BTV NEWS

គម្រោងស្ពានឆ្លងកាត់ទន្លេបាសាក់ (ចាក់អង្រែក្រោម-ព្រែកប្រា) និងផ្លូវតភ្ជាប់ សម្រេចបាន ៤៥% ហើយ ដែលលឿនជាងផែនការ ៤,១១%

សម្ដេចធិបតី អំពាវនាវដល់ជនរួមជាតិជឿទុកចិត្តលើរាជរដ្ឋាភិបាលដែលកំពុងធ្វើកិច្ចការងារយ៉ាងសកម្មស្វែងរកដំណោះស្រាយបញ្ចប់បញ្ហាព្រំដែនកម្ពុជា-ថៃ ឱ្យបានឆាប់រហ័ស

សម្ដេចធិបតីផ្ដល់អនុសាសន៍៧ចំណុច ដល់ក្រសួង-ស្ថាប័នពាក់ព័ន្ធឱ្យយកចិត្តទុកដាក់ក្នុងឱកាសទិវាអក្ខរកម្មអន្តរជាតិ ៨ កញ្ញា ២០២៥

សម្ដេចធិបតី៖ រាជរដ្ឋាភិបាលប្តេជ្ញាចិត្តយ៉ាងមុតមាំលើកកម្ពស់ការងារអក្ខរកម្ម និងបំពាក់បំប៉ន ជំនាញ និងឱកាសសិក្សាពេញមួយជីវិត ជាពិសេសជំនាញឌីជីថល

នយោបាយ និង ការអភិវឌ្ឍន៍

សម្ដេច ទៀ បាញ់ ចូលរួមកិច្ចប្រជុំរដ្ឋមន្ត្រីការពារជាតិអាស៊ានលើកទី១៥ តាមប្រព័ន្ធវីដេអូ

ភ្នំពេញ ៖ សម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិកម្ពុជា នៅព្រឹកថ្ងៃទី១៥ ខែមិថុនា នេះ បានចូលរួមកិច្ចប្រជុំរដ្ឋមន្ត្រីការពារជាតិអាស៊ានលើកទី១៥ (15th ADMM) កិច្ចប្រជុំរដ្ឋមន្ត្រីការពារជាតិអាស៊ាន-បូក លើកទី៨ (8th ADMM-Plus) និងកិច្ចប្រជុំក្រៅផ្លូវការរដ្ឋមន្ត្រីការពារជាតិអាស៊ាន-ចិន តាមប្រព័ន្ធវីដេអូ ដែលកិច្ចប្រជុំនេះ ប្រទេសព្រុយណេធ្វើជាម្ចាស់ផ្ទះ។សេចក្តីជូនដំណឹងរបស់ក្រសួងការពារជាតិកម្ពុជា បានឲ្យដឹង របៀបវារៈ នៃកិច្ចប្រជុំពីរថ្ងៃ គឺថ្ងៃទី១៥ និង១៦ ខែមិថុនានេះ គឺទី១- នៅក្នុងកិច្ចប្រជុំរដ្ឋមន្ត្រីការពារជាតិអាស៊ាន សម្តេចពិជ័យសេនា ទៀ បាញ់ នឹងចូលរួមអនុម័តឯកសារទស្សនទានចំនួន៤ ក្នុងក្របខ័ណ្ឌកិច្ចប្រជុំរដ្ឋមន្ត្រីការពារជាតិអាស៊ាន និងសេចក្តីប្រកាសបេដាសេរីបេហ្គាវ៉ាន់ ក្នុងការប្រារព្ធខួបលើកទី១៥ របស់រដ្ឋមន្ត្រីការពារជាតិអាស៊ាន ឆ្ពោះទៅកាន់ការត្រៀមជាស្រេចសម្រាប់អនាគត សន្តិភាព និងវិបុលភាពអាស៊ាន។ទី២- នៅក្នុងកិច្ចប្រជុំរដ្ឋមន្ត្រីការពារជាតិអាស៊ាន-បូក លើកទី៨ ប្រមុខការពារជាតិកម្ពុជា នឹងផ្លាស់ប្តូរទស្សនៈ ស្ដីពីបរិយាកាសសន្តិសុខតំបន់ និងអន្តរជាតិ។ ក្នុងពេលនោះ សម្តេចពិជ័យសេនា នឹងចូលរួមអនុម័តសេចក្តីប្រកាសបេដាសេរីបេហ្គាវ៉ាន់ ដោយរដ្ឋមន្ត្រីការពារជាតិអាស៊ាន-បូក ក្នុងការប្រារព្ធខួបលើកទី១៥ របស់រដ្ឋមន្ត្រីការពារជាតិអាស៊ាន ឆ្ពោះទៅកាន់ការត្រៀមជាស្រេចសម្រាប់អនាគតសន្តិភាព និងវិបុលភាពអាស៊ាន។ទី៣- ស្របគ្នានឹងកិច្ចប្រជុំនេះដែរ សម្តេចពិជ័យសេនា ទៀ បាញ់ នឹងចូលរួមកិច្ចប្រជុំក្រៅផ្លូវការរដ្ឋមន្ត្រីការពារជាតិអាស៊ាន-ចិន។ ក្នុងកិច្ចប្រជុំនេះ សម្តេចពិជ័យសេនា ទៀ បាញ់ នឹងផ្លាស់ប្តូរទស្សនៈ ស្តីពីសភាពការណ៍ក្នុងតំបន់ និងអន្តរជាតិផងដែរ ខណៈសភាពការណ៍ទាំងនោះ បាននឹងកំពុងធ្វើឲ្យប្រទេសក្នុងតំបន់ ក៏ដូចជាពិភពលោក ព្រួយបារម្ភយ៉ាងខ្លាំងនោះ៕អត្ថបទ៖ បាន ចក់

សម្តេចតេជោ ផ្ញើសាររំលែកទុក្ខចំពោះគ្រួសារសពទេវនាដនិម្មិត ឯម ធាយ ដែលបានស្លាប់ដោយជរាពាធ

ភ្នំពេញ ៖ សម្តេចតេជោ ហ៊ុន សែន និងថ្នាក់ដឹកនាំជាន់ខ្ពស់មួយចំនួនទៀត បានសម្តែងនូវមរណទុក្ខដ៏ក្រៀមក្រំចំពោះក្រុមគ្រួសារ ទេវនាដនិម្មិត ឯម ធាយ ដែលបានអនិច្ចកម្ម កាលពីថ្ងៃទី ១៥ ខែមិថុនា ឆ្នាំ២០២១ ក្នុងជន្មាយុ ៨៨ឆ្នាំ ដោយជរាពាធ។សម្តេចតេជោ ហ៊ុន សែន បានសម្តែងនូវមរណទុក្ខដ៏ក្រៀមក្រំចំពោះក្រុមគ្រួសារ ឧបាសិកាព្រឹទ្ធសិល្បការិនី សំនៀងពីរោះគន្ធា ទេវនាដនិម្មិត ឯម ធាយ ដែលបានអនិច្ចកម្ម កាលពីយប់ថ្ងៃទី ១៥ ខែមិថុនា ឆ្នាំ២០២១ ក្នុងជន្មាយុ ៨៨ឆ្នាំ ដោយជរាពាធ។ តាមរយៈសាររំលែកទុក្ខនៅថ្ងៃទី ១៥ ខែមិថុនានេះ សម្តេចតេជោ បានបង្ហាញនូវក្តីសោកស្ដាយយ៉ាងនេះថា «ក្នុងវេលាប្រកបដោយសមានទុក្ខនេះ ខ្ញុំនិងភរិយាសូមសម្តែងនូវការសោកស្តាយ ស្រណោះអាឡោះអាល័យ ចំពោះការបាត់បង់ឧបាសិកាព្រឹទ្ធាចារ្យ ទេវនាដនិម្មិត ដែលជាការបាត់បង់នូវម្តាយ ជីដូន ប្រកបដោយព្រហ្មវិហារធម៌មិនចេះរីងស្ងួត និងជាព្រឹទ្ធាចារ្យសិល្បការិនីដ៏ឆ្នើម ដែលជាមរតកមនុស្សរស់ដ៏មានតម្លៃបំផុតនៃរបាំព្រះរាជទ្រព្យ»។ សម្តេចតេជោ បន្តថា ពេញមួយជីវិតរបស់ឧបាសិកាព្រឹទ្ធាចារ្យ ទេវនាដនិម្មិត បានលះបង់ពេលវេលាដ៏មានតម្លៃរួមចំណែក លើកស្ទួយ និងថែរក្សាសិល្បៈវប្បធម៌ដ៏រុងរឿងរបស់ជាតិយើង។ ជាមួយគ្នានេះ ឯកឧត្តម ហ៊ុន ម៉ានី ប្រធានគណៈកម្មការអប់រំ យុវជន និងកីឡា កិច្ចការសាសនា វប្បធម៌ និងទេសចរណ៍នៃរដ្ឋសភា ក៏បានសម្តែងនូវសមានទុក្ខដ៏ក្រៀមក្រំ និងចូលរួមរំលែកទុក្ខជាមួយក្រុមគ្រួសារសពវរព្រឹទ្ធសិល្បការិនី ទេវនាដនិម្មិត ឯម ធាយ ផងដែរ។ តាមរយៈទំព័រហ្វេសប៊ុកផ្លូវការរបស់ឯកឧត្តមនៅថ្ងៃនេះ ឯកឧត្តម ហ៊ុន ម៉ានី ក៏បានចាត់ទុកព្រឹទ្ធាចារ្យ ឯម ធាយ គឺជាតួអង្គដ៏សំខាន់មួយនៃការរស់រានឡើងវិញនៃរបាំបុរាណ ក៏ដូចជាវិស័យសិល្បៈខ្មែរ ក្រោយការដួលរលំនៃរបបប្រល័យពូជសាសន៍។ ឯកឧត្តម បានបន់ស្រន់បែបនេះថា«ខ្ញុំសូមបួងសួងដល់វិញ្ញាណក្ខន្ធទេវនាដនិម្មិត ឯម ធាយ បានយោនយោគក្នុងកាន់ទីស្ថានសុគតិភព កុំបីឃ្លៀងឃ្លាតឡើយ»។សូមបញ្ជាក់ថា ទេវនាដនិមិ្មត ឯម ធាយ បានទទួលមរណភាព នៅវេលាម៉ោង ១២:២០ នាទីយប់ ថ្ងៃអង្គារ ៦កើតខែបឋមាសាឍ ឆ្នាំឆ្លូវ ត្រីស័ក ព.ស ២៥៦៥ ក្នុងជន្មាយុ ៨៨ឆ្នាំ។ ក្រោយពីការទទួលមរណភាពរបស់លោកយាយ ថ្នាក់ដឹកនាំនិងប្រជាពលរដ្ឋខ្មែរជាច្រើនបានសរសេរនៅលើបណ្តាញសង្គមហ្វេសបុករបស់ខ្លួនដោយសម្តែងនូវមរណទុក្ខចំពោះមរណភាពនេះ ដោយពួកគេលើកឡើងដូចៗគ្នាថា ការស្លាប់របស់លោកយាយនេះជាការបាត់បង់នូវធនធានដ៏កម្រមួយក្នុងវិស័យសិល្បៈបុរាណ ហើយបានបួងសួងឲ្យវិញ្ញាណក្ខន្ធលោកយាយបានទៅកាន់ទីឋានសុគតិភព៕អត្ថបទ ៖ បាន ចក់

មន្ត្រីជំនាញ និងអាជ្ញាធរត្រូវកាត់ដីចេញពីបញ្ជីសារពើភណ្ឌជូនពលរដ្ឋ និងមន្ត្រីរាជការឲ្យឆាប់រហ័ស

កំពត ៖ អភិបាលខេត្តកំពត បានជំរុញមន្ត្រីជំនាញ និងអាជ្ញាធរពាក់ព័ន្ធ ឱ្យពិនិត្យវាយតម្លៃឱ្យច្បាស់លាស់ ដើម្បីដោះស្រាយបញ្ចប់បញ្ហាដ៏រ៉ាំរ៉ៃ ឲ្យបានឆាប់រហ័ស ពាក់ព័ន្ធនឹងការសុំកាត់ដីចេញ ពីបញ្ជីសារពើភណ្ឌ របស់រដ្ឋ ដើម្បីចេញប័ណ្ណកម្មសិទ្ធិជូនពលរដ្ឋ និងមន្ត្រីរាជការ ដែលបានកាន់កាប់រស់នៅអាស្រ័យផល ជាយូរឆ្នាំមកហើយ នៅលើដីរបស់រដ្ឋនោះ។នៅខេត្តកំពត នៅសល់៦អង្គភាពទៀត ដែលបានដាក់ពាក្យសុំកាត់ដីចេញពីបញ្ជីសារពើភណ្ឌ របស់រដ្ឋ ដើម្បីចេញប័ណ្ណកម្មសិទ្ធិជូនពលរដ្ឋ និងមន្ត្រីរាជការ ដែលបានកាន់កាប់រស់នៅអាស្រ័យផលជា យូរឆ្នាំមកហើយ នៅលើដីរបស់រដ្ឋ។នៅក្នុងកិច្ចប្រជុំរៀបចំឯកសារការងារកាត់ដីជូនមន្ត្រីរាជការ និងប្រជាពលរដ្ឋ ដែលបានរស់នៅលើ ដីរដ្ឋយូរឆ្នាំ នៅថ្ងៃទី១៤ ខែមិថុនានេះ ឯកឧត្តម ជាវ តាយ អភិបាលខេត្តកំពត បានលើកឡើងថា ការងារ កាត់ដីចេញពីបញ្ជីសារពើភណ្ឌរបស់រដ្ឋ ដើម្បីផ្ដល់ប័ណ្ណកម្មសិទ្ធិស្របច្បាប់ជូនប្រជាពលរដ្ឋ និងមន្ត្រីរាជការ ដែលបានរស់នៅកាន់កាប់អាស្រ័យផលយូរឆ្នាំមកហើយនោះ មានលក្ខណៈស្មុគស្មាញ និងបានអូស បន្លាយមកជាច្រើនឆ្នាំ តាំងពីអាណត្តិអភិបាលខេត្តមុនៗមកម្ល៉េះ។ឯកឧត្ដម បានបញ្ជាក់ថា ប្រមុខរាជរដ្ឋាភិបាល បានចេញនូវសេចក្តីណែនាំ និងលក្ខខណ្ឌច្បាស់ លាស់ណាស់ ដើម្បីជំរុញឱ្យអាជ្ញាធរអនុវត្តការងារកាត់ដីចេញពីបញ្ជីសារពើភណ្ឌជូនដល់ពលរដ្ឋ និងមន្ត្រី រាជការ ដែលខ្វះខាត និងបានរស់នៅអាស្រ័យផលលើដីរដ្ឋជាក់ស្តែងយូរឆ្នាំ (រយៈពេល១០ គិតត្រឹម ឆ្នាំ២០១៥) ។ដើម្បីឲ្យការងារនេះសម្រេចបានឆាប់រហ័ស ឯកឧត្តមអភិបាលខេត្ត បានស្នើឱ្យជំនាញ និងអាជ្ញាធរពាក់ព័ន្ធ រួមគ្នាពិនិត្យពិភាក្សា វាយតម្លៃលើទីតាំងដីនីមួយៗជាក់ស្ដែង ដើម្បីបានជាមូលដ្ឋាន ក្នុងការ រៀបចំឯកសារឱ្យត្រឹមត្រូវ និងគ្រប់គ្រាន់ សម្រាប់ដាក់ពាក្យស្នើសុំកាន់កាប់ ឱ្យស្របតាមនីតិវិធីច្បាប់ រក្សា បាននូវតម្លាភាព បញ្ចៀសបាននូវការកេងប្រវ័ញ្ចទ្រព្យសម្បត្តិរដ្ឋផងដែរ។តាមរបាយការណ៍ មានអង្គភាពចំនួន៦ បានដាក់ពាក្យសុំកាត់ដីចេញពីបញ្ជីសារពើភណ្ឌរបស់រដ្ឋ ជូនប្រជាពលរដ្ឋ និងមន្ត្រីរាជការ សរុប៣០៦គ្រួសារ រួមមាន មន្ទីរអប់រំ យុវជន និងកីឡា ខេត្តកំពត មានចំនួន១១ទីតាំង ស្មើនឹង១៥៥គ្រួសារ។ ២. សង្កាត់ក្រាំងអំពិល ក្រុងកំពត ចំនួន៣កន្លែង ស្មើនឹង៣២គ្រួ សារ។ ៣. រោងចក្រជីហ្វូស្វាត ស្រុកបន្ទាយមាស ១ទីតាំង ស្មើ៩០គ្រួសារ។ ៤. វិទ្យាល័យ ហ៊ុនសែនឈូក ១កន្លែង ស្មើ២០គ្រួសារ។ ៥- អតីតដី និងអគារការិយាល័យពាណិជ្ជកម្ម ស្រុកកំពង់ត្រាច ១កន្លែង ស្នើ ០៨គ្រួសារ និងទី៦- សាលាខេត្តថ្មី អតីតផ្ទះមុខងារខេត្ត ក្នុងក្រុងកំពត ១កន្លែង ស្នើ០១គ្រួសារ៕អត្ថបទ៖ អន សារឹម

ក្រសួងបរិស្ថាន ពិនិត្យគម្រោងស្នើសុំវិនិយោគអភិវឌ្ឍន៍ទេសចរណ៍ធម្មជាតិចំនួន៣កន្លែងនៅខេត្តកោះកុង

កោះកុង ៖ តំណាងក្រសួងបរិស្ថាន លោកអភិបាលរងខេត្តកោះកុង និងក្រុមអ្នកវិនិយោគ បានចុះពិនិត្យវាយតម្លៃអំពីទីតាំងស្នើសុំគម្រោងអភិវឌ្ឍន៍ទេសចរណ៍ធម្មជាតិខ្នាតតូចចំនួន៣កន្លែង ស្ថិតនៅក្នុងដែនជម្រកសត្វព្រៃតាតៃ ក្នុងភូមិសាស្ត្រ សង្កាត់ស្មាច់មានជ័យ ក្រុងខេមរភូមិន្ទ និងឃុំប៉ាក់ខ្លង ស្រុកមណ្ឌលសីមា ។ គម្រោងវិនិយោគផ្នែកវិស័យទេសចរណ៍ចំនួន៣កន្លែងផ្សេងៗនេះ មានទំហំសរុប ២៩,៩៨៤៣ ហិកតា ធ្វើឡើងក្រោមការចុះពិនិត្យដោយផ្ទាល់របស់ឯកឧត្តម ស្រ៊ុន ដារិទ្ធិ រដ្ឋលេខាធិការ នៅរសៀលថ្ងៃទី១៤ ខែមិថុនា នេះ។បើតាមឱ្យដឹងរបស់លោក ហ៊ុន ម៉ារ៉ាឌី មន្ទីរបរិស្ថានខេត្តកោះកុង ចុះពិនិត្យវាយតម្លៃរួមគ្នានៅពេលនេះ គឺក្រសួងគ្រាន់តែផ្តល់ជាគោលការណ៍លើការស្នើសុំរបស់អ្នកវិនិយោគប៉ុណ្ណោះ។ ប៉ុន្តែការសម្រេចយ៉ាងណានោះ អាស្រ័យលើរបាយការណ៍លម្អិតមួយច្បាស់លាស់បន្ថែមទៀត។លោក បានបន្ថែមថា តាមលក្ខខណ្ឌសម្រេចឱ្យវិនិយោគរយៈពេល១៥ឆ្នាំ ក្រោមគោលបំណងអភិវឌ្ឍន៍ផង និងអភិរក្សផង ដោយឡែកសម្រាប់ទំហំប្រាក់វិនិយោគ គឺលោកពុំទាន់មានព័ត៌មានច្បាស់លាស់ណាមួយនោះទេ។លោក អ៊ុក ភ័ក្ត្រា អភិបាលរងខេត្តកោះកុង លើកឡើងថា លោកសុំឱ្យដោះស្រាយផលប៉ះពាល់ និងសំណងនានា ប្រសិនបើការអនុវត្តគម្រោងនេះ បានប៉ះពាល់ដល់ទ្រព្យសម្បត្តិ ឬកម្មសិទ្ធិឯកជន។ បន្តជួយអភិវឌ្ឍន៍ហេដ្ឋារចនាសម្ព័ន្ធ និងការជ្រើសរើសកម្លាំងពលកម្មពីមូលដ្ឋានដែលជាផ្នែកមួយនៃការលើកកម្ពស់កំរិតជីវភាពប្រជាពលរដ្ឋ។អាជ្ញាធរខេត្តកោះកុង សូមឱ្យចូលរួមថែរក្សាបរិស្ថាន ធនធានធម្មជាតិ និងជីវចម្រុះ នៅក្នុង និងក្បែរទីតាំង ស្នើសូមវិនិយោគទេសចរណ៍ធម្មជាតិ ពិសេសគឺការគ្រប់គ្រងសំណល់រឹង រាវនិងសំរាម ព្រមទាំងគោរពតាមគោលការណ៍ណែនាំរបស់រាជរដ្ឋាភិបាល ក្រសួងបរិស្ថាន និងលិខិតបទដ្ឋាននានាដែលបានអនុញ្ញាតឱ្យ៕អត្ថបទ ៖ ឈឹម មករា

សម្តេចពិជ័យសេនា ទៀ បាញ់ បញ្ជាឲ្យស្វែងរកជនដែលយកលុយពីពលរដ្ឋ ពេលចាក់វ៉ាក់សាំងកូវីដ-១៩

ភ្នំពេញ ៖ សម្តេចពិជ័យសេនា ទៀ បាញ់ ឧបនាយករដ្ឋមន្ត្រី និងជារដ្ឋមន្ត្រីក្រសួងការពារជាតិកម្ពុជា បានបញ្ជាឲ្យស្វែងរកបុគ្គល ដែលយកលុយពីបងប្អូនប្រជាពលរដ្ឋ ពេលទៅចាក់ថ្នាំវ៉ាក់សាំងការពារមេរោគកូវីដ-១៩ យកមកផ្ដន្ទាទោសទៅតាមច្បាប់ឲ្យបាន ខណៈការចាក់តាំងពីដើមរហូតមកនេះ រាជរដ្ឋាភិបាលពុំបានឲ្យយកលុយនោះឡើយ ។ថ្លែងប្រាប់អ្នកសារព័ត៌មានក្រោយពី ដឹកនាំកិច្ចប្រជុំបូកសរុបលទ្ធផលយុទ្ធនាការងារចាក់វ៉ាក់សាំងការពារជំងឺកូវីដ-១៩ ជូនប្រជាពលរដ្ឋ កម្មករ-កម្មការិនី និងជនបទរទេស ដែលមានអាយុចាប់ពី១៨ឆ្នាំឡើងទៅនៅខណ្ឌចំនួន៦ ក្នុងភូមិសាស្ត្ររាជធានីភ្នំពេញ និងទីក្រុងតាខ្មៅ នៃខេត្តកណ្ដាល សម្តេចពិជ័យ សេនា ទៀ បាញ់ បានលើកឡើងថា មិនត្រូវលើកលែងឲ្យនោះឡើយ ចំពោះបុគ្គលដែលមានពាក្យចចាមអារ៉ាមថា បានយកលុយពីប្រជាពលរដ្ឋពេលទៅចាក់ថ្នាំវ៉ាក់សាំងការពារមេរោគកូវីដ-១៩នេះ។យ៉ាងណាក៏ដោយសម្តេចពិជ័យសេនា ទៀ បាញ់ បានឲ្យដឹងផងដែរថា រហូតមកដល់ពេលនេះ ក្រុមការងារចាក់វ៉ាក់សាំងការពារមេរោគកូវីដ-១៩ ជូនដល់បងប្អូនប្រជាពលរដ្ឋ នៅក្នុងខណ្ឌចំនួន៦នៃរាជធានីភ្នំពេញ បានចំនួនប្រហែលមួយលាននាក់ហើយ ហើយបន្ទាប់ក្រសួងការពារជាតិនឹងធ្វើការចាក់ជូន បងប្អូនប្រជាពលរដ្ឋនៅខេត្តចំនួន៥បន្តទៀត ដូចជា ខេត្តកំពង់ចាម កំពង់ស្ពឺ តាកែវ ស្វាយរៀង និងខេត្តព្រះសីហនុ ដើម្បីធ្វើយ៉ាងណាពន្លឿនការចាក់ជូនដល់បងប្អូនប្រជាពលរដ្ឋឲ្យបានឆាប់រហ័សបំផុតស្របទៅ តាមការណែនាំរបស់រាជរដ្ឋាភិបាលនោះ។សូមបញ្ជាក់ថា យុទ្ធនាការចាក់វ៉ាក់សាំងការពារជំងឺកូវីដ-១៩ ទ្រង់ទ្រាយធំ ដែលដឹកនាំដោយក្រសួងការពារជាតិ បានធ្វើឡើងកាលពីថ្ងៃទី៣០ ខែមេសា ឆ្នាំ២០២១ កន្លងទៅក្រោមអធិបតីភាពសម្តេចពិជ័យសេនា ទៀ បាញ់។ ក្រោយចាប់ផ្តើមនូវយុទ្ធនាការរហូតមកដល់ពេលនេះការចាក់វ៉ាក់សាំងការពារជំងឺកូវីដ-១៩ លើកទី១ ជូនកងទ័ព, គ្រួសារកងទ័ព និងប្រជាពលរដ្ឋបានចំនួនសរុប ១,៣០៤,២៦១នាក់ ក្នុងនោះ ចាក់នៅតំបន់ក្រហមបានចំនួន៩៩៣,៩០២នាក់ ខណៈចាក់លើកទី២បានចំនួន១,១៤១,៥៥០នាក់នោះ។សម្តេចពិជ័យសេនា ទៀ បាញ់ បានបន្ថែមទៀតថា ក្រុមយោធានឹងធ្វើការចាក់វ៉ាក់សាំងឲ្យ បានលឿនបំផុតដែលអាចធ្វើទៅតាម នៅពេលដែលវ៉ាក់សាំងមានគ្រប់គ្រាន់ ដូចអ្វីដែលថ្នាក់ដឹកនាំបាន លើកឡើងថា «មិនឲ្យវ៉ាក់សាំងដេកក្នុងឃ្លាំង ដោយត្រូវឲ្យវ៉ាក់សាំងជ្រាបចូលក្នុងខ្លួនមនុស្ស ដើម្បីបង្កើត ភាពសាំ»៕អត្ថបទ ៖ បាន ចក់

រដ្ឋបាលខេត្តកណ្តាល បញ្ជាអាជ្ញាធរក្រុងស្រុករុះរើផ្ទះបណ្ដែតទឹក និងបែរចិញ្ចឹមត្រីខុសច្បាប់ចេញពីទន្លេ

កណ្ដាល ៖ រដ្ឋបាលខេត្តកណ្តាល បញ្ជាអោយអាជ្ញាធរមូលដ្ឋាននៅតាមក្រុងស្រុក ដែលមានភូមិសាស្ត្រនៅតាមដងទន្លេនានា ត្រូវចាត់វិធានការតាមនីតិវិធីច្បាប់ និងរុះរើសំណង់បែរចិញ្ចឹមត្រី ផ្ទះបណ្តែតខុសច្បាប់ដោយគ្មានការយោគយល់ ដើម្បីធានារក្សាសោភ័ណភាព សណ្តាប់ធ្នាប់ និងធានារក្សាគុណភាពបរិស្ថានឲ្យបានល្អប្រសើរ។ឯកឧត្តម គង់ សោភ័ណ្ឌ អភិបាលខេត្តកណ្តាល បានថ្លែងប្រាប់BTV នៅថ្ងៃទី១៤ ខែមិថុនានេះ ថា បន្ទាប់ពីអាជ្ញាធររាជធានីភ្នំពេញ បានអនុវត្តន៍វិធានការច្បាប់ លើសំណង់អនាធិបតេយ្យ ផ្ទះបណ្តែតទឹក បែរចិញ្ចឹមត្រីគ្រប់ប្រភេទ នៅតាមមាត់ទន្លេ ក្នុងភូមិសាស្ត្ររាជធានីភ្នំពេញ បានធ្វើឱ្យមានផ្ទះបណ្តែត ទឹក បែរចិញ្ចឹមត្រីខុសច្បាប់មួយចំនួន បានចល័តផ្លាស់ទីចេញពីរាជធានីភ្នំពេញ ទៅក្នុងភូមិសាស្ត្រខេត្តកណ្តាល សម្រាប់បញ្ហានេះ ឯកឧត្តម ក៏បានបញ្ជាអាជ្ញាធរមូលដ្ឋានខ្លួន ត្រូវជំរុញអោយផ្ទះបណ្តែតទឹក បែរចិញ្ចឹមត្រីខុសច្បាប់ទាំងនោះត្រូវចេញអោយផុតពីទឹកដីភូមិសាស្ត្រខេត្តកណ្តាល ខណៈអាជ្ញាធរមូលដ្ឋានខេត្តកណ្តាល បាននិងកំពុងអនុវត្តវិធានការច្បាប់ និងមានការរុះរើផ្ទះបណ្តែតទឹក បែរចិញ្ចឹមត្រីខុសច្បាប់នៅក្នុងដងទន្លេភូមិសាស្ត្រខេត្តកណ្តាល ចេញពីដងទន្លេជាបន្ទាន់ផងដែរ។នៅក្នុងដំណើរចុះត្រួតពិនិត្យផ្ទះបណ្តែតទឹក បែរត្រី ខុសច្បាប់តាមដងទន្លេក្នុងភូមិសាស្ត្រស្រុកកៀនស្វាយ ស្រុកល្វាឯម និងស្រុកលើកដែក នៅថ្ងៃម្សិលមិញនេះ ឯកឧត្តម គង់ សោភ័ណ្ឌ សំគាល់ឃើញថា មានផ្ទះបណ្តែតទឹក បែរចិញ្ចឹមត្រី និងផ្ទះទូកតូចចល័តខុសច្បាប់ភាគច្រើនជាសំណង់របស់បងប្អូនពលរដ្ឋខ្មែរខ្លះ បងប្អូនខ្មែរ-ឥស្លាមខ្លះ និងខ្លះទៀតជាជនជាតិវៀតណាម បានសង់ផ្ទះបណ្តែតទឹកស្នាក់នៅអចិន្ត្រៃយ៍មានប័ណ្ណខៀវស្នាក់នៅស្របច្បាប់ និងខ្លះទៀត រស់នៅលក្ខណៈមិនស្របច្បាប់ ដែលទាមទារត្រូវត្រួតពិនិត្យ និងដោះស្រាយតាមវិធានការច្បាប់។ឯកឧត្តម គង់ សោភ័ណ្ឌ បន្តថា មកដល់ពេលនេះ យើងមិនទាន់ដឹងពីចំនួនសំណង់បែរចិញ្ចឹមត្រី និងផ្ទះបណ្តែតទឹកខុសច្បាប់មានចំនួនប៉ុន្មាននោះទេ ដោយសារក្នុងអំឡុងពេលអាជ្ញាធរកំពុងអនុវត្តច្បាប់នេះ គឺបានធ្វើអោយម្ចាស់បែរចិញ្ចឹមត្រី និងផ្ទះបណ្តែតទឹកទាំងនោះ ធ្វើការចល័តបំលាស់ទីចុះឡើង រត់គេចពីអាជ្ញាធរចុះត្រួតពិនិត្យ។នៅក្នុងដំណើរចុះត្រួតពិនិត្យនោះ ឯកឧត្តម អភិបាលបានបញ្ជាអោយអាជ្ញាធរស្រុកត្រូវចាត់អោយមានកងកម្លាំងយាមល្បាតគ្រប់ពេលវេលា និងហាមមិនមានបែរត្រី ផ្ទះបណ្តែតទឹកចូលចតក្នុងមូលដ្ឋានខ្លួនជាដាច់ខាត ហើយត្រូវគ្រប់គ្រងស្ថិតិបែរត្រី ផ្ទះបណ្តែតទឹក ទាំងចាស់ទាំងថ្មីអោយបានច្បាស់លាស់បំផុត ដើម្បីរៀបចំសណ្តាប់ធ្នាប់តាមដងទន្លេឡើងវិញ សម្រួលដល់ផ្លូវនាវាចរ និងប្រព័ន្ធអេកូឡូហ្ស៊ី ជៀសវាងការខូចខាតធ្ងន់ធ្ងរ ដល់ជីវៈចម្រុះក្នុងទឹក ខូចគុណភាពទឹក បំពុលបរិស្ថាន និង ប៉ះពាល់ដល់សោភ័ណភាពតាមដងទន្លេ និងសុខភាពរបស់ប្រជាពលរដ្ឋដែលបានប្រើប្រាស់ទឹកក្នុងទន្លេជាប្រចាំថ្ងៃផងដែរ៕អត្ថបទ ស៊ុម សុខជា

ឯកអគ្គរដ្ឋទូតឆេក អះអាងពីការខិតខំពង្រឹងពង្រីកទំនាក់ទំនងឱ្យកាន់តែស៊ីជម្រៅជាមួយកម្ពុជា

ភ្នំពេញ ៖ ឯកអគ្គរដ្ឋទូតថ្មី នៃសាធារណរដ្ឋឆេក «ឆេកូ» ត្រូវបានសម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណា ចក្រកម្ពុជា អនុញ្ញាតឱ្យចូលជួបសំដែងការគួរសម នៅវិមានសន្តិភាព នាព្រឹកថ្ងៃទី១៤មិថុនា ដោយនៅក្នុងជំនួបនេះ ឯកអគ្គរដ្ឋទូត បានគោរពជម្រាបជូនសម្តេចតេជោថា ក្នុងរយៈពេលបេសកកម្មការទូតរបស់លោកនៅកម្ពុជា លោកនឹង ខិតខំពង្រឹងពង្រីកទំនាក់ទំនង រវាងប្រទេសទាំងពីរ ឱ្យកាន់តែស៊ីជម្រៅឡើងថែមទៀត។ឯកឧត្តម អ៊ាង សុផល្លែត ជំនួយការផ្ទាល់សម្តេចតេជោ បានប្រាប់ដល់ក្រុមអ្នកសារព័ត៌មានថា នៅក្នុងជំនួបនេះ ឯកឧត្តម Martin Vavra ឯកអគ្គរដ្ឋទូតថ្មី នៃសាធារណរដ្ឋឆេក បានគោរពជម្រាបជូនសម្តេចថា ឆេកគឺតែងតែមាន មនោសញ្ចេតនាខ្ពស់ និងមានភាពជិតស្និទ្ធជាមួយកម្ពុជា។ឯកឧត្តម បានបន្តទៀតថា នៅក្នុងជំនួបនេះ សម្តេចតេជោ បានបញ្ជាក់ថា ពាក់ព័ន្ធនឹងបេសកកម្មការទូត នេះ សម្តេច បានស្នើឱ្យឯកឧត្តមទូតថ្មី យកចិត្តទុកដាក់លើការជំរុញកិច្ចសហប្រតិបត្តិការខាងផ្នែកសេដ្ឋកិច្ច ពាណិជ្ជកម្ម វិនិយោគ និងការអភិវឌ្ឍធនធានមនុស្ស។ សម្តេចតេជោ បានបញ្ជាក់ប្រាប់ឯកអគ្គរដ្ឋទូតឆេកថា កម្ពុជាកំពុងតែជំរុញការចាក់វ៉ាក់សាំងបង្ការជំងឺកូវីដ-១៩ ដែលអាចចាក់បានដល់១០លាននាក់ នៅត្រឹមខែវិច្ឆិកាខាងមុខ៕អត្ថបទ ៖ មុត សុទ្ធ

ក្រសួងឧស្សាហកម្មលើកឡើងពីគម្រោងបង្កើតរោងចក្រប្រព្រឹត្តិកម្មទឹកស្អាតបាក់ខែងទី៣

ភ្នំពេញ ៖ ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានលើកឡើងពីគម្រោងបង្កើតរោងចក្រប្រព្រឹត្តិកម្មទឹកស្អាតបាក់ខែង ទី៣ ដើម្បីឆ្លើយតបទៅនឹងតម្រូវការប្រើប្រាស់ទឹកស្អាតរបស់ប្រជាពលរដ្ឋក្នុងរាជធានីភ្នំពេញ។គម្រោងនេះ ត្រូវបានលើកឡើងដោយ ឯកឧត្តមកិត្តិសេដ្ឋាបណ្ឌិតទេសរដ្ឋមន្ត្រី ចម ប្រសិទ្ធ ជួបលោកជំទាវ Eva Nguyen Binh ឯកអគ្គរដ្ឋទូតបារាំងប្រចាំកម្ពុជា ដែលទើបចប់អាណត្តិ កាលពីសប្តាហ៍មុន នៅទីស្តីការក្រសួង។នៅក្នុងជំនួបនោះ ឯកឧត្ដមកិត្តិសេដ្ឋាបណ្ឌិតទេសរដ្ឋមន្ត្រី ចម ប្រសិទ្ធ បានមានប្រសាសន៍ថា ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ប្រទេសបារាំង តាមរយៈទីភ្នាក់ងារអភិវឌ្ឍបារាំង (AFD) បានដើរតួយ៉ាងសំខាន់លើវិស័យទឹកស្អាត ក្នុងគម្រោងធំៗជាច្រើន ។ ជាក់ស្តែងដូចជារោងចក្រប្រព្រឹត្តកម្មទឹកស្អាតបាក់ខែងទី២ ដែលទើបសម្ពោធបើកការដ្ឋានថ្មីៗនេះ ក្នុងទឹកប្រាក់រាប់រយលានដុល្លារ ដោយសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ។ឯកឧត្តមកិត្តិសេដ្ឋាបណ្ឌិតទេសរដ្ឋមន្ត្រី ចម ប្រសិទ្ធ បានបន្ថែមថា បេសកកម្មរបស់រាជរដ្ឋាភិបាល ក៏ដូចជាទស្សនៈវិស័យរបស់ក្រសួងត្រូវខិតខំរួមគ្នាសម្រេចឲ្យបាននូវគោលដៅអភិវឌ្ឍវិស័យទឹកស្អាតដោយកំណត់ថា នៅឆ្នាំ២០២៥ ទីប្រជុំជនត្រូវមានទឹកស្អាតប្រើប្រាស់ និងឆ្នាំ២០៣០ ប្រជាជននឹងទទួលបានទឹកស្អាតប្រើប្រាស់គ្រប់គ្នា។ ចំណុចនេះឯកឧត្តមកិត្តិសេដ្ឋាបណ្ឌិត បានស្នើឲ្យភាគីបារាំងពិនិត្យលទ្ធភាពវិនិយោគ ឬផ្តល់កម្ចីឥណទានលើវិស័យទឹកស្អាតបន្ថែម និងបន្តបន្ទាប់ទៀត ។ឯកឧត្តមកិត្តិសេដ្ឋាបណ្ឌិតទេសរដ្ឋមន្ត្រី ចម ប្រសិទ្ធ គឺស្នើឲ្យភាគីបារាំងចាប់អារម្មណ៍យកចិត្តទុកដាក់ចំពោះគម្រោងរោងចក្រប្រព្រឹត្តិកម្មទឹកស្អាតបាក់ខែងទី៣ ដើម្បីគិតគូរដោះស្រាយឲ្យបានទាន់ពេលវេលានៃតម្រូវការប្រើប្រាស់ទឹកស្អាតរបស់ប្រជាពលរដ្ឋក្នុងរាជធានីភ្នំពេញ ដែលមានផ្ទៃក្រឡាដីកាន់តែរីកធំឡើង ។លោកជំទាវ Eva Nguyen Binh បានបញ្ជាក់ថា វិស័យទឹកស្អាតជាវិស័យដ៏មានសារៈសំខាន់សម្រាប់មនុស្សគ្រប់រូប ។ ដូច្នេះប្រទេសបារាំង មានការយកចិត្តទុកដាក់លើវិស័យនេះ ហើយច្បាស់ណាស់ការអភិវឌ្ឍន៍គម្រោងទឹកស្អាតរបស់បារាំងនៅកម្ពុជា នឹងនៅតែស្ថិតក្នុងកត្តាអាទិភាពមួយ ។ សូមបញ្ជាក់ថា តម្រូវការទឹកស្អាតនៅរាជធានីភ្នំពេញ និងក្រុងតាខ្មៅ ខេត្តកណ្តាល មានប្រមាណជាង៧០ម៉ឺនម៉ែត្រគូបក្នុងមួយថ្ងៃ។ ប៉ុន្តែការផលិតទឹកស្អាតពីរោងចក្រប្រព្រឹត្តិកម្មទឹកស្អាតមានបរិមាណ ត្រឹមតែ ៦០ម៉ឺនម៉ែត្រគូបក្នុងមួយថ្ងៃ ដែលធ្វើឱ្យការផ្គត់ផ្គង់ទឹកស្អាតនៅតំបន់មួយចំនួនមិនគ្រប់គ្រាន់៕អត្ថបទ ៖ វណ្ណៈ

សម្តេចតេជោ ហ៊ុន សែន ឧបត្ថម្ភថវិកាបន្ថែមដល់បណ្តាខេត្តចំនួន២៤ ចាត់ចែងសម្រាប់ការធ្វើចត្តាឡីស័ក

ភ្នំពេញ ៖ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី បានឧបត្ថម្ភថវិកាបន្ថែមចំនួន២៦៩០លានរៀល (២,៦៩០,០០០,០០០រៀល) ដល់បណ្តាខេត្តនានាចំនួន២៤ក្នុងក៏រួមទាំងខេត្តជាប់ព្រំដែនកម្ពុជា-ថៃ និងវៀតណាមផងដែរ ដើម្បីរៀបចាំចាត់ចែងសម្រាប់ធ្វើចត្តាឡីស័ក ចាប់ពីថ្ងៃទី១៤ ខែមិថុនា រហូតដល់ថ្ងៃទី២០ ខែមិថុនា ឆ្នាំ២០២១។បើយោងតាមការបញ្ជាក់របស់លោកជំទាវ វេជ្ជបណ្ឌិត យក់ សម្បត្តិ រដ្ឋលេខាធិការក្រសួងសុខាភិបាល និងជាប្រធានក្រុមការងារប្រតិបត្តិការបច្ចេកទេស និងផ្គត់ផ្គង់នៃគណៈកម្មការអន្តរក្រសួង ដើម្បីប្រយុទ្ធនឹងជំងឺកូវីដ-១៩ ប្រាប់ BTV ព័ត៌មាន នាព្រឹកថ្ងៃទី១៤ ខែមិថុនា ឆ្នាំ២០២១នេះថា ដោយទទួលបានការយកចិត្តទុកដាក់ខ្ពស់ពីសម្តេចតេជោ ហ៊ុន សែន និងទទួលបានការឧបត្ថម្ភថវិកាបន្ថែម ជូនបណ្តាខេត្តចំនួន២៤ ដូចខាងក្រោម៖១).ខេត្តបាត់ដំបង ទទួលបានថវិកា៤០០លានរៀល / ២).ខេត្តបន្ទាយមានជ័យ ទទួលបានថវិកា២៨០លានរៀល៣).ខេត្តឧត្តរមានជ័យ ទទួលបានថវិកា ៦០លានរៀល / ៤).ខេត្តប៉ៃលិន ទទួលបានថវិកា ៧០លានរៀល៥).ខេត្តកោះកុង ទទួលបានថវិកា ១០លានរៀល / ៦).ខេត្តពោធិ៍សាត់ ទទួលបានថវិកា ២០០លានរៀល៧).ខេត្តព្រះវិហារ ទទួលបានថវិកា ៦០លានរៀល / ៨).ខេត្តកណ្តាល ទទួលបានថវិកា ១៥០លានរៀល៩).ខេត្តស្វាយរៀង ទទួលបានថវិកា ៣០លានរៀល / ១០).ខេត្តព្រៃវែង ទទួលបានថវិកា ២៤០លានរៀល១១).ខេត្តត្បូងឃ្មុំ ទទួលបានថវិកា ១២០លានរៀល / ១២).ខេត្តក្រចេះ ទទួលបានថវិកា ២០លានរៀល១៣).ខេត្តរតនគិរី ទទួលបានថវិកា ២០លានរៀល / ១៤).ខេត្តមណ្ឌលគិរី ទទួលបានថវិកា ១០លានរៀល១៥).ខេត្តកំពត ទទួលបានថវិកា ១០លានរៀល / ១៦).ខេត្តតាកែវ ទទួលបានថវិកា ១១០លានរៀល១៧).ខេត្តកំពង់ចាម ទទួលបានថវិកា ២០០លានរៀល / ១៨).ខេត្តកំពង់ឆ្នាំង ទទួលបានថវិកា ៥០លានរៀល១៩).ខេត្តកែប ទទួលបានថវិកា ៦០លានរៀល / ២០).ខេត្តកំពង់ស្ពឺ ទទួលបានថវិកា ២៧០លានរៀល២១).ខេត្តកំពង់ធំ ទទួលបានថវិកា ១៦០លានរៀល / ២២).ខេត្តស្ទឹងត្រែង ទទួលបានថវិកា ១០លានរៀល២៣).ខេត្តព្រះសីហនុ ទទួលបានថវិកា ៦០លានរៀល / ២៤).ខេត្តសៀមរាប ទទួលបានថវិកា ៩០លានរៀល ខណៈដែលអ្នកកំពុងធ្វើចត្តាឡីស័កទាំង២៤ខេត្តនេះ មានចំនួនសរុប ៩៣៤៦៣នាក់៕អត្ថបទ រដ្ឋា

ទេសរដ្ឋមន្ត្រី លី ធុជ ប្រាប់ឲ្យអាជ្ញាធរមូលដ្ឋាន ត្រូវយកចិត្តទុកដាក់ក្នុងការផ្តល់សេវាសាធារណៈឲ្យកាន់តែប្រសើរឡើងជូនពលរដ្ឋ

ស្វាយរៀង ៖ ឯកឧត្តម ទេសរដ្ឋមន្ត្រី លី ធុជ បានជំរុញឲ្យអាជ្ញាធរមូលដ្ឋានគ្រប់លំដាប់ថ្នាក់ ត្រូវបន្តយកចិត្តទុកដាក់បន្ថែមក្នុងការផ្តល់សេវាសាធារណៈឲ្យកាន់តែប្រសើរឡើង និងចូលរួមជួយសម្រាលបន្ទុកដល់ការលំបាករបស់បងប្អូនប្រជាពលរដ្ឋមូលដ្ឋាន ដោយត្រូវបង្កើនធ្វើសកម្មភាពជាមួយប្រជាពលរដ្ឋ បង្កភាពស្និតស្នាល ផ្សារភ្ជាប់គ្នាដូចជា ៖ មានបុណ្យទាន មានជំងឺ ការសួរសុខទុក្ខ ឬការឧបត្ថម្ភ ជាដើម ជាពិសេសត្រូវបន្តលើកកម្ពស់អនុវត្តគោលនយោបាយរបស់រាជរដ្ឋាភិបាល។ឯកឧត្តម ទេសរដ្ឋមន្ត្រី លី ធុជ លី ធុជ ប្រធានក្រុមការងាររាជរដ្ឋាភិបាលចុះមូលដ្ឋានក្រុងបាវិត ថ្លែងបែបនេះ ក្នុងពិធីប្រកាសទទួលស្គាល់ក្រុមការងាររាជរដ្ឋាភិបាលចុះមូលដ្ឋាននៅក្រុងបាវិត ខេត្តស្វាយរៀង ទទួលបន្ទុកតាមសង្កាត់ទាំង៥ នៅព្រឹកថ្ងៃទី១២ ខែមិថុនា ឆ្នាំ២០២១។ ក្នុងនាមលោកជំទាវកិត្តិសង្គហបណ្ឌិត ម៉ែន សំអន ឧបនាយករដ្ឋមន្ត្រី និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តស្វាយរៀង ឯកឧត្តម ទេសរដ្ឋមន្ត្រី បានលើកឡើងអំពីតួនាទីភារកិច្ចមួយចំនួនរបស់ក្រុមការងាររាជរដ្ឋាភិបាល ក្នុងការពង្រឹងទំនាក់ទំនងផ្សារភ្ជាប់រវាងរដ្ឋាភិបាលជាមួយប្រជាពលរដ្ឋគ្រប់មជ្ឈដ្ឋាន នៅតាមមូលដ្ឋាន ព្រមទាំងបានជំរុញលើកទឹកចិត្តឲ្យក្រុមការងារ បន្តបង្កើនសកម្មភាពចុះមូលដ្ឋាន ដើម្បីស្វែងយល់សុខទុក្ខជុំវិញជីវភាពប្រចាំថ្ងៃរបស់ប្រជាពលរដ្ឋតាមមូលដ្ឋាននានា សំដៅចូលរួមដោះស្រាយបញ្ហាប្រឈម សំណើសំណូមពរនានារបស់ប្រជាពលរដ្ឋ ឲ្យបានសមស្រប និងទាន់ពេលវេលាផងដែរ។ឯកឧត្តម ទេសរដ្ឋមន្ត្រី លី ធុជ បានបន្តលើកឡើងថា ចាប់ពីពេលរាជរដ្ឋាភិបាលកម្ពុជា ក្រោមការដឹកនាំដ៏ខ្ពង់ខ្ពស់បំផុតរបស់ សម្តេចតេជោ នាយករដ្ឋមន្ត្រី បានបង្កើតឲ្យមានក្រុមការងារថ្នាក់ជាតិចុះជួយរាជធានីខេត្ត និងក្រុមការងារថ្នាក់ខេត្តចុះជួយក្រុង ស្រុក ឃុំ សង្កាត់មក គឺបានដំណើរការធ្វើវេទិកាសាធារណៈនៅគ្រប់មូលដ្ឋានភូមិ ឃុំ សង្កាត់ ដើម្បីក្តាប់ស្ថានភាព បញ្ហាប្រឈមរបស់ប្រជាពលរដ្ឋ ដើម្បីដោះស្រាយនូវបញ្ហាមិនពេញចិត្ត និងការឆ្លើយតបតាមតម្រូវការជាក់ស្តែងរបស់ប្រជាពលរដ្ឋមូលដ្ឋានបានទាន់ពេលវេលា ជាពិសេសទៅទៀតបានធ្វើការផ្សព្វផ្សាយយ៉ាងទូលំទូលាយអំពីកម្មវិធីនយោបាយ និងយុទ្ធសាស្ត្រចតុកោណដំណាក់កាលទី០៤ របស់រាជរដ្ឋាភិបាលដល់គ្រប់មជ្ឈដ្ឋានដូចជា៖ ប្រជាពលរដ្ឋ មន្ត្រីរាជការ គ្រូបង្រៀន អង្គការមិនមែនរដ្ឋាភិបាល និងសង្គមស៊ីវិល បានយល់ដឹងស៊ីជម្រៅកាន់តែច្បាស់ថែមទៀត។ក្នុងឱកាសនោះ ឯកឧត្តម ទេសរដ្ឋមន្ត្រី លី ធុជ បានថ្លែងអំណរគុណ និងវាយតម្លៃខ្ពស់ចំពោះសមាជិក សមាជិកា ក្រុមការងារ នាពេលកន្លងមក ដែលតែងតែយកចិត្តទុកដាក់ គាំទ្រ និងជំរុញលើកទឹកចិត្តដល់មន្ត្រីរាជការ និងកងកម្លាំងប្រដាប់អាវុធ ក្នុងការបំពេញភារកិច្ចបម្រើប្រជាពលរដ្ឋមូលដ្ឋាន ឆ្លើយតបនឹងគុណបំណាច់ដែលពួកគាត់បានផ្តល់សេចក្តីទុកចិត្ត តាមរយៈការបោះឆ្នោតនាពេលកន្លងមកនេះ ក៏ដូចជាឆ្លើយតបទៅនឹងគោលនយោបាយយុទ្ធសាស្ត្រចតុកោណដំណាក់កាលទី៤ និងការសម្រេចបានតាមកម្មវិធីនយោបាយរបស់រាជរដ្ឋាភិបាលដំណាក់កាលទី៦ នៃរដ្ឋសភា៕

បណ្ដាញសង្គម

ព័ត៌មានថ្មីៗ

អ្នកនាំពាក្យក្រសួងការពារជាតិ៖ កងកម្លាំងកម្ពុជាមិនបានប្រើប្រាស់អាវុធបាញ់ចូលក្នុងទឹកដីថៃដូចការលើកឡើងរបស់ផេកកងទ័ពថៃ និងសារព័ត៌មានថៃ នោះទេ

សម្ដេចតេជោ ហ៊ុន សែន៖ ជំហរកម្ពុជានឹងមិនផ្លាស់ប្តូរទេ ហើយកម្ពុជាក៏មិនធ្វើថោកទៅសុំថៃបើកច្រកព្រំដែននោះដែរ, ថៃអាចបន្តបិទ សូម្បី១០០ឆ្នាំទៀតក៏កម្ពុជាមិនស្លាប់ដែរ

អ៊ីរ៉ង់ និង E3 នឹងបើកកិច្ចចរចាដ៏សំខាន់ ដើម្បីបញ្ចៀសការដាក់ទណ្ឌកម្ម តែឱកាសនៅតែស្ដួចស្ដើង

បាតុករគាំទ្រប៉ាឡេស្ទីន បិទកំពង់ផែទីក្រុង Genoa និងប៉ះង្គិចជាមួយនគរបាល នៅទីក្រុង Milan

មនុស្សយ៉ាងតិច ២នាក់ ស្លាប់ និងជាច្រើននាក់ រងរបួស ក្រោយអគារបាក់រលំ នៅភាគកណ្តាលឥណ្ឌា

នាយករដ្ឋមន្ត្រីអូស្ត្រាលីលើកឡើងពីការសម្លាប់បុគ្គលិកជំនួយក្នុងសុន្ទរកថា ស្តីពីការទទួលស្គាល់ប៉ាឡេស្ទីន

ឧទ្ធម្ភាគចក្រ និងរថយន្ត ស្វែងរក និងជួយសង្គ្រោះអ្នកស្រុកជាប់ក្នុងទឹកជំនន់ នៅអ៊ីតាលី

លោក Trump នឹងជួបក្រុមមន្ត្រីមកពីប្រទេសមូស្លីមភាគច្រើន ដើម្បីពិភាក្សាអំពីតំបន់ហ្កាហ្សា

ជប៉ុនបដិសេធមិនទទួលស្គាល់រដ្ឋប៉ាឡេស្ទីន ក្នុងកិច្ចប្រជុំអង្គការសហប្រជាជាតិ

អ្នកការទូតជាន់ខ្ពស់មកពីអាមេរិក កូរ៉េខាងត្បូង និងជប៉ុន សម្តែងក្ដីបារម្ភ អំពីច្រកសមុទ្រតៃវ៉ាន់

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877

នយោបាយ និង ការអភិវឌ្ឍន៍

សម្ដេច ទៀ បាញ់ ចូលរួមកិច្ចប្រជុំរដ្ឋមន្ត្រីការពារជាតិអាស៊ានលើកទី១៥ តាមប្រព័ន្ធវីដេអូ

សម្តេចតេជោ ផ្ញើសាររំលែកទុក្ខចំពោះគ្រួសារសពទេវនាដនិម្មិត ឯម ធាយ ដែលបានស្លាប់ដោយជរាពាធ

មន្ត្រីជំនាញ និងអាជ្ញាធរត្រូវកាត់ដីចេញពីបញ្ជីសារពើភណ្ឌជូនពលរដ្ឋ និងមន្ត្រីរាជការឲ្យឆាប់រហ័ស

ក្រសួងបរិស្ថាន ពិនិត្យគម្រោងស្នើសុំវិនិយោគអភិវឌ្ឍន៍ទេសចរណ៍ធម្មជាតិចំនួន៣កន្លែងនៅខេត្តកោះកុង

សម្តេចពិជ័យសេនា ទៀ បាញ់ បញ្ជាឲ្យស្វែងរកជនដែលយកលុយពីពលរដ្ឋ ពេលចាក់វ៉ាក់សាំងកូវីដ-១៩

រដ្ឋបាលខេត្តកណ្តាល បញ្ជាអាជ្ញាធរក្រុងស្រុករុះរើផ្ទះបណ្ដែតទឹក និងបែរចិញ្ចឹមត្រីខុសច្បាប់ចេញពីទន្លេ

ឯកអគ្គរដ្ឋទូតឆេក អះអាងពីការខិតខំពង្រឹងពង្រីកទំនាក់ទំនងឱ្យកាន់តែស៊ីជម្រៅជាមួយកម្ពុជា

ក្រសួងឧស្សាហកម្មលើកឡើងពីគម្រោងបង្កើតរោងចក្រប្រព្រឹត្តិកម្មទឹកស្អាតបាក់ខែងទី៣

សម្តេចតេជោ ហ៊ុន សែន ឧបត្ថម្ភថវិកាបន្ថែមដល់បណ្តាខេត្តចំនួន២៤ ចាត់ចែងសម្រាប់ការធ្វើចត្តាឡីស័ក

បណ្ដាញសង្គម

ព័ត៌មានថ្មីៗ

អាស័យដ្ឋាន

ផែនទី

ទាញយកកម្មវិធី

នយោបាយ​ និង ការអភិវឌ្ឍន៍

សម្ដេច ទៀ បាញ់ ចូលរួម​កិច្ចប្រជុំ​រដ្ឋមន្ត្រី​ការពារជាតិ​អាស៊ាន​លើក​ទី​១៥​ តាម​ប្រព័ន្ធ​វីដេអូ​

សម្តេច​តេ​ជោ ​ផ្ញើ​សារ​រំលែក​ទុក្ខ​ចំពោះ​គ្រួសារ​សព​ទេវ​នាដ​និម្មិត ឯម ធា​យ​ ដែល​បាន​ស្លាប់​ដោយ​ជរាពាធ

សម្តេច​ពិជ័យ​សេនា​ ទៀ បាញ់ បញ្ជា​ឲ្យ​ស្វែងរក​ជន​ដែល​យក​លុយ​ពី​ពលរដ្ឋ​ ពេល​ចាក់​វ៉ាក់សាំង​កូ​វីដ-១៩

ឯកអគ្គរដ្ឋទូត​ឆេ​ក អះអាង​ពី​ការ​ខិតខំ​ពង្រឹង​ពង្រីក​ទំនាក់ទំនង​ឱ្យ​កាន់តែ​ស៊ីជម្រៅ​ជាមួយ​កម្ពុជា​

ក្រសួង​ឧស្សាហកម្ម​លើកឡើង​ពី​គម្រោង​បង្កើត​រោងចក្រ​ប្រព្រឹត្តិកម្ម​ទឹកស្អាត​បាក់​ខែង​ទី​៣

បណ្ដាញសង្គម

ព័ត៌មានថ្មីៗ

អាស័យដ្ឋាន

ផែនទី

ទាញយកកម្មវិធី

នយោបាយ និង ការអភិវឌ្ឍន៍

សម្ដេច ទៀ បាញ់ ចូលរួមកិច្ចប្រជុំរដ្ឋមន្ត្រីការពារជាតិអាស៊ានលើកទី១៥ តាមប្រព័ន្ធវីដេអូ

សម្តេចតេជោ ផ្ញើសាររំលែកទុក្ខចំពោះគ្រួសារសពទេវនាដនិម្មិត ឯម ធាយ ដែលបានស្លាប់ដោយជរាពាធ

សម្តេចពិជ័យសេនា ទៀ បាញ់ បញ្ជាឲ្យស្វែងរកជនដែលយកលុយពីពលរដ្ឋ ពេលចាក់វ៉ាក់សាំងកូវីដ-១៩

ឯកអគ្គរដ្ឋទូតឆេក អះអាងពីការខិតខំពង្រឹងពង្រីកទំនាក់ទំនងឱ្យកាន់តែស៊ីជម្រៅជាមួយកម្ពុជា

ក្រសួងឧស្សាហកម្មលើកឡើងពីគម្រោងបង្កើតរោងចក្រប្រព្រឹត្តិកម្មទឹកស្អាតបាក់ខែងទី៣