នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
សម្ដេចធិបតីអញ្ជើញចុះត្រួតពិនិត្យ និងសួរសុខទុក្ខពលរដ្ឋរងគ្រោះដោយទឹកជំនន់នៅបន្ទាយមានជ័យ
សម្តេចតេជោ ហ៊ុន សែន អនុញ្ញាតឱ្យ លោកជំទាវ រ៉េឡែន ស្យ៉ាល់ តាហ្គាឡ័រ លៀវហ្វាឡានី (Raylene Siale Tagaloa LIUFALANI) ឯកអគ្គរដ្ឋទូតតែងតាំងថ្មី នៃប្រទេសនូវែលសេឡង់ ប្រចាំនៅកម្ពុជាចូលជួប និងប្រគល់សារតាំង
សម្តេចតេជោ ហ៊ុន សែន អនុញ្ញាតឱ្យ ឯកឧត្តម ទ្រីសម៉ាន់ អ៉ីហ្គោរ៍ (Driesmans Igor) ឯកអគ្គរាជទូតសហភាពអឺរ៉ុបប្រចាំកម្ពុជា និងជាប្រេសិតពិសេស EU ប្រចាំនៅមីយ៉ាន់ម៉ា ចូលជួបសម្ដែងការគួរសម
សម្តេចតេជោ ហ៊ុន សែន អនុញ្ញាតឱ្យ ឯកឧត្តមឯកអគ្គរដ្ឋទូតសហភាពអឺរ៉ុប ប្រចាំកម្ពុជា ចូលជួបសម្តែងការគួរសម

នយោបាយ​ និង ការអភិវឌ្ឍន៍

សិក្ខាសាលាអំពាវនាវឲ្យមានកិច្ចសហប្រតិបត្តិការពីប្រព័ន្ធផ្សព្វផ្សាយ ដើម្បីជំរុញការអភិវឌ្ឍរួម

2023/06/28 06:05:53 pm        162
Facebook Telegram Linkin
សិក្ខាសាលាសម្រាប់ថ្នាក់ដឹកនាំប្រព័ន្ធផ្សព្វផ្សាយគណបក្សនយោបាយសាកល ជាវេទិកាតាមបណ្តាញអ៊ីនធឺណិតរយៈពេល៣ថ្ងៃ រៀបចំដោយនាយកដ្ឋានអន្តរជាតិរបស់គណបក្សកុម្មុនីសចិន បានបើកកាលពីថ្ងៃអង្គារក្នុងទីក្រុងប៉េកាំង។ អ្នកចូលរួមជាង៤០នាក់ ទទួលបន្ទុកផ្នែកប្រព័ន្ធផ្សព្វផ្សាយដំណើរការដោយគណបក្សនយោបាយចំនួន៣០មកពីប្រទេសចំនួន១៦ រួមមានទាំងប្រទេសកម្ពុជា ទុយនីស៊ី ទួរគី បារាំង អេស្បាញ និងចក្រភពអង់គ្លេស បានចូលរួមព្រឹត្តិការណ៍នេះ។ នៅក្នុងសុន្ទរកថាដែលបានថ្លែងនៅក្នុងពិធីបើកសិក្ខាសាលា លោក Guo Yezhou អនុប្រធាននាយកដ្ឋានអន្តរជាតិនៃគណៈកម្មាធិការកណ្តាលបក្សកុម្មុយនីសចិន បាននិយាយថា បក្សកុម្មុនីសចិន តែងតែ ផ្សារភ្ជាប់ទៅនឹងសារៈសំខាន់ដែលមិនអាចខ្វះបានចំពោះទំនាក់ទំនងអន្តរជាតិ និងការងារសាធារណៈ។លោកបានគូសបញ្ជាក់ពីទិដ្ឋភាពនៃការផ្លាស់ប្តូរដ៏ស្មុគ្រស្មាញក្នុងស្ថានភាពអន្តរជាតិ និងការវិវត្តន៍ដ៏ជឿនលឿននៃបដិវត្តន៍ផ្នែកព័ត៌មានវិទ្យា បក្សកុម្មុនីសចិនមានឆន្ទៈពង្រឹងការផ្លាស់ប្តូរ ការរៀនពីគ្នាទៅវិញទៅមកជាមួយគណបក្សនយោបាយមកពីប្រទេសផ្សេងៗគ្នាលើទស្សនៈជាទូទៅ និងការងារជាសាធារណៈ ពង្រីកកិច្ចសហប្រតិបត្តិការរវាងគណបក្សនយោបាយ និងប្រព័ន្ធផ្សព្វផ្សាយ បង្កើនការផ្គត់ផ្គង់ព័ត៌មានជាវិជ្ជមាន ពង្រឹងសំឡេងនៃភាពត្រឹមត្រូវ និងយុត្តិធម៌ក្នុងពិភពលោក ជំរុញការអភិវឌ្ឍន៍ និងវឌ្ឍនភាពនៃអារ្យធម៌មនុស្សជាតិ។ ការលើកឡើងរបស់លោក Guo ត្រូវបានស្វាគមន៍យ៉ាងកក់ក្ដៅពីវាគ្មិនផ្សេងៗទៀតក្នុងពិធីបើកព្រឹត្តិការណ៍នេះ។លោក សួស យ៉ារ៉ា អនុប្រធានទី១ នៃគណៈកម្មាធិការទទួលបន្ទុកទំនាក់ទំនងខាងក្រៅរបស់គណបក្សប្រជាជនកម្ពុជា បានគាំទ្រក្នុងការបង្កើតយន្តការផ្លាស់ប្តូរទស្សនៈរបស់គណបក្សនយោបាយ និងប្រព័ន្ធផ្សព្វផ្សាយ និងពង្រឹងភាពជាដៃគូរវាងគណបក្សនយោបាយ និងប្រយុទ្ធប្រឆាំងម៉ាស៊ីនផ្សព្វផ្សាយប្រព័ន្ធផ្សព្វផ្សាយរបស់ប្រទេសលោកខាងលិចដែលក្តោបយកព័ត៌មានមិនពិត ការផ្តល់ព័ត៌មានខុស និង ព័ត៌មានក្លែងក្លាយ៕

សម្ដេចតេជោ៖ «អ្នកទោសណាក៏ដោយបើមានអន្តរាគមន៍ពីបរទេស គឺគ្មានការបន្ធូរបន្ថយឡើយ»

2023/06/28 06:03:23 pm        149
Facebook Telegram Linkin
ភ្នំពេញ៖ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានប្រកាសជាថ្មីម្តងទៀតថា អ្នកទោសណាក៏ដោយឱ្យតែ ​មានការអន្តរាគមន៍ ឬលូកដៃពីបរទេស​នោះ គឺគ្មានការបន្ធូរបន្ថយ ឬលើកលែងទោសឡើយ ខណៈការធ្វើនេះ ក៏ដើម្បីលុបបំបាត់ការជ្រៀតជ្រែកពីបរទេសលើកិច្ចការងារផ្ទៃក្នុងរបស់កម្ពុជា។សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានបញ្ជាក់ជាថ្មីបែបនេះ ក្នុងឱកាសអញ្ជើញចុះជួបសំណេះសំណាលជាមួយកម្មករនិយោជិត ២ ម៉ឺននាក់នៅតំបន់ព្រៃស្ពឺ ខណ្ឌពោធិ៍សែនជ័យ នាព្រឹកថ្ងៃទី២៨ ខែមិថុនា ឆ្នាំ២០២៣នេះ។សម្ដេចតេជោ មានប្រសសន៍ថា ប្រទេសកម្ពុជា ធ្លាប់រងគ្រោះដោយសារទង្វើបែបនេះ ប្រជាពលរដ្ឋ​រាប់លាន​នាក់​បានស្លាប់ ដោយសារតែមានការលូកដៃពីបរទេសចូលកិច្ចការងារផ្ទៃក្នុងរបស់កម្ពុជា។ ដូច្នេះការចាត់វិធានការមិនលើកឡើងចំពោះជនជាប់ទោសដែល​បរទេសអន្តរាគមន៍នេះ ក៏ជា​សារផ្ដាំមួយ​ទៅបរទេសមួយចំនួនដែលតែងតែចង់លូកដៃ​ចូលកិច្ចការផ្ទៃក្នុងរបស់កម្ពុជាដែរ។ សូមជម្រាបថា សម្ដេចតេជោ ហ៊ុន សែន តែងតែមានទឹកចិត្តសន្ដោសប្រណី ​នឹងលើកលែង​ទោស​ចំពោះក្រុមប្រឆាំងជាប់ទោសទាំងអស់ដែលដឹងកំហុស ហើយចាកចេញ​ពី​ជនក្បត់ជាតិ​នៅ​ក្រៅប្រទេស ដើម្បីងាកមកធ្វើការងារជាមួយរាជរដ្ឋាភិបាលក្នុង​ការ​អភិវឌ្ឍ​ប្រទេសកម្ពុជា​ឱ្យមានការរីកចម្រើនទៅមុខ៕ អត្ថបទ៖ វ៉ន ដារ៉ា

ផ្សែងឆេះព្រៃនៅកាណាដា បន្តគ្របដណ្តប់រាលដល់អឺរ៉ុបហើយ

2023/06/28 05:58:46 pm        135
Facebook Telegram Linkin
កាណាដា៖ ផ្សែងអ័ព្ទដ៏ក្រាស់បង្កឡើងដោយចំហេះព្រៃដែលមិនអាចបញ្ឈប់បាន នៅក្នុងប្រទេសកាណាដា មិនត្រឹមតែគ្របដណ្តប់ទីក្រុងនានារបស់សហរដ្ឋអាមេរិក ដោយក្នុងនោះមានទាំងទីក្រុងឈីកាហ្គោផងដែរនោះ តែឥឡូវនេះ បានហុយទៅដល់តំបន់អឺរ៉ុបហើយ ព្រោះបើយោងតាមសេវាកម្មត្រួតពិនិត្យបរិយាកាស Copernicus របស់សហភាពអឺរ៉ុប កាលពីថ្ងៃអង្គារ (ទី២៧ ខែមិថុនា) បានឲ្យដឹងថា ចំហេះព្រៃដែលកំពុងឆេះរាលដាលយ៉ាងសន្ធោសន្ធៅនៅភាគខាងកើត និងភាគខាងលិចកាណាដា បានបញ្ចេញឧស្ម័នកាបូនិកចំនួន ១៦០លានតោន។នៅសហរដ្ឋអាមេរិក បើយោងតាមសេវាអាកាសធាតុជាតិ តាមរយៈបណ្ដាញសង្គម Twitter បានឲ្យដឹងថា គុណភាពខ្យល់ ដោយភាគច្រើននៅទូទាំងភាគកណ្តាលប៉ែកខាងលិចនៃសហរដ្ឋអាមេរិក គឺមិនល្អសម្រាប់សុខភាពនោះឡើយ ដោយស្ថានភាពនេះ នឹងបន្តមានទៀត ហើយបើយោងតាមក្រុមហ៊ុនបច្ចេកវិទ្យា IQAir នៅប្រទេសស្វីស បានឲ្យដឹងថា យ៉ាងហោចណាស់នៅថ្ងៃអង្គារនេះ គុណភាពខ្យល់របស់ទីក្រុងឈីកាហ្គោ (Chicago) ត្រូវបានចាត់ទុកថា មានសភាពអាក្រក់បំផុតក្នុងពិភពលោក។ផ្សែងចេញពីចំហេះព្រៃរបស់ប្រទេសកាណាដា បានគ្របដណ្ដប់លើមជ្ឈមណ្ឌលទីក្រុងសំខាន់ៗជាច្រើនក្នុងខែមិថុនា ក្នុងនោះរួមទាំងទីក្រុងញូវយ៉ក និងតូរ៉ង់តូ ដោយធ្វើឲ្យផ្ទៃមេឃមានពណ៌លឿងទុំដ៏គួរឲ្យភ្ញាក់ផ្អើល ហើយឥឡូវនេះ ផ្សែងបានហោះរសាត់ឆ្លងកាត់មហាសមុទ្រអាត្លង់ទិកខាងជើង។ ការឆេះកាន់តែអាក្រក់ទៅៗ នៅក្រុងកេបិក (Quebec) និងអង់តារីយ៉ូ (Ontario) ទំនងជានឹងធ្វើឲ្យមេឃអាប់អួរ និងថ្ងៃលិចពណ៌លឿងទុំយ៉ាងពេញលេញនៅអឺរ៉ុប ក្នុងសប្តាហ៍នេះ។ តែទោះបីជាយ៉ាងណាក៏ដោយ អ្នកជំនាញម្នាក់បានលើកឡើងថា ដោយសារតែផ្សែងត្រូវបានគេព្យាករថា នឹងស្ថិតនៅរយៈកម្ពស់ខ្ពស់ក្នុងបរិយាកាសនោះ ផ្សែងនេះទំនងជាមិនប៉ះពាល់ដល់ផ្ទៃគុណភាពខ្យល់នោះទេ។រដូវកាលភ្លើងឆេះព្រៃឆ្នាំនេះ គឺជារដូវកាលដ៏អាក្រក់បំផុត ក្នុងកំណត់ត្រា នៅប្រទេសកាណាដា ដោយផ្ទៃដីទំហំប្រហែល ៧៦.០០០គីឡូម៉ែត្រក្រឡា កំពុងត្រូវបានឆេះនៅទូទាំងភាគខាងកើត និងភាគខាងលិចកាណាដា ហើយបើយោងតាមមជ្ឈមណ្ឌលចំហេះព្រៃអន្តរទ្វីបកាណាដា បានឲ្យដឹងទំហំនោះ គឺធំជាងតំបន់ដែលបានឆេះ ក្នុងឆ្នាំ ២០១៦ ២០១៩ ២០២០ និងឆ្នាំ២០២២៕

UN ពិភាក្សាអំពីការតាំងទីលំនៅរបស់អ៊ីស្រាអែលនិងអំពើហិង្សានៅ West Bank

2023/06/28 05:53:30 pm        122
Facebook Telegram Linkin
UN៖ ក្រុមប្រឹក្សាសន្តិសុខអង្គការសហប្រជាជាតិ កាលពីថ្ងៃអង្គារ បានជួបប្រជុំគ្នាដើម្បីពិភាក្សាអំពីភាពតានតឹងនៅមជ្ឈិមបូព៌ា ជាពិសេសសកម្មភាពការតាំងលំនៅឋាននិងការផ្ទុះឡើងអំពើហិង្សានៅតំបន់គ្រប់គ្រង West Bank។ ក្នុងអំឡុងកិច្ចប្រជុំក្រុមប្រឹក្សាសន្តិសុខ ឯកអគ្គរដ្ឋទូតរងរបស់សហរដ្ឋអាមេរិក លោក Robert Wood បាននិយាយថា ទីក្រុងវ៉ាស៊ីនតោននឹងធ្វើការជាមួយប្រទេសអ៊ីស្រាអែល និងអាជ្ញាធរដែនដីប៉ាឡេស្ទីន ដើម្បីកាត់បន្ថយភាពតានតឹង និងស្តារការទុកចិត្តគ្នាឡើងវិញ និងជួយបង្កើតលក្ខខណ្ឌសម្រាប់ការវិលត្រឡប់មករកកិច្ចចរចា។លោក Wood បាននិយាយថា យើងអំពាវនាវឱ្យភាគីទាំងអស់អត់ធ្មត់ពីសកម្មភាពឯកតោភាគី រួមទាំងសកម្មភាពការតាំងលំនៅឋាន ការបណ្តេញចេញ និងការរុះរើលំនៅឋានពលរដ្ឋប៉ាឡេស្ទីន អំពើភេរវកម្ម និងការញុះញង់ឱ្យមានអំពើហិង្សា ដែលទាំងអស់នេះបង្កើតឲ្យស្ថានការណ៍កាន់តែឆាបឆេះ។ ការវាយប្រហារដោយបាញ់រះរបស់ក្រុមហាម៉ាស ដែលបានបណ្តាលឲ្យជនស៊ីវិលអ៊ីស្រាអែល ៤ នាក់ស្លាប់ នៅខាងក្រៅតំបន់តាំងទីលំនៅក្នុងទឹកដីដែលគ្រប់គ្រងដោយអ៊ីស្រាអែល បានបង្កឱ្យមានការចូលលុកលុយដោយហឹង្សាជាច្រើនថ្ងៃ ទៅក្នុងភូមិនិងក្រុងនានារបស់ប៉ាឡេស្ទីន ដោយក្រុមអ្នកតាំងទីលំនៅជនជាតិជ្វីហ្វ។ នគរបាលអ៊ីស្រាអែល បាននិយាយថា ជនសង្ស័យ១២ នាក់ត្រូវបានចាប់ខ្លួននៅក្នុងឧបទ្ទហេតុចុងក្រោយនេះ៕

សម្ដេចតេជោ៖ បើការបង្ក្រាបគ្រឿងញៀនបានច្រើនមិនមែនជាសញ្ញាថាជោគជ័យ នៃការទប់ស្កាត់បទល្មើសនេះទេ

2023/06/28 05:51:12 pm        229
Facebook Telegram Linkin
ភ្នំពេញ៖ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានលើកឡើងថា កម្ពុជាមិនមែនជាប្រទេសផលិតទេ តែគ្រឿងញៀនបានរុលចូលមកប្រទេសរបស់យើងយ៉ាងច្រើន ដែលត្រូវតែខិតខំប្រឹងប្រែងស្រាវជ្រាវបង្ក្រាបទប់ស្កាត់ឱ្យបាន។សម្តេចតេជោ ប្រមុខនៃរាជរដ្ឋភិបាលបានលើកឡើងទាក់ទិននឹងបទល្មើសគ្រឿងញៀន យ៉ាងដូច្នេះ ខណៈបន្តអញ្ជើញចុះជួបសំណេះសំណាលជាមួយកម្មករ ​និយោជិតសរុបជិត ២ម៉ឺននាក់ នៅតំបន់ព្រៃស្ពឺ ​ខណ្ឌពោធិ៍សែនជ័យ រាជធានីភ្នំពេញ នាព្រឹកថ្ងៃទី២៨មិថុនានេះ ។សម្តេច បានគូសបញ្ជាក់ថា បើការបង្ក្រាបបទល្មើសមួយនេះ បានច្រើនមិនមែនជាសញ្ញាបង្ហាញថា ជាលទ្ធផលល្អ ឬជាជោគជ័យនៃការទប់ស្កាត់បទល្មើសគ្រឿងញៀននៅឡើយទេ។សូមបញ្ជាក់ថា រយៈពេលចុងក្រោយនេះ អនុវត្តតាមបទបញ្ជារបស់នាយឧត្តមសេនីយ៍សន្តិបណ្ឌិត នេត សាវឿន ​​អគ្គស្នងការនគរបាលជាតិ ​និងនាយឧត្តមសេនីយ៍ ម៉ក់ ជីតូ អគ្គស្នងការរងទទួល​ផែន​ប្រឆាំងបទល្មើសគ្រឿងញៀន ​និងក្រោមការដឹកនាំផ្ទាល់ពី ឧត្តមសេនីយ៍ឯក ឃឹង សារ៉ាត់ នាយកមន្ទីរប្រឆាំងបទល្មើសគ្រឿងញៀន កម្លាំងជំនាញមន្ទីរប្រឆាំងគ្រឿងបាន ចុះប្រតិបត្តិការ​បង្ក្រាប​បទល្មើសគ្រឿងញៀន ​ដូចភ្លៀងរលឹមនៅទូទាំង​ប្រទេស​ជារៀងរាល់ថ្ងៃ ជាពិសេសបង្ក្រាប​បានបទល្មើសជួញដូរ​គ្រឿងញៀន​ធំៗជាបន្តបន្ទាប់។សន្និបាតបូកសរុបត្រួតពិនិត្យលទ្ធផលការងារគ្រឿងញៀន ឆ្នាំ២០២២ និងលើកទិសដៅបន្តរបស់​អាជ្ញាធរជាតិប្រយុទ្ធប្រឆាំងគ្រឿងញៀន ថ្មីៗនេះ យោងតាមរបាយការណ៍ ​បានឲ្យដឹងថា អាជ្ញាធរជាតិ​ប្រយុទ្ធប្រឆាំងគ្រឿងញៀន ​បានបន្តសហការសម្របសម្រួលជាមួយស្ថាប័ន អង្គភាព​អនុវត្តច្បាប់ទាំងក្នុងក្របខ័ណ្ឌជាតិ​ និងអន្តរជាតិ​ ក្នុងការពង្រឹងការអនុវត្តវិធានការច្បាប់ ក៏ដូចជាវិធានការរដ្ឋបាល។គណៈកម្មការ បង្ការ ទប់ស្កាត់ និងបង្ក្រាបគ្រឿងញៀនខុសច្បាប់​តាមច្រកនៃយុទ្ធនាការ​ប្រយុទ្ធ​ប្រឆាំង​គ្រឿងញៀន​ខុសច្បាប់ បានបន្តការងារតាមគោលការណ៍​ដឹកនាំរបស់​គណៈបញ្ជាការ​យុទ្ធនាការ ក្នុងការពង្រឹងប្រសិទ្ធភាពអនុវត្តច្បាប់ និងឈានទៅបំផ្លាញអង្គការ​ចាត់តាំង​ឧក្រិដ្ឋ​ជនគ្រឿងញៀន​ ដោយបង្កើនកិច្ចសហប្រតិបត្តិការជាមួយអន្តរជាតិ ​តំបន់ អនុតំបន់ ពិសេស​សហការយ៉ាងជិតស្និទ្ធជាមួយប្រទេសជិតខាង​ ដើម្បីទប់ស្កាត់ការចរាចរ​គ្រឿងញៀន​គ្រប់ប្រភេទ ឆ្លងកាត់តំបន់ព្រំដែន៕

ប្រមុខNATO៖ សង្គ្រាមរបស់លោកPutin នៅអ៊ុយក្រែន បានធ្វើឱ្យមានការបែកចែកកាន់តែជ្រៅនៅក្នុងប្រទេសរុស្ស៊ី

2023/06/28 05:47:40 pm        137
Facebook Telegram Linkin
រុស្ស៊ី៖ អគ្គលេខាធិការសម្ព័ន្ធយោធាណាតូ លោក Jens Stoltenberg បាននិយាយកាលពីថ្ងៃអង្គារថា ព្រឹត្តិការណ៍ដែលបានកើតឡើងនៅក្នុងប្រទេសរុស្ស៊ីកាលពីចុងសប្តាហ៍ បានបង្ហាញថាសង្រ្គាមនៅអ៊ុយក្រែនបានធ្វើឱ្យមានការបែងចែកកាន់ជ្រាលជ្រៅនៅក្នុងប្រទេសរុស្ស៊ី ប៉ុន្តែសម្ព័ន្ធមិត្តរបស់អ៊ុយក្រែន នៅតែមិនអាចមើលស្រាលលើរុស្ស៊ីបានទេ ហើយត្រូវតែបន្តគាំទ្រអ៊ុយក្រែន ។ការអធិប្បាយរបស់លោក Stoltenberg បានធ្វើឡើងបន្ទាប់ពីការទទួលទានអាហារពេលល្ងាចជាមួយមេដឹកនាំរដ្ឋសមាជិកសម្ព័ន្ធយោធាណាតូជាច្រើននៅទីក្រុងឡាអេ ប៉ុន្មានថ្ងៃបន្ទាប់ពីកងកម្លាំងទាហានស៊ីឈ្នួលក្រុមហ៊ុន Wagner បានចូលគ្រប់គ្រងរយៈពេលខ្លីមជ្ឈមណ្ឌលទីបញ្ជាការយុទ្ធសាស្ត្រសម្រាប់សង្គ្រាមនៅអ៊ុយក្រែនរបស់រុស្ស៊ី និងក្បួនដំណើរចូលទៅកាន់ទីក្រុងមូស្គូ មុនពេលត្រឡប់មកវិញ ជាការប្រឈមមុខដ៏កម្រចំពោះមេដឹកដឹកនាំយោធារបស់ខ្លួន។ថ្លែងនៅក្នុងសន្និសីទសារព័ត៌មាន លោក Stoltenberg បាននិយាយថា វាឆាប់ពេកក្នុងការសន្និដ្ឋានលើលទ្ធផលនៃសកម្មភាពរបស់កងទ័ពក្រុមហ៊ុន Wagner ទៅកាន់ប្រទេសបេឡារុស ប៉ុន្តែបានបញ្ជាក់ថា សម្ព័ន្ធភាពនេះ បានត្រៀមខ្លួនជាស្រេចដើម្បីការពារខ្លួនប្រឆាំងការគំរាមកំហែងណាមួយ។ លោក Stoltenberg និងនាយករដ្ឋមន្ត្រីប្រទេសហូឡង់ លោក Mark Rutte ដែលជាសហប្រធានរៀបចំអាហារពេលល្ងាចការងារ នៅទីក្រុងឡាអេ សម្រាប់មេដឹកនាំមួយក្រុមតូច នៅមុនកិច្ចប្រជុំនៃប្រទេសសម្ព័ន្ធមិត្តពេញលេញនៅទីក្រុង Vilnius ប្រទេសលីទុយអានី នៅថ្ងៃទី ១១-១២ ខែកក្កដា។ ដោយនិយាយជាមួយ លោក Stoltenberg ប្រធានាធិបតីលីទុយអានី លោក Gitanas Nauseda បាននិយាយថា ការដាក់ពង្រាយទាហានស៊ីឈ្នួលរបស់ក្រុមហ៊ុន Wagner នៅក្នុងប្រទេសបេឡារុស ប្រឈមនឹង«គ្រោះថ្នាក់កាន់តែខ្លាំងនៃអស្ថិរភាព» នៅក្នុងប្រទេសជិតខាង។ ប្រធានាធិបតីប៉ូឡូញ លោក Andrzej Duda បាននិយាយថា ចំណាត់ការនេះ ទាមទារការឆ្លើយតបដ៏ម៉ឺងម៉ាត់ពីសម្ព័ន្ធយោធាណាតូ៕

សម្តេចតេជោប្រកាសផ្តល់រង្វាន់២០ម៉ឺនដុល្លារ ដល់អង្គភាពណាបាញ់យន្តហោះគ្មានមនុស្សបើក ហោះចូលទឹកដីកម្ពុជា

2023/06/28 05:40:58 pm        503
Facebook Telegram Linkin
ភ្នំពេញ៖ សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា ប្រកាសផ្ដល់រង្វាន់ចំនួន២០ម៉ឺនដុល្លារ​ដល់អង្គភាពយោធាណា ដែលបានបាញ់ទម្លាក់យន្តហោះគ្មានមនុស្សបើក ដែលហោះចូលទឹកដីកម្ពុជា ។ថ្លែងនៅក្នុងឱកាសអញ្ជើញចុះជួបសំណេះសំណាលជាមួយកម្មករ និយោជិតសរុប១៨,៣១នាក់ នៅតំបន់ព្រៃស្ពឺ ខណ្ឌពោធិ៍សែនជ័យ រាជធានីភ្នំពេញ នាព្រឹកថ្ងៃទី២៨ ខែមិថុនា ឆ្នាំ២០២៣នេះ សម្តេចតេជោ ហ៊ុន សែន បានបញ្ជាឲ្យកងទ័ពដែលបានបញ្ជូន និងប្រចាំនៅតំបន់ភូមិភាគទី១ទាំង​អស់ត្រូវតែបាញ់ដ្រូន ​និងយន្តហោះគ្មានមនុស្សបើកនេះ ឲ្យខាងតែបាន ខណៈការហោះចូលជា​រឿយៗ​ក្នុងទឹកដីកម្ពុជាជាប់នឹងព្រំដែនវៀតណាមនាពេលប៉ុន្មានថ្ងៃមកនេះ គឺជាការឈ្លានពាន និង​បំពាន​នូវ​អធិបតេយ្យ​កម្ពុជា​សុទ្ធសាធ។ជាមួយគ្នានោះដែរ​សម្តេចតេជោ ​ក៏បានអំពាវនាវ​យ៉ាង​ទទូច​ដល់​ប្រទេស​ណា​ក៏ដោយដែលបាន ឧបត្ថម្ភ​នូវ​សម្ភារៈដ្រូន និង​យន្តហោះ​គ្មានមនុស្សបើកទាំង​នេះ​ដល់​ក្រុម​ឧទ្ទាម​ទាំងនោះ​សូម​បញ្ឈប់ជាបន្ទាន់ ​ខណៈបញ្ហានេះ​វាមិនមែនជាករណី​លេងសើច​នោះទេ ​វាគឺជាបញ្ហា​ភេរវកម្ម។ទាក់ទងនឹងបញ្ហាដ្រូន និងយន្តហោះគ្មានមនុស្សបើកចូលទឹកដីកម្ពុជា​នេះដែរ ​សម្តេច​ ក៏​បាន​ស្តីបន្ទោស​ដល់មេភូមិភាគទី១ថា ជាមេទ័ព​កំសាក​ដោយ​មិន​ហ៊ាន​បាញ់​ទម្លាក់​ចំពោះដ្រូន ដែល​បាន​ហោះ​ចូលតំបន់​ស្រុកកោះញែក ខេត្តមណ្ឌលគិរី ចំនួន៥គ្រឿង​កាលពីយប់មិញផងដែរ។សម្តេច បានលើកឡើងថា អស់លោកធ្វើទ័ពស្លូតពេកហើយ ​គេហោះចូលដីយើងប៉ុន្មាន​ថ្ងៃ​ត្រឹម​យកកាំភ្លើងសេកាសេបាញ់ ​ដូច្នេះ​សម្តេច​សូមបញ្ជាឲ្យដាក់សំណាញ់មេឃ​បាញ់ទម្លាក់ដ្រូន និង​យន្តហោះទាំងនោះ ឲ្យខាងតែបាន ដើម្បីឲ្យដឹងប្រភពច្បាស់លាស់ថា​វាចេញពីខាងណាមក។សូមបញ្ជាក់ថា កាលពី​ម្សិលមិញ​សម្តេចតេជោ​ បាន​បញ្ជាឱ្យ​នាយឧត្តមសេនីយ៍ ហ៊ីង ប៊ុនហៀង បញ្ចេញកម្លាំង​យោធា​ចំនួន​៥០០នាក់ ​និងអាវុធទំនើប២០០ដើម​ទៅកាន់តំបន់ភូមិភាគ១ ដើម្បី​ត្រៀមបាញ់ដ្រូន ​និងយន្តហោះគ្មាន​មនុស្ស​បើកចូល​ទឹកដី​កម្ពុជា ខណៈសម្តេច ​បានដាក់ការ​សង្ស័យថា​ដ្រូន ទាំងនោះជារបស់ក្រុមឧទ្ទាម ឬជនជាតិភាគតិច​ម៉ុងតាញ៉ា ដែល​បានវាយ​ប្រហារ​ដល់អាជ្ញាធរវៀតណាម កាល​ពីពាក់កណ្តាលខែមិថុនាកន្លងទៅ ​ហើយបាក់​ទ័ពរត់ចូល​លាក់ខ្លួន​ក្នុងព្រំដែនកម្ពុជា៕អត្ថបទ៖ បាន ចក់

តុលាការក្រុងញូវយ៉កបង្រួបសំណុំរឿងក្លែងបន្លំរបស់Trump ដោយច្រានចោលលោកស្រី Ivanka Trump ជាចុងចោទ

2023/06/28 05:30:22 pm        166
Facebook Telegram Linkin
អាមេរិក៖ តុលាការឧទ្ធរណ៍ទីក្រុងញូវយ៉កកាលពីថ្ងៃអង្គារបានបង្រួមបណ្តឹងរដ្ឋប្បវេណីរបស់រដ្ឋអាជ្ញាលោកស្រី Letitia James ដែលចោទប្រកាន់លោក Donald Trump និងអាជីវកម្មគ្រួសាររបស់លោកពីបទក្លែងបន្លំ "គួរឲ្យភ្ញាក់ផ្អើល" ហើយបានច្រានចោលការអះអាងទាំងអស់ប្រឆាំងនឹងកូនស្រីច្បងរបស់អតីតប្រធានាធិបតីអាមេរិក រូបនេះ។   ខណៈបដិសេធការអះអាងរបស់លោក Trump ក្នុងការច្រានចោលករណីនេះ ផ្នែកបណ្តឹងឧទ្ធរណ៍នៅ សង្កាត់ Manhattan បាននិយាយថាលក្ខន្តិកៈនៃការកំណត់បានរារាំងលោកស្រី James ពីការប្តឹងជុំវិញប្រតិបត្តិការដែលបានកើតឡើងមុនថ្ងៃទី ១៣ ខែកក្កដា ឆ្នាំ ២០១៤ ឬថ្ងៃទី ៦ ខែកុម្ភៈ ឆ្នាំ ២០១៦អាស្រ័យលើចុងចោទ។តុលាការក៏បាននិយាយផងដែរថា ការទាមទារទាំងអស់ប្រឆាំងនឹងកូនស្រីច្បងរបស់លោក Trump គឺ លោកស្រី Ivanka Trump គួរតែត្រូវបានច្រានចោល ដោយសារតែរឿងហួសពេលវេលាយូរពេក។ ខ្លួនបានបញ្ជូនសំណុំរឿងនេះទៅចៅក្រមជំនុំជម្រះដើម្បីកំណត់ថាការទាមទារមួយណាគួរត្រូវបានទាត់ចោល។  លោកស្រី James បានចោទប្រកាន់លោក Donald Trump ពីបទកុហកធនាគារផ្ដល់ប្រាក់កម្ចី និងក្រុមអ្នកធានាពីឆ្នាំ ២០១១ ដល់ឆ្នាំ ២០២១ អំពីតម្លៃទ្រព្យសកម្មនៅអង្គការ Trump ឬ Trump Organization ក៏ដូចជាទ្រព្យសម្បត្តិសុទ្ធផ្ទាល់ខ្លួនរបស់លោក ដើម្បីទទួលបានលក្ខខណ្ឌល្អប្រសើរពីអ្នកធនាគារ និងក្រុមអ្នកធានា។ ដោយត្រូវបានដាក់កាលពីខែកញ្ញាឆ្នាំមុន បន្ទាប់ពីការស៊ើបអង្កេតរយៈពេល៣ឆ្នាំ បណ្តឹងរបស់លោកស្រី James ស្វែងរកការខូចខាតយ៉ាងហោចណាស់ ២៥០លានដុល្លារ និងដើម្បីបញ្ឈប់ Trumps កុំឲ្យដំណើរការអាជីវកម្មនៅញូវយ៉ក។ កូនប្រុសពេញវ័យរបស់លោក Trump គឺ Donald Jr. និង Eric ក៏ជាជនដែលត្រូវចោទផងដែរ៕

រលកកំដៅមិនស្រុតចុះ បានគ្របដណ្ដប់លើសហរដ្ឋអាមេរិកភាគខាងត្បូង ខណៈគុណភាពខ្យល់កាន់តែយ៉ាប់យ៉ឺនលើតំបន់ Midwest

2023/06/28 05:06:34 pm        162
Facebook Telegram Linkin
អាមេរិក​៖ រលកកំដៅដ៏អូសបន្លាយ បានបន្តគ្របដណ្ដប់នៅលើភាគខាងត្បូងសហរដ្ឋអាមេរិកកាលពីថ្ងៃអង្គារ ខណៈ សីតុណ្ហភាពខ្ពស់ដ៏គ្រោះថ្នាក់កើនឡើងលើសពី១០០ អង្សាហ្វារិនហៃ ស្មើរនឹង៣៨ អង្សាសេ និងសម្ពាធសំណើមធ្ងន់ធ្ងរបានកំពុងប៉ះពាល់ពាសពេញផ្នែកដ៏ធំនៃតំបន់នេះរហូតដល់ថ្ងៃឈប់សម្រាកចុងសប្តាហ៍។ ទន្ទឹមនឹងនេះ នៅទីក្រុង ឈីកាហ្គោ កុមារ មនុស្សចាស់ និងអ្នកដែលមានជំងឺផ្លូវដង្ហើមត្រូវបានណែនាំឲ្យស្នាក់នៅក្នុងផ្ទះសម្រាប់ហេតុផលខុសគ្នាទាំងស្រុង ដូចជា កង្វក់ខ្យល់ឣាកាសជាដើម។មន្ទីរផ្ដល់សេវាកម្មអាកាសធាតុជាតិបាននិយាយថា ពលរដ្ឋអាមេរិកប្រហែល ៦២លាននាក់នៅភាគកណ្តាលរដ្ឋអារីហ្សូណា ទូទាំងរដ្ឋតិចសាស់ និងតំបន់ ឌីប សោត (Deep South) និងចូលទៅក្នុងតំបន់គ្រប់គ្រងរបស់រដ្ឋផ្លរីដា ស្ថិតនៅក្រោមការឃ្លាំមើលកំដៅខ្លាំង ការព្រមាន និងការណែនាំដែលរំពឹងថានឹងមានរយៈពេលរហូតដល់ថ្ងៃទី៤ ខែកក្កដា។  មន្ទីរផ្ដល់សេវាកម្មអាកាសធាតុជាតិ បាននិយាយនៅក្នុងសេចក្តីណែនាំមួយថា វាអាចមានគ្រោះថ្នាក់ជាងព្រឹត្តិការណ៍កំដៅធម្មតាដោយសារតែរយៈពេលវែងនៃការកើនឡើងកំណត់ត្រាខ្ពស់បំផុតមិនធ្លាប់មាននៅពេលយប់ និងអំណានសន្ទស្សន៍កំដៅកើនឡើងនៅពេលថ្ងៃ ។ វាចាំបាច់ណាស់ក្នុងការចាត់វិធីធ្វើឲ្យត្រជាក់ និងទប់ស្កាត់ការប៉ះពាល់ពីកំដៅ។កាលពីថ្ងៃអង្គារ បណ្តាញអគ្គិសនីនៅរដ្ឋតិចសាស់ កំពុងដំណើរការក្នុងការប្រើប្រាស់ខ្ពស់បំផុត ដោយ"ការឃ្លាំមើលអាកាសធាតុ" ដែលមិនស្នើសុំឲ្យអ្នកស្រុកកាត់បន្ថយការប្រើប្រាស់ថាមពលទេ ប៉ុន្តែបង្កើនលទ្ធភាពផលិតកម្ម។ សូម្បីតែអ្នកជំនាញផ្នែកថាមពលមួយចំនួនដែលបានរិះគន់ការគ្រប់គ្រងថាមពលរបស់រដ្ឋតិចសាស់ ក៏ចាត់ទុកការដាច់ភ្លើងក្នុងរដូវក្តៅនេះមិនទំនងនោះទេ ដោយនិយាយថារដូវរងាមានហានិភ័យខ្លាំងជាង៕

ការប៉ះបោររបស់ក្រុមហ៊ុនទាហានស៊ីឈ្នួល វ៉េកណា បង្កហានីភ័យសម្រាប់ទំនាក់ទំនងដ៏ជ្រាលជ្រៅរបស់រុស្ស៊ីជាមួយចិន

2023/06/28 04:44:08 pm        174
Facebook Telegram Linkin
រុស្ស៊ី៖ ខណៈព័ត៌មានបានផ្ទុះថា ទាហានរបស់ក្រុមហ៊ុនទាហានស៊ីឈ្នួលវ៉េកណា(Wagner) បានកំពុងហែក្បួនទៅកាន់ទីក្រុងមូស្គូ ក្នុងការបះបោររយៈពេលខ្លី ក្រុមធុរកិច្ចជនមួយចំនួនមកពីប្រទេសចិនភាគខាងត្បូង បានចាប់ផ្ដើមចេញបញ្ជាយ៉ាងប្រញាប់ប្រញាល់ឲ្យក្រុមហ៊ុននានាបញ្ឈប់ការដឹកជញ្ជូនទំនិញដែលបានត្រៀមទៅកាន់ប្រទេសរុស្ស៊ី ។  ខណៈការបះបោរ ដែលជាការសាកល្បងដ៏ធំបំផុតសម្រាប់ការដឹកនាំរបស់លោកប្រធានាធិបតីរុស្ស៊ី Vladimir Putin ចាប់តាំងពីការឈ្លានពានរបស់លោកចូលអ៊ុយក្រែន កាលពីថ្ងៃទី២៤ខែកុម្ភៈឆ្នាំ២០២២ ពេលនេះក្រុមហ៊ុននាំចេញមួយចំនួន បានចោទជាសំណួរអំពីការពឹងផ្អែកនាពេលអនាគតរបស់ខ្លួនលើសម្ព័ន្ធមិត្តដ៏ជិតស្និទ្ធិបំផុតរបស់ទីក្រុងប៉េកាំង។ លោក ស៊ិន មូហួយ (Shen Muhui) ប្រធានផ្នែកពាណិជ្ជកម្មសម្រាប់ក្រុមហ៊ុននៅក្នុងខេត្ត ហ្វូជៀន (Fujian) ភាគខាងត្បូងរបស់ប្រទេសចិនបានរំឮកពីផលវិបាកក្នុងចំណោមសមាជិករបស់ខ្លួនដែលនាំចេញគ្រឿងបន្លាស់រថយន្ត គ្រឿងចក្រ និងសម្លៀកបំពាក់ទៅកាន់ប្រទេសរុស្ស៊ីថា "យើងគិតថានឹងមានបញ្ហាធំ" ។ប្រទេសចិន បានព្យាយាមនិយាយសម្រាលព្រឹត្តិការដែលបានកើតឡើងកាលពីថ្ងៃចុងសប្ដាហ៍មុន និងបានបង្ហាញការគាំទ្រដល់ទីក្រុងមូស្គូ ដែលបានបញ្ជាក់ពីភាពជាដៃគូគ្មានព្រំដែនភ្លាមៗ មុនពេលរុស្ស៊ី វាយលុកចូលអ៊ុយក្រែន ជាអ្វីដែលរុស្ស៊ី ហៅថាជាប្រតិបត្តិការសឹកពិសេស។  ប៉ុន្តែកាលពីថ្ងៃចន្ទ មន្ត្រីជាន់ខ្ពស់មួយរូបរបស់សហរដ្ឋអាមេរិក បាននិយាយថា ការបះបោរកាលពីចុងសប្តាហ៍ បានធ្វើឲ្យការដឹកនាំរបស់ទីក្រុងប៉េកាំង មានភាពស្ងប់ស្ងាត់ ហើយអ្នកវិភាគមួយចំនួននៅក្នុង និងក្រៅប្រទេសចិន បានចាប់ផ្តើមចោទសួរថាតើទីក្រុងប៉េកាំងត្រូវការបន្ធូរបន្ថយទំនាក់ទំនងនយោបាយ និងសេដ្ឋកិច្ចរបស់ខ្លួនជាមួយទីក្រុងមូស្គូដែរឬទេ៕

បណ្ដាញសង្គម

ព័ត៌មានថ្មីៗ

ថ្នាក់ដឹកនាំ បុគ្គលិកនៃអគ្គនាយកដ្ឋានវិទ្យុនិងទូរទស្សន៍បាយ័ន កាន់វេនបិណ្ឌទី៥ នៅវត្តកោះនរា
10/01/2026 12:10 PM
Facebook Telegram Linkin
វេទិកា និងពិព័រណ៍កសិកម្មកម្ពុជាឆ្នាំ២០២៦ ត្រៀមប្រមូលផ្តុំអ្នកពាក់ព័ន្ធជាង ២៥,០០០នាក់ និងស្តង់ពិព័រណ៍ជាង ៤០០
10/01/2026 11:10 AM
Facebook Telegram Linkin
ប្រសាសន៍សំខាន់ៗរបស់សម្ដេចធិបតី ក្នុងពិធីសម្ពោធបើកឲ្យប្រើប្រាស់ជាផ្លូវការផ្លូវជាតិលេខ១០ ប្រវែងសរុប ១៩៨,៥១៨ គីឡូម៉ែត្រ នៅខេត្តពោធិ៍សាត់
10/01/2026 10:10 AM
Facebook Telegram Linkin
ទិវាមនុស្សចាស់| សម្ដេចធិបតី៖«ការវិនិយោគលើយុវជនវ័យក្មេងនៅថ្ងៃនេះសម្រាប់មនុស្សវ័យចាស់ប្រកបដោយផលិតភាពនៅថ្ងៃអនាគត»
10/01/2026 08:10 AM
Facebook Telegram Linkin
ទិវាមនុស្សចាស់| ព្រះមហាក្សត្រ អំពាវនាវដល់អាជ្ញាធរគ្រប់លំដាប់ថ្នាក់ និងជនរួមជាតិយកចិត្តទុកដាក់ និងជួយបីបាច់ថែរក្សាមនុស្សវ័យចាស់ ជរា ពិការ ក្រីក្រ និងអ្នកគ្មានទីពឹងទាំងឡាយ
10/01/2026 08:10 AM
Facebook Telegram Linkin
ក្រសួងបរិស្ថាន និងក្រសួងមហាផ្ទៃ ជំរុញភាពស្អាតនៅតាមពន្ធនាគារនៅទូទាំងប្រទេស
09/30/2026 08:09 PM
Facebook Telegram Linkin
នាយករដ្ឋមន្រ្តីកាតាថ្កោលទោសអំពើឃោឃៅរបស់អ៊ីស្រាអែលនៅតំបន់ហ្កាហ្សា
09/30/2026 07:09 PM
Facebook Telegram Linkin
គ្រូពេទ្យ៖ ការវាយប្រហាររបស់អ៊ីស្រាអែល នៅតំបន់ហ្កាហ្សា សម្លាប់មនុស្សយ៉ាង​តិច​ ៥នាក់
09/30/2026 07:09 PM
Facebook Telegram Linkin
​តំណាងអចិន្ត្រៃយ៍កម្ពុជា ប្រចាំ UN ស្នើអ្នករាយការណ៍ពិសេសស្តីពីស្ថានភាពសិទ្ធិមនុស្សបន្តយកចិត្តទុកដាក់ចំពោះប្រជាជនភៀសសឹកកម្ពុជា និងការវិលត្រឡប់ទៅកាន់លំនៅឋានវិញដោយសុវត្ថិភាព និងសេចក្តីថ្លៃថ្នូរ
09/30/2026 07:09 PM
Facebook Telegram Linkin
ជើងហោះហើរទៅកាន់អ៊ីស្រាអែល បង្វែរទិសដៅហោះហើរទៅកាន់អារ៉ាប៊ីសាអ៊ូឌីត ក្រោយការប្រកាសអាសន្ន
09/30/2026 06:09 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.