នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
សម្ដេចធិបតី អំពាវនាវដល់ជនរួមជាតិជឿទុកចិត្តលើរាជរដ្ឋាភិបាល​ដែលកំពុង​ធ្វើកិច្ច​ការងារ​យ៉ាង​សកម្ម​ស្វែង​រក​ដំណោះស្រាយបញ្ចប់បញ្ហាព្រំដែនកម្ពុជា-ថៃ ឱ្យបានឆាប់រហ័ស
សម្ដេចធិបតីផ្ដល់អនុសាសន៍៧ចំណុច ដល់ក្រសួង-ស្ថាប័នពាក់ព័ន្ធឱ្យយកចិត្តទុកដាក់ក្នុងឱកាសទិវាអក្ខរកម្មអន្តរជាតិ ៨ កញ្ញា ២០២៥
សម្ដេចធិបតី៖ រាជរដ្ឋាភិបាលប្តេជ្ញាចិត្តយ៉ាងមុតមាំលើកកម្ពស់ការងារអក្ខរកម្ម និងបំពាក់បំប៉ន ជំនាញ និងឱកាសសិក្សាពេញមួយជីវិត ជាពិសេសជំនាញឌីជីថល
ប្រជាពលរដ្ឋត្រេកអរនឹងសមិទ្ធផលអាកាសយានដ្ឋានថ្មីដែលត្រៀមបើកដំណើរការ

នយោបាយ​ និង ការអភិវឌ្ឍន៍

លោក Biden ព្រួយបារម្ភអំពីជំនួយទៅឲ្យអ៊ុយក្រែន ខណៈមន្ទីរបញ្ចកោណព្រមានពីការអស់ជំនួយ

2023/10/05 12:45:46 pm        297
Facebook Telegram Linkin
ប្រធានាធិបតីសហរដ្ឋអាមេរិក លោក Joe Biden បាននិយាយថា លោកមានការព្រួយបារម្ភថា ភាពច្របូកច្របល់នៅក្នុងសភា អាចធ្វើឲ្យអន្តរាយដល់ការសន្យារបស់លោកផ្តល់ឲ្យអ៊ុយក្រែននូវអ្វីដែលប្រទេសនេះត្រូវការសម្រាប់ការប្រយុទ្ធប្រឆាំងរុស្ស៊ី ជាការព្រួយបារម្ភដែលកើតមានឡើងខណៈមន្ទីរបញ្ចកោណ បានព្រមានថាជំនួយយោធាក្នុងប្រទេសអ៊ុយក្រែនអស់យ៉ាងឆាប់រហ័ស។ប្រព័ន្ធផ្សព្វផ្សាយ NPR បានដឹងថាមន្ទីរបញ្ចកោណ បានព្រមានសមាជិកសភាសហរដ្ឋអាមេរិកថា ពួកគេចាំបាច់ត្រូវអនុម័តបន្ទាន់នូវជំនួយបន្ថែមទៀតដើម្បីការពារការអាក់ខានលំហូរអាវុធទៅឲ្យអ៊ុយក្រែន។ លោកBiden បានស្នើសុំសភា នូវទឹកប្រាក់ចំនួន២៤ពាន់លានដុល្លារ សម្រាប់ជំនួយថ្មីផ្នែកសេដ្ឋកិច្ច មនុស្សធម៌ និងយោធាទៅឲ្យអ៊ុយក្រែន រហូតដល់ចុងឆ្នាំតាមប្រតិទិន។ បច្ចុប្បន្ន ការបណ្តេញចេញប្រធានសភា លោក Kevin McCarthy បានបង្កើតភាពមិនច្បាស់លាស់កាន់តែធំអំពីជោគវាសនានៃសំណើនោះ។ លោកBiden និយាយថា វាពិតជាធ្វើឲ្យលោកបារម្ភ។ ប៉ុន្តែលោកដឹងថាមានសមាជិកភាគច្រើននៃសភា និងព្រឹទ្ធសភា ក្នុងគណបក្សទាំងពីរ ដែលបាននិយាយថាពួកគេគាំទ្រការផ្តល់មូលនិធិដល់អ៊ុយក្រែន។

ក្រុងសេអ៊ូល ចោទប្រកាន់ចោរព័ត៌មានវិទ្យាកូរ៉េខាងជើង ពីការវាយប្រហារមកលើក្រុមហ៊ុនសាងសង់នាវា

2023/10/05 12:41:27 pm        232
Facebook Telegram Linkin
ទីភ្នាក់ងារស៊ើបអង្កេតរបស់ប្រទេសកូរ៉េខាងត្បូង បាននិយាយថា ប្រទេសកូរ៉េខាងជើង បានអនុវត្ត ការវាយប្រហារតាមបណ្តាញអ៊ីនធឺណិតមកលើក្រុមហ៊ុនសាងសង់នាវា ដើម្បីទទួលបានព័ត៌មានដែលត្រូវការក្នុងការសាងសង់នាវាចម្បាំង។ អង្គភាពសេវាចារកិច្ចជាតិ កាលពីថ្ងៃពុធ បានបង្ហាញថាក្រុមហ៊ុនសាងសង់នាវាកូរ៉េខាងត្បូងជាច្រើន ស្ថិតក្រោមការវាយប្រហារតាមបណ្តាញអ៊ីនធឺណិតធ្ងន់ធ្ងរពីក្រុមចោរព័ត៌មានវិទ្យាកូរ៉េខាងជើង ក្នុងខែសីហា និងខែកញ្ញា។ទីភ្នាក់ងារនេះបាននិយាយថា សារអេឡិចត្រូនិកក្លែងក្លាយ ត្រូវបានបញ្ជូនទៅកាន់បុគ្គលិក ដើម្បីលួចព័ត៌មានសម្ងាត់។ ការស៊ើបអង្កេតរបស់ទីភ្នាក់ងារ បានរកឃើញថា មេដឹកនាំកូរ៉េខាងជើង លោក Kim Jong Un បានចេញបញ្ជាថា នាវាចម្បាំងដែលត្រូវបានសាងសង់ ហើយការវាយប្រហារតាមបណ្តាញអ៊ីនធឺណិត ត្រូវបានអនុវត្តជាការឆ្លើយតប។ កាលពីខែមុន លោក Kim បានចូលរួមការបើកពិធីសម្រាប់នាវាមុជទឹកវាយប្រហារនុយក្លេអ៊ែរតាកទិកដែលសាងសង់ថ្មីរបស់ខ្លួន និងបានពិនិត្យសហគ្រាសរដ្ឋ ដែលជាប់ទាក់ទងទៅនឹងការសាងសង់នាវា ជាកន្លែងដែលលោក បានបង្ហាញពីដំណោះស្រាយដើម្បីជំរុញសមត្ថភាពយោធារបស់កងទ័ពជើងទឹកកូរ៉េខាងជើង។ ទីភ្នាក់ងារ និយាយថា ការវាយប្រហារតាមបណ្តាញអ៊ីនធឺណិតទំនងជានឹងបន្ត។ ទីភ្នាក់ងារ បានព្រមានដល់ក្រុមហ៊ុនសាងសង់នាវា និងក្រុមហ៊ុនគ្រឿងបន្លាស់សាងសង់នាវា ឲ្យបង្កើនសន្តិសុខតាមបណ្តាញអ៊ីនធឺណិតរបស់ពួកគេ។

ក្រសួងសុខាភិបាល ប្រកាសដាក់បញ្ចូលថ្នាំបង្ការជំងឺមហារីកមាត់ស្បូនដល់កុមារអាយុ៩ឆ្នាំ នៅទូទាំងប្រទេស

2023/10/05 12:25:33 pm        386
Facebook Telegram Linkin
ភ្នំពេញ៖ ព្រឹកថ្ងៃទី៥ ខែតុលា ឆ្នាំ២០២៣នេះ ឯកឧត្តមសាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាល បានអញ្ជើញជាអធិបតីប្រកាសដាក់បញ្ចូលថ្នាំបង្ការជំងឺមហារីកមាត់ស្បូន​ដល់កុមារអាយុ៩ឆ្នាំ នៅទូទាំងព្រះរាជាណាចក្រកម្ពុជា។ក្រសួងសុខាភិបាលបានសហការជាមួយក្រសួងអប់រំ យុវជន និងកីឡា និងរដ្ឋបាលមូលដ្ឋាន និងដោយមានការគាំទ្រពីអង្គការសម្ព័ន្ធសកលសម្រាប់វ៉ាក់សាំង និងការផ្តល់ថ្នាំបង្ការ (Gavi) អង្គការសុខភាពពិភពលោក (WHO) អង្គការមូលនិធិសម្រាប់កុមារនៃអង្គការសហប្រជាជាតិ (UNICEF) និងអង្គការគ្លីនតុនហែល អែកសេស ស៊ីនីតស៊ីអេធីវ (CHAI) នឹងដាក់បញ្ចូលថ្នាំបង្ការជំងឺមហារីកមាត់ស្បូនដែលត្រូវផ្ដល់តែចំនួនមួយដូសប៉ុណ្ណោះដល់ កុមារីម្នាក់ៗដែលមានអាយុ៩ឆ្នាំនៅទូទាំង ព្រះរាជាណាចក្រកម្ពុជា តាមរយៈការផ្តល់ថ្នាំបង្ការនៅតាមសាលាបឋមសិក្សា នៅតាមភូមិ ឬសហគមន៍ និងការផ្តល់ថ្នាំបង្ការពេញមួយឆ្នាំនៅតាមមណ្ឌលសុខភាពចាប់ពីថ្ងៃទី៥ ខែតុលា ឆ្នាំ២០២៣នេះ។ជំងឺមហារីកមាត់ស្បូន ជានិច្ចកាលត្រូវបានគេប្រសិទ្ធនាមថាជា " ឃាតកលាក់មុខ " ហើយក៏ជាជំងឺមួយដែលអាចការពារបានទាំងស្រុងផងដែរ ដោយសារថ្នាំបង្ការ។ វីរុសមហារីកមាត់ស្បូនបង្កឱ្យកើតជំងឺមហារីក មាត់ស្បូន ហើយជំងឺនេះជាមូលហេតុចម្បងទីបួន នៃការស្លាប់របស់ស្ត្រីដោយជំងឺមហារីកនៅទូទាំងពិភពលោក ហើយភាគច្រើនកើតនៅក្នុងប្រទេស ដែលមានប្រាក់ចំណូលទាប និងមធ្យម។ឯកឧត្តមសាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាល បានថ្លែងថា ជំងឺមហារីកមាត់ស្បូន គឺជាអាទិភាពសុខភាពសាធារណៈ ដែលត្រូវយកចិត្តទុកដាក់នៅព្រះរាជាណាចក្រកម្ពុជា។ យើងទាំងអស់គ្នាត្រូវពន្លឿន កិច្ចខិតខំប្រឹងប្រែងរួមគ្នា ដើម្បីលុបបំបាត់ជំងឺដ៏កាចសាហាវនេះ តាមរយៈការបញ្ចូលថ្នាំបង្ការជំងឺមហារីកមាត់ស្បូន ទៅក្នុងកម្មវិធីជាតិផ្តល់ថ្នាំបង្ការនៅ​ព្រះរាជាណាចក្រកម្ពុជា។ យើងធានាថាកុមារីអាយុ៩ឆ្នាំទាំងអស់ នឹងទទួលបានថ្នាំបង្ការ​ជំងឺមហារីកមាត់​ស្បូនមួយដូសដោយឥតគិតថ្លៃចាប់ពីថ្ងៃនេះតទៅ ហើយកម្ពុជាក៏មានគំរោង​នឹងផ្តល់​ថ្នាំបង្ការជំងឺមហារីកមាត់ស្បូនដល់កុមារី ដែលមានអាយុលើសពី៩ឆ្នាំ តាមរយៈការធ្វើយុទ្ធនាការក្នុងឆ្នាំ២០២៥ផងដែរ។ ឯកឧត្តមសាស្ត្រាចារ្យ ក៏បានលើកទឹកចិត្តដល់មន្ត្រី បុគ្គលិកសុខាភិបាល និងដៃគូអភិវឌ្ឍន៍ទាំងអស់អោយ ចូលរួមជាមួយគ្នា ដើម្បីការពារសុខភាពកុមារីទាំងអស់នៅក្នុងព្រះរាជាណាចក្រកម្ពុជា។សូមបញ្ជាក់ផងដែរថា នៅកម្ពុជា ជំងឺមហារីកមាត់ស្បូន គឺជាមូលហេតុចម្បងទី២ ក្នុងចំណោមមហារីកគ្រប់ប្រភេទដែលកើតទៅលើស្រ្តីគ្រប់វ័យ ដោយយោងទៅតាមរបាយការណ៍របស់អង្គការសុខភាពពិភពលោកឆ្នាំ២០២០ បានបង្ហាញថាជំងឺមហារីកមាត់ស្បូន សរុបចំនួនប្រមាណ ១១៣៥ករណី (១១,៤%) ត្រូវបានធ្វើរោគវិនិច្ឆ័យ ហើយចំនួន៦៤៣ករណីបានស្លាប់។ ថ្នាំបង្ការជំងឺមហារីកមាត់ស្បូន គឺមានប្រសិទ្ធភាពខ្ពស់ក្នុងការការពារស្តីពីជំងឺមហារីកមាត់ស្បូនតាមរយៈការកាត់ផ្តាច់នូវការចម្លងមេរោគមហារីកមាត់ស្បូន។ យោងទៅលើការសិក្សាស្រាវជ្រាវតាមបែបវិទ្យាសាស្ត្ររបស់អង្គការសុខភាពពិភពលោកនាពេលបច្ចុប្បន្ន បានបង្ហាញថា៖ ថ្នាំបង្ការជំងឺមហារីកមាត់ស្បូនចំនួនមួយដូសគឺមានប្រសិទ្ធភាព​ខ្ពស់ប្រមាណពី៨០ទៅ ៩០% ក្នុងការកាត់បន្ថយការឆ្លង និងការការពារពីជំងឺមហារីកមាត់ស្បូន។ ចាប់ពីឆ្នាំ២០១៧ ដល់២០១៨ ក្រសួងសុខាភិបាលបានអនុវត្តគម្រោងផ្តល់ថ្នាំ​បង្ការជំងឺមហារីកមាត់ស្បូន ដ៏ជោគជ័យដល់កុមារីអាយុ៩ឆ្នាំ នៅក្នុងស្រុករដ្ឋបាលចំនួន១០ នៅក្នុងខេត្តសៀមរាប និងខេត្តស្វាយរៀង។ គម្រោងនេះសម្រេចបានការគ្របដណ្តប់ចំនួន៩៦% ដែលជាលទ្ធផលមួយបង្ហាញពីការចូលរួម និងការមកទទួលថ្នាំបង្ការពីសំណាក់សហគមន៍ខ្ពស់ ដែលអាចឆ្លុះបញ្ចាំងថា៖ ប្រទេសកម្ពុជា មាន​​សមត្ថភាព និងបានត្រៀមរួចជាស្រេចផងដែរ សម្រាប់ការផ្តល់ថ្នាំបង្ការជំងឺ​មហារីកមាត់ស្បូន​នៅទូទាំងប្រទេស។ ឥឡូវនេះ ប្រទេសកម្ពុជាបាន ចូលរួមជាមួយប្រទេស​ចំនួន១៣៦ផ្សេងទៀត ដែលបានដាក់បញ្ចូលថ្នាំបង្ការជំងឺ​មហារីកមាត់ស្បូនទៅក្នុងកម្មវិធី ជាតិផ្តល់ថ្នាំបង្ការ៕អត្ថបទ រដ្ឋា

សម្តេចធិបតី ណែនាំក្រសួងអប់រំពិនិត្យឱ្យបានម៉ត់ចត់ចំពោះការជ្រើសរើសនាយកសាលា

2023/10/05 12:16:54 pm        339
Facebook Telegram Linkin
ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានណែនាំដល់ក្រសួង អប់រំ យុវជន និងកីឡា ធ្វើការពិនិត្យឱ្យបានម៉ត់ចត់ចំពោះការជ្រើសរើសនាយកសាលា ខណៈសាលារៀនដំណើរការទៅបានល្អ គឺត្រូវពឹងផ្អែកសំខាន់លើនាយកសាលា និងគ្រូបង្រៀន ហើយនាយកសាលាប្រៀបដូចជា ឪពុកម្តាយរបស់សាលារៀននីមួយៗដែរ។សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា ក្នុងឱកាសអញ្ជើញជាអធិបតី​ប្រារព្ធ​ទិវាគ្រូបង្រៀនលើកទី២៦ ​នៅព្រឹកថ្ងៃទី៥ ខែតុលា​ ឆ្នាំ២០២៣នេះ​ នៅវិទ្យាស្ថានបច្ចេកវិទ្យាកម្ពុជា បានណែនាំដល់ក្រសួងអប់រំ ​ត្រូវពិនិត្យឱ្យបាន​ម៉ត់ចត់​ចំពោះការជ្រើសរើស​នាយកសាលា ពី​ព្រោះនាយក​សាលា ​គឺមានសារៈសំខាន់ណាស់ក្នុងការដឹកនាំ​លើការ​បណ្ដុះបណ្ដាល​ធនធានមនុស្ស ចាប់តាំង​ពីថ្នាក់​មត្តេយ្យរហូត​ដល់មធ្យមសិក្សា។សម្ដេចនាយករដ្ឋមន្រ្ដី ក៏បានណែនាំដល់ក្រសួងអប់រំ ត្រូវរៀបចំគោលការណ៍ជ្រើសរើស​នាយក​សាលានេះ​រួចដាក់ជូនមកសម្ដេចពិនិត្យ​ និងសម្រេចនាពេលខាងមុខផងដែរ។សូមជម្រាបថា ក្រោមការដឹកនាំប្រកបដោយគតិបណ្ឌិតរបស់ ​សម្តេចអគ្គមហាសេនាបតីតេជោ ហ៊ុន សែន ស្ថាបនិកឯកនយោបាយឈ្នះ-ឈ្នះ ​កម្ពុជាសម្រេចបាននូវសុខសន្តិភាព​ពេញលេញ ​ឯកភាព ទឹកដី ដែលមិនធ្លាប់មានក្នុងរយៈពេលជាង៥០០ឆ្នាំកន្លងទៅ។ ​សន្តិភាពគឺជាមូលដ្ឋានគ្រឹះនៃការ អភិវឌ្ឍសេដ្ឋកិច្ចនិងសង្គមក្នុងគ្រប់វិស័យ។ ចាប់តាំងពីឆ្នាំ២០១៣ ដើមអាណត្តិទី៥ នៃរាជ​រដ្ឋាភិបាល​កម្ពុជា ក្រសួងអប់រំ យុវជន និងកីឡាបាន ​ដាក់ចេញនូវកំណែទម្រង់ជា​បន្តបន្ទាប់​ជាពិសេស ​ការធ្វើកំណែទម្រង់ ​គុណភាពអប់រំ ​ការគ្រប់គ្របង់បុគ្គលិកអប់រំ, ការពង្រឹង​ការប្រឡង​គ្រប់ប្រភេទ​ រួមនឹងការពង្រឹងសមត្ថភាព ​និងការបណ្ដុះបណ្ដាលគ្រូបង្រៀនល្អជាដើម៕អត្ថបទៈ វ៉ន ដារ៉ា

សម្តេចធិបតី ហ៊ុន ម៉ាណែត គាំទ្រលើកម្មវិធីកែទម្រង់វិស័យអប់រំពីឆ្នាំ២០២៣-២០២៨

2023/10/05 12:12:57 pm        338
Facebook Telegram Linkin
ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានបង្ហាញការគាំទ្រលើកម្មវិធីកែទម្រង់វិស័យអប់រំ របស់ក្រសួងអប់រំ យុវជន និងកីឡា ឆ្នាំ២០២៣-២០២៨ ខណៈគោលនយោបាយរបស់រាជរដ្ឋាភិបាលអាណត្តិទី៧នេះ គឺបន្តយកចិត្តទុកដាក់ក្នុងការអភិវឌ្ឍទៅលើមូលធនមនុស្សកម្ពុជាតាមរយៈយុទ្ធសាស្រ្ដបញ្ចកោណ ដំណាក់កាលទី១ ដោយផ្ដល់អាទិភាពលើការពង្រឹងគុណភាពវិស័យអប់រំ កីឡា វិទ្យាសាស្រ្ដ និងបច្ចេកវិទ្យា និងការបន្ដកែទម្រង់សាលារដ្ឋនៅទូទាំងប្រទេស។សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា មានប្រសាសន៍ក្នុងឱកាសអញ្ជើញជា​អធិបតីប្រារព្ធទិវាគ្រូបង្រៀនលើកទី២៦ នៅព្រឹកថ្ងៃទី៥ ​ខែតុលា ឆ្នាំ២០២៣នេះ នៅវិទ្យាស្ថាន​បច្ចេកវិទ្យាកម្ពុជាដោយបានកោតសរសើរ និងវាយតម្លៃខ្ពស់ ​ចំពោះក្រសួងអប់រំ យុវជន និងកីឡា ក្នុងការលើកកម្ពស់ គុណវុឌ្ឍ និងគុណតម្លៃគ្រូបង្រៀននាពេលកន្លងមក។ សម្ដេចធិបតីបញ្ជាក់ថា គោលនយោបាយរបស់រាជរដ្ឋាភិបាលអាណត្តិទី៧នេះ គឺបន្តយកចិត្តទុក​ដាក់​ក្នុងការអភិវឌ្ឍទៅលើមូលធនមនុស្សកម្ពុជា ជាក់ស្ដែងយុទ្ធសាស្រ្ដ បញ្ចកោណ ដំណាក់​កាលទី១ បានផ្ដល់អាទិភាពលើការពង្រឹង គុណភាពវិស័យអប់រំ កីឡា វិទ្យាសាស្រ្ដ​ និងបច្ចេកវិទ្យា និងការបន្ដកែទម្រង់សាលារដ្ឋ ​ដោយផ្ដោតលើការពង្រឹងសមិទ្ធផលដែលមានស្រាប់ ការជំរុញ​ការបង្កើត​សាលារៀនគំរូ ការពង្រឹងអភិបាលកិច្ច និងប្រសិទ្ធភាពគ្រប់គ្រងនៅ​តាមមន្ទីរអប់រំ​រាជធានីខេត្ត ព្រមទាំងជំរុញឱ្យមានការចូលរួមយ៉ាងសកម្មពីមាតាបិតា វិស័យឯកជន ជាដើម។ សម្ដេចធិបតីមានប្រសាសន៍ថា ​នៅក្នុងយុទ្ធសាស្រ្ដបញ្ជកោណ រាជរដ្ឋាភិបាលបានដាក់ចេញរួហើយ នៅក្នុងនោះក៏មានយន្តការ ​គិតគូរអំពីការពង្រឹងវិស័យអប់រំ ​ដែលអនុវត្តបន្តវីយុទ្ធសាស្រ្ដចតុកោណ ខណៈការធ្វើកំណែទម្រង់នេះ ​គឺមិនមែនធ្វើតែមួយឆ្នាំត្រូវប្ដូរនោះទេ​ ប៉ុន្ដែមាននិរន្តរភាព។ សម្ដេចធិបតីបញ្ជាក់ថា ​វិធានការគន្លឹះដែលសម្ដេច​បានដាក់ចេញក្នុងការធ្វើកំណែទម្រង់វិស័យ​អប់រំ​នេះ គឺក្រោមទ្រឹស្ដី គិតធំ ប៉ុន្ដែត្រូវចាប់ផ្ដើមធ្វើពីតូចទៅ។​ មានន័យថាការធ្វើកំណែទម្រង់នេះ គឺ​ត្រូវគិត​ឱ្យបានគ្រប់ជ្រុងជ្រោយ ​ប៉ុន្ដែការអនុវត្តគឺត្រូវ​ជ្រើសរើស​ចំណុចណា​ដែលជាអាទិភាព​ហើយ​ត្រូវអនុវត្តឱ្យចំគោលដៅជាជំហានៗតែម្ដង៕អត្ថបទៈ វ៉ន ដារ៉ា

សម្ដេចធិបតី៖ រដ្ឋសន្សំថវិកាបានជាង២០០ លានដុល្លារពីការលុបគម្រោង ដែលមិនចាំបាច់តាមក្រសួងនានា

2023/10/05 12:08:39 pm        503
Facebook Telegram Linkin
ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានធ្វើការណែនាំដល់ក្រសួង ស្ថាប័ននានា ត្រូវពិនិត្យក្នុងការលុបចោលនូវគម្រោងមួយចំនួនដែលមិនចាំបាច់នៅតាមសាមីក្រសួង ខណៈក្នុងពេលថ្មីៗនេះ ក្រោយការលុបគម្រោងដែលមិនចាំបាច់មួយចំនួន រាជរដ្ឋាភិបាលអាចសន្សំថវិកាបានជាង ២០០ លានដុល្លារអាមេរិក។សម្តេចមហាបវរធិបតី ហ៊ុន ម៉ាណែត ​នាយករដ្ឋមន្ត្រីកម្ពុជា មានប្រសាសន៍ក្នុងឱកាសអញ្ជើញ​ជា​អធិបតីប្រារព្ធទិវាគ្រូបង្រៀនលើកទី២៦ ​នៅព្រឹកថ្ងៃទី៥ ខែតុលា ឆ្នាំ២០២៣នេះ នៅវិទ្យាស្ថាន​បច្ចេកវិទ្យាកម្ពុជាថា ក្រសួងស្ថាប័ននានា ត្រូវពិនិត្យ និងហ៊ានលុបចោលចំពោះគម្រោងដែលមិនចាំ​បាច់​នៅតាមសាមីក្រសួងរបស់ខ្លួន ​ដើម្បីចូលរួមក្នុងការសន្សំថវិកាជាតិ។ទោះជាយ៉ាងណា សម្តេចធិបតី ហ៊ុន ម៉ាណែត បញ្ជាក់ថា ​រាជរដ្ឋាភិបាលអាណត្តិទី៧ បន្តអនុវត្ត​គោលនយោបាយជាអាទិភាពលើវិស័យអប់រំ ​និងវិស័យសុខាភិបាល​នៅក្នុងប្រទេសកម្ពុជា ខណៈបច្ចុប្បន្នវិស័យទាំងពីរនេះរាជរដ្ឋាភិបាលបានវិនិយោគច្រើនជាងវិស័យផ្សេងៗទៀត។ សម្តេចធិបតី បញ្ជាក់ថា សម្រាប់ការជ្រើសរើសគ្រូបង្រៀនឆ្នាំនេះ រាជរដ្ឋាភិបាលអនុញ្ញាត​ឱ្យជ្រើរើស​បន្ថែមចំនួន ៣០០០ នាក់ផងដែរ៕អត្ថបទវ៉ន ដារ៉ា

នាយករដ្ឋមន្រ្តី ណែនាំឲ្យកងយោធពលខេមរភូមិន្ទពិនិត្យឡើងវិញ ចំពោះការជ្រើសរើសក្របខណ្ឌកងទ័ព

2023/10/05 11:03:27 am        356
Facebook Telegram Linkin
ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី បានណែនាំក្រសួងការពារជាតិ ក៏ដូចជាកងយោធពលខេមរភូមិន្ទ ត្រូវពិនិត្យ និងធ្វើការសិក្សាឡើងវិញ ចំពោះការជ្រើសរើស ក្របខណ្ឌកងទ័ព មួយវិញទៀតត្រូវកាត់បន្ថយការជ្រើសរើស និងដំឡើង​ឋានន្តរសក្ដិ​ថ្នាក់នាយទាហាន ដោយត្រូវបង្កើនពលទាហានវិញ។ថ្លែងនៅក្នុងអញ្ជើញជួបសំណេះសំណាល ជាមួយលោកគ្រូ អ្នកគ្រូជាងពីរពាន់នាក់ ដើម្បី​អបអរសាទរអបអរសាទរ ទិវាគ្រូបង្រៀនពិភពលោក ​ក្រោមប្រធានបទ«គ្រូបង្រៀន ជាសសរស្តម្ភនៃសាលារៀនឆ្ពោះទៅរកឧត្តមភាព» ​នាព្រឹកថ្ងៃទី៥ ខែតុលា ឆ្នាំ២០២៣នេះ នៅវិទ្យាស្ថានបច្ចេកកម្ពុជា(តិចណូ) ​សម្តេចធិបតី ហ៊ុន ម៉ាណែត ​បានបញ្ជាក់ថា ចាប់ពីពេល​នេះតទៅ​កងយោធពលខេមរភូមិន្ទ ​គប្បីពិនិត្យឡើងវិញ​ លើការបណ្ដុះបណ្ដាល និងការជ្រើសរើស​ក្របខណ្ឌកងទ័ព។សម្តេចធិបតី ​នាយករដ្ឋមន្រ្តី បានលើកឡើងទៀតថា នាពេលកន្លងមក សម្តេចសង្កេតឃើញថា​ការបណ្ដុះបណ្ដាល​នាយទាហាន​មាន​អត្រាខ្ពស់ជាងការ​បណ្ដុះបណ្ដាល​ពលទាហាន ហើយពេល​ដែលមាននាយទាហាន​ច្រើនពេក វានឹងធ្វើឲ្យប៉ះពាល់​ដល់​ការ​តែងតាំង​តួនាទី​នាយទាហាន​ទាំងនោះផងដែរ ហើយមួយវិញទៀត​ការធ្វើការកំណែ​ទម្រង់បែបនេះ​ក៏កាត់បន្ថយការ​ចំណាយ​ថវិកា​របស់ជាតិផងដែរ៕ អត្ថបទបាន ចក់

សម្តេចធិបតី នាយករដ្ឋមន្រ្តី ណែនាំឲ្យពិនិត្យការលក់ដូរតាមសាលានានា ដើម្បីបង្ការសុខុមាលភាពដល់សិស្ស

2023/10/05 10:48:31 am        602
Facebook Telegram Linkin
ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា បានណែនាំឲ្យពិនិត្យការលក់ដូរអាហារនៅតាមសាលារៀនទាំងអស់ទាំងវិស័យឯកជន និងរដ្ឋ ខណៈអាហារខ្លះអាចមានផលប៉ះពាល់ដល់សុខភាពរបស់សិស្សានុសិស្ស។សម្តេចធិបតី បានបញ្ជាក់ថា ក្រៅពីការពង្រឹងនូវការសិក្សាដល់សិស្សានុសិស្សក៏ត្រូវពង្រឹង និងបង្ការសុខភាពដល់សិស្សានុសិស្សផងដែរ ។ សម្តេចធិបតី ក៏បានអំពាវនាវ​ដល់អ្នកលក់ដូរ​នៅ​តាមសាលារៀនទាំងអស់​ឱ្យគិតគូរពីបញ្ហាសុខភាពរបស់សិស្ស ខណៈអាហារណា​ដែលនឹងធ្វើ​ឲ្យប៉ះពាល់ដល់សុខភាព គប្បីបញ្ឈប់ការលក់ជាបន្ទាន់។ការលើកឡើងរបស់សម្តេចធិបតី ធ្វើឡើងក្នុងឱកាសអញ្ជើញជួបសំណេះសំណាល ជាមួយលោកគ្រូ អ្នកគ្រូជាងពីរពាន់នាក់ ​ដើម្បីអបអរសាទរអបអរសាទរ​ ទិវាគ្រូបង្រៀនពិភពលោក ក្រោមប្រធានបទ«គ្រូបង្រៀនជាសសរស្តម្ភនៃសាលារៀនឆ្ពោះទៅរកឧត្តមភាព» នាព្រឹកថ្ងៃទី៥ ខែតុលា ឆ្នាំ២០២៣នេះ នៅវិទ្យាស្ថានបច្ចេកកម្ពុជា(តិចណូ)៕អត្ថបទ៖ បាន ចក់

ប្រសាសន៍សំខាន់ៗរបស់សម្តេចធិបតី នាយករដ្ឋមន្រ្តី ក្នុងទិវាគ្រូបង្រៀនពិភពលោក នៅវិទ្យាស្ថានបច្ចេកកម្ពុជា(តិចណូ)

2023/10/05 10:25:10 am        445
Facebook Telegram Linkin
ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា នៅព្រឹកថ្ងៃទី៥ ខែតុលា ឆ្នាំ២០២៣នេះ បានអញ្ជើញជួបសំណេះសំណាល ជាមួយលោកគ្រូ អ្នកគ្រូ ដើម្បីអបអរសាទរអបអរសាទរ ទិវាគ្រូបង្រៀនពិភពលោក ក្រោមប្រធានបទ «គ្រូបង្រៀន ជាសសរស្តម្ភនៃសាលារៀនឆ្ពោះទៅរកឧត្តមភាព» ។ពិធីសំណេះសំណាលនេះគឺបានធ្វើឡើងនៅវិទ្យាស្ថានបច្ចេកកម្ពុជា(តិចណូ)។ប្រសាសន៍សំខាន់ៗរបស់សម្តេចធិបតី នាយករដ្ឋមន្រ្តី ដែលមានខ្លឹមសារដូចខាងក្រោម៖សម្តេចធិបតី ហ៊ុន ម៉ាណែត បញ្ជាក់ថា វិស័យអប់រំ ដំណាក់កាលនេះ គឺជាដំណាក់កាលពង្រឹងវិស័យអប់រំ ដូច្នេះត្រូវយកសសរស្ដម្ភណាមួយ ក្នុងនោះមានដូចជាការពង្រឹងមូលដ្ឋាន នៃការសិក្សារបស់សិស្ស ចាប់តាំងពីថ្នាក់មត្ដេយ្យរហូតដល់ថ្នាក់ទី១២ ឬមធ្យមសិក្សាតែម្ដង ដែលការអប់រំនេះ ត្រូវផ្ដោតលើលទ្ធផលចំនួន២ គឺសមត្ថភាព និងឥរិយាបថ (Soft Skill)។សម្ដេចធិបតី ហ៊ុន ម៉ាណែត ណែនាំដល់ក្រសួងអប់រំ យុវជន និងកីឡា ត្រូវពិនិត្យឱ្យបានម៉ត់ចត់ចំពោះការជ្រើសរើសនាយកសាលា ពីព្រោះនាយកសាលាគឺមានសារៈសំខាន់ណាស់ក្នុងការដឹកនាំលើការបណ្ដុះបណ្ដាលធនធានមនុស្ស ចាប់តាំងពីថ្នាក់មត្តេយ្យរហូតដល់មធ្យមសិក្សា។ សម្ដេចណែនាំដល់ក្រសួងអប់រំ ត្រូវរៀបចំគោលការណ៍ជ្រើសរើសនាយកសាលានេះមកសម្ដេចពិនិត្យ និងសម្រេច។សម្តេចធិបតី ហ៊ុន ម៉ាណែត បញ្ជាក់ថា គ្រូបង្រៀនត្រូវមានទាំងចំណេះដឹង និងគុណធម៌ សីលធម៌ ដែលគំរូ និងជាមូលដ្ឋានគ្រឹះក្នុងការបណ្ដុះបណ្ដាល ចែករំលែកចំណេះដឹងទៅដល់សិស្សានុសិស្ស និងយុវជនជំនាន់ក្រោយ ជាពិសេសជាការពង្រឹង និងបណ្ដុះបណ្ដាលធនធនមនុស្សល្អសម្រាប់ប្រទេសកម្ពុជា។សម្តេចធិបតី ហ៊ុន ម៉ាណែត បញ្ជាក់ថា រាជរដ្ឋាភិបាលកំពុងបន្តគិតគូរ និងយកចិត្តទុកដាក់លើការដំឡើងប្រាក់បៀវត្ស និងអត្ថប្រយោជន៍ដល់គ្រូបង្រៀននៅទូទាំងប្រទេស ខណៈបច្ចុប្បន្នគ្រូបង្រៀន ក្របខណ្ឌ (ក) ទទួលបានប្រាក់បៀវត្សក្នុងរង្វង់ជិត ១លានរៀល។សម្តេចធិបតី ហ៊ុន ម៉ាណែត បញ្ជាក់ថា កាលពីពេលថ្មីៗនេះ សម្ដេចបានណែនាំឱ្យលុបគម្រោងដែលមិនចាំបាច់តាមបណ្ដាក្រសួងស្ថាប័នមួយចំនួនចោល ក្នុងនោះរាជរដ្ឋាភិបាលអាចសន្សំថវិកាបានជាង ២០០ លានដុល្លារ។ ដូច្នេះសម្ដេចធិបតី ណែនាំដល់ក្រសួងស្ថាប័ននានា ត្រូវពិនិត្យ និងអនុវត្តលុបចោលចំពោះគម្រោងដែលមិនចាំបាច់នៅតាមសាមីក្រសួងរបស់ខ្លួន។សម្តេចធិបតី ហ៊ុន ម៉ាណែត បានបញ្ជាក់ថា ចាប់ពីពេលនេះតទៅត្រូវកាត់បន្ថយ ការដំឡើង​ឋានន្តរសក្ដិថ្នាក់នាយទាហាន ដោយត្រូវបង្កើនការជ្រើសរើសពលទាហានវិញ ដើម្បីកាត់បន្ថយការចំណាយថវិការបស់ជាតិ។សម្តេចធិបតី លើកទឹកចិត្តដល់តាមបណ្ដាសាលារៀន ក្រៅពីការបង្រៀនសិស្សតាមមុខវិជ្ជាគោលដែលមានស្រាប់ សាលារៀនក៏ត្រូវបង្រៀនសិស្សបន្ថែមទៀត លើការស្ម័គ្រចិត្តចូលរួមធ្វើកិច្ចការងារសង្គមផ្សេងៗបន្ថែមទៀត ដើម្បីឱ្យយុវជនចេះចូលរួមធ្វើកិច្ចការងារក្នុងសង្គមជាតិ។សម្តេចធិបតី ហ៊ុន ម៉ាណែត ណែនាំដល់ក្រសួងអប់រំ និងសាលារៀនចំពោះការផ្ដល់ពិន្ទុដល់សិស្ស កុំគិតតែលើលទ្ធផលលើក្រដាស ប៉ុន្ដែក៏ត្រូវពិនិត្យមើលលើសកម្មភាព និងឥរិយាបថជាក់ស្ដែងរបស់សិស្ស ក្នុងការសិក្សារៀនសូត្រផងដែរ។សម្តេចធិបតី ហ៊ុន ម៉ាណែត បញ្ជាក់ថា រាជរដ្ឋាភិបាលអាណត្តិទី៧ បន្តអនុវត្តគោលនយោបាយជាអាទិភាពលើវិស័យអប់រំ និងវិស័យសុខាភិបាលនៅក្នុងប្រទេសកម្ពុជា ខណៈបច្ចុប្បន្នវិស័យទាំងពីរនេះ រាជរដ្ឋាភិបាលបានវិនិយោគច្រើនជាងវិស័យផ្សេងៗទៀត។សម្តេចធិបតី ហ៊ុន ម៉ាណែត ណែនាំឲ្យពិនិត្យការលក់ដូរអាហារនៅតាមសាលារៀនទាំង អស់ទាំងវិស័យឯកជន និងរដ្ឋ ខណៈអាហារខ្លះអាចមានផលប៉ះពាល់ដល់សុខភាពរបស់សិស្សានុសិស្ស។ សម្ដេចធិបតី អំពាវនាវដល់អ្នកលក់ដូរនៅតាមសាលារៀនឱ្យគិតគូរពីបញ្ហាសុខភាពរបស់សិស្ស។

ហ្វីលីពីនដឹកជញ្ជូនសម្ភារៈផ្គត់ផ្គង់ទៅកាន់ទីបញ្ជាការយោធានៅសមុទ្រចិនខាងត្បូង បើទោះជាចិនព្យាយាម រារាំងក៏ដោយ

2023/10/05 10:21:45 am        339
Facebook Telegram Linkin
ហ្វីលីពីន៖ ប្រទេសហ្វីលីពីន បាននិយាយថា ខ្លួនបានដឹកជញ្ជូនសម្ភារៈផ្គត់ផ្គង់ថ្មីៗដោយជោគជ័យទៅកាន់ទីបញ្ជាការយោធា នៅក្នុងតំបន់ថ្មប៉ប្រះទឹក ក្នុងសមុទ្រចិនខាងត្បូង បើទោះបីជាអ្វីដែលខ្លួនបានពិពណ៌នាថាជាការប៉ុនប៉ងដោយនាវាចិន «ដើម្បីរារាំង យាយី និងជ្រៀតជ្រែក»ក្នុងបេសកកម្មនេះក្តី។ក្រុមប្រឹក្សាសន្តិសុខជាតិរបស់ទីក្រុងម៉ានីល បាននិយាយនៅក្នុងសេចក្តីថ្លែងការណ៍មួយថា៖«ចំនួនដ៏ច្រើន»នៃឆ្មាំល្បាតឆ្នេរចិន និងនាវាកងជីវពលដែនសមុទ្រ បានព្យាយាមបញ្ឈប់បេសកកម្មផ្គត់ផ្គង់ឡើងវិញចុងក្រោយបង្អស់ ដែលធ្វើឡើងដោយយោធាហ្វីលីពីន និងឆ្មាំល្បាតឆ្នេរសមុទ្រ កាលពីថ្ងៃពុធ។ប្រទេសចិន បាននិយាយថា ខ្លួនបានព្រមាននាវាផ្គត់ផ្គង់ហ្វីលីពីនពីរគ្រឿង និងនាវាឆ្មាំល្បាតឆ្នេរសមុទ្រពីរគ្រឿង ឲ្យចាកចេញពីតំបន់សមុទ្រក្បែរប្រជុំកោះ ណានសា (Nansha) កាលពីថ្ងៃពុធ ហើយដេញតាមនាវាទាំងអស់នោះ នេះបើយោងតាមសេចក្តីថ្លែងការណ៍មួយពីឆ្មាំល្បាតឆ្នេរសមុទ្រចិន។ប្រជុំកោះណានសា គឺជារបៀបដែលទីក្រុងប៉េកាំងហៅថា ប្រជុំកោះស្រ្បាតលី (Spratly) នៅសមុទ្រចិនខាងត្បូង ដែលត្រូវបានទាមទារដោយប្រទេសហ្វីលីពីន ម៉ាឡេស៊ី ប្រ៊ុយណេ វៀតណាម និងកោះតៃវ៉ាន់៕

បណ្ដាញសង្គម

ព័ត៌មានថ្មីៗ

រដ្ឋមន្រ្តីសុខាភិបាល អនុញ្ញាតឱ្យគណៈកម្មការប្រយុទ្ធប្រឆាំងផលិតផលក្លែងក្លាយ ដែលបង្កគ្រោះថ្នាក់មានហានិភ័យខ្ពស់ដល់សុខភាព និងសុវត្ថិភាពសង្គម ជួបសម្តែងការគួរសម និងពិភាក្សាការងារ
09/10/2025 08:09 PM
Facebook Telegram Linkin
រ៉្វាន់ដា៖ ការអំពាវនាវរបស់កុងហ្គោឲ្យ UN ទទួលស្គាល់មាន «អំពើប្រល័យពូជសាសន៍» គឺជាទង្វើ «ល្ងង់ខ្លៅ»
09/10/2025 08:09 PM
Facebook Telegram Linkin
វិមានក្រឹមឡាំងបដិសេធមិនធ្វើអត្ថាធិប្បាយ ជុំវិញឧប្បត្តិហេតុយានដ្រូន នៅប៉ូឡូញ
09/10/2025 07:09 PM
Facebook Telegram Linkin
ក្រុមបារាំងកៀរគរគ្នាដើម្បីបេតិកភណ្ឌកម្ពុជា
09/10/2025 07:09 PM
Facebook Telegram Linkin
នាយករដ្ឋមន្ត្រីអង់គ្លេស៖ ការរំលោភរបស់រុស្ស៊ីលើដែនអាកាសប៉ូឡូញ គឺជា «ធ្វេសប្រហែសខ្លាំងណាស់»
09/10/2025 07:09 PM
Facebook Telegram Linkin
សមាជិកព្រឹទ្ធសភាអូស្ត្រាលីស្តាំនិយម ត្រូវបណ្តេញចេញពីក្រសួងស្រមោល ជុំវិញការអត្ថាធិប្បាយប្រឆាំងឥណ្ឌា
09/10/2025 06:09 PM
Facebook Telegram Linkin
ក្រុងច្បារមន និងខេត្តកំពង់ស្ពឺ ទទួលបាន ជ័យលាភី “ទីក្រុងទេសចរណ៍គ្មានផ្សែងបារី”
09/10/2025 06:09 PM
Facebook Telegram Linkin
ក្រុមហ៊ុនអាកាសចរណ៍ JAL រងការព្រមានជាលើកទី២ ពាក់ព័ន្ធនឹងអ្នកបើកបរយន្តហោះស្រវឹង
09/10/2025 06:09 PM
Facebook Telegram Linkin
ប្រមុខគណៈកម្មការ EU បញ្ជាក់ថា លោកស្រីនឹងស្នើវិធានការថ្មីផ្ដោតលើអ៊ីស្រាអែល
09/10/2025 06:09 PM
Facebook Telegram Linkin
សំឡេងផ្ទុះបន្លឺឡើង ក្រោយរថយន្តផ្លូវដែកផ្ទុកដោយឥន្ធនៈ មានអគ្គិភ័យ នៅលីទុយអានី
09/10/2025 06:09 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.