BTV NEWS

លោកសាស្ត្រាចារ្យ Yang Jiemian៖ ការពង្រឹង និងពង្រីកកិច្ចសហប្រតិបត្តិការលើគ្រប់វិស័យ និងគ្រប់តួអង្គ ជាកត្តាគន្លឹះនៃទំនាក់ទំនងទ្វេភាគី ចិន-កម្ពុជា

មេបញ្ជាការរងកងទ័ពជើងគោកនៃសហព័ន្ធរុស្ស៊ី ប្ដេជ្ញាបន្តពូនជ្រំទំនាក់ទំនង និងកិច្ចសហប្រតិបត្តិការរវាងប្រទេសទាំងពីរ ឱ្យកាន់តែរឹងមាំ និងរីកចម្រើន

កម្ពុជា បារាំង ចង់បង្កើតនូវកិច្ចសហប្រតិបត្តិការ លើវិស័យសុខាភិបាល និងអាកាសចរស៊ីវិល បន្ថែមទៀត

សម្ដេចតេជោ៖ ទំនាក់ទំនងស្នូលកម្ពុជា-ជប៉ុន មិនអាចខ្វះបានឡើយ នូវផ្នែកសេដ្ឋកិច្ច ពាណិជ្ជកម្ម និងវិនិយោគ

នយោបាយ និង ការអភិវឌ្ឍន៍

លោក ណេតាន់យ៉ាហ៊ូ៖ អ៊ីស្រាអែល នឹងមិនបញ្ចប់សង្គ្រាមនៅហ្កាហ្សាទេ លុះត្រាតែខ្លួនកម្ទេចហាម៉ាសបានទាំងស្រុង

នាយករដ្ឋមន្ត្រីអ៊ីស្រាអែល លោក បេនចាមីន ណេតាន់យ៉ាហ៊ូ ( Benjamin Netanyahu) បានបញ្ជាក់ជាថ្មីថា ប្រតិបត្តិការយោធារបស់អ៊ីស្រាអែល នៅតំបន់ហ្កាហ្សាស្ទ្រីប នឹងមិនបញ្ចប់ឡើយ រហូតទាល់តែអង្គភាពប្រដាប់អាវុធទាំងអស់របស់ក្រុមហាម៉ាស ត្រូវបានលុបបំបាត់ទាំងស្រុង។លោកនាយករដ្ឋមន្ត្រី បានថ្លែងនៅសន្និសីទសារព័ត៌មានមួយថា៖« អ្នកទាំងអស់គ្នា កំពុងសួរថាតើនៅពេលណាដែលសង្រ្គាមនេះ នឹងបញ្ចប់។ ចម្លើយរបស់ខ្ញុំ គឺច្បាស់លាស់ណាស់ និងមិនអាចប្រកែកបាន សង្គ្រាមនេះ នឹងបញ្ចប់ នៅពេលដែលយើងសម្រេចបាននូវគោលដៅទាំងអស់ ហើយមិនមែនមួយភ្លែតមុននេះទេ។ ជ័យជម្នះ មិនមែនជាពាក្យទទេនោះទេ។ ជ័យជម្នះ នឹងសម្រេចបាននៅពេលដែលយើងលុបបំបាត់សមត្ថភាពគ្រប់គ្រងយោធា និងក្រុមហាម៉ាស ការដោះលែងចំណាប់ថ្នូរ របស់យើង លុបបំបាត់ការគំរាមកំហែងលើតំបន់ហ្កាហ្សាពីអ៊ីស្រាអែល ហើយបញ្ជូនអ្នកស្រុករបស់យើងនៅភាគខាងត្បូង និងខាងជើងត្រឡប់ ទៅផ្ទះសម្បែងរបស់ពួកគេវិញដោយសុវត្ថិភាព នេះគឺជាជ័យជម្នះដែលនឹងស្ដារឡើងវិញនូវជំហររារាំងរបស់អ៊ីស្រាអែល និងបញ្ជូនសញ្ញាច្បាស់លាស់ ដល់ទាំងអស់គ្នា ខ្មាំងសត្រូវរបស់យើងដែលតម្លៃនៃការធ្វើបាបយើង នឹងមិនអាចទទួលយកបានចំពោះពួកគេ»។សុន្ទរកថារបស់លោក ណេតាន់យ៉ាហ៊ូ គឺពាក់ព័ន្ធនឹងប្រតិបត្តិការរបស់កងទ័ពអ៊ីស្រាអែលនៅតំបន់ហ្កាហ្សា ស្ទី្រប ដែលមានគោលបំណងកម្ចាត់មេដឹកនាំយោធាក្រុមហាម៉ាស លោក ម៉ូហាម៉េដ ដេហ្វ ( Mohammed Deif) ។ លោកនាយករដ្ឋមន្ត្រីបញ្ជាក់ថា នេះជាគោលបំណងនៃការវាយប្រហារលើផ្នែកនេះ ហើយបានទទួលស្គាល់ពី កង្វះការបញ្ជាក់ពីការកម្ចាត់លោក ដេហ្វ។ ទោះបីជាយ៉ាងណាក៏ដោយ លោកបានសម្តែងមតិថា ប្រតិបត្តិការនេះ ទោះក្នុងករណីណាក៏ដោយ គឺជាចំណុចរបត់មួយ នៅក្នុងយុទ្ធនាការយោធានៅក្នុងដែនដីនេះ និងបម្រើជាសញ្ញាមួយដល់អ៊ីរ៉ង់ និង «ផ្កាយរណបទាំងអស់» នៅក្នុងតំបន់នេះ។

ការបាញ់ប្រហារលើលោក Trump រំលឹកពីការប៉ុនប៉ងធ្វើឃាតកន្លងមក ប្រឆាំងនឹងមេដឹកនាំអាមេរិក

លោក Donald Trump ត្រូវបានខ្មាន់កាំភ្លើងបាញ់ប្រហារអំឡុងពេលយុទ្ធនាការឃោសនាបោះឆ្នោតកាលពីថ្ងៃសៅរ៍ (១៣ កក្កដា) នៅក្នុងអ្វីដែល FBI ហៅថាជាការប៉ុនប៉ងធ្វើឃាត ខណៈលោក Trump បានរួចរស់ជីវិតពីការវាយប្រហារ និងមានរបួសត្រង់ត្រចៀក។ ហេតុការណ៍នោះធ្វើឱ្យគេនឹកឃើញដល់ការប៉ុនប៉ងធ្វើឃាតកន្លងមកលើមេដឹកនាំអាមេរិក ទាំងជោគជ័យ និងមិនជោគជ័យ។ប្រធានាធិបតីអាមេរិក ៤នាក់ត្រូវបានគេធ្វើឃាតពេលកាន់តំណែង រួមមានទីមួយលោក អាប្រាហាំ លីនខុន (Abraham Lincoln) ដែលត្រូវបានសម្លាប់នៅឆ្នាំ១៨៦៥ នៅរោងមហោស្រព ហ្វត (Ford) ក្នុងទីក្រុងវ៉ាស៊ីនតោន។ ទីពីរគឺលោក ជេមស៍ ហ្កាហ្វីល (James Garfield) ដែលត្រូវបានគេបាញ់នៅឆ្នាំ១៨៨១ នៅស្ថានីយ៍រថភ្លើងទីក្រុងវ៉ាស៊ីនតោន ហើយបានស្លាប់ពីរខែកន្លះក្រោយមកដោយសាររបួស។ ទីបីលោក វីលៀម មេកឃីនលី (William McKinley) ត្រូវគេធ្វើឃាតនៅឆ្នាំ១៩០១ នៅក្រុង បាហ្វឺឡូ (Buffalo) រដ្ឋញូវយ៉ក (New York) និងទីបួនគឺលោក ចន អេហ្វ ខិនណេឌី (John F. Kennedy) ត្រូវបានគេបាញ់នៅឆ្នាំ១៩៦៣ នៅក្រុង ដាលឡាស (Dallas) រដ្ឋតិចសាស់ (Texas)។ មេដឹកនាំដែលរួចជីវិតពីការប៉ុនប៉ងធ្វើឃាតរួមមាន លោក Donald Trump, លោក រ៉ូណល រ៉េហ្កេន (Ronald Reagan) ដែលត្រូវគេបាញ់នៅឆ្នាំ១៩៨១ ក្នុងទីក្រុងវ៉ាស៊ីនតោន, លោក ជឺរ៉ល ហ្វដ (Gerald Ford) បានរួចរស់ជីវិតពីការប៉ុនប៉ងធ្វើឃាតពីរដងក្នុងពេលតិចជាង ៣ សប្តាហ៍ក្នុងឆ្នាំ១៩៧៥, លោក ស៊ីអូឌ័រ រ៉ុសេវ៉េល (Theodore Roosevelt) ដែលត្រូវគេបាញ់ចំទ្រូងក្នុងឆ្នាំ១៩១២។ មិនត្រឹមតែប៉ុណ្ណេះ នៅមានមេដឹកនាំនៅសហរដ្ឋអាមេរិក ជាច្រើនរូបទៀតដែលមានតំណែងជាន់ខ្ពស់ ត្រូវបានជួបហេតុការណ៍ដូចគ្នានេះក្នុងពេលជាច្រើនឆ្នាំកន្លងមកនេះ៕

ពលរដ្ឋហ្វីលីពីន បន្តនេសាទក្នុងដែនទឹកជម្លោះ ខណៈបារម្ភពីច្បាប់ដែនសមុទ្រថ្មីរបស់ចិន

អ្នកនេសាទនៅក្នុងប្រទេសហ្វីលីពីន បានបន្តនេសាទនៅក្នុងដែនទឹកជម្លោះនានាក្នុងសមុទ្រចិនខាងត្បូង បើទោះបីជាចិន ដាក់ចេញច្បាប់ល្បាតដែនសមុទ្រថ្មីដ៏តឹងតែងរបស់ខ្លួនក៏ដោយ។ ច្បាប់ ដែលត្រូវបានអនុវត្តកាលពីមួយខែមុននោះ អនុញ្ញាតឱ្យឆ្មាំល្បាតឆ្នេរចិន ឃាត់ខ្លួននាវាបរទេស និងបុគ្គល ប្រសិនបើគេសង្ស័យថាពួកគេ «រំលោភបំពាន» លើដែនទឹករបស់ខ្លួន។នៅឯដែនទឹកជម្លោះ ស្កាបូរ៉ូ ស្ហូល (Scarborough Shoal) ក្នុងសមុទ្រចិនខាងត្បូង អ្នកនេសាទហ្វីលីពីនមួយចំនួនបានបន្តនេសាទនៅទីនោះ ខណៈបទប្បញ្ញត្តិថ្មីរបស់ចិន គំរាមចាប់ខ្លួនអ្នកបំពានដែនសមុទ្រ។ អ្ននេសាទម្នាក់បានប្រាប់សារព័ត៌មាន CNA ថា «ពេលខ្លះនៅពេលដែលយើងទៅជិតថ្មប៉ប្រះទឹក ស្កាបូរ៉ូ យើងត្រូវបានរារាំងដោយឆ្មាំល្បាតឆ្នេរចិន ហើយយើងត្រូវបានបង្ខំឱ្យចេញឆ្ងាយពីទីនោះ»។ លោកបន្ថែមថា «យើងមានការព្រួយបារម្ភខ្លាំងណាស់នៅពេលនេះ ដោយសារតែច្បាប់បំពានដែនសមុទ្រថ្មីរបស់ចិន។ ប៉ុន្តែឧបករណ៍រកត្រីរបស់យើងគឺនៅជិតដែនទឹកនោះ ដូច្នេះយើងត្រូវតែទៅទីនោះ»។ ផ្លូវទឹកយុទ្ធសាស្ត្រ ស្កាបូរ៉ូ ស្ហូល បានស្ថិតនៅចំកណ្តាលនៃជម្លោះដែនទឹករវាងហ្វីលីពីន និងចិន ហើយចិន បានគាំទ្រការទាមទារដ៏ធំធេងរបស់ខ្លួនជាមួយនឹងការល្បាតរបស់កងនាវាចរជាញឹកញាប់៕

ចិន និងរុស្ស៊ីចាប់ផ្តើមធ្វើសមយុទ្ធកងទ័ពជើងទឹករួមគ្នា ប៉ុន្មានថ្ងៃបន្ទាប់ពីសម្ព័ន្ធមិត្តណាតូបានហៅទីក្រុងប៉េកាំងថា ជាអ្នកបើកដៃឲ្យមានសង្គ្រាមអ៊ុយក្រែន

ទីភ្នាក់ងារសារព័ត៌មានចិនស៊ិនហួ(Xinhua) បានរាយការណ៍ថា កងកម្លាំងទ័ពជើងទឹករបស់ចិន និងរុស្ស៊ីកាលពីថ្ងៃអាទិត្យ បានចាប់ផ្តើមធ្វើសមយុទ្ធរួមគ្នាមួយនៅឯកំពង់ផែយោធាមួយនៅប្រទេសចិនភាគខាងត្បូង កាលពីថ្ងៃអាទិត្យ ប៉ុន្មានថ្ងៃបន្ទាប់ពីសម្ព័ន្ធមិត្តណាតូបានហៅទីក្រុងប៉េកាំងថាជា អ្នកបើកដៃឲ្យមានសង្គ្រាមនៅអ៊ុយក្រែន។ ក្រសួងការពារជាតិចិនបាននិយាយនៅក្នុងសេចក្តីថ្លែងការណ៍ខ្លីមួយថា កងកម្លាំងពីភាគីទាំងពីរថ្មីៗនេះបានល្បាតនៅមហាសមុទ្រប៉ាស៊ីហ្វិកខាងលិច និងខាងជើង ហើយប្រតិបត្តិការនេះមិនមានជាប់ពាក់ព័ន្ធនឹងស្ថានភាពអន្តរជាតិ និងតំបន់ទេ ហើយមិនបានកំណត់គោលដៅភាគីទីបីណាមួយឡើយ។សមយុទ្ធដែលបានចាប់ផ្តើមនៅក្នុងខេត្តក្វាងទុងកាលពីថ្ងៃអាទិត្យ ហើយត្រូវបានគេរំពឹងថានឹងបន្ត រហូតដល់ពាក់កណ្តាលខែកក្កដា ក្នុងគោលបំណងបង្ហាញពីសមត្ថភាពរបស់កងទ័ពជើងទឹកក្នុងការដោះស្រាយការគំរាមកំហែងផ្នែកសន្តិសុខ និងរក្សាសន្តិភាព និងស្ថិរភាពនៅទូទាំងពិភពលោក និងក្នុងតំបន់។ ទូរទស្សន៍រដ្ឋ CCTV បានរាយការណ៍កាលពីថ្ងៃសៅរ៍ដោយបន្ថែមថាសមយុទ្ធនេះ នឹងរួមមានលំហាត់ប្រឆាំងមីស៊ីល ការវាយប្រហារតាមសមុទ្រ និងការការពារដែនអាកាស។ ទីភ្នាក់ងារសារព័ត៌មាន ស៊ិនហួ បានរាយការណ៍ថា កងកម្លាំងទ័ពជើងទឹកចិន និងរុស្ស៊ី បានអនុវត្តសកម្មភាពយោធាប្រដូចទៅនឹងស្ថានភាពពិតៗនៅលើផែនទី និងសមយុទ្ធសម្របសម្រួលតាកទិក បន្ទាប់ពីពិធីបើកនៅទីក្រុង ចានជាំង (Zhanjiang) ។ សមយុទ្ធរួមគ្នានេះបានធ្វើឡើងបន្ទាប់ពីភាពតានតឹងចុងក្រោយរបស់ចិនជាមួយនឹងសម្ព័ន្ធមិត្តណាតូកាលពីសប្តាហ៍មុន ដែលកន្លងមកសម្ព័ន្ធនេះបានលើកឡើងថាចិនមានឥទ្ធិពលបញ្ឈប់រុស្ស៊ីក្នុងសង្រ្គាមអ៊ុយក្រែនបាន៕

លោកTrump បានទៅដល់ទីក្រុង មីលវ៉ូគី ( Milwaukee) សម្រាប់សន្និបាតគណបក្សសាធារណរដ្ឋ ក្រោយរងការបាញ់ប្រហារ

អតីតប្រធានាធិបតីអាមេរិក លោក Donald Trump បានទៅដល់រដ្ឋ វីសខុនស៊ីន (Wisconsin) សម្រាប់សន្និបាតជាតិរបស់គណបក្សសាធារណរដ្ឋ មួយថ្ងៃបន្ទាប់ពីការរួចជីវិតពីការប៉ុនប៉ងធ្វើឃាត។សន្និសីទគណបក្សនៅ ទីក្រុង មីលវូគី (Milwaukee) នឹងដំណើរការតាមការគ្រោងទុក ទោះបីជាមានការបាញ់ប្រហារកាលពីល្ងាចថ្ងៃសៅរ៍ នៅឯការជួបជុំមួយក្នុងរដ្ឋ ផេនស៊ីលវេនៀ (Pennsylvania) ដែលលោក Trump ត្រូវបានបាញ់ចំត្រចៀក។លោក Trump បានបង្ហោះនៅលើប្រព័ន្ធផ្សព្វផ្សាយសង្គមថាលោកបានពិចារណាពន្យារពេលការធ្វើដំណើររបស់លោកត្រឹមពីរថ្ងៃ ប៉ុន្តែទើបតែបានសម្រេចចិត្តថាខ្ញុំមិនអាចបណ្ដោយឱ្យអ្នកបាញ់ប្រហារ ឬអ្នកធ្វើឃាត មកលើរូបខ្ញុំ អាចបង្ខំឱ្យផ្លាស់ប្តូរកាលវិភាគឬអ្វីផ្សេងទៀតបានទេ។ការវាយប្រហារលើលោក Trump បានដាក់ការយកចិត្តទុកដាក់ខ្ពស់ទៅលើសុវត្ថិភាព និងសន្តិសុខនៃព្រឹត្តិការណ៍នេះ ដែលចាប់ផ្តើមនៅថ្ងៃចន្ទនេះ នៅឯទីលានដែលជាផ្ទះរបស់ក្រុមបាល់បោះ NBA Milwaukee Bucks ។មនុស្សប្រហែល ៥ម៉ឺននាក់ ត្រូវបានគេរំពឹងថានឹងចូលរួមក្នុងសន្និបាតគណបក្សសាធារណរដ្ឋរយៈពេល ៤ថ្ងៃ នៃការប្រកួតនយោបាយ និងគោលនយោបាយ ខណៈដែលគណបក្សនេះលើកករណីរបស់ខ្លួនទៅកាន់អ្នកបោះឆ្នោតនៅមុនការបោះឆ្នោតសកលខែវិច្ឆិកាឆ្នាំ២០២៤នេះ ៕

រុស្ស៊ីព្រមានថា ខ្លួនអាចកំណត់គោលដៅលើអឺរ៉ុប ប្រសិនបើអាមេរិក ដាក់ពង្រាយមីស៊ីល

វិមានក្រឹមឡាំង កាលពីថ្ងៃសៅរ៍ (១៣ កក្កដា) បានព្រមានថា ការដាក់ពង្រាយមីស៊ីលរបស់អាមេរិក នៅក្នុងប្រទេសអាល្លឺម៉ង់ អាចធ្វើឱ្យបណ្ដារដ្ឋធានីអឺរ៉ុប ក្លាយជាគោលដៅសម្រាប់មីស៊ីលរបស់រុស្ស៊ី នៅក្នុងការប្រឈមមុខគ្នាបែបសង្គ្រាមត្រជាក់ម្តងទៀត។អ្នកនាំពាក្យវិមានក្រឹមឡាំង លោក ឌីមីទ្រី ផេស្កូវ (Dmitry Peskov) បាននិយាយអំពី «ភាពផ្ទុយគ្នា» ដែលក្នុងនោះ «អឺរ៉ុបគឺជាគោលដៅសម្រាប់មីស៊ីលរបស់រុស្ស៊ី ចំណែករុស្ស៊ី គឺជាគោលដៅសម្រាប់មីស៊ីលអាមេរិក នៅអឺរ៉ុប»។ លោកបាននិយាយទៅកាន់ទូរទស្សន៍រដ្ឋរុស្ស៊ីថា «យើងមានសមត្ថភាពគ្រប់គ្រាន់ក្នុងការទប់ទល់មីស៊ីលអាមេរិកទាំងនោះ ប៉ុន្តែអ្នករងគ្រោះបំផុតគឺជាបណ្ដារដ្ឋធានីនៃប្រទេសអឺរ៉ុប»។លោក Peskov ក៏បានលើកឡើងផងដែរថា ការប្រឈមមុខដាក់គ្នាបែបនេះអាចបំផ្លាញអឺរ៉ុបទាំងមូល តាមរបៀបដូចគ្នាដែលសង្រ្គាមត្រជាក់បានបញ្ចប់ក្រោយការដួលរលំនៃសហភាពសូវៀត។ សេតវិមាន បានប្រកាសកាលពីសប្ដាហ៍មុនក្នុងអំឡុងពេលកិច្ចប្រជុំកំពូលរបស់អង្គការសន្ធិសញ្ញាអាត្លង់ទិកខាងជើង (NATO) ថា ខ្លួននឹងដាក់ពង្រាយអាវុធរយៈចម្ងាយឆ្ងាយចាប់ពីឆ្នាំ២០២៦ នៅអាល្លឺម៉ង់ ដើម្បីជាការរារាំង។វិមានក្រឹមឡាំង បានរិះគន់សកម្មភាពនេះរួចទៅហើយ ដោយចោទប្រកាន់ក្រុងវ៉ាស៊ីនតោន ថាបានបោះជំហានឆ្ពោះទៅរកសង្រ្គាមត្រជាក់ថ្មី និងចូលរួមដោយផ្ទាល់នៅក្នុងជម្លោះនៅអ៊ុយក្រែន៕

រដ្ឋអាជ្ញាតំបន់៖ វាជារឿងអាម៉ាស់សម្រាប់សហគមន៍ ជុំវិញការបាញ់ប្រហារលោក Trump

រដ្ឋអាជ្ញាក្នុងតំបន់នៅទីក្រុង បាត់ល័រ(Butler) រដ្ឋ Pennsylvania បានសម្តែងការអាម៉ាស់ កាលពីថ្ងៃអាទិត្យ ទី១៤ ខែកក្កដា បន្ទាប់ពីការប៉ុនប៉ងធ្វើឃាតលើអតីតប្រធានាធិបតីសហរដ្ឋអាមេរិក លោក Donald Trump។រដ្ឋអាជ្ញាលោក Richard Goldinger បាននិយាយថា វាគួរឱ្យអាម៉ាស់សម្រាប់សហគមន៍។ លោក និយាយថា លោកបានរស់នៅទីនេះពេញមួយជីវិតរបស់លោក ហើយមិននឹកស្មានថា មានរឿងបែបនេះកើតឡើងនៅស្រុកកំណើតនោះទេ។លោក Trump ត្រូវបានគេបាញ់ចំត្រចៀកនៅក្នុងការប៉ុនប៉ងធ្វើឃាត ក្នុងអំឡុងពេលការជួបជុំសម្រាប់យុទ្ធនាការបោះឆ្នោតកាលពីថ្ងៃសៅរ៍ ជាការវាយប្រហារដែលទំនងជាកំណត់ជាថ្មីសម្រាប់ការប្រកួតប្រជែងប្រធានាធិបតីសហរដ្ឋអាមេរិកនៅឆ្នាំនេះ ខណៈមានការលើកឡើងនូវសំណួរជាច្រើនអំពីសន្តិសុខ ដែលផ្តល់ដល់បេក្ខជនមកពីគណបក្សសាធារណរដ្ឋ។ យុទ្ធនាការរបស់លោក Trump ក្រោយមក ត្រូវបានគេនិយាយថា លោក ធ្វើបានល្អ ហើយលោកទំនងជាពុំមានរបួសអ្វីធំដុំ ក្រៅពីរបួសនៅលើត្រចៀកខាងស្តាំរបស់លោកនោះទេ។កាលពីព្រឹកថ្ងៃអាទិត្យ FBI បានកំណត់អត្តសញ្ញាណ លោក ថូម៉ាស់ ម៉ាស៊ូ គ្រូក (Thomas Matthew Crooks) អាយុ២០ ឆ្នាំ នៅរដ្ឋ Pennsylvania ជា គោលដៅពាក់ព័ន្ធ ជាអ្វីដែលគេហៅថាការប៉ុនប៉ងធ្វើឃាត។ ទីភ្នាក់ងារ និយាយថា ជនសង្ស័យត្រូវបានបាញ់សម្លាប់ដោយភ្នាក់ងារអង្គភាពសេវាសម្ងាត់ បន្ទាប់ពីបុរសរូបនេះ បានបាញ់ប្រហារពីលើដំបូលអគារប្រហែល១៤០ម៉ែត្រពីវេទិកា ដែលលោក Trump កំពុងថ្លែង។

អតីតអនុប្រធានាធិបតីរបស់លោក Trump និយាយថា គ្មានកន្លែងណានៅអាមេរិក មានហិង្សានយោបាយទេ

អតីតអនុប្រធានាធិបតី លោក Mike Pence បាននិយាយកាលពីថ្ងៃអាទិត្យ ទី ១៤ ខែកក្កដា ថា គ្មានកន្លែងណាមួយ នៅសហរដ្ឋអាមេរិក មានហិង្សានយោបាយប្រភេទដូចដែលបានដាក់គោលដៅទៅលើអតីតចៅហ្វាយនាយរបស់លោក គឺលោក Donald Trump នៅក្នុងការជួបជុំគណបក្សសាធារណរដ្ឋនោះទេ។ លោក Pence បាននិយាយនៅលើវេទិកាបណ្តាញផ្សព្វផ្សាយសង្គម X ថា អំពើហិង្សាបែបនេះ «ត្រូវតែបានថ្កោលទោសជាសកល»។ លោក Trump ត្រូវបានគេបាញ់ចំត្រចៀកខាងស្តាំ អំឡុងពេលជួបប្រជុំអ្នកគាំទ្រនៅទីក្រុងបាត់ល័រ(Butler) រដ្ឋ Pennsylvania កាលពីថ្ងៃសៅរ៍។ ការវាយប្រហារនេះ បានសម្លាប់មនុស្សម្នាក់ និងពីរនាក់ផ្សេងទៀតរងរបួសធ្ងន់ ខណៈអ្នកបាញ់ប្រហារ ត្រូវបានសម្លាប់ដោយអ្នកបាញ់ស៊ីបរបស់អង្គភាពសេវាសម្ងាត់។លោក Trump អាយុ៧៨ឆ្នាំ មានឈាមហូរនៅលើផ្ទៃមុខរបស់លោក បានឆ្លើយតបដោយការក្តាប់កណ្តាប់ដៃរបស់លោកទៅកាន់ហ្វូងមនុស្សដែលមានការភ្ញាក់ផ្អើល មុនពេលភ្នាក់ងារសម្ងាត់បានប្រញាប់ប្រញាល់នាំលោកចេញពីកន្លែងកើតហេតុ។ លោក Pence បាននិយាយនៅលើបណ្តាញ X ថាលោក និងភរិយារបស់លោក លោកស្រី Karen កំពុងបួងសួងសូមឲ្យលោក Trump ឆាប់ជាសះស្បើយពេញលេញ និងបួងសួងសម្រាប់អ្នករងរបួស និងអ្នកបាត់បង់ជីវិតក្នុងការវាយប្រហារដ៏រន្ធត់នេះ។ អតីតអនុប្រធានាធិបតីរូបនេះ ស្ថិតក្នុងចំណោមអ្នកគាំទ្រដ៏ស្មោះត្រង់បំផុតរបស់លោក Trump រហូតដល់ត្រឹមព្រឹត្តិការណ៍ថ្ងៃទី៦ ខែមករា ឆ្នាំ២០២១ ដែលនៅពេលនោះមានការមានៈចំពោះចៅហ្វាយនាយរបស់លោក ដែលលោកបានបដិសេធមិនរារាំង ការអះអាងជ័យជម្នះក្នុងការបោះឆ្នោតរបស់លោក Joe Biden ហើយអ្នកគាំទ្រ របស់លោក Trump ដែលមានកំហឹង បានវាយលុកលើវិមាន Capitol របស់សហរដ្ឋអាមេរិក។ ក្រោយមក លោក Pence បានចោទប្រកាន់មហាសេដ្ឋីរូបនេះថា បង្កគ្រោះថ្នាក់ដល់ជីវិតរបស់លោក និងគ្រួសាររបស់លោក តាមរយៈវោហាសាស្ត្រដ៏ក្តៅគគុក មុនពេលមានការវាយលុកលើវិមាន Capitol។ អ្នកគាំទ្រអតីតប្រធានាធិបតី បច្ចុប្បន្ននេះបានចាត់ទុកលោក Pence ថាជាជនក្បត់ ហើយលោក Trump ដែលត្រូវបានគេរំពឹងថានឹងប្រកាសពីការជ្រើសរើសអ្នករួមការងាររបស់លោកក្នុងពេលឆាប់ៗនេះ បានច្រានចោលការរំពឹងទុកនៃការវិលត្រលប់មករកអតីតអភិបាលរដ្ឋ Indiana ជាថ្មីម្តងទៀត។

ក្រុមហាម៉ាសថា ខ្លួនមិនបានចេញពីកិច្ចចរចាបទឈប់បាញ់ទេ ក្រោយការវាយប្រហាររបស់អ៊ីស្រាអែល

មន្ត្រីជាន់ខ្ពស់ម្នាក់របស់ក្រុមហាម៉ាស បាននិយាយកាលពីថ្ងៃអាទិត្យ (១៤ កក្កដា) ថា ក្រុមអ៊ិស្លាមនិយមមួយនេះមិនបានដកខ្លួនចេញពីកិច្ចចរចាបទឈប់បាញ់ជាមួយអ៊ីស្រាអែលទេ បន្ទាប់ពីការវាយប្រហារដ៏បង្ហូរឈាមកាលពីចុងសប្តាហ៍នេះនៅតំបន់ហ្កាហ្សា ដែលអ៊ីស្រាអែល បាននិយាយថាកំណត់គោលដៅលើមេដឹកនាំយោធារបស់ក្រុមនេះគឺលោក ម៉ូហាម៉េដ ដេហ្វ (Mohammed Deif)។លោក អ៊ីសហ្សាត អែលរ៉េស៊ីក (Izzat El-Reshiq) សមាជិកការិយាល័យនយោបាយរបស់ក្រុមហាម៉ាស បានចោទប្រកាន់អ៊ីស្រាអែល ថាបានព្យាយាមបង្អាក់កិច្ចខិតខំប្រឹងប្រែងរបស់អ្នកសម្រុះសម្រួលអារ៉ាប់ និងសហរដ្ឋអាមេរិក ក្នុងការឈានដល់កិច្ចព្រមព្រៀងបទឈប់បាញ់ ដោយបង្កើនការវាយប្រហាររបស់ខ្លួននៅក្នុងតំបន់ហ៊ុមព័ទ្ធ។ការវាយប្រហារកាលពីថ្ងៃសៅរ៍នៅក្នុងក្រុង ខាន់យូនីស (Khan Younis) នៃតំបន់ហ្កាហ្សា ដែលក្នុងនោះយ៉ាងហោចណាស់មានជនជាតិប៉ាឡេស្ទីនចំនួន ៩០ នាក់ត្រូវបានសម្លាប់ បានបង្កើនភាពសង្ស័យលើកិច្ចចរចាបទឈប់បាញ់។ មានសញ្ញាសង្ឃឹមកាន់តែខ្លាំងឡើងក្នុងប៉ុន្មានថ្ងៃថ្មីៗនេះដែលថាកិច្ចព្រមព្រៀងមួយអាចត្រូវបានឈានដល់ដើម្បីបញ្ឈប់ការប្រយុទ្ធ និងដោះលែងចំណាប់ថ្នូរ ប៉ុន្តែប្រភពពីអេហ្ស៊ីប បាននិយាយថាកិច្ចចរចានោះត្រូវបានផ្អាក។យោធាអ៊ីស្រាអែលបាននិយាយកាលពីថ្ងៃអាទិត្យថា ការវាយប្រហារកាលពីថ្ងៃសៅរ៍ ដែលបានកំណត់គោលដៅលើប្រមុខយោធាក្រុមហាម៉ាស បានសម្លាប់លោក រ៉ាហ្វា សាឡាម៉ា (Rafa Salama) មេបញ្ជាការកងពលតូចនៅក្រុង ខាន់យូនីស របស់ហាម៉ាស ប៉ុន្តែមិនមានការបញ្ជាក់ថាលោក Deif ក៏ត្រូវបានសម្លាប់ដែរឬយ៉ាងណាទេ៕

ក្រុមអ្នកគាំទ្ររបស់លោក Trump ប្រមូលផ្ដុំគ្នាបួងសួងឱ្យលោក បន្ទាប់ពីការវាយប្រហារ

នៅក្នុងពិធីបួងសួងឱ្យលោក Donald Trump នៅជិតមហាសន្និបាតជាតិរបស់គណបក្សសាធារណរដ្ឋនៅទីក្រុង មីលវ៉ឃី (Milwaukee) រដ្ឋ វីស្ខនស៊ិន (Wisconsin) កាលពីថ្ងៃអាទិត្យ (១៤ កក្កដា) ក្រុមអ្នកគាំទ្របានសរសេរការអធិស្ឋាន ការបួងសួង និងជូនពរដល់លោក បន្ទាប់ពីការវាយប្រហារដ៏គួរឱ្យភ្ញាក់ផ្អើលលើអតីតប្រធានាធិបតីរូបនេះ។ អ្នកក្រុង Milwaukee និងអ្នកគាំទ្រលោក បាននិយាយថា ការចូលរួមក្នុងពិធីនេះមានសារៈសំខាន់ណាស់ ពីព្រោះការរស់រានមានជីវិតពីការប៉ុនប៉ងធ្វើឃាតរបស់លោក Trump គឺជា «អព្ភូតហេតុ»។ អ្នកចូលរួមរូបនោះបានប្រាប់សារព័ត៌មានរ៉យទ័រថា «ព្រះមិនទាន់អស់កិច្ចការជាមួយលោក Trump ទេ ហើយផែនការធំត្រូវបានរៀបចំទុកសម្រាប់លោក»។បណ្ដាសមាជិកសាធារណៈរដ្ឋបាននិយាយថា ពួកគេបានកត់សម្គាល់ឃើញពីអារម្មណ៍នៃការបង្រួបបង្រួមគ្នាកាន់តែខ្លាំងនៅក្នុងបក្សក្នុងរយៈពេល ២៤ ម៉ោងចុងក្រោយនេះ ហើយសង្ឃឹមថាមនុស្សកាន់តែច្រើននឹងចេញទៅបោះឆ្នោត។ អ្នកចូលរួមម្នាក់ទៀតមាននិយាយថា «អ្នកបោះឆ្នោតជាច្រើនចេះតែទៅបោះឱ្យតែរួច ពួកគេមិនដឹងអ្វីសោះពីបេក្ខជនឡើយ។ ដូច្នេះហើយ យើងសង្ឃឹមថាប្រជាជននឹងដឹងពីអ្នកដែលគេគាំទ្រ ព្រោះនេះជាការបោះឆ្នោតដ៏ធំបំផុតក្នុងប្រវត្តិសាស្ត្រសម្រាប់ប្រទេស»។លោក Trump ត្រូវបានគេបាញ់ចំត្រចៀកខាងស្ដាំអំឡុងពេលការជួបជុំយុទ្ធនាការបោះឆ្នោតនៅរដ្ឋ ផិនស៊ីលវេនៀ (Pennsylvania) នៅក្នុងការវាយប្រហារដែលត្រូវបានគេស៊ើបអង្កេតថាជាការប៉ុនប៉ងលួចធ្វើឃាត។ លោកបានទៅដល់ទីក្រុង មីលវ៉ឃី (Milwaukee) កាលពីថ្ងៃអាទិត្យ ជាទីដែលលោកនឹងទទួលបានការតែងតាំងជាផ្លូវការជាបេក្ខជនប្រធានាធិបតីនៃគណបក្សសាធារណរដ្ឋនៅចុងសប្តាហ៍នេះ៕

បណ្ដាញសង្គម

ព័ត៌មានថ្មីៗ

ប្រធានក្រុមការងារទទួលបន្ទុកជួសជុល និងសាងសង់ឡើងវិញអគារសិក្សាអំណោយសម្ដេចតេជោ បន្តដឹកនាំក្រុមការងារចុះពិនិត្យ និងវាយតម្លៃស្ថានភាពអគារសិក្សាចំនួន ៦ ទីតាំង ក្នុងក្រុងកែប និងស្រុកដំណាក់ចង្អើរ ខេត្តកែប

វត្ថុសិល្បៈចំនួន ១៨ អាយុប្រមាណ ១ពាន់ឆ្នាំ នឹងត្រូវប្រគល់ត្រឡប់មកកម្ពុជាវិញ ពី ចក្រភពអង់គ្លេស

ក្រសួងអប់រំ បើកវេទិកាជាតិលើកទី៣ ស្តីពីការសិក្សាពេញមួយជីវិត ឆ្នាំ២០២៦

ភ្លៀងធ្លាក់ខ្លាំងបង្កជាទឺកជំនន់ដ៏គំហក់នៅតំបន់ភាគខាងជើង និងខាងកើតស៊ីរី សម្លាប់មនុស្ស ៥នាក់ និងមនុស្ស ៥នាក់ផ្សេងទៀតបាត់ខ្លួន

ប្រធានាធិបតី៖ ចិន និងអាល្លឺម៉ង់ គួររួមគ្នាលើកបន្តកម្ពស់សណ្តាប់ធ្នាប់អន្តរជាតិ

អ៊ីស្រាអែលវាយប្រហារតំបន់ហ្កាហ្សា ខណៈក្រសួងសុខាភិបាលតំបន់មួយនេះ ជំរុញឲ្យបើកច្រកព្រំដែន Rafahឡើងវិញ

រុស្ស៊ីវាយប្រហារហេដ្ឋារចនាសម្ព័ន្ធថាមពល នៅទីក្រុងគីវ ខណៈជំនួយឆ្ពោះទៅទីក្រុង Oleshky របស់អ៊ុយក្រែន

ក្រុមរដ្ឋអាជ្ញាកូរ៉េខាងត្បូង ជំរុញឲ្យមានទោសប្រហារជីវិតសម្រាប់លោកអតីតប្រធានាធិបតី Yoon

ប្រភពនយោបាយជាន់ខ្ពស់រិះគន់ខ្លាំងលើលោក Qassem ចំពោះសេចក្តីថ្លែងការណ៍ថ្មីៗរបស់លោក

ក្រសួងសន្តិសុខសាធារណៈចិន ចុះពិនិត្យទីតាំងធ្លាប់ប្រព្រឹត្តបទល្មើសឆបោកតាមប្រព័ន្ធបច្ចេកវិទ្យានៅតំបន់ OP ក្រុងបាវិត

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877

នយោបាយ​ និង ការអភិវឌ្ឍន៍