BTV NEWS

គម្រោងស្ពានឆ្លងកាត់ទន្លេបាសាក់ (ចាក់អង្រែក្រោម-ព្រែកប្រា) និងផ្លូវតភ្ជាប់ សម្រេចបាន ៤៥% ហើយ ដែលលឿនជាងផែនការ ៤,១១%

សម្ដេចធិបតី អំពាវនាវដល់ជនរួមជាតិជឿទុកចិត្តលើរាជរដ្ឋាភិបាលដែលកំពុងធ្វើកិច្ចការងារយ៉ាងសកម្មស្វែងរកដំណោះស្រាយបញ្ចប់បញ្ហាព្រំដែនកម្ពុជា-ថៃ ឱ្យបានឆាប់រហ័ស

សម្ដេចធិបតីផ្ដល់អនុសាសន៍៧ចំណុច ដល់ក្រសួង-ស្ថាប័នពាក់ព័ន្ធឱ្យយកចិត្តទុកដាក់ក្នុងឱកាសទិវាអក្ខរកម្មអន្តរជាតិ ៨ កញ្ញា ២០២៥

សម្ដេចធិបតី៖ រាជរដ្ឋាភិបាលប្តេជ្ញាចិត្តយ៉ាងមុតមាំលើកកម្ពស់ការងារអក្ខរកម្ម និងបំពាក់បំប៉ន ជំនាញ និងឱកាសសិក្សាពេញមួយជីវិត ជាពិសេសជំនាញឌីជីថល

នយោបាយ និង ការអភិវឌ្ឍន៍

ក្រុមការងារចុះជួយស្រុកកណ្តាលស្ទឹង ផ្តល់សម្ភារៈប្រើប្រាស់ដល់គណៈស្រុកសម្រាប់ប្រយុទ្ធនឹងកូវីដ-១៩

កណ្ដាល ៖ រថយន្ត២គ្រឿង ឧបករណ៍តេស្តជំងឺកូវីដ-១៩ និងសម្ភារៈប្រើប្រាស់មួយចំនួនទៀត ដែលជាអំណោយរបស់នាយឧត្តមសេនីយ៍កិត្តិបណ្ឌិត ហ៊ីង ប៊ុនហៀង អនុប្រធានក្រុមការងារចុះជួយខេត្តកណ្តាល និងជាប្រធានក្រុមការងារចុះជួយស្រុកកណ្តាលស្ទឹង ត្រូវបានប្រគល់ជូនដល់គណៈបញ្ជាការឯកភាពស្រុកកណ្តាលស្ទឹង ដើម្បីទុកប្រើប្រាស់ជាប្រយោជន៍រួម ពិសេសក្នុងយុទ្ធនាការប្រយុទ្ធប្រឆាំងនឹងជំងឺកូវីដ-១៩។ឯកឧត្តម លឹម សុធា និងឯកឧត្តម ឃុត ឌីវឌ្ឍនា អនុប្រធានក្រុមការងារចុះជួយស្រុកកណ្តាលស្ទឹង ក្នុងឱកាសប្រគល់សម្ភារៈប្រើប្រាស់ នៅព្រឹកថ្ងៃទី១៨ ខែមិថុនានេះ បានលើកឡើងថា ដើម្បីចូលរួម ចំណែកជាមួយរាជរដ្ឋាភិបាល ក៏ដូចជាអាជ្ញាធរមូលដ្ឋាន ក្នុងការប្រយុទ្ធប្រឆាំង និងទប់ស្កាត់ការរាតត្បាត នៃជំងឺកូវីដ-១៩ ក្រុមការងារចុះជួយស្រុកកណ្តាលស្ទឹង តែងតែយកចិត្តទុកដាក់ទាំងការឧបត្ថម្ភផ្ទាល់ដល់ ប្រជាពលរដ្ឋ ដែលមានការខ្វះខាតក្នុងបរិបទនេះ និងដល់គណៈបញ្ជាការឯកភាពស្រុក ដើម្បីរួមសហការ ក្នុងការប្រយុទ្ធប្រឆាំង និងទប់ស្កាត់ជំងឺកូវីដ-១៩ ។លោក អ៊ូច សាវឿន អភិបាលស្រុកកណ្តាលស្ទឹង ខេត្តកណ្តាល បាននិយាយថា តាមរយៈអំណោយទាំងនេះ ពិតជាបានចូលរួមចំណែកខ្លាំងណាស់សម្រាប់គណៈបញ្ជាការឯកភាពស្រុក ដើម្បីទុក ប្រើប្រាស់ជាប្រយោជន៍រួមក្នុងស្រុក ជាពិសេសក្នុងអំឡុងពេលជំងឺកូវីដ-១៩ ក្នុងព្រឹត្តិការណ៍សហគមន៍ ២០កុម្ភៈនេះ ។លោកអភិបាលស្រុករូបនេះ បានឱ្យដឹងទៀតថា ក្នុងបរិបទនៃជំងឺកូវីដ-១៩នេះ ស្រុកកណ្តាលស្ទឹង ក៏មានអ្នកវិជ្ជមានកូវីដ-១៩ ចំនួនជាង៣៥០នាក់ផងដែរ ប៉ុន្តែរហូតមកដល់ពេលនេះ បានជាសះស្បើយ ចំនួនជាង១០០នាក់។ ដោយឡែកចំពោះការគ្រប់គ្រងសភាពការណ៍ ក៏ដូចជា ស្ថានភាពជីវភាពរស់នៅ របស់ពលរដ្ឋក្នុងមូលដ្ឋាននេះ ដោយមានការយកចិត្តទុកដាក់ពីរាជរដ្ឋាភិបាល ក៏ដូចជា ថ្នាក់ដឹកនាំគ្រប់លំដាប់ថ្នាក់ គឺពុំមានប្រជាពលរដ្ឋណាមួយ ខ្វះខាតស្បៀងអាហារនោះទេ៕អត្ថបទ៖ ជៀប សម្បត្តិ

ទូតបារាំងវាយតម្លៃយុទ្ធសាស្ត្រដឹកនាំរបស់កម្ពុជា ខុសពីអ្វីដែលអ្នកដទៃមើលមកពីចម្ងាយ

ភ្នំពេញ ៖ លោកជំទាវឯកអគ្គរដ្ឋទូតបារាំងប្រចាំកម្ពុជា បានវាយតម្លៃខ្ពស់ចំពោះការដឹកនាំរបស់សម្តេចតេជោ ហ៊ុន សែន ដែលគ្រប់គ្រងដឹកនាំ និងរក្សាបាននូវសុខសន្តិភាពរីកចម្រើនខុសពីអ្វីដែលអ្នកដទៃមើលមកកម្ពុជាពីចម្ងាយ ១២០០គីឡូម៉ែត្រនោះ។បើតាមឯកឧត្តម អ៊ាង សុផល្លែត ជំនួយការផ្ទាល់សម្តេចតេជោ នាយករដ្ឋមន្ត្រី បានប្រាប់ដល់ក្រុម អ្នកព័ត៌មានថា ក្នុងឱកាសដែលសម្តេចតេជោអនុញ្ញាតឱ្យលោកជំទាវ Eva Nguyen Binh ឯកអគ្គរដ្ឋទូត នៃសាធារណរដ្ឋបារាំងប្រចាំកម្ពុជា ចូលជួបសំដែងការគួរសម និងជំរាបលា នៅវិមានសន្តិភាព នាព្រឹកថ្ងៃទី១៨ មិថុនានេះ លោកជំទាវ បានវាយតម្លៃខ្ពស់ អំពីយុទ្ធសាស្ត្រដឹកនាំគ្រប់គ្រងរបស់សម្តេច ដែលបានដឹកនាំ រក្សាបាននូវសុខសន្តិភាព ស្ថិរភាព និងការអភិវឌ្ឍ រីកចម្រើន ខុសពី អ្វីដែលអ្នកដទៃមើលពីចម្ងាយ១ពាន់២០០គ.ម មកលើកម្ពុជា។ឯកឧត្តម អ៊ាង សុផល្លែត បានឱ្យដឹងដែរថា នៅក្នុងជំនួបនេះ លោកជំទាវ ក៏បានកត់សម្គាល់ថាការផ្តល់វ៉ាក់សាំងជូនជនបរទេសទាំងអស់នៅក្នុងប្រទេសកម្ពុជា គឺជាសន្ដានចិត្តមនុស្សធម៌ របស់កម្ពុជា ដែលរាល់ស្ថានទូតទាំងអស់បានទទួលស្គាល់ និងបានវាយតម្លៃខ្ពស់ចំពោះការយកចិត្តទុកដាក់របស់រាជរដ្ឋាភិបាលកម្ពុជា។ជាការឆ្លើយតប សម្ដេចតេជោ បានថ្លែង អំណរគុណជូនចំពោះលោកជំទាវឯកអគ្គរដ្ឋទូតបារាំង ដែលបានប្រឹងប្រែងអស់ពីកម្លាំងកាយចិត្តបំពេញបេសកកម្ម ការទូតដើម្បីពង្រឹងនិងពង្រីកទំនាក់ទំនងកិច្ចសហប្រតិបត្តិការរវាងប្រទេសទាំងពីរ។សម្ដេច ក៏បានថ្លែងអំណរគុណដល់រដ្ឋាភិបាលបារាំង ដែលបានជួយដល់កម្ពុជា ក្នុងការប្រយុទ្ធប្រឆាំងជំងឺកូវីដ-១៩ ក្នុងនោះ មានវិទ្យាស្ថានប៉ាស្ទ័រ បានដើរតួយ៉ាងសំខាន់ ក្នុងការចូលរួមចំណែកប្រយុទ្ធប្រឆាំងកូវីដ-១៩។សម្តេច ក៏បានជម្រាបជូនលោកជំទាវ ថាយុទ្ធសាស្ត្ររបស់កម្ពុជា គឺផ្តល់វ៉ាក់សាំងដល់គ្រប់គ្នាទាំងអស់ ដែលរស់នៅក្នុងប្រទេសកម្ពុជា មិនថាប្រជាជនខ្មែរ ឬជនជាតិបរទេសនោះទេ។ នេះគឺជា ជម្រើសចុងក្រោយ ក្នុងការប្រយុទ្ធប្រឆាំងនឹងជំងឺកូវីដ-១៩។ សម្តេច ក៏បានថ្លែងអំណរគុណជូន ចំពោះ រដ្ឋាភិបាលបារាំង ដែលតែងតែផ្តល់ជំនួយដល់កម្ពុជាជាពិសេសលើវិស័យអភិវឌ្ឍន៍ធនធានមនុស្សវិស័យវិទ្យាសាស្ត្រ ដែលបានជួយដល់កម្រិតនៃការពង្រឹងសមត្ថភាពដល់កម្ពុជា នឹងផ្តល់ជាជំនួយទាំងហិរញ្ញប្បទាន ក្នុងការអភិវឌ្ឍកម្ពុជាផងដែរ។ សម្តេច ក៏បានថ្លែងអំណរគុណនិងជូនពរលោកជំទាវ អ៊ីវ៉ា ឱ្យសម្រេចបានជោគជ័យថ្មីទៀត ក្នុងការបំពេញបេសកកម្មរបស់លោកជំទាវជាបន្តបន្ទាប់នោះ៕អត្ថបទ៖ មុត សុទ្ធ

រដ្ឋបាលខេត្តកណ្តាល ប្ដេជ្ញាចាក់វ៉ាក់សាំងកូវីដ-១៩ ជូនកម្មករតាមរោងចក្រឲ្យអស់ក្នុងរយៈពេល១សប្តាហ៍ទៀត

កណ្ដាល ៖ រដ្ឋបាលខេត្តកណ្តាល នៅថ្ងៃទី១៨ ខែមិថុនានេះ បានបង្ហាញការប្តេជ្ញាចិត្តថា នឹងខិតខំចុះយុទ្ធនាការចាក់វ៉ាក់សាំងការពារកូវីដ-១៩ ជុំទី១ ដូសទី១ ជូនបងប្អូនកម្មករកម្មការិនី ដែលបំរើការងារនៅតាមបណ្តារោងចក្រនានា ឲ្យហើយរួចរាល់អស់ នៅក្នុងរយៈពេល១សប្តាហ៍ទៀតនេះ។បើតាមឯកឧត្តម គីម រិទ្ធី អភិបាលរងខេត្តកណ្តាល បានថ្លែងប្រាប់BTV នៅថ្ងៃទី១៨ ខែមិថុនានេះថា បច្ចុប្បន្នខេត្តកណ្តាល បានកំពុងពន្លឿនការចាក់វ៉ាក់សាំងដោយបានប្រើប្រាស់ក្រុមពេទ្យជាច្រើន មានក្រុមពេទ្យស្ម័គ្រចិត្តនៅតាមមន្ទីរពេទ្យបង្អែកក្រុងស្រុកនានា ក្នុងខេត្តកណ្តាល ក្រុមពេទ្យស្ម័គ្រចិត្តសហភាពសហព័ន្ធយុវជនកម្ពុជា ក្រុមពេទ្យស្ម័គ្រចិត្តឯកឧត្តម ហ៊ុន ម៉ានី ក្រុមពេទ្យស្ម័គ្រចិត្តសម្តេចពិជ័យសេនាទៀ បាញ់ បាននិងកំពុងសហការចាក់វ៉ាក់សាំងការពារកូវីដ-១៩ជូនកម្មករ និងកម្មការិនី កំពុងបំរើការងារនៅតាមបណ្តារោងចក្រនៅក្នុងខេត្តកណ្តាល អោយបានលឿនបំផុត។ឯកឧត្តម គីម រិទ្ធី បន្តថា មកដល់ពេលនេះ ការចាក់វ៉ាក់សាំងក្នុងចំណោមកម្មករ កម្មការិនីរោងចក្រគឺបានដំណើរការជិតហើយរួចរាល់ ពោលគឺនៅសល់តែ១សប្តាហ៍ទៀតប៉ុណ្ណោះ ការចាក់ដូសទី១ នឹងត្រូវគ្រប់ចំនួន ហើយយើងក៏កំពុងត្រៀមចាក់ដូសទី២ទៀត។បើតាមបណ្តាកម្មករ ដែលទើបទទួលបានការចាក់វ៉ាក់សាំង បានថ្លែងថា ជាបន្ទាប់ពីតំណាងរោងចក្របានរៀបចំចុះឈ្មោះកម្មករស្ម័គ្រចិត្តចាក់វ៉ាក់សាំង គឺគេម្នាក់ៗមានទន្ទឹងរងចាំចាក់វ៉ាក់សាំងនេះខ្លាំងណាស់ ដើម្បីបង្កើតប្រព័ន្ធការងារខ្លួនបន្ថែមអោយកាន់តែខ្លាំង ខណៈការងារប្រមូលផ្តុំគ្នាធ្វើការងារនៅក្នុងរោងចក្រ គឺមានការប្រឈមហានិភ័យខ្លាំង នឹងការចម្លងមេរោគកូវីដ-១៩។សូមបញ្ជាក់ថា ការចាក់វ៉ាក់សាំងការពារកូវីដ-១៩នៅខេត្តកណ្តាល បច្ចុប្បន្នគឺបានដំណើរការចាក់បានប្រមាណជាង៥០% ជូនដល់បណ្តាពលរដ្ឋទូទៅ ដែលរស់នៅតាមទីប្រជុំជនតាមបណ្តាក្រុងស្រុក និងកម្មករកម្មការិនីតាមរោងចក្រនានា ខណៈ នៅក្នុងយុទ្ធនាការចាក់វ៉ាក់សាំងការពារកូវីដ-១៩ នៅខេត្តកណ្តាល ដែលបានចាប់ផ្តើមតាំងពីថ្ងៃទី១០ ខែមិថុនា ឆ្នាំ២០២១ គឺបានកំណត់ចាក់ជូនពលរដ្ឋពលរដ្ឋទូទៅ នៅតាមតំបន់ទីប្រជុំជន និងកម្មករកម្មការិនីរោងចក្រប្រមាណជាង៩០ម៉ឺននាក់៕អត្ថបទ ស៊ុម សុខជា

អាជ្ញាធរខេត្តបាត់ដំបងកំពុងរៀបចំតំបន់ទេសចរណ៍ឱ្យសម្បូរបែប និងស្រស់ស្អាតដើម្បីឆក់បេះដូងទេសចរ

បាត់ដំបង ៖ អាជ្ញាធរខេត្តបាត់ដំបង កំពុងរៀបចំតំបន់ទេសចរណ៍ឱ្យកាន់តែសម្បូរ បែប និងស្រស់ស្អាត ដើម្បីឆក់ បេះដូងទេសចរ ខណៈខេត្តមួយនេះ ក៏ជាគោលដៅទេសចរណ៍ដ៏ល្បីល្បាញមួយដែរ ក្នុងចំណោមតំបន់ ទេសចរណ៍ជាច្រើននៅក្នុងព្រះរាជាណាចក្រកម្ពុជា។នៅក្នុងខេត្តបាត់ដំបង មានតំបន់ទេសចរណ៍ជាច្រើន ដូចជារមណីយដ្ឋានប្រវត្តិសាស្ត្រ រមណីយដ្ឋាន វប្បធម៌ រមណីយដ្ឋានធម្មជាតិ កសិទេសចរណ៍ ទេសចរណ៍កែច្នៃ សហគមន៍ទេសចរណ៍ជាដើម ដែល កាលមិនទាន់ផ្ទុះមានជំងឺកូវីដ-១៩ ខេត្តនៅភូមិភាគពាយព្យប្រទេសមួយនេះ ក្នុងមួយឆ្នាំៗ ទទួលបាន ភ្ញៀវ ទេសចរជាតិ និងអន្តរជាតិ ចំនួនរាប់ម៉ឺននាក់ លោក សឿម ប៊ុនរិទ្ធ អភិបាលរង និងជាអ្នកនាំពាក្យរដ្ឋបាលខេត្តបាត់ដំបង លើកឡើងថា គោលដៅរបស់អាជ្ញាធរខេត្ត គឺចង់ឲ្យភ្ញៀវទេសចរចេញពីរាជធានីភ្នំពេញ ធ្វើដំណើរតាមផ្លូវជាតិលេខ៦ ទៅលេង ខេត្តសៀមរាប បង្ហួសចូលលេងកម្សាន្តនៅខេត្តបាត់ដំបង ឬចេញពីភ្នំពេញតាមផ្លូវជាតិលេខ៥ ទៅលេង ខេត្តបាត់ដំបង បន្តទៅលេងកម្សាន្តនៅខេត្តសៀមរាប ឬខេត្តផ្សេងៗទៀត ។លោក បានបន្តថា ក្នុងការធ្វើឲ្យមានភាពទាក់ទាញ និងឲ្យសម្រេចគោលដៅនោះ គឺខេត្តបានរៀប ចំតំបន់ទេសចរណ៍ ក្នុងទិសទាំង៤ ជុំវិញក្រុងបាត់ដំបង ដូចជា នៅទិសខាងត្បូងមានប្រាសាទបាណន់ រៀបចំបន្ថែមនូវភោជនីយដ្ឋាន រៀបចំតំបន់បៃតង និងទីតាំងជិះឡូរីនៅជើងភ្នំបាណន់ជាដើម, ទិសខាង ជើង មានប្រាសាទឯកភ្នំ តាមរយៈការរៀបចំផ្លូវភ្លោះពីទីរួមខេត្ត ការស្ដារបឹងធម្មជាតិជុំវិញប្រាសាទ មាន បឹងរលួស និងបឹងតាគម រួមទាំងការដាំដើមឈើរាបរយដើមនិងកែលម្អទីតាំងទេសចរណ៍មួយចំនួន ។លោក សឿម ប៊ុនរិទ្ធ បានបន្ថែមថា ទាំង៤ជ្រុង ជុំវិញក្រុងបាត់ដំបងនេះ ធ្វើម៉េចឲ្យក្លាយជាដែក ឆក់ ហើយប្រជាពលរដ្ឋក្នុងខេត្ត ក៏ដូចជាភ្ញៀវជាតិ និងអន្តរជាតិ ចូលលេងខេត្តបាត់ដំបង អាចមានទី កន្លែងកម្សាន្តច្រើនុ៕អត្ថបទ៖ បាន សុខរិទ្ធ

តំណាងធនាគារពិភពលោកកោតសរសើរកម្ពុជាចាក់វ៉ាក់សាំងជូនពលរដ្ឋបានជាង៣លាននាក់ ចាត់ទុកជា«ដំណឹងល្អ»

ភ្នំពេញ៖ នាយិកាធនាគារពិភពលោកប្រចាំកម្ពុជា អ្នកស្រី អ៊ីហ្គូណា ដូប្រាចា (Inguna Dobraja) បានកោតសរសេរចំពោះកិច្ចខិតខំប្រឹងប្រែងរបស់កម្ពុជាក្នុងការចាក់វ៉ាក់សាំងជូនប្រជាពលរដ្ឋ ដែលជាកម្រិតខ្ពស់ជាងគេនៅក្នុងតំបន់។ការលើកសរសើររបស់តំណាងធនាគារពិភពលោកប្រចាំកម្ពុជារូបនេះ ត្រូវបានគេមើលឃើញនៅក្នុងរបាយការណ៍«ផ្លូវឆ្ពោះទៅការងើបឡើងវិញ»របស់ធនាគារពិភពលោកចេញនៅថ្ងៃនេះ ដែលបង្ហាញពីបច្ចប្បន្នភាពនៃសេដ្ឋកិច្ចកម្ពុជានៅពាក់កណ្ដាលឆ្នាំនេះ។ក្នុងរបាយការណ៍នោះ ធនាគារពិភពលោកបានលើកឡើងថា សេដ្ឋកិច្ចកម្ពុជាត្រូវបានព្យាករថា កំពុងងើបឡើងវិញដោយសន្សឹមៗនៅឆ្នាំនេះ បន្ទាប់ពីបានថយចុះអស់ ៣.១ភាគរយកាលពីឆ្នាំ២០២០កន្លងមក។ទោះជាយ៉ាងណា ធនាគារមួយនេះ បានបញ្ជាក់ថា ដំណើរការងើបឡើងវិញនៃសេដ្ឋកិច្ចកម្ពុជានេះ កំពុងរងការគំរាមកំហែងពីស្ថានភាពមិនច្បាស់លាស់នែការឆ្លងរីករាលដាលនៃមេរោគកូវីដ-១៩។គិតត្រឹមថ្ងៃនេះ កម្ពុជាបានរកឃើញមនុស្សរហូតដល់ទៅជាង ៤ម៉ឺននាក់ហើយ បានឆ្លងមេរោគកូវីដ-១៩នៅទូទាំងប្រទេស ក្នុងនោះអ្នកជំងឺ ៣៨០នាក់ហើយបានស្លាប់ដោយសារជំងឺនេះ។ប្រឈមមុខនឹងការឆ្លងរីករាលដាលនៃមេរោគកូវីដ-១៩នេះ កម្ពុជាក៏កំពុងតែបន្តបង្កើនការចាក់វ៉ាក់សាំងជូនប្រជាពលរដ្ឋរបស់ខ្លួនផងដែរ ចាប់តាំងពីយុទ្ធនាការចាក់វ៉ាក់សាំងទូទាំងប្រទេសបានចាប់ផ្ដើមកាលពីថ្ងៃទី១០ ខែកុម្ភៈកន្លងមក។នាយិកាធនាគារពិភពលោក អ្នកស្រី អ៊ីហ្គូណា ដូប្រាចា មើលឃើញថា ដូចទៅនឹងបណ្ដាប្រទេសជាច្រើនទៀតនៅក្នុងតំបន់ផងដែរ កម្ពុជាបានរងការវាយប្រហារធ្ងន់ធ្ងរដោយសារតែវិបត្តិកូវីដ-១៩នេះ។ទន្ទឹមគ្នានេះ អ្នកស្រី អ៊ីហ្គូណា ដូប្រាចា កត់សម្គាល់ឃើញថា កម្ពុជាបានចាក់វ៉ាក់សាំងជូនប្រជាពលរដ្ឋខ្លួនបានដល់ទៅជាង ៣លាននាក់ហើយ ដែលអ្នកស្រីចាត់ទុកជា «ដំណឹងល្អ»។អ្នកស្រី អ៊ីហ្គូណា ដូប្រាចា និយាយក្នុងសេចក្ដីប្រកាសព័ត៌មានថា៖ «ដំណឹងល្អគឺថា មកដល់ថ្ងៃនេះ កម្ពុជាបានចាក់វ៉ាក់សាំងជូនពលរដ្ឋបានជាង ៣លាននាក់ហើយ ជាអត្រាខ្ពស់បំផុតមួយនៅក្នុងតំបន់»។តួលេខរបស់ក្រសួងសុខាភិបាល បង្ហាញថា ពលរដ្ឋដល់ទៅជាង ៣លាន ១៣ម៉ឺននាក់ហើយ បានទទួលវ៉ាក់សាំង ក្នុងនោះពលរដ្ឋដល់ទៅជាង ២លាន ៦២ម៉ឺននាក់ បានទទួលវ៉ាក់សាំងទាំងពីរដូសរួចរាល់ហើយ នៅក្នុងយុទ្ធនាការចាក់វ៉ាក់សាំងចន្លោះពីថ្ងៃទី១០ ខែកុម្ភៈ មកដល់ថ្ងៃម្សិលមិញនេះ។តួលេខនេះ បង្ហាញថា កម្ពុជាសម្រេចការចាក់វ៉ាក់សាំងជូនពលរដ្ឋបាន ៣១.៣៩ភាគរយនៃចំនួនប្រជាជន ១០លាននាក់ដែលជាគោលដៅរបស់រាជរដ្ឋាភិបាល។តំណាងធនាគារពិភពលោករូបនេះ និយាយទៀតថា ធនាគារពិភពកំពុងធ្វើការជាមួយកម្ពុជា ដើម្បីផ្ដល់ការគាំទ្របន្ថែមទៀតក្នុងការប្រយុទ្ធនឹងវិបត្តិជំងឺឆ្លង និងជួយដល់ភាពធុននៃសេដ្ឋកិច្ច និងការងើបឡើងវិញនៃសង្គមរបស់ប្រទេសនេះ៕

រាជធានីភ្នំពេញទទួលជំនួយសង្គ្រោះបន្ទាន់ជាសាច់ប្រាក់៨០ម៉ឺនដុល្លារពីទីភ្នាក់ងារស្វីស

ភ្នំពេញ ៖ អភិបាលរាជធានីភ្នំពេញទទួលជំនួយសង្គ្រោះបន្ទាន់ជាសាច់ប្រាក់ និងស្បៀងពីទីភ្នាក់ងារស្វីស សម្រាប់ការអភិវឌ្ឍ និងសហប្រតិបត្តិការ នូវទឹកប្រាក់ចំនួនទឹកប្រាក់៨០ម៉ឺនដុល្លារ។ឯកឧត្ដម ឃួង ស្រេង អភិបាលរាជធានីភ្នំពេញ បានឲ្យដឹងថា នៅក្នុងរាជធានីភ្នំពេញមានប្រជាពលរដ្ឋក្រីក្រប៉ះពាល់ដោយជំងឺកូវីដ-១៩ ប្រមាណ១០ម៉ឺនគ្រួសារ ដែលទទួលបានប្រាក់ឧបត្ថម្ភពីរាជរដ្ឋាភិបាល ក្នុងអំឡុងពេលប្រយុទ្ធប្រឆាំង និងជំងឺកូវីដ-១៩ ខណៈដែរប្រទេសកម្ពុជាបាននិងកំពុងប្រឈមនឹងការរីករាលដាលជំងឺ-១៩នេះ។ ប៉ុន្តែទោះបីជាយ៉ាងណាក្តី ប្រជាពលរដ្ឋក្រីក្រដែលទទួលបានថវិកាជំនួយគាំពារសង្គមពីរាជរដ្ឋាភិបាលហើយ គឺមិនត្រូវបានទទួលប្រាក់ឧបត្ថម្ភពីរាជរដ្ឋាភិបាល ក្នុងអំឡុងពេលប្រយុទ្ធ ប្រឆាំងនិងជំងឺកូវីដ-១៩នេះទៀតទេ ។ នេះជាការបញ្ជាក់របស់អភិបាលរាជធានីភ្នំពេញ នាព្រឹកថ្ងៃទី១៧ ខែមិថុនា ឆ្នាំ២០២១នៅសាលារាជធានីភ្នំពេញ ខណៈដែលឯកឧត្ដមអញ្ជើញទទួលជំនួយសង្គ្រោះបន្ទាន់ជាសាច់ប្រាក់ និងស្បៀងពីទីភ្នាក់ងារ ស្វីស សម្រាប់ការអភិវឌ្ឍ និងសហប្រតិបត្តិការ នូវទឹកប្រាក់ចំនួនទឹកប្រាក់៨០ម៉ឺនដុល្លារសហរដ្ឋអាមេរិក ដើម្បីជួយទៅដល់ប្រជាពលរដ្ឋដែលរងការប៉ះពាល់ដោយជំងឺកូវីដ-១៩ នៅរាជធានីភ្នំពេញ។ឯកឧត្ដម ឃួង ស្រេង បានបន្តទៀតថា ក្នុងនាមក្រុមប្រឹក្សា គណៈអភិបាលរាជធានីភ្នំពេញ មន្ត្រីរាជការ កងកម្លាំងប្រដាប់អាវុធ និងប្រជាពលរដ្ឋទាំងអស់នៅរាជធានីភ្នំពេញ សូមថ្លែងអំណរគុណយ៉ាងជ្រាលជ្រៅចំពោះ ទីភ្នាក់ងារស្វីស សម្រាប់ការអភិវឌ្ឍ និងសហប្រតិបត្តិការ ដែលបានផ្តល់ទឹកប្រាក់ចំនួន៨០ម៉ឺនដុល្លារសហរដ្ឋអាមេរិកជូនរដ្ឋបាលរាជធានីភ្នំពេញ ដើម្បីជួយឧបត្ថម្ភជីវភាពជូនប្រជាពលរដ្ឋដែលទទួលរងគ្រោះ ឬរងផលប៉ះពាល់ធ្ងន់ធ្ងរដោយជំងឺកូវីដ-១៩ ។ឯកឧត្ដម ឃួង ស្រេង បន្ថែមថា តាមរយៈកាយវិការដ៏ល្អប្រពៃ ប្រកបដោយមនុស្សធម៌ និងគុណធម៌ខាងលើនេះ ពិតជាបានរួមចំណែកយ៉ាង សំខាន់ជាមួយរដ្ឋបាលរាជធានីភ្នំពេញ និងរាជរដ្ឋាភិបាល ស្របតាមការអំពាវនាវរបស់សម្តេចតេជោ ហ៊ុន សែន នាយករដ្ឋមន្ត្រី ក្នុងការចាត់វិធានការទប់ស្កាត់ការរីករាលដាលនៃមេរោគកូវីដ-១៩ នៅរាជធានីភ្នំពេញ ក៏ដូចជានៅទូទាំងព្រះរាជាណាចក្រកម្ពុជាបានទាន់ពេលវេលា នៅក្នុងកាលៈទេសៈដែលប្រទេសកម្ពុជាបាននិងកំពុងជួបប្រទះនឹងគ្រោះភ័យ នៃការរាតត្បាតពីមេរោគកូវីដ-១៩ ។ សមានចិត្តដ៏ប្រពៃនេះ នឹងត្រូវបានចងចាំ ទុកដោយរាជរដ្ឋាភិបាល រដ្ឋបាលរាជធានីភ្នំពេញ និងប្រជាជនកម្ពុជាទាំងអស់៕អត្ថបទ ៖ ប្រាក់ វ៉ាន់ដា

ធនាគារពិភពលោកអះអាងថា សេដ្ឋកិច្ចកម្ពុជាកំពុងងើបឡើងវិញសន្សឹមៗ ខណៈស្ថានភាពកូវីដ-១៩ធ្វើឱ្យមានភាពស្រពិចស្រពិល

ភ្នំពេញ៖ ធនាគារពិភពលោកបានប្រកាសថា សេដ្ឋកិច្ចកម្ពុជាកំពុងងើបឡើងវិញដោយសន្សឹមៗហើយ បន្ទាប់ពីកំណើនសេដ្ឋកិច្ចប្រទេសនេះ បានធ្លាក់ចុះរហូតដល់ដក៣.១ភាគរយកាលពីឆ្នាំមុន។ធនាគារពិភពលោកបានប្រកាសបែបនេះនៅក្នុងរបាយការណ៍ស្ដីពី«ដំណើរងើបឡើងវិញ» ដែលជារបាយការណ៍បង្ហាញពីបច្ចុប្បន្នភាពនៃដំណើរការសេដ្ឋកិច្ចរបស់កម្ពុជាចេញនៅថ្ងៃនេះ។ធនាគារពិភពលោក បានបញ្ជាក់ថា សេដ្ឋកិច្ចកម្ពុជាត្រូវព្យាករថា នឹងមានកំណើន ៤ភាគរយនៅក្នុងឆ្នាំ២០២១នេះ បន្ទាប់ពីបានធ្លាក់ចុះដល់ដក ៣.១ភាគរយកាលពីឆ្នាំ២០២០។ទោះជាយ៉ាងណា ធនាគារពិភពលោកនិយាយថា ដំណើរងើបឡើងវិញនៃសេដ្ឋកិច្ចកម្ពុជានេះ នៅតែបន្តមានភាពមិនច្បាស់លាស់នៅឡើយ ដោយសារតែមួយផ្នែកបណ្ដាលមកពីការអនុវត្តវិធានការបិទខ្ទប់ដើម្បីទប់ស្កាត់ការឆ្លងរីករាលដាលនៃជំងឺកូវីដ-១៩។ បើតាមធនាគារពិភពលោក វិស័យមួយចំនួនរបស់កម្ពុជា កំពុងមានងើបឡើងវិញ ដូចជា វិស័យកសិកម្ម ដែលមួយផ្នែកកើតចេញពីកិច្ចព្រមព្រៀងពាណិជ្ជកម្មសេរីកម្ពុជា-ចិន ដែលចុះហត្ថលេខាថ្មីៗ។ក្រៅពីវិស័យកសិកម្ម ធនាគារពិភពលោក បានឱ្យដឹងទៀតថា វិស័យវាយនភ័ណ្ឌ ក៏បានងើបឡើងវិញសន្សឹមៗផងដែរតាមរយៈការសម្របខ្លួនទៅនឹងលក្ខខណ្ឌប្រែប្រួលនៅខាងក្រៅ ខណៈវិស័យពាណិជ្ជកម្មលក់ដុំ និងលក់រាយ ក៏បានមានការងើបឡើងវិញបន្តិចផងដែរ ដោយសារតែការរស់រានឡើងវិញដោយសន្សឹមនៃសកម្មភាពសេដ្ឋកិច្ចនៅក្នុងស្រុក។ចំណែកឯលំហូរទុនវិនិយោគដោយផ្ទាល់ពីក្រៅប្រទេសវិញ ធនាគារពិភពលោកបញ្ជាក់ថា នៅតែបន្តធុនទ្រាំបាន និងកំពុងជួយរក្សាស្ថិរភាពវិស័យខាងក្រៅ។ប៉ុន្តែ ធនាគារពិភពលោកបានបញ្ជាក់ថា វិស័យសេវាកម្ម ដូចជាការស្នាក់នៅ ភោជនីយដ្ឋាន និងដឹកជញ្ជូន នៅតែបន្តរងការវាយប្រហារធ្ងន់ធ្ងរដោយសារតែការធ្លាក់ចុះនៃទេសចរណ៍ក្នុងស្រុក និងអន្តរជាតិ។ធនាគារពិភពលោក បញ្ជាក់ថា ទស្សនវិស័យកំណើនសេដ្ឋកិច្ចកម្ពុជា នៅតែស្ថិតក្នុងស្ថានភាពមិនច្បាស់លាស់ខ្ពស់នៅឡើយ ដែលចំណុចនេះអាស្រ័យយ៉ាងខ្លាំងទៅលើស្ថានភាពជំងឺកូវីដ-១៩ និងល្បឿននៃយុទ្ធនាការចាក់វ៉ាក់សាំង៕

យុវជនខេត្តកំពង់ចាម កំពុងដើរតួយ៉ាងសំខាន់ចូលរួមទប់ស្កាត់ជំងឺកូវីដ-១៩

កំពង់ចាម ៖ ក្រុមការងារយុវជន ខេត្តកំពង់ចាម ហៅកាត់ថា KCY កំពុងដើរតួយ៉ាងសំខាន់ក្នុងការទប់ស្កាត់ការឆ្លងរីករាលដាល ជំងឺកូវីដ-១៩ ដោយបានចុះផ្សព្វផ្សាយ អប់រំណែនាំ ឲ្យពលរដ្ឋតាមមូលដ្ឋាន ទីសាធារណៈ និងបណ្តាផ្សារក្នុងក្រុងកំពង់ចាម ក្នុងន័យកាត់ផ្តាច់ខ្សែចម្លងកូវីដ-១៩។ ក្រោយពីមានវិបត្តិកូវីដកំពុងរីករាលដាលក្នុងប្រទេសកម្ពុជា ដោយឡែក ខេត្តកំពង់ចាម ក៏មានរកឃើញករណីអ្នក វិជ្ជមានជាបន្តបន្ទាប់ផងដែរ។ លោក ទូច ចាន់ណា ប្រធានផ្នែក ព័ត៌មាន និងផ្សព្វផ្សាយបណ្តាញសង្គម ខេត្តកំពង់ចាម នៃ ក្រុមការងារយុវជនខេត្តកំពង់ចាម ដែលហៅថា ខេស៊ីវ៉ាយ (KCY) ដោយមានចង្អុលបង្ហាញពី ឯកឧត្តម អ៊ុន ចាន់ដា អភិបាលខេត្តកំពង់ចាម បានណែនាំឲ្យក្រុមយុវជនតាមបណ្តាស្រុកក្រុងចូលរួមផ្សព្វផ្សាយ ចែកម៉ាស់តាមទី សាធារណៈ ទីប្រជុំជន និងផ្សារមួយចំនួន និងជាពិសេសនោះ ក្រុមយុវជន KCY បានកែច្នៃរូបភាពភ្ជាប់ជាមួយសារអប់រំ ណែនាំ របស់ក្រសួងសុខាភិបាល បីកុំ បីការពារ ផងដែរ។យុវជន ដែលបានស្ម័គ្រចិត្តចូលរួមដោយឆន្ទៈ មកពីបណ្តាស្រុក-ក្រុងមួយចំនួន ដូចជាស្រុកកោះសូទិន ស្រុកកំពង់សៀម និងក្រុងកំពង់ចាម បានលើកឡើងថា ក្នុងនាមជាយុវជន គឺមានតែចូលរួមជារូបភាពផ្សព្វផ្សាយ តាមមេក្រូ និង កែច្នៃរូបភាពថ្នាក់ដឹកនាំ អមដោយអក្សរអប់រំរបស់ក្រសួងសុខាភិបាល ដើម្បីបង្ហោះផ្សព្វផ្សាយលើបណ្តាញសង្គម Facebook និងជំរុញដល់ប្រជាពលរដ្ឋឲ្យមានការប្រុងប្រយ័ត្នខ្ពស់ ក្នុងការទប់ស្កាត់ ជំងឺកូវីដដ៏កាចសាហាវមួយនេះ។ក្នុងភូមិសាស្ត្រខេត្តកំពង់ចាមមក មានករណីវិជ្ជមានកូវីដ-១៩ រកឃើញជាបន្តបន្ទាប់ និងរដ្ឋបាលខេត្ត បានចេញ សេចក្តីសម្រេចបិទខ្ទប់ភូមិមួយចំនួន និងរោងចក្រទៀត ដើម្បីបង្ការទប់ស្កាត់ និងកាត់ផ្ដាច់ខ្សែចម្លង នៃជំងឺដ៏កាចសាហាវ នេះទៅក្នុងសហគមន៍កម្ពុជាជាបន្តទៀត៕អត្ថបទ៖ ថុង សីហា

ស្ថាប័នជំនាញនិងអង្គការសង្គមស៊ីវិល ប្រជុំប្រមូលធាតុចូលបន្ថែមលើផែនការសកម្មភាពនៃប្រព័ន្ធកិច្ចការពារកុមារ នៅកម្ពុជា

ភ្នំពេញ ៖ ក្រសួងស្ថាប័ន រួមទាំងវត្តមានរបស់អង្គការសង្គមស៊ីវិល បានរៀបចំសិក្ខាសាលានៅថ្ងៃនេះ ដើម្បីប្រមូលនូវធាតុចូលបន្ថែមលើសេចក្ដីព្រាងផែនការសកម្មភាព នៃគោលនយោបាយជាតិស្ដីពីប្រព័ន្ធកិច្ចការពារកុមារ ឆ្នាំ២០១៩-២០២៩។ ជាក់ស្ដែងសម្រាប់ការប្រមូលធាតុចូលនាពេលនេះ គឺផ្តោតលើផែនការធំៗចំនួន ៣។សម្រាប់សិក្ខាសាលានេះ រៀបចំឡើងដោយ អគ្គលេខាធិការដ្ឋានក្រុមប្រឹក្សាជាតិកម្ពុជាដើម្បីកុមារ និងមានមន្ត្រីជំនាញមកពីក្រសួងស្ថាប័ន ពាក់ព័ន្ធ រួមទាំងវត្តមានរបស់អង្គការសង្គមស៊ីវិលផងដែរ។ ជាគោលដៅនៃការជួបជុំគ្នានាពេលនេះ គឺដើម្បីប្រមូលនូវធាតុចូលបន្ថែម លើសេចក្ដីព្រាងផែនការសម្រាប់អនុវត្តគោលនយោបាយជាតិស្ដីពី ប្រព័ន្ធកិច្ចការពារកុមារ ២០១៩-២០២៩ លើ៣ចំណុចធំៗ រួមមាន ផែនការសកម្មភាព ២០២១-២០២៩ ផែនការអភិវឌ្ឍធនធានមនុស្ស និងថវិកា និងផែនការត្រួតពិនិត្យ និងវាយតម្លៃ។ នេះជាការលើកឡើងរបស់លោកជំទាវ ញ៉េប សុភាព អគ្គលេខាធិការ នៃអគ្គលេខាធិការដ្ឋាន ក្រុមប្រឹក្សាជាតិកម្ពុជាដើម្បីកុមារ។លោកជំទាវ បញ្ជាក់បន្ថែមថា គោលនយោបាយស្ដីពីកិច្ចការពារកុមារនេះ គឺជាត្រីវិស័យចង្អុលបង្ហាញ ដល់ផ្នែកពាក់ព័ន្ធឱ្យបំពេញការងារ ជាលក្ខណៈប្រព័ន្ធ ប្រទាក់ក្រឡា ដោយធ្វើយ៉ាងណាឱ្យកុមារជាអ្នកទទួលផល និងក្រុមគ្រួសារទទួលបានអត្ថប្រយោជន៍ដោយមានប្រសិទ្ធភាព។ លោកជំទាវ បន្តថា សព្វថ្ងៃទោះបីមានកិច្ចប្រឹងប្រែងពីរាជរដ្ឋាភិបាល និងផ្នែកពាក់ព័ន្ធជាច្រើនក្ដី ក៏កុមារកម្ពុជានៅតែជួបប្រទះបញ្ហាប្រឈមមួយចំនួន រួមមាន កត្តាគ្រោះមហន្តរាយ ការរីករាលដាលនៃជំងឺកូវីដ-១៩ ភាពក្រីក្រ អំពើហិង្សាក្នុងគ្រួសារ ការធ្វើចំណាកស្រុក ការទុកកូនចោល ការជាប់ពន្ធនាគាររបស់អាណាព្យាបាល។លោកជំទាវ បានលើកឡើងដែរថា កម្ពុជាជាប្រទេសដែលមនុស្សស្ថិតនៅវ័យក្មេងច្រើន ដែលពួកគេនឹងក្លាយជាធនធានមនុស្សជំរុញសេដ្ឋកិច្ចជាតិនាពេលខាងមុខ។ ការវិនិយោគលើកុមារ នៅថ្ងៃនេះ នឹងបង្កើតនូវធនធានមនុស្សដែលមានជំនាញ និងប្រកបដោយសក្ដានុពលនាពេលអនាគត ហើយការវិនិយោគនេះ គឺត្រូវការពេលវេលា ដើម្បីមើលឃើញជាលទ្ធផល ដែលខុសពីការវិនិយោគលើផ្នែកផ្សេងទៀត៕អត្ថបទ៖គឹមហុក

ហ៊្វុនស៊ិនប៉ិចគាំទ្រចំណាត់ការរដ្ឋបាលរាជធានី ក្នុងការសម្អាតបែរចិញ្ចឹមត្រី និងផ្ទះមិនរៀបរយនៅតាមដងទន្លេ

ភ្នំពេញ ៖ អនុប្រធានគណបក្សហ៊្វុនស៊ិនប៉ិច និងជានាយកខុទ្ទកាល័យ សម្តេចក្រុមព្រះនរោត្តម រណ ឫទ្ធិព្រះប្រធាន គណបក្សហ៊្វុនស៊ិនប៉ិច ឯកឧត្តម សាយ ហាក់ បានសម្តែងការគាំទ្រពេញទំហឹងចំពោះចំណាត់ការរបស់អាជ្ញាធររាជធានីភ្នំពេញ បោសសំអាត រុះរើបែរចិញ្ចឹមត្រី និងផ្ទះបណ្តែតទឹកអាធិបតេយ្យនៅលើផ្ទៃទឹកទន្លេ ដោយវិធានការនេះ វានឹងធ្វើឲ្យសោភ័ណភាព នៃដងទន្លេនៃរាជធានីភ្នំពេញកាន់តែល្អប្រសើ។ថ្លែងប្រាប់ទូរទស្សន៍BTV ក្រោយរៀបចំពិធីសូត្រមន្ត រាប់បាតថ្វាយព្រះសម្តេចព្រះមហាក្សត្រី នរោត្តម មុនិនាថ សីហនុ ព្រះវររាជមាតាជាតិខ្មែរ ក្នុងសេរីភាព សេចក្តីថ្លៃថ្នូរ និងសុភមង្គលក្នុងឱកាសនៃព្រះរាជពិធីបុណ្យចម្រើនព្រះជន្មរបស់សម្តេចព្រះមហាក្សត្រី ព្រះវររាជមាតាជាតិខ្មែរ គម្រប់៨៥ យាងចូល៨៦ ព្រះវស្សា នាទិវាដ៏នក្ខត្តឫក្ស នាថ្ងៃទី១៧ ខែមិថុនា ឆ្នាំ២០២១នេះ នៅទីស្នាក់ការកណ្តាលគណបក្សហ៊្វុនស៊ិនប៉ិច រាជធានីភ្នំពេញ ឯកឧត្តម សាយ ហាក់ បានលើកឡើងថា ក្នុងនាមគណបក្សហ៊្វុនស៊ិនប៉ិច សូមគាំទ្រទាំងស្រុងចំពោះអាជ្ញាធររាជធានីភ្នំពេញ ដែលបានចាត់វិធានការក្តៅបោសសម្អាត បែរចិញ្ចឹមត្រី ផ្ទះមិនរៀបរយ ដែលភាគច្រើនជាជនបរទេស(វៀតណាម)នេះ។បើតាមរបាយការណ៍របស់នគរបាល ដែលបានបង្ហាញដល់ទូរទស្សន៍BTV នាពេលកន្លងទៅនេះបានអនុវត្តវិធានការរុះរើបែរចិញ្ចឹមត្រី និងផ្ទះបណ្តែតទឹកអាធិបតេយ្យនៅលើផ្ទៃទឹកទន្លេ នៅក្នុងភូមិសាស្ត្រខណ្ឌចំនួន៥ នៃរាជធានីភ្នំពេញ ដែលជាប់នឹងមាត់ទន្លេនោះ កម្លាំងឯកភាពរាជធានីភ្នំពេញបានរុះរើបែរចិញ្ចឹមត្រី និងផ្ទះបណ្តែតទឹកបានជាងមួយពាន់បែរ និងផ្ទះហើយ ខណៈវិធានការនេះបានកំពុងតែបន្តទៀតរហូតឲ្យអស់ពីដងទន្លេ។ក្រោយមានចំណាត់ការរបស់អាជ្ញាធររាជធានភ្នំពេញ មានគណបក្សនយោបាយ បងប្អូនប្រជាពលរដ្ឋខ្មែរភាគច្រើនបានសម្ដែងការគាំទ្រយ៉ាងពេញទំហឹង ខណៈវិធានការនេះ វានឹងធ្វើឲ្យប្រទេសកម្ពុជា ក៏ដូចជាតាមដងទន្លេនៃរាជធានីភ្នំពេញ កាន់តែមានសោភ័ណភាព របៀបរៀបរយបន្ថែមទៀតឲ្យស្របទៅនឹង ពាក្យស្លោកថា រាជធានីភ្នំពេញជាបេះដូងរបស់ប្រទេសជាតិទាំងមូលនោះ៕អត្ថបទ ៖ បាន ចក់

បណ្ដាញសង្គម

ព័ត៌មានថ្មីៗ

អ្នកនាំពាក្យក្រសួងការពារជាតិ៖ កងកម្លាំងកម្ពុជាមិនបានប្រើប្រាស់អាវុធបាញ់ចូលក្នុងទឹកដីថៃដូចការលើកឡើងរបស់ផេកកងទ័ពថៃ និងសារព័ត៌មានថៃ នោះទេ

សម្ដេចតេជោ ហ៊ុន សែន៖ ជំហរកម្ពុជានឹងមិនផ្លាស់ប្តូរទេ ហើយកម្ពុជាក៏មិនធ្វើថោកទៅសុំថៃបើកច្រកព្រំដែននោះដែរ, ថៃអាចបន្តបិទ សូម្បី១០០ឆ្នាំទៀតក៏កម្ពុជាមិនស្លាប់ដែរ

អ៊ីរ៉ង់ និង E3 នឹងបើកកិច្ចចរចាដ៏សំខាន់ ដើម្បីបញ្ចៀសការដាក់ទណ្ឌកម្ម តែឱកាសនៅតែស្ដួចស្ដើង

បាតុករគាំទ្រប៉ាឡេស្ទីន បិទកំពង់ផែទីក្រុង Genoa និងប៉ះង្គិចជាមួយនគរបាល នៅទីក្រុង Milan

មនុស្សយ៉ាងតិច ២នាក់ ស្លាប់ និងជាច្រើននាក់ រងរបួស ក្រោយអគារបាក់រលំ នៅភាគកណ្តាលឥណ្ឌា

នាយករដ្ឋមន្ត្រីអូស្ត្រាលីលើកឡើងពីការសម្លាប់បុគ្គលិកជំនួយក្នុងសុន្ទរកថា ស្តីពីការទទួលស្គាល់ប៉ាឡេស្ទីន

ឧទ្ធម្ភាគចក្រ និងរថយន្ត ស្វែងរក និងជួយសង្គ្រោះអ្នកស្រុកជាប់ក្នុងទឹកជំនន់ នៅអ៊ីតាលី

លោក Trump នឹងជួបក្រុមមន្ត្រីមកពីប្រទេសមូស្លីមភាគច្រើន ដើម្បីពិភាក្សាអំពីតំបន់ហ្កាហ្សា

ជប៉ុនបដិសេធមិនទទួលស្គាល់រដ្ឋប៉ាឡេស្ទីន ក្នុងកិច្ចប្រជុំអង្គការសហប្រជាជាតិ

អ្នកការទូតជាន់ខ្ពស់មកពីអាមេរិក កូរ៉េខាងត្បូង និងជប៉ុន សម្តែងក្ដីបារម្ភ អំពីច្រកសមុទ្រតៃវ៉ាន់

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877

នយោបាយ និង ការអភិវឌ្ឍន៍

ក្រុមការងារចុះជួយស្រុកកណ្តាលស្ទឹង ផ្តល់សម្ភារៈប្រើប្រាស់ដល់គណៈស្រុកសម្រាប់ប្រយុទ្ធនឹងកូវីដ-១៩

ទូតបារាំងវាយតម្លៃយុទ្ធសាស្ត្រដឹកនាំរបស់កម្ពុជា ខុសពីអ្វីដែលអ្នកដទៃមើលមកពីចម្ងាយ

រដ្ឋបាលខេត្តកណ្តាល ប្ដេជ្ញាចាក់វ៉ាក់សាំងកូវីដ-១៩ ជូនកម្មករតាមរោងចក្រឲ្យអស់ក្នុងរយៈពេល១សប្តាហ៍ទៀត

អាជ្ញាធរខេត្តបាត់ដំបងកំពុងរៀបចំតំបន់ទេសចរណ៍ឱ្យសម្បូរបែប និងស្រស់ស្អាតដើម្បីឆក់បេះដូងទេសចរ

តំណាងធនាគារពិភពលោកកោតសរសើរកម្ពុជាចាក់វ៉ាក់សាំងជូនពលរដ្ឋបានជាង៣លាននាក់ ចាត់ទុកជា«ដំណឹងល្អ»

រាជធានីភ្នំពេញទទួលជំនួយសង្គ្រោះបន្ទាន់ជាសាច់ប្រាក់៨០ម៉ឺនដុល្លារពីទីភ្នាក់ងារស្វីស

យុវជនខេត្តកំពង់ចាម កំពុងដើរតួយ៉ាងសំខាន់ចូលរួមទប់ស្កាត់ជំងឺកូវីដ-១៩

ហ៊្វុនស៊ិនប៉ិចគាំទ្រចំណាត់ការរដ្ឋបាលរាជធានី ក្នុងការសម្អាតបែរចិញ្ចឹមត្រី និងផ្ទះមិនរៀបរយនៅតាមដងទន្លេ

បណ្ដាញសង្គម

ព័ត៌មានថ្មីៗ

អាស័យដ្ឋាន

ផែនទី

ទាញយកកម្មវិធី

នយោបាយ​ និង ការអភិវឌ្ឍន៍

ទូត​បារាំង​វាយតម្លៃ​យុទ្ធសាស្ត្រ​ដឹកនាំ​របស់​កម្ពុជា ​ខុសពី​អ្វី​ដែល​អ្នកដទៃ​មើល​មកពី​ចម្ងាយ

រាជធានី​ភ្នំពេញ​ទទួល​ជំនួយ​សង្គ្រោះ​បន្ទាន់​ជា​សាច់ប្រាក់​៨០​ម៉ឺន​ដុល្លារ​ពី​ទីភ្នាក់ងារ​ស្វី​ស​

យុវជន​ខេត្តកំពង់ចាម កំពុង​ដើរតួ​យ៉ាងសំខាន់​ចូលរួម​ទប់ស្កាត់​ជំងឺ​កូ​វីដ​-១៩

បណ្ដាញសង្គម

ព័ត៌មានថ្មីៗ

អាស័យដ្ឋាន

ផែនទី

ទាញយកកម្មវិធី

នយោបាយ និង ការអភិវឌ្ឍន៍

ទូតបារាំងវាយតម្លៃយុទ្ធសាស្ត្រដឹកនាំរបស់កម្ពុជា ខុសពីអ្វីដែលអ្នកដទៃមើលមកពីចម្ងាយ

រាជធានីភ្នំពេញទទួលជំនួយសង្គ្រោះបន្ទាន់ជាសាច់ប្រាក់៨០ម៉ឺនដុល្លារពីទីភ្នាក់ងារស្វីស

យុវជនខេត្តកំពង់ចាម កំពុងដើរតួយ៉ាងសំខាន់ចូលរួមទប់ស្កាត់ជំងឺកូវីដ-១៩