នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
BREAKING NEWS|កម្ពុជាចាត់ទុកផែនការថៃចង់ដណ្តើមប្រាសាទតាក្របី និងបិទប្រាសាទតាមាន់ធំគឺជាការប៉ុនប៉ងឈ្លានពានកម្ពុជាគិតទុកជាមុន និងមិនគោរពបទឈប់បាញ់
សម្ដេចតេជោ៖សង្គ្រាមព្រំដែនកម្ពុជា-ថៃបានផ្ទេរពីសង្គ្រាមប្រើប្រាស់អាវុធមកជាសង្រ្គាម ប្រើប្រាស់ជំពាមកៅស៊ូ ខណៈបើពិនិត្យឲ្យសុីជម្រៅវាជារឿងធំ ប្រសិនបើមិនទប់ស្កាត់
ឯកឧត្តម ចាន់ ដារ៉ុង ដឹកនាំគណៈកម្មការ​អន្តរ​ក្រសួង​ចុះ​ពិនិត្យ​វាយ​តម្លៃ​បញ្ចប់​សុពល​ភាព​ការងារ​ថែ​ទាំ​ផ្លូវ​ខួបចំនួន ៣កំណាត់ ក្នុងខេត្តពោធិ៍សាត់
BREAKING NEWS! សម្តេចធិបតី អបអរសាទរចំពោះការប្រព្រឹត្តទៅដោយជោគជ័យ​នូវ​កិច្ច​ប្រជុំ​​វិសាមញ្ញ នៃ​គណៈកម្មាធិកា​រ​ព្រំដែន​ទូទៅកម្ពុជា-ថៃ

នយោបាយ​ និង ការអភិវឌ្ឍន៍

ភ្លើងឆេះព្រៃនៅភាគពាយ័ព្យទីក្រុងអាតែន ប្រទេសក្រិក បន្តឆាបឆេះដល់ពេលយប់ និងបានបំផ្លិចបំផ្លាញផ្ទះសម្បែងជាច្រើន

2023/07/19 12:45:09 pm        171
Facebook Telegram Linkin
ក្រិក៖ ភ្លើងឆេះព្រៃ ២កន្លែងបានឆាបឆេះដោយមិនអាចគ្រប់គ្រងបានលើដីព្រៃក្នុងទីក្រុង Mandra នៅភាគពាយ័ព្យទីក្រុងអាតែន ប្រទេសក្រិក រយៈពេល ២ថ្ងៃជាប់ៗគ្នា កាលពីថ្ងៃអង្គារ ដោយបង្ខំឲ្យប្រជាពលរដ្ឋកាន់តែច្រើនរត់ភៀសខ្លួនចេញពីផ្ទះសម្បែងរបស់ពួកគេ ស្របពេលដែលក្រុមអាជ្ញាធរ ព្យាយាមបញ្ឈប់អណ្តាតភ្លើងពីការរីករាលដាលដល់តំបន់ដែលមានរោងចក្រចម្រាញ់ប្រេងកាត ។  យោងតាមការអះអាងរបស់ក្រុមសាក្សី និងក្រុមមន្រ្តី បានឲ្យដឹងថា ភ្លើងឆេះព្រៃមួយកន្លែង មានមុខកាត់រហូតដល់ ៨គ.ម ដោយបានឆាបឆេះផ្ទះសម្បែងប្រជាពលរដ្ឋ និងរថយន្តនៅជុំវិញទីក្រុង Mandra ស្ថិតនៅភាគខាងលិចរដ្ឋធានីអាតែន ដែលគ្របដណ្តប់ពីលើដោយផ្សែងខ្មៅយ៉ាងក្រាស់ឃ្មឹក ។  លោក Christos Stathis គឺជាអភិបាលក្រុង Mandra បាននិយាយប្រាប់ទូរទស្សន៍ Open TV ថា ពួកយើងកំពុងរស់នៅក្នុងស្ថានភាពអាក្រក់ ។ ផ្ទះសម្បែង និងអចលទ្រព្យ ត្រូវបានឆាបឆេះដោយតែភ្លើងឆេះព្រៃ ។  គួរឲ្យដឹងថា កាលពីឆ្នាំ ២០១៧ ទីក្រុង Mandra ដែលជាតំបន់ឧស្សាហកម្មធំ បានរងគ្រោះដោយសារទឹកជំនន់ដែលបានសម្លាប់មនុស្ស ២៤នាក់ ។  ការធ្វើចរាចរណ៍ ត្រូវបានផ្អាករយៈពេលជាច្រើនម៉ោងនៅតាមផ្លូវជាតិ ២ខ្សែតភ្ជាប់ទីក្រុងអាតែនជាមួយទីក្រុង Elefsina និងទីក្រុង Corinth ជាកន្លែងដែលរោងចក្រចម្រាញ់ប្រេងកាតកំពុងប្រតិបត្តិការ ។ កាលពីល្ងាចថ្ងៃអង្គារ អណ្តាតភ្លើងបានឆាបឆេះឆ្ពោះទៅកាន់ទីក្រុងមាត់សមុទ្រ Nea Peramos ។  សាក្សីរបស់ទីភ្នាក់ងារព័ត៌មានរ៉យទ័រ បាននិយាយថា ផ្ទះសម្បែង និងរោងចក្រផលិតនាវាខ្នាតតូចមួយកន្លែង ត្រូវបានបំផ្លាញនៅក្នុងទីក្រុង Neos Pontos ហើយសំណុំផ្សែងខ្មៅដ៏ក្រាស់ បានហោះលើមេឃ ក្រោយការផ្ទុះ ។  មន្រ្តីនគរបាលមួយរូប និយាយប្រាប់ទីភ្នាក់ងារព័ត៌មានរ៉យទ័រថា មកទល់នឹងពេលនេះ ស្រុកយ៉ាងហោចចំនួន ៧ ត្រូវបានជម្លៀសប្រជាពលរដ្ឋចេញ ហើយក្រុមនគរបាល បានជួយជម្លៀសមនុស្សជាង ៣០០នាក់ ។  លោក Andreas Theodosiadis គឺជាពលរដ្ឋមួយរូបរស់នៅក្នុងទីក្រុង Mandra ដែលឈរនៅជុំវិញកម្ទេចកម្ទី និងបំណែករថយន្តដែលរងការឆាបឆេះ និយាយថា ពួកយើងបានប្រឹងអស់ពីលទ្ធភាពដើម្បីពន្លត់ភ្លើងឆេះព្រៃ ហើយឥឡូវអ្វីៗត្រូវបានបំផ្លាញអស់ដោយសារតែវា ៕

UN៖ គំនិតមានច្រើនលើវិធីនាំចេញគ្រាប់ធុញ្ញជាតិ និងជីគីមីអ៊ុយក្រែន និងរុស្ស៊ីទៅកាន់ទីផ្សារពិភពលោក

2023/07/19 12:41:49 pm        159
Facebook Telegram Linkin
UN៖អង្គការសហប្រជាជាតិ(UN)និយាយកាលពីថ្ងៃអង្គារថា មាននូវគំនិតជាច្រើនបានលេចចេញឡើងដើម្បីជួយឲ្យគ្រាប់ធុញ្ញជាតិអ៊ុយក្រែន និងរុស្ស៊ី ហើយនិងជីគីមីរុស្ស៊ី ទៅកាន់ទីផ្សារសកលលោក ក្រោយទីក្រុងម៉ូស្គូ ឈប់ទទួលយកកិច្ចព្រមព្រៀងអនុញ្ញាតឲ្យមានការនាំចេញគ្រាប់ធុញ្ញជាតិអ៊ុយក្រែនដោយសុវត្ថិភាពចេញពីកំពង់ផែសមុទ្រខ្មៅ ។  កិច្ចព្រមព្រៀងសមុទ្រខ្មៅនេះ ត្រូវបានរៀបចំឡើងដោយ UN និងប្រទេសទួរគី កាលពីខែកក្កដា ឆ្នាំមុន ដើម្បីប្រយុទ្ធប្រឆំាងនឹងវិបត្តិស្បៀងអាហារពិភពលោក បង្កឡើងដោយសារការវាយលុករបស់រុស្ស៊ីលើអ៊ុយក្រែន ។ អ៊ុយក្រែន និងរុស្ស៊ី ស្ថិតនៅក្នុងចំណោមប្រទេសនាំចេញគ្រាប់ធុញ្ញជាតិធំៗបំផុតរបស់ពិភពលោក ។  ការដកខ្លួនចេញពីកិច្ចព្រមព្រៀងរបស់រុស្ស៊ីកាលពីថ្ងៃចន្ទ ដែលរួមទាំងការដកចេញការធានាចំពោះការធ្វើនាវាចរណ៍ប្រកបដោយសុវត្ថិភាពនោះ បានបញ្ចប់ផងដែរនូវកិច្ចព្រមព្រៀងរវាង UN និងទីក្រុងម៉ូស្គូ ដែលក្រុមមន្រ្តី UNបានយល់ព្រមជួយនាំចេញជីគីមី និងស្បៀងអាហាររុស្ស៊ីទៅកាន់ទីផ្សារពិភពលោក ។  អ្នកនាំពាក្យអង្គការសហប្រជាជាតិលោក Stephane Dujarric និយាយថា ទោះបីជាយ៉ាងណាក៏ដោយ អគ្គលេខាធិការ UNលោក Antonio Guterresនឹងបន្តស្វែងរកវិធីដែលមានលទ្ធភាពទាំងអស់ ដើម្បីធានាបានថា គ្រាប់ធុញ្ញជាតិអ៊ុយក្រែន គ្រាប់ធុញ្ញជាតិរុស្ស៊ី ជីគីមីរុស្ស៊ី អាចនាំចេញទៅកាន់ទីផ្សារពិភពលោកបាន ។  លោកបាននិយាយប្រាប់ក្រុមអ្នកសារព័ត៌មានដោយពុំបានផ្តល់សេចក្តីលម្អិតថា មាននូវគំនិតច្រើនណាស់បានលេចចេញ ។  ខណៈពេលនោះដែរ រដ្ឋមន្រ្តីក្រសួងការបរទេសអ៊ុយក្រែនលោក Dmytro Kuleba និយាយថា ជម្រើសផ្សេងទៀតចំពោះកិច្ចព្រមព្រៀងគ្រាប់ធុញ្ញជាតិសមុទ្រខ្មៅ ត្រូវតែរកឲ្យឃើញ ហើយបច្ចុប្បន្នមាននូវការជជែកពិភាក្សាយ៉ាងសកម្មបំផុត ។  លោកបន្តថា ការនាំចេញគ្រាប់ធុញ្ញជាតិអ៊ុយក្រែនឆ្លងកាត់អឺរ៉ុបមិនអាចទូទាត់ជាមួយការចែកចាយពីកំពង់ផែអ៊ុយក្រែននៅសមុទ្រខ្មៅបាននោះទេ ៕

វៀតណាមអនុម័តផែនការតម្លៃ៣១.៧ ពាន់លានដុល្លារដើម្បីពង្រីកសមត្ថភាពស្តុកប្រេង នៅឆ្នាំ២០៣០

2023/07/19 12:38:16 pm        145
Facebook Telegram Linkin
វៀតណាម៖ ប្រទេសវៀតណាម បានអនុម័តផែនការមួយដើម្បីពង្រីកសមត្ថភាពស្តុកប្រេងឥន្ធនៈរបស់ខ្លួន នៅត្រឹមឆ្នាំ២០៣០ ជាមួយនឹងការវិនិយោគរហូតដល់៣១,៧ពាន់លានដុល្លារ។ យោងតាមផែនការដែលត្រូវបានចុះហត្ថលេខាដោយលោក Tran Hong Ha ( ត្រឹង ហុង ហា) ឧបនាយករដ្ឋមន្ត្រីបានឲ្យដឹងកាលពីថ្ងៃអង្គារថា ការវិនិយោគនឹងបង្កើនសមត្ថភាពស្តុកទុកប្រេងឥន្ធនៈចម្រាញ់រួច និងប្រេងឆៅរបស់ប្រទេស រហូតដល់៧៥ ទៅ៨០ថ្ងៃនៃការនាំចេញសរុប។

កម្មករ-កម្មការិនី ត្រៀមខ្លួនរួចរាល់ទៅបោះឆ្នោត និងបន្តគំាទ្រគណបក្សប្រជាជនកម្ពុជា

2023/07/19 12:37:41 pm        195
Facebook Telegram Linkin
ភ្នំពេញ៖ កម្មករ-កម្មការិនី បម្រើការងារនៅក្នុងមូលដ្ឋានរាជធានីភ្នំពេញ បាននិយាយថា ពួកគេត្រៀមខ្លួនរួចរាល់ហើយ ដើម្បីទៅបោះឆ្នោតជ្រើសតាំងតំណាងរាស្រ្ត ​នីតិកាលទី៧ និងបន្តបោះឆ្នោតគាំទ្រគណបក្ស ប្រជាជនកម្ពុជា ​ឱ្យដឹកនាំរាជរដ្ឋាភិបាល អាណត្តិទី៧ទៀត ។ក្រុមកម្មករ កម្មការិនី នៅថ្ងៃទី១៩ ខែកក្កដានេះបានប្រាប់BTVថា ពួកគេបន្តការគាំទ្រគណបក្ស ប្រជាជនកម្ពុជា ព្រោះថា គណបក្សនេះមានស្នាដៃជាច្រើន ក្នុងកសាងប្រទេសជាតិឱ្យមាន​ការអភិវឌ្ឍរីកចម្រើន ជាពិសេសក្នុងវិស័យកាត់ដេរ​សំលៀកបំពាក់ និងស្បែក ​ដែលរាជរដ្ឋាភិបាល មាន​គោលនយោបាយទាក់ទាញអ្នកវិនិយោគក្នុងស្រុក ​និងក្រៅស្រុក បង្កើតរោងចក្រជាច្រើននៅ​ទូទាំង​ប្រទេស និងផ្តល់ ការងារជូនប្រជាពលរដ្ឋ។កម្មករ កម្មការិនី បានលើកឡើងពីអត្ថប្រយោជន៍ផ្សេងៗ ​ដែលពួកគេទទួលបានពីការងាររោងចក្រ ក្រោមការជួយគិតគូររបស់រាជរដ្ឋាភិបាល ​របស់គណបក្សប្រជាជនកម្ពុជា ។បើតាមកម្មវិធីនយោបាយសម្រាប់កសាង​ និងការពារមាតុភូមិ​ (ឆ្នាំ២០២៣-២០២៨) របស់ គណបក្សប្រជាជនកម្ពុជា ​ត្រង់ចំណុច ការអភិវឌ្ឍការងារ ​និងប្រព័ន្ធគាំពារសង្គម បានបង្ហាញពី​សារនយោបាយពាក់ព័ន្ធនឹងកម្មករនិយោជិត ដូចជា៖ បន្តអនុវត្តគោលនយោបាយជាតិ ស្តីពីមុខរបប និងការងារ ​ដើម្បីរក្សាការងារ បង្កើតការងារ បង្កើនឱកាសទទួលបានការងារ​សមរម្យ/ផលិតភាព​ខ្ពស់​ជូនប្រជាពលរដ្ឋ និងធានាភាពសុខដុមរមនា ​នៃទំនាក់ទំនងវិជ្ជាជីវៈនៅកន្លែងការងារ ព្រមទាំងលើ​កកម្ពស់ការអភិវឌ្ឍជំនាញជាប្រចាំ ។ បន្តលើកកម្ពស់ជីវភាពរស់នៅរបស់​កម្មករ​និយោជិត តាមរយៈការបន្តដំឡើងប្រាក់ឈ្នូល អប្បបរមា និងអត្ថប្រយោជន៍ផ្សេងៗ, ការ​ពិនិត្យលទ្ធភាពពង្រីកវិសាលភាពប្រាក់ឈ្នូលអប្បបរមា ទៅវិស័យផ្សេងៗ, ការបន្តជួយសម្រាល​បន្ទុកចំណាយរបស់កម្មករនិយោជិត ដោយបន្តពង្រីកការតបណ្តាញ អគ្គិសនី និងទឹកស្អាតក្នុង​តម្លៃសមរម្យជូនកម្មករនិយោជិតនៅតាមផ្ទះជួល និងជំរុញអនុវត្តច្បាប់ ស្តីពីភតិសន្យាពិសេស ។ បន្តលើកលែងពន្ធលើប្រាក់អត្ថប្រយោជន៍បន្ថែមរបស់កម្មករនិយោជិត​ និងកែ សម្រួលកម្រិត​ប្រាក់​បៀវត្សរ៍​អប្បបរមាត្រូវជាប់ពន្ធ និងការធានាការបើកប្រាក់ឈ្នួល២ដងក្នុងមួយខែ ព្រម ទាំងការ​ទូទាត់​ប្រាក់បំណាច់​អតីតភាពការងារ ​រៀងរាល់៦ខែម្តង និងពង្រឹងការអនុវត្តលក្ខខណ្ឌ​សុវត្ថិភាព និងសុខភាពការងារ ជាដើម ៕អត្ថបទ៖ ទូច សោភ័ណ

បារាំងផ្តល់កិត្តិយសដល់លោក Modi មេដឹកនាំឥណ្ឌាក្នុងពិធីប្រារព្ធទិវាជាតិ

2023/07/19 12:34:51 pm        149
Facebook Telegram Linkin
បារាំង៖ នាយករដ្ឋមន្ត្រីឥណ្ឌាលោក Narendra Modi ត្រូវបានផ្តល់កិត្តិយសពិសេសបំផុតរបស់ប្រទេសបារាំង កាលពីថ្ងៃសុក្រទី១៤ ខែកក្កដា ជាភ្ញៀវកិត្តិយស នៅក្នុងព្យុហយាត្រាយោធាទិវាជាតិ ជាផ្នែកនៃដំណើរទស្សនកិច្ច ដែលបានបញ្ជាក់ពីកិច្ចព្រមព្រៀងការពារជាតិកម្រិតខ្ពស់។ លោក Modi និងប្រធានាធិបតី លោក Emmanuel Macron បានត្រួតពិនិត្យមើលការដើរក្បួនយោធាឥណ្ឌា និងបារាំង នៅតាមដងផ្លូវ Champs-Elysees ដែលមានជួរដើមឈើ នៅក្នុងទីក្រុងប៉ារីស ខណៈយន្តហោះប្រយុទ្ធ Rafale ផលិតនៅប្រទេសបារាំង ដែលឥណ្ឌាបានទិញកាលពីឆ្នំ២០១៥ បានចូលរួមនៅក្នុងការហោះហើរឆ្លងកាត់វិមាន Arc de Triomphe ។ការប្រារព្ធពិធីជាតិ ធ្វើឡើងនៅពេលដ៏លំបាកសម្រាប់លោក Macron ដែលមានការមិនពេញចិត្តពីសមាជិកសាធារណៈមួយចំនួន ខណៈលោក ធ្វើដំណើរតាមរថយន្តយោធានៅតាមផ្លូវ Champs-Elysees ( ហ្សង់អេលីហ្ស៊េ)។ ការសម្រេចចិត្តរបស់លោក ដើម្បីបង្កើនអាយុចូលនិវត្តន៍ បានបង្កឲ្យមានការតវ៉ាជាច្រើនខែ និងបានធ្វើឲ្យប៉ះពាល់ដល់អត្រាប្រជាប្រីយភាពរបស់លោក។  លោក Modi បានចាប់ផ្តើមដំណើរទស្សនកិច្ចរយៈពេល២ថ្ងៃ ទៅកាន់ទីក្រុងប៉ារីសកាលពីពីថ្ងៃទី១៣ ខែកក្កដា នៅពេលនោះ លោកត្រូវបានផ្តល់រង្វាន់ងារកិត្តិយស ជារង្វាន់ខ្ពស់បំផុតរបស់ប្រទេសបារាំង។ ព្យុះហយាត្រា បានធ្វើឡើងបន្ទាប់ពីទីក្រុងញ៉ូវឌេលី បានផ្តល់ការអនុម័តដំបូងដើម្បីទិញយន្តហោះ Rafale បន្ថែមចំនួន២៦គ្រឿង សម្រាប់កងទ័ពជើងទឹករបស់ខ្លួន និងនាវាមុជទឹកចំនួន៣គ្រឿង ដោយផ្អែកលើទំនាក់ទំនងការពារជាតិជាមួយទីក្រុងប៉ារីស នៅពេលមួយដែលប្រទេសទាំងពីរ កំពុងស្វែងរកសម្ព័ន្ធមិត្ត នៅក្នុងតំបន់ ឥណ្ឌូ-ឥណ្ឌូប៉ាស៊ីហ្វិក។ប្រភពដែលដឹងច្បាស់ពីព័ត៌មានលម្អិត បានឲ្យដឹងថា តម្លៃសរុបនៃការទិញនេះ ត្រូវបានគេរំពឹងថា មានតម្លៃប្រមណ៨០០ពាន់លានរូបពី ឬ៩.៧៥ ពាន់លានដុល្លារ ទោះបីជាតម្លៃនេះនៅតែជាគោលដៅចំពោះការចរចាក៏ដោយ។ លោក Macron បានផ្តល់កិត្តិយស ចំពោះមេដឹកនាំពិភពលោក មួយចំនួនប៉ុណ្ណោះមកចូលរួមក្នុងព្យុះហយាត្រាយោធាក្នុងទីវាជាតិ៕

អភិបាលតំបន់៖ រុស្ស៊ីវាយប្រហារតាមផ្លូវអាកាសជាយប់ទី២ លើកំពង់ផែ Odesa របស់អ៊ុយក្រែន

2023/07/19 12:25:55 pm        189
Facebook Telegram Linkin
អ៊ុយក្រែន៖ អភិបាលតំបន់ បាននិយាយថា ប្រព័ន្ធការពារដែនអាកាសអ៊ុយក្រែន បានជាប់រវល់យ៉ាងខ្លាំង ក្នុងរយៈពេលជាច្រើនម៉ោង នៅព្រឹកថ្ងៃពុធ ដើម្បីទប់ទល់ និងកម្ទេចការវាយប្រហារតាមផ្លូវអាកាសរបស់រុស្ស៊ីលើកំពង់ផែភាគខាងត្បូងនៃទីក្រុង Odesa សម្រាប់យប់ទីពីរជាប់ៗគ្នា។ប្រទេសរុស្ស៊ីបានចាប់ផ្ដើមវាយប្រហារកំពង់ផែរបស់អ៊ុយក្រែន កាលពីថ្ងៃអង្គារ (ទី១៨ ខែកក្កដា) មួយថ្ងៃបន្ទាប់ពីការដកខ្លួនចេញពីកិច្ចព្រមព្រៀងដែលគាំទ្រដោយអង្គការសហប្រជាជាតិ (UN) សម្រាប់ការនាំចេញគ្រាប់ធញ្ញជាតិតាមសមុទ្រខ្មៅប្រកបដោយសុវត្ថិភាព ដោយការសម្រេចចិត្តនេះ បានបង្កើនការបារម្ភជាចម្បង នៅទ្វីបអាហ្រ្វិក និងអាស៊ីពីការឡើងថ្លៃតម្លៃស្បៀងអាហារ និងពីការកើនឡើងនូវភាពអត់ឃ្លាន។អភិបាលក្រុង Odesa លោក Oleh Kiper បាននិយាយនៅលើកម្មវិធីផ្ញើសារនៃបណ្ដាញសង្គម Telegram ថា៖ «កុំចូលទៅជិតបង្អួច កុំបាញ់ ឬបង្ហាញពីការងាររបស់កងកម្លាំងការពារដែនអាកាសឲ្យសោះ»។ភាគខាងកើតទាំងអស់របស់ប្រទេសអ៊ុយក្រែន ត្រូវបានប្រកាសព្រមានអំពីការវាយឆ្មក់តាមអាកាស ដោយចាប់ផ្តើមភ្លាមៗបន្ទាប់ពីពាក់កណ្តាលអធ្រាត្រឈានចូលថ្ងៃពុធ។ ក្នុងរបាយការណ៍សមរភូមិផ្សេងទៀត ទីក្រុងម៉ូស្គូ និងទីក្រុងគីវ បានផ្តល់ព័ត៌មានផ្សេងគ្នាយ៉ាងច្រើននៃការប្រយុទ្ធគ្នា នៅភាគឦសានអ៊ុយក្រែន កាលពីថ្ងៃអង្គារ។៦សប្តាហ៍ ចាប់តាំងពីអ៊ុយក្រែនចាប់ផ្តើមបើកការវាយបក នៅភាគខាងកើត និងខាងត្បូង រុស្ស៊ីកំពុងបង្កើនការវាយលុកផ្នែកថ្មើរជើង នៅភាគឦសាន ហើយជាមួយគ្នានេះ ទីក្រុងមូស្គូនិយាយថា ការវាយលុករបស់អ៊ុយក្រែន បានបរាជ័យ៕

សម្ដេចតេជោ៖ ពួកជ្រុលនិយមនៅក្រៅស្រុករកគ្រប់វិធី ដើម្បីបំផ្លាញដំណើរការប្រជាធិបតេយ្យនៅកម្ពុជា

2023/07/19 12:22:58 pm        405
Facebook Telegram Linkin
ភ្នំពេញ៖ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្រ្ដីនៃកម្ពុជា នាថ្ងៃទី១៩ ខែកក្កដា ឆ្នាំ២០២៣នេះ បានបញ្ជាក់ថា ពួកជ្រុលនិយមដែលបញ្ជាដោយទណ្ឌិតរត់ចោលគុកពីក្រៅប្រទេស ក្រោយមកមានបក្សនយោបាយមួយនៅក្នុងប្រទេស បានរកគ្រប់វិធីដើម្បីបំផ្លាញចោលដំណើរការ​ប្រជាធិបតេយ្យ តាមរយៈការខិតខំបំផ្លាញចោលការបោះឆ្នោត ដូចជាយុទ្ធនាការមិនឲ្យប្រជាជន​ទៅបោះឆ្នោត និងបំផ្លាញចោលសន្លឹកឆ្នោតជាដើម។សម្ដេចតេជោ បានសរសេរនៅលើបណ្ដាញតេឡេក្រាម និងធ្វីតធឺផ្លូវការណ៍ថា ការបោះឆ្នោត​សកលឆ្នាំ២០២៣ ក្រៅពីការប្រកួតប្រជែងរវាងគណបក្សនយោបាយចំនួន ១៨ គណបក្សដែល​បានចុះឈ្មោះ​ប្រកួតប្រជែងយកកៅអីក្នុងសភាជាតិ ​ក៏នៅមានការប្រកួតប្រជែងរវាង ​១៨ គណបក្ស​ដែលចូលរួមការបោះឆ្នោត ​ជាមួយពួកជ្រុលនិយមដែលចង់បំផ្លាញចោលការបោះឆ្នោត​នៅកម្ពុជាផងដែរ។ សម្ដេចតេជោ បញ្ជាក់ថា៖«ពួកជ្រុលនិយមដែលបញ្ជាដោយទណ្ឌិតរត់ចោលគុកពីក្រៅប្រទេស ក្រោយមកមានបក្សនយោបាយមួយនៅក្នុងប្រទេស បានរកគ្រប់វិធីដើម្បីបំផ្លាញចោលដំណើរការ​ប្រជាធិបតេយ្យ ​តាមរយៈការខិតខំបំផ្លាញចោលការបោះឆ្នោត ដូចជាយុទ្ធនាការមិនឲ្យប្រជាជន​ទៅបោះឆ្នោត​ និងបំផ្លាញចោលសន្លឹកឆ្នោតជាដើម»។ សម្ដេចតេជោ បានចោទជាសំណួរថា តើថ្ងៃទី២៣ ខែកក្កដា ឆ្នាំ២០២៣ខាងមុខ កម្លាំង​ប្រជាធិបតេយ្យ​ដែលចូលរួមការបោះឆ្នោតមានច្រើនជាង​ ឬមានតិចជាង កម្លាំង​បំផ្លាញ​ប្រជាធិបតេយ្យ បំផ្លាញការបោះឆ្នោត? សូមរង់ចាំមើលទាំងអស់គ្នា៕ អត្ថបទ៖ វ៉ន ដារ៉ា

លោក Erdogan ចុះកិច្ចព្រមព្រៀងយានដ្រូនជាមួយអារ៉ាប៊ីសាអ៊ូឌីត មុនមកដល់ប្រទេសកាតា

2023/07/19 12:19:44 pm        50
Facebook Telegram Linkin
ទួរគី៖ ប្រធានាធិបតីទួរគី លោក រ៉េសិប តៃយីប អ៊ើដូហ្គែន (Recep Tayyip Erdogan) បានធ្វើដំណើរទៅដល់ទីក្រុងដូហា (Doha) ប្រទេសកាតាហើយ កាលពីថ្ងៃអង្គារ (ទី១៨ ខែកក្កដា) ដែលនេះជាកន្លែងឈប់សំចតទី២ នៃដំណើរទស្សនកិច្ច នៅរដ្ឋឈូងសមុទ្ររបស់លោក បន្ទាប់ពីឈប់សំចតនៅប្រទេសអារ៉ាប៊ីសាអ៊ូឌីត ដែលនៅទីនោះ លោកបានចុះកិច្ចព្រមព្រៀងផ្តល់យានដ្រូនដល់ព្រះរាជាណាចក្រមួយនេះ។នាពេលនេះ លោក អ៊ើដូហ្គែន ដែលបានឈ្នះអាណត្តិ ៥ឆ្នាំម្ដងទៀត ក្នុងការបោះឆ្នោត កាលពីខែឧសភា កំពុងស្វែងរកការគាំទ្រ សម្រាប់សេដ្ឋកិច្ចរបស់ប្រទេសទួរគីដែលកំពុងធ្លាក់ចុះ។ យោងតាមប្រព័ន្ធផ្សព្វផ្សាយរបស់រដ្ឋកាតា បានឲ្យដឹងថា មេដឹកនាំទួរគី បានធ្វើដំណើរទៅដល់ នៅល្ងាចថ្ងៃអង្គារ (ទី១៨ ខែកក្កដា) ជាមួយនឹងភរិយារបស់លោក លោកស្រី Emine Erdogan នៅក្នុងរដ្ឋធានីនៃសម្ព័ន្ធមិត្តសំខាន់របស់កាតា មុននឹងមានជំនួបជាមួយមេដឹកនាំ លោក Tamim bin Hamad Al-Thani។ទីភ្នាក់ងារសារព័ត៌មានផ្លូវការរបស់អារ៉ាប៊ីសាអ៊ូឌីត ( SPA) បានរាយការណ៍ថា បន្ទាប់ពីមានជំនួប រវាងលោក អេរដូហ្គែន (Erdogan) និងរជ្ជទាយាទអារ៉ាប៊ីសាអ៊ូឌីតព្រះអង្គម្ចាស់ Mohammed bin Salman នៅកំពង់ផែសមុទ្រក្រហម Jeddah កាលពីថ្ងៃចន្ទ (ទី១៧ ខែកក្កដា) ការឈប់សំចតនៅឯប្រទេសអារ៉ាប៊ីសាអ៊ូឌីតនេះ បានឃើញថា កិច្ចព្រមព្រៀងជាច្រើន ត្រូវបានចុះហត្ថលេខា ក្នុងនោះរួមទាំងកិច្ចព្រមព្រៀងយានដ្រូនជាមួយក្រុមហ៊ុនឯកជន Baykar ផងដែរ។SPA បានរាយការណ៍បន្ថែមទៀតថា បន្ទាប់ពីបានចូលរួមវេទិកាធុរកិច្ចអារ៉ាប៊ីសាអ៊ូឌីត-ទួរគី នៅទីក្រុង Jeddah នាថ្ងៃចន្ទនោះ លោក អ៊ើដូហ្គែន (Erdogan) និងព្រះអង្គម្ចាស់ Mohammed បានពិភាក្សាអំពី«ទស្សនវិស័យសម្រាប់កិច្ចសហប្រតិបត្តិការរួមគ្នា» ក្នុងកិច្ចប្រជុំរបស់ថ្នាក់ដឹកនាំទាំងពីរដែលបន្ទាប់មកបានចុះហត្ថលេខាលើកិច្ចព្រមព្រៀងសហប្រតិបត្តិការក្នុងវិស័យថាមពល ការវិនិយោគផ្ទាល់ វិស័យការពារជាតិ និងប្រព័ន្ធផ្សព្វផ្សាយ៕

បេសកជនអាមេរិក៖ការពិភាក្សាអំពីអាកាសធាតុនៅប្រទេសចិន មានលក្ខណៈស្ថាបនា ប៉ុន្តែមានភាពស្មុគស្មាញ

2023/07/19 12:15:04 pm        123
Facebook Telegram Linkin
អាមេរិក៖ បេសកជនទទួលបន្ទុកកិច្ចការអាកាសធាតុរបស់សហរដ្ឋអាមេរិក លោក ចន ឃើរី (John Kerry) បាននិយាយនៅថ្ងៃពុធ (ទី១៩ ខែកក្កដា)នេះថា កិច្ចពិភាក្សារបស់លោកជាមួយមន្ត្រីចិនក្នុងសប្តាហ៍នេះ មានលក្ខណៈស្ថាបនា ប៉ុន្តែមានភាពស្មុគស្មាញ ដោយភាគីទាំងពីរ នៅតែដោះស្រាយជាមួយ«ផ្នែកខាងក្រៅ» ពាក់ព័ន្ធនយោបាយ រួមទាំងកោះតៃវ៉ាន់ផងដែរ។លោកឃើរី បានប្រាប់អ្នកយកព័ត៌មានថា៖«យើងគ្រាន់តែតភ្ជាប់ឡើងវិញ។«យើងកំពុងព្យាយាមបង្កើតឡើងវិញនូវដំណើរការ ដែលយើងបានធ្វើជាច្រើនឆ្នាំមកហើយនោះ»។លោកឃើរី បានទៅដល់ទីក្រុងប៉េកាំងកាលពីថ្ងៃអាទិត្យសប្តាហ៍មុន ហើយបានជួបប្រជុំជាមួយអ្នកការទូតកំពូលរបស់ចិនលោក វ៉ាង យី (Wang Yi) និងលោកនាយករដ្ឋមន្ត្រី លី គាង (Li Qiang) ព្រមទាំងបេសកជនអាកាសធាតុជើងចាស់ លោក Xie Zhenhua ក្នុងកិច្ចខិតខំប្រឹងប្រែងមួយស្តារទំនុកចិត្តឡើងវិញរវាងភាគីទាំងពីរនៅមុនកិច្ចពិភាក្សាអាកាសធាតុ COP28 នៅទីក្រុងឌូបៃ នាចុងឆ្នាំនេះ។ លោកឃើរី បានថ្លែងថា៖«យើងកំពុងព្យាយាមបង្កើតផ្លូវច្បាស់លាស់មួយទៅកាន់COP ដើម្បីអាចសហការ និងធ្វើការដូចដែលយើងចង់បានជាមួយគ្រប់មជ្ឈដ្ឋានខាងក្រៅ»។ការទូតអាកាសធាតុរវាងប្រទេសបញ្ចេញថាមពលកំពូលទាំងពីររបស់ពិភពលោក ត្រូវបានផ្អាកកាលពីខែសីហាឆ្នាំ២០២២ បន្ទាប់ពីដំណើរទស្សនកិច្ចរបស់ប្រធានសភាតំណាងរាស្រ្តអាមេរិក លោក ណានស៊ី ប៉េឡូស៊ី (Nancy Pelosi) ទៅកាន់កោះតៃវ៉ាន់ ដែលជាកោះគ្រប់គ្រងតាមបែបប្រជាធិបតេយ្យ ដែលប្រទេសចិនទាមទារ៕

បណ្តាគណបក្សនយោបាយមួយចំនួន បានត្រៀមខ្លួនរួចរាល់ហែបក្សបិទយុទ្ធនាការឃោសនាបោះឆ្នោត

2023/07/19 12:13:16 pm        209
Facebook Telegram Linkin
ភ្នំពេញ៖ រហូតមកដល់ថ្ងៃទី១៩ ខែកក្កដានេះ គឺមានបណ្តាគណបក្សនយោបាយមួយចំនួន នៅរាជធានីភ្នំពេញ និងខេត្តកណ្តាល បានរៀបចំក្បួនហែបក្សបិទយុទ្ធនាការឃោសនាបោះឆ្នោតរបស់ខ្លួនជាបណ្តើរៗហើយ ខណៈការបិទយុទ្ធនាការឃោសនាបោះឆ្នោតផ្លូវការ នឹងឈានមកដល់នៅថ្ងៃទី២១ ខែកក្កដា ហើយការបោះឆ្នោតជ្រើសតាំងតំណាងរាស្ត្រនីតិកាលទី៧ នឹងឈានចូលមកដល់នៅថ្ងៃទី២៣ ខែកក្កដា។ គណបក្សនយោបាយ ដែលបានហែរបក្សបិទយុទ្ធនាបការរបស់ខ្លួននៅថ្ងៃនេះ​ និងគណបក្ស​ដែលត្រៀម​ហែបិទយុទ្ធនាការនៅថ្ងៃបន្ទាប់ បានថ្លែងប្រាប់BTV ​នៅថ្ងៃទី១៩ខែកក្កដានេះថា នៅ​ពេលនេះ ពួកគេ​បាន​ត្រៀមយានជំនិះ និង​កម្លាំង​ពលរដ្ឋចូលរួមពិធីបិទហែយុទ្ធនាការឃោសនា​បោះឆ្នោតរួចហើយ ក្នុងឱកាសហែបិទយុទ្ធនាការនៅថ្ងៃចុងក្រោយផ្សព្វផ្សាយពីកម្មវិធី​នយោបាយ​របស់បក្សខ្លួនជូនពលរដ្ឋបានយល់ជ្រួតជ្រាប។ បណ្តាគណបក្សនយោបាយបានអំពាវនាវពលរដ្ឋចូលរួមបោះឆ្នោត​ឲ្យបានគ្រប់ៗគ្នា និង​សូមគូស​ជ្រើសរើស​គណបក្សនយោបាយដែលខ្លួនស្រឡាញ់ឲ្យបានត្រឹមត្រូវ ​ខណៈសន្លឹកមួយៗ គឺតម្លៃខ្លាំង​សម្រាប់ប្រទេសជាតិយើងទាំងអស់គ្នា។បើតាម លោក ស៊ីម ដូនី ប្រធានលេខាធិការដ្ឋានគណកម្មាធិការរៀបចំការបោះឆ្នោតរាជធានីភ្នំពេញ ឲ្យដឹងថា នៅថ្ងៃទី១៩ ​ខែកក្កដានេះ ​គឺមានគណបក្សខ្មែរអភិរក្ស ​មួយបានធ្វើសកម្មភាពហែ​គណបក្ស​បិ​ទយុទ្ធនាការឃោសនា​បោះឆ្នោត ដោយឡែក ​គណបក្សប្រជាធិបតេយ្យមូលដ្ឋាន មួយទៀត ​នឹងធ្វើការហែរបិទការឃោសនារបសខ្លួននៅថ្ងៃស្អែក ​ហើយនៅថ្ងៃទី២១ ខែកក្កដា ដែលជាចុងក្រោយ ​គឺមានគណបក្សហែបិទយុទ្ធនាការចំនួន៣ រួមមាន​ គណបក្សប្រជាជនកម្ពុជា គណបក្សហ្វ៊ុនស៊ិនប៉ិច និងគណបក្សខ្មែររួបរួមជាតិ ។ដោយឡែកនៅខេត្តកណ្តាលវិញ​ លោក ផាន់ រិទ្ធិពល ប្រធានលេខាធិការដ្ឋាន​គណៈកម្មាធិការ​រៀបចំ​ការបោះឆ្នោតខេត្តកណ្តាល ថា នៅថ្ងៃស្អែកទី២០ ​និងថ្ងៃខានស្អែកទី២១ កក្កដា នៅ​ខេត្តកណ្តាល​គឺមានគណបក្សចំនួន៤​បានជូនដំណឹងថា​នឹងធ្វើការហែបិទយុទ្ធនាការ​ឃោសនាបោះឆ្នោតរបស់ខ្លួនផងដែរ។សូមបញ្ជាក់ថា យុទ្ធនាការហែរគណបក្សឃោសនាបោះឆ្នោតជ្រើសតាំងតំណាងរាស្ត្រនីតិកាលទី៧ ឆ្នាំ២០២៣​នេះ គឺមានរយៈពេល ២១ថ្ងៃ គិតចាប់ពីថ្ងៃទី១ ដល់ថ្ងៃទី២១ ខែកក្កដាឆ្នាំ២០២៣ ដែលមានគណបក្សនយោបាយចំនួន១៨បានចូលរួមប្រកួតប្រជែង៕ អត្ថបទ ស៊ុម សុខជា

បណ្ដាញសង្គម

ព័ត៌មានថ្មីៗ

លោកជំទាវលីម ដារ៉ែន ជួន ណារិន្ទ ផ្តល់ម៉ូតូ២០គ្រឿង និងអំណោយមួយចំនួន ទៅកាន់វរៈនគរបាល និងកងទ័ពការពារព្រំដែន
08/16/2025 06:08 PM
Facebook Telegram Linkin
ក្រុមការងាររាជរដ្ឋាភិបាលចុះមូលដ្ឋានឃុំកណ្តឹងស្រុកបាទី ខេត្តតាកែវនិងរដ្ឋបាលឃុំកណ្តឹងប្រារព្វពិធីផ្សព្វផ្សាយពីបញ្ហាគ្រឿងញៀន និង ពិធីបង្សុកូលឧទ្ទិសកុសលដល់វិញ្ញាណក្ខន្ធវិរះកងទ័ពកម្ពុជាដែលបានពលីជីវិតក្នុងសមរភូមិ
08/16/2025 06:08 PM
Facebook Telegram Linkin
ហ្វីលីពីន និងអូស្ត្រាលី ចាប់ផ្តើមសមយុទ្ធដ៏ធំបំផុតមិនធ្លាប់មាន នៅជិតសមុទ្រចិនខាងត្បូង
08/16/2025 05:08 PM
Facebook Telegram Linkin
ទីក្រុងគីវ៖ រុស្ស៊ីបាញ់យាន ៨៥គ្រឿង និងមីស៊ីល ១គ្រាប់ លើអ៊ុយក្រែន ប៉ុន្មានម៉ោងក្រោយមានជំនួប Trump-Putin
08/16/2025 05:08 PM
Facebook Telegram Linkin
ផ្ទុះរោងចក្រ នៅតំបន់ Ryazan របស់រុស្ស៊ី បណ្ដាលឲ្យមនុស្ស ១១នាក់ស្លាប់ និង ១៣០នាក់របួស
08/16/2025 05:08 PM
Facebook Telegram Linkin
នាយករដ្ឋមន្ត្រីដាណឺម៉ាក និយាយថា លោក Netanyahu បានប្រែទៅជាបង្ក «បញ្ហាដោយខ្លួនលោកផ្ទាល់»
08/16/2025 05:08 PM
Facebook Telegram Linkin
ឯកឧត្តមសាស្ត្រាចារ្យ ប៉ិច សុធី អញ្ជើញបើកសន្និសីទប្រចាំឆ្នាំលើកទី១ របស់សមាគមគ្រូពេទ្យបង្កកំណើតកម្ពុជា
08/16/2025 04:08 PM
Facebook Telegram Linkin
មេដឹកនាំអឺរ៉ុបស្វាគមន៍កិច្ចប្រឹងប្រែងរបស់លោក Trump ប៉ុន្តែបញ្ជាក់ថា សម្ពាធលើរុស្ស៊ី ត្រូវតែមានបន្ត
08/16/2025 04:08 PM
Facebook Telegram Linkin
មេភូមិភាគ៣កម្ពុជាស្នើថៃជៀសវាងសកម្មភាពទាំងឡាយដែលនាំឲ្យមានភាពតានតឹងនៅតាមព្រំដែនជាយថាហេតុ
08/16/2025 04:08 PM
Facebook Telegram Linkin
[UPDATE] ក្រុមអ្នកជួយសង្គ្រោះប៉ាគីស្ថាន ពិបាកស្រង់សាកសព ក្រោយភ្លៀងរដូវមូសុង សម្លាប់មនុស្សយ៉ាងតិច ៣២០នាក់
08/16/2025 03:08 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.