BTV NEWS

ជនជាតិចិន ៣២៣នាក់ទៀត ត្រូវបានបណ្ដេញចេញពីកម្ពុជា ពាក់ព័ន្ធករណីឆបោកតាមប្រព័ន្ធអនឡាញ (Online Scams)

តុលាការចេញដីការឃុំខ្លួនជនជាតិចិន២នាក់ ជាមេខ្លោងពាក់ព័ន្ធករណីឆបោកជាក្រុមដោយមានការចាត់តាំង (Online Scam) ដាក់ពន្ធនាគារ

បង្ក្រាបករណី Online Scam ក្នុងបុរីប៉េងហួតច្បារអំពៅ ឃាត់ខ្លួនជនសង្ស័យជាបរទេសជាង ៨០នាក់

កម្ពុជា បន្តបណ្ដេញចេញជនបរទេសចំនួន ១,០៩០នាក់ទៀត ពាក់ព័ន្ធករណីឆបោកតាមប្រព័ន្ធអនឡាញ និងលួចឆ្លងដែនស្នាក់នៅគ្មានលិខិតឆ្លងដែន និងធ្វើការងារខុសច្បាប់

សន្តិសុខ និង សង្គម

មជ្ឈមណ្ឌលពិនិត្យបទឈប់បាញ់តំបន់ Nagorno-Karabakh បានបិទ ខណៈរុស្ស៊ីដកកងទ័ព

ទង់ជាតិប្រទេសរុស្ស៊ី និងទួរគី ត្រូវបានបង្ហូតចុះកាលពីថ្ងៃសុក្រ ដើម្បីប្រារព្ធការបិទមជ្ឈមណ្ឌលត្រួតពិនិត្យបទឈប់បាញ់នៅតំបន់ ណាហ្ក័រណូ-ការ៉ាបាក់(Nagorno-Karabakh)។ វាបានបង្ហាញសញ្ញា ពីការបញ្ចប់ការដាក់ពង្រាយកងរក្សាសន្តិភាពរុស្ស៊ីជាច្រើនឆ្នាំ នៅក្នុងតំបន់យុទ្ធសាស្ត្រ South Caucasus ។ កងកម្លាំងរក្សាសន្តិភាពរុស្ស៊ីជិត ២.០០០នាក់ ត្រូវបានបញ្ជូនទៅកាន់តំបន់បែកចែក កាលពីខែវិច្ឆិកា ឆ្នាំ ២០២០ ក្រោមកិច្ចព្រមព្រៀងរវាងទីក្រុងមូស្គូ ដែលបានបញ្ឈប់ការប្រយុទ្ធគ្នារយៈពេលប្រាំមួយសប្តាហ៍រវាងប្រទេសអាស៊ែបៃហ្សង់ និងកងកម្លាំងជនជាតិភាគតិចអាមេនី។ទោះបីជាមានការដាក់ពង្រាយក៏ដោយ ក៏ អាស៊ែបៃហ្សង់ ដណ្តើមយកតំបន់ការ៉ាបាក់មកវិញ ដោយប្រើកម្លាំងកាលពីខែកញ្ញា ឆ្នាំមុន បង្កឱ្យមានការភៀសខ្លួនជនជាតិភាគតិចអាមេនី យ៉ាងហោចណាស់ ១០០,000 នាក់ ដែលរស់នៅទីនោះ និងចាប់ខ្លួនមេដឹកនាំជនជាតិភាគតិចអាមេនីក្នុងតំបន់នោះ។ មេដឹកនាំនយោបាយរបស់ប្រទេសអាមេនី បានចោទប្រកាន់ទីក្រុងមូស្គូ ពីការបរាជ័យក្នុងការការពារផលប្រយោជន៍របស់ប្រទេសអាមេនី ជាការចោទប្រកាន់ដែលរុស្ស៊ីបានច្រានចោល។ ការសម្រេចចិត្តនេះត្រូវបានប្រកាសកាលពីដើមខែនេះ និងបញ្ចប់ការដាក់ពង្រាយ ដែលត្រូវបានកំណត់រហូតដល់ឆ្នាំ២០២៥។កងរក្សាសន្តិភាពមកពីប្រទេសរុស្ស៊ី និងទួរគី ក៏ដូចជាទាហានអាហ្ស៊េរី បានប្រមូលផ្តុំគ្នានៅមជ្ឈមណ្ឌលក្បែរទីក្រុង អាកដាម(Aghdam) ក្នុងផ្នែកមួយនៃតំបន់ការ៉ាបាក់(Karabakh) ដែលគ្រប់គ្រងដោយទីក្រុង Baku របស់ប្រទេសអាស៊ែបៃហ្សង់ តាំងពីឆ្នាំ២០២០។ លោក Sergei Istrakov នាយសេនាធិការរងនៃកងកម្លាំងប្រដាប់អាវុធរុស្ស៊ី បានអរគុណចំពោះ មិត្តភាពរវាងប្រទេសទាំងបី។លោកនិយាយថា គោលការណ៍សំខាន់នៃច្បាប់មនុស្សធម៌អន្តរជាតិ បានធ្វើឱ្យខ្លួនអាចបញ្ចប់ប្រតិបត្តិការបានមុនកាលកំណត់។ ប្រទេសអាមេនី និងអាស៊ែបៃហ្សង់ បាននិងកំពុងឆ្ពោះទៅរកកិច្ចព្រមព្រៀងសន្តិភាព ដើម្បីបញ្ចប់ជម្លោះជុំវិញតំបន់ការ៉ាបាក់ ដែលមានមកតាំងពីឆ្នាំ ១៩៨៨ ។

ការតវ៉ាជុំវិញសង្គ្រាមតំបន់ហ្កាហ្សា បន្តរីករាលដាលនៅទូទាំងសហរដ្ឋអាមេរិក និងនៅបរទេស

និស្សិតនៅសាកលវិទ្យាល័យ Stanford ភាគខាងជើងរដ្ឋកាលីហ្វ័រនីញ៉ា សហរដ្ឋអាមេរិក បានចូលរួមការតវ៉ានៅទូទាំងសកលវិទ្យាល័យដែលកំពុងកើនឡើងប្រឆាំងសង្រ្គាមរបស់អ៊ីស្រាអែលនៅតំបន់ហ្កាហ្សា។ និស្សិតជាច្រើនរយនាក់ បានធ្វើបាតុកម្មនៅបរិវេណសាលា មុនពេលបង្កើតការបោះជំរុំនៅ White Memorial Plaza នៅចំកណ្តាលសាកលវិទ្យាល័យ។ កាលពីព្រឹកថ្ងៃសុក្រ តង់ប្រមាណជាង២០ ត្រូវបានបង្កើតឡើង ហើយនិស្សិតប្រហែល ៥០ នាក់ បានប្រមូលផ្តុំគ្នានៅទីនោះ ។នគរបាលបានចាប់ខ្លួនមនុស្សជាង ១០០នាក់ ហើយបានរុះរើតង់ចេញពីទីធ្លាធំនៃបរិវេណសាកលវិទ្យាល័យទីក្រុង Manhattan ប៉ុន្តែក្រុមអ្នកតវ៉ា បានវិលត្រលប់មកវិញយ៉ាងឆាប់រហ័ស ហើយរៀបចំជំរំឡើងវិញ។ជាមួយគ្នានេះ ភាពតានតឹងបានផ្ទុះឡើងនៅមុខសកលវិទ្យាល័យ Sciences Po ដ៏ល្បីល្បាញរបស់ទីក្រុងប៉ារីស ប្រទេសបារាំង ខណៈជាការតវ៉ារបស់និស្សិតជុំវិញសង្គ្រាមនៅតំបន់ហ្កាហ្សា បានរីករាលដាលបន្ថែមទៀត កាលពីថ្ងៃសុក្រ។ នគរបាលបង្ក្រាបកុបកម្ម បានមកដល់ដើម្បីបន្ថយភាពតានតឹងបន្ទាប់ពីក្រុមបាតុករគាំទ្រអ៊ីស្រាអែល មកប្រឈមមុខដាក់គ្នាជាមួយក្រុមបាតុករគាំទ្រប៉ាឡេស្ទីន។និស្សិតដែលគាំទ្រប៉ាឡេស្ទីនមួយចំនួន បានចូលកាន់កាប់អគារសាកលវិទ្យាល័យកាលពីពេលយប់ ដោយទាមទារឱ្យស្ថាប័ននេះថ្កោលទោសចំពោះសកម្មភាពរបស់អ៊ីស្រាអែល។ លោក ហ៊ីចាម( Hicham) ជានិស្សិតថ្នាក់អនុបណ្ឌិតនៅសាកលវិទ្យា Sciences Po និយាយថា នៅពេលដែលយើងឃើញអ្វីដែលកំពុងកើតឡើងនៅក្នុងសហរដ្ឋអាមេរិក ហើយបច្ចុប្បន្ននេះនៅប្រទេសអូស្ត្រាលី យើងបន្តឆ្ពោះទៅមុខ ហើយយើងសង្ឃឹមថា វាក៏ចាប់ផ្តើមនៅប្រទេសបារាំងផងដែរ ព្រោះសាកលវិទ្យាល័យនានា ពិតជាមានតួនាទីក្នុងអ្វីដែលកំពុងកើតឡើងនៅដែនដីប៉ាឡេស្ទីន និងអំពើប្រល័យពូជសាសន៍ដែលកំពុងកើតឡើងនៅទីនោះ។កាលពីថ្ងៃសុក្រ អ្នកតវ៉ាជិត២០០នាក់បានប្រមូលផ្តុំគ្នានៅសកលវិទ្យាល័យ George Washington ដោយកាន់ផ្ទាំងរូបភាពមានសរសេរថា «សេរីភាពប៉ាឡេស្ទីន និងស្រែកពាក្យផ្សេងៗ»។

ក្រុមឧទ្ទាមមីយ៉ាន់ម៉ា និងរបបសឹក បន្តប្រយុទ្ធយ៉ាងក្ដៅគគុក ដើម្បីដណ្ដើមភូមិព្រំដែនដ៏សំខាន់

ទាហានប្រដាប់អាវុធដ៏ស្មោះស្ម័គ្ររបស់ក្រុមឧទ្ទាម កំពុងយាមល្បាតតាមដងផ្លូវនៃភូមិព្រំដែន មីយ៉ាវ៉ាឌី (Myawaddy) ភាគអាគ្នេយ៍នៃសហភាពមីយ៉ាន់ម៉ា ខណៈដែលកងទ័ពនៃរបបសឹកកំពុងកាន់អំណាច និងក្រុមតស៊ូ កំពុងចោមរោមប្រយុទ្ធយ៉ាងក្ដៅគគុកដើម្បីដណ្ដើមគ្រប់គ្រងច្រកព្រំដែនដែលមានពាណិជ្ជកម្មព្រំដែនជាង ១ ពាន់លានដុល្លារជារៀងរាល់ឆ្នាំមួយនេះ។ការតស៊ូដើម្បីគ្រប់គ្រងភូមិ មីយ៉ាវ៉ាឌី បានបង្ហាញពីតួនាទីរបស់វរសេនីយ៍ឯក លោក ស ជិតធូ (Saw Chit Thu) កងជីវពលរបស់ខ្លួន និងសហគ្រាសពាណិជ្ជកម្មដ៏ធំទូលាយ ដោយគូសបញ្ជាក់ពីឥទ្ធិពលដ៏លើសលប់របស់មេទ័ពរូបនេះនៅក្នុងទឹកដីដ៏មានសារៈសំខាន់ជាយុទ្ធសាស្ត្រ។កងទ័ពជាតិ ការ៉ែន (KNA) ដែលលោកដឹកនាំ មានវត្តមានជាយូរមកហើយ នៅក្នុងតំបន់លាតសន្ធឹងពីប្រទេសថៃ ដែលបានក្លាយជាសមរភូមិដ៏សំខាន់មួយក្នុងប៉ុន្មានសប្តាហ៍ថ្មីៗនេះ ខណៈការតស៊ូប្រឆាំងរបបសឹក ទទួលបានសន្ទុះប្រឆាំងនឹងយោធាដ៏មានឥទ្ធិពល។នៅដើមខែមេសា ភូមិ មីយ៉ាវ៉ាឌី គឺជាសមរភូមិជួរមុខ ខណៈដែលអ្នកប្រយុទ្ធតស៊ូដឹកនាំដោយសហភាពជាតិការ៉ែន (KNU) ដែលជាកងទ័ពជនជាតិភាគតិចចំណាស់ជាងគេមួយរបស់មីយ៉ាន់ម៉ា បានវាយរុញចូលទៅក្នុងតំបន់នោះ ហើយបានបណ្តេញកងទ័ពរបបយោធារាប់រយនាក់ចេញពីមូលដ្ឋានរបស់ពួកគេ។ការគ្រប់គ្រងទឹកដី មីយ៉ាវ៉ាឌី នៅតែជាសមរភូមិប្រយុទ្ធដ៏ក្ដៅគគុកមួយទៀតសម្រាប់របបយោធា ដែលជាប់គាំងនៅក្នុងសង្គ្រាមស៊ីវិលកាន់តែធំ ជាមួយកងទ័ពជនជាតិភាគតិចដែលបានបង្កើតឡើង និងចលនាតស៊ូមូលដ្ឋានដែលកើតឡើងក្រោយរដ្ឋប្រហារឆ្នាំ២០២១ របស់ខ្លួន៕

ចំនួនអ្នកស្លាប់ជនជាតិប៉ាឡេស្ទីន នៅតំបន់សង្គ្រាមហ្កាហ្សា ឡើងជាង ៣៤.៣០០ នាក់

ក្រសួងសុខាភិបាលដែលគ្រប់គ្រងដោយក្រុមហាម៉ាស បាននិយាយកាលពីថ្ងៃព្រហស្បតិ៍ (២៥ មេសា) ថាចំនួនអ្នកស្លាប់របស់ប៉ាឡេស្ទីន នៅតំបន់ហ្កាហ្សាស្ទ្រីប ពីការវាយប្រហាររបស់អ៊ីស្រាអែល ដែលកំពុងបន្ត បានកើនឡើងដល់ជាង ៣៤.៣០០ នាក់។នៅក្នុងសេចក្តីថ្លែងការណ៍មួយ ក្រសួងនិយាយថា កងទ័ពអ៊ីស្រាអែលបានសម្លាប់ជនជាតិប៉ាឡេស្ទីន ៤៣ នាក់ និងបង្ករបួសចំនួន ៦៤ នាក់ ក្នុងរយៈពេល ២៤ ម៉ោងចុងក្រោយនេះ ដែលនាំឱ្យចំនួនអ្នកស្លាប់សរុបកើនដល់ ៣៤.៣០៥ នាក់ និងអ្នករបួសដល់ ៧៧.២៩៣ នាក់ ចាប់តាំងពីជម្លោះអ៊ីស្រាអែល និងក្រុមហាម៉ាសបានផ្ទុះឡើងកាលពីថ្ងៃទី០៧ ខែតុលា ឆ្នាំ២០២៣ មក។ក្រសួងបន្ថែមថា នៅមានជនរងគ្រោះជាច្រើនជាប់នៅក្រោមគំនរបាក់បែក ហើយការបំផ្លិចបំផ្លាញនៃហេដ្ឋារចនាសម្ព័ន្ធបានរារាំងក្រុមជួយសង្គ្រោះមិនឱ្យទៅដល់ពួកគេ។ សារព័ត៌មាន ដឹ ថែម អហ្វ អ៊ីស្រាអែល (The Times of Israel) កាលពីថ្ងៃព្រហស្បតិ៍បានរាយការណ៍ថា យោធាអ៊ីស្រាអែលបានប្រមូលផ្តុំរថក្រោះ និងរថពាសដែករាប់សិបគ្រឿងនៅតាមបណ្តោយព្រំដែនរបស់ខ្លួនជាមួយភាគខាងត្បូងតំបន់ហ្កាហ្សាស្ទ្រីប។កាលពីយប់ថ្ងៃព្រហស្បតិ៍ សាជីវកម្មផ្សព្វផ្សាយសាធារណៈរបស់អ៊ីស្រាអែលរាយការណ៍ថា នាយករដ្ឋមន្ត្រីអ៊ីស្រាអែល លោក បេនចាមីន ណេតាន់យ៉ាហ៊ូ (Benjamin Netanyahu) បានយល់ព្រមលើប្រតិបត្តិការជើងគោកនៅក្រុង រ៉ាហ្វា ក្នុងកិច្ចប្រជុំគណៈរដ្ឋមន្ត្រីសង្គ្រាម ប៉ុន្តែគណៈរដ្ឋមន្ត្រីមិនបានធ្វើការសម្រេចចិត្តពាក់ព័ន្ធណាមួយឡើយ ខណៈដែលកងកម្លាំងការពារ IDF នៅតែរង់ចាំការណែនាំ៕

សមាជិកក្រុមប្រដាប់អាវុធ EMC ១៥នាក់ ត្រូវបានសម្លាប់ក្នុងប្រតិបត្តិការយោធានៅកូឡុំប៊ី

រដ្ឋមន្ត្រីការពារជាតិរបស់ប្រទេសកូឡុំប៊ី បាននិយាយថា យ៉ាងហោចណាស់ពួកឧទ្ទាមចំនួន ១៥ នាក់មកពីក្រុមប្រដាប់អាវុធ កងកម្លាំងកណ្ដាល (EMC) ត្រូវបានសម្លាប់កាលពីថ្ងៃព្រហស្បតិ៍ (២៥ មេសា) នៅក្នុងប្រតិបត្តិការមួយដោយកងកម្លាំងយោធានៅភាគនិរតីនៃប្រទេសកូឡុំប៊ី។ក្រុម EMC នេះគឺជាក្រុមប្រដាប់អាវុធខុសច្បាប់ដែលបង្កើតឡើងដោយមនុស្សជាង ៣.៥០០ នាក់ដែលបានកើតចេញពីបក្សពួកនៃអតីតទ័ពព្រៃ FARC ដែលបានបដិសេធកិច្ចព្រមព្រៀងសន្តិភាពឆ្នាំ២០១៦ ព្រោះនោះជាការអនុញ្ញាតឱ្យមានសមាហរណកម្មចូលទៅក្នុងសង្គមនៃយុទ្ធជនប្រហែល ១៣.០០០ នាក់របស់ខ្លួន។ការវាយប្រហារនេះបានកើតឡើងនៅតំបន់ជនបទនៃទីក្រុង អាហ្គេលីយ៉ា (Argelia) ក្នុងតំបន់ភ្នំ កាវកាស (Cauca) ដែលជាតំបន់យុទ្ធសាស្ត្រសម្រាប់ការជួញដូរគ្រឿងញៀន និងជាតំបន់ដែលរដ្ឋាភិបាលបានផ្អាកបទឈប់បាញ់ទ្វេភាគីជាមួយក្រុម EMC កាលពីខែមីនា បន្ទាប់ពីក្រុមនេះបានសម្លាប់មេដឹកនាំជនជាតិដើមភាគតិចម្នាក់។រដ្ឋាភិបាលរបស់ប្រធានាធិបតី ហ្គាស្តាវ៉ូ ផេត្រូ (Gustavo Petro) បានចាប់ផ្តើមការចរចាជាមួយក្រុម EMC នៅក្នុងខែតុលា ដែលរួមបញ្ចូលបទឈប់បាញ់ទ្វេភាគី ប៉ុន្តែថ្មីៗនេះ រចនាសម្ព័ន្ធប្រដាប់អាវុធចំនួន ៤ នៃក្រុមទាំង ៦ បានបោះបង់ចោលការសន្ទនាជុំវិញការបែកបាក់ផ្ទៃក្នុង ដោយនោះជាការសម្រេចចិត្តដែលអាចបង្កើនអំពើហិង្សានៃជម្លោះផ្ទៃក្នុង និងប៉ះពាល់ដល់ប្រជាជនស៊ីវិលថែមទៀត៕

មន្ត្រី UN អំពាវនាវការចូលរួមពីអន្តជាតិក្នុងការប្រយុទ្ធប្រឆាំងអំពើហិង្សាផ្លូវភេទនៅស៊ូដង់

អ្នកនាំពាក្យអង្គការសហប្រជាជាតិ បាននិយាយកាលពីថ្ងៃព្រហស្បតិ៍ថា មន្ត្រីអង្គការសហប្រជាជាតិពីររូប កំពុងអំពាវនាវឱ្យមានការចូលរួមពីអន្តរជាតិបន្ថែមទៀត ដើម្បីប្រយុទ្ធប្រឆាំងអំពើហិង្សាផ្លូវភេទលើស្ត្រី និងក្មេងស្រី ក្នុងជម្លោះនៅប្រទេសស៊ូដង់។ លោក Stephane Dujarric ប្រធានអ្នកនាំពាក្យរបស់លោក Guterres បាននិយាយថា ឧបការីអគ្គលេខាធិការទទួលបន្ទុកកិច្ចការមនុស្សធម៌ លោកស្រី Joyce Msuya បានរួមគ្នាជាមួយលោកស្រី Pramila Patten អ្នកតំណាងពិសេសរបស់អគ្គលេខាធិការ ទទួលបន្ទុកអំពើហិង្សាផ្លូវភេទនៅក្នុងជម្លោះ ដើម្បីសុំការអង្វរ។លោក Dujarric និយាយថា ការអំពាវនាវនេះបានធ្វើឡើង ខណៈមានការចោទប្រកាន់ជាច្រើន អំពីការរំលោភ ការរៀបអាពាហ៍ពិពាហ៍ដោយបង្ខំ ទាសភាពផ្លូវភេទ និងការជួញដូរស្ត្រី និងក្មេងស្រី នៅតែបន្តកើនឡើងខ្ពស់ ជាពិសេសនៅក្នុងទីក្រុង Khartoum ព្រមតាំងទីក្រុង Darfur និងទីក្រុង Kordofan។ អ្នកនាំពាក្យបាននិយាយថា ក្រុមមន្ត្រី បានកំណត់ពេលការចេញផ្សាយសេចក្តីថ្លែងការណ៍រួមរបស់ពួកគេ នៅមុនថ្ងៃប្រជុំក្រុមប្រឹក្សាសន្តិសុខ ស្តីពីអំពើហិង្សាផ្លូវភេទដែលទាក់ទងទៅនឹងជម្លោះ។លោកស្រី Msuya និងលោកស្រី Patten កំពុងទទូចឲ្យសមាជិក ផ្ញើសារច្បាស់លាស់ ដែលស្ថិតនៅក្រោមច្បាប់មនុស្សធម៌អន្តរជាតិថា ជនស៊ីវិលក្នុងប្រទេសស៊ូដង់ និងគ្រប់ទីកន្លែងជុំវិញពិភពលោក ត្រូវតែបានការពារ និងពុំមែនជាគោលដៅនៃសកម្មភាពអំពើហឹង្សាផ្លូវភេទ ដែលអាចបង្កើតជាឧក្រិដ្ឋកម្មសង្គ្រាម។សេចក្តីថ្លែងការណ៍បាននិយាយថា របាយការណ៍នៃអំពើហឹង្សាផ្លូវភេទ បង្ហាញពីផលប៉ះពាល់មិនស្របគ្នានៃសង្រ្គាម លើស្ត្រី និងក្មេងស្រី។ ជនស៊ីវិលរាប់លាននាក់ ប្រឈមមុខទៅនឹងហានិភ័យ ខណៈពួកគេភៀសខ្លួនចេញពីតំបន់ជម្លោះ ដើម្បីស្វែងរកទីជម្រកនៅក្នុងប្រទេសស៊ូដង់ និងនៅក្នុងប្រទេសជិតខាង។

អ្នកបោះឆ្នោតឥណ្ឌា ប្រឈមការហក់ឡើងសីតុណ្ហភាពខ្ពស់ ខណៈរលកកម្ដៅខ្លាំងគ្របដណ្ដប់ប្រទេសនេះ

អ្នកបោះឆ្នោតឥណ្ឌាកំពុងទប់ទល់នឹងលក្ខខណ្ឌកម្ដៅដ៏ក្តៅ ដើម្បីចូលរួមក្នុងការបោះឆ្នោតដ៏ធំបំផុតរបស់ពិភពលោក ខណៈរលកកម្ដៅខ្លាំងបានវាយប្រហារផ្នែកខ្លះនៃប្រទេសនេះ ហើយក្រុមអាជ្ញាធរ បានព្យាករណ៍ថារដូវក្តៅឆ្នាំនេះ មានសីតុណ្ហភាពក្ដៅជាងធម្មតាសម្រាប់ប្រទេសនៅក្នុងតំបន់អាស៊ីខាងត្បូងមួយនេះ។ ក្រសួងឧតុនិយមឥណ្ឌា (IMD) បាននិយាយថា រលកកម្ដៅនឹងប៉ះពាល់ដល់ផ្នែកខ្លះនៃភាគខាងត្បូង និងខាងកើតប្រទេសឥណ្ឌា រហូតដល់ចុងសប្តាហ៍នេះ រួមទាំងរដ្ឋចំនួនបួនដែលកំពុងបោះឆ្នោតនៅថ្ងៃសុក្រសប្ដាហ៍នេះ។ ផ្នែកខ្លះនៃរដ្ឋ វ៉េស ប៊ែង ហ្គាល់ (West Bengal) ប៊ីហា ( Bihar) ឧតារប្រទេស( Uttar Pradesh)និង រដ្ឋ កាណាតាកា (Karnataka) ស្ថិតក្នុងចំណោមរដ្ឋចំនួន១៣ និងដែនដីសហភាពដែលកំពុងបោះឆ្នោតនៅក្នុងដំណាក់កាលទីពីរនៃការបោះឆ្នោតដ៏ធំរបស់ប្រទេសឥណ្ឌា ខណៈសីតុណ្ហភាពត្រូវបានព្យាករណ៍ថា នឹងហក់ឡើងលើសពី ៤០ អង្សាសេ នៅក្នុងតំបន់មួយចំនួន។ ក្រសួងឧតុនិយមឥណ្ឌាដែលបានព្រមានកាលពីខែមុនថាប្រទេសឥណ្ឌាទំនងជានឹងមើលឃើញរលកកម្ដៅខ្លាំង និងយូរជាងនៅឆ្នាំនេះ សីតុណ្ហភាពឡើងខ្ពស់ខុសពីធម្មតា កាលពីថ្ងៃព្រហស្បតិ៍ទី២៥មេសា សប្ដាហ៍នេះ ទីក្រុង បារីផាដា (Baripada) នៅរដ្ឋ អូឌីសា (Odisha) ភាគខាងកើតសីតុណ្ហភាពបានហក់ឡើងដល់៤៣,៦អង្សាស ហើយទីក្រុងកាំម៉ាម (Khammam) របស់រដ្ឋ តេឡានហ្កាណា (Telangana) នៅភាគខាងត្បូងបានឡើងដល់ ៤៣,៤ អង្សាសេ ។យោងតាមក្រសួងដដែលបានឱ្យដឹងថា សីតុណ្ហភាពកើនឡើងលើសពី ៤១អង្សាសេ បានព្យាករណ៍ជារៀងរាល់ថ្ងៃរហូតដល់ថ្ងៃទី ១ ខែឧសភា នៅក្នុងស្រុកបានកា(Banka)។ការហក់ឡើងខ្ពស់នៃសីតុណ្ហភាព នេះនាំឲ្យមានក្ដីបារម្ភកាន់តែខ្លាំងចំពោះការបោះឆ្នោត ខណៈយុទ្ធនាការនានាធ្វើឡើងដោយការប្រមូលផ្ដុំគ្នារបស់ក្រុមអ្នកនយោបាយនៅខាងក្រៅបានទាក់ទាញមនុស្សរាប់ម៉ឺននាក់ ក្រោមកម្ដៅថ្ងៃដ៏ក្ដៅ ជាក់ស្ដែង កាលពីថ្ងៃពុធ អ្នកតំណាងរាស្ត្រម្នាក់បានដួលសន្លប់ដោយសារកម្ដៅថ្ងៃនៅរដ្ឋមហារាស្ត្រ(Maharashtra state) ភាគខាងលិច៕

កេនយ៉ា ដាក់ពង្រាយកងទ័ពដើម្បីទប់ទល់ទឹកជំនន់ ខណៈអ្នកស្លាប់ឡើងជាង ៤០ នាក់

យោធារបស់ប្រទេសកេនយ៉ា ត្រូវបានដាក់ពង្រាយកាលពីថ្ងៃព្រហស្បតិ៍ (២៥ មេសា) ដើម្បីជួយសង្គ្រោះជនរងគ្រោះក្នុងទឹកជំនន់ដោយសារភ្លៀងធ្លាក់ខ្លាំង ដែលបានសម្លាប់មនុស្សអស់ជាច្រើននាក់នៅទូទាំងទ្វីបអាហ្រ្វិកខាងកើតក្នុងរយៈពេលមួយខែកន្លងមកនេះ។កាកបាទក្រហមកេនយ៉ាបាននិយាយថា យ៉ាងហោចណាស់មនុស្ស ៤៥ នាក់បានស្លាប់នៅក្នុងទឹកជំនន់នៅប្រទេសកេនយ៉ា ចាប់តាំងពីខែមីនា រួមទាំងមនុស្ស ១០ នាក់បានស្លាប់ចាប់តាំងពីថ្ងៃចន្ទសប្ដាហ៍នេះ។ ផ្នែកធំនៃរដ្ឋធានីណៃរ៉ូប៊ី និងទីក្រុងសំខាន់ៗផ្សេងទៀតស្ថិតនៅក្រោមទឹក ដែលបង្ខំឱ្យអ្នកស្រុករាប់ពាន់នាក់ចាកចេញពីលំនៅឋានរបស់ពួកគេ។ប្រធានាធិបតីកេនយ៉ា លោក វីលៀម រូតូ (William Ruto) បាននិយាយនៅក្នុងកិច្ចប្រជុំជាមួយមន្ត្រីរដ្ឋាភិបាលជាន់ខ្ពស់ថា យោធាកំពុងដាក់ពង្រាយដើម្បីជួយក្នុងប្រតិបត្តិការជួយសង្គ្រោះ។ អនុប្រធានាធិបតី លោក រីហ្កាទី ហ្កាឆាហ្គ័រ (Rigathi Gachagua) បាននិយាយថាមជ្ឈមណ្ឌលឆ្លើយតបគ្រាអាសន្នពហុភ្នាក់ងារត្រូវបានដំណើរការនៅរសៀលថ្ងៃព្រហស្បតិ៍។អាហ្រ្វិកខាងកើតត្រូវបានរងគ្រោះដោយទឹកជំនន់ធ៏ធ្ងន់ធ្ងរបំផុតក្នុងកំណត់ត្រាក្នុងរដូវវស្សាចុងក្រោយនៅចុងឆ្នាំ២០២៣។ អ្នកវិទ្យាសាស្ត្រនិយាយថាបម្រែបម្រួលអាកាសធាតុកំពុងបណ្តាលឱ្យមានព្រឹត្តិការណ៍អាកាសធាតុដ៏ធ្ងន់ធ្ងរ និងកាន់តែញឹកញាប់៕

អ្នកជំនាញអាកាសធាតុអាមេរិកខាងត្បូងមើលឃើញថា ភាពញឹកញាប់នៃបាតុភូត La Nina និង El Nino កើនឡើង

អ្នកជំនាញអាកាសធាតុ បាននិយាយកាលពីថ្ងៃព្រហស្បតិ៍ថា បាតុភូតអាកាសធាតុដែលគេស្គាល់ថា អែលនីញ៉ូ(El Nino) និងឡា នីណា(La Nina) ដែលនាំមកនូវរលកកម្តៅ ភាពត្រជាក់ ភ្លៀងធ្លាក់ ឬគ្រោះរាំងស្ងួត នឹងកាន់តែញឹកញាប់ និងខ្លាំងក្លានៅប៉ុន្មានឆ្នាំខាងមុខ បន្ទាប់ពីអាមេរិកខាងត្បូង ទទួលរងនូវ បាតុភូត អែលនីញ៉ូ(El Nino) ខ្លាំងបំផុតក្នុងរយៈពេលជាច្រើនទសវត្សរ៍មកនេះ។យោងតាមមជ្ឈមណ្ឌលអន្តរជាតិសម្រាប់ការស្រាវជ្រាវលើបាតុភូតអែលនីញ៉ូ មានមូលដ្ឋាននៅប្រទេសអេក្វាឌ័រ និងទីភ្នាក់ងារឧតុនិយមនិងធារាសាស្ត្រប្រទេសប៉េរូ បានឲ្យដឹងថា បាតុភូត El Nino នៅពេលថ្មីៗនេះ ស្ថិតក្នុងចំណោមបាតុភូតចំនួនប្រាំដែលខ្លាំងបំផុត ចាប់តាំងពីឆ្នាំ ១៩៥០។បន្ទាប់ពីកិច្ចប្រជុំរបស់អ្នកជំនាញ មកពីតំបន់ក្នុងទីក្រុង Lima ប្រទេសប៉េរូ ស្តីពីអាកាសធាតុ នាយកមជ្ឈមណ្ឌលអន្តរជាតិសម្រាប់ការស្រាវជ្រាវលើបាតុភូតអែលនីញ៉ូ(CIIFEN) បាននិយាយថា ការប្រែប្រួលសីតុណ្ហភាពពីបាតុភូតមួយទៅបាតុភូតមួយទៀត នឹងកាន់តែលឿន។ បាតុភូត El Nino និង La Nina បានវាយប្រហារផ្នែកផ្សេងៗនៃពិភពលោកដាច់ដោយឡែកពីគ្នា។ នៅអាមេរិកឡាទីន បាតុភូតនេះ បានធ្វើឲ្យប៉ះពាល់ដល់ដំណាំដូចជាស្រូវសាលី សណ្ដែក និងពោត ដោយបំផ្លាញសេដ្ឋកិច្ចក្នុងតំបន់ដែលជារឿយៗពឹងផ្អែកខ្លាំងលើការធ្វើកសិកម្ម។សីតុណ្ហភាព ត្រូវបានសន្និដ្ឋានថាខ្ពស់ជាងកម្រិតធម្មតា ភាគច្រើននៅអាមេរិកខាងត្បូង ទោះបីជាទាបជាងកម្រិតធម្មតានៅឆ្នេរសមុទ្រប្រទេសអេក្វាឌ័រ ប្រទេសប៉េរូភាគខាងជើង ប្រទេសអាហ្សង់ទីន ភាគខាងត្បូង និងប្រទេសឈីលីក៏ដោយ។ ដោយមានបាតុភូត អែលនីញ៉ូ (El Nino) ថ្មីៗនេះ ប្រទេសប៉េរូ មានរដូវរងាដែលក្តៅបំផុតក្នុងរយៈពេល៦០ឆ្នាំកន្លងទៅនេះ នេះបើយោងតាមមជ្ឈមណ្ឌលអន្តរជាតិសម្រាប់ការស្រាវជ្រាវលើបាតុភូតអែលនីញ៉ូ(CIIFEN) ខណៈនៅប្រទេសកូឡុំប៊ី សីតុណ្ហភាពបានឡើងខ្ពស់នៅតំបន់ផ្សេងៗគ្នារបស់ប្រទេស។

វិមានក្រឹមឡាំង៖ ការបញ្ជូនមីស៊ីលរយៈចម្ងាយឆ្ងាយពីអាមេរិកទៅអ៊ុយក្រែន នឹងពុំផ្លាស់ប្ដូរលទ្ធផលសង្រ្គាមឡើយ

វិមានក្រឹមឡាំងបាននិយាយកាលពីថ្ងៃព្រហស្បតិ៍ទី២៥មេសាសប្ដាហ៍នេះថា ការបញ្ជូនប្រព័ន្ធមីស៊ីលយុទ្ធសាស្ត្ររយៈចម្ងាយឆ្ងាយ(ATACMS) របស់សហរដ្ឋអាមេរិក ទៅកាន់អ៊ុយក្រែននឹងមិនផ្លាស់ប្តូរលទ្ធផលរបស់សង្គ្រាមនោះទេ ផ្ទុយទៅវិញនឹងបង្កើតបញ្ហាបន្ថែមទៀតសម្រាប់អ៊ុយក្រែនខ្លួនឯងប៉ុណ្ណោះ។ មន្ត្រីអាមេរិកមួយរូបបាននិយាយកាលពីថ្ងៃពុធសប្ដាហ៍នេះថា ក្នុងប៉ុន្មានសប្តាហ៍ថ្មីៗនេះសហរដ្ឋអាមេរិក បានបញ្ជូនមីស៊ីលរយៈចម្ងាយឆ្ងាយទៅកាន់ប្រទេសអ៊ុយក្រែនដោយស្ងាត់ៗ ដែលរហូតមកដល់ពេលនេះបានប្រើប្រាស់ពីរលើកហើយ។ មន្ត្រីរូបនោះបាននិយាយថាមីស៊ីលទាំងនោះត្រូវបានប្រើប្រាស់ជាលើកដំបូងកាលពីថ្ងៃទី១៧ ខែមេសា ដាក់គោលដៅលើអាកាសយានដ្ឋានរុស្ស៊ីនៅ តំបន់គ្រីម៉េ (Crimea) ដែលមានចម្ងាយប្រហែល ១៦៥គីឡូម៉ែត្រ ពីសមរភូមិជួរមុខរបស់អ៊ុយក្រែន។ អ្នកនាំពាក្យវិមានក្រឹមឡាំង លោក ឌីមីទ្រី ផេស្កូវ (Dmitry Peskov) បានប្រាប់ក្រុមអ្នកសារព័ត៌មានថា សហរដ្ឋអាមេរិក កំពុងលូកដៃចូលពាក់ព័ន្ធដោយផ្ទាល់នៅក្នុងជម្លោះនេះ។ ពួកគេកំពុងដើរតាមគន្លងនៃការបង្កើនជួរប្រតិបត្តិការនៃប្រព័ន្ធសព្វាវុធដែលពួកគេផ្គត់ផ្គង់ឲ្យទៅអ៊ុយក្រែន។លោកបានបន្ថែមថា ការបញ្ជូនអាវុធនេះ នឹងមិនផ្លាស់ប្តូរជាមូលដ្ឋានចំពោះលទ្ធផលនៃប្រតិបត្តិការយោធាពិសេសរបស់រុស្ស៊ីនោះទេ។ យើងនឹងសម្រេចគោលដៅរបស់យើង។ ប៉ុន្តែសកម្មភាពនេះបានត្រឹមតែបង្កឱ្យមានបញ្ហាកាន់តែច្រើនសម្រាប់អ៊ុយក្រែនខ្លួនឯងទេ។ កាបញ្ជូនប្រព័ន្ធមីស៊ីលយុទ្ធសាស្ត្ររបស់កងទ័ព (ATACMS) ដែលមានរយៈចម្ងាយរហូតដល់ ៣០០គីឡូម៉ែត្រ គឺជាប្រធានបទនៃការជជែកដេញដោលនៅក្នុងរដ្ឋបាលរបស់លោកប្រធានាធិបតី Biden អស់រយៈពេលជាច្រើនខែមកនេះ ។ មីស៊ីលរយៈចម្ងាយមធ្យម ATACMS ត្រូវបានបញ្ជូនទៅអ៊ុយក្រែនកាលពីខែខែកញ្ញា ឆ្នាំមុន ៕

បណ្ដាញសង្គម

ព័ត៌មានថ្មីៗ

[UPDATE] ប្រព័ន្ធផ្សព្វផ្សាយរដ្ឋអ៊ីរ៉ង់ បានបញ្ជាក់នៅថ្ងៃអាទិត្យ ទី១ ខែមីនា នេះថា មេបញ្ជាការយោធាអ៊ីរ៉ង់ លោក Abdolrahim Mousavi ត្រូវបានសម្លាប់ហើយ នៅក្នុងការវាយប្រហារទ្រង់ទ្រាយធំរបស់អាមេរិក-អ៊ីស្រាអែល

ប្រមុខអង្គការសហប្រជាជាតិអំពាវនាវឱ្យបញ្ឈប់អរិភាពជាបន្ទាន់ខណៈអាមេរិក-អ៊ីស្រាអែលរួមដៃគ្នាបំបាក់អ៊ីរ៉ង់

អភិបាលខេត្តណែនាំអាជ្ញាធរខេត្តកំពតយកចិត្តទុកដាក់ដោះស្រាយបញ្ហា និងតម្រូវការពលរដ្ឋឲ្យបានល្អ

លោក Trump ហៅការស្លាប់របស់លោក Khamenei ថាជា «យុត្តិធម៌សម្រាប់ប្រជាជនអ៊ីរ៉ង់»

យុទ្ធនាការធាក់ស៊ីក្លូភ្នំពេញទៅស្ទឹងត្រែងដើម្បីរួមគ្នាលើកកម្ពស់វិស័យទេសចរណ៍ និងអភិរក្សស៊ីក្លូខ្មែរ

ប្រធានក្រុមការងារចុះមូលដ្ឋានខេត្តសៀមរាប វាយតម្លៃខ្ពស់ចំពោះក្រុមការងារខេត្តបានខិតខំប្រឹងប្រែងបម្រើប្រជាពលរដ្ឋនៅតាមមូលដ្ឋានបានល្អ

អាគារសិក្សាថ្មី និងសមិទ្ធផលនានានៅវិទ្យាល័យហ៊ុនសែន ព្រែកអាជី ត្រូវបានសម្ភោធជាផ្លូវការ

សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន សម្រេចផ្តល់អំណោយមនុស្សធម៌ជាបន្ទាន់ដើម្បីជួយសម្រាលការលំបាកជូនប្រជាជនភៀសសឹកចំនួន ២.៨៨០គ្រួសារ នៅខេត្តបន្ទាយមានជ័យ ដែលរងគ្រោះដោយទឹកភ្លៀងនៅជំរំសុវត្ថិភាព

វិស័យឯកជន៖ កម្ពុជាកំពុងឈរលើមាគ៌ា ឈានទៅសម្រេចចក្ខុវិស័យឆ្នាំ២០៣០ និងឆ្នាំ២០៥០

[UPDATE] របាយការណ៍៖ មន្ត្រីអ៊ីរ៉ង់ជាង ៤០ នាក់ត្រូវបានសម្លាប់ក្នុងការវាយប្រហាររបស់អាមេរិក-អ៊ីស្រាអែល

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877