BTV NEWS

សម្ដេចធិបតី អំពាវនាវដល់ជនរួមជាតិជឿទុកចិត្តលើរាជរដ្ឋាភិបាលដែលកំពុងធ្វើកិច្ចការងារយ៉ាងសកម្មស្វែងរកដំណោះស្រាយបញ្ចប់បញ្ហាព្រំដែនកម្ពុជា-ថៃ ឱ្យបានឆាប់រហ័ស

សម្ដេចធិបតីផ្ដល់អនុសាសន៍៧ចំណុច ដល់ក្រសួង-ស្ថាប័នពាក់ព័ន្ធឱ្យយកចិត្តទុកដាក់ក្នុងឱកាសទិវាអក្ខរកម្មអន្តរជាតិ ៨ កញ្ញា ២០២៥

សម្ដេចធិបតី៖ រាជរដ្ឋាភិបាលប្តេជ្ញាចិត្តយ៉ាងមុតមាំលើកកម្ពស់ការងារអក្ខរកម្ម និងបំពាក់បំប៉ន ជំនាញ និងឱកាសសិក្សាពេញមួយជីវិត ជាពិសេសជំនាញឌីជីថល

ប្រជាពលរដ្ឋត្រេកអរនឹងសមិទ្ធផលអាកាសយានដ្ឋានថ្មីដែលត្រៀមបើកដំណើរការ

នយោបាយ និង ការអភិវឌ្ឍន៍

សម្តេចប្រធានព្រឹទ្ធសភា ទទួលជួបប្រធានរដ្ឋសភាឥណ្ឌា

ភ្នំពេញ៖ សម្តេចវិបុលសេនាភក្តី សាយ ឈុំ ប្រធានព្រឹទ្ធសភា នៃព្រះរាជាណាចក្រកម្ពុជា បានទទួលជួបឯកឧត្តម OM BIRLA ប្រធានរដ្ឋសភានៃសាធារណរដ្ឋឥណ្ឌា នៅថ្ងៃទី២២ ខែមេសា ឆ្នាំ២០២២នេះ នៅវិមានព្រឹទ្ធសភា ក្នុងឱកាសដែល ឯកឧត្តមដឹកនាំគណៈប្រតិភូមកបំពេញទស្សនកិច្ចផ្លូវការនៅកម្ពុជា។ដំណើរទស្សនកិច្ចនេះ បានឆ្លុះបញ្ចាំងពីទំនាក់ទំនង កិច្ចសហប្រតិបតិ្តការដ៏ល្អរវាងប្រជាជន និងប្រទេសទាំងពីរដែលមានស្រាប់ និងបន្តពង្រឹងពង្រីកទំនាក់ទំនង កិច្ចសហប្រតិបត្តិការលើគ្រប់វិស័យរវាងកម្ពុជា និងឥណ្ឌារវាងសភាទាំងពីរឱ្យកាន់តែប្រសើរជាងទៀត ដើម្បីជាគុណប្រយោជន៍ដ៏ធំធេងសម្រាប់ប្រជាជននៃប្រទេសទាំងពីរ ទាំងក្នុងពេលបច្ចុប្បន្ន និងពេលអនាគត៕

និស្សិតខ្មែរកំពុងសិក្សានៅប្រទេសជប៉ុន បានចេញ«វីដេអូ»ស្វាគមន៍ដំណើរទស្សនកិច្ចសម្តេចតេជោទៅកាន់ប្រទេសជប៉ុន

ភ្នំពេញ៖ និស្សិត និងបងប្អូនពលករខ្មែរ ដែលកំពុងសិក្សា និងធ្វើការនៅប្រទេសជប៉ុន បានចេញ«វីដេអូឃ្លីប» សម្តែងការស្វាគមន៍ចំពោះដំណើរទស្សនកិច្ចរបស់ សម្តេចតេជោ ហ៊ុន សែន នាយករដ្ឋមន្រ្តី នៃកម្ពុជា ដើម្បីចូលរួមកិច្ចប្រជុំកំពូលស្តីពីបញ្ហាទឹកនៅតំបន់អាស៊ី-ប៉ាស៊ីហ្វិក (APWS) លើកទី៤ ធ្វើឡើងនៅទីក្រុង Kumamoto ប្រទេសជប៉ុន។វីដេអូជាច្រើនឃ្លីប ដែលបានបង្ហាញជាបន្តបន្ទាប់ពីប្រទេសជប៉ុន តាមរយៈបណ្តាញសង្គមហ្វេសបុកដែលទូរទស្សន៍BTV ទទួលបាននាព្រឹកថ្ងៃទី២២ ខែមេសា ឆ្នាំ២០២២នេះ បងប្អូននិស្សិត និងពលករ ទាំងនោះ បានលើកឡើងថា ពួកគេពិតជាសប្បាយចិត្តយ៉ាងខ្លាំងបន្ទាប់ពីដឹងដំណឹងថាសម្តេចតេជោ ហ៊ុន សែន អញ្ជើញទៅកាន់ប្រទេសជប៉ុន ហើយពួកគេបានជូនពរសម្តេច និងប្រតិភូអមដំណើរទទួលបានជោគជ័យសុវត្ថិភាពគ្រប់ពេលវេលាផងដែរ។សូមបញ្ជាក់ថា សម្តេចតេជោ ហ៊ុន សែន នាយករដ្ឋមន្រ្តី នៅព្រឹកថ្ងៃទី២២ ខែមេសា ឆ្នាំ២០២២នេះ បានដឹកនាំគណប្រតិភូទៅកាន់ប្រទេសជប៉ុន ដើម្បីចូលរួមកិច្ចប្រជុំកំពូលស្តីពីបញ្ហាទឹកនៅតំបន់អាស៊ី-ប៉ាស៊ីហ្វិក (APWS) លើកទី៤ ខណៈកិច្ចប្រជុំកំពូលលើកទី៤ ស្តីពី «បញ្ហាទឹកក្នុងតំបន់អាស៊ី-ប៉ាស៊ីហ្វិក» នឹងត្រូវធ្វើឡើង ក្រោមមូលបទ «ទឹកសម្រាប់ការអភិវឌ្ឍប្រកបដោយចីរភាព៖ ឧត្តមានុវត្តន៍ និងអ្នកបន្តវេនជំនាន់ក្រោយ» ដែលនឹងធ្វើឡើងចាប់ពីថ្ងៃទី២៣ ដល់២៤ ខែមេសានេះ។កិច្ចប្រជុំខាងលើនេះ ធ្វើឡើងក្នុងគោលបំណងចែករំលែកទស្សនទាន ការប្រមើមើលទៅមុខនៃដំណោះស្រាយ និងការអនុវត្ត ជូនចំពោះប្រមុខរដ្ឋ ប្រមុខរដ្ឋាភិបាល ដែលគាំទ្រដល់ការសម្រេចចិត្តជាគោលនយោបាយ ក្នុងការពន្លឿនសកម្មភាពឲ្យសម្រេចបាននូវការលូតលាស់ប្រកបដោយគុណភាព ឆ្ពោះទៅកាន់សង្គមមួយដែលមានភាពធន់ ប្រកបដោយបរិយាប័ន្ន និងដោយចីរភាព ដោយដោះស្រាយនូវរាល់បញ្ហាដែលពាក់ព័ន្ធនឹងទឹក ក្រោយពេលដែលស្ថានភាពជំងឺកូវីដ-១៩ បានប្រសើរឡើងវិញ ក្នុងតំបន់អាស៊ី-បាស៊ីហ្វិក។កិច្ចប្រជុំដ៏សំខាន់នោះក៏មានគោលបំណងជំរុញកិច្ចសហការ និងភាពជាដៃគូបន្ថែមទៀត ដើម្បីប្រើប្រាស់ហេដ្ឋារចនាសម្ព័ន្ធប្រកបដោយគុណភាព ដើម្បីគាំទ្រនៃការលូតលាស់ប្រកបដោយគុណភាពផងដែរ។តាមរយៈវីដេអូឃ្លីបខាងលើ បងប្អូនជានិស្សិត និងពលករខ្មែរ ដែលកំពុងសិក្សា និងធ្វើការនៅប្រទេសជប៉ុននេះដែរ ក៏បានថ្លែងអំណរគុណ និងកោតសរសើរចំពោះសម្តេចតេជោ ហ៊ុន សែន ដែលបានខិតខំ និងយកចិត្តទុកដាក់បំផុត ក្នុងការសហការ និងរកដំណោះស្រាយនូវបញ្ហាទឹក ដែលពិភពលោកកំពុងជួបប្រទេសនេះផងដែរ៕អត្ថបទ៖ បាន ចក់

រដ្ឋសភាកម្ពុជារៀបចំទទួលបដិសណ្ឋារកិច្ចជាផ្លូវការ ប្រធានសភាជាន់ទាប នៃសាធារណរដ្ឋឥណ្ឌា នៅខាងមុខវិមានរដ្ឋសភា

ភ្នំពេញ៖ បន្ទាប់មកសម្តេចអគ្គមហាពញាចក្រី ហេង សំរិន ប្រធានរដ្ឋសភា នៃព្រះរាជាណាចក្រកម្ពុជា ក៏បានទទួលជួបសវនាការ និងពិភាក្សាការងារទ្វេភាគីជាមួយ ឯកឧត្តម អំ បឺរឡា (OM BIRLA) ប្រធានសភាជាន់ទាប នៃសាធារណរដ្ឋឥណ្ឌា នាព្រឹកថ្ងៃទី២២ ខែមេសា ឆ្នាំ២០២២ នៅវិមានរដ្ឋសភា បន្ទាប់ពីបានអញ្ជើញមកដល់ព្រះរាជាណាចក្រកម្ពុជា កាលពីរាត្រីថ្ងៃទី២១ ខែមេសា ឆ្នាំ២០២២នេះ ដើម្បីបំពេញទស្សនកិច្ចជាផ្លូវការ និងមិត្តភាព នៅព្រះរាជាណាចក្រកម្ពុជា រយៈពេល៤ថ្ងៃ គឺចាប់ពីថ្ងៃទី២១ ដល់ថ្ងៃទី២៤ ខែមេសា ឆ្នាំ២០២២។សូមជម្រាបថា បន្ទាប់ពីបញ្ចប់សវនាការ និងពិភាក្សាការងារទ្វេភាគីជាមួយសម្តេចអគ្គមហាពញាចក្រី ហេង សំរិន ប្រធានរដ្ឋសភារួចមក ឯកឧត្តមប្រធានគណៈប្រតិភូ នឹងត្រូវចូលជួបសម្តែងការគួរសមជាមួយ សម្តេចវិបុលសេនាភក្តី សាយ ឈុំ ប្រធានព្រឹទ្ធសភានៃព្រះរាជាណាចក្រកម្ពុជា ហើយនៅវេលារសៀលថ្ងៃនេះដែរ ឯកឧត្តម អំ បឺរឡា (OM BIRLA) និងដឹកនាំគណៈប្រតិភូសភាជាន់ទាប នៃសាធារណរដ្ឋឥណ្ឌា ចូលក្រាបបង្គំគាល់ ព្រះករុណាព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា នៅព្រះបរមរាជវាំង៕

សម្តេចតេជោ ហ៊ុន សែន អញ្ជើញទៅចូលរួមកិច្ចប្រជុំកំពូលស្តីពីបញ្ហាទឹកតំបន់អាស៊ី-ប៉ាស៊ីហ្វិកលើកទី៤ នៅប្រទេសជប៉ុន

ភ្នំពេញ៖ តមតាមការអញ្ជើញរបស់ឯកឧត្តម គីស៊ីដា ហ៊្វីមីអូ នាយករដ្ឋមន្ត្រីជប៉ុន និងគណៈកម្មាធិការ ប្រតិបត្តិចម្រុះនៃកិច្ចប្រជុំកំពូលលើកទី៤ ស្តីពីបញ្ហាទឹកនៅតំបន់អាស៊ី-ប៉ាស៊ីហ្វិក នៅព្រឹកថ្ងៃទី២២ ខែមេសានេះ សម្តេចតេជោ ហ៊ុន សែន នាយករដ្ឋមន្ត្រី បានដឹកនាំគណៈប្រតិភូជាន់ខ្ពស់អញ្ជើញទៅចូលរួមកិច្ចប្រជុំកំពូលស្តីពីបញ្ហាទឹកនៅតំបន់អាស៊ី-ប៉ាស៊ីហ្វិក (APWS) លើកទី៤ ដែលប្រារព្ធធ្វើឡើងនៅទីក្រុង Kumamoto ប្រទេសជប៉ុន។កិច្ចប្រជុំកំពូលលើកទី៤ ស្តីពីបញ្ហាទឹកក្នុងតំបន់អាស៊ី-ប៉ាស៊ីហ្វិក នឹងត្រូវធ្វើឡើងក្រោមមូលបទ ទឹកសម្រាប់ការអភិវឌ្ឍប្រកបដោយចីរភាព៖ ឧត្តមានុវត្តន៍ និងអ្នកបន្តវេនជំនាន់ក្រោយដែលនឹងធ្វើឡើងចាប់ពីថ្ងៃទី២៣ ដល់២៤ មេសា ។កិច្ចប្រជុំនេះធ្វើឡើងក្នុងគោលបំណងចែករំលែកទស្សនទាន ការប្រមើមើលទៅមុខនៃដំណោះស្រាយ និងការអនុវត្តជូនចំពោះប្រមុខរដ្ឋ ប្រមុខរដ្ឋាភិបាល ដែលគាំទ្រដល់ការសម្រេចចិត្តជាគោលនយោបាយ ក្នុងការពន្លឿនសកម្មភាពឲ្យសម្រេចបាននូវការលូតលាស់ប្រកបដោយគុណភាព ឆ្ពោះទៅកាន់សង្គមមួយដែលមានភាពធន់ ប្រកបដោយបរិយាប័ន្ន និងដោយចីរភាព ដោយដោះស្រាយនូវរាល់បញ្ហាដែលពាក់ព័ន្ធនឹងទឹក ក្រោយពេលដែលស្ថានភាពជម្ងឺកូវីដ-១៩ បានប្រសើរឡើងវិញ ក្នុងតំបន់អាស៊ី-បាស៊ីហ្វិក។ឯកឧត្តម ស្រុី ថាមរុង្គ រដ្ឋមន្ត្រីប្រតិភូអមនាយករដ្ឋមន្ត្រីបានបញ្ជាក់យ៉ាងដូច្នេះថា ទឹកជាបញ្ហាដែលមិនអាចខ្វះបាននិងមិនអាចកាត់ផ្តាច់ពីបញ្ហាស្បៀងដែលថ្នាក់ដឹកនាំនឹងជជែកពិភាក្សាផ្លាស់ប្តូរមតិយោបល់គ្នា ដើម្បីការអភិវឌ្ឍដោយចីរភាព។ អញ្ជើញអម សម្តេចតេជោនាយករដ្ឋមន្ត្រី នៅក្នុងកិច្ចប្រជុំកំពូលខាងលើ រួមមាន ឯកឧត្តម លឹម គានហោ រដ្ឋមន្ត្រីក្រសួងធនធានទឹក និងឧតុនិយម និងមន្ត្រីជាន់ខ្ពស់នៃ រាជរដ្ឋាភិបាលកម្ពុជាមួយចំនួនទៀតផងដែរ ។នៅថ្ងៃទី២៣ ខែមេសា ឆ្នាំ២០២២ នៅចំពោះមុខប្រមុខរាជ/រដ្ឋាភិបាល និងឥស្សរជន នយោបាយ ព្រមទាំងតំណាងអង្គការជាតិ និងអង្គការអន្តរជាតិជាច្រើនរូប សម្តេចតេជោនាយករដ្ឋមន្ត្រី នឹងអញ្ជើញថ្លែងសុន្ទរកថាគន្លឹះនៅក្នុងកិច្ចប្រជុំកំពូល ដោយផ្តោតលើសារសំខាន់នៃទឹក និងបញ្ហានានាពាក់ព័ន្ធនឹងទឹក ក៏ដូចជាតម្រូវការចាំបាច់ក្នុងការធ្វើការជាមួយគ្នា ដើម្បីគ្រប់គ្រង ធនធានដ៏ចាំបាច់។ក្រៅពីនេះ សម្តេចតេជោនាយករដ្ឋមន្ដ្រី និងឯកឧត្តម គីស៊ីដា ហ្វឺមីអូ នាយករដ្ឋមន្ត្រីជប៉ុននឹង មានកិច្ចប្រជុំទ្វេភាគី ដើម្បីពង្រឹង និងលើកកម្ពស់បន្ថែមទៀតនូវទំនាក់ទំនង និងកិច្ចសហប្រតិបត្តិការ រវាងប្រទេសទាំងពីរ។ នាយករដ្ឋមន្ត្រីទាំងពីរ ក៏នឹងធ្វើជាអធិបតីដ៏ខ្ពង់ខ្ពស់ក្នុងពិធីចុះហត្ថលេខាលើ អនុស្សារណៈនៃកិច្ចសហប្រតិបត្តិការរវាងក្រសួងធនធានទឹក និងឧតុនិយមកម្ពុជា និងក្រសួងដែនដី ហេដ្ឋារចនាសម្ព័ន្ធ ដឹកជញ្ជូន និងទេសចរណ៍ជប៉ុន ផងដែរ។សម្តេចតេជោនាយករដ្ឋមន្រ្តី ក៏រំពឹងថា នឹងជួបពិភាក្សាការងារទ្វេភាគីជាមួយឯកឧត្តម ផនខាំ វីផាវ៉ាន់ នាយករដ្ឋមន្ត្រី នៃសាធារណរដ្ឋប្រជាធិបតេយ្យប្រជាមានិតឡាវ និងទទួល ការជួបសម្តែងការគួរសម ពីសំណាក់ឥស្សរជននយោបាយ និងធុរជន ជប៉ុនមួយចំនួនផងដែរ។គួរបញ្ជាក់ថា អតីតនាយករដ្ឋមន្ត្រីជប៉ុន បានស្វះស្វែងបង្កើតឱកាសមួយសម្រាប់ប្រមុខរដ្ឋ និងរដ្ឋាភិបាលក្នុងតំបន់អាស៊ី-ប៉ាស៊ីហ្វិក ដើម្បីជួបផ្ទាល់ និងពិភាក្សាអំពីបញ្ហាទឹក។ដោយ ផ្អែកលើការឯកភាពគ្នានេះ ចាប់តាំងពីឆ្នាំ ២០០៧ មក មានកិច្ចប្រជុំកំពូលស្តីពីបញ្ហាទឹក ក្នុងតំបន់អាស៊ី-ប៉ាស៊ីហ្វិក ចំនួន៣លើករួចមកហើយ។ លើកទី១ ធ្វើឡើងនៅខែធ្នូ ឆ្នាំ២០០៧ ក្នុងប្រទេសជប៉ុនក្រោមមូលបទ សន្តិសុខទឹក៖ ភាពជាមេដឹកនាំ និងការបេ្តជ្ញាចិត្ត, លើកទី២ ធ្វើឡើងនៅខែឧសភា ឆ្នាំ២០១៣ ក្នុងប្រទេសថៃ ក្រោមមូលបទ សន្តិសុខទឹក៖ ភាពជាមេដឹកនាំ និងការបេ្តជ្ញាចិត្ត ដោយផ្តោតលើបញ្ហាប្រឈមគ្រោះមហន្តរាយពីទឹក និងលើកទី៣ ធ្វើឡើងនៅខែមេសា ឆ្នាំ២០១៧ ក្នុងប្រទេសមីយ៉ាន់ម៉ា ក្រោមមូលបទសន្តិសុខទឹកសម្រាប់ការអភិវឌ្ឍដោយចីរភាព៕

អន្តរក្រសួង គាំទ្រការរៀបចំបង្កើតតំបន់បេតិកភណ្ឌធម្មជាតិ វប្បធម៌ប្រវត្តិសាស្រ្តនគរភ្នំ-ឈើកាច់បាភ្នំ

ភ្នំពេញ៖ ក្រសួងបរិស្ថាន និងក្រសួងវប្បធម៌ និងវិចិត្រសិល្បៈ បានធ្វើសកម្មភាពរួមគ្នា គាំទ្រការរៀបចំបង្កើតតំបន់បេតិកភណ្ឌធម្មជាតិ វប្បធម៌ប្រវត្តិសាស្រ្តនគរភ្នំ-ឈើកាច់បាភ្នំ។គួរបញ្ជាក់ថា កាលពីថ្ងៃទី២០ ខែមេសា ឆ្នាំ២០២២ ឯកឧត្តម សាយ សំអាល់ រដ្ឋមន្ត្រីក្រសួងបរិស្ថាន បានដឹកនាំកិច្ចប្រជុំអន្តរក្រសួង ស្តីពីការសិក្សា កំណត់ និងរៀបចំបង្កើតតំបន់បេតិកភណ្ឌធម្មជាតិ និងវប្បធម៌ប្រវត្តិសាស្រ្ត នគរភ្នំ-ឈើកាច់បាភ្នំ ស្ថិតនៅក្នុងឃុំជើងភ្នំ និងឃុំឈើកាច់ ស្រុកបាភ្នំ ខេត្តព្រៃវែង។កិច្ចប្រជុំនោះមានការអញ្ជើញចូលរួមពីតំណាងក្រសួងវប្បធម៌ និងវិចិត្រសិល្បៈ ក្រសួងមហាផ្ទៃ ក្រសួងការពារជាតិ ក្រសួងសេដ្ឋកិច្ច និងហិរញ្ញវត្ថុ ក្រសួងរៀបចំដែនដីនគរូបនីយកម្ម និងសំណង់ ក្រសួងកសិកម្ម រុក្ខាប្រមាញ់ និងនេសាទ ក្រសួងរ៉ែ និងថាមពល ក្រសួងទេសចរណ៍ និងតំណាងរដ្ឋបាលខេត្តព្រៃវែង។មតិរួមរបស់អន្តរក្រសួងបានគាំទ្រចំពោះការសិក្សា កំណត់ និងរៀបចំបង្កើតតំបន់បេតិកភណ្ឌធម្មជាតិ និងវប្បធម៌ប្រវត្តិសាស្រ្ត នគរភ្នំ-ឈើកាច់បាភ្នំ ដែលជាទីតាំងដ៏សំខាន់នៅក្នុងប្រវត្តិសាស្ត្រនៃ នគរគោកធ្លក ឬនគរភ្នំ ដើមកំណើតទឹកដីនៃព្រះរាជាណាចក្រកម្ពុជា៕

លោកជំទាវ ឱ វណ្ណឌីន៖ ទោះខេត្ដរតនគិរី ត្រូវលើកលែងកាតព្វកិច្ចពាក់ម៉ាស តែប្រជាជនភាគច្រើននៅតែបន្តពាក់ម៉ាស និងអនុវត្តន៍វិធានសុខាភិបាល

ភ្នំពេញ ៖ លោកជំទាវ ឱ វណ្ណឌីន រដ្ឋលេខាធិការក្រសួងសុខាភិបាល និងជាប្រធានគណៈកម្មការចំពោះកិច្ចចាក់វ៉ាក់សាំងកូវីដ១៩ ក្របខណ្ឌទូទាំងប្រទេស កាលពីថ្ងៃទី២០ ខែមេសា ឆ្នាំ២០២២ ក្នុងដំណើរបន្តចុះពិនិត្យដំណើរការចាក់វ៉ាក់សាំងបង្ការជំងឺកូវីដ-១៩ នៅខេត្ដរតនគិរី បានលើកឡើងថា បើទោះបីខេត្ដរតនគិរីត្រូវបានលើកលែងការពាក់ម៉ាសក្ដី ប៉ុន្ដែប្រជាជនភាគច្រើននៅតែបន្តពាកម៉ាស និងអនុវត្តន៍វិធានសុខាភិបាល។ តាមរយៈសកម្មភាពនេះលោកជំទាវវាយតម្លៃថា ប្រជាជនមានការយល់ដឹងច្រើនអំពីការការពារសុខភាព។គួរបញ្ជាក់ថា នៅរសៀលថ្ងៃពុធទី២០ ខែមេសា ឆ្នាំ២០២២ លោកជំទាវ ឱ វណ្ណឌីន , លោកស្រី វេជ្ជបណ្ឌិត លី អាយលែន តំណាងអង្គការសុខភាពពិភពលោក ប្រចាំប្រទេសកម្ពុជា និងលោកស្រីវេជ្ជបណ្ឌិត ហ្វារូហ្វ ហ្វូយូហ្សាត តំណាងអង្គការ UNICEFប្រចាំប្រទេសកម្ពុជា រួមទាំងមន្រ្តីពាក់ព័ន្ធមួយចំនួនទៀត បានចុះត្រួតពិនិត្យដំណើរការចាក់វ៉ាកសាំងកូវីដ-១៩ នៅមណ្ឌលសុខភាពបរខាំ ខេត្តរតនគីរី និងបានបន្តដំណើរទៅកាន់ច្រកព្រំដែនអន្តរជាតិ អូយ៉ាដា ខេត្តរតនគីរី ដើម្បីសាកសួរ និងពិនិត្យស្ថានភាពជំងឺកូវីដ-១៩ រួមទាំងដំណើរការចាក់វ៉ាក់សាំងផងដែរ៕

កម្ពុជាកាត់បន្ថយការធ្វើចត្តាឡីស័កអ្នកមកពីបរទេសមិនបានចាក់វ៉ាក់សាំង មកត្រឹម៧ថ្ងៃ

ភ្នំពេញ៖ រាជរដ្ឋាភិបាលកម្ពុជា បានសម្រេចកាត់បន្ថយការធ្វើចត្តាឡីស័ក ចំពោះអ្នកដំណើរមកពីបរទេស ដែលមិនបានចាក់វ៉ាក់សាំងកូវីដ-១៩ ពីរយៈពេល១៤ថ្ងៃ មកត្រឹមរយៈពេល ៧ថ្ងៃវិញ និងត្រូវអនុវត្តវិធានការសុខាភិបាលមួយចំនួនទៀត ។ យោងតាមសេចក្តីប្រកាសព័ត៌មាន របស់ក្រសួងសុខាភិបាល នៅថ្ងៃទី២១ ខែមេសា ឆ្នាំ២០២២នេះ បានឲ្យដឹងថា ដោយមានការឯកភាពពីសម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា ក្រសួងមានការកែសម្រួលលក្ខខណ្ឌធ្វើចត្តាឡីស័ក ចំពោះអ្នកដំណើរមកពីបរទេស ដែលមិនបានចាក់វ៉ាក់សាំង ឬមិនទាន់បានចាក់វ៉ាក់សាំងពេញលេញ ។ ប្រកាសព័ត៌មានបានបន្តថា ចំណុចត្រូវកែសម្រួលនោះ ទី១. កែសម្រួលរយៈពេលធ្វើចត្តាឡីស័កពី ១៤ថ្ងៃ មកនៅត្រឹម ៧ថ្ងៃ និងទី២. កែសម្រួលលក្ខខណ្ឌធ្វើតេស្ត ចំពោះអ្នកធ្វើចត្តាឡីស័ក ក្នុងនោះអ្នកដំណើរមកពីបរទេសចូលតាមផ្លូវអាកាស ត្រូវធ្វើតេស្តរហ័សនៅថ្ងៃទី៧ ដើម្បីបញ្ចប់ការធ្វើចត្តាឡីស័ក និងអ្នកមកតាមព្រំដែនគោក ត្រូវធ្វើតេស្តរហ័សចំនួន ២លើក ដែលលើកទី១ នៅថ្ងៃទី១ មុនពេលចូលមណ្ឌលចត្តាឡីស័ក និងលើកទី២ នៅថ្ងៃទី៧ ដើម្បីបញ្ចប់ការធ្វើចត្តាឡីស័ក ។ ប្រភពបន្ថែមថា ជាមួយនេះ អាជ្ញាធរមានសមត្ថកិច្ចពាក់ព័ន្ធ ត្រូវបន្តរក្សាការចាក់វ៉ាក់សាំងកូវីដ១៩ ដូសទី១ ឬដូសទី២ (ចំពោះអ្នកដែលបានចាក់វ៉ាក់សាំងដូសទី១រួច ហើយមានលក្ខណៈសម្បត្តិគ្រប់គ្រាន់ សម្រាប់ការចាក់ដូសទី២ តាមរបបចាក់វ៉ាក់សាំង) ដូចដែលបានអនុវត្តរហូតមកមកដល់ពេលនេះជូនប្រជាពលរដ្ឋ និងពលករកម្ពុជា នៅថ្ងៃដែលត្រូវបានអនុញ្ញាតិឲ្យចាកចេញពីមណ្ឌលចត្តាឡីស័ក៕

គ.ជ.ប បានបញ្ចប់ការចាប់ឆ្នោតកំណត់លេខរៀងបក្សនយោបាយសម្រាប់ការបោះឆ្នោតឃុំ-សង្កាត់

ភ្នំពេញ៖ ឯកឧត្តម ហង្ស ពុទ្ធា អ្នកនាំពាក្យគណៈកម្មាធិការជាតិរៀបចំការបោះឆ្នោត ហៅកាត់ គ.ជ.ប ឲ្យដឹងថា គ.ជ.ប បានបញ្ចប់ការចាប់ឆ្នោតកំណត់លេខរៀងរបស់គណបក្សបក្សនយោបាយ សម្រាប់ចូលរួមប្រកួតប្រជែងការបោះឆ្នោតជ្រើសរសើក្រុមប្រឹក្សាឃុំ-សង្កាត់ នាពេលខាងមុខ។ថ្លែងប្រាប់BTV News នៅថ្ងៃទី២០ ខែមេសា ឆ្នាំ២០២២ ឯកឧត្តម ហង្ស ពុទ្ធា អ្នកនាំពាក្យគណៈកម្មាធិការជាតិរៀបចំការបោះឆ្នោត បានឲ្យដឹងថា បន្ទាប់ពីដំណើរការឈរឈ្មោះបេក្ខជន និងចុះបញ្ជីបេក្ខជនគណបក្សនយោបាយបានបិទបញ្ចប់ គ.ជ.ប បានដំណើរចាប់ឆ្នោតកំណត់លេខរៀងរបស់គណបក្សនយោបាយតាមបណ្តាគណៈកម្មការឃុំ-សង្កាត់រៀបចំការបោះឆ្នោតនៅទូទាំងប្រទេស។ ឯកឧត្តម ហង្ស ពុទ្ធា បន្តថា ការចាប់ឆ្នោតកំណត់លេខរៀងគណបក្សនយោបាយបានបញ្ចប់រួចរាល់ ដោយមានការអញ្ជើញចូលរួមពីគ្រប់ភាគីពាក់ព័ន្ធ រួមមាន គណបក្សនយោបាយ អាជ្ញាធរមូលដ្ឋាន និងតំណាងប្រជាពលរដ្ឋជាព្រះសង្ឃជាដើម។ឯកឧត្តម ហង្ស ពុទ្ធា បញ្ជាក់ថា ការចាប់ឆ្នោតកំណត់លេខរៀងគណបក្សនយោបាយ ក្នុងគោលបំណងបង្កលក្ខណៈងាយស្រួលដល់ការឃោសនាបោះឆ្នោត និងផ្តល់ការចំណាំលេខរៀងជូនប្រជាពលរដ្ឋដែលនឹងចូលរួមការបោះឆ្នោតតាមការិយាល័យរៀបចំការបោះឆ្នោតក្នុងឃុំ-សង្កាត់នីមួយៗ។ឯកឧត្តម ហង្ស ពុទ្ធា សង្កត់ធ្ងន់ថា ការចាប់ឆ្នោតកំណត់លេខរៀងគណបក្សនយោបាយ គឺជាការផ្តល់សិទ្ធិ និងការសម្រេចចិត្តជូនប្រជាពលរដ្ឋ ដើម្បីជ្រើសរើសគណបក្សដែលខ្លួនពេញចិត្ត ក្នុងការឆ្លើយតបរាល់តម្រូវការនានារបស់ប្រជាពលរដ្ឋក្នុងមួលដ្ឋាន។គួរបញ្ជាក់ថា បន្ទាប់ពីការចាប់ឆ្នោតកំណត់លេខរៀងគណបក្សនយោបាយ គ.ជ.ប នឹងឈានទៅរកការត្រៀមដំណើរការឃោសនាបោះឆ្នោត ខណៈការបោះឆ្នោតជ្រើសរើសក្រុមប្រឹក្សាឃុំ-សង្កាត់ នឹងប្រព្រឹត្តទៅនៅថ្ងៃទី៥ ខែមិថុនា ខាងមុខនេះ៕អត្ថបទ៖ សេក ឧត្តម

សម្តេចតេជោ ហ៊ុន សែន អញ្ជើញសម្ពោធសមិទ្ធផលនានាគម្រោងការពារទឹកជំនន់ និងកែលម្អប្រព័ន្ធប្រឡាយ-លូ ក្នុងរាជធានីភ្នំពេញជំហានទី៤

ភ្នំពេញ៖ សម្តេចតេជោ ហ៊ុន សែន នាយករដ្ឋមន្ត្រី អញ្ជើញសម្ពោធសមិទ្ធផលនានា ដែលជាគម្រោងការពារទឹកជំនន់ និងកែលម្អប្រព័ន្ធប្រឡាយ-លូ ក្នុងរាជធានីភ្នំពេញជំហានទី៤ នៅព្រឹកថ្ងៃទី២០ ខែមេសា ឆ្នាំ២០២២នេះ។គម្រោងការពារទឹកជំនន់ និងកែលំអប្រព័ន្ធប្រឡាយលូក្នុងរាជធានីភ្នំពេញ ជំហានទី៤នេះ ចំណាយថវិកាទឹកប្រាក់សរុបប្រមាណ៣០លានដុល្លាអាមេរិក ជាជំនួយឥតសំណងរបស់រដ្ឋាភិបាលជប៉ុន។ គម្រោងនេះរួមមាន៖ ដាក់បណ្តាញលូមេ នៅក្នុងភូមិសាស្ត្រខណ្ឌទួលគោក ប្រវែង ៨.២គីឡូម៉ែត្រ, ដាក់បណ្តាញលូមេ នៅក្នុងភូមិសាស្ត្រខណ្ឌដូនពេញប្រវែង ៤.៤គីឡូម៉ែត្រ, សាងសង់អាងស្តុកទឹកក្រោមដី និងសាងសង់ស្ថានីយ៍បូមទឹក នៅសួនច្បារមុខក្រុមប្រឹក្សាអភិវឌ្ឍន៍កម្ពុជា CDC, ដំឡើងរបាមេកានិចស្វ័យប្រវត្តិ ដើម្បីប្រមូលសំរាមនៅមុខផ្លូវបង្ហូរទឹកនៅស្ថានីយបូមទឹកចតុមុខព្រះគន្លង់១ ព្រះគន្លង់២ និងផ្សារចាស់ និងផ្តល់រថយន្តបូមទឹកចល័តចំនួន ២គ្រឿង។គម្រោងសាងសង់សំណង់ទាំងអស់នេះគឺដើម្បីការពារទឹកជំនន់ និងកែលម្អប្រព័ន្ធប្រឡាយ-លូ ក្នុងរាជធានីភ្នំពេញ ជំហានទី៤ ត្រូវបានសម្តេចតេជោ ហ៊ុន សែន អញ្ជើញជាអធិ បតីភាពបើកការដ្ឋានសាងសង់កាលពីថ្ងៃទី០៤ ខេមីនា ឆ្នាំ២០១៩កន្លងទៅ។ គម្រោងនេះ ប្រើរយៈពេលសាងសង់ប្រមាណជា ៣៦ខែ ដោយចាប់ផ្តើមគម្រោងពីថ្ងៃទី០១ ខែធ្នូ ឆ្នាំ២០១៨ បញ្ចប់នៅថ្ងៃទី៣១ ខែតុលា ឆ្នាំ២០២១៕

ព្រឹកស្អែកនេះ សម្តេចតេជោ ហ៊ុន សែន នឹងអញ្ជើញសម្ពោធគម្រោងការពារទឹកជំនន់ និងកែលម្អប្រព័ន្ធប្រឡាយ-លូ រាជធានីភ្នំពេញជំហានទី៤

ភ្នំពេញ៖ សម្តេចតេជោ ហ៊ុន សែន នាយករដ្ឋមន្ត្រី និងឯកឧត្តម មីកាមិ ម៉ាសាហ៊ីរ៉ុ ឯកអគ្គរដ្ឋទូតជប៉ុនប្រចាំកម្ពុជា នឹងអញ្ជើញសម្ពោធគម្រោងការពារទឹកជំនន់ និងកែលម្អប្រព័ន្ធប្រឡាយ-លូ ក្នុងរាជធានីភ្នំពេញជំហានទី៤ នៅព្រឹកថ្ងៃទី២០ ខែមេសា ស្អែកនេះ។គួរបញ្ជាក់ថា គម្រោងការពារទឹកជំនន់ និងកែលំអប្រព័ន្ធប្រឡាយលូរាជធានីភ្នំពេញ ជំហានទី៤នេះ មានការ ដាក់បណ្តាញលូមេ នៅក្នុងភូមិសាស្ត្រខណ្ឌទួលគោក ប្រវែង ៨.២គីឡូម៉ែត្រ, ដាក់បណ្តាញលូមេ នៅក្នុងភូមិសាស្ត្រខណ្ឌដូនពេញប្រវែង ៤.៤គីឡូម៉ែត្រ, សាងសង់អាងស្តុកទឹកក្រោមដី និងសាងសង់ស្ថានីយបូមទឹក នៅសួនច្បារមុខក្រុមប្រឹក្សាអភិវឌ្ឍន៍កម្ពុជា CDC, ដំឡើងរបាមេកានិចស្វ័យប្រវត្តិ ដើម្បីប្រមូលសំរាមនៅមុខផ្លូវបង្ហូរទឹកនៅស្ថានីយបូមទឹកចតុមុខព្រះគន្លង់១ ព្រះគន្លង់២ និងផ្សារចាស់ និងផ្តល់រថយន្តបូមទឹកចល័តចំនួន ២គ្រឿង។គម្រោងនេះ ចំណាយថវិកាប្រមាណ ៣០លានដុល្លាអាមេរិក ជាជំនួយឥតសំណងរបស់រដ្ឋាភិបាល និងប្រជាជនជប៉ុន៕

បណ្ដាញសង្គម

ព័ត៌មានថ្មីៗ

រដ្ឋមន្រ្តីសុខាភិបាល អនុញ្ញាតឱ្យគណៈកម្មការប្រយុទ្ធប្រឆាំងផលិតផលក្លែងក្លាយ ដែលបង្កគ្រោះថ្នាក់មានហានិភ័យខ្ពស់ដល់សុខភាព និងសុវត្ថិភាពសង្គម ជួបសម្តែងការគួរសម និងពិភាក្សាការងារ