BTV NEWS

គម្រោងស្ពានឆ្លងកាត់ទន្លេបាសាក់ (ចាក់អង្រែក្រោម-ព្រែកប្រា) និងផ្លូវតភ្ជាប់ សម្រេចបាន ៤៥% ហើយ ដែលលឿនជាងផែនការ ៤,១១%

សម្ដេចធិបតី អំពាវនាវដល់ជនរួមជាតិជឿទុកចិត្តលើរាជរដ្ឋាភិបាលដែលកំពុងធ្វើកិច្ចការងារយ៉ាងសកម្មស្វែងរកដំណោះស្រាយបញ្ចប់បញ្ហាព្រំដែនកម្ពុជា-ថៃ ឱ្យបានឆាប់រហ័ស

សម្ដេចធិបតីផ្ដល់អនុសាសន៍៧ចំណុច ដល់ក្រសួង-ស្ថាប័នពាក់ព័ន្ធឱ្យយកចិត្តទុកដាក់ក្នុងឱកាសទិវាអក្ខរកម្មអន្តរជាតិ ៨ កញ្ញា ២០២៥

សម្ដេចធិបតី៖ រាជរដ្ឋាភិបាលប្តេជ្ញាចិត្តយ៉ាងមុតមាំលើកកម្ពស់ការងារអក្ខរកម្ម និងបំពាក់បំប៉ន ជំនាញ និងឱកាសសិក្សាពេញមួយជីវិត ជាពិសេសជំនាញឌីជីថល

នយោបាយ និង ការអភិវឌ្ឍន៍

ចិនបន្តផ្តល់សព្វាវុធការពារអាកាសបន្ថែមដល់ក្រសួងការពារជាតិកម្ពុជា

ភ្នំពេញ ៖ រដ្ឋាភិបាលនៃសាធារណរដ្ឋប្រជាមានិតចិន តាមរយៈក្រសួងការពារជាតិរបស់ខ្លួន បានផ្តល់នូវសព្វាវុធ ការពារអាកាសបន្ថែមទៀតដល់ក្រសួងការពារជាតិកម្ពុជា ដើម្បីពង្រឹង និងលើកកម្ពស់សមត្ថភាពនូវវិស័យការពារជាតិកម្ពុជា ឲ្យកាន់តែមានប្រសិទ្ធភាពបន្ថែមទៀត ទាំងយុទ្ធោបករណ៍ និងធនធានមនុស្ស។យោងតាមខ្លឹមសារនៃកិច្ចប្រជុំពិភាក្សាការងារពាក់ព័ន្ធការរៀបចំ កសាងផែនការការគ្រប់គ្រងប្រព័ន្ធសព្វាវុធការពារអាកាស នៅទីស្តីការគណៈរដ្ឋមន្ត្រី នាថ្ងៃទី១០ខែមិថុនា ឆ្នាំ២០២១ ដែលកិច្ចប្រជុំនេះ បានប្រព្រឹត្តទៅក្រោមអធិបតីភាព សម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ បានឲ្យដឹងថា ខណៈដែលរដ្ឋាភិបាលចិនបន្តផ្តល់នូវសព្វាវុធការពារអាកាសបន្ថែមដល់កម្ពុជានោះ កងទ័ពនៅក្នុងអង្គភាពទាំងអស់ត្រូវតែខិតខំហ្វឹកហ្វឺនជំនាញបន្ថែមក្នុងការប្រើប្រាស់នូវបច្ចេកទេសថ្មី ទាំងនោះ។នៅក្នុងកិច្ចប្រជុំនោះ សម្តេចពិជ័យសេនា ទៀ បាញ់ បានលើកឡើងថា ការគ្រប់គ្រង ការថែទាំបច្ចេកទេសសម្ភារៈគ្រឿងបំពាក់ប្រព័ន្ធការពារអាកាសដែលបម្រើឲ្យវិស័យការពារជាតិ នៃព្រះរាជាណាចក្រកម្ពុជា ទាំងគ្រឿងបំពាក់ចាស់ និងថ្មីវាជាការចាំបាច់បំផុត ដូច្នេះមន្ត្រីជំនាញទាំងអស់ត្រូវតែខិតខំបន្ថែមទៀតនូវការប្រើប្រាស់វា និងថែទាំវាឲ្យបានល្អយូរអង្វែងនោះ។សម្តេចពិជ័យសេនាទៀ បាញ់ បានថ្លែងទៀតថា សម្ភារៈដែលជាជំនួយរបស់ប្រទេសជាមិត្តផ្តល់ ជូនដល់កងយោធពលខេមរភូមិន្ទនេះ ត្រូវរៀបចំទីតាំងដាក់វាឲ្យបានល្អ ដើម្បីបំរើឲ្យកិច្ចការការពារអធិបតេយ្យ បូរណភាពទឹកដី ដែនទឹក ដែនកោះ នៃព្រះរាជាណាចក្រកម្ពុជា ទៅថ្ងៃអនាគតអោយបានគង់វង្ស។ក្រៅពីការពិភាក្សាការងាររៀបចំកសាងផែនការការគ្រប់គ្រងប្រព័ន្ធសព្វាវុធការពារអាកាស សម្តេចពិជ័យសេនា ទៀ បាញ់ ក៏បានធ្វើការពិភាក្សាអំពីការងារហ្វឹកហ្វឺនជំនាញការពារអាកាស ទាំងការបញ្ជូនសិក្ខាកាមទៅសិក្សា នៅក្រៅប្រទេស និង ការហ្វឹកហ្វឺនក្នុងប្រទេស ដោយផ្តោតទៅលើការបណ្តុះបណ្តាលគ្រូយោធាចារ្យជំនាញការពារអាកាស ដើម្បីបន្តហ្វឹកហ្វឺនជំនាញការពារអាកាស ដល់ យោធិនកម្ពុជា បន្តទៅថ្ងៃខាងមុខមុខផងដែរ។យ៉ាងណាក៏ដោយសម្តេចពិជ័យសេនា ទៀ បាញ់ បានវាយតម្លៃខ្ពស់ចំពោះជំនាញការពារអាកាស ដែល កងយោធពលខេមរភូមិន្ទ បានខិតខំបំពេញភារកិច្ចកន្លងមកជូនប្រទេសជាតិ ហើយតាមរយៈកិច្ចប្រជុំនេះ សម្តេចពិជ័យសេនា ទៀ បាញ់ បានបន្តជំរុញឲ្យអង្គភាពជំនាញ និង បណ្តាអង្គភាពមានការពាក់ព័ន្ធត្រូវបន្តយកចិត្តទុកដាក់លើការងារហ្វឹកហ្វឺនជំនាញ និង បច្ចេកទេស បន្តទៀតខណៈសម្ភារៈថ្មីដែលប្រទេសជាមិត្តបានផ្តល់ឲ្យកម្ពុជាមកជាបន្តបន្ទាប់នោះ។ ជាងនេះទៅទៀតសម្តេចពិជ័យសេនា ទៀ បាញ់ ក៏បានជំរុញឲ្យកងទ័ពទាំងអស់បន្តយកចិត្តទុកដាក់លើការងារថែទាំបច្ចេកទេស ការគ្រប់គ្រង រៀបចំទុកដាក់នូវរាល់សម្ភារៈ គ្រឿងបំពាក់ទាំងនេះ ដោយត្រូវ ធ្វើការគ្រប់គ្រង ថែរក្សា អោយបានគង់វង្ស ដើម្បីបំរើអោយវិស័យការពារជាតិកម្ពុជាកាន់តែល្អប្រសើបន្ថែមទៀតនោះ៕អត្ថបទ ៖ បាន ចក់

អាជ្ញាធរជាតិអប្សរា បញ្ចប់គម្រោងជួសជុលបណ្ណាល័យខាងត្បូងប្រាសាទព្រះខ័ន

សៀមរាប ៖ បណ្ណាល័យខាងត្បូង នៃប្រាសាទព្រះខ័ន បានបញ្ចប់ការជួសជុលនៅក្នុងខែឧសភា ឆ្នាំ២០២១កន្លងទៅ ។ នេះបើតាមការឲ្យដឹងពីលោក ជា សារិទ្ធ បុរាណវិទូ នៃនាយកដ្ឋានអភិរក្សប្រាសាទក្នុងឧទ្យានអង្គរ និងបុរាណវិទ្យាបង្ការ និងជាប្រធានគម្រោងនៅថ្ងៃនេះ។លោក បានឱ្យដឹងទៀតថា បណ្ណាល័យនេះ មានសភាពទ្រុឌទ្រោម ហើយទ្រេតខ្លាំងទៅជ្រុងខាងត្បូង ដោយសារគ្រឹះចុះខ្សោយ និងដើមស្ពង់ធំដុះពីលើដំបូលធ្វើឱ្យប្រេះស្រាំ បើកចំហរធំចាប់ពីផ្នែកដំបូលរហូតដល់ខឿន ដែលអាចប្រឈមនឹងការដួលរលំ។បុរាណវិទូរូបនេះ បញ្ជាក់ថា ចាប់តាំងពីខែសីហា ឆ្នាំ២០២០ រហូតដល់ខែឧសភា ឆ្នាំ២០២១នេះ អាជ្ញាធរជាតិអប្សរា បានសហការជាមួយអង្គការមូលនិធិប្រាសាទពិភពលោក World Monuments Fund (WMF) ធ្វើសម្រង់ប្លង់និងសិក្សាយ៉ាងម៉ត់ចត់ពីស្ថានភាពគ្រោះថ្នាក់ រួមទាំងការធ្វើកំណាយបុរាណវិទ្យា ដើម្បីពិនិត្យស្ថានភាពគ្រឹះរបស់ប្រាសាទ។ គម្រោងនេះ ប្រើរយៈពេលប្រហែល១៥ខែ ត្រូវរុះរើថ្ម ជួសជុលពង្រឹងគ្រឹះ និងរៀបផ្គុំតាមផ្នែកដែលខូចខាតឡើងវិញ។ក្រោយពេលបញ្ចប់ការជួសជុលបណ្ណាល័យខាងត្បូងនៃប្រាសាទព្រះខ័នរួចរាល់ អាជ្ញាធរជាតិអប្សរា មានផែនការជួសជុលខ្លោងទ្វារខាងកើតនៃអគារព្រះឥសូរ និងជួសជុលកំពង់ទឹកនៅខាងកើតព្រះខ័ន។ ក្រៅពីនោះ អាជ្ញាធរជាតិអប្សរាសហការជាមួយអង្គការមូលនិធិប្រាសាទពិភពលោកលើគម្រោងធ្វើផែនទីហានិភ័យ ដើម្បីកំណត់ទីតាំងដែលប្រឈមនឹងគ្រោះថ្នាក់ និងកំណត់គោលដៅជួសជុលនៅកន្លែងអាទិភាព៕អត្ថបទ ៖ ឈិត សាវី

កម្ពុជា-ហ្វីលីពីន បង្ហាញកិច្ចសហការអភិវឌ្ឍន៍ទេសចរណ៍រួមគ្នា ក្រោយស្ថានការណ៍កូវីដ-១៩ បានធូរស្រាល

ភ្នំពេញ ៖ នៅល្ងាចថ្ងៃទី៩ខែមិថុនា ម្សិលមិញនេះ ឯកឧត្តម ថោង ខុន រដ្ឋមន្ត្រីក្រសួងទេសចរណ៍ បានទទួលជួបសវនាការជាមួយលោកជំទាវ Maria Amelita C. Aquino ឯកអគ្គរដ្ឋទូតវិសមញ្ញ និងពេញសមត្ថភាពប្រទេសហ្វីលីពីនថ្មី ប្រចាំនៅកម្ពុជា ។ ភាគីទាំងពីរបានដោះដូរយោបល់គ្នា អំពីស្ថានការណ៍ទេសចរណ៍ដ៏លំបាកក្នុងអំឡុងកូវីដ-១៩ និង កិច្ចសហប្រតិបត្តិការអភិវឌ្ឍទេសចរណ៍ ក្នុងតំបន់អាស៊ាន។ឯកឧត្តម រដ្ឋមន្ត្រី ថោង ខុន បានជម្រាបជំទាវអគ្គរដ្ឋទូតហ្វីលីពីនថ្មីថា វិស័យទេសចរណ៍ក្នុងអំឡុងរងការផលប៉ះពាល់នៃវិបត្តិកូវីដ-១៩ ចុងក្រោយនេះ ក្រសួងទេសចរណ៍ កំពុងសហការជាមួយក្រសួងសុខាភិបាល គិតគូររៀបចំបើកទេសចរណ៍ឡើងវិញ នៅពេលស្ថានការណ៍កូវីដ-១៩ អនុញ្ញាត។នៅក្រោយជំនួបនេះ ឯកឧត្តម ទ្រី ឈីវ ទីប្រឹក្សាក្រសួងទេសចរណ៍ ក៏បានថ្លែងថា ជាការគិតគូរបើកវិស័យទេសចរណ៍ឡើងវិញនេះ ស្របតាមផែនទីចង្អុលផ្លូវស្ដីពីការលើកស្ទួយ និងស្ដារឡើងវិញ នៃវិស័យទេសចរណ៍កម្ពុជា ក្នុងអំឡុង និងក្រោយវិបត្តិកូវីដ-១៩ ដែលរាជរដ្ឋាភិបាលបានអនុម័ត នោះជំហ៊ានទី១ ជំរុញបើកដំណើរការទេសចរណ៍ក្នុងស្រុកឡើងវិញ ស្របតាមស្ថានការណ៍កូវីដ-១៩ និងជំហ៊ានទី២ ពិភាក្សាជាមួយក្រសួងសុខាភិបាល បើកទទួលយកទេសចរអន្តរជាតិដែលបានចាក់វ៉ាក់សាំងពេញលេញ ពីប្រទេសដែលមានហានិភ័យទាមនៃការចម្លងកូវីដ-១៩ មកកម្សាន្តតំបន់គោលដៅទេសចរណ៍កម្ពុជា ដែលមានសុវត្ថិភាព។ទោះយ៉ាងណាក៏ដោយ ឯកឧត្តម ទ្រី ឈីវ បន្តថា ការទទួលយកភ្ញៀវទេសចរអន្តរជាតិចាក់វ៉ាក់សាំងមកទស្សនាកម្ពុជានោះ គឺអាស្រ័យលើស្ថានការណ៍កូវីដ-១៩។ ទាក់ទងនឹងកិច្ចសហប្រតិបត្តិការទេសចរណ៍អាស៊ាន ឯកឧត្ដម ថោង ខុន ក៏បានជម្រាបជូនលោកជំទាវអគ្គរដ្ឋទូតផងដែរថា ៖ តាមរយៈកិច្ចប្រជុំទេសចរណ៍អាស៊ានតាមប្រព័ន្ធ Video Conference នានាដែលកម្ពុជា បានធ្វើប្រធាននៃកិច្ចប្រជុំកន្លងមក គឺរដ្ឋមន្ត្រីទេសចរណ៍អាស៊ាន ក៏បានគាំទ្រការបើកទទួលទេសចរចាក់វ៉ាក់សាំងមកទស្សនាក្នុងតំបន់ផងដែរ។លោកជំទាវ Maria Amelita C. Aquino ក៏បានគាំទ្រកម្ពុជា លើគំនិតផ្ដួចផ្ដើមបើកវិស័យទេសចរណ៍ឡើងវិញ ដោយមានផែនទី ចង្អុលផ្លូវច្បាស់លាស់។ លោកជំទាវ ក៏បានគាំទ្រគំនិត និងការគិតគូរ របស់កម្ពុជា ក្នុងការរៀបចំវេទិកាទេសចរណ៍អាស៊ានឆ្នាំ២០២២ និងបន្តការគាំទ្រគ្នាទៅវិញទៅលើការជំរុញ ចលនាភ្ញៀវទេសចរចាក់វ៉ាក់សាំង និងទាក់ទាញទេសចរហ្វីលីពីនមកទស្សនាកម្ពុជា ខណៈទេសចរធ្លាប់មកទស្សនាកម្ពុជា ក៏កោតសរសើរកម្ពុជាពិតជាមានតំបន់ទេសចរណ៍ ប្រកបដោយភាពទាក់ទាញដ៏ច្រើន និងមានភាពសម្បូរ បែប ហើយលោកជំទាវនឹងខិតខំបង្កើនកិច្ចសហប្រតិបត្តិការទេសចរណ៍តទៅទៀត៕អត្ថបទ ស៊ុម សុខជា

ពលរដ្ឋខណ្ឌជ្រោយចង្វារអរគុណរាជរដ្ឋាភិបាលស្វះស្វែងរកវ៉ាក់សាំងការពារកូវីដ-១៩ ចាក់ជូនពលរដ្ឋគ្រប់ៗគ្នា

ភ្នំពេញ ៖ ប្រជាពលរដ្ឋទូទៅ ចាស់ជរា យុវជន រស់នៅខណ្ឌជ្រោយចង្វារ ថ្លែងអំណរគុណប្រមុខរាជរដ្ឋាភិបាល ក្រសួងសុខាភិបាល និងលោកគ្រូពេទ្យ អ្នកគ្រូពេទ្យ បានខិតខំយ៉ាងសស្រាក់សស្រាំ និងផ្តល់ការចាក់វ៉ាក់សាំងកូវីដ-១៩ ជូនដល់ប្រជាពលរដ្ឋទាំងអស់គ្នា ដើម្បីការពារការឆ្លងរាលដាលជំងឺកូវីដ-១៩។ការលើកឡើងយ៉ាងដូច្នេះរបស់ ប្រជាពលរដ្ឋចាស់ជរា យុវជន នាឱកាសដែលលោកជំទាវ វេជ្ជបណ្ឌិត ឱ វណ្ណឌីន រដ្ឋលេខាធិការក្រសួងសុខាភិបាល និងជាប្រធានគណៈកម្មការចំពោះកិច្ចចាក់វ៉ាក់សាំងកូវីដ-១៩ ក្នុងក្របខណ្ឌទូទាំងប្រទេស ជាមួយលោកស្រី លី អាយឡែន តំណាងអង្គការសុខភាពពិភពលោក(WHO) ប្រចាំនៅកម្ពុជា និងលោកស្រី Foroogh Foyouzat តំណាងអង្គការយូនីសេហ្វ (UNICEF)ប្រចាំនៅកម្ពុជា បានអញ្ជើញចុះពិនិត្យការងារក្នុងថ្ងៃបើកយុទ្ធនាការចាក់វ៉ាក់សាំងបង្ការជំងឺកូវីដ-១៩ នៅមណ្ឌលចាក់វ៉ាក់សាំងក្នុងវិទ្យាល័យ ជា ស៊ីម ជ្រោយចង្វារ ខណ្ឌជ្រោយចង្វារ រាជធានីភ្នំពេញ ព្រឹកថ្ងៃទី១០ ខែមិថុនា ឆ្នាំ២០២១នេះ។ប្រជាពលរដ្ឋចាស់ជរា និងយុវជន មកទទួលការចាក់វ៉ាក់សាំងបង្ការជំងឺកូវីដ-១៩ នៅក្នុងមណ្ឌលចាក់វ៉ាក់សាំង វិទ្យាល័យ ជា ស៊ីម ជ្រោយចង្វារ បានលើកឡើងស្រដៀងគ្នាទៀតថា ពួកគាត់បានមកចាក់វ៉ាក់សាំងបង្ការជំងឺកូវីដ-១៩ ប្រភេទស៊ីណូវ៉ាក ដូសទី១ តាមការកំណត់ ដើម្បីការពារសុខភាព និងកុំឲ្យឆ្លងជំងឺកូវីដ-១៩ ក៏សូមថ្លែងអំណរគុណដល់ប្រមុខរាជរដ្ឋាភិបាល ក្រសួងសុខាភិបាល និងលោកគ្រូពេទ្យ អ្នកគ្រូពេទ្យ បានខិតខំយ៉ាងសស្រាក់សស្រាំ ផ្តល់ការចាក់វ៉ាក់សាំងកូវីដ-១៩ ជូនគាត់ និងប្រជាពលរដ្ឋទាំងអស់ ដើម្បីប្រឆាំងមេរោគកូវីដ-១៩។ជាមួយគ្នានោះដែរលោកវេជ្ជបណ្ឌិត ពិន ពន្លាក់ អនុប្រធានដឹកនាំរួមរបស់ក្រុមគ្រូពេទ្យស្ម័គ្រចិត្តសម្តេចពិជ័យសេនា ទៀ បាញ់ នៅមណ្ឌលចាក់វ៉ាក់សាំង វិទ្យាល័យ ជា ស៊ីម ជ្រោយចង្វារ បានឲ្យដឹងថា នេះជាថ្ងៃដំបូង នៃយុទ្ធការចាក់វ៉ាក់សាំងកូវីដ-១៩ ចាប់ពីថ្ងៃទី១០ រហូតដល់ថ្ងៃទី២៣ ខែមិថុនា ឆ្នាំ២០២១ សម្រាប់ដូសទី១ និងដូសទី២ ចាប់ពីថ្ងៃទី២៥ ខែមិថុនា ដល់ថ្ងៃទី៨ ខែកក្កដា ឆ្នាំ២០២១។ សម្រាប់មណ្ឌលនេះ មានសមាជិកប្រចាំការចាក់វ៉ាក់សាំងជូនប្រជាពលរដ្ឋ មានចំនួន០២ក្រុម ដោយក្នុង១ក្រុម មានសមាជិកចំនួន១០នាក់ សរុប២០នាក់។ ដោយឡែកសម្រាប់ក្នុងមូលដ្ឋានខណ្ឌជ្រោយចង្វារទាំងមូល មានទីតាំងចំនួន៥ សម្រាប់ទទួលរងចាំការអញ្ជើញរបស់មន្រី្តរាជការ និងប្រជាពលរដ្ឋ មកចាក់វ៉ាក់សាំងបង្ការជំងឺកូវីដ-១៩។លោកវេជ្ជបណ្ឌិត បានបញ្ជាក់ទៀតថា បើទោះបីបងប្អូនប្រជាពលរដ្ឋ បានចាក់វ៉ាក់សាំងកូវីដ-១៩ហើយកី្ត និងមិនទាន់បានចាក់វ៉ាក់សាំងកូវីដ-១៩ហើយកី្ត គឺវិធានការ៣កុំ ៣ការពារ និង២ចូលរួម ជាវិធីសាស្ត្រមួយដ៏សំខាន់ ដែលបុគ្គលគ្រប់រូបអាចធ្វើបានគ្រប់គ្នា ដែលជាវិធីសាស្ត្រ កំពុងប្រើប្រាស់នៅទូទាំងសកលលោក អាចទប់ស្កាត់ ការពារ ការចម្លងមេរោគកូវីដ-១៩យ៉ាងមានប្រសិទ្ធភាព៕អត្ថបទ រដ្ឋា

លោកជំទាវ ឱ វណ្ណឌីន ៖ ស្ថានភាពជំងឺកូវីដ-១៩ នឹងថមថយតាមរយៈយុទ្ធនាការចាក់វ៉ាក់សាំង

ភ្នំពេញ ៖ លោកជំទាវ ឱ វណ្ណឌីន បានសម្ដែងនូវក្ដីរំពឹងថា តាមរយៈយុទ្ធនាការចាក់ វ៉ាក់សាំងជូនដល់ប្រជាពលរដ្ឋ នឹងជួយកាត់បន្ថយអត្រាចម្លងឱ្យនៅកម្រិតទាប ដូច្នេះនាពេលខាងមុខ កម្ពុជា នឹងមានការថមថយនៃជំងឺនេះ។លោកជំទាវ ឱ វណ្ណឌីន ប្រធានគណៈកម្មការចំពោះកិច្ចចាក់វ៉ាក់សាំងការពារជំងឺកូវីដ-១៩ក្រប ខណ្ឌទូទាំងប្រទេស តំណាងអង្គការសុខភាពពិភពលោក និងតំណាងអង្គការយូនីសែហ្វប្រចាំនៅកម្ពុជា នៅព្រឹកថ្ងៃនេះ បានចុះពិនិត្យដំណើរការចាក់វ៉ាក់សាំងបង្ការជំងឺកូវីដ-១៩ នៅមណ្ឌលសុខភាពសំរោង ដែលមានទីតាំងស្ថិតក្នុងសង្កាត់សំរោង ខណ្ឌព្រែកព្នៅ រាជធានីភ្នំពេញ។លោកជំទាវ បានលើកឡើងថា តាមរយៈការខិតខំខ្នះខ្នែងរបស់ប្រមុខរាជរដ្ឋាភិបាល បានរិះរក គ្រប់មធ្យោបាយ ទាំងការស្នើសុំរកជំនួយ ក៏ដូចជា ការបញ្ជាទិញវ៉ាក់សាំង ដើម្បីផ្តល់ជូនបងប្អូនប្រជាពល រដ្ឋដោយឥតគិតថ្លៃ ស្របតាមគោលដៅ១០លាននាក់ ។យោងតាមរបាយការណ៍របស់អនុគណៈកម្មការតាមដាន និងវាយតម្លៃ នៃគណៈកម្មករចំពោះកិច្ច ចាក់វ៉ាក់សាំងការពារជំងឺ Covid-19 ក្របខណ្ឌទូទាំងប្រទេស បានបង្ហាញអោយដឹងថា ចាប់តាំងពីថ្ងៃទី១០ ខែកុម្ភៈ ឆ្នាំ២០២១ រហូតមកដល់ថ្ងៃទី៧ ខែមិថុនា ឆ្នាំ២០២១ ទាំងក្របខណ្ឌក្រសួងសុខាភិបាល និង ក្រសួងការពារជាតិ បានចាក់វ៉ាក់សាំងជូនដល់ប្រជាពលរដ្ឋដែលមានអាយុចាប់ពី១៨ឆ្នាំឡើងទៅ បានចំនួនជាង២លាន៨សែននាក់ ស្មើហ្នឹងប្រមាណជាង២៧ភាគរយ បើធៀបនឹងគោលដៅ១០ លាននាក់៕អត្ថបទ៖ ជៀប សម្បត្តិ

រដ្ឋាភិបាលចំណាយថវិកាជាង៤លានដុល្លារ សម្រាប់កម្មវិធីជំនួយសង្គមជាសាច់ប្រាក់ក្រោយពេលបិទខ្ទប់

ភ្នំពេញ ៖ រាជរដ្ឋាភិបាលកម្ពុជា នឹងចំណាយថវិកាជាង៤លានដុល្លារអាមេរិក សម្រាប់បើកជូនដល់គ្រួសារទទួលផលចំនួន៦១៦៧៨គ្រួសារ ក្នុងកម្មវិធីជំនួយសង្គមជាសាច់ប្រាក់ក្រោយពេលបិទខ្ទប់ជំហ៊ានដំបូងនេះ។ ការបើកជូនសាច់ប្រាក់ គឺចាប់ផ្ដើមអនុវត្តពីថ្ងៃទី១០ ខែមិថុនានេះ ដោយគ្រួសារទទួលផល អាចទៅបើកបាននៅគ្រប់ភ្នាក់ងារវីង ដោយត្រូវភ្ជាប់មកជាមួយនូវអត្តសញ្ញាណប័ណ្ណ និងលេខទូរស័ព្ទដែលបានកត់ត្រាពេលសម្ភាសន៍។ក្នុងឱកាសសន្និសីទសារព័ត៌មាននាព្រឹកនេះ ក្រោមអធិបតីភាព ឯកឧត្តម រដ្ឋមន្ត្រី វង សូត រដ្ឋមន្ត្រីក្រសួងសង្គមកិច្ច និងមន្ត្រីនៃក្រសួងស្ថាប័នពាក់ព័ន្ធ បានបញ្ជាក់យ៉ាងច្បាស់ថា កម្មបើកសាច់ប្រាក់ជូនដល់ប្រជាពលរដ្ឋ សម្រាប់កម្មវិធីជំនួយសង្គមក្រោយពេលបិទបញ្ចប់ការបិទខ្ទប់ គឺចាប់ផ្ដើមអនុវត្តពីថ្ងៃទី១០ ខែមិថុនានេះតទៅ។ ជាក់ស្ដែងសម្រាប់ជំហ៊ានដំបូងនេះ គឺរាជរដ្ឋាភិបាលនឹងចំណាយថវិកា ជាងលានដុល្លារសម្រាប់ប្រជាពលរដ្ឋ ចំនួន ៦១៦៧៨ គ្រួសារ ដែលជាប់ក្នុងការសម្ភាសន៍។ នេះជាការលើកឡើងរបស់ លោក ឈួរ សុបញ្ញា ប្រធាននាយកដ្ឋានសុខុមាលភាពសង្គម នៃក្រសួងសង្គមកិច្ច។លោក បញ្ជាក់បន្ថែមថា សម្រាប់កម្មវិធីនេះ គឺរាប់គ្របដណ្ដប់លើគ្រួសារគោលដៅ ៣ប្រភេទ គឺសម្រាប់អ្នកមានជីវភាព ខ្វះខាតក្នុងកំឡុងពេលបិទខ្ទប់ ក្នុងទីតាំងរាជធានីភ្នំពេញ ក្រុងតាខ្មៅ ក្រុងព្រះសីហនុ និងសម្រាប់គ្រួសារដែលមាន សមាជិកឆ្លងជំងឺកូវីដ ដែលមានជីវភាពខ្វះខាត និងសម្រាប់គ្រួសារដែលសមាជិកស្លាប់ដោយសារ ជំងឺកូវីដ ក្នុងក្របខណ្ឌទូទាំងប្រទេស។សម្រាប់ការបើកសាច់ប្រាក់នាពេលនេះ លោកបញ្ជាក់ថា គ្រួសារទទួលផលអាចទៅបើកថវិកាបាននៅគ្រប់ភ្នាក់ងារ វីង ដោយត្រូវភ្ជាប់ជាមួយ អត្តសញ្ញាណប័ណ្ណ និងលេខទូរស័ព្ទដែលបានផ្ដល់ជូន កំឡុងពេលសម្ភាសន៍។ លោក បានបន្តថា ចំពោះគ្រួសារដែលមានសមាជិកបាត់បង់ជីវិត ដោយកូវីដ-១៩ គឺមន្ត្រីជំនាញនឹងបើកសាច់ប្រាក់ជូនដល់គេហដ្ឋានដោយផ្ទាល់។សម្រាប់កម្មវិធីជំនួយសង្គមជាសាច់ប្រាក់ក្រោយពេលបិទខ្ទប់នេះ គឺជាកម្មវិធីអនុវត្តតែមួយដងតែប៉ុណ្ណោះ ពុំមានការបើកសាច់ប្រាក់ជូនរាល់ខែនោះទេ។ សម្រាប់គ្រួសារដែលមានជីវភាពខ្វះខាតក្រោយពេលបិទខ្ទប់ ហើយចង់ដាក់ពាក្យស្នើសុំការសម្ភាសន៍ នៅតែអាចបន្តដាក់ពាក្យស្នើសុំទៅឃុំ-សង្កាត់ក្នុងរយៈពេលមួយសប្ដាហ៍នេះបន្ថែមទៀត។ នេះជាការបញ្ជាក់របស់ ឯកឧត្តម ថេង បញ្ញាធន តំណាងមកពីក្រសួងផែនការ ជាក្រសួងសាមី ក្នុងការកំណត់អត្តសញ្ញាណគ្រួសារទទួលផល។គួរបញ្ជាក់ថា សម្រាប់កម្មវិធីជំនួយសង្គមក្រោយបញ្ចប់ការបិទខ្ទប់នេះ គឺមានផ្ដោតសំខាន់លើចំណុចសំខាន់ចំនួន ៣ រួមមាន ថ្លៃស្បៀងអាហារ ថ្លៃទឹកស្អាត និងថ្លៃអគ្គិសនី ដោយគ្រួសារទទួលផល អាចទទួលបានសាច់ប្រាក់ខុសគ្នា ទៅតាមចំនួនសមាជិកនៃគ្រួសារនីមួយៗ៕អត្ថបទ៖ គឹមហុក

អាស៊ាន-ចិន ប្ដេជ្ញាពង្រីកកិច្ចសហប្រតិបត្តិការឱ្យកាន់តែល្អប្រសើរបន្ថែមទៀត

ភ្នំពេញ ៖ កិច្ចប្រជុំពិសេសរដ្ឋមន្ត្រីការបរទេសអាស៊ាន-ចិន និងកិច្ចប្រជុំរដ្ឋមន្ត្រីការបរទេសមេគង្គ-ឡានឆាង លើកទី៦ បានធ្វើឡើងកាលពីថ្ងៃទី៧ និងថ្ងៃទី៨ ខែមិថុនា នេះ នៅទីក្រុងឆុងឈីង ប្រទេសចិន។ ជំនួបនេះ បានបង្កើតឡើងនូវការប្ដេជ្ញាបន្ថែមទៀត ដើម្បីពង្រីកកិច្ចសហប្រតិបត្តិការអាស៊ាន-ចិន ឱ្យកាន់តែល្អ ប្រសើរឡើងថែមទៀត។ឯកឧត្តម ប្រាក់ សុខុន ឧបនាយករដ្ឋមន្ត្រី និងជារដ្ឋមន្ត្រីក្រសួងការបរទេសកម្ពុជា ដែលបានដឹកនាំប្រតិភូទៅចូលរួមកិច្ចប្រជុំពិសេសរដ្ឋមន្ត្រីការបរទេសអាស៊ាន-ចិន និងកិច្ចប្រជុំរដ្ឋមន្ត្រីការបរទេស មេគង្គ-ឡានឆាង លើកទី៦ នៅក្នុងប្រទេសចិន បានឱ្យដឹងថា រដ្ឋមន្ត្រីការបរទេសចិន ឯកឧត្តម Wang Yi បានសន្យាថា នឹងគាំទ្រដល់ក្របខ័ណ្ឌស្តារឡើងវិញគ្រប់ជ្រុងជ្រោយរបស់អាស៊ាន (ACRF) ខណៈ ពាណិជ្ជកម្ម រវាងចិន និងអាស៊ាន បានកើនឡើងពីចំនួនតិចជាង៨ពាន់លានដុល្លារ ទៅជាង៦៨៤ពាន់ លានដុល្លារ ហើយភាគីទាំងពីរ ក៏បានផ្លាស់ប្ដូរកម្មករជាង៦ម៉ឺន៥ពាន់នាក់ ក្នុងរយៈពេលបីទសវត្សរ៍ចុង ក្រោយនេះ។ក្នុងអំឡុងចូលរួមកិច្ចប្រជុំនេះ ឯកឧត្ដម ប្រាក់ សុខុន ក៏បានជួបពិភាក្សាគ្នាដាច់ដោយឡែកជាមួយ ប្រមុខការទូតចិន ថៃ និងវៀតណាម ដោយក្នុងកិច្ចជំនួបនោះ បានសន្យាបន្តពង្រឹងកិច្ច សហប្រតិបត្តិការ ទ្វេភាគីជាមួយគ្នា ឲ្យកាន់តែល្អប្រសើបន្ថែមទៀត និងរួមគ្នាបន្តទប់ស្កាត់ការរីករាលដាលនូវមេរោគកូវីដ-១៩ ដែលប្រទេសផងខ្លួន កំពុងកើតឡើង នាពេលបច្ចុប្បន្ននេះ។កិច្ចប្រជុំពិសេសរដ្ឋមន្ត្រីការបរទេសអាស៊ាន-ចិន ត្រូវបានធ្វើឡើង ក៏ដើម្បីប្រារព្ធខួបអនុស្សាវរីយ៍ លើកទី៣០ នៃទំនាក់ទំនងសន្ទនាអាស៊ាន-ចិន។ជំនួបទ្វេភាគី រវាងឯកឧត្តម ប្រាក់ សុខុន និងឯកឧត្តម វ៉ាង យី រដ្ឋមន្ត្រីក្រសួងការបរទេសចិន បាន ផ្លាស់ប្ដូរទស្សនៈ ស្ដីពីការលើកតម្កើងទំនាក់ទំនង និងកិច្ចសហប្រតិបត្តិការកម្ពុជា-ចិន។ ភាគីទាំងពីរ បាន វាយតម្លៃខ្ពស់«ចំពោះកិច្ចសហប្រតិបត្តិការភាពជាដៃគូយុទ្ធសាស្ត្រគ្រប់ជ្រុងជ្រោយរវាងកម្ពុជា និងចិន និង បានបញ្ជាក់ជាថ្មីនូវការប្តេជ្ញាចិត្តយ៉ាងមុតមាំក្នុងការពង្រឹង និងធ្វើឱ្យកាន់តែស៊ីជម្រៅនូវចំណងមិត្តភាពដូច ដែកថែប ព្រមទាំងពង្រីកកិច្ចសហប្រតិបត្តិការលើគ្រប់វិស័យបន្ថែមទៀត» ៕អត្ថបទ៖ បាន ចក់

ខែមិថុនាឆ្នាំនេះ ខេត្តកំពង់ឆ្នាំង ទទួលបានទឹកភ្លៀងច្រើនជាងឆ្នាំមុន កសិករកំពុងចាប់ផ្តើមបន្តបង្កបង្កើនផល

កំពង់ឆ្នាំង ៖ គិតមកដល់ថ្ងៃទី០៨ ខែមិថុនា នេះ ខេត្តកំពង់ឆ្នាំង ទទួលបានរបបទឹកភ្លៀងច្រើនជាងដើមខែមិថុនា ឆ្នាំ២០២០ ក្នុងរយៈពេល២សប្តាហ៍នេះ ទឹកភ្លៀងបានបង្អុរមកជាបន្តបន្ទាប់ ធ្វើឱ្យប្រជាកសិករទាំងអស់ ចាប់ផ្តើមបង្ក បង្កើនផលនៅស្ទើរគ្រប់ទីកន្លែងក្នុងខេត្ត ដើម្បីធ្វើស្រែឱ្យទាន់ដើមរដូវ។លោក ងិន ហ៊ុន ប្រធានមន្ទីរកសិកម្មខេត្តកំពង់ឆ្នាំង បានឱ្យដឹងថា គិតមកដល់ថ្ងៃទី០៨ ខែមិថុនា ឆ្នាំ២០២១នេះ របបទឹកភ្លៀងទទួលបានចំនួន៦៩,២៩មម បូកយោងពីដើមរដូវ សរុបជាមធ្យមបានចំនួន៣៣៥,៩២មម ប្រៀបធៀប ជាមួយឆ្នាំ២០២០ មានកម្រិតច្រើនជាងចំនួន៦១,៦៧មម។ ដោយសារស្ថានភាពទឹកភ្លៀងបានអំណោយផល ប្រជា កសិករ កំពុងតែខំប្រឹងប្រែងក្នុងការបង្កបង្កើនផល នាំឱ្យសាបរួច ចំនួន៣២២ហិកតា ផ្ទៃដីដាំដុះ (ព្រោះ) បានចំនួនជាង១០ម៉ឺនហិកតា ស្មើនឹង៨៩% លើផែនការ១២ម៉ឺន២០០០ហិកតា។ចំណែកដំណាំសាកវប្បកម្ម និងដំណាំឧស្សាហកម្ម អនុវត្តបានជាង៤ពាន់ហិកតា ស្មើនឹង៧,៩៧% លើផែនការ ៧៨០០ហិកតា រួមមាន ពោត ស ដំឡូងជ្វា បន្លែគ្រប់មុខ ដំឡូងឈើ សណ្តែកបាយ អំពៅ ល្ង ថ្នាំជក់ ក្រចៅ ឪឡឹក និង សណ្តែកដី។ ចំពោះតម្លៃស្រូវក្នុងសប្តាហ៍នេះ គឺស្រូវស្ងួត ជាមធ្យម១១០០រៀល ក្នុង១គីឡូក្រាម មានតម្លៃខ្ពស់ជាង ឆ្នាំ២០២០ ចំនួន៥០រៀល ក្នុង១គីឡូក្រាម ស្រូវក្រអូប តម្លៃ១៣០០រៀល ក្នុង១គីឡូក្រាម ខ្ពស់ជាងឆ្នាំ២០២០ ចំនួន ១០រៀល ក្នុង១គីឡូក្រាម។នៅក្នុងខែមិថុនា ឆ្នាំ២០២១នេះ ពុំមានសត្វគោក្របីឈឺធ្ងន់ធ្ងរនោះទេ ដោយបច្ចុប្បន្ន ខាងមន្ត្រីបសុពេទ្យកំពុងជួយពិនិត្យគ្រប់ទីកន្លែងផងដែរ។ទោះបីទឹកភ្លៀងធ្លាក់គ្រប់គ្រាន់ និងស្ថិតក្នុងបរិបទ នៃការឆ្លងរាលដាលជំងឺកូវីដ-១៩ ក្នុងសហគមន៍ក៏ពិតមែន តែប្រជាកសិករ កំពុងសស្រាក់សស្រាំខិតខំបង្កបង្កើនផលនៅគ្រប់ទីកន្លែង។ មន្ទីរកសិកម្ម និងមន្ទីរធនធានទឹក កំពុងត្រៀមចុះ ជួយប្រជាពលរដ្ឋណា ដែលជួបនូវការខ្វះខាតទឹក នៅគ្រប់ទីកន្លែង តាមគោលការណ៍ ដោយមិនប្រកាន់និន្នាការអ្វី ឡើយ៕អត្ថបទ៖ ហុង វាស្នា

ខេត្តកណ្តាល ចាប់ផ្តើមចាក់វ៉ាក់សាំងកូវីដ១៩ ដូសទី១ ជូនពលរដ្ឋទូទៅចាប់ពីថ្ងៃទី១០ ខែមិថុនាតទៅ

កណ្ដាល ៖ រដ្ឋបាលខេត្តកណ្តាល ប្រកាសបើកយុទ្ធនាការចាក់វ៉ាក់សាំងការពារកូវីដ-១៩ នៅទូទាំងខេត្ត ចាប់ពីថ្ងៃទី១០ ខែមិថុនា ស្អែកនេះតទៅ ។ សម្រាប់ការយុទ្ធនាការចាក់វ៉ាក់សាំងនេះ គេសង្កេតឃើញថា អាជ្ញាធរនៅតាមឃុំសង្កាត់ទូទាំងខេត្តកណ្តាល បាននឹងកំពុងមមាញឹក ចុះចែកលិខិត ឬប័ណ្ណអញ្ជើញពលរដ្ឋទៅចាក់វ៉ាក់សាំងទៅតាមពេលវេលា និងទីតាំងដែលបានកំណត់ទៅតាមការណែនាំពីក្រុមពេទ្យចាក់វ៉ាក់សាំង។បើតាមលោក យ៉ាវ ឡេង ចៅសង្កាត់កំពង់សំណាញ់ ក្រុងតាខ្មៅខេត្តកណ្តាល បានថ្លែងថា មកដល់ថ្ងៃនេះសង្កាត់កំពង់សំណាញ់ ក៏ដូចឃុំសង្កាត់នានាទៀត នៅទូទាំងខេត្តកណ្តាល គឺបាននិងកំពុងចុះចែកលិខិតអញ្ជើញពលរដ្ឋនៅតាមបណ្តាភូមិមកចាក់វ៉ាក់សាំងនៅថ្ងៃស្អែកនេះរួចហើយ ហើយនៅព្រឹកថ្ងៃនេះដែរ អាជ្ញាធរក៏កំពុងរៀបចំទីតាំងចាក់នៅអនុវិទ្យាល័យ ហ៊ុន សែន ខ្ពបវែង ក៏ជិតរួចរាល់ដែរ ។លោក យ៉ាវ ឡេង បន្តថា សម្រាប់ការចាក់វ៉ាក់សាំងការពារកូវីដ-១៩នេះគឺយើងបានរៀបចំតាមណែនាំរបស់ក្រុមគ្រូពេទ្យចាក់វ៉ាក់សាំង ចៀសវាងការប្រជ្រៀតគ្នា ត្រូវរក្សាគន្លាតត្រឹមត្រូវ ហើយសម្រាប់ការចាក់នេះ គឺយើងចាក់ជូនចំពោះពលរដ្ឋណាដែលមានលិខិត ឬប័ណ្ណអញ្ជើញនៅក្នុងដៃតែប៉ុណ្ណោះ ហើយសម្រាប់ពលរដ្ឋមិនទាន់មានប័ណ្ណអញ្ជើញ ឬមិនទាន់ដល់ថ្ងៃណាត់ គឺត្រូវរង់ចាំចាក់នៅពេលក្រោយ។ឯកឧត្តម គីម រិទ្ធី អភិបាលរងខេត្តកណ្តាល បានថ្លែងបញ្ជាក់ថា យុទ្ធនាការចាក់វ៉ាក់សាំងការពារកូវីដ១៩នេះ គឺយើងគ្រោងនឹងបើកការចាក់ទៅមនុស្សប្រមាណជាង៩០ម៉ឺននាក់ ដែលមានអាយុចាប់ពី១៨ឆ្នាំឡើងទៅ ដែលមានពលរដ្ឋទូទៅក្នុងខេត្តកណ្តាល និងបណ្តាកម្មករ កម្មការិនីរោងចក្រនៅខេត្តកណ្តាល ហើយកម្មករកម្មការិនីមកពីបណ្តាខេត្តរាជធានីនានា មកធ្វើការងារនៅក្នុងខេត្តកណ្តាល ក៏អាចអញ្ជើញទៅចាក់បានដែរ តែត្រូវមានលិខិត ឬប័ណ្ណអញ្ជើញពីអាជ្ញាធរ។ឯកឧត្តម បន្តថា កាលពីមុនយើងមានគំរោងចាក់តែនៅក្នុងក្រុងតាខ្មៅមួយទេ ប៉ុន្តែដោយសារមុននេះ យើងទទួលដំណឹងថា ខេត្តកណ្តាល ទទួលបានវ៉ាក់សាំងច្រើនលើសលប់ពីសម្តេចតេជោ ទើបនៅថ្ងៃនេះយើងជំរុញអោយអាជ្ញាធរគ្រប់ក្រុងស្រុកទាំងអស់ក្នុងខេត្តកណ្តាល រៀបចំមណ្ឌលចាក់ជាច្រើន ដោយក្នុង១ស្រុកក្រុងត្រូវរៀបចំមណ្ឌលចាក់ប្រមាណ៨ទៅ១០កន្លែង ហើយការចាក់នេះនៅថ្ងៃដំបូងអាចមានភាពរអាក់រអួលបន្តិច។បន្ថែមពីនេះ បើតាមការបញ្ជាក់របស់ ឯកឧត្តម គង់ សោភ័ណ្ឌ អភិបាលខេត្តកណ្តាល បានលើកឡើងដែរថា ៖ នៅពេលនេះ ខេត្តកណ្តាល បានត្រៀមរួចរាល់ហើយបើកយុទ្ធនាការចាក់វ៉ាក់សាំងជូនពលរដ្ឋខេត្តកណ្តាលទ្រង់ទ្រាយធំនេះ សម្រាប់ការចាក់នេះ ក្រៅពីចាក់នៅតាមមន្ទីរពេទ្យបង្អែកក្រុងស្រុក ខេត្តក៏បានរៀបចំអោយមានការចាក់នៅតាមសាលារៀន និងវត្តអារ៉ាមតាមក្រុងស្រុកឃុំសង្កាត់នានាទូទាំងខេត្តកណ្តាល ដែលអាជ្ញាធរមូលដ្ឋានរៀបចំអញ្ជើញ ខណៈការចាក់យើងរៀបចំក្រុមគ្រូពេទ្យចំនួន ៧០០នាក់ ស្មើនឹង ៧០ក្រុម ហើយរដ្ឋបាលខេត្ត គ្រោងនឹងបន្ថែមគ្រូពេទ្យចំនួន ១៨០០ នាក់ទៀតផងដែរ ដើម្បីធ្វើឲ្យយុទ្ធនាការនេះប្រព្រឹត្តទៅប្រកបដោយភាពរលូន និងអាចចាក់វ៉ាក់សាំងបានឆាប់រហ័សជូនប្រជាពលរដ្ឋនៅទូទាំងខេត្តកណ្តាល៕ អត្ថបទ សុខជា

សាលារាជធានីភ្នំពេញ បិទខ្ទប់ផ្នែកខ្លះនៃភូមិចំនួន៤នៅខណ្ឌពោធិ៍សែនជ័យ ក្រោយមើលឃើញកំណើនករណីឆ្លងឡើងវិញ

ភ្នំពេញ៖ សាលារាជធានីភ្នំពេញ បានបិទខ្ទប់ផ្នែកខ្លះនៃភូមិចំនួន៤នៅក្នុងខណ្ឌពោធិ៍សែនជ័យឡើងវិញ ចាប់ពីថ្ងៃស្អែកនេះទៅ ដើម្បីទប់ស្កាត់ការឆ្លងរីករាលដាលនៃមេរោគកូវីដ-១៩។ក្នុងសេចក្ដីសម្រេចនៅថ្ងៃនេះ រដ្ឋបាលរាជធានីភ្នំពេញ បានកំណត់ជាតំបន់លឿងទុំនូវផ្នែកខ្លះនៃភូមិចោមចៅ៣ ស្ថិតក្នុងសង្កាត់ចោមចៅទី២ និងផ្នែកខ្លះនៃភូមិត្រពាំងពោធិ៍ ភូមិព្រៃព្រីងខាងជើង២ និងភូមិជម្ពូវ័ន២ នៅក្នុងសង្កាត់ចោមចៅទី៣ ជា«តំបន់លឿងទុំ»។បើតាមសេចក្ដីសម្រេចនេះ វិធានការបិទខ្ទប់នេះ នឹងត្រូវចាប់ផ្ដើមអនុវត្តចាប់ពីម៉ោងសូន្យឈានចូលថ្ងៃស្អែកនេះ រហូតដល់ថ្ងៃទី២៣ ខែមិថុនាខាងមុខនេះ។នៅក្រោមវិធានការបិទខ្ទប់នេះ អាជ្ញាធររាជធានីភ្នំពេញសម្រេចហាមឃាត់ការធ្វើដំណើរចាកចេញពីលំនៅឋាន ឬទីស្នាក់អាស្រ័យរបស់ប្រជាពលរដ្ឋ។ចំណែកឯសកម្មភាពខាងមុខរបរ ការងារ និងអាជីវកម្ម ដែលមិនមែនជាតម្រូវការចាំបាច់ ក៏ត្រូវបានហាមឃាត់ផងដែរ។ទោះជាយ៉ាងណា សាលារាជធានីភ្នំពេញក៏បានផ្ដល់ការលើកលែងសម្រាប់ការធ្វើដំណើរមួយចំនួន និងសកម្មភាពអាជីវកម្ម ការងារ ឬមុខរបរមួយចំនួនផងដែរ។សាលារាជធានីភ្នំពេញ បានបញ្ជាក់ក្នុងសេចក្ដីសម្រេចនោះថា វិធានការនេះ គឺដើម្បីទប់ស្កាត់ការឆ្លងរីករាលដាលនៃមេរោគកូវីដ-១៩ បន្ទាប់ពីខណ្ឌពោធិ៍សែនជ័យ បានមើលឃើញកំណើនឡើងវិញនៃចំនួនពលរដ្ឋឆ្លងមេរោគកូវីដ-១៩រយៈពេលប៉ុន្មានថ្ងៃចុងក្រោយនេះ៕

បណ្ដាញសង្គម

ព័ត៌មានថ្មីៗ

លោក Trump នឹងជួបក្រុមមន្ត្រីមកពីប្រទេសមូស្លីមភាគច្រើន ដើម្បីពិភាក្សាអំពីតំបន់ហ្កាហ្សា

ជប៉ុនបដិសេធមិនទទួលស្គាល់រដ្ឋប៉ាឡេស្ទីន ក្នុងកិច្ចប្រជុំអង្គការសហប្រជាជាតិ

អ្នកការទូតជាន់ខ្ពស់មកពីអាមេរិក កូរ៉េខាងត្បូង និងជប៉ុន សម្តែងក្ដីបារម្ភ អំពីច្រកសមុទ្រតៃវ៉ាន់

ក្រុមលោក Trump៖ កិច្ចព្រមព្រៀង TikTok ជិតកើតឡើង ដោយ Oracle និង Silver Lake ស្ថិតក្នុងចំណោមអ្នកវិនិយោគ

ក្រុមបាតុករ នៅអេក្វាឌ័រ បិទផ្លូវតវ៉ា ជុំវិញការកាត់ប្រាក់ឧបត្ថម្ភធនប្រេងម៉ាស៊ូត

ICC ចោទប្រកាន់អតីតប្រធានាធិបតីហ្វីលីពីន លោក Duterte ពីបទឧក្រិដ្ឋកម្មប្រឆាំងមនុស្សជាតិ

លោក Trump នឹងថ្លែងទៅកាន់ UN ចំពេលគោលមាននយោបាយការបរទេស «អាមេរិកទី១» របស់លោក

សមាគមស្ថាបត្យករខ្មែរ ចូលរួមកម្មវិធីសមាជក្រុមប្រឹក្សាស្ថាបត្យករទ្វីបអាស៊ី លើកទី២១ និងពិធីខួបលើកទី៦០ឆ្នាំ នៃសមាគមស្ថាបត្យករសាធារណរដ្ឋកូរ៉េ

ប្រជាពលរដ្ឋ ចាប់ផ្តើមជិះរថយន្តក្រុងរបស់រាជរថ្ឋាភិបាល ចូលរាជធានីភ្នំពេញវិញជាបណ្តើរៗហើយ

ក្រុមស្វែងរកការងារជូនបងប្អូនអតីតពលករមកពីថៃ ១២៩៧ នូវបន្តដំណើរការធម្មតាក្នុងថ្ងៃបុណ្យភ្ជុំបិណ្ឌ

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877

នយោបាយ​ និង ការអភិវឌ្ឍន៍

ចិន​បន្ត​ផ្តល់​សព្វាវុធ​ការពារ​អាកាស​បន្ថែម​ដល់​ក្រសួងការពារជាតិ​កម្ពុ​ជា

អាជ្ញាធរ​ជាតិ​អប្សរា​ បញ្ចប់​គម្រោង​ជួសជុល​បណ្ណាល័យ​ខាងត្បូង​ប្រាសាទព្រះខ័ន

លោកជំទាវ ឱ វណ្ណឌី​ន ​៖ ស្ថានភាព​ជំងឺ​កូ​វីដ​-១៩ នឹង​ថមថយ​តាមរយៈ​យុទ្ធនា​ការ​ចាក់​វ៉ាក់សាំង

អាស៊ាន​-​ចិន ប្ដេជ្ញា​ពង្រីក​កិច្ចសហប្រតិបត្តិការ​ឱ្យ​កាន់តែ​ល្អប្រសើរ​បន្ថែមទៀត