នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
គម្រោងស្ពានឆ្លងកាត់ទន្លេបាសាក់ (ចាក់អង្រែក្រោម-ព្រែកប្រា) និងផ្លូវតភ្ជាប់ សម្រេចបាន ៤៥% ហើយ ដែលលឿនជាងផែនការ ៤,១១%
សម្ដេចធិបតី អំពាវនាវដល់ជនរួមជាតិជឿទុកចិត្តលើរាជរដ្ឋាភិបាល​ដែលកំពុង​ធ្វើកិច្ច​ការងារ​យ៉ាង​សកម្ម​ស្វែង​រក​ដំណោះស្រាយបញ្ចប់បញ្ហាព្រំដែនកម្ពុជា-ថៃ ឱ្យបានឆាប់រហ័ស
សម្ដេចធិបតីផ្ដល់អនុសាសន៍៧ចំណុច ដល់ក្រសួង-ស្ថាប័នពាក់ព័ន្ធឱ្យយកចិត្តទុកដាក់ក្នុងឱកាសទិវាអក្ខរកម្មអន្តរជាតិ ៨ កញ្ញា ២០២៥
សម្ដេចធិបតី៖ រាជរដ្ឋាភិបាលប្តេជ្ញាចិត្តយ៉ាងមុតមាំលើកកម្ពស់ការងារអក្ខរកម្ម និងបំពាក់បំប៉ន ជំនាញ និងឱកាសសិក្សាពេញមួយជីវិត ជាពិសេសជំនាញឌីជីថល

នយោបាយ​ និង ការអភិវឌ្ឍន៍

ស្រ្តីកម្ពុជាជាង៩០ភាគរយ ក្នុងវិស័យការងារមិនទាន់បានទទួលកិច្ចគាំពារមាតុភាព

2021/05/01 07:57:25 am        206
Facebook Telegram Linkin
ភ្នំពេញ ៖  អង្គការអុកស្វាម (Oxfam) នៅថ្ងៃនេះ បានប្រកាសបើកយុទ្ធនាការកិច្ចគាំពារមាតុភាពក្នុងទិវាពលកម្មអន្តរជាតិ ដើម្បីបង្កើនការយកចិត្តទុកដាក់ទៅដល់កម្មការិនីនៅតាមវិស័យនានា ជាពិសេសនៅក្នុងវិស័យសេដ្ឋកិច្ចក្រៅប្រព័ន្ធ ដែលជារឿយៗពុំទាន់ត្រូវបានគេគិតគូរពេញលេញនៅឡើយ ទាំងនៅប្រទេសកម្ពុជា និងតំបន់អាស៊ាន។នៅក្នុងសេចក្តីប្រកាសព័ត៌មាន នៅព្រឹកថ្ងៃទី១ ខែឧសភា ឆ្នាំ២០២១ ក្នុងឱកាសទិវាពលកម្មអន្តរជាតិលើកទី១៣៥នាឆ្នាំនេះ អង្គការអុកស្វាម បានលើកឡើងថា ឆ្នាំនេះអង្គការ និងដៃគូនៅកម្ពុជា ឡាវ និងវៀតណាម បានរួមគ្នារៀបចំយុទ្ធនាការកិច្ចគាំពារមាតុភាពមួយ ក្នុងគោលបំណងលើកកម្ពស់ការយកចិត្តទុកដាក់ និងដោះស្រាយលើរាល់បញ្ហាប្រឈមរបស់កម្មការិនីនៅក្នុងវិស័យខាងលើ ដើម្បីទទួលបានកិច្ចគាំពារមាតុភាពពេញលេញ និងសមស្រប និងខណៈដែលនៅក្នុងប្រទេសកម្ពុជាស្ត្រីប្រមាណជាង ៩០ភាគរយ ក្នុងវិស័យការងារមិនទាន់បានទទួលកិច្ចគាំពារមាតុភាពនៅឡើយទេ ដោយសារស្ថានភាពការងារក្រៅប្រព័ន្ធរបស់ពួកគេ ដែលយុទ្ធនាការនេះមានរយៈពេល ២ខែ ធ្វើឡើងតាមប្រព័ន្ធ អនឡាញ។លោកស្រី លឹម សូលីន នាយិកាអង្គការ អុកស្វាម មានប្រសាសន៍ថា កិច្ចគាំពារមាតុភាព គឺជាសិទ្ធិមូលដ្ឋាន និងសិទ្ធិនៅក្នុងរដ្ឋធម្មនុញ្ញ ហើយកិច្ចគាំពារនេះ គឺជាការចាំបាច់ណាស់ក្នុងការសម្រេចបាននូវសមភាពយេនឌ័រ សុខុមាលភាព និងសុខភាពរបស់ម្តាយនិងកូន ក៏ដូចជាក្នុងការទទួលបានឱកាស និងភាពស្មើគ្នាក្នុងវិស័យការងាររវាងស្រ្តី និងបុរស ក៏ដូចជាពលរដ្ឋក្នុងក្រុមផ្សេងៗផងដែរ។នៅក្នុងសេចក្តីប្រកាសខាងលើនេះ ឯកឧត្តម ថេ ឈុនហាក់ អគ្គនាយកសមភាពយេនឌ័រ និងអភិវឌ្ឍសេដ្ឋកិច្ច នៃក្រសួងកិច្ចការនារី បានបញ្ជាក់ថា កិច្ចគាំពារមាតុភាព គឺជាតម្លៃរបស់មនុស្សទូទៅ និងជាមូលដ្ឋាន នៃសមភាពយេនឌ័រ និងសេដ្ឋកិច្ចដែលគិតគូរលើការគាំពារនិងថែទាំ។ នៅកម្ពុជា ការចូលរួមនៃកម្លាំងពលកម្មស្ត្រីកំពុងតែមានការកើនឡើងជាលំដាប់ ហើយតម្រូវការកិច្ចគាំពារមាតុភាពកាន់តែមានសារៈសំខាន់ និងត្រូវយកចិត្តទុកដាក់សម្រាប់គ្រប់ៗគ្នា។ ឯកឧត្តម លើកឡើងបន្តថា ក្រសួងកិច្ចការនារី តាមរយៈផែនការយុទ្ធសាស្ត្រ នារីរតនទី៥ ឆ្នាំ២០១៩-២០២៣ បានប្តេជ្ញាចិត្តក្នុងការលើកកម្ពស់ការយកចិត្តទុកដាក់ និងការទទួលខុសត្រូវពីគ្រប់មជ្ឈដ្ឋានលើរបៀបវារៈនេះ។ របាយការណ៍របស់ធនាគារពិភពលោក ឆ្នាំ២០២០ បានឱ្យដឹងថា ស្ត្រីដែលស្ថិតនៅក្នុងវ័យសកម្មក្នុងការពរពោះនៅចន្លោះពីអាយុ ២៥ដល់៣៤ឆ្នាំ ហាក់មានចំនួនច្រើនលើសលប់នៅក្នុងចំណោមអ្នកមានជីវភាពខ្វះខាត។ សម្រាប់កម្ពុជា ស្ត្រីចំណាយពេលជាមធ្យម ៣.៥ម៉ោង ច្រើនជាងបុរសទៅលើការមើលថែកូនដោយមិនទទួលបានប្រាក់ចំណូល និងការងារផ្ទះ សូម្បីតែអំឡុងមានផ្ទៃពោះ និងមាតុភាពក៏ដោយ ហើយជាពិសេសក្នុងអំឡុងពេលនៃជំងឺរាតត្បាតកូវីដ១៩តែម្តង៕អត្ថបទ ៖ បូរ៉ាវី 

សម្តេចតេជោ បន្តអំពាវនាវ ដល់ម្ចាស់រោងចក្រ សហគ្រាស និងកម្មករនិយោជិត ចូលរួមយុទ្ធនាការចាក់វ៉ាក់សាំងកូវីដ-១៩

2021/05/01 10:03:26 am        277
Facebook Telegram Linkin
ភ្នំពេញ ៖ ថ្ងៃនេះសម្តេចតេជោ ហ៊ុន សែន នាយករដ្ឋមន្ត្រី បានផ្ញើសារលិខិតទៅកាន់ជនរួមជាតិក្នុង ឱកាសខួបអនុស្សាវរីយ៍លើកទី១៣៥ នៃទិវាពលកម្មអន្តរជាតិ១ឧសភា ឆ្នាំ២០២១។តាមរយៈសាលិខិតនេះ សម្តេច ក៏បានអំពាវនាវ ដល់ម្ចាស់រោងចក្រ សហគ្រាស និងបងប្អូន កម្មករនិយោជិត ចូលរួមយុទ្ធនាការចាក់វ៉ាក់សាំងកូវីដ-១៩ អនុវត្តអោយបានហ្មត់ចត់បំផុត។សម្តេច បានមានប្រសាសន៍ថា ទោះបីជាស្ថិតក្នុងស្ថានភាពដ៏លំបាកនៃជំងឺកូវីដ-១៩ក៏ដោយ រាជរដ្ឋាភិបាលនៅតែខិតខំបន្តរក្សាការងារ ដែលមានស្រាប់ និងបង្កើតការងារថ្មីគ្រប់ប្រភេទជូនប្រជាពលរដ្ឋ ដែលនាំឱ្យផលប៉ះពាល់លើចំនួនការងារស្ថិត ក្នុងកម្រិតមួយដែលអាចគ្រប់គ្រងបាន។ ជាក់ស្ដែង រោងចក្រ សហគ្រាសចំនួន ១ ១០៣ បានបើកដំណើរការថ្មី ដែលផ្តល់ការងារដល់កម្មករនិយោជិតសរុបជាង ៦ម៉ឺននាក់បន្ថែម។ លើសពីនេះ ចំនួនរោងចក្រ សហគ្រាស ដែលបានព្យួរកិច្ចសន្យាការងារបានធ្លាក់ចុះពីចំណុចកំពូលនៅខែមិថុនា ឆ្នាំ២០២០ ពីចំនួន ៤៣៣ ស្មើនឹងកម្មករ និយោជិតជាង ១៥ម៉ឺននាក់ មកត្រឹម ១៥០រោងចក្រ សហគ្រាស ស្មើនឹងកម្មករជាង ២ម៉ឺននាក់ គិតត្រឹមបំណាច់ ឆ្នាំ២០២០ និងបន្តធ្លាក់ចុះជាបណ្តើរ ៗផងដែរ។ ទន្ទឹមនឹងនេះ ទីភ្នាក់ងារជាតិមុខរបរ និងការងារ ក៏បានចុះឈ្មោះ ស្វែងរកការងារចំនួន ១៧ ២០១នាក់, បានផ្សព្វផ្សាយព័ត៌មានជ្រើសរើសកម្លាំងពលកម្មចំនួន ១៨៤ ៨០៨នាក់ និងបានបន្តជួយស្វែងរកការងារធ្វើជូនប្រជាពលរដ្ឋតាមមូលដ្ឋានភូមិឃុំ។កន្លងទៅនេះ ដើម្បីជំរុញការអនុវត្តគោលនយោបាយស្តីពីការអភិវឌ្ឍវិស័យឧស្សាហកម្ម សម្តេចផ្ទាល់បាន ចុះជួបជាមួយបងប្អូនកម្មករនិយោជិត បានចំនួន៧៧លើក សរុបកម្មករនិយោជិតចំនួនប្រមាណជិត ១លាននាក់ គិតចាប់ពីឆ្នាំ២០១៧ ដល់ឆ្នាំ២០១៩ ដែលតាមរយៈជំនួបទាំងនេះ បានរកឃើញបញ្ហាមួយចំនួន និងបានដាក់ ចេញនូវគោលការណ៍ និងវិធានការជាច្រើន ជាពិសេសអនុសាសន៍១០ចំណុច ដើម្បីលើកកម្ពស់ជីវភាព សុខុមាលភាពកម្មករនិយោជិត និងទំនាក់ទំនងវិជ្ជាជីវៈ ហើយសម្តេចនឹងបន្តសកម្មភាព នេះជារៀងរហូតនៅក្នុងតំណែង របស់សម្តេច ជានាយករដ្ឋមន្ត្រី នៃព្រះរាជាណាចក្រកម្ពុជា។ ប៉ុន្តែសម្តេចក៏សូមការអធ្យាស្រ័យ ដែលនៅឆ្នាំ២០២១នេះ យើងមិនអាចរៀបចំការជួបជុំដូចសព្វដង ដោយសារការរីករាលដាលជាសកលនៃជំងឺកូវីដ-១៩ ដែលកំពុងគំរាម កំហែងសុខភាពសាធារណៈ សេចក្តីសុខ និងអាយុជីវិតប្រជាជនកម្ពុជា ក៏ដូចជាប្រជាជនទូទាំងសកលលោក។ជាមួយនឹងសមិទ្ធផលគួរជាទីមោទនៈលើវិស័យការងារសម្តេច ក៏បញ្ជាក់ថា ជាអកុសល វិបត្តិនៃការផ្ទុះឡើងនៃជំងឺកូវីដ-១៩បានជះ ឥទ្ធិពលយ៉ាងធ្ងន់ធ្ងរដល់ពិភពលោក និងបានធ្វើឱ្យប៉ះពាល់ដល់សេដ្ឋកិច្ចសកល ហើយប្រទេសកម្ពុជាក៏មិន អាចចៀសផុតពីផលប៉ះពាល់យ៉ាងធំធេងក្នុងសង្គម-សេដ្ឋកិច្ចនេះផងដែរ ហើយដើម្បីធ្វើការឆ្លើយតបទៅនឹងវិបត្តិ នៃជំងឺកូវីដ-១៩ រាជរដ្ឋាភិបាលបានដាក់ចេញនូវកញ្ចប់វិធានការអន្តរាគមន៍ចំនួន ៧ជុំ រួចមកហើយ។សម្តេច បន្តថា ព្រឹត្តិការណ៍​សហគមន៍ ២០ កុម្ភៈ បានបណ្តាលឱ្យ ករណី​វិជ្ជមាននៃជំងឺកូវីដ-១៩ កើនឡើងយ៉ាង គំហុក និងគួរឱ្យព្រួយបារម្ភ ព្រមទាំងបានឆក់យកអាយុជីវិតអ្នកឆ្លងជំងឺកូវីដ-១៩ ផងដែរ។ រាជរដ្ឋាភិបាលបាន បន្តដាក់ចេញនូវកញ្ចប់វិធានការអន្តរាគមន៍ជុំទី៨ ដើម្បីបន្តគ្រប់គ្រងផលប៉ះពាល់លើវិស័យសំខាន់ៗនៃសេដ្ឋកិច្ចនៅក្នុងបរិការណ៍នៃវិបត្តិជំងឺកូវីដ-១៩នេះ ក្នុងគោលបំណង (១) កាត់បន្ថយផលប៉ះពាល់មកលើស្ថានភាពសង្គម សេដ្ឋកិច្ចដែលបណ្តាលមកពីការឆ្លងនៃព្រឹត្តិការណ៍សហគមន៍ ២០ កុម្ភៈ, (២) បន្តសុពលភាពនៃវិធានការដែល បានដាក់ចេញនាពេលកន្លងមក ដែលនឹងផុតកំណត់ក្នុងពេលឆាប់ៗខាងមុខ , (៣) បន្តដាក់ចេញ និងអនុវត្តនូវ វិធានការទ្រទ្រង់ និងស្តារអាជីវកម្ម និងធុរកិច្ច ឱ្យងើបឡើងវិញ ដើម្បីចូលរួមជំរុញកំណើនសេដ្ឋកិច្ចក្នុងបរិការណ៍ ក្រោយវិបត្តិនៃជំងឺកូវីដ-១៩ និង (៤) បន្តជួយទំនុកបម្រុងជីវភាពប្រចាំថ្ងៃរបស់គ្រួសារក្រីក្រ និងងាយរងគ្រោះ តាមរយៈកម្មវិធីឧបត្ថម្ភសាច់ប្រាក់ ដែលរួមមាន ៖១-វិធានការបន្តជួយវិស័យវាយនភណ្ឌ កាត់ដេរ ផលិតស្បែកជើង ផលិតផលធ្វើដំណើរនិងកាបូប និងវិស័យទេសចរណ៍បន្ទាប់ពី រោងចក្រ សហគ្រាស និងអាជីវកម្ម ក្នុងវិស័យវាយនភណ្ឌ កាត់ដេរ ផលិតស្បែកជើង ផលិតផលធ្វើដំណើរនិងកាបូប និងវិស័យទេសចរណ៍ ទទួលបានលិខិតអនុញ្ញាតឱ្យព្យួរកិច្ចសន្យាការងារពី ក្រសួងការងារ និងបណ្តុះបណ្តាលវិជ្ជាជីវៈ ដោយផ្អែកតាមលក្ខខណ្ឌនៃការព្យួរកិច្ចសន្យាការងារ រាជរដ្ឋាភិ បាល។ក្នុងនាមរាជរដ្ឋាភិបាល សម្តេចបានបន្តអំពាវនាវ ជាថ្មីម្ដងទៀតដល់ម្ចាស់រោងចក្រ សហគ្រាស និងបងប្អូន កម្មករនិយោជិត ចូលរួមយុទ្ធនាការចាក់វ៉ាក់សាំងកូវីដ-១៩ ដោយស្ម័គ្រចិត្ត និងអនុវត្តឱ្យបានហ្មត់ចត់បំផុតនូវ វិធានការបង្ការ និងទប់ស្កាត់ការរីករាលដាលនៃជំងឺកូវីដ-១៩ តាមរយៈការអនុវត្តវិធាន «៣ការពារ» និង «៣កុំ»៕អត្ថបទ មុត សុទ្ធ

អាជ្ញាធរបន្ដបិទខ្ទប់ តំបន់មួយចំនួនទៀត ក្នុងក្រុងសៀមរាប ខណៈរកឃើញអ្នកជំងឺកូវីដ១៩ចំនួន១៥នាក់បន្ថែមទៀត

2021/04/30 01:50:58 pm        113
Facebook Telegram Linkin
សៀមរាប ៖ រដ្ឋបាលខេត្តសៀមរាប តំបន់មួយចំនួន នៅក្រុងសៀមរាប បានបន្ដបិទខ្ទប់មិនចេញចូល ព្រមទាំងផ្អាកការលក់ដូរគ្រឿងស្រវឹងបណ្ណោះអាសន្ន ខណៈដែលអាជ្ញាធរខេត្ដនេះ ​បានរកឃើញអ្នកឆ្លងជំងឺកូវីដ១៩ ចំនួន១៥នាក់បន្ថែមទៀត កាលពីថ្ងៃទី២៩ ខែមេសា ឆ្នាំ២០២១នេះ។សេចក្ដីប្រកាសព័ត៌មានរបស់រដ្ឋបាលខេត្ដសៀមរាប ចេញផ្សាយកាលពីថ្ងៃទី២៩ខែមេសានេះ បានបង្ហាញថា អ្នកឆ្លងកូវីដ១៩ចំនួន១៣ជាធ្វើដំណើរមកពីខេត្ដផ្សេង រួមមាន រាជធានីភ្នំពេញ ខេត្ដកំពង់ធំ និងខេត្ដព្រះសីហនុ និង២នាក់ជាអ្នកឆ្លងនៅក្នុងសហគមន៍នៃខេត្ដសៀមរាប។បច្ចុប្បន្ន ក្រុមការងារស្រាវជ្រាវ និងតាមដានបុគ្គលសង្ស័យថា មានផ្ទុកជំងឺកូវីដ-១៩ នៅក្នុងខេត្តសៀមរាប កំពុងកំណត់មុខសញ្ញាអ្នកពាក់ព័ន្ធដោយផ្ទាល់ និងដោយប្រយោលជាមួយអ្នកវិជ្ជមានជំងឺកូវីដ ១៩ ទាំង១៥រូបខាងលើ។ លិខិតដដែល បានបន្ដថា គណៈបញ្ជាការ ឯកភាពរដ្ឋបាលខេត្ត នឹងដាក់ចេញនូវវិធានការទប់ស្កាត់នៃការឆ្លងរាលជំងឺកូវីដ-១៩ ជាជំហានៗ ទៅតាម លទ្ធផលនៃការស្រាវជ្រាវ នឹងទទួលបានជាបន្តបន្ទាប់ ហើយរដ្ឋបាលខេត្ត នឹងចេញសេចក្តីប្រកាសព័ត៌មាន បញ្ជាក់ជូននាពេលខាងមុខ។ក្នុងសេចក្ដីបប្រកាសព័ត៌មានដដែល ក៏​អំពាវនាវឱ្យប្រជាពលរដ្ឋដែលរស់នៅក្នុងខេត្តសៀមរាប បង្កើនការប្រុងប្រយ័ត្នខ្ពស់ ចូលរួមអនុវត្តវិធានការការពារ ការពារ ៣កុំ និងត្រូវអនុវត្តកាតព្វកិច្ចពាក់ម៉ាស និងកាតព្វកិច្ចរក្សាគម្លាត សុវត្ថិភាព ជាពិសេសត្រូវអនុវត្តវិធានការរដ្ឋបាល និងវិធានការចត្តាឡីស័ក។ បុគ្គលទាំងឡាយណាល្មើសនឹង វិធានការនេះ នឹងប្រឈមទទួលការផ្តន្ទាទោសពិន័យអន្តរការណ៍ ឬដាក់ពន្ធនាគារ ដោយអនុលោមតាមខ្លឹមសារ ច្បាប់ និងលិខិតបទដ្ឋានគតិយុត្តជាធរមាន។ជាមួយគ្នានោះដែរ ក្នុងបរិបទនៃការឆ្លងរាលដាលនៃជំងឺកូវីដ-១៩ ក្នុងព្រឹត្តការណ៍សហគមន៍ ២០ កុម្ភៈនេះ អាជ្ញាធរខេត្ដសៀមរាប ក៏​បានបន្ដផ្អាកជាបណ្ដោះអាសន្ន នូវការលក់គ្រឿងស្រវឹងគ្រប់ប្រភេទក្នុងភូមិសាស្ត្រខេត្តសៀមរាប រយៈពេល២សប្តាហ៍ ចាប់ពីថ្ងៃទី២៩ ខែមេសា រហូតដល់ថ្ងៃទី១២ ខែឧសភា ឆ្នាំ២០២១ ក្នុងគោលបំណងធានាដល់ប្រសិទ្ធភាពនៃការគ្រប់គ្រង ការឆ្លងរាលដាលនៃជំងឺកូវីដ-១៩ និងការពារអាយុជីវិតរបស់ប្រជាពលរដ្ឋ សុខភាពសាធារណៈ និង សណ្តាប់ធ្នាប់សាធារណៈ ព្រមទាំងអនុលោមទៅតាមច្បាប់ស្តីពីវិធានការទប់ស្កាត់ការឆ្លងរាលដាលន កូវីដ-១៩ និងជំងឺឆ្លងកាចសាហាវ និងប្រកបដោយគ្រោះថ្នាក់ធ្ងន់ធ្ងរផ្សេងទៀត និងលិខិតបទដ្ឋានគតិយុត្ត ជាធរមាន រដ្ឋបាលខេត្តសៀមរាប។ លិខិតក៏​បានហាមឃាត់រាល់ការជួបជុំប្រមូលផ្តុំគ្នាពីគេហដ្ឋានមួយទៅគេហដ្ឋាន ឬទីកន្លែងផ្សេងៗ ដើម្បីពិសារគ្រឿង ស្រវឹង និងការចាក់ឧបករណ៍បំពងសំឡេង​ការច្រៀង រាំកម្សាន្ត ត្រូវហាមជាដាច់ខាតផងដែរ។ក្នុងករណីបុគ្គលណា ឬម្ចាស់ ឬអ្នកគ្រប់គ្រងក្រុមហ៊ុន សហគ្រាស ដេប៉ូចែកចាយ សណ្ឋាគារ ផ្ទះសំណាក់ ភោជនីយដ្ឋាន អាហារដ្ឋាន ផ្សាររដ្ឋ-ឯកជន ផ្សារទំនើប ផ្សារម៉ត ហាងលក់កសត្វ តូបអាហារ ហាងកាហ្វេ អាជីវកម្មដ្ឋាន សេវាកម្មដ្ឋាន និងកន្លែងលក់ទំនិញគ្រប់ប្រភេទ បងប្អូន អាជីវករ ប្រជាពលរដ្ឋ និងសាធារណជន មិនអនុវត្តតាមការណែនាំខាងលើ អាជ្ញាធរមាន សមត្ថកិច្ចនឹងចាត់វិធានការស្របតាមនីតិវិធីច្បាប់ និងលិខិតបទដ្ឋាន់គតិយុត្តជាធរមាន។សូមជម្រាបថា ព្រឹត្តិការណ៍សហគមន៍២០កុម្ភៈ ខេត្តសៀមរាប បានរកឃើញអ្នកជំងឺកូវីដ១៩កើនឡើងដល់ចំនួន៣៦នាក់ក្នុងនោះ ១២នាក់ បានព្យាបាលជាសះស្បើយ និងមួយចំនួនទៀតកំពុងសំរាកនៅមន្ទីរពេទ្យបង្អែកខេត្ដសៀមរាប ៕អត្ថបទ ៖ សាវី 

រកឃើញកម្មកររោងចក្រដេកាបូបPV នៅស្រុកបាទីចំនួន១២នាក់ ផ្ទុកជំងឺកូវីដ១៩

2021/04/30 01:39:13 pm        306
Facebook Telegram Linkin
តាកែវ ៖ ប្រធានមន្ទីរសុខាភិបាលខេត្តតាកែវ លោកវិជ្ជបណ្ឌិត នុត ស៊ីណាត បានថ្លែងឲ្យដឹងថា រហូតមកដល់ពេលនេះ មន្រ្តីជំនាញសុខាភិបាលបានរកឃើញបងប្អូនកម្មករខ្មែរ និងអ្នកធ្វើការជាជនជាតិនៅរោងចក្រដេកាបូប PV ដែលមានតីតាំងនៅក្នុងឃុំឃ្លាំងសម្បត្តិ ស្រុកបាទី ខេត្តតាកែវ ចំនួន១២នាក់ ហើយដែលផ្ទុកជំងឺកូវីដ១៩។លោកប្រធានមន្ទីរសុខាភិបាលខេត្តតាកែវ បានប្រសាសន៍បន្តថា ចំពោះរោងចក្រដេកាបូបPV រហូតមកដល់ពេលនេះ មានកម្មករខ្មែរ និងអ្នកធ្វើការជាជនជាតិចិនចំនួន១២នាក់ ត្រូវបានរកឃើញផ្ទុកចំងឺកូវីដ១៩ និងកម្មករខ្មែរម្នាក់ទៀត ដែលបំរើការនៅរោងចក្រផ្សេងក៏​ត្រូវបានរកឃើញមានផ្ទុកចំងឺកូវីដ១៩ផងដែរ។លោកវិជ្ជបណ្ឌិត នុត ស៊ីណាត បានថ្លែងបន្តថា បច្ចប្បន្ននេះ មន្រ្តីជំនាញសុខាភិបាលបានយកសំណាក់កម្មករជាង២០០នាក់ហើយទៅធ្វើតេស្តរកជំងឺកូវីដ១៩ និងបន្តតាមយកសំណាកបងប្អូនកម្មករមួយចំនួនទៀតផងដែរ ដោយឡែកយើងក៏​បានធ្វើការណែនាំ​ដល់បងប្អូនកម្មករដែលយកសំណាកហើយត្រូវធ្វើចត្តាឡីស័ក អោយបានត្រឹមត្រូវទៅតាមការណែនាំ​របស់មន្រ្តីសុខាភិបាល ហើយអាជ្ញាធមូលដ្ឋាន​ក៏​និងតាមដានការធ្វើចត្តាឡីស័ក របស់បងប្អូនកម្មករផងដែរ។លោក ម៉ឹង វីរីយ៉ា ប្រធានមន្ទីរការងារ និងបណ្ដុះបណ្ដាលវិជ្ជាជីវៈខេត្តតាកែវ បានឲ្យដឹងថា រហូតមកដល់ពេលនេះ មានរោងចក្រចំនួន៤ហើយដែលត្រូវបានបិទបណ្ដោះអាសន្នដោយសារតែមានការជាប់ពាក់ព័ន្ធ និងជំងឺកូវីដ១៩ ដោយក្នុងនោះរោងចក្រចំនួន២បានបិទដោយខ្លួនឯង និង២ទៀតត្រូវបានអាជ្ញាធស្នើអោយបិទបណ្ដោះអាសន្ន ​ហើយរោងចក្រខ្លះនិងបើកដំណើរវិញនៅថ្ងៃ៣ ខែឧសភា ខាងមុខនេះ៕ដោយ៖គុជ វិភាគ

បងប្អូនកម្មករ និយោជិក មកចាក់វ៉ាក់សាំងបង្ការជំងឺកូវីដ-19 ដូសទី២ ប្រភេទស៊ីណូវ៉ាក់ នៅទីតាំងក្រសួងបរិស្ថាន

2021/04/30 01:12:52 pm        104
Facebook Telegram Linkin
ភ្នំពេញ ៖ បងប្អូនកម្មករ និយោជិកតាមរោងចក្រ សហគ្រាស ក្នុងមួយថ្ងៃចន្លោះពី៤០០នាក់ ទៅ៨០០នាក់ បានមកចាក់វ៉ាក់សាំងបង្ការជំងឺកូវីដ-19 ដូសទី២ ប្រភេទស៊ីណូវ៉ាក់ នៅទីតាំងក្រសួងបរិស្ថាន។បើតាមអ្នកស្រី សួន សុខេននារី អនុប្រធានក្រុម និងជាប្រធានក្រុមគ្រូពេទ្យស្ម័គ្រចិត្ត នៃក្រសួងការងារបណ្តុះបណ្តាល និងវិជ្ជាជីវៈ ប្រចាំនៅទីតាំងក្រសួងបរិស្ថាន ប្រាប់BTV ព័ត៌មាននាព្រឹកថ្ងៃទី៣០ ខែមេសា ឆ្នាំ២០២១នេះថា ​ក្រុមការងារគ្រូពេទ្យស្ម័គ្រចិត្តក្រសួងការងារ ​បានរៀបចំការចាក់វ៉ាក់សាំងកូវីដ១៩ នៅទីតាំងនេះ ដើម្បីចាក់វ៉ាក់សាំងកូវីដ១៩​ ដូសទី២ ប្រភេទស៊ីណូវ៉ាក់ ជូនបងប្អូនកម្មករ និយោជិក នៅតំបន់បិទខ្ទប់ក្នុងខណ្ឌចំការមន​ រាជធានីភ្នំពេញ ដែលមិនអាចទៅចាក់វ៉ាក់សាំងនៅតាមទីតាំងដូសទី១បាន។ ដូច្នេះសូមឲ្យបងប្អូនកម្មករ និយោជិក មកចាក់វ៉ាក់សាំងកូវីដ១៩ ដូសទី២ នៅក្រសួងបរិស្ថាន ដើម្បីទប់ស្កាត់ការឆ្លងរីករាលដាលវីរុសកូវីដ-19។ជាមួយគ្នានោះដែរ បងប្អូនកម្មករ និយោជិក បានមកចាក់វ៉ាក់សាំងបង្ការជំងឺកូវីដ-19​ ដូសទី២ ប្រភេទស៊ីណូវ៉ាក់ និយាយស្រដៀងគ្នាថា ក្នុងវិបតិ្តកូវីដ១៩នេះ បានបង្ករការលំបាកជាច្រើន ក្នុងជីវភាពរស់នៅ និងការងារប្រចាំថ្ងៃផងដែរ។សូមបញ្ជាក់ផងដែរថា ក្រសួងការងារបណ្តុះបណ្តាល និងវិជ្ជាជីវៈ បើកយុទ្ធនាការចាក់វ៉ាក់សាំងបង្ការជំងឺកូវីដ១៩ ជូនកម្មករ និយោជិកតាមរោងចក្រ សហគ្រាស ប្រភេទស៊ីណូវ៉ាក់ បានចាប់ដំណើរការកាលពីថ្ងៃទី១ ខែមេសា ឆ្នាំ២០២១។ ទន្ទឹមនឹងនោះបើយោងតាមរបាយការណ៍របស់ក្រសួងសុខាភិបាល បានបង្ហាញថា ការចាក់វ៉ាក់សាំងកូវីដ១៩ទាំង៣ប្រភេទ (ស៊ីណូហ្វាម អាស្ត្រាហ្សេនីកា និងស៊ីណូវ៉ាក់) ចាក់បានចំនួន ១,០៣៤,៨៩០នាក់ហើយ។ ក្នុងនោះអ្នកចាក់លើកទី២ បានចំនួន ៦៦៦,១០៨នាក់៕អត្ថបទ ៖ រដ្ឋា 

ស្នងការភ្នំពេញ ប្រាប់ដល់កម្លាំងក្រោមឱវាទទយាមឲ្យបានតឹងរឹងបំផុតចំពោះតំបន់ក្រហមទាំងបួនខណ្ឌ

2021/04/30 01:04:52 pm        86
Facebook Telegram Linkin
ភ្នំពេញ ៖ ឧត្តមសេនីយ៍ឯក ស ថេត អគ្គស្នងការរងនគរបាលជាតិ និងជាស្នងការរាជធានីភ្នំពេញ បានក្រើនរំលឹកដល់កងកម្លាំងក្រោមឱវាទទាំងអស់ ត្រូវធ្វើការយាមកាមឲ្យបានម៉ត់ចត់ និងតឹងរឹងបំផុតចំពោះខណ្ឌទាំងបួនក្នុងរាជធានីភ្នំពេញ ដែលជាតំបន់ក្រហម ដោយមិនត្រូវអនុញ្ញាតឲ្យមានការចេញចូលប្រសេចប្រសាចនោះឡើយ លើកលែងតែមានករណីចាំបាច់ ស្របទៅតាមសេចក្តីសម្រេចរបស់រាជរដ្ឋាភិបាលកម្ពុជាលេខ៥៤ ដែលបន្តបិទខ្ទប់រយៈពេល៧ថ្ងៃបន្ថែមទៀតនោះ។ក្នុងឱកាសដឹកនាំកម្លាំងក្រោមឱវាទ ចុះអនុវត្តនៅក្នុងតំបន់ក្រហម ដែលមានករណីផ្ទុះរីករាលដាលខ្លាំងនូវជំងឺឆ្លងកូវីដ១៩នៅខណ្ឌទាំងបួន រួមមានសង្កាត់ទួលសង្កែ១ ខណ្ឌប្ញស្សីកែវនិង នៅភូមិសាស្រ្តផ្នែកមួយចំនួននៃសង្កាត់បឹងសាឡាង ខណ្ឌទួលគោក ភូមិសាស្រ្តសង្កាត់ចោមចៅ១ ខណ្ឌពោធិ៍សែនជ័យ និង ភូមិសាស្រ្តសង្កាត់ស្ទឹមានជ័យ១ ស្ទឹងមានជ័យ២ និងសង្កាត់ស្ទឹងមានជ័យ៣ ស្ថិតក្នុងខណ្ឌមានជ័យ រាជធានីភ្នំពេញជាដើមនោះ ឯកឧត្តមឧត្តមសេនីយ៍ឯក ស ថេត បានលើកឡើងថា នាពេលនេះ  កងកម្លាំងរបស់យើងទាំងអស់ បានដាក់ពង្រាយកម្លាំងការពារតាមគោលដៅនៃច្រកចេញចូលនៅគ្រប់ច្រកល្ហកក្នុងភូមិសាស្រ្តតំបន់ក្រហមទាំងអស់ ជាមួយការដាក់រនាំងដែក បិតខ្ទប់មិនឱ្យប្រជាពលរដ្ឋលួចចេញចូលឆ្លងកាត់បានឡើយ លើកលែងតែក្នុងករណីពិសេសចាំបាច់ណាមួយតែប៉ុណ្ណោះ។ឯកឧត្តមឧត្តមសេនីយ៍ឯក បានលើកឡើងបន្ថែមទៀតថា «ក្នុងនាមយើងជាកងកម្លាំងត្រូវអនុវត្តឲ្យបានដាចខាតនូវវិធានការបិទខ្ទប់ ស្របតាមសេចក្តីសម្រេចរបស់រាជរដ្ឋាភិបាលកម្ពុជារយៈពេល៧ថ្ងៃថែមទៀតដោយចាប់ពីថ្ងៃទី២៩ ខែមេសា ដល់ថ្ងៃទី៥ ខែឧសភា ខាងមុខនេះ អនុវត្តឱ្យបានត្រឹមត្រូវ ម៉ឺងម៉ាត់និងការទទួលខុសត្រូវខ្ពស់ ជាពិសេសត្រូវតាមដានត្រួតពិនិត្យគ្រប់គោលដៅច្រកចេញចូលទាំងអស់នៅតំបន់ក្រហមនេះ មិនឱ្យប្រជាពលរដ្ឋធ្វើដំណើរដោយធូរលង់នោះឡើយ ពោលគឺណែនាំពួកគាត់មានភាពស្ងប់ស្ងាត់ឱ្យចូលរួមគោរពអនុវត្តវិធានការបិទខ្ទប់តំបន់ក្រហមនេះឱ្យមានប្រសិទ្ធភាព ហើយយើងទាំងអស់គ្នាត្រូវជួយណែនាំដល់បងប្អូនប្រជាពលរដ្ឋ ដែលនៅក្នុងតំបន់បិទខ្ទប់នេះ ឲ្យពួកគាត់មានការអត់ធ្មត់ហើយ ដោយគ្មានការចាំបាច់ទេនោះ សូមកុំឲ្យពួកគាត់ចេញពីផ្ទះ ត្រូវពន្យល់គាត់ឲ្យមានការចូលរួម ទើបអាចកាត់បន្ថយ ឬកាត់ផ្តាច់ជំងឺឆ្លងកូវីដ១៩នេះ ទទួលបានជោគជ័យ»។ការអនុវត្តវិធានការបិទខ្ទប់តំបន់ក្រហមទាំងបួនខណ្ឌនៃរាជធានីភ្នំពេញនេះ ​ខណៈដែលអត្រានៃការឆ្លងរីករាលដាលជំងឺកូវីដ១៩ ក្នុងសហគមន៍ រាជធានីភ្នំពេញ ​មិនទាន់មានភាពធូរស្បើយនៅឡើយ ហើយការឆ្លងនេះនៅតែមានកំណើនខ្ពស់ ​ដែលជាក្តីបារម្ភនៅឡើយរបស់រាជរដ្ឋាភិបាលនោះ។ ប៉ុន្ដែទោះជាយ៉ាងណាក៏ដោយការបន្តអនុវត្តវិធានការបិទខ្ទប់ជំហ៊ានទី២ ដែលមានរយៈពេល៧ថ្ងៃទៀតនោះ​ គឺដើម្បីគ្រប់គ្រង និងកាត់ផ្តាច់ជំងឺឆ្លងកូវីដ១៩​ កុំឱ្យឆ្លងទៅតំបន់ផ្សេងទៀត។សូមបញ្ជាក់ថា រដ្ឋបាលរាជធានីភ្នំពេញ បានកំណត់នូវភូមិសាស្ត្រដែលត្រូវកំណត់ជាតំបន់ក្រហម តំបន់លឿងទុំ និងតំបន់លឿង ក្រោយរាជរដ្ឋាភិបាលសម្រេចបន្តបិទខ្ទប់រាជធានីភ្នំពេញ និងក្រុងតាខ្មៅ ខេត្តកណ្តាល មួយសប្តាហ៍ទៀតនោះ គឺដើម្បីឲ្យបងប្អូនប្រជាពលដែលនៅក្នុងតំបន់នោះមានការប្រុងប្រយ័ត្ន និងហាមប្រាមមិនឲ្យចេញចូលមួយរយៈនេះ គឺដើម្បីទប់ស្កាត់ការរីករាលដាលនូវមេរោគកូវីដ១៩ ​ដែលកំពុង​វាយលុកក្នុងតំបន់ទាំងនោះ។សេចក្តីសម្រេចរបស់រដ្ឋបាលរាជធានីភ្នំពេញនោះ​ ក៏បានហាមឃាត់ពីការធ្វើដំណើរ ​ការជួបជុំ និង​សកម្មភាពការងារមួយចំនួននៅតំបន់ក្រហម ​និងតំបន់លឿងទុំ​ រួមនឹងការអនុវត្តវិធានការមួយចំនួនទៀតក្នុងអំឡុងពេលបិទខ្ទប់នេះផងដែរ​ លើកលែងតែតំបន់លឿង​ ដែលមានការអនុញ្ញាតឱ្យធ្វើដំណើរ​ ប៉ុន្តែត្រូវបន្តអនុវត្តបម្រាមគោចរ ​ដោយផ្អាកជាបណ្តោះអាសន្ននូវការធ្វើចរាចរណ៍ ​និងរាល់សកម្មភាពការងារ និងអាជីវកម្ម ​នៅចន្លោះម៉ោង​៨យប់ ដល់ម៉ោង៥ភ្លឺ៕

សម្តេចតេជោ អបអរសាទរខួប២២ឆ្នាំ ដែលកម្ពុជាបានចូលជាសជិកអាស៊ាន

2021/04/30 12:44:52 pm        18
Facebook Telegram Linkin
ភ្នំពេញ ៖ ហ្វេសប៊ុករបស់សម្តេចនៅថ្ងៃនេះ សម្តេចតេជោ ហ៊ុន សែន នាយករដ្ឋមន្ត្រីបានបង្ហាញ​ការអបអរសាទរខួប២២ឆ្នាំ ដែលកម្ពុជា​បានចូលជាសជិកអាស៊ាន។សម្តេច បានសរសេរថា អបអរសាទរខួប២២ឆ្នាំ (៣០ មេសា ១៩៩៩-៣០ មេសា ២០២១) ដែលកម្ពុជាក្លាយជាសមាជិកសមាគមប្រជាជាតិអាស៊ីអាគ្នេយ៍ ហៅថាអាស៊ាន(ASEAN)។សម្តេចបញ្ជាក់ថា ចាប់តាំងពីបានក្លាយជាសមាជិកអាស៊ានមក កម្ពុជាបានធ្វើការយ៉ាងជិតស្និទ្ធជាមួយសមាជិកដទៃទៀត ក្នុងការកសាងសហគមន៍អាស៊ានមួយ ដែលផ្តោតលើប្រជាជន និងយកប្រជាជនជាស្នូល ក្នុងស្មារតីនៃភាពម្ចាស់ការ និងការទទួលខុសត្រូវរួម។បន្ទាប់ពីការស្វះស្វែងតាមនយោបាយការទូតយ៉ាងស្វិតស្វាញ និងទន់ភ្លន់ កម្ពុជាត្រូវបានអាស៊ាន សម្រេចឱ្យចូលជាសមាជិកទី១០ ក្នុងកិច្ចប្រជុំកំពូលរបស់ខ្លួននៅទីក្រុងហាណូយ ប្រទេសវៀតណាម នៅថ្ងៃទី៣០ ខែមេសា ឆ្នាំ១៩៩៩។ អាស៊ានបានក្លាយជាស្នូលមួយនៃនយោបាយការបរទេសរបស់កម្ពុជា ដែលអាចឆ្លុះបញ្ចាំងបានតាមរយៈការផ្សារភ្ជាប់ការអភិវឌ្ឍ ផ្នែកនយោបាយ សង្គម សេដ្ឋកិច្ចរបស់កម្ពុជា ទៅនឹងសមាហរណកម្មតំបន់ និងកិច្ចសហប្រតិបត្តិការអន្តរជាតិ។ ការក្លាយទៅជាសមាជិកអាស៊ាននេះ គឺជាជោគជ័យនៃការទូតមួយរបស់ប្រទេសកម្ពុជា ក្នុងកាពង្រីកអនុភាព និងបង្កើនតួនាទីរបស់ខ្លួនកាន់តែសកម្ម នៅក្នុងតំបន់ផងដែរ៕

ទស្សនវិស័យ​របស់​សម្តេចតេជោ ​ក្នុងសន្និបាត UN-ESCAP ​បានចូល​រួមចំណែកយ៉ាងសំខាន់ ក្នុងការឆ្លើយតបទៅនឹងការស្តារឡើងវិញ ក្រោយវិបត្តិកូវីដ-១៩

2021/04/29 08:34:40 am        109
Facebook Telegram Linkin
ភ្នំពេញ ៖ ឯកឧត្តម ទេសរដ្ឋមន្រ្តី លី ធុជ ​មានប្រសាសន៍​ថា ទស្សនវិស័យរបស់ សម្តេចតេជោ នាយករដ្ឋមន្ត្រី បានផ្តោតទៅលើទិដ្ឋភាពសំខាន់ៗ ចំនួន៣គឺ៖ ទី១,ផលប៉ះពាល់នៃជំងឺកូវីដ-១៩ ទៅលើសេដ្ឋកិច្ចសកល ទី២,ភាពចាំបាច់បន្ទាន់នៃវ៉ាក់សាំងបង្ការជំងឺកូវីដ-១៩ និងទី៣.ផែនការស្តារឡើងវិញក្រោយវិបត្តិជំងឺកូវីដ-១៩ ទស្សនទាំងនេះ ពិតជាបានចូលរួមចំណែកយ៉ាងសំខាន់ ក្នុងការឆ្លើយតបភ្លាមៗទៅនឹងការស្តារ សេដ្ឋកិច្ច -សង្គម ឡើងវិញក្រោយវិបត្តិកូវីដ-១៩។ទេសរដ្ឋមន្រ្តី លី ធុជ ប្រធានគណៈកម្មាធិការជាតិ អេស្កាប់  បាន​បញ្ជាក់​​ទៀត​ថា វត្តមានដ៏ខ្ពង់ខ្ពស់របស់ សម្តេចតេជោ នាយករដ្ឋមន្ត្រី ​ក្នុងសន្និបាតប្រចាំឆ្នាំនេះ ​បាន​ឆ្លុះបញ្ចាំង​ពី​ឆន្ទៈ និងកិច្ចខិតខំ ប្រឹងប្រែង​របស់​រាជរដ្ឋាភិបាលកម្ពុជា ក្នុងការ​ឆ្លើយ​តប​ និង​ចូលរួមសហការជាមួយបណ្តាប្រទេសក្នុងតំបន់ និងដៃគូអភិវឌ្ឍន៍នានា​ ក្នុងកិច្ចប្រឹងប្រែងប្រយុទ្ធប្រឆាំង នឹងជំងឺ​រាតត្បាតសកល​ និងការ ស្តារឡើងវិញនូវស្ថានភាពសេដ្ឋកិច្ច-សង្គម ដើម្បីបន្តសម្រេចឲ្យបាននូវចក្ខុវិស័យអភិវឌ្ឍន៍ប្រកបដោយចីរភាព។សូម​បញ្ជាក់​ថា "UN-ESCAP ត្រូវបាន​ បង្កើតឡើងដោយ​អង្គការសហ​ប្រជាជាតិ ​នៅ​ក្នុងឆ្នាំ១៩៤៧ មានទីស្នាក់ការ នៅទីក្រុងសៀងហៃ ប្រទេស​ចិន ​ក្នុងគោលបំណង ស្តារសេដ្ឋកិច្ចតំបន់ក្រោយសង្រ្គាមលោក និងវិបត្តិសេដ្ឋកិច្ចសកល ហើយ ក្រោយមកបានប្តូរ​ទីស្នាក់ការ​ ​មកទីក្រុងបាងកក ប្រទេសថៃវិញ ​ក្នុង​ឆ្នាំ១៩៤៩ ។បច្ចុប្បន្ន UN-ESCAP មានរដ្ឋជាសមាជិកចំនួន ៥៣ និង រដ្ឋ សង្កេតការណ៍ចំនួន ៩ ដែល កម្ពុជា បានចូលជា សមាជិកនៅថ្ងៃទី២០ ខែសីហា ឆ្នាំ ១៩៥៤។ UN-ESCAP គឺជាគណៈកម្មការសេដ្ឋកិច្ច និងសង្គមកិច្ចរបស់អង្គការសហប្រជាជាតិ ដ៏ធំជាងគេបំផុត ក្នុងចំណោមគណៈកម្មការសេដ្ឋកិច្ច និងសង្គមកិច្ចរបស់អង្គការសហប្រជាជាតិ ប្រចាំតំបន់ចំនួន ០៥ ក្នុងពិភពលោក រួមមាន ៖ តំបន់អាស៊ីនិងប៉ាស៊ីហ្វិក (UN-ESCAP) តំបន់អាហ្រ្វិក (UN-ECA) តំបន់អឺរ៉ុប (UN-ECE) តំបន់អាមេរិកឡាទីននិងការ៉ាប៊ីន (UN-ECLAC) និងតំបន់អាស៊ីខាងលិច (UN-ESCWA)។UN-ESCAP ដើរតួនាំមុខនៅក្នុងតំបន់ ក្នុងការអង្កេតវិភាគ និងដោះស្រាយនូវបញ្ហាប្រឈមលើវិស័យជាច្រើន ជាពិសេសគោល នយោបាយ ​ម៉ាក្រូសេដ្ឋកិច្ច ការកាត់បន្ថយភាពក្រីក្រ និងហិរញ្ញប្បទានសម្រាប់ការអភិវឌ្ឍ  ពាណិជ្ជកម្ម និងវិនិយោគ, ការដឹកជញ្ជូន, បរិស្ថាន និងការអភិវឌ្ឍ, ព័ត៌មានវិទ្យានិងបច្ចេកវិទ្យាគមនាគមន៍ វិទ្យាសាស្ត្រ បច្ចេកវិទ្យានិងនវានុវត្តន៍, ការកាត់បន្ថយហានិភ័យគ្រោះមហន្តរាយ, ការអភិវឌ្ឍសង្គម, ស្ថិតិ, ថាមពល៕

កម្មករខ្មែរនិងបរទេសជិត១០០នាក់ នៅរោងចក្រដេកាបូបPV ក្នុងស្រុកបាទី ត្រូវបានយកសំណាកទៅពិនិត្យរកជំងឺកូវីដ១៩

2021/04/29 02:01:39 pm        133
Facebook Telegram Linkin
តាកែវ ៖ ក្រុមកម្មករកម្មការិនី និងជនបរទេសចំនួនជិត១០០នាក់ ដែលបំរើការនៅរោងចក្រដេកាបូបPV ដែលមានទីតាំងស្ថិតនៅក្នុងឃុំឃ្លាំងសម្បត្តិ ស្រុកបាទី ត្រូវបានយកសំណាកទៅធ្វើតេស្ដរកជំងឺកូវីដ១៩ បន្ទាប់ពីមានកម្មករម្នាក់ និងជនជាតិចិន២នាក់ ដែលបំរើការនៅរោងចក្រខាងលើត្រូវបានរកឃើញមានផ្ទុកចំងឺកូវីដ១៩។លោក ម៉ឹង វីរីយ៉ា ប្រធានមន្ទីរការងារ និងបណ្ដុះបណ្ដាលវិជ្ជាជីវៈខេត្តតាកែវ បានថ្លែងប្រាប់ទូរទស្សន៍BTV ឲ្យដឹងនៅថ្ងៃនេះថា​ រហូតមកដល់ពេលនេះ មានកម្មករខ្មែចំនួន៦៥នាក់ និងជនជាតិចិនចំនួន២៥នាក់ ដែលធ្វើការនៅរោងចក្រដេកាបូបនេះ ត្រូវបានយកសំណាកទៅធ្វើតេស្តរកជំងឺកូវីដ១៩ ក៏​ប៉ុន្តែលទ្ធផលយ៉ាងណានោះគឺយើងមិនទាន់ដឹងនៅឡើយទេ។លោកវិជ្ជបណ្ឌិត នុត ស៊ីណាត ប្រធានមន្ទីរសុខាភិបាលខេត្តតាកែវ បានថ្លែងឲ្យដឹងថា មន្រ្តីសុខាភិបាល បានយកសំណាកកម្មករមួយចំនួនទៅធ្វើតេស្តរកជំងឺកូវីដ១៩រួចហើយកាលពីម្សិលមិញនេះ ក៏​ប៉ុន្តែលទ្ធផលមិនទាន់ចេញទេនៅថ្ងៃនេះ ហើយយើងក៏បានធ្វើការណែនាំ​ពួកគាត់អោយធ្វើចត្តាឡីស័ក អោយបានត្រឹមត្រូវនៅពេលដែលរងចាំលទ្ធផល ​ដោយមិនត្រូវធ្វចើដំណើរចេញក្រៅផ្ទះផ្ដេសផ្ដាស់នោះទេ។គួរបញ្ជាក់ថា កាលពីម្សិលមិញនេះអាជ្ញាធខេត្តតាកែវបានរកឃើញអ្នកផ្ទុកជំងឺកូវីដ១៩ចំនួន៣នាក់ ដែលបំរើការនៅរោងចក្រដេកាបូបPV ដែលមានទីតាំងនៅក្នុងឃុំឃ្លាំងសម្បត្តិ ស្រុកបាទីខេត្តតាកែវ ដែលមានកម្មករជាង៧រយនាក់។ អ្នកផ្ទុកជំងឺកូវីដ១៩ មានកម្មករខ្មែរម្នាក់និងជនជាតិចិនចំនួន២នាក់។ បន្ទាប់បពីរកឃើញអ្នកផ្ទុកជំងឺកូវីដ១៩ ខាងភាគីរោងចក្របានបិទទ្វារោងចក្ររបស់ខ្លួនជាបណ្ដោះអាសន្ន៕ដោយ៖គុជ វិភាគ

ចិន ប្រគល់ឱសថបុរាណចំនួន៨៨,០០០ប្រអប់ ដល់កម្ពុជា ដើម្បីទប់ស្កាត់ការឆ្លងរីករាលដាលនៃវីរុសកូវីដ-១៩

2021/04/29 12:34:13 pm        46
Facebook Telegram Linkin
ភ្នំពេញ ៖ ក្រសួងសុខាភិបាល ព្រឹកថ្ងៃទី២៩ មេសា ២០២១នេះ បានរៀបចំពិធីប្រគល់-ទទួល ឱសថបុរាណចិន Lianhua Qingwen Capsules ចំនួន៨៨,០០០ប្រអប់ ដែលជាជំនួយដ៏ថ្លៃថ្លារបស់រដ្ឋាភិបាល និងប្រជាជន នៃសាធារណរដ្ឋប្រជាមានិតចិន ជូនរាជរដ្ឋាភិបាល និងប្រជាជននៃព្រះរាជាណាចក្រកម្ពុជា ក្រោមកិច្ចសហប្រតិបតិ្តការក្នុងភាពជាដៃគូយុទ្ធសាស្រ្តគ្រប់ជ្រុងជ្រោយ និងការសម្របសម្រួលយ៉ាងសកម្មរបស់ស្ថានទូតភាគីមិត្តចិន ប្រចាំនៅកម្ពុជា។ឯកឧត្តម សាស្រ្តាចារ្យ ម៉ម ប៊ុនហេង រដ្ឋមន្រី្តក្រសួងសុខាភិបាល បានបញ្ជាក់ថា ក្រោមការដឹកនាំដ៏ឈ្លាសវៃ និងប្រកបដោយគតិបណ្ឌិតរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រី្តនៃព្រះរាជាណាចក្រកម្ពុជា កិច្ចសហប្រតិបតិ្តការកម្ពុជា-ចិន ត្រូវបានពង្រឹង និងពង្រីកឥតឈប់ឈរពីមួយថ្ងៃទៅមួយថ្ងៃ លើគ្រប់វិស័យទាំងអស់ ពិសេសវិស័យសុខាភិបាលបានទទួលនូវជំនួយឥតសំណងយ៉ាងច្រើនឥតគណនា និយាយជារួម និងការជួយឧបត្ថម្ភគាំទ្រក្នុងការប្រយុទ្ធនឹងការរាតត្បាតជំងឺកូវីដ-១៩ នៅកម្ពុជា ទាំងបច្ចេកទេស ថវិកា និងឧបករណ៍ សម្ភារៈបរិក្ខារវេជ្ជសាស្រ្ត រួមទាំងវ៉ាក់សាំងបង្ការជំងឺកូវីដ-១៩ និយាយដោយឡែក។ទន្ទឹមគ្នានោះដែរ ឯកឧត្តម វ៉ាង វិនធៀន ឯកអគ្គរដ្ឋទូត នៃសាធារណរដ្ឋប្រជាមានិតចិន ប្រចាំព្រះរាជាណាចក្រកម្ពុជា បានលើកឡើងថា សកម្មភាពនាថ្ងៃនេះ ចាត់ទុកថាយើងបានទទួលសមិទ្ធផលថ្មីមួយបន្ថែមទៀត នៅក្នុងកិច្ចសហប្រតិបតិ្តការវាងកម្ពុជា-ចិន ពិសេសក្នុងវិស័យសុខាភិបាល។ ប្រទេសកម្ពុជា កំពុងស្ថិតក្នុងការលំបាកដ៏ធ្ងន់ធ្ងរមួយ ដូច្នេះប្រទេសចិន ដែលជាមិត្តដែកថែប ក៏តែងតែយកចិត្តទុកដាក់នៅក្នុងស្ថានការវិវត្តន៍នៅក្នុងប្រទេសកម្ពុជា។ ស្ថានទូតចិន ស្ថិតក្រោមការដឹកនាំ របស់ឯកឧត្តមប្រធានាធិបតី ស៊ី ជិនពីង និងមេដឹកនាំរបស់សាធារណរដ្ឋប្រជាមានិតចិន គឺយើងខិតខំប្រឹងប្រែងឲ្យអស់ពីលទ្ធភាព ដើម្បីសហការជិតស្និតជាមួយប្រទេសកម្ពុជា ក្នុងការទប់ស្កាត់ និងការឆ្លងរីករាលដាល នៃវីរុសកូវីដ-១៩៕អត្ថបទ រដ្ឋា 

បណ្ដាញសង្គម

ព័ត៌មានថ្មីៗ

ពលរដ្ឋជិតឆ្ងាយជាច្រើននាំទេយ្យទានទៅធ្វើបុណ្យ និងប្រគេនព្រះសង្ឃនៅវត្តព្រៃចាន់ក្នុងឱកាសភ្ជុំបិណ្ឌនេះ
09/21/2025 02:09 PM
Facebook Telegram Linkin
លោក Trump ព្រមានអាហ្វហ្គានីស្ថានពីភាពធ្ងន់ធ្ងរ ប្រសិនបើមិនប្រគល់មូលដ្ឋានទ័ព Bagramឲ្យអាមេរិកវិញ
09/21/2025 02:09 PM
Facebook Telegram Linkin
អ៊ីរ៉ង់និយាយាថា ខ្លួននឹងផ្អាកកិច្ចសហប្រតិបត្តិការជាមួយទីភ្នាក់ងារឃ្លាំមើលនុយក្លេអ៊េររបស់អង្គការសហប្រជាជាតិ
09/21/2025 02:09 PM
Facebook Telegram Linkin
កងកម្លាំងអ៊ីស្រាអែល បានសម្លាប់មនុស្សជាង៩០នាក់ រួមទាំងជនស៊ីវិលកំពុងរត់គេចពីទីក្រុងហ្កាហ្សា
09/21/2025 01:09 PM
Facebook Telegram Linkin
លោក Trump ព្រមានពីការខាតបង់មិនអាចគណនាបាន ប្រសិនបើវេណេស៊ុយអេឡា នឹងមិនទទួលយកអ្នកទោស
09/21/2025 01:09 PM
Facebook Telegram Linkin
ក្រុមបាតុករ 'Gen Z' របស់ប៉េរូ ប៉ះទង្គិចជាមួយនគរបាលនៅទីក្រុងលីម៉ា ជុំវិញកំណែទម្រង់ប្រាក់សោធននិវត្តន៍ និងអត្រាឧក្រិដ្ឋកម្ម
09/21/2025 12:09 PM
Facebook Telegram Linkin
ពលរដ្ឋទៅធ្វើបុណ្យភ្ជុំបិណ្ឌក្រៅពីឧទ្ទិសកុសលដល់បុព្វការីជនក៏បានឧទ្ទិផលបុណ្យដល់វីរកងទ័ពពលីដែរ
09/21/2025 11:09 AM
Facebook Telegram Linkin
អ្នកទេសចរណ៍ជិត២ម៉ឺននាក់ ទស្សនាទិដ្ឋភាពព្រះអាទិត្យរះចំកំពូលប្រាសាទអង្គរវត្ត
09/21/2025 11:09 AM
Facebook Telegram Linkin
អាជីវករលក់ដូរនៅភ្នំពេញថ្ងៃភ្ជុំបិណ្ឌវេនទី១៤នេះ ខ្លះបិទទ្វារ និងខ្លះទៀតបន្តលក់ដូរជាធម្មតា
09/21/2025 11:09 AM
Facebook Telegram Linkin
មនុស្សម្នាក់ស្លាប់ក្នុងការបាញ់បោះនៅក្លឹបរាត្រីក្នុងរដ្ឋ New Hampshire សហរដ្ឋអាមេរិក ហើយជនសង្ស័យត្រូវបានឃុំខ្លួន
09/21/2025 11:09 AM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.