នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
សភាតំណាងប្រជាជនចិនចាត់ទុកសម្តេចតេជោ ជាតួអង្គសំខាន់បន្ត​ពីព្រះបរម​រតនកោដ្ឋ​ក្នុង​ការ​ពូន​ជ្រំ​ទំនាក់ទំនងរវាងកម្ពុជា និងចិន
សម្តេចតេជោអនុញ្ញាតឱ្យសមាជិកគណៈកម្មាធិការអចិន្ត្រៃយ៍សភាប្រជាជនចិនជួបសម្តែងការគួរសម
ក្រុមការងារបច្ចេកទេសអន្តរក្រសួងបន្តចុះកំណត់និយាមកា និងបោះបង្គោលព្រំដីតាមបណ្តោយព្រែកជីកហ្វូណនតេជោ សម្រាប់កំណាត់ទី២ ក្នុងភូមិសាស្រ្តខេត្តកំពត
សម្ដេចតេជោ ជំរុញឱ្យកម្ពុជា-កូរ៉េខាងត្បូងលើកកម្ពស់ទំនាក់ទំនងភាពជាដៃគូយុទ្ធសាស្រ្តគ្រប់ជ្រុងជ្រោយក្នុងឱកាសខួប៣០ឆ្នាំនៃទំនាក់ទំនងប្រទេសទាំងពីរ

នយោបាយ​ និង ការអភិវឌ្ឍន៍

សម្តេចតេជោ អំពាវនាវជាថ្មីឱ្យពលរដ្ឋរួមគ្នារក្សាសន្តិភាព ដើម្បីធានាការអភិវឌ្ឍរយៈពេលវែង

2023/06/27 01:19:44 pm        99
Facebook Telegram Linkin
កំពង់ស្ពឺ៖ សម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានធ្វើការអំពាវនាវជាថ្មីដល់ពលរដ្ឋ ឱ្យរួបរួមគ្នាថែរក្សាសន្តិភាព ដើម្បីធានាការដល់ការអភិវឌ្ឍរីកចម្រើនរយៈពេលវែង ។សម្តេចតេជោ ហ៊ុន សែន ក្នុងឱកាសជាថ្មីបន្តជួបសំណេះសំណាលជាមួយកម្មករ និយោជិត ជិត២ម៉ឺននាក់ នៅក្នុងខេត្តកំពង់ស្ពឺ នៅព្រឹកថ្ងៃទី២៧ ខែមិថុនា នេះ បានថ្លែងលើកឡើងថា ការរួមគ្នារក្សា សន្តិភាព នឹងបន្តនិរន្តរភាពនៃការអភិវឌ្ឍរីកចម្រើនទៅពេលខាងមុខ ហើយសម្តេច បានព្រមានជាថ្មីថា នឹង មិនអត់ឱនឱ្យអ្នកណាទាំងអស់ដែលមានបំណងបំផ្លាញសន្តិភាព ។សម្ដេចតេជោ ហ៊ុន សែន បានលើកឡើងនូវនយោបាយជ្រុលនិយម ដែលសម្ដេចនឹងមិនអត់ឱនឱ្យ ជាដាច់ខាត ជាពិសេសជនក្បត់ជាតិ៣ជំនាន់ដោយសម្តេច បានអះអាងថា ​នឹងរំលាយឱ្យអស់ ដូចអង្គការចាត់តាំងខ្មែរក្រហមយ៉ាងដូច្នោះដែរ ។​ ដូច្នេះអ្នកណាក៏ដោយ ឲ្យតែមានជាប់​ទំនាក់ទំនង​ចង សម្ព័ន្ធភាពជាមួយក្រុមជ្រុលនិយម មិនទទួលបានការរាប់រក​ ឬអត់ឱនឱ្យបានពីសម្ដេចឡើយ ៕អត្ថបទ៖ មុត សុទ្ធ

ប៉ាគីស្ថានរិះគន់ គោលនយោបាយអន្តោប្រវេសន៍បន្ទាប់ពីលិចទូកនៅសមុទ្រមេឌីទែរ៉ាណេ

2023/06/27 12:18:59 pm        108
Facebook Telegram Linkin
ប៉ាគីស្ថាន៖ ប្រទេសប៉ាគីស្ថាន និងប្រទេសអាហ្រ្វិកមួយចំនួន បានអំពាវនាវឱ្យមានការការពារបន្ថែមទៀតសម្រាប់ជនអន្តោប្រវេសន៍ នៅក្រុមប្រឹក្សាសិទ្ធិមនុស្សអង្គការសហប្រជាជាតិកាលពីថ្ងៃចន្ទ បន្ទាប់ពីទូកលិចនៅឆ្នេរសមុទ្រប្រទេសក្រិក។ មនុស្សយ៉ាងហោចណាស់ ៨២ នាក់បានស្លាប់ និងរាប់រយនាក់ទៀតត្រូវបានគេគិតថា ស្លាប់នៅក្នុងឧបទ្ទវហេតុលិចទូកកាលពីថ្ងៃទី ១២-១៣ ខែមិថុនា នៅតាមផ្លូវនៃការធ្វើអន្តោប្រវេសន៍បណ្តាលឲ្យមានមនុស្សស្លាប់ច្រើនបំផុតរបស់ពិភពលោកមកពីប្រទេសលីប៊ីទៅកាន់ប្រទេសអ៊ីតាលី។ ប្រទេសប៉ាគីស្ថាន ដែលមានជនជាតិរបស់ខ្លួនចំនួន ៣៥០នាក់ នៅលើទូកដែលបានក្រឡាប់លិច បាននិយាយថាឧបទ្ទវហេតុនេះគឺជា «ការរំលឹកឡើងវិញពីភាពដ៏រន្ធត់នៃការខ្វះចន្លោះការការពារ» ។ឯកអគ្គរដ្ឋទូតរងអចិន្ត្រៃយ៍របស់ប្រទេសប៉ាគីស្ថាន លោក Zaman Mehdi បាននិយាយទៅកាន់ក្រុមប្រឹក្សាដែលមានសមាជិក ៤៧ រូបថា «ការបាត់បង់មនុស្សក្នុងស្ថានភាពជាក់ស្តែងបែបនេះ គឺមិនអាចទទួលយកបានទេ» ។ «ការខ្វះចន្លោះនៃការចែករំលែកការទទួលខុសត្រូវ ការរៀបចំសម្រាប់ការស្វែងរក និងជួយសង្គ្រោះប្រកបដោយសុវត្ថិភាព និងទាន់ពេលវេលា ការមកដល់របស់មនុស្សទាំងឣស់នៅលើទូក ត្រូវបានជួយសង្គ្រោះនៅសមុទ្រ និងការទទួលខុសត្រូវ ត្រូវតែដាក់ចូលរួមក្នុងស្មារតីនៃសាមគ្គីភាព។ បេសកជនរបស់ប្រទេសហ្កំប៊ី ជាប្រទេសដែលជនអន្តោប្រវេសន៍ជាច្រើនចេញដំណើរក្នុងការធ្វើដំណើរដ៏គ្រោះថ្នាក់ឆ្ពោះទៅកាន់អឺរ៉ុប បាននិយាយថា បញ្ហានេះតម្រូវឱ្យមានការយកចិត្តទុកដាក់ជាបន្ទាន់។លោក Felipe Gonzalez Morales អ្នករាយការណ៍ពិសេសរបស់អង្គការសហប្រជាជាតិទទួលបន្ទុកការធ្វើអន្តោប្រវេសន៍បានអំពាវនាវឱ្យរដ្ឋនានាបញ្ចប់ការដាក់ទោសទណ្ឌលើជនអន្តោប្រវេសន៍មិនទៀងទាត់ និងស្វែងរកផ្លូវទៀងទាត់សម្រាប់ពួកគេ។ លោក បាននិយាយឡើងវិញនូវការអំពាវនាវដែលធ្វើឡើងដោយអង្គការមិនមែនរដ្ឋាភិបាលរាប់រយសម្រាប់ស្ថាប័នសិទ្ធិមនុស្សដើម្បីបង្កើតស្ថាប័នស៊ើបអង្កេតអន្តរជាតិថ្មីមួយ ដោយពិនិត្យមើលការរំលោភបំពានសិទ្ធិមនុស្សដែលបានប្រព្រឹត្តលើជនអន្តោប្រវេសន៍។ គំនិតនេះកំពុងត្រូវបានពិភាក្សាជាផ្នែកនៃសម័យប្រជុំក្រុមប្រឹក្សាដែលកំពុងធ្វើឡើងនៅទីក្រុងហ្សឺណែវ៕

អាមេរិកនិងសម្ព័ន្ធមិត្តមិនពាក់ព័ន្ធក្នុងការបះបោរប្រឆាំងលោកពូទីននោះទេ

2023/06/27 12:10:48 pm        113
Facebook Telegram Linkin
អាមេរិក៖ ប្រធានាធិបតីសហរដ្ឋអាមេរិកលោក Joe Biden កាលពីថ្ងៃចន្ទ បាននិយាយថា ការបះបោររយៈពេលខ្លីធ្វើឡើងដោយទាហានស៊ីឈ្នួលរុស្ស៊ីប្រឆាំងវិមានក្រឹមឡាំង គឺជាផ្នែកមួយនៃការតស៊ូនៅក្នុងប្រព័ន្ធរបស់ប្រទេសរុស្ស៊ី ហើយសហរដ្ឋអាមេរិក និងសម្ព័ន្ធមិត្តមិនពាក់ព័ន្ធនឹងរឿងនេះទេ។ លោក Biden បាននិយាយនៅក្នុងការអធិប្បាយដំបូងរបស់លោកចំពោះការបះបោរដោយក្រុមទាហានស៊ីឈ្នួល Wagner ដែលបានធ្វើឲ្យរង្គោះរង្គើកាលពីចុងសប្តាហ៍ថា យើងបានបញ្ជាក់យ៉ាងច្បាស់ថាយើងមិនជាប់ពាក់ព័ន្ធនោះទេ យើងគ្មានអ្វីដែលត្រូវធ្វើជាមួយរឿងនេះឡើយ។ នៅក្នុងព្រឹត្តិការណ៍មួយនៅសេតវិមាន លោក Biden បានថ្លែងលើកឡើងពីការតស៊ូដណ្តើមអំណាចយ៉ាងខ្លាំងក្លា ដែលបានផ្ទុះឡើងកាលពីចុងសប្តាហ៍ នៅពេលដែលក្រុមអ្នកបះបោរបានឈានឆ្ពោះទៅកាន់ទីក្រុងមូស្គូ ដែលបានបញ្ឈប់មុនពេលទៅដល់រដ្ឋធានី។លោក Biden បាននិយាយថា លោកបានណែនាំក្រុមសន្តិសុខជាតិរបស់លោក ឣោយធ្វើបច្ចុប្បន្នភាពអំពីស្ថានភាព «ពីមួយម៉ោងទៅមួយម៉ោង» និងដើម្បីត្រៀមសម្រាប់សេណារីយោជាច្រើន ដែលលោកពុំបាននិយាយលម្អិត។ ទីភ្នាក់ងារសារព័ត៌មាន TASS បានដកស្រង់សម្តីរដ្ឋមន្ត្រីការបរទេសលោក Sergei Lavrov បាននិយាយកាលពីថ្ងៃចន្ទថា អង្គភាពសេវាស៊ើបការណ៍សម្ងាត់របស់រុស្ស៊ី កំពុងស៊ើបអង្កេតថាតើទីភ្នាក់ងារចារកម្មប្រទេសលោកខាងលិច បានដើរតួនាទីនៅក្នុងការបះបោរដែលត្រូវបានបញ្ឈប់នេះដែរឬទេ។ លោក Biden បាននិយាយថា លោកបានពិភាក្សាជាមួយសម្ព័ន្ធមិត្តសំខាន់ៗតាមសន្និសីទវីដេអូមួយ ដើម្បីធ្វើឱ្យប្រាកដថា អ្នកគ្រប់គ្នាស្ថិតនៅលើព្រឹត្តិការណ៍តែមួយ និងសម្របសម្រួលក្នុងការឆ្លើយតបរបស់ពួកគេ។ លោកបាននិយាយថា ពួកគេបានព្រមព្រៀងជាមួយលោកថា យើងត្រូវធ្វើឱ្យប្រាកដថា យើងបានផ្តល់ឱ្យប្រធានាធិបតីរុស្ស៊ី លោក វ្ល៉ាឌីមៀ ពូទីន គ្មានលេស ដើម្បីដាក់កំហុសរឿងនេះមកលើប្រទេសលោកខាងលិច និងដាក់កំហុសរឿងនេះលើសម្ព័ន្ធយោធាណាតូនោះទេ៕

បន្ទាប់ពីការបះបោរ តើប្រធានក្រុមហ៊ុនទាហានស៊ីឈ្នួល Prigozhin នៅឯណា?

2023/06/27 12:04:10 pm        196
Facebook Telegram Linkin
រុស្ស៊ី៖ ប្រធានក្រុមហ៊ុនទាហានស៊ីឈ្នួលរុស្សីលោក Yevgeny Prigozhin បាននិយាយរិះគន់កាលពីថ្ងៃចន្ទ ជាលើកដំបូងចាប់តាំងពីលោកនិងក្រុមអ្នកប្រយុទ្ធរបស់ក្រុមហ៊ុន Wagner Group របស់លោកបានចាប់ផ្តើមការបះបោរដ៏គួរឱ្យភ្ញាក់ផ្អើលនិងមានរយៈពេលខ្លី នៅក្នុងប្រទេសរុស្ស៊ីកាលពីចុងសប្តាហ៍។ លោក Prigozhin បានចេញសេចក្តីថ្លែងការណ៍ជាសាសំឡេងដ៏វែងនៅលើបណ្តាញ Telegram ដោយការពារសកម្មភាពរបស់លោក ទោះបីជាមានសំណួរជាច្រើននៅតែមាន រួមទាំងស្ថានភាព និងអនាគតរបស់លោកក៏ដោយ។ នេះជាលើកចុងក្រោយ ដែលលោក Prigozhin ត្រូវបានគេឃើញដោយផ្ទាល់ ខណៈលោក និងក្រុមអ្នកប្រយុទ្ធរបស់លោក បានចាកចេញពីទីក្រុងរុស្ស៊ីដែលពួកគេបានចូលគ្រប់គ្រង ទីក្រុងRostov-on-Don កាលពីយប់ថ្ងៃសៅរ៍។ នៅក្នុងសារសំឡេងរយៈពេល ១១ នាទី លោក Prigozhin និយាយថា លោកគ្មានបំណងផ្តួលរំលំរដ្ឋាភិបាលនោះទេ ដោយអះអាងថា ចំណាត់ការនេះគឺដើម្បីតវ៉ាជុំវិញការដោះស្រាយរបស់យោធាក្នុងសង្គ្រាមនៅអ៊ុយក្រែន និងនិយាយឡើងវិញពីការចោទប្រកាន់របស់លោកថាយោធារុស្ស៊ីបានវាយប្រហារលើជំរំក្រុមហ៊ុនទាហានស៊ីឈ្នួល Wagner ដោយមីស៊ីល និងឧទ្ធម្ភាគចក្រ បណ្តាលឲ្យទាហានរបស់លោកប្រមាណ ៣០នាក់ស្លាប់ ជាការបង្កឲ្យមានការរុញបញ្ឆេះការប៉ះបោរ។ ប្រព័ន្ធផ្សព្វផ្សាយរុស្ស៊ីកំពុងរាយការណ៍ថាសំណុំរឿងព្រហ្មទណ្ឌលើរូបលោក នៅតែបើកចំហ។ទោះបីជាមានសេចក្តីថ្លែងការណ៍របស់វិមានក្រឹមឡាំងកាលពីចុងសប្តាហ៍ក៍ដោយ ដែលការចោទប្រកាន់លើអ្នកចូលរួមក្នុងការបះបោរនឹងត្រូវបានដកចេញនៅក្នុងកិច្ចព្រមព្រៀងដែលពួកគេនឹងត្រឡប់ទៅមូលដ្ឋានវិញហើយលោក Prigozhin ផ្លាស់ទៅកាន់ប្រទេសបេឡារុស។ លោក Prigozhin ក៏មិនឆ្លើយសំណួរអ្វីផ្សេងទៀតជុំវិញកិច្ចព្រមព្រៀងនោះ ដែលត្រូវបានសម្របសម្រួលដោយប្រធានាធិបតី បេឡារុស លោក Alexander Lukashenko។ ប្រធានាធិបតីលោក វ្ល៉ាឌីមៀ ពូទីន បានអរគុណដល់ក្រុមអ្នកប្រយុទ្ធដែលបានទម្លាក់អាវុធចុះដើម្បីបញ្ចៀសការបង្ហូរឈាម។ លោកនឹងគោរពការសន្យាដែលអនុញ្ញាតឱ្យពួកគេផ្លាស់ទីតាំងទៅកាន់ប្រទេសបេឡារុស ដែលបានចុះហត្ថលេខាលើកិច្ចសន្យាជាមួយក្រសួងការពារជាតិ ឬគ្រាន់តែត្រឡប់ទៅលំនៅឋានវិញ៕

ការកើនឡើងតម្លៃស្បៀងអាហារជាសកល ប៉ះពាល់ដល់ការប្រារព្ធពិធីបុណ្យ Eid al-Adha របស់អ៊ីស្លាមសាសនិក

2023/06/27 12:00:56 pm        70
Facebook Telegram Linkin
មជ្ឈិមបូព៌ា​៖ ពលរដ្ឋនៅតាមប្រទេសនានានៅតំបន់មជ្ឈិមបូព៌ា និងអាហ្វ្រិកខាងជើង ដែលកំពុងព្យាយាមទប់ទល់ទៅនឹងអតិផរណាខ្ពស់ និងការហក់ឡើងខ្ពស់នៃតម្លៃស្បៀងអាហារ កំពុងជួបប្រទះការលំបាកក្នុងការលក់ ឬ ទិញ សត្វជៀម សម្រាប់ធ្វើម្ហូបអាហារសែនព្រេន តាមទំនៀបទម្លាប់ដែលបានបន្តរយៈពេលជាច្រើនឆ្នាំអំឡុងថ្ងៃឈប់សម្រាកបុណ្យមូស្ល៊ីមប្រចាំឆ្នាំ Eid al-Adha។ Eid al-Adha ដែលជាពិធីបុណ្យដ៏សំខាន់មួយក្នុងចំណោមបុណ្យធំៗជាច្រើនរបស់ពលរដ្ឋជាអ៊ីស្លាមសាសនិក នឹងក្លាយជាព្រឹត្តិការណដ៏សំខាន់នៃធម្មយាត្រាប្រចាំឆ្នាំ ហាជី(haj) នៅពេលដែលការសម្លាប់សត្វរបស់ពលរដ្ឋមូស្ល៊ីមដើម្បីរំឭកដល់ឆន្ទ:របស់បព្វជិតសាសនាលោក Ibrahimឬ Abraham ដែលបានលះបង់កូនប្រុសរបស់លោកតាមការទាមទាររបស់ព្រះ ដែលជារឿយៗចែកជូនសាច់ដល់ជនក្រីក្រ។  ប្រជាពលរដ្ឋនៅក្នុងតំបន់ ដែលកំពុងស្វែងរកសត្វ ដោយការទៅកាន់ទីផ្សារលក់សត្វពាហនៈ ដែលជាធម្មតា តែងប្រារព្ធឡើងប៉ុន្មានសប្ដាហ៍មុនរដូវស្លឹកឈើលាស់ ត្រូវបានប៉ះពាល់យ៉ាងខ្លាំង ដោយសារតម្លៃទំនិញហក់ឡើងខ្ពស់ បើធៀបទៅនឹងរយៈពេលប៉ុន្មានឆ្នាំកន្លងទៅនោះ។  នៅពេលនេះ ប្រជាពលរដ្ឋជាច្រើន ត្រូវបានបង្ខំឲ្យជ្រើសរើសការប្រកាន់ខ្ជាប់ទំនៀមទម្លាប់សាសនាដែលមានរាប់សតវត្សរ៍មកហើយឬ ទម្លាក់ចោល៕

សម្តេចតេជោ ហ៊ុន សែន ចេញបទបញ្ជាឱ្យរាំងខ្ទប់សកម្មភាពបាក់ទ័ព​របស់ក្រុមវាយប្រហារ​លើទឹកដីវៀតណាម ចូលទឹកដីកម្ពុជា

2023/06/27 11:50:30 am        343
Facebook Telegram Linkin
ភ្នំពេញ៖ សម្តេចតេជោ ហ៊ុន សែន តាមរយៈសារបន្ទាន់ នៅព្រឹកថ្ងៃទី២៧ ខែមិថុនា ឆ្នាំ២០២៣នេះ ចេញបទបញ្ជាឱ្យសម្តេចពិជ័យសេនាទៀ បាញ់ រដ្ឋមន្ត្រីក្រសួងការពារជាតិ, នាយឧត្តមសេនីយ៍ វង្ស ពិសេន អគ្គមេបញ្ជាការកងយោធពលខេមរភូមិ និងនាយឧត្តមសេនីយ៍ ហ៊ីង ប៊ុនហៀង មេបញ្ជាការកងអង្គរក្ស ព្រមទាំងកម្លាំងប្រដាប់អាវុធ ឈរជើងនៅខេត្តមណ្ឌលគិរី, រតនគិរី ,ក្រចេះ ឱ្យរាំងខ្ទប់សកម្មភាពជ្រៀតចូលរបស់ក្រុមប្រដាប់អាវុធ វាយប្រហារបែបភេរវកម្មនៅក្នុងប្រទេសវៀតណាម កាលពីប៉ុន្មានថ្ងៃថ្មីៗនេះ ដែលមានបំណងជ្រកកោណនៅទឹកដីកម្ពុជា។សម្តេចបញ្ជាក់ថា ក្រុមបាក់ទ័ពទាំងនេះ បានរាយប៉ាយក្នុងភូមិសាស្ត្រព្រំដែនវៀតណាម ជាប់នឹងព្រំដែនប្រទេសកម្ពុជា ក្នុងភូមិសាស្ត្រខេត្តរតនគិរី ។សម្តេចតេជោបញ្ជាក់ថា ប៉ុន្មានថ្ងៃនេះ មានដ្រូនជាច្រើនគ្រឿងបានហោះ និងធ្លាក់ចូលទឹកដីកម្ពុជា ដែលតាមការបញ្ជាក់ពីភាគីវៀតណាម មិនមែនជាដ្រូនវៀតណាមឡើយ ដូច្នេះដ្រូនទាំងនោះជាដ្រូនរបស់ក្រុមវាយប្រហារវៀតណាម។ ទន្ទឹងនឹងនោះមានមួយចំនួននៃកងទ័ពភេរវកម្មទាំងនោះ កំពុងបាក់ទ័ពរត់ចូលទឹកដីកម្ពុជា។សម្តេចតេជោ ហ៊ុន សែន បានចេញបញ្ជាបន្ទាន់ឱ្យកងអង្គរក្សប្រើអាវុធទំនើបសម្រាប់បាញ់យន្តហោះ ទៅកាន់គោលដៅ ដែលមានដ្រូនរបស់ក្រុមបាក់ទ័ពវាយប្រហារនៅវៀតណាមហោះចូលទឹកដីកម្ពុជា។សម្តេចតេជោ បានបញ្ជាឱ្យកងទ័ពនៅបញ្ជាការដ្ឋានអង្គរក្ស៥០០នាក់ និងកាំភ្លើងបាញ់យន្តហោះ២០០ដើមចេញជាបន្ទាន់ ដើម្បីពង្រាយគ្រប់ច្រកល្ហកសម្រាប់បាញ់ទម្លាក់ដ្រូនទាំងនោះ៕

អ្នកបោះឆ្នោតកាតេម៉ាឡា បញ្ជូនបេក្ខជនប្រធានាធិបតីពីភាគីបដិបក្ខម្ខាងម្នាក់ ដើម្បីទៅប្រជែងគ្នា នៅជុំទី២

2023/06/27 11:15:01 am        72
Facebook Telegram Linkin
កាតេម៉ាឡា៖ យោងតាមលទ្ធផលបឋម កាលពីថ្ងៃចន្ទ (ទី២៦ ខែមិថុនា) បានបង្ហាញថា អ្នកបោះឆ្នោតកាតេម៉ាឡា បានបញ្ជូនបេក្ខជនប្រធានាធិបតី ២រូប មកពីភាគីបដិបក្ខដែលមានទស្សន:នយោបាយខុសគ្នាទៅកាន់ការបោះឆ្នោត នៅថ្ងៃទី២០ ខែសីហា ដោយផ្តល់ក្តីសង្ឃឹមដល់ពលរដ្ឋជាច្រើនដែលកំពុងមានការខកចិត្តថា ការផ្លាស់ប្តូរ នឹងអាចកើតឡើងបាន។តុលាការកំពូលនៃការបោះឆ្នោត បានឲ្យដឹងថា ជាមួយនឹងចំនួន ៩៨ភាគរយនៃសន្លឹកឆ្នោតដែលបានរាប់ពីការបោះឆ្នោត កាលពីថ្ងៃអាទិត្យ (ទី២៥ ខែមិថុនា) បានបង្ហាញថា អតីតស្ត្រីទី១ លោកស្រី Sandra Torres របស់គណបក្សអភិរក្ស (UNE) ទទួលបានសំឡេងឆ្នោត ១៥,៧ភាគរយ ហើយលោក Bernardo Arévalo របស់គណបក្សឆ្វេងនិយម «Seed Movement» (ចលនាគ្រាប់ពូជ) មានការគាំទ្រ ១១,៨ភាគរយ។ការបោះឆ្នោត ដែលត្រូវបានរួបរឹតដោយកង្វល់អំពីអំពើពុករលួយ នៅក្នុងប្រទេសអាមេរិកកណ្តាលមួយនេះ ត្រូវបានកំណត់សម្រាប់ជុំទី២ នៅថ្ងៃទី២០ ខែសីហា ដោយសារគ្មានបេក្ខជនណាម្នាក់ឈានជិតដល់ជ័យជម្នះ ៥០ភាគរយបូកមួយ ដែលត្រូវការជាចាំបាច់ ដើម្បីទទួលបានជោគជ័យដោយសំឡេងភាគច្រើនលើសលុប។សម្រាប់ការបោះឆ្នោតនេះ លោក Arevalo ដែលជាអតីតអ្នកការទូត និងជាកូនប្រុសរបស់អតីតប្រធានាធិបតី Juan Jose Arevalo (វ៉ាន់ ហូសេ ឣារ៉េវ៉ាឡូ) គឺជាអ្នកទទួលបានសំឡេងគាំទ្រដ៏គួរភ្ញាក់ផ្អើល ដោយការស្ទង់មតិពីការបោះឆ្នោតមិនបានព្យាករថា រូបលោកនឹងមិនទទួលបានជោគជ័យនោះទេ។ លោក Arevalo បានយកការដោះស្រាយអំពើពុករលួយជាអាទិភាពដ៏សំខាន់៕

ប្រធានាធិបតីសៀរ៉ាឡេអូន លោក Bio នាំមុខក្នុងការបោះឆ្នោតប្រធានាធិបតី

2023/06/27 10:50:43 am        71
Facebook Telegram Linkin
សៀរ៉ាឡេអូន៖ គណៈកម្មាធិការជាតិរៀបចំការបោះឆ្នោតរបស់ប្រទេសសៀរ៉ាឡេអូន បានឲ្យដឹង កាលពីថ្ងៃចន្ទ (ទី២៦ ខែមិថុនា) ថា លោកប្រធានាធិបតី Julius Maada Bio កំពុងនាំមុខលើគូប្រជែង សម្រាប់ការរាប់សន្លឹកឆ្នោតពីការបោះឆ្នោតជ្រើសរើសប្រធានាធិបតីរបស់ប្រទេសអាហ្រ្វិកខាងលិចមួយនេះ។លោក Bio វ័យ ៥៩ឆ្នាំ កំពុងឈរឈ្មោះប្រជែងតំណែងអ្នកដឹកនាំកំពូលរបស់ប្រទេសជាលើកទីពីរ ប្រឆាំងនឹងគូបដិបក្ខចំនួន ១២រូប ដោយក្នុងនោះគូប្រជែងដ៏លេចធ្លោបំផុតរបស់លោក គឺបេក្ខជនក្នុងគណបក្សសភាប្រជាជនទាំងអស់ (APC) លោក Samura Kamara ដែលបានចាញ់លោក Bio ក្នុងការបោះឆ្នោតលើកចុងក្រោយ ក្នុងឆ្នាំ២០១៨។លទ្ធផលសន្លឹកឆ្នោតបណ្ដោះអាសន្ន បានបង្ហាញថា មកទល់ពេលនេះ លោក Bio បានទទួលសំឡេងឆ្នោតជាង ១លានសំឡេង ធៀបនឹងលោក Kamara ដែលមានសំឡេងតិចជាង ៨០០.០០០សំឡេង។ គណៈកម្មការ បាននិយាយនៅរសៀលថ្ងៃចន្ទថា លទ្ធផលដែលបានផ្ទៀងផ្ទាត់ចុងក្រោយ នឹងត្រូវប្រកាសក្នុងរយៈពេល ៤៨ម៉ោងបន្ទាប់។ការបោះឆ្នោតនេះ មានសភាពតានតឹងខ្លាំង ខណៈគណបក្សសភាប្រជាជនទាំងអស់ (APC) បាននិយាយថា តំណាងបោះឆ្នោតរបស់ពួកគេត្រូវបានវាយប្រហារ និងបំភិតបំភ័យ នៅក្នុងស្រុកចំនួន៣ នៅថ្ងៃបោះឆ្នោត។ ចំណែកខាងគណៈកម្មាធិការជាតិរៀបចំការបោះឆ្នោត កាលពីថ្ងៃអាទិត្យ បានគូសបញ្ជាក់ពីករណីជាច្រើន ដែលមន្ត្រីត្រូវបានគេវាយដំ ឬក៏ត្រូវបានបំភិតបំភ័យ។សម្រាប់ប្រជាជនសៀរ៉ាឡេអូន ពួកគេបារម្ភខា្លចថា អាចនឹងមានភាពចលាចលកើតឡើង នៅពេលដែលលទ្ធផលត្រូវបានប្រកាស ជាពិសេសប្រសិនបើគ្មានបេក្ខជនណាម្នាក់ ក្នុងចំណោមបេក្ខជនទាំង ១៣រូប ទទួលបានសំឡេង ៥៥ភាគរយនៃការបោះឆ្នោតនេះ ជាស្ថានភាពដែលនឹងបង្កមានការប្រជែងគ្នាបន្ថែមទៀត រវាងបេក្ខជនឈានមុខគេទាំងពីរ។ ជាមួយគ្នានេះ អ្នកសង្កេតការណ៍អន្តរជាតិ បានសម្តែងកង្វល់អំពីកង្វះតម្លាភាព ក្នុងការរាប់សន្លឹកឆ្នោត។តែយ៉ាងណាក្ដី លោកប្រធានាធិបតី Bio ថ្លែងទៅកាន់ប្រជាជាតិរបស់លោក បន្ទាប់ពីការផ្សព្វផ្សាយលទ្ធផលបណ្តោះអាសន្ននេះ កាលពីល្ងាចថ្ងៃចន្ទ ដោយអំពាវនាវឲ្យប្រជាពលរដ្ឋគ្រប់រូបរក្សាសន្តិភាព។ លោកបាននិយាយនៅក្នុងសុន្ទរកថាតាមទូរទស្សន៍ថា៖ «យើងម្នាក់ៗមានចំណែកក្នុងការរក្សាសន្តិភាព ទាំងក្នុងអំឡុងពេល និងទាំងបន្ទាប់ពីការប្រកាសលទ្ធផលនៃការបោះឆ្នោតទាំងនេះ»៕

យោធាហុងឌុយរ៉ាស ចូលគ្រប់គ្រងពន្ធនាគារបន្ទាប់ពីមនុស្សរាប់សិបនាក់ស្លាប់ដោយកុបកម្ម

2023/06/27 10:24:10 am        139
Facebook Telegram Linkin
ហុងឌុយរ៉ាស៖ ក្រុមមន្ត្រីបាននិយាយថា យោធាប្រទេសហុងឌុយរ៉ាស បានចាប់ផ្តើមគ្រប់គ្រងពន្ធនាគារដែលមានហិង្សារបស់ប្រទេសនេះ កាលពីថ្ងៃចន្ទ ទី២៦ ខែមិថុនា បន្ទាប់ពីជម្លោះក្រុមជនអន្ធពាលដែលបានបណ្តាលឱ្យអ្នកទោស៤៦ នាក់ស្លាប់នៅមជ្ឈមណ្ឌលឃុំឃាំងស្ត្រីកាលពីសប្តាហ៍មុន។ប្រធានាធិបតីឆ្វេងនិយមលោកស្រី Xiomara Castro បានប្រកាសកាលពីសប្តាហ៍មុនថា លោកស្រីនឹងប្រគល់ឱ្យនគរបាល គ្រប់គ្រងប្រព័ន្ធពន្ធនាគារ ដែលជាការចាកចេញពីជំហរអតីតកាលនៃសន្តិសុខគ្មានយោធា ខណៈរដ្ឋបាលរបស់លោកស្រីព្យាយាមបញ្ឈប់សកម្មភាពឧក្រិដ្ឋកម្មដែលរៀបចំទុកនៅក្នុងពន្ធនាគារ។វីដេអូផ្លូវការ បានបង្ហាញពីអ្នកទោសបុរសគ្មានអាវរាប់រយនាក់ ដែលភាគច្រើនមានចាក់សាក់ និងកោរសក់ ដែលត្រូវបានដាក់ឣោយនៅលើកម្រាលឥដ្ឋនៃពន្ធនាគារ Tamara មានសន្តិសុខខ្ពស់របស់ប្រទេសហុងឌុយរ៉ាស ដោយលើកដៃដាក់លើក្បាលរបស់ពួកគេ ហើយត្រូវបានការពារដោយទាហានប្រដាប់អាវុធយ៉ាងតឹងរ៉ឹង។ រូបភាពបង្ហាញពីភាពស្រដៀងគ្នាទៅនឹងរូបភាពដែលបានចែករំលែកកាលពីដើមឆ្នាំនេះដោយរដ្ឋាភិបាលប្រទេសអែលសាវ៉ាឌ័រស្តាំនិយមដែលនៅជិតខាង បានបង្កើនសន្តិសុខពន្ធនាគារ និងបានចាក់សោឧក្រិដ្ឋជនដែលត្រូវបានចោទប្រកាន់ជាង ៦២.០០០នាក់ ក្នុងអំឡុងពេលការបង្ក្រាបក្រុមជនអន្ធពាល។ពន្ធនាគារ Tamara ជាកន្លែងដែលអ្នកទោសប្រមាណ ៤.២០០នាក់ ត្រូវបានប្រមូលផ្តុំទៅក្នុងកន្លែងមួយដែលមានសមត្ថភាពផ្ទុកអ្នកទោសបានត្រឹមតែ ២.៥០០នាក់ ជាពន្ធនាគារមួយក្នុងចំណោមពន្ធនាគារចំនួន ២ រួមជាមួយពន្ធនាគារ La Tolva ដែលនគរបាលបានចូលគ្រប់គ្រងកាលពីថ្ងៃចន្ទ។ នៅប្រទេសហុងឌុយរ៉ាស អ្នកទោសប្រហែល ២០.០០០នាក់ រស់នៅជាមួយគ្នានៅក្នុងពន្ធនាគារចំនួន២៦កន្លែង ដែលមានមនុស្សច្រើន ដោយរបាយការណ៍របស់អង្គការសហប្រជាជាតិបាននិយាយថា ពន្ធនាគាររបស់ប្រទេសមាន ៣៤,២% លើសសមត្ថភាព។ នគរបាលកាលពីថ្ងៃចន្ទ បានរឹបអូសកាំភ្លើងខ្លី កាំភ្លើងយន្ត គ្រាប់រំសេវ បង់កាំភ្លើង និងគ្រាប់បែកដៃ ពីតំបន់មួយនៅពន្ធនាគារ Tamara ដែលគ្រប់គ្រងដោយក្រុមជនអន្ធពាល Barrio 18 ។

តើការក្រោកបះបោររបស់ក្រុមហ៊ុនទាហានស៊ីឈ្នួលរុស្ស៊ី វ៉េកណា អាចប៉ះពាល់អ្វីខ្លះដល់អាហ្វ្រិក?

2023/06/27 10:17:09 am        132
Facebook Telegram Linkin
រុស្ស៊ី៖ ខណៈក្រុមអ្នកប្រយុទ្ធមកពីក្រុមហ៊ុនទាហានស៊ីឈ្នួលរុស្ស៊ី វ៉េកណា បានចេញក្បួនដំណើរទៅកាន់ទីក្រុងមូស្គូ ហេតុការណ៍ភ្ញាក់ផ្អើលជាច្រើនត្រូវបានទម្លាយនៅក្នុងប្រទេសម៉ាលី និងសាធារណរដ្ឋអាហ្វ្រិកកណ្ដាល។ក្រុមហ៊ុនទាហានស៊ីឈ្នួលវ៉េកណា បានកំពុងដើរតួនាទីកាន់តែសំខាន់ ក្នុងសមរភូមិដែលនៅតែបន្តជាយូរមកហើយប្រឆាំងនឹងក្រុមបះបោរ នៅក្នុងប្រទេសទាំង២នេះ ។ យោងតាមឯកសារលិចធ្លាយរបស់សហរដ្ឋអាមេរិក ក្រុមទាហានស៊ីឈ្នួលវ៉េកណា បានធ្វើប្រតិបត្តិការនៅក្នុងប្រទេសយ៉ាងហោចណាស់៨នៅតំបន់អាហ្វ្រិក។ នៅសាធារណរដ្ឋអាហ្វ្រិកកណ្ដាល ក្រុមអ្នកប្រយុទ្ធរបស់ខ្លួន បានវាយបង្ក្រាបក្រុមឧទ្ទាមបះបោរមួយចំនួនចាប់តាំងពីឆ្នាំ២០១៨មក។ នៅក្នុងប្រទេសម៉ាលី អង្គការសហប្រជាជាតិនិងប្រទេសមហាអំណាចលោកខាងលិច និយាយថា ក្រុមហ៊ុនទាហានស៊ីឈ្នួលបានប្រព្រឹត្តឧក្រិដ្ឋកម្មសង្រ្គាម ជាមួយកងកម្លាំងម៉ាលី ដែលកំពុងប្រយុទ្ធប្រឆាំងក្រុមសកម្មប្រយុទ្ធជីហាដ។ តែប្រទេសម៉ាលី និងរុស្ស៊ី បានច្រានចោលរាល់ការចោទប្រកាន់ទាំងនោះ។ ក្រុមមេដឹកនាំយោធារបស់ប្រទេសម៉ាលី និយាយថា ពួកគេពុំបានទទួលយកកងកម្លាំងពីក្រុមហ៊ុនទាហានស៊ីឈ្នួលវ៉េកណាទេ តែក្រុមអ្នកបណ្ដុះបណ្ដាលកំពុងជួយដល់ទាហានក្នុងស្រុក ដោយនាំយកគ្រឿងយុទ្ធោបករណ៍ពីប្រទេសរុស្ស៊ី។ ដូច្នេះ តើការក្រោកបះបោររបស់ក្រុមហ៊ុនទាហានស៊ីឈ្នួលវ៉េកណាអាចប៉ះពាល់អ្វីខ្លះដល់តំបន់នេះ? កាលពីចុងសប្ដាហ៍មុន អ្នកនាំពាក្យសម្រាប់រដ្ឋាភិបាលក្នុងទីក្រុង បាម៉ាកូ (Bamako)  របស់ប្រទេសម៉ាលី និងទីក្រុង បាងគី (Bangui)របស់សាធារណរដ្ឋអាហ្វ្រិកកណ្ដាល បានច្រានចោលការអត្ថាធិប្បាយ ដែលថា តើភាពចលាចលនេះនឹងអាចប៉ះពាល់យ៉ាងណាខ្លះដល់យុទ្ធសាស្ត្រសន្តិសុខរបស់ពួកគេ។ ប៉ុន្តែជម្លោះផ្ទៃក្នុងភ្លាមៗបែបនេះ បានបង្កឲ្យមានបញ្ហាផ្នែកការទូត ។ ប្រទេសទាំង២ បាននិងកំពុងព្យាយាមស្វែងរកទំនាក់ទំនងកាន់តែជិតស្និទ្ធជាមួយរុស្ស៊ី៕

បណ្ដាញសង្គម

ព័ត៌មានថ្មីៗ

ឧបនាយករដ្ឋមន្រ្តី កើត រិទ្ធ៖យប់នេះក្រសួងយុត្តិធម៌មានភាពចាំបាច់ផ្អាកជាបណ្តោះអាសន្នមុខងាររបស់ព្រះរាជអាជ្ញារងឈ្មោះ គ្រី សីហា ដែលដោះលែងដោយរំលោភអំណាចនូវជនល្មើស
07/16/2025 10:07 PM
Facebook Telegram Linkin
សម្តេចរដ្ឋសភាធិបតី ឃួន សុដារី ៖ កិច្ចប្រជុំក្រុមអ្នកនយោបាយអន្តរសភាអាស៊ានលើកទី១៦បានផ្លាស់ប្តូរនូវទស្សនៈយ៉ាងសកម្មក្នុងការជំរុញការទូតសភា កិច្ចសហប្រតិបត្តិការ និងភាពជាដៃគូដើម្បីប្រជាពលរដ្ឋ
07/16/2025 10:07 PM
Facebook Telegram Linkin
កុមារជួបកង្វះអាហារូបត្ថម្ភទទួលការព្យាបាលនៅមន្ទីរពេទ្យ Nasser ស្ថិតក្នុងតំបន់ហ្កាហ្សា
07/16/2025 08:07 PM
Facebook Telegram Linkin
តើហេតុអ្វីបានជាអឺរ៉ុបប្រឈមនឹងរលកកម្តៅបំបែកកំណត់ត្រា?
07/16/2025 08:07 PM
Facebook Telegram Linkin
កងកម្លាំងសន្តិសុខស៊ីរី ត្រូវបានដាក់ពង្រាយទៅកាន់ទីក្រុង Sweida របស់ជនជាតិភាគតិច Druze
07/16/2025 08:07 PM
Facebook Telegram Linkin
សភាអ៊ុយក្រែនគាំទ្រការបង្កើនជិត ១០ពាន់លានដុល្លារដល់ការចំណាយលើវិស័យការពារជាតិ ខណៈសង្រ្គាមបន្តមាន
07/16/2025 08:07 PM
Facebook Telegram Linkin
អ៊ីតាលីអាចនឹងដោះលែងអ្នកទោស ១០.០០០នាក់ ដើម្បីសម្រាលភាពចង្អៀត ក្នុងពន្ធនាគារ
07/16/2025 08:07 PM
Facebook Telegram Linkin
អង់គ្លេសដកចេញការរឹតត្បិតលើក្រុមហ៊ុនអាកាសចរណ៍ប៉ាគីស្ថាន ក្រោយបំរាមរយៈពេល ៥ឆ្នាំ
07/16/2025 08:07 PM
Facebook Telegram Linkin
លោក Prabowo ថាលោក Trump ជាអ្នកចរចាតឹងតែង ខណៈកិច្ចប្រជុំពាណិជ្ជកម្មឥណ្ឌូនេស៊ី-អាមេរិកនៅបន្ត
07/16/2025 08:07 PM
Facebook Telegram Linkin
ការបំផ្ទុះសម្លាប់ទាហានកេនយ៉ា ៣នាក់ នៅតាមផ្លូវ ក្បែរព្រំដែនសូម៉ាលី
07/16/2025 08:07 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.