នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
សម្ដេចធិបតីអញ្ជើញចុះត្រួតពិនិត្យ និងសួរសុខទុក្ខពលរដ្ឋរងគ្រោះដោយទឹកជំនន់នៅបន្ទាយមានជ័យ
សម្តេចតេជោ ហ៊ុន សែន អនុញ្ញាតឱ្យ លោកជំទាវ រ៉េឡែន ស្យ៉ាល់ តាហ្គាឡ័រ លៀវហ្វាឡានី (Raylene Siale Tagaloa LIUFALANI) ឯកអគ្គរដ្ឋទូតតែងតាំងថ្មី នៃប្រទេសនូវែលសេឡង់ ប្រចាំនៅកម្ពុជាចូលជួប និងប្រគល់សារតាំង
សម្តេចតេជោ ហ៊ុន សែន អនុញ្ញាតឱ្យ ឯកឧត្តម ទ្រីសម៉ាន់ អ៉ីហ្គោរ៍ (Driesmans Igor) ឯកអគ្គរាជទូតសហភាពអឺរ៉ុបប្រចាំកម្ពុជា និងជាប្រេសិតពិសេស EU ប្រចាំនៅមីយ៉ាន់ម៉ា ចូលជួបសម្ដែងការគួរសម
សម្តេចតេជោ ហ៊ុន សែន អនុញ្ញាតឱ្យ ឯកឧត្តមឯកអគ្គរដ្ឋទូតសហភាពអឺរ៉ុប ប្រចាំកម្ពុជា ចូលជួបសម្តែងការគួរសម

នយោបាយ​ និង ការអភិវឌ្ឍន៍

ឯកឧត្តម ឱម យ៉ិនទៀង រំលឹកដល់សមាជិកាត្រូវប្រកាន់ខ្ជាប់នូវក្រមសីលធម៌ និងសុជីវធម៌ពេលកំពុងធ្វើយុទ្ធនាការឃោសនាបោះឆ្នោត

2023/07/03 05:49:28 pm        260
Facebook Telegram Linkin
ភ្នំពេញ៖ ឯកឧត្តម ឱម យ៉ិនទៀង អនុប្រធាន ក្រុមការងារចុះជួយរាជធានីភ្នំពេញ និងជាប្រធាន​ក្រុមការងារចុះមូលដ្ឋានខណ្ឌទួលគោក រាជធានីភ្នំពេញ នៅល្ងាចថ្ងៃទី២នៃយុទ្ធនាការ​ឃោសនា​រកសំឡេងឆ្នោតបានរំលឹកដល់សមាជិក-សមាជិកា​បក្សនៅខណ្ឌទួលគោកទាំងអស់​គប្បី​ប្រកាន់ខ្ជាប់នៅក្រមសីលធម៌ ​និងសុជីវធម៌ ពេលធ្វើយុទ្ធនាការបោះឆ្នោតដែលបានកំពុង​ប្រព្រឹត្តនាពេលនេះ។ជាមួយនឹងការរំលឹកដល់សមាជិក-សមាជិកាគណបក្សឲ្យប្រកាន់ខ្ជាប់ ចំពោះក្រមសីលធម៌ និង ស្របទៅតាមការណែនាំរបស់គណៈកម្មាធិការជាតិរៀបចំការបោះឆ្នោត (គជប)នោះ ឯកឧត្តម ឱម យ៉ិនទៀង ក៏បានរំលឹកបន្ថែមទៀតអំពីគោលនយោបាយគណបក្សប្រជាជនកម្ពុជា ដោយ​ឯកឧត្តម បានបញ្ជាក់ថា គណបក្សប្រជាជនកម្ពុជា ដែលមានសម្តេចតេជោ ហ៊ុន សែន នាយករដ្ឋ​មន្រ្តី​នៃកម្ពុជា និងជាប្រធានគណបក្ស គឺនៅជាមួយបងប្អូនប្រជាពលរដ្ឋគ្រប់ពេលវេលា និងគ្រប់​កាលៈទេសៈទាំងអស់ ហើយមានតែគណបក្សប្រជាជនកម្ពុជាមួយគត់ដែលមាន​គោលនយោបាយ​ច្បាស់លាស់ និងស័ក្តិសមបំផុតក្នុងការដឹកនាំនាវាកម្ពុជាឆ្ពោះទៅកាន់ការអភិវឌ្ឍរីកចម្រើន តាំងពីដើមរហូតមកដល់សព្វថ្ងៃនេះ។ឯកឧត្តមប្រធានក្រុមការងារក៏ បានអំពាវនាវដល់បងប្អូនប្រជាពលរដ្ឋក៏ដូចជាសមាជិក-សមាជិកា​គណបក្សទាំងអស់នៅក្នុងខណ្ឌទូលគោកនេះ សូមអញ្ជើញ​ទៅបោះឆ្នោតឲ្យបានគ្រប់ៗគ្នាផងដែរ​ដើម្បីឲ្យក្លាយទៅជាពលរដ្ឋល្អ ​ហើយគប្បីបោះឆ្នោតដើម្បីការពារសន្តិភាព ដោយធ្វើការគូសត្រូវ​គិតឲ្យត្រូវ គាំទ្រឲ្យត្រូវ ​ចំពោះលេខរៀងទី១៨ ខណៈគូសត្រូវលេខរៀងទី១៨ គឺដើម្បីបន្តអភិវឌ្ឍន៍​ប្រទេសជាតិលើគ្រប់វិស័យទាំងអស់ផងដែរ។សូមបញ្ជាក់ថា ក្រោយធ្វើយុទ្ធនាការឃោសនារកសំឡេងឆ្នោត ឯកឧត្តម ឱម យ៉ិនទៀង ក៏បានរៀបចំកម្មវិធីសប្បាយដល់សមាជិក-សមាជិកា​ទាំងអស់នៅខណ្ឌទួលគោកនេះផងដែរ ៕

អ៊ុយក្រែន រាយការណ៍ការវាយប្រហាររបស់រុស្ស៊ី នៅភាគខាងកើត ខណៈរុលទៅមុខក្នុងភាគខាងត្បូង

2023/07/03 05:46:43 pm        243
Facebook Telegram Linkin
អ៊ុយក្រែន៖ អនុរដ្ឋមន្ត្រីការពារជាតិអ៊ុយក្រែន បាននិយាយកាលពីថ្ងៃអាទិត្យថា កងកម្លាំងរបស់ខ្លួន កំពុងទប់ទល់នឹងការវាយលុករបស់រុស្ស៊ី នៅក្នុងតំបន់នានាភាគខាងកើតនៃសមរភូមិជួរមុខ និងប្រឈមស្ថានភាពលំបាក ជាច្រើននៅភាគខាងឦសាន ប៉ុន្តែកំពុងវាយរុលទៅមុខជិតទីក្រុង បាកមូត (Bakhmut)ដែលរងការបំផ្លិចបំផ្លាញ និងនៅក្នុងភាគខាងត្បូង ។កងកម្លាំងរុស្ស៊ីនៅសមរភូមិជួរមុខ បាននិយាយថា កងកម្លាំងរបស់ទីក្រុងមូស្គូ បានវាយបណ្ដេញការវាយប្រហាររបស់អ៊ុយក្រែន ជិតភូមិនានាជុំវិញទីក្រុងបាកមូត និងនៅក្នុងតំបន់មួយចំនួន នៅភាគខាងត្បូង ពិសេសទីក្រុងយុទ្ធសាស្ត្រតំបន់ភ្នំ វូលៀ (Vuhlear) ។ ពួកគេក៏បានរាយការណ៍ពីភាពជោគជ័យផងដែរចំពោះការទប់ទល់បានពីការវាយលុករបស់ទាហានអ៊ុយក្រែន នៅភាគឦសាន ។ សារព័ត៌មាន Reuters មិនអាចបញ្ជាក់បានទេពីសមរភូមិប្រយុទ្ធទាំងនេះទេ ។ ចំណែក លោកប្រធានាធិបតី អ៊ុយក្រែន Volodymyr Zelenskiy បានផ្ដល់រង្វាន់ដល់កងទ័ព នៅក្នុងកំពង់ផែ អូដេសា (Odesa) និងបានប្ដេជ្ញាថា សត្រូវ នឹងពុំមានផ្លូវបង្ហាញពីលក្ខខណ្ឌរបង្គាប់បញ្ជារបស់ខ្លួនក្នុងសមុទ្រខ្មៅទេ។  យោធារបស់អ៊ុយក្រែន បានប្រយុទ្ធតបតក្នុងការវាយបកដើម្បីដណ្ដើមតំបន់នានាមកវិញ នៅក្នុងភាគខាងកើត និងខាងត្បូង ដែលរុស្ស៊ី បានដណ្ដើមកាន់កាប់រយៈពេល១៦ខែមកនេះ ។ ការវាយរុលទៅមុខដំណាក់កាលដំបូងរបស់អ៊ុយក្រែនបានផ្ដោតលើការដណ្ដើមយកមកវិញនូវភូមិជាច្រើនក្នុងភាគខាងត្បូង។  អនុរដ្ឋមន្ត្រីការពារជាតិអ៊ុយក្រែន លោកស្រី ហានណា ម៉ាលីយ៉ា (Hanna Maliar) បាននិយាយថា គ្រប់ទីកន្លែងក្នុងភាគខាងកើតសុទ្ធតែជាចំណុចក្តៅដោយការប្រយុទ្ធគ្នាយ៉ាងខ្លាំង ខណៈកងកម្លាំងរុស្ស៊ី កំពុងវាយរុលទៅមុខជិតទីក្រុងមួយចំនួន ដែលមានស្ថានភាពយ៉ាប់យ៉ឺន ដូចជា ទីក្រុង អាវឌីវកា (Avdiivka) និង ទីក្រុង ម៉ារីយីនកា (Maryinka) ក្នុងតំបន់ដូណេត (Donetsk)៕

ប្រធានសភា Duma ៖ អ្នកប្រយុទ្ធក្រុមហ៊ុន Wagner ច្រើននាក់បានយល់ព្រមចុះហត្ថលេខាជាមួយក្រសួងការពារជាតិរុស្ស៊ី

2023/07/03 05:29:39 pm        241
Facebook Telegram Linkin
រុស្ស៊ី៖ ប្រធានសភាជាន់ទាបរបស់ប្រទេសរុស្ស៊ីបាននិយាយថា អ្នកប្រយុទ្ធច្រើននាក់នៃក្រុមទាហានស៊ីឈ្នួលក្រុមហ៊ុន Wagner បានយល់ព្រមចុះហត្ថលេខាលើកិច្ចសន្យាជាមួយក្រសួងការពារជាតិរបស់ប្រទេស។ ក្រសួង បានជំរុញឱ្យអ្នកប្រយុទ្ធចុះហត្ថលេខាលើកិច្ចសន្យាកាលពីថ្ងៃសៅរ៍។ ប្រធានសភា រដ្ឋ លោក Vyacheslav Volodin បានសរសេរនៅក្នុងការបង្ហោះតាមប្រព័ន្ធផ្សព្វផ្សាយសង្គមកាលពីថ្ងៃអាទិត្យថា តាមដែលលោកដឹង ពួកគេភាគច្រើនបានយល់ព្រមចុះហត្ថលេខា។ រឿងនេះកើតឡើង បន្ទាប់ពីប្រធានាធិបតីប្រទេសបេឡារុស លោក Alexander Lukashenko តាមដែលត្រូវបានគេរាយការណ៍ថា បានផ្តល់ដល់អ្នកប្រយុទ្ធក្រុមហ៊ុនទាហានស៊ីឈ្នួល Wagner ឱ្យប្រើប្រាស់ជំរំនៅក្នុងប្រទេសរបស់លោក។ ទន្ទឹមនឹងនេះ កងកម្លាំងប្រទេសអ៊ុយក្រែន និងរុស្ស៊ី ទំនងជាត្រូវបានជាប់នៅក្នុងការប្រយុទ្ធគ្នាខ្លាំងជាថ្មីម្តងទៀតលើការគ្រប់គ្រងទីក្រុង Bakhmut ក្នុងតំបន់ភាគខាងកើតតំបន់ Donetsk ។អនុរដ្ឋមន្ត្រីក្រសួងការពារជាតិអ៊ុយក្រែនលោកស្រី Hanna Maliar បាននិយាយនៅលើបណ្តាញផ្សព្វផ្សាយសង្គមកាលពីថ្ងៃអាទិត្យថា កងកម្លាំងអ៊ុយក្រែនបានទទួលជោគជ័យដោយផ្នែកក្នុងការរុលទៅមុខនៅតំបន់ភាគខាងត្បូងទីក្រុង Bakhmut ។ ប៉ុន្តែលោកស្រី បាននិយាយថា រុស្ស៊ីបានផ្ទេរកងទ័ពទៅកាន់ភាគខាងជើងទីក្រុង និងប្រយុទ្ធបន្តនៅទីនោះ។ កាលពីខែឧសភា ភាគីរុស្ស៊ីបានអះអាងថាខ្លួនបានគ្រប់គ្រងទីក្រុង Bakhmut បានពេញលេញ។ ការិយាល័យប្រធានាធិបតីអ៊ុយក្រែន បាននិយាយថា ប្រធានាធិបតី លោក Volodymyr Zelenskyy បានធ្វើទស្សនាតំបន់ភាគខាងត្បូងទីក្រុង Odesa កាលពីថ្ងៃអាទិត្យ ដើម្បីប្រារព្ធទិវាកងទ័ពជើងទឹករបស់ប្រទេស។ តាមសេចក្តីរាយការណ៍បានឲ្យដឹងថាថា លោកត្រូវបានរាយការណ៍សង្ខេបជូនដោយមេបញ្ជាការកងទ័ពជើងទឹកអំពីប្រតិបត្តិការនៅក្នុងសមុទ្រខ្មៅ និងអំពីសមត្ថភាពវាយប្រហារដោយមីស៊ីលរបស់យោធារុស្ស៊ីពីសមុទ្រ។ លោក Zelenskyy បាននិយាយនៅក្នុងសុន្ទរកថា ថា លោកមានទំនុកចិត្តថាអ៊ុយក្រែន នឹងដណ្តើមបានមកវិញនូវអ្វីៗគ្រប់យ៉ាង ដែលត្រូវបានគ្រប់គ្រងបណ្តោះអាសន្នដោយរុស្ស៊ី។

ពលរដ្ឋបាឡេស្ទីន ដុតកង់ឡាន បន្ទាប់ពីអ៊ីស្រាអែលវាយប្រហារទៅលើទីក្រុងចេនីនបណ្តាលឱ្យមនុស្សស្លាប់

2023/07/03 05:26:41 pm        212
Facebook Telegram Linkin
ប៉ាឡេស្ទីន៖ យោធាអ៊ីស្រាអែល បាននិយាយថា ខ្លួនបានវាយប្រហារទៅលើមណ្ឌលទីបញ្ជាការសម្រាប់យុទ្ធជនសកម្មប្រយុទ្ធនៅទីក្រុងចេនីននៃតំបន់វេសបែង (West Bank) ជាការវាយប្រហារមួយនៅព្រឹកថ្ងៃចន្ទនេះ ដែលអ្នកស្រុក បាននិយាយថា បណ្តាលឱ្យមនុស្សយ៉ាងតិចម្នាក់ បានស្លាប់ និងទាក់ទិននឹងមីស៊ីល១គ្រាប់ ដែលត្រូវបានបាញ់ចេញពីដែនអាកាស។  យោធាអ៊ីស្រាអែល បាននិយាយទៀតថា ខ្លួនបានវាយប្រហារទៅលើមជ្ឈមណ្ឌលប្រតិបត្តិការរួមមួយកន្លែងដែលបម្រើជាមណ្ឌលទីបញ្ជាការសម្រាប់យុទ្ធជនមកពីកងពលតូចនៅទីក្រុងចេនីន ជាកងប្រដាប់អាវុធមួយ ដែលមានអ្នកយុទ្ធមកពីក្រុមសកម្មប្រយុទ្ធផ្សេងទៀត។កាលពីខែមុន អ៊ីស្រាអែល បានសម្លាប់ខ្មាន់កាំភ្លើងសកម្មប្រយុទ្ធ៣នាក់ នៅជិតទីក្រុងចេនីន នៅក្នុងការវាយប្រហារដោយយន្តហោះដ្រូនទី១ នៅតំបន់វេសបែង តាំងពីឆ្នាំ២០០៦ ខណៈដែលអំពើហិង្សានៅទូទាំងតំបន់បានកើនឡើង។ អ៊ីស្រាអែល បានបដិសេធមិនបញ្ជាក់ថាតើការវាយប្រហារនៅថ្ងៃចន្ទនេះទាក់ទិននឹងដ្រូនដែរឬយ៉ាងណា? ក្រសួងសុខាភិបាលប៉ាឡេស្ទីន បានឱ្យដឹងថា មនុស្សម្នាក់ បានស្លាប់ និងម្នាក់ផ្សេងទៀត បានរងរបួស នៅក្នុងការវាយប្រហារនោះ។ អ្នកស្រុក បាននិយាយថា មីស៊ីល១គ្រាប់ដែលត្រូវបានគេបាញ់ចេញពីដែនអាកាសនោះ បានត្រូវចំលំនៅឋានមួយខ្នង ហើយផ្សែងបានហុយចេញពីបំណែកផ្ទះនោះ។ យោធា បាននិយាយថា គោលដៅនោះ ដើរតួជាមជ្ឈមណ្ឌលពិនិត្យ និងឈ្លបយកការណ៍ដ៏ទំនើបមួយ និងជាទីកន្លែងរក្សាទុកអាវុធ និងគ្រឿងផ្ទុះព្រមទាំងជាមជ្ឈមណ្ឌលសម្របសម្រួល និងទំនាក់ទំនងសម្រាប់យុទ្ធជនសកម្មប្រយុទ្ធ៕

រដ្ឋមន្ត្រីរតនាគារអាមេរិក លោកស្រី Yellen នឹងទៅទស្សនកិច្ចប្រទេសចិន នៅសប្តាហ៍នេះ ដើម្បីពង្រីកទំនាក់ទំនង

2023/07/03 05:12:36 pm        175
Facebook Telegram Linkin
ចិន៖ មន្ត្រីជាន់ខ្ពស់រតនាគារអាមេរិកមួយរូប បាននិយាយកាលពីថ្ងៃអាទិត្យ (ថ្ងៃទី២ ខែកក្កដា) ថា រដ្ឋមន្ត្រីក្រសួងរតនាគារអាមេរិក លោកស្រី Janet Yellen នឹងធ្វើដំណើរទៅកាន់ទីក្រុងប៉េកាំង ចាប់ពីថ្ងៃទី៦ ខែកក្កដា ដល់ថ្ងៃទី៩ ខែកក្កដា ដើម្បីជួបពិភាក្សាជាមួយមន្ត្រីជាន់ខ្ពស់របស់ប្រទេសចិនលើបញ្ហាជាច្រើន ក្នុងនោះរួមទាំងការបារម្ភរបស់សហរដ្ឋអាមេរិកអំពីច្បាប់ប្រឆាំងចារកម្មថ្មីរបស់ចិន។មន្ត្រីជាន់ខ្ពស់រូបនោះ បានប្រាប់អ្នកសារព័ត៌មានថា ការធ្វើដំណើរដែលត្រូវបានរំពឹងទុកជាយូរមកហើយរបស់លោកស្រី Yellen គឺជាផ្នែកមួយនៃការជំរុញរបស់លោកប្រធានាធិបតី Joe Biden ដែលចង់ធ្វើឲ្យការប្រាស្រ័យទាក់ទងកាន់តែមានភាពស៊ីជម្រៅ រវាងប្រទេសដែលមានសេដ្ឋកិច្ចធំបំផុតទាំង២ ធ្វើឲ្យទំនាក់ទំនងមានស្ថិរភាព និងកាត់បន្ថយហានិភ័យនៃកំហុសឆ្គងនានា នៅពេលមានការខ្វែងគំនិតគ្នាកើតឡើង។ការលើកឡើងនេះ កើតឡើងតែប៉ុន្មានសប្តាហ៍ប៉ុណ្ណោះ បន្ទាប់ពីរដ្ឋមន្ត្រីការបរទេសលោក Antony Blinken បានធ្វើទស្សនកិច្ចនៅទីក្រុងប៉េកាំង ហើយបានយល់ព្រមជាមួយប្រធានាធិបតីចិន លោក Xi Jinping ក្នុងការធ្វើឲ្យចំណងទាក់ទងមានស្ថិរភាព និងធានាថា ការប្រជែងគ្នាដ៏ខ្លាំងក្លារបស់ប្រទេសទាំង២ មិនប្រែក្លាយទៅជាជម្លោះនោះឡើយ។ស្របជាមួយនឹងការមានសញ្ញាល្អខ្លះៗពីទស្សនកិច្ចរបស់លោក Blinken នោះ ក៏មានលេចឡើងនូវប្រតិកម្មតវ៉ាយ៉ាងខ្លាំងក្លាដោយប្រទេសចិន បន្ទាប់ពីលោក Biden បានហៅលោក Xi ថាជា «ជនផ្តាច់ការ» ប៉ុន្តែយ៉ាងណាក្ដី អ្នកវិភាគលើកឡើងថា ពាក្យសម្ដីនេះជះផលប៉ះពាល់តិចតួចប៉ុណ្ណោះក្នុងកិច្ចប្រឹងប្រែង ដើម្បីធ្វើទំនាក់ទំនងរវាងប្រទេសមហាអំណាចទាំង២ កាន់តែប្រសើរឡើង។ពាក់ព័ន្ធនឹងទស្សនកិច្ចនេះ មន្ត្រីដែលនិយាយក្នុងលក្ខខណ្ឌមិនបញ្ចេញឈ្មោះនោះ បានបដិសេធមិនផ្តល់ព័ត៌មានលម្អិតពីមន្ត្រីចិន ដែលលោកស្រី Yellen នឹងជួបនៅទីក្រុងប៉េកាំងនោះ។ មន្ត្រីរដ្ឋបាលទី២ បានប្រាប់សារព័ត៌មាន Reuters ថា លោកស្រី Yellen ត្រូវបានគេរំពឹងថា នឹងជួបជាមួយឧបនាយករដ្ឋមន្ត្រីចិនលោក He Lifeng (ហ៊ើ លីហ្វឹង)៕

ក្រុមជម្លោះនៅប្រទេសសូដង់ ប៉ះទង្គិចគ្នាកាន់តែខ្លាំង ដោយគ្មានសញ្ញានៃការសម្របសម្រួលបញ្ចប់សង្គ្រាម

2023/07/03 04:45:56 pm        137
Facebook Telegram Linkin
ស៊ុដង់៖ ការប៉ះទង្គិចគ្នា រវាងកងទ័ព និងកងកម្លាំងគាំទ្ររហ័សប៉ារ៉ា ហៅកាត់ថា ( RSF) បានពុះកញ្ជ្រោលកាន់តែខ្លាំង កាលពីថ្ងៃអាទិត្យ ខណៈសង្រ្គាម នៅក្នុងរដ្ឋធានីរបស់ប្រទេសនេះ និងតំបន់ជាច្រើននៅភាគខាងលិចបានឈានចូលដល់សប្ដាហ៍ទី១២ ដោយពុំបានមើលឃើញសញ្ញានៃការប៉ុនប៉ងនាំយកសន្តិភាពបញ្ចប់ជម្លោះនោះទេ។ គេបានលឺសំឡេងនៃការវាយប្រហារតាមអាកាសនិងកាំភ្លើងធំ ព្រមទាំងអាវុធធុនតូចពិសេសនៅក្នុងទីក្រុង អូមឌូម៉ាន់ (Omdurman) ក៏ដូចជានៅក្នុងរដ្ឋធានីខាទូម(Khartoum)ខណៈជម្លោះនេះ បង្កឲ្យមានវិបត្តិមនុស្សធម៌ធ្ងន់ធ្ងរ និងគំរាមកំហែងដល់ផលប្រយោជន៍តំបន់ផ្សេងទៀត។ កងកម្លាំងគាំទ្ររហ័សប៉ារ៉ា បាននិយាយថា ខ្លួនបានបាញ់សម្លាក់យន្តហោះចម្បាំង និងយានដ្រូនមួយគ្រឿង នៅក្នុងទីប្រជុំជន បារី( Bahri)  នៅក្នុងសេចក្ដីថ្លែងការណ៍មួយ ដែលភាគីខាងយោធាពុំបានឆ្លើយតបភ្លាមៗនោះទេ។  ពលរដ្ឋវ័យ២៥ឆ្នាំម្នាក់ ដែលរស់នៅក្នុងភាគខាងជើងទីក្រុង អូមឌូម៉ាន់ (Omdurman)  បានប្រាប់សារព័ត៌មាន Reuters តាមទូរស័ព្ទថា យើងភ័យខ្លាចណាស់ ព្រោះការវាយប្រហារកើតឡើងជារៀងរាល់ថ្ងៃនិងកាន់តែធ្ងន់ធ្ងរទៅ ។RSF បាន គ្រប់គ្រងរដ្ឋធានីនេះ ហើយត្រូវបានចោទប្រកាន់ពីបទលួចយកទំនិញ និង ចូលកាន់កាប់ផ្ទះសម្បែងប្រជាពលរដ្ឋ ខណៈដែលកងទ័ពបានផ្ដោតលើការវាយប្រហារតាមអាកាស និងកាំភ្លើងធំ ៕

អ៊ីស្រាអែលនឹងទិញយន្តហោះចម្បាំងបំបាំងកាយ F-35 ២៥គ្រឿងទៀត ក្នុងតម្លៃ ៣ពាន់លានដុល្លារ

2023/07/03 04:39:13 pm        171
Facebook Telegram Linkin
អ៊ីស្រាអែល៖ ក្រសួងការពារជាតិអ៊ីស្រាអែល បានឲ្យដឹងកាលពីថ្ងៃអាទិត្យ (ទី២ ខែកក្កដា) ថា ប្រទេសអ៊ីស្រាអែល បានព្រមព្រៀងទិញយន្តហោះចម្បាំងបំបាំងកាយ F-35 ជាច្រើនគ្រឿងបន្ថែមទៀត នៅក្នុងកិច្ចព្រមព្រៀងដែលមានតម្លៃ ៣ពាន់លានដុល្លារ។ក្រសួងបានប្រាប់ថា យន្តហោះ ២៥គ្រឿងបន្ថែមដែលផលិតដោយក្រុមហ៊ុន Lockheed Martin នឹងនាំឲ្យចំនួនយន្តហោះ F-35 នៅក្នុងកងទ័ពអាកាសរបស់អ៊ីស្រាអែលកើនឡើងដល់៧៥គ្រឿង ដោយបន្ថែមថា កិច្ចព្រមព្រៀងនេះ នឹងត្រូវបានផ្តល់ហិរញ្ញប្បទានតាមរយៈកញ្ចប់ជំនួយការពារជាតិ ដែលអ៊ីស្រាអែលទទួលបានពីសហរដ្ឋអាមេរិក។អ៊ីស្រាអែល ជាប្រទេសដំបូងគេ នៅក្រៅសហរដ្ឋអាមេរិក ដែលបានទិញយន្តហោះ F-35 ហើយកាលពីខែឧសភា ឆ្នាំ២០១៨ មេទ័ពអាកាសរបស់ប្រទេសនេះ បាននិយាយថា អ៊ីស្រាអែលគឺជាប្រទេសដំបូងគេដែលប្រើយន្តហោះនេះ ក្នុងការប្រយុទ្ធ។យន្តហោះ F-35 ត្រូវបានគេស្គាល់ថា ជា Joint Strike Fighter (យន្តហោះចម្បាំងវាយប្រហាររួម) និងក្នុងភាសាអ៊ីស្រាអែលតាមភាសាហេប្រ៊ូរបស់ខ្លួនថា «Adir» (ដ៏មានអំណាច)។ ជាមួយគ្នានេះ ក្រសួងការពារជាតិអ៊ីស្រាអែល បានបន្ថែមថា ក្រុមហ៊ុន Lockheed Martin និងក្រុមហ៊ុនផលិតម៉ាស៊ីន Pratt & Whitney បានយល់ព្រមចូលរួមជាមួយក្រុមហ៊ុនការពារជាតិអ៊ីស្រាអែល ដើម្បីផលិតគ្រឿងបន្លាស់យន្តហោះ៕

ជីដូនរបស់យុវជនដែលត្រូវបាននគរបាលបាញ់សម្លាប់ អំពាវនាវឲ្យមានភាពស្ងៀមស្ងាត់ខណៈបារាំងត្រៀមទប់ទល់ការតវ៉ាដោយហិង្សានៅយប់ទី៦

2023/07/03 04:20:56 pm        132
Facebook Telegram Linkin
បារាំង៖ ជីដូន របស់យុវជនវ័យ១៧ ឆ្នាំម្នាក់ ដែលត្រូវបានបាញ់សម្លាប់ ដោយមន្ត្រីនគរបាលនៅជាយទីក្រុងប៉ារីស បានអំពាវនាវឲ្យបញ្ចប់អំពើហិង្សាដែល បានផ្ទុះឡើង ក្រោយការស្លាប់របស់យុវជននេះ ខណៈក្រុមអាជ្ញារបារាំង បានត្រៀមទប់ទល់អំពើកុបកម្មយប់ទី៦ ។ជីដូន របស់ជនរងគ្រោះ ណាហេល ម៊ើហ្សូក (Nahel Merzouk) បានអំពាវនាវដល់ក្រុមអ្នកគាំទ្រ កាលពីថ្ងៃអាទិត្យ ដោយបានប្រាប់សារព័ត៌មាន BFMTV ដែលមានសម្ព័ន្ធភាពជាមួយសារព័ត៌មាន CNN ថា ពួកគេមិនគួរបំផ្លិចបំផ្លាញសាលារៀនឡើយ ពួកគេមិនគួរវាយកម្ទេចរថយន្តក្រុងទេ វាជារថយន្តក្រុង ដែលម្ដាយគ្រប់រូបជិះ ។ ជីដូន ដែលសារព័ត៌មាន BMFTV បានហៅឈ្មោះ ថា ណាឌៀ (Nadia) បាននិយាយថា ខ្ញុំហត់នឿយណាស់ ដោយបន្ថែមថា ម្ដាយណាហេល ពុំមានជីវិតរស់នៅទៀតទេ។  យោងតាមក្រុមអ្នកផលិតកម្មវិធីរបស់សារព័ត៌មាន CNN នៅក្នុងប្រទេសបារាំង ស្ថានភាពទូទាំងប្រទេសបារាំងចាប់តាំងពីថ្ងៃអាទិត្យ មានភាពធូរស្រាលបន្តិចជាងកាលពីថ្ងៃសៅរ៍ ដោយ មានសេចក្ដីរាយការណ៍តែការតវ៉ាប៉ុណ្ណោះ ប៉ុន្តែអំពើហិង្សាបានកើតឡើង បន្ទាប់ពីព្រះអាទិត្យលិច ៕

នគរបាលបារាំងឃុំខ្លួនបាតុករជាង៣.០០០នាក់ ក្នុងការតវ៉ាក្រោយនគរបាលបាញ់សម្លាប់យុវជនម្នាក់

2023/07/03 04:16:48 pm        161
Facebook Telegram Linkin
បារាំង៖ មនុស្សជាង៣.០០០នាក់ ត្រូវបានចាប់ឃុំខ្លួន នៅប្រទេសបារាំង ក្នុងការតវ៉ាដោយហិង្សាដែលបានបង្កឡើងដោយការបាញ់សម្លាប់យុវជនម្នាក់ពីសំណាក់នគរបាល។  យុវជនវ័យ១៧ឆ្នាំ រូបនេះ ត្រូវបានបាញ់សម្លាប់អំឡុងការឈប់ត្រួតពិនិត្យចរាចរណ៍ ក្នុងទីប្រជុំជន    ណង់ទែរ (Nanterre) ជាយក្រុងប៉ារីស កាលពីថ្ងៃអង្គារសប្ដាហ៍មុន។  រដ្ឋាភិបាលបារាំង បានបញ្ជូនក្រុមមន្ត្រីនគរបាល និងកងកម្លាំងផ្សេងទៀត ចំនួន៤៥.០០០នាក់ ទៅកាន់ដងផ្លូវនានា ខណៈក្រុមបាតុករបានដុតរថយន្ត និងអគារជាច្រើន។  សារព័ត៌មានក្នុងស្រុក បាននិយាយថា យុវជនដែលត្រូវបានបាញ់សម្លាប់ គឺជាកូនកាត់មានដើមកំណើតអាហ្វ្រិកខាងជើង។ អ្នកនាំពាក្យសម្រាប់ឧត្ដមស្នងការឃ្លាំមើលសិទ្ធិមនុស្សរបស់អង្គការសហប្រជាជាតិ បាននិយាយកាលពីចុងសប្ដាហ៍ថា នេះគឺជាពេលវេលាដ៏លំបាកបំផុតសម្រាប់ប្រទេសបារាំងដោះស្រាយបញ្ហាដ៏ធ្ងន់ធ្ងរនៃការ ប្រកាន់ពូជសាសន៍ និងការរើសអើងនៅក្នុងការអនុវត្តន៍ច្បាប់។ រដ្ឋាភិបាលបារាំងបាននិយាយក្នុងការឆ្លើយតបចំពោះការចោទប្រកាន់ណាមួយ នៃការប្រកាន់ពូជសាសន៍និងការរើសអើងជាប្រព័ន្ធដោយនគរបាលក្នុងប្រទេសបារាំង ថាជារឿងគ្មានមូលដ្ឋានទាល់តែសោះ។ ភាពរំជើបរំជួលនេះ កំពុងបង្កជាឧបសគ្គសម្រាប់ផ្នែកការទូតរបស់បារាំង។ លោកប្រធានាធិបតី Emmanuel Macron បានផ្អាកដំណើរទស្សនកិច្ចទៅកាន់ប្រទេសអាល្លឺម៉ង់ ដែលបានគ្រោងពីថ្ងៃអាទិត្យដល់ថ្ងៃអង្គារ៕

គ.ជ.ប៖ យុទ្ធនាការឃោសនាបោះឆ្នោតឆ្នោតថ្ងៃទី២ប្រព្រឹត្តិទៅដោយរលូន

2023/07/03 01:34:16 am        251
Facebook Telegram Linkin
ភ្នំពេញ៖ គណៈកម្មាធិការជាតិរៀបចំការបោះឆ្នោត (គ.ជ.ប) នារសៀលនេះបានប្រកាសថា ថ្ងៃទី២ នៃយុទ្ធនាការឃោសនារកសំឡេងឆ្នោត ត្រូវនៅថ្ងៃទី០២ ខែកក្កដា ឆ្នាំ២០២៣នេះ បានប្រព្រឹត្តិទៅដោយរលូន មានសុវត្ថិភាព សណ្តាប់ធ្លាប់ល្អ និងគ្មានអំពើហិង្សា។យោងតាមសេចក្ដីប្រកាសព័ត៌មានរបស់ គ.ជ.ប បញ្ជាក់ថា នៅថ្ងៃទីពីរនៃយុទ្ធនាការឃោសនាបោះឆ្នោតជ្រើសតាំងតំណាងរាស្ត្រ នីតិកាលទី៧ ឆ្នាំ២០២៣ ត្រូវនឹងថ្ងៃទី២ ខែកក្កដា ឆ្នាំ២០២៣ បណ្តាគណបក្សនយោបាយដែលឈរឈ្មោះបោះឆ្នោត បានធ្វើ ការឃោសនាបោះឆ្នោតតាមកំណត់ និងតាមរូបភាពផ្សេងៗគ្នា ដែលរួមមានជាអាទិ៍ ការជួបប្រជុំ ការហែក្បួនឃោសនា ការប្រគុំតន្រ្តី ការចាក់មេក្រផ្សព្វផ្សាយនៅទីស្នាក់ការគណបក្ស និងចល័ត តាមភូមិ និងការចែកខិត្តបណ្ណ។ផ្អែកតាមរបាយការណ៍របស់គណៈកម្មការរាជធានី ខេត្តរៀបចំការបោះឆ្នោត (គធ.ខប) បាន កត់​សម្គាល់ឃើញថា នៅថ្ងៃទីពីរនេះ មានចំនួនគណបក្សនយោបាយធ្វើសកម្មភាពហែ​ក្បួនឃោសនា ច្រើនជាងថ្ងៃទីមួយ ដោយការហែក្បួនឃោសនាបានប្រព្រឹត្តទៅ​នៅតាមមណ្ឌល​បោះឆ្នោតមួយចំនួន។គ.ជ.ប បញ្ជាក់ថា ជាក់ស្ដែង គណបក្សហ៊្វុនស៊ិនប៉ិច គណបក្សខ្មែរអភិរក្ស គណបក្សឯកភាពជាតិខ្មែរ គណបក្ស កម្លាំងប្រជាធិបតេយ្យ និងគណបក្សយុវជនកម្ពុជា បានហែក្បួនឃោសនានៅមណ្ឌលរាជធានីភ្នំពេញ។រីឯគណបក្សប្រជាជនកម្ពុជា បានហែក្បួនឃោសនានៅមណ្ឌលខេត្តបន្ទាយមានជ័យ ខេត្តឧត្តរមានជ័យ ខេត្តត្បូងឃ្មុំ និងមណ្ឌលខេត្តក្រចេះ។ ចំណែកគណបក្សខ្មែររួបរួមជាតិ បានហែក្បួនឃោសនានៅ មណ្ឌលខេត្តបន្ទាយមានជ័យ ខេត្តតាកែវ និងមណ្ឌលខេត្តកំពត។ ដោយឡែកគណបក្សសំបុកឃ្មុំ- សង្គមប្រជាធិបតេយ្យ បានហែក្បួនឃោសនា​នៅមណ្ឌលខេត្តបាត់ដំបង។គ.ជ.បបញ្ជាក់ជារួម ស្ថានភាពទូទៅនៃដំណើរការឃោសនាបោះឆ្នោតរបស់​គណបក្ស​នយោបាយក្នុង ថ្ងៃទីពីរនេះ បានប្រព្រឹត្តទៅដោយរលូន មានសន្តិសុខ សុវត្ថិភាព សណ្ដាប់ធ្នាប់ល្អ ហិង្សា។សូមជម្រាបជូនថា ការឃោសនាបោះឆ្នោតជ្រើសតាំងតំណាងរាស្ត្រ នីតិការង២៣ មានរយៈពេល ២១ ថ្ងៃ ចាប់ពីថ្ងៃទី១ ដល់ថ្ងៃទី២១ ខែកក្កដា ឆ្នាំ២០២៣៕

បណ្ដាញសង្គម

ព័ត៌មានថ្មីៗ

ក្រសួងបរិស្ថាន និងក្រសួងមហាផ្ទៃ ជំរុញភាពស្អាតនៅតាមពន្ធនាគារនៅទូទាំងប្រទេស
09/30/2026 08:09 PM
Facebook Telegram Linkin
នាយករដ្ឋមន្រ្តីកាតាថ្កោលទោសអំពើឃោឃៅរបស់អ៊ីស្រាអែលនៅតំបន់ហ្កាហ្សា
09/30/2026 07:09 PM
Facebook Telegram Linkin
គ្រូពេទ្យ៖ ការវាយប្រហាររបស់អ៊ីស្រាអែល នៅតំបន់ហ្កាហ្សា សម្លាប់មនុស្សយ៉ាង​តិច​ ៥នាក់
09/30/2026 07:09 PM
Facebook Telegram Linkin
​តំណាងអចិន្ត្រៃយ៍កម្ពុជា ប្រចាំ UN ស្នើអ្នករាយការណ៍ពិសេសស្តីពីស្ថានភាពសិទ្ធិមនុស្សបន្តយកចិត្តទុកដាក់ចំពោះប្រជាជនភៀសសឹកកម្ពុជា និងការវិលត្រឡប់ទៅកាន់លំនៅឋានវិញដោយសុវត្ថិភាព និងសេចក្តីថ្លៃថ្នូរ
09/30/2026 07:09 PM
Facebook Telegram Linkin
ជើងហោះហើរទៅកាន់អ៊ីស្រាអែល បង្វែរទិសដៅហោះហើរទៅកាន់អារ៉ាប៊ីសាអ៊ូឌីត ក្រោយការប្រកាសអាសន្ន
09/30/2026 06:09 PM
Facebook Telegram Linkin
នាយករដ្ឋមន្ត្រីអ៊ីរ៉ាក់សាទរ​យុគសម័យ «អធិបតេយ្យភាព​» ថ្មី​ ក្រោយកម្លាំង​ចម្រុះ​ដឹកនាំដោយអាមេរិក​​ចាក​ចេញ​
09/30/2026 06:09 PM
Facebook Telegram Linkin
KCNA៖ កូរ៉េខាងជើង និងវៀតណាមកំពុងស្វែងរកការពង្រីកកិច្ចសហប្រតិបត្តិការយោធា
09/30/2026 06:09 PM
Facebook Telegram Linkin
ប្រធានាធិបតីអ៊ីរ៉ង់បង្ហាញឆន្ទៈពង្រឹងទំនាក់ទំនងជាមួយអ៊ូសបេគីស្ថាន និងអាស៊ែរបៃហ្សង់
09/30/2026 06:09 PM
Facebook Telegram Linkin
រុស្ស៊ីចេញការព្រមាននុយក្លេអ៊ែរទៅកាន់អង្គការណាតូ ខណៈភាពតានតឹងកើនឡើង នៅតំបន់បាល់ទិក
09/30/2026 05:09 PM
Facebook Telegram Linkin
ការបោកបក់ដល់ដីគោកជាលើកទី ២របស់ព្យុះសង្ឃរា Polo បង្កការជន់លិចនៅតំបន់ភាគខាងជើងម៉ិកស៊ិក
09/30/2026 05:09 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.