នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
គណៈប្រតិភូសភាពាណិជ្ជកម្មអាមេរិក-កម្ពុជា បង្ហាញចំណាប់អារម្មណ៍បណ្ដាក់ទុនវិនិយោគលើវិស័យសំខាន់ៗ នៅកម្ពុជា
សមាគម JCA ពង្រឹងកិច្ចសហប្រតិបត្តិការជាមួយកម្ពុជាលើវិស័យបណ្តុះបណ្តាល, កសិកម្ម និងឧស្សាហកមុ្មឌីជីថល
ឯកអគ្គរដ្ឋទូតអ៊ីរ៉ង់ ប្ដេជ្ញាជំរុញកិច្ចសហប្រតិបត្តិការជាមួយកម្ពុជា
សម្ដេចតេជោ សង្ឃឹមថា ឯកអគ្គរដ្ឋទូតថ្មីអ៊ីរ៉ង់នឹងញ៉ាំងទំនាក់ទំនងកម្ពុជា និងអ៊ីរ៉ង់ឱ្យកាន់តែរឹងមាំបន្ថែមទៀត

នយោបាយ​ និង ការអភិវឌ្ឍន៍

អភិបាលរាជធានី ជំរុញសិស្សានុសិស្សត្រូវខិតខំរៀនសូត្រ ដើម្បីខ្លួនឯង គ្រួសារ និងសង្គមជាតិ

2023/12/02 06:57:04 pm        274
Facebook Telegram Linkin
មានប្រសាសន៍ក្នុងពិធីបើកបវសនកាលឆ្នាំសិក្សា២០២៣-២០២៤ និងចែករង្វាន់ដល់សិស្សពូកែរាជ​ធានីភ្នំពេញ ដែលប្រារព្ធឡើងនៅវិទ្យាល័យ ជាស៊ីម ឈូកវ៉ា សង្កាត់គោករកា ខណ្ឌព្រែកព្នៅ នាព្រឹកថ្ងៃទី០១ ខែធ្នូ ឆ្នាំ២០២៣ ឯកឧត្តម ឃួង ស្រេង អភិបាលរាជធានីភ្នំពេញបានថ្លែងថា ក្នុងរបបប្រល័យពូជសាសន៍ប៉ុលពត វិស័យអប់រំត្រូវបានលុបចោលទាំងស្រុង ជាមួយនឹងការកាប់​សម្លាប់គ្រូបង្រៀន និងអ្នកចេះដឹងអស់ស្ទើរដល់ឬសគល់។ ក្រោយការរំដោះប្រទេសពីរបបនេះ នៅថ្ងៃទី២៤ ខែមករា ឆ្នាំ១៩៧៩ កម្ពុជាបានបើកបវសនកាលឡើងវិញ ដោយពេលនោះ កម្ពុជាបានអនុវត្ត គឺអ្នកចេះច្រើន បង្រៀនអ្នកចេះតិច អ្នកចេះតិច បង្រៀនអ្នកមិនចេះសោះ។ឯកឧត្តម ឃួង ស្រេង ក៏បានណែនាំសិស្សានុសិស្សទាំងអស់ត្រូវព្យាយាមរៀនសូត្រ​កុំដើរលេងកម្សាន្ត ច្រើនជាងការរៀនសូត្រ នាំឲ្យសោកស្ដាយនៅពេលអនាគត ខណៈដែលក្មួយៗ មានឱកាសក្នុងការសិក្សារៀនសូត្រ ក្រោមម្លប់នៃសន្តិភាព។ ​សម្ដេចបវរធិបតី ហ៊ុន ម៉ាណែត បានយកចិត្តទុកដាក់ខ្លាំងណាស់ ​ដោយរកអស់គ្រប់មធ្យោបាយ ដើម្បីធ្វើយ៉ាងណាឲ្យកម្ពុជា​មានភាពរីកចម្រើនរុងរឿង ក្លាយជាប្រទេសដែលមានចំណូលកម្រិតខ្ពស់នៅឆ្នាំ២០៥០។ ការខិតខំប្រឹងប្រែងរៀនសូត្ររបស់ក្មួយៗ ​គឺដើម្បីខ្លួនឯងផង ​ដើម្បីគ្រួសារផង និងពិសេសគឺ​ដើម្បីសង្គមជាតិទាំងមូល ដោយពេលនេះក្មួយៗមានលទ្ធភាពគ្រប់គ្រាន់ក្នុងការសិក្សារៀនសូត្រ ពោលគឺក្មួយៗអាចរៀនសូត្របានតាមប្រព័ន្ធអ៊ីនធឺណែតថែមទៀតផង។ឯកឧត្តម ឃួង ស្រេង បន្ថែមថា ការទទួលបានមេដាយរបស់ក្មួយៗ គឺជាកិត្តិយសរបស់ក្មួយៗ កិត្តិយសរបស់អាណាព្យាបាលឪពុកម្ដាយរបស់ក្មួយៗ ហើយក៏ជាកិត្តិយសរបស់ជាតិផងដែរ។ សម្រាប់អាជ្ញាធររាជធានីភ្នំពេញតែងតែជួយគាំទ្រ​ ទាំងសម្ភារៈ និងថវិកា ជាមួយនឹងការតម្រង់​ទិសក្មួយៗឲ្យដើរផ្លូវត្រូវ ជៀសវាង ការប្រព្រឹត្តនៅអបាយមុខផ្សេងៗ ។ រដ្ឋបាលរាជធានីភ្នំពេញ បានបង្កើតក្រុមតេឡេក្រាមមួយ ដោយភ្ជាប់គ្នារវាងសាលារៀន​ជាមួយនឹង​អាជ្ញាធរ និងកងកម្លាំងមានសមត្ថកិច្ចមូលដ្ឋាន ដើម្បីធ្វើយ៉ាងណាឲ្យនៅតាមសាលារៀន​មាន​សន្តិសុខល្អ មិនមានគ្រឿងញៀន ​និងមិនមានក្រុមបងតូចបងធំ ដើម្បីឲ្យក្មួយៗសិស្សានុសិស្ស​បានសិក្សារៀនសូត្រ ក្លាយជា​ទំពាំង​ស្នងឬស្សីរបស់ជាតិនាពេលអនាគត៕ អត្ថបទ ៖ ប្រាក់ វ៉ាន់ដា

អង្គការ AHFកម្ពុជា អំពាវនាវឲ្យប្រយុទ្ធនឹងមេរោគអេដស៍ ជំងឺអេដស៍ ព្រោះអេដស៍មិនទាន់ដល់ទីបញ្ចប់ទេ

2023/12/02 06:43:32 pm        295
Facebook Telegram Linkin
ក្នុងទិវាពិភពលោកប្រយុទ្ធនឹងជំងឺអេដស៍ អង្គការមូលនិធិថែទាំសុខភាពអ្នកជំងឺអេដស៍ (AHF) កម្ពុជា នៅព្រឹកថ្ងៃទី២ ខែធ្នូ ឆ្នាំ២០២៣នេះ បានរំលឹកដល់ពិភពលោកពីការប្រយុទ្ធនឹងមេរោគអេដស៍/ជំងឺអេដស៍ គឺមិនទាន់ដល់ទីបញ្ចប់ទេ។ជាមួយនឹងការរៀបចំព្រឹត្តិការណ៍ដើម្បីរំលឹក និងអបអរសាទរ នៅថ្ងៃទី២ ខែធ្នូនេះ ប្រារព្ធធ្វើឡើងនៅសួនកំសាន្តយូរ៉ូផាក ក្នុងបុរីប៉េងហួត បឹងស្នោ រាជធានីភ្នំពេញ។ ព្រឹត្តិការណ៍នេះនឹងធ្វើការរំលឹកដល់អ្នកដែលបានបាត់បង់ជីវិតដោយសារជំងឺអេដស៍ ហើយផ្តល់ការគាំទ្រដល់អ្នកដែលបន្តការប្រយុទ្ធប្រឆាំង និងបង្រួបបង្រួមប្រជាជនទូទាំងពិភពលោក ក្នុងការប្រយុទ្ធនឹងមេរោគអេដស៍/ជំងឺអេដស៍។ ទិវានេះ មានការចូលរួមពីឯកឧត្តមបណ្ឌិត ឈឹម ឃិនដារ៉េត អគ្គលេខាធិការអាជ្ញាធរជាតិប្រយុទ្ធ នឹងជំងឺអេដស៍ (NAA)និង អ្នកតស៊ូមតិ និងអ្នកស្ម័គ្រចិត្តចំនួន៦០០នាក់។ក្នុងឱកាសនោះ លោកស្រីវេជ្ជបណ្ឌិត ហួយ ស៊ីខេង ប្រធានគ្រប់គ្រងកម្មវិធីប្រចាំប្រទេស បានមានប្រសាសន៍ថា ការប្រយុទ្ធនឹងមេរោគអេដស៍/ជំងឺអេដស៍ គឺមិនទាន់ដល់ទីបញ្ចប់ទេ យើងអំពាវនាវជាសំឡេងតែមួយ ដោយរួមជាមួយនឹងសហគមន៍ដែលជាអ្នករស់នៅជាមួយមេរោគអេដស៍ ក្រុមប្រឈមមុខខ្ពស់ ឬអ្នករងផលប៉ះពាល់ដោយមេរោគអេដស៍ គឺជាការអំពាវនាវឱ្យមានសកម្មភាពក្នុងការប្រយុទ្ធនឹងមេរោគអេដស៍។ជាមួយគ្នានោះដែរ ឯកឧត្តមបណ្ឌិត ឈឹម ឃិនដារ៉េត អគ្គលេខាធិការអាជ្ញាធរជាតិប្រយុទ្ធ នឹងជំងឺអេដស៍ បានថ្លែងថា ការបញ្ចប់ជំងឺអេដស៍តម្រូវឱ្យយើងទាំងអស់គ្នាកសាងភាព​ជា​អ្នកដឹកនាំ​ដ៏រឹងមាំ ដើម្បីជំរុញភាពជាដៃគូដែលមានបរិយាបន្ន និងការវិនិយោគធនធាន និងពេលវេលា​ក្នុងការដោះស្រាយតម្រូវការរបស់ជនងាយរងគ្រោះ និងអ្នកដែលរងផលប៉ះពាល់ដោយសារ​មេរោគអេដស៍ និងជំងឺអេដស៍។សូមបញ្ជាក់ថា ខណៈដែលពិភពលោកកំពង់តែមានការរីកចម្រើនគួរឱ្យកត់សម្គាល់​ក្នុងរយៈពេល​ប៉ុន្មាន​ទសវត្សរ៍កន្លងមកនេះ ការឆ្លើយតបនឹងមេរោគអេដស៍/ជំងឺអេដស៍ ជាសកលកំពុងប្រឈម​នឹងការគំរាមកំហែងយ៉ាងធ្ងន់ធ្ងរ បូករួមទាំងការទទួលបានមូលនិធិមិនគ្រប់គ្រាន់ ជាមួយអត្រាគ្រោះ​ថ្នាក់ខ្ពស់ នៃការចម្លងមេរោគអេដស៍ថ្មីចំនួន ១.៣ លាននាក់ជារៀងរាល់ឆ្នាំ ការស្លាប់ប្រមាណជា ៦៣ម៉ឺននាក់ក្នុង១ឆ្នាំ ​ហើយការឆ្លើយតបនឹងមេរោគអេដស៍/ជំងឺអេដស៍ មិនត្រូវបានផ្តល់អាទិភាព​ខ្ពស់គ្រប់គ្រាន់ ជាពិសេសនៅក្នុងបណ្តាប្រទេសដែលមាន​ចំណូលទាបនោះទេ ហើយអង្គការ​មូលនិធិថែទាំសុខភាពអ្នកជំងឺអេដស៍ គឺជាអង្គការពិភពលោកដ៏ធំបំផុតដែលបាននិងកំពុង​ផ្តល់​សេវាថែទាំ ព្យាបាលដោយមិនគិតពីលទ្ធភាពនៃការបង់ប្រាក់ ដល់អតិថិជនជាង ១.៩លាននាក់​ក្នុង៤៥ប្រទេសជុំវិញពិភពលោក មានដូចជានៅសហរដ្ឋអាមេរិក អាហ្វ្រិក អាមេរិកឡាទីន ការាបៀន តំបន់អាស៊ី ប៉ាស៊ីហ្វិក និងអឺរ៉ុប៕អត្ថបទ រដ្ឋា

UN និយាយថា អ៊ីស្រាអែល នឹងមិនបន្តថ្មី ទិដ្ឋាការសម្រាប់មន្ត្រីផ្តល់ជំនួយជាន់ខ្ពស់នោះទេ

2023/12/02 06:05:41 pm        152
Facebook Telegram Linkin
អ្នកនាំពាក្យរបស់អង្គការសហប្រជាជាតិ បាននិយាយកាលពីថ្ងៃសុក្រថា អ៊ីស្រាអែល បានប្រាប់អង្គការសហប្រជាជាតិថា ខ្លួននឹងមិនបន្តថ្មី ទិដ្ឋាការសម្រាប់មន្ត្រីជាន់ខ្ពស់ផ្តល់ជំនួយមនុស្សធម៌ របស់អង្គការសហប្រជាជាតិ នៅតំបន់ហ្កាហ្សាប៉ាឡេស្ទីន និងតំបន់ West Bankនោះទេ ។ អ្នកនាំពាក្យរបស់អង្គការសហប្រជាជាតិ លោក Stephane Dujarric បាននិយាយកាលពីថ្ងៃសុក្រ ថា ការផ្តល់ជំនួយមនុស្សធម៌ទៅកាន់តំបន់ហ្កាហ្សា គឺជាការធ្វើមិនដឹងមិនលឺ បន្ទាប់ពីការចាប់ផ្តើមការប្រយុទ្ធគ្នាឡើងវិញ។យន្តហោះចម្បាំងរបស់អ៊ីស្រាអែល បានវាយលុកលើតំបន់ហ្កាហ្សាកាលពីថ្ងៃសុក្រ បន្ទាប់ពីកិច្ចពិភាក្សាដើម្បីបន្ថែមពេលបទឈប់បាញ់រយៈពេលមួយសប្តាហ៍ជាមួយក្រុមហាម៉ាសបានដួលរលំ ដោយបានបញ្ជូនពលរដ្ឋប៉ាឡេស្ទីនរងរបួស និងស្លាប់ ទៅកាន់មន្ទីរពេទ្យ ហើយពលរដ្ឋដទៃទៀតត្រូវឡើងមកលើដងផ្លូវដើម្បីស្វែងរកទីសុវត្ថិភាព។

ការប៉ះសំដីគ្នា ជុំវិញឥន្ធនៈហ្វូស៊ីល និងសង្គ្រាមនៅហ្កាហ្សា នៅកិច្ចប្រជុំកំពូលអាកាសធាតុ COP28

2023/12/02 05:23:53 pm        158
Facebook Telegram Linkin
អគ្គលេខាធិការអង្គការសហប្រជាជាតិលោក Antonio Guterres បានជំរុញឱ្យមេដឹកនាំពិភពលោកនៅក្នុងកិច្ចប្រជុំកំពូលអាកាសធាតុ COP28 រៀបចំផែនការសម្រាប់អនាគតគ្មានឥន្ធនៈហ្វូស៊ីល ដោយនិយាយថា ពុំមានវិធីផ្សេងទៀតដើម្បីទប់ស្កាត់ការឡើងកម្តៅផែនដីនោះទេ។ ថ្លែងមួយថ្ងៃ បន្ទាប់ពីប្រធានកិច្ចប្រជុំ COP28 លោក Sultan Ahmed al-Jaber បានស្នើឱ្យទទួលយកការប្រើប្រាស់ឥន្ធនៈហ្វូស៊ីលនៅបន្ត ដែលលោក Guterres បាននិយាយថា យើងពុំអាចជួយសង្គ្រោះភពផែនដីដែលកំពុងឡើងកម្តៅដោយបំពង់បញ្ចេញផ្សែងនៃឥន្ធនៈហ្វូស៊ីលបាននោះទេ។លោកនិយាយថា ដែនកំណត់ ១,៥ អង្សារគឺអាចធ្វើទៅបាន លុះត្រាតែយើងបញ្ឈប់ការដុតឥន្ធនៈហ្វូស៊ីលទាំងអស់។ ចក្ខុវិស័យប្រកួតប្រជែង មានការលំបាកក្នុងកិច្ចពិភាក្សាស្តីពីអាកាសធាតុរបស់អង្គការសហប្រជាជាតិ នៅក្នុងប្រទេសអារ៉ាប់រួមជាប្រទេសផលិតប្រេង ដែលមានការបែងចែកលើឥន្ធនៈហ្វូស៊ីល និងភាពខ្វែងគំនិតគ្នាលើការផ្តល់ហិរញ្ញប្បទានយឺតយ៉ាវ និងភាពតានតឹងភូមិសាស្ត្រនយោបាយជុំវិញសង្រ្គាមនៅតំបន់ហ្កាហ្សា ដែលបានធ្វើឲ្យប៉ះពាល់ដល់អារម្មណ៍គណៈប្រតិភូពុំមានភាពវិវឌ្ឍន៍។កិច្ចព្រមព្រៀងមួយត្រូវបានឈានដល់កាលពីថ្ងៃព្រហស្បតិ៍ សម្រាប់ការបង្កើតមូលនិធិសម្រាប់ការបំផ្លាញ និងការខាតបង់ ដើម្បីជួយប្រទេសក្រីក្រទប់ទល់ផលប៉ះពាល់នៃបម្រែបម្រួលអាកាសធាតុ ដែលភាគច្រើនជាលទ្ធផលនៃការប្រើប្រាស់ឥន្ធនៈហ្វូស៊ីលដោយប្រទេសអ្នកមាន ដែលបានបង្កើតចំណែកដ៏ធំនៃការបំភាយឧស្ម័ន។ ជាមួយគ្នានេះ មេដឹកនាំពិភពលោក បានចុះហត្ថលេខាលើកិច្ចព្រមព្រៀងសន្តិសុខស្បៀងនៅកិច្ចប្រជុំ COP28 កាលពីថ្ងៃសុក្រ ថ្ងៃទី ១ ខែធ្នូ ដែលក្នុងនោះប្រទេសចំនួន ១៣៤ នឹង ធ្វើសមាហរណកម្មប្រព័ន្ធស្បៀងអាហារទៅក្នុងផែនការអាកាសធាតុនៅឆ្នាំ២០២៥ ។

សមាជិកព្រឹទ្ធសភា៥រូប ស្នើឱ្យលោក Biden ដាក់បម្រាមធ្វើដំណើរលើប្រទេសចិន បន្ទាប់ពីមានករណីជំងឺផ្លូវដង្ហើម

2023/12/02 05:06:42 pm        132
Facebook Telegram Linkin
សមាជិកព្រឹទ្ធសភា មកពីគណបក្សសាធារណរដ្ឋចំនួន៥រូប ដឹកនាំដោយលោក Marco Rubio កាលពីថ្ងៃសុក្រ បានស្នើឱ្យរដ្ឋបាលរបស់ប្រធានាធិបតី លោក Joe Biden ដាក់បម្រាមធ្វើដំណើររវាងសហរដ្ឋអាមេរិកនិងប្រទេសចិន បន្ទាប់ពីមានករណីជំងឺផ្លូវដង្ហើមនៅចិនកើនឡើង។ លិខិតដែលត្រូវបានចុះហត្ថលេខាដោយលោក Rubio សមាជិកជាន់ខ្ពស់គណបក្សសាធារណរដ្ឋនៅគណៈកម្មាធិការស៊ើបការណ៍សម្ងាត់ព្រឹទ្ធសភា បាននិយាយថា យើងគួរតែរឹតត្បិតភ្លាមៗការធ្វើដំណើររវាងសហរដ្ឋអាមេរិក និង ប្រទេសចិន រហូតដល់យើងទទួលបានព័ត៌មានបន្ថែមអំពីគ្រោះថ្នាក់ដែលបង្កឡើងដោយជំងឺថ្មីនេះ។ការកើនឡើងនៃករណីនេះ បានក្លាយជាបញ្ហាសកលកាលពីសប្តាហ៍មុន នៅពេលដែលអង្គការសុខភាពពិភពលោក បានស្នើសុំប្រទេសចិនសម្រាប់ព័ត៌មានបន្ថែម ដោយលើកឡើងពីរបាយការណ៍ស្តីពីចង្កោមនៃជំងឺរលាកសួតដែលពុំបានធ្វើរោគវិនិច្ឆ័យទៅលើកុមារ ដោយកម្មវិធីសម្រាប់ការតាមដានជំងឺដែលកំពុងលេចចេញ។ លោកស្រី Maria Van Kerkhove នាយកស្តីទីនៃនាយកដ្ឋានប្រយុទ្ធប្រឆាំងនិងបង្ការជំងឺរាតត្បាតរបស់អង្គការសុខភាពពិភពលោក បាននិយាយកាលពីដើមសប្តាហ៍នេះថា ការកើនឡើងនេះទំនងជាត្រូវបានជំរុញដោយការកើនឡើងចំនួនកុមារដែលឆ្លងវីរុស ដែលពួកគេបានចៀសផុតក្នុងអំឡុងពេលពីរឆ្នាំនៃការរឹតត្បិតជំងឺ COVID-19 ។ ក្នុងរយៈពេលប៉ុន្មានខែថ្មីៗនេះ សហរដ្ឋអាមេរិក និងចិន បាននិងកំពុងបង្កើនការជើងហោះហើរជាលំដាប់រវាងប្រទេសទាំងពីរ ដែលនៅទាបជាងឆ្ងាយពីកម្រិតកាលពីឆ្នាំ ២០១៩ នៅឡើយ។

សម្តេចតេជោ៖ បើគ្មានថ្ងៃកំណើតរណសិរ្ស២ធ្នូ និងជ័យជំនះ ៧ មករាទេនោះ ក៏គ្មានអ្វីៗដូចថ្ងៃនេះដែរ

2023/12/02 03:43:57 pm        513
Facebook Telegram Linkin
នៅក្នុងសារអបអរសាទរខួបអនុស្សាវរីយ៍លើកទី៤៥ ទិវាកំណើតរណសិរ្សសាមគ្គី អភិវឌ្ឍន៍មាតុភូមិកម្ពុជា (០២ ធ្នូ ១៩៧៨-០២ ធ្នូ ២០២៣) សម្តេចតេជោ ហ៊ុន សែន ប្រធានគណបក្សប្រជាជនកម្ពុជា បានលើកឡើងថា បើគ្មានថ្ងៃកំណើតរណសិរ្ស ២ធ្នូ និងជ័យជំនះ ៧ មករា ទេនោះ ក៏គ្មានអ្វីៗដូចថ្ងៃនេះដែរ«នេះគឺជាសច្ចធម៌ នៃប្រវត្ដិសាស្ដ្រ»។តាមរយៈឆាណែលតេលេក្រាម និងបណ្តាញសង្គមហ្វេសបុក នាថ្ងៃទី២ ខែធ្នូ ឆ្នាំ២០២៣នេះ សម្តេចតេជោ ហ៊ុន សែន បានរំលឹកថា រណសិរ្សសាមគ្គីសង្រ្គោះជាតិកម្ពុជា ត្រូវបានកើតឡើងដោយកម្លាំងមហាសាមគ្គីប្រជាជនទាំងមូល ទាំងក្នុង និងក្រៅប្រទេស ដែលមានសម្តេចអគ្គមហាពញាចក្រី ហេង សំរិន សម្តេចអគ្គមហាធម្មពោធិសាល ជា ស៊ីម សម្តេចអគ្គមហាសេនាបតីតេជោ ហ៊ុន សែន និងវីរជនស្នេហាជាតិជាច្រើនរូបទៀត ក្នុងការរៀបចំកម្លាំងផ្ដួលរំលំរបបប្រល័យពូជសាសន៍ ប៉ុល ពត និងទទួលបានជ័យជម្នះលើរបបនេះ នៅថ្ងៃទី៧ មករា ឆ្នាំ ១៩៧៩។សម្តេចតេជោ ហ៊ុន សែន ប្រធានគណបក្សប្រជាជនកម្ពុជា បានបន្ថែមទៀតថា «រណសិរ្សសាមគ្គីសង្គ្រោះជាតិកម្ពុជា» បច្ចុប្បន្នត្រូវបានដូរឈ្មោះជា «រណសិរ្សសាមគ្គី អភិវឌ្ឍន៍​មាតុភូមិកម្ពុជា» ដែលជាអង្គការចាត់តាំងមហាជនមួយឈានមុខ របស់គណបក្សប្រជាជនកម្ពុជា បានបដិសន្ធិឡើងនៅក្នុងតំបន់រំដោះ នាភូមិជើងឃ្លូ ឃុំ២ធ្នូ ស្រុកស្នួល ខេត្ដក្រចេះ។ ឆ្លើយតបទៅនឹងការអំពាវនាវរបស់រណសិរ្ស ប្រជាជនគ្រប់ទិសទីបានក្រោកឈររួបរួមគ្នា ជាកម្លាំងមហាសាមគ្គីជាតិ ដោយបានទទួលការជួយឧបត្ថម្ភយ៉ាងធំធេងពី​កងទ័ពស្ម័គ្រចិត្ដ​វៀតណាម និងការគាំទ្រពីមិត្ដភក្ដិជិតឆ្ងាយលើសកលលោក ដើម្បីផ្ដួលរំលំរបបកម្ពុជា​ប្រជាធិបតេយ្យ រហូតដល់ទទួលបានជ័យជម្នះដ៏ត្រចះត្រចង់នាថ្ងៃ៧ មករា ឆ្នាំ១៩៧៩។សម្តេចតេជោ ហ៊ុន សែន បានបញ្ជាក់ទៀតថា មហាជ័យជម្នះ ៧ មករា ១៩៧៩ បានបពា្ចប់នូវ​សម័យកាលដ៏ខ្មៅងងឹតបំផុត ដែលពុំធ្លាប់មាននៅក្នុងប្រវត្ដិសាស្ដ្រកម្ពុជា បានបើកឡើងនូវ​សករាជថ្មី ប្រជាជនកម្ពុជាយើងក៏បានទទួលមកវិញនូវសិទ្ធិសេរីភាព និងឱកាសដើម្បីស្ដារកសាង​មាតុភូមិរបស់ខ្លួនឡើងវិញ។ សម្តេចបានបញ្ជាក់ថា«ប្រជាជនគ្រប់រូបសុទ្ធតែយល់ច្បាស់ថា បើគ្មានថ្ងៃកំណើតរណសិរ្ស ២ធ្នូ និងជ័យជំនះ ៧ មករា ទេនោះ ក៏គ្មានអ្វីៗដូចថ្ងៃនេះដែរ» «នេះគឺជាសច្ចធម៌ នៃប្រវត្ដិសាស្ដ្រ»៕ អត្ថបទបាន ចក់

អបអរសាទរខួបអនុស្សាវរីយ៍លើកទី ៤៥ ថ្ងៃបង្កើតរណសិរ្សសាមគ្គីអភិវឌ្ឍន៍ជាតិមាតុភូមិកម្ពុជា

2023/12/02 02:07:46 pm        198
Facebook Telegram Linkin
ថ្ងៃនេះ កាលពី៤៥ឆ្នាំមុន ចលនាតស៊ូផ្តួលរំលំរបបប្រល័យពូជសាសន៍ប៉ុលពតបានចាប់បដិសណ្ឋិឡើងនៅក្នុងស្រុកស្នួល ខេត្តក្រចេះ ដែលមានឈ្មោះថា «រណសិរ្សសាមគ្កីសង្រ្គោះជាតិ»។ ក្រោមការដឹកនាំនៃបិតាស្ថាបនិកមានដូចជា សម្តេច ហេង សំរិន សម្តេច ជា ស៊ីម សម្តេច ហ៊ុន សែន និងឥស្សរជនកំពូលជាច្រើនរូបទៀត រណសិរ្សបានក្លាយកម្លាំងរួបរួមដ៏ខ្លាំងក្លា ហើយធ្វើការរំដោះប្រទេសជាតិបានដោយជោគជ័យនៅថ្ងៃ ៧ មករា ឆ្នាំ១៩៧៩។ស្មារតី ២ធ្នូ គឺជាការលះបង់មិនស្តាយស្រណោះនូវសាច់ស្រស់ ឈាមស្រស់ ហ៊ានធ្វើពលិកម្មគ្រប់បែបយ៉ាងដើម្បីជាតិ មាតុភូមិ និងប្រជាជន ដែលបានក្លាយជាចលករឱ្យការតស៊ូរំដោះជាតិបានទទួលជ័យជម្នះពិតប្រាកដ។ ស្មារតីនេះនៅតែបន្តចាក់ឬសយ៉ាងរឹងមាំក្នុងស្រទាប់យុវជនបន្តវេន។ ទោះបីជាយើងរស់នៅសុខសាន្តក្រោមម្លប់នៃសន្តិភាព តែស្មារតី ២ធ្នូនៅតែជាគម្រូវីរភាពដ៏ធំធេងដែលយើងខ្ញុំទាំងអស់នឹងចងចាំជានិច្ចនិរន្តរ៍។២ ធ្នូ ១៩៧៨ ក៏ជាថ្ងៃកំណើតនៃសមាគមយុវជនសាមគ្គីសង្រ្គោះជាតិ ដែលជាបុព្វការីនៃសមាគមយុវជនកម្ពុជា និងសហភាពសហព័ន្ធយុវជនកម្ពុជាផងដែរ។ សមាជិក សមាជិកា នៃក្រុមគ្រួសារ ស.ស.យ.ក. សូមសម្តែងនូវកត្តញូកត្តវេទីដ៏ជ្រាលជ្រៅបំផុត ជូនចំពោះអតីតយុវជន ថ្នាក់ដឹកនាំជំនាន់មុននូវការធ្វើពលិកម្មសព្វបែបយ៉ាងដើម្បីបុព្វហេតុជាតិមាតុភូមិ និងការស្វែងរកសន្តិភាពជូនប្រជាជន។ យើងខ្ញុំប្តេជ្ញាបន្តដើរតាមគម្រូវីរភាពដ៏អង់អាចតាមរយៈ ស្មារតី ២ធ្នូនេះ ដើម្បីបន្តថែរក្សា ការពារ និងកសាងបន្ថែមនូវសមិទ្ធផលនានាដែលត្រូវបានពុះពារដ៏លំបាកទម្រាំសម្រេចបានដូចបច្ចុប្បន្ន។

ចិនកាន់មរណទុក្ខមិត្តចាស់លោក Kissinger ដែលបានបើកឱកាសសម្រាប់ចំណងមិត្តភាពអាមេរិក

2023/12/01 09:17:57 pm        99
Facebook Telegram Linkin
មរណភាពរបស់រដ្ឋបុរសអាមេរិក លោក ហិនរី ឃីសស៊ីងជើ (Henry Kissinger) កំពុងតែត្រូវបានកាន់ទុក្ខយ៉ាងក្រៀមក្រំនៅក្នុងប្រទេសចិន ជាទីដែលលោកត្រូវបានគេលើកសរសើរ កាលពីថ្ងៃព្រហស្បតិ៍ (៣០ វិច្ឆិកា) ថាជា «មិត្តចាស់» សម្រាប់តួនាទីក្នុងការទំនាក់ទំនងក្នុងសតវត្សទី២០ រវាងប្រទេសទាំងពីរ។ ក្រុមហ៊ុនប្រឹក្សារបស់លោក បានប្រកាសថាលោក ឃីសស៊ីងជើ វ័យ ១០០ឆ្នាំ បានស្លាប់កាលពីថ្ងៃពុធ នៅគេហដ្ឋានរបស់ខ្លួនក្នុងរដ្ឋ ខនណិកធីខាត់ (Connecticut) សហរដ្ឋអាមេរិក ។ ដំណឹងនេះបានទាក់ទាញការរំលែកទុក្ខពីបណ្ដាមន្ត្រីជាន់ខ្ពស់ និងប្រព័ន្ធផ្សព្វផ្សាយរដ្ឋនៅទីក្រុងប៉េកាំង ដែលលោក ឃីសស៊ីងជើ បានទៅទស្សនៈកិច្ចនាពេលថ្មីៗនេះ។ ការបើកឱកាសរបស់ចិនទៅកាន់សហរដ្ឋអាមេរិក បន្ទាប់ពីភាពឯកោជាសកលជាច្រើនទសវត្សរ៍ ធ្វើឡើងបន្ទាប់ពីដំណើរទស្សនៈកិច្ចសម្ងាត់របស់លោក ឃីសស៊ីងជើ ទៅកាន់ប្រទេសចិន ដែលបានក្រាលផ្លូវសម្រាប់ការធ្វើដំណើរជាប្រវត្តិសាស្ត្រដោយអតីតប្រធានាធិបតីអាមេរិក លោក នីសុន (Nixon) នៅឆ្នាំបន្ទាប់ និងការបង្កើតទំនាក់ទំនងផ្លូវការរវាងសហរដ្ឋអាមេរិក និងចិន ក្នុងឆ្នាំ១៩៧៩។លោក ឃីសស៊ីងជើ បានសកម្មយ៉ាងខ្លាំងនៅក្នុងប្រទេសចិន ក្នុងនាមជាអ្នកការទូត និងអ្នកជំនួញ ហើយក្នុងប៉ុន្មានឆ្នាំថ្មីៗនេះ លោកតែងតែសម្តែងការព្រួយបារម្ភអំពីទំនាក់ទំនងរវាងសហរដ្ឋអាមេរិក និងចិន នៅពេលដែលប្រទេសទាំងពីរបានប៉ះទង្គិចគ្នាលើបញ្ហាជាច្រើនរួមមានពាណិជ្ជកម្ម បច្ចេកវិទ្យា សិទ្ធិមនុស្ស ស្ថានភាពរបស់កោះតៃវ៉ាន់ ព្រមទាំងតួនាទីរបស់ចិនលើសង្គ្រាមនៅអ៊ុយក្រែន និងមជ្ឈិមបូព៌ា។ក្រសួងការបរទេសចិនបាននិយាយកាលពីថ្ងៃព្រហស្បតិ៍ថា លោកប្រធានាធិបតីចិន ស៊ី ជីនពីង (Xi Jinping) និងបណ្ដាមន្ត្រីជាន់ខ្ពស់ផ្សេងទៀត បានផ្ញើសារចូលរួមរំលែកទុក្ខដល់លោកប្រធានាធិបតី ចូ បៃដិន ដោយហៅលោក ឃីសស៊ីងជើ ថាជាមិត្តចាស់ និងមិត្តជាទីស្រឡាញ់របស់ប្រជាជនចិន និងជាអ្នកនយោបាយនាំមុខគេផងដែរ៕

បក្សប្រជាធិបតេយ្យ មិនមានផែនការបម្រុងសម្រាប់ការបោះឆ្នោតអាមេរិកទេ ទោះជាមានការបារម្ភពីវ័យរបស់លោកបៃដិន កាន់តែចាស់ក៏ដោយ

2023/12/01 09:02:47 pm        117
Facebook Telegram Linkin
គណបក្សប្រជាធិបតេយ្យមិនមានផែនការបម្រុងនោះទេ ប្រសិនបើប្រធានាធិបតីអាមេរិក លោក ចូ បៃដិន (Joe Biden) សម្រេចដោយហេតុផលណាមួយក្នុងការបញ្ឈប់យុទ្ធនាការបោះឆ្នោតដើម្បីបន្តកាន់តំណែងនៅឆ្នាំ២០២៤ ហើយតម្រូវការភ្លាមៗដើម្បីជំនួសលោកជាអ្នកកាន់ស្តង់ដារខ្ពស់នេះ នឹងបង្កឱ្យមានការបែកបាក់ផ្ទៃក្នុងដ៏រញ៉េរញ៉ៃ។ទោះបីជាចំនួននៃការស្ទង់មតិ និងសំណួរមិនល្អ រួមទាំងការរិះគន់ពីគណបក្សប្រជាធិបតេយ្យមួយចំនួនអំពីវ័យរបស់លោក បៃដិន ក៏ដោយ ក៏លោកបានបន្តផែនការក្នុងការស្វះស្វែងរកអាណត្តិទីពីរ បន្ទាប់ពីបានជម្រះផ្នែកនៃគូប្រជែងចម្បងរបស់គណបក្សប្រជាធិបតេយ្យ ខណៈលោកបានប្រកាសកាលពីខែមេសា ថាខ្លួនកំពុងឈរឈ្មោះបោះឆ្នោតម្តងទៀត។បើទោះបីជាបេក្ខជនគណបក្សប្រជាធិបតេយ្យកាន់តែច្រើននឹងចូលឈរឈ្មោះក៏ដោយ ក៏ផ្លូវឆ្ពោះទៅមុខនឹងមិនច្បាស់លាស់នោះទេ ខណៈពេលវេលាកំណត់ដើម្បីទទួលបានសន្លឹកឆ្នោតបឋមនៅក្នុងរដ្ឋសំខាន់ៗដូចជារដ្ឋ ណេវ៉ាដា (Nevada) រដ្ឋ សៅ ខារ៉ូឡាញណា (South Carolina) និងរដ្ឋ ចចា (Georgia) បានកន្លងផុតទៅហើយ។ក្រុមអ្នកស្មោះត្រង់ចំពោះលោក បៃដិន ដោយសំអាងដល់កំណត់ត្រារបស់លោកនៅពេលកាន់តំណែង បានអះអាងថា គណបក្សនេះមិនត្រូវការផែនការបម្រុងទុកដើម្បីកម្ចាត់បេក្ខភាពមកពីគណបក្សសាធារណរដ្ឋ ដែលទំនងជាលោក ដូណាល់ ត្រាំ (Donald Trump) ដែលលោក បៃដិន បានផ្តួលនៅក្នុងការបោះឆ្នោតឆ្នាំ២០២០ នោះទេ។ ក្នុងចំណោមសេណារីយ៉ូដែលអាចកើតមាន ប្រសិនបើប្រធានាធិបតី វ័យ៨១ឆ្នាំរូបនេះបានបោះបង់ចោលការប្រជែងតំណែងក្នុងការបោះឆ្នោត គណបក្សប្រជាធិបតេយ្យអាចជ្រើសរើសអ្នកឈរឈ្មោះផ្សេងទៀតនៅខែសីហា ខាងមុខក្នុងសន្និបាតរបស់ខ្លួន ឬក៏រយៈពេលក្រោយមកទៀតឲ្យស្របតាមច្បាប់គណបក្ស៕

ប្រតិកម្មពិភពលោកចំពោះមរណភាពរបស់អ្នកការទូតអាមេរិកដ៏ល្បីល្បាញ លោក Henry Kissinger

2023/12/01 08:56:51 pm        120
Facebook Telegram Linkin
បណ្ដាមេដឹកនាំក្នុងពិភពលោកជាច្រើនមានប្រតិកម្មចំពោះមរណភាពរបស់លោក ហិនរី ឃីសស៊ីងជើ (Henry Kissinger) អ្នកឈ្នះរង្វាន់ណូបែលសន្តិភាពដ៏ចម្រូងចម្រាស ដែលបានបន្សល់ទុកនូវដំណែលដែលមិនអាចបំភ្លេចបានលើគោលនយោបាយការបរទេសរបស់សហរដ្ឋអាមេរិក។ ប្រធានាធិបតីសហរដ្ឋអាមេរិក លោក ចូ បៃដិន (JOE BIDEN) បាននិយាយនៅក្នុងសេចក្តីថ្លែងការណ៍ថា «ពេញមួយអាជីពរបស់ខ្ញុំ និងលោក ឃីសស៊ីងជើ យើងតែងតែមិនយល់ស្របគ្នាជាខ្លាំង។ បន្ទាប់ពីចូលនិវត្តន៍ពីរដ្ឋាភិបាល លោក ឃីសស៊ីងជើ បានបន្តផ្តល់ទស្សនៈ និងគំនិតចំពោះការពិភាក្សាគោលនយោបាយដ៏សំខាន់បំផុតនៅទូទាំងច្រើនជំនាន់»។ប្រធានាធិបតីរុស្ស៊ី លោក វ្លាឌីមៀ ពូទីន (Vladimir Putin) បាននិយាយថា «ឈ្មោះរបស់លោក ហិនរី ឃីសស៊ីងជើ ត្រូវបានផ្សារភ្ជាប់យ៉ាងពេញលេញជាមួយនឹងបន្ទាត់គោលនយោបាយការបរទេសប្រកបដោយប្រសិទ្ធភាព ដែលសម្រេចបាននូវការកាត់បន្ថយភាពតានតឹងអន្តរជាតិ និងឈានដល់កិច្ចព្រមព្រៀងដ៏សំខាន់បំផុតរបស់សហភាពសូវៀត-អាមេរិក និងបានរួមចំណែកដល់ការពង្រឹងសន្តិសុខពិភពលោក។ ខ្ញុំពិតជានឹងរក្សាការចងចាំដ៏ពេញចិត្តបំផុតសម្រាប់លោក ឃីសស៊ីងជើ»។លើសពីនោះ មេដឹកនាំពិភពលោកជាច្រើនបានចូលរួមរំលែកទុក្ខចំពោះមរណភាពរបស់លោក ឃីសស៊ីងជើ មានដូចជានាយករដ្ឋមន្ត្រីអ៊ីស្រាអែល នាយករដ្ឋមន្ត្រីអង់គ្លេស ប្រធានក្រុមប្រឹក្សាអឺរ៉ុប នាយករដ្ឋមន្ត្រីជប៉ុន ក្នុងចំណោមអ្នកផ្សេងទៀតជាច្រើន។ ពួកគេបានសាទរចំពោះដំណែលដែលមិនអាចបំភ្លេចបាន និងការរួមចំណែករបស់លោកចំពោះកិច្ចការពិភពលោក ក៏ដូចជាការយល់ដឹងពីភាពស្មុគស្មាញនៃទំនាក់ទំនងអន្តរជាតិ និងទស្សនៈពិសេសរបស់លោកចំពោះបញ្ហាប្រឈមពិភពលោក៕

បណ្ដាញសង្គម

ព័ត៌មានថ្មីៗ

រដ្ឋមន្ត្រីក្រសួងប្រៃសណីយ៍ អញ្ជើញជាតំណាងដ៏ខ្ពង់ខ្ពស់របស់សម្ដេចធិបតី ចូលរួម​កិច្ច​ប្រជុំកំពូលអន្តរជាតិស្ដីពីលំហអាកាសនៅប្រទេសបារាំង
09/11/2026 02:09 PM
Facebook Telegram Linkin
សមត្ថកិច្ចជំនាញផ្ទុះអាវុធក្នុងប្រតិបត្តិការ បង្រ្កាបមេខ្លោង និង​បក្ខពួក​ជួញ​ដូរ​គ្រឿង​ញៀន​ ​ក្នុង​ខេត្តព្រះសីហនុ ឃាត់ខ្លួនជនសង្ស័យ ៨នាក់
09/11/2026 02:09 PM
Facebook Telegram Linkin
អ្នកជំនាញវិទ្យាសាស្រ្តនយោបាយ៖ ដំណើការកិច្ចប្រជុំលើកដំបូង UNCLOS ជា​សញ្ញា​វិជ្ជមាន​ខាង​ផ្លូវ​ច្បាប់
09/11/2026 01:09 PM
Facebook Telegram Linkin
ភារធារីស្ថានទូតអាមេរិក ជួបជាមួយក្រុមអ្នកសង្កេតការណ៍អាស៊ាន (AOT) ដើម្បីស្តាប់អំពីការងារក្នុងការសង្កេតការអនុវត្តបទឈប់បាញ់នៅតាមព្រំដែនកម្ពុជា-ថៃ
09/11/2026 01:09 PM
Facebook Telegram Linkin
សម្តេច ម៉ែន សំអន អញ្ជើញជាតំណាងដ៏ខ្ពង់ខ្ពស់ សម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ក្នុងពិធីបញ្ចុះបឋមសិលាកសាងអគារសាលបដិសណ្ឋារកិច្ច នៅវត្តនិគ្រោធវ័ន គល់ទទឹង
09/11/2026 01:09 PM
Facebook Telegram Linkin
ទេសាភិបាលធនាគារជាតិ ជួបសំណេះសំណាលសិស្សប្រឡងបាក់ឌុប និងសញ្ញាបត្របច្ចេកទេស និងវិជ្ជាជីវៈកម្រិត៣
09/11/2026 01:09 PM
Facebook Telegram Linkin
សម្តេចប្រមុខរដ្ឋស្តីទី អញ្ជើញជួបប្រជុំកំពូល ជាមួយឯកឧត្តមប្រធានាធិបតីមីយ៉ាន់ម៉ា
09/11/2026 12:09 PM
Facebook Telegram Linkin
ជនជាតិថៃ ៦៥នាក់ ត្រូវបានបណ្ដាញចេញពីកម្ពុជាពាក់ព័ន្ធករណីឆបោកតាមប្រព័ន្ធបច្ចេកវិទ្យា និងបទល្មើសផ្សេងៗទៀត
09/11/2026 12:09 PM
Facebook Telegram Linkin
សម្តេចតេជោ ហ៊ុន សែន ទទួលបដិសណ្ឋារកិច្ចស្វាគមន៍ដំណើរទស្សនកិច្ចផ្លូវរដ្ឋ របស់ប្រធានាធិបតីមីយ៉ាន់ម៉ា
09/11/2026 12:09 PM
Facebook Telegram Linkin
ក្រុមនិស្សិតនៅប្រទេសស៊ែប៊ី បានប្រមូលផ្តុំគ្នានៅមុនការបោះឆ្នោត
09/11/2026 12:09 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.