កម្ពុជា-សិង្ហបុរី បន្ដពង្រឹងទំនាក់ទំនង និងកិច្ចសហប្រតិបត្តិការទ្វេភាគីឱ្យកាន់តែរឹងមាំ​ និង​ ស៊ីជម្រៅ​
កម្ពុជា-អូស្ត្រាលី ប្ដេជ្ញាពង្រឹងកិច្ចសហប្រតិបត្តិការដែលមានស្រាប់ និងស្វែងរកកាលានុវត្តភាពថ្មីៗបន្ថែមទៀត
សម្ដេចតេជោ៖ កម្ពុជានឹងនិយាយលើវេទិកាអន្តរជាតិកាន់តែខ្លាំងជាងមុនថែមទៀត បើថៃមិនអនុវត្តកិច្ចព្រមព្រៀង
សម្តេចធិបតី ហ៊ុន ម៉ាណែត ជួបពិភាក្សាការងារទ្វេភាគី ជាមួយ ឯកឧត្តមនាយករដ្ឋមន្ត្រីសិង្ហបុរី នៅហ្វីលីពីន

នយោបាយ​ និង ការអភិវឌ្ឍន៍

ក្រុមអ្នកនេសាទកូរ៉េខាងត្បូង ប្រមូលផ្តុំគ្នាប្រឆាំងនឹងផែនការបញ្ចេញទឹកសំណល់វិទ្យុសកម្មរបស់ជប៉ុន

2023/08/17 07:11:53 pm        142
កូរ៉េខាងត្បូង៖ ក្រុមអ្នកនេសាទកូរ៉េខាងត្បូងជាង១.០០០នាក់នៅតំបន់ឆ្នេរភាគខាងត្បូងនៃតំបន់ហ្គោវ៉្យុង (Goheung) បានប្រមូលផ្តុំគ្នាកាលពីថ្ងៃពុធ ដែលជាផ្នែកមួយនៃការប្រមូលផ្តុំតវ៉ានាពេលថ្មីៗនេះក្នុងចំណោមអ្នកនេសាទក្នុងស្រុក ដើម្បីប្រឆាំងនឹងគម្រោងការរបស់ប្រទេសជប៉ុន ក្នុងការការបញ្ចេញទឹកសំណល់វិទ្យុសកម្មទៅក្នុងមហាសមុទ្រ។ក្រុមអ្នកតវ៉ាបានសង្កត់ធ្ងន់ថា ប្រសិនបើទឹកសំណល់វិទ្យុសកម្មត្រូវបានបញ្ចេញទៅក្នុងមហាសមុទ្រ ការខូចខាតនឹងកើតឡើងចំពោះប្រព័ន្ធអេកូឡូស៊ីទាំងអស់នៅក្នុងមហាសមុទ្រប៉ាស៊ីហ្វិក និងអ្នកនេសាទទាំងអស់ដែលរស់នៅពឹងផ្អែកលើការរកស៊ីក្នុងសមុទ្រផងដែរ។ យោងតាមការស្ទង់មតិលើមនុស្សពេញវ័យជនជាតិកូរ៉េខាងត្បូងចំនួន១.០០០នាក់ ក្នុងខែឧសភា មនុស្សចំនួន៨៥,៤ភាគរយបានប្រឆាំងនឹងការបញ្ចេញទឹកសំណល់វិទ្យុសកម្មរបស់ប្រទេសជប៉ុននេះ ខណៈដែលមនុស្ស៧២ភាគរយបាននិយាយថា ពួកគេនឹងកាត់បន្ថយការប្រើប្រាស់ផលិតផលសមុទ្រ ប្រសិនបើទឹកសំណល់ត្រូវបានបង្ហូរទៅក្នុងមហាសមុទ្រ។ស្របពេលមានការរិះគន់យ៉ាងទូលំទូលាយពីក្នុងប្រទេស និងក្រៅប្រទេស រដ្ឋាភិបាលជប៉ុនបាននិងកំពុងជំរុញឱ្យបញ្ចេញទឹកសំណល់មានមេរោគនុយក្លេអ៊ែរ នៅរដូវក្តៅនេះ ពីរោងចក្រថាមពលនុយក្លេអ៊ែរ ហ្វ៊ូគូស៊ីម៉ា ដៃអ៊ីឈី ដែលរងការវាយប្រហារដោយការរញ្ជួយដីដ៏ធំ និងរលកយក្សស៊ូណាមិកាលពីខែមីនា ឆ្នាំ២០១១៕

ចំហេះព្រៃនៅកាណាដា គំរាមដល់ទីក្រុងនានា ខណៈរដ្ឋាភិបាលចេញបទបញ្ជាជម្លៀសពលរដ្ឋ

2023/08/17 07:08:59 pm        137
កាណាដា៖ ក្រុមមន្ត្រីប្រទេសកាណាដា បានចេញបទបញ្ជាជម្លៀសពលរដ្ឋ នៅរដ្ឋធានី Yellowknife ដែនដីភាគពាយព្យ និងសហគមន៍តូចៗជាច្រើនកាលពិថ្ងៃពុធ ខណៈចំហេះព្រៃទ្រង់ទ្រាយធំ បានគំរាមកំហែងដល់ទីក្រុងទន្លេ Hay កាលពីពេលយប់។ ក្រុមជាច្រើនកំពុងធ្វើការជម្លៀស នៅតំបន់ទន្លេ Hay ជាសហគមន៍មួយមានពលរដ្ឋប្រមាណ៣.០០០នាក់ នៅលើបឹងធំ Great Slave Lake ដឹកជញ្ជូនដោយរថយន្តក្រុង ឬយន្តហោះ កាលពីយប់ថ្ងៃពុធខណៈអគ្គិភ័យខិតជិតមកដល់។ មន្ត្រីព័ត៌មានអគ្គិភ័យ លោក Mike Westwick បាននិយាយនៅក្នុងសន្និសីទសារព័ត៌មានកាលពីល្ងាចថ្ងៃពុធថា នៅតំបន់ទន្លេHay បានឃើញអគ្គិភ័យ នៅភាគខាងត្បូងសហគមន៍របស់ពួកគេកើនឡើង ដែលខិតកាន់តែកៀកទីក្រុងនៅថ្ងៃនេះ។ យើងបានមើលឃើញអគ្គិភ័យមានសកម្មភាពខ្ពស់នៅក្នុងតំបន់នោះ ហើយវាកំពុងរាលដាលយ៉ាងឆាប់រហ័ស។ លោក Westwick និយាយថា អណ្តាតភ្លើង នឹងទៅដល់ទីក្រុង Yellowknife នៅចុងសប្តាហ៍នេះដោយពុំមានភ្លៀងធ្លាក់ ហើយពលរដ្ឋនៅរដ្ឋធានី កំពុងត្រូវបានស្នើសុំឲ្យចាកចេញ ជាផ្នែកមួយនៃ ការជម្លៀសតាមដំណាក់កាល ដោយចាប់ផ្តើមជាមួយសហគមន៍ដែលមានការគំរាមកំហែងខ្លាំងបំផុត។អង្គភាពអគ្គិភ័យនៅដែនដីភាពពាយព្យ បាននិយាយថា មានហានីភ័យដល់ទីក្រុង Yellowknife ។ ក្រុមរបស់យើង រួមជាមួយទីក្រុង Yellowknife កំពុងធ្វើអ្វីគ្រប់យ៉ាងដែលអាចធ្វើទៅបានដើម្បីពន្យឿតការកើនឡើងអគ្គិភ័យ និងការពារសហគមន៍។ ដែនដីភាគពាយព្យ បានប្រកាសរដ្ឋក្នុងគ្រាអាសន្នកាលពីល្ងាចថ្ងៃអង្គារ ហើយយោធានាកាណាដា ត្រូវបានដាក់ពង្រាយដើម្បីជួយទប់ទល់អណ្តាតភ្លើង និងដឹកជញ្ជូនពលរដ្ឋមួយចំនួនតាមយន្តហោះទៅកាន់ទីសុវត្ថិភាព៕

អ្នកស្រាវជ្រាវវ័យក្មេងមើលឃើញថា គណៈរដ្ឋមន្រ្តីថ្មីជាក្តីសង្ឃឹមរបស់ប្រជាជនខ្មែរ

2023/08/17 07:07:42 pm        248
ភ្នំពេញ៖ អ្នកស្រាវជ្រាវវ័យក្មេងនៅក្នុងប្រទេសកម្ពុជា លោក ប៊ិន យ៉ាន បានបង្ហាញទស្សនៈវិជ្ជមាន និងក្ដីសង្ឃឹមថា ​គណៈរដ្ឋមន្រ្ដីថ្មីដែលដឹកនាំដោយឯកឧត្ដមកិត្តិទេសាភិបាលបណ្ឌិត ហ៊ុន ម៉ាណែត គឺជាក្ដីសង្ឃឹមរបស់ប្រជាជនខ្មែរ ក្នុងការដឹកនាំប្រទេសកម្ពុជាឱ្យមានការអភិវឌ្ឍ​រីកចម្រើន​បន្ថែមទៀត។លោក ប៊ិន យ៉ាន សង្កេតឃើញថា គណៈរដ្ឋមន្រ្ដីថ្មីក្នុងអាណត្តិទី៧នេះអ្វីដែលជាភាពលេចធ្លោ​ក្រោម​ការ​ដឹកនាំ​របស់ឯកឧត្ដមកិត្តិទេសាភិបាលបណ្ឌិត ហ៊ុន ម៉ាណែត ជានាយករដ្ឋមន្រ្ដីថ្មីនៃកម្ពុជា គឺមានភាពវិជ្ជមានជាច្រើន ដោយសារតែឥស្សរជននៃគណៈរដ្ឋមន្រ្ដីថ្មីនេះ ​បានរៀនសូត្រចេះ​ដឹង​ខ្ពង់ខ្ពស់ពី​បច្ឆិម​ប្រទេសទាំងផ្នែកសេដ្ឋកិច្ច យោធា ​និងផ្នែកនយោបាយ។ ដូច្នេះសម្រាប់ការដឹកនាំប្រទេសកម្ពុជា​ដោយគណៈរដ្ឋមន្រ្ដីថ្មីនេះ នឹងបង្កើតនូវសមិទ្ធផលថ្មីៗ​ជាច្រើន​បន្ថែមទៀតសម្រាប់ប្រទេសកម្ពុជា។លោក ប៊ិន យ៉ាន យល់ឃើញថា​ បើទោះពីជាបច្ចុប្បន្ននេះពិភពលោកកំពុង​មាន​វិបត្តិសាកល និង​អតិផរណាសេដ្ឋកិច្ចមិនច្បាស់លាស់ក៏ដោយ។ ​ប៉ុន្ដែក្រោមការ​ដឹកនាំ​របស់​គណៈរដ្ឋមន្រ្ដីថ្មី​សេដ្ឋកិច្ចរបស់​ប្រទេសកម្ពុជា​នឹងមានការរីក​លូតលាស់​បន្ថែមទៀត ​ក្រោមការដឹកនាំរបស់​ឯកឧត្តមកត្តិទេសាភិបាលបណ្ឌិត ហ៊ុន ម៉ាណែត និងគណបក្សប្រជាជនកម្ពុជា​ បានធ្វើឱ្យប្រទេស​កម្ពុជាមានស្ថិរភាព​ លំនឹងផ្នែកនយោបាយ និងសង្គម។សូមបញ្ជាក់ថា ​អាណត្តិថ្មីនៃរាជរដ្ឋាភិបាលកម្ពុជា នឹងមានសុពលភាពចាប់ពីថ្ងៃទី២២​ ខែសីហា តទៅ ​ដោយក្នុងនោះមានការផ្លាស់ប្តូរក្បាលម៉ាស៊ីនដឹកនាំថ្មីស្ទើរតែទាំងស្រុង ដោយ​ឯកឧត្តមកិត្តិទេសាភិបាលបណ្ឌិត ហ៊ុន ម៉ាណែត ជានាយករដ្ឋមន្ត្រី ដែលការផ្លាស់ប្តូរ​ជាប្រវត្តិសាស្ត្រ​នៃការដឹកនាំប្រទេសមកពីគណបក្សប្រជាជនកម្ពុជា។ ខណៈការផ្លាស់ប្ដូរនេះត្រូវបាន​សម្តេចតេជោ​ ហ៊ុន សែន ​ចាត់ទុកជាការផ្លាស់ប្តូរ ដើម្បីធានានូវ​ស្ថិរភាពសង្គម ​និងការអភិវឌ្ឍមួយយូរអង្វែង៕អត្ថបទ៖ វ៉ន ដារ៉ា

ទាហាននីហ្សេជាង១០នាក់ ត្រូវបានសម្លាប់ក្នុងការវាយប្រហារនៅជិតព្រំដែនប្រទេសម៉ាលី

2023/08/17 07:05:38 pm        172
នីហ្សេ៖ ក្រសួងការពារជាតិរបស់ប្រទេសបាននិយាយថា ទាហាននីហ្សេ យ៉ាងហោចណាស់១៧នាក់ត្រូវបានសម្លាប់នៅក្នុងការវាយប្រហារដោយក្រុមប្រដាប់អាវុធ នៅជិតព្រំដែនជាមួយប្រទេសម៉ាលី។ យោងតាមសេចក្តីថ្លែងការណ៍ ដែលបានចេញផ្សាយកាលពីល្ងាចថ្ងៃអង្គារបានឲ្យដឹងថា ការផ្តាច់ខ្លួនរបស់កងកម្លាំងប្រដាប់អាវុធនីហ្សេ ដែលកំពុងធ្វើសកម្មភាពរវាងតំបន់ Boni និង Torodi គឺជាជនរងគ្រោះនៃការពួនស្ទាក់វាយប្រហារដោយក្រុមភេរវកម្ម នៅជិតទីក្រុង Koutougou មានចម្ងាយ៥២គីឡូម៉ែត្រភាគនិរតី តំបន់ Torodi។ សេចក្តីថ្លែងការណ៍បានបន្ថែមថា ទាហាន២០នាក់ផ្សេងទៀត បានរងរបួស ដោយពួកគេទាំងអស់ត្រូវបានជម្លៀសទៅកាន់ទីក្រុង Naimey ជារដ្ឋធានី។ ទាហាននិយាយថា អ្នកវាយប្រហារជាង១០០នាក់ ត្រូវបានរារាំងអំឡុងប្រតិបត្តិការរបស់ពួកគេ។ កាលពីទសវត្សរ៍មុន តំបន់ព្រំដែន នៅកន្លែងមានការប្រសព្វគ្នាប្រទេសម៉ាលីភាគកណ្តាល ប្រទេសបួរគីណាហ្វាសូ និងប្រទេសនីហ្សេភាគខាងលិច បានក្លាយជាចំណុចកណ្តាលនៃអំពើហិង្សាដោយក្រុមប្រដាប់អាវុធ ទាក់ទងទៅនឹងក្នុងអាល់កៃដា និងក្រុមរដ្ឋអ៊ីស្លាមអ៊ីរ៉ាក់ និងឡេវ៉ាន នៅក្នុងតំបន់សាហ៊ែល(Sahel) ។ កំហឹងនៅក្នុងការបង្ហូរឈាម បានបង្កឲ្យមានការដណ្តើមអំណាចយោធា នៅក្នុងប្រទេសចំនួន៣ ចាប់តាំងពីឆ្នាំ២០២០ ដោយប្រទេសនីហ្សេ ចុងក្រោយធ្លាក់ចូលក្នុងរដ្ឋប្រហារកាលពីថ្ងៃទី២៦ ខែកក្កដា នៅពេលនោះប្រធានាធិបតីលោក Mohamed Bazoum ត្រូវបានបណ្តេញចេញ។ ប្រទេសនីហ្សេ ភាកអាគ្នេយ៍ ក៏ជាគោលដៅរបស់ក្រុមប្រដាប់អាវុធដែលកំពុងឆ្លងកាត់ពីប្រទេសនីហ្សេរីយ៉ា ភាគឦសាន ជាប្រភពនៃយុទ្ធនាការដែលផ្តើមឡើងដោយក្រុម Boko Haram នៅក្នុងឆ្នាំ២០១០។ មេដឹកនាំរដ្ឋប្រហារ បាននិយាយថាការបណ្តេញចេញលោក Bazoum ដោយសារតែភាពអសន្តិសុខនៅក្នុងប្រទេសនិងការធ្លាក់ចុះកាន់តែយ៉ាប់យ៉ឺនស្ថានភាពសន្តិសុខ និងអភិបាលកិច្ចខ្សោយ។ ប៉ុន្តែអ្នករាយការណ៍ព័ត៌មានរបស់សារព័ត៌មាន Al Jazeera ដែលរាយការណ៍ពី ទីក្រុង Abuja នៅជិតប្រទេសនីហ្សេរីយ៉ា បាននិយាយថា ការលុបចោលកិច្ចព្រមព្រៀងរបស់រដ្ឋាភិបាលយោធារបស់ប្រទេសនីហ្សេ ជាមួយយោធាបារាំង និងការផ្អាកការផ្តល់ជំនួយដោយដៃគូផ្សេងទៀតរបស់ទីក្រុង Niamey ធ្វើឲ្យជីវិតកាន់តែលំបាក៕

កុមារជាច្រើនស្ថិតក្នុងចំណោមអ្នកដែលត្រូវបានជួយសង្គ្រោះ ខណៈទូកតូចមួយគ្រឿង បានមកដល់អង់គ្លេសភាគខាងត្បូង

2023/08/17 07:02:49 pm        96
បារាំង៖ កុមារតូចៗជាច្រើននាក់ ស្ថិតក្នុងចំណោមជនអន្តោប្រវេសន៍រាប់សិបនាក់ ត្រូវបានជួយសង្គ្រោះនិងនាំយកទៅកាន់ឆ្នេរសមុទ្រពីព្រែកជីកអង់គ្លេសកាលពីថ្ងៃពុធ ប៉ុន្មានថ្ងៃបន្ទាប់ពីមនុស្ស៦នាក់បានស្លាប់ដែលកំពុងព្យាយាមឆ្លងកាត់រវាងប្រទេសបារាំង និងចក្រភពអង់គ្លេស។ ផ្លូវទឹកអង់គ្លេស គឺជាផ្លូវដឹកជញ្ជូនដ៏មមាញឹកបំផុតមួយរបស់ពិភពលោក ដោយមានអាកាសធាតុពុំអាចព្យាករណ៍ទុកជាមុនបានធ្វើឲ្យការឆ្លងកាត់តាមទូកតូចៗមានគ្រោះថ្នាក់។ ស្ថានភាពអាកាសធាតុកាន់តែមានអំណោយផលច្រើនក្នុងប៉ុន្មានសប្តាហ៍ថ្មីៗនេះ។ តួលេខរបស់រដ្ឋាភិបាលអង់គ្លេស បានបង្ហាញថាចំនួនជនអន្តោប្រវេសន៍ដែលឆ្លងកាត់ផ្លូវទឹកនេះរហូតមកដល់ពេលនេះនៅឆ្នាំនេះ មានចំនួនជាង១៦.០០០នាក់ ដោយជាង១.១០០នាក់ បានមកដល់កាលពីសប្តាហ៍មុនតែមួយ។ ក្នុងរយៈពេល៣ខែដំបូងនៃឆ្នាំនេះ ភាគច្រើននៃជនអន្តោប្រវេសន៍នៅលើទូកតូចៗ មានមកពីប្រទេសអាហ្វហ្គានីស្ថាន ឥណ្ឌា អ៊ីរ៉ង់ ឬអ៊ីរ៉ាក់។ កាលពីឆ្នាំមុន ក្នុងខែសីហា បានបង្ហាញពីចំនួនខ្ពស់បំផុតនៃការមកដល់នៅលើទូកតូចៗសម្រាប់ខែនេះមានចំនួនខ្ពស់បំផុត ខណៈពាក់កណ្តាលនៃជនអន្តោប្រវេសន៍ទាំងអស់ បានមកដល់ក្នុងអំឡុងខែសីហា រហូតដល់អំឡុងខែតុលា៕

ចំនួនអ្នកស្លាប់បន្ទាប់ពីបំណាក់ដីនៅតំបន់ភ្នំហិម៉ាល័យប្រទេសឥណ្ឌាកើនឡើងដល់៧១នាក់

2023/08/17 06:59:46 pm        87
ឥណ្ឌា៖ ក្រុមមន្ត្រី បានពិនិត្យឡើងវិញពីការកើនឡើងចំនួនអ្នកស្លាប់ ដោយបំណាក់ដីកាលពីចុងសប្តាហ៍ក្នុងក្រុង Shimla តំបន់ភ្នំហិម៉ាល័យប្រទេសឥណ្ឌាមានចំនួនពី៥៧ ដល់៧១នាក់ កាលពីថ្ងៃពុធ ប៉ុន្តែការស្វែងរកសាកសពនៅតែបន្តខណៈរហូតមកដល់ពេលនេះសាកសពមួយចំនួនប៉ុណ្ណោះត្រូវបានរកឃើញ។មនុស្សប្រមាណ២.៥០០នាក់ ត្រូវបានជម្លៀសខ្លួននៅក្នុងរដ្ឋ Himachal Pradesh ហើយរដ្ឋមន្ត្រីគ្រប់គ្រងគ្រោះមហន្តរាយ លោក Onkar Chand Sharmaបាននិយាយថា តម្លៃនៃការខាតបង់អាចមានរហូតដល់រាប់លាន់ ខណៈភ្លៀងធ្លាក់ខ្លាំង ទឹកជំនន់ភ្លាមៗ និងបំណាក់ដីនៅក្នុងតំបន់ភ្នំ បានបំផ្លាញលំនៅឋាន អគារ បណ្តាញដឹកជញ្ជូន និងបណ្តាលឲ្យមានការកាត់ផ្តាច់ផ្លូវរថភ្លើង និងអគ្គិសនី។ ក្រុមអ្នកជួយសង្គ្រោះ បានជីកកកាយក្នុងដីល្បប់ ដើមឈើ និងកម្ទេចកម្ទី ចាប់តាំងពីថ្ងៃចន្ទ នៅជិតទីតាំងវិហារមួយកន្លែងដែលបានបាក់រលំដោយបំណាក់ដី។ កាលពីថ្ងៃអង្គារ សាកសពន្ថែមចំនួន៣នាក់ ត្រូវបានទាញចេញពីទីតាំងនោះក្នុងក្រុង Shimla ជាកន្លែងដែលមានមនុស្សយ៉ាងហោចណាស់ ១៤នាក់បានស្លាប់ នៅក្នុងឧបទ្ទវហេតុទាក់ទងទៅនឹងភ្លៀងធ្លាក់៕

គ្រូបង្រៀន និងសិស្សគាំទ្រគម្រោងបង្កើតមជ្ឈមណ្ឌលបច្ចេកវិទ្យាសហគមន៍នៅតាមវិទ្យាល័យ

2023/08/17 06:57:39 pm        93
ភ្នំពេញ៖ គ្រូបង្រៀន និងសិស្សានុសិស្ស បានបង្ហាញការគាំទ្រ នូវគម្រោងបង្កើតមជ្ឈមណ្ឌលបច្ចេកវិទ្យាសហគមន៍ នៅតាមវិទ្យាល័យ របស់ក្រសួងប្រៃសណីយ៍ និងទូរគមនាគមន៍ ដែលពួកគេបានចាត់ទុកថា គម្រោងនេះ នឹងកាន់តែធ្វើឲ្យវិស័យឌីជីថល នៅកម្ពុជាកាន់តែមានភាពរីកចម្រើន ដើរទាន់សម័យកាល ។លោក អុក ព្រីង នាយកវិទ្យាល័យ ហ៊ុន សែន សិរីដីដុះ ស្ថិតក្នុងឃុំកំពង់ស្វាយ ស្រុកកៀនស្វាយ ខេត្តកណ្ដាល ​បានលើកឡើងថា ក្រសួងអប់រំ យុវជន និងកីឡា ​មានការយកចិត្តទុកដាក់ មានផែនការ​ត្រឹមត្រូវ និងកំពុងជំរុញជាខ្លាំងលើការបង្រៀន ​និងរៀនតាមបែបឌីជីថល ដែលជាតម្រូវការចាំបាច់មួយ ក្នុងពេលបច្ចុប្បន្ន ។លោកនាយកបានបន្តថា ចំពោះគម្រោងរបស់ក្រសួងប្រៃសណីយ៍ បង្កើតមជ្ឈមណ្ឌលបច្ចេកវិទ្យា​សហគមន៍ នៅតាមវិទ្យាល័យ ពិតជាផ្ដល់នូវអត្ថប្រយោជន៍ជាខ្លាំង ដល់គ្រូបង្រៀន​ និងសិស្ស អាចបង្កើន​ចំណេះដឹងលើវិស័យឌីជីថល ក៏ដូចជាសិក្សាស្រាវជ្រាវបន្ថែមលើមេរៀន ពិសេសទៀតនោះ ក៏បានផ្ដល់ឱកាសដល់ពលរដ្ឋទូទៅ ​បានចូលរៀនវគ្គបណ្ដុះបណ្ដាល លើផ្នែកឌីជីថលនេះ ​អាចប្រើប្រាស់តាមតម្រូវការរបស់ពួកគាត់ ​ខណៈវិទ្យាល័យនេះ ក៏បានត្រៀមដី​សម្រាប់កសាងនូវមជ្ឈមណ្ឌលនេះហើយដែរ ។សម្រាប់សិស្សានុសិស្ស កំពុងសិក្សាក្នុងវិទ្យាល័យនេះ បានបង្ហាញនូវការគាំទ្រ និងសប្បាយរីករាយ​ជាខ្លាំង នៅពេលទទួលបានព័ត៌មាន ​នៃគម្រោងបង្កើតមជ្ឈមណ្ឌលបច្ចេកវិទ្យាសហគមន៍នេះ ដែលនឹងអាចជួយពួកគេ អាចពង្រីកនូវចំណេះដឹង ​ហើយបានជួយដល់សិស្សក្រីក្រ ដែលពុំមាន​លទ្ធភាពបង់ថ្លៃសិក្សា លើការរៀនសូត្រជំនាញឌីជីថលនេះ ។គួរបញ្ជាក់ថា ក្រសួងប្រៃសណីន៍ និងទូរគមនាគមន៍ កំពុងអនុវត្តគម្រោងបង្កើត​មជ្ឈមណ្ឌល​បច្ចេកវិទ្យា​សហគមន៍ នៅតាមវិទ្យាល័យ ​ដែលគម្រោងរបស់ក្រសួងនឹងបង្កើតឲ្យបានគ្រប់វិទ្យាល័យ​ទាំង៥៥៨ នៅទូទាំងប្រទេស​ ខណៈនេះកំពុងសាងសង់​ដំបូងគេនៅក្នុងវិទ្យាល័យហ៊ុនសែន​ ១មិថុនា ស្ថិតក្នុងឃុំពារាម ស្រុកបាទី ខេត្តតាកែវ ៕អត្ថបទ បាន សុខរិទ្ធិ

ទីភ្នាក់ងារអវកាស និយាយថា យានអវកាស Luna-25 របស់រុស្ស៊ី ចូលដល់គន្លងភពព្រះចន្ទហើយ

2023/08/17 06:48:44 pm        85
រុស្ស៊ី៖ យានអវកាស Luna-25 នឹងធ្វើដំណើរវិលជុំវិញព្រះចន្ទ ដែលជាផ្កាយរណបធម្មជាតិតែមួយគត់របស់ផែនដី ក្នុងរយៈពេលប្រហែល ៥ ថ្ងៃ បន្ទាប់មកផ្លាស់ប្តូរទិសដៅសម្រាប់ការចុះចតដែលមានការគ្រប់គ្រងក្នុងសម្ពាធស្រាល នៅលើប៉ូលខាងត្បូងភពព្រះចន្ទដែលគ្រោងធ្វើនៅថ្ងៃទី២១ ខែសីហា សប្ដាហ៍ក្រោយនេះ។ក្រុមហ៊ុនអវកាសរុស្ស៊ី Roskosmos បាននិយាយថាយានអវកាស Luna-25 បានចូលទៅក្នុងគន្លងរបស់ភពព្រះចន្ទនៅម៉ោង ១១:៥៧ ព្រឹកម៉ោងក្នុងតំបន់។  យានអវកាស Luna-25 នឹងធ្វើដំណើរវិលជុំវិញព្រះចន្ទ ដែលជាផ្កាយរណបធម្មជាតិតែមួយគត់របស់ផែនដី ក្នុងរយៈពេលប្រហែល ៥ ថ្ងៃ បន្ទាប់មកផ្លាស់ប្តូរទិសដៅសម្រាប់ការចុះចតដែលមានការគ្រប់គ្រងក្នុងសម្ពាធស្រាល នៅលើប៉ូលខាងត្បូងភពព្រះចន្ទដែលគ្រោងធ្វើនៅថ្ងៃទី២១ ខែសីហា សប្ដាហ៍ក្រោយនេះ។  យានអវកាស ចន្ត្រាយាន -៣ (Chandrayaan-3) របស់ឥណ្ឌាបានចូលទៅក្នុងគន្លងភពព្រះចន្ទនៅដើមខែនេះ មុនពេលចុះចតដែលបានគ្រោងទុកនៅលើប៉ូលខាងត្បូងភពព្រះចន្ទនៅចុងខែនេះ។  យានអវកាស Luna-25 ដែលមានទំហំប៉ុនរថយន្តតូចមួយគ្រឿង នឹងមានបំណងដំណើរការរយៈពេលមួយឆ្នាំនៅលើប៉ូលខាងត្បូង ជាទីដែលក្រុមអ្នកវិទ្យាសាស្ត្រអង្គការ NASA និងទីភ្នាក់ងារអវកាសផ្សេងទៀតក្នុងប៉ុន្មានឆ្នាំថ្មីៗនេះបានរកឃើញដាននៃទឹកកកនៅក្នុងរណ្ដៅមួយចំនួន។ វត្តមានទឹកនៅលើភពព្រះចន្ទ បានផ្ដល់ភាពស្មុគស្មាញដល់មហាអំណាចអវកាសធំៗ ដែលអនុញ្ញាតឲ្យមានការធ្វើដំណើររបស់មនុស្សបានយូរជាងមុននៅលើភពនេះ ដែលអាចឲ្យមានការជីកយករ៉ែធនធានតាមនៅភពព្រះចន្ទ។ យោងតាមលោកអាណាតូលីហ្សាក ( Anatoly Zak) ដែលជាអ្នកបង្កើតនិងផ្សព្វផ្សាយ ដែលបានតាមដានកម្មវិធីអវកាសរបស់រុស្ស៊ី គ្មានយានអវកាសរុស្ស៊ីណាមួយបានចូលក្នុងគន្លងភពព្រះចន្ទទេ ចាប់តាំងពី យានអវកាស Luna-24 ដែលជាបេសកកម្មទៅកាន់ភពព្រះចន្ទ កាលពីឆ្នាំ ១៩៧៦ របស់សហភាពសូវៀត មកនោះ ៕

បេសកជនUN៖ ការគំរាមកំហែងវិលទៅរកសង្រ្គាមនៅប្រទេសយ៉េម៉ែន រារាំងកិច្ចខិតខំប្រឹងប្រែង ដើម្បីចាប់ផ្តើមកិច្ចចរចាសន្តិភាព

2023/08/17 06:26:00 pm        150
UN៖ មន្ត្រីជាន់ខ្ពស់អង្គការសហប្រជាជាតិ បាននិយាយកាលពីថ្ងៃពុធថា ការគំរាមកំហែងវិលទៅរកសង្រ្គាមនៅក្នុងប្រទេសយ៉េម៉ែនជាថ្មី កំពុងរារាំងកិច្ចខិតខំប្រឹងប្រែង ដើម្បីចាប់ផ្តើមកិច្ចចរចាសន្តិភាព ខណៈដែលប្រទេសក្រីក្របំផុតរបស់ពិភពអារ៉ាប់ ប្រឈមមុខនឹងស្ថានភាពសេដ្ឋកិច្ចកាន់តែអាក្រក់ទៅៗ។លោក Hans Grundberg តំណាងពិសេសរបស់UNប្រចាំប្រទេសយ៉េម៉ែន បានប្រាប់ក្រុមប្រឹក្សាសន្តិសុខថា អរិភាពរវាងពួកឧទ្ទាមហ៊ូធី (Houthi) និងកងកម្លាំងរដ្ឋាភិបាល មិនបានវិលមករកកម្រិត នៅមុនពេលបទឈប់បាញ់រយៈពេល៦ខែ ដែលបានបញ្ចប់ក្នុងខែតុលា ប៉ុន្តែលោកបាននិយាយថា ការប្រយុទ្ធគ្នាជាបន្តបន្ទាប់ និងការបាញ់តគ្នានៅវិញទៅមក បានបន្ត។ លោកបានលើកឡើងនូវតំបន់ជួរមុខចំនួន៦។ ពួកគេរាប់បញ្ចូលទាំងទីក្រុងធំបំផុតទី៣ របស់យ៉េម៉ែនគឺ ទីក្រុងតៃ (Taiz) ដែលស្ថិតនៅក្រោមការឡោមព័ទ្ធដោយពួកហ៊ូធី ចាប់តាំងពីឆ្នាំ ២០១៦។ ទីក្រុងហូដេដា ( Hodeida) ជាកន្លែងដែលកំពង់ផែសំខាន់របស់យ៉េម៉ែនស្ថិតនៅ និងខេត្តម៉ារីប ( Marib) ភាគខាងកើតសម្បូរប្រេង ដែលពួកហ៊ូឌី ប៉ុនប៉ងដណ្តើមយកក្នុងឆ្នាំ២០២១។សង្រ្គាមស៊ីវិលនៅប្រទេសយេម៉ែន បានផ្ទុះឡើងនៅក្នុងឆ្នាំ២០១៤ នៅពេលដែលពួកហ៊ូធីគាំទ្រដោយអ៊ីរ៉ង់ បានវាយប្រហារចេញពីតំបន់ការពាររឹងមាំភាគខាងជើងរបស់ពួកគេ ហើយបានបណ្តេញរដ្ឋាភិបាលដែលត្រូវបានទទួលស្គាល់ជាអន្តរជាតិចេញពីរដ្ឋធានីសាណា។ ក្រុមចម្រុះដឹកនាំដោយអារ៉ាប៊ីសាអ៊ូឌីត បានធ្វើអន្តរាគមន៍នៅឆ្នាំ២០១៥ ក្នុងនាមរដ្ឋាភិបាល ហើយនៅពេលនោះជម្លោះ បានប្រែក្លាយទៅជាសង្រ្គាមមហាអំណាចរវាងអារ៉ាប៊ីសាអ៊ូឌីត និងអ៊ីរ៉ង់៕

WB៖ កំណែទម្រង់ដើម្បីបង្កើនគុណភាពអប់រំ ផ្តល់អត្ថប្រយោជន៍ដល់សិស្សកន្លះលាននាក់នៅកម្ពុជា

2023/08/17 06:18:50 pm        139
ភ្នំពេញ៖ ធនាគារពិភពលោក (World Bank) នៅថ្ងៃទី១៦ ខែសីហានេះ បានចេញផ្សាយរបាយការណ៍​មួយបង្ហាញថា សិស្សកម្ពុជាជិតកន្លះលាននាក់ ក្នុងនោះមានក្មេងស្រី​ជាង ៥២ ភាគរយទទួលបានអត្ថប្រយោជន៍ពីការកែលម្អដំណើរការ​របស់សាលារៀន អគារសិក្សា និងគ្រឿងបរិក្ខារ និងការបង្កើនសមត្ថភាពរបស់គ្រូ និងគណៈគ្រប់គ្រងសាលាឱ្យកាន់តែប្រសើរឡើងតាមរយៈជំនួយរបស់គម្រោង កែលម្អគុណភាពអប់រំមធ្យមសិក្សា។ WB បានបង្ហាញថា គម្រោងកែលម្អគុណភាពអប់រំមធ្យមសិក្សា (Secondary Education Improvement Project/SEIP) បានខិតខំជួយការអប់រំកម្រិតមធ្យមសិក្សា ឱ្យសម្រេចបានស្តង់ដារអប្បបរមា តាមរយៈកិច្ច​អន្តរាគមន៍បែបនវានុវត្តន៍ជាច្រើន។ ក្នុងនោះ ទីមួយគម្រោងនេះបានបង្កើតឱ្យមានតម្រូវការខ្ពស់លើការអប់រំប្រកប​ដោយគុណភាព​ពីមាតាបិតា និងសហគមន៍ ដោយដាក់ចេញនូវរបៀបគ្រប់គ្រងតាមសាលារៀន ដើម្បី​បង្កើន​ស្វ័យភាព គណនេយ្យភាព និងការវាយតម្លៃរបស់ខ្លួន។ មាតាបិតា និងសហគមន៍ទទួលបាន​ព័ត៌មាន ពេញលេញអំពីដំណើរការរៀនសូត្ររបស់សិស្ស និងអំពីការបំពេញកិច្ចរបស់សាលារៀន ហើយពួកគាត់បានចូលរួមយ៉ាងសកម្មក្នុងការអប់រំរបស់កូនពួកគាត់ទៀតផង។ ទីពីរ លោកគ្រូ អ្នកគ្រូ ថ្នាក់ដឹកនាំសាលា និងអ្នកតំណាងសហគមន៍បានទទួលការបណ្តុះបណ្តាល និងការណែនាំគ្រប់ជ្រុងជ្រោយ ដើម្បីអនុវត្តតួនាទីរបស់ពួកគាត់ឱ្យកាន់តែមានប្រសិទ្ធភាព។ ទីបី ការទូទាត់ផ្តល់ថវិកាផ្អែកលើសមិទ្ធផលការងារ បានផ្តល់នូវភាពបត់បែន និងប្រសិទ្ធភាព​នៃការចំណាយ ដូចជាការផ្តល់ហិរញ្ញប្បទាននៃការចំណាយ លើវិធានការឆ្លើយតបនឹងជំងឺរាតត្បាត (ឧទាហរណ៍៖ ការផ្តល់កុំព្យូទ័រយួរដៃដល់លោកគ្រូអ្នកគ្រូដើម្ប់អនុវត្តការបង្រៀនពីចម្ងាយ ការផលិតវីដេអូបង្រៀន ការផ្តល់សាចប្រាក់សម្រាប់សេវា អ៊ិនធឺណិត, ការបណ្តុះបណ្តាល​លើជំនាញបច្ចេកវិទ្យាព័ត៌មាន និងសារគមនាគមន៍ [ICT] ជាដើម)។ជាលទ្ធផល គម្រោងនេះគាំទ្រដល់ការអនុវត្តផែនការយុទ្ធសាស្ត្រអប់រំនៅកម្ពុជា ដើម្បីលើកកម្ពស់​គុណភាព និងការពង្រីកលទ្ធភាពទទួលបានការអប់រំមធ្យមសិក្សាប្រកប​ដោយសមធម៌។ សមិទ្ធផលដែលទទួលបានរួមមាន ដំណើការសាលារៀន ហេដ្ឋារចនាសម្ព័ន្ធ និងសមត្ថភាពរបស់គ្រូ និងរបស់ថ្នាក់ដឹកនាំសាលារៀន ទទួលបានការកែលម្អកាន់តែប្រសើរ។ សិស្សចំនួន ៤៥៣,៨៣៨ នាក់ក្នុងនោះ ៥២ ភាគរយជាក្មេងស្រីទទួលបានអត្ថប្រយោជន៍ពីគម្រោងនេះ។ សាលារៀនចំនួន ៩៤ ក្នុងចំណោម ១០០ សម្រេចបានស្តង់ដារអប្បបរមានៃស្តង់ដារសាលារៀនដែលមានប្រសិទ្ធភាព ដោយមានការចូលរួមគាំទ្រយ៉ាងសកម្មពីសំណាក់មាតាបិតា និងសហគមន៍ក្នុងការរៀបចំផែន​ការ​កែលម្អសាលារៀន ​ក្នុងការត្រួតពិនិត្យការអនុវត្តការងាររបស់សាលា និងក្នុងការទាក់ទាញធនធាន​ហិរញ្ញវត្ថុពីខាងក្រៅ ។ឥទ្ធិពលរបស់គម្រោងនៅតែបន្ត បើទោះជាគម្រោងត្រូវបានបញ្ចប់។ ក្រសួងអប់រំ យុវជន និងកីឡា បានដាក់បញ្ចូលសកម្មភាពគម្រោងទៅក្នុងគោលនយោបាយអប់រំជាតិ ហើយបានបង្កើតគណៈកម្មាធិការជាតិដើម្បីអនុវត្តគោលនយោបាយទាំងនោះ។ សាលារៀនមិនមែនគោលដៅជាច្រើន (រួមមានអនុវិទ្យាល័យចំនួន ២១៣ និងសាលាបឋមសិក្សាចំនួន ៥៦០) បានអនុវត្តសកម្មភាពនេះ។ រដ្ឋាភិបាលកម្ពុជាបានស្នើសុំគម្រោងកែលម្អការអប់រំចំណេះដឹងទូទៅ (General Education Improvement Project/GEIP) ដោយមានឥណទាន ពីធនាគារពិភពលោក ចំនួន ៦០លានដុល្លារអាមេរិក (អនុម័តដោយក្រុមប្រឹក្សាភិបាលធនាគារពិភពលោកនៅថ្ងៃទី១៨ ខែមករា ឆ្នាំ២០២២) និងសហហិរញ្ញប្បទានជំនួយឥតសំណងពីភាពជាដៃគូសកលសម្រាប់ការអប់រំ (GPE) ចំនួន 9.25 លានដុល្លារអាមេរិក ដើម្បីបន្ត និងពង្រីកការអនុវត្តសកម្មភាពរបស់គម្រោងSEIP។ បច្ចុប្បន្នសំណើឥណទានបន្ថែមទៀត ចំនួន៦០លានដុល្លារពីធនាគារពិភពលោក កំពុងត្រូវបានរៀបចំ រួមជាមួយនឹងសហហិរញ្ញប្បទានជំនួយឥតសំណងចំនួន ២០លានដុល្លារអាមេរិក របស់ GPE ៕

បណ្ដាញសង្គម

ព័ត៌មានថ្មីៗ

គណៈប្រតិភូជាន់ខ្ពស់សភាកម្ពុជា អញ្ជើញចូលរួមពិធីបើកជាផ្លូវការ មហា​សន្និបាត​អន្តរ​សភា​អាស៊ាន​ លើកទី៤៧ ដែលរដ្ឋសភាហ្វីលីពីនធ្វើជាម្ចាស់ផ្ទះ
11/18/2026 03:11 PM
លោក Trump៖ អាមេរិកបានសម្រេចកិច្ចព្រមព្រៀងពាណិជ្ជកម្មដ៏​ធំមួយ ជាមួយហ្វីលីពីន មុនទៅ​ APEC
11/18/2026 03:11 PM
អតីតខ្សែប្រយុទ្ធអង់គ្លេស Wayne Rooney បង្ហើបថា ធ្លាប់​ជួប​វិបត្តិ​ផ្លូវ​ចិត្ត​ធ្ងន់​ធ្ងរ​ក្នុង​អាជីព​បាល់ទាត់
11/18/2026 03:11 PM
កម្ពុជា-ម៉ាឡេស៊ី​ ផ្លាស់ប្តូរទស្សនៈគ្នាលើវិស័យនយោបាយ សេដ្ឋកិច្ច សន្តិសុខ ការងារ ថាមពល ការដឹកជញ្ជូន និងការតភ្ជាប់
11/18/2026 03:11 PM
អង្គការសង្គមស៊ីវិលរំពឹងថាសំឡេងហ្វ្រង់កូហ្វូនីនឹងជាចលករមួយជំរុញកិច្ចសន្ទនាដោយសន្តិវិធីលើបញ្ហាព្រំដែនកម្ពុជា-ថៃ
11/18/2026 02:11 PM
គណៈប្រតិភូ៖ ស្នាមញញឹម​នៃហ្វ្រង់កូហ្វូនី​ទាក់ទាញ​ចិត្ត​ឱ្យ​នាំ​ក្រុមគ្រួសារ​មក​ទស្សនា​កម្ពុ​ជា​នៅ​ឆ្នាំ​ក្រោយ
11/18/2026 02:11 PM
ក្រុមប្រឹក្សាអភិវឌ្ឍន៍កម្ពុជា និងសភាពាណិជ្ជកម្ម និងឧស្សាហកម្មបារាំងនៅកម្ពុជា ផ្លាស់​ប្តូរ​អនុស្សរណៈ​នៃ​ការ​យោគយល់​គ្នា ពង្រឹងកិច្ចសហប្រតិបត្តិការ និងការវិនិយោគ
11/18/2026 01:11 PM
សម្តេច ម៉ែន សំអន អញ្ជើញដឹកនាំកិច្ចប្រជុំឆ្លងសម្រេចបញ្ជីឈ្មោះបេក្ខជនផ្លូវការឈរឈ្មោះបោះឆ្នោតជ្រើសរើសក្រុមប្រឹក្សាឃុំ សង្កាត់ អាណត្តិទី៦ ឆ្នាំ២០២៧ នៅខេត្តស្វាយរៀង
11/18/2026 01:11 PM
ប្រមុខការទូតកម្ពុជា អរគុណជាថ្មីដល់ម៉ាឡេស៊ីកាលជាប្រធានអាស៊ានឆ្នាំ២០២៥ សកម្មសម្របសម្រួលដោះស្រាយជម្លោះព្រំដែនកម្ពុជា-ថៃ ដោយសន្តិវិធី និងបង្កើតក្រុម IOT និង AOT
11/18/2026 01:11 PM
វិទ្យាស្ថានជាតិ NIB បើកដំណើការមជ្ឈមណ្ឌលឧត្តមភាពអេអាយ និងឌីជីថល កម្ពុជា-ចិន
11/18/2026 01:11 PM