BTV NEWS

គម្រោងស្ពានឆ្លងកាត់ទន្លេបាសាក់ (ចាក់អង្រែក្រោម-ព្រែកប្រា) និងផ្លូវតភ្ជាប់ សម្រេចបាន ៤៥% ហើយ ដែលលឿនជាងផែនការ ៤,១១%

សម្ដេចធិបតី អំពាវនាវដល់ជនរួមជាតិជឿទុកចិត្តលើរាជរដ្ឋាភិបាលដែលកំពុងធ្វើកិច្ចការងារយ៉ាងសកម្មស្វែងរកដំណោះស្រាយបញ្ចប់បញ្ហាព្រំដែនកម្ពុជា-ថៃ ឱ្យបានឆាប់រហ័ស

សម្ដេចធិបតីផ្ដល់អនុសាសន៍៧ចំណុច ដល់ក្រសួង-ស្ថាប័នពាក់ព័ន្ធឱ្យយកចិត្តទុកដាក់ក្នុងឱកាសទិវាអក្ខរកម្មអន្តរជាតិ ៨ កញ្ញា ២០២៥

សម្ដេចធិបតី៖ រាជរដ្ឋាភិបាលប្តេជ្ញាចិត្តយ៉ាងមុតមាំលើកកម្ពស់ការងារអក្ខរកម្ម និងបំពាក់បំប៉ន ជំនាញ និងឱកាសសិក្សាពេញមួយជីវិត ជាពិសេសជំនាញឌីជីថល

នយោបាយ និង ការអភិវឌ្ឍន៍

គណៈកម្មការរដ្ឋសភា និងតំណាងរាជរដ្ឋាភិបាលបានលើកយកសេចក្តីព្រាងច្បាប់ចំនួនពីរមកពិភាក្សា

ភ្នំពេញ ៖ គណៈកម្មការជំនាញរដ្ឋសភា នៅព្រឹកថ្ងៃទី២១ ខែមិថុនា ឆ្នាំ២០២១នេះ បានបើកកិច្ចប្រជុំជាមួយតំណាងរាជរដ្ឋាភិបាល ដោយបានលើកយកសេចក្តីព្រាងច្បាប់ចំនួន២ ដើម្បីពិភាក្សាគ្នា ដែលសេចក្តីព្រាងច្បាប់នោះគឺស្តីពី ការអនុម័តយល់ព្រមលើកិច្ចព្រមព្រៀងភាពជាដៃគូរសេដ្ឋកិច្ចគ្រប់ជ្រុងជ្រោយតំបន់ និងសេចក្តីព្រាងច្បាប់ ស្តីពីវិសោធនកម្មមាត្រា១៨ថ្មី នៃច្បាប់ស្តីពីវិសោធនកម្មមាត្រា១៨ នៃច្បាប់ស្តីពីសវនកម្ម នៃព្រះរាជាណាចក្រកម្ពុជា។កិច្ចប្រជុំនេះ បានធ្វើឡើងក្រោមអធិបតីភាព ឯកឧត្តមបណ្ឌិត ជាម យៀប ប្រធានគណៈកម្មការសេដ្ឋកិច្ច ហិរញ្ញវត្ថុ ធនាគារ និងសវនកម្ម នៃរដ្ឋសភា សហការជាមួយគណៈកម្មការសាធារណការ ដឹកជញ្ជូន ទូរគមនាគមន៍ ប្រៃសណីយ៍ ឧស្សាហកម្មរ៉ែ ថាមពល ពាណិជ្ជកម្ម រៀបចំដែនដី នគរូបនីយកម្ម និងសំណង់ នៃរដ្ឋសភា និងឯកឧត្តម នឹម ច័ន្ទតារា លេខាធិការគណៈកម្មការកិច្ចការបរទេស សហប្រតិបត្តិការអន្តរជាតិ ឃោសនាការ និងព័ត៌មាននៃរដ្ឋសភា ដោយមានការចូលរួមពីលោក លោកស្រីអនុប្រធាន លេខាធិការ និងសមាជិក សមាជិកាគណៈកម្មការជំនាញនានា។តំណាងភាគីរាជរដ្ឋាភិបាលរួមមាន ឯកឧត្តមបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ, ឯកឧត្តម ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម និងលោកស្រី សោម គឹមសួគ៌ អគ្គសវនករនៃអាជ្ញាធរសវនកម្មជាតិ តំណាងរាជរដ្ឋាភិបាលការពារសេចក្តីព្រាងច្បាប់ទាំងពីរនេះ ដែលផ្សាយចេញពីសាលសន្និសីទបាយ័ន នៃវិមានរដ្ឋសភា ទៅកាន់ក្រសួងពាក់ព័ន្ធ តាមប្រព័ន្ធវីដេអូ។នៅក្នុងកិច្ចពិភាក្សានោះ ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន បានថ្លែងថា សេចក្តីព្រាងច្បាប់ស្តីពីការអនុម័តយល់ព្រមលើកិច្ចព្រមព្រៀងភាពជាដៃគូរសេដ្ឋកិច្ចគ្រប់ជ្រុងជ្រោយតំបន់ គឺជាកិច្ចព្រមព្រៀងភាពជាដែគូសេដ្ឋកិច្ចគ្រប់ជ្រុងជ្រោយតំបន់ដែលតទៅនេះ ហៅកាត់ថាកិច្ចព្រមព្រៀងអាសិប (Regional Comprehensive Economic Partnership RCEP) ជាកិច្ចព្រមព្រៀងពាណិជ្ជកម្មសេរី តំបន់ ដើមឡើយមានប្រទេសចូលរួមចរចាចំនួន១៦ រួមមាន ៖ ប្រទេសសមាជិកអាស៊ានទាំង១០ និងប្រទេសដៃគូរពាណិជ្ជកម្មសេរី អាស៊ានចំនួន៦ ដូចជា ៖ ប្រទេសអូស្ត្រាលី ចិន ឥណ្ឌា ជប៉ុន កូរ៉េខាងត្បូង និង ណូវែលហ្សេឡង់។ បន្ទាប់មកទៀត ដោយសារបញ្ហាផ្ទៃក្នុងរបស់ខ្លួនឥណ្ឌា បានប្រកាសដកខ្លួនចេញពីកិច្ចព្រមព្រៀងអាសិប ក្នុងកិច្ចប្រជុំកំពូលអាសិបលើកទី៣ កាលពីឆ្នាំ២០១៩ នៅប្រទេសថៃ។ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន បានបន្ថែមថា កិច្ចព្រមនេះ ត្រូវបានរចនាឡើង ដើម្បីសម្រេចបាននូវគោលបំណងដោយវិធីសាស្ត្រមួយចំនួន ដូចជា តាមរយៈភាពទន់ភ្លន់ដែលសមស្រប និងបទប្បញ្ញត្តិសម្រាប់ប្រព្រឹត្តកម្មពិសេស ជាពិសេសសម្រាប់ប្រទេសកម្ពុជា ឡាវ មីយ៉ាន់ម៉ា និងវៀតណាម និងភាពទន់ភ្លន់បន្ថែម សម្រាប់ប្រទេសអភិវឌ្ឍន៍តិចតួច។ លើសពីនេះទៀតកិច្ចព្រមព្រៀងអាសិប បញ្ចូលនូវកិច្ចសហប្រតិបត្តិការបច្ចេកទេស និងការកសាងសមត្ថភាព ដើម្បីអនុវត្តន៍កាតព្វកិច្ចនៅក្នុងកិច្ចព្រមព្រៀង និងទាញយកផលប្រយោជន៍ឱ្យបានជាអតិបរមា។ កិច្ចព្រមព្រៀងអាសិប ក៏បានបញ្ចូលនៅបទប្បញ្ញត្តិ ដែលធានាថាប្រទេសចូលរួមចរចាទោះបីសេដ្ឋកិច្ច និងទំហំអាជីវកម្មខុសៗគ្នាក៏ដោយអាចទទួលបានអត្ថប្រយោជន៍ពីពាណិជ្ជកម្ម។ដោយឡែកសេចក្តីព្រាងច្បាប់ ស្តីពីវិសោធនកម្មមាត្រា១៨ថ្មី នៃច្បាប់ស្តីពីវិសោធនកម្មមាត្រា១៨ នៃច្បាប់ស្តីពីសវនកម្ម នៃព្រះរាជាណាចក្រកម្ពុជា ត្រូវបានលោកស្រី សោម គឹមសួគ៌ អគ្គសវនករនៃអាជ្ញាធរសវនកម្មជាតិ បានពន្យល់ថា សេចក្តីព្រាងច្បាប់នេះរៀបចំឡើង ក្នុងគោលបំណងបើកផ្លូវឱ្យមានការតែងតាំងអគ្គសវនករ និងអគ្គសវនកររងថ្មី នៅពេលដែលអាណត្តិ៥ឆ្នាំ ត្រូវបានបញ្ចប់ដើម្បីទទួលស្គាល់គុណវុឌ្ឍិ ស្នាដៃ បទពិសោធន៍ សមត្ថភាព កិច្ចសហប្រតិបត្តិការ និងការទទួលខុសត្រូវខ្ពស់លើការដឹកនាំអាជ្ញាធរសវនកម្មជាតិ ក្នុងការបំពេញតួនាទីរបស់ខ្លួនដូចមានចែងក្នុងច្បាប់ស្តីពីសវនកម្ម នៃព្រះរាជាណាចក្រកម្ពុជា។ក្រោយពីស្តាប់ការពន្យល់ពីតំណាងរដ្ឋាភិបាលបានបកស្រាយពីអត្ថប្រយោជន៍នៃសេចក្តីព្រាងច្បាប់ទាំងពីរគណៈជំនាញរបស់រដ្ឋសភា បានចោទជាសំនួរ និងមានការបកស្រាយពីខាងតំណាងរដ្ឋាភិបាល ហើយអង្គប្រជុំបានឯកភាពគ្នាដោយរក្សាទម្រង់អត្ថបទនៃសេចក្តីព្រាងច្បាប់ទាំងពីរឱ្យនៅដែល ដោយគ្រាន់តែកែសម្រួលអក្ខរាវិរុទ្ធឱ្យត្រឹមត្រូវតាមអត្ថបទច្បាប់៕អត្ថបទ ៖ បាន ចក់

ប្រមុខការទូតអង់គ្លេស នឹងមកបំពេញទស្សនកិច្ចនៅកម្ពុជា នៅថ្ងៃទី២៣ខែមិថុនា ខាងមុខនេះ

ភ្នំពេញ ៖ រដ្ឋមន្ត្រីការបរទេស និងអភិវឌ្ឍន៍នៃចក្រភពអង់គ្លេស លោកដូមីនី រ៉ាអាប់(Dominic Raab) នឹងមកបំពេញទស្សនកិច្ចនៅប្រទេសកម្ពុជា រយៈពេលមួយថ្ងៃគឺថ្ងៃទី២៣ខែមិថុនា ឆ្នាំ២០២១ខាងមុខនេះ ដោយដំណើរទស្សនកិច្ចនេះ នឹងជួយជំរុញឲ្យទំនាក់ទំនងទ្វេភាគីកម្ពុជា-អង់គ្លេសកាន់តែល្អប្រសើរបន្ថែមទៀត។យោងតាមសេចក្តីប្រកាសព័ត៌មានរបស់ក្រសួងការបរទេស និងសហប្រតិបត្តិការអន្តរជាតិ ដែលទូរទស្សន៍BTV ទទួលបាន នៅព្រឹកថ្ងៃទី២១ ខែមិថុនា នេះ បានឲ្យដឹងថា តបតាមការអញ្ជើញ របស់ឯកឧត្តម ប្រាក់ សុខុន ឧបនាយករដ្ឋមន្ត្រី រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ នៃព្រះរាជាណាចក្រកម្ពុជា លោកដូមីនី រ៉ាអាប់ នឹងមកបំពេញទស្សនកិច្ចជាផ្លូវការប្រទេសកម្ពុជា នាថ្ងៃទី២៣ ខែមិថុនាខាងមុខនេះ។សេចក្តីប្រកាសព័ត៌មាន បានឲ្យដឹងទៀតថា ប្រមុខការទូតកម្ពុជា និងអង់គ្លេស នឹងមានកិច្ចប្រជុំទ្វេភាគី ដែលនឹងផ្តោតការពិភាក្សាលើទិដ្ឋភាពផ្សេងៗនៃកិច្ចសហប្រតិបត្តិការទ្វេភាគី ព្រមទាំងបញ្ហាតំបន់ និងអន្តរជាតិ ដែលជាប្រយោជន៍ និងកង្វល់រួមជាដើម។ប្រភពដដែល បានបន្ថែមទៀតថា ក្នុងឱកាសស្នាក់នៅក្នុងរាជធានីភ្នំពេញនេះ លោកដូមីនី រ៉ាអាប់ នឹងមានកិច្ចជំនួបជាមួយឯកឧត្តម សាល សំអាល់ រដ្ឋមន្ត្រីក្រសួងបរិស្ថាន ហើយក៏នឹងអញ្ជើញទៅ ទស្សនាសារមន្ទីរឧក្រិដ្ឋកម្មប្រល័យពូជសាសន៍ទូលស្លែង និងមជ្ឈមណ្ឌលឯកសារកម្ពុជាផងដែរ។បើតាមសេចក្តីប្រកាសព័ត៌មានរបស់ក្រសួងការបរទេស បានបញ្ជាក់ទៀតថា ដំណើរទស្សនកិច្ចជាផ្លូវការនៅប្រទេសកម្ពុជារបស់លោកដូមីនី រ៉ាអាប់នេះ នឹងជួយរួមចំណែកជំរុញ និងពង្រឹងបន្ថែមទៀតនូវទំនាក់ទំនងទ្វេភាគីរវាងកម្ពុជា និងអង់គ្លេស និងជាការបោះជំហានទៅមុខនៅក្នុងកិច្ចសហប្រតិបត្តិការពហុភាគីក្នុងក្របខណ្ឌអាស៊ានផងដែរ៕អត្ថបទ ៖ បាន ចក់

ក្រោយបញ្ចប់ការសាងសង់ផ្លូវល្បឿនលឿនភ្នំពេញ-ព្រះសីហនុ គ្រោងឱ្យពលរដ្ឋធ្វើដំណើរដោយមិនបង់ប្រាក់ពីមួយសប្ដាហ៍ទៅមួយខែ

ព្រះសីហនុ ៖ នៅពេលបើកឱ្យដំណើរការផ្លូវល្បឿនលឿនភ្នំពេញ-ព្រះសីហនុ ក្រសួងសាធារណការគ្រោងពិចារណាជាមួយក្រុមហ៊ុនចិន នឹងបើកឱ្យប្រជាពលរដ្ឋ ធ្វើដំណើរដោយមិនបង់ប្រាក់ពីមួយសប្ដាហ៍ទៅមួយខែ ខណៈដំណើរការសាងសង់សម្រេចបានជាង៥៥ភាគរយហើយ។ក្នុងឱកាសអញ្ជើញត្រួតពិនិត្យពីវឌ្ឍនភាពផ្លូវល្បឿនលឿន ភ្នំពេញ ព្រះសីហនុ នាព្រឹកថ្ងៃទី២១ ខែមិថុនា ឆ្នាំ២០២១ ឯកឧត្ដមទេសរដ្ឋមន្ដ្រី ស៊ុន ចាន់ថុល រដ្ឋមន្ដ្រីក្រសួងសាធារណការ និងដឹកជញ្ជូន បានថ្លែងថា ដំណើរការសាងសង់ផ្លូវល្បឿនលឿននេះ សម្រេចបានជាង៥៥ភាគរយហើយ ចំពោះគុណភាពសាងសង់ គឺល្អប្រសើរណាស់។ឯកឧត្ដមទេសរដ្ឋមន្ដ្រី បន្ថែមថា នៅពេលបើកឱ្យដំណើរការផ្លូវល្បឿនលឿន ភ្នំពេញ ព្រះសីហនុនេះ ក្រសួងសាធារណការគ្រោងពិចារណាជាមួយក្រុមហ៊ុនចិន នឹងបើកឱ្យប្រជាពលរដ្ឋធ្វើដំណើរដោយមិនបង់ប្រាក់ពីមួយសប្ដាហ៍ទៅមួយខែ។ឯកឧត្ដមទេសរដ្ឋមន្ដ្រី ស៊ុន ចាន់ថុល បានបញ្ជាក់ថា ផ្លូវល្បឿនលឿននេះ មិនអាចឱ្យមានការឆ្លងកាត់ទេ គឺផ្លូវត្រូវបានសាងសង់របងសងខាង ដូច្នេះអ្នកដំណើរអាចប្រើល្បឿនបាន១០០គីឡូម៉ែត្រក្នុងមួយម៉ោង និងមានទីតាំងផ្ដល់សេវា៣កន្លែង សម្រាប់ឈប់សម្រាក ចាក់ប្រេងជាដើម។ សម្រាប់ប្រជាពលរដ្ឋតាមភូមិអាចធ្វើដំណើរបាននៅខាងក្រោមផ្លូវល្បឿនលឿននេះ ដោយក្រុមហ៊ុនបានសាងសង់ស្ពានខាងក្រោមផ្លូវចំនួន ២៧០កន្លែង។សូមបញ្ជាក់ថា ផ្លូវល្បឿនលឿន ភ្នំពេញ ព្រះសីហនុ បានបើកការដ្ឋានសាងសង់នៅខែមីនា ឆ្នាំ២០១៩ ហើយគ្រោងបើកដាក់ឱ្យប្រើប្រាស់នៅខែកញ្ញា ឆ្នាំ២០២២ ដែលគម្រោងបិទបញ្ចប់ការសាងសង់ គឺនៅខែឧសភា ឆ្នាំ២០២៣។ ផ្លូវនេះមានប្រវែងជាង ១៨៧គីឡូម៉ែត្រ៕អត្ថបទ ៖ ប្រាក់ វ៉ាន់ដា

សម្ដេចតេជោ ៖ រដ្ឋាភិបាលនិងប្រជាពលរដ្ឋចងចាំជានិច្ចចំពោះការលះបង់របស់អតីតយុទ្ធជនគ្រប់រូប

ភ្នំពេញ ៖ សម្តេចតេជោ ហ៊ុន សែន នាយករដ្ឋមន្ត្រី នៅថ្ងៃទី២១មិថុនា បានផ្ញើសារលិខិតអបអរសាទរខួបលើកទី១៤ អតីតយុទ្ធជនកម្ពុជាដែលជាទិវាប្រវត្តិសាស្ត្រ ប្រកបដោយមោទនភាពបំផុតសម្រាប់បងប្អូនអតីតយុទ្ធជន និងប្រជាពលរដ្ឋនៅទូទាំងប្រទេស។ខ្លឹមសារក្នុងសារលិខិតរបស់សម្ដេចតេជោ សម្ដេចបានសរសេរថា ទិវាអតីតយុទ្ធជនកម្ពុជារៀបចំឡើង គឺដើម្បីរំឭកដល់គំរូវីរភាពដ៏មោះមុតនិងគុណបំណាច់ដ៏ធំធេងរបស់ វីរយុទ្ធជនយុទ្ធនារីនៃកងកម្លាំងប្រដាប់អាវុធ និង ប្រជាពលរដ្ឋគ្រប់ស្រទាប់ ដែលបានពលិកម្មយ៉ាងអង់អាចក្លាហាន បូជាសាច់ស្រស់ ឈាមស្រស់ ដើម្បីបុព្វហេតុជាតិមាតុភូមិជាទីស្នេហានៃយើង។ពលិកម្មប្រកបដោយស្មារតីស្នេហាជា តិរបស់វីរអតីតយុទ្ធជន យុទ្ធនារី និងប្រជាពលរដ្ឋយើងនៅគ្រប់ដំណាក់កាល នៃប្រវត្តិសាស្ត្រគឺបានរួម ចំណែកយ៉ាងសំខាន់ក្នុងកិច្ចការពារបូរណភាពទឹកដី ការកសាងសុខសន្តិភាព និងស្ថិរភាពសង្គមសម្រាប់កម្ពុជា សំដៅធានាឱ្យមានការអភិវឌ្ឍសេដ្ឋកិច្ច និងសង្គម ដើម្បីជាឧត្តមប្រយោជន៍សម្រាប់ជាតិមាតុភូមិ និងប្រជាជនកម្ពុជា។ក្នុងឱកាសនេះ សម្តេចក៏បានអំពាវនាវដល់បងប្អូនអតីតយុទ្ធជនកម្ពុជា សូមបន្តរក្សាស្មារតីវីរភាពដ៏ឧត្ដុង្គឧត្ដម និងសេចក្ដីថ្លៃថ្នូរ ជាពលរដ្ឋឆ្នើមរបស់ជាតិ មាតុភូមិ ដើម្បីបន្តធ្វើជាគំរូល្អក្នុងសង្គមជាតិ។ រាជរដ្ឋាភិបាល និងប្រជាជនកម្ពុជាទូទាំងប្រទេស ពិតជាចងចាំជានិច្ចនូវការលះបង់ និងគុណបំណាច់ដ៏ធំធេង របស់បងប្អូនអតីតយុទ្ធជនគ្រប់រូប ចំពោះជាតិមាតុភូមិជាទីស្នេហានៃយើង ជាពិសេសក្រសួងសង្គមកិច្ច អតីតយុទ្ធជន និងយុវនីតិសម្បទា ត្រូវបន្តអនុវត្តឱ្យបានល្អ និងមានប្រសិទ្ធភាពផ្ដល់សេវារបបសន្តិសុខសង្គមសម្រាប់អតីតយុទ្ធជន និងគ្រួសារអតីតយុទ្ធជនតាមរយៈបេឡាជាតិ អតីតយុទ្ធជននៅទូទាំងប្រទេស។ម្យ៉ាងវិញទៀត ត្រូវខិតខំជំរុញការអនុវត្តគម្រោងសាងសង់ផ្ទះជូនអតីតយុទ្ធជន និងគ្រួសារដូចដែលបានបញ្ចូលក្នុងផែនការវិនិយោគសាធារណៈរបស់រាជរដ្ឋាភិបាល។ក្រសួងរៀបចំដែនដី នគរូបនីយកម្ម និងសំណង់ និងក្រសួងសង្គមកិច្ច អតីតយុទ្ធជន និងយុវនីតិសម្បទា ត្រូវសហការជាមួយក្រសួង ស្ថាប័នពាក់ព័ន្ធ បន្តជំរុញការអនុវត្តគោលនយោបាយស្តីពីការផ្តល់សម្បទានដីសង្គមកិច្ចជូនអតីត កងកម្លាំងប្រដាប់អាវុធ និងគ្រួសារ ឱ្យកាន់តែមានប្រសិទ្ធភាពខ្ពស់។ក្រសួងស្ថាប័នពាក់ព័ន្ធ អាជ្ញាធរដែនដី និងកងកម្លាំងប្រដាប់អាវុធគ្រប់ប្រភេទ ត្រូវចូលរួមក្នុងការជួយឧបត្ថម្ភ គាំទ្រដល់អតីតយុទ្ធជន ជាពិសេសត្រូវយកចិត្តទុកដាក់ជួយឧបត្ថម្ភគាំទ្រដល់គ្រួសារអតីត យុទ្ធជនដែលកំពុងជួបប្រទះការលំបាក៕អត្ថបទ ៖ មុត សុទ្ធ

មន្ទីសាធារណៈការ បានបន្តអ៊ុតកៅស៊ូនៅលើផ្លូវលេខ៤៧ មូលដ្ឋានខណ្ឌដូនពេញ រួចរាល់ហើយ

ភ្នំពេញ ៖ រដ្ឋបាលរាជធានីភ្នំពេញ បានយកចិត្តទុកដាក់ពីបញ្ហា ការខូចផ្លូវ រលុបគំនូសសញ្ញាចរាចរណ៍ ការកក់ស្ទះចរាចរណ៍ និងរៀបចំសណ្ដាប់ធ្នាប់នៅតាមបណ្ដាមហាវិថីតូចធំ និងផ្លូវតូចៗ ក្នុងមូលដ្ឋានទាំង១៤ខណ្ឌ ដើម្បីកាត់បន្ថយការកក់ស្ទះចរាចរណ៍ និងលើកសោភ័ណភាពទីក្រុងផងដែរ។ជាក់ស្ដែងថ្ងៃទី២០ ខែមិថុនា ឆ្នាំ២០២១ សកម្មភាពអ៊ុតកៅស៊ូផ្លូវលេខ ៤៧ ចាប់ពីរង្វង់មូលវត្តភ្នំ ដល់រង្វង់កួចកាណុង ក្នុងមូលដ្ឋានខណ្ឌដូនពេញរាជធានីភ្នំពេញ បានរួចរាល់ជាស្ថាពរ ដើម្បីដាក់អោយបងប្អូនធ្វើដំណើរចរាចរណ៍ បានងាយស្រួលជាងមុន។មន្រ្តីជំនាញ បានបញ្ជាក់ថា កន្លងនៅតាមបណ្ដោយផ្លូវលេខ៤៧នេះ គឺមន្ទីរសាធារណៈការ និងដឹកជញ្ជូន បានធ្វើការកាយផ្លូវដើម្បីផ្លាស់ប្ដូរប្រព័ន្ធលូមេ ដូច្នេះ មន្ទីរសាធារណៈការ បានចាត់ម្លាំងចុះអ៊ុតកៅស៊ូថ្មីឡើងវិញ ដើម្បីអោយបងប្អូនប្រជាពលរដ្ឋងាយស្រួលក្នុងការបញ្ជាយានយន្ត។គួរបញ្ជាក់ផងដែរ កន្លងមករដ្ឋបាលរាជធានីភ្នំពេញ បានបន្តគម្រោងការពារទឹកជំនន់ និងកែលម្អប្រព័ន្ធប្រឡាយ លូ ក្នុងរាជរាធានីភ្នំពេញ ជំហានទី៤ ហិរញ្ញប្បទានឥតសំណងពីប្រជាជនជប៉ុន ជាសក្ខីភាពនៃមិត្តភាព និងកិច្ចសហប្រតិបត្តិការរវាងប្រទេសជប៉ុន និងព្រះរាជាណាចក្រកម្ពុជា ដាក់បណ្តាញលូមេ មានជាច្រើនគម្រោងមកហើយ រួមមាន ផ្លូវលេខ៣១៥ ផ្លូវលេខ៤៧ ផ្លូវលេខ៥៩២-ល-។ ដើម្បីដោះស្រាយទឹកលិចពេលមានភ្លៀងធ្លាក់ខ្លាំងម្ដងៗ បង្ហូរទឹកទាន់ពេលវេលា៕អត្ថបទ៖ កុម្ភះ

សមមិត្តហ៊ុន សែន៖ ខ្ញុំមិនដែលភ្លេចនូវទឹកភ្នែករាប់ម៉ឺនរាប់សែនដំណក់ ពេលឈានជើងចេញពីប្រជាជន និងប្រពន្ធកំពុងមានផ្ទៃពោះ

ភ្នំពេញ ៖ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី លកាលពីជាង៤០ឆ្នាំមុន ត្រូវបានគេហៅថាសមមិត្ត ហ៊ុន សែន បានរៀបរាប់ជាថ្មីម្តងទៀតនូវប្រវត្តិដ៏ជូរចត់ និងគ្រោះថ្នាក់បំផុតពេលដែលបានឈានជើងផ្សងព្រេងទៅកាន់ប្រទេសវៀតណាម ដើម្បីស្នើសុំកម្លាំងជួយស្រោចស្រងជីវិតរបស់បងប្អូនប្រជាពលរដ្ឋកម្ពុជាទាំងមូល ចេញពីរបបវាលពិឃាត ប៉ុល ពតនោះ។ថ្ងៃទី២០ ខែមិថុនា គឺជាខួបលើកទី៤៤ឆ្នាំ (២០ មិថុនា ១៩៧៧-២០ មិថុនា ២០២១) ដែលសមមិត្តហ៊ុន សែន និងកម្មាភិបាលចំនួន៤រូបទៀត បានសម្រេចចិត្តដ៏គ្រោះថ្នាក់បំផុត ចោលប្រពន្ធកូន របស់ខ្លួនឆ្ពោះទៅកាន់ប្រទេសវៀតណាម ដើម្បីស្នើកម្លាំងភាគីវៀតណាម មកផ្តួលរំលំរបបប្រល័យពូជសាសន៍ ប៉ុលពតនោះ។តាមរយៈហ្វេសបុក នាថ្ងៃទី២០ ខែមិថុនា ឆ្នាំ២០២១នេះ សម្តេចតេជោ ហ៊ុន សែន បានលើកឡើងថា«ខ្ញុំសម្រេចចិត្តដោយការឈឺចាប់យកជីវិតធ្វើដើមទុន ដើម្បីតស៊ូរំដោះប្រជាជនកម្ពុជាចេញពីរបបប្រល័យពូជសាសន៍ ប៉ុល ពត។ ទោះបីពេលនេះខ្លួនខ្ញុំ និងប្រជាជនកម្ពុជាកំពុងទទួលបាននូវសេចក្តីសុខ តែខ្ញុំមិនដែលភ្លេចនូវទឹកភ្នែករាប់ម៉ឺន រាប់សែន ដំណក់ នៅពេលដែលខ្ញុំឈានជើងចេញពីមាតុភូមិចោលប្រជាជនកម្ពុជា ដែលកំពុងរងគ្រោះ ពិសេសចាកចេញចោល ភរិយា ដ៏កំសត់ដែលកំពុងមានផ្ទៃពោះ។ ខ្ញុំអត់មានជម្រើសឲ្យល្អជាងនេះទេ ព្រោះយើងមិនអាចសុំការអាណិតពីពួក ប៉ុល ពត បានឡើយ។ ជំរើសប្រកបដោយគ្រោះថ្នាក់ និងទឹកភ្នែកនោះហើយ ដែលនាំមកនូវសេចក្តីសុខ និងការរីកចម្រើនរហូតសព្វថ្ងៃនេះ»។សម្តេចតេជោ លើកឡើងទៀតថា« ខ្ញុំធ្លាប់បានរៀបរាប់ពីប្រវត្តិដ៏ឈឺចាប់នេះច្រើនដងហើយ តែខ្ញុំមិនទាន់បានបញ្ចេញនូវចម្ងល់ក្នុងចិត្តខ្ញុំទាក់ទងជាមួយប្រវត្តិនេះ ដែលតាំងជាសំនួរថា ប្រសិនបើខ្ញុំមិនសម្រេចចិត្តដឹកនាំការតស៊ូដោយចាប់ផ្តើមពីថ្ងៃ២០ មិថុនា ១៩៧៧ ទេតើពេលនោះពួក ប៉ុល ពត សម្លាប់ខ្ញុំនៅឯណា? ដោយវិធីណា?។ សំនួរបន្ទាប់តើមានអ្នកស្នេហាជាតិណាផ្សេងទៀតបង្កើតឡើងនូវកងកម្លាំងប្រដាប់អាវុធ សាមគ្គីសង្រ្គាះជាតិជំនួសខ្ញុំដែរឬទេ? តើដំណើរឆ្ពោះមករំដោះប្រទេសពីរបប ប៉ុល ពត កើតមានឡើងបានដោយរបៀបណា? តើមានដំណោះស្រាយតាមរយៈការចចារ និងកិច្ចព្រមព្រៀងប៉ារីសឬទេ? និងចុងក្រោយតើមាន នយោបាយ ឈ្នះ ឈ្នះ ដើម្បីបញ្ចប់សង្រ្គាមនាំមកនូវសន្តិភាព និងការអភិវឌ្ឍដូចសព្វថ្ងៃឬទេ? ។សំនួរសង្ខេបទាំងនេះ តែងបង្កប់ក្នុងខួរក្បាលខ្ញុំជានិច្ច ហើយខ្ញុំក៏មិនអាចឆ្លើយជាមួយសំនួរនេះដោយខ្លួនឯងបានដែរ ខ្ញុំទុកជូនបងប្អូនជនរួមជាតិមេត្តាជួយរកចម្លើយ»។សូមបញ្ជាក់ថា ថ្ងៃទី២០ ខែមិថុនា ឆ្នាំ២០២១នេះគឺជាខួបគម្រប់ ៤៤ឆ្នាំហើយ នៃដំណើរតស៊ូឆ្ពោះទៅរកការរំដោះជាតិរបស់សមមិត្ត ហ៊ុន សែន និងយុទ្ធមិត្ត ដើម្បីរំដោះជាតិ និងប្រជាជនកម្ពុជាចេញពីកាប់សម្លាប់របស់ខ្មែរក្រហម។ ក្រសួងការពារជាតិកម្ពុជា បានយកថ្ងៃនេះ ប្រារព្ធទិវាចងចាំ ហើយបានសាងសង់នូវហេដ្ឋារចនាសម្ព័ន្ធជាច្រើន រួមទាំងសារមន្ទីរផង ដើម្បីទុកជាប្រវត្តិសាស្រ្តសម្រាប់កូនខ្មែរជំនាន់ក្រោយទៀតផងដែរ។ជាក់ស្តែងនៅថ្ងៃនេះ សម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិកម្ពុជា និងលោក ហ្វាន វ៉ាន់ ហ្សាង រដ្ឋមន្ត្រីក្រសួងការពារប្រទេសរបស់វៀតណាម បានធ្វើជាអធិបតីភាពរួមគ្នាប្រារព្ធពិធីរំលឹកខួប នៃដំណើរការតស៊ូនេះ ព្រមទាំងបញ្ចុះបឋមសិលាសាងសង់អគារមិត្តភាពកម្ពុជា-វៀតណាម និងសម្ពោធសមិទ្ធផលមួយចំនួន ដែលបានសាងសង់នៅភូមិទន្លូង ឃុំកោះថ្ម ស្រុកមេមត់ ខេត្តត្បូងឃ្មុំ ដែលជាទីតាំងស្លាកស្នាមនៃតម្រាយផ្លូវរបស់សមមិត្តតេជោ ហ៊ុន សែន និងយុទ្ធមិត្តបានភាសខ្លួនទាំងយប់ទៅកាន់វៀតណាម កាលពី ៤៤ឆ្នាំមុននោះ។ថ្ងៃទី២០ ខែមិថុនា ឆ្នាំ១៩៧៧នោះ គឺជាពេលដែលសមមិត្ត ហ៊ុន សែន ក្នុងវ័យ ២៥ឆ្នាំ រួមនឹងយុទ្ធមិត្តដ៏ស្ម័គ្រស្មោះ៤រូបផ្សេងទៀត បានសម្រេចចិត្តក្នុងស្ថានភាពដ៏តាន់តឹងបំផុតលាចាកទឹកដី លាចាកឧត្តមភរិយា និងកូនក្នុងផ្ទៃជាទីស្រឡាញ់ធ្វើដំណើរជ្រែកស្បៃរាត្រីឆ្លងកាត់ព្រំដែនទាំងគ្រោះថ្នាក់បំផុត ឆ្ពោះទៅកាន់ប្រទេសវៀតណាម ដើម្បីស្វែងរកគាំទ្រក្នុងការរំដោះជាតិ និងប្រជាជនកម្ពុជា ចេញពីក្រញាំបិសាចដ៏សែនឃោឃៅ របស់ប៉ុលពត។ទាក់ទងនឹងព្រឹត្តិការណ៍ ដ៏ជួរចត់របស់សមមិត្តហ៊ុន សែន និងកម្មាភិបាលចំនួន៤រូបទៀតនេះ ត្រូវ បានក្រសួងការពារជាតិកម្ពុជា បានយកទៅចារ និងឆ្លាក់ទុកជាប្រវត្តិសាសន៍នៅក្នុងបរិវេនវិមាន ឈ្នះ ឈ្នះ ដែលស្ថិតនៅទឹកដីខណ្ឌជ្រោយចង្វារ រាជធានីភ្នំពេញ៕អត្ថបទ ៖ បាន ចក់

ក្រសួងទេសចរណ៍ប្រកាសបញ្ឈប់ផ្តល់អាជ្ញាប័ណ្ណដល់អាជីវកម្មដឹកជញ្ជូនទេសចរណ៍តាមផ្លូវគោកនិងផ្លូវទឹក

ភ្នំពេញ ៖ ដើម្បីជួយសម្រួលម្ចាស់អាជីវកម្មក្នុងវិស័យទេសចរណ៍ កាត់បន្ថយការចំណាយថ្លៃធ្វើអាជ្ញាប័ណ្ណដឹកជញ្ជូនភ្ញៀវទេសចរច្រើនកន្លែង ចាប់ពីថ្ងៃទី១ ខែកក្កដា ឆ្នាំ២០២១នេះតទៅ គ្រប់អាជីវកម្មដឹកជញ្ជូនតាមផ្លូវគោក និងផ្លូវទឹកទាំងអស់ ដែលមានអាជ្ញាប័ណ្ណប្រកបអាជីវកម្មដឹកជញ្ជូនអ្នកដំណើរពីក្រសួងសាធារណៈការ និងដឹកជញ្ជូនរួចហើយ គឺអាចប្រកបអាជីវកម្មដឹកជញ្ជូនភ្ញៀវទេសចរជាតិ និងអន្តរជាតិ នៅក្នុងវិស័យទេសចរណ៍បានផងដែរ។បើតាមការបញ្ជាក់ពីឯកឧត្តម តុប សុភ័គ រដ្ឋលេខាធិការ និងជាអ្នកនាំពាក្យក្រសួងទេសចរណ៍ បានថ្លែងប្រាប់ BTV នៅថ្ងៃទី១៩ ខែមិថុនានេះថា នៅពេលកន្លងមកនេះ គ្រប់អាជីវកម្មដឹកជញ្ជូនតាមផ្លូវគោក និងផ្លូវទឹកទាំងអស់ នៅពេលដែលគេមានលិខិតអនុញ្ញាតដឹកជញ្ជូនអ្នកដំណើរពីក្រសួងសាធារណការ និងដឹកជញ្ជូនរួចហើយ ហើយប្រសិនបើគេចង់ពង្រីកអាជីវកម្មប្រកបរបរដឹកជញ្ជូនភ្ញៀវទេសចរបន្ថែមទៀត គឺម្ចាស់អាជីវកម្មនោះត្រូវទៅសុំធ្វើអាជ្ញាប័ណ្ណប្រកបអាជីវកម្មដឹកជញ្ជូនភ្ញៀវទេសចរបន្ថែមទៀតពីក្រសួងទេសចរណ៍។ឯកឧត្តម តុប សុភ័គ ថ្លែងថា ប៉ុន្តែនៅពេលថ្មីនេះ ដោយសារយើងមានសារាចរពីរាជរដ្ឋាភិបាល និងដើម្បីជួយសម្រួលដល់អាជីវកម្មធុនតូចធុនមធ្យមដែលផ្តល់សេវាកម្មដឹកជញ្ជូនទេសចរណ៍តាមផ្លូវទឹកផ្លូវគោគនោះ កុំអោយមានការសុំអាជ្ញាប័ណ្ណច្រើនកន្លែង ដូចនេះ រាជរដ្ឋាភិបាល ក៏បានសម្រេចអោយតែក្រសួងសាធារណការ និងដឹកជញ្ជូនជាអ្នកផ្តល់អាជ្ញាប័ណ្ណដឹកជញ្ជូនទេសចរណ៍នោះវិញ។តាមសេចក្តីជូនដំណឹងរបស់ក្រសួងទេសចរណ៍នៅថ្ងៃទី១៧ ខែមិថុនានេះ ក៏បានចេញផ្សាយដែរថា ក្រសួងទេសចរណ៍នឹងបញ្ឈប់ការចេញអាជ្ញាប័ណ្ណទេសចរណ៍ ដល់ម្ចាស់អាជីវកម្មដឹកជញ្ជូនទេសចរណ៍តាមផ្លូវគោក និងផ្លូវទឹកចាប់ពីថ្ងៃទី១ ខែកក្កដា ឆ្នាំ២០២១តទៅ ប៉ុន្តែសម្រាប់ម្ចាស់អាជីវកម្មដឹកជញ្ជូនទេសចរណ៍តាមផ្លូវគោក ផ្លូវទឹកណាពង្រឹងគុណភាពសេវាកម្មដឹកជញ្ជូនទេសចរណ៍ គឺអាចស្នើចូលរួមផ្តល់ការបណ្តុះបណ្តាល និងដាក់ពាក្យចូលរួមប្រឡងប្រណាំងផ្សេងៗនៅកម្រិតថ្នាក់ជាតិ និងថ្នាក់តំបន់តាមរយៈក្រសួងទេសចរណ៍។បើតាមការបញ្ជាក់ពីឯកឧត្តម វ៉ាស៊ីម សូរិយា អ្នកនាំពាក្យក្រសួងសាធារណៈការ និងដឹកជញ្ជូន បានឲ្យដឹងថា ក្រសួងសាធារណៈការ មិនមានការផ្លាស់ប្តូរនីតីវិធី នៃការផ្តល់អាជ្ញាប័ណ្ណជូនម្ចាស់អាជីវកម្មដឹកអ្នកដំណើរនោះទេ ពោលគឺ គ្រប់អាជ្ញាប័ណ្ណដឹកជញ្ជូនអ្នកដំណើរទូទៅក្តី និងដឹកជញ្ជូនទេសចរណ៍ក្តី តាមមធ្យោបាយផ្លូវគោក និងផ្លូវទឹក គឺត្រូវធ្វើបន្តសុពលភាពធ្វើអាជ្ញាប័ណ្ណរៀងរាល់មួយឆ្នាំម្តងដូចៗគ្នា៕អត្ថបទ ៖ ស៊ុម សុខជា

ពលរដ្ឋជាង៦ម៉ឺនគ្រួសារទៀត ដែលមានបញ្ហាជីវភាពនឹងត្រូវសម្ភាសន៍សម្រាប់កម្មវិធីជំនួយសង្គមក្រោយពេលបិទខ្ទប់

ភ្នំពេញ ៖ ក្រសួងផែនការជាក្រសួងសាមី ក្នុងការកំណត់អត្តសញ្ញាណគ្រួសារទទួលផលពីកម្មវិធីជំនួយសង្គមជាសាច់ប្រាក់ក្រោយពេលបិទខ្ទប់ បានបញ្ជាក់ថា សម្រាប់ការសម្ភាសន៍លើកទី២នេះ គឺមានគ្រួសារដែលមានជីវភាពលំបាកក្នុងទីតាំងបិទខ្ទប់រាជធានីភ្នំពេញ ក្រុងតាខ្មៅ និងក្រុងព្រះសីហនុ ចំនួនជាង៦ម៉ឺនគ្រួសារបន្ថែមទៀត ដែលនឹងត្រូវទទួលបានការសម្ភាសន៍។ជុំវិញដំណើរការកំណត់អត្តសញ្ញាណគ្រួសារទទួលផលសម្រាប់កម្មវិធីជំនួយសង្គមថ្មីនេះ ឯកឧត្តម ថេង បញ្ញាធន ប្រតិភូរាជរដ្ឋាភិបាលទទួលបន្ទុកអគ្គនាយកផែនការ នៃក្រសួងផែនការ បញ្ជាក់ថាសម្រាប់ការសម្ភាសន៍លើកទី២នេះ គឺមានគ្រួសារដែលមានជីវភាពលំបាកក្នុងទីតាំងបិទខ្ទប់ទាំងបី ចំនួនជាង៦ម៉ឺនគ្រួសារបន្ថែមទៀត នឹងត្រូវទទួលបានការសម្ភាសន៍។ឯកឧត្តម បន្តថា ការសម្ភាសន៍នេះ គឺមានរយៈពេល មួយសប្ដាហ៍ ក្រោយបិទបញ្ចប់ការដាក់ពាក្យស្នើសុំកាលពីថ្ងៃទី ១៧មិថុនា កន្លងទៅ។ ឯកឧត្តម បញ្ជាក់ដែរថា ចំនួនគ្រួសារទាំងជាង៦ម៉ឺនគ្រួសារនេះ មិនប្រាកដថានឹងទទួលបានសាច់ប្រាក់ទាំងអស់នោះទេ។ ការទទួលបានសាច់ប្រាក់លុះត្រាតែជាប់ក្នុងការសម្ភាសន៍ ដែលគណនាដោយស្វ័យប្រវត្តិពីប្រព័ន្ធបច្ចេកវិទ្យា។ សម្រាប់គ្រួសារដែលទទួលបានការសម្ភាសន៍ នៅក្នុងសង្កាត់ដង្កោ នាព្រឹកនេះ ក៏បង្ហាញក្ដីរំភើប នៅពេលពួកគាត់នៅតែអាចទទួលបានការសម្ភាសន៍ សម្រាប់កម្មវិធីជំនួយសង្គមជាសាច់ប្រាក់ក្រោយពេលបិទខ្ទប់នេះផងដែរ។ ពួកគាត់សង្ឃឹមថា បើសម្ភាសន៍ជាប់ទទួលបានថវិកាមួយចំនួន ពួកគាត់នឹងអាចប្រើប្រាស់ថវិកាទាំងនោះជួយដោះស្រាយជីវភាព។កម្មវិធីជំនួយសង្គមជាសាច់ប្រាក់ក្រោយពេលបិទខ្ទប់នេះជាកម្មវិធីថ្មីដែលរាជរដ្ឋាភិបាលដាក់ឱ្យអនុវត្តដើម្បីជួយសម្រួលដល់ គ្រួសារដែលមានជីវភាពលំបាកប៉ះពាល់ក្នុងកំឡុងពេលបិទខ្ទប់នៅទីតាំងរាជធានីភ្នំពេញ ក្រុងតាខ្មៅ ក្រុងព្រះសីហនុ ដោយមិនរាប់បញ្ចូលគ្រួសារដែលមានប័ណ្ណសមធម៌ មានសុពលភាព។ កម្មវិធីនេះក៏ជួយដល់ គ្រួសារដែលមានសមាជិកគ្រួសារឆ្លងកូវីដ-១៩ និងមានជីវភាពលំបាក និងគ្រួសារដែលមានសមាជិកស្លាប់ដោយសារកូវីដ-១៩ ក្នុងក្របខណ្ឌទូទាំងប្រទេស។ សម្រាប់កម្មវិធីជំនួយសង្គមជាសាច់ប្រាក់ក្រោយពេលបិទខ្ទប់ ដែលបានសម្ភាសន៍ជាប់អាចទទួលបានសាច់ប្រាក់ សម្រាប់លើកទី ១កន្លងទៅ គឺមានចំនួន ៦១ ៦៧៨គ្រួសារ ដែលគ្រោងចំណាយថវិកាសរុបជាង៤លានដុល្លារអាមេរិក។ ចំពោះការបើកសាច់ប្រាក់ គឺត្រូវទៅបើកនៅភ្នាក់ងារ វីង ដោយភ្ជាប់ជាមួយអត្តសញ្ញាណប័ណ្ណ និងលេខទូរស័ព្ទដែលផ្ដល់ជូនពេលសម្ភាសន៍៕អត្ថបទ ៖ គឹមហុក

ឧបនាយករដ្ឋមន្ត្រី ហោ ណាំហុង ៖ កម្ពុជា-បារាំងមានកិច្ចសហប្រតិបត្តិការល្អលើគ្រប់វិស័យ

ភ្នំពេញ ៖ កាលពីថ្ងៃទី១៨ ខែមិថុនា ម្សិលមិញនេះ ឯកឧត្តម ឧបនាយករដ្ឋមន្ត្រី ហោ ណាំហុង បានទទួលជួបលោកជំទាវ Eva Nguyen Binh ឯកអគ្គរដ្ឋទូតសាធារណរដ្ឋបារាំងជម្រាបលាដែល ត្រូវចប់អាណត្តិនៅកម្ពុជា។ក្នុងជំនួបនោះឯកឧត្តម ឧបនាយករដ្ឋមន្ត្រី ក៏បានកត់សម្គាល់ថា ទំនាក់ទំនងរវាងកម្ពុជា និងបារាំងតាំងពីកម្ពុជាបានទទួលឯករាជ្យនៅថ្ងៃ០៩ វិច្ឆិកា ឆ្នាំ១៩៥៣មក មានភាពល្អប្រសើរជិតស្និទ្ធពុំដែលមានទំនាស់អ្វីទេ ហើយកិច្ចសហប្រតិបត្តិការល្អលើគ្រប់វិស័យ នយោបាយ សេដ្ឋកិច្ច វប្បធម៌។ ទន្ទឹមនឹងនេះ នៅថ្ងៃទី១១ ខែមិថុនា ឆ្នាំ២០២០ ក៏មានការចុះហត្ថលេខារវាង សម្ដេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និងលោកជំទាវ ឯកអគ្គរដ្ឋទូតបារាំង អំពីអនុសញ្ញា កិច្ចសហប្រតិបត្តិការយោធារវាងបារាំង និងកម្ពុជា។ បារាំងក៏បានជួយកម្ពុជាច្រើនខាងវិស័យវប្បធម៌ តាមរយៈ «សាលាបារាំងចុងបូព៌ា» ក្នុងវិស័យ ជួសជុលប្រាសាទបុរាណនានារបស់កម្ពុជាកន្លងមក។ក្នុងឱកាសនោះដែរ ឯកឧត្តម ឧបនាយករដ្ឋមន្ត្រី បានថ្លែងអំណរគុណចំពោះរដ្ឋាភិបាល បារាំងដែលបានផ្ដល់អាហារូបករណ៍ច្រើនដល់និស្សិតកម្ពុជាដែលសិក្សាកម្រិតអនុបណ្ឌិត និងបណ្ឌិត ព្រមទាំងសិក្ខាកាមកម្ពុជាខាងវិស័យវេជ្ជសាស្ត្រ និងខាងវិស័យយោធាជាច្រើន។ទោះជាក្នុងពេលដែលមានជំងឺកូវីដ-១៩ រាតត្បាតទាំងនៅបារាំង និងកម្ពុជា រដ្ឋាភិបាលបារាំង ក៏បានផ្ដល់ជំនួយដល់កម្ពុជា នៅខែធ្នូ ឆ្នាំ២០២០ តាមរយៈទីភ្នាក់ងារបារាំងដើម្បីអភិវឌ្ឍន៍(AFD) ចំនួន៩១លានដុល្លារអាមេរិក។ ទន្ទឹមនឹងនេះ នៅថ្ងៃទី៣១ ខែឧសភា ឆ្នាំ២០២១ ក្នុងឱកាសសន្ទនា នយោបាយរវាងកម្ពុជា និង AFD រដ្ឋាភិបាលបារាំងបានកំណត់ទិសដៅផ្ដល់ ១០០ ទៅ១២០លានអឺរ៉ូ ដល់កម្ពុជា ឯកឧត្តម ឧបនាយករដ្ឋមន្ត្រី ក៏បានលើកឡើងថា ទោះជាប្រទេសបារាំងត្រូវជំងឺកូវីដ-១៩រាតត្បាត យ៉ាងធ្ងន់ធ្ងរក៏ដោយ បញ្ជីពាណិជ្ជកម្មរវាងកម្ពុជា និងបារាំង ក្នុងឆ្នាំ២០២០ បានជាង១ពាន់លានអឺរ៉ូ៕

ផ្លូវកៅស៊ូមួយខ្សែក្នុងក្រុងសួង កំពុងត្រូវបានជួសជុលកែលម្អដើម្បីលើកស្ទួយសេដ្ឋកិច្ចពលរដ្ឋ

ត្បូងឃ្មុំ ៖ ជាការឆ្លើយតបចំពោះតម្រូវការ និងសម្រួលដល់ការធ្វើដំណើរប្រកបរបររកស៊ីប្រចាំថ្ងៃរបស់ប្រជាពលរដ្ឋ អភិបាលខេត្តត្បូងឃ្មុំ បានសម្រេចជួសជុលផ្លូវកៅស៊ូប្រភេទDBST ១ខ្សែ ប្រវែង៣១០០ម៉ែត្រ ដែលតភ្ជាប់ពីផ្លូវជាតិលេខ៧ ចូលមកកាន់ភូមិថ្នល់ថ្មី សង្កាត់វិហាហ្លួង ក្រុងសួង។ឯកឧត្តម ជាម ច័ន្ទសោភ័ណ អភិបាលខេត្តត្បូងឃ្មុំ កាលពីម្សិលមិញ បានដឹកនាំមន្ត្រីជំនាញពាក់ព័ន្ធមួយចំនួន ចុះពិនិត្យមើលដំណើរការជួសជុល និងស្ថាបនា ដើម្បីធ្វើយ៉ាងណាអោយដំណើរការទៅបានលឿនតាមការគ្រោងទុក និងជាពិសេសពិនិត្យមើលពីគុណភាព និងបទដ្ឋានបច្ចេកទេស ពោលគឺត្រូវតែធ្វើតាមបទដ្ឋានបច្ចេកទេស ដែលបានកំណត់ ដើម្បីឱ្យផ្លូវមានគុណភាពប្រើប្រាស់បានយូរ ។ឯកឧត្តម ជាម ច័ន្ទសោភ័ណ បានលើកឡើងថា ផ្លូវ១ខ្សែ ដែលកំពុងត្រូវបានជួសជុលកែលម្អនេះ នឹងជួយសម្រួលដល់ការធ្វើប្រកបការងាររបររកស៊ីចិញ្ចឹមជីវិតប្រចាំថ្ងៃរបស់ប្រជាពលរដ្ឋ។ឯកឧត្តម បញ្ជាក់ថា សម្រាប់អាជ្ញាធរខេត្តត្បូងឃ្មុំ គឺនៅតែមានសកម្មភាពអភិវឌ្ឍន៍ឥតឈប់ឈរ ពិសេសការកសាងនូវហេដ្ឋារចនាសម្ព័ន្ធផ្សេងៗ ដូចជា ការកសាង និងជួសជុលផ្លូវថ្នល់ការស្តារ និងជួសជុលប្រឡាយ ស្រះ និងទ្វារទឹក សម្រាប់បម្រើឲ្យវិស័យកសិកម្ម និងការអភិវឌ្ឍហេដ្ឋារចនាសម្ព័ន្ធដទៃទៀតនៅទីរួមខេត្ត។ឯកឧត្តម ជាម ច័ន្ទសោភ័ណ ក៏បានផ្ដាំផ្ញើដល់បងប្អូនប្រជាពលរដ្ឋដែលរស់នៅអមសងខាងផ្លូវត្រូវចូលរួមជួយថែរក្សាផ្លូវ ដើម្បីធានាឱ្យការប្រើប្រាស់បានយូរអង្វែង។លោក ជា ណារ៉ុន អភិបាលក្រុងសួង បានឲ្យដឹងថា ផ្លូវដែលកំពុងជួសជុល និងស្ថាបនានេះគឺជាប្រភេទផ្លូវកៅស៊ូ DBST មានប្រវែង៣១០០ម៉ែត្រ តភ្ជាប់ពីផ្លូវជាតិលេខ៧ ត្រង់ចំណុច ភូមិថ្នល់ថ្មី ដែលអាចបម្រើផលប្រយោជន៍ដោយផ្ទាល់ដល់ប្រជាពលរដ្ឋ ភូមិថ្នល់ថ្មី ភូមិព្នៅ ភូមិព្រះស្រែ ភូមិកណ្តាល ក្នុងក្រុងសួង និងភូមិគៀនល្មៀត ភូមិសង្គមថ្មី ឃុំស្រឡប់ ស្រុកត្បូងឃ្មុំ។ ផ្លូវនេះ ជាគម្រោងថវិការបស់ខេត្ត ដែលគ្រោងធ្វើប្រវែង៤៥០០ម៉ែត្រ តែជំហានដំបូងធ្វើតែ៣១០០ម៉ែត្រសិន ដោយចាប់ដំណើរការតាំងពីដើមខែមិថុនាមកម្ល៉េះ៕អត្ថបទ៖ ថុង សីហា

បណ្ដាញសង្គម

ព័ត៌មានថ្មីៗ

អ្នកនាំពាក្យក្រសួងការពារជាតិ៖ កងកម្លាំងកម្ពុជាមិនបានប្រើប្រាស់អាវុធបាញ់ចូលក្នុងទឹកដីថៃដូចការលើកឡើងរបស់ផេកកងទ័ពថៃ និងសារព័ត៌មានថៃ នោះទេ

សម្ដេចតេជោ ហ៊ុន សែន៖ ជំហរកម្ពុជានឹងមិនផ្លាស់ប្តូរទេ ហើយកម្ពុជាក៏មិនធ្វើថោកទៅសុំថៃបើកច្រកព្រំដែននោះដែរ, ថៃអាចបន្តបិទ សូម្បី១០០ឆ្នាំទៀតក៏កម្ពុជាមិនស្លាប់ដែរ

អ៊ីរ៉ង់ និង E3 នឹងបើកកិច្ចចរចាដ៏សំខាន់ ដើម្បីបញ្ចៀសការដាក់ទណ្ឌកម្ម តែឱកាសនៅតែស្ដួចស្ដើង

បាតុករគាំទ្រប៉ាឡេស្ទីន បិទកំពង់ផែទីក្រុង Genoa និងប៉ះង្គិចជាមួយនគរបាល នៅទីក្រុង Milan

មនុស្សយ៉ាងតិច ២នាក់ ស្លាប់ និងជាច្រើននាក់ រងរបួស ក្រោយអគារបាក់រលំ នៅភាគកណ្តាលឥណ្ឌា

នាយករដ្ឋមន្ត្រីអូស្ត្រាលីលើកឡើងពីការសម្លាប់បុគ្គលិកជំនួយក្នុងសុន្ទរកថា ស្តីពីការទទួលស្គាល់ប៉ាឡេស្ទីន

ឧទ្ធម្ភាគចក្រ និងរថយន្ត ស្វែងរក និងជួយសង្គ្រោះអ្នកស្រុកជាប់ក្នុងទឹកជំនន់ នៅអ៊ីតាលី

លោក Trump នឹងជួបក្រុមមន្ត្រីមកពីប្រទេសមូស្លីមភាគច្រើន ដើម្បីពិភាក្សាអំពីតំបន់ហ្កាហ្សា

ជប៉ុនបដិសេធមិនទទួលស្គាល់រដ្ឋប៉ាឡេស្ទីន ក្នុងកិច្ចប្រជុំអង្គការសហប្រជាជាតិ

អ្នកការទូតជាន់ខ្ពស់មកពីអាមេរិក កូរ៉េខាងត្បូង និងជប៉ុន សម្តែងក្ដីបារម្ភ អំពីច្រកសមុទ្រតៃវ៉ាន់

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877

នយោបាយ និង ការអភិវឌ្ឍន៍

គណៈកម្មការរដ្ឋសភា និងតំណាងរាជរដ្ឋាភិបាលបានលើកយកសេចក្តីព្រាងច្បាប់ចំនួនពីរមកពិភាក្សា

ប្រមុខការទូតអង់គ្លេស នឹងមកបំពេញទស្សនកិច្ចនៅកម្ពុជា នៅថ្ងៃទី២៣ខែមិថុនា ខាងមុខនេះ

សម្ដេចតេជោ ៖ រដ្ឋាភិបាលនិងប្រជាពលរដ្ឋចងចាំជានិច្ចចំពោះការលះបង់របស់អតីតយុទ្ធជនគ្រប់រូប

មន្ទីសាធារណៈការ បានបន្តអ៊ុតកៅស៊ូនៅលើផ្លូវលេខ៤៧ មូលដ្ឋានខណ្ឌដូនពេញ រួចរាល់ហើយ

ក្រសួងទេសចរណ៍ប្រកាសបញ្ឈប់ផ្តល់អាជ្ញាប័ណ្ណដល់អាជីវកម្មដឹកជញ្ជូនទេសចរណ៍តាមផ្លូវគោកនិងផ្លូវទឹក

ពលរដ្ឋជាង៦ម៉ឺនគ្រួសារទៀត ដែលមានបញ្ហាជីវភាពនឹងត្រូវសម្ភាសន៍សម្រាប់កម្មវិធីជំនួយសង្គមក្រោយពេលបិទខ្ទប់

ឧបនាយករដ្ឋមន្ត្រី ហោ ណាំហុង ៖ កម្ពុជា-បារាំងមានកិច្ចសហប្រតិបត្តិការល្អលើគ្រប់វិស័យ

ផ្លូវកៅស៊ូមួយខ្សែក្នុងក្រុងសួង កំពុងត្រូវបានជួសជុលកែលម្អដើម្បីលើកស្ទួយសេដ្ឋកិច្ចពលរដ្ឋ

បណ្ដាញសង្គម

ព័ត៌មានថ្មីៗ

អាស័យដ្ឋាន

ផែនទី

ទាញយកកម្មវិធី

នយោបាយ​ និង ការអភិវឌ្ឍន៍

គណៈកម្មការ​រដ្ឋសភា និង​តំណាង​រាជរដ្ឋាភិបាល​បាន​លើក​យក​សេចក្តីព្រាងច្បាប់​ចំនួន​ពីរ​មក​ពិភាក្សា

ប្រមុខ​ការទូត​អង់គ្លេស​ នឹង​មក​បំពេញ​ទស្សនកិច្ច​នៅ​កម្ពុ​ជា នៅ​ថ្ងៃទី​២៣ខែមិថុនា ​ខាងមុខនេះ

សម្ដេច​តេ​ជោ​ ៖ រដ្ឋាភិបាល​និង​ប្រជាពលរដ្ឋ​ចងចាំ​ជានិច្ច​ចំពោះ​ការ​លះបង់​របស់​អតីត​យុទ្ធជន​គ្រប់រូប

មន្ទីសាធារណៈការ បានបន្តអ៊ុតកៅស៊ូនៅលើផ្លូវលេខ៤៧ មូលដ្ឋានខណ្ឌដូនពេញ រួចរាល់ហើយ

ឧបនាយករដ្ឋមន្ត្រី ហោ ណាំហុង ៖ កម្ពុជា​-​បារាំង​មាន​កិច្ច​សហប្រតិបត្តិការ​ល្អ​លើ​គ្រប់​វិស័យ

បណ្ដាញសង្គម

ព័ត៌មានថ្មីៗ

អាស័យដ្ឋាន

ផែនទី

ទាញយកកម្មវិធី

នយោបាយ និង ការអភិវឌ្ឍន៍

គណៈកម្មការរដ្ឋសភា និងតំណាងរាជរដ្ឋាភិបាលបានលើកយកសេចក្តីព្រាងច្បាប់ចំនួនពីរមកពិភាក្សា

ប្រមុខការទូតអង់គ្លេស នឹងមកបំពេញទស្សនកិច្ចនៅកម្ពុជា នៅថ្ងៃទី២៣ខែមិថុនា ខាងមុខនេះ

សម្ដេចតេជោ ៖ រដ្ឋាភិបាលនិងប្រជាពលរដ្ឋចងចាំជានិច្ចចំពោះការលះបង់របស់អតីតយុទ្ធជនគ្រប់រូប

ឧបនាយករដ្ឋមន្ត្រី ហោ ណាំហុង ៖ កម្ពុជា-បារាំងមានកិច្ចសហប្រតិបត្តិការល្អលើគ្រប់វិស័យ