BTV NEWS

សមត្ថកិច្ចកំពុងស្រាវជ្រាវករណីក្រុមឧក្រិដ្ឋជនអូសទាញពលករខ្មែរដែលវិលត្រឡប់មកពីថៃឲ្យធ្វើសកម្មភាព Online Scams

៦ខែ សមត្ថកិច្ចបង្ក្រាបករណីជួញដូរមនុស្ស ១១២ករណី និងឃាត់ខ្លួន ១៦៩នាក់ និងសង្គ្រោះជនរងគ្រោះជិត ៦០០នាក់

តំណាងអយ្យការចោទប្រកាន់ រតនៈ ពិសាល ពីបទហិង្សាដោយចេតនាមានស្ថានទម្ងន់ទោស ក្រោយបង្កហិង្សា និងអះអាងថា ខ្លួនជាកូនខ្លាមេ០៧

សាម ម៉ីជូ ត្រូវបាននគរបាលនាំខ្លួនដល់អយ្យការអមសាលាដំបូងរាជធានីភ្នំពេញហើយ ដើម្បីចោទប្រកាន់

សន្តិសុខ និង សង្គម

អ៊ីរ៉ង់អំពាវនាវឲ្យបណ្ដាប្រទេសអ៊ីស្លាម ដាក់ទណ្ឌកម្មអ៊ីស្រាអែល ខណៈ OPEC គ្មានគម្រោងចាត់វិធានការភ្លាមៗ

រដ្ឋមន្ត្រីការបរទេសអ៊ីរ៉ង់ លោក ហូសេន អាមៀអាប់ដូឡាហៀន (Hossein Amirabdollahian) បាននិយាយកាលពីថ្ងៃពុធទី១៨ ខែតុលា ថា សមាជិកនៃអង្គការសហប្រតិបត្តិការឥស្លាម (OIC) គួរតែដាក់ទណ្ឌកម្មប្រេង និងទណ្ឌកម្មផ្សេងទៀតលើអ៊ីស្រាអែល ហើយបណ្តេញឯកអគ្គរដ្ឋទូតអ៊ីស្រាអែលទាំងអស់ចេញពីក្នុងប្រទេសជាសមាជិក។ កិច្ចប្រជុំបន្ទាន់មួយរបស់ OIC កំពុងប្រព្រឹត្តទៅនៅទីក្រុង ចេដា (Jeddah) ប្រទេសអារ៉ាប៊ីសាអ៊ូឌីត ដើម្បីពិភាក្សាអំពីជម្លោះអ៊ីស្រាអែល និងប៉ាឡេស្ទីនដែលកំពុងរីកកាន់តែធំ បន្ទាប់ពីមានការបំផ្ទុះនៅមន្ទីរពេទ្យមួយនៅតំបន់ហ្កាហ្សា កាលពីល្ងាចថ្ងៃអង្គារសម្លាប់ប្រជាជនប៉ាឡេស្ទីនជាង៥០០នាក់។ក្រសួងការបរទេសអ៊ីរ៉ង់បាននិយាយនៅក្នុងសេចក្តីថ្លែងការណ៍មួយថា បណ្ដារដ្ឋមន្ត្រីការបរទេសអំពាវនាវឱ្យមានការដាក់ទណ្ឌកម្មជាបន្ទាន់ និងពេញលេញលើអ៊ីស្រាអែលដោយបណ្ដាប្រទេសអ៊ីស្លាម រួមទាំងទណ្ឌកម្មប្រេង បន្ថែមពីលើការបណ្តេញឯកអគ្គរដ្ឋទូតអ៊ីស្រាអែល ប្រសិនបើទំនាក់ទំនងជាមួយរបបប្រឆាំងជ្វីហ្វ (Zionist) ត្រូវបានបង្កើតឡើង ។រដ្ឋមន្ត្រីការបរទេសអ៊ីរ៉ង់រូបនេះ ក៏បានអំពាវនាវឱ្យមានការបង្កើតក្រុមមេធាវីអ៊ីស្លាម ផងដែរ ដើម្បីចងក្រងឯកសារឧក្រិដ្ឋកម្មសង្គ្រាមដែលអាចប្រព្រឹត្តដោយអ៊ីស្រាអែលនៅតំបន់ហ្កាហ្សា។ សូមបញ្ជាក់ថា ប្រទេសអ៊ីរ៉ង់មិនមានទំនាក់ទំនងការទូតជាមួយអ៊ីស្រាអែលទេ។ មុនពេលការផ្ទុះនៅមន្ទីរពេទ្យហ្កាហ្សាកាលពីថ្ងៃអង្គារ ក្រុមអាជ្ញាធរសុខាភិបាលក្នុងតំបន់នេះបាននិយាយថា មនុស្សយ៉ាងហោចណាស់ជាង៣.០០០ នាក់បានស្លាប់ក្នុងអំឡុងការទម្លាក់គ្រាប់បែករយៈពេល ១១ ថ្ងៃរបស់អ៊ីស្រាអែលដែលបានចាប់ផ្តើមបន្ទាប់ពីការវាយលុករបស់ពួកហាម៉ាសកាលពីថ្ងៃទី ៧ ខែតុលា ទៅលើសហគមន៍អ៊ីស្រាអែលភាគខាងត្បូង ដែលមនុស្ស ១.៣០០ នាក់បានស្លាប់ និងប្រមាណ២០០ នាក់ ត្រូវបាន ក្រុមហាម៉ាស ចាប់ជាចំណាប់ថ្នូរចូលទៅក្នុងតំបន់ហ្កាហ្សា៕

ការកើនឡើងផ្សព្វផ្សាយព័ត៌មានមិនពិត ជំរុញការដុតបញ្ឆេះជម្លោះរវាងអ៊ីស្រាអែល និងក្រុមហាម៉ាស

ខណៈជម្លោះរវាងអ៊ីស្រាអែល និងក្រុមហាម៉ាស រាលដាលកាន់តែធំ ក្រុមនិយតករ និងក្រុមអ្នកវិភាគ និយាយថា រលកនៃការផ្សព្វផ្សាយព័ត៌មានក្លែងក្លាយតាមអ៊ីនធឺណិត ប្រឈមការដុតបញ្ឆេះភាពតានតឹង បន្ថែមទៀត និងធ្វើឲ្យជម្លោះរីកកាន់តែធំក្នុងសង្គ្រាមដ៏ធ្ងន់ធ្ងរមួយនេះ។ ការផ្ទុះនៅមន្ទីរពេទ្យហ្កាហ្សា (Gaza) ដែលបានសម្លាប់ជនជាតិប៉ាឡេស្ទីនរាប់រយនាក់កាលពីថ្ងៃអង្គារ គឺជាការផ្តោតចុងក្រោយនៃសកម្មភាពកើនឡើង ខណៈក្រុមអ្នកគាំទ្រភាគីទាំងពីរនៅក្នុងការប្រយុទ្ធគ្នារវាងអ៊ីស្រាអែល និងក្រុមហាម៉ាសព្យាយាម ពង្រឹងការនិទានរឿងរបស់ភាគីខ្លួន និងដាក់ការសង្ស័យទៅលើភាគីម្ខាងទៀត។ លោកប្រធានាធិបតីអាមេរិក Joe Biden បានសំដៅលើបញ្ហាប្រឈមនៃការផ្ទៀងផ្ទាត់ព័ត៌មានក្នុងអំឡុងពេលជម្លោះនៅក្នុងការកត់សម្គាល់អំពីការផ្ទុះនៅមន្ទីរពេទ្យក្នុងដំណើរទស្សនកិច្ចទៅកាន់ប្រទេសអ៊ីស្រាអែលកាលពីថ្ងៃពុធ ដោយនិយាយថាការទទួលខុសត្រូវចំពោះឧបទ្ទវហេតុ នេះទំនងជាស្ថិតនៅជាមួយសត្រូវរបស់អ៊ីស្រាអែល។ អង្គភាពត្រួតពិនិត្យការពិតរបស់សារព័ត៌មាន Reuters បានកំណត់ករណីជាច្រើននៃការបង្ហោះតាមប្រព័ន្ធផ្សព្វផ្សាយសង្គមដោយប្រើរូបភាពក្លែងក្លាយ និងព័ត៌មានអំពីជម្លោះអ៊ីស្រាអែល និងក្រុមហាម៉ាស និងផ្សេងទៀតដែលការភាន់ច្រឡំជាជាងការចេរញផ្សាយព័ត៌មានមិនពិតដោយចេតនានាំឲ្យ មានភាពតានតឹងកាន់តែខ្លាំងឡើង។គណនី X មួយមានឈ្មោះ ថា Farida Khan ដែលអះអាងថាជាអ្នកយកព័ត៌មានរបស់ក្រុមហ៊ុន Al Jazeera ក្នុងតំបន់ Gaza បានបង្ហោះសារមួយដោយនិយាយថា ពួកគេមានវីដេអូនៃការបាញ់របស់ក្រុមហាម៉ាស បានធ្លាក់លើមន្ទីរពេទ្យនៅក្នុងឧបទ្ទវហេតុកាលពីថ្ងៃអង្គារ។ ក្រុមហ៊ុនប្រព័ន្ធផ្សព្វផ្សាយAl Jazeera បានជូនដំណឹងជាបន្តបន្ទាប់ដល់អ្នកប្រើប្រាស់ប្រព័ន្ធផ្សព្វផ្សាយសង្គមថាគណនីនេះមិនមានទំនាក់ទំនងជាមួយសេវាកម្មព័ត៌មាននោះទេ ។ សារព័ត៌មាន Al Jazeera បានប្រាប់សារព័ត៌មាន Reuters ថា ខ្លួនពុំបានជួលបុគ្គលដែលមានឈ្មោះ Farida Khan ទេ។ ក្រោយមកគណនីត្រូវបានលុបចេញ៕

ពលរដ្ឋប៉ាឡេស្ទីន ចាត់ទុកអាមេរិក ជាអ្នកទទួលខុសត្រូវចំពោះសង្គ្រាមនៅតំបន់ហ្គាហ្សា ខណៈជម្លោះនៅតែបន្ត

ប៉ាឡេស្ទីន៖ ពលរដ្ឋប៉ាឡេស្ទីន បានចាត់ទុកសហរដ្ឋអាមេរិក ថាជាអ្នកទទួលខុសត្រូវចំពោះសង្គ្រាមនៅតំបន់ហ្គាហ្សា ខណៈពួកគេកាន់ទុក្ខសម្រាប់សាច់ញាតិ កាលពីថ្ងៃពុធ (១៨ តុលា) ដែលត្រូវបានសម្លាប់ក្នុងអំឡុងពេលការទម្លាក់គ្រាប់បែកមួយយប់ លើទីតាំងភាគខាងត្បូងនៃតំបន់ហ៊ុមព័ទ្ធមួយនេះ និងខណៈដែលប្រធានាធិបតីសហរដ្ឋអាមេរិក លោក ចូ បៃដិន បានទៅដល់ប្រទេសអ៊ីស្រាអែល។ ដំណើរទស្សនកិច្ចរបស់លោក បៃដិន ធ្វើឡើងរយៈពេលមួយថ្ងៃ បន្ទាប់ពីការវាយប្រហារទៅលើមន្ទីរពេទ្យមួយនៅតំបន់ហ្គាហ្សា ដែលបានសម្លាប់ប្រជាជនប៉ាឡេស្ទីនរាប់រយនាក់ និងបានធ្វើឱ្យភាពតានតឹងកាន់តែខ្លាំងឡើងនៅមជ្ឈិមបូព៌ា។ជនជាតិប៉ាឡេស្ទីនម្នាក់បាននិយាយថា «ជូនចំពោះលោកប្រធានាធិបតី បៃដិន និងរដ្ឋបាលរបស់លោកឲ្យបានដឹងថា ប្រជាជនប៉ាឡេស្ទីនគ្រប់ជំនាន់ នឹងមិនបំភ្លេចសង្រ្គាមនេះឡើយ ហើយប្រវត្តិសាស្រ្តនឹងត្រូវបានកត់ត្រាថា នេះបណ្ដាលមកពីរដ្ឋបាលអាមេរិក ប្រាក់ជំនួយរាប់ពាន់លានដុល្លាររបស់អាមេរិក ការគាំទ្ររបស់ប្រទេសនេះ ជាមួយនឹងជំនួយអាវុធមហាប្រល័យដល់កងកម្លាំងការពារអ៊ីស្រាអែល ដែលបណ្តាលឱ្យមានសោកនាដកម្ម ដែលកំពុងកើតឡើងនៅពេលនេះក្នុងតំបន់ហ្គាហ្សា»។បេសកកម្មការទូតដ៏ស្មុគស្មាញរបស់លោក បៃដិន ទៅកាន់មជ្ឈិមបូព៌ា ត្រូវបានគេសន្មតថា ធ្វើឱ្យតំបន់នេះស្ងប់ស្ងាត់ និងជំរុញកិច្ចខិតខំប្រឹងប្រែងមនុស្សធម៌សម្រាប់តំបន់ហ្គាហ្សា ប៉ុន្តែបន្ទាប់ពីការវាយប្រហារនៅមន្ទីរពេទ្យនោះរួចមក ប្រទេសហ្ស៊កដានី បានលុបចោលកិច្ចប្រជុំកំពូលដែលបានគ្រោងទុកជាមួយលោក បៃដិន។មុនពេលការវាយប្រហារនៅមន្ទីរពេទ្យ ក្រុមអាជ្ញាធរសុខាភិបាលក្នុងតំបន់ហ្គាហ្សាបាននិយាយថា យ៉ាងហោចណាស់មនុស្ស ៣.០០០នាក់ បានស្លាប់នៅក្នុងការទម្លាក់គ្រាប់បែករយៈពេល ១១ថ្ងៃរបស់អ៊ីស្រាអែល ដែលបានចាប់ផ្តើមបន្ទាប់ពីក្រុមហាម៉ាស បានបើកការវាយប្រហារដ៏ភ្ញាក់ផ្អើលលើអ៊ីស្រាអែល និងបានធ្វើឱ្យមនុស្សជិត ២០០នាក់ ត្រូវបានចាប់ខ្លួនទៅកាន់តំបន់ហ្គាហ្សា ជាចំណាប់ថ្នូរផងដែរ៕

លោក បៃដិន ប្តេជ្ញាផ្តល់ជំនួយសម្រាប់តំបន់ហ្គាហ្សា និងអ៊ីស្រាអែល ខណៈការតវ៉ាបានធ្វើឲ្យកក្រើកមជ្ឈិមបូព៌ា

អាមេរិក៖ ប្រធានាធិបតីអាមេរិក លោក ចូ បៃដិន បានសន្យាជួយអ៊ីស្រាអែល និងប៉ាឡេស្ទីន ក្នុងអំឡុងពេលទស្សនកិច្ចរបស់ខ្លួននៅអ៊ីស្រាអែល កាលពីថ្ងៃពុធ (១៨ តុលា) ប៉ុន្តែការបំផ្ទុះនៅមន្ទីរពេទ្យដ៏បង្ហូរឈាម ដែលលោកបានសន្មតថា ជាគ្រាប់រ៉ុក្កែតដែលបាញ់ដោយពួកសកម្មប្រយុទ្ធនៅតំបន់ហ្គាហ្សា បានបង្កការលំបាកដល់កិច្ចពិភាក្សាក្នុងការរារាំងការរីករាលដាលនៃសង្គ្រាម។ដោយភ័យខ្លាចកំណើនអស្ថិរភាពក្នុងតំបន់កាន់តែទូលំទូលាយ ក្រុមអ្នកតវ៉ាបានធ្វើបាតុកម្មប្រឆាំងអ៊ីស្រាអែល នៅជុំវិញមជ្ឈិមបូព៌ាជុំវិញការបាញ់មីស៊ីល ដែលបានបណ្ដាលឲ្យឆាបឆេះមន្ទីរពេទ្យ អាល់ អាលី អារ៉ាប់ នៃតំបន់ហ្គាហ្សា ស្ទ្រីប កាលពីល្ងាចថ្ងៃអង្គារ ដែលក្រុមមន្ត្រីប៉ាឡេស្ទីនបាននិយាយថា បានសម្លាប់មនុស្សជិត៥០០នាក់។ ក្រុមមន្រ្តីប៉ាឡេស្ទីន បានស្តីបន្ទោសការវាយប្រហារតាមអាកាសរបស់អ៊ីស្រាអែល ថាជាមូលហេតុនៃការផ្ទុះនោះ ខណៈដែលអ៊ីស្រាអែលបាននិយាយថា ការវាយប្រហារនោះត្រូវបានបង្កឡើងដោយការបាញ់រ៉ុក្កែតបរាជ័យពីក្រុមសកម្មប្រយុទ្ធអ៊ីស្លាមជីហាត ប៉ុន្តែក្រុមឧទ្ទាមនោះបានបដិសេធការទទួលខុសត្រូវលើបញ្ហានេះ។លោក បៃដិន សន្យាផ្ដល់ជំនួយបន្ថែមដល់អ៊ីស្រាអែល ហើយក៏បាននិយាយថា សហរដ្ឋអាមេរិក នឹងផ្តល់មូលនិធិថ្មីចំនួន ១០០លានដុល្លារ សម្រាប់ជំនួយមនុស្សធម៌ដល់ប្រជាជនប៉ាឡេស្ទីន នៅតំបន់ហ្គាហ្សានិងតំបន់វេស ប៊ែង ដែលកាន់កាប់ដោយអ៊ីស្រាអែលផងដែរ។ នៅចុងបញ្ចប់នៃដំណើរទស្សនកិច្ចរបស់លោក បៃដិន ការិយាល័យរបស់នាយករដ្ឋមន្ត្រីអ៊ីស្រាអែល លោក បេនចាមីន ណេតាន់យ៉ាហ៊ូ បានដាក់ចេញនូវសេចក្តីថ្លែងការណ៍មួយដោយនិយាយថា អ៊ីស្រាអែលនឹងអនុញ្ញាតឱ្យស្បៀងអាហារ ទឹក និងថ្នាំសង្រ្គោះ ចូលទៅដល់ភាគខាងត្បូងតំបន់ហ្គហ្សា តាមរយៈប្រទេសអេហ្ស៊ីបផងដែរ៕

លោក Biden គាំទ្រការអះអាងរបស់អ៊ីស្រាអែលចំពោះការផ្ទុះដ៏បង្ហូរឈាមនៅមន្ទីរពេទ្យហ្កាហ្សា

អាមេរិក៖ លោកប្រធានាធិបតីអាមេរិក Joe Bidenនិយាយថា ការបំផ្ទុះដ៏សាហាវនៅមន្ទីរពេទ្យហ្កាហ្សា( Gaza សម្លាប់មនុស្សជាង៥០០នាក់ ទំនងជាត្រូវបានបង្កឡើងដោយពួកសកម្មប្រយុទ្ធប៉ាឡេស្ទីន ដោយគាំទ្រដល់ការអះអាងរបស់អ៊ីស្រាអែល អំពីឧបទ្ទវហេតុនេះ នៅពេលលោកបំពេញទស្សនកិច្ចនៅក្នុងប្រទេសជាសម្ព័ន្ធមិត្តមួយនេះ។ លោក Biden ដែលបានទៅដល់ទីក្រុង តេល អាវីវ(Tel Aviv) កាលពីថ្ងៃពុធ បាននិយាយថា លោក សោកស្ដាយ និងខឹងសម្បារយ៉ាងខ្លាំងចំពោះការផ្ទុះនេះ។ យោធាអ៊ីស្រាអែល បាននិយាយថា ហេតុការណ៍នោះបណ្តាលមកពីការបាញ់រ៉ូកែតបរាជ័យរបស់ប៉ាឡេស្ទីន ។ ប៉ុន្តែ ក្រុមមន្ត្រីប៉ាឡេស្ទីនបាននិយាយថា ការវាយប្រហារតាមអាកាសរបស់អ៊ីស្រាអែលបានវាយប្រហារមន្ទីរពេទ្យនោះ។អំឡុងដំណើរបំពេញទស្សនកិច្ចនោះ លោក Biden ក៏បានប្រកាសផងដែរថា អ៊ីស្រាអែល បានយល់ព្រមឲ្យមានការដឹកជញ្ជូនជំនួយមនុស្សធម៌ពីប្រទេសអេហ្ស៊ីប ចូលទៅតំបន់ហ្គាហ្សា។លោក Biden ក៏បាននិយាយផងដែរថា កញ្ចប់មូលនិធិចំនួន១០០លានដុល្លារ របស់សហរដ្ឋអាមេរិក នឹងត្រូវបានបែងចែកដើម្បីគាំទ្រដល់ជនស៊ីវិលប៉ាឡេស្ទីន។ លទ្ធភាពទទួលបានស្បៀងអាហារ ទឹក ប្រេងឥន្ធនៈ និងថាមពលត្រូវបានរារាំងដោយអ៊ីស្រាអែល ចាប់តាំងពីជម្លោះបានចាប់ផ្តើម ដែលបង្កឱ្យមានការព្រួយបារម្ភយ៉ាងខ្លាំងអំពីវិបត្តិមនុស្សធម៌។ប្រធានាធិបតីអ៊ីស្រាអែលបាននិយាយថាបានយល់ព្រមអនុញ្ញាតឱ្យផ្តល់ជំនួយដោយផ្អែកលើការយោគយល់ថា ជំនួយនេះ នឹងត្រូវទៅឲ្យដល់ដៃជនស៊ីវិល មិនមែនជាក្រុមហាម៉ាសនោះទេ។បន្តិចក្រោយមក លោកនាយករដ្ឋមន្ត្រី បេន ចាមីនណេតានយ៉ាហ៊ូ (Benjamin Netanyahu) បានបញ្ជាក់ថា អ៊ីស្រាអែល នឹងមិនរារាំងការផ្ដល់អាហារ ទឹក និងថ្នាំពេទ្យ ដែលដឹកជញ្ជូនចេញពីប្រទេសអេហ្ស៊ីបទៅកាន់ក្រុមជនស៊ីវិលនៅភាគខាងត្បូង តំបន់ហ្កាហ្សា នោះទេ។ទោះយ៉ាងណាក៏ដោយ អ៊ីស្រាអែលនិងមិនអនុញ្ញាតឱ្យជំនួយណាមួយឆ្លងកាត់ទឹកដីរបស់ខ្លួនឡើយ រហូតទាល់តែចំណាប់ថ្នូរដែលក្រុមហាម៉ាសបានចាប់ខ្លួនទាំងអស់ត្រូវបានដោះលែង។ អ៊ីស្រាអែលនិយាយថា មនុស្សជិត ២០០ នាក់ត្រូវបានចាប់ពង្រត់៕

អង្គការសហប្រជាជាតិរង់ចាំភ្លើងខៀវ ដើម្បីដឹកជំនួយចូលទៅក្នុងតំបន់ហ្គាហ្សា ខណៈមានវិបត្តិមនុស្សធម៌

កម្មវិធីស្បៀងអាហារពិភពលោករបស់អង្គការសហប្រជាជាតិ (WFP) បាននិយាយកាលពីថ្ងៃអង្គារទី១៧តុលាថា ខ្លួនមានជំនួយរាប់តោន កំពុងរង់ចាំការអនុញ្ញាតឲ្យចូលទៅក្នុងតំបន់ហ្គាហ្សា ជាទីដែលការទម្លាក់គ្រាប់បែករបស់អ៊ីស្រាអែលបាននាំឲ្យមានវិបត្តិមនុស្សធម៌ និងបាននិយាយថា ការផ្គត់ផ្គង់អាហារ នៅក្នុងតំបន់ហ្គាហ្សា នឹងអស់ក្នុងរយៈពេលប៉ុន្មាថ្ងៃទៀតនេះ។ រូបភាពបញ្ចេញដោយកម្មវិធីស្បៀងអាហារពិភពលោករបស់អង្គការសហប្រជាជាតិ បានបង្ហាញពីរថយន្តដឹកសម្ភារៈផ្គត់ផ្គង់ នៅក្នុងអាកាសយានដ្ឋាន Al-Arish ក្នុងឧបទ្វីបស៊ីណៃ ដែលនៅជិតច្រកឆ្លងដែន រ៉ាហ្វា (Rafah) ជាចំណុចចូលតែមួយគតទៅកាន់តំបន់ហ្គាហ្សា មិនត្រូវបានគ្រប់គ្រងដោយអ៊ីស្រាអែល ។ប្រភពខាងលើនេះ បាននិយាយថា ការផ្គត់ផ្គង់អាហារដ៏សំខាន់នៅក្នុងតំបន់ហ្គាហ្សា នឹងបន្តបានត្រឹមតែរយៈពេល២សប្ដាហ៍ប៉ុណ្ណោះ។ អេហ្ស៊ីប បាននិយាយថាច្រកព្រំដែន Rafah ពុំទាន់ត្រូវបានបិទជាផ្លូវការទេ ប៉ុន្តែ មិនអាចដំណើរការបាន ដោយសារតែការវាយប្រហារតាមអាកាសរបស់អ៊ីស្រាអែលទៅលើភាគីតំបន់ហ្គាហ្សា ។រដ្ឋមន្ត្រីក្រសួងមហាផ្ទៃរបស់តំបន់ហ្គាហ្សា បាននិយាយថា មនុស្សយ៉ាងហោចណាស់៤៩នាក់ បានស្លាប់ ក្នុងការវាយទម្លាក់គ្រាប់បែកទាំងយប់របស់អ៊ីស្រាអែល ទៅលើព្រំដែន Rafah និង ជិតទីក្រុង ខាន់យូនីស( Khan Younis)។ រថយន្តដឹកជំនួយរបស់អេហ្ស៊ីបបានរំកិលកាន់តែជិតកាលពីថ្ងៃអង្គារទៅកាន់ច្រកឆ្លងកាត់ Rafah ប៉ុន្តែដោយមិនមានកិច្ចព្រមព្រៀងក្នុងកន្លែងផ្តល់ជំនួយ ហើយភាគីប៉ាឡេស្ទីននៅតែបិទដោយសារតែការវាយប្រហារ គេមិនច្បាស់ថានៅពេលណាពួកគេអាចឆ្លងកាត់។ បន្ទាប់ពីការចរចារយៈពេល៩ម៉ោង រដ្ឋមន្ត្រីការបរទេសអាមេរិក លោក Antony Blinken បាននិយាយកាលពីព្រឹកថ្ងៃអង្គារថា លោកបានយល់ព្រមជាមួយអ៊ីស្រាអែល បង្កើតផែនការ ដើម្បីទទួលបានជំនួយទៅកាន់តំបន់ហ្គាហ្សា ៕

មនុស្សជាង ១.០០០នាក់ ត្រូវជម្លៀសខ្លួនម្តងទៀតនៅវៀតណាម បន្ទាប់ពីហានិភ័យទឹកជំនន់

ប្រជាជនភាគច្រើនដែលរស់នៅក្នុងខណ្ឌ លីវ ឈីវ (Lieu Chieu) នៃទីក្រុង ដាណាង ប្រទេសវៀតណាម បានចាកចេញពីលំនៅឋានរបស់ពួកគេ ទៅកាន់ទីទួលខ្ពស់កាលពីព្រឹកថ្ងៃអង្គារ (១៧ តុលា)។ មនុស្សជិត ៥.០០០នាក់ នៅក្នុងតំបន់នេះត្រូវបានជម្លៀសចេញកាលពីយប់ថ្ងៃសុក្រ បន្ទាប់ពីមានភ្លៀងធ្លាក់ខ្លាំងបានបណ្តាលឱ្យកម្ពស់ទឹកកើនឡើងដល់ ១,៥ម៉ែត្រ។ ពលរដ្ឋទាំងនោះបានត្រឡប់ទៅផ្ទះវិញកាលពីព្រឹកថ្ងៃច័ន្ទ (១៦ តុលា) ប៉ុន្តែមនុស្សជាង ១.០០០នាក់ ត្រូវជម្លៀសចេញម្តងទៀតកាលពីថ្ងៃអង្គារ បន្ទាប់ពីមានភ្លៀងធ្លាក់ខ្លាំងរយៈពេល ៤ម៉ោងនៅក្នុងតំបន់នេះ។លោក ប៊ួយ ជុង ខាញ់ (Bui Trung Khanh) ចៅសង្កាត់ ហ័រខាញ់ ណាម (Hoa Khanh Nam) នៃខណ្ឌ លីវ ឈីវ បាននិយាយថា មនុស្សភាគច្រើនបានផ្លាស់ទៅរស់នៅផ្ទះអ្នកជិតខាងរបស់ពួកគេនៅលើទីទួលជាងនេះ ហើយអ្នកផ្សេងទៀតត្រូវបានគេបញ្ជូនទៅកាន់ការិយាល័យរដ្ឋាភិបាល។ សូមបញ្ជាក់ថា ទីក្រុងដាណាង របស់ប្រទេសវៀតណាម ត្រូវបានគេរំពឹងថា នឹងមានភ្លៀងធ្លាក់បន្ថែមទៀតនៅប៉ុន្មានថ្ងៃខាងមុខនេះ ដោយសារឥទ្ធិពលនៃការធ្លាក់ចុះរបស់ភ្លៀងត្រូពិច៕

អាមេរិកបញ្ចេញរូបភាព និងវីដេអូ ពីឥរិយាបថដ៏គ្រោះថ្នាក់របស់យន្តហោះយោធាចិន

ក្រសួងការពារជាតិសហរដ្ឋអាមេរិក បានលើកឡើងពីក្តីបារម្ភដ៍ខ្លាំង អំពីឥរិយាបថនៃប្រតិបត្តិការដ៏គ្រោះថ្នាក់របស់យន្តហោះយោធាចិននៅក្នុងដែនអាកាសអន្តរជាតិ រួមទាំងការហោះហើរទៅជិតយន្តហោះយោធាសហរដ្ឋអាមេរិកយ៉ាងគ្រោះថ្នាក់។ ក្រសួងការពារជាតិ បានបញ្ចេញរូបភាព និងវីដេអូកាលពីថ្ងៃអង្គារបង្ហាញ១៥ករណីនៃឥរិយាបថប្រតិបត្តិការដ៏គ្រោះថ្នាក់ និងមានឥទ្ធិពលដោយយន្តហោះចម្បាំងរបស់ចិន នៅតំបន់សមុទ្រចិនខាងកើត និងខាងត្បូង។ រូបភាព និងវីដេអូជាច្រើន ត្រូវបានថតនៅចន្លោះខែមករា ឆ្នាំ២០២២ និងខែកញ្ញាឆ្នាំ២០២៣។ វីដេអូចាប់តាំងពីខែឧសភា ឆ្នាំ២០២២បានបង្ហាញពីយន្តហោះចម្បាំងចិន ឆ្លងកាត់ក្រោមយន្តហោះយោធាសហរដ្ឋអាមេរិក នៅសមុទ្រចិនខាងកើត។ ក្រសួងការពារជាតិនិយាយថាអាកាយានិកអាមេរិក បានបើកចេញឆ្ងាយរវាងយន្តហោះទាំងពីរ ប៉ុន្តែអាកាសយានិកចិនបានខិតមកជិតជាថ្មី ក្នុងចម្ងាយប្រមាណ៣ម៉ែត្រ ក្រោមយន្តហោះរបស់អាមេរិក។វីដេអូមួយផ្សេងទៀត កាលពីខែកក្កដាឆ្នាំនេះ បានថតយន្តហោះចម្បាំងចិន កំពុងដាក់ពង្រាយភ្លើងសញ្ញានៅសមុទ្រចិនខាងកើត។ មេបញ្ជាការនៃទីបញ្ជាការតំបន់ឥណ្ឌូ-ប៉ាស៊ីហ្វិក របស់សហរដ្ឋអាមេរិក ឧត្តមនាវីឯក John Aquilino បាននិយាយនៅក្នុងសន្និសីទសារព័ត៌មានថា លោក មានការព្រួយបារម្ភខ្លាំង អំពីសក្តានុពលសម្រាប់ឧបទ្ទវហេតុ ហើយឧបទ្ទវហេតុទាំងនោះ អាចឈានទៅរកការសន្និដ្ឋានខុស។

មានការផ្ទុះប្រតិកម្មជាច្រើនជុំវិញការវាយប្រហារលើមន្ទីរពេទ្យតំបន់ហ្គាហ្សា ដែលបានសម្លាប់មនុស្សរាប់រយនាក់

ការបំផ្ទុះនៅមន្ទីរពេទ្យមួយ ក្នុងតំបន់ហ្គាហ្សា បានសម្លាប់ជនជាតិប៉ាឡេស្ទីនប្រហែល ៥០០នាក់ កាលពីថ្ងៃអង្គារ (១៧ តុលា) នៅក្នុងឧប្បត្តិហេតុតែមួយគត់ ដែលមានមនុស្សស្លាប់ច្រើនបំផុត ចាប់តាំងពីអ៊ីស្រាអែលបានចាប់ផ្តើមយុទ្ធនាការទម្លាក់គ្រាប់បែកមិនឈប់ឈរ ក្នុងការសងសឹកចំពោះការវាយប្រហារឆ្លងព្រំដែនរបស់ក្រុមហាម៉ាស កាលពីថ្ងៃទី៧ ខែតុលា មក។ ភាគីទាំងពីរបានបដិសេធការទទួលខុសត្រូវចំពោះការទម្លាក់គ្រាប់បែកនេះ ដែលជំរុញឱ្យមានការផ្ទុះប្រតិកម្មចម្រុះជាច្រើនពីអន្តរជាតិ។ប្រធានាធិបតីសហរដ្ឋអាមេរិក លោក ចូ បៃដិន បាននិយាយថា ខ្លួនមានការខឹងសម្បារ និងសោកស្តាយយ៉ាងខ្លាំង ចំពោះហេតុការណ៍ផ្ទុះនៅមន្ទីរពេទ្យ អាល់ អាលី អារ៉ាប់ (Al Ahli Arab) ក្នុងតំបន់ហ្គាហ្សា ហើយលោកបានណែនាំក្រុមសន្តិសុខជាតិរបស់ខ្លួន ឱ្យបន្តប្រមូលព័ត៌មានលម្អិតអំពីរឿងរ៉ាវដែលបានកើតឡើងពិតប្រាកដ។អង្គការសុខភាពពិភពលោក ក៏បានថ្កោលទោសយ៉ាងខ្លាំងផងដែរ ចំពោះការវាយប្រហារលើមន្ទីរពេទ្យ នៅភាគខាងជើងនៃតំបន់ ហ្គាហ្សា ស្រ្ទីប មួយនេះ ដោយនិយាយថា មន្ទីរពេទ្យនេះដំណើរការដោយមានអ្នកជំងឺ អ្នកផ្តល់សេវាថែទាំសុខភាព និងអ្នកជម្លៀសខ្លួនខាងក្នុងដែលជ្រកកោននៅទីនោះ ហើយវាមិនមែនជាសមរភូមិប្រយុទ្ធគ្នានោះទេ។មេដឹកនាំក្រុមហាម៉ាស និងនាយករដ្ឋមន្ត្រីអ៊ីស្រាអែល បានចោទដាក់គ្នាជុំវិញការបំផ្ទុះនោះ ហើយភាគីទាំងពីរបានបដិសេធថាមិនបានធ្វើការវាយប្រហារនោះទេ។ លើសពីនេះទៅទៀត ប្រទេសស៊ីរី និងទួរគី ក៏បានចូលរួមជាមួយបណ្ដាប្រទេសជាច្រើនទៀត ក្នុងការថ្កោលទោសការវាយប្រហារនេះផងដែរ ខណៈស៊ីរីបានទម្លាក់ទំនួលខុសត្រូវនេះលើបណ្ដាប្រទេសលោកខាងលិច ជាពិសេសសហរដ្ឋអាមេរិក ចំពោះការសម្លាប់រង្គាលមួយនេះ និងបញ្ហានៅប្រទេសដទៃទៀត ហើយទួរគី បានអំពាវនាវឱ្យមនុស្សជាតិទាំងអស់ចាត់វិធានការដើម្បីបញ្ឈប់អំពើឃោរឃៅ ដែលមិនធ្លាប់មានពីមុនមកនៅក្នុងតំបន់ហ្គាហ្សា នេះផងដែរ៕

សហភាពអឺរ៉ុបធ្វើសមយុទ្ធយោធារួមគ្នាលើកដំបូង ក្នុងគោលបំណងពង្រឹងតួនាទីសន្តិសុខពិភពលោក

ប្រធានគោលនយោបាយការបរទេសរបស់សហភាពអឺរ៉ុប លោក Josep Borrell បាននិយាយកាលពីថ្ងៃអង្គារ (១៧ តុលា) ថា សហភាពអឺរ៉ុប បានចាប់ផ្តើមសមយុទ្ធយោធារួមគ្នាលើកដំបូងរបស់ពួកគេ ដើម្បីពង្រឹង «តួនាទីជាអ្នកការពារ និងអ្នកផ្តល់សេវាសន្តិសុខសម្រាប់ពិភពលោក»។ក្រុមទាហានបុរស និងស្ត្រី ជាង២.៨០០នាក់ មកពីប្រទេសអូទ្រីស អេស្ប៉ាញ បារាំង ហុងគ្រី អៀរឡង់ អ៊ីតាលី ម៉ាល់តា ព័រទុយហ្គាល់ និងមកពីប្រទេសរ៉ូម៉ានី កំពុងចូលរួមក្នុងសមយុទ្ធឈ្មោះ ម៉ៃឡេច-២៣ (MILEX-23) នៅឆ្នេរសមុទ្ររ៉ូតា ប្រទេសអេស្ប៉ាញ ដើម្បីបណ្តុះបណ្តាលសមត្ថភាពដាក់ពង្រាយយ៉ាងឆាប់រហ័សរបស់ពួកគេនៅខាងក្រៅសហភាពអឺរ៉ុប។សហភាពអឺរ៉ុប មានគោលបំណងពង្រឹងសមត្ថភាពក្នុងការដាក់ពង្រាយទាហានរហូតដល់ ៥.០០០នាក់យ៉ាងឆាប់រហ័សនៅឆ្នាំ២០២៥ ដើម្បីឆ្លើយតបទៅនឹងការគំរាមកំហែងដែលជិតមកដល់ ព្រមទាំងស្ថានភាពវិបត្តិផ្សេងៗ។ ក្នុងអំឡុងពេលធ្វើសមយុទ្ធនោះ ក្រុមទាហានចូលរួមក្នុងប្រតិបត្តិការវាយប្រហារនិមិត្តតាមអាកាស ដើម្បីធានាសុវត្ថិភាពកំពង់ផែដ៏សំខាន់មួយ៕

បណ្ដាញសង្គម

ព័ត៌មានថ្មីៗ

ផ្លូវជនបទស្ថិតក្រោមក្របខណ្ឌក្រសួងអភិវឌ្ឍន៍ជនបទ កំពុងលើកកម្ពស់ដល់ការរស់នៅប្រជាពលរដ្ឋ

ក្រុមគ្រួសារជនរងគ្រោះប្រាប់ថា របួសមិនទាន់ជាសះស្បើយទេ ៦ឆ្នាំក្រោយការផ្ទុះនៅកំពង់ផែបេរូតរបស់លីបង់

ប្រមុខរតនាគារ៖ អាមេរិក និងអ៊ីរ៉ង់ អាចនឹងឈានដល់កិច្ចព្រមព្រៀងច្រកសមុទ្រ Hormuz នៅថ្ងៃអង្គារ ឬថ្ងៃពុធ

ប្រព័ន្ធផ្សព្វផ្សាយរដ្ឋ៖ បំណាក់ដីបណ្ដាលឱ្យមនុស្ស ១៤នាក់ស្លាប់ នៅតំបន់ Amhara របស់អេត្យូពី

កម្ពុជាទទួលបានការគាំទ្រឱ្យធ្វើជាម្ចាស់ផ្ទះកីឡាតេក្វាន់ដូអាយ-ធីអែហ្វជើងឯកអាស៊ី២០២៨

Brussels Airlines រាយការណ៍ពីការខាតបង់ប្រតិបត្តិការ ៨០លានដុល្លារ អំឡុងការចំណាយលើប្រេងឥន្ធនៈខ្ពស់

ប្រភព៖ អាមេរិកបានប្រើប្រាស់មីស៊ីលចម្ងាយឆ្ងាយមានភាពជាក់លាក់ខ្ពស់ស្ទើរទាំងអស់ អំឡុងសង្គ្រាម ជាមួយអ៊ីរ៉ង់

មនុស្សជាង ៨.០០០នាក់ នៅតែបន្តនៅក្នុងជម្រកបណ្ដោះអាសន្ន ក្រោយរញ្ចួយដី ១សប្តាហ៍ នៅជប៉ុន

ក្រុម AOT ចុះសង្កេតការណ៍ ផ្ទៀងផ្ទាត់ និងរាយការណ៍អំពីស្ថានភាពព្រំដែននៅតំបន់ច្រកបឹងត្រកួន

កូរ៉េខាងត្បូង តវ៉ាចំពោះការអះអាងសិទ្ធិរបស់ជប៉ុន លើកោះតូចៗមានជម្លោះ

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877