BTV NEWS

ករណីបុរសម្នាក់ឡើងលើផ្លូវល្បឿនលឿនPK54 យកដែកដាក់ទទឹងផ្លូវត្រូវបានសមត្ថកិច្ចនគរបាលស្រាវជ្រាវបង្រ្កាបបានហើយ

អង្គភាពប្រឆាំងអំពើពុករលួយបានធ្វើកោសល្យវិច័យទូរស័ព្ទជាង ៨០០គ្រឿង និងភស្តុតាងមួយចំនួនទៀតដែលសាលាដំបូងរាជធានីភ្នំពេញប្រគល់ឱ្យ

នគរបាលរាជធានីភ្នំពេញ ស្រាវជ្រាវឃាត់ខ្លួនក្មេងទំនើង ៩នាក់ ពាក់ព័ន្ធករណីវាយប្លន់យកម៉ូតូ

អាវុធហត្ថរាជធានីភ្នំពេញ បង្ក្រាបគ្រឿងញៀនជាង ៦គីឡូក្រាមឃាត់ខ្លួនមនុស្ស ១១នាក់

សន្តិសុខ និង សង្គម

សមត្ថកិច្ចកំពុងស្រាវជ្រាវតាមចាប់ជនបង្កបើករថយន្តព្រូស បុកបុរសម្នាក់បណ្តាលឱ្យស្លាប់ នៅក្នុងកោះពេជ្រ

ភ្នំពេញ៖ ករណីរថយន្តតូយូព្រូសមិនចាំស្លាកលេខមួយគ្រឿង បើកបញ្ច្រាសទិស ទៅបុកនឹងម៉ូតូមួយគ្រឿង បណ្តាលឱ្យបុរសម្នាក់ស្លាប់នៅហ្នឹងកន្លែង នៅក្នុងកោះពេជ្រ កាលពីវេលាទាបភ្លឺថ្ងៃទី៣០ វិច្ឆិកា ឆ្នាំ២០២៣នោះ គិតមកទល់ពេលនេះ សមត្ថកិច្ចនគរបាលជំនាញកំពុងព្យាយាមស្រាវជ្រាវ តាមចាប់ខ្លួនជនបង្កយកមកផ្តន្ទាទោស ។ លោកវរសេនីយ៍ឯក ដេ ម៉ៅ នាយការិយាល័យនគរបាលចរាចរណ៍ជើងគោក នៃស្នងការដ្ឋាននគរបាលរាជធានីភ្នំពេញ បានប្រាប់ BTV ឱ្យដឹងថា ករណីនេះ សមត្ថកិច្ចការិយាល័យជំនាញរបស់រាជធានី បានសហការជាមួយនគរបាលខណ្ឌចំការមន បើកការស្រាវជ្រាវតាំងពីថ្ងៃកើតហេតុ ជាបន្តបន្ទាប់តាមជំនាញ ពិសេសកាមេរ៉ាសុវត្ថិភាព នៅជុំវិញតំបន់កើតហេតុ ។ លោកបន្តថា បច្ចុប្បន្ន សមត្ថកិច្ចបានកំណត់បានតម្រុយខ្លះៗហើយ នឹងកំពុងបន្តស្រាវជ្រាវបន្ថែមទៀត ដើម្បីឈានទៅចាប់ឃាត់ខ្លួនអ្នកបើកបរ និងរថយន្ត យកមកផ្តន្ទាទោសតាមច្បាប់ ឱ្យបាននៅពេលខាងមុខ ។ គួររំលឹកថា ករណីគ្រោះថ្នាក់ចរាចរណ៍ខាងលើនេះបានកើតឡើង នៅក្នុងមជ្ឈមណ្ឌលកោះពេជ្រ ស្ថិតនៅគល់ស្ពានកោះនរាត្រើយខាងលិច ក្នុងសង្កាត់ទន្លេបាសាក់ ខណ្ឌចំការមន រាជធានីភ្នំពេញ ។ជនរងគ្រោះមានឈ្មោះ ចាន់ ប៉េងលាង ភេទប្រុស អាយុ៥៩ឆ្នាំ មុខរបរលក់គ្រឿងសក្ការៈ បូជា មានទីលំនៅភូមិសន្សំកុសល សង្កាត់បឹងទំពន់ទី១ ខណ្ឌមានជ័យ រាជធានីភ្នំពេញ ។ តាមប្រភពព័ត៌មាននៅកន្លែងកើតហេតុបានឲ្យដឹងថា មុនពេលកើតហេតុគេឃើញជនរងគ្រោះខាងលើជិះម៉ូតូមួយគ្រឿងម៉ាកគុបសេរីចាស់គ្មានស្លាកលេខ ធ្វើដំណើរចេញពីផ្ទះបម្រុងធ្វើដំណើរទៅហាត់ប្រាណនៅកោះនរា ក្នុងទិសដៅពីលិចទៅកើត លុះដល់ចំណុចកើតហេតុ ក៏មានរថយន្តម៉ាកព្រូស ពណ៌សមួយគ្រឿង មិនចាំស្លាកលេខ បានបើកបរបញ្ច្រាសរង្វង់មូលសួនច្បារ ក៏បានបើកលឿនទៅបុកម៉ូតូជនរងគ្រោះពេញទំហឹង បណ្ដាលឲ្យជនរងគ្រោះ បែកក្បាលស្លាប់ភ្លាមៗនៅហ្នឹងកន្លែងតែម្តង ។សូមជម្រាបថា បច្ចុប្បន្ននេះសពបុរសរងគ្រោះត្រូវបានក្រុមគ្រួសារសាច់ញាតិ រៀបចំធ្វើបុណ្យបូជាតាមប្រពៃណីរួចរាល់ហើយ ប៉ុន្តែសាច់ញាតិជនរងគ្រោះ កំពុងដង្ហើយរកពន្លឺយុត្តិធម៌ និងស្នើរឱ្យសមត្ថកិច្ចមេត្តាព្យាយាមស្រាវជ្រាវតាមចាប់ខ្លួនជនបង្កយកមកផ្តន្ទាទោសឱ្យខាងតែបានផង ដើម្បីផ្តល់ភាពសមស្របចំពោះការបាត់បង់មនុស្សជាទីស្រលាញ់របស់ពួកគាត់ ។ គួរបន្ថែមថា អ្វីជាភាពសោកសង្រែង ក្នុងមរណះភាពរបស់ជនរងគ្រោះខាងលើ ក៏បានបន្សល់ទុកនូវភាពឈឺចាប់ធ្ងន់ធ្ងរដល់កូនៗ ពិសេសស្ត្រីជាប្រពន្ធ ដែលកំពុងមានជម្ងឺមហារីកសុដន់ធ្ងន់ធ្ងរ ធ្វើឱ្យប៉ះពាល់ផ្លូវអារម្មណ៍មួយផ្នែកទៅហើយ ឥលូវបែរជាមកទទួលបានអារម្មណ៍ប៉ះពាល់ផ្លូវចិត្តមួយផ្នែកធំបន្ថែមទៀត ដែលជាការបាត់បង់មនុស្សជាទីស្រលាញ់បំផុតក្នុងជីវិត ដែលបានទៅហើយមិនអាចវិលត្រឡប់មកវិញ ៕ លីហេង

បាតុករគាំទ្រប៉ាឡេស្ទីនដុតខ្លួនឯងនៅខាងក្រៅស្ថានកុងស៊ុលអ៊ីស្រាអែល នៅអាត្លង់តា

អាជ្ញាធរបានឲ្យដឹងថា បាតុករម្នាក់ដែលមានទង់ជាតិប៉ាឡេស្ទីន បានដុតខ្លួនឯង កាលពីថ្ងៃសុក្រ (ទី១ ខែធ្នូ) នៅខាងក្រៅស្ថានកុងស៊ុលអ៊ីស្រាអែល ក្នុងទីក្រុងអាត្លង់តា សហរដ្ឋអាមេរិក ដោយបានធ្វើឲ្យសន្តិសុខម្នាក់រងរបួស នៅពេលដែលសន្តិសុខរូបនោះ ព្យាយាមចូលទៅអន្តរាគមន៍។មេនគរបាលក្រុងអាត្លង់តា លោក Darin Schierbaum បានប្រាប់នៅក្នុងសន្និសីទសារព័ត៌មានថា បុគ្គលដែលមន្ត្រីមិនបានកំណត់អត្តសញ្ញាណនោះ ស្ថិតក្នុងស្ថានភាពធ្ងន់ធ្ងរ ហើយចំណែកស្ថានភាពរបស់សន្តិសុខ មិនទាន់ដឹងច្បាស់លាស់នៅឡើយទេ។នគរបាលបាននិយាយបន្ថែមថា បាតុករបានទៅដល់ម៉ោងប្រហែល ១២:១៥នាទី (ម៉ោងនៅសហរដ្ឋអាមេរិក) នៅអគារការិយាល័យ ដែលជាទីកន្លែងសម្រាប់ស្ថានកុងស៊ុល ក៏ដូចជាក្រុមហ៊ុនជាច្រើនទៀត ហើយបានប្រើសាំងដុត។ ការិយាល័យ នៅក្រុងអាត្លង់តារបស់ទីភ្នាក់ងារស៊ើបអង្កេតសហព័ន្ធ (FBI) បានប្រាប់ថា ខ្លួនកំពុងសម្របសម្រួលជាមួយរដ្ឋបាលអនុវត្តច្បាប់ក្នុងតំបន់។ ស្ថានកុងស៊ុល និងស្ថានទូតអ៊ីស្រាអែលប្រចាំក្រុងវ៉ាស៊ីនតោន មិនបានឆ្លើយតបភ្លាមៗនោះឡើយ ចំពោះសំណើសុំការអត្ថាធិប្បាយ។អ៊ីស្រាអែលបានចាប់ផ្ដើមការវាយប្រហារផ្នែកយោធា នៅតំបន់ហ្កាហ្សាឡើងវិញ កាលពីថ្ងៃសុក្រ បន្ទាប់ពីកិច្ចពិភាក្សា ដើម្បីបន្តបទឈប់បាញ់រយៈពេល ១សប្តាហ៍ បានបរាជ័យ។ អ៊ីស្រាអែលបានប្តេជ្ញាថា នឹងកម្ទេចក្រុមហាម៉ាស បន្ទាប់ពីក្រុមសកម្មប្រយុទ្ធមួយនេះ បានវាយប្រហារអ៊ីស្រាអែលភាគខាងត្បូង កាលពីថ្ងៃទី៧ ខែតុលា ដោយបានសម្លាប់មនុស្ស ១.២០០ នាក់ និងចាប់ចំណាប់ខ្មាំង ២៤០នាក់។ចំណែកខាងមន្ត្រីប៉ាឡេស្ទីនវិញ បាននិយាយថា ជនជាតិប៉ាឡេស្ទីនជាង ១៥.០០០នាក់ ត្រូវបានសម្លាប់នៅក្នុងការវាយលុករបស់អ៊ីស្រាអែល ដែលបានបំផ្លិចបំផ្លាញទឹកដីយ៉ាងច្រើន៕

ប្រជាជនយេម៉ែនធ្វើបាតុកម្មគាំទ្រប៉ាឡេស្ទីន ខណៈក៏មានបាតុកម្មគាំទ្រប៉ាឡេស្ទីន នៅទីក្រុងវ៉ាស៊ីនតោន

មនុស្សរាប់ពាន់នាក់ បានមកប្រមូលផ្តុំគ្នានៅក្នុងរដ្ឋធានីសាណា(Sanaa) របស់ប្រទេសយេម៉ែន កាលពីថ្ងៃសុក្រ ទី១ ខែធ្នូ ដើម្បីបង្ហាញការគាំទ្រដល់ពលរដ្ឋប៉ាឡេស្ទីននៅតំបន់ហ្កាហ្សា ក្នុងពេលមានជម្លោះនៅបន្តរវាងអ៊ីស្រាអែល និងក្រុមអ៊ីស្លាមនិយមហាម៉ាសប៉ាឡេស្ទីន។ក្រុមបាតុករ បានគ្រវីទង់ជាតិប៉ាឡេស្ទីន អាវុធ និងដាវបុរាណ ខណៈពួកគេបានស្រែកពាក្យគាំទ្រប៉ាឡេស្ទីន។ ការប្រមូលផ្តុំគ្នានេះ ត្រូវបានរៀបចំឡើងដោយចលនាក្រុមហួធី(Houthi) គាំទ្រដោយអ៊ីរ៉ង់ ដែលបានគ្រប់គ្រងភាគច្រើននៅប៉ែកពាយ័ព្យប្រទេសយេម៉ែន រួមទាំងទីក្រុង Sanaa ចាប់តាំងពីចុងឆ្នាំ ២០១៤ មក។ជាមួយគ្នានេះកាលពីថ្ងៃសុក្រ ទី១ ខែធ្នូ ក្រុមបាតុករគាំទ្រប៉ាឡេស្ទីន បានមកប្រមូលផ្តុំគ្នានិងបួងសួងក្នុងការជួបជុំគ្នាមួយនៅខាងក្រៅស្ថានទូតអ៊ីស្រាអែល ក្នុងទីក្រុងវ៉ាស៊ីនតោន ឌី.ស៊ី(Washington, D.C.)។ក្រុមបាតុករពាក់កន្សែង keffiyeh ជាកន្សែងក្រឡាមានព័ណ៌ស-ខ្មៅ បែបប្រពៃណី ដែលមានពាក់នៅមជ្ឈិមបូព៌ា ហើយបានគ្រវីទង់ជាតិប៉ាឡេស្ទីន ទាមទារឲ្យបញ្ចប់ការហ៊ុមព័ទ្ធនៅហ្កាហ្សា។ការប្រយុទ្ធជាថ្មីនៅហ្កាហ្សា បានអូសបន្លាយចូលដល់ថ្ងៃទីពីរនៅថ្ងៃសៅរ៍នេះ បន្ទាប់ពីកិច្ចពិភាក្សាដើម្បីបន្តបទឈប់បាញ់ដែលមានរយៈពេលមួយសប្តាហ៍ជាមួយក្រុមហាម៉ាស់បានដួលរលំ ហើយអ្នកសម្របសម្រួលបាននិយាយថា ការទម្លាក់គ្រាប់បែករបស់អ៊ីស្រាអែលកំពុងធ្វើឱ្យស្មុគស្មាញដល់ការប៉ុនប៉ងដើម្បីផ្អាកប្រយុទ្ធម្តងទៀត។

នៅកិច្ចប្រជុំ COP28 សកម្មជនបានដាក់ស្បែកជើងកុមារបញ្ជាក់ពីការស្លាប់កុមារនៅតំបន់ហ្កាហ្សា និងអ៊ីស្រាអែល

សកម្មជនលោក Nicolas Haeringer បានដាក់ស្បែកជើងកុមារ នៅលើចិញ្ចើមផ្លូវនៅកិច្ចប្រជុំកំពូលអាកាសធាតុ COP28 រួមជាមួយស្លាកដែលសរសេរថា «គ្មានយុត្តិធម៌ផ្នែកអាកាសធាតុទេ បើគ្មានសិទ្ធិមនុស្ស» ដើម្បីទាក់ទាញការយកចិត្តទុកដាក់ចំពោះការស្លាប់របស់កុមារនៅតំបន់ហ្កាហ្សា និងអ៊ីស្រាអែល ចាប់តាំងពីថ្ងៃទី ៧ ខែតុលា។ ក្នុងអំឡុងពេលពីរថ្ងៃនៃកិច្ចប្រជុំកំពូលមេដឹកនាំពិភពលោក ការតវ៉ានិងសកម្មភាពសកម្មណាមួយ ពុំត្រូវបានអនុញ្ញាតឲ្យមាននៅខាងក្នុងតំបន់សន្តិសុខខ្ពស់នោះទេ។សកម្មភាពរបស់លោក Haeringer បានកើតឡើងនៅក្នុងតំបន់ខៀវ ឬ Blue Zone ដែលនៅជាប់គ្នានោះ។ សកម្មជន និងអ្នកតវ៉ា មិនត្រូវបានអនុញ្ញាតឱ្យដាក់ឈ្មោះបណ្តាប្រទេស មេដឹកនាំ និងរួមទាំងទង់ជាតិជាមួយនឹងសកម្មភាពរបស់ពួកគេនៅក្នុងព្រឹត្តិការណ៍អនុសញ្ញាក្របខណ្ឌអង្គការសហប្រជាជាតិស្តីពីបម្រែបម្រួលអាកាសធាតុ(UNFCCC) ដូចជាកិច្ចប្រជុំកំពូលអាកាសធាតុ COP28 នេះទេ។

កងកម្លាំងការពារជាតិអ៊ីស្រាអែល៖ ចំណាប់ថ្នូរអ៊ីស្រាអែល៦នាក់ត្រូវបានបញ្ជាក់ថាស្លាប់

ទាហាននិយាយថា កងទ័ពអ៊ីស្រាអែល បានកំណត់អត្តសញ្ញាណសាកសពចំណាប់ថ្នូរម្នាក់ និងបញ្ជាក់ពីការស្លាប់ចំណាប់ថ្នូរ៤នាក់ផ្សេងទៀត ដែលត្រូវបានចាប់ដោយខ្មាន់កាំភ្លើងក្រុមហាម៉ាស់កាលពីថ្ងៃទី ៧ ខែតុលា ខណៈការប្រយុទ្ធបានបន្តនៅតំបន់ហ្កាហ្សា បន្ទាប់ពីបានផ្អាកប្រយុទ្ធរយៈពេលមួយសប្តាហ៍។យោធាបាននិយាយនៅក្នុងសេចក្តីថ្លែងការណ៍ថា លោក Ofir Tzarfati ជាមនុស្សម្នាក់ក្នុងចំណោមអ្នកដែលត្រូវបានចាប់ខ្លួននៅក្នុងពិធីជប់លៀងតន្ត្រី Nova នៅស្រុក Re'im ខាងក្រៅតំបន់ហ្កាហ្សា ត្រូវបានរកឃើញដោយកងកម្លាំងអ៊ីស្រាអែលកាលពីពេលថ្មីៗនេះ ហើយត្រូវបានកំណត់អត្តសញ្ញាណកាលពីថ្ងៃពុធ ទី២៨ ខែវិច្ឆិកា ដោយមន្ត្រីធ្វើកោសល្យវិច្ច័យ។ បន្ថែមលើនេះ អ្នកនាំពាក្យមេបញ្ជាការយោធា ឧត្តមនាវីឯក Daniel Hagari បាននិយាយថា គ្រួសារចំណាប់ថ្នូរមានឈ្មោះ Eliyahu Margalit, Maya Goren, Ronen Engel និង Arye Zalmanovich ត្រូវបានផ្តល់ដំណឹងអំពីការស្លាប់របស់ពួកគេ ដោយផ្អែកលើការស៊ើបការណ៍ដែលអាចទុកចិត្តបាន។ក្រុមតំណាងឱ្យគ្រួសារចំណាប់ថ្នូរបាននិយាយថា ចំណាប់ថ្នូរទី៦ ដែលជាវិស្វករផ្នែកសំឡេងនៅក្នុងកម្មធីបុណ្យតន្ត្រី Nova មានឈ្មោះថា Guy Illouz ត្រូវបានបញ្ជាក់ថាស្លាប់នៅក្នុងការជាប់ឃុំឃាំង។យោងតាមអាជ្ញាធរអ៊ីស្រាអែល បានឲ្យដឹងថា ជាសរុប ចំណាប់ថ្នូរប្រហែល ២៤០ នាក់ត្រូវបានចាប់ខ្លួនក្នុងអំឡុងការវាយប្រហារថ្ងៃទី៧ ខែតុលា ខណៈជនជាតិអ៊ីស្រាអែល និងជនបរទេសប្រហែល ១.២០០នាក់ ត្រូវបានសម្លាប់។ យោងតាមអាជ្ញាធរប៉ាឡេស្ទីនបាននិយាយថា អ៊ីស្រាអែល បានឆ្លើយតបទៅនឹងការវាយប្រហារថ្ងៃទី ៧ តុលា ដោយការទម្លាក់គ្រាប់បែកខ្លាំងបំផុតមិនធ្លាប់មានរបស់ខ្លួនទៅលើតំបន់ហ្កាហ្សា ដោយមានការវាយលុកតាមដីគោកក្នុងតំបន់ហ៊ុមព័ទ្ធ បណ្តាលឲ្យមនុស្សជាង ១៤.០០០ នាក់ស្លាប់ ប្រហែល ៤០% នៃអ្នកស្លាប់មានអាយុក្រោម ១៨ ឆ្នាំ។

មនុស្សជាង១៨០ នាក់បានស្លាប់ ខណៈអ៊ីស្រាអែលបន្តការវាយលុកតំបន់ហ្កាហ្សា បន្ទាប់ពីបទឈប់បាញ់ផុតកំណត់

យោងតាមមន្ត្រីប៉ាឡេស្ទីនបានឲ្យដឹងថា បន្ទាប់ពីបទឈប់បាញ់រយៈពេលមួយសប្តាហ៍បានផុតកំណត់ មនុស្សជាង១៨០នាក់ បានស្លាប់ និងរាប់រយនាក់ផ្សេងទៀតបានរងរបួស ខណៈកងកម្លាំងអ៊ីស្រាអែល បានបន្តការទម្លាក់គ្រាប់បែករបស់ពួកគេទៅលើតំបន់ហ្កាហ្សា បន្ទាប់ពីបទឈប់បាញ់រយៈពេល១សប្តាហ៍ បានផុតកំណត់។ ទីភ្នាក់ងារសារព័ត៌មាន Reuters បានរាយការណ៍ថា តំបន់ភាគខាងកើត Khan Younis ស្ថិតនៅភាគខាងត្បូងតំបន់ហ្កាហ្សា បានទទួលរងនូវការទម្លាក់គ្រាប់បែកយ៉ាងខ្លាំង ខណៈពេលវេលាកំណត់បទឈប់បាញ់បានកន្លងផុតភ្លាមៗបន្ទាប់ពីព្រឹកថ្ងៃសុក្រ ដោយមានផ្សែងហុយឡើងទៅលើអាកាស។ ពលរដ្ឋ បាននាំគ្នាឡើងទៅលើដងផ្លូវដោយមានរបស់របរដាក់លើរទេះ ស្វែងរកទីជម្រកឆ្ពោះទៅភាគខាងលិច។ ស៊ីរ៉ែន បានបន្លឺនៅទូទាំងប្រទេសអ៊ីស្រាអែលភាគខាងត្បូង ខណៈក្រុមសកម្មប្រយុទ្ធ បានបាញ់រ៉ុក្កែតចេញពីតំបន់ហ៊ុមព័ទ្ធឆ្នេរចូលទៅក្នុងទីក្រុង។ ក្រុមហាម៉ាស បាននិយាយថា ខ្លួនបានកំណត់គោលដៅលើទីក្រុង Tel Aviv ប៉ុន្តែពុំទាន់មានរបាយការណ៍អំពីអ្នកស្លាប់ រងរបួស ឬការខូចខាតនៅទីនោះនៅឡើយ។ មន្ត្រីសុខាភិបាលតំបន់ហ្កាហ្សា បាននិយាយថា ការវាយប្រហារតាមអាកាសរបស់អ៊ីស្រាអែល បានសម្លាប់មនុស្ស១៨៤នាក់ របួសយ៉ាងតិច៥៨៩នាក់ និងបានបំផ្លាញលំនៅឋានជាង២០ខ្នង។ យោធាអ៊ីស្រាអែល បានទម្លាក់ខិត្តប័ណ្ណនៅលើទីក្រុងហ្កាហ្សា និងនៅផ្នែកភាគខាងត្បូងតំបន់ហ៊ុមព័ទ្ធកាលពីថ្ងៃសុក្រ ដោយជំរុញឱ្យជនស៊ីវិលភៀសខ្លួនចេញ ដើម្បីបញ្ចៀសពីការប្រយុទ្ធគ្នា ប៉ុន្តែក្រុមសិទ្ធិមនុស្ស បានព្រមានម្តងហើយម្តងទៀតថា គ្មានកន្លែងសុវត្ថិភាពនោះទេនៅក្នុងតំបន់ហ្កាហ្សា។ អង្គការគ្រូពេទ្យគ្មានព្រំដែន ជាអង្គការក្រៅរដ្ឋាភិបាល បាននិយាយនៅលើបណ្តាញ X ថា ជនស៊ីវិលត្រូវបានបញ្ជាឱ្យជម្លៀសខ្លួនទៅភាគខាងត្បូង ប៉ុន្តែគ្មានកន្លែងណានៅក្នុងតំបន់ហ្កាហ្សា Gaza មានសុវត្ថិភាពនោះទេ ដោយសារតែការទម្លាក់គ្រាប់បែកមិនរើសមុខ ហើយការប្រយុទ្ធនៅបន្ត ដោយបានអំពាវនាវឲ្យកងទ័ពអ៊ីស្រាអែល លុបចោលបទបញ្ជា។

ក្រុមអ្នកសម្របសម្រួល ជំរុញឱ្យមានបទឈប់បាញ់ជាថ្មី ខណៈសង្រ្គាមអ៊ីស្រាអែល និងក្រុមហាម៉ាស់ បន្តនៅហ្កាហ្សា

អ្នកសម្របសម្រួលប្រទេសកាតា និយាយថា កិច្ចខិតខំប្រឹងប្រែងដើម្បីបន្តថ្មីបទឈប់បាញ់រវាងអ៊ីស្រាអែល និងក្រុមហាម៉ាស កំពុងធ្វើឡើង បន្ទាប់ពីអ៊ីស្រាអែល បានបន្តការទម្លាក់គ្រាប់បែករបស់ខ្លួនទៅលើតំបន់ហ្កាហ្សា ដោយបានសម្លាប់ពលរដ្ឋប៉ាឡេស្ទីនរាប់សិបនាក់។ ប្រទេសកាតា ដឹកនាំកិច្ចចរចាដែលបានបង្កើតការផ្អាកប្រយុទ្ធសម្រាប់បុព្វហេតុមនុស្សធម៌រយៈពេលមួយសប្តាហ៍បានបញ្ចប់កាលពីព្រឹកថ្ងៃសុក្រ បាននិយាយថា ខ្លួននឹងបន្តការស្វែងរកកិច្ចព្រមព្រៀងជាថ្មី ប៉ុន្តែបានព្រមានថា ការបន្តប្រយុទ្ធកំពុងធ្វើឱ្យមានបញ្ហាស្មុគស្មាញ។ មន្ត្រីនៅជុំវិញពិភពលោក បានបង្ហាញការខកចិត្តរួមគ្នារបស់ពួកគេចំពោះការដួលរលំបទឈប់បាញ់ និងការវិលត្រឡប់មករកការប្រយុទ្ធគ្នាវិញយ៉ាងឆាប់រហ័ស។ មន្ត្រីមួយចំនួន បានអំពាវនាវឲ្យមានកិច្ចខិតខំប្រឹងប្រែងបន្ទាន់ដើម្បីទប់ស្កាត់អំពើហិង្សា និងការពារការស្លាប់និងរងរបួសជនស៊ីវិលបន្ថែមទៀតនៅក្នុងតំបន់ហ៊ុមព័ទ្ធ។ អ៊ីស្រាអែល និងក្រុមហាម៉ាស បានបន្ទោសគ្នាទៅវិញទៅមកចំពោះការបំពានបទឈប់បាញ់។ ការិយាល័យរបស់នាយករដ្ឋមន្ត្រីអ៊ីស្រាអែល លោក Benjamin Netanyahu បាននិយាយនៅក្នុងសេចក្តីថ្លែងការណ៍កាលពីថ្ងៃសុក្រថា ក្រុមនេះពុំទាន់បំពេញកាតព្វកិច្ចរបស់ខ្លួនក្នុងការដោះលែងចំណាប់ថ្នូរស្ត្រីទាំងអស់នៅថ្ងៃនេះទេ ហើយបានបាញ់រ៉ុក្កែតទៅលើពលរដ្ឋអ៊ីស្រាអែល។ រដ្ឋាភិបាលអ៊ីស្រាអែល បានប្តេជ្ញាធ្វើឲ្យសម្រេចគោលដៅនៃសង្រ្គាម រួមមានការដោះលែងចំណាប់ថ្នូរ ការលុបបំបាត់ក្រុមហាម៉ាស និងធានាបានថាតំបន់ហ្កាហ្សានឹងមិនបង្កការគំរាមកំហែងដល់ពលរដ្ឋអ៊ីស្រាអែលទៀតនោះទេ។ មន្ត្រីក្រុមហាម៉ាស់ បានចោទប្រកាន់អ៊ីស្រាអែលថា បានបំផ្លាញកិច្ចខិតខំប្រឹងប្រែងក្នុងការបន្ថែមពេលបទឈប់បាញ់។ លោក Osama Hamdan មន្ត្រីជាន់ខ្ពស់សម្រាប់ក្រុម ដែលគ្រប់គ្រងនៅតំបន់ហ្កាហ្សា បានប្រាប់សារព័ត៌មាន Al Jazeera ថា ជារៀងរាល់ថ្ងៃក្នុងរយៈពេលប្រាំពីរថ្ងៃកន្លងទៅនៃបទឈប់បាញ់បណ្តោះអាសន្ន អ៊ីស្រាអែលបានធ្វើសកម្មភាពក្នុងវិធីមួយដើម្បីបំផ្លាញដំណើរការទាំងមូល។ យើងនៅតែមានភាពវិជ្ជមានចំពោះកិច្ចខិតខំប្រឹងប្រែងទាំងអស់ ប៉ុន្តែអ៊ីស្រាអែលបានបដិសេធ។

អ៊ីស្រាអែល កោះហៅត្រឡប់មកវិញនូវឯកអគ្គរដ្ឋទូតរបស់ខ្លួនប្រចាំនៅអេស្ប៉ាញ ចំពេលមានជម្លោះ កើនឡើង

រដ្ឋាភិបាលអ៊ីស្រាអែល បានកោះហៅត្រឡប់មកវិញនូវឯកអគ្គរដ្ឋទូតរបស់ខ្លួនប្រចាំនៅទីក្រុងម៉ាឌ្រីដ បន្ទាប់ពីនាយករដ្ឋមន្រ្តីអេស្ប៉ាញ បាននិយាយថា លោកមាន «ការសង្ស័យយ៉ាងធ្ងន់ធ្ងរថា អ៊ីស្រាអែល កំពុងអនុវត្តតាមច្បាប់មនុស្សធម៌អន្តរជាតិ» នៅក្នុងការទម្លាក់គ្រាប់បែករបស់ខ្លួន ទៅលើតំបន់ហ្កាហ្សា។ ការអត្ថាធិប្បាយរបស់លោក Pedro Sanchez ត្រូវបានធ្វើឡើង ក្នុងអំឡុងពេលកិច្ចសម្ភាសន៍មួយ នៅលើទូរទស្សន៍រដ្ឋអេស្ប៉ាញ TVE កាលពីព្រឹកថ្ងៃព្រហស្បតិ៍។លោកបាននិយាយថា ខណៈដែលអ្វីដែលក្រុមហាម៉ាស បានធ្វើចំពោះអ៊ីស្រាអែលគឺ «ឃោរឃៅ និងគួរឲ្យ ស្អប់ខ្ពើម» វីដេអូដែលចេញពីតំបន់ហ្កាហ្សា រួមជាមួយនឹង «ចំនួនកុមារដែលស្លាប់កំពុងកើនឡើង» ធ្វើឲ្យលោកព្រួយបារម្ភយ៉ាងខាងខ្លាំង។ការអធិប្បាយនេះ គំរាមកំហែងធ្វើឲ្យកាន់តែកើនឡើងនូវជម្លោះការទូត ដែលបានកើតឡើងកាលពី សប្តាហ៍មុន នៅពេលដែលលោកបានធ្វើសុន្ទរកថា នៅតាមព្រំដែនហ្កាហ្សាជាមួយប្រទេសអេហ្ស៊ីប ដោយបានថ្កោលទោសដល់ «ការសម្លាប់ជនស៊ីវិលស្លូតត្រង់»ដោយគ្មានរើសអើងជាមួយនាយករដ្ឋមន្ត្រីបែល ហ្ស៊ិក លោក Alexander De Croo ។ រដ្ឋមន្ត្រីការបរទេសអ៊ីស្រាអែល លោក Eli Cohen បានកោះហៅ ត្រឡប់មកវិញនូវឯកអគ្គរដ្ឋទូតប្រចាំនៅប្រទេសទាំងពីរភ្លាមៗ ចំពោះអ្វីដែលការិយាល័យរបស់ខ្លួនហៅថា«ការស្តីបន្ទោសដ៏ធ្ងន់ធ្ងរ»។កាលពីថ្ងៃព្រហស្បតិ៍ លោក Cohen បាននិយាយថា ឯកអគ្គរដ្ឋទូតអេស្ប៉ាញប្រចាំទីក្រុង Tel Aviv នឹងត្រូវរងការស្តីបន្ទោសម្តងទៀតជុំវិញការអះអាង «ដោយកំហឹងក្រេវក្រោដ»និង «គ្មានមូលដ្ឋាន» របស់លោកSanchez។

ចៅក្រមអាមេរិក រារាំងរដ្ឋMontana មិនឲ្យដាក់បម្រាមការប្រើប្រាស់Tik Tok នៅក្នុងរដ្ឋនេះ

ចៅក្រមសហរដ្ឋអាមេរិក កាលពីថ្ងៃព្រហស្បតិ៍ ទី ៣០ ខែវិច្ឆិកា បានរារាំងបម្រាមកម្រិតរដ្ឋដំបូងរបស់រដ្ឋ Montana លើការប្រើប្រាស់កម្មវិធីចែករំលែកវីដេអូខ្លី TikTok មិនឱ្យចូលជាធរមាននៅថ្ងៃទី១ ខែមករា ដោយនិយាយថា វាបានរំលោភលើសេរីភាពសិទ្ធិនិយាយស្តីរបស់អ្នកប្រើប្រាស់។ចៅក្រមសហព័ន្ធប្រចាំតំបន់របស់សហអាមេរិក លោក Donald Molloy បានចេញសេចក្តីបង្គាប់ ដើម្បីរារាំងបម្រាមលើកម្មវិធីដែលគ្រប់គ្រងដោយប្រទេសចិន ដោយនិយាយថា បម្រាមរបស់រដ្ឋ ប្រព្រឹត្តហួសពីអំណាចរដ្ឋ និងរំលោភលើសិទ្ធិរដ្ឋធម្មនុញ្ញរបស់អ្នកប្រើប្រាស់។កម្មវិធី TikTok ដែលជាកម្មសិទ្ធិរបស់ក្រុមហ៊ុន ByteDance របស់ប្រទេសចិន ពុំបានធ្វើអត្ថាធិប្បាយភ្លាមៗនោះទេកាលពីថ្ងៃព្រហស្បតិ៍។ ក្រុមហ៊ុន បានប្តឹងរដ្ឋ Montana កាលពីខែឧសភា ដោយស្វែងរកការរារាំងមិនឲ្យដាក់បម្រាមរដ្ឋរបស់សហរដ្ឋអាមេរិកលើហេតុផលជាច្រើន ដោយអះអាងថា វារំលោភលើសិទ្ធិសេរីភាពនិយាយស្តីនៃវិសោធនកម្មដំបូងរបស់ក្រុមហ៊ុន និងអ្នកប្រើប្រាស់របស់ខ្លួន។ អ្នកប្រើប្រាស់ TikTok នៅរដ្ឋ Montana ក៏បានដាក់ពាក្យប្តឹងដើម្បីរារាំងបម្រាមនេះផងដែរ។ការិយាល័យអគ្គមេធាវីរដ្ឋ ការពារការដាក់បម្រាម ដែលត្រូវបានអនុម័តដោយនីតិប្បញ្ញត្តិ បានលើកឡើងពីការព្រួយបារម្ភអំពីទិន្នន័យផ្ទាល់ខ្លួនរបស់អ្នកប្រើប្រាស់នៅរដ្ឋ Montana និងចារកម្មរបស់ចិនដ៏មានសក្តានុពលនោះ ពុំបានធ្វើអត្ថាធិប្បាយភ្លាមៗនោះទេ។ក្រុមហ៊ុន TikTok បាននិយាយនៅក្នុងឯកសារតុលាការថា ក្រុមហ៊ុន មិនបានចែករំលែក និងមិនចែករំលែកទិន្នន័យអ្នកប្រើប្រាស់អាមេរិកជាមួយរដ្ឋាភិបាលចិននោះទេ ហើយមានចំណាត់ការជាច្រើនដើម្បីការពារឯកជនភាព និងសុវត្ថិភាពរបស់អ្នកប្រើប្រាស់ TikTok។

ក្រុមហាម៉ាស់ ដោះលែងចំណាប់ថ្នូរ៨នាក់ ខណៈកិច្ចពិភាក្សាស្វែងរកការបន្ថែមពេលបទឈប់បាញ់នៅហ្កាហ្សា

កាលពីថ្ងៃព្រហស្បតិ៍ក្រុមហាម៉ាស់ បានដោះលែងចំណាប់ថ្នូរជាពលរដ្ឋអ៊ីស្រាអែល ៨ នាក់នៅតំបន់ហ្កាហ្សា ក្រោមកិច្ចព្រមព្រៀងបទឈប់បាញ់នៅនាទីចុងក្រោយ ហើយអ៊ីស្រាអែល បានដោះលែងអ្នកទោសប៉ាឡេស្ទីន ៣០នាក់ ខណៈអ្នកចរចាបានស្វែងរកការបន្តការផ្អាកប្រយុទ្ធគ្នាម្តងទៀត។ អ៊ីស្រាអែល បានកំណត់អត្តសញ្ញាណស្ត្រីពីរនាក់ ដែលត្រូវបានដោះលែងដំបូងកាលពីថ្ងៃព្រហស្បតិ៍ មានឈ្មោះ Mia Schem អាយុ២១ឆ្នាំ ក្នុងចំណោមអ្នកទាំងឡាយដែលត្រូវបានចាប់ខ្លួននៅក្នុងពិធីជប់លៀងមួយ ដែលក្រុមសកម្មប្រយុទ្ធហាម៉ាស បានវាយសម្រុកចូលកាលពីថ្ងៃទី ៧ ខែតុលា និង នាង Amit Soussana អាយុ ៤០ឆ្នាំ។អ៊ីស្រាអែល បានស្បថថានឹងកម្ទេចក្រុមហាម៉ាស់ ដែលគ្រប់គ្រងនៅតំបន់ហ្គាហ្សា ជាការឆ្លើយតបនឹងការវាយប្រហារកាលពីថ្ងៃទី ៧ ខែតុលា ធ្វើឡើងដោយក្រុមសកម្មប្រយុទ្ធ។រហូតដល់ពេលមានបទឈប់បាញ់នេះ អ៊ីស្រាអែលបានទម្លាក់គ្រាប់បែកទៅលើដែនដីហ្កាហ្សារយៈពេល៧សប្តាហ៍ ហើយតួលេខអ្នកស្លាប់របស់អាជ្ញាធរសុខាភិបាលប៉ាឡេស្ទីន ត្រូវបានអង្គការសហប្រជាជាតិចាត់ទុកថាគួរឲ្យទុកចិត្តបាន ដោយនិយាយថាប្រជាជនតំបន់ហ្កាហ្សាជាង ១៥.០០០ នាក់ត្រូវបានគេបញ្ជាក់ថាស្លាប់។

បណ្ដាញសង្គម

ព័ត៌មានថ្មីៗ

កម្ពុជា-អាស៊ែបៃហ្សង់ នឹងបន្តពង្រឹង និងពង្រីកកិច្ចសហប្រតិបត្តិការឱ្យកាន់តែរីកចម្រើនបន្ថែមទៀត

កូរ៉េខាងជើង និងរុស្ស៊ី ចុះហត្ថលេខាលើផែនការសហប្រតិបត្តិការ ៣ឆ្នាំ ស្តីពីការគ្រប់គ្រងគ្រោះមហន្តរាយ

អាកាសយានដ្ឋាន Nuremberg របស់អាល្លឺម៉ង់ បិទដំណើរការដោយសារគ្រាអាសន្នផ្នែកអាកាសចរណ៍

ស៊ុយអែត៖ លោកស្រី Andersson ប្រាប់ថា គណបក្សរបស់លោកស្រី នៅមិនអាចបង្កើតរដ្ឋាភិបាលបាន

លោក TRUMP ថា លោកមិនជឿថា ចិន និងរុស្ស៊ី កំពុងជួយអ៊ីរ៉ង់នោះទេ

សម្ដេចធិបតី៖រយៈពេល៤ថ្ងៃហើយ មិនទាន់បានឃើញលោក អ៊ុ សំអាន ផ្តល់ចម្លើយច្បាស់លាស់ពាក់ព័ន្ធនឹងការអញ្ជើញរបស់សម្ដេចនៅឡើយទេ

សារព័ត៌មាន RIA៖ រុស្ស៊ីចាត់ទុកការរឹបអូសនាវាដឹកប្រេងដោយបារាំងថា ជាការរំលោភលើច្បាប់អន្តរជាតិ

ហ្ស៊កដានីជំរុញឲ្យសមាជិក OIC រួមគ្នាដោះស្រាយការរំលោភបំពានរបស់អ៊ីស្រាអែល

ប្រមុខរដ្ឋកាតា៖ សន្តិសុខ និងអធិបតេយ្យភាពរបស់បណ្តាប្រទេសឈូងសមុទ្រ មិនអាចត្រូវបានគេបំពានបានឡើយ

រុស្ស៊ីអះអាងថា បានវាយប្រហារលើនាវាដែលដឹកសម្ភារៈយោធាទៅកាន់ទីក្រុង Mykolaiv របស់អ៊ុយក្រែន

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877