BTV NEWS

គម្រោងស្ពានឆ្លងកាត់ទន្លេបាសាក់ (ចាក់អង្រែក្រោម-ព្រែកប្រា) និងផ្លូវតភ្ជាប់ សម្រេចបាន ៤៥% ហើយ ដែលលឿនជាងផែនការ ៤,១១%

សម្ដេចធិបតី អំពាវនាវដល់ជនរួមជាតិជឿទុកចិត្តលើរាជរដ្ឋាភិបាលដែលកំពុងធ្វើកិច្ចការងារយ៉ាងសកម្មស្វែងរកដំណោះស្រាយបញ្ចប់បញ្ហាព្រំដែនកម្ពុជា-ថៃ ឱ្យបានឆាប់រហ័ស

សម្ដេចធិបតីផ្ដល់អនុសាសន៍៧ចំណុច ដល់ក្រសួង-ស្ថាប័នពាក់ព័ន្ធឱ្យយកចិត្តទុកដាក់ក្នុងឱកាសទិវាអក្ខរកម្មអន្តរជាតិ ៨ កញ្ញា ២០២៥

សម្ដេចធិបតី៖ រាជរដ្ឋាភិបាលប្តេជ្ញាចិត្តយ៉ាងមុតមាំលើកកម្ពស់ការងារអក្ខរកម្ម និងបំពាក់បំប៉ន ជំនាញ និងឱកាសសិក្សាពេញមួយជីវិត ជាពិសេសជំនាញឌីជីថល

នយោបាយ និង ការអភិវឌ្ឍន៍

រដ្ឋបាលខេត្តកំពង់ឆ្នាំង រកឃើញអ្នកវិជ្ជមានកូវីដ១៩ថ្មីចំនួន ១៩នាក់បន្ថែម ធ្វើអោយអ្នកឆ្លងនៅកំពង់ឆ្នាំងកើនដល់ ២១៦នាក់

កំពង់ឆ្នាំង៖ តាមសេចក្តីប្រកាសព័ត៌មានរបស់រដ្ឋបាលខេត្តកំពង់ឆ្នាំង នៅល្ងាចថ្ងៃទី២៧ ខែឧសភា ឆ្នាំ២០២១នេះ បានអោយដឹងថា ក្នុងខេត្តកំពង់ឆ្នាំង បានរកឃើញអ្នកវិជ្ជមានកូវីដ១៩ក្នុងព្រឹត្តិការណ៍សហគមន៍២០កុម្ភៈ ចំនួន ១៩នាក់បន្ថែម សម្រាប់ការធ្វើតេស្តសំណាកនៅថ្ងៃទី២៦ ខែឧសភា ឆ្នាំ២០២១ នាំអោយអ្នកឆ្លងជំងឺកូវីដនៅក្នុងខេត្តកើនឡើងរហូតដល់២១៦នាក់។រដ្ឋបាលខេត្តកំពង់ឆ្នាំង បានបន្តថា ករណីវិជ្ជមានកូវីដ១៩ នៅក្នុងភូមិសាស្ត្រខេត្តកំពង់ឆ្នាំង បានរកឃើញជាបន្តបន្ទាប់ចាប់ពីអំឡុងចុងខែមីនា ឆ្នាំ២០២១ រហូតមកដល់ពេលនេះ ដែលសុទ្ធសឹងជាករណីនាំចូលពីក្រុងភ្នំពេញ ពាក់ព័ន្ធនឹងព្រឹត្តិការណ៍សហគមន៍២០កុម្ភៈទាំងអស់។ដោយឡែកនៅថ្ងៃទី២៦ ខែឧសភា ឆ្នាំ២០២១ ក្រុមការងារឆ្លើយតបបន្ទាន់នៃមន្ទីរសុខាភិបាលខេត្តបានរកឃើញករណីវិជ្ជមានកូវីដ១៩ចំនួន ១៩នាក់ថ្មីបន្ថែមទៀត ធ្វើអោយអ្នកឆ្លងកូវីដ១៩នៅខេត្តកំពង់ឆ្នាំង កើនដល់ ២១៦នាក់ ក្នុងនោះ មានករណីជាសះស្បើយចំនួន ៣២នាក់, ករណីស្លាប់ចំនួន ០៣នាក់, និងកំពុងដាក់អោយសម្រាកព្យាបាលនៅក្នុងមន្ទីរពេទ្យបង្អែកខេត្តកំពង់ឆ្នាំង និងនៅមន្ទីរពេទ្យបង្អែកស្រុកកំពង់ត្រឡាចសរុបចំនួន ១៨១នាក់។អ្នកឆ្លងជំងឺកូវីដ១៩ជាករណីថ្មី ដែលក្រុមការងារទើបរកឃើញ គឺមាននៅក្នុងឃុំពាម និងឃុំសេដ្ឋី ស្រុកសាមគ្គីមានជ័យចំនួន៣នាក់, ក្នុងឃុំច្រេស និងឃុំពានី ស្រុកកំពង់ត្រឡាចចំនួន ០២នាក់, នៅក្នុងឃុំអភិវឌ្ឍន៍ និងឃុំចោងម៉ោង ស្រុកទឹកផុសចំនួន ០៧នាក់, ក្នុងឃុំជ្រៃបាក់ ឃុំអណ្តូងស្នាយ និងឃុំទឹកហូត ស្រុករលាប្អៀរចំនួន៧នាក់, និងសង្កាត់ប្អេរ ក្រុងកំពង់ឆ្នាំងចំនួន ០១នាក់។ ចំពោះអ្នកជំងឺកូវីដ១៩ ដែលរកឃើញថ្មីទាំង ១៩នាក់នោះ ភាគច្រើនជាកម្មករកម្មការិនីនៅតាមរោងចក្រ ហើយក្រុមការងារបានដាក់អោយសំរាកព្យាបាលនៅក្នុងវិទ្យាល័យ ហ៊ុន សែន កំពង់ត្រឡាច ស្រុកកំពង់ត្រឡាចទាំងអស់។រដ្ឋបាលខេត្តកំពង់ឆ្នាំង ក៏បានបន្តអំពាវនាវដ៏ទទូចដល់អាជ្ញាធរមូលដ្ឋានដែលមានកម្មករកម្មការនីស្នាក់នៅទាំងអស់ យកចិត្តទុកដាក់គ្រប់គ្រងក្រុមគ្រួសារអ្នកទាំងនោះអោយធ្វើចត្តាឡីស័កនៅតាមលំនៅដ្ឋាន ទីសំណាក់រៀងៗខ្លួនអោយបានត្រឹមត្រូវតាមវិធានរបស់ក្រសួងសុខាភិបាល។ បន្តតាមដានសុខភាពរបស់បងប្អូន និងជួយដោះស្រាយការលំបាកនានាក្នុងគ្រួសារនីមូយៗតាមជាក់ស្តែង។ រដ្ឋបាលខេត្ត ក៏បានអំពាវនាវដល់បងប្អូនប្រជាពលរដ្ឋ ដែលធ្លាប់ប្រាស្រ័យទាក់ទងដោយផ្ទាល់ជាមួយអ្នកវិជ្ជមានកូវីដ១៩ ដែលរដ្ឋបាលខេត្តបានបង្ហាញជូនហើយនោះ សូមមកពិនិត្យសំណាកជាបន្ទាន់នៅមន្ទីរពេទ្យបង្អែកខេត្ត ឬមន្ទីរពេទ្យបង្អែកស្រុកកំពង់ត្រឡាច ឬមណ្ឌលសុខភាពដែលនៅជិតបំផុត ដើម្បីទប់ស្កាត់ការឆ្លងរាលដាលនៃជំងឺកូវីដ១៩ ជាពិសេសសូមបន្តអនុវត្តអោយបានខ្ជាប់ខ្ជួននូវវិធានការណ៍ «៣ការពារ និង៣កុំ» ដើម្បីខ្លួនយើង គ្រួសារយើង និងសង្គមជាតិយើង៕ អត្ថបទ៖ ហុង វាស្នា

កាកបាទក្រហមទទួលប្រាក់ ១លានដុល្លារ ពីក្រុមហ៊ុន ជីប ម៉ុង សម្រាប់សាងសង់ផ្ទះជូនអតីតយុទ្ធជន

ភ្នំពេញ៖ នៅទីស្នាក់ការកណ្តាលថ្ងៃទី២៧ ខែឧសភា ឆ្នាំ២០២១នេះ កាកបាទក្រហមកម្ពុជា បានទទួលជួបសវនការ និងទទួលជំនួយថវិកាចំនួន ១លានដុល្លារអាមេរិក ពីក្រុមហ៊ុន ជីប ម៉ុង ដែលដឹកនាំដោយលោកជំទាវអ្នកឧកញ៉ា ភាព ហៀក ស្ថាបនិកក្រុមហ៊ុន ជីប ម៉ុង។ដើម្បីចូលរួមចំណែកជួយសាងសង់ផ្ទះចំនួន ៦២៨ខ្នង ជូនអតីតយុទ្ធជនក្រីក្រ និងអតីតយុទ្ធជនមានពិការភាព នៅភូមិដំណាក់ត្រយឹង ឃុំព្រងិល ស្រុកភ្នំក្រវាញ ខេត្តពោធិ៍សាត់។ថវិកានេះ គឺបន្ថែមពីលើថវិកាចំនួន ២០ម៉ឺនដុល្លារអាមេរិក របស់ក្រុមហ៊ុនខ្មែរប៊ែវើរី ដែលបានឧបត្ថម្ភកាលពីថ្ងៃទី១៧ ខែឧសភា ឆ្នាំ២០២១កន្លងទៅ។នៅក្នុងឱកាសជួបសវនការ លោកជំទាវ ពុំ ចន្ទីនី អគ្គលេខាធិការកាកបាទក្រហមកម្ពុជា និងក្រុមការងារបានទទួលស្វាគមន៍យ៉ាងកក់ក្តៅ និងបាននាំប្រសាសន៍របស់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន ដែលផ្តាំផ្ញើសួរសុខទុក្ខ ចំពោះលោកជំទាវអ្នកឧកញ៉ា ភាព ហៀក និងប្រតិភូ ដែលបានអញ្ជើញនាំយកថវិកាមកប្រគល់ជូនដល់ទីស្នាក់ការ។ ជាមួយគ្នានេះ ក្នុងនាមកាកបាទក្រហមកម្ពុជា ដែលមានសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធានលោកជំទាវអគ្គលេខាធិការ បានថ្លែងអំណរគុណយ៉ាងជ្រាលជ្រៅបំផុត ចំពោះទឹកចិត្តដ៏សប្បុរសធម៌របស់ក្រុមហ៊ុន ជីប ម៉ុង ដែលតែងតែចូលរួមឧបត្ថម្ភគាំទ្រដល់កាកបាទក្រហមកម្ពុជា ជាបន្តបន្ទាប់ចំនួន៣៨លើករួចមកហើយ គិតចាប់តាំងពីឆ្នាំ២០០១មក។ទន្ទឹមនឹងនេះ លោកជំទាវបានគូសបញ្ជាក់ថា កាកបាទក្រហមកម្ពុជា នឹងផ្តល់ថវិកានេះតាមរយៈសមាគមអតីតយុទ្ធជនកម្ពុជា ដែលមានឯកឧត្តមទេសរដ្ឋមន្ត្រី គន់ គីម អនុប្រធាន និងជាអគ្គលេខាធិការ នៃសមាគមអតីតយុទ្ធជនកម្ពុជា សម្រាប់ការសាងសង់ផ្ទះជូនអតីតយុទ្ធជនក្រីក្រ និងអតីតយុទ្ធជនមានពិការភាពទាំង ៦២៨គ្រួសារ នៅខេត្តពោធិ៍សាត់ឱ្យបានគ្រប់ចំនួន ដោយមិនឱ្យខ្វះមួយគ្រួសារណាឡើយ។ការផ្តល់ថវិកាសម្រាប់ការសាងសង់ផ្ទះនេះ គឺជាការគិតគូររបស់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ដោយសារតែសម្តេច ធ្លាប់បានឆ្លងកាត់ភ្លើងសង្គ្រាម និងមានប្រវត្តិតស៊ូជាច្រើនរាប់មិនអស់ ជាមួយសម្តេចតេជោ ហ៊ុនសែន ក៏ដូចជាឥស្សរជនជាន់ខ្ពស់ដទៃទៀត ជាពិសេសបងប្អូនអតីតយុទ្ធជន ដែលមានគុណបំណាច់ដ៏ធំធេង ចំពោះបុព្វហេតុជាតិមាតុភូមិ។ជាកិច្ចឆ្លើយតប គណៈប្រតិភូក្រុមហ៊ុន ជីប ម៉ុង បានថ្លែងអំណរគុណចំពោះសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដែលបានអនុញ្ញាតឱ្យក្រុមហ៊ុន បានចូលរួមចំណែកការងារមនុស្សធម៌ជាមួយកាកបាទក្រហមកម្ពុជា ដែលជាសមាគមជាតិ តែងតែធ្វើសកម្មភាពមនុស្សធម៌យ៉ាងសកម្មជួយដល់ប្រជាពលរដ្ឋងាយរងគ្រោះបំផុតយ៉ាងពិតប្រាកដ និងបានកសាងនូវភាពជឿជាក់ពីសប្បុរសជនគ្រប់មជ្ឈដ្ឋាន។ គណៈប្រតិភូបានគូសបញ្ជាក់ថា ទីណាមានទុក្ខលំបាក ទីនោះតែងតែមានវត្តមានកាកបាទក្រហមកម្ពុជាជានិច្ច។សូមជម្រាបថា រហូតដល់ថ្ងៃទី២៧ ខែឧសភា ឆ្នាំ២០២១នេះ សប្បុរសជនដែលបានចូលរួមបរិច្ចាគក្នុងការសាងសង់ផ្ទះជូនអតីតយុទ្ឋជនបានចំនួន៧នាក់ហើយ: ទី1ក្រុមហ៊ុន ជីប ម៉ុង គ្រុបឧបត្ថម្ភចំនួន ១,០០០,០០០ដុល្លារ, ក្រុមហ៊ុនខ្មែរប៊ែវើរី ២០០,០០ដុល្លារ, ឯកឧត្តមបណ្ឌិត ម៉ា ឈឿន និងលោកជំទាវកិត្តិបណ្ឌិត អ៊ុក ម៉ាលី ៧,០០០ដុល្លារ, ឯកឧត្តម ឈឿន កុសលវីរៈ និងលោកជំទាវ ៣,៥០០ដុល្លារ, លោកជំទាវកិត្តិសង្គហបណ្ឌិត ឃួន សុដារី ៣,៥០០ដុល្លារ, លោកជំទាវ ម៉ែន នារីសោភ័គ ៣,៥០០ដុល្លារ, លោក ឈាង រ័ត្ន និងលោកស្រី នួន ស៊ុន្ទរី ៧០,០០០ដុល្លារ។សូមបញ្ជាក់ផងដែរថា ផ្ទះនីមួយៗ មានទំហំ ៥ X ៧ម៉ែត្រ ដែលចំណាយថវិកាតម្លៃ 3,500ដុល្លារអាមេរិក និងបង្គន់អនាម័យដាច់ដោយឡែកមួយទៀតមានតម្លៃ ២៧០ដុល្លារអាមេរិក៕ អត្ថបទ៖ សំ ងីម

ក្រសួងផែនការ បន្តកំណត់អត្តសញ្ញាណពលរដ្ឋក្រីក្រ សម្រាប់កម្មវិធី ជំនួយសង្គមជាសាច់ប្រាក់ក្រោយការបិទខ្ទប់

ភ្នំពេញ ៖ សកម្មភាពការងាររបស់ក្រុមយុវជន សហភាពសហព័ន្ធយុវជនកម្ពុជា និងវត្តមានរបស់មន្ត្រីមូលដ្ឋាន កំពុងបន្តការចុះកំណត់អត្តសញ្ញាណប្រជាពលរដ្ឋ និងគ្រួសារ សម្រាប់ទទួលបានការឧបត្ថម្ភពីកម្មវិធីជំនួយសង្គមជាសាច់ប្រាក់ក្រោយការបិទខ្ទប់។ ការចុះកំណត់អត្តសញ្ញាណនេះ នឹងបន្តរហូតដល់ថ្ងៃទី ៣០ ខែឧសភា ខាងមុខ នេះជាការបញ្ជាក់របស់ក្រសួងផែនការ។ជាការគិតគូរដល់ជីវភាពរស់នៅរបស់ប្រជាពលរដ្ឋ រាជរដ្ឋាភិបាលកម្ពុជាបានសម្រេចបង្កើតកម្មវិធីជំនួយសង្គមថ្មីមួយទៀត គឺ “កម្មវិធីជំនួយសង្គមជាសាច់ប្រាក់ក្រោយការបិទខ្ទប់”។ កម្មវិធីជំនួយសង្គមជាសាច់ប្រាក់ក្រោយការបិទខ្ទប់ នេះគឺសម្រាប់ប្រជាពលរដ្ឋ និងគ្រួសារដែលមានជីវភាពលំបាកស្ថិតក្នុងតំបន់បិទខ្ទប់ រាជធានីភ្នំពេញ ក្រុងតាខ្មៅ និងក្រុងព្រះសីហនុ។កម្មវិធីនេះ ក៏នឹងជួយឧបត្ថម្ភដល់ គ្រួសារប្រជាពលរដ្ឋដែលមានសមាជិកឆ្លងកូវីដ-១៩ មានការលំបាកផ្នែកជីវភាព និងសម្រាប់គ្រួសារដែលមានសមាជិកបាត់បង់អាយុជីវិតដោយសារកូវីដ-១៩ ក្នុងព្រឹត្តិការណ៍ ២០កុម្ភៈ ក្នុងក្របខណ្ឌទូទាំងប្រទេស។គិតមកត្រឹមពេលនេះ ការងារកំណត់អត្តសញ្ញាណរបស់ប្រជាពលរដ្ឋ និងគ្រួសារដែលនឹងទទួលផល គឺកំពុងតែបន្តដោយមានមន្ត្រីមូលដ្ឋាន និងវត្តមានរបស់យុវជនស្ម័គ្រចិត្តសហភាពសហព័ន្ធយុវជនកម្ពុជា ចូលរួមយ៉ាងសកម្មក្នុងការចុះសម្ភាសតាមផ្ទះប្រជាពលរដ្ឋដោយផ្ទាល់ជារៀងរាល់ថ្ងៃ។ ការកំណត់អត្តសញ្ញាណនេះ នឹងបន្តរហូតដល់ថ្ងៃទី ៣០ ខែឧសភាខាងមុខ នេះបើតាមការបញ្ជាក់របស់ក្រសួងផែនការ។សម្រាប់គ្រួសារដែលទទួលបានការសម្ភាសរស់នៅក្នុងសង្កាត់ដង្កោ ខណ្ឌដង្កោ នាព្រឹកនេះ ពួកគាត់លើកឡើងថា ការបង្កើតកម្មវិធីជំនួយសង្គមថ្មីនេះ ជារឿងប្រសើរ និងមានអត្ថប្រយោជន៍សម្រាប់ពួកគាត់ដែលមានជីវភាពខ្វះខាត និងរងផលប៉ះពាល់ច្រើនកំឡុងពេលបិទខ្ទប់មកនេះ។ការងារកំណត់អត្តសញ្ញាណប្រជាពលរដ្ឋ និងគ្រួសារសម្រាប់កម្មវិធីជំនួយសង្គមជាសាច់ប្រាក់ក្រោយការបិទខ្ទប់នេះ មានការចូលរួមស្ម័គ្រចិត្តយ៉ាងសកម្មពីយុវជនសហភាពសហព័ន្ធយុវជនកម្ពុជា។ លោក ខែម សុខជា ជាយុវជន ស ស យ ក មួយរូប ដែលបានចូលរួមក្នុងការងារសម្របសម្រួលនៅទីតាំងចាក់វ៉ាក់សាំង និងចូលរួមក្នុងការងារកំណត់អត្តសញ្ញាណកម្មសម្រាប់កម្មវិធីថ្មីនេះ លើកឡើងថា លោកជាយុវជន លោកពិតជាពេញចិត្តក្នុងការបំពេញការងារសម្រាប់ប្រជាពលរដ្ឋក្នុងសហគមន៍ និងសម្រាប់ជាតិក្នុងកំឡុងពេលការលំបាកនេះ។ចំពោះកម្មវិធីជំនួយសង្គមជាសាច់ប្រាក់ក្រោយការបិទខ្ទប់ តាមសេចក្ដីសម្រេចរបស់ក្រសួង សេដ្ឋកិច្ចនិងហិរញ្ញវត្ថុ បញ្ជាក់ថា នឹងចាប់ផ្ដើមអនុវត្តនៅដើមខែមិថុនា ខាងមុខនេះ ដោយក្រសួងសង្គមកិច្ច ជាក្រសួងទទួលខុសត្រូវក្នុងការបើកសាច់ប្រាក់ជូនអ្នកទទួលផល។ ចំពោះចំនួនថវិកា គឺមានភាពខុសគ្នាទៅតាមចំនួនសមាជិកគ្រួសារនីមួយៗ។សេចក្ដីសម្រេចនេះ បញ្ជាក់ថា សម្រាប់ប្រជាពលរដ្ឋ និងគ្រួសារដែលមានជីវភាពលំបាក ក្នុងតំបន់បិទខ្ទប់ រាជធានីភ្នំពេញ ក្រុងតាខ្មៅ និងក្រុងព្រះសីហនុ អាចទទួលបានថវិកា ពី១៥៦ ០០០ រៀល ទៅ៣១១ ០០០ រៀល។ចំណែកឯគ្រួសារដែលមានសមាជិកឆ្លងកូវីដ-១៩ និងមានជីវភាពលំបាកវិញ អាចទទួលបានថវិកាពី ១៥៦ ០០០ រៀល ទៅ ៣១១ ០០០ រៀលដូចគ្នា។ រីឯគ្រួសារដែលមានសមាជិកបាត់បង់អាយុជីវិត ដោយសារកូវីដ-១៩វិញ ក្នុងព្រឹត្តិការណ៍ ២០កុម្ភៈ គឺអាចទទួលបានថវិកា ចាប់ពី ៤៤០ ០០០រៀល ទៅ ៧៦០ ០០០រៀល៕អត្ថបទ ៖ គឹមហុក

ពន្ធនាគារខេត្តកណ្តាល ដាក់ជាតំបន់ក្រហម ក្រោយរកឃើញសង្ស័យវិជ្ជមានកូវីដ-១៩ លើអ្នកទោសមួយចំនួន

កណ្ដាល ៖ បន្ទាប់ពីក្រុមគ្រូពេទ្យ បានចុះយកសំណាកពិនិត្យរកមេរោគកូវីដ-១៩ ទៅលើអ្នកជាប់ឃុំ និងមន្ត្រីពន្ធនាគារខេត្តកណ្តាល រួចហើយនៅថ្ងៃម្សិលមិញនេះ គិតមកដល់ព្រឹកថ្ងៃទី២៧ ខែឧសភានេះ ខាងមន្ទីរពិសោធន៍ជាតិ មិនទាន់បង្ហាញលទ្ធផលជាក់ស្តែងថ្មីយ៉ាងណានោះទេ តែទោះយ៉ាងណាឯកឧត្តម គង់ សោភ័ណ្ឌ អភិបាលខេត្តកណ្តាល នៅថ្ងៃនេះ បញ្ជាឱ្យអ្នកគ្រប់គ្រងពន្ធនាគារខេត្ត ផ្អាកសាច់ញាតិអ្នកជាប់ឃុំពីខាងក្រៅចូលសាកសួរសុខទុក្ខមួយរយៈសិន។ឯកឧត្តម អភិបាលខេត្ត គង់ សោភ័ណ្ឌ ថ្លែងថា មកដល់ថ្ងៃនេះ យើងមិនទាន់រកឃើញករណីឆ្លងថ្មីនៃមេរោគកូវីដ-១៩ លើអ្នកជាប់ឃុំ និងអ្នកពាក់ព័ន្ធនៅក្នុងពន្ធនាគារខេត្តកណ្តាលនោះទេ ហើយបន្ទាប់ពីពិនិត្យស្ថានភាពសុខភាពលើអ្នកជាប់ឃុំ និងមន្ត្រីពាក់ព័ន្ធមួយចំនួនមានអាការៈ មិនសូវស្រួល ហើយសង្ស័យថា មានឆ្លងកូវីដ-១៩ តាមរយៈការយកសំណាកតេស្តដំបូងដោយប្រើ Rapid Test មក នៅពេលនេះ ឯកឧត្តមបញ្ជាអោយអ្នកគ្រប់គ្រងពន្ធនាគារ ផ្អាកការអនុញ្ញាតឱ្យបងប្អូនសាច់ញាតិពីខាងក្រៅចូលសាកសួរសុខទុក្ខ និងផ្ញើរបស់របរនានា ជូនអ្នកជាប់ឃុំក្នុងពន្ធនាគារនេះតែម្តង ខណៈយើងកំពុងចាត់ទុកទីតាំងពន្ធនាគារនេះជាតំបន់ក្រហម។ទន្ទឹមនឹងនេះដែរ ឯកឧត្តម បន្តថា នៅពេលនេះដែរ យើងក៏កំពុងផ្តល់ការគិតគូរខ្លាំងលើបញ្ហាផ្តល់អាហារហូបចុកប្រចាំថ្ងៃអោយគ្រប់គ្រាន់ និងមានការបែងចែកអគារស្នាក់នៅត្រឹមត្រូវ ដោយតម្រូវអោយអ្នកជាប់ឃុំនៅដាច់ៗពីគ្នា និងផ្តល់ការគ្រប់គ្រងតាមដានសុខភាពផ្ដល់ថ្នាំសង្កូវទៀងទាត់ពីក្រុមគ្រូពេទ្យប្រចាំនៅក្នុងពន្ធនាគារយកចិត្តទុកដាក់បំផុត ។ឯកឧត្តម គង់ សោភ័ណ្ឌ ក៏បានបញ្ជាក់ដែរថា នៅក្នុងពន្ធនាគារខេត្តកណ្តាលនេះ មានអគារធំៗជាច្រើន សម្រាប់ដាក់អោយអ្នកជាប់ឃុំស្នាក់នៅ ហើយក្នុងនោះ មានតែអ្នកជាប់ឃុំនៅលើអគារមួយដែលជាប់ការសង្ស័យ ហើយក៏បានទៅសំណាកម្នាក់ម្តងៗ ដើម្បីពិនិត្យអោយបានច្បាស់ថា តើអ្នកនោះ មានកូវីដ-១៩ ឬ មិនមានកូវីដ-១៩ ខណៈតាមប្រភពព័ត៌មានមួយចំនួនចុះផ្សាយ និងអះអាងថា តាមរយៈពេលលទ្ធផលតេស្តរហ័សគឺបានសង្ស័យថា មានអ្នកជាប់ឃុំ និងមន្ត្រីពាក់ព័ន្ធប្រមាណ១០០នាក់ មានករណីវិជ្ជមានកូវីដ-១៩ ហើយពេលគេកំពុងរង់ចាំលទ្ធផលតេស្តជាក់ស្តែងពីមន្ទីរពិសោធន៍ជាតិរបស់ក្រសួងសុខាភិបាល៕អត្ថបទ ៖ ស៊ុម សុខជា

ក្រសួងមហាផ្ទៃតម្រូវឲ្យអ្នកទោសទូទាំងប្រទេសមុនចូលពន្ធនាគារត្រូវតេស្តរកកូវីដ-១៩ និងធ្វើចត្តាឡីស័ក

ភ្នំពេញ ៖ លោកឧត្តមអគ្គានុរក្ស.១ នុត សវនា អ្នកនាំពាក្យអគ្គនាយកដ្ឋានពន្ធនាគារ បានថ្លែងថា ចំពោះអ្នកទោសទាំងអស់ មុនចូលក្នុងពន្ធនាគារ ត្រូវធ្វើតេស្តរកមេរោគកូវីដ-១៩ និងធ្វើចត្តាឡីស័ក ចំនួន២០ថ្ងៃ។ថ្លែងប្រាប់BTV តាមទូរស័ព្ទ នៅថ្ងៃទី២៧ខែឧសភានេះ លោក នុត សវនា អគ្គនាយករង និងជាអ្នកនាំពាក្យនៃអគ្គនាយកដ្ឋានពន្ធនាគារ បានឲ្យដឹងថា កាលពីពេលថ្មីៗ ដោយមានការណែនាំដ៏ខ្ពង់ខ្ពស់ពីសម្តេចក្រឡោហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃអគ្គនាយកដ្ឋានពន្ធនាគារ បានចេញសេចក្តីគោលការណ៍ជុំវិញការអនុវត្តក្នុងពន្ធនាគារបន្ថែម ពិសេសអ្នកទោសទើបបញ្ជូនទៅពន្ធនាគារ ត្រូវអនុវត្តយ៉ាងម៉ត់ចត់នូវវិធានការសុខាភិបាលទាំងការធ្វើតេស្តរកមេរោគកូវីដ-១៩ និងការធ្វើចត្តាឡីស័ក ខណៈកាលពីពេលកន្លងទៅ ក្នុងពេលបញ្ជូនអ្នកទោសទៅពន្ធនាគារ អនុវត្តត្រឹមតែការពិនិត្យអាការៈ ផ្នែកខាងក្រៅតែប៉ុណ្ណោះ។លោកឧត្តមអគ្គានុរក្ស.១នុត សវនា អគ្គនាយករង និងជាអ្នកនាំពាក្យនៃអគ្គនាយកដ្ឋានពន្ធនាគារ ក៏បានបញ្ជាក់ផងដែរថា ចំពោះកិច្ចការគ្រប់គ្រងស្ថានការណ៍ពន្ធនាគារខេត្តកណ្តាល ដែលកំពុងផ្ទុះការឆ្លងថ្មីនេះ អគ្គនាយកដ្ឋានពន្ធនាគារ បានសហការជាមួយអាជ្ញាធរខេត្ត ហើយគ្រប់គ្រងសភាពការណ៍បានច្រើន។ លោក ថា អគ្គនាយកដ្ឋានពន្ធនាគារ បានបញ្ជូនអ្នកជំនាញ ដើម្បីសង្កេតការណ៍ពីវឌ្ឍនភាព និងសភាពការណ៍ ដែលមានការប្រែប្រួលល្អ ឬអាក្រក់ និងប្រឹក្សាយោបល់ជាមួយមន្ត្រីពន្ធនាគារ។បើតាមលោកឧត្តមអគ្គានុរក្ស.១ នុត សវនា ក្រោយព្រឹត្តិការណ៍២០កុម្ភៈ មានការផ្ទុះឡើងជំងឺកូវីដ១៩ក្នុងពន្ធនាគារខេត្តព្រះសីហនុ កាលពីដើមខែឧសភា កន្លងទៅ និងករណីផ្ទុះក្នុងពន្ធនាគារខេត្តកណ្តាល តែប៉ុណ្ណោះ៕អត្ថបទ ៖ ឧត្តម

អាជ្ញាធរខេត្តស្វាយរៀង បញ្ជាក់អំពីហេតុការណ៍កម្មកររោងចក្រនៅក្រុងបាវិត ជ្រួលយោបល់ទាក់ទងនិងយកសំណាកកូវីដ-១៩

ស្វាយរៀង ៖ រដ្ឋបាលខេត្តស្វាយរៀង បានចេញសេចក្ដីជូនដំណឹងមួយបញ្ជាក់អំពីហេតុការណ៍ ដែលបងប្អូនកម្មករ-កម្មការិនី រោងចក្រ ក្នុងតំបន់សេដ្ឋកិច្ចពិសេស នៅក្រុងបាវិត នាំគ្នាសម្រុកចេញពីរោងចក្រ មិនស្ដាប់តាមការណែនាំរបស់អាជ្ញាធរ ពាក់ព័ន្ធការយកសំណាកទៅពិនិត្យរកជំងឺកូវីដ-១៩ ដែលការជ្រួលយោបល់នេះ បានធ្វើឲ្យមានការព្រួយបារម្ភបន្ថែមទៀត ក្នុងការរីករាលដាលនៃជំងឺកូវីដ-១៩ ដល់ក្រុមគ្រួសាររបស់ពួកគេ។យោងតាមសេចក្តីជូនដំណឹងរបស់រដ្ឋបាលខេត្តស្វាយរៀង ដែលទូរទស្សន៍BTV ទទួលបាននារសៀលថ្ងៃទី២៧ ខែឧសភា ឆ្នាំ២០២១នេះ បានឲ្យដឹងថា កាលពីថ្ងៃទី២៦ម្សិលមិញនេះ មានកម្មករម្នាក់ ធ្វើការនៅក្នុងរោងចក្រដំឡើងទោចក្រយាន អេ អេន ជេ (ខេមបូឌា) ក្នុងតំបន់សេដ្ឋកិច្ចពិសេសតាយសេង១ ស្ថិតនៅភូមិតាពៅ សង្កាត់បាវិត ក្រុងបាវិត ដោយមានអាការសង្ស័យចូលក្នុងនិយមន័យកូវីដ-១៩ បានស្ម័គ្រចិត្តទៅយកវត្ថុវិភាគសំណាកធ្វើតេស្តរហ័ស នៅប៉ុស្តិ៍យកសំណាកក្រុងបាវិត ហើយជាលទ្ធផលវិជ្ជមានកូវីដ-១៩។ក្រោយពីពិនិត្យឃើញកម្មករម្នាក់ ដែលមានវិជ្ជមានកូវីដ-១៩នោះ ក្រុមការងារស្រាវជ្រាវ និងតាមដានបុគ្គលសង្ស័យមានផ្ទុកជំងឺកូវីដ-១៩ខេត្ត បានសហការជាមួយមន្ទីរសុខាភិបាលខេត្ត បានចុះយកវត្ថុវិភាគសំណាក អ្នកប៉ះពាល់ផ្ទាល់ចំនួន៩នាក់ ហើយលទ្ធផលវិជ្ជមានគឺបានឃើញចំនួន៣នាក់។តាមរយៈសេចក្តីជូនដំណឹងនេះ អាជ្ញាធរខេត្តស្វាយរៀង បានបញ្ជាក់បន្ថែមទៀតថា ក្រុមការងារបានបន្តយកវត្ថុវិភាគសំណាកអ្នកប៉ះពាល់អ្នកជំងឺកូវីដ-១៩ នៅអគារផ្នែកខាងមុខ ចំនួន១៤៥នាក់ ហើយជាលទ្ធផលវិជ្ជមានកូវីដ-១៩ ចំនួន៥៤នាក់ បន្ទាប់មកក្រុមការងារបានសហការជាមួយរោងចក្រ ធ្វើការស្រាវជ្រាវ រកអ្នកប៉ះពាល់ផ្ទាល់ និងប្រយោលនៅអគារផ្សេងទៀត ដើម្បីធ្វើការវាយតម្លៃកម្រិតហានិភ័យ នៃការឆ្លងក្នុងរោងចក្រទាំងមូល។ ប៉ុន្តែដោយសារមានការភិតភ័យ និងស្របពេលដល់ម៉ោងចេញពីធ្វើការ បងប្អូនកម្មករ កម្មការិនីនៅអគារដទៃទៀត ក៏បាននាំគ្នាចេញពីរោងចក្រ បើទោះបីជាក្រុមការងារ បានខិតខំពន្យល់ណែនាំ ពីការយកវត្ថុវិភាគសំណាករកមេរោគកូវីដ-១៩ ណែនាំអំពីការថែទាំសុខភាព និងផលប៉ះពាល់ នៃការឆ្លងរីករាលដាលជំងឺកូវីដ-១៩ និងការធ្វើចត្តាឡីស័ក តាមដានសុខភាពក្តី តែបងប្អូនជឿតាមការញុះញង់ និងការបំផុស បំផុលរបស់ជនអគតិមួយក្តាប់តូច ក៏បាននាំគ្នាធ្វើដំណើរចេញពីរោងចក្រទាំងជ្រួលច្របល់តែម្តង។យ៉ាងណាក៏ដោយរដ្ឋបាលខេត្តស្វាយរៀង បានណែនាំដល់អាជ្ញាធរមូលដ្ឋាន និងមន្ត្រីពាក់ព័ន្ធទាំងអស់ ត្រូវយកចិត្តទុកដាក់គ្រប់គ្រងបងប្អូនកម្មករ-កម្មការិនី ដែលបម្រើការងារនៅរោងចក្រខាងលើ ដែលចេញពីរោងចក្រមុន ការពិនិត្យវាយតម្លៃលើកម្រិតហានិភ័យ នៃការឆ្លងរីករាលដាលជំងឺកូវីដ-១៩ តម្រូវឲ្យធ្វើចត្តាឡីស័ក នៅតាមផ្ទះរៀងៗខ្លួន និងត្រូវតាមដានសុខភាពជាប្រចាំ ហើយប្រសិនបើមានអាការខុសប្រក្រតី ដូចជា ក្តៅខ្លួន, ក្អក, កណ្ដាស់, ឈឺបំពង់ក, ពិបាកដកដង្ហើមសូមផ្តល់ព័ត៌មានទៅអាជ្ញាធរមូលដ្ឋាន និងរួសរាន់ទៅយកវត្ថុវិភាគសំណាក ឬ ទំនាក់ទំនងមកកាន់លេខទូរស័ព្ទ ០៩៧ ៥០៣ ៤៥៦៧/០៤៤ ៧១២ ៥២២នេះផងដែរ៕អត្ថបទ ៖ បាន ចក់

ក្រុមហ៊ុនល្មើសច្បាប់ពាណិជ្ជកម្មនៅកម្ពុជា នឹងរងផាកពិន័យពី១លានរៀលដល់១០លានរៀល

ភ្នំពេញ ៖ ក្រសួងសេដ្ឋកិច្ចនិងហិរញ្ញវត្ថុ និងក្រសួងពាណិជ្ជកម្ម នឹងធ្វើការផាកពិន័យជាប្រាក់ចំពោះជនទាំងឡាយណាដែលប្រព្រឹត្តអំពើល្មើសពាណិជ្ជកម្មមួយចំនួន ដែលអនុវត្តចាប់ពីថ្ងៃទី២៦ ខែឧសភានេះតទៅ។ការប្រកាសផាកពិន័យនេះ ធ្វើឡើងដោយយោងតាមសេចក្តីប្រកាសអន្តរក្រសួង ស្តីពីការពិន័យជាប្រាក់ដែលស្ថិតក្រោមសមត្ថកិច្ចរបស់ក្រសួងពាណិជ្ជកម្ម ដែលចុះហត្ថលេខាដោយឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុ និងឯកឧត្តម ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម ចុះកាលពីថ្ងៃទី១២ ខែឧសភា ឆ្នាំ២០២១កន្លងទៅ។តាមសេចក្តីប្រកាសអន្តរក្រសួង ការពិន័យជាប្រាក់ដែលស្ថិតនៅក្រោមសមត្ថកិច្ចរបស់ក្រសួងពាណិជ្ជកម្ម។ ចំណែកបទល្មើសពាណិជ្ជកម្ម សំដៅដល់ជនទាំងឡាយណាដែលប្រព្រឹត្តអំពីល្មើសទៅនឹងច្បាប់ស្តីពីវិធានពាណិជ្ជកម្ម និងបញ្ជីពាណិជ្ជកម្ម, ច្បាប់ស្តីពីម៉ាក ពាណិជ្ជនាម និងអំពើនៃការប្រកួតប្រជែងមិនស្មោះត្រង់ ច្បាប់ស្តីពីសហគ្រាសពាណិជ្ជកម្ម និងច្បាប់ស្តីពីពាណិជ្ជកម្មតាមប្រព័ន្ធអេឡិចត្រូនិក ព្រមទាំងលិខិតបទដ្ឋានគតិយុត្តិពាក់ព័ន្ធជាធរមាន។ប្រភពដដែល បានបន្តថា ចំពោះប្រភេទបទល្មើស និងកម្រិតទឹកប្រាក់ពិន័យទៅតាមប្រភេទល្មើសនីមួយៗ មានទំហំចន្លោះពី ១លានរៀល ដល់ ១០លានរៀល ទៅតាមបញ្ជីពិន័យជាប្រាក់នៃបទល្មើសនីមួយៗ។តាមការបញ្ជាក់របស់សេចក្តីប្រកាសខាងលើ ក្រសួងសេដ្ឋកិច្ច និងហិរញ្ញវត្ថុ បានស្នើឲ្យក្រសួងពាណិជ្ជកម្ម ត្រូវរៀបចំគម្រោងចំណូលពិការពិន័យតាមប្រភេទបទល្មើសនីមួយៗ ដែលមានចែង នៃប្រកាសអន្តរក្រសួងនេះ ដើម្បីដាក់បញ្ចូលទៅក្នុងច្បាប់ស្តីពីហិរញ្ញវត្ថុសម្រាប់ការគ្រប់គ្រងប្រចាំឆ្នាំ និងត្រូវធ្វើរបាយការណ៍ចំណូលប្រចាំខែ និងប្រចាំឆ្នាំ ផ្ញើទៅក្រសួងសេដ្ឋកិច្ចនិងហិរញ្ញវត្ថុឲ្យបានមុនថ្ងៃទី១០ នៃខែបន្ទាប់ សម្រាប់របាយការណ៍ប្រចាំខែ និងឲ្យបានមុនថ្ងៃទី១៥ ខែមករា នៃឆ្នាំបន្ទាប់ សម្រាប់របាយការណ៍ប្រចាំឆ្នាំ៕អត្ថបទ៖ ឈិត បូរ៉ាវី

កម្ពុជា-វៀតណាម នឹងដាក់ឲ្យដំណើរការនូវច្រកព្រំដែនអន្តរជាតិម៉ឺនជ័យ រវាងខេត្តព្រៃវែង និងខេត្តតៃនីង នាចុងខែឧសភានេះ

ភ្នំពេញ ៖ ប្រសិនបើគ្មានការប្រែប្រួលទេនោះ រដ្ឋាភិបាលកម្ពុជា-វៀតណាម នឹងដាក់ឲ្យដំណើរការច្រកព្រំដែនអន្តរជាតិម៉ឺនជ័យ(ព្រៃវែង)-តឺនណាម(តៃនីង) នាថ្ងៃទី៣១ ខែឧសភា ឆ្នាំ២០២១ ខាងមុខនេះ ខណៈការបើកនេះ នឹងសម្រួលដល់ការផ្លាស់ប្ដូរទំនិញរវាងប្រទេសទាំងពីរ ជាពិសេសរវាងប្រជាពលរដ្ឋខេត្តព្រៃវែង និងប្រជាពលរដ្ឋខេត្តតៃនិញ កាន់តែល្អប្រសើរ ក៏ដូចជា ចូលរួមបង្កើនទំហំពាណិជ្ជកម្មរបៀបប្រទេសទាំងពីរផងដែរ។យោងតាមលិខិត របស់សម្ដេចក្រឡាហោម ស ខេង ឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃ ស្នើទៅកាន់ សម្ដេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ដើម្បីសុំគោលការណ៍អនុញ្ញាត ដែលទូរទស្សន៍BTV ទទួលបាន នាថ្ងៃទី២៧ ខែឧសភា ឆ្នាំ២០២១នេះ បានបញ្ជាក់បន្ថែមថា ពិធីប្រកាសដាក់ឲ្យដំណើរការច្រកអន្តរជាតិថ្មីនេះ នឹងត្រូវរៀបចំឡើងដោយរដ្ឋបាលខេត្តព្រៃវែង របស់កម្ពុជា សហការជាមួយរដ្ឋបាលខេត្តតៃនីង របស់វៀតណាម ដោយអនុវត្តវិធានការ និងគោលការណ៍ណែនាំនានារបស់រាជរដ្ឋាភិបាល និងក្រសួងសុខាភិបាល ក្នុងការទប់ស្កាត់ការរីករាលដាលជំងឺកូវីដ-១៩ ឲ្យកាន់តែមានប្រសិទ្ធភាពបន្ថែមទៀតនោះ។តាមលិខិតរបស់សម្តេចក្រឡាហោម ស ខេង ដដែល បានលើកឡើងទៀតថា សម្រាប់ការរៀបចំពិធីសម្ពោធដាក់ឲ្យដំណើរការច្រកទ្វារព្រំដែនអន្តរជាតិម៉ឺនជ័យ(ព្រៃវែង)-តឺនណាម(តៃនីង)នេះ ជាផ្លូវការ នឹងធ្វើឡើងក្រោមអធិបតីភាព នាយករដ្ឋមន្ត្រីនៃប្រទេសទាំងពីរ នាពេលខាងមុខ នៅក្រោយស្ថានភាពនៃការឆ្លងរីករាលដាលជំងឺកូវីដ១៩ បានធូរស្រាល។សម្តេចក្រឡាហោម បានបញ្ជាក់ផងដែរថា ច្រកអន្តរជាតិថ្មីនេះ នឹងសម្រួលដល់ការផ្លាស់ប្ដូរទំនិញរវាងប្រទេសទាំងពីរ ជាពិសេសរវាងប្រជាពលរដ្ឋខេត្តព្រៃវែង និងប្រជាពលរដ្ឋខេត្តតៃនិញកាន់តែល្អប្រសើរ ក៏ដូចជា ចូលរួមបង្កើនទំហំពាណិជ្ជកម្មរបៀបប្រទេសទាំងពីរផងដែរ៕អត្ថបទ ៖ បាន ចក់

ពលរដ្ឋជាង២.៣៦លានទទួលបានវ៉ាក់សាំង ក្នុងនោះជាង១.៧៥លាននាក់ទទួលបានទាំងពីរដូសរួចរាល់

ភ្នំពេញ៖ គណៈកម្មការចំពោះកិច្ចការចាក់វ៉ាក់សាងបង្ការជំងឺកូវីដ-១៩ បានចាក់វ៉ាក់សាំងដល់ប្រជាពលរដ្ឋដល់ទៅជាង ២លាន ៣៦ម៉ឺននាក់ហើយនៅក្នុងយុទ្ធនាការចាក់វ៉ាក់សាំងទូទាំងប្រទេសជាង ១០០ថ្ងៃកន្លងមកនេះ។ក្នុងរបាយការណ៍ប្រចាំថ្ងៃរបស់ខ្លួន គណៈកម្មការចំពោះកិច្ចការចាក់វ៉ាក់សាំងបង្ការជំងឺកូវីដ-១៩ បានឱ្យដឹងថា ដំណើរការចាក់វ៉ាក់សាំងជូនប្រជាពលរដ្ឋទូទាំងប្រទេសម្រេចបាន ២៣.៦២ភាគរយនៃចំនួនប្រជាពលរដ្ឋ ១០លាននាក់ដែលរាជរដ្ឋាភិបាលកំណត់ចាក់វ៉ាក់សាំងនៅឆ្នាំនេះ។បើតាមរបាយការណ៍ដដែលនេះ ប្រជាពលរដ្ឋជាងជាង ១លាន ៧៥ម៉ឺននាក់ហើយ បានទទួលវ៉ាក់សាំងទាំងពីរដូសរួចរាល់។នៅក្នុងរយៈពេល ១០៦ថ្ងៃកន្លងមកនេះ យុទ្ធនាការចាក់វ៉ាក់សាំងទូទាំងប្រទេស បានទទួលពលរដ្ឋស្ម័គ្រចិត្តចាក់វ៉ាក់សាំងដល់ទៅជាង ២លាន ៤១ម៉ឺននាក់ ប៉ុន្តែ ប្រជាពលរដ្ឋជាង ៥ម៉ឺននាក់ មិនត្រូវបានអនុញ្ញាតឱ្យចាក់វ៉ាក់សាំងនោះឡើយដោយសារបញ្ហាសុខភាពរបស់ពួកគេ។កម្ពុជាបានចាប់ផ្ដើមយុទ្ធនាការចាក់វ៉ាក់សាំងជូនប្រជាពលរដ្ឋរបស់ខ្លួននៅទូទាំងប្រទេសដើម្បីបង្ការជំងឺកូវីដ-១៩ ចាប់តាំងពីថ្ងៃទី១០ ខែកុម្ភៈកន្លងមកនេះ ដោយដំណើរការបាន ១០៦ថ្ងៃរួចមកហើយ៕

កម្មករដែលរត់ចេញដោយជ្រួលច្របល់នៅស្វាយរៀង គឺដោយសារការយល់ច្រលំ និងការបំផុសបំផុល

ស្វាយរៀង៖ ករណីកម្មកររត់ចេញពីរោងចក្រនៅក្រុងបាវិត ខេត្តស្វាយរៀង កាលល្ងាចថ្ងៃទី២៦ ខែឧសភា កើតមានដោយ សារការយល់ច្រឡំ និងការបំផុសបំផុល។ នេះបើតាមអភិបាលខេត្តស្វាយរៀង ឯកឧត្ដម ម៉ែន វិបុល ថ្លែងប្រាប់ BTV នៅយប់ថ្ងៃទី២៦ ខែឧសភា។ឯកឧត្ដមបញ្ជាក់បន្ថែមថា ភាពជ្រួលច្របល់នោះកើតមានក្រោយពេលមានកម្មករធ្វើការនៅរោងចក្រដំឡើងកង់ ម្នាក់ត្រូវបានរកឃើញមានវិជ្ជមានកូវីដ-១៩ ហើយមន្ត្រីជំនាញបន្តស្រាវជ្រាវរកអ្នកពាក់ព័ន្ធនៅកន្លែងដែលកម្មករ នោះធ្វើការ។ ក្នុងអំឡុងពេលធ្វើតេស្តកម្មករនៅកន្លែងដែលគាត់ធ្វើការនោះ ស្រាប់តែមានកម្មករនៅទីតាំងក្បែរ នោះ បានឃើញពីការយកសំណាកធ្វើតេស្តរកកូវីដ និងមានការបំផុសបំផុលផង ទើបកម្មករដែលមានទីតាំងនៅ ក្បែរនោះជ្រួលច្របល់រត់ចេញពីរោងចក្រ ហើយក៏ស្របពេលនឹងដល់ម៉ោងចេញពីធ្វើការផងដែរ។កាលពីល្ងាចថ្ងៃទី២៦ ខែឧសភា ឆ្នាំ២០២១ មានការចែកចាយតាមបណ្ដាញសង្គមនានា ស្ដីពីទិដ្ឋភាពកម្មករនៅ រោងចក្រដំឡើងកង់ក្នុងក្រុងបាវិត ជ្រួលច្របល់រត់ប្រសេចប្រសាចចេញពីរោងចក្រ។ ក្រោយហេតុការណ៍នេះ កើតឡើងអភិបាលខេត្តស្វាយរៀងបញ្ជាក់ថា ករណីនេះគឺកើតចេញពីការយល់ច្រឡំ និងការបំផុសបំផុលព័ត៌ មានមិនពិតប៉ុណ្ណោះ៕ អត្ថបទ៖ គង់ ឌិន

បណ្ដាញសង្គម

ព័ត៌មានថ្មីៗ

សម្ដេចមហាបវរធិបតី ហ៊ុន ម៉ាណែត និងលោកជំទាវបណ្ឌិត អញ្ជើញរាប់បាត្រថ្ងៃភ្ជុំបិណ្ឌ វត្តហរិរក្សរាជិនី ហៅវត្តវាំងចាស់

កងទ័ពអាកាសអ៊ុយក្រែន បញ្ចេញវីដេអូយន្តហោះចម្បាំង F-16 បាញ់ទម្លាក់យានដ្រូន

បាតុករអ៊ីស្រាអែល ដង្ហែរក្បួននៅទីក្រុងហ្សេរុយសាឡឹម និងតែល អាវីវ ទាមទារបញ្ចប់សង្រ្គាមហ្កាហ្សា

ជនស៊ីវិលវេណេស៊ុយអេឡា ហ្វឹកហាត់ប្រើអាវុធជាមួយយោធា ខណៈភាពតានតឹងកើនឡើងជាមួយអាមេរិក

លោក Trump៖ រឿងអាក្រក់នឹងកើតឡើង បើសិនអាហ្វហ្គានីស្ថាន មិនប្រគល់មូលដ្ឋានទ័ពអាកាស Bagram

គោរពច្បាប់ចរាចរណ៍ស្មើនឹងគោរពជីវិតខ្លួនឯង! គ្រោះថ្នាក់ចរាចរណ៍ទូទាំង ប្រទេសនៅថ្ងៃទី២១ កញ្ញា កើតឡើងចំនួន ៩លើក បណ្តាលឲ្យមនុស្សស្លាប់៧នាក់ និងរបួសធ្ងន់ស្រាល ១១នាក់

អំពើហិង្សាផ្ទុះឡើង អំឡុងការដង្ហែរក្បួនប្រឆាំងអំពើពុករលួយនៅហ្វីលីពីន

អង់គ្លេស អូស្រ្តាលី និងកាណាដា ចេញសេចក្តីថ្លែងការណ៍ទទួលស្គាល់រដ្ឋប៉ាឡេស្ទីន

ពលរដ្ឋកហ្កាហ្សាជម្លៀសខ្លួនពិបាកធ្វើដំណើរ ខណៈពួកគេរត់ភៀសខ្លួនទៅកាន់តំបន់ភាគខាងត្បូង

មេបញ្ជាការកងទ័ពតាលីបង់ច្រានចោលកិច្ចប្រជុំពាក់ព័ន្ធនឹងមូលដ្ឋានទ័ពអាកាស Bagram

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877

នយោបាយ និង ការអភិវឌ្ឍន៍

កាកបាទក្រហមទទួលប្រាក់ ១លានដុល្លារ ពីក្រុមហ៊ុន ជីប ម៉ុង សម្រាប់សាងសង់ផ្ទះជូនអតីតយុទ្ធជន

ក្រសួងផែនការ បន្តកំណត់អត្តសញ្ញាណពលរដ្ឋក្រីក្រ សម្រាប់កម្មវិធី ជំនួយសង្គមជាសាច់ប្រាក់ក្រោយការបិទខ្ទប់

ពន្ធនាគារខេត្តកណ្តាល ដាក់ជាតំបន់ក្រហម ក្រោយរកឃើញសង្ស័យវិជ្ជមានកូវីដ-១៩ លើអ្នកទោសមួយចំនួន

ក្រសួងមហាផ្ទៃតម្រូវឲ្យអ្នកទោសទូទាំងប្រទេសមុនចូលពន្ធនាគារត្រូវតេស្តរកកូវីដ-១៩ និងធ្វើចត្តាឡីស័ក

អាជ្ញាធរខេត្តស្វាយរៀង បញ្ជាក់អំពីហេតុការណ៍កម្មកររោងចក្រនៅក្រុងបាវិត ជ្រួលយោបល់ទាក់ទងនិងយកសំណាកកូវីដ-១៩

ក្រុមហ៊ុនល្មើសច្បាប់ពាណិជ្ជកម្មនៅកម្ពុជា នឹងរងផាកពិន័យពី១លានរៀលដល់១០លានរៀល

ពលរដ្ឋជាង២.៣៦លានទទួលបានវ៉ាក់សាំង ក្នុងនោះជាង១.៧៥លាននាក់ទទួលបានទាំងពីរដូសរួចរាល់

កម្មករដែលរត់ចេញដោយជ្រួលច្របល់នៅស្វាយរៀង គឺដោយសារការយល់ច្រលំ និងការបំផុសបំផុល

បណ្ដាញសង្គម

ព័ត៌មានថ្មីៗ

អាស័យដ្ឋាន

ផែនទី

ទាញយកកម្មវិធី

នយោបាយ​ និង ការអភិវឌ្ឍន៍

កាកបាទក្រហម​ទទួល​ប្រាក់​ ១​លាន​ដុល្លារ​ ពី​ក្រុមហ៊ុន ជីប ម៉ុង សម្រាប់​សាងសង់​ផ្ទះ​ជូន​អតីត​យុទ្ធជន​

ពន្ធនាគារ​ខេត្តកណ្តាល ដាក់​ជា​តំបន់​ក្រហម ក្រោយ​រកឃើញ​សង្ស័យ​វិជ្ជមាន​កូ​វីដ​-១៩​ លើ​អ្នកទោស​មួយចំនួន

ក្រុមហ៊ុន​ល្មើសច្បាប់​ពាណិជ្ជកម្ម​នៅ​កម្ពុជា​ នឹង​រង​ផាក​ពិន័យ​ពី​១​លាន​រៀល​ដល់​១០​លាន​រៀល​

ពលរដ្ឋ​ជាង​២​.៣៦​លាន​​ទទួល​បាន​វ៉ាក់សាំង​ ក្នុង​នោះ​ជាង​១​.៧៥​លាន​នាក់​ទទួល​បាន​ទាំង​ពីរ​ដូស​រួច​រាល់

កម្មករដែលរត់ចេញដោយជ្រួលច្របល់នៅស្វាយរៀង គឺដោយសារការយល់ច្រលំ និងការបំផុសបំផុល

បណ្ដាញសង្គម

ព័ត៌មានថ្មីៗ

អាស័យដ្ឋាន

ផែនទី

ទាញយកកម្មវិធី

នយោបាយ និង ការអភិវឌ្ឍន៍

កាកបាទក្រហមទទួលប្រាក់ ១លានដុល្លារ ពីក្រុមហ៊ុន ជីប ម៉ុង សម្រាប់សាងសង់ផ្ទះជូនអតីតយុទ្ធជន

ពន្ធនាគារខេត្តកណ្តាល ដាក់ជាតំបន់ក្រហម ក្រោយរកឃើញសង្ស័យវិជ្ជមានកូវីដ-១៩ លើអ្នកទោសមួយចំនួន

ក្រុមហ៊ុនល្មើសច្បាប់ពាណិជ្ជកម្មនៅកម្ពុជា នឹងរងផាកពិន័យពី១លានរៀលដល់១០លានរៀល

ពលរដ្ឋជាង២.៣៦លានទទួលបានវ៉ាក់សាំង ក្នុងនោះជាង១.៧៥លាននាក់ទទួលបានទាំងពីរដូសរួចរាល់