទារឲ្យប្រធានាធិបតី លោកហ្គាប្រៀល បូរីក(Gabriel Boric) កាត់ផ្តាច់ទំនាក់ទំនងជាមួយប្រទេសអ៊ីស្រាអែល ជុំវិញសង្គ្រាមនៅតំបន់ហ្កាហ្សា។ក្រុមបាតុករ ដែលមានកាន់ទង់ជាតិប៉ាឡេស្ទីន បានមកប្រមូលផ្តុំគ្នានៅខាងក្រៅស្ថានទូតអ៊ីស្រាអែល ក្នុងទីក្រុង Santiago ដោយស្រែកពាក្យផ្សេងៗដូចជា«សេរីភាព ប៉ាឡេស្ទីន» ជាដើម។កាលពីខែវិច្ឆិកា ប្រធានាធិបតីឈីលី លោក Boric បានកោះហៅឯកអគ្គរដ្ឋទូតរបស់លោក ក្នុងទីក្រុង Tel Aviv និងបាននិយាយថា អ៊ីស្រាអែល ពុំបានអនុវត្តទៅតាមច្បាប់អន្តរជាតិនោះទេ ហើយកាលពីពេលថ្មីៗនេះ ក្នុងខែមករា អំឡុងពេលដំណើរទស្សនកិច្ចទៅកាន់ប្រទេស កាតេម៉ាឡា លោក បានបញ្ជាក់ថា ក្នុងតំបន់ហ្កាហ្សា កំពុងប្រព្រឹត្តរឿងកាន់តែអាក្រក់ជាងនៅទីក្រុងប៊ែកឡាំង កាលពីក្នុងឆ្នាំ១៩៤៥ ។សហគមន៍ប៉ាឡេស្ទី នៅប្រទេសឈីលី ជាសហគមន៍ធំបំផុត នៅខាងក្រៅតំបន់មជ្ឈឹមបូព៌ា គឺជាកម្លាំងនយោបាយ និងសង្គមដ៏រឹងមាំមួយ នៅក្នុងប្រទេសតំបន់ភ្នំអង់ ដែលមានវប្បធម៌ នយោបាយក្នុងតំបន់ និងកីឡាបាល់ទាត់។

បណ្ដាប្រទេសជិតខាងរបស់ហៃទី ត្រៀមទប់ទល់ការកើនឡើងនៃអំពើហឹង្សា បន្ទាប់ពីការហែកពន្ធនាគារ

បណ្ដាអ្នកជិតខាងរបស់ប្រទេសហៃទី កាលពីថ្ងៃចន្ទ (០៤ មីនា) បានចាប់ផ្តើមបង្កើនការការពាររបស់ពួកគេ និងកោះហៅបុគ្គលិកស្ថានទូតត្រឡប់ទៅវិញ ខណៈដែលជម្លោះក្រុមជនអន្ធពាលនៅក្នុងប្រទេសសមុទ្រការ៉ាអ៊ីបនេះបានកើនឡើងខ្លាំង ហើយមនុស្សរាប់ពាន់នាក់បានភៀសខ្លួនចេញពីការប្រយុទ្ធថ្មីៗនេះ។កាលពីថ្ងៃអាទិត្យ រដ្ឋាភិបាលហៃទី បានប្រកាសដាក់រដ្ឋក្នុងគ្រាអាសន្នរយៈពេល ៧២ ម៉ោង និងដាក់បម្រាមគោចរពេលយប់ បន្ទាប់ពីក្រុមប្រដាប់អាវុធបានរំដោះមនុស្សរាប់ពាន់នាក់ចេញពីពន្ធនាគារ ហើយមេដឹកនាំក្រុមជនអន្ធពាលនេះបានអំពាវនាវឱ្យបណ្តេញលោកនាយករដ្ឋមន្ត្រី អារៀល ហិនរី (Ariel Henry) ចេញពីតំណែង។សាធារណរដ្ឋដូមីនីក ដែលចែកព្រំដែនកោះ ហីសផានីអូឡា (Hispaniola) ជាមួយហៃទី ហើយកាលពីឆ្នាំមុនបាននិរទេសជនជាតិហៃទីរាប់ម៉ឺននាក់ បាននិយាយកាលពីថ្ងៃចន្ទថា រដ្ឋមន្ត្រីការពារជាតិរបស់ខ្លួនកំពុងធ្វើទស្សនកិច្ចនៅព្រំដែនដើម្បីត្រួតពិនិត្យវឌ្ឍនភាពលើរបងព្រំដែន និងចាត់វិធានការសុវត្ថិភាព។សហរដ្ឋអាមេរិកបានជំរុញឱ្យពលរដ្ឋរបស់ខ្លួនចាកចេញពីហៃទី ឱ្យបានឆាប់តាមដែលអាចធ្វើទៅបាន ខណៈរដ្ឋាភិបាលប្រេស៊ីល បានអំពាវនាវឱ្យសហគមន៍អន្តរជាតិអនុវត្តដំណោះស្រាយរបស់អង្គការសហប្រជាជាតិក្នុងការបញ្ជូនកងកម្លាំងចម្រុះជាតិសាសន៍ទៅកាន់ហៃទី។ ប្រទេសជិតខាង បាហាម៉ា និងម៉ិកស៊ិក ក៏ចាត់វិធានការស្រដៀងគ្នានេះដោយព្រមានពលរដ្ឋរបស់ខ្លួនឱ្យចាកចេញ ឬចាត់វិធានការប្រុងប្រយ័ត្ន៕

UN៖ ហិង្សាផ្លូវភេទទំនងជាកើតឡើងក្នុងអំឡុងពេលការវាយប្រហាររបស់ក្រុមហាម៉ាស លើអ៊ីស្រាអែល

ក្រុមអ្នកជំនាញរបស់អង្គការសហប្រជាជាតិ បានរាយការណ៍កាលពីថ្ងៃចន្ទ (០៤ មីនា) ថាមាន «ហេតុផលច្បាស់លាស់» ដើម្បីជឿថា អំពើហឹង្សាផ្លូវភេទ រួមទាំងការរំលោភសេពសន្ថវៈ និងការរំលោភដោយក្រុមជនអន្ធពាល បានកើតឡើងនៅទីតាំងជាច្រើនក្នុងអំឡុងពេលនៃការវាយប្រហារកាលពីថ្ងៃទី០៧ ខែតុលា លើអ៊ីស្រាអែល ដោយពួកសកម្មប្រយុទ្ធហាម៉ាស។ក្រុមអ្នកជំនាញ ដែលដឹកនាំដោយបេសកជនពិសេសរបស់អង្គការសហប្រជាជាតិទទួលបន្ទុកអំពើហឹង្សាផ្លូវភេទក្នុងជម្លោះ លោកស្រី ប្រាមីឡា ផាតថេន (Pramila Patten) បានទៅបំពេញទស្សនកិច្ចនៅអ៊ីស្រាអែលនៅចន្លោះថ្ងៃទី២៩ ខែមករា ដល់ថ្ងៃទី១៤ ខែកុម្ភៈ ក្នុងបេសកកម្មដែលមានបំណងប្រមូលផ្តុំ វិភាគ និងផ្ទៀងផ្ទាត់ព័ត៌មានស្តីពីអំពើហិង្សាផ្លូវភេទ ដែលទាក់ទងនឹងការវាយប្រហារកាលពីថ្ងៃទី០៧ ខែតុលា។ក្រុមអង្គការសហប្រជាជាតិនេះបានបន្ថែមថា ខ្លួនក៏ទទួលបានព័ត៌មានពីប្រភពស្ថាប័ន និងសង្គមស៊ីវិល និងការសម្ភាសន៍ដោយផ្ទាល់អំពី «អំពើហិង្សាផ្លូវភេទប្រឆាំងនឹងបុរស និងស្ត្រីប៉ាឡេស្ទីននៅក្នុងកន្លែងឃុំឃាំង កំឡុងការវាយឆ្មក់តាមផ្ទះ និងនៅប៉ុស្តិ៍ត្រួតពិនិត្យ» នៅអ៊ីស្រាអែល បន្ទាប់ពីថ្ងៃទី០៧ ខែតុលា ផងដែរ។ក្រុមអ្នកជំនាញនេះបាននិយាយថា ខ្លួនបានលើកឡើងការចោទប្រកាន់ទាំងនេះជាមួយក្រសួងយុត្តិធម៌ និងអគ្គមេធាវីយោធារបស់អ៊ីស្រាអែល ប៉ុន្តែខាងអ៊ីស្រាអែលបាននិយាយថា ខ្លួនមិនទទួលបានការតវ៉ាអំពីអំពើហិង្សាផ្លូវភេទណាមួយលើសមាជិកនៃកងកម្លាំងរបស់ខ្លួននោះទេ៕

មន្ត្រីនគរបាលនៅប៉ាគីស្ថាន ត្រូវបានសរសើរចំពោះការជួយសង្គ្រោះស្ត្រីម្នាក់ពីហ្វូងមនុស្សដែលមានកំហឹង

នគរបាលប៉ាគីស្ថានម្នាក់ ត្រូវបានគេសរសើរថា ជាវីរនារី បន្ទាប់ពីអ្នកស្រី បានការពារស្ត្រីម្នាក់ពីហ្វូងមនុស្សដែលមានកំហឹង ដោយចោទប្រកាន់ថា នាងប្រមាថលើអ្វីដែលនាងកំពុងស្លៀកពាក់។លោក Usman Anwar អធិការនគរបាលខេត្ត ពុនចាប (Punjab) បាននិយាយថា អ្នកស្រី Sheher Bano ជំនួយការស្នងការនគរបាលនៅទីក្រុងឡាហ័រ ( Lahore) ធ្វើឲ្យជីវិតរបស់នាងស្ថិតក្នុងគ្រោះថ្នាក់« ដើម្បីជួយសង្រ្គោះស្ត្រីរូបនេះ បន្ទាប់ពីការសរសេរអក្សរភាសាអារ៉ាប់ចម្រុះពណ៌នៅលើសម្លៀកបំពាក់របស់នាង ត្រូវបានច្រឡំថាជាកំណាក្យដកស្រងចេញពីគម្ពីរកូរ៉ាន (Quran) ដែលជាសៀវភៅដ៏ពិសិដ្ឋរបស់សាសនាមូស្លីម។ ការប្រមាថ គឺជាបញ្ហារសើបខ្លាំងនៅក្នុងប្រទេសប៉ាគីស្ថាន ដែលភាគច្រើនកាន់សាសនាមូស្លីម ជាទីដែលវាត្រូវបានផ្តន្ទាទោសប្រហារជីវិត។ ការចោទប្រកាន់ បាននាំឲ្យមានការវាយដំដោយហិង្សា ការឃុំខ្លួន និងការវាយប្រហារដោយហ្វូងមនុស្ស។នៅក្នុងពិធីមួយនៅទីក្រុងរ៉ាវ៉ាល់ភីនឌី (Rawalpindi) កាលពីថ្ងៃពុធ អ្នកស្រី Bano បានទទួលកិត្តិយសខ្ពស់បំផុតរបស់ប្រទេសប៉ាគីស្ថានក្នុងការអនុវត្តច្បាប់ពីយោធារបស់ប្រទេសនេះ ដែលបានចាត់ទុកអ្នកស្រីថា «គ្មានការភ័យខ្លាច»។នគរបាល បានទទួលការហៅទូរសព្ទដំបូងកាលពីរសៀលថ្ងៃអាទិត្យមុនថា មនុស្សរាប់សិបនាក់ បានប្រមូលផ្តុំគ្នានៅខាងក្រៅភោជនីយដ្ឋានមួយ ក្នុងតំបន់ផ្សារទំនើបដ៏មមាញឹកនៃទីក្រុងឡាហ័រ។ ហ្វូងមនុស្ស បានចោទស្ត្រីដែលមិនបញ្ចេញឈ្មោះរូបនេះថា បានប្រមាថ ដោយសារនាងស្លៀកពាក់ខោអាវរលុងវែង ដែលស្រដៀងនឹងអាវគ្មានក ហើយទាមទារឲ្យនាងដោះវាចេញ។អ្នកស្រី Bano បានប្រាប់សារព័ត៌មាន NBC News ក្នុងបទសម្ភាសន៍តាមទូរស័ព្ទកាលពីថ្ងៃសុក្រថា៖«ការទទួលខុសត្រូវដំបូង និងជាបន្ទាន់របស់ខ្ញុំ គឺត្រូវយកស្ត្រីនោះចេញពីទីនោះភ្លាមៗ»។ អ្នកស្រី បាននិយាយថា ខ្លួនបានព្យាយាមការពារស្ត្រី ដែលអង្គុយក្នុងស្ថានភាពភ័យស្លន់ស្លោ នៅជ្រុងមួយ ខណៈដែលហ្វូងមនុស្សដែលមានកំហឹង បានចេញមកក្រៅកាន់តែឡើងនោះ។

មនុស្សប្រមាណ១៧០នាក់ស្លាប់ ក្នុងការវាយប្រហារលើភូមិជាច្រើន ប្រទេសបួគីណាហ្វាសូ

អាជ្ញាធរក្នុងប្រទេសបួគីណាហ្វាសូ បាននិយាយថា មនុស្សប្រមាណ ១៧០នាក់ ត្រូវបានសម្លាប់នៅក្នុងការវាយប្រហារនៅក្នុងភូមិចំនួន ៣ ។ ស្ថានភាពសន្តិសុខ កាន់តែអាក្រក់នៅក្នុងប្រទេសអាហ្វ្រិកខាងលិចមួយនេះ ដែលក្រុមជ្រុលនិយមឥអ៊ិស្លាម បានបង្កការគំរាមកំហែងយ៉ាងខ្លាំង។ អាជ្ញាធរ បាននិយាយថា ការវាយប្រហារ បានកើតឡើង នៅក្នុងភូមិនៃខេត្ត Yatenga ភាគខាងជើងរបស់ប្រទេស។ ទីភ្នាក់ងារសារព័ត៌មាន AFP បានដកស្រង់សម្តីអ្នកនៅរស់ជីវិត ដោយនិយាយថា ស្ត្រី និងកុមារតូចៗ រាប់សិបនាក់ស្ថិតក្នុងចំណោមជនរងគ្រោះ។ ចាប់តាំងពីអំឡុងឆ្នាំ ២០១៥មក ក្រុមសកម្មប្រយុទ្ធឥស្លាមនិយម នៅប្រទេសបួគីណាហ្វាសូ បានធ្វើការវាយប្រហារម្តងហើយម្តងទៀត និងធ្វើសកម្មភាពភេរវកម្ម ភាគច្រើននៅក្នុងតំបន់ភាគខាងជើងរបស់ប្រទេស។ មនុស្សប្រហែល ៨.៥០០នាក់ ត្រូវបានគេរាយការណ៍ថាបានស្លាប់នៅឆ្នាំ ២០២៣ ហើយមនុស្សជាង ២ លាននាក់ បានភៀសខ្លួនចេញពីលំនៅឋាន នៅខាងក្នុងប្រទេសនេះ។រដ្ឋប្រហារពីរលើក បាននាំទៅដល់ការបង្កើតរដ្ឋាភិបាលយោធានៅក្នុងប្រទេស ក្នុងឆ្នាំ ២០២២។ ចាប់តាំងពីពេលនោះមក មេដឹកនាំយោធាបានពង្រឹងទំនាក់ទំនងកាន់តែស៊ីជម្រៅជាមួយប្រទេសរុស្ស៊ី។ កាលពីខែមករា ទាហាននៅក្រោមក្រសួងការពារជាតិរុស្ស៊ី បានមកដល់ប្រទេសបួគីណាហ្វាសូ ដើម្បីបណ្តុះបណ្តាលទាហានរបស់របបយោធាប្រទេសនេះ។ ក្រុមឥស្លាមជ្រុលនិយម ក៍បានធ្វើឲ្យសន្តិសុខកាន់តែអាក្រក់ទៅ ៗ នៅក្នុងប្រទេសជិតខាងមួយចំនួននៅតំបន់សហ៊ែលប្រទេសអាហ្វ្រិកខាងលិច ដែលនាំឱ្យមានរដ្ឋប្រហារយោធាក្នុងរយៈពេលប៉ុន្មានឆ្នាំចុងក្រោយនេះ។ ប្រទេសលោកខាងលិច មានការប្រុងប្រយ័ត្នកាន់តែខ្លាំងឡើងថា រុស្ស៊ីអាចនឹងពង្រីកឥទ្ធិពលរបស់ខ្លួនលើប្រទេសទាំងនេះ។

កងទ័ពដឹកជញ្ជូនស្បៀងអាហារ ទឹក និងជំនួយវេជ្ជសាស្រ្ដ ទៅដល់ជនរងគ្រោះដោយទឹកជំនន់នៅបូលីវី

កងកម្លាំងប្រដាប់អាវុធ និងបុគ្គលិកការពារជនស៊ីវិលប្រទេសបូលីវី ត្រូវបានដាក់ចល័ត ដើម្បី ដឹកជញ្ជូនស្បៀងអាហារ ទឹក និងជំនួយផ្នែកវេជ្ជសាស្រ្ត ទៅដល់ជនរងគ្រោះដោយទឹកជំនន់នៅភាគខាងជើងប្រទេសបូលីវី។មន្ត្រីជាច្រើននាក់ បានចូលទៅដល់តំបន់ដាច់ស្រយាលជនលិចដោយទឹកជំនន់ តាមទូក ដែលបានចែកចាយគ្រឿងផ្គត់ផ្គង់ និងផ្តល់ជំនួយផ្នែកវេជ្ជសាស្រ្តដល់ប្រជាប្រជាជនជួបគ្រោះមហន្តរាយ។ភ្លៀងធ្លាក់ខ្លាំងក្នុងសប្តាហ៍កន្លងទៅនេះ បានវាយលុកនៅតំបន់សមុទ្រ Andean តំបន់ Amazon និងជ្រលងភ្នំប្រទេសបូលីវីភាគកណ្តាល។ អង្គភាពសេវាឧតុនិយម និងជលសាស្ត្រជាតិ បាននិយាយថា ភ្លៀងធ្លាក់ក្នុងខែកុម្ភៈកន្លងទៅនេះ លើសពីកម្រិតប្រវត្តិសាស្ត្រ ជាពិសេសនៅក្នុងតំបន់ទីក្រុង ឡាប៉ាស និងទីក្រុង ប៉ូតូស៊ី។ទីភ្នាក់ងារ រីលីហ្វវែប(Reliefweb)បាននិយាយនៅក្នុងរបាយការណ៏ដែលបានចេញផ្សាយកាលពីថ្ងៃទី១ ខែ មីនាថា ប្រទេសបូលីវី បានប្រកាសដាក់រដ្ឋក្នុងគ្រាអាសន្ន កាលពីថ្ងៃទី ២៨ ខែកុម្ភៈ បន្ទាប់ពីទឹកទន្លេ Acre បានហក់ឡើងហៀរច្រាំង ដោយបង្ខំឱ្យពលរដ្ឋ ៥៧០គ្រួសារ មកពី ១៤ ស្រុក ចាកចេញពីលំនៅឋានរបស់ពួកគេ និងស្វែងរកទីជម្រកសុវត្ថិភាព ហើយភ្លៀងធ្លាក់ខ្លាំង ដែលបានធ្វើឲ្យកាន់តែធ្ងន់ធ្ងដោយបាតុភូត អែល នីញ៉ូ បានឆក់យកជីវិតមនុស្ស ៤០ នាក់ និងប៉ះពាល់ដល់គ្រួសារជាង ១៥.០០០គ្រួសារ នៅទូទាំងប្រទេស។

ម៉ាឡេស៊ី និយាយថា ការស្វែងរកយន្តហោះ MH370 ត្រូវតែបន្ត ១០ឆ្នាំបន្ទាប់ពីយន្តហោះបាត់ដាន

សាច់ញាតិ និងមិត្តភក្តិ បានរៀបចំពិធីរំលឹក កាលពីថ្ងៃអាទិត្យ ចំពោះអ្នកដំណើរដែលបាត់ខ្លួនពីជើងហោះហើរ MH370 របស់ក្រុមហ៊ុនអាកាសចរណ៍ម៉ាឡេស៊ី ដែលបានបាត់ដានកាលពី ១០ ឆ្នាំមុន ខណៈកំពុងធ្វើដំណើរពីទីក្រុងគូឡាឡាំពួ ទៅកាន់ទីក្រុងប៉េកាំង កាលពីថ្ងៃទី ៨ ខែមីនា ឆ្នាំ ២០១៤។ នៅក្នុងព្រឹត្តិការណ៍រំលឹកខួប ដែលរៀបចំដោយអង្គការមិនមែនរដ្ឋាភិបាល មានឈ្មោះថា សំឡេងយន្តហោះ MH370 (VoiceMH370) នៅទីក្រុង Subang Jaya រដ្ឋមន្ត្រីក្រសួងដឹកជញ្ជូនម៉ាឡេស៊ី លោក Anthony Loke បាននិយាយថា រដ្ឋាភិបាលកំពុងជំរុញឱ្យមានការបន្តស្វែងរកយន្តហោះជាថ្មី ខណៈខួបលើកទី ១០ នៃការបាត់ដានយន្តហោះក្នុងភាពអាថ៌កំបាំងផ្នែកអាកាសចរណ៍ធំបំផុតមួយរបស់ពិភពលោក ខិតចូលជិតមកដល់។ កម្ទេចកម្ទីយន្តហោះមួយចំនួន ត្រូវបានដាក់តាំងបង្ហាញនៅលើតុ និង រចនាដាក់ផ្គុំ ដែលមានសំនួរសួរថា «ហេតុអ្វី» និង «តើយន្តហោះបានបាត់ដោយរបៀបណា»។ ប្រទេសម៉ាឡេស៊ី បានចូលរួមជាមួយក្រុមហ៊ុន អសិន អ៊ីនហ្វីនីធី(Ocean Infinity) ក្នុងឆ្នាំ ២០១៨ ដើម្បីស្វែងរកនៅមហាសមុទ្រឥណ្ឌាភាគខាងត្បូង ដោយផ្តល់ប្រាក់រហូតដល់ទៅ ៧០លានដុល្លារ ប្រសិនបើរកឃើញយន្តហោះនោះ។ ប្រទេសម៉ាឡេស៊ី ចិន និងប្រទេសអូស្ត្រាលី កាលពីពេលមុន បានបញ្ចប់ការស្វែងរកក្រោមទឹកក្នុងការចំណាយ ២០០ លានដុល្លារអូស្ត្រាលី ស្មើនឹង១៣០,៤៦ លានដុល្លារ កាលពីខែមករា ឆ្នាំ២០១៧ ដោយពុំទទួលបានលទ្ធផលឡើយ។ លោក Jiang Hui ជាជនជាតិចិន ដែលម្តាយរបស់លោកជាអ្នកដំណើរនៅលើយន្តហោះ MH370 បានអំពាវនាវដល់ប្រទេសម៉ាឡេស៊ី ឱ្យផ្តល់ព័ត៌មានចុងក្រោយដល់សាច់ញាតិដែលខ្លួនទទួលបាន។ លោកស្ថិតក្នុងចំណោមសមាជិកគ្រួសារ ដែលបានដាក់ពាក្យបណ្តឹងនៅប្រទេសចិនទាមទារសំណងជុំវិញការបាត់ដានយន្តហោះនេះ។ តុលាការទីក្រុងប៉េកាំង បានចាប់ផ្តើមសវនាការលើសំណងកាលពីខែវិច្ឆិកា។ អ្នកដំណើរជនជាតិចិន ជាង ១៥០ នាក់នៅលើជើងហោះហើរនេះ ដោយសាច់ញាតិបានទាមទារសំណងពីក្រុមហ៊ុនអាកាសចរណ៍ម៉ាឡេស៊ី ក្រុមហ៊ុន Boeing ក្រុមហ៊ុនផលិតម៉ាស៊ីនយន្តហោះ Rolls-Royce និងក្រុមធានារ៉ាប់រង Allianz ក្នុងចំណោមក្រុមហ៊ុនផ្សេងទៀតផ្សេងទៀត។

អ្នកទោសច្រើននាក់ រត់គេចចេញពីពន្ធនាគារប្រទេសហៃទី បន្ទាប់ពីការវាយប្រហារប្រដាប់អាវុធ

ក្រុមប្រដាប់អាវុធ កាលពីយប់ថ្ងៃសៅរ៍ បានវាយប្រហារនៅពន្ធនាគារធំបំផុតរបស់ប្រទេសហៃទី ដែលនាំឱ្យអ្នកទោសរត់គេចខ្លួនពីពន្ធនាគារធំ ខណៈមេដឹកនាំក្រុមជនអន្ធពាលម្នាក់ ស្វែងរកការបណ្តេញនាយករដ្ឋមន្ត្រី លោក Ariel Henry ពីតំណែង។សារព័ត៌មានរ៉យទ័រ បានទៅដល់ពន្ធនាគារជាតិកាលពីថ្ងៃអាទិត្យ ជាកន្លែងដែលពុំឃើញមានមន្រ្តីនគរបាលពាក់ឯកសណ្ឋាន ហើយទ្វារពន្ធនាគារធំ នៅបើកចំហ។ អ្នកទោសមិនស្គាល់អត្តសញ្ញាណម្នាក់បានសារព័ត៌មានប្រាប់រ៉យទ័រថា គាត់នៅសល់តែម្នាក់ឯងនៅក្នុងបន្ទប់ឃុំឃាំង។គេនៅមិនដឹងនោះទេ ថាតើមានអ្នកទោសប៉ុន្មាននាក់ ដែលកំពុងរត់គេចខ្លួន។ ប្រភពនានា ជិតស្និទ្ធទៅនឹងស្ថាប័ននេះ បាននិយាយថា វាទំនងជាមានចំនួនច្រើនលើសលប់។ យោងតាមក្រុមសិទ្ធិមនុស្ស បានឱ្យដឹងថា ពន្ធនាគារដែលត្រូវបានសាងសង់ឡើងដើម្បីដាក់អ្នកទោសចំនួនត្រឹមតែ ៧០០នាក់ ត្រូវបានគេឃុំឃាំងអ្នកទោសរហូតចំនួន ៣.៦៨៧នាក់។បុគ្គលិកពន្ធនាគារស្ម័គ្រចិត្តម្នាក់ កាលពីថ្ងៃអាទិត្យបានប្រាប់សារព័ត៌មាន Reuters ថា អ្នកទោសចំនួន ៩៩នាក់ បានយកមកស្នាក់នៅក្នុងបន្ទប់ឃុំឃាំងរបស់ពួកគេ ដោយព្រួយបារម្ភថា ត្រូវបានសម្លាប់នៅក្នុងការបាញ់ប្រហារនេះ។ ទាំងនេះ រួមមានទាហានកូឡុំប៊ីចូលនិវត្តន៍ជាច្រើននាក់ ដែលត្រូវបានដាក់ពន្ធនាគារ ពីបទជាប់ពាក់ព័ន្ធក្នុងការប៉ុនប៉ងធ្វើឃាតប្រធានាធិបតី លោក ចូវេនែល ម៉ូអ៊ីស(Jovenel Moïse)។សាកសពអ្នកទោសបីនាក់ ដែលបានប៉ុនប៉ងរត់គេចខ្លួនបានស្លាប់នៅទីធ្លានៃពន្ធនាគារ កាលពីព្រឹកថ្ងៃអាទិត្យ។ រដ្ឋាភិបាលប្រទេសហៃទី ដែលជាប្រទេសក្រីក្របំផុតនៅទ្វីបអាមេរិក ពុំបានធ្វើអត្ថាធិប្បាយលើស្ថានភាពនេះទេ។

បណ្ដាញសង្គម

ព័ត៌មានថ្មីៗ

អ៊ីរ៉ាក់នឹងកាត់បន្ថយការផលិតប្រេង បើសិនជានាវាដឹកប្រេងមិនអាចធ្វើដំណើរឆ្លងកាត់ច្រកសមុទ្រ Hormuz

បារាំងបង្ហាញ «សាមគ្គីភាព» ជាមួយអេស្ប៉ាញ ក្រោយមានការគំរាមកំហែងពីអាមេរិកលើទីក្រុងម៉ាឌ្រីដ

ប្រតិភូអនុព័ន្ធយោធាបរទេស បន្តចុះសួរសុខទុក្ខប្រជាជនភៀសសឹកកម្ពុជាកំពុងបន្តរស់នៅជំរំក្នុងវត្តកណ្តោល ស្រុកថ្មពួកដែលមិនទាន់អាចវិលត្រឡប់ទៅកាន់លំនៅដ្ឋានវិញបានដោយសារថៃឈ្លានពាន

រដ្ឋមន្ត្រីក្រសួងកសិកម្ម ទទួលជួបគណៈប្រតិភូក្រុមប្រឹក្សាធុរកិច្ចសហភាពអឺរ៉ុប-អាស៊ានដើម្បីរកឱកាសវិនិយោគនៅប្រទេសកម្ពុជា

ការបាញ់ផ្លោង និងការផ្ទុះយ៉ាងខ្លាំង បង្កឲ្យមានការភ័យខ្លាចតាមបណ្តោយព្រំដែនប៉ាគីស្ថាន-អាហ្វហ្គានីស្ថាន

ស្ថាប័នបោះឆ្នោតថៃ អះអាងលទ្ធផលបោះឆ្នោតផ្លូវការ ដោយបើកផ្លូវឲ្យមានសភាថ្មី

យានដ្រូនរាប់រយគ្រឿងមានគោលដៅនៅគូវ៉ែត អ៊ីរ៉ាក់ អារ៉ាប៊ីសាអ៊ូឌីត និងអារ៉ាប់រួម ស្របពេលផ្ទុះសង្រ្គាមអ៊ីរ៉ង់

ឯកឧត្ដមឧបនាយករដ្ឋមន្ត្រី ហ៊ុន ម៉ានី អញ្ជើញជាអធិបតីក្នុងពិធីសមោសរនៃកិច្ចប្រជុំកំពូលធុរកិច្ចអាស៊ាន-កម្ពុជា ឆ្នាំ២០២៦ នៅភ្នំពេញ

ផ្លូវបានបិទ នគរបាលមកដល់ ក្រោយផ្សែងហុយនៅជិតស្ថានកុងស៊ុលសហរដ្ឋអាមេរិក ក្នុងទីក្រុង Dubai

អ៊ីស្រាអែលវាយប្រហារ និងបំផ្លាញទីតាំងអ៊ីរ៉ង់មានការជាប់ពាក់ព័ន្ធនឹងកម្មវិធីអាវុធនុយក្លេអ៊ែរ

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877