BTV NEWS

អ្នកនាំពាក្យ ៖ ស្ត្រីបើករថយន្តបង្កគ្រោះថ្នាក់ស្លាប់មន្ត្រីក្រសួងសាធារណការ នឹងត្រូវបញ្ជូនខ្លួនទៅតុលាការនៅព្រឹកស្អែក

ស្នងការនគរបាលរាជធានី ៖ ករណីស្ដ្រីបើករថយន្តបុកមនុស្សស្លាប់ ហើយគេចខ្លួន គឺជាករណីមនុស្សឃាតដោយអចេតនា ដែលសមត្ថកិច្ចអនុវត្តច្បាប់ស្មើៗគ្នា

អាជ្ញាធរខេត្តកោះកុងឃាត់ខ្លួនជនជាតិចិន១៣១នាក់ ក្នុងប្រតិបត្តិការបង្ក្រាបទីតាំង Online Scams ក្នុងស្រុកគិរីសាគរ

ឧត្តមសេនីយ៍ឯក ជួន ណារិន្ទ បញ្ជាឲ្យបើកការស្រាវជ្រាវ និងអនុវត្តវិធានការច្បាប់ ករណីយុវជនតាំងខ្លួនកូនខ្លាបង្កហិង្សានៅខណ្ឌចំការមន

សន្តិសុខ និង សង្គម

ក្រុមគ្រួសារ៖ សពរបស់លោក Alexei Navalny នឹងត្រូវតម្កល់រយៈពេល ២សប្តាហ៍ ដើម្បី «វិភាគជីវសាស្ត្រ»

មានការរាយការណ៍ថា ក្រុមគ្រួសាររបស់លោក Alexei Navalny ដែលជាអ្នករិះគន់ចំពោះលោក Vladimir Putin និងដែលបានស្លាប់នៅក្នុងពន្ធនាគាររុស្សីនោះ ត្រូវបានប្រាប់ថា សាកសពរបស់លោក នឹងមិនត្រូវបានឲ្យយកចេញនោះឡើយ ក្នុងរយៈពេល ២សប្តាហ៍។អ្នកតំណាងឲ្យលោក Navalny បាននិយាយថា ម្តាយរបស់សពត្រូវបានជូនដំណឹងថា សពនឹងត្រូវតម្កល់ទុកសិន ដើម្បី «វិភាគជីវសាស្ត្រ»។ តែមិនទាន់មានការបញ្ជាក់ពីទីកន្លែងតម្កល់សពពីអាជ្ញាធររុស្ស៊ីនៅឡើយទេ ខណៈដែលការព្យាយាមស្វែងរកទីតាំងម្តងហើយម្តងទៀតមិនទទួលបានផល។ ភរិយារបស់អតីតមេដឹកនាំគណបក្សប្រឆាំងរុស្ស៊ីរូបនេះ បានចោទប្រកាន់អាជ្ញាធរថា បានលាក់បាំងសពស្វាមីរបស់ខ្លួន។ក្នុងវីដេអូមួយ កាលពីថ្ងៃចន្ទ (ទី១៩ ខែកុម្ភៈ) ដោយប្តេជ្ញាបន្តការងាររបស់ស្វាមីខ្លួន ក្នុងការប្រយុទ្ធដើម្បី «ឲ្យប្រទេសរុស្ស៊ីមានសេរីភាព» នោះ លោកស្រី Yulia Navalnaya បានចោទប្រកាន់ដោយផ្ទាល់ទៅលើប្រធានាធិបតីរុស្ស៊ីលោក Putin ថា បានសម្លាប់ស្វាមីរបស់លោកស្រី។ លោកស្រីក៏បានចោទប្រកាន់ដែរថា សពស្វាមីរបស់លោកស្រី ត្រូវបានគេរក្សាទុករហូតដល់ស្លាកស្នាមនៃការបំពុលដោយសារធាតុពាក់ព័ន្ធនឹងប្រព័ន្ធប្រសាទ Novichok បានរលាយបាត់។សូមបញ្ជាក់ថា មរណភាពរបស់លោក Navalny នៅក្នុងពន្ធនាគារ ត្រូវបានប្រកាសកាលពីថ្ងៃសុក្រសប្ដាហ៍កន្លមក។ អាជ្ញាធរនៅមន្ទីរឃុំឃាំងស៊ីបេរី ជាកន្លែងដែលលោកត្រូវបានឃុំខ្លួននោះ បាននិយាយថា អ្នកទោសមិនអាចដឹងខ្លួនវិញឡើយ បន្ទាប់ពីបានដួល ក្រោយដើរលេងក្នុងពន្ធនាគារនោះ។ម្តាយ និងមេធាវីរបស់សព បានធ្វើដំណើរទៅកាន់កន្លែងឃុំឃាំងដាច់ស្រយាលនោះភ្លាមៗ នៅពេលដែលព័ត៌មាននៃការស្លាប់របស់អ្នកទោសរូបនោះបានលេចឡើង។ ការព្យាយាមរកទីតាំងតម្កល់សព ត្រូវបានរារាំងបិទបាំងម្ដងហើយម្ដងទៀត ពីសំណាក់អាជ្ញាធរ នៅកន្លែងបញ្ចុះសពពន្ធនាគារ និងមូលដ្ឋាន៕

អង្គការសហប្រជាជាតិ ព្រមានពីភាពអត់ឃ្លានកាន់តែធ្ងន់ធ្ងរ នៅស៊ូដង់ និងហួសពីនេះ ក្នុងពេលមានគម្លាតមូលនិធិ

មនុស្សយ៉ាងហោចណាស់២៥លាននាក់ នៅទូទាំងប្រទេសស៊ូដង់ ស៊ូដង់ខាងត្បូង និងប្រទេសឆាដ កំពុងជួបបញ្ហាជាមួយនឹងការកើនឡើងភាពអត់ឃ្លាន និងកង្វះអាហារូបត្ថម្ភ ខណៈវិបត្តិនៅក្នុងប្រទេសស៊ូដង់ បានបញ្ជូនរលកដ៏ព្រួយបារម្ភនៅជុំវិញតំបន់។លោក Stephane Dujarric អ្នកនាំពាក្យរបស់អគ្គលេខាធិការអង្គការសហប្រជាជាតិ លោក Antonio Guterres បាននិយាយនៅក្នុងសន្និសីទសារព័ត៌មានថា ផលប៉ះពាល់ជាបន្តបន្ទាប់នៃអស្ថិរភាពនៅប្រទេសស៊ូដង់ ដែលអាចមើលឃើញ ដោយបុគ្គលិកកំពុងភៀសខ្លួនទៅកាន់ប្រទេសស៊ូដង់ខាងត្បូង និងប្រទេសឆាដ ដែលនៅជិតខាង «ភាពអត់ឃ្លាន និងការមកដល់នៃជនភៀសខ្លួន ដោយគ្មានធនធាន»។ លោក Dujarric បាននិយាយថា ដោយសារតែគម្លាតការផ្តល់មូលនិធិរាប់រយលានដុល្លារអាមេរិក កម្មវិធីស្បៀងអាហារពិភពលោក (WFP) បានចេញការព្រមានយ៉ាងខ្លាំងអំពីស្ថានភាពដ៏អាក្រក់នេះ ដោយលោក Dujarric បាននិយាយថា ការសម្រេចចិត្តដ៏លំបាករបស់កម្មវិធីស្បៀងអាហារពិភពលោក(WFP) ក្នុងការផ្តល់អាទិភាពដល់ធនធានដែលខ្វះខាតចំពោះអ្នកមកដល់ថ្មី មានន័យថា ជនភៀសខ្លួនដែលមានស្រាប់លែងពីពេលមុនលែងទទួលបានជំនួយទៀតហើយ ដែលជាសកម្មភាពមួយបង្ហាញយ៉ាងច្បាស់ពីការពិតដ៏អាក្រក់នៃការចែកចាយជំនួយក្នុងគ្រាមានវិបត្តិ។ លោក Dujarric បាននិយាយថា ការព្រមានរបស់អង្គការសហប្រជាជាតិអំពីស្ថានភាពមនុស្សធម៌ក្នុងប្រទេសស៊ូដង់ បានបញ្ជាក់ពីភាពបន្ទាន់ដោយ ប្រជាជន ១៨ លាននាក់ ជួបអសន្តិសុខស្បៀងធ្ងន់ធ្ងរនៅក្នុងប្រទេស ដែលពួកគេភាគច្រើន ជាប់គាំងដំណើរនៅក្នុងតំបន់នៃការប្រយុទ្ធយ៉ាងសកម្ម។ ទីភ្នាក់ងារនានា ត្រូវការមធ្យោបាយដើម្បី ផ្តល់ការគាំទ្រដល់ក្រុមគ្រួសារនៅក្នុងប្រទេសស៊ូដង់ ដើម្បីបញ្ចៀស មហន្តរាយនៃភាពអត់ឃ្លាន។

ភ្លៀងធ្លាក់ខ្លាំងវាយប្រហាររដ្ឋកាលីហ្វ័រនីញ៉ា ដោយពលរដ្ឋរាប់លាននាក់ស្ថិតក្រោមការព្រមានពីទឹកជំនន់

ភ្លៀងធ្លាក់ខ្លាំងជុំថ្មី បានបោកបក់ទៅលើផ្នែកធំៗនៃរដ្ឋកាលីហ្វ័រនីញ៉ាភាគខាងត្បូង កាលពីថ្ងៃចន្ទ ហើយប្រជាជនរហូតដល់ ៣៧លាននាក់ ស្ថិតនៅក្រោមការព្រមានអំពីទឹកជំនន់។យោងតាមអង្គភាពសេវាអាកាសធាតុជាតិសហរដ្ឋអាមេរិក (NWS) បានឲ្យដឹងថា ប្រព័ន្ធសម្ពាធទាប នៅក្នុងមហាសមុទ្រប៉ាស៊ីហ្វិក កំពុងនាំមកសំណើមនៅលើឆ្នេរសមុទ្រក្នុងរដ្ឋកាលីហ្វ័រនីញ៉ា បណ្តាលឱ្យមានភ្លៀង និងព្រិលធ្លាក់ខ្លាំងនៅតំបន់ភ្នំ ។ការព្រមានអំពីទឹកជំនន់ភ្លាមៗ ត្រូវបានចេញកាលពីថ្ងៃចន្ទ សម្រាប់តំបន់នៅរដ្ឋកាលីហ្វ័រនីញ៉ា ភាគខាងត្បូង រួមមានតំបន់ Santa Barbara និង Ventura ជាកន្លែងដែលភ្លៀងធ្លាក់ពី ២ ទៅ ៥ អ៊ីង ។ទីភ្នាក់ងារដឹកជញ្ជូនរបស់រដ្ឋកាលីហ្វ័រនីញ៉ា បានរាយការណ៍ថា ផ្លូវជាច្រើនខ្សែនៅទូទាំងរដ្ឋ ត្រូវបានបិទដោយសារតែទឹកជំនន់ និងបំណាក់ដី។ អង្គភាពសេវាអាកាសធាតុជាតិ បានឱ្យដឹងថា ព្យុះផ្គររន្ទះដ៏ខ្លាំង ដែលនាំមកដោយសន្ទុះខ្យល់ដ៏បំផ្លាញ រួមទាំងព្យុះកំណាចរយៈពេលខ្លី អាចកើតមានឡើងនៅពេលរសៀល និងពេលល្ងាច។តំបន់នានាដែលមានភ្លៀងធ្លាក់ និងផ្គររន្ទះ នៅតែបន្តកើតឡើងឆ្ពោះទៅភាគខាងជើង ឆ្លងកាត់ផ្នែកជាច្រើននៅរដ្ឋកាលីហ្វ័រញ៉ាភាគខាងជើង និងភាគកណ្តាល ។រដ្ឋកាលីហ្វ័រនីញ៉ា បានជួបប្រទះគ្រោះរាំងស្ងួតធ្ងន់ធ្ងរក្នុងសតវត្សរ៍នេះ រហូតដល់របត់សំណើមបរិយាកាសទន្លេកាលពីឆ្នាំមុន ដែលមានភ្លៀង និងព្រិលធ្លាក់ខ្លាំងក្នុងប្រវត្តិសាស្ត្រ។ អ្នកជំនាញរំពឹងថា នឹងមានឆ្នាំសំណើមមួយទៀតនៅឆ្នាំ ២០២៤នេះ ប៉ុន្តែមានសីតុណ្ហភាពកាន់តែក្តៅ នៅពីក្រោយការធ្លាក់ព្រិល។

ជម្លោះនៅសាធារណរដ្ឋកុងហ្គោកាន់តែខ្លាំងឡើង បានកាត់ផ្តាច់ការផ្គត់ផ្គង់ស្បៀងអាហារ

នេះគឺជាទីផ្សារតូចមួយនៅទីក្រុង Kituku នៅលើច្រាំងនៃបឹង Kivu នៃសាធារណរដ្ឋប្រជាធិបតេយ្យកុងហ្គោ។ បច្ចុប្បន្ននេះ វាជាប្រភពអាហារដ៏សំខាន់សម្រាប់មនុស្សជាងពីរលាននាក់ រួមទាំងអ្នកដែលបានភៀសខ្លួនចេញពីអំពើហិង្សានៅភាគខាងកើតរបស់ប្រទេស។ បញ្ហានេះ វាបានកើតឡើង បន្ទាប់ពីជម្លោះកាន់តែខ្លាំងឡើងរវាងកងទ័ព និងក្រុមឧទ្ទាម ដែលបានបង្អាក់ការផ្គត់ផ្គង់ដល់ទីក្រុង Goma ភាគខាងកើត។ ផ្លូវជាច្រើនខ្សែត្រូវបានកាត់ផ្តាច់ ដែលបានបន្សល់ទុកឲ្យប្រជាជនដូចជាអ្នកលក់ចេក នាង Nyota ត្រូវពឹងផ្អែកលើការផ្គត់ផ្គង់តិចតួច ដែលចូលមកដល់ទីក្រុង Kituku តាមរយៈទូក។ នាង Nyota ព្រួយបារម្ភពីទុរ្ភិក្សដែលជិតមកដល់ ប្រសិនបើស្ថានភាពនេះនៅតែបន្ត។ អាជ្ញាធររបស់ប្រទេស ត្រូវតែធ្វើអ្វីៗគ្រប់យ៉ាងក្នុងអំណាចរបស់ពួកគេដើម្បីបញ្ចប់សង្រ្គាម។ វាប្រាកដណាស់ថា បន្ទាប់ពីសង្គ្រាម អ្វីៗនឹងល្អប្រសើរ។ ពួកគេត្រូវតែធ្វើអ្វីគ្រប់យ៉ាងដើម្បីបញ្ចប់សង្រ្គាមនេះ។ ការប៉ះទង្គិចគ្នានៅតាមក្រុង និងភូមិនានា ជុំវិញទីរួមខេត្ត បានកើនឡើងតាំងពីដើមឆ្នាំមក។ ខណៈក្រុមឧទ្ទាម M23 បានដណ្តើមយកទឹកដី មនុស្សរាប់ពាន់នាក់បានស្វែងរកទីជ្រកកោនក្នុងទីក្រុង Goma។ យោងតាមទីភ្នាក់ងារជនភៀសខ្លួនរបស់អង្គការសហប្រជាជាតិបានឱ្យដឹងថា មនុស្សប្រហែល ១៣៥.០០០នាក់ បានភៀសខ្លួនចេញពីទីក្រុង សាកេ(Sake) ក្នុងសប្តាហ៍កន្លងទៅនេះ។ ទីភ្នាក់ងារអង្គការសហប្រជាជាតិ បានព្រមានថា ជម្លោះ រួមទាំងការបំផ្ទុះគ្រាប់បែកមិនរើសមុខ ហានិភ័យធ្វើឱ្យមានភាពតានតឹងកាន់តែខ្លាំងឡើងលើធនធានដែលមានកម្រិតរួចទៅហើយ ដើម្បីផ្គត់ផ្គង់លំហូរចូល។ក្រុមអ្នកតវ៉ា បានចេញធ្វើបាតុកម្មក្នុងទីក្រុង Goma កាលពីថ្ងៃចន្ទ ទី១៩ ខែកុម្ភៈ ប្រឆាំងក្រុមឧទ្ទាមដែលកើតមានឡើងវិញ។ រដ្ឋាភិបាលប្រទេសកុងហ្គោ មន្ត្រីអង្គការសហប្រជាជាតិ និងប្រទេសមហាអំណាចលោកខាងលិច បានចោទប្រកាន់ប្រទេសរវ៉ាន់ដាថា បានគាំទ្រ ក្រុមឧទ្ទាម M23 ដែលអះអាងថាការពារផលប្រយោជន៍ជនជាតិភាគតិច Tutsi ប្រឆាំងកងជីវពល Hutu ដែលមេដឹកនាំរបស់ពួកគេ បានចូលរួមក្នុងអំពើប្រល័យពូជសាសន៍នៅរវ៉ាន់ដា ឆ្នាំ ១៩៩៤។

បំណាក់ដីបង្ករដោយព្រិលធ្លាក់ខ្លាំង បណ្តាលឲ្យមនុស្ស២៥នាក់ស្លាប់នៅអាហ្វហ្គានីស្ថាន

មន្ត្រីក្នុងតំបន់បាននិយាយថា យ៉ាងហោចណាស់មនុស្ស ២៥នាក់បានស្លាប់ និងជាច្រើននាក់ផ្សេងទៀតបានរងរបួស កាលពីយប់ថ្ងៃអាទិត្យ ទី១៨ ខែ កុម្ភៈ នៅពេលដែលបំណាក់ដីដែលបង្កឡើងដោយព្រិលធ្លាក់យ៉ាងគំហុក នៅភូមិ Mokani ទីក្រុងន័រហ្គារ៉ាម(Nurgaram) ភាគខាងកើតប្រទេសអាហ្វហ្គានីស្ថាន។វីដេអូរបស់សារព័ត៌មាន Reuters បានបង្ហាញអ្នកភូមិជាច្រើន សែងសាកសព ហើយលំនៅឋានច្រើនខ្នងដែលគ្របដណ្តប់ដោយព្រិល ត្រូវបានកប់ក្រោមបំណាក់ដី។ប្រធានព័ត៌មាន និងវប្បធម៌ ខេត្ត Nuristan លោក Sami al-Haq Bayan បានប្រាប់សារព័ត៌មានរ៉យទ័រ ថា ក្រុមសង្គ្រោះបន្ទាន់ ត្រូវបានបញ្ជូនចេញទៅជួយសង្គ្រោះមនុស្ស ដែលជាប់នៅក្រោមគំនរបាក់បែក។យោងតាមប្រធានព័ត៌មានខេត្ត បានឲ្យដឹងថា លំនៅឋាន ២៥ខ្នង ត្រូវបានបំផ្លាញ។ខេត្ត Nuristan មានព្រំប្រទល់ជាប់ប្រទេសប៉ាគីស្ថាន ភាគច្រើនគ្របដណ្តប់ដោយព្រៃភ្នំ។ មន្ត្រីខេត្ត បាននិយាយថាព្រិល បានរារាំងដល់កិច្ចប្រឹងប្រែងជួយសង្រ្គោះ ហើយដោយសារតែពពកនិងភ្លៀង ឧទ្ធម្ភាគចក្រ ពុំអាចចុះចតនៅក្នុងខេត្ត Nuristan នេះ បានទេ ហើយព្រិល បានបិទផ្លូវធំមួយកន្លែងចូលទៅកាន់ខេត្តនេះ ធ្វើឲ្យប្រតិបត្តិការជួយសង្គ្រោះ ជួបការលំបាក។

ត្រាក់ទ័ររាប់រយគ្រឿងបើកចូលទីក្រុងប្រាក់ ខណៈក្រុមកសិករសាធារណរដ្ឋឆែក រួមគ្នាតវ៉ាប្រឆាំងតម្លៃថាមពលខ្ពស់និងច្បាប់បៃតង

ក្រុមប្រជាកសិករសាធារណរដ្ឋឆែករាប់រយនាក់ បានបើកត្រាក់ទ័ររបស់ពួកគេចូលទៅក្នុងទីក្រុងប្រាក់(Prague) កាលពីថ្ងៃចន្ទទី១៩ខែកុម្ភៈ បណ្ដាលឲ្យកកស្ទះចរាចរណ៍នៅខាងក្រៅក្រសួងកសិកម្ម ខណៈពួកគេបានរួមគ្នាតវ៉ាប្រឆាំងនឹងការហក់ឡើងខ្ពស់នៃតម្លៃថាមពល ការិយាធិបតេយ្យឬប្រព័ន្ធគ្រប់គ្រងសាំញ៉ាំរបស់រដ្ឋ និងកិច្ចព្រមព្រៀងបៃតង Green Deal ឬកិច្ចព្រមព្រៀងបរិស្ថានរបស់សហភាពអឺរ៉ុប។ ក្រុមប្រជាកសិករទូទាំងអឺរ៉ុប បានចេញតវ៉ាតាមដងផ្លូវនានានៅឆ្នាំនេះ រួមទាំងប្រទេសប៉ូឡូញ បារាំង អាល្លឺម៉ង់ អេស្ប៉ាញ និងអ៊ីតាលីជាដើម ដើម្បីប្រឆាំងទៅនឹងអ្វីដែលពួកគេនិយាយថា ការលក់ផលិតផលកសិកម្មរបស់ខ្លួនមានតម្លៃទាប ការចំណាយលើជីវភាពរស់នៅប្រចាំថ្ងៃនៅលើទីផ្សារមានតម្លៃខ្ពស់ ការនាំចូលទំនិញពីប្រទេសក្រៅមានតម្លៃទាប និងការមិនស្មើរបស់សហភាពអឺរ៉ុបលើបញ្ហាបម្រែបម្រួលអាកាសធាតុ។ ក្រុមប្រជាកសិករសាធារណរដ្ឋឆែក គ្រោងចូលរួមការតវ៉ាជាបន្តបន្ទាប់នៅសប្ដាហ៍នេះ ទោះបីជាសហគមកសិកម្មធំៗដកខ្លួនចេញឆ្ងាយពីការតវ៉ាកាលពីថ្ងៃចន្ទក៏ដោយ ដោយមានត្រាក់ទ័រជាច្រើនគ្រឿង បានបិទផ្លូវសំខាន់មួយទៅកាន់ទីក្រុងប្រាក់ ប៉ុន្តែពុំបង្ហាញបង្កឲ្យកកស្ទះចរារចណ៍ខ្លាំងទេ។ មនុស្សរាប់រយនាក់ផ្លុំកញ្ចែ ហើយក្រុមបាតុការផ្សេងទៀត បានប្រមូលផ្ដុំគ្នានៅខាងក្រៅក្រសួងកសិកម្ម។ក្រុមអ្នករៀបចំការតវ៉ា គ្រោងនឹងចូលរួមការតវ៉ាជាមួយក្រុមប្រជាកសិករអឺរ៉ុបផ្សេងទៀត នៅច្រកឆ្លងកាត់ព្រំដែននានានៅថ្ងៃព្រហស្បតិ៍ទី២២ខែកុម្ភៈសប្ដាហ៍នេះ ហើយការតវ៉ានោះដែរ នឹងមិនមែនជាផ្នែកមួយនៃការតវ៉ាដោយការបើកត្រាក់ទ័រនោះទេ៕

មនុស្ស ១២នាក់បានស្លាប់ នៅក្នុងការបាញ់ប្រហារនៅភាគខាងជើងម៉ិកស៊ិក ជិតព្រំដែនរដ្ឋតិចសាស់

អាជ្ញាធរម៉ិកស៊ិក បាននិយាយកាលពីយប់ថ្ងៃអាទិត្យ (១៨ កុម្ភៈ) ថាមនុស្សយ៉ាងហោចណាស់ ១២ នាក់បានស្លាប់នៅក្នុងការបាញ់ប្រហារមួយជាមួយកងកម្លាំងសន្តិសុខនៅភាគខាងជើងប្រទេសម៉ិកស៊ិក នៅជិតព្រំដែនជាមួយសហរដ្ឋអាមេរិក។ទីភ្នាក់ងារសន្តិសុខរបស់រដ្ឋ តាម៉ាវលីប៉ាស (Tamaulipas) បាននិយាយនៅក្នុងសេចក្តីថ្លែងការណ៍មួយចេញផ្សាយនៅលើបណ្ដាញសង្គម X ថាក្រុមទាហានកំពុងល្បាតនៅក្នុងក្រុង មីហ្គែល អាឡេម៉ាន (Miguel Aleman) តាមបណ្តោយព្រំដែនរដ្ឋតិចសាស់ (Texas) នៅពេលដែលពួកគេត្រូវបានវាយប្រហារដោយ «ជនស៊ីវិលប្រដាប់អាវុធ»។ទីភ្នាក់ងារនេះមិនបានឆ្លើយតបនឹងសំណួរថាតើមានទាហានណាម្នាក់ត្រូវបានសម្លាប់ ឬរងរបួសក្នុងការបាញ់ប្រហារនោះ ឬយ៉ាងណាទេ។ ក្រុមអាជ្ញាធរបាននិយាយថា រដ្ឋ តាម៉ាវលីប៉ាស មានក្រុមឧក្រិដ្ឋកម្មជាច្រើន ដែលសកម្មភាពសំខាន់ៗរបស់ពួកគេរួមមានការរត់ពន្ធមនុស្ស និងការជួញដូរគ្រឿងញៀនជាដើម៕

កោះតៃវ៉ាន់៖ កងឆ្មាំល្បាតឆ្នេរចិន បង្កឱ្យមានការភ័យស្លន់ស្លោក្នុងទូកទេសចរណ៍តៃវ៉ាន់

រដ្ឋមន្ត្រីកោះតៃវ៉ាន់បាននិយាយនៅថ្ងៃអង្គារ (២០ កុម្ភៈ) នេះថាការឡើងទូកទេសចរណ៍របស់កោះតៃវ៉ាន់ ដោយកងឆ្មាំល្បាតឆ្នេររបស់ប្រទេសចិន បានបង្កឱ្យមានការភ័យស្លន់ស្លោយ៉ាងខ្លាំងក្នុងចំណោមប្រជាជនតៃវ៉ាន់។ឆ្មាំល្បាតឆ្នេរតៃវ៉ាន់បាននិយាយថា មន្ត្រីឆ្មាំល្បាតឆ្នេរចិនចំនួនប្រាំមួយនាក់ កាលពីថ្ងៃចន្ទ បានឡើងលើទូកទេសចរណ៍តៃវ៉ាន់ដែលដឹកសមាជិកនាវិក ១១ នាក់និងអ្នកដំណើរ ២៣ នាក់ដើម្បីពិនិត្យមើលផែនការផ្លូវធ្វើដំណើរ វិញ្ញាបនបត្រ និងអាជ្ញាប័ណ្ណនាវិក ហើយប្រហែលកន្លះម៉ោងក្រោយមកទើបចាកចេញ។លោកស្រី ខ្វ័ន ពីលីង (Kuan Bi-ling) ប្រធានក្រុមប្រឹក្សាកិច្ចការសមុទ្រកោះតៃវ៉ាន់បានប្រាប់អ្នកយកព័ត៌មាននៅខាងក្រៅសភាក្នុងទីក្រុងតៃប៉ិ នៅថ្ងៃអង្គារថា «យើងគិតថាវាបានធ្វើឱ្យប៉ះពាល់ដល់អារម្មណ៍ប្រជាជនរបស់យើង និងបង្កឱ្យមានការភ័យស្លន់ស្លោយ៉ាងខ្លាំងដល់ប្រជាជន»។ប្រទេសចិន បានប្រកាសកាលពីថ្ងៃអាទិត្យ ថាឆ្មាំល្បាតឆ្នេររបស់ខ្លួននឹងចាប់ផ្តើមល្បាតជាប្រចាំ និងបង្កើតសកម្មភាពអនុវត្តច្បាប់នៅជុំវិញកោះ គីនមិន (Kinmen) ដែលគ្រប់គ្រងដោយតៃវ៉ាន់ បន្ទាប់ពីការស្លាប់របស់ជនជាតិចិនពីរនាក់ ដែលរត់គេចខ្លួនចេញពីឆ្មាំល្បាតឆ្នេរកោះតៃវ៉ាន់ ដោយសារបានចូលទៅជិតដែនទឹកកោះ គីនមិន ពេក៕

អ្នកជំនាញUNថ្កោលទោសការប្រហារជីវិត និងការរំលោភផ្លូវភេទដោយទាហានអ៊ីស្រាអែល នៅក្នុងរបាយការណ៍គួរឲ្យទុកចិត្តបាន

ក្រុមអ្នកជំនាញសិទ្ធិមនុស្សរបស់អង្គការសហប្រជាជាតិ បានថ្កោលទោសយោធាអ៊ីស្រាអែល កាលពីថ្ងៃចន្ទចំពោះការចោទប្រកាន់អំពីការប្រហារជីវិត និងការរំលោភផ្លូវភេទលើជនជាតិប៉ាឡេស្ទីន នៅក្នុងតំបន់ ហ្កាហ្សា។អ្នកជំនាញឯករាជ្យដែលមានទំនាក់ទំនងជាមួយក្រុមប្រឹក្សាសិទ្ធិមនុស្សរបស់អង្គការសហប្រជាជាតិ បាននិយាយថា ការចោទប្រកាន់នេះ គឺជា «ការរំលោភសិទ្ធិមនុស្សដ៏ធ្ងន់ធ្ងរ» ដោយបន្ថែមការរិះគន់លើកិច្ចខិតខំប្រឹងប្រែងសង្គ្រាមអ៊ីស្រាអែលនៅតំបន់ហ្កាហ្សា ខណៈដែលយោធារបស់ខ្លួន ត្រូវបានគេរាយការណ៍ថា កំពុងរៀបចំវាយលុកថ្មើរជើងលើទីក្រុងរ៉ាហ្វា(Rafah)។ជាពិសេស ក្រុមអ្នកជំនាញ បាននិយាយថា ពួកគេមានការភ្ញាក់ផ្អើលចំពោះរបាយការណ៍នៃ «ការកំណត់គោលដៅដោយចេតនា និងការសម្លាប់ក្រៅប្រព័ន្ធតុលាការ» លើស្ត្រី និងកុមារប៉ាឡេស្ទីន នៅតំបន់ហ្កា ហ្សា ដោយទាហានអ៊ីស្រាអែល រួមទាំងអ្នកដែលកាន់ក្រណាត់ស ឬរត់គេចខ្លួន។ពួកគេ ក៏បានថ្កោលទោស «ការឃុំខ្លួនដោយបំពាន» លើស្ត្រី និងកុមារប៉ាឡេស្ទីនរាប់រយនាក់ជាមួយនឹង «ការធ្វើបាបដ៏អមនុស្សធម៌ និងថោកទាប» រួមទាំងគ្មានការផ្គត់ផ្គង់ថ្នាំពេទ្យ និងស្បៀងអាហារ។ក្រុមអ្នកជំនាញបានបញ្ជាក់ថា៖«យើងមានការព្រួយចិត្តជាខ្លាំងចំពោះរបាយការណ៍ដែលថាស្ត្រី និងក្មេងស្រីប៉ាឡេស្ទីននៅក្នុងការឃុំឃាំង ក៏ត្រូវបានទទួលរងនូវការរំលោភផ្លូវភេទជាច្រើនទម្រង់ផងដែរ ដូចជាត្រូវបានដោះអាវអាក្រាត និងស្វែងរកដោយមន្ត្រីយោធាអ៊ីស្រាអែលជាបុរស។ «យ៉ាងហោចណាស់អ្នកជាប់ឃុំជនជាតិប៉ាឡេស្ទីនពីរនាក់ ត្រូវបានគេរាយការណ៍ថា ត្រូវបានគេចាប់រំលោភ ខណៈពេលដែលអ្នកផ្សេងទៀត ត្រូវបានគេរាយការណ៍ថា ត្រូវបានគំរាមកំហែងដោយការចាប់រំលោភ និងអំពើហិង្សាផ្លូវភេទ»។

ទីស្នាក់ការ UNRWA ដែលត្រូវបានបំផ្លាញនៅហ្កាហ្សា ជាការរំលឹកដ៏ឈឺចាប់សម្រាប់ជនភៀសខ្លួនប៉ាឡេស្ទីន

ទីស្នាក់ការកណ្តាលនៃទីភ្នាក់ងារជំនួយ និងការងាររបស់អង្គការសហប្រជាជាតិ សម្រាប់ជនភៀសខ្លួនប៉ាឡេស្ទីន (UNRWA) ក្នុងទីក្រុងហ្កាហ្សា ដែលត្រូវបានបោះបង់ចោល និងត្រូវបំផ្លាញ ឈរជាការរំលឹកយ៉ាងច្បាស់អំពីកម្រិតនៃការបំផ្លិចបំផ្លាញ និងការផ្លាស់ទីលំនៅដែលពលរដ្ឋហ្កាហ្សា បានទទួលរងក្នុងអំឡុងពេលការវាយលុករបស់យោធារបស់អ៊ីស្រាអែល លើតំបន់ប្រយុទ្ធមួយនេះ។ថ្វីត្បិតតែបរិវេណនេះមានឋានៈជាអន្តរជាតិ និងតួនាទីជាជម្រកកំឡុងពេលមានជម្លោះក៏ដោយ ទីស្នាក់ការនេះត្រូវបានលុកលុយដោយកងទ័ពអ៊ីស្រាអែល អមដោយរថក្រោះ និងគ្រឿងឈូសឆាយ។ ប្រជាជនប៉ាឡេស្ទីនរាប់សិបម៉ឺននាក់ដែលភៀសខ្លួនចេញពីកន្លែងផ្សេងទៀតនៃតំបន់ហ្កាហ្សា ធ្លាប់បានជ្រកកោននៅក្នុងបរិវេណនោះមុនពេលដែលកងទ័ពអ៊ីស្រាអែល បានចូលកាន់កាប់។ភាគីអ៊ីស្រាអែល បានធ្វើការចោទប្រកាន់យ៉ាងធ្ងន់ធ្ងរប្រឆាំងនឹងទីភ្នាក់ងារជំនួយប៉ាឡេស្ទីន UNRWA ដោយអះអាងថា បុគ្គលិករបស់ទីភ្នាក់ងារនេះបានជាប់ពាក់ព័ន្ធក្នុងការវាយប្រហារទ្រង់ទ្រាយធំរបស់ពួកហាម៉ាស លើអ៊ីស្រាអែល ដែលបានធ្វើឡើងកាលពីថ្ងៃទី០៧ ខែតុលា ឆ្នាំមុន ហើយថាក្រុមហាម៉ាស មានផ្លូវរូងក្រោមដីរត់នៅក្រោមបរិវេណនេះ ហើយបានទទួលការផ្គត់ផ្គង់ថាមពលដែលផ្តល់ពីអគារអង្គការសហប្រជាជាតិនៅខាងលើនោះផងដែរ។ជាការឆ្លើយតបទៅនឹងការចោទប្រកាន់របស់អ៊ីស្រាអែល ប្រទេសលោកខាងលិចមួយចំនួនបានកាត់ផ្តាច់ការផ្តល់មូលនិធិដល់ទីភ្នាក់ងារជំនួយ UNRWA ដែលរួមចំណែកដល់មហន្តរាយមនុស្សធម៌ ដែលកំពុងកើតមានរួចទៅហើយនៅក្នុងតំបន់ហ្កាហ្សា៕

បណ្ដាញសង្គម

ព័ត៌មានថ្មីៗ

ប្រជាកសិករចិញ្ចឹមឃ្មុំនៅតំបន់ហ្កាហ្សា ពិបាកស្តាឡើងវិញ ក្រោយសង្រ្គាមបំផ្លិចបំផ្លាញបង្គងរបស់ពួកគេ

ឆ្អឹងសត្វដំរីម៉ាំម៉ុតបុរាណ ត្រូវបានរកឃើញនៅប៊ុលហ្គារី ក្រោយកម្រិតទឹកទន្លេ Danube ស្រកទាបជាប់កំណត់ត្រា

អាល្លឺម៉ង់មានអ្នកស្លាប់ទាក់ទងនឹងកម្ដៅជិត ១០.០០០នាក់ នៅពាក់កណ្តាលខែកក្កដា

ក្រុមលើកលែងទោស៖ ការលក់អាវុធឥណ្ឌាឲ្យអ៊ីស្រាអែល ជាហានិភ័យនៃការជាប់ពាក់ព័ន្ធក្នុងអំពើប្រល័យពូជសាសន៍ហ្កាហ្សា

ភាគពាយ័ព្យចិនប្រុងប្រយ័ត្នខ្ពស់ ខណៈភ្លៀងខ្លាំងបង្កើនហានិភ័យមានទឹកជំនន់ និងបំណាក់ដី

ហានិភ័យភ្លើងឆេះព្រៃបារំាងបន្តស្ថិតនៅខ្ពស់ខ្លាំងបើទោះបីជាស្ថានភាពអាកាសធាតុល្អប្រសើរបន្តិចក្តី

អ្នកផលិតមាតិកាយូធូបជនជាតិថៃ Hlun Solo ប្រទះឃើញស្លាប់នៅហ្សកហ្ស៊ី

បារាំងថ្កោលទោសការរំលោភដែនអាកាសប៉ូឡូញ អំឡុងពេលមានវាយប្រហាររបស់រុស្ស៊ីលើអ៊ុយក្រែន

ពលរដ្ឋអ៊ីរ៉ង់អះអាងថា អាមេរិកព្យាយាមធ្វើឲ្យអ៊ីរ៉ង់ចុះខ្សោយកម្លាំង និងធ្វើឲ្យសង្រ្គាមរីកកាន់តែធំ

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877