BTV NEWS

ករណីបុរសម្នាក់ឡើងលើផ្លូវល្បឿនលឿនPK54 យកដែកដាក់ទទឹងផ្លូវត្រូវបានសមត្ថកិច្ចនគរបាលស្រាវជ្រាវបង្រ្កាបបានហើយ

អង្គភាពប្រឆាំងអំពើពុករលួយបានធ្វើកោសល្យវិច័យទូរស័ព្ទជាង ៨០០គ្រឿង និងភស្តុតាងមួយចំនួនទៀតដែលសាលាដំបូងរាជធានីភ្នំពេញប្រគល់ឱ្យ

នគរបាលរាជធានីភ្នំពេញ ស្រាវជ្រាវឃាត់ខ្លួនក្មេងទំនើង ៩នាក់ ពាក់ព័ន្ធករណីវាយប្លន់យកម៉ូតូ

អាវុធហត្ថរាជធានីភ្នំពេញ បង្ក្រាបគ្រឿងញៀនជាង ៦គីឡូក្រាមឃាត់ខ្លួនមនុស្ស ១១នាក់

សន្តិសុខ និង សង្គម

ការប៉ះទង្គិចគ្នាបានផ្ទុះឡើងក្នុងការតវ៉ាខួបគ្រោះថ្នាក់រថភ្លើងបុកគ្នា នៅក្នុងប្រទេសក្រិក

នគរបាលបានប៉ះទង្គិចគ្នាជាមួយក្រុមបាតុករកាលពីថ្ងៃពុធទី២៨ខែកុម្ភៈនៅតាមដងផ្លូវនានានៃទីក្រុងថេសាឡូនីគី (Thessaloniki)ស្របពេលមនុស្សរាប់ពាន់នាក់បានប្រមូលផ្ដុំគ្នារម្លឹកខួបមួយឆ្នាំនៃគ្រោះថ្នាក់រថភ្លើងបុកគ្នាដ៏សាហាវបំផុតរបស់ប្រទេសក្រិក។ក្រុមអ្នកតវ៉ាបានគប់គ្រាប់បែកភ្លើង ទៅលើនគរបាល ដែលព្យាយាមរារាំងហ្វូងមនុស្ស។កាលពីឆ្នាំមុន រថភ្លើងដឹកអ្នកដំណើរមួយខ្សែ ធ្វើដំណើរចេញពីរដ្ឋធានីអាតែន ទៅកាន់ទីក្រុងថេសាឡូនីគី ភាគខាងជើង បានបុកគ្នាជាមួយរថភ្លើងដឹកទំនិញ បណ្ដាលឲ្យមនុស្ស៥៧នាក់ស្លាប់ និងផ្ទុះការតវ៉ាទ្រង់ទ្រាយធំៗជាច្រើន ជាអ្វីដែលមនុស្សជាច្រើនចាត់ទុកថាជាការធ្វេសប្រហែសលើវិស័យរថភ្លើងរយៈពេលប៉ុន្មានទសវត្សរ៍មកនេះ។ នៅក្នុងរដ្ឋធានីអាតែន (Athens) កម្មករ និងនិស្សិត បានហែរក្បួននៅកណ្ដាលរដ្ឋធានី ដើម្បីប្រារព្ធខួបនៃគ្រោះថ្នាក់រថភ្លើង នេះនិងដើម្បីទាមទាររកយុត្តិធម៌ និងការដំឡើងប្រាក់ខែ។ ការធ្វើកូដកម្មរយៈពេល២៤ម៉ោង បានបញ្ឈប់សេវាដឹកជញ្ជូនតាមរថភ្លើងទូទាំងប្រទេស និងបានរំខានដល់ការដឹកជញ្ជូននៅតាមជាយក្រុង ក្នុងរដ្ឋធានីរបស់ប្រទេសក្រិក ។ នាវាត្រូវបានជាប់គាំងនៅក្នុងកំពង់ផែនានាជិតរដ្ឋធានីអាតែន ខណៈដែលបុគ្គលិករថភ្លើង មន្ទីរពេទ្យ នាវា និងបុគ្គលិកនាវាចម្លង ព្រមទាំងគ្រូបង្រៀន បានដើរចេញពីការងារទាំងអស់៕

ជនអន្តោប្រវេសន៍២៣នាក់ បានស្លាប់ បន្ទាប់ពីលិចទូកក្នុងប្រទេសសេណេហ្គាល់ភាគខាងជើង

ក្រុមអ្នកសង្រ្គោះបានទាញសាកសពមនុស្ស២៣នាក់ពីសមុទ្រក្នុងប្រទេសសេណាហ្គាល់ភាគខាងជើងកាលពីថ្ងៃពុធទី២៨កុម្ភៈបន្ទាប់ពីទូកដឹកជនអន្តោប្រវេសន៍មួយគ្រឿងទៅកាន់ទឹកដីអឺរ៉ុប បានលិច។ អភិបាលតំបន់សេន ល្វីស (Saint-Louis) លោក អាលីអូណេ បាដារ៉ា សាម (Alioune Badara Samb)បាននិយាយតាមទូរស័ព្ទថា សាកសពជាង២០នាក់ ត្រូវបានរកឃើញ ដោយបន្ថែមថា មនុស្សចំនួន២០នាក់ផ្សេងទៀតត្រូវបានជួយសង្រ្គោះ។ពួកលោកបានមើលឃើញសាកសពអណ្ដែតមកកាន់ច្រាំងសមុទ្រជាបន្តបន្ទាប់ហើយក្រុមអ្នកសង្គ្រោះក្នុងតំបន់ និងកងកម្លាំងកងទ័ពជើងទឹកកំពុងតាមស្វែងរកអ្នកនៅមានជីវិតផ្សេងទៀតបន្ទាប់ពីមេឃងងឹត។លោកពុំបានបញ្ជាក់ទេ ថាតើមានអ្នកដំណើរប៉ុន្មាននាក់នៅលើទូកនោះ ប៉ុន្តែក្រុមអ្នកនៅរស់រានមានជីវិត បានប្រកាសថាចំនួនអ្នកដំណើរលើទូកអាចមានរាប់រយនាក់។ អ្នករួចជីវិតម្នាក់ឈ្មោះ ម៉ាម៉ាឌី ឌីអានហ្វូ (Mamady Dianfo) មកពីតំបន់ កាសាម៉ាន់ស៍(Casamance)ជាយភាគខាងត្បូងប្រទេសនេះ បាននិយាយថា មានអ្នកដំណើរប្រហែល៣០០នាក់នៅពេលទូកចាកចេញពីប្រទេសសេណេហ្គាល់កាលពីមួយសប្ដាហ៍មុន។ ចំណែកអ្នករស់រានមានជីវិតម្នាក់ទៀត ឈ្មោះ អាល់ហ្វា បាល(Alpha Balde) បាននិយាយថា មានអ្នកដំណើរនៅលើទូកប្រែហល២០០នាក់។ យោងតាមទីភ្នាក់ងារព្រំដែន Frontex របស់អឺរ៉ុប ប្រទេសសេណេហ្គាល់ និងម៉ារ៉ុក គឺជាកន្លែងមកដល់ដ៏សំខាន់បំផុតសម្រាប់ជនអន្តោប្រវេសន៍ចម្រុះជាតិសាសន៍ នៅលើប្រជុំកោះអាត្លង់ទិកនេះ៕

ចំហេះព្រៃនៅរដ្ឋតិចសាស់ ឆ្លងចូលដល់ រដ្ឋអូក្លាហូម៉ា សហរដ្ឋអាមេរិក

ចំហេះព្រៃ បានឆ្លងកាត់ពីរដ្ឋតិចសាស់ ចូលទៅក្នុងរដ្ឋអូក្លាហូម៉ា សហរដ្ឋអាមេរិក ជាកន្លែងដែលចំហេះព្រៃ បានជំរុញឱ្យមានការជម្លៀសប្រជាជន កាលពីថ្ងៃអង្គារ។ យោងតាមអាជ្ញាធររដ្ឋតិចសាស់ បានឲ្យដឹងថា នៅរដ្ឋតិចសាស់ ចំហេះព្រៃ បានឆាបឆេះលើផ្ទៃដីជាង១០ម៉ឺនហិចតា គិតត្រឹមរសៀលថ្ងៃអង្គារម្សិលមិញ ក្នុងរយៈពេលត្រឹមតែ ២៨ ម៉ោង ចាប់តាំងពីបានឆាបឆេះ កាលពីរសៀលថ្ងៃច័ន្ទ ទី២៦ ខែកុម្ភៈ ។ ប្រព័ន្ធផ្សព្វផ្សាយក្នុងស្រុកបានរាយការណ៍ថា កាលពីថ្ងៃអង្គារ អភិបាលរដ្ឋតិចសាស់ លោក ហ្គ្រេក អាបុត(Greg Abbott) បានចេញការប្រកាសគ្រោះមហន្តរាយ សម្រាប់តំបន់ចំនួន៦០តំបន់ ដើម្បីផ្តល់លទ្ធភាពដល់ធនធានសំខាន់ៗ ត្រូវបានដាក់ពង្រាយចំពោះចំហេះព្រៃ ដែលកំពុងឆេះនៅក្នុងរដ្ឋនេះ។អង្គភាពសេវាអាកាសធាតុជាតិ នៅទីក្រុង Amarillo បានរាយការណ៍កាលពីយប់ថ្ងៃអង្គារថា ការព្រមានអំពីចំហេះព្រៃ និងការជម្លៀសប្រជាជន បានចូលជាធរមាន នៅក្នុងតំបន់ជាច្រើនកន្លែង ហើយកាលពីល្ងាចថ្ងៃអង្គារ សន្ទុះខ្យល់បោកបក់ មុនពេលត្រជាក់ខ្លាំង បានបក់ឆ្លងកាត់នៅទូទាំងប្រទេស ក្នុងសន្ទុះខ្យល់មានល្បឿន ៥០ម៉ាយស៍ ក្នុងមួយម៉ោង ចូលមកក្នុងតំបន់នេះ។មន្ត្រីព័ត៌មានសាធារណៈរបស់អង្គភាពសេវាព្រៃឈើរដ្ឋតិចសាស់ បានរៀបរាប់អំពីស្ថានភាពដ៏គ្រោះថ្នាក់ និងផ្លាស់ប្តូរយ៉ាងឆាប់រហ័ស នៅក្នុងការធ្វើបច្ចុប្បន្នភាពទៅកាន់មជ្ឈមណ្ឌលសម្របសម្រួលអន្តរទីភ្នាក់ងារជាតិ។ មនុស្សជាង ៥០លាននាក់ បានប្រឈមមុខចំពោះការគំរាមកំហែងអាកាសធាតុមិនអំណោយផលខ្លាំងកាលពីយប់ថ្ងៃអង្គារ ដោយលាតសន្ធឹងទៅភាគខាងជើង និងភាគខាងកើត ពីរដ្ឋអាកាន់សាស់ (Arkansas) ទៅកាន់រដ្ឋ New England ។ អង្គភាពសេវាកម្មអាកាសធាតុ បាននិយាយថា នៅក្នុងរដ្ឋតិចសាស់ ការជម្លៀសប្រជាជនជាកាតព្វកិច្ច ត្រូវបានអនុវត្តនៅក្នុងទីក្រុងជិត១០ទីក្រុង។ យោងតាមការធ្វើបច្ចុប្បន្នភាពរបស់មជ្ឈមណ្ឌលសម្របសម្រួលបានឲ្យដឹងថាទីក្រុងមួយនៅប្រទេសកាណាដា ត្រូវបានស្នើសុំឱ្យផ្តល់ទីជម្រក ហើយទីភ្នាក់ងារជាច្រើនកំពុងបញ្ជូនសមាជិក ដើម្បីជួយការពាររចនាសម្ព័ន្ធទប់ទល់អណ្តាតភ្លើងកើនឡើង។

UN និយាយថា មួយភាគបួននៃប្រជាជនតំបន់ហ្កាហ្សា បានឈានមួយជំហានចេញពីគ្រោះទុរ្ភិក្ស

ឯកអគ្គរដ្ឋទូតរងសហរដ្ឋអាមេរិកប្រចាំនៅអង្គការសហប្រជាជាតិ លោក Robert Wood បាន និយាយទៅកាន់ក្រុមប្រឹក្សាសន្តិសុខថា សហរដ្ឋអាមេរិក បានជំរុញឱ្យសម្ព័ន្ធមិត្តរបស់ខ្លួនគឺប្រទេសអ៊ីស្រាអែល ឲ្យបើកចំហព្រំដែនឆ្លងកាត់ សម្រាប់ការផ្តល់ជំនួយមនុស្សធម៌ទៅកាន់តំបន់ហ្កាហ្សា និងដើម្បីជួយសម្រួលដល់ការបើកច្រកឆ្លងកាត់បន្ថែមទៀត។ លោកបាននិយាយថា «និយាយឲ្យសាមញ្ញ អ៊ីស្រាអែល ត្រូវតែធ្វើឲ្យបានច្រើនជាងនេះ។ យើងបន្តអំពាវនាវដល់អ៊ីស្រាអែល ធ្វើឱ្យប្រសើរឡើងនូវការខ្វែងគំនិតគ្នា ដើម្បីធានាបានថា ជំនួយអាចឆ្លងកាត់ដោយសុវត្ថិភាព។ នាយករងប្រតិបត្តិកម្មវិធីស្បៀងអាហារពិភពលោក(WFP) លោក ខាល់ ស្កៅ (Carl Skau) បាននិយាយទៅកាន់ ក្រុមប្រឹក្សាសន្តិសុខថា កម្មវិធីស្បៀងអាហារពិភពលោក ត្រៀមជាស្រេចដើម្បីពង្រីកប្រតិបត្តិការយ៉ាងឆាប់រហ័ស ប្រសិនបើមានកិច្ចព្រមព្រៀងបទឈប់បាញ់ ។ លោក Skau បាននិយាយថា ប៉ុន្តែក្នុងពេលដំណាលគ្នានេះ ហានិភ័យនៃគ្រោះទុរភិក្ស កំពុងត្រូវបានបញ្ឆេះដោយអសមត្ថភាព ក្នុងការនាំយកការផ្គត់ផ្គង់ស្បៀងអាហារសំខាន់ៗទៅកាន់តំបន់ហ្កាហ្សាក្នុងបរិមាណឲ្យបានគ្រប់គ្រាន់ និងលក្ខខណ្ឌប្រតិបត្តិការស្ទើរតែមិនអាចធ្វើទៅបាន ដោយបុគ្គលិកត្រូវប្រឈមមុខនៅលើដែនដីនោះ។លោកស្រី ខារ៉ូលីន រ៉ូទ្រីហ្គូស ប៊ឺកេត (Carolyn Rodrigues-Birkett) ឯកអគ្គរដ្ឋទូតប្រចាំអង្គការសហប្រជាជាតិរបស់ប្រទេស ហ្គីយ៉ាន(Guyana) បាននិយាយទៅកាន់ក្រុមប្រឹក្សាដែលមានសមាជិក ១៥ រូបថា «ភាពអត់ឃ្លានជាវិធីសាស្រ្តក្នុងសង្គ្រាម គឺខុសច្បាប់ ហើយប្រទេសហ្គីយ៉ាន ថ្កោលទោសអ្នកទាំងឡាយណា ដែលមានចេតនាប្រើប្រាស់វិធីសាស្ត្រនេះ ជាឧបករណ៍ប្រឆាំងប្រជាជននៅតំបន់ហ្កាហ្សា ។ ឯកអគ្គរដ្ឋទូតប្រចាំអង្គការសហប្រជាជាតិ របស់ប្រទេសអាល់ហ្សេរី លោក អាម៉ា បេនចាម៉ា (Amar Bendjama) បាននិយាយទៅកនា់ក្រុមប្រឹក្សាសន្តិសុខថា យុទ្ធនាការរបស់អ៊ីស្រាអែល នៅតំបន់ហ្កាហ្សា គឺជាការដាក់ទណ្ឌកម្មរួមសម្រាប់ជនស៊ីវិលប៉ាឡេស្ទីន។ ភាពស្ងៀមស្ងាត់របស់យើង បានផ្តល់ការអនុញ្ញាតដើម្បីសម្លាប់ និងបង្អត់អាហារប្រជាជនប៉ាឡេស្ទីន។

វិមានក្រឹមឡាំងព្រមាន «ភាពជៀសមិនរួច» ជម្លោះជាមួយNATO ប្រសិនបើសម្ព័ន្ធយោធានេះបញ្ជូនកងទ័ពទៅអ៊ុយក្រែន

ប្រមុខសម្ព័ន្ធយោធាណាតូ(NATO) និយាយថា សម្ព័ន្ធមិត្តយោធានេះ ពុំមានផែនការបញ្ជូនកងទ័ពទៅប្រទេសអ៊ុយក្រែននោះទេ ប៉ុន្តែប្រធានាធិបតីបារាំងលោក Emmanuel Macron បាននិយាយថាផែនការបញ្ជូនកងទ័ព មិនគួរត្រូវបានច្រានចោលឡើយ។ វិមានក្រឹមឡាំង និយាយកាលពីថ្ងៃអង្គារថា ជម្លោះដោយផ្ទាល់រវាងសម្ព័ន្ធយោធាណាតូ និងរុស្ស៊ី នឹងក្លាយជារឿង«ជៀសមិនរួច» ប្រសិនបើសម្ព័ន្ធយោធានេះ ដាក់ពង្រាយកងទ័ពទៅកាន់ប្រទេសអ៊ុយក្រែន។ លោក Dmitry Peskov អ្នកនាំពាក្យរបស់ប្រធានាធិបតីរុស្ស៊ី លោក វ្ល៉ាឌីមៀ ពូទីន កំពុងមានប្រតិកម្មទៅនឹងសេចក្តីថ្លែងការណ៍ស្តីពីការដាក់ពង្រាយកងទ័ពរបស់សម្ព័ន្ធយោធាណាតូដ៏មានសក្តានុពល នៅក្នុងសន្និសីទអន្តរជាតិមួយដែលធ្វើឡើងនៅទីក្រុងប៉ារីស ប្រទេសបារាំង កាលពីថ្ងៃចន្ទ។ លោក Peskov បាននិយាយថា ការពិភាក្សាអំពីលទ្ធភាពនៃការបញ្ជូនអ្នកពាក់ព័ន្ធមួយចំនួនពីសម្ព័ន្ធយោធាណាតូ ចូលទៅក្នុងប្រទេសអ៊ុយក្រែន គឺជា «សមាសភាពថ្មីដ៏សំខាន់» ។ លោកនិយាយបន្តថា វាពុំមានផលប្រយោជន៍សម្រាប់ប្រទេសទាំងនេះទេ ហើយពួកគេគួរតែគិតពិចារណា។ ប្រធានាធិបតីបារាំង លោក Emmanuel Macron បាននិយាយថា ការបញ្ជូនកងទ័ពរបស់ប្រទេសលោកខាងលិច នៅកាន់ដែនដីប្រទេសអ៊ុយក្រែន មិនគួរត្រូវបានច្រានចោលនាពេលអនាគតនោះទេ ខណៈប្រតិបត្តិការយោធារបស់រុស្ស៊ី បានឈានចូលដល់ឆ្នាំទី ៣ ហើយអ៊ុយក្រែនព្យាយាមបញ្ចុះបញ្ចូលប្រទេសលោកខាងលិច ឱ្យបន្តផ្តល់ជំនួយយោធាបន្ទាន់។ គំនិតនៃការបញ្ជូនកងទ័ពរបស់សម្ព័ន្ធយោធាណាតូ ទៅកាន់ប្រទេសអ៊ុយក្រែន គឺជារឿងហាមឃាត់ ចាប់តាំងពីការឈ្លានពានរបស់រុស្ស៊ី ក្នុងខែកុម្ភៈ ឆ្នាំ ២០២២ ហើយវានៅតែស្ថិតក្នុងបន្ទាត់ក្រហម សម្រាប់មេដឹកនាំជាន់ខ្ពស់ភាគច្រើន របស់សហភាពអឺរ៉ុប។ អធិការបតីអាល្លឺម៉ង់ លោក Olaf Scholz មានគំនិតខុសពីលោក Macron ចំពោះអ្វីដែលបានធ្វើឡើងនៅក្នុងទីក្រុងប៉ារីស ដោយនិយាយថា អ្នកចូលរួមបានព្រមព្រៀងថា នឹងគ្មានកងទ័ព គ្មានទាហាន នៅលើទឹកដីប្រទេសអ៊ុយក្រែន ដែលត្រូវបានបញ្ជូនទៅទីនោះដោយរដ្ឋសហភាពអឺរ៉ុប ឬរដ្ឋសម្ព័ន្ធយោធាណាតូឡើយ។

ជនជាតិប៉ាឡេស្ទីនជិត ២៩.៩០០ នាក់ស្លាប់ក្នុងសង្រ្គាមដែលកំពុងបន្តនៅតំបន់ហ្កាហ្សា

ក្រសួងសុខាភិបាលដែលគ្រប់គ្រងដោយក្រុមហាម៉ាស បាននិយាយនៅក្នុងសេចក្តីថ្លែងការណ៍មួយកាលពីថ្ងៃអង្គារ (២៧ កុម្ភៈ) ថាចំនួនអ្នកស្លាប់របស់ប៉ាឡេស្ទីន នៅក្នុងតំបន់ហ្កាហ្សាស្ទ្រីប បានកើនឡើងជិតដល់ ២៩.៩០០ នាក់ចាប់តាំងពីថ្ងៃទី០៧ ខែតុលា ឆ្នាំ២០២៣ មក។ យោងតាមសេចក្តីថ្លែងការណ៍បានឱ្យដឹងថា កងទ័ពអ៊ីស្រាអែលបានសម្លាប់ជនជាតិប៉ាឡេស្ទីនចំនួន ៩៦ នាក់ និងបង្ករបួស ១៧២ នាក់ផ្សេងទៀតក្នុងរយៈពេល ២៤ ម៉ោងចុងក្រោយនេះ ដែលនាំឱ្យចំនួនអ្នកស្លាប់សរុបកើនឡើងដល់ ២៩.៨៧៨ នាក់ និងរបួសដល់ ៧០.២១៥ នាក់។សេចក្តីថ្លែងការណ៍បានបន្ថែមថា ជនរងគ្រោះមួយចំនួននៅតែជាប់នៅក្រោមគំនរបាក់បែក និងនៅលើដងផ្លូវ ដោយកងកម្លាំងអ៊ីស្រាអែលរារាំងរថយន្តសង្គ្រោះបន្ទាន់ និងក្រុមការពារជនស៊ីវិលមិនឱ្យចូលទៅសង្រ្គោះ។ ទន្ទឹមនឹងនេះដែរ កងទ័ពអ៊ីស្រាអែលបានបើកការវាយប្រហារតាមអាកាស និងជើងគោកលើផ្នែកផ្សេងៗនៃតំបន់ហ្កាហ្សាស្ទ្រីប ដែលបណ្តាលឱ្យមានអ្នកស្លាប់ និងរបួសជាច្រើន នេះបើយោងតាមប្រភពក្នុងស្រុក និងសាក្សីផ្ទាល់ភ្នែក។ជាមួយគ្នានេះ ប្រទេសហ្ស៊កដានី កាលពីថ្ងៃអង្គារ បានទម្លាក់ជំនួយមនុស្សធម៌ទៅកាន់តំបន់ហ្កាហ្សា សម្រាប់ថ្ងៃទីពីរដែលជាផ្នែកនៃកិច្ចខិតខំប្រឹងប្រែងមនុស្សធម៌ចម្រុះជាតិរួមគ្នាដើម្បីកាត់បន្ថយវិបត្តិហ្កាហ្សា៕

ប្រទេសថៃ នឹងមើលឃើញកម្តៅឡើងខ្លាំង និងភ្លៀងធ្លាក់តិចនៅរដូវក្តៅនេះ

យោងតាមនាយកដ្ឋានឧតុនិយមថៃ (TMD) បានឱ្យដឹងថា ប្រទេសថៃគ្រោងនឹងទប់ទល់នឹងកម្ដៅដ៏ខ្លាំង ជាមួយនឹងទឹកភ្លៀងដែលបានព្យាករថាមានកម្រិត ២០ ភាគរយទាបជាងធម្មតាក្នុងរដូវក្តៅឆ្នាំនេះ ដោយសារតែគំរូអាកាសធាតុ អ៊ែលនីញ៉ូ។ប្រទេសអាស៊ីអាគ្នេយ៍មួយនេះបានឈានចូលរដូវកាលក្តៅរបស់ខ្លួនជាផ្លូវការកាលពីសប្តាហ៍មុន ដែលនឹងបន្តរហូតដល់ពាក់កណ្តាលខែឧសភា។ សីតុណ្ហភាពពេលថ្ងៃជាមធ្យមត្រូវបានគេរំពឹងថានឹងខ្ពស់ជាងឆ្នាំមុន ២ អង្សាសេ ខណៈសីតុណ្ហភាពនៅតំបន់ភាគឦសាន និងភាគខាងជើងអាចកើនឡើងដល់ ៤៤,៥ អង្សាសេ នេះបើយោងតាមទិន្នន័យដែលចេញផ្សាយដោយនាយកដ្ឋានឧតុនិយមថៃ នាពេលថ្មីៗនេះ។នាយកដ្ឋាននេះ បាននិយាយនៅក្នុងសេចក្តីថ្លែងការណ៍មួយថា រាជធានីបាងកក បានរាយការណ៍ពីកម្រិតគួរឱ្យព្រួយបារម្ភនៃសន្ទស្សន៍កម្ដៅនៅក្នុងស្រុកមួយចំនួនកាលពីថ្ងៃអង្គារ (២៧ កុម្ភៈ) ជាមួយនឹងការព្យាករណ៍ថានឹងឈានដល់កម្រិតខ្ពស់ដ៏គ្រោះថ្នាក់រហូតដល់ ៤៣,៦ អង្សាសេនៅថ្ងៃពុធនេះ មុនពេលលោតដល់ ៤៧,៥ អង្សាសេនៅថ្ងៃព្រហស្បតិ៍។អភិបាលក្រុងបាងកក លោក ឆាត់ឆាត ស៊ីធីភុន (Chadchart Sittipunt) បាននិយាយថា រដ្ឋបាលក្រុងបាងកក (BMA) បានចាត់វិធានការបង្ការ រួមទាំងការព្រមានសាធារណជនអំពីការកើនឡើងនៃសីតុណ្ហភាព ជាពិសេសហានិភ័យនៃជំងឺសុរិយរោគ ឬ ការថប់ដង្ហើមដោយសារកម្ដៅខ្ពស់ពេក ក្នុងចំណោមក្រុមមនុស្សងាយរងគ្រោះ៕

ក្រុមហ៊ួទី អាចវាយតម្លៃឡើងវិញនូវការវាយប្រហារនៅសមុទ្រក្រហម បើអ៊ីស្រាអែល បញ្ឈប់ការឈ្លានពាននៅហ្កាហ្សា

ក្រុមហ៊ួទីនៅប្រទេសយេម៉ែន បាននិយាយកាលពីថ្ងៃអង្គារថា ពួកគេអាចពិចារណាឡើងវិញនូវការវាយប្រហារដោយមីស៊ីល និងយានដ្រូនរបស់ពួកគេលើការដឹកជញ្ជូនអន្តរជាតិ នៅសមុទ្រក្រហម នៅពេលដែលអ៊ីស្រាអែល បញ្ចប់ «ការឈ្លានពាន»របស់ខ្លួន នៅក្នុងតំបន់ហ្កាហ្សាស្ទ្រីប។នៅពេលសួរថាតើពួកគេនឹងបញ្ឈប់ការវាយប្រហារដែរឬយ៉ាងណា ប្រសិនបើកិច្ចព្រមព្រៀងបទឈប់បាញ់ត្រូវបានឈានដល់ អ្នកនាំពាក្យក្រុមហ៊ួទី លោក ម៉ូហាមេដ អាប់ឌុលសាឡាម (Mohammed Abdulsalam) បានប្រាប់សារព័ត៌មានរ៉យទ័រថា ស្ថានភាព នឹងត្រូវបានវាយតម្លៃឡើងវិញ ប្រសិនបើការឡោមព័ទ្ធតំបន់ហ្កាហ្សា ត្រូវបានបញ្ចប់ ហើយជំនួយមនុស្សធម៌ អាចចូលបានដោយសេរីនោះ។លោកបានបញ្ជាក់ថា៖«វានឹងមិនមានការបញ្ឈប់ចំពោះប្រតិបត្តិការណាមួយដែលជួយប្រជាជនប៉ាឡេស្ទីន លើកលែងតែពេលដែលការឈ្លានពានរបស់អ៊ីស្រាអែលលើតំបន់ហ្កាហ្សា និងការឡោមព័ទ្ធ ត្រូវបានបញ្ឈប់ មុនពេលមានរបាយការណ៍ថ្មីនៃការវាយប្រហារផ្សេងទៀតដែលអាចកើតឡើងនោះ។ក្រុមហ៊ុនសន្តិសុខដែនសមុទ្រអង់គ្លេស Ambrey បាននិយាយនៅក្នុងសេចក្តីជូនដំណឹងមួយថា នាវាផ្ទុកយន្តហោះរបស់ក្រិកមានទង់ជាតិកោះ Marshall កាលពីថ្ងៃអង្គារ បានរាយការណ៍ថា មីស៊ីលមួយគ្រាប់ ត្រូវបានវាយប្រហារក្នុងទឹកចម្ងាយ ៣ម៉ាយ(ជាង៤គីឡូម៉ែត្រ)ពីនាវា ដែលស្ថិតនៅចម្ងាយ៦៣ម៉ាយ (១០១គីឡូម៉ែត្រ)ពីភាគពាយព្យនៃទីក្រុងហូដេដា( Hodeidah)ប្រទេសយេម៉ែន។ប្រតិបត្តិការពាណិជ្ជកម្មដែនសមុទ្ររបស់ចក្រភពអង់គ្លេស (UKMTO) ក៏បានជូនដំណឹងអំពីឧបទ្ទវហេតុនេះផងដែរ ដោយបន្ថែមថា ក្រុមនាវិក និងនាវា ត្រូវបានរាយការណ៍ថា មានសុវត្ថិភាព និងបន្តដំណើរទៅកាន់កំពង់ផែមួយទៀត។

អាមេរិក ព្រមានអំពីភាពតានតឹងកើនឡើងរវាងអ៊ីស្រាអែល និងក្រុមហេសបូឡា

ក្រសួងការបរទេសអាមេរិក បាននិយាយកាលពីថ្ងៃអង្គារថា សហរដ្ឋអាមេរិក មិនចង់ឃើញភាពតានតឹងកើនឡើងបន្ថែមទៀតរវាងអ៊ីស្រាអែល និងក្រុមហេសបូឡាទេ ដោយបន្ថែមថា អ៊ីស្រាអែល បានអះអាង ចំពោះក្រុងវ៉ាស៊ីនតោនថា ខ្លួនចង់បានដំណោះស្រាយការទូត។ថ្លែងនៅក្នុងសន្និសីទសារព័ត៌មានប្រចាំថ្ងៃ អ្នកនាំពាក្យក្រសួងការបរទេស លោក Matthew Miller បាននិយាយថា ប្រជាជនអ៊ីស្រាអែលរាប់ម៉ឺននាក់នៅភាគខាងជើង ប្រឈមមុខនឹងការគំរាមកំហែងផ្នែកសន្តិសុខដែលចាំបាច់ត្រូវដោះស្រាយ ហើយទីក្រុងវ៉ាស៊ីនតោន កំពុងបន្តផ្លូវការទូត ដើម្បីដោះស្រាយបញ្ហានេះ។លោក Miller បានបន្ថែមថា៖«យើងមិនចង់ឃើញភាគីណាមួយ បង្កើនជម្លោះ នៅភាគខាងជើងទេ។ រដ្ឋាភិបាលអ៊ីស្រាអែល បាននិយាយជាសាធារណៈ ហើយពួកគេ បានធានាចំពោះយើងជាលក្ខណៈឯកជនថា ពួកគេចង់សម្រេចបាននូវដំណោះស្រាយផ្លូវការទូត។ ដូច្នេះហើយ នោះជាអ្វីដែលយើងនឹងបន្ត ហើយទីបំផុតវានឹងធ្វើឲ្យសកម្មភាពយោធា មិនមានភាពចាំបាច់។ការអត្ថាធិប្បាយរបស់លោក បានកើតឡើងបន្ទាប់ពីក្រុមហេសបូឡា បាននិយាយថា ខ្លួនបានបាញ់គ្រាប់រ៉ុក្កែតទៅលើមូលដ្ឋានឃ្លាំមើលដែនអាកាសអ៊ីស្រាអែលកាលពីថ្ងៃអង្គារ ដើម្បីជាការឆ្លើយតបទៅនឹងការវាយប្រហារដ៏ជ្រៅបំផុតរបស់យោធាអ៊ីស្រាអែល មិនទាន់ចូលទឹកដីលីបង់។ ពុំទាន់មានសេចក្តីរាយការណ៍ភ្លាមៗអំពីអ្នកស្លាប់ដោយការបាញ់គ្រាប់រ៉ុក្កែតទាំងនោះទេ។

មនុស្សរាប់សិបនាក់ត្រូវបញ្ជូនទៅមន្ទីរពេទ្យ ក្រោយអគ្គិភ័យបានឆាបឆេះផ្សារដ៏ធំទី២នៅកណ្តាលក្រុង អឺបៀល របស់អ៊ីរ៉ាក់

អគ្គិភ័យដែលបានឆាបឆេះនៅផ្សារប្រវត្តិសាស្រ្ត ឡានហ្កា (Langa)ដែលជាផ្សារដ៏ធំទី២ នៅក្នុងទីក្រុងអឺបៀល(Erbil) របស់ប្រទេសអ៊ីរ៉ាក់ ត្រូវពន្លត់បានដោយជោគជ័យកាលពីល្ងាចថ្ងៃអង្គារ ដោយពុំមានសេចក្ដីរាយការណ៍ពីអ្នកស្លាប់នោះទេ។ អគ្គិភ័យដែលបានឆាបឆេះកាលពីវេលាម៉ោង៧និង៣០នាទីយប់ បណ្តាលឱ្យផ្សារនោះរងការខូចខាតយ៉ាងដំណំ។ទោះបីជាយ៉ាងណាក៏ដោយ ក្រុមការពារជនស៊ីវិលក្រុង អឺបៀល បានពន្លត់អណ្ដាតភ្លើងដោយជោគជ័យបន្ទាប់ពីការប្រឹងប្រែងដ៏ស្វិតស្វាញ។ លោក កាវ៉ាន មីរ៉ាវដេលី (Karwan Mirawdely)អ្នកនាំពាក្យរបស់ក្រុមការពារជនស៊ីវិលក្រុងអឺបៀល បានបញ្ជាក់ទៅកាន់សារព័ត៌មាន 964 ថាភ្លើងត្រូវបានពន្លត់ បន្ទាប់ពីការខិតខំប្រឹងប្រែងឆ្លើយតបយ៉ាងខ្លាំងក្លា។មូលហេតុនៃការឆេះនេះនៅមិនទាន់ដឹងនៅឡើយទេ ប៉ុន្តែមានការសន្និដ្ឋានថាអាចជាការឆ្លងចរន្តអគ្គិសនី ដែលអាចបណ្តាលមកពីខ្យល់កន្ត្រាក់ខ្លាំងនាពេលនោះ ។ប្រភពពីក្រុមការពារជនស៊ីវិលបានជូនដំណឹងដល់ប្រព័ន្ធផ្សព្វផ្សាយ 964 ថា អង្គភាពនិងយានជំនិះដែលមានទាំងអស់ត្រូវបានបញ្ជូនពីមូលដ្ឋានរបស់ពួកគេនៅទីក្រុងអឺបៀល ដើម្បីគ្រប់គ្រងស្ថានការណ៍។ អ្នកយកព័ត៌មានរបស់ប្រព័ន្ធផ្សព្វផ្សាយ964បាននៅនឹងកន្លែងកើតហេតុដោយផ្តល់ព័ត៌មានទាន់ហេតុការណ៍ រូបភាព និងវីដេអូអំពីអគ្គិភ័យ និងសកម្មភាពឆ្លើយតបអគ្គិភ័យនានា។ ក្រុមឆ្លើយតបបន្ទាន់បានប្រាប់ប្រព័ន្ធផ្សព្វផ្សាយ 964 ថាមនុស្សពី ២៥ ទៅ ៣០នាក់ត្រូវបានបញ្ជូនទៅមន្ទីរពេទ្យដោយសារតែការស្រូបផ្សែងនិងបញ្ហាផ្លូវដង្ហើម។ចំណែក លោក អូម៉េដ ខូស្នាវ (Omed Khoshnaw) អភិបាលក្រុងអឺបៀល បានបញ្ជាក់ថា ប្រជាពលរដ្ឋជាង២០នាក់ បានទទួលការព្យាបាល បន្ទាប់ពីឧបទ្ទវហេតុនេះ។ សេចក្តីរាយការណ៍បឋមបង្ហាញថា ហាងជាង ៥០ បានរងការខូចខាតក្នុងអគ្គិភ័យនេះ ខណៈកំពុងវាយតម្លៃបន្ថែមទៀតលើទំហំនៃការខូចខាតទាំងស្រុង៕

បណ្ដាញសង្គម

ព័ត៌មានថ្មីៗ

តំណាងរាស្រ្តខេត្តបន្ទាយមានជ័យ៖ ទោះបីមានការឈ្លានពានពីប្រទេសជិតខាង តែពលរដ្ឋកម្ពុជា នៅតែមានឱកាសធ្វើបុណ្យទានប្រកបដោយសទ្ធាជ្រះថ្លា

ឯកឧត្តម ឌី វិជ្ជា និងលោកជំទាវ ហ៊ុន ម៉ាណា អញ្ជើញកាន់បិណ្ឌទី៨ និងនាំយកទេយ្យវត្ថុប្រគេនវត្តចំនួន១៣វត្ត និងចែកអំណោយដល់យាយជីតាជី នៅខេត្តពោធិ៍សាត់

មន្រ្តីជាន់ខ្ពស់ធនាគារជាតិ៖ វិស័យធនាគារបានបន្តរក្សាលំនឹង និងមានសុខភាពល្អជាធម្មតា

លោកជំទាវ ចម និម្មល អញ្ជើញសំណេះសំណាល សួរសុខទុក្ខ និងនាំយកអំណោយជូននាយទាហាន នាយទាហានរង និងពលទាហាន នៃបញ្ជាការដ្ឋានកាំភ្លើងធំ កងទ័ពជើងគោក ក្នុងឱកាសពិធីបុណ្យភ្ជុំបិណ្ឌ

ប្រតិបត្តិការបង្ក្រាប Online Scam នៅប៉ោយប៉ែត ឃាត់ខ្លួនមនុស្សជិត៦០០នាក់

ប្រធានក្រុមការងាររាជរដ្ឋាភិបាលចុះមូលដ្ឋានស្រុកស្អាង និងកោះធំ អញ្ជើញជួបសំណេះសំណាល និងសួរសុខទុក្ខគ្រួសារវីរៈកងទ័ព និងគ្រួសារក្រីក្រក្នុងស្រុកស្អាង និងកោះធំ សរុប ១៨០០គ្រួសារ

ការនាំចេញអង្ករកម្ពុជាទៅកាន់ប្រទេសហ្វីលីពីន មានសន្ទុះខ្លាំង ខណៈការដឹកជញ្ជូនអង្ករចំនួន ២០.០០០តោនបានចាប់ផ្តើមចេញដំណើរហើយ

រដ្ឋមន្ត្រីសុខាភិបាល៖ ការតម្កល់សុខុមាលភាពរបស់ប្រជាពលរដ្ឋ គឺជាអាទិភាពចម្បងជានិច្ចរបស់រាជរដ្ឋាភិបាល

អតីតសមាជិកគណបក្សប្រឆាំង ចំនួន៣៩នាក់ សម្រេចចិត្តចូលរួមជីវភាពនយោបាយជាមួយគណបក្សប្រជាជនកម្ពុជា

នេប៉ាល់ប្រារព្ធពិធីរំឭកវិញ្ញាណក្ខន្ធជនរងគ្រោះ និងទាមទារភាពយុត្តិធម៌អាកាសធាតុ

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877