BTV NEWS

ករណីបុរសម្នាក់ឡើងលើផ្លូវល្បឿនលឿនPK54 យកដែកដាក់ទទឹងផ្លូវត្រូវបានសមត្ថកិច្ចនគរបាលស្រាវជ្រាវបង្រ្កាបបានហើយ

អង្គភាពប្រឆាំងអំពើពុករលួយបានធ្វើកោសល្យវិច័យទូរស័ព្ទជាង ៨០០គ្រឿង និងភស្តុតាងមួយចំនួនទៀតដែលសាលាដំបូងរាជធានីភ្នំពេញប្រគល់ឱ្យ

នគរបាលរាជធានីភ្នំពេញ ស្រាវជ្រាវឃាត់ខ្លួនក្មេងទំនើង ៩នាក់ ពាក់ព័ន្ធករណីវាយប្លន់យកម៉ូតូ

អាវុធហត្ថរាជធានីភ្នំពេញ បង្ក្រាបគ្រឿងញៀនជាង ៦គីឡូក្រាមឃាត់ខ្លួនមនុស្ស ១១នាក់

សន្តិសុខ និង សង្គម

សីតុណ្ហភាពពិភពលោកអាចឡើងលើសកម្រិត ១,៥°C ក្នុងរយៈពេល៧ឆ្នាំ

ក្រុមអ្នកវិទ្យាសាស្ត្របានព្រមាននៅថ្ងៃអង្គារ (០៥ ធ្នូ) នេះថា សីតុណ្ហភាពពិភពលោកអាចនឹងឆ្លងផុតកម្រិតកម្ដៅផែនដី ១,៥អង្សារសេក្នុងរយៈពេលប្រាំពីរឆ្នាំ ខណៈការបំភាយឧស្ម័នកាបូនឌីអុកស៊ីត បន្តកើនឡើង ដោយដាស់តឿនប្រទេសនានាក្នុងកិច្ចពិភាក្សា COP28 ឱ្យ «មានចំណាត់ការឥឡូវនេះ» លើបញ្ហាធ្យូងថ្ម ប្រេង និងការបំពុលឧស្ម័ន។ខ្សែបន្ទាត់ដ៏គ្រោះថ្នាក់កំពុងត្រូវបានគូរជុំវិញអនាគតនៃឥន្ធនៈហ្វូស៊ីលនៅឯកិច្ចប្រជុំកំពូលអាកាសធាតុរបស់អង្គការសហប្រជាជាតិនៅទីក្រុងឌុយបៃ ដោយបណ្ដាប្រទេសបង្កកង្វក់បរិយាកាសធំៗព្យាយាមអំពាវនាវឱ្យមានកិច្ចព្រមព្រៀងដើម្បីបញ្ឈប់ថាមពលពឹងផ្អែកឧស្ម័នកាបូន ដែលទទួលខុសត្រូវចំពោះការបំភាយឧស្ម័នផ្ទះកញ្ចក់ បង្កឡើងដោយមនុស្ស។ការបំពុលឧស្ម័នកាបូនឌីអុកស៊ីត នៃឥន្ធនៈហ្វូស៊ីលបានកើនឡើង ១,១ភាគរយកាលពីឆ្នាំមុន នេះបើយោងតាមសមាគមអន្តរជាតិនៃអ្នកវិទ្យាសាស្ត្រអាកាសធាតុ នៅក្នុងការវាយតម្លៃគម្រោងឧស្ម័នកាបូនសកលប្រចាំឆ្នាំរបស់ពួកគេ ជាមួយនឹងការកើនឡើងនៃការបំភាយឧស្ម័ននៅក្នុងប្រទេសចិន និងឥណ្ឌា ដែលឥឡូវនេះក្លាយជាប្រភពបញ្ចេញឧស្ម័នធំបំផុតទីមួយ និងទីបីរបស់ពិភពលោក។ក្រុមអ្នកវិទ្យាសាស្រ្តបានប៉ាន់ប្រមាណថាមានឱកាស ៥០ភាគរយនៃការឡើងកម្ដៅផែនដី នឹងលើសពីគោលដៅរបស់កិច្ចព្រមព្រៀងទីក្រុងប៉ារីស គឺកម្រិត ១,៥អង្សាសេក្នុងរយៈពេលប៉ុន្មានឆ្នាំទៀតត្រឹមឆ្នាំ២០៣០ ទោះបីជាពួកគេបានកត់សម្គាល់ពីភាពមិនច្បាស់លាស់ជុំវិញការឡើងកម្ដៅដោយសារឧស្ម័នផ្ទះកញ្ចក់ដែលមិនមែនជាឧស្ម័នកាបូនឌីអុកស៊ីតក៏ដោយ៕

មនុស្ស១៤នាក់ បានស្លាប់នៅក្នុងគ្រោះថ្នាក់រថយន្តក្រុងទេសចរណ៍នៅប្រទេសថៃ

ប្រព័ន្ធផ្សព្វផ្សាយក្នុងស្រុកបានរាយការណ៍ថា មនុស្សចំនួន ១៤នាក់បានស្លាប់ និង ៣៥នាក់ផ្សេងទៀតបានរងរបួស បន្ទាប់ពីរថយន្តក្រុងទេសចរណ៍មួយគ្រឿងបានជួបគ្រោះថ្នាក់នៅជិតច្រកចូលឧទ្យានជាតិក្នុងខេត្ត ប្រាជាប់ ឃីរីខាន់ (Prachuap Khiri Khan) របស់ប្រទេសថៃ។ រថយន្តក្រុង ដែលដឹកអ្នកដំណើរ ៤៦នាក់ និងបុគ្គលិក ៣នាក់នោះ បានបើកធា្លក់ចេញពីផ្លូវ ហើយបានបុកដើមឈើនៅថ្ងៃអង្គារ (០៥ ធ្នូ) នេះវេលាម៉ោងប្រហែល ១ទៀបភ្លឺ (ម៉ោងក្នុងស្រុក)។គេមិនទាន់ដឹងច្បាស់ពីមូលហេតុនៃគ្រោះថ្នាក់នេះនោះទេ ហើយការស៊ើបអង្កេតកំពុងបន្ត។ ឧបទ្ទវហេតុនេះបានកើតឡើងនៅខេត្ត ប្រាជាប់ ឃីរីខាន់ ភាគខាងលិចប្រទេសកាលពីពាក់កណ្តាលអធ្រាត្រ។ យោងតាមទូរទស្សន៍រដ្ឋ ThaiPBS បានឲ្យដឹងថា ផ្នែកខាងមុខរបស់រថយន្តក្រុងត្រូវបានបែកជាពាក់កណ្តាលបន្ទាប់ពីមានគ្រោះថ្នាក់។ក្រុមជួយសង្គ្រោះបានទាញអ្នកដំណើរចេញពីបំណែករថយន្ត។ សេចក្តីថ្លែងការណ៍បាននិយាយថា «អ្នករងរបួសទាំងអស់កំពុងត្រូវបានព្យាបាលនៅមន្ទីរពេទ្យ» ដោយបន្ថែមថាការស៊ើបអង្កេតលើមូលហេតុនៃគ្រោះថ្នាក់កំពុងត្រូវបានអនុវត្ត។យោងតាមអង្គការសុខភាពពិភពលោកបានឱ្យដឹងថា ប្រទេសថៃមានអត្រាគ្រោះថ្នាក់ចរាចរណ៍ខ្ពស់បំផុតមួយនៅក្នុងពិភពលោក ដែលមានមនុស្សប្រហែល ២០.០០០នាក់ បានស្លាប់ជារៀងរាល់ឆ្នាំ៕

អ៊ីស្រាអែល បញ្ជាឲ្យពលរដ្ឋជម្លៀសខ្លួនចេញពីទីក្រុងហ្កាហ្សាភាគខាងត្បូង ខណៈការវាយលុករីកធំ

យោធាអ៊ីស្រាអែល បានបញ្ជាឱ្យជម្លៀសប្រជាជនមួយភាគប្រាំរស់នៅទីក្រុងធំតំបន់ហ្កាហ្សាភាគខាងត្បូង ខណៈខ្លួនពង្រីកការវាយលុកតាមដីគោកទៅលើក្រុមហាម៉ាស។ ផែនទី បានបង្ហាញតំបន់ភាគខាងជើង និងភាគកណ្តាលចំនួន៦តំបន់ នៅទីក្រុង Khan Younis ជាកន្លែងដែលមនុស្សប្រមាណ ១៦៧.០០០ នាក់ ចាំបាច់ត្រូវតែចាកចេញ។ សាក្សីបានរាយការណ៍ថា បានឃើញរថក្រោះច្រើនគ្រឿងទៅភាគខាងកើត ហើយវេជ្ជបណ្ឌិតម្នាក់ និយាយថា មន្ទីរពេទ្យក្នុងតំបន់មួយកន្លែងបានគ្របដណ្ដប់ដោយជនរងគ្រោះច្រើនលើសលប់។ នៅទីក្រុងតំបន់ហ្កាហ្សា ការរាយការណ៍និយាយថា មនុស្ស៥០ នាក់ បានស្លាប់នៅពេលការវាយប្រហារតាមអាកាសរបស់អ៊ីស្រាអែល បានវាយប្រហារទៅលើសាលារៀន២ កន្លែង។ យោងតាមទីភ្នាក់ងារសារព័ត៌មានប៉ាឡេស្ទីន Wafa បានឲ្យដឹងថា ពួកគេបានស្លាប់នៅក្នុងសាលារៀនដែលផ្តល់ទីជម្រកដល់ជនភៀសខ្លួននៅក្នុងសង្កាត់ជិតខាង Daraj របស់ទីក្រុង។ ពលរដ្ឋភាគច្រើនក្នុងចំណោមពលរដ្ឋចំនួន ២,៣លាននាក់នៅតំបន់ហ្កាហ្សា កំពុងជ្រកកោននៅភាគខាងត្បូង បន្ទាប់ពីត្រូវបានបញ្ជាឱ្យជម្លៀសខ្លួនចេញពីភាគខាងជើងកាលពីពេលមុន។ យោធាអ៊ីស្រាអែល និយាយថា ខ្លួននឹងធ្វើប្រតិបត្តិការជាមួយកងកម្លាំងដ៏ខ្លាំងក្លានៅភាគខាងត្បូង ដូចដែលខ្លួនបានធ្វើនៅភាគខាងជើង ជាកន្លែងដែលមានការបំផ្លាញយ៉ាងច្រើនក្នុងរយៈពេលប្រាំបីសប្តាហ៍កន្លងទៅនេះ។ អ៊ីស្រាអែល បានបើកយុទ្ធនាការទ្រង់ទ្រាយធំនៅតំបន់ហ្កាហ្សា ជាការឆ្លើយតបទៅនឹងការវាយប្រហារឆ្លងព្រំដែនមិនធ្លាប់មាន ពីក្រុមខ្មាន់កាំភ្លើងក្រុមហាម៉ាសកាលពីថ្ងៃទី ៧ តុលា។ បទឈប់បាញ់បណ្តោះអាសន្ន មានរយៈពេលប្រាំពីរថ្ងៃ ដែលនាំទៅដល់ការដោះលែងចំណាប់ថ្នូរចំនួន ១០៥នាក់ និងពលរដ្ឋប៉ាឡេស្ទីនចំនួន ២៤០នាក់ដែលត្រូវបានឃុំខ្លួននៅក្នុងពន្ធនាគាររបស់អ៊ីស្រាអែលបានផុតពេលកំណត់កាលពីថ្ងៃសុក្រ សប្តាហ៍មុន។

សង្គ្រាមអ៊ីស្រាអែល-ក្រុមហាម៉ាស៖ ផ្លូវសំខាន់នៅតំបន់ហ្គាហ្សា ក្លាយជា«សមរភូមិប្រយុទ្ធ»

កងកម្លាំងការពារអ៊ីស្រាអែល (IDF) បាននិយាយថា ផ្លូវសំខាន់មួយ នៅតំបន់ហ្កាហ្សា គឺជា «សមរភូមិប្រយុទ្ធ» ខណៈដែលខ្លួន បានអះអាងថា ខ្លួនកំពុងបើកច្រករបៀងមនុស្សធម៌ថ្មីមួយសម្រាប់ជនស៊ីវិល ក្នុងការជម្លៀសចេញ។កងកម្លាំងការពារនេះ បានបន្ថែមថា ការរុលទៅមុខរបស់កងកម្លាំងអ៊ីស្រាអែល នៅភាគខាងជើង និងខាងកើតនៃទីក្រុង Khan Younis មានន័យថា ជនស៊ីវិល មិនអាចធ្វើដំណើរតាមដងផ្លូវ Salah al-Din ដែលឆ្លងកាត់ទឹកដីប៉ាឡេស្ទីនបានទៀតទេ។ផ្លូវនេះ «គឺជាសមរភូមិ ដូច្នេះវាមានគ្រោះថ្នាក់ខ្លាំងណាស់ ក្នុងការទៅទីនោះ»។កងកម្លាំងការពារអ៊ីស្រាអែល បានបន្តថា ខ្លួនបានបើកផ្លូវវាងថ្មីសម្រាប់ជនស៊ីវិលទៅភាគខាងលិចនៃទីក្រុង Khan Younis។ការបើកផ្លូវវាងនេះ កើតឡើង នៅពេលដែលរថក្រោះអ៊ីស្រាអែលជាច្រើនគ្រឿង បានសម្រុកទៅភាគខាងត្បូងបន្ថែមទៀត ចូលទៅក្នុងតំបន់ហ្កាហ្សាស្ទ្រីប។

ប្រទេសកាន់តែច្រើនគំរាមបិទព្រំដែនជាមួយរុស្ស៊ី ខណៈលំហូរជនអន្តោប្រវេសន៍កើនឡើង

ចំនួនជនស្វែងរកសិទ្ធិជ្រកកោនចេះតែកើនឡើង ដែលកំពុងទៅដល់តំបន់ព្រំដែនភាគខាងកើតរបស់សហភាពអឺរ៉ុប កំពុងបង្ខំឲ្យបណ្ដាប្រទេស នៅតំបន់បាល់ទិក ពិចារណាបិទច្រកព្រំដែនជាមួយរុស្ស៊ី ដោយសារតែបារម្ភថា វិមានក្រឹមឡាំង កំពុងប្រើមនុស្សពោពេញ ដោយអស់សង្ឃឹមជាអាវុធ ដើម្បីបង្កើតវិបត្តិជនអន្តោប្រវេសន៍នៅលើទ្វីបនេះ។ ប្រទេសឡាតវី លីទុយអានី និងអេស្តូនី ព្រួយបារម្ភកាន់តែខ្លាំង បន្ទាប់ពីប្រទេសហ្វាំងឡង់កាលពីសប្តាហ៍មុន បានបិទច្រកឆ្លងកាត់ទាំងអស់របស់ខ្លួនជាមួយរុស្ស៊ីរយៈពេលពីរសប្តាហ៍ បន្ទាប់ពីជនអន្តោប្រវេសន៍គ្មានឯកសារមកពីបណ្ដាប្រទេស ដែលរងគ្រោះដោយវិបត្តិនៅក្នុងតំបន់ញ៉កអាហ្រ្វិក និងអាស៊ី បានចូលទៅក្នុងប្រទេសនៅអឺរ៉ុបខាងកើតមួយនេះ។ ក្រសួងកិច្ចការផ្ទៃក្នុងឡាតវី បានប្រាប់សារព័ត៌មាន POLITICO ថា រដ្ឋធានី រីកា (Riga) បច្ចុប្បន្នពុំមានគម្រោងបិទព្រំដែនជាមួយរុស្ស៊ី និងបេឡារុស្សទាំងស្រុងទេ ប៉ុន្តែក្រុមមន្ត្រីកំពុងត្រួតពិនិត្យ ដោយប្រុងប្រយ័ត្នចំពោះការអភិវឌ្ឍន៍បន្ថែមទៀត នៃស្ថានភាពលំហូរអន្តោប្រវេសន៍ខុសច្បាប់។ ប្រសិនបើស្ថានការណ៍ប្រែប្រួលខ្លាំង ហើយគំរាមកំហែងដល់សន្តិសុខប្រទេស នោះនឹងមិនត្រូវបាន រាប់បញ្ចូលទេ ដែលឡាតវី អាចបិទព្រំដែនភាគខាងកើតរបស់ខ្លួនទាំងស្រុង។ សម្ព័ន្ធយោធាណាតូ បានព្រមានថា ប្រទេសរុស្ស៊ីកំពុងប្រើប្រាស់ជនអន្តោប្រវេសន៍ជា ឧបករណ៍ដាក់សម្ពាធលើប្រទេសផ្សេងទៀត ក្នុងតំបន់អឺរ៉ុប ក្រោយការសម្រេចចិត្តរបស់ហ្វាំងឡង់ ចូលជាសមាជិករបស់សម្ព័ន្ធយោធាមួយនេះ ៕

សង្គ្រាមអ៊ុយក្រែន-រុស្ស៊ី៖ ចំនួនអ្នកស្លាប់និងរបួសរុស្ស៊ី នៅអ៊ុយក្រែន កើនដល់ ៣២ម៉ឺននាក់

ក្រសួងការពារជាតិអង់គ្លេស (MoD) បាននិយាយថា ចំនួនអ្នកស្លាប់ និងរបួសរុស្ស៊ី នៅអ៊ុយក្រែន កើនឡើងដល់ ៣២ម៉ឺននាក់ហើយ។នៅក្នុងសន្និសីទព័ត៌មានសម្ងាត់ការពារជាតិចុងក្រោយរបស់ខ្លួន ក្រសួងនេះ បាននិយាយថា ការប៉ាន់ប្រមាណជាមធ្យមនៃទាហានរុស្ស៊ី ដែលត្រូវបានសម្លាប់ និងរងរបួស នៅក្នុងអ៊ុយក្រែនគឺ ៣២ម៉ឺននាក់។ក្រសួង បានបន្ថែមទៀតថា ចំនួនអ្នកស្លាប់និងរបួស អាចកើនឡើងដល់ ៣៥ម៉ឺននាក់។ក្រសួងនេះ បាននិយាយថា៖វប្បធម៌នៃការរាយការណ៍មិនស្មោះត្រង់ ដែលបានបង្កើតឡើងជាយូរមកហើយ នៅក្នុងយោធារុស្ស៊ី ទំនងជាបានបង្កើត «កម្រិតទាបនៃការយល់ដឹងអំពីតួលេខអ្នកស្លាប់និងរបួសសរុប» ក្នុងចំណោមមន្ត្រីរុស្ស៊ី និងជនស៊ីវិល។លោក វ្ល៉ាឌីមៀ ពូទីន បានបញ្ជាឲ្យបង្កើនទាហានចំនួន ១៧០.០០០នាក់ ដល់កងទ័ពរុស្ស៊ី កាលពីសប្តាហ៍មុន ដែលនឹងនាំទំហំទាហានសរុបដល់ទៅ ១.៣លាននាក់។

ក្រុមគ្រួសារកម្មករអណ្តូងរ៉ែប៉េរូដែលត្រូវបានសម្លាប់ ទាមទាររកយុត្តិធម៌

សាច់ញាតរបស់ជនរងគ្រោះក្នុងការវាយប្រហារដ៏ឃោឃៅនៅអណ្តូងរ៉ែមាសនៅក្នុងប្រទេសប៉េរូកាលពីថ្ងៃសៅរ៍ បានមកទាមទាររកយុត្តិធម៌កាលពីថ្ងៃចន្ទ។រដ្ឋមន្ត្រីក្រសួងមហាផ្ទៃប៉េរូ លោក Victor Torres បានិយាយថា អាជ្ញាធរកំពុងបង្កើតផែនការសកម្មភាពទ្រទ្រង់ដើម្បីប្រយុទ្ធប្រឆាំងការរុករករ៉ែខុសច្បាប់ និងជួយរក្សាសន្តិភាពនៅក្នុងតំបន់។កម្មករ៩នាក់ ត្រូវបានសម្លាប់ និង១០នាក់ផ្សេងទៀតរងរបួសធ្ងន់ក្នុងការវាយប្រហារចុងក្រោយ នៅពេលក្រុមប្រដាប់អាវុធ ប្រដាប់ដោយគ្រឿងផ្ទុះ បានវាយឆ្មក់ចូល និងចាប់ចំណាប់ថ្នូរ នៅអណ្តូងរ៉ែមួយកន្លែងរបស់ក្រុមហ៊ុន Poderosa ជាក្រុមហ៊ុនផលិតរ៉ែមាសកំពូលមួយរបស់ប្រទេសប៉េរូ។រដ្ឋាភិបាល បានដាក់កំហុសលើក្រុមហ៊ុនរ៉ែខុសច្បាប់ និងក្រុមឧក្រិដ្ឋកម្ម។ ការវាយប្រហារជាច្រើនលើកទៅលើក្រុមហ៊ុន Poderosa កាលពីឆ្នាំមុនបានសម្លាប់មនុស្ស៧នាក់ ហើយបង្គោលអគ្គិសនីចំនួន១០ ត្រូវបានបំផ្លាញ។នៅក្នុងព្រឹត្តិការណ៍មួយផ្សេងទៀត មិនពាក់ព័ន្ធជាមួយក្រុមហ៊ុន Poderosa នោះទេ កាលពីខែមិថុនា ឆ្នាំមុន មានការប្រឈមមុខដាក់គ្នាមួយ រវាងកម្មករអណ្តូងរ៉ែមាសជាសិប្បករ ជុំវិញបញ្ហាដីធ្លី នៅប្រទេសប៉េរូ ភាគខាងត្បូង បានបណ្តាលឲ្យមនុស្ស១៤ នាក់ស្លាប់។

ពលរដ្ឋនូវែលសេឡង់ រាប់ពាន់នាក់ប្រមូលផ្តុំគ្នាទូទាំងប្រទេសដើម្បីតវ៉ាគោលនយោបាយថ្មី

ក្រុមបាតុកររាប់ពាន់នាក់ បានប្រមូលផ្តុំគ្នានៅទីលានចតុរង្គរបស់ទីក្រុង ស្ពានផ្លូវហាយវេ និងនៅមុខសភារបស់ប្រទេសនូវែលសេឡង់ នៅថ្ងៃអង្គារ (០៥ ធ្នូ) នេះដើម្បីតវ៉ានឹងគោលនយោបាយរបស់រដ្ឋាភិបាលថ្មីដែលពួកគេជឿថាជាការប្រកាន់ពូជសាសន៍។ សកម្មភាពតវ៉ានេះត្រូវបានជំរុញឡើងដោយគណបក្សនយោបាយ តេប៉ាទី ម៉ៅរី (Te Pati Maori) ហើយស្របពេលជាមួយនឹងការបើកសភាទី៥៤ របស់ប្រទេសនូវែលសេឡង់ នៅពេលល្ងាច។រដ្ឋាភិបាលកណ្តាលស្តាំនិយមថ្មីនៃគណបក្សជាតិ បក្សនូវែលសេឡង់ទីមួយ និងបក្សអែក (ACT) របស់នូវែលសេឡង់ ត្រូវបានបោះឆ្នោតជ្រើសរើសបន្ទាប់ពីការបោះឆ្នោតក្នុងខែតុលា ហើយកិច្ចព្រមព្រៀងចម្រុះរបស់គណបក្សទាំងបីបានគូសបញ្ជាក់អំពីផែនការដើម្បីបន្ថយការប្រើប្រាស់ភាសាម៉ៅរី (Maori) ពិនិត្យឡើងវិញនូវគោលនយោបាយសកម្មភាព និងវាយតម្លៃមធ្យោបាយដែលឯកសារសន្ធិសញ្ញាបង្កើតប្រទេសត្រូវបានបកស្រាយនៅក្នុងច្បាប់។សហមេដឹកនាំបក្ស តេប៉ាទី ម៉ៅរី លោក រ៉ាវីរី វៃទីទី (Rawiri Waititi) បានដឹកនាំក្រុមបាតុកររាប់រយនាក់ក្នុងការដើរដង្ហែរឆ្លងកាត់ទីក្រុង វែលីងតោន (Wellington) ទៅកាន់អគារសភា សំបុកឃ្មុំ ដាច់ដោយឡែករបស់ប្រទេស ដោយអំពាវនាវឱ្យក្រុមបាតុករសម្ដែងក្ដីកង្វល់របស់ពួកគេ៕

ជនស៊ីវិលរាប់សិបនាក់ បានស្លាប់ក្នុងការវាយប្រហារដោយយានដ្រូននៅភាគខាងជើងនីហ្ស៊េរីយ៉ា

ជនស៊ីវិលរាប់សិបនាក់ ត្រូវបានសម្លាប់នៅក្នុងរដ្ឋកាដុណា (Kaduna) ភាគខាងជើងនៃប្រទេសនីហ្ស៊េរីយ៉ា បន្ទាប់ពីការវាយប្រហារដោយយានដ្រូនរបស់យោធា សំដៅទៅលើក្រុមបះបោរ និងក្រុមចោរកាលពីយប់ថ្ងៃអាទិត្យ នេះបើយោងតាមអភិបាលរដ្ឋ មេដឹកនាំសាសនា និងសាក្សីបាននិយាយកាលពីថ្ងៃច័ន្ទ (០៤ ធ្នូ)។យោធារបស់ប្រទេសនីហ្ស៊េរីយ៉ា ដែលត្រូវបានគាំទ្រដោយសហរដ្ឋអាមេរិក អង់គ្លេស និងសម្ព័ន្ធមិត្តមិនមែនលោកខាងលិចផ្សេងទៀតនៅក្នុងសង្រ្គាមដ៏យូរប្រឆាំងនឹងក្រុមបះបោរអ៊ីស្លាមនៅភាគឦសាននោះ ក៏បាននិងកំពុងបញ្ចេញការវាយប្រហារតាមអាកាសយ៉ាងបង្ហូរឈាមអស់រយៈពេលជាច្រើនឆ្នាំនៅក្នុងតំបន់ផ្សេងទៀតនៃប្រទេសនេះ។អភិបាលរដ្ឋកាដុណា លោក អ៊ុបា សានី (Uba Sani) បាននិយាយថា ជនជាតិមូស្លីមដែលចូលរួមក្នុងពិធីបុណ្យ ម៉ូលុត (Maulud) នៅក្នុងភូមិទុដាន ប៊ីរី (Tudun Biri) «ត្រូវបានសម្លាប់ដោយច្រឡំ និងមនុស្សជាច្រើននាក់ទៀតរងរបួស បន្ទាប់ពីការវាយប្រហារដោយយានដ្រូនយោធា សំដៅទៅលើក្រុមភេរវករ និងក្រុមចោរ»។លោក សានី មិនបានផ្តល់ការចង្អុលបង្ហាញអំពីចំនួនអ្នកស្លាប់នោះទេ ប៉ុន្តែមេដឹកនាំសាសនាម្នាក់បាននិយាយថា មានមនុស្សស្លាប់ចំនួន ៥០នាក់ បុន្តែសាក្សីពីរនាក់បាននិយាយថា មនុស្ស៨០នាក់ ត្រូវបានសម្លាប់៕

អង្គការសហប្រជាជាតិនិយាយថា ស្ថានភាពដ៏មហន្តរាយនៅតំបន់ហ្កាហ្សា កាន់តែធ្ងន់ធ្ងរខ្លាំង

មន្ត្រីជាន់ខ្ពស់នៅអង្គការសហប្រជាជាតិកំពុងព្រមានអំពីស្ថានភាពដ៏មហន្តរាយកាន់តែធ្ងន់ធ្ងរ នៅក្នុងតំបន់ហ្កាហ្សា ដែលហែកហួរដោយសង្រ្គាម ដោយគ្មានកន្លែងសុវត្ថិភាពត្រូវទៅទេសម្រាប់ជនស៊ីវិល ខណៈសង្រ្គាមរបស់អ៊ីស្រាអែលជាមួយក្រុមហាម៉ាស បានរាលដាលទៅភាគខាងត្បូង ជាទីដែលមនុស្សជាច្រើន ធ្លាប់បានស្វែងរកកន្លែងជ្រកកោន ។ លោក ម៉ាទីន គ្រីនហ្វីត (Martin Griffiths) មន្ត្រីជាន់ខ្ពស់ទទួលបន្ទុកការផ្ដល់ជំនួយគ្រាអាសន្នរបស់អង្គការសហប្រជាជាតិបាននិយាយនៅក្នុងសេចក្តីថ្លែងការណ៍មួយកាលពីថ្ងៃចន្ទថា រាល់ពេលដែលយើងគិតថាមិនចង់ឲ្យមានគ្រោះមហន្តរាយកាន់តែអាក្រក់កើតឡើងនៅក្នុងតំបន់ហ្កាហ្សា ស្ថានភាពទាំងនោះបានកើតឡើង ។ លោកនិយាយថា មនុស្សត្រូវបានគេបញ្ជាឲ្យផ្លាស់ទីម្តងទៀត ដោយមានធនធានតិចតួចប៉ុណ្ណោះដើម្បីបន្តរស់ ដោយបង្ខំឲ្យរើសយកជម្រើសមួយដែលមិនអាចទៅរួចបន្ទាប់ពីជម្រើសផ្សេងទៀត។លោកក៏បាននិយាយថា ការមិនយកចិត្តទុកដាក់ទាល់តែសោះចំពោះមនុស្សជាតិជាចម្បងត្រូវតែបញ្ឈប់។អ៊ីស្រាអែលបាននិងកំពុងបង្កើនការទម្លាក់គ្រាប់បែកតាមអាកាសលើតំបន់ហ្កាហ្សាភាគខាងត្បូង តាមប្រមាញ់ក្រុមសកម្មប្រយុទ្ធប៉ាឡេស្ទីន ហាម៉ាស ហើយបាននិយាយកាលពីចុងសប្តាហ៍ថា ខ្លួននឹងពង្រីកប្រតិបត្តិការថ្មើរជើងលើដែនដីនេះទាំងមូល។អគ្គលេខាធិការអង្គការសហប្រជាជាតិលោក Antonio Guterres កាលពីថ្ងៃចន្ទបានអំពាវនាវដល់ កងកម្លាំងការពារអ៊ីស្រាអែល ឱ្យជួយសង្គ្រោះជនស៊ីវិលកុំឲ្យរងទុក្ខបន្ថែមទៀត រួមទាំងបុគ្គលិកសុខាភិបាល អ្នកសារព័ត៌មាន បុគ្គលិកអង្គការសហប្រជាជាតិ និងហេដ្ឋារចនាសម្ព័ន្ធស៊ីវិលត្រូវតែត្រូវបានការពារគ្រប់ពេលវេលា៕

បណ្ដាញសង្គម

ព័ត៌មានថ្មីៗ

កម្ពុជា-អាស៊ែបៃហ្សង់ នឹងបន្តពង្រឹង និងពង្រីកកិច្ចសហប្រតិបត្តិការឱ្យកាន់តែរីកចម្រើនបន្ថែមទៀត

កូរ៉េខាងជើង និងរុស្ស៊ី ចុះហត្ថលេខាលើផែនការសហប្រតិបត្តិការ ៣ឆ្នាំ ស្តីពីការគ្រប់គ្រងគ្រោះមហន្តរាយ

អាកាសយានដ្ឋាន Nuremberg របស់អាល្លឺម៉ង់ បិទដំណើរការដោយសារគ្រាអាសន្នផ្នែកអាកាសចរណ៍

ស៊ុយអែត៖ លោកស្រី Andersson ប្រាប់ថា គណបក្សរបស់លោកស្រី នៅមិនអាចបង្កើតរដ្ឋាភិបាលបាន

លោក TRUMP ថា លោកមិនជឿថា ចិន និងរុស្ស៊ី កំពុងជួយអ៊ីរ៉ង់នោះទេ

សម្ដេចធិបតី៖រយៈពេល៤ថ្ងៃហើយ មិនទាន់បានឃើញលោក អ៊ុ សំអាន ផ្តល់ចម្លើយច្បាស់លាស់ពាក់ព័ន្ធនឹងការអញ្ជើញរបស់សម្ដេចនៅឡើយទេ

សារព័ត៌មាន RIA៖ រុស្ស៊ីចាត់ទុកការរឹបអូសនាវាដឹកប្រេងដោយបារាំងថា ជាការរំលោភលើច្បាប់អន្តរជាតិ

ហ្ស៊កដានីជំរុញឲ្យសមាជិក OIC រួមគ្នាដោះស្រាយការរំលោភបំពានរបស់អ៊ីស្រាអែល

ប្រមុខរដ្ឋកាតា៖ សន្តិសុខ និងអធិបតេយ្យភាពរបស់បណ្តាប្រទេសឈូងសមុទ្រ មិនអាចត្រូវបានគេបំពានបានឡើយ

រុស្ស៊ីអះអាងថា បានវាយប្រហារលើនាវាដែលដឹកសម្ភារៈយោធាទៅកាន់ទីក្រុង Mykolaiv របស់អ៊ុយក្រែន

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877