BTV NEWS

TOP STORY | សម្ដេចតេជោ៖ ពេលនេះ ខ្ញុំកំពុងតែរួមចំណែកបញ្ជាទ័ព តាមប្រព័ន្ធវីដេអូ និងប្រព័ន្ធផ្សេងទៀតជាមួយនាយករដ្ឋមន្ត្រី, រដ្ឋមន្ត្រីក្រសួងការពារជាតិ អគ្គមេបញ្ជាការកងទ័ព និងបញ្ជាការកងកម្លាំងប្រដាប់អាវុធគ្រប់លំដាប់ថ្នាក់

TOP STORY |សម្ដេចធិបតី ហ៊ុន ម៉ាណែត ដាក់លិខិតស្នើសុំកោះប្រជុំក្រុមប្រឹក្សាសន្តិសុខជាបន្ទាន់ ដើម្បីសុំការអន្តរាគមន៍បញ្ចប់ការឈ្លានពានរបស់កងទ័ពថៃមកលើដែនអធិបតេយ្យភាពរបស់កម្ពុជា

TOP STORY | សម្ដេចធិបតី៖ កងទ័ពថៃបានបើកការវាយប្រហារមកលើទីតាំងឈរជើងរបស់កងទ័ពកម្ពុជា នៅប្រាសាទតាមាន់ធំ តាក្របី និងបានពង្រីកភូមិសាស្ត្រវាយប្រហារទៅដល់តំបន់មុំបី

TOP STORY | ខណៈព្រំដែនកំពុងមានការផ្ទុះអាវុធ, សម្តេចតេជោ ហ៊ុន សែន ប្រាប់ពលរដ្ឋឲ្យជឿទុកចិត្តលើរាជរដ្ឋាភិបាល និងកងទ័ព

នយោបាយ និង ការអភិវឌ្ឍន៍

សម្តេចតេជោ ថ្លែងអំណរគុណ បងប្អូនជនរួមជាតិដែលបានគាំទ្រដល់សារនយោបាយរបស់សម្តេចគឺ “ អរគុណ សន្តិភាព “

ភ្នំពេញ ៖ សម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានអរគុណដល់បងប្អូនជនរួមជាតិដែលបានគាំទ្រដល់សារនយោបាយរបស់សម្តេចគឺអរគុណសន្តិភាព ហើយសម្ដេចថា មានតែភេរវករប៉ុណ្ណោះដែលចង់បំផ្លាញសន្តិភាព។ សម្ដេចតេជោ បានមានប្រសាសន៍យ៉ាងដូច្នេះ តាមរយៈសារលិខិតរបស់សម្ដេចក្នុងឱកាសទិវាសន្តិភាពអន្តរជាតិថ្ងៃទី២១កញ្ញាឆ្នាំ២០២០នេះ។តាមរយៈសារលិខិតនេះសម្ដេចបានគូសបញ្ជាក់ដោយថ្លែងអំណរគុណដល់បងប្អូនជនរួមជាតិដែលបានគាំទ្រដល់សារនយោបាយរបស់សម្ដេចគឺអរគុណសន្តិភាពដែលសម្ដេចយល់ថាមានតម្លៃមិនសាបសូន្យមិនថាកន្លងមក ថ្ងៃនេះនិងថ្ងៃក្រោយ។សម្ដេច បានបន្តថា មនុស្សទាំងអស់គ្នាត្រូវការសន្តិភាពលើកលែងតែពួកភេរវករប៉ុណ្ណោះដែលចង់បំផ្លាញសន្តិភាព។សម្ដេចបានបន្តថា“អរគុណសន្តិភាព” បានក្លាយទៅជាពាក្យស្លោករបស់ ប្រជាជនដែលស្រឡាញ់សន្តិភាព។ សារលិខិតរបស់សម្ដេច ក៏បានបញ្ជាក់ថា ក្នុងនាម ជាប្រទេសមួយដែលបានឆ្លងកាត់សង្គ្រាមបំផ្លិចបំផ្លាញដ៏រ៉ាំរ៉ៃ ក្រោយពីទទួលបាននូវការបង្រួបបង្រួមជាតិពិតប្រាកដ សុខសន្តិភាពពេញលេញនៅទូទាំងប្រទេស និងការរីកចម្រើននៅលើគ្រប់វិស័យគួរជាទីមោទនៈកម្ពុជាមិនភ្លេចនូវមនោសញ្ចេតនារបស់ខ្លួនដែលមានចំពោះប្រជាជាតិផ្សេងទៀតនៅក្នុងពិភពលោកតាមរយៈការសម្ដែងចេញនូវការខិតខំចែករំលែកបទពិសោធន៍ក្នុងការកសាងថែរក្សាការពារសន្តិភាពនិងអភិវឌ្ឍន៍ប្រទេសជាតិ។នេះគឺជាឆន្ទៈដ៏មោះមុតរបស់កម្ពុជាក្នុងការសម្ដែងសាមគ្គីភាពជាអន្តរជាតិនិងរួមវិភាគទានដោយកិច្ចប្រឹងប្រែងរបស់សហគមន៍អន្តរជាតិដើម្បីបុព្វហេតុសន្តិភាព សន្តិសុខនិងមនុស្សធម៌ទៅលើពិភពលោក។សម្តេច បានបន្តដែរថា កម្ពុជាមានមោទនភាពយ៉ាងក្រៃលែង ក្នុងការចូលរួមរបស់ខ្លួន ក្នុងកិច្ចប្រតិបត្តិការរក្សាសន្តិភាពពិភពលោក ក្រោមឆត្ររបស់អង្គការសហប្រជាជាតិ បើទោះជាមានការប្រឈមនឹងគ្រោះថ្នាក់ដល់អាយុជីវិតយ៉ាងណាក៏ដោយ។ឆ្នាំនេះគឺជាឆ្នាំទី១៤ដែលកម្ពុជា បានបញ្ជូនកងកម្លាំងសរុបចំនួន ៦ ៨២២នាក់ (ស្រី៣៦៩នាក់ )ទៅបំពេញបេសកកម្មថែរក្សាសន្តិភាព អ.ស.ប នៅតំបន់បេសកកម្មចំនួន ១០ ក្នុងប្រទេស៩ រួមមាន ឆាដ៍ ស៊ូដង់ ស៊ូដង់ខាងត្បូង អាហ្វ្រិកកណ្ដាល លីបង់ ស៊ីប ស៊ីរី ម៉ាលីនិង យេមែន។ គិតត្រឹមដំណាច់ខែកក្កដានេះ កងកំលាំងកម្ពុជាកំពុងបំពេញបេសកកម្មថែរក្សាសន្តិភាពមានចំនួន ៧៨៧នាក់(ស្រី៧៦នាក់)នៅប្រទេសស៊ូដង់ខាងត្បូង លីបង់ ម៉ាលី អាហ្វ្រិកកណ្ដាលនិង យេមែន៕

សម្ដេចតេជោ ៖ ទោះបីជាជំងឺរាតត្បាតកូវីដ១៩តែកម្ពុជាកំពុងរៀបចំកែលម្អច្បាប់វិនិយោគដើម្បីទាក់ទាញវិនិយោគិនបន្ថែម

ភ្នំពេញ ៖ សម្ដេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានអះអាងបញ្ជាក់ជូនសមាជិកក្រុមប្រឹក្សាធុរកិច្ចអាមេរិក-អាស៊ាន អំពីកំណែទម្រង់ជាពិសេសការរៀបចំកែលម្អច្បាប់វិនិយោគ និងប្រព័ន្ធលើកទឹកចិត្តថ្មីដែលមានលក្ខណៈគ្រប់ជ្រុងជ្រោយដើម្បីទាក់ទាញវិនិយោគិន បន្ថែមទៀតជាពិសេសនៅពេលជំងឺកូវីដ១៩មានភាពធូរស្រាល ។ក្នុងឱកាសអញ្ជើញចូលរួមប្រជុំក្រុមប្រឹក្សាធុរកិច្ចអាមេរិក-អាស៊ានដឹកនាំដោយលោក អាឡិចសង់ឌ័រហ្វែលម៉េន នាយកប្រតិបត្តិនៃក្រុមប្រឹក្សាធុរកិច្ចអាស៊ាន-អាមេរិក សម្ដេចតេជោ ហ៊ុនសែន បានជម្រាបជូនសមាជិកគណៈប្រតិភូទាំងអស់ថា ទោះបីជាជម្ងឺរាតត្បាតកូវីដ១៩ បាននិងកំពុងបង្កការលំបាកជាច្រើនដល់កិច្ចដំណើរការនៃជីវិតសង្គម ក៏ប៉ុន្តែរាជរដ្ឋាភិបាលកម្ពុជាមិនបន្ថយល្បឿននៃការងារកំណែទម្រង់នៅក្នុងគ្រប់វិស័យរបស់ខ្លួននោះទេ។សន្ទរកថា របស់ប្រមុខរាជរដ្ឋាភិបាលកម្ពុជា ដែលបានថ្លែងចេញពីវិមានសន្តិភាពទីស្តីការនាយករដ្ឋមន្ត្រីនាព្រឹកថ្ងៃទី ២១កញ្ញា ទៅកាន់វេទិកាដ៏មានសារសំខាន់នេះ សម្ដេចបានស្វាគមន៍យ៉ាងកក់ក្តៅចំពោះលោក alexander Feldman ដែលបានចូលរួមកិច្ចប្រជុំប្រពន្ធវីដេអូនេះ។ សម្ដេចបានគូសបញ្ជាក់ថា ទោះជាមិនអាចរៀបចំជំនួបដោយផ្ទាល់ នៅប្រទេសកម្ពុជាក្តី តែសម្ដេចជឿជាក់ថាយើងនឹងអាចទាញយកលទ្ធផលជាក់ស្ដែងចេញពីកិច្ចប្រជុំដ៏សំខាន់នេះ នៅពេលដែលយើងកំពុងព្យាយាមដោះស្រាយបញ្ហាប្រឈមនានា ដែលបណ្ដាលមកពីការរាតត្បាតជំងឺកូវីដ១៩ ដើម្បីពង្រីកកាលានុវត្តភាព សហប្រតិបត្តិការ ជំរុញកំណើន នឹងធ្វើឲ្យសេដ្ឋកិច្ចរបស់យើងមានភាពរឹងមាំវិញ បន្ទាប់ពីជំងឺកូវីដ១៩ មានការថមថយ។សម្ដេចបានមានប្រសាសន៍ថា អស់រយៈពេលជាង ៩ ខែមកហើយ ពិភពលោកបាននិងកំពុងប្រយុទ្ធប្រឆាំងនិងជំងឺកូវីដ១៩ ដែលបានបង្កជាវិបត្ដិធ្ងន់ធ្ងរមិនធ្លាប់មានពីមុនមក លើ សង្គមនិងសេដ្ឋកិច្ច។ សម្រាប់កម្ពុជារាជរដ្ឋាភិបាលបានគ្រប់គ្រងសភាពការណ៍កូវីដ១៩ ប្រកបដោយប្រសិទ្ធភាព ដោយមកដល់ពេលនេះ កម្ពុជាមិនមានការឆ្លងជាសហគមន៍ ហើយក៏មិនបានឈានដល់ការបិទជាតំបន់ឬបិទប្រទេសទាំងមូលនោះទេ។ ជាការពិត ជំងឺកូវីដ១៩ បាននាំមកនូវបញ្ហាប្រឈមដ៏ស្រួចស្រាល់មួយចំនួនជាអាទិ៍ នៅក្នុងវិស័យវាយនភណ្ឌ វិស័យទេសចរណ៍ វិស័យអាកាសចរណ៍និងវិស័យសេវាខ្លះទៀត។ស្ថិតក្នុងសភាពការណ៍នេះ រាជរដ្ឋាភិបាលកម្ពុជាបានដាក់ចេញនូវវិធានការចំនួន៥ជុំរួចមកហើយទាំងវិធានការជួយដល់វិស័យសេដ្ឋកិច្ចនិងវិស័យសង្គមកិច្ច សំដៅជួយរក្សាលំនឹងផលិតកម្មនិងអាជីវកម្មក៏ដូចជាធានាលំនឹងជីវភាពរស់នៅរបស់ប្រជាពលរដ្ឋដែលទទួលរងផលប៉ះពាល់ធ្ងន់ធ្ងរ។សម្ដេចជឿជាក់ថា ធុរកិច្ចអាមេរិកមួយចំនួនដែលមានវត្តមាននៅកម្ពុជាក៏បានទទួលនូវផលប្រយោជន៍ពីវិធានការទាំងនេះ។ ទោះជាមានបញ្ហាជំងឺកូវីដក៏ដោយ សម្ដេចពិតជាមានមោទនភាពចំពោះកំណើនទំហំពាណិជ្ជកម្មទ្វេភាគីរវាងប្រទេសទាំងពីរដែលនៅក្នុងរយៈពេល ៨ ខែឆ្នាំ ២០២០ នេះ បានកើនឡើងប្រមាណជិត ១៧ ភាគរយ ធៀបនឹងរយៈពេលដូចគ្នានៃឆ្នាំកន្លងទៅ។សម្តេចតេជោ បានបន្តថា ដើម្បីទាក់ទាញវិនិយោគិនបន្ថែម ជាពិសេសនៅពេលជំងឺកូវីដ១៩ មានភាពធូរស្រាល កម្ពុជាកំពុងរៀបចំកែលម្អច្បាប់វិនិយោគនិងប្រព័ន្ធលើកទឹកចិត្តថ្មីដែលមានលក្ខណៈគ្រប់ជ្រុងជ្រោយនិងមានភាពទាក់ទាញសម្រាប់ឧស្សាហកម្មប្រភេទអេឡិចត្រូនិច បង្គំ កសិ-ឧស្សាហកម្ម គ្រឿងបន្លាស់ ឧស្សាហកម្មគាំទ្រ និងឧស្សាហកម្មផ្សេងទៀត៕

ខេត្តកំពត នឹងក្លាយជាតំបន់លំនៅឋាននិងទេសចរណ៍ដ៏ពេញនិយម

កំពត ៖ អភិបាលខេត្តកំពត បានលើកឡើងថា ការអភិវឌ្ឍរបស់ខេត្តកំពត មិនអាចនៅជាប់ទ្រឹងនោះទេ ដោយ ខេត្តនេះ នឹងក្លាយជាតំបន់លំនៅឋាន និងទេសចរណ៍ដ៏ទាក់ទាញ និងពេញនិយមបំផុតមួយនៅកម្ពុជា។នៅក្នុងកិច្ចប្រជុំគណៈបញ្ជាការឯកភាពរដ្ឋបាលខេត្ត នៅថ្ងៃទី២១ ខែកញ្ញា នេះ ឯកឧត្តម ជាវ តាយ អភិបាលខេត្តកំពត បានលើកឡើងថា បើទោះស្ថិតនៅក្នុងអន្តរកាល នៃវិបត្តិជំងឺកូវីដ១៩ក្តី ប៉ុន្តែ ខេត្តកំពត មានទីតាំងភូមិសាស្ត្រល្អ មានសក្ដានុពលសម្បូរបែប អនុគ្រោះ និងអំណោយផលដល់វិស័យ កសិកម្ម ឧស្សាហកម្ម សេដ្ឋកិច្ច និងទេសចរណ៍។ឯកឧត្ដម បានឱ្យដឹងថា អ្នកវិនិយោគជាច្រើន បាននឹងកំពុងបោះទុនទិញដី ធ្វើការវិនិយោគលើ វិស័យអចលនទ្រព្យ និងវិស័យផ្សេងទៀត ពិសេសវិស័យទេសចរណ៍ បាននឹងកំពុងពង្រីកវិសាលភាពកាន់ តែធំ ធ្វើឲ្យមានកំណើនភ្ញៀវ ពីមួយខែទៅមួយខែ។ ល្បឿន នៃការអភិវឌ្ឍខេត្ត មិនអាចថយចុះ ឬ នៅជាប់ ទ្រឹងនោះទេ ទោះជាស្ថិតនៅក្នុងអន្តរកាលនៃជំងឺកូវីដ១៩ក៏ដោយ ព្រោះបច្ចុប្បន្ន មានក្រុមហ៊ុនជាច្រើន បានដាក់ពាក្យសុំធ្វើការវិនិយោគ ខណៈក្រុមហ៊ុនខ្លះ បានរកទិញដីរាប់រយហិកតា ដើម្បីធ្វើការអភិវឌ្ឍលើ វិស័យអចលនទ្រព្យ ដូចជា មជ្ឈមណ្ឌលពាណិជ្ជកម្ម ឧស្សាហកម្ម ក្រុងវៃឆ្លាត (Smart City) និង គម្រោងអភិវឌ្ឍវិស័យទេសចរណ៍ជាច្រើនកន្លែង បង្កឱកាសឱ្យខេត្ត អាចនឹងរកចំណូលបានរាប់លាន ដុល្លារ ក្នុងមួយឆ្នាំៗ ដើម្បីយកមកអភិវឌ្ឍបន្ត។ឯកឧត្តម បានសម្ដែងនូវសុទិដ្ឋិនិយមថា ទៅថ្ងៃអនាគត ខេត្តកំពត នឹងក្លាយទៅជាតំបន់លំនៅ ឋាន និងទេសចរណ៍ដ៏ពេញនិយម ស្របពេលដែលរោងចក្រ តំបន់ឧស្សាហកម្ម និងពាណិជ្ជកម្មធំៗ បាន នឹងកំពុងស្ថាបនាយ៉ាងមមាញឹក។ ជាងនេះទៅទៀត ខេត្តនេះ ត្រូវបានសម្តេចតេជោ ហ៊ុន សែន ជ្រើសរើស ធ្វើជាទីតាំងដើម្បីនឹងសាងសង់ពហុកីឡដ្ឋានស្តង់ដារអន្តរជាតិថែមទៀតផង៕

ក្រសួងអប់រំមានគោលដៅឱ្យសាលាតាមទីប្រជុំជនបង្កើតបន្ទប់ឌីជីថលសម្រាប់ជួយសម្រួលការរៀនតាមបែបចម្រុះ

ភ្នំពេញ ៖ ក្នុងបរិបទជំងឺកូវីដ១៩នេះ ក្រសួងអប់រំ តាមការលើកឡើងរបស់ ឯកឧត្តមរដ្ឋមន្ត្រីដោយផ្ទាល់ បានលើកឡើងថា ក្រសួងអប់រំ មានគោលដៅចង់ឱ្យសាលារៀននៅតាមទីប្រជុំជន បង្កើតបន្ទប់ឌីជីថល ដើម្បីជួយសម្រួល ដល់ការសិក្សា ស្របពេលដែលកម្ពុជា នឹងនៅតែបន្តការសិក្សាបែបចម្រុះ ទាំងការសិក្សាក្នុងថ្នាក់រៀន និងការសិក្សាតាមប្រព័ន្ធអន ឡាញ រឺការសិក្សាពីចម្ងាយ។ នេះជាការលើកឡើងនៅថ្ងៃទី ២១ កញ្ញា ឆ្នាំ ២០២០ ក្នុងឱកាសរដ្ឋមន្ត្រីក្រសួងអប់រំ ហង់ជួន ណារ៉ុន និង ឯកឧត្តម ហ៊ុន ម៉ានី ប្រធានគណៈកម្មការអប់រំ យុវជននិងកីឡា កិច្ចការសាសនា វប្បធម៌ និងទេសចរណ៍ នៃរដ្ឋសភាចុះពិនិត្យការសិក្សានៅវិទ្យាល័យបាក់ទូក។ក្នុងឱកាសចុះត្រួតពិនិត្យដំណើរការសិក្សាឡើងវិញដំណាក់កាលទី២ ក្នុងបរិបទកូវីដ១៩ នៅវិទ្យាល័យបាក់ទូក នាព្រឹកនេះ ឯកឧត្តម ហង់ ជួនណារ៉ុន រដ្ឋមន្ត្រីក្រសួងអប់រំ បានលើកឡើងថា ជាការត្រៀមក្នុងរយៈពេលមធ្យមចាប់ពីពេលបច្ចុប្បន្នទៅឆ្នាំ ២០២៣ ក្រសួងអប់រំមានគោលដៅឱ្យសាលានៅទីប្រជុំជនបង្កើតបន្ទប់ឌីជីថល បំពាក់ដោយកុំព្យូទ័រ និងឯកសារផ្សេងៗ ដើម្បីជួយគាំទ្រដល់ការសិក្សាតាមបែបចម្រុះ និងផ្ដល់ភាពងាយស្រួលកាន់ច្រើនដល់សិស្ស។ ឯកឧត្តម លើកឡើងថា បន្ទប់នេះគឺមានសារៈសំខាន់ច្រើន ជាពិសេសសម្រាប់សិស្សដែលពុំមានលទ្ធភាពរៀនតាមទូរស័ព្ទដៃ ដោយពួកគេអាចចូលមករៀនក្នុងបន្ទប់នេះ ហើយបន្ទប់នេះក៏អាចជួយកាត់បន្ថយការចំណាយលើប្រព័ន្ធអ៊ីនធើណិតរបស់សិស្សផងដែរ។ គោលដៅបែបនេះ ស្របពេលដែលកម្ពុជាបានអនុញ្ញាតឱ្យមានការបើកសាលាជាថ្មីបានពីរដំណាក់កាលរួចមកហើយ ហើយក្រសួងក៏នៅតែបន្តការសិក្សាតាមបែបចម្រុះទាំងការសិក្សាក្នុងថ្នាក់រៀន និងការសិក្សាតាមប្រព័ន្ធអនឡាញ រឺការសិក្សាពីចម្ងាយ។នាឱកាសដដែលនេះ ឯកឧត្តម ហ៊ុន ម៉ានី ជាប្រធានគណៈកម្មការអប់រំ យុវជន កីឡា កិច្ចការសាសនា វប្បធម៌ និងទេសចរណ៍ នៃរដ្ឋសភា លើកឡើងជាការកោតសរសើរចំពោះការផ្លាស់ប្ដូរភ្លាមៗ ដែលក្រសួងអប់រំអាចបន្តការបង្រៀនតាមប្រព័ន្ធអនឡាញ និងការសិក្សាពីចម្ងាយ ដល់សិស្សក្នុងបរិបទជំងឺកូវីដ ១៩ ស្របពេលដែលកម្ពុជាពុំមានបទពិសោធន៍ រឺ មូលដ្ឋានបែបនេះពីមុនមក។ ឯកឧត្តម ក៏លើកឡើងជាការគាំទ្រដែរថា វាជារឿងចាំបាច់សម្រាប់កម្ពុជាទាំងពេលបច្ចុប្បន្ន និងពេលអនាគត បើទោះជាលែងមានហានិភ័យពីជំងឺកូវីដ១៩ យ៉ាងណាក្ដី ក៏កម្ពុជាត្រូវវិនិយោគលើវិស័យអប់រំ តាមបែបឌីជីថលផងដែរ។សូមបញ្ជាក់ថា បច្ចុប្បន្នកម្ពុជាបានអនុញ្ញាតឱ្យសាលារៀនបើកដំណើរការបាន២ដំណាក់កាលរួចមកហើយ។ ដំណាក់កាលទី ១ គឺសម្រាប់សាលារៀនឯកជន មានស្តង់ដារសុវត្ថិភាពខ្ពស់ចំនួន ២០ រីឯដំណាក់កាលទី២ គឺការចូលរៀនជាថ្មីសម្រាប់សិស្សថ្នាក់ទី ៩ និងសិស្សថ្នាក់ទី១២ទូទាំងប្រទេស និងសាលាឯកជនមួយចំនួន ក្នុងខែកញ្ញានេះ។ ចំណែកឯការបើកសាលារៀនដំណាក់កាលទី ៣ពុំទាន់មានការបញ្ជាក់កាលបរិច្ឆេទនោះទេ។ ខណៈពេលនេះ ទោះបីជាសាលារៀនជាច្រើនបានបើកដំណើរការវិញយ៉ាងណាក្ដី ក៏ត្រូវអនុវត្តការសិក្សាបែបចម្រុះដែល ដោយរៀនក្នុងថ្នាក់រៀនខ្លះ និងរៀនតាមប្រព័ន្ធអនឡាញខ្លះ ។ ការសិក្សាតាមប្រព័ន្ធអនឡាញ សព្វថ្ងៃក្រសួងអប់រំបានបង្កើតវីដេអូបង្រៀនជាច្រើន ដោយមានការចាក់ផ្សាយ លើទំព័រហ្វេសប៊ុករបស់ក្រសួង ការចាក់ផ្សាយក្នុងប្រព័ន្ធ យូធូប របស់ក្រសួង និងមានការចាក់ផ្សាយនៅទូរទស្សន៍ ទទក ២ ផងដែរ៕

កម្មករនិយោជិត បានវិលត្រឡប់ចូលធ្វើការវិញដោយរីករាយ

ភ្នំពេញ ៖ តាមការកំណត់ នៅថ្ងៃទី២១ កញ្ញា ឆ្នាំ២០២០នេះ កម្មករ និយោជិតនៅតាមបណ្តារោងចក្រនានាទូទាំងប្រទេសបានត្រឡប់ចូលបំពេញការងារវិញ ក្រោយឈប់សម្រាកថ្ងៃបុណ្យភ្ជុំបិណ្ឌ។ ក្នុងនោះកត់សម្គាល់ឃើញថា ក្រុមកម្មករទាំងនោះមានទឹកមុខសប្បាយរីករាយ និងនៅតែប្រកាន់ខ្ជាប់នូវការពាក់ម៉ាស់ផងដែរ ខណៈជំងឺកូវីដ១៩ មិនទាន់អវត្តមាន។កំពុងធ្វើដំណើរទៅកាន់ទីកន្លែងការងាររៀងៗខ្លួន ក្រុមកម្មការិនី ស្ថិតនៅផ្លូវវេងស្រេង រាជធានីភ្នំពេញ បានប្រាប់ទូរទស្សន៍ព័ត៌មាន ប៊ីធីវី ថា បន្ទាប់ពីឈប់សម្រាកអស់រយះពេលជាច្រើនកន្លងមកនេះ បានបន្សល់ទុកនូវអនុស្សាវរីយ៍ជាច្រើនពីការជួបជុំ រវាងក្រុមគ្រួសារ សាច់ញាតិ និងមិត្តភ័ក្ដិ។ ក្រុមកម្មការិនីទាំងនេះ បានលើកឡើងស្រដៀងគ្នាទៀតថា សម្រាប់ថ្ងៃបុណ្យភ្ជុំបិណ្ឌឆ្នាំនេះ ធៀបនឹងឆ្នាំកន្លងៗទៅ សកម្មភាពជួបជុំគ្នានៅតាមផ្ទះ ក៏ដូចជា តាមទីវត្តអារាម នៅតែដូចដើម ពោលគឺមានភាពភាពអ៊ូអរនិងសប្បាយរីករាយ ទោះបីជាស្ថិតក្នុងវិបត្តិកូវីដ១៩ក្តី។ជាមួយគ្នានេះ ក្រុមកម្មការិនីទាំងនោះ បានអំពាវនាវដល់កម្មករនិយោជិត និងប្រជាពលរដ្ឋទាំងអស់ ចូលរួមទប់ស្កាត់ និងគោរពតាមការណែនាំរបស់រដ្ឋាភិបាល ជៀសវាងកើតមានជំងឺឆ្លងកូវីដ១៩៕

ឥទ្ធិពលព្យុះ NOUL រយៈពេលប៉ុន្មានថ្ងៃនេះ បង្កផលប៉ះពាល់ដល់ខេត្តមួយចំនួននៃកម្ពុជា តែមិនសូវធ្ងន់ធ្ងរ

ភ្នំពេញ ៖ ឥទ្ធិពលព្យុះទី១១ មានឈ្មោះថា NOUL(នូល) ដែលបាននាំទឹកភ្លៀងខ្លាំង និងខ្យល់បក់បោកខ្លាំង មកលើ ប្រទេស កម្ពុជា ចាប់ពីថ្ងៃទី១៨ ដល់ថ្ងៃទី២០ ខែកញ្ញា ឆ្នាំ២០២០ កន្លងមកនេះ មិនបង្កផលប៉ះពាល់និងខូចខាតធ្ងន់ធ្ងរដល់ផលដំណាំពលរដ្ឋនោះទេ ប៉ុន្តែក៏មានការប៉ះពាល់ខ្លះដល់លំនៅឋានរបស់ប្រជាពលរដ្ឋ ។ នេះបើតាមរបាយការណ៍របស់គណៈកម្មាធិការជាតិគ្រប់គ្រងគ្រោះមហន្តរាយ នៅព្រឹកនេះ ។បើតាមអ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយ លោក ឃុន សុខា បានថ្លែងប្រាប់BTV នៅថ្ងៃទី២១ ខែកញ្ញានេះ បានឲ្យដឹងថា ភ្លៀងធ្លាក់ខ្លាំងដែលបង្កដោយសារព្យុះNOUL ក្នុងរយៈពេលប៉ុន្មានថ្ងៃចុងក្រោយនេះគឺបានបង្កអោយមានជំនន់ទឹកភ្លៀង នៅក្នុងខេត្តក្រចេះ ប៉ៃលិន ខេត្តឧត្តរមានជ័យ ហើយខេត្តក្រៅពីនេះ មានជំនន់ទឹកភ្លៀងលិចធម្មតា មិនមានរយៈពេលយូរ ដោយសារអំឡុងពេលនេះ មេឃមិនសូវមានភ្លៀងហើយជំនន់ទឹកភ្លៀងនេះ ក៏មានការស្រកអស់លឿនផងដែរ។លោក ឃុន សុខា បន្តថា នៅក្នុងអំឡុងពេលនេះ ថ្នាក់ដឹកនាំគណៈកម្មាធិការជាតិ ក៏បានចុះពិនិត្យមើលស្ថានភាពជាក់ស្តែងពីផលប៉ះពាលនេះរួចរាល់អស់ហើយ ហើយព្យុះនោះ មិនបង្កប៉ះពាល់ខ្លាំងណាស់ណានោះទេ។បើតាមរបាយការណ៍គណៈកម្មាធិការជាតិគ្រប់គ្រង់គ្រោះមហន្តរាយ ក៏បានចេញផ្សាយនៅព្រឹកទី២១ ខែកញ្ញានេះ បានឲ្យដឹងថា សម្រាប់ជំនន់ទឹកភ្លៀង នៅខេត្តប៉ៃលិន ព្រឹកនេះ ដោយសារទឹកកំពុងតែហូរស្រកចុះទៅខាងក្រោមនៃតំបន់ផ្ទៃរងទឹករបស់អូរដូនតា កត្តានេះបានបង្កអោយទឹកកំពុងជន់លិច ផ្ទះប្រជាពលរដ្ឋចំនួន៣៧ខ្នង និងខ្នងប្រឡាយជាង២០០ម៉ែត្រ ផ្លូវលំប្រវែង៥០០ម៉ែត្រ ស្ថិតក្នុងភូមិព្រៃសន្ទះ និងភូមិផ្ទះស្បូវ ឃុំស្ទឹងត្រង់ ស្រុកសាលាក្រៅ ក៏ត្រូវបានទឹកជន់លិច ។ដោយឡែកសម្រាប់ខេត្តឧត្តរមានជ័យវិញ ស្ថានភាពទឹកនៅអាងទឹកតាម៉ុក នៅព្រឹកនេះ ធៀបនឹងថ្ងៃលា្ងចម្សិលមិញ កម្ពស់ទឹកមានជិត ៤ម៉ែត្រ ហើយបានស្រុកចុះ០.១៤ម៉ែត្រ ហើយចរាចរណ៍រថយន្តធុនធ្ងន់ត្រូវបានផ្អាកជាបណ្ដោះអាសន្ន ហើយផលប៉ះពាល់លំនៅឋានប្រជាពលរដ្ឋពុំមានទេ តែខណៈនេះមន្ទីរធនធានទឹកខេត្ត អាជ្ញាធរដែនដី និងកងកម្លាំងប្រដាប់អាវុធទាំង៣ បានត្រៀមលក្ខណៈអន្តរាគមន៍រួចជាស្រេចដើម្បីជួយប្រជាពលរដ្ឋពេលជួបបញ្ហា។ តែទោះយ៉ាងណា អ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយ ក៏បានអំពាវនាវអោយបងប្អូនប្រជាពលរដ្ឋដែលរស់នៅជុំវិញផ្នែកខាងលើ និងខាងក្រោមអាងទឹកតាម៉ុក ស្ថិតនៅឃុំអន្លង់ ស្រុកអន្លង់វែង ខេត្តឧត្តរមានជ័យ សូមមេត្តាមានការប្រុងប្រយ័ត្នខ្ពស់ ជៀសវាងការគ្រោះថ្នាក់ដោយប្រការណាមួយជាយថាហេតុ ៕

ក្រសួងកិច្ចការនារី បណ្ដុះបណ្ដាលផ្នែកចំណេះដឹងហិរញ្ញវត្ថុសម្រាប់អភិវឌ្ឍន៍សហគ្រិនភាពស្ត្រីក្នុងខេត្តព្រះវិហារ

ព្រះវិហារ ៖ ក្រសួងកិច្ចការនារី បានបណ្ដុះបណ្ដាលផ្នែកចំណេះដឹងផ្នែកហិរញ្ញវត្ថុសម្រាប់ការអភិវឌ្ឍសហគ្រិនភាពស្ដ្រី ប្រមាណ៥០នាក់ ដែលភាគច្រើនជាស្ដ្រី មកពីតាមមន្ទីរនានា ក្នុងខេត្ដព្រះវិហារ ដើម្បីអភិវឌ្ឍន៍សមត្ថភាពជំនាញរបស់ខ្លួនឲ្យកាន់តែប្រសើរឡើងជាបន្តទៀត។ពិធីនេះ ធ្វើឡើងរយៈពេល២ថ្ងៃចាប់ពីថ្ងៃទី២១ ដល់ថ្ងៃទី២២ ខែកញ្ញា ឆ្នាំ២០២០នេះ នៅមន្ទីរអប់រំយុវជន និងកីឡាខេត្ដព្រះវិហារ ដោយរួមសហការជាមួយធនាគារជាតិកម្ពុជា និងក្រុមហ៊ុនវីសាផងដែរ។នៅក្នុងពិធីបើកវគ្គបណ្ដុះបណ្ដាលនេះ លោកជំទាវ ច័ន្ទ សូរីយ៍ រដ្ឋលេខាធិការក្រសួងកិច្ចការនារី មានប្រសាសន៍ថា ការរៀបចំវគ្គបណ្ដុះបណ្ដាលនេះឡើង ក្នុងគោលបំណងដើម្បីបង្កើនចំណេះដឹងដល់មន្ត្រីបុគ្គលិកនៃមន្ទីរ និងមជ្ឈមណ្ឌលអភិវឌ្ឍន៍ស្ត្រីអំពីការគ្រប់គ្រងហិរញ្ញវត្ថុការប្រើប្រាស់សេវាហិរញ្ញវត្ថុផ្លូវការ និងការប្រើប្រាស់ប្រព័ន្ធឌីជីថលសម្រាប់សេវាកម្មហិរញ្ញវត្ថុ ដើម្បីយកទៅផ្សព្វផ្សាយបន្ត សម្រាប់ជួយគាំទ្រដល់ការអភិវឌ្ឍន៍អាជីវកម្ម និងធុរកិច្ចរបស់ស្ត្រីនៅតាមមូលដ្ឋាននៃប្រទេសកម្ពុជា។លោកជំទាវ បានបន្តទៀតថា វគ្គបណ្ដុះបណ្ដាលនេះ មានការរួមបញ្ចូល នៅប្រធានបទសំខាន់ៗចំនួន៦ ដែលទាក់ទងទៅ និងបញ្ហាជុំវិញចំណេះដឹង ផ្នែកហិរញ្ញវត្ថុរបស់ស្ត្រីមានជាអាទិ៍ បរិបន្នហិរញ្ញវត្ថុនៅកម្ពុជា និងបញ្ហាប្រឈមរបស់ស្ត្រី ក្នុងការទទួលបានសេវាហិរញ្ញវត្ថុប្រភេទ ផលិតផល សេវា និងគ្រឹះស្ថាន នៃធនាគារ និងហិរញ្ញវត្ថុ ការគ្រប់គ្រងហិរញ្ញវត្ថុ ការប្រើប្រាស់បច្ចេកវិទ្យាហិរញ្ញវត្ថុ សេវាទូទាត់ សេវាធានារ៉ាប់រង និងកិច្ចការពារអតិថិជន។ធនាគារជាតិនៃកម្ពុជា និងក្រុមហ៊ុនវីសា ដែលជាក្រុមហ៊ុនឈានមុខគេលើពិភពលោក ក្នុងការទូទាត់តាមប្រព័ន្ធឌីជីថល ។លោកជំទាវ ចឹក ហេង អភិបាលរងខេត្ដព្រះវិហារ បានថ្លែងអំណរគុណដល់ក្រសួងកិច្ចការនារី ធនាគារជាតិនៃកម្ពុជា និងក្រុមហ៊ុន វីសា ដែលបានចុះមកបើកវគ្គបណ្ដុះបណ្ដាលស្ដីពីចំណេះដឹងផ្នែកហិរញ្ញវត្ថុសម្រាប់អភិវឌ្ឍន៍សហគ្រិនភាពស្ត្រីនៅក្នុងខេត្តព្រះវិហារ ។ លោកជំទាវក៏បានផ្ដាំផ្ញើដល់សិក្ខាកាមទាំងអស់ ត្រូវយកចិត្តទុកដាក់ត្រងត្រាប់ស្ដាប់ និងចាប់យកចំណេះដឹងពីវគ្គបណ្ដុះបណ្ដាលនាថ្ងៃនេះ ដើម្បីអភិវឌ្ឍន៍សមត្ថភាពរបស់ខ្លួនឲ្យកាន់តែប្រសើរឡើងជាបន្តទៀត៕ដោយ ៖ សាវី

ទេសរដ្ឋមន្ត្រី លី ធុជ៖ អង្គការ NPA បានចូលរួមយ៉ាងសកម្ម ក្នុងសកម្មភាពដោះមីននៅកម្ពុជា

ភ្នំពេញ៖ ឯកឧត្ដមទេសរដ្ឋមន្ត្រីលី ធុជ អនុប្រធានទី១ អាជ្ញាធរមីន នៅថ្ងៃទី២១ ខែកញ្ញានេះ បានអនុញ្ញាតឲ្យ លោកស្រី Portia Clare Stratton ប្រធានគម្រោងសកម្មភាពមីន នៃអង្គការNPA ចូលជួបពិភាក្សាការងារ ស្តីពីកិច្ចសហប្រតិបត្តិការ និងភាពជាដៃគូ លើវិស័យសកម្មភាពមីននៅកម្ពុជា។នៅក្នុងឱកាសនោះ ឯកឧត្តមទេសរដ្ឋមន្ត្រីបានបញ្ជក់ថា អង្គការNPA បានចូលរួមយ៉ាងសកម្ម ក្នុងសកម្មភាពដោះមីននៅកម្ពុជា។មានប្រសាសន៍ប្រាប់ BTV ក្រោយជំនួបពិភាក្សាការងារជាមួយលោកស្រី Portia Clare Stratton ប្រធានគម្រោងសកម្មភាពមីន នៃអង្គការ NPA ឯកឧត្តមទេសរដ្ឋមន្ត្រីលី ធុជ អនុប្រធានទី១អាជ្ញាធរមីន បានលើកឡើងថា រាជរដ្ឋាភិបាលកម្ពុជា ដោយមានការចូលរួមគាំទ្រពីបណ្តាប្រទេសជាមិត្ត ម្ចាស់ជំនួយ និងដៃគូ ក្នុងនោះ ក៏មានប្រទេសន័រវេស្សផងដែរនោះ បានសម្រេចនូវសមិទ្ធផលយ៉ាងច្រើនគួរជាទីមោទនៈ លើវិស័យបោសសម្អាតមីនមនុស្សធម៌នៅកម្ពុជា។ឯកឧត្តមទេសរដ្ឋមន្ត្រី បន្តថា អង្គការ NPA បានចូលរួមការងារសកម្មភាពមីននៅកម្ពុជា អស់រយៈពេលជាងជាច្រើនឆ្នាំ ក្នុងនោះ រួមមានការបោសសម្អាតមីននិងគ្រាប់បែកចង្កោម ការលើកកម្ពស់សមត្ថភាពថ្នាក់ជាតិ និងការបង្ហាត់សុនខហិតមីននៅកម្ពុជា និងសកម្មភាពផ្សេងៗមួយចំនួនទៀត។ជាមួយគ្នានេះ លោកស្រី Portia Stratton បានកោតសរសើរ និងវាយតម្លៃខ្ពស់ចំពោះរាជរដ្ឋាភិបាលកម្ពុជា ដែលមានឆន្ទៈ និងគោលដៅច្បាស់លាស់ ដើម្បីដោះស្រាយនូវសំណល់ជាតិផ្ទុះពីសង្គ្រាម សម្រាប់ប្រទេសជាតិ និងប្រជាជនកម្ពុជា។ លោកស្រី បានបង្ហាញអំពីការតាំងចិត្តរបស់ រាជរដ្ឋាភិបាល និងប្រជាជនន័រវេស្ស តាមរយៈអង្គការ NPA នឹងបន្តជួយគាំទ្រដល់រាជរដ្ឋាភិបាលកម្ពុជា តាមរយៈអាជ្ញាធរមីន ក្នុងការងារបោសសម្អាតមីនមនុស្សធម៌ ស្របតាមគោលដៅរបស់រាជរដ្ឋាភិបាលកម្ពុជា គ្មានមីននៅឆ្នាំ២០២៥។ជាការកត់សំគាល់ ចាប់តាំងពីឆ្នាំ១៩៩២ ដល់បំណាច់ខែមិថុនា ឆ្នាំ២០២០នេះ ផ្ទៃដីប្រមាណជាង២ពាន់ គីឡូម៉ែត្រក្រឡា ត្រូវបានបោសសម្អាតដោយប្រតិបត្តិករជាតិ-អន្តរជាតិ ដោយក្នុងនោះ រកឃើញ និងកម្ទេចចោលមីនប្រឆាំងមនុស្សមានជាង១លានគ្រាប់ មីនប្រឆាំងរថក្រោះជាង២ម៉ឺនគ្រាប់ និងសំណល់ជាតិផ្ទុះពីសង្គ្រាមមានជាង២លានគ្រាប់៕ អត្ថបទ៖ទូច សោភ័ណ

អគ្គស្នងការនគរបាលជាតិ ក្រើនរំលឹកដល់មន្ត្រីនគរបាលទាំងអស់ ត្រូវអនុវត្តតួនាទី ភារកិច្ច និងគោរពវិន័យជាដាច់ខាត

កំពង់ធំ៖ អគ្គស្នងការនគរបាលជាតិក្រើនរំលឹកដល់មន្ត្រីនគរបាលទាំងអស់ ត្រូវអនុវត្តតួនាទី ភារកិច្ច និងគោរពវិន័យរបស់កងកម្លាំងជាដាច់ខាត ព្រោះនគរបាលគ្រប់រូបជាកម្លាំងស្នូលមួយ ក្នុងការជួយ ថែរក្សាសុខសុវត្ថិភាពក្នុងសង្គម ព្រមទាំងជួយកាត់បន្ថយសេចក្តីព្រួយបារម្ភរបស់ប្រជាពលរដ្ឋទូទៅ។ថ្លែងក្នុងពិធីប្រកាសចូលកាន់មុខតំណែងលោក ម៉ែន លី ជាស្នងការនគរបាលខេត្តកំពង់ធំ នៅថ្ងៃទី២១ ខែកញ្ញា ឆ្នាំ២០២០ ឯកឧត្តមនាយឧត្តមសេនីយ៍សន្ដិបណ្ឌិត នេត សាវឿន អគ្គស្នងការនគរបាលជាតិ ក្រើនរំលឹកដល់មន្ត្រីនគរបាលទាំងអស់ត្រូវតែអនុវត្តតួនាទីភារកិច្ចរបស់ ខ្លួនជាដាច់ខាត ដើម្បីថែរក្សាសុខសុវត្ថិភាព និងនាំមកនូវភាពជោគជ័យសម្រាប់អង្គទាំងមូល។ ឯកឧត្ដមនាយឧត្តមសេនីយ៍សន្ដិបណ្ឌិត បន្តថា ការអនុវត្តបានល្អប្រសើរនូវតួនាទីភារកិច្ចទាំងអស់ នេះ នឹងធ្វើឲ្យមន្ត្រីទាំងអស់នៅក្នុងអង្គភាពអគ្គស្នងការនគរបាលជាតិគ្រប់លំដាប់ថ្នាក់ លុបបំបាត់ ចោលវប្បធម៌ “ក្ដិចត្រួយ” ក្នុងការប្រកួតប្រជែកលើមុខដំណែង និងឋានន្តរស័ក្តិ ខុសពីសីលធម៌វិជ្ជាជីវៈ ព្រមទាំងវិន័យរបស់អង្គភាពផង។ ឋានន្តរស័ក្តិ តួនាទី និងមុខតំណែងដែលត្រូវបានថ្នាក់ដឹកនាំគ្រប់លំដាប់ថ្នាក់ ប្រគល់ជូនគឺជាតម្លៃមិនអាចកាត់ថ្លៃបាន ដែលស្តែងចេញតាមរយៈការប្រឹងប្រែងបំពេញការងារ ប្រកបដោយទំនួលខុសត្រូវ! ឈរលើផលប្រយោជន៍រួមរបស់ប្រទេសជាតិ ប្រជាពលរដ្ឋ រួមជាមួយអង្គភាពសាមីផងដែរ។ឯកឧត្តមបន្ថែមថា កង្វល់បច្ចុប្បន្ន ដែលត្រូវឲ្យមន្ត្រីនគរបាលគ្រប់រាជធានីខេត្តត្រូវអនុវត្តបន្ទាន់ ដូចភ្លៀង រលឹមនោះ គឺ ១.ការបង្ក្រាបគ្រឿងញៀនឲ្យដល់ឫសគល់ (មេក្លោងជួញដូរ), ២.ការអនុវត្តន៍ឲ្យបាន ម៉ឺងមាត់ដោយមិនមានការលើកលែង បក្សពួក និងឋានៈក្នុងសង្គម និង៣. អំពើហិង្សាដែលតែងតែកើតឡើងលើបងប្អូនប្រជាពលរដ្ឋ។ហើយកង្វល់ទាំងបីនេះត្រូវចាត់ទុកថា ជាកង្វល់យើងទាំងអស់គ្នា មិនត្រូវដាក់បន្ទុកតែលើកងកម្លាំង មន្ត្រីរាជការ ឬប្រជាពលរដ្ឋណាម្នាក់ ឡើយ! ប៉ុន្តែត្រូវរួមគ្នាដោះស្រាយ រួមគ្នាធ្វើទាំងអស់គ្នាដើម្បីកម្ពុជាទាំងមូលមានភាពសុខសាន្ត និងរីកចម្រើន។ ឯកឧត្ដមសង្កាត់ធ្ងន់ថា បញ្ហាចំពោះមុខគណៈបញ្ជាការឯកភាពខេត្ត ត្រូវមានវិធានការជាគោលទប់ស្កាត់របស់ឧបាយកលពួកអមិត្ត ដែលមានបំណងបំផ្លាញសន្តិសុខជាតិ បំផ្លាញសេចក្តីសុខសាន្តរបស់ប្រជាពលរដ្ឋផងដែរ៕

ពលរដ្ឋមានជំងឺឈឺក្បាលរ៉ាំរ៉ៃ សូមមកពិគ្រោះព្យាបាលជំងឺជាមួយគ្រូពេទ្យឯកទេស

ភ្នំពេញ៖ លោកវេជ្ជបណ្ឌិត ម៉ប់ សីហា ឯកទេសវះកាត់ប្រព័ន្ធប្រសាទ នៃមនី្ទរពេទ្យព្រះអង្គឌួង បានអំពាវនាវឲ្យប្រជាពលរដ្ឋ ដែលមានជំងឺឈឺក្បាលរ៉ាំរ៉ៃ សូមមកពិគ្រោះព្យាបាលជំងឺជាមួយគ្រូពេទ្យឯកទេសជៀសវាងការប្រើប្រាស់ថ្នាំ ដោយគ្មានវេជ្ជបញ្ជា ដើម្បីវាយតម្លៃថា គាត់មានដុំសាច់ក្នុងខួរក្បាល ឬអត់។លោកវេជ្ជបណ្ឌិត បន្តថា ដុំសាច់ក្នុងខួរក្បាល គឺជាប្រភេទដុំសាច់មួយ ដែលកើតចេញពីការលូតលាស់ ភាពមិនប្រក្រដី នៃកោសិកាប្រព័ន្ធប្រសាទ ឬក៏កោសិកានៅជុំវិញប្រព័ន្ធប្រសាទ ដែលវាលុកលុយដល់ដុំសាច់ខួរក្បាល។ ជាទូទៅប្រជាពលរដ្ឋស្គាល់ដុំសាច់នៅក្នុងខួរក្បាលបាន គឺដុំសាច់នោះ មាន០២ប្រភេទ ដុំសាច់ស្លូត (គ្រូពេទ្យវះកាត់ព្យាបាលឲ្យជាសះស្បើយបាន១០០% ប៉ុន្តែលុះត្រាតែអ្នកជំងឺនោះធ្វើរោគវិនិច្ឆ័យបានទាន់ពេលវេលា) និងដុំសាច់កាច (គឺជាទូទៅដែលយើងទាំងអស់គ្នាស្គាល់ថា មហារីកខួរក្បាល ទោះបីធ្វើការវះកាត់ព្យាបាលរួចរាល់ ក៏អ្នកជំងឺមិនអាចមានជីវិតរស់នៅបានយូរដែរ)។ដុំសាច់ក្នុងខួរក្បាល កើតឡើងលើមនុស្សគ្រប់វ័យទាំងអស់ តាំងពីកើតមក រហូតដល់គាត់ស្លាប់។ ប៉ុន្តែ យើងចែកចេញក្រុមអាយុ ជា២ គឺជំងឺដុំសាច់ចំពោះកុមារ និងជំងឺដុំសាច់ចំពោះមនុស្សធំ។សម្រាប់អ្នកជំងឺដុំសាច់ក្នុងខួរក្បាល គួរជៀសវាងការបរិភោគអាហារខ្លោចៗ និងបន្លែណាដែលមានសារធាតុគីមីច្រើន ហើយក៏ត្រូវការលើកទឹកចិត្តពីក្រុមគ្រួសាររបស់គាត់ ដើម្បីឲ្យគាត់អាចរស់នៅក្នុងសង្គមបានយូរផងដែរ។ជាមួយគ្នានោះដែរ ប្រជាពលរដ្ឋ០២រូប មានប័ណ្ណសមធម៌ ឬហៅថាប័ណ្ណក្រីក្រ គឺលោក ឌឹម សារ៉ាន់ រស់នៅខេត្តកំពង់ចាម មានអាការៈឈឺក្បាលស្ទើររាល់ថ្ងៃ ដូច្នេះ ទើបលោកសម្រេចចិត្តមកធ្វើការព្យាបាល នៅក្នុងមនី្ទរពេទ្យព្រះអង្គឌួង ក្រោយការវៈកាត់ បានធ្វើឲ្យជំងឺរបស់លោកធូរស្បើយច្រើន។ ដោយឡែកអ្នកស្រី ផាន់ សុខុន រស់នៅខេត្តកោះកុង មានជំងឺកៀបសរសៃឆ្អឹងខ្នង អស់រយៈពេល៤ ទៅ៥ឆ្នាំមកហើយ ទោះទៅព្យាបាលជំងឺនៅមនី្ទរណាក៏អត់ជាសះស្បើយដែរ លុះដល់មកព្យាបាលជំងឺនៅក្នុងមនី្ទរពេទ្យព្រះអង្គឌួង ធ្វើឲ្យជំងឺរបស់គាត់មានអាការៈធូរស្បើយច្រើន។ជាចុងក្រោយលោកវេជ្ជបណ្ឌិត ម៉ប់ សីហា បានថ្លែងអំណរគុណដល់លោកសាស្ត្រាចារ្យ លូ លីឃាង នាយកមនី្ទរពេទ្យព្រះអង្គឌួង ដែលបានពង្រីកសេវាកម្មបន្ថែម ដើម្បីផ្តល់សេវាថែទាំព្យាបាលជំងឺជូនប្រជាពលរដ្ឋ ឲ្យកាន់តែមានប្រសិទ្ធភាព និងគុណភាពខ្ពស់ ម្យ៉ាងទៀតមនី្ទរពេទ្យព្រះអង្គឌួង បានបំពាក់នូវឧបករណ៍ទំនើបៗ ដើម្បីធ្វើការវះកាត់ សម្រាប់ផ្តល់សុវត្ថិភាពខ្ពស់ជូនប្រជាពលរដ្ឋ៕អត្ថបទ៖ រដ្ឋា

បណ្ដាញសង្គម

ព័ត៌មានថ្មីៗ

អគ្គនាយកស៊ីម៉ាក់៖ទាហានឈ្លានពានសៀមប្រើគ្រាប់បែកចង្កោមគឺរំលោភអនុសញ្ញាអន្តរជាតិយ៉ាងធ្ងន់ធ្ងរ

ឯកអគ្គរដ្ឋទូត៖ ហ្វីលីពីនសង្ឃឹមទទួលបានការបញ្ចុះអត្រាពន្ធបន្ថែម នៅត្រឹមប្រហែល ១៥%

ថៃបដិសេធមិនទទួលយកការសម្របសម្រួលអន្តរជាតិ ដើម្បីបញ្ចប់ជម្លោះជាមួយកម្ពុជា

មនុស្ស ៣នាក់ស្លាប់ ក្នុងហេតុការណ៍ផ្ទុះក្នុងប្លុកអគារផ្ទះល្វែងនៅទីក្រុង Saratov ប្រទេសរុស្ស៊ី

នាយករដ្ឋមន្ត្រីម៉ាឡេស៊ី ក្នុងនាមប្រធានអាស៊ាន ជំរុញឲ្យមានការចរចាសន្តិភាព ដើម្បីបន្ថយភាពតានតឹងរវាងថៃ និងកម្ពុជា

វិមានក្រឹមឡាំង៖ លោក Putin និង Zelenskiy អាចជួបគ្នាបាន លុះត្រាតែជាជំហានផ្តាច់ព្រ័ត្រនៃកិច្ចព្រមព្រៀងសន្តិភាព

TOP STORY | Prime Minister Hun Manet: "Genuine willingness of the Thai side to accept ceasefire is the first step to solving conflict"

ក្រុមហាម៉ាសបញ្ជាក់ជាថ្មីពីការប្តេជ្ញាចិត្តរបស់ខ្លួនចំពោះកិច្ចចរចាសន្តិភាព បន្ទាប់ពីរងការរិះគន់ពីបេសកជនអាមេរិក

កងទ័ពជើងទឹករុស្ស៊ីធ្វើសមយុត្ធទ្រង់ទ្រាយធំបាញ់គ្រាប់ពិតចេញពីមហាសមុទ្រប៉ាស៊ីហ្វិកទៅកាន់សមុទ្របាល់ទិក

រុស្សីបានបន្តប្រើប្រាស់យន្តហោះ An-24 អាយុកាលជិត ៥០ឆ្នាំ ខណៈវាធ្លាក់ស្លាប់មនុស្សទាំងអស់

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877

នយោបាយ និង ការអភិវឌ្ឍន៍

សម្តេចតេជោ ថ្លែងអំណរគុណ បងប្អូនជនរួមជាតិដែលបានគាំទ្រដល់សារនយោបាយរបស់សម្តេចគឺ “ អរគុណ សន្តិភាព “

ខេត្តកំពត នឹងក្លាយជាតំបន់លំនៅឋាននិងទេសចរណ៍ដ៏ពេញនិយម

ក្រសួងអប់រំមានគោលដៅឱ្យសាលាតាមទីប្រជុំជនបង្កើតបន្ទប់ឌីជីថលសម្រាប់ជួយសម្រួលការរៀនតាមបែបចម្រុះ

កម្មករនិយោជិត បានវិលត្រឡប់ចូលធ្វើការវិញដោយរីករាយ

ឥទ្ធិពលព្យុះ NOUL រយៈពេលប៉ុន្មានថ្ងៃនេះ បង្កផលប៉ះពាល់ដល់ខេត្តមួយចំនួននៃកម្ពុជា តែមិនសូវធ្ងន់ធ្ងរ

ទេសរដ្ឋមន្ត្រី លី ធុជ៖ អង្គការ NPA បានចូលរួមយ៉ាងសកម្ម ក្នុងសកម្មភាពដោះមីននៅកម្ពុជា

ពលរដ្ឋមានជំងឺឈឺក្បាលរ៉ាំរ៉ៃ សូមមកពិគ្រោះព្យាបាលជំងឺជាមួយគ្រូពេទ្យឯកទេស

បណ្ដាញសង្គម

ព័ត៌មានថ្មីៗ

អាស័យដ្ឋាន

ផែនទី

ទាញយកកម្មវិធី

នយោបាយ​ និង ការអភិវឌ្ឍន៍

ខេត្តកំពត​ នឹង​ក្លាយជា​តំបន់​លំនៅឋាន​និង​ទេសចរណ៍​ដ៏​ពេញនិយម​

កម្មករ​និយោជិត ​បាន​វិលត្រឡប់​ចូល​ធ្វើការ​វិញ​ដោយ​រីករាយ

ទេសរដ្ឋមន្ត្រី លី ធុជ​៖​ អង្គការ NPA បាន​ចូលរួម​យ៉ាងសកម្ម ​ក្នុង​សកម្មភាព​ដោះមីន​នៅ​កម្ពុជា​

ពលរដ្ឋ​មាន​ជំងឺ​ឈឺក្បាល​រ៉ាំរ៉ៃ សូម​មក​ពិគ្រោះ​ព្យាបាល​ជំងឺ​ជាមួយ​គ្រូពេទ្យ​ឯកទេស

បណ្ដាញសង្គម

ព័ត៌មានថ្មីៗ

អាស័យដ្ឋាន

ផែនទី

ទាញយកកម្មវិធី

នយោបាយ និង ការអភិវឌ្ឍន៍

ខេត្តកំពត នឹងក្លាយជាតំបន់លំនៅឋាននិងទេសចរណ៍ដ៏ពេញនិយម

កម្មករនិយោជិត បានវិលត្រឡប់ចូលធ្វើការវិញដោយរីករាយ

ទេសរដ្ឋមន្ត្រី លី ធុជ៖ អង្គការ NPA បានចូលរួមយ៉ាងសកម្ម ក្នុងសកម្មភាពដោះមីននៅកម្ពុជា

ពលរដ្ឋមានជំងឺឈឺក្បាលរ៉ាំរ៉ៃ សូមមកពិគ្រោះព្យាបាលជំងឺជាមួយគ្រូពេទ្យឯកទេស