នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
សម្ដេច​តេជោ៖ការពង្រឹងខឿនការពារជាតិមិនសំដៅតែនៅសមរភូមិមុខទេ ត្រូវយកចិត្តទុកដាក់ទំនុកបម្រុងអ្នកសមរភូមិក្រោយជាគ្រួសារយុទ្ធជនជួរមុខ និងអតីតយុទ្ធជន
ឯកអគ្គរដ្ឋទូតហុងគ្រីចប់អាណត្តិមើលឃើញថាកម្ពុជាគឺជាដៃគូដ៏ជិតស្និទ្ធរបស់ហុងគ្រី
ឯកអគ្គរដ្ឋទូតបញ្ចប់អាណត្តិស្វីស៖ រដ្ឋាភិបាលស្វីសនឹងបន្តគាំទ្រដល់ការអភិវឌ្ឍសង្គម-សេដ្ឋកិច្ចកម្ពុជា
សម្តេចធិបតីផ្ញើសារច្បាស់លាស់ និងយ៉ាងម៉ឺងម៉ាត់​ដល់អាជ្ញាធរមូលដ្ឋានឱ្យ​បង្ក្រាប​ Online Scams ឱ្យទាល់តែអស់​ជាដាច់ខាត​ប្រកបដោយស្មារតីទទួលខុសត្រូវខ្ពស់បំផុត

នយោបាយ​ និង ការអភិវឌ្ឍន៍

ឯកឧត្តម ហ៊ុន ម៉ានិត អំពាវនាវអាជ្ញាធរ និងពលរដ្ឋប៉ៃលិន ចូលរួមទប់ស្កាត់ការឆ្លងជំងឺកូវីដ១៩ បំប្លែង​ថ្មីដែលតា

2021/08/05 11:23:12 am        383
Facebook Telegram Linkin
ប៉ៃលិន ៖ ឯកឧត្តម ហ៊ុន ម៉ានិត ប្រធានអនុគណៈកម្មការ គ្រប់គ្រងច្រកទ្វារចេញ-ចូល ប្រទេស និងធ្វើចត្តាឡីស័ក បានអំពាវនាវដល់អាជ្ញាធរ និងប្រជាពលរដ្ឋខេត្តប៉ៃលិន បន្តចូលរួមជាមួយរាជរដ្ឋាភិបាល ក្នុងការទប់ស្កាត់ឲ្យបាន នូវការឆ្លងរីករាលដាលនៃជំងឺកូវីដ១៩ ជាពិសេសប្រភេទបំប្លែង​ថ្មីដែលតា (Delta) ខណៈកម្ពុជាបានរកឃើញជាបន្តបន្ទាប់ ។ក្នុងឱកាសចុះពិនិត្យមើលតាមមណ្ឌលចត្តាឡីស័ក និងមណ្ឌលព្យាបាលជំងឺកូវីដ-១៩ នៅ​ក្នុងខេត្តប៉ៃលិន ដែលកំពុងទទួលពលករមកពីប្រទេសថៃ កាលពីថ្ងៃទី៤ ខែសីហា ឆ្នាំ២០២១ ឯកឧត្តម ហ៊ុន ម៉ានិត មានប្រសាសន៍ថា ពលរដ្ឋកំពុងធ្វើចត្តាឡីស័ក និងកំពុងព្យាបាលជំងឺកូវីដ-១៩ទាំងអស់ ត្រូវមានការអត់ធ្មត់ និងខិតខំថែទាំសុខភាព ព្រមទាំងស្ដាប់តាមការណែនាំ​របស់​​ប្រធាន​មណ្ឌលនីមួយៗ និងការណែនាំរបស់ក្រសួងសុខាភិបាល ក៏ដូចជាវិធានការនានា​របស់​រដ្ឋបាលខេត្តប៉ៃលិន ។ឯកឧត្តម បានបន្តថា នៅក្នុងអំឡុងពេលនេះ ប្រទេសកម្ពុជាកំពុងមានការឆ្លងរីករាលដាល​នៃជំងឺ​កូវី១៩ ជាពិសេសប្រភេទបំប្លែង​ថ្មី Delta ដែលកំពុងមានឆ្លងនៅក្នុងប្រទេស ហើយភាគច្រើន គឺនាំចូលតាមរយៈពលករវិលត្រលប់មកពីប្រទេសថៃ ដូច្នេះសូមអាជ្ញាធរគ្រប់លំដាប់ថ្នាក់ និងប្រជាពលរដ្ឋទាំងអស់ នៅក្នុងខេត្តប៉ៃលិន រួមគ្នាទប់ស្កាត់នូវវីរុសបម្លែងថ្មីនេះ ។លោកជំទាវ បាន ស្រីមុំ អភិបាលខេត្តប៉ៃលិន មានប្រសាសន៍ថា បច្ចុប្បន្នខេត្តប៉ៃលិន បានរៀបចំ​មណ្ឌលចត្តាឡីស័ក និងមណ្ឌលសម្រាប់ព្យាបាលជំងឺកូវីដ-១៩ តាមលក្ខណៈស្តង់ដារតែមួយ មាន​សម្ភារៈប្រើប្រាស់ ប្រព័ន្ធទឹកប្រព័ន្ធភ្លើង និងបង្គន់អនាម័យ ព្រមទាំងផ្គត់ផ្គង់អាហារ៣ពេល ជា​ច្រើនទីតាំង សម្រាប់ទទួលពលករមកពីប្រទេសថៃ តាមរយៈភូមិសាស្ត្រខេត្តប៉ៃលិន និងជួយទទួល​មកពីបណ្តាខេត្តនានា ជាប់ព្រំដែនកម្ពុជា-ថៃផងដែរ ។លោកជំទាវ បានបញ្ជាក់ថា ទន្ទឹមនឹងការរៀបចំមណ្ឌលចត្តាឡីស័ក នឹងទីតាំងព្យាបាលអ្នក​ជំងឺ​កូវីដ១៩នេះ អាជ្ញាធរខេត្ត បានការពារយ៉ាងតឹងរឹងនៅតាមបន្ទាត់ព្រំដែនជាមួយប្រទេសថៃ ក្នុង​អំឡុងនៃការបិទខ្ទប់ព្រំដែននេះ ដើម្បីទប់ស្កាត់ការឆ្លងរីករាលដាលនៃជំងឺកូវីដ១៩ បំប្លែង​ថ្មីដែលតា ។គួរបញ្ជាក់ថា ខេត្តប៉ៃលិន ជាខេត្តមួយក្នុងចំណោមខេត្តចំនួន៨ ដែលត្រូវរាជរដ្ឋាភិបាល ធ្វើការបិទខ្ទប់រយៈពេល ១៤ថ្ងៃ ចាប់ពីថ្ងៃទី២៩ ខែកក្កដា ដល់ថ្ងៃទី១២ ខែសីហា ឆ្នាំ២០២១ ដើម្បីទប់ស្កាត់ការឆ្លងរីករាលដាលជំងឺកូវីដ-១៩ ជាពិសេសប្រភេទបំប្លែង​ថ្មី Delta ខណៈខេត្តមួយនេះ ក៏បានរកឃើញអ្នកឆ្លងកូវីដ១៩ បំប្លែងថ្មីនេះ ជាពលករត្រឡប់មកពីប្រទេសថៃ ។ កាលពីថ្ងៃទី៤ ខែសីហា ខេត្តប៉ៃលិនអាជ្ញាធរបានរកឃើញអ្នកវិជ្ជមានកូវីដ១៩ ចំនួន៦នាក់ និងជាសះស្បើយចំនួន ១១នាក់ ៕អត្ថបទ ៖ បាន សុខរិទ្ធ

ក្រសួងវប្បធម៌នឹងរៀបចំពិធីអបអរសាទរខួបលើកទី៥៤ ថ្ងៃបង្កើតអាស៊ាន តាមរយៈប្រពន្ធអនឡាញ នៅថ្ងៃទី០៨ ខែសីហា ខាងមុខនេះ

2021/08/05 09:56:45 am        334
Facebook Telegram Linkin
ភ្នំពេញ ៖ ក្រសួងវប្បធម៌ និងវិចិត្រសិល្បៈនៃព្រះរាជាណាចក្រកម្ពុជា នឹងរៀបចំពិធីអបអរសាទរខួបលើកទី៥៤ ថ្ងៃបង្កើតសមាគមន៍ប្រជាជាតិអាស៊ីអាគ្នេយ៍ហៅកាត់ថា«អាស៊ាន»តាមរយៈប្រពន្ធអនឡាញ នៅថ្ងៃទី០៨ ខែសីហា ឆ្នាំ២០២១ខាងមុខនេះ។យោងតាមការឱ្យដឹងពីមន្ត្រីជំនាញ ដែលជាអ្នករៀបចំកម្មវិធីនេះ បានឱ្យដឹងថា លោកជំទាវបណ្ឌិតសភាចារ្យ ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ ប្រទេសកម្ពុជា និងជាប្រធានរដ្ឋមន្រ្តីវប្បធម៌អាស៊ានទទួលបន្ទុកវប្បធម៌ និងសិល្បៈ នឹងថ្លែងសន្ទរកថាស្វាគមន៍ អបអរសាទរខួបលើកទី៥៤ថ្ងៃបង្កើតអាស៊ាននេះ។ប្រភពដដែរ បានបញ្ជាក់ថា ចំពោះព្រឹត្តិការណ៍ខាងលើ ក្រសួងវប្បធម៌ និងវិចិត្រសិល្បៈតែងតែ​ប្រារព្ធធ្វើជា​ញឹកញាប់​ទៅតាមពេលវេលា ដើម្បីអបអរសាទរខួបនៃថ្ងៃបង្កើតអាស៊ាន។ ប៉ុន្តែនៅពេលមានវិបត្តិនៃការរីករាលដាលជំងឺកូវីដ-១៩នេះមក យើងមានការអាក់ខាន​ក្នុងការ​រៀបចំ​ព្រឹត្តិការណ៍ដោយផ្ទាល់ តែទោះជាយ៉ាងណាក្ដី យើងនៅតែព្យាយាមរៀបចំ​តាមរយៈប្រព័ន្ធ​អនឡាញ។ក្រោយមានការផ្ទុះនៃការរីករាលដាលនៃជំងឺកូវីដ-១៩ យ៉ាងគំហក់នៅទូទាំងពិភពលោក ក៏ដូចជានៅក្នុងតំបន់ ព្រឹត្តិការណ៍ជាច្រើនបានប្តូរសណ្ឋាននៃការរៀបចំ ពីការរៀបចំដោយផ្ទាល់ មកជាការរៀបចំតាមរយៈប្រព័ន្ធវីដេអូ ឬប្រភេទហាយប្រី ដដែលមានអ្នកអាចចូលរួមដោយផ្ទាល់ និងដោយប្រយោលតាមប្រព័ន្ធវីដេអូ ដែលវាជាបរិបទនៃការរៀបចំតាមបែបបទគន្លងប្រក្រតីភាពថ្មី។ជាក់ស្តែងកាលពីឆ្នាំ២០២០ ក្រសួងវប្បធម៌ និងវិចិត្រសិល្បៈធ្លាប់បានរៀបចំកិច្ចប្រជុំលើកទី៩ ថ្នាក់រដ្ឋមន្ត្រីអាស៊ានទទួលបន្ទុបវប្បធម៌ និងសិល្បៈ និងកិច្ចប្រជុំពាក់ព័ន្ធតាមប្រព័ន្ធវីដេអូ ដែលកម្ពុជាម្ចាស់ផ្ទះ និងជាប្រធានAMCA សម្រាប់អាណត្តិឆ្នាំ២០២០-២០២២។ ក្នុងន័យនេះ ស្ថិតក្នុងអាណត្តិជាប្រធានAMCA ឆ្នាំ២០២១ ដើម្បីអបអរខួបលើកទី៥៤នៃការបង្កើត​សមាគមន៍ប្រជាជាតិអាស៊ីអាគ្នេយ៍ ហៅកាត់ថាអាស៊ានក្រសួងវប្បធម៌ និងវិចិត្រសិល្បៈ បានគ្រោង នឹងរៀបចំព្រឹត្តិការណ៍ខួបអបអរសាទរនេះ នៅថ្ងៃទី០៨ ខែសីហា ឆ្នាំ២០២១ តាមរយៈការថតជា​វីដេអូអបអរសាទរ រួចចាក់ផ្សាយតាមស្ថានីយទូរទស្សន៍ក្នុងស្រុក និងតាមប្រព័ន្ធផ្សព្វផ្សាយ​បណ្តាញ​សង្គមមួយចំនួន។សូមបញ្ជាក់ថា អាស៊ានបង្កើត គឺនៅថ្ងៃទី០៨ ខែសីហា ឆ្នាំ១៩៦៧ នៅទីក្រុងបាងកកប្រទេសថៃ ដែលមានប្រទេសចំនួន៥ ជាស្ថាបនិក រួមមានប្រទេសឥណ្ឌូនេស៊ី ម៉ាឡេស៊ី ហ្វីលីពីន សឹង្ហបុរី និងថៃ បានព្រមព្រៀងគ្នាចុះហត្ថលេខារួមគ្នាលើសេចក្តីប្រកាសរួមក្នុងការបង្កើតសមាគមន៍មួយនេះឡើង ហើយសព្វថ្ងៃនេះអាស៊ាន បានក្លាយជាសមាគមន៍ ដែលកំពុងទទួលបានភាពលេចធ្លោ និង​ជោគជ័យ។ ប្រទេសកម្ពុជា បានក្លាយជាប្រទេសសមាជិកអាស៊ានទី១០ នៅថ្ងៃទី៣០ ខែមេសា ឆ្នាំ១៩៩៩ បន្ទាប់ពីប្រទេសព្រុយណេដារ៉ូសេឡឹម វៀតណាម ឡាវ និងមីយ៉ាន់ម៉ា៕អត្ថបទ រដ្ឋា

អាជ្ញាធរជាតិអប្សរា កំពុងកែលម្អផ្លូវក្នុងរមណីយដ្ឋានអង្គរ ចាប់ពីមុខព្រះលានជល់ដំរី រហូតមុខប្រាសាទបន្ទាយក្តី ដែលមានប្រវែង៦៣៦៨ម៉ែត្រ

2021/08/04 02:24:41 pm        593
Facebook Telegram Linkin
សៀមរាប ៖ បច្ចុប្បន្នអាជ្ញាធរជាតិអប្សរាបាន និងកំពុងកែលម្អផ្លូវថ្នល់ក្នុងរមណីយដ្ឋានអង្គរ ចាប់ពីមុខព្រះលានជល់ដំរី រហូតមុខប្រាសាទបន្ទាយក្តី ដែលមានប្រវែងសរុបចំនួន៦៣៦៨ម៉ែត្រ ដោយចែកជា ៣កំណាត់ ដើម្បីធ្វើអោយផ្លូវមានសោភណ្ឌភាពស្អាត និងងាយស្រួលធ្វើចរាចរណ៍ និងទាក់ទាញអ្នកទេសចរណ៍។លោក យិត ចាន់ដារដ្ឋ អគ្គនាយករងនៃអាជ្ញាធរជាតិអប្សរា មានប្រសាសន៍តាមប្រព័ន្ធតេឡេក្រាម​នៅល្ងាចថ្ងៃទី ០៣ខែសីហាឆ្នាំ២០២១នេះថា កំណាត់ផ្លូវដែលបានជួសជុសទី១ ចាប់ពីមុខលាន​ជល់ដំរី ទៅដល់ស្ពានប្រាសាទតាកែវ មានប្រវែង២១២២ ម៉ែត្រ។ កំណាត់ផ្លូវបានជួសជុលទីទី២ ចាប់ពីស្ពានប្រាសាទតាកែវ ទៅដល់ខាងលិចប្រាសាទតាព្រហ្មប្រវែង ២១២៣ ម៉ែត្រ។ ទី៣ ចាប់ពីខាងលិចប្រាសាទតាព្រហ្ម ទៅដល់មុខប្រាសាទបន្ទាយក្តី មានប្រវែង២១២៣ ម៉ែត្រ ដែលសរុបមានប្រវែងចំនួន៦៣៦៨ម៉ែត្រ។ លោក បានបន្ដថា ផ្លូវនេះជាផ្លូវកៅស៊ូ អ៊ុតបេតុងអេស៊ី ដែលការងារនេះរួមមាន​ការ​ពង្រីក​ស្មាផ្លូវសងខាង និងមានទំហំ៦ម៉ែត្រ ហើយជាផ្លូវដែលសំខាន់ខ្លាំងនៅក្នុង​រមណីយដ្ឋាន ដែល​ស្ដារឡើងវិញ ដើម្បីលើកកម្ពស់សោភណភាព និងសម្រួលដល់ការធ្វើដំណើររបស់ប្រជាពលរដ្ឋ និងភ្ញៀវទេសចរជាតិ-អន្តរជាតិ។បើតាមលោក យិត ចាន់ដារដ្ឋ លើកឡើងថា ការស្ដារនិងកែលំអរកំណាត់ផ្លូវទាំងបីនេះ ដោយ​គម្រោងប្រើប្រាស់ថវិការាជរដ្ឋាភិបាល តាមរយៈមូលនិធិ​អភិរក្ស និងអភិវឌ្ឍន៍ ។លោកបញ្ជាក់ថា ផ្លូវសំខាន់ៗនៅក្នុងរមណីយអង្គរ និងបានល្អប្រសើរទាំងស្រុង ​នៅចុងឆ្នាំ២០២១ ដើម្បី​ត្រៀម​ទទួលភ្ញៀវជាតិ​ និងអន្ដរជាតិក្រោយបញ្ចប់ជំងឺកូវីដ១៩ ជា​ពិសេសសម្រួល​ដល់ការធ្វើដំណើរ​ប្រជាពលរដ្ឋប្រសើរ៕

ប្រមុខការទូតកម្ពុជា នឹងចូលរួមកិច្ចប្រជុំរដ្ឋមន្រ្តីការបរទេសមេគង្គ-ជប៉ុន លើកទី១៤ តាមរយៈវីដេអូពីចម្ងាយ

2021/08/04 11:05:21 am        424
Facebook Telegram Linkin
ភ្នំពេញ ៖ ឯកឧត្តមប្រាក់ សុខុន ឧបនាយករដ្ឋមន្រ្តី និងជារដ្ឋមន្រ្តីក្រសួងការបទេស និងសហប្រតិបត្តិការអន្តរជាតិ នឹងចូលរួមកិច្ចប្រជុំរដ្ឋមន្រ្តី ការបរទេសមេគង្គ-ជប៉ុន លើកទី១៤ តាមរយៈវីដេអូពីចម្ងាយនាថ្ងៃទី៦ ខែសីហា ឆ្នាំ២០២១នេះ ខណៈកិច្ចប្រជុំនេះ នឹងជំរុញការអភិវឌ្ឍ​ប្រកប​ដោយចីរភាព លើកកម្ពស់ការតភ្ជាប់ផ្នែកសង្គម សេដ្ឋកិច្ច និងវប្បធម៌ក្នុងចំណោម​ប្រទេស​មេគង្គ និងប្រទេសជប៉ុនឲ្យកាន់តែល្អប្រសើបន្ថែមទៀតផងដែរ។យោងតាមសេចក្តីប្រកាសព័ត៌មានរបស់ក្រសួងការបរទេសកម្ពុជា ដែលទូរទស្សន៍BTVទទួលបាន នាព្រឹកថ្ងៃទី៤ ខែសីហានេះ បានឲ្យដឹងថា តបតាមការអញ្ជើញរបស់ ឯកឧត្តម ម៉ូតេហ្គី តូស៊ីមីសឺ (MOTEGI Toshimitsu) រដ្ឋមន្រ្តី ការបរទេស នៃប្រទេសជប៉ុន ឯកឧត្តម ប្រាក់ សុខុន ឧបនាយក​រដ្ឋមន្រ្តី រដ្ឋមន្រ្តីការបរទេស និងសហប្រតិបត្តិការអន្តរជាតិ នៃព្រះរាជាណាចក្រកម្ពុជា នឹងអញ្ជើញ​ចូលរួមក្នុងកិច្ចប្រជុំរដ្ឋមន្រ្តី ការបរទេសមេគង្គ-ជប៉ុន លើកទី១៤ ដែលនឹងប្រព្រឹត្ត​ទៅនៅថ្ងៃទី ០៦ ខែសីហា ឆ្នាំ២០២១ តាមប្រព័ន្ធវីដេអូ។សេចក្តីប្រកាសបានឲ្យដឹងទៀតថា ប្រទេសជប៉ុន នឹងធ្វើជាប្រធានដឹកនាំកិច្ចប្រជុំនេះ ហើយរដ្ឋមន្រ្តី​ការបរទេសនៃប្រទេសមេគង្គដទៃទៀត រួមមាន ៖ ឡាវ មីយ៉ាន់ម៉ា ថៃ និងវៀតណាម ក៏នឹងអញ្ជើញ​ចូលរួមក្នុងកិច្ចប្រជុំនេះ ផងដែរ។ប្រភពដដែលបានបញ្ជាក់ផងដែរថា រដ្ឋមន្រ្តីការបរទេសមេគង្គ-ជប៉ុន នឹងពិនិត្យមើលវឌ្ឍនភាព​នៃកិច្ចសហប្រតិបត្តិការមេគង្គ-ជប៉ុន នៅក្នុងវិស័យផ្សេងៗ កំណត់ទិសដៅអនាគត​នៃកិច្ច​សហប្រតិបត្តិការនេះ ដើម្បីជំរុញការអភិវឌ្ឍប្រកបដោយចីរភាព លើកកម្ពស់ការតភ្ជាប់ផ្នែកសង្គម សេដ្ឋកិច្ច និងវប្បធម៌ក្នុងចំណោមប្រទេសមេគង្គ និងប្រទេសជប៉ុន និងដើម្បីធានាបាននូវ​អនុតំបន់​មេគង្គ ដែលកាន់តែរស់រវើក ដោយគិតគូរពិចារណាទៅលើជំងឺកូវីដ-១៩ និងការប្រឈមនានា ដែលកំពុងកើតមានឡើង។ រដ្ឋមន្រ្តីទាំងអស់ក៏នឹងផ្លាស់ប្តូរទស្សនៈគ្នាផងដែរ លើបញ្ហាតំបន់ និងអន្តរជាតិ ដែលជាចំណាប់អារម្មណ៍ និងការបារម្ភរួមគ្នា៕អត្ថបទបាន ចក់

កុមារ-យុវវ័យ​ជាង៦០០០នាក់ ក្នុងខណ្ឌជ្រោយចង្វារ មកចាក់វ៉ាក់សាំងកូវីដ-១៩ ដើម្បី​ទប់ស្កាត់ការ​ចម្លងកូវីដ-១៩

2021/08/03 12:47:22 pm        551
Facebook Telegram Linkin
ភ្នំពេញ ៖ កុមារ និងយុវវ័យ រស់នៅក្នុងមូលដ្ឋាន​ ខណ្ឌជ្រោយចង្វារ មានចំនួនសរុបជាង៦០០០នាក់ បានមកចាក់វ៉ាក់សាំងបង្ការជំងឺកូវីដ-១៩ ប្រភេទស៊ីណូវ៉ាក់ ដែលមានអាយុចាប់ពី១២ឆ្នាំ ដល់​អាយុ​ក្រោម១៨ឆ្នាំ ដើម្បីការពារទប់ស្កាត់ការចម្លងមេរោគកូវីដ-១៩ នៅព្រឹកថ្ងៃទី៣ ខែសីហា ឆ្នាំ២០២១នេះ។បើតាមលោក វុធ សូវៀត ប្រធានរដ្ឋបាល និងបុគ្គលិកការិយាល័យខណ្ឌជ្រោយចង្វារ បានឲ្យដឹងថា ខណ្ឌជ្រោយចង្វារ មិនខុសពីបណ្តាខណ្ឌទាំង១៣ ផ្សេងទៀតនោះទេ គឺក្នុងរាជធានីភ្នំពេញ​ចាប់​ផ្តើមចាក់វ៉ាក់សាំងបង្ការជំងឺកូវីដ-១៩ ជូនកុមារ និងយុវវ័យ មានអាយុចាប់ពី១២ឆ្នាំ រហូត​​ដល់​ក្រោម១៨ឆ្នាំ ដែលយុទ្ធនាការនេះ ​បានចាប់ផ្តើមកាលពីថ្ងៃទី១ខែ សីហា ឆ្នាំ២០២១ មានចំនួន២ ទីតាំងក្នុងមូលដ្ឋានខណ្ឌ។ ទី១.ទីតាំងផ្សាររុងរឿង OCIC ដំណើរការចាក់ជូនកុមារ និងយុវវ័យ កំពុងរស់នៅក្នុងសង្កាត់ចំនួន៤ គឺសង្កាត់ព្រែកលៀប សង្កាត់ជ្រោយចង្វារ សង្កាត់ព្រែកតាសេក និងសង្កាត់បាក់ខែង ។ទី២. ទីតាំងមណ្ឌលសុខភាពកោះដាច់ ដំណើរការចាក់ជូនកុមារ និងយុវវ័យ ដែលពិបាកក្នុងការឆ្លងដ ទាំងទៅ ទាំងមក ដោយធ្វើការរក្សាគម្លាតសង្គម និងគម្លាតបុគ្គល ដោយ​មិនចង់ប្រមូលផ្តុំគ្នានៅទីតាំងតែមួយ ទើបសាលារាជធានីភ្នំពេញ បង្កើតទីតាំងមណ្ឌលសុខភាព​​កោះដាច់​បន្ថែមទៀត សម្រាប់ចាក់វ៉ាក់សាំងជូនកុមារ និងយុវវ័យ។ជាមួយគ្នានោះដែរ កុមារ យុវវ័យ អាយុចាប់ពី១២ឆ្នាំ ដល់អាយុក្រោម១៨ឆ្នាំ មកចាក់វ៉ាក់សាំង​បង្ការ​ជំងឺកូវីដ-១៩ ពីក្រុមការងារគ្រូពេទ្យស្រុកប្រតិបតិ្តមេគង្គ បានបង្ហាញចំណាប់​អារម្មណ៍​ស្រដៀងគ្នាថា យុទ្ធនាការចាក់វ៉ាក់សាំងកូវីដ-១៩នេះ ពិតជាល្អមែនទែនសម្រាប់កុមារ និងយុវវ័យ ព្រោះបាន​ចូលរួម​ការពារសុខភាព អាយុជីវិតរបស់ពួកគាត់ និងសូមគោរពដឹងគុណ និងថ្លែងអំណរគុណ​ចំពោះ​សម្តេចតេជោ ហ៊ុន សែន នាយករដ្ឋមន្រី្ត បានស្វះស្វែងរកវ៉ាក់សាំងបង្ការជំងឺកូវីដ-១៩ មកចាក់​ជូនកុមារ និងយុវវ័យ ដែលមានអាយុចាប់ពី១២ឆ្នាំ រហូតដល់អាយុក្រោម១៨ឆ្នាំ។ឆ្លៀតក្នុងឱកាសនោះ លោក វុធ សូវៀត បានអំពាវនាវដល់លោកពុក អ្នកម្តាយ ជាមាតា បិតា អាណាព្យាបាលកុមារ និងយុវវ័យ អាយុចាប់ពី១២ឆ្នាំ រហូតដល់ក្រោម១៨ឆ្នាំ ត្រូវអញ្ជើញពួកគាត់ មកចាក់វ៉ាក់សាំងការពារជំងឺកូវីដ១៩ តាមការស្ម័គ្រចិត្តឲ្យបានគ្រប់ៗគ្នា ទោះបីជាប្រជាពលរដ្ឋ​មានជីវភាពមាន ឬក្រ ស្ថិតក្នុងស្ថានភាពបែបណាក៏ដោយ គឺអាជ្ញាធរភូមិ សង្កាត់ ខណ្ឌ នឹងចាក់វ៉ាក់សាំងកូវីដ១៩ ជូនឲ្យបានគ្រប់ៗគ្នា និងសូមបងប្អូនប្រជាពលរដ្ឋ ត្រូវរក្សាសុខភាព អនាម័យឲ្យបាន​ខ្ជាប់ខ្ជួន បើទោះបីជាបានចាក់វ៉ាក់សាំងរួចហើយកី្ត មិនមែនមានន័យថា បងប្អូន​ប្រជាពលរដ្ឋមិនឆ្លងនោះទេ។ ដូច្នេះ​សូមយកចិត្តទុកដាក់ខ្ពស់ អនុវត្តន៍​តាមវិធានការ​ដែល​រាជ​រដ្ឋាភិបាល​បានអំពាវនាវម្តងហើយ ម្តងទៀត នូវអនុសាសន៍ដ៏ខ្ពង់ខ្ពស់ គឺ៣កុំ ៣ការពារ របស់​សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រី្ត៕អត្ថបទ រដ្ឋា 

ប្រមុខការទូតកម្ពុជា ៖ ការយល់ដឹង និងការគោពសិទ្ធិមនុស្ស ត្រូវមានភាព​គ្រប់​ជ្រុងជ្រោយ រួមទាំងគ្មានស្ដង់ដារពីរ

2021/08/03 05:14:54 am        856
Facebook Telegram Linkin
ភ្នំពេញ ៖ ឧបនាយករដ្ឋមន្រ្តី និងជារដ្ឋមន្រ្តីក្រសួងការបទេសខ្មែរ ឯកឧត្តម ប្រាក់ សុខុន បានលើក​ឡើងថា ការយល់ដឹង និងការគោពសិទ្ធិមនុស្សត្រូវមានភាពគ្រប់ជ្រុងជ្រោយ​រួមទាំងគ្មាន​ស្តង់ដារទ្វេ ហើយគោរព​អធិបតេយ្យភាពជាតិ​របស់ប្រទេសនីមួយៗ ក៏ស្របតាមគោលការណ៍​មិនជ្រៀតជ្រែក​កិច្ចការផ្ទៃក្នុងផងគ្នាដែរ។យោងតាមសេចក្តីប្រកាសព័ត៌មានស្តីពី លទ្ធផលក្នុងកិច្ចប្រជុំរដ្ឋមន្រ្តីការបរទេសអាស៊ានលើកទី៥៤ និងកិច្ចប្រជុំពាក់ព័ន្ធជាច្រើនទៀត កាលពីថ្ងៃទី០២ ខែសីហា ឆ្នាំ២០២១នេះ តាមរយៈវីដេអូពីចម្ងាយ ដែលប្រទេសព្រុយណេធ្វើជាម្ចាស់ផ្ទះនោះ ឯកឧត្តម ប្រាក់ សុខុន បានលើកឡើងថា ខណៈដែល​អាស៊ាន​កំពុងប្រឈមមុខ នឹងផលប៉ះពាល់ដែលបង្កដោយការរីករាលដាលជំងឺកូវីដ-១៩ បាន​ជះ​ឥទ្ធិពលយ៉ាងធ្ងន់ធ្ងរ មកលើប្រជាជនក្រីក្រ អាស៊ានគួរខិតខំប្រឹងប្រែងរួមគ្នា ដើម្បី​កាត់​បន្ថយ​ការលំបាករបស់ប្រជាជនទាំងនោះ និងបន្ត​វឌ្ឍនភាព​នៃការកាត់បន្ថយភាពក្រីក្រ។ឯកឧត្តម ឧបនាយករដ្ឋមន្រ្តី ក៏បានសង្កត់ធ្ងន់លើភាពចាំបាច់«ក្នុងការបែងចែករវាងការគោរព​សិទ្ធិមនុស្ស​ និងសេរីភាព ក្នុងការលើកកម្ពស់ភាព​សុខដុមរមនា​ និងវឌ្ឍនភាពរបស់មនុស្សជាតិ ពី​ការបន្លំ​ប្រើប្រាស់​គោលការណ៍​ពិសិដ្ឋ​ទាំងនេះ ដើម្បីបង្កឱ្យមានការ​ស្អប់ខ្ពើម ភាពមិនចុះសម្រុង​ក្នុង​សង្គម អស្ថិរភាព និងការជ្រៀតជ្រែកទៅក្នុងកិច្ចការផ្ទៃក្នុងរបស់ប្រទេសដទៃ ហើយការយល់ដឹង និង​ការគោពសិទ្ធិមនុស្សត្រូវមានភាពគ្រប់ជ្រុងជ្រោយរួមទាំង​គ្មានស្តង់ដារទ្វេ ហើយគោរព​អធិបតេយ្យ​ភាពជាតិរបស់ប្រទេសនីមួយៗ ស្របតាមគោលការណ៍មិនជ្រៀតជ្រែក​​កិច្ចការផ្ទៃ​ក្នុងផងគ្នាផងដែរ»។បើតាមសេចក្តីប្រកាសព័ត៌មានដដែល បានបញ្ជាក់ផងដែរថា នៅក្នុងកិច្ចប្រជុំនោះរដ្ឋមន្រ្តីការ​បរទេស​អាស៊ាន​បានសង្កត់ធ្ងន់លើសារៈសំខាន់នៃការប្តេជ្ញាចិត្តប្រកាន់ខ្ជាប់របៀបវារៈសិទ្ធិមនុស្ស រួមទាំងការការពារ និងលើកកម្ពស់សេរីភាពស្នូលរបស់ប្រជាជនអាស៊ាន។ រដ្ឋមន្រ្តីការបរទេសអាស៊ានបានជំរុញឱ្យ AICHR កាន់តែសកម្មក្នុងការបំពេញភារកិច្ចលើកកម្ពស់ និងការពារសិទ្ធិមនុស្សទូទាំងអាស៊ាន ជាពិសេសអំឡុងពេលដ៏លំបាកដែលបណ្តាល​មក​ពីការរីក​រាលដាលជំងឺកូវីដ-១៩នេះដែរ។សេចក្តីប្រកាសព័ត៌មាន ក៏បានឲ្យដឹងផងដែរថា កិច្ចប្រជុំបានពិភាក្សាលើបញ្ហានានាពាក់ព័ន្ធ​នឹង​កិច្ចខិតខំប្រឹងប្រែងកសាងសហគមន៍អាស៊ាន ការលើកកម្ពស់​សមាហរណកម្ម​​តំបន់ ទិដ្ឋភាពនយោបាយ និងសន្តិសុខ និងបញ្ហាចាំបាច់បន្ទាន់ ដទៃទៀតដែលជាការយកចិត្តទុកដាក់ និងការបារម្ភរួម សម្រាប់តំបន់អាស៊ាន រួមទាំងបញ្ហាទំនាក់ទំនង ខាងក្រៅផងដែរ។ប្រទេសជា​សមាជិកអាស៊ានបានសង្កត់ធ្ងន់អំពីសារៈសំខាន់នៃតម្រូវការក្នុងការចាប់ផ្តើមឱ្យមានអភិក្រមរួម ប្រកបដោយបរិយាប័ន្ន និងរឹងមាំ ក្នុងការឆ្លើយតបចំពោះការប្រឈមភ្លាមៗ ជាពិសេស ដើម្បី​បញ្ចប់ជំងឺរាតត្បាតកូវីដ-១៩ និងធានាបាននូវការស្តារសេដ្ឋកិច្ចឡើងវិញ យ៉ាងឆាប់រហ័ស​នៅ​ក្នុងតំបន់។ ក្នុងន័យនេះ កិច្ចប្រជុំបានឯកភាពពន្លឿនការអនុវត្តក្របខ័ណ្ឌស្តារឡើងវិញគ្រប់ជ្រុងជ្រោយរបស់អាស៊ាន និងផែនការអនុវត្ត ក៏ដូចជា គំនិតផ្តួចផ្តើមសំខាន់ៗផ្សេងទៀតដែលបានឯកភាពគ្នារួច រួមមាន កិច្ចព្រមព្រៀងច្រករបៀងធ្វើដំណើរនៅក្នុងតំបន់អាស៊ាន ដើម្បីធានាថា អាស៊ានងើបចេញ​ពីជំងឺ​រាតត្បាតកូវីដ-១៩ ប្រកបដោយភាពកាន់តែរឹងមាំជាងមុន ។រដ្ឋមន្រ្តីការបរទេសបានអះអាងជាថ្មីនូវការប្តេជ្ញាចិត្តក្នុងការជំរុញតំបន់និយម និងពហុភាគីនិយម ក៏ដូចជា ពង្រឹងនិម្មាបនកម្មតំបន់ដែលបើកចំហ មានតម្លាភាព ប្រកបដោយបរិយាប័ន្ន និងផ្អែកលើគោលការណ៍ច្បាប់ ដោយយកអាស៊ានជាស្នូលក្នុងការដោះស្រាយបញ្ហាប្រឈមរួម ដោយឈរលើផលប្រយោជន៍ទៅវិញទៅមក។ជាមួយគ្នានោះរដ្ឋមន្ត្រីការបរទេសបានផ្លាស់ប្តូរទស្សនៈអំពីបញ្ហាតំបន់ និងអន្តរជាតិ ដែលជា​ចំណាប់​អារម្មណ៍ និងការបារម្ភរួម រួមមាន កិច្ចសហប្រតិបត្តិការនិងសន្តិសុខលំហសមុទ្រ សមុទ្រចិនខាងត្បូង បញ្ហាឧបទ្វីបកូរ៉េ ស្ថានការណ៍នៅមជ្ឈឹមបូព៌ា ការវិវត្តនៅប្រទេសមីយ៉ាន់ម៉ា និងបញ្ហាឆ្លងដែនផ្សេងៗ រួមមាន បញ្ហាសន្តិសុខអ៊ីនធឺណិត។កិច្ចប្រជុំបានឯកភាពធ្វើឱ្យប្រសើរឡើងនូវការអនុវត្តវិស័យយុទ្ធសាស្ត្រចំនួន៤ នៃកិច្ច​សហប្រតិបត្តិការ​ក្រោមទស្សនៈវិស័យអាស៊ានស្តីពីឥណ្ឌូ-ប៉ាស៊ីហ្វិក (AOIP) ក្នុងការចូលរួមរបស់​អាស៊ាន​ជាមួយដៃគូខាងក្រៅ ជាពិសេស តាមរយៈក្របខ័ណ្ឌអាស៊ានបូកបី និងកិច្ចប្រជុំកំពូលអាស៊ី-បូព៌ា (EAS)។ដើម្បីតាមដានលទ្ធផលពីកិច្ចប្រជុំថ្នាក់ដឹកនាំអាស៊ានកាលពីថ្ងៃទី២៤ ខែមេសា ឆ្នាំ២០២១ រដ្ឋមន្ត្រីការបរទេសអាស៊ាន បានបង្ហាញការប្តេជ្ញាចិត្ត​ពន្លឿនការអនុវត្ត​ការព្រមព្រៀង​ជាឯកច្ឆន្ទ ៥ចំណុច ជាពិសេស ការចាប់ផ្តើមបេសកកម្មរបស់ប្រេសិតពិសេសរបស់ប្រធានអាស៊ាន ដើម្បីសម្រុះសម្រួលដំណើរការនៃកិច្ចសន្ទនា និងជំនួយមនុស្សធម៌ដល់មីយ៉ាន់ម៉ា។រដ្ឋមន្ត្រីការបរទេសអាស៊ានបានឯកភាពចាប់ផ្តើមផ្តល់នូវជំនួយមនុស្សធម៌ ដោយគ្មានការ​ពន្យារពេល តាមរយៈមជ្ឈមណ្ឌលសម្របសម្រួលអាស៊ាន ដើម្បីជំនួយមនុស្សធម៌ និងការគ្រប់គ្រងគ្រោះមហន្តរាយ ដើម្បីឆ្លើយតបការរីករាលដាលនៃជំងឺកូវីត១៩ នៅក្នុងមីយ៉ាន់ម៉ា៕អត្ថបទ ៖ បាន ចក់

ប្រមុខការពារជាតិកម្ពុជា អរគុណជាថ្មីចំពោះភាគីចិន ដែលបានកំពុងបន្តជួយ​ដល់កម្ពុជា​គ្រប់បែប​យ៉ាង​ជាពិសេសវ៉ាក់សាំង

2021/08/03 04:10:07 am        319
Facebook Telegram Linkin
ភ្នំពេញ ៖ សម្តេចពិជ័យសេនា ទៀ បាញ់ ឧបនាយករដ្ឋមន្រ្តី និងជារដ្ឋមន្រ្តីក្រសួងការពារជាតិកម្ពុជា បាន​ថ្លែងកោតសរសើរ និងអរគុណចំពោះរដ្ឋាភិបាល និងប្រជាជនចិន ដែលបានកំពុងបន្តជួយ​ដល់​កម្ពុជា​គ្រប់បែបយ៉ាង ជាពិសេសជំនួយផ្នែកវ៉ាក់សាំងការពារមេរោគកូវីដ១៩ ដោយចាប់ពីដើម​ឆ្នាំ២០២១ មកនេះ ចិនបានផ្តល់វ៉ាក់សាំងកូវីដដល់កម្ពុជា សរុប១៨.៧លានដូស ក្នុងនោះ​៣.២លានដូស​ជាជំនួយឥតសំណង និង១៥.៥លានដូសជាការបញ្ជាទិញ​របស់ភាគីកម្ពុជានោះ។តាមរយៈផេកហ្វេសបុកនាព្រឹកថ្ងៃទី៣ ខែសីហា ឆ្នាំ២០២១នេះ សម្តេចពិជ័យសេនា ទៀ បាញ់ បានលើកឡើងថា «សូមកោតសរសើរ និងថ្លែងអំណរគុណយ៉ាងជ្រាលជ្រៅបំផុត ​ចំពោះមិត្តចិន ដែលបាននិងកំពុងជួយកម្ពុជា ​ក្នុងការប្រយុទ្ធនឹងជំងឺកូវីដ-១៩ ​តាមរយៈជំនួយសុខាភិបាលនានា ជាពិសេស ការផ្គត់ផ្គង់វ៉ាក់សាំងបានគ្រប់គ្រាន់ និងទាន់ពេលវេលា ទោះបីជា មិត្តចិនមិនទាន់​បាន​បញ្ចប់យុទ្ធនាការចាក់វ៉ាក់សាំងជូនប្រជាជនរបស់ខ្លួនក៏ដោយ»។សូមបញ្ជាក់ថា ចាប់តាំងពីមានការផ្ទុះឡើងនូវជំងឺវីរុសកូវីដមក ​ចិននិងកម្ពុជាបានជួយគ្នាទៅវិញ​ទៅ​មក និងរួមគ្នាជំនះ​រាល់ការលំបាកទាំងឡាយ ​បង្កើតបានជាគំរូសម្រាប់កិច្ចសហប្រតិបត្តិការ​ទប់ស្កាត់​ជំងឺវីរុស​ក្នុង​សហគមន៍អន្តរជាតិ ។ ដោយចាប់តាំងពីដើមឆ្នាំ២០២១នេះ ចិនបានផ្តល់វ៉ាក់​សាំង​​​កូវីដ​ដល់កម្ពុជាសរុប១៨.៧លានដូស ក្នុងនោះ៣.២លានដូសជាជំនួយឥតសំណង និង១៥.៥លានដូសជាការបញ្ជាទិញរបស់ភាគីកម្ពុជា។ក្នុងពេលឆាប់ៗនេះ ភាគីចិន នឹងបន្តផ្តល់ជំនួយជាសម្ភារៈបន្ទាន់ជូនភាគីកម្ពុជា​ទៀតសម្រាប់​កិច្ច​ទប់ស្កាត់​ជំងឺវីរុស ដែលមានតម្លៃសរុបជាង២០លានយ័ន ក្នុងនោះរួមមានម៉ាស៊ីនអុកស៊ីសែន​សម្រាប់​វេជ្ជសាស្រ្ត ម៉ាស៊ីនជំនួយដកដង្ហើម​ និងសម្លៀកបំពាក់ការពារជាដើម ដើម្បីជួយកម្ពុជា​ប្រយុទ្ធប្រឆាំងនឹងជំងឺវីរុស។សាធារណរដ្ឋប្រជាមានិតចិន និងរាជរដ្ឋាភិបាលកម្ពុជា គឺជាបងប្អូនល្អប្រៀបដូចដៃនិងជើង និងជាមិត្តភក្តិល្អក្នុងសហគមន៍វាសនារួម។ ភាគីចិននឹងបន្តធ្វើជាកម្លាំងគាំទ្រយុទ្ធសាស្ត្រដ៏រឹងមាំ និងជាបង្អែកយុទ្ធសាស្ត្រវ៉ាក់សាំងសម្រាប់កម្ពុជា និងគាំទ្រមិនងាករេដល់កិច្ចការងារ​ប្រយុទ្ធប្រឆាំង​ជំងឺវីរុសនៅក្នុងកម្ពុជា។ ដរាបណាជំងឺវីរុសកូវីដនៅកម្ពុជាមិនទាន់បញ្ចប់ ការផ្តល់ជំនួយរបស់ចិន​មកកម្ពុជាក៏មិនអាចបញ្ឈប់បាននោះដែរ។ នេះជាការបញ្ជាក់របស់លោក វ៉ាង វិនធាន ឯកអគ្គរដ្ឋទូតចិនប្រចាំនៅកម្ពុជា ដែលបានថ្លែង​តាមរយៈផេកហ្វេស​បុកស្ថានទូតចិន​នាពេល​កន្លងមកថ្មីៗនេះ៕អត្ថបទ បាន ចក់

អភិបាលខេត្តកំពត ប្រាប់អាជ្ញាធរឲ្យរិតបន្តឹងការអនុវត្តដើម្បីការពារកូវីដ១៩ និងកូវីដបំប្លែងថ្មី

2021/08/02 12:50:07 pm        472
Facebook Telegram Linkin
កំពត ៖ អភិបាលខេត្តកំពត បានប្រាប់អាជ្ញាធរ សមត្ថកិច្ចជំនាញពាក់ព័ន្ធត្រូវបង្កើនការ​រិតបន្តឹង​ការអនុវត្ត​សារាចរណែនាំលេខ០៤ របស់រាជរដ្ឋាភិបាល និងអំពាវនាវដល់ប្រជាពលរដ្ឋត្រូវបង្កើន​ការប្រុងប្រយ័ត្នទ្វេដង ហើយមិនត្រូវជួបជុំគ្នាច្រើនឡើយ ព្រោះមានតែការចូលរួមទាំងអស់គ្នាទេ ទើបអាចទប់ស្កាត់ការឆ្លងរាលដាលកូវីដ១៩ ​និងកូវីដ១៩បំប្លែងថ្មី ប្រភេទ“ដែលតា”បាន។ ថ្លែងក្នុងកិច្ចប្រជុំគណៈអភិបាលខេត្ត តាមរយៈវីដេអូ Zoom ដើម្បីបូកសរុបលទ្ធផលការងារប្រចាំ​ខែកក្កដា ២០២១ នាសាលប្រជុំសាលាខេត្ត នៅព្រឹកថ្ងៃទី០២ ខែសីហានេះ ឯកឧត្តម ជាវ តាយ អភិបាលខេត្តកំពត បានលើកឡើងថា ដើម្បីធានាបានប្រសិទ្ធភាព នៃការអនុវត្តវិធានការប្រយុទ្ធ និងទប់ស្កាត់ការឆ្លងរាលដាល នៃជំងឺកូវីដ-១៩ ជាពិសេស ក្នុងបរិបទដែលកម្ពុជាកំពុងប្រឈម​នឹងការមកដល់នៃរលកទី៣ នៃការឆ្លងរាលដាល នៃជំងឺកូវីដ-១៩ បំប្លែងខ្លួនថ្មី ប្រភេទ​ដែលតា (Delta) រដ្ឋបាលខេត្តកំពត បានចេញសេចក្តីណែនាំសំខាន់រួចទៅហើយ ប៉ុន្តែរយៈពេលពីរបីថ្ងៃនេះ ឃើញការអនុវត្ត និងការចូលរួមរបស់ប្រជាពលរដ្ឋនៅមិនទាន់បានល្អប្រើសើរនោះទេ ខណៈដែល​កូវីដ​ប្រភេទ(Delta) បានឆ្លងរាលដាលកើនដល់ជាង១០០ករណី ក្នុងនោះក៏មាននៅរាជធានីខ្លះដែរ។ ឯកឧត្តម បានប្រាប់ដល់អាជ្ញាធរតាមបណ្តា ក្រុងស្រុក ត្រូវរិតបន្តឹងការអនុវត្តតាមសេចក្តី​ណែនាំ​ឲ្យ​បានម៉ឺងមាត់។ ពិសេសសារាចរណែនាំ លេខ០៤ របស់រាជរដ្ឋាភិបាលស្តីពីការដាក់ចេញយុទ្ធនាការ​ពង្រឹងវិធានការប្រយុទ្ធ និងទប់ស្កាត់ការឆ្លងរាលដាលនៃជំងឺកូវីដ-១៩ នៅក្នុងភូមិសាស្រ្តខេត្តកំពត ឲ្យមានប្រសិទ្ធភាព។ចំណែកប្រជាពលរដ្ឋសូមកុំជួបជុំគ្នាច្រើន ក្រៅពីសមាជិកគ្រួសារខ្លួនឡើយ នៅក្នុងអំឡុងពេលនេះ។វិធានការសំខាន់ៗ របស់រដ្ឋបាលខេត្តមានដូចជា ៖ ផ្អាកការធ្វើអាជីវកម្មក្លឹបកំសាន្ត ខារ៉ាអូខេ, រង្គសាល កន្លែងម៉ាស្សា ក្លឹបហាត់ប្រាណ រោងភាពយន្ត។ល។ ហាមលក់ និងសេពគ្រឿងស្រវឹង ហាមឃាត់ការប្រមូលផ្តុំមនុស្សច្រើន និងបានដាក់​បម្រាម​គោរចរ​ពីចន្លោះម៉ោង ២១ រហូតដល់ម៉ោង ៣ភ្លឺ ។ ប្រសិនបើមានការល្មើសនឹងបទបញ្ជានេះ ត្រូវចាត់វិធានការណែនាំអប់រំ ឬផាកពិន័យ ឬបិទទីតាំងអាជីវកម្មល្មើសនោះតែម្តង៕អត្ថបទ ៖ សារីម 

វ៉ាក់សាំងបង្ការជំងឺកូវីដ-១៩ប្រភេទស៊ីណូហ្វាម ចំនួន០១លានដូស និងម្ជុលចាក់វ៉ាក់សាំងចំនួន០១លាន ជាជំនួយរបស់ចិន ដឹកមកដល់កម្ពុជាហើយ

2021/08/01 12:25:55 pm        314
Facebook Telegram Linkin
ភ្នំពេញ ៖ វ៉ាក់សាំងបង្ការជំងឺកូវីដ-១៩ ប្រភេទស៊ីណូហ្វាម (Sinopharm) ចំនួន០១លានដូស និងម្ជុលចាក់វ៉ាក់សាំង ចំនួន០១លាន ថ្មីបន្ថែមទៀត ដែលជាជំនួយរបស់សាធារណរដ្ឋប្រជាមានិត ចិន បានដឹកតាមយន្តហោះពិសេសមកដល់ព្រះរាជាណាចក្រកម្ពុជា នាព្រឹកថ្ងៃទី០១ ខែសីហា ឆ្នាំ២០២១នេះ។វ៉ាក់សាំងបង្ការជំងឺកូវីដ-១៩ ប្រភេទ ស៊ីណូហ្វាមនេះ ចាក់បានតែមនុស្សមានអាយុចាប់ពី១៨ឆ្នាំ រហូតដល់៥៩ឆ្នាំ តែប៉ុណ្ណោះ។សូមបញ្ជាក់ផងដែរថា វ៉ាក់សាំងបង្ការជំងឺកូវីដ-១៩ គឺជាឧបករណ៍ដ៏សំខាន់មួយក្នុង​ការ​ប្រយុទ្ធ​ប្រឆាំង​នឹងជំងឺកូវីដ-១៩ ដែលកំពុងរីករាលដាលលើពិភពលោក។ ជាពិសេសរាជរដ្ឋាភិបាលកម្ពុជា ដែលមានសម្តេចតេជោ ហ៊ុន សែន នាយករដ្ឋមន្រី្ត បានដាក់ចេញផែនការផ្តល់វ៉ាក់សាំង​ការពារ​ជំងឺកូវីដ-១៩ជូនប្រជាពលរដ្ឋ គឺជាផែនការយុទ្ធសាស្ត្រមួយក្នុងការប្រយុទ្ធប្រឆាំង នឹងជំងឺកូវីដ-១៩។ រាជរដ្ឋាភិបាលកម្ពុជា បានស្វះស្វែងយ៉ាងខ្លាំងក្នុងការរកវ៉ាក់សាំងការពារជំងឺកូវីដ-១៩ មកចាក់ជូនប្រជាពលរដ្ឋ។ តាមផែនការនៅត្រឹមខែ​សីហា ឆ្នាំ២០២១នេះ កម្ពុជា នឹងទទួលបានវ៉ាក់សាំងគ្រប់ ២០លានដូស​សម្រាប់​ចាក់ជូន​ប្រជាពលរដ្ឋអាយុចាប់ពី ១៨ឆ្នាំឡើង ដែលមានចំនួនប្រមាណ ១០លាននាក់។ កម្ពុជា ក៏បានបញ្ជាទិញវ៉ាក់សាំងប្រមាណ ៥លានដូសបន្ថែមទៀត សម្រាប់ចាក់ជូនកុមារ និងយុវវ័យអាយុចាប់ពី ១២ឆ្នាំ ទៅ១៧ឆ្នាំផងដែរ។ ដោយឡែកកាលពីថ្ងៃទី៣១ ខែកក្កដា ឆ្នាំ២០២១កាលពីម្ស៊ិលម៉ិញនេះ ព្រះរាជាណាចក្រកម្ពុជា ក៏បានទទួលវ៉ាក់សាំងបង្ការជំងឺកូវីដ-១៩ ប្រភេទស៊ីណូវ៉ាក់ ចំនួន០១លានដូស ព្រមទាំងឧបករណ៍តេស្តរហ័ស ចំនួន៣០ម៉ឺនតេស្ត របស់ក្រុមហ៊ុន ស៊ីណូវ៉ាក់ ដែលជាការបញ្ជាទិញ របស់រាជរដ្ឋាភិបាលកម្ពុជា៕អត្ថបទ រដ្ឋា 

សម្ដេច​តេជោ ហ៊ុន សែន បញ្ជាក់​ថា ការ​ដឹកនាំ​ជា​កត្តា​ជួយ​ជំរុញ​ដំណើរការ​នៃ​ការ​ចាក់​វ៉ាក់សាំង​បាន​លឿន​នៅ​កម្ពុជា

2021/08/01 10:16:13 am        436
Facebook Telegram Linkin
ភ្នំពេញ ៖ ប្រមុខ​រាជ​រដ្ឋាភិបាល​កម្ពុជា សម្ដេច​តេជោ ហ៊ុន សែន បាន​បញ្ជាក់​ថា ផែនការ​ចាក់​វ៉ាក់សាំង​ជូន​ប្រជា​ពលរដ្ឋ​កម្ពុជា អាច​នឹង​បញ្ចប់​លឿន​ជាង​ការ​គ្រោង​រហូត​ដល់​ទៅ ៦​ខែ បើ​ពិនិត្យ​មើល​តាម​ល្បឿន​នៃ​ការ​ចាក់​វ៉ាក់សាំង​រហូត​មក​ដល់​ថ្ងៃ​នេះ។សម្ដេច​តេជោ ហ៊ុន សែន បាន​ថ្លែង​បញ្ជាក់​បែប​នេះ​នៅ​ក្នុង​ពិធី​បើក​យុទ្ធនាការ​ចាក់​វ៉ាក់សាំង​ជូនក្រុម​មនុស្ស​អាយុ​ចន្លោះ​ពី ១២ ទៅ ១៧​ឆ្នាំ​ នៅ​ព្រឹក​ថ្ងៃ​នេះ។ប្រមុខ​រាជ​រដ្ឋាភិបាល​​បាន​បញ្ជាក់​ថា កត្តា​ដឹកនាំ​ គឺ​ជា​ចំណុច​សំខាន់​សម្រាប់​ដំណើរការ​ចាក់​វ៉ាក់សាំង​លឿន​បែប​នេះ​នៅ​ក្នុង​ប្រទេស​កម្ពុជា។សម្ដេច​តេជោ ហ៊ុន សែន បញ្ជាក់​​ទៀត​ថា ដំណើរការ​ចាក់​វ៉ាក់សាំង​នៅ​កម្ពុជា​នេះ អាច​មាន​ល្បឿន​លឿន​ជាង​នេះ ១​ខែ​ទៀត ប្រសិនបើ​សម្ដេច​ជឿ​​តាម​មតិ​យោបល់​របស់​សម្ដេច​ពិជ័យ​សេនា​ ទៀ បាញ់ ឧប​នាយករដ្ឋ​មន្ត្រី និង​ជា​រដ្ឋ​មន្ត្រី​ក្រសួង​ការពារ​ជាតិ។គិត​ត្រឹម​ថ្ងៃ​នេះ កម្ពុជា​បាន​ចាក់​វ៉ាក់សាំង​ជូន​ប្រជា​ពលរដ្ឋ​បាន​ចំនួន​ជាង ៧​លាន ៣០​ម៉ឺន​នាក់​ហើយ ឬ​ស្មើ​នឹង​ ៧៣.០៥​ភាគរយ ក្នុង​នោះ​ពលរដ្ឋ​ជាង ៤​លាន ៧៨​ម៉ឺន​នាក់ បាន​ចាក់​វ៉ាក់សាំង​ទាំងពីរ​ដូស​រួច​រាល់​ហើយ​ដែរ៕

បណ្ដាញសង្គម

ព័ត៌មានថ្មីៗ

អ៊ីស្រាអែលបង្កើនការវាយប្រហារលើតំបន់ភាគខាងត្បូងលីបង់ បណ្តាលឲ្យមនុស្សយ៉ាងហោច ១៦នាក់ស្លាប់
05/28/2026 09:05 PM
Facebook Telegram Linkin
រុស្ស៊ីចុះហត្ថលេខាលើកិច្ចព្រមព្រៀងតម្លៃ ១៦,៥ពាន់លានដុល្លារ ដើម្បីសាងសង់រោងចក្រថាមពលនុយក្លេអ៊ែរដំបូងនៅកាហ្សាក់ស្ថាន
05/28/2026 09:05 PM
Facebook Telegram Linkin
រុស្ស៊ី៖ អឺរ៉ុបគួរបង្ហាញភ័ស្តុតាងពីអំណះអំណាងថាទីក្រុងមូស្គូរំខានសញ្ញា GPS
05/28/2026 08:05 PM
Facebook Telegram Linkin
មន្ត្រីរុស្ស៊ី៖ គំនិតផ្តួចផ្តើមសន្តិភាពអ៊ុយក្រែន ជាមួយសហរដ្ឋអាមេរិក កំពុង «ជាប់គាំង»
05/28/2026 08:05 PM
Facebook Telegram Linkin
ក្រុមហ៊ុន Temu របស់ចិនរងការផាកពិន័យ ២៣២លានដុល្លារ សម្រាប់ការបំពានច្បាប់លក់របស់ EU
05/28/2026 08:05 PM
Facebook Telegram Linkin
ទីភ្នាក់ងារអាកាសធាតុអេស្ប៉ាញ ព្យាករសីតុណ្ហភាពខ្ពស់ខ្លាំងអំឡុងរដូវក្តៅ និងហានិភ័យភ្លើងឆេះព្រៃ
05/28/2026 08:05 PM
Facebook Telegram Linkin
កូរ៉េខាងត្បូងធ្វើសមយុទ្ធបាញ់គ្រាប់ពិត ដើម្បីបញ្ជាក់ការជំរុញការការពារពឹងផ្អែកលើខ្លួនឯង
05/28/2026 08:05 PM
Facebook Telegram Linkin
លោក Zelenskiy ៖ អ៊ុយក្រែនរៀបចំជំហានដឹរឹងមាំសម្រាប់យន្តហោះចម្បាំង Gripen
05/28/2026 08:05 PM
Facebook Telegram Linkin
នាយករដ្ឋមន្រ្តីជប៉ុនលោកស្រី Takaichi ជួបពិភាក្សាការងារជាមួយប្រធានាធិបតីហ្វីលីពីននៅទីក្រុងតូក្យូ
05/28/2026 08:05 PM
Facebook Telegram Linkin
កម្មករធ្វើផ្លូវនៅភាគនិរតីប្រទេសបារាំង ពិបាកស៊ូទ្រាំនឹងអាកាសធាតុក្តៅខ្លាំងអំឡុងខែឧសភា
05/28/2026 08:05 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.