នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
ឯកឧត្តម ស៊ុន ចាន់ថុល៖ ព្រែកជីកហ្វូណនតេជោ គ្រោងបញ្ចប់ការផ្ទៀងផ្ទាត់និយាមកា និងបោះបង្គោលព្រំដីក្នុងពេលដ៏ខ្លីខាងមុខ
សម្តេចតេជោ៖ ថ្ងៃទី១១កក្កដានេះ រដ្ឋសភានឹងកោះប្រជុំ ដើម្បី​ធ្វើ​វិសោធន​កម្ម​ច្បាប់​រដ្ឋ​ធម្មនុញ្ញ​ដក​សញ្ជាតិ ជនជាតិខ្មែរណាដែលឃុបឃិតជាមួយបរទេសបំផ្លាញជាតិសាសន៍ឯង
ប្រសាសន៍សំខាន់ៗសម្ដេចតេជោ ហ៊ុន សែន ក្នុងពិធីសំណេះសំណាលជាមួយសិស្ស និស្សិត លោកគ្រូ អ្នកគ្រូ នៅមជ្ឈមណ្ឌលអប់រំ និង​បណ្តុះ​បណ្តាល ជាស៊ីមកំចាយមារ
សម្ដេចតេជោជំរុញឱ្យសិង្ហបុរីមានជើងហោះហើរកាន់តែច្រើនមកកាន់កម្ពុជាបន្ទាប់ពីដាក់ឱ្យដំណើរ​ការព្រលានយន្តហោះអន្តរជាតិតេជោ

នយោបាយ​ និង ការអភិវឌ្ឍន៍

ម្ចាស់ជំនួយអន្តរជាតិ សន្យាជំនួយ១,៥ ពាន់លានដុល្លារ សម្រាប់ប្រទេសស៊ូដង់

2023/06/20 10:28:21 am        104
Facebook Telegram Linkin
ស៊ូដង់៖ ម្ចាស់ជំនួយអន្តរជាតិកាលពីថ្ងៃច័ន្ទ បានសន្យាផ្តល់ជំនួយមនុស្សធម៌ជិត ១,៥ពាន់លានដុល្លារដល់ប្រទេសស៊ូដង់ និងតំបន់ដ៏ធំទូលំទូលាយ ដោយឆ្លើយតបទៅនឹងការអំពាវនាវរបស់អង្គការសហប្រជាជាតិដើម្បីជំរុញជំនួយក្នុងពេលមានជម្លោះដែលបានបង្ខំមនុស្សប្រមាណ ២,២ លាននាក់ចាកចេញពីលំនៅឋានរបស់ពួកគេ។អង្គការសហប្រជាជាតិបាននិយាយថា ជំនួយចំនួន៣ ពាន់លានដុល្លារត្រូវការនៅឆ្នាំនេះសម្រាប់ការផ្តល់ជំនួយបន្ទាន់ផ្នែកមនុស្សធម៌នៅក្នុងប្រទេសស៊ូដង់ និងសម្រាប់ជនភៀសខ្លួនដែលភៀសខ្លួនចេញពីប្រទេស ដែលមានតែភាគតិចប៉ុណ្ណោះដែលត្រូវបានផ្តល់មូលនិធិ។ប្រទេសអាល្លឺម៉ង់ បានប្រកាសកាលពីថ្ងៃចន្ទថាខ្លួនកំពុងសន្យាផ្តល់ជំនួយ ២០០ លានអឺរ៉ូ ដល់ប្រទេសស៊ូដង់និងតំបន់រហូតដល់ឆ្នាំ ២០២៤ ហើយសហរដ្ឋអាមេរិកបានសន្យាផ្តល់ចំនួន ១៧១លានដុល្លារ ខណៈប្រទេសកាតាបានសន្យាផ្តល់ចំនួន ៥០ លានដុល្លារ។ អង្គការសហប្រជាជាតិបាននិយាយថា ស្ថាប័ននេះកំពុងបែងចែកជំនួយបន្ថែមចំនួន ២២ លានដុល្លារ ដើម្បីដោះស្រាយតម្រូវការជាអាទិភាព។សង្គ្រាមរវាងកងទ័ពស៊ូដង់ និងកងកម្លាំងគាំទ្ររហ័សយោធាប៉ារ៉ា(RSF) បានចាប់ផ្តើមកាលពីពាក់កណ្តាលខែមេសា ក្នុងពេលមានភាពតានតឹងជុំវិញផែនការដែលគាំទ្រដោយអន្តរជាតិសម្រាប់អន្តកាលឈានឆ្ពោះទៅរកការបោះឆ្នោតក្រោមរដ្ឋាភិបាលស៊ីវិល។ វាបានធ្វើឱ្យមនុស្សជាង ៣.០០០នាក់ស្លាប់ និងបានប្រែក្លាយរដ្ឋធានី Khartoum ទៅជាតំបន់សង្រ្គាម និងបានបង្កឱ្យមានអំពើហិង្សាដ៏ឃោរឃៅនៅក្នុងតំបន់ទីក្រុង Darfur ភាគខាងលិចដែលមានជម្លោះ ព្រមទាំងផ្នែកផ្សេងទៀតរបស់ប្រទេសនេះ។អង្គការសហប្រជាជាតិបានអំពាវនាវដាច់ដោយឡែកសម្រាប់ជំនួយជិត ៥០០លានដុល្លារសម្រាប់ជនភៀសខ្លួនដែលភៀសខ្លួនពីប្រទេសស៊ូដង់ ដែលប្រធានទីភ្នាក់ងារជនភៀសខ្លួនរបស់អង្គការសហប្រជាជាតិ លោក Filippo Grandi បាននិយាយថា បានទទួលមូលនិធិចំនួន ១៥% ជាស្ថានភាពមួយដែលលោកហៅថា «មានការព្រួយបារម្ភយ៉ាងខ្លាំង» ។ អគ្គលេខាធិការលោក Antonio Guterres បានប្រកាសអាសន្នលើជម្លោះនេះដោយនិយាយថា «ខ្ញុំមានការព្រួយបារម្ភជាពិសេសចំពោះរបាយការណ៍អំពីអំពើហិង្សាផ្លូវភេទ និងផ្អែកលើភេទ និងដោយទំហំនៃអំពើហិង្សាជនជាតិភាគតិចនៅក្នុងទីក្រុង Geneina៕

ច្បាប់វិធានការដើមកំណើតទំនិញ នឹងជួយលើកកម្ពស់ការនាំចេញទំនិញកម្ពុជា និងទប់ស្កាត់ការក្លែងបន្លំ

2023/06/20 10:27:30 am        149
Facebook Telegram Linkin
ភ្នំពេញ៖ សេចក្តីព្រាងច្បាប់ស្តីពី វិធានការដើមកំណើតទំនិញ នឹងជួយលើកកម្ពស់ការនាំចេញទំនិញរបស់កម្ពុជា ក៏ដូចជាការជួយទប់ស្កាត់ការក្លែងបន្លំដើមកំណើតទំនិញ ដែលច្បាប់នេះ គឺធ្វើឡើង ស្របតាមគោលការណ៍អាស៊ាន និងអង្គការពាណិជ្ជកម្មពិភពលោកផងដែរ ។ បន្ទាប់ពីកិច្ចប្រជុំគណៈកម្មាធិការអចិន្រ្តៃយ៍ព្រឹទ្ធសភា ក្រោមអធិបតីភាព របស់សម្តេចវិបុលសេនាភក្តី សាយ ឈុំ ប្រធានព្រឹទ្ធសភា នៅថ្ងៃទី២០ ខែមិថុនា ឯកឧត្តម ម៉ម ប៊ុននាង អ្នកនាំពាក្យព្រឹទ្ធសភា មានប្រសាសន៍ថា សេចក្តីព្រាងច្បាប់ស្តីពី វិធានដើមកំណើតទំនិញ រៀបចំឡើង ក្នុងគោលបំណងកំណត់អំពីគោលការណ៍ និងវិធានដើមកំណើតទំនិញនាំចេញ និងនាំចូល ដើម្បីជំរុញ និងសម្រួលពាណិជ្ជកម្មក្រោមប្រព័ន្ធអនុគ្រោះពាណិជ្ជកម្ម និងក្រៅប្រព័ន្ធអនុគ្រោះពាណិជ្ជកម្ម ។ឯកឧត្តមបានបន្តថា សេចក្តីព្រាងច្បាប់នេះ នឹងធានានូវដើមកំណើតទំនិញ របស់កម្ពុជា ក្នុងការ​លើកកម្ពស់ និងជំរុញការនាំចេញផលិតផលរបស់កម្ពុជា​ ព្រមទាំងចូលរួមទប់ស្កាត់ ការក្លែងបន្លំ​ដើមកំណើតទំនិញផងដែរ ។ឯកឧត្តមអ្នកនាំពាក្យ បន្ថែមថា សេចក្តីព្រាងច្បាប់ស្តីពី វិធានការដើមកំណើតទំនិញ គឺជាការ​អនុវត្តបន្ថែម នូវលិខិតបទដ្ឋានគតិយុត្តក្នុងវិស័យសេដ្ឋកិច្ច ​និងពាណិជ្ជកម្ម ដែលត្រូវរៀបចំឡើង​ស្រប​តាមគោលការណ៍អាស៊ាន ​និងអង្គការពាណិជ្ជកម្មពិភពលោកផងដែរ និងជាផ្នែកមួយដ៏មាន​សារសំខាន់ នៃប្រព័ន្ធច្បាប់នៅលើពិភពលោក ដោយដើរទន្ទឹមគ្នាជាមួយកិច្ចព្រមព្រៀង​ពាណិជ្ជកម្ម​សេរីទ្វេភាគី តំបន់ និងពហុភាគី ដូចជាកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយតំបន់ កិច្ចព្រមព្រៀងពាណិជ្ជកម្មសេរីគ្រប់ជ្រុងជ្រោយកម្ពុជា-ចិន និងកម្ពុជា-កូរ៉េ ជាដើម ។ឯកឧត្តម ម៉ម ប៊ុននាង ​បានបញ្ជាក់ថា បន្ទាប់ពីពិនិត្យ និងពិភាក្សារួចមក គណៈកម្មាធិការអចិន្ត្រៃយ៍​ព្រឹទ្ធសភាជាតិ នឹងលើកយកសេចក្តីព្រាងច្បាប់ស្តីពីវិធានការដើមកំណើតទំនិញ នឹងលើកយក​ទៅពិនិត្យ ហើយឲ្យយោបល់ ក្នុងសម័យប្រជុំលើកទី១០ ព្រឹទ្ធសភានីតិកាលទី៤ ​នៅថ្ងៃទី២១ ខែមិថុនា​ ឆ្នាំ២០២៣ស្អែកនេះ ជាមួយនឹងរបៀបវារៈមួយទៀត គឺពិនិត្យហើយឱ្យយោបល់លើ​សេចក្តីព្រាង​ច្បាប់ស្តីពី អត្រានុកូលដ្ឋាន ស្ថិតិអត្រានុកូល-ដ្ឋាន និងអត្តញ្ញាណកម្ម ៕ អត្ថបទ បាន សុខរិទ្ធិ

អ៊ុយក្រែនត្រៀមការវាយសម្រុកធំបំផុត ខណៈអះអាងពីការដណ្ដើមបានភូមិចំនួន៨មកវិញពីរុស្ស៊ី

2023/06/20 10:21:46 am        158
Facebook Telegram Linkin
អ៊ុយក្រែន៖ អ៊ុយក្រែន បាននិយាយកាលពីថ្ងៃចន្ទទី១៩មិថុនា ខ្លួនបានបណ្ដេញកងកម្លាំងរុស្ស៊ី ចេញពីភូមិទី៨ ក្នុងការវាយបកមានរយៈពេល២សប្ដាហ៍ ហើយមន្ត្រីការពារជាតិមួយរូប បានប្ដេជ្ញាវាយសម្រុករុលទៅមុខទ្រង់ទ្រាយធំបំផុត របស់ទីក្រុង Kyiv ទោះបីជាមានការវាយតបដ៏ខ្លាំងក្លាពីទាហានរបស់ទីក្រុង Moscow ក៏ដោយ។  អនុរដ្ឋមន្ត្រីការពារជាតិអ៊ុយក្រែន លោកស្រី ហាណា ម៉ាលីយ៉ា (Hanna Maliar) បាននិយាយថា កងកម្លាំងអ៊ុយក្រែន បានដណ្ដើមយកបានមកវិញនូវភូមិ ភាទីខាគី (Piatykhatky) នៅតំបន់មួយដែលមានការវាយប្រយុទ្ធគ្នាខ្លាំងនៃសមរភូមិមុខ ជិតផ្លូវដែលនៅកៀកបំផុតទៅកាន់ឆ្នេរសមុទ្រអាសូវ(Azov)របស់ប្រទេសនេះ។  នេះគឺជាផ្នែកមួយនៃការវាយរុលទៅមុខដោយទីក្រុង Kyiv ចម្ងាយ៧គីឡូម៉ែត្រ ចូលទៅក្នុងសមរភូមិដែលរុស្ស៊ីគ្រប់គ្រងក្នុងរយៈពេល២សប្ដាហ៍ ដោយដណ្ដើមបានមកវិញនូវផ្ទៃដីទំហំ១៣៣គីឡូម៉ែត្រក្រឡា។  លោកស្រី Maliar បាននិយាយនៅលើបណ្ដាញតេឡេក្រាមថា សត្រូវ នឹងមិនបោះបង់ចោលមូលដ្ឋានរបស់ពួកគេដោយងាយៗនោះទេ យើងត្រូវតែត្រៀមខ្លួនសម្រាប់សមរភូមិដ៏លំបាកមួយ។ យោធាកំពុងរុលទៅមុខ ព្រោះពួកគេគួរតែសម្រុករុលទៅមុខ ។ ហើយការវាយសម្រុកទៅមុខដ៏ធំបំផុត មិនទាន់បានធ្វើនៅឡើយទេ។  លោកស្រី បានបញ្ជក់ថា ការវាយប្រយុទ្ធគ្នាដ៏ខ្លាំងក្លា មាននៅក្នុងភាគខាងកើត និងខាងត្បូងក្នុងប្រទេសអ៊ុយក្រែន ដោយឡែក លោកស្រី បាននិយាយថា យោធាអ៊ុយក្រែនកំពុងទប់ស្កាត់ការវាយរុលទៅមុខរបស់កងទ័ពរុស្ស៊ី នៅក្នុងភាគខាងកើត ជាទីដែលបានផ្ដោតលើអង្គភាពរបស់ខ្លួន រួមទាំងទាហានវាយប្រហារតាមអាកាសផងដែរ៕

ប្រសាសន៍សំខាន់ៗរបស់សម្ដេចតេជោ ក្នុងឱកាសអញ្ជើញអបអរសាទរខួបលើកទី៤៦ ទិវានៃការចងចាំដំណើរឆ្ពោះទៅរកការផ្តួលរំលំរបបប្រល័យពូជសាសន៍ ប៉ុល ពត

2023/06/20 10:05:37 am        189
Facebook Telegram Linkin
ភ្នំពេញ៖ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានអញ្ជើញអបអរសាទរប្រារព្ធខួប៤៦ឆ្នាំ នៃទិវានៃការចងចាំដំណើរឆ្ពោះទៅរកការផ្តួលរំលំ របបប្រល័យពូជសាសន៍ ប៉ុល ពត (២០ មិថុនា ១៩៧៧-២០ មិថុនា ២០២៣) នៅក្រសួងការពារជាតិ នាព្រឹកថ្ងៃទី២០ ខែមិថុនា ឆ្នាំ២០២៣នេះ។ប្រសាសន៍សំខាន់ៗរបស់សម្ដេចតេជោ ហ៊ុន សែន ដែលមានខ្លឹមសារដូចខាងក្រោម៖សម្តេចតេជោ ហ៊ុន សែន បានលើកទឹកចិត្តឲ្យអាជ្ញាធរគ្រប់រាជធានី-ខេត្តទាំងអស់ សាងសង់វិមានអនុស្សាវរីយ៍ឈ្នះឈ្នះ ដើម្បីជាការរំលឹកអតីតកាល និងជាកន្លែងកម្សាន្តរបស់ប្រជាពលរដ្ឋផងដែរ។សម្តេចតេជោ ហ៊ុន សែន បានចោទសំនួរថា កាលពី៤៦ឆ្នាំមុន(ថ្ងៃទី២០ ខែមិថុនា ឆ្នាំ១៩៧៧) បើសមមិត្តហ៊ុន សែន មិនសម្រេចចិត្តយកជីវិតធ្វើជាដើមទុន ដើម្បីធ្វើដំណើរឆ្ពោះទៅកាន់ការផ្តួលរំលំរបបប្រល័យពូជសាសន៍ ប៉ុល ពត ទេ តើអាចនឹងមានអ្វីកើតឡើងសម្រាប់ប្រទេសកម្ពុជាបន្តទៀត? ខណៈដែលជីវិតប្រជាពលរដ្ឋខ្មែរទាំងអស់ ស្ថិតនៅក្រោមកណ្តាប់ដៃរបស់ពួកខ្មែរក្រហម។សម្ដេចតេជោ ហ៊ុន សែន បង្ហាញសៀវភៅប្រវត្តិសាស្រ្ដកម្ពុជា ដែលជាសម្រង់ប្រសាសន៍របស់សម្ដេចជាង ៤០ ម៉ោង។ ប៉ុន្ដែសៀវភៅនេះ ត្រូវមានការត្រួតពិនិត្យ និងកែតម្រូវពីសម្ដេចបន្ថែមទៀតទើបឈានទៅដល់ការបោះពុម្ព។សម្ដេចតេជោ ហ៊ុន សែន បានណែនាំឲ្យមានការសិក្សាជាមួយអ្នកច្បាប់ ចំពោះការរៀបចំបង្កើតច្បាប់ស្ដីពីប្រវត្តិសាស្រ្ដយោធា បន្ទាប់ពីមានការស្នើសុំគោលការណ៍ ពីសម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ។សម្តេចតេជោ ហ៊ុន សែន បានថ្លែងថា ការចាកចេញរបស់សម្តេចទៅកាន់ការផ្តួលរំលំរបបប្រល័យពូជសាសន៍ប៉ុល ពត កាលពី៤៦ឆ្នាំមុន ជាមួយនឹងទឹកភ្នែករាប់ម៉ឺនតំណក់ និងការឈឺចាប់ជាច្រើនទៀត ដោយបែកបាក់ប្រពន្ធ និងកូន ប៉ុន្តែទោះជាយ៉ាងណាទេវតាតាមថែរក្សាសម្តេចជានិច្ចផងដែរ។សម្ដេចតេជោ ហ៊ុន សែន បញ្ជាក់ថា សៀវភៅប្រវត្តិសាស្រ្ដកម្ពុជា ដែលជាសម្រង់ប្រសាសន៍របស់សម្ដេចជាង៤០ម៉ោងនោះ រយៈពេលប្រមាណ១០ឆ្នាំទៀត ទើបសម្ដេចអនុញ្ញាតឱ្យបោះពុម្ពផ្សាយជាផ្លូវការ។សម្តេចតេជោ បានបញ្ជាក់ថា «ខ្ញុំទទួលស្គាល់ថា ខ្លួនឯងជាមនុស្សឆេវឆាវ...[]តែការសម្រេចចិត្តខាងផ្នែកនយោបាយ ខ្ញុំជាមនុស្សចិត្តធ្ងន់បំផុតហើយ..»។សម្ដេចតេជោ ហ៊ុន សែន រម្លឹកការឈឺចាប់អំឡុងពេលសម្ដេច និងយុទ្ធមិត្តបានទៅដល់ប្រទេសវៀតណាម ២០ មិថុនា ១៩៧៧ ដែលពេលនោះ វៀតណាមបានទទួលបាយធ្វើឱ្យសម្ដេចពិសាបាយទាំងស្រក់ទឹកភ្នែកព្រោះនឹករលឹកដល់ប្រពន្ធ និងប្រជាពលរដ្ឋខ្មែរដែលកំពុងរងគ្រោះពីការកាប់សម្លាប់របស់ខ្មែរក្រហម។

លោក Xi និងលោក Blinken ព្រមព្រៀងរក្សាស្ថិរភាពនៃទំនាក់ទំនងរវាងអាមេរិក-ចិន ក្នុងកិច្ចពិភាក្សានៅប៉េកាំង

2023/06/20 10:02:49 am        102
Facebook Telegram Linkin
 ចិន៖ ប្រទេសចិន និងសហរដ្ឋអាមេរិក បានព្រមព្រៀងកាលពីថ្ងៃចន្ទដើម្បីរក្សាស្ថិរភាពនៃប្រទេសគូប្រជែងដ៏ខ្លាំងក្លាទាំង២ ដើម្បីបញ្ចៀសពីជម្លោះ ប៉ុន្តែបានបរាជ័យក្នុងការសម្រេចបានជំហានរីកចម្រើនសំខាន់ណាមួយអំឡុងដំណើរទស្សនកិច្ចដ៏កម្រទៅកាន់ទីក្រុងប៉េកាំងពីសំណាក់ប្រមុខការទូតអាមេរិក លោក Antony Blinken។  លោកប្រធានាធិបតីចិន Xi Jinping បានស្វាគមន៍ការរីកចម្រើន បន្ទាប់ពីការចាប់ដៃជាមួយលោក Blinken នៅមហាសាលប្រជាជន ជាបន្ទប់ប្រជុំដ៏ធំ ដែលប្រើសម្រាប់ការស្វាគមន៍ប្រមុខរដ្ឋទាំងឡាយ។ ប្រមុខការទូតអាមេរិក និងលោក Xi បានបញ្ជាក់ពីសារៈសំខាន់នៃការរក្សាទំនាក់ទំនងប្រកបដោយស្ថិរភាពបន្ថែមទៀត ស្របពេលដែលជម្លោះជាយថាហេតុណាមួយរវាងប្រទេសមហាអំណាចសេដ្ឋកិច្ចធំបំផុតទាំង២របស់ពិភពលោក នឹងបង្កើតឲ្យមានការរំខានជាលក្ខខណៈសកល។  ប្រទេសចិនបានបដិសេធមិនទទួលយកបំណងរបស់ទីក្រុងវ៉ាស៊ីនតោន ដើម្បីបន្តបណ្តាញទំនាក់ទំនងយោធា និងយោធា ដោយលើកឡើងពីការដាក់ទណ្ឌកម្មរបស់សហរដ្ឋអាមេរិកថាជាឧបសគ្គ។ ភាគីទាំងពីរបានបង្ហាញជំហរខ្លួនលើបញ្ហាគ្រប់យ៉ាង ចាប់ពីកោះតៃវ៉ាន់រហូតដល់ពាណិជ្ជកម្ម រួមទាំងសកម្មភាពរបស់សហរដ្ឋអាមេរិកចំពោះឧស្សាហកម្មបន្ទះឈីបរបស់ចិន សិទ្ធិមនុស្ស និងសង្គ្រាមរបស់រុស្ស៊ីប្រឆាំងនឹងអ៊ុយក្រែន។ក្រោយមកកាលពីថ្ងៃចន្ទ ដដែលលោកប្រធានាធិបតីសហរដ្ឋអាមេរិក Joe Biden បាននិយាយ ថា លោកគិតថាទំនាក់ទំនងរវាងប្រទេសទាំងពីរគឺស្ថិតនៅលើផ្លូវត្រូវ ហើយបានបង្ហាញថាការរីកចម្រើននោះ ត្រូវបានធ្វើឡើងក្នុងអំឡុងដំណើររបស់លោក Blinken ៕

សម្ដេចតេជោ ហ៊ុន សែន អញ្ជើញអបអរសាទរខួបលើកទី៤៦ ទិវានៃការចងចាំដំណើរឆ្ពោះទៅរកការផ្តួលរំលំរបបប្រល័យពូជសាសន៍ ប៉ុល ពត (២០ មិថុនា ១៩៧៧-២០ មិថុនា ២០២៣)

2023/06/20 07:42:29 am        202
Facebook Telegram Linkin
ភ្នំពេញ៖ សម្តេចតេជោ ហ៊ុន សែន នាយករដ្ឋមន្ត្រី បានអញ្ជើញអបអរសាទរប្រារព្ធខួប៤៦ឆ្នាំ នៃទិវានៃការចងចាំដំណើរឆ្ពោះទៅរកការផ្តួលរំលំ របបប្រល័យពូជសាសន៍ ប៉ុល ពត (២០ មិថុនា ១៩៧៧-២០ មិថុនា ២០២៣) នៅក្រសួងការពារជាតិ នាព្រឹកថ្ងៃទី២០ ខែមិថុនា ឆ្នាំ២០២៣នេះ។គួររំលឹកថា នៅថ្ងៃទី២០ ខែមិថុនា ឆ្នាំ២០២៣ គឺជាខួបគម្រប់ ៤៦ឆ្នាំ នៃដំណើរតស៊ូឆ្ពោះទៅរកការរំដោះជាតិរបស់សម្តេចតេជោ ហ៊ុន សែន និងយុទ្ធមិត្ត ដើម្បីរំដោះជាតិ និងប្រជាជនកម្ពុជាចេញពីការកាប់សម្លាប់នៃរបបប្រល័យពូជសាសន៍ ប៉ុល ពត។ ថ្ងៃទី២០ ខែមិថុនា ឆ្នាំ១៩៧៧ ជាពេលដែលសមមិត្ត ហ៊ុន សែន ក្នុងវ័យ២៥ឆ្នាំ រួមនឹងយុទ្ធមិត្តដ៏ស្ម័គ្រស្មោះ ៤រូបផ្សេងទៀត បានសម្រេចចិត្តក្នុងស្ថានភាពដ៏តានតឹងបំផុតលាចាកទឹកដី លាចាកឧត្តមភរិយា និងកូនក្នុងផ្ទៃជាទីស្រឡាញ់ធ្វើដំណើរជ្រែកស្បៃរាត្រីឆ្លងកាត់ព្រំដែនទាំងគ្រោះថ្នាក់បំផុត ឆ្ពោះទៅកាន់ប្រទេសវៀតណាម ដើម្បីស្វែងរកគាំទ្រក្នុងការរំដោះជាតិ និងប្រជាជនកម្ពុជា ចេញពីក្រញាំបិសាចដ៏សែនឃោរឃៅប៉ុលពត។ផ្តើមចេញពីដំណើរតស៊ូជាមួយទឹកចិត្តដ៏មុះមុតនោះហើយ ទើបនាំឱ្យមានការរំដោះប្រទេសជាតិ និងប្រជាជនកម្ពុជា ចេញពីរបបវាលពីឃាត ប៉ុល ពត នៅថ្ងៃទី៧ ខែមករា ឆ្នាំ១៩៧៩ ហើយឈានឆ្ពោះទៅរកការបិទបញ្ចប់ភ្លើងសង្គ្រាម បិទបញ្ចប់ការបែកបាក់ជាតិ នាំមកនូវការបង្រួបបង្រួមជាតិ ឯកភាពជាតិ និងការកសាងអភិវឌ្ឍន៍ប្រទេស​ឱ្យរីកចម្រើនដូចពេលបច្ចុប្បន្ន។ដើម្បីរំលឹកដល់ស្លាកស្នាមប្រវត្តិសាស្ត្រដ៏មានគុណតម្លៃសម្រាប់ជាតិ និងប្រជាជន និងដើម្បីគាសរំលើងឱ្យឃើញនូវវីរភាពរបស់កុលបុត្រខ្មែរក្នុងការតស៊ូដើម្បីជាតិ និងប្រជាជនសម្រាប់កុលបុត្រខ្មែរជំនាន់ក្រោយនោះ នៅឆ្នាំ២០១៧ ដែលចំខួប៤០ឆ្នាំនៃការចេញតស៊ូនេះ សម្តេចតេជោ ហ៊ុន សែន រួមនឹងយុទ្ធមិត្តដែលនៅមានជីវិតពេលនោះ បានធ្វើដំណើររួមគ្នាទៅកាន់គ្រប់ចំណុចក្នុងដំណាក់កាលតស៊ូនោះ។ ចាប់តាំងពីឆ្នាំ២០១៧នោះមក ក្រសួងការពារជាតិ ក៏បានទទួលភារកិច្ចរៀបចំប្រារព្ធពិធីមួយនេះជារៀងរាល់ឆ្នាំ។ បន្ថែមពីលើនោះ ក៏មានការរៀបចំសាងសង់នូវសំណង់នានា នៅលើតំបន់ប្រវត្តិសាស្ត្រមួយនេះផងដែរ ដើម្បីតម្កល់ទុកជាមរតកដល់មនុស្សជំនាន់ក្រោយ៕

ព្រឹទ្ធសភាអូស្ត្រាលីឆ្លងកាត់រនាំងសភាចុងក្រោយ សម្រាប់ការធ្វើប្រជាមតិលើការទទួលស្គាល់ជនជាតិដើមភាគតិច

2023/06/19 01:34:17 pm        82
Facebook Telegram Linkin
អូស្ត្រាលី៖ ព្រឹទ្ធសភាអូស្ត្រាលីបានអនុម័តច្បាប់ នៅថ្ងៃចន្ទ (ទី១៩ ខែមិថុនា) ដែលនឹងបើកផ្លូវឲ្យប្រទេសនេះ ធ្វើប្រជាមតិដ៏សំខាន់មួយ នៅចុងឆ្នាំនេះ ស្តីពីបញ្ហាថា តើត្រូវទទួលស្គាល់ជនជាតិដើមរបស់ខ្លួន នៅក្នុងរដ្ឋធម្មនុញ្ញ ឬក៏អត់។ក្នុងការបោះឆ្នោតចុងក្រោយ នៅក្នុងសភាជាន់ខ្ពស់ សន្លឹកឆ្នោត ៥២សំឡេង បានបោះឆ្នោតគាំទ្រសេចក្តីស្នើច្បាប់នេះ ខណៈដែល ១៩សំឡេង បានបោះប្រឆាំង ដែលនេះមានន័យថា ច្បាប់នេះត្រូវបានអនុម័តដោយសំឡេងភាគច្រើនដាច់ខាត។ សមាជិកសភាដែលគាំទ្រសេចក្តីស្នើច្បាប់នេះ បានទះដៃ និងអបអរសាទរ ខណៈដែលចំនួនចុងក្រោយនៃការបោះឆ្នោត ត្រូវបានអានឮៗ នៅក្នុងសភា។ការបោះឆ្នោតប្រជាមតិ ដែលជាលើកដំបូងសម្រាប់ប្រទេសអូស្ត្រាលី ចាប់តាំងពីឆ្នាំ១៩៩៩ មក នៅពេលដែលប្រទេសនេះបានបដិសេធនូវការបង្កើតសាធារណរដ្ឋ នឹងសាកសួរប្រជាពលរដ្ឋថា តើពួកគេគាំទ្រដល់ការប្រែរដ្ឋធម្មនុញ្ញ ដើម្បីរួមបញ្ចូល «សំឡេងផ្ញើទៅកាន់សភា» ដែលជាគណៈកម្មាធិការ អាចផ្តល់ប្រឹក្សាដល់សភាអំពីបញ្ហា ដែលប៉ះពាល់ដល់ប្រជាជនជនជាតិដើម និងកោះ Torres Strait នោះដែរ ឬទេ។ឥឡូវនេះ នាយករដ្ឋមន្ត្រីអូស្ត្រាលី លោក Anthony Albanese នឹងត្រូវកំណត់កាលបរិច្ឆេទធ្វើប្រជាមតិ ដែលត្រូវតែកើតឡើង ក្នុងរយៈពេលមិនយូរជាង ២ខែ និងមិនលើសពី ៦ខែ។ជនជាតិដើមភាគតិច ដែលរួមបញ្ចូលគ្នាមានចំនួនប្រហែល ៣,២ភាគរយនៃចំនួនប្រជាជនជិត ២៦លាននាក់របស់ប្រទេសអូស្ត្រាលី មានដំណើរជីវិតក្រោមមធ្យមភាគជាតិលើវិធានការសេដ្ឋកិច្ចសង្គមភាគច្រើន ហើយមិនត្រូវបានលើកយកនិយាយនៅក្នុងរដ្ឋធម្មនុញ្ញទេ។ ពួកគេត្រូវបានអ្នកគ្រប់គ្រងអាណានិគមអង់គ្លេសទុកចោល ហើយមិនបានផ្តល់សិទ្ធិបោះឆ្នោតរហូតដល់ទសវត្សរ៍ឆ្នាំ១៩៦០៕

លោកនាយករដ្ឋមន្ត្រីអ៊ីស្រាអែល ប្ដេជ្ញាបន្តកំណែទម្រង់ប្រព័ន្ធតុលាការ មិនខ្វល់ពីការតវ៉ាទូទាំងប្រទេស

2023/06/19 12:32:50 pm        78
Facebook Telegram Linkin
អ៊ីស្រាអែល៖ លោកនាយករដ្ឋមន្ត្រីអ៊ីស្រាអែល Benjamin Netanyahu កាលពីថ្ងៃអាទិត្យបានប្ដេជ្ញាជំរុញកំណែទម្រង់ប្រព័ន្ធតុលាការដ៏ចម្រូងចម្រាសរបស់រដ្ឋាភិបាលលោក ដែលត្រូវគេមើលឃើញថា ការដឹកនាំរបស់លោកត្រូវបានរារាំងដោយការតវ៉ាទ្រង់ធំៗយ៉ាងច្រើនប្រឆាំងនឹងកំណែទម្រង់ដែលលោកបានស្នើឡើង។ លោក Netanyahu បាននិយាយនៅពេលចាប់ផ្ដើមកិច្ចប្រជុំគណៈរដ្ឋមន្ត្រីប្រចាំសប្ដាហ៍ក្នុងរទីក្រុង ហ្ស៊េរ៉ុយសាឡឹម (Jerusalem) ថា យើងនឹងរួមគ្នា និងចាប់ផ្ដើមវិធានការជាក់ស្ដែងនានា។  កញ្ចប់កំណែទម្រង់ដែលបានបង្ហាញកាលពីខែមករា ត្រូវបានផ្អាកក្នុងពេលប៉ុន្មានខែថ្មីៗនេះ ដោយសារការតវ៉ាជាច្រើន ដែលបានធ្វើឡើងរៀងរាល់សប្ដាហ៍ ដែលមានអ្នកចូលរួមរាប់ម៉ឺននាក់។ លោក Netanyahu បានផ្អាកដំណើរការច្បាប់នេះ កាលពីខែមីនា និងបានបង្កើតឲ្យមានការពិភាក្សាទូទាំងក្នុងគណបក្សជុំវិញបញ្ហានេះ ប៉ុន្តែក្រុមមេដឹកនាំបក្សប្រឆាំងលោក Yair Lapid និង លោកBenny Gantz បានដើរចេញពីការពិភាក្សាកាលពីថ្ងៃពុធ។ ក្រុមអ្នកនយោបាយជាន់ខ្ពស់របស់ប្រទេសនេះ បានស្ដីបន្ទោសដាក់គ្នាចំពោះការបរាជ័យក្នុងការចរចាជាបន្តបន្ទាប់។ លោក Netanyahu បានចោទប្រកាន់មេដឹកនាំបក្សប្រឆាំងពីបទរៀបចំការចរចាក្លែងក្លាយ បន្ទាប់ពីអ្នកកាន់តំណែងមុនរបស់លោកគឺលោក Lapid បាននិយាយថា នាយករដ្ឋមន្ត្រីរូបនេះ គ្រាន់តែសម្ដែងធ្វើជាចង់បានការចរចាតែប៉ុណ្ណោះ ។  កំណែទម្រង់ដ៏ចម្រូងចម្រាសនេះ ព្យាយាមដកអំណាចរបស់តុលាការជាន់ខ្ពស់ និងផ្ដល់អំណាចកាន់តែច្រើនឲ្យទៅក្រុមអ្នកនយោបាយក្នុងការជ្រើសរើសក្រុមចៅក្រមក្នុងតុលាការ៕

រដ្ឋសភាទទួលយកសេចក្តីព្រាងច្បាប់ ស្តីពីវិសោធនកម្មច្បាប់បោះឆ្នោតដើម្បីពិនិត្យសិក្សា

2023/06/19 12:28:05 pm        151
Facebook Telegram Linkin
ភ្នំពេញ៖ គណៈកម្មាធិការអចិន្ត្រៃយ៍រដ្ឋសភា នៅព្រឹកថ្ងៃទី១៩ ខែមិថុនា ឆ្នាំ២០២៣នេះ បានបើកកិច្ចប្រជុំក្រោមអធិបតីភាពសម្តេចពញាចក្រី ហេង សំរិន ប្រធានរដ្ឋសភា ដោយកិច្ចប្រជុំនេះ បានអនុម័តទទួល យកសេចក្តីព្រាងច្បាប់ ស្តីពីវិសោធនកម្មច្បាប់បោះឆ្នោត ដើម្បីពិនិត្យ សិក្សា ក្រោយមានការស្នើឡើង ដោយរាជរដ្ឋាភិបាល ។យោងតាមសេចក្តីប្រកាសព័ត៌មានរបស់រដ្ឋសភា បានឲ្យដឹងថា សេចក្តីព្រាងច្បាប់ ស្តីពីវិសោធន កម្មច្បាប់បោះឆ្នោត គឺត្រូវបានគណៈកម្មាធិការអចិន្រ្តៃយ៍ សម្រេចប្រគល់ជូន ដល់គណៈកម្មការនីតិកម្ម និងយុត្តិធម៌ នៃរដ្ឋសភា សហការជាមួយគណៈកម្មការមហាផ្ទៃ ការពារជាតិ និងមុខងារសាធារណៈ នៃរដ្ឋសភា ពិនិត្យសិក្សា ហើយធ្វើរបាយការណ៍​ជូនគណៈកម្មាធិការអចិន្រ្តៃយ៍រដ្ឋសភាវិញ ។សេចក្ដីព្រាងច្បាប់ ស្ដីពីវិសោធនកម្មច្បាប់បោះឆ្នោត ត្រូវបានរាជរដ្ឋាភិបាលធ្វើឡើង កាលពីពេល ថ្មីៗនេះ ដើម្បីការពារបរិយាសបោះឆ្នោតឱ្យដំណើរការទៅដោយរលូន តាមបែបលទ្ធិប្រជាធិបតេយ្យ ជាពិ សេសច្បាប់នេះ មានគោលដៅដាក់ទោសចំពោះបុគ្គលទាំងឡាយណា ដែលមានចេតនា​ញុះញង់ រារាំង ពលរដ្ឋ មិនឱ្យទៅចូលរួមបោះឆ្នោត និងម្យ៉ាងទៀត ដើម្បីទប់ស្កាត់បុគ្គលទាំង​ឡាយណា ដែលមិនចូលរួមបោះឆ្នោតមិនឱ្យឈរឈ្មោះឱ្យគេបោះឆ្នោតបាន នៅអាណត្តិក្រោយៗទៀត ។ក្រៅពីទទួលយកសេចក្ដីព្រាងច្បាប់ ស្ដីពីវិសោធនកម្មច្បាប់បោះឆ្នោត រដ្ឋសភា ក៏ទទួលយកសេច ក្ដីព្រាងច្បាប់៥ទៀតផងដែរ ដូចជា សេចក្តីព្រាងច្បាប់ ស្ដីពីការអនុម័តយល់ព្រមលើការធានា​ទូទាត់របស់រាជរដ្ឋាភិបាលកម្ពុជា ឱ្យក្រុមហ៊ុន ខ្មែរ អេឡិកទ្រីខល ផៅវ័រ សម្រាប់គម្រោងអភិវឌ្ឍន៍​វារីអគ្គិសនីស្ទឹងឫស្សី ជ្រុំកណ្តាល អានុភាព ៧០មេហ្កាវ៉ាត់ ផ្គួបគ្នាជាមួយគម្រោងអភិវឌ្ឍន៍​វារីអគ្គិសនីស្ទឹង​វាលថ្មកំបុត អានុភាព ១០០មេហ្កាវ៉ាត់ ខេត្តកោះកុង។ សេចក្តីព្រាងច្បាប់ ស្ដីពីការអនុម័តយល់ព្រមលើការធានាទូទាត់ឱ្យក្រុម ហ៊ុន ឡាក់ឃី សូឡា ផៅវ័រ ឯ.ក សម្រាប់គម្រោងអភិវឌ្ឍន៍ស្ថានីយផលិតអគ្គិសនី ដើរដោយថាមពលពន្លឺ ព្រះអាទិត្យ អានុភាព ៨០មេហ្កាវ៉ាត់ ខេត្តព្រៃវែង ។ សេចក្តីព្រាងច្បាប់ ស្តីពីការអនុម័តយល់ព្រមលើការធា នាទូទាត់ឱ្យក្រុមហ៊ុន ស្នេថេក ខូ អិលធីឌី សម្រាប់គម្រោងអភិវឌ្ឍន៍ស្ថានីយផលិតអគ្គិសនីដើរដោយថាមពលពន្លឺព្រះអាទិត្យ អានុភាព ១៥០មេហ្កាវ៉ាត់ ខេត្តពោធិ៍សាត់ ។ សេចក្តីព្រាងច្បាប់ ស្តីពីការអនុម័តយល់ ព្រមលើការធានាទូទាត់ឱ្យក្រុមហ៊ុន ស្នេថេក ខូ អិលធីឌី សម្រាប់គម្រោងអភិវឌ្ឍន៍ស្ថានីយផលិតអគ្គិសនី ​ដើរដោយថាមពលពន្លឺព្រះអាទិត្យ អានុភាព ៦០មេហ្កាវ៉ាត់ ខេត្តស្វាយរៀង និងសេចក្តីព្រាងច្បាប់ ស្តីពី ការអនុម័តយល់ព្រមលើការធានាទូទាត់​របស់រាជរដ្ឋាភិបាល ឱ្យក្រុមហ៊ុន ស្នេថេក ខូ អិលធីឌី សម្រាប់ គម្រោងអភិវឌ្ឍន៍ស្ថានីយ​ផលិត​អគ្គិសនីដើរដោយថាមពលពន្លឺព្រះអាទិត្យ អានុភាព ៦០មេហ្គាវ៉ាត់ ខេត្តកំពង់ឆ្នាំង ៕អត្ថបទ៖ បាន ចក់

សម្ដេចតេជោ ស្នើបារាំងនិងអឺរ៉ុប បន្តផ្តល់ជំនួយនិងកម្ចីសម្រាប់គម្រោងទីបីនៃរោងចក្រទឹកស្អាត

2023/06/19 12:16:18 pm        272
Facebook Telegram Linkin
ភ្នំពេញ៖ សម្តេចតេជោ ហ៊ុន សែន នាយករដ្ឋមន្រ្តី នៃកម្ពុជា បានស្នើដល់រដ្ឋាភិបាលបារាំង និងសហភាពអឺរ៉ុប បន្តផ្តល់ជំនួយឥតសំណង និងកម្ចីហិរញ្ញវត្ថុដល់កម្ពុជាបន្ថែមទៀត សម្រាប់គម្រោងទី៣ នៃរោងចក្រប្រព្រឹត្តិកម្មផលិតទឹកស្អាត នៅរាជធានីភ្នំពេញ ព្រោះតម្រូវការទឹកស្អាតបានកើនឡើង ។ក្នុងពិធីសម្ពោធដាក់ឲ្យប្រើប្រាស់ជាផ្លូវការ រោងចក្រប្រព្រឹត្តកម្មទឹកស្អាតបាក់ខែង ក្នុងខណ្ឌជ្រោយ ចង្វារ នៅព្រឹកថ្ងៃទី១៩ ខែមិថុនានេះ សម្តេចតេជោ ហ៊ុន សែន បានបញ្ជាក់ថា តាមរយៈការអភិវឌ្ឍ គម្រោងរោងចក្រប្រព្រឹត្តកម្មទឹកស្អាតជាបន្តបន្ទាប់ វានឹងជួយជំរុញឲ្យវិស័យអចលនទ្រព្យ ជាពិសេសគម្រោងបុរី កាន់តែរីកដុះដាលបន្ថែមទៀត​ និងកាត់បន្ថយការខ្វះខាតទឹកស្អាតប្រើប្រាស់ ដូច្នេះគម្រោង ទី៣ នាពេលខាងមុខនេះ គប្បីបារាំងបន្តជួយផ្តល់កម្ចីបន្ថែមទៀត ដោយកុំភ័យថា កម្ពុជាខ្វះលទ្ធភាពសងឲ្យសោះ ។សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា បានបញ្ជាក់ថា សំណើសុំជំនួយរបស់​សម្តេចពី​បារាំង ​និងសហភាពអឺរ៉ុប ​នាពេលនេះ ​គឺដើម្បីផលប្រយោជន៍របស់ប្រទេសជាតិទាំងមូល ។ យ៉ាងណាក៏ដោយ នាឱកាសនេះដែរសម្តេចតេជោ ហ៊ុន សែន ​ក៏បានប្រកាសអរគុណជប៉ុន ​បារាំង និង​សហភាពអឺរ៉ុប ដែលផ្ដល់ថវិកាសម្រាប់បង្កើតរោងចក្រប្រព្រឹត្តកម្មទឹកស្អាត​នៅរាជធានីភ្នពេញ​នាពេលកន្លងមកផងដែរ ៕អត្ថបទ៖ បាន ចក់

បណ្ដាញសង្គម

ព័ត៌មានថ្មីៗ

ពលករខ្មែរធ្វើការចំណាក់ស្រុកថៃ នៅតែបន្តឆ្លងដែនមកកម្ពុជា តាមច្រកទ្វារព្រំដែនអូរស្មាច់
07/06/2025 12:07 PM
Facebook Telegram Linkin
អាជ្ញាធររៀបចំប្រព័ន្ធលូថ្មី ដើម្បី​បញ្ចៀស​ការជនលិចដោយទឹកភ្លៀង ក្នុងក្រុងប៉ោយប៉ែត
07/06/2025 11:07 AM
Facebook Telegram Linkin
រដ្ឋបាលក្រុងសិរីសោភ័ណជ្រើសរើសយកក្រុមហ៊ុនប្រមូលសំរាមថ្មី ដើម្បីពង្រឹងសេវាប្រមូលសំរាមនៅទីប្រជុំជន
07/06/2025 11:07 AM
Facebook Telegram Linkin
ព្រះសង្ឃ និងពលរដ្ឋធ្វើនំអន្សមជូនដល់កងទ័ព ឈរជើងតាមបន្ទាត់ព្រំដែន ខេត្តបន្ទាយមានជ័យ
07/06/2025 11:07 AM
Facebook Telegram Linkin
អ៊ីស្រាអែលនឹងបញ្ជូនគណៈប្រតិភូទៅកាតាសម្រាប់កិច្ចចរចាតំបន់ហ្កាហ្សា ទោះច្រានចោល ការទាមទាររបស់ក្រុមហាម៉ាស
07/06/2025 10:07 AM
Facebook Telegram Linkin
[UPDATE] ចំនួនអ្នកស្លាប់ក្នុងទឹកជំនន់រដ្ឋតិចសាស់ ឡើងដល់៥០នាក់ ខណៈបន្តស្វែងរកក្មេងស្រីជាង២០នាក់
07/06/2025 10:07 AM
Facebook Telegram Linkin
សម្តេច ម៉ែន សំអន ស្នើដល់សិក្ខាកាមនៃវគ្គអប់រំនយោបាយរបស់គណបក្សកម្រិត១ ជំនាន់ទី៨៦ ធ្វើការចែករំលែកនូវចំណេះដឹង និងបទពិសោធន៍ ជូនដល់មន្ត្រីនៅក្នុងអង្គភាព
07/06/2025 07:07 AM
Facebook Telegram Linkin
អាវុធហត្ថរាជធានីភ្នំពេញ បំបែកសំណុំរឿងឃាតកម្ម ចាក់សម្លាប់បុរសម្នាក់នៅមុខវត្តស្ទឹងមានជ័យ
07/06/2025 07:07 AM
Facebook Telegram Linkin
ក្រសួងការពារជាតិកម្ពុជា អំពាវនាវឱ្យកងទ័ពថៃ កំពុងឈរជើងនៅប្រាសាទតាក្របីអនុវត្តការងាររបស់ខ្លួនឱ្យបានត្រឹមត្រូវ និងការទទួសខុសត្រូវ
07/05/2025 10:07 PM
Facebook Telegram Linkin
រដ្ឋមន្ត្រីការបរទេសបារាំងស្វាគមន៍ការសម្រេចរបស់ចិន ជុំវិញស្រាកូញាក់ ប៉ុន្តែប្រាប់ថា បញ្ហានៅតែមាន
07/05/2025 05:07 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.