BTV NEWS

តំណាងអយ្យការចោទប្រកាន់ រតនៈ ពិសាល ពីបទហិង្សាដោយចេតនាមានស្ថានទម្ងន់ទោស ក្រោយបង្កហិង្សា និងអះអាងថា ខ្លួនជាកូនខ្លាមេ០៧

សាម ម៉ីជូ ត្រូវបាននគរបាលនាំខ្លួនដល់អយ្យការអមសាលាដំបូងរាជធានីភ្នំពេញហើយ ដើម្បីចោទប្រកាន់

ក្មេងទំនើងដែលបង្កហិង្សា និងអះអាងថាខ្លួនជាកូនខ្លាមេ០៧ ត្រូវបានអាវុធហត្ថបញ្ជូនដល់ដំណាក់កាលអយ្យការហើយ

៦ខែដើមឆ្នាំ២០២៦ សមត្ថកិច្ចក្រសួងមហាផ្ទៃចុះឆែកឆេរជិត ៣ម៉ឺនទីតាំង ឃាត់ខ្លួនជនបរទេស Online Scams ជាង ២ពាន់នាក់ និងពិន័យប្រាក់ម្ចាស់ទីតាំងជិត ៨ប៊ីលានរៀល

សន្តិសុខ និង សង្គម

គណៈកម្មាធិការជួយសង្គ្រោះអន្តរជាតិ ព្រួយបារម្ភចំពោះសុខុមាលភាពជនភៀសខ្លួនអាហ្វហ្កានីស្ថានវិលត្រឡប់ពីប៉ាគីស្ថាន

ដោយរដូវរងារចូលមកដល់ គណៈកម្មាធិការជួយសង្គ្រោះអន្តរជាតិ (IRC) នៅក្នុងប្រទេសអាហ្វហ្គានីស្ថាន កាលពីថ្ងៃសុក្រ ទី១០ ខែវិច្ឆិកា បានបង្ហាញការព្រួយបារម្ភខ្លាំងអំពីការរស់រានមានជីវិតរបស់ជនភៀសខ្លួនអាហ្វហ្គានីស្ថាន ដែលបានមកដល់ពីប្រទេសប៉ាគីស្ថាន។ ប្រជាជនអាហ្វហ្គានីស្ថាន រាប់ម៉ឺននាក់ ភាគច្រើនបានទៅរស់នៅក្នុងប្រទេសប៉ាគីស្ថានអស់រយៈពេលជាច្រើនទសវត្សរ៍មកហើយ ត្រូវចាកចេញពីប្រទេសនេះ ហើយអាជ្ញាធរកំពុងដើរប្រមូលជាច្រើនបន្ថែមទៀតនៅក្នុងការឆ្មក់ចាប់។ ប្រទេសប៉ាគីស្ថាន បាននិយាយកាលពីថ្ងៃពុធទី ៨ ខែវិច្ឆិកាថា ចំណាត់ការរបស់ខ្លួន ត្រូវបណ្តេញចេញមនុស្សរាប់ម៉ឺននាក់ដែលគ្មានឯកសារ។ ការបណ្តេញចេញប្រជាជនអាហ្វហ្គានីស្ថាន គឺជាការឆ្លើយតបមួយចំពោះភាពគ្មានឆន្ទះរបស់រដ្ឋបាលដឹកនាំដោយក្រុមតាលីបង់ ក្នុងការធ្វើសកម្មភាពប្រឆាំងក្រុមសកម្មប្រយុទ្ធ ដែលប្រើប្រាស់ប្រទេសអាហ្វហ្គានីស្ថាន ដើម្បីធ្វើការវាយប្រហារនៅក្នុងប្រទេសប៉ាគីស្ថាន។ អ្នកនាំពាក្យរបស់រដ្ឋបាលក្រុមតាលីបង់ លោក Zabihullah Mujahid នៅក្នុងសេចក្តីថ្លែងការណ៍ បាន ច្រានចោលការចោទប្រកាន់នេះ។ គណៈកម្មាធិការជួយសង្គ្រោះអន្តរជាតិ (IRC) កំពុងផ្តល់សេវាថែទាំសុខភាព ជំនួយផ្លូវចិត្ត និងសេវាអនាម័យដល់ជនភៀសខ្លួនអាហ្វហ្គានីស្ថានរាប់ពាន់នាក់ដែលបានមកដល់ជំរុំក្នុងតំបន់ Torkham និងតំបន់ Nangarhar ។ នាយករងផ្នែកទំនាក់ទំនងអាស៊ី គណៈកម្មាធិការជួយសង្គ្រោះអន្តរជាតិ លោកស្រី Nancy Dent បានប្រាប់សារព័ត៌មានរ៉យទ័រក្នុងបទសម្ភាសន៍តាមបណ្តាញ Zoom ពីទីក្រុងកាប៊ុលថា ប្រទេសអាហ្វហ្គានីស្ថាន ពុំមានលទ្ធភាពទទួលគ្រួសាររាប់ពាន់គ្រួសារដែលបានមកដល់នោះទេ ហើយវាទំនងជានឹងដាក់បន្ទុកធ្ងន់លើសេដ្ឋកិច្ចកាន់តែខ្លាំងថែមទៀត។ ដូច្នេះស្ថានភាពសម្រាប់ប្រទេសអាហ្វហ្គានីស្ថានទាំងមូល ទំនងជាកាន់តែយ៉ាប់យ៉ឺន។

កងទ័ពអ៊ីស្រាអែល ដាក់គោលគោលដៅជាច្រើនទីតាំង នៅភាគខាងត្បូងប្រទេសលីបង់

កងកម្លាំងអ៊ីស្រាអែល បានកំណត់គោលដៅជាច្រើនទីតាំងនៅភាគខាងត្បូងប្រទេសលីបង់ កាលពីថ្ងៃសុក្រ ទី១០ ខែវិច្ឆិកា ហើយវីដេអូរបស់សារព័ត៌មាន Reuters បានបង្ហាញពីផ្សែងហុយឡើងបន្ទាប់ពីកងទ័ពអ៊ីស្រាអែល បានបាញ់ឆ្លងព្រំដែន។តំបន់នេះ បានស្ថិតលើការបង្កើនការប្រុងប្រយ័ត្នអស់រយៈពេលប៉ុន្មានសប្តាហ៍កន្លងទៅនេះ បន្ទាប់ពីក្រុមហេសបូឡាអ៊ីស្លាមនិយមលីបង់ បាននិយាយថា ខ្លួនបានបាញ់មីស៊ីលហួសព្រំដែនចូលទៅក្នុងប្រទេសអ៊ីស្រាអែល ហើយយោធាអ៊ីស្រាអែល បាននិយាយថា ខ្លួនបានឆ្លើយតបវិញដោយការបាញ់កាំភ្លើងធំ។អំពើហឹង្សា នៅព្រំដែនប្រទេសលីបង់-អ៊ីស្រាអែល គឺជាការសម្លាប់មនុស្សច្រើនបំផុតចាប់តាំងពីឆ្នាំ ២០០៦មក ខណៈអ៊ីស្រាអែល បានទម្លាក់គ្រាប់បែកលើក្រុមហាម៉ាសដែលជាសម្ព័ន្ធមិត្តប៉ាឡេស្ទីន របស់ក្រុមហេសបូឡា នៅតំបន់ហ្កាហ្សា ក្នុងការឆ្លើយតបទៅនឹងការវាយប្រហាររបស់ក្រុមហាម៉ាស ទៅលើប្រទេសអ៊ីស្រាអែល កាលពីថ្ងៃទី ៧ ខែតុលា។ មន្ត្រីសន្តិសុខប្រទេសលីបង់ បាននិយាយថា ការប៉ះទង្គិចគ្នានៅតាមព្រំដែនប្រទេសលីបង់ បានសម្លាប់អ្នកប្រយុទ្ធក្រុមហេសបូឡាជាង ៦០ នាក់ និងជនស៊ីវិល ១០ នាក់ ។ យ៉ាងហោចណាស់ ទាហានអ៊ីស្រាអែល ៧នាក់ និងជនស៊ីវិលម្នាក់ បានស្លាប់។

អង្គការសហប្រជាជាតិ កាន់ទុក្ខអ្នកស្លាប់យ៉ាងច្រើនក្នុងសង្គ្រាម ដោយមានបុគ្គលិកខ្លួនជាង១០០នាក់ ត្រូវបានសម្លាប់នៅហ្កាហ្សា

ទីភ្នាក់ងារជនភៀសខ្លួនប៉ាឡេស្ទីនរបស់អង្គការសហប្រជាជាតិ (UNRWA) បាននិយាយកាលពីថ្ងៃសុក្រ ទី១០ ខែវិច្ឆិកា ថា បុគ្គលិករបស់អង្គការសហប្រជាជាតិជាង ១០០នាក់ត្រូវបានសម្លាប់ ចាប់តាំងពីសង្គ្រាមអ៊ីស្រាអែល និងក្រុមហាម៉ាស់ ចាប់ផ្តើមនៅក្នុងតំបន់ហ្កាហ្សា ដែលធ្វើឲ្យវាក្លាយជាជម្លោះមានមនុស្សស្លាប់ច្រើនបំផុតមិនធ្លាប់មានសម្រាប់អង្គការសហប្រជាជាតិក្នុងអំឡុងពេលខ្លីបែបនេះ។ ទីភ្នាក់ងារ UNRWA បានប្រាប់សារព័ត៌មានរ៉យទ័រថា មនុស្សមួយចំនួនបានស្លាប់ដោយកំពុងឈរតម្រង់ជួរទទួលនំប៉័ង ខណៈអ្នកផ្សេងទៀតបានស្លាប់រួមជាមួយក្រុមគ្រួសាររបស់ពួកគេនៅក្នុងលំនៅឋាន ក្នុងពេលសង្រ្គាមពីលើអាកាសនិងតាមដីគោកដ៏មហន្តរាយរបស់អ៊ីស្រាអែលមកលើក្រុមហាម៉ាស់នៅក្នុងតំបន់ហ្កាហ្សាមានប្រជាជនរស់នៅច្រើន ដែលបានបន្តការឆ្លើយតបទៅនឹងការវាយប្រហារឆ្លងព្រំដែនកាលពីថ្ងៃទី ៧ ខែតុលា លើសហគមន៍អ៊ីស្រាអែល ធ្វើឡើងដោយក្រុមសកម្មប្រយុទ្ធ។លោក Philippe Lazzarini បាននិយាយនៅលើវេទិកាប្រព័ន្ធផ្សព្វផ្សាយសង្គម X ថា ដោយត្រូវបានបំផ្លិចបំផ្លាញ បុគ្គលិកទីភ្នាក់ងារជនភៀសខ្លួនប៉ាឡេស្ទីនរបស់អង្គការសហប្រជាជាតិ (UNRWA) ជាង ១០០នាក់ ត្រូវបានបញ្ជាក់ថាបានស្លាប់ក្នុងរយៈពេល ១ ខែមកនេះ មានទាំងឪពុកម្តាយ គ្រូបង្រៀន គិលានុបដ្ឋាក វេជ្ជបណ្ឌិត និងបុគ្គលិកគាំទ្រ។ ទីភ្នាក់ងារ UNRWAកំពុងកាន់ទុក្ខ ពលរដ្ឋប៉ាឡេស្ទីនកាន់ទុក្ខ ពលរដ្ឋអ៊ីស្រាអែលក៏កាន់ទុក្ខ។ ស្ថាប័នពិភពលោកមួយនេះ បាននិយាយថា បុគ្គលិករបស់អង្គការសហប្រជាជាតិនៅជុំវិញពិភពលោកនឹងស្ថិតនៅក្នុងភាពស្ងៀមស្ងាត់មួយនាទី ហើយទង់ជាតិនឹងត្រូវបង្ហូតនៅត្រឹមពាក់កណ្តាលដងនៅថ្ងៃច័ន្ទ។ អ៊ីស្រាអែល បានបន្ទោសក្រុមហាម៉ាស់ចំពោះការស្លាប់ជនស៊ីវិលនៅតំបន់ហ្កាហ្សា ដោយនិយាយថាក្រុមនេះប្រើប្រាស់ប្រជាជនជាខែលការពារ និងលាក់ទុកអាវុធ និងឧបករណ៍នៅជុំវិញមន្ទីរពេទ្យដែលត្រូវបានវាយប្រហារដោយការទម្លាក់គ្រាប់បែក។

ប្រមុខអង្គការសុខភាពពិភពលោកនិយាយថា កុមារម្នាក់ត្រូវបានសម្លាប់ជាមធ្យមរៀងរាល់ ១០ នាទីម្តងនៅហ្កាហ្សា

អគ្គនាយកអង្គការសុខភាពពិភពលោក លោក Tedros Adhanom Ghebreyesus បានថ្លែងទៅកាន់ក្រុមប្រឹក្សាសន្តិសុខអង្គការសហប្រជាជាតិ កាលពីថ្ងៃសុក្រ ទី១០ ខែវិច្ឆិកា ថា កុមារម្នាក់ត្រូវបានសម្លាប់ជាមធ្យមរៀងរាល់១០នាទីម្តងនៅតំបន់ហ្កាហ្សា ដោយព្រមានថាគ្មានកន្លែងណាសុវត្ថិភាពនោះទេ។ លោកនិយាយថា ពាក់កណ្តាលនៃមន្ទីរពេទ្យចំនួន ៣៦កន្លែងនៅតំបន់ហ្កាហ្សា និងពីរភាគបីនៃមណ្ឌលថែទាំសុខភាពបឋមនៅតំបន់នេះ មិនដំណើរការទេ ហើយនៅកន្លែងដែលកំពុងដំណើរការគឺហួសពីសមត្ថភាពរបស់ពួកគេ ដោយពណ៌នាអំពីប្រព័ន្ធថែទាំសុខភាពថា «វាស្ទើតែដួលរលំ» ។ លោក Ghebreyesus បានថ្លែងទៅកាន់ក្រុមប្រឹក្សាដែលមានសមាជិក ១៥រូបថា «ច្រករបៀងមន្ទីរពេទ្យចង្អៀតដោយអ្នករងរបួស អ្នកជំងឺ និងអ្នកស្លាប់។ បន្ទប់ដាក់សពពេញហៀរ។ ចំណែកការវះកាត់ ធ្វើឡើងដោយគ្មានការប្រើថ្នាំស្ពឹក។ អ្នកជម្លៀសខ្លួនរាប់ម៉ឺននាក់ ស្នាក់នៅក្នុងមន្ទីរពេទ្យ។ អ៊ីស្រាអែល បានវាយលុកលើតំបន់ហ្កាហ្សា ជាតំបន់ហ៊ុមព័ទ្ធមួយមានប្រជាជន ២,៣លាននាក់ ពីលើអាកាស ដោយបានដាក់ការហ៊ុមព័ទ្ធ និងបានបើកការវាយលុកលុយតាមដីគោក។ លោក Ghebreyesus និយាយថា «ជាមធ្យម កុមារម្នាក់ត្រូវបានសម្លាប់រៀងរាល់ ១០ នាទីម្តងនៅក្នុងតំបន់ហ្កាហ្សា»។ លោក Ghebreyesus បាននិយាយថា ចាប់តាំងពីថ្ងៃទី ៧ ខែតុលាមក អង្គការសុខភាពពិភពលោក បានផ្ទៀងផ្ទាត់ការវាយប្រហារមានច្រើនជាង ២៥០លើក មកលើទីតាំងថែទាំសុខភាពនៅក្នុងតំបន់ហ្កាហ្សា និងតំបន់ West Bank ខណៈមានការវាយប្រហារចំនួន ២៥ លើក លើទីតាំងថែទាំសុខភាពនៅក្នុងប្រទេសអ៊ីស្រាអែល។ អ៊ីស្រាអែល និយាយថា ក្រុមហាម៉ាស់លាក់ទុកអាវុធនៅក្នុងផ្លូវរូងក្រោមដីក្រោមមន្ទីរពេទ្យ ដែលការចោទប្រកាន់នេះក្រុមហាម៉ាស់បានបដិសេធ។ ឯកអគ្គរដ្ឋទូតប្រចាំអង្គការសហប្រជាជាតិរបស់អ៊ីស្រាអែល លោក Gilad Erdan បានថ្លែងទៅកាន់ក្រុមប្រឹក្សាសន្តិសុខថា អ៊ីស្រាអែលបានបង្កើតក្រុមការងារមួយដើម្បីបង្កើតមន្ទីរពេទ្យនៅភាគខាងត្បូងតំបន់ តំបន់ហ្កាហ្សា។

ពលរដ្ឋតំបន់ហ្កាហ្សាជាង១០ម៉ឺននាក់ ភៀសខ្លួនទៅភាគខាងត្បូង ក្នុងរយៈពេលពីរថ្ងៃនេះ

អ្នកនាំពាក្យមេបញ្ជាការយោធាឧត្តមនាវីឯក Daniel Hagari បាននិយាយកាលពីថ្ងៃសុក្រថា ពលរដ្ឋជាង ១០ ម៉ឺននាក់ នៅតំបន់ហ្កាហ្សា បានភៀសខ្លួនទៅភាគខាងត្បូងក្នុងរយៈពេលពីរថ្ងៃចុងក្រោយនេះ ខណៈកងកម្លាំងអ៊ីស្រាអែល ធ្វើប្រតិបត្តិការចូលជ្រៅទៅក្នុងទីក្រុងតំបន់ហ្កាហ្សា។នៅក្នុងបទសម្ភាសន៍តាមទូរទស្សន៍ លោក Hagari បាននិយាយថា កិច្ចខិតខំប្រឹងប្រែងកំពុងបន្ត ដើម្បីឲ្យមានការដោះលែងចំណាប់ថ្នូរ ដែលត្រូវបានឃុំខ្លួននៅក្នុងតំបន់ហ្កាហ្សា ប៉ុន្តែកិច្ចខិតខំប្រឹងប្រែងបែបនេះ ត្រូវការពេលវេលា។លោកបាននិយាយថា យើងកំពុងធ្វើការគ្រប់ពេលជាមួយគំនិតផ្តួចផ្តើមលើកិច្ចខិតខំប្រឹងប្រែងជាបន្តបន្ទាប់ ដើម្បីនាំយកចំណាប់ថ្នូរត្រឡប់មកវិញ។ កិច្ចខិតខំប្រឹងប្រែងទាំងនេះ មានភាពស្មុគស្មាញ វាមិនទាន់បញ្ចប់នៅឡើយទេ។ វាត្រូវការពេលវេលា ត្រូវចំណាយពេលច្រើនទៀត។

អ៊ីស្រាអែល កែប្រែបន្ថយចំនួនអ្នកស្លាប់ ខណៈការវាយប្រហារដ៏ឃោរឃៅធ្លាក់លើមន្ទីរពេទ្យ និងសាលារៀន នៅហ្កាហ្សា

ប្រទេសអ៊ីស្រាអែល កាលពីថ្ងៃសុក្រ បានកែប្រែបន្ថយចំនួនអ្នកស្លាប់ក្នុងការវាយប្រហាររបស់ក្រុមហាម៉ាស កាលពីខែមុន មកនៅត្រឹមប្រមាណ ១.២០០នាក់ ខណៈប្រទេសនេះ បន្តការវាយលុករបស់ខ្លួនទៅលើតំបន់ហ្កាហ្សា ដោយបង្ខំឱ្យពលរដ្ឋប៉ាឡេស្ទីនរាប់ពាន់នាក់ ភៀសខ្លួនទៅភាគខាងត្បូងដើម្បីគេចចេញពីការបំផ្លាញនៅក្នុងទីក្រុង។ អ្នកនាំពាក្យក្រសួងការបរទេសលោក Lior Haiat បាននិយាយថា ចំនួនថ្មី បន្ថយចុះពី ១.៤០០នាក់ គឺជាការប៉ាន់ប្រមាណធ្វើបច្ចុប្បន្នភាព។ ទន្ទឹមនឹងនេះ ប៉ាឡេស្ទីន បានរាយការណ៍ថា មានការវាយប្រហារយ៉ាងឃោឃៅទៅលើមន្ទីរពេទ្យ Al-Shifa និងសាលារៀន Al-Buraq ក្នុងទីក្រុងតំបន់ហ្កាហ្សា ព្រមទាំងការវាយឆ្មក់បាញ់ទៅលើមន្ទីរពេទ្យ Al-Quds ផងដែរ។ កងទ័ពអ៊ីស្រាអែល បានចោទប្រកាន់ក្រុមសកម្មប្រយុទ្ធហាម៉ាស់ប៉ាឡេស្ទីនដដែលៗថា ក្រុមនេះបានប្រើប្រាស់មន្ទីរពេទ្យ ជាពិសេសមន្ទីរពេទ្យ Al-Shifa ជាមណ្ឌលទីបញ្ជាការ និងជាកន្លែងលាក់ខ្លួន។ ប៉ុន្តែ អាជ្ញាធរក្រុមហាម៉ាស បានច្រានចោលការចោទប្រកាន់នេះ។ លោក Abu Mohammad អាយុ ៣២ ឆ្នាំ ស្ថិតក្នុងចំណោមអ្នកដែលកំពុងស្វែងរកការជ្រកកោននៅមន្ទីរពេទ្យ បាននិយាយថា «គ្មានកន្លែងសុវត្ថិភាពនៅសល់នោះទេ កងទ័ពបានវាយលុកលើមន្ទីរពេទ្យ Al-Shifa ខ្ញុំមិនដឹងថាត្រូវធ្វើដូចម្តេចទេ»។ នាយកមន្ទីពេទ្យ Al-Shifa និងរដ្ឋាភិបាលក្រុមហាម៉ាស់នៅហ្កាហ្សា បានរាយការណ៍ថាមានអ្នកស្លាប់ចំនួន ១៣ នាក់ ដែលបានដាក់កំហុសលើកងកម្លាំងអ៊ីស្រាអែលសម្រាប់ការវាយប្រហារលើមន្ទីរពេទ្យ។ លោក បាននិយាយថា មន្ទីរពេទ្យបានទទួលសាកសពមនុស្ស ៥០ នាក់ផ្សេងទៀត ដែលបានស្លាប់ក្នុងការវាយប្រហារលើសាលារៀន Al-Buraq នៅទីក្រុងតំបន់ហ្កាហ្សា។ ការប្រយុទ្ធគ្នាខ្លាំង កំពុងផ្ទុះឡើងរាលដាលនៅជិតមន្ទីរពេទ្យ Al-Shifa ដោយអ៊ីស្រាអែល និយាយថា ខ្លួនបានសម្លាប់ក្រុមសកម្មប្រយុទ្ធរាប់សិបនាក់ និងបានបំផ្លាញផ្លូវរូងក្រោមដី ដែលជាទីតាំងសំខាន់នៃសមត្ថភាពប្រយុទ្ធរបស់ក្រុមហាម៉ាស។

នគរបាលឃាត់ខ្លួនអនុប្រធានមន្ទីរប្រឆាំងបទល្មើសគ្រឿងញៀនម្នាក់ និងមន្ត្រី៤នាក់ផ្សេងទៀត ពាក់ព័ន្ធបញ្ហាគ្រឿងញៀន

ភ្នំពេញ ៖ នគរបាលនៃអគ្គស្នងការដ្ឋាននគរបាលជាតិបានឃាត់ខ្លួននគរបាលជាឧត្ដមសេនីយ៍ទោម្នាក់ មានតួនាទីជាអនុប្រធានមន្ទីរប្រឆាំងបទល្មើសគ្រឿងញៀន និងមនុស្ស៤នាក់ផ្សេងទៀត បញ្ជូនទៅតុលាការ ដោយសង្ស័យថា មានជាប់ពាក់ព័ន្ធនឹងបញ្ហាគ្រឿងញៀន។ប្រភពព័ត៌មានបានឱ្យដឹងថា នគរបាលនៃនាយកដ្ឋានចារកម្មនៃអគ្គស្នងការដ្ឋាននគរបាលជាតិ កាលពីថ្ងៃទី០៩ ខែវិច្ឆិកា ឆ្នាំ២០២៣ម្សិលមិញនេះ បានឃាត់ខ្លួនអនុប្រធានមន្ទីរប្រឆាំងបទល្មើសគ្រឿងញៀនម្នាក់ និងមនុស្ស៤នាក់ផ្សេងទៀត ដោយមានជាប់ពាក់ព័ន្ធក្នុងរឿងគ្រឿងញៀន។ បើតាមប្រភពបន្ថែមថា អនុប្រធានមន្ទីរប្រឆាំងបទល្មើសគ្រឿងញៀននៅមានឈ្មោះ វ៉ាន់ កុសល មានឋានន្តរស័ក្តិថ្នាក់ឧត្តមសេនីយ៍ទោ កាន់ជំនាញ ក៨ ។ប្រភពព័ត៌មានបន្ថែមថា ក្រោយឃាត់ខ្លួន នគរបាលនៃអគ្គស្នងការដ្ឋាននគរបាលជាតិ បានបញ្ជូនសំណុំរឿងនេះទៅកាន់ស្ថាប័នអយ្យការអមសាលាដំបូងរាជធានីភ្នំពេញនៅរសៀលថ្ងៃទី១០ ខែវិច្ឆិកា ឆ្នាំ២០២៣នេះ។លោកឧត្តមសេនីយ៍ទោ អ៉ិន សុង អ្នកនាំពាក្យមន្ទីរប្រឆាំងបទល្មើសគ្រឿងញៀនបានប្រាប់ថា ករណីនេះមិនទាន់ច្បាស់នោះទេ លោកនឹងផ្ដល់ដំណឹងនាពេលក្រោយ។លោក ប្លង់ សុផល អ្នកនាំពាក្យអយ្យការអមសាលាដំបូងរាជធានីភ្នំពេញបានឱ្យដឹងនៅល្ងាចថ្ងៃទី១០ ខែវិច្ឆិកានេះថា សំណុំរឿងទេីបតែទទួលបាន តំណាងអយ្យការកំពុងតែប្រេីប្រាស់នីតិវិធីដេីម្បីចាត់លេីរឿងនេះ៕ អត្ថបទ ៖ ប្រាក់ វ៉ាន់ដា

មន្ត្រីហ្កាហ្សា៖ មន្ទីរពេទ្យជាច្រើនស្ថិតក្រោមការវាយប្រហារថ្មីរបស់អ៊ីស្រាអែល

ក្រុមមន្ត្រីតំបន់ហ្កាហ្សាបាននិយាយថា អ៊ីស្រាអែលបានបើកការវាយប្រហារតាមអាកាសថ្មីនៅលើ ឬនៅជិតមន្ទីរពេទ្យយ៉ាងហោចណាស់ចំនួនបីទីតាំង នៅថ្ងៃសុក្រ (១០ វិច្ឆិកា) នេះដោយបានបង្កគ្រោះថ្នាក់បន្ថែមទៀតដល់ប្រព័ន្ធសុខាភិបាល ដែលពោរពេញដោយអ្នកស្លាប់ និងរបួសរាប់ពាន់នាក់ ដែលភៀសខ្លួនដោយសង្គ្រាមរបស់អ៊ីស្រាអែល ប្រឆាំងនឹងក្រុមហាម៉ាស នៅក្នុងតំបន់ហ៊ុមព័ទ្ធប៉ាឡេស្ទីនមួយនេះ។អ្នកនាំពាក្យក្រសួងសុខាភិបាលហ្កាហ្សា លោក Ashraf Al-Qidra បាននិយាយថា អ៊ីស្រាអែលបានកំណត់គោលដៅលើបរិវេណមន្ទីរពេទ្យ អាល់ ស៊ីហ្វា (Al Shifa) ដែលជាមន្ទីរពេទ្យដ៏ធំបំផុតមួយនៅក្នុងទីក្រុងហ្កាហ្សា ហើយមានអ្នកស្លាប់បាត់បង់ជីវិតជាច្រើន ប៉ុន្តែលោកមិនបានផ្តល់ព័ត៌មានលម្អិតនោះទេ។ អ៊ីស្រាអែលបាននិយាយថា ក្រុមហាម៉ាសមានមជ្ឈមណ្ឌលបញ្ជាការ និងផ្លូវរូងក្រោមដី លាក់កំបាំងនៅក្រោមមន្ទីរពេទ្យ អាល់ ស៊ីហ្វា ប៉ុន្តែក្រុមហាម៉ាស បានបដិសេធការចោទប្រកាន់នោះ។យុទ្ធនាការយោធាអ៊ីស្រាអែលរយៈពេលមួយខែ ដើម្បីកម្ទេចក្រុមហាម៉ាស បន្ទាប់ពីការវាយឆ្មក់កាលពីថ្ងៃទី៧ ខែតុលា របស់ពួកសកម្មប្រយុទ្ធទៅលើភាគខាងត្បូងអ៊ីស្រាអែល បានធ្វើឱ្យមន្ទីរពេទ្យជាច្រើននៅតំបន់ហ្កាហ្សា ជួបការលំបាកនៅក្នុងប្រតិបត្តិការ ខណៈដែលការផ្គត់ផ្គង់ផ្នែកវេជ្ជសាស្រ្ត ទឹកស្អាត និងប្រេងឥន្ធនៈដល់ម៉ាស៊ីនភ្លើងជិតអស់ទៅហើយ៕

ភ្លៀងធ្លាក់ បាននាំមកភាពធូស្រាលបន្តិចសម្រាប់កង្វក់ខ្យល់នៅទីក្រុងញ៉ូវដេលី

ទឹកភ្លៀងធ្លាក់ នៅក្នុងរដ្ឋធានីប្រទេសឥណ្ឌា បានផ្តល់ឲ្យពលរដ្ឋរស់នៅទីក្រុងញ៉ូដេលី នូវភាពធូស្រាលបន្តិច ពីកង្វក់ខ្យល់នៅថ្ងៃសុក្រនេះ ប៉ុន្តែទោះជាយ៉ាងណា គុណភាពខ្យល់ នៅតែស្ថិតក្នុងកម្រិតគ្រោះថ្នាក់ដល់សុខភាព។ ពលរដ្ឋដែលបានចេញទៅខាងក្រៅនៅពេលព្រឹក បាននិយាយថា ពួកគេមានអារម្មណ៍ធូស្រាល បើប្រៀបធៀបទៅនឹងប៉ុន្មានថ្ងៃមុននោះ។ ពលរដ្ឋទីក្រុងញ៉ូវដេលី និយាយថាយើងមានអារម្មណ៍ល្អ។ មានការផ្លាស់ប្តូរភ្លាមៗក្នុងកង្វក់ខ្យល់។គុណភាពខ្យល់បានធ្លាក់ចុះនៅក្នុងទីក្រុងញ៉ូវដេលី នៅមុនរដូវរងាជារៀងរាល់ឆ្នាំ នៅពេលនោះខ្យល់ត្រជាក់បានរារាំងដល់សារធាតុបង្កការបំពុលមកពីប្រភពជាច្រើន រួមមានមកពីយានយន្ត ឧស្សាហកម្ម ធូលីសំណង់ និងការដុតសំណល់កសិកម្ម។ប្រជាជនទីក្រុងញូវឌេលី បានឃើញផ្ទៃមេឃគ្របដណ្តប់ដោយផេះ និងស្រទាប់ក្រាស់នៃផ្សែងអ័ព្ទដ៏គួរឱ្យព្រួយបារម្ភសម្រាប់រយៈពេលជាង ១០ថ្ងៃជាប់ៗគ្នា។ អ្នកជំនាញបានព្រមាន អំពីជំងឺរយៈពេលវែង និងការស្លាប់ ប្រសិនបើការកង្វក់ខ្យល់ ធ្ងន់ធ្ងរបែបនេះ នៅតែបន្តកើតមាន។

អ្នកជំនាញព្រមានថា សង្រ្គាមអ៊ីស្រាអែល-ប៉ាឡេស្ទីន អាចបណ្ដាលឲ្យមានវិបត្តិជនអន្តោប្រវេសន៍នៅអឺរ៉ុប

អ្នកវិភាគមួយរូបបានព្រមានថា សង្គ្រាមនៅតំបន់ហ្កាហ្សាអាចបង្កឱ្យមានរលកថ្មីនៃការធ្វើអន្តោប្រវេសន៍ទៅកាន់តំបន់អឺរ៉ុប លុះត្រាតែអ៊ីស្រាអែលបញ្ឈប់យុទ្ធនាការទម្លាក់គ្រាប់បែករបស់ខ្លួន និងការបង្ខំឱ្យបណ្តេញជនជាតិប៉ាឡេស្ទីនចេញពីផ្ទះសម្បែងរបស់ពួកគេ។ អ្នកនិពន្ធ និងជាអ្នកស្រាវជ្រាវដែលមានមូលដ្ឋាននៅទីក្រុងវីយែនប្រទេសអូទ្រីសលោក Hossam Shaker បានប្រាប់សារព័ត៌មាន Middle East Eye ថាការវាយលុកដ៏សាហាវរបស់អ៊ីស្រាអែលនៅលើតំបន់ហ្កាហ្សាអាចបង្កឱ្យមានការភៀសខ្លួនយ៉ាងច្រើនទៅកាន់អឺរ៉ុប ដែលអាចមានចំនួន យ៉ាងច្រើន ដូចកាលពីឆ្នាំ២០១៥ នៅពេលដែលជនភៀសខ្លួន និងជនអន្តោប្រវេសន៍ ជិតមួយលាននាក់បានមកដល់ច្រាំងអឺរ៉ុប។ លោកបាននិយាយថា ជម្លោះនេះអាចទុកឱ្យអឺរ៉ុបប្រឈមនឹងសម្ពាធឲ្យទទួលយកជនភៀសខ្លួនប៉ាឡេស្ទីនមួយចំនួនធំ ដែលភៀសខ្លួនចេញពីតំបន់ហ្កាហ្សាទៅ ហើយក៏អាចជាជនជាតិប៉ាឡេស្ទីនមកពីលីបង់ផងដែរ ប្រសិនបើសង្រ្គាម និងវិបត្តិសេដ្ឋកិច្ចកាន់តែធ្ងន់ធ្ងរឡើង។ យោងតាមក្រសួងសុខាភិបាលប៉ាឡេស្ទីន ក្នុងរយៈពេលប៉ុន្មានសប្តាហ៍ចាប់តាំងពីការវាយប្រហារដ៏ធ្ងន់ធ្ងរមិនធ្លាប់មានរបស់ក្រុមហាម៉ាសលើអ៊ីស្រាអែល ប្រជាជនប៉ាឡេស្ទីនជាង ៧០ % នៅក្នុងតំបន់ហ្កាហ្សាត្រូវបានផ្លាស់ទីលំនៅ។ផ្ទះសម្បែងជាង២០០.០០០ខ្នង ត្រូវបានបំផ្លាញដោយផ្នែក ឬទាំងស្រុង ស្ទើរតែពាក់កណ្តាលនៃលំនៅដ្ឋាននៅក្នុងដែនដីមួយនេះ ព្រមទាំងអគារ យ៉ាងហោចណាស់៤២កន្លែង ដែលជាកម្មសិទ្ធិរបស់មូលដ្ឋានរបស់ទីភ្នាក់ងារផ្ដល់ជំនួយ និងការងាររបស់អង្គការសហប្រជាជាតិសម្រាប់ប៉ាឡេស្ទីនបានរងការខូចខាតយ៉ាងធ្ងន់ធ្ងរផងដែរ៕

បណ្ដាញសង្គម

ព័ត៌មានថ្មីៗ

រលកកម្តៅជាប់កំណត់ត្រាធ្វើឲ្យទីក្រុងចំនួន ២៥របស់អ៊ីតាលីស្ថិតក្រោមការប្រកាសអាសន្នកម្រិតពណ៌ក្រហម

កម្ពុជានិងអាមេរិក ពង្រឹងកិច្ចសហប្រតិបត្តិការលើការប្រើប្រាស់បច្ចេកវិទ្យាថ្មី ដើម្បីបង្រ្កាបបទល្មើសព្រៃឈើ

ម៉ារ៉ុក៖ ការសម្រុកចូលរបស់អន្តោប្រវេសន៍ទៅក្នុងដែនដី Ceuta គឺដោយសារចចាមអារ៉ាមលើបណ្ដញសង្គម

ប្រមុខការទូតកម្ពុជា ថ្លែងអំណរគុណយ៉ាងជ្រាលជ្រៅចំពោះតួនាទីយ៉ាងសកម្មរបស់ម៉ាឡេស៊ី ក្នុងការរក្សាសន្តិភាព និងស្ថិរភាពយូរអង្វែងក្នុងតំបន់ ជាពិសេសក្នុងជម្លោះព្រំដែនកម្ពុជា-ថៃ

ហុងគ្រីប្រឈមនឹងរយៈពេល ៥ថ្ងៃដ៏ធ្ងន់ធ្ងរ ខណៈគ្រោះរាំងស្ងួត បង្ខំឲ្យបិទរោងចក្រថាមពលនុយក្លេអ៊ែរ

អ្នកភូមិវាយតម្លៃការខូចខាត ពេលទឹកជំនន់បំផ្លិចបំផ្លាញនៅរដ្ឋ Assam ប្រទេសឥណ្ឌា

កម្រិតទឹកទាបជាប់កំណត់ត្រាបង្ហាញនាវាលិច និងបណ្តាលឲ្យទូកជាប់លើខ្សាច់ក្នុងប្រទេសក្រូអាត

ការស្វែងរកមនុស្សបាត់ខ្លួន ២៨នាក់នៅតែបន្ត បន្ទាប់ពីស្រឡាងបានកើតអគ្គិភ័យ នៅកោះ Madura របស់ឥណ្ឌូនេស៊ី

អ៊ីស្រាអែលបង្ហាញ «ក្តីបារម្ភ» ទៅកាន់សហរដ្ឋអាមេរិក ជុំវិញផែនការតំបន់ហ្កាហ្សា

ចិនជម្លៀសប្រជាជនចេញ ខណៈភ្លៀងធ្លាក់ខ្លាំងកើតមាននៅភាគពាយ័ព្យ និងភាគនិរតីប្រទេស

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877