នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
ឯកឧត្តម កែវ រតនៈ បញ្ជាក់ជាថ្មីថាបច្ចុប្បន្នកម្ពុជាពុំបាននាំចូលអគ្គិសនី ប្រេងសាំង និង​ឧស្ម័ន​ពី​ប្រទេស​ថៃ​នោះទេ
ទំនប់អូរតេធិបតី ត្រៀមផ្គត់ផ្គង់ទឹកស្អាតជូនពលរដ្ឋរាប់ពាន់គ្រួសារបន្ថែមទៀតក្នុងខេត្តមណ្ឌលគិរី
រដ្ឋមន្ត្រីអាកាសចរណ៍ស៊ីវិល ចុះពិនិត្យអាកាសយានដ្ឋានអន្តរជាតិតេជោ ដើម្បីត្រៀម​ផ្តល់​វិញ្ញា​បន​ប័ត្រ​ដល់ប្រតិបត្តិករ
ស្ពានមិត្តភាពកម្ពុជា-ចិន មេគង្គក្រចេះ” គ្រោងនឹងបើកឱ្យឆ្លងកាត់បណ្តោះអាសន្ន អំឡុង​ពិធី​បុណ្យ​ដា​​ក់បិណ្ឌ និងភ្ជុំបិណ្ឌនៅខែកញ្ញាខាងមុខនេះ សម្រាប់យានយន្តធុនតូច

នយោបាយ​ និង ការអភិវឌ្ឍន៍

កងទ័ពកម្ពុជា-វៀតណាមនឹងបន្តធ្វើលំហាត់សមយុទ្ធរួមគ្នាលើការប្រឆាំងអំពើភេរវកម្ម ឧក្រិដ្ឋកម្មឆ្លងដែន

2022/03/18 03:32:58 pm        694
Facebook Telegram Linkin
ភ្នំពេញ៖ នៅក្នុងកិច្ចជំនួបរវាងសម្តេចពិជ័យសេនាទៀ បាញ់ ឧបនាយករដ្ឋមន្រ្តីរដ្ឋមន្រ្តីក្រសួងការពារជាតិកម្ពុជា និងឧត្តមសេនីយ៍ឯកបម្រុង ង្វៀង អ៊ឹង គឿង (NGUYEN TAN CUONG) ប្រធានអគ្គសេនាធិការកងទ័ពប្រជាជនវៀតណាម និងជាអនុរដ្ឋមន្តី ក្រសួងការពារប្រទេសវៀតណាម បានសន្យាថា នឹងបន្តធ្វើលំហាត់ហ្វឹកហ្វឺនរួមគ្នា ផ្នែកប្រឆាំងភេរវកម្ម ឧក្រិដ្ឋកម្មឆ្លងដែន និងសង្រ្គោះគ្រោះមហន្តរាយបន្តទៀត បន្ទាប់ពីមាន ការផ្អាកមួយរយៈដោយសារបញ្ហាកូវីដ១៩។នៅក្នុងកិច្ចជំនួបនាព្រឹកថ្ងៃទី១៨ ខែមីនា ឆ្នាំ២០២២នេះ ភាគីទាំងពីរបានធ្វើការវាយតម្លៃខ្ពស់ចំពោះ​លទ្ធផល​អនុវត្តផែនការកិច្ចសហប្រតិបត្តិការឆ្នាំ២០២១ និងបានដាក់ចេញផែនការកិច្ច​សហប្រតិបត្តិការ​ឆ្នាំ២០២២ ដោយប្តេជ្ញាចិត្តបន្តសហការរួមគ្នាយ៉ាង​ស្អិត​រមួត​ក្នុង​ភាពអ្នកជិតខាងល្អ មិត្តភាពជាប្រពៃណី ​សំដៅលើកកម្ពស់ទំនាក់ទំនង​ជាដៃគូយុទ្ធសាស្ត្រគ្រប់ជ្រុងជ្រោយ​ ដើម្បីពង្រឹង និង​ពង្រីកចំណងមិត្តភាព ​សាមគ្គីភាព និងកិច្ចសហប្រតិបត្តិការលើគ្រប់វិស័យឲ្យមានភាពរីកចម្រើន ដែលជា​កត្តា​គន្លឹះបម្រើ ​ឲ្យផលប្រយោជន៍ទៅវិញទៅមករបស់កងទ័ព ​និងប្រជាជនប្រទេសទាំងពីរ កម្ពុជា-វៀតណាម។ ថ្នាក់ដឹកនាំនៃក្រសួងការពារជាតិ និងប្រទេសនៃប្រទេសទាំងពីរ​ក៏បានពិភាក្សា និងវាយតម្លៃ​ក្នុង​តំបន់ និងសកលលោក​មានការ​គំរាមកំហែង​ ពីជំងឺកូដ-១៩ ជា​សកលបន្តរាតត្បាត​ទូទាំង​ពិភពលោក​ និងពេលថ្មីៗនេះ ក៏មានសង្គ្រាមផ្ទុះឡើង​នៅទ្វីប​អឺរ៉ុប​រវាង​រុស្ស៊ី​ និងអ៊ុយក្រែន​ថែមទៀត​ផងដែរ។នៅក្នុងកិច្ចជំនួបនោះសម្តេចពិជ័យសេនា ទៀ បាញ់ ក៏បានស្នើក្រសួងការពារប្រទេសវៀតណាម បន្ត​ពង្រឹងកិច្ចសហប្រតិបត្តិការការងារសម្រាប់​ឆ្នាំ២០២២នេះផងដែរ ដោយក្នុងនោះជំរុញ​ការ​បញ្ជូន​សិក្ខាកាមយោធាកម្ពុជា ​ទៅបណ្តុះបណ្តាលហ្វឹកហ្វឺន​នៅប្រទេសវៀតណាម និង​បង្កើនកិច្ច​សហប្រតិបត្តិការ​លើវិស័យព័ត៌មានវិទ្យា ​និងបណ្ដាញសន្តិសុខតាមរយៈបណ្ដុះបណ្ដាល​ហ្វឹកហាត់ នាយទាហាន​បច្ចេកទេស​ ដល់សិក្ខាកាមកម្ពុជា​ទៅសិក្សានៅប្រទេសវៀតណាម ​និងភាគីវៀតណាម​ចាត់​បញ្ជូន​យោធាចារ្យមកបង្ហាត់​នៅ​កម្ពុជាជាដើម។សម្តេចពិជ័យ ក៏បានស្នើបង្កើនការផ្លាស់ប្តូរទស្សនកិច្ចគណៈប្រតិភូជាន់ខ្ពស់ ពិសេស​គណៈប្រតិភូ​នាយ​ទាហានវ័យក្មេង​ កងទ័ពនាវី​ គណៈប្រតិភូ​សម្រាក​បំប៉ន​សុខភាព ​និងការ ពិនិត្យ​ព្យាបាល​ជំងឺ​នៅប្រទេសវៀតណាម,ពង្រឹងកិច្ចសហប្រតិបត្តិការប្រចាំឆ្នាំរវាងកងទ័ព​ជើងគោក នៃកង​យោធពល​ខេមរភូមិន្ទ ជាមួយបញ្ហាការដ្ឋានកងទ័ពការពារព្រំដែន ​ក្រសួងការពារប្រទេស វៀតណាម,​ពង្រឹងកិច្ច​សហប្រតិបត្តិការរវាងកងទ័ពជើងទឹកប្រទេសទាំងពីរកម្ពុជា-វៀតណាម។ពង្រឹងកិច្ចសហប្រតិបត្តិការរវាងក្រុមការងារប្រទេសទាំងពីរ ​ដើម្បីគាំទ្រលំហាត់​សមយុទ្ធរួមគ្នា ស្ដីពីការប្រឆាំងអំពើភេរវកម្ម ឧក្រិដ្ឋកម្មឆ្លងដែន ​ការជួញដូរគ្រឿងញៀន និងការសង្គ្រោះគ្រោះ​មហន្តរាយ ​សម្រាប់កិច្ចការមនុស្សធម៌នៅតាមព្រំដែនកម្ពុជា-វៀតណាម។ ចូលរួមទប់ស្កាត់ការទន្ទ្រានកាន់កាប់ដី​ នៅតាមតំបន់គ្មានកងកម្លាំងប្រដាប់​អាវុធ​ឈរជើង និង​ប្រជាជនរស់​នៅ​ និងការបង្កបង្កើនផលខុសច្បាប់​ នៅទឹកដីដែលបាន​បោះបង្គោល​សីមារួចផងដែរ៕ អត្ថបទ៖ បាន ចក់

ប្រមុខការពារជាតិកម្ពុជា ស្នើអូស្រ្តាលីបន្តជួយបណ្ដុះបណ្ដាលធនធានកងទ័ពកម្ពុជាបន្ថែមទៀត

2022/03/18 03:12:11 pm        692
Facebook Telegram Linkin
ភ្នំពេញ៖ សម្តេចពិជ័យសេនា ទៀ បាញ់ ឧបនាយករដ្ឋមន្រ្តី រដ្ឋមន្រ្តីក្រសួងការពារជាតិកម្ពុជា បានស្នើដល់ភាគី អូស្រ្តាលី ឱ្យបន្តជួយបណ្តុះបណ្តាលផ្នែកធន់ធានមនុស្ស និងបច្ចេកទេសនានា ដល់កងទ័ពកម្ពុជាបន្ថែមទៀត ខណៈជំនួយខ្លះបានអាក់ខានមួយរយៈ ដោយសារការរីករាលដាលនូវមេរោគកូវីដ១៩។នៅក្នុងកិច្ចជំនួបមួយជាមួយ លោក ប៉ាប្លូ កាង (Pablo KANG) ឯកអគ្គរាជទូតអូស្ត្រាលីប្រចាំកម្ពុជា កាលពីរសៀលថ្ងៃទី១៧ ខែមីនានេះ សម្តេចពិជ័យសេនា ទៀ បាញ់ បានស្នើដល់ភាគីអូស្ត្រាលីឱ្យ​បង្កើន​ផ្តល់​វគ្គបណ្តុះបណ្តាល​អាហារូបករណ៍​សម្រាប់ថ្នាក់មូលដ្ឋាន នៅតាមបណ្តាសាកល​វិទ្យាល័យនៅកម្ពុជា ដែលបានផ្អាកមួយរយៈពេលកន្លងមក ​និងទៅសិក្សានៅប្រទេសអូស្ត្រាលី។ បន្តរៀបចំកម្មវិធីក្រុមបាញ់កាំភ្លើងជើងគោក ​ដែលបានផ្អាកដោយសារបញ្ហាជំងឺកូវីដ-១៩។ ជួយគាំទ្រដល់ការពង្រឹងសមត្ថភាពនាយទាហាន ​សិក្ខាកាមកំពុងសិក្សានៅសាកលវិទ្យាល័យ​ការពារជាតិ ​ជួយគាំទ្រលើផ្នែកច្បាប់រដ្ឋបាល និងបច្ចេកទេសដល់មន្ត្រីអគ្គលេខាធិការដ្ឋាន​សន្តិសុខលម្ហសមុទ្រជាដើម។សម្តេចពិជ័យសេនា បានលើកឡើងអំពីកិច្ចសហប្រតិបត្តិការទ្វេភាគី ​រវាងកងទ័ពកម្ពុជា​ និងអូស្រ្តាលី ​នាពេលកន្លងទៅផងដែរ ​ដែលនៅសាកលវិទ្យាល័យការពារជាតិកម្ពុជា អូស្រ្តាលី បាន​ជួយជួសជុល បន្ទប់បំពេញការងារ ​បណ្ណាល័យភាសាបរទេស ​បន្ទប់ទឹកសិក្ខាកាម សាងសង់​បន្ទប់​ប្រចាំការ និងសម្រាកថ្ងៃត្រង់យោធាចារ្យនារី​ ជួសជុលកន្លែងលេងកីឡាបាល់ទះ និងសាងសង់​ទីលាន​ ហ្វឹកហាត់ការងារបដិសណ្ឋារកិច្ច ជួយបង្កើនសមត្ថភាពផ្នែក​និយាយភាសាអង់គ្លេស​ថ្នាក់​អនុបណ្ឌិតផ្នែកអប់រំសិក្សាធិការជាដើម។កងទ័ពអូស្ត្រាលី បានទទួលសិក្ខាកាមទៅសិក្សាបណ្ឌិតសភាយោធា​ ភាសាអង់គ្លេសកម្រិតខ្ពស់ មធ្យមអភិវឌ្ឍន៍​ភាសាអង់គ្លេស និង​កម្មវិធីអាហារូបករណ៍កិច្ច​សហប្រតិបត្តិការការពារជាតិ។ បានបណ្ដុះបណ្ដាលវគ្គថ្នាក់អនុបណ្ឌិតស្រាវជ្រាវ ​ស្តីពីសន្តិសុខលំហសមុទ្រ ជួយគាំទ្រ​ឧបករណ៍​សម្ភារៈសម្រាប់​ទីបញ្ជាការជួរមុខ ​នៃគណៈកម្មាធិការជាតិ​សន្តិសុខ​លម្ហសមុទ្រ។សម្តេចពិជ័យសេនា ​បានអរគុណរដ្ឋាភិបាល ​និងក្រសួងការពារប្រទេសអូស្ត្រាលី ដែល​បាន​ពង្រឹងកិច្ចសហប្រតិបត្តិការ ទំនាក់ទំនង​ ចំណងមិត្តភាព​ជាមួយកម្ពុជា។ ជាក់ស្តែង នៅ​ក្នុង​ឆ្នាំ២០២១ ទោះបីមានការ​រីករាលដាលជំងឺកូវីដ-១៩ ជាសកលយ៉ាងណាក្ដី ​ប៉ុន្តែរដ្ឋាភិបាល ក្រសួងការពារប្រទេសអូស្ត្រាលី ​នៅតែពង្រឹងកិច្ចសហប្រតិបត្តិការជាមួយក្រសួងការពារជាតិ តាមរយៈការផ្ដល់សម្ភារៈ ​និងបរិក្ខារពេទ្យ ​គាំទ្រយុទ្ធនាការប្រយុទ្ធនឹងជំងឺកូដ-១៩ដល់​កងយោធពល​ខេមរភូមិន្ទ ការទស្សនកិច្ចនាវាយោធាអូស្ត្រាលី ចូលចតនៅកំពង់ផែស្វយ័តក្រុងព្រះសីហនុ ជួយ​គាំទ្រដល់ការងាររៀបចំសៀវភៅ-សការ ពារជាតិ ឆ្នាំ២០២២-២០២៧ផងដែរ។លោក ប៉ាប្លូ កាង (Pablo KANG) បានបញ្ជាក់ថា ​កងទ័ពប្រទេសទាំងពីរ​ នៅតែបន្តពង្រឹង និង​ពង្រីកកិច្ចសហប្រតិបត្តិការឲ្យបានកាន់តែប្រសើរឡើងថែមទៀត ​ដូចនឹងអ្វីដែលភាគីទាំងពីរ បានធ្វើរួមគ្នានាពេលកន្លងទៅយ៉ាងដូច្នោះដែរ៕អត្ថបទ៖ បាន ចក់

សមាគមនិងអាជីវកម្មទេសចរណ៍ត្រេកអរក្រោយរដ្ឋប្រកាសលើកលែងធ្វើតេស្ត និងបើក VISA on Arrivals

2022/03/18 02:30:12 pm        734
Facebook Telegram Linkin
ភ្នំពេញ៖ សមាគមជាតិ អន្តរជាតិ និងអាជីវកម្មនានាក្នុងវិស័យទេសចរណ៍ បានសម្តែងការអបអរសាទរ និងគាំទ្រសម្តេចតេជោ ហ៊ុន សែន ដែលបានប្រកាសលើកលែងការធ្វើតេស្តPCR គ្មានការធ្វើចត្តាឡីស័ក និងបានបើកធ្វើ VISA ជូនភ្ញៀវអន្តរជាតិនៅពេលមកដល់ព្រំដែនកម្ពុជា ឬហៅ VISA on Arrivals ។បើតាម លោកស្រី ឆាយ សៀវលីន ប្រធានសមាគមទីភ្នាក់ងារទេសចរណ៍កម្ពុជា CATA បានថ្លែងប្រាប់BTV នៅថ្ងៃទី១៨ ខែមីនានេះថា សម្រាប់គោលនយោបាយថ្មីលើការ​បើកប្រទេស​ និងការទទួលភ្ញៀវអន្តរជាតិនៅពេលនេះ ​គឺបានធ្វើអោយក្រុមហ៊ុនទេសចរណ៍ជាង ២០០ក្រុមហ៊ុន សប្បាយចិត្តខ្លាំង ​ហើយយើងរំពឹងថា​ ភ្ញៀវទេសចរអន្តរជាតិ​ នឹងមានផ្តោត ឬអាចថា នឹងមានកក់​ទិញ​កញ្ចប់ទេសចរណ៍មកទស្សនាការកម្ពុជា ​កាន់តែច្រើនថែមទៀត។ជាមួយគ្នាលោក ធួន ស៊ីណាន ប្រធានសមាគមន៍ទេសចរណ៍អាស៊ីប៉ាស៊ីភិច PATA ​ប្រចាំនៅកម្ពុជា បានថ្លែងថា ​ការប្រកាសផ្លូវការសម្តេចតេជោ​ លើការលើកលែងការធ្វើតេស្តPCR គ្មានការធ្វើ​ចត្តាឡីស័ក និងបើក VISA on Arrivalsនេះ នឹងជំរុញកកំណើនភ្ញៀវទេសចរអន្តរជាតិ​នៅក្នុង​តំបន់អាស៊ានមកទស្សនាកម្ពុជា​កាន់តែច្រើន​ ប៉ុន្តែសម្រាប់ភ្ញៀវអន្តរជាតិនៅក្រៅតំបន់ គឺយើង​មិនទាន់មានការរំពឹងខ្លាំងនោះ​ ដោយសារវិបត្តិសង្គ្រាមនៅរ៉ុស្ស៊ី ​និងអ៊ុយក្រែន ​នៅបន្តអូសបន្លាយ ដែលបានបានធ្វើអោយប្រេងសាំង ​និងតំលៃទំនិញពាក់ព័ន្ធនានាទៀត ​មានការឡើងថ្លៃ។ឯកឧត្តម តុប សុភ័គ រដ្ឋលេខាធិការ និងជាអ្នកនាំពាក្យក្រសួងទេសចរណ៍ ​ពន្យល់ថា គោលការណ៍​ថ្មីរបស់កម្ពុជានេះ​ គឺធ្វើអោយភ្ញៀវបរទេសដែលមកកម្ពុជា ​ទទួលបានការចំណេញច្រើន ពិសេសការ​ចំណេញពេលវេលា ​និងថវិកាលើការធ្វើVISA ​ស្នាក់នៅដើរទស្សនាកម្ពុជា។នាយឧត្តមសេនីយ៍ កែវ វណ្ណថន អគ្គនាយករង និងជាអ្នកនាំពាក្យនៃអគ្គនាយកដ្ឋានអន្តោប្រវេសន៍ លើកឡើងថា ​ចំពោះការផ្តល់ទិដ្ឋាការនៅពេលមកដល់​ ឬ (Visa on Arrival) មន្រ្តីអន្តោប្រវេសន៍​គ្រប់ច្រកព្រំដែនគឺត្រូវចាប់ផ្តើមអនុវត្តចាប់ពីថ្ងៃទី១៧ ​ខែមីនា ឆ្នាំ២០២២តទៅ។ ក្នុងន័យនេះ ចំពោះអ្នកដំណើរដែលមិនបានស្នើសុំ​ទិដ្ឋាការ​ជាមុន ​មន្រ្តីនឹងពិនិត្យផ្តល់ជូននៅពេលមកដល់។ សូមបញ្ជាក់ថា ​គិតចាប់ពីថ្ងៃទី ១ មីនា ​ដល់ថ្ងៃទី១៦មីនា ២០២២ ​អ្នកដំណើរអន្តរជាតិ បានឆ្លងដែន​ចូលមកកម្ពុជា​តាមច្រកអាកាសយានដ្ឋានអន្តរជាតិ ​មានចំនួន ១៩,៣៧៦ នាក់ ជាមធ្យម​គឺមាន​ប្រមាណ ១២០០នាក់ក្នុង១ថ្ងៃ ​ហើយច្រកព្រំដែនគោក មានចំនួន ៧,៥០៨ នាក់ ជាមធ្យមគឺមានជាង ៤០០នាក់ក្នុង១ថ្ងៃ៕ អត្ថបទ ស៊ុម សុខជា

យុទ្ធនាការសម្អាតសំរាមក្នុងទឹកទន្លេ នៅក្នុងរាជធានីភ្នំពេញ បានចាប់ផ្តើមបើកដំណើរការ

2022/03/18 02:00:57 pm        698
Facebook Telegram Linkin
ភ្នំពេញ៖ យុទ្ធនាការសម្អាតទន្លេទន្លេមេគង្គ ទន្លេសាប និងទន្លេបាសាក់ នៅក្នុងភូមិសាស្ត្ររាជធានីភ្នំពេញ បានចាប់ផ្តើមបើកដំណើរការនៅថ្ងៃទី១៨ ខែមីនា ឆ្នាំ២០២២នេះតទៅ ។ នៅក្នុងយុទ្ធនាការសម្អាតសំរាមតាមដងទន្លេនេះ បានប្រើប្រាស់ទូកប្រមូលសំរាមបំពាក់បច្ចេកវិទ្យាទំនើបរបស់ប្រទេសអាល្លឺម៉ង់ ដែលមានសមត្ថភាពប្រមូលសំរាមក្នុងទឹកបានប្រមាណ ២០តោនក្នុងមួយថ្ងៃ និងមានកម្លាំងស្ម័គ្រចិត្តជាច្រើនរូបទៀត ដើរប្រមូលសំរាមតាមច្រាំងទន្លេផងដែរ។នៅក្នុងឱកាសអញ្ជើញបើកយុទ្ធនាការប្រមូលសំរាមដងទន្លេមេគង្គនេះ ឯកឧត្តម ថោង ខុន រដ្ឋមន្ត្រីក្រសួងទេសចរណ៍ បានអំពាវនាវប្រជាពលរដ្ឋនៅលំនៅដ្ឋានតាមដងទន្លេទាំងអស់ និង​អ្នកអាស្រ័យ​ផលតាមទឹកទន្លេ ស្ទឹង បឹងបួរនានាទៀត រួមគ្នាបញ្ឈប់ការចោលសំរាម​ឥត​សណ្ដាប់ធ្នាប់​ចូល​ក្នុងទន្លេ និងច្រាំងទន្លេ ​រួមគ្នាថែរក្សាបរិស្ថានធម្មជាតិ ​ទាំងអស់គ្នា ដើម្បី​បាននូវភាពស្អាត ទាក់ទាញភ្ញៀវទេសចរអន្តរជាតិមកទស្សនា ​និងរួមគ្នាធ្វើអោយកម្ពុជាស្អាត ឆ្ពោះទៅកាន់កម្ពុជា ​ធ្វើជាម្ចាស់ផ្ទះរៀបចំកីឡា​ SEAGAME ឆ្នាំ២០២៣នេះ។ឯកឧត្តម ហួត ហៃ អភិបាលរងរាជធានីភ្នំពេញ បានថ្លែងថា ​យុទ្ធនាការសម្អាតទន្លេទន្លេមេគង្គ ទន្លេសាប ​និងទន្លេបាសាក់នេះ ក្រុមហ៊ុន ​និងអង្គការសង្គមស៊ីវិលដែល​ជាប្រតិបត្តិករសកម្មភាព​ក្នុងយុទ្ធនាការនេះ ​ក៏នឹងធ្វើការប្រមូលទិញសំរាមពីបងប្អូនប្រជាពលរដ្ឋផងដែរ ដើម្បីយក​ទៅធ្វើការ​កែច្នៃ​ផងដែរ ។ ដោយឡែក សម្រាប់ពលរដ្ឋណាធ្វើសកម្មភាពចោល​សំរាមពាស​វាលពាលកាល​ឥតសណ្តាប់ធ្នាប់​ អាជ្ញាធរនឹងធ្វើការអនុវត្តច្បាប់​ ដូចជាការផាកពិន័យជាប្រាក់ ទៅតាមទោស​កំហុស​ដែលពលរដ្ឋប្រព្រឹត្ត។សូមបញ្ជាក់ថា យុទ្ធនាការសម្អាតទន្លេមេគង្គ ទន្លេសាប និងទន្លេបាសាក់នេះ នឹងប្រើប្រាស់ពេល​ពេល​ប្រមូលសំរាមពីក្នុងទន្លេ​ និងតាមច្រាំងទន្លេជាង ៣ខែដោយគិតចាប់ពីថ្ងៃទីខែមីនា ដល់ខែមិថុនា ​ឆ្នាំ២០២២ ​ដោយមានអ្នកស្ម័គ្រចិត្តមកពីក្រសួងទេសចរណ៍​ក្រសួងបរិស្ថាន រដ្ឋបាលរាជធានីភ្នំពេញ ​អង្គការ River Ocean Cleanup ​និង Everwave។បើតាមលោក Clemens Nepomuk Feigl ស្ថាបនិកក្រុមហ៊ុន ​everwave ​ បានថ្លែងថា នៅ​ក្នុង​យុទ្ធនាការ​នេះ ក្រុមហ៊ុន ​នឹងផ្តល់ទូកបច្ចេកវិទ្យាទំនើប​ប្រមូលសំរាមនេះបន្ថែមទៀត ប្រសិន​បើក្រុមអ្នក​សម្អាត​ទន្លេមានត្រូវការចំបាច់ ​ខណៈទូកប្រមូលសំរាមបំពាក់បច្ចេកវិទ្យាថ្មីរបស់អាល្លឺម៉ង់ មានឈ្មោះថា «Moringa by Landmarken» ​មានសមត្ថភាពអាចប្រមូលទិន្នន័យទីតាំងដែលមានសំរាមបានរហ័ស តាមរយៈដ្រូន ​និងកាម៉េរ៉ា​ និងមាន​សមត្ថភាពប្រមូលសំរាមក្នុងទឹក៕ អត្ថបទ៖ ស៊ុម សុខជា

ក្រសួងពាណិជ្ជកម្ម ពិនិត្យចុងក្រោយ ផែនការយុទ្ធសាស្ត្រទាញយកប្រយោជន៍ជាអតិបរមា FTA

2022/03/18 01:48:48 pm        458
Facebook Telegram Linkin
ភ្នំពេញ៖ ឯកឧត្ដម ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម បានដឹកនាំក្រុមការងារក្រសួង ដើម្បីពិនិត្យ និងពិភាក្សាលើសេចក្តីកំណែចុងក្រោយនៃផែនការយុទ្ធសាស្ត្រ ទាញយកអត្ថប្រយោជន៍ជាអតិបរមាពីការអនុវត្តកិច្ចព្រមព្រៀងពាណិជ្ជកម្មសេរី មុននឹងដាក់ឆ្លងទៅអន្តរក្រសួងពាក់ព័ន្ធចំនួន១៥ ដើម្បីពិនិត្យនិងសម្រចជាលើកចុងក្រោយ។ ក្នុងកិច្ចប្រជុំកាលពីល្ងាចថ្ងៃទី១៧ មីនា ឆ្នាំ២០២២កន្លងទៅ ក្រសួងពាណិជ្ជកម្ម បានឲ្យដឹងថា គោលបំណងសំខាន់នៃការរៀបចំផែនការយុទ្ធសាស្ត្រនេះឡើង គឺដើម្បីជ្រើសរើសទំនិញ​នាំចេញ​សក្ដានុពល ​ដោយប្រើប្រាស់ទីផ្សារដែលមានស្រាប់ ដើម្បីទាញយកប្រយោជន៍​ជា​អតិបរមា​ពី​ការអនុវត្តកិច្ចព្រមព្រៀង​ពាណិជ្ជកម្មសេរីទាំងនោះ។ លើកឡើងក្នុងអង្គប្រជុំនាឱកាសនោះ ឯកឧត្តមរដ្ឋមន្រ្តី ប៉ាន សូរស័ក្តិ បានមានប្រសាសន៍ ក្រុមការងារ​បានផ្ដោតទៅលើការសិក្សាលើមុខទំនិញអាទិភាពចំនួន ​១០មុខមុនគេ រួមមាន៖ ស្រូវអង្ករ ដំឡូងមី ចេក មៀនប៉ៃលិន ស្វាយ ស្វាយចន្ទី សាច់ កៅស៊ូធម្មជាតិ ម្នាស់ និងម្រេច និង​ការទាក់ទាញអ្នកវិនិយោគធ្វើជាមូលដ្ឋាន​ ដើម្បីធ្វើការសិក្សាស្រាវជ្រាវ និងធ្វើជាគំរូសម្រាប់កិច្ច​ព្រមព្រៀង​ពាណិជ្ជកម្មសេរីទ្វេភាគីផ្សេងទៀត។ឯកឧត្តម បានជំរុញឱ្យក្រុមការងារខិតខំបញ្ចប់ការងាររៀបចំ​ផែនការ​យុទ្ធសាស្ត្រ​ទាញយកអត្ថ​ប្រយោជន៍​ជាអតិបរមា ពីការអនុវត្តកិច្ចព្រមព្រៀងពាណិជ្ជកម្មសេរី​នេះឱ្យបានឆាប់​ជាមួយ​អន្តរក្រសួង ​ព្រោះកិច្ចព្រមព្រៀងពាណិជ្ជកម្មសេរីរវាងកម្ពុជា-ចិន និងកិច្ចព្រមព្រៀង​ភាពជា​ដៃគូសេដ្ឋកិច្ច​គ្រប់ជ្រុងជ្រោយតំបន់​បានចូលជាធរមាននៅដើមឆ្នាំ២០២២ ហើយច្បាប់​ស្តីពី​ការអនុម័តយល់ព្រមលើកិច្ចព្រមព្រៀង​ពាណិជ្ជកម្មសេរីរវាងកម្ពុជា ​និងប្រទេសកូរ៉េខាងត្បូង ក៏ត្រូវ​បាន​ព្រះមហាក្សត្របានឡាយព្រះហស្តលេខា ដាក់ឱ្យប្រើប្រាស់កាលពីថ្ងៃទី២៩​ ខែមករាកន្លងទៅ ហើយនឹងត្រូវចូលជាធរ​មានក្នុងពេលឆាប់ខាងមុខនេះផងដែរ។ឆ្លៀតក្នុងឱកាសនោះ ឯកឧត្តមរដ្ឋមន្រ្តី ​បានថ្លែងការកោតសរសើ ​និងវាយតម្លៃខ្ពស់ ចំពោះកិច្ច​ខិតខំប្រឹងប្រែង​របស់ក្រុមការងារពាក់ព័ន្ធ ​ដែលបានសហការគ្នាយ៉ាងល្អ​ក្នុងការសិក្សា និង​ចងក្រង​ឯកសារ​ដ៏មានសារសំខាន់នេះ ​សម្រាប់ជាមូលដ្ឋានក្នុងការអនុវត្តផែនការសកម្មភាពរបស់ក្រសួង-ស្ថាប័នពាក់ព័ន្ធ ​សំដៅរួមចំណែកក្នុងការជំរុញកំណើនពាណិជ្ជកម្ម ​ទាក់ទាញ​វិនិយោគ បង្កើត​ការងារ ​និងកាត់បន្ថយភាពក្រីក្រស្របតាមយុទ្ធសាស្ត្រចតុកោណដំណាក់កាលទី៤ របស់​រាជរដ្ឋាភិបាល៕អត្ថបទ៖ ឈិត បូរ៉ាវី

មន្រ្តីជំនាញបន្តពិនិត្យម៉ត់ចត់លើកាតចាក់វ៉ាក់សាំង ខណៈមានការលើកលែងPCR និងធ្វើតេស្តរហ័ស

2022/03/18 12:52:17 pm        750
Facebook Telegram Linkin
ភ្នំពេញ៖ លោកឧត្តមសេនីយ៍ត្រី ថោង សុផាត នាយរងប៉ុស្ត៍ច្រកទ្វារអាកាសយានដ្ឋានអន្តរជាតិភ្នំពេញ លើកឡើងថា មន្រ្តីអន្តោប្រវេសន៍បានបន្តអនុវត្តពិនិត្យម៉ត់ចត់ លើកាតចាក់វ៉ាក់សាំងបង្ការជំងឺកូវីដ១៩ ខណៈកម្ពុជាសម្រេចលុបចោលលក្ខខណ្ឌតម្រូវឱ្យអ្នកដំណើរមកពីបរទេស ត្រូវបង្ហាញលទ្ធផលតេស្ត PCR អវិជ្ជមានក្នុងរយៈពេល៧២ម៉ោង និងការធ្វើតេស្តរហ័ស(Rapid test)។ថ្លែងប្រាប់BTV នៅថ្ងៃទី១៨ ខែមីនា ឆ្នាំ២០២២ លោកឧត្តមសេនីយ៍ត្រី ថោង សុផាត នាយរង​ប៉ុស្តិ៍ច្រកទ្វារអាកាសយានដ្ឋានអន្តរជាតិភ្នំពេញ បានឲ្យដឹងថា បន្ទាប់ពីមានចំណារ​របស់​សម្តេចតេជោ ហ៊ុន សែន នាយករដ្ឋមន្រ្តី និងតាមសេចក្តីប្រកាសរបស់ក្រសួងសុខាភិបាលថ្មី​ពាក់ព័ន្ធ​កែសម្រួលលក្ខខណ្ឌមួយចំនួន​ ចំពោះអ្នកដំណើរមកពីបរទេស ពេលមកដល់ប្រទេស​កម្ពុជា ​បានសម្តែងការគាំទ្រចំពោះការសម្រេចចិត្តរបស់ប្រមុខរាជរដ្ឋាភិបាល សំដៅ​បង្ក​លក្ខណៈកាន់តែងាយ​ស្រួលដល់អ្នកធ្វើដំណើរចូលកម្ពុជា។ឧត្តមសេនីយ៍ត្រី ថោង សុផាត បន្តថា គិតចាប់ពីអំឡុងខែមករានេះ ​មកដល់ពេលនេះ កំណើន​អ្នក​ធ្វើដំណើរបានកើនឡើង​ជាមធ្យមក្នុងមួយថ្ងៃចំនួនជាង​ ១ពាន់នាក់​ ខណៈចុងឆ្នាំ២០២១ មាន​ចំនួនត្រឹម៤០០-៥០០នាក់​ប៉ុណ្ណោះ។ឧត្តមសេនីយ៍ត្រី ថោង សុផាត ថ្លែងថា ទន្ទឹមនឹងការសម្រេចរបស់រាជរដ្ឋាភិបាលនេះ មន្រ្តី​អន្តោប្រវេសន៍ប្រចាំច្រកទ្វារអាកាសយានដ្ឋាន​អន្តរជាតិភ្នំពេញ ក៏បន្ត​អនុវត្តម៉ត់ចត់​ទៅ​លើ​កាត​វ៉ាក់សាំង​បង្ការជំងឺកូវីដ១៩ ផងដែរ។ជាមួយគ្នានេះអ្នកដំណើរជាតិ-អន្តរជាតិ បានសម្តែងការពេញចិត្តចំពោះការ​សម្រេច​បន្ធូរបន្ថយ​កាន់​តែងាយស្រួល​ រួមទាំង​កាត់បន្ថយការចំណាយ​ និងពេលវេលា។ក្រសួងសុខាភិបាល នៅថ្ងៃទី១៧ ខែមីនា ម្សិលមិញនេះ បានប្រកាសលុបចោល​លក្ខខណ្ឌ​តម្រូវ​ឲ្យ​អ្នកដំណើរ​មកពីបរទេសបង្ហាញ​លទ្ធផល​តេស្តPCR អវិជ្ជមាន​ក្នុង​រយៈពេល​៧២ម៉ោង​មុនមក​ដល់​កម្ពុជា ​លុបចោលការតម្រូវឲ្យធ្វើតេស្តរហ័ស​នៅពេលមកដល់ និង​អនុញ្ញាត​បើក​ឡើង​វិញ​ការ​ផ្តល់ទិដ្ឋាកាតពេលមកដល់(Visa on Arrival) សម្រាប់អ្នកដំណើរអន្តរជាតិ៕អត្ថបទ សេក ឧត្តម

លោកជំទាវ ឱ វណ្ណឌីន ផ្ញើសារឲ្យអ្នកជាសះស្បើយទៅពិនិត្យសួត ក្នុងករណីកូវីដវាយលុកសួតខ្លាំង

2022/03/18 12:39:43 pm        469
Facebook Telegram Linkin
ភ្នំពេញ៖ លោកជំទាវ ឱ វណ្ឌឌីន រដ្ឋលេខាធិការ និងជាអ្នកនាំពាក្យក្រសួងសុខាភិបាល លើកឡើងប្រាប់ BTV ថា បុគ្គលដែលត្រូវបានកូវីដ-១៩វាយលុកខ្លាំងទៅលើសួត គឺត្រូវទៅពិនិត្យសួតឡើងវិញ ក្នុងរយៈពេល ៣ខែដំបូងក្រោយជាសះស្បើយ។ពាក់ព័ន្ធនឹងករណីក្រោយជាសះស្បើយពីកូវីដ-១៩ លោកជំទាវ ឱ វណ្ឌឌីន អ្នកនាំពាក្យក្រសួង​សុខាភិបាល ​លើកឡើងថា ​មិនទាន់មានការសិក្សាបញ្ជាក់ច្បាស់​ពីផលប៉ះពាល់សួតក្នុង​កម្រិត​ណានោះឡើយ។ តែគេសង្កេតឃើញ មុខងារសួតអាចថមថយខ្លះៗ​ ប្រសិនបើវីរុសកូវីដ-១៩ បាន​វាយលុកខ្លាំង​ទៅលេលើសួត ​ដែលតម្រូវឱ្យអ្នកជំងឺដែលជាសះស្បើយទៅ ត្រូវហាត់ការដក​ដង្ហើម​ផង និងត្រួតពិនិត្យ​សួត​ឡើងវិញផង ​នៅក្នុងរយៈពេល៣ខែដំបូងបន្ទាប់ពីជាសះស្បើយ។ ប្រសិនបើនៅមានសេសសល់សំណល់បញ្ហាសួតខ្លះៗនោះ ​គួរតែត្រូវបានបន្តត្រួតពិនិត្យឱ្យ​បាន​ទៀងទាត់​តាមការណែនាំរបស់គ្រូពេទ្យ។ លោកជំទាវ លើក​ឡើងបន្ថែមថា ករណីឆ្លងឡើងវិញនូវវីរុសកូវីដ-១៩​ ផលប៉ះពាល់អាច​មាន​តិចតួច បើសិន​ជាមានកងការពារខ្លាំងសម្រាប់​ទប់ទល់។ ​ករណីកងការពារខ្សោយវិញ គឺអាចបន្ថែមភាព​ប៉ះពាល់​ទៅ​លើប្រព័ន្ធសរសសៃប្រសាទ បេះដូង ថ្លើម​ និងតម្រងនោមជាដើម។ ជារួមលោកជំទាវ បញ្ជាក់ថា តាមការស្រាវជ្រាវរបស់អ្នកវិទ្យាសាស្រ្តវេជ្ជសាស្រ្តបរទេសមួយចំនួន បង្ហាញថា អ្នកជាសះស្បើយពីកូវីដក្នុងរង្វង់​ ២៣ ទៅ ២៦ភាគរយ គឺមានបញ្ហាផ្លូវចិត្តដូចជា ឆាប់បាក់ទឹកចិត្ត​ និងឆាប់ព្រួយ។ ​លើសពីនេះ​ក៏មានបញ្ហា ​ឆាប់នឿយហត់ ​មិនសូវមានកម្លាំង និងមួយចំនួនទៀតក៏ឆាប់ឆ្លងកូវីដឡើងវិញផងដែរ។ ការសិក្សាក៏ បានបង្ហាញថា អាចមានរោគសញ្ញាសេសសល់ ក្នុងរយៈពេលមួយឆ្នាំ​ក្រោយ​ជា​សះស្បើយ​ផងដែរ ​ដូចជា​ដក​ដង្ហើមមិនបានវែង​ ពិបាកដកដង្ហើម ​មានអារម្មណ៍ថប់ដង្ហើម បន្តនៅក្អកខ្លះៗ ​អាចឈឺសន្លាក់ដៃជើង​ អាចឈឺដើមទ្រូងខ្លះៗ ​មានបញ្ហាការចងចាំ បញ្ហាសម្រាន្តមិនសូវលក់ ​ឈឺសាច់ដុំ ឈឺក្បាល ​បេះដូងដើរញាប់ជាងមុន ជាដើម។លោកជំទាវ ក៏នៅតែបន្តអំពាវនាវ ​កុំឱ្យប្រជាពលរដ្ឋមើលស្រាលជំងឺកូវីដ-១៩ ជាពិសេស​វីរុសបំប្លែងថ្មី អូមីក្រុង​។ សូមបងប្អូនប្រជាពលរដ្ឋមានការ​យល់​ដឹងថា លទ្ធភាព​វៃលុក​របស់​វាមកលើសរីរាង្គកាយមនុស្ស ​អាចកើតមានមិនអាចមើលរំលងបានឡើយ​ ហើយជំងឺកូវីដ-១៩ ក៏មិនមែន​ជាជំងឺផ្តាសាយក្នុងលក្ខណៈធម្មតា​ និង​រិតតែមិនមែន​ជាជំងឺ​ដែល​សាមញ្ញពេកនោះដែរ ថ្វីត្បិតតែ​ វាមានលក្ខណៈដូចជាស្រាល​ ដោយមួយចំណែកធំដោយសារឥទ្ធិពលបានមកពីការ ស្រោចស្រពវ៉ាក់សាំង​បានច្រើននៅក្នុងសហគមន៍។ អ្នកនាំពាក្យក្រសួងសុខាភិបាលរូបនេះ បានក្រើនរម្លឹកថា ​សរីរាង្គកាយមនុស្ស ​ប្រហែលជានឹងអាច មាន​ការប៉ះពាល់សុខភាពទោះតិចក្តី ឫច្រើនក្តី ​ក្រោយពីបានឆ្លងជំងឺកូវីដ-១៩ ប្រសិន​បើយើងមិនមានកងការពារក្នុងខ្លួនយើងរឹងមាំទេនោះ ហើយការចាក់វ៉ាក់សាំងកូវីដ-១៩​ ដូសទី ៣ ឬដូសជំរុញ ​នាពេលនេះ ​នឹងជួយពង្រឹងកងការពារនេះ ​ដើម្បីទប់ទល់ពីការវាយលុកធ្ងន់ធ្ងរ​លើស​រីរាង្គបុគ្គល​ និងជួយសង្គ្រោះអាយុជីវិតមនុស្សផងដែរ៕ អត្ថបទ៖ គឹមហុក

ប្រេសិតពិសេសរបស់ប្រធានអាស៊ាន នឹងបំពេញទស្សនកិច្ចលើកដំបូងនៅមីយ៉ានម៉ា សប្ដាហ៍ក្រោយ

2022/03/18 12:24:34 pm        710
Facebook Telegram Linkin
ភ្នំពេញ៖ ក្នុងនាមជាប្រេសិតពិសេសរបស់ប្រធានអាស៊ានស្តីពីមីយ៉ានម៉ា ឯកឧត្តម ប្រាក់ សុខុន ឧបនាយករដ្ឋមន្ត្រី រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ នឹងដឹកនាំគណៈប្រតិភូអញ្ជើញទៅបំពេញទស្សនកិច្ចការងារ លើកដំបូង នៅសាធារណរដ្ឋសហភាពមីយ៉ាន់ម៉ា រយៈពេល៣ថ្ងៃ ពីថ្ងៃទី២១ ដល់ទី២៣ ខែមីនា ឆ្នាំ២០២២ តបតាមការអញ្ជើញរបស់ក្រុមប្រឹក្សារដ្ឋបាលនៃប្រទេសមួយនេះ ។យោងតាមសេចក្តីប្រកាសព័ត៌មានក្រសួងការបរទេស នៅថ្ងៃទី១៨ ខែមីនា ឆ្នាំ២០២២ បានឲ្យដឹងថា ដំណើរទស្សនកិច្ចនេះ មានគោលបំណង ​ដើម្បីបង្កើតលក្ខខណ្ឌអំណោយផល ដើម្បីឈានទៅ​ដល់​ការ​បញ្ចប់អំពើហិង្សា ​ក៏ដូចជាការ​អត់ធ្មត់​ឲ្យបានខ្ពស់បំផុត ​ពីគ្រប់ភាគីទាំងអស់, ការចែកចាយ​ជំនួយ​មនុស្សធម៌​ ដោយមានការគាំទ្រ ​និងសម្របសម្រួលពីលេខាធិការដ្ឋានអាស៊ាន និង​មជ្ឈមណ្ឌល​សម្របសម្រួលអាស៊ាន ដើម្បីជំនួយមនុស្សធម៌ ​និងការគ្រប់គ្រងគ្រោះមហន្តរាយ និង​លើកទឹកចិត្តឲ្យមានកិច្ចពិគ្រោះយោបល់/កិច្ច​សន្ទនា​នយោបាយ ​ក្នុងចំណោមភាគីពាក់ព័ន្ធទាំងអស់ ។ សេចក្តីប្រកាសព័ត៌មាន បានបន្តថា ដំណើរទស្សនកិច្ចនេះ​ នឹងផ្អែកលើឯកសារមូលដ្ឋាន នៃកិច្ចព្រមព្រៀង​ជា​ឯកច្ឆន្ទ​ប្រាំ​ចំណុចរបស់អាស៊ាន​ លទ្ធផលនៃដំណើរទស្សនកិច្ចការងារ របស់​សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា ​ទៅកាន់ប្រទេសមីយ៉ាន់ម៉ា ​នៅថ្ងៃទី៧ និងទី៨ ខែមករា ឆ្នាំ២០២២ ​លទ្ធផលនៃកិច្ចពិភាក្សារវាងសម្ដេចតេជោ និងឯកឧត្តម នាយឧត្តមសេនីយ៍​ជាន់​ខ្ពស់ មីង អោង ឡាំង ​និងលទ្ធផល​នៃកិច្ចប្រជុំចង្អៀតរដ្ឋមន្ត្រីការ​បរទេសអាស៊ាន ​នាពេលថ្មីៗនេះ ។ប្រកាសព័ត៌មានដដែល ​បានបញ្ជាក់ថា​ ទស្សនកិច្ចនេះ អមដំណើរដោយ​ឯកឧត្តមកិត្តិ​សេដ្ឋា​បណ្ឌិត ចម ប្រសិទ្ធ ទេសរដ្ឋមន្ត្រី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា ​និងនវានុវត្តន៍ ឯកឧត្តម លឹម ចុកហ៊ុយ ​អគ្គលេខាធិការអាស៊ាន លោក លី យ៉ាមមីង នាយកប្រតិបត្តិ​នៃ​មជ្ឈមណ្ឌល​សម្របសម្រួលអាស៊ាន​ ដើម្បីជំនួយមនុស្សធម៌ ​និងការគ្រប់គ្រងគ្រោះមហន្តរាយ (AHA Centre) ​និងមន្ត្រីជាន់ខ្ពស់របស់​រាជរដ្ឋាភិបាលមួយចំនួន ព្រមទាំង​បុគ្គលិក​របស់​លេខាធិការដ្ឋាន​អាស៊ាន និង AHA Centre ផងដែរ ៕

សម្តេចតេជោ៖ កម្ពុជានឹងមានកំណើនសេដ្ឋកិច្ចឡើងវិញ តាមរយៈការកែ​លម្អ​នូវ​ជន្ទល់​សេដ្ឋកិច្ច​សំខាន់ៗ

2022/03/18 11:31:24 am        571
Facebook Telegram Linkin
ភ្នំពេញ៖ សម្តេចតេជោ ហ៊ុន សែន នាយករដ្ឋមន្ត្រី នៃកម្ពុជា បានប្រកាសថា កម្ពុជារំពឹងថា នឹងអាចស្ដារនិងជំរុញកំណើនសេដ្ឋកិច្ចឡើងវិញ តាមរយៈការកែលម្អនូវជន្ទល់សេដ្ឋកិច្ចសំខាន់ៗ ដែលរងផលប៉ះពាល់ពីជំងឺកូវីដ-១៩ នឹងការស្វែងរកជន្ទល់ថ្មីប្រកបដោយសក្តានុពលពីវិស័យផ្សេងៗ។ការថ្លែងរបស់សម្តេចតេជោ យ៉ាងដូច្នេះ ត្រូវបានធ្វើឡើងក្នុងពិធីប្រគល់-ទទួលអំណោយដ៏ថ្លៃថ្លា វ៉ាក់សាំងកូវីដ១៩ អាស្ត្រាហ្សេនីកា ចំនួន៥សែន២ម៉ឺន៣ពាន់ដូសពីរដ្ឋាភិបាលនិងប្រជាជនហុងគ្រី ជូនរាជរដ្ឋាភិបាលនិងប្រជាជនកម្ពុជា នៅវិមានសន្តិភាពនាព្រឹកថ្ងៃទី ១៨ មីនានេះ។សម្តេច បានបង្ហាញមោទនភាពថា តាមរយៈការខិតខំការពារទប់ស្កាត់ជាពិសេសការចាក់ស្រោច​វ៉ាក់សាំង​ការពារកូវីដ១៩ បានអនុញ្ញាតឲ្យកម្ពុជាបើកប្រទេសឡើងវិញ និងរក្សាកិច្ចការនៃសកម្មភាព​សង្គម​សេដ្ឋកិច្ច​ពេញលេញលើគ្រប់វិស័យ ទោះបីជាការឆ្លងរាលដាលចូលក្នុង​សហគមន៍​នឹង​បន្តមានក៏ដោយ។សម្តេចតេជោគូសបញ្ជាក់ទៀតថា បើទោះបីជាវិស័យទេសចរណ៍នៅមិនទាន់ងើបឡើងវិញ ក៏​វិស័យសំខាន់ៗ​មួយចំនួនបាន​និងកំពុងស្ដានិងជំរុញដំណើរការជាប្រក្រតីឡើងវិញ​ដែលជា​លទ្ធផល​កម្ពុជារំពឹងថា នឹងធានាបាននៅកំណើនវិជ្ជមានកម្រិតប្រមាណ ៣ភាគរយនៅឆ្នាំ ២០២១ នឹងបន្តកើនឡើងលើស ៥ភាគរយនៃឆ្នាំ ២០២២។ជាមួយគ្នានេះភាពមិនប្រាកដប្រជានៅមានបន្តក្នុងកម្រិតគួរឱ្យបារម្ភដោយសារការកើនឡើងនូវបញ្ហាប្រឈមនានាផ្សេងទៀត ជាក់ស្ដែងជម្លោះរវាងអ៊ុយក្រែន-រុស្ស៊ី​និង​អាចជះឥទ្ធិពលអវិជ្ជមានលើ​កំណើន​សេដ្ឋកិច្ចសកល​នឹងសេដ្ឋកិច្ចកម្ពុជា​ប្រសិនបើជម្លោះនេះនៅបន្តអូសបន្លាយទៅមុខទៀត។ក្នុងន័យនេះ កម្ពុជាបាននិងកំពុងតាមដានយ៉ាងយកចិត្តទុកដាក់ចំពោះបញ្ហា​ប្រឈមទាំងនេះ​ដើម្បីរៀបចំគោល​នយោបាយ​និងដាក់ចេញវិធានការអន្តរាគមន៍ចាំបាច់ឱ្យបានទាន់ពេលវេលា៕

សម្តេចតេជោ ជំរុញលើកទឹកចិត្តឱ្យកម្ពុជា ហុងគ្រីបើកស្ថានទូតឡើងវិញ

2022/03/18 04:39:50 am        499
Facebook Telegram Linkin
ភ្នំពេញ៖ សម្តេចតេជោ ហ៊ុន សែន នាយករដ្ឋមន្ត្រី បានលើកទឹកចិត្ត និងជំរុញឱ្យ បើកស្ថានទូតនៃប្រទេសទាំងពីរកម្ពុជា-ហុងគ្រី ជាថ្មីឡើងវិញ ដែលជាការបើកទំព័រប្រវត្តិសាស្ត្រថ្មីមួយសំដៅជំរុញទំនាក់ទំនងការទូតកម្ពុជា-ហុងគ្រីឲ្យកាន់តែស៊ីជម្រៅ និងពេញលេញថែមទៀត។ក្នុងឱកាសអញ្ជើញជាអធិបតីដ៏ខ្ពង់ខ្ពស់ក្នុងពិធីប្រគល់-ទទួលអំណោយដ៏ថ្លៃថ្លាវ៉ាក់សាំងកូវីដ-១៩ (AstraZeneca) ពីរដ្ឋាភិបាល និងប្រជាជនហុងគ្រី នៅវិមានសន្តិភាព ព្រឹកថ្ងៃទី១៨មីនានេះ សម្តេចតេជោ ហ៊ុន សែន នាយករដ្ឋមន្ត្រី បានបង្ហាញការជឿជាក់យ៉ាងមុតមាំថា ចំណងមិត្តភាព​រវាងកម្ពុជា និងហុងគ្រី នឹងកាន់តែរឹងមាំថែមទៀត។ក្នុងពិធីដ៏ថ្លៃថ្លានេះ សម្ដេចតេជោ បានសម្ដែងនូវអំណរគុណយ៉ាងជ្រាលជ្រៅចំពោះរដ្ឋាភិបាល​និង​ប្រជាជនហុងគ្រី​ដែលបានផ្ដល់អំណោយសប្បុរសធម៌ដ៏ថ្លៃថ្លាវ៉ាក់សាំងកូវីដ-១៩​ប្រភេទ​អាស្ត្រាហ្សេនីកា​ ចំនួន ៥ សែន២ម៉ឺន៣០០០ដូស ជូនដល់ប្រជាជន និងរាជរដ្ឋាភិបាលកម្ពុជា។ហុងគ្រីគឺជាប្រទេសទី៦ ​ដែលបានផ្ដល់អំណោយ​វ៉ាក់សាំងកូវីដ-១៩ដល់ប្រជាជន​និង​រាជរដ្ឋាភិបាល​កម្ពុជា​ក្នុងក្របខណ្ឌទ្វេភាគី​ដែលសម្ដេច​បាន​ទទួលដោយផ្ទាល់​អំណោយ​ដ៏ថ្លៃថ្លា​នេះ​គឺជាសក្ខីភាព​មួយ​ដែល​ឆ្លុះបញ្ចាំង​ពីកិច្ចការមនុស្សធម៌ និងការយកចិត្តទុកដាក់ខ្ពស់​របស់ប្រជាជន​និង​រដ្ឋាភិបាល​ហុងគ្រី លើការប្រយុទ្ធនឹងជំងឺកូវីដ១៩ នៅកម្ពុជា​និងនៅ​លើសកលលោកទាំង​មូល​ហើយកម្ពុជា​សូមកោត​សរសើរ និងវាយតម្លៃខ្ពស់ ជាការពិតការឆ្លងរាលដាលបើជំងឺកូវីដ១៩នៅតែបន្តអូសបន្លាយ និងកំពុងវិវត្តន៍ជាពិសេស​តាមរយៈការ​បង្កើត​ជាប្រភេទមេរោគបំប្លែងខ្លួនថ្មីៗជាបន្ត។ ឈរលើស្មារតីប្រុងប្រយ័ត្នប្រកប​ដោយ​សុទិដ្ឋិនិយម​មកម្ពុជា​បានតាមបានវាយតម្លៃសភាពការណ៍​និងយកចិត្តទុកដាក់ខ្ពស់​ដោយបាន​ពន្លឿន​និងជំរុញយុទ្ធនាការចាក់វ៉ាក់សាំងសំដៅបង្កើតភាពស៊ាំសហគមន៍នៅទូទាំងកម្ពុជា។ក្នុងក្របខ័ណ្ឌសកលលោក កម្ពុជាក៏បានចូលរួមជំរុញផងដែរនូវ​យុទ្ធនាការ​ចាក់វ៉ាក់​សាំង​និង​សូមវាយ​តម្លៃខ្ពស់​ចំពោះវប្បធម៌ជួយគ្នាទៅវិញទៅមក ​ជាពិសេសការចែករំលែក​វ៉ាក់សាំងកូវីដ១៩ ដែលពិតជាមានសារៈសំខាន់ និងប្រសិទ្ធភាពខ្ពស់ក្នុង​ការទប់ស្កាត់ការឆ្លងរាលដាល​នៃជម្ងឺ​ដ៏កាច​សាហាវនេះ ។កម្ពុជាជឿជាក់ថា ការចាក់វ៉ាក់សាំងគឺជាកិច្ចការអាទិភាព​សម្រាប់យើងទាំងអស់​គ្នាហើយ​វ៉ាក់សាំងនឹងបន្តដើរតួនាទីជាទំនិញយុទ្ធសាស្ត្រគន្លឹះក្នុង​ការទប់ទល់នឹងឆ្លងរាលដាល​ក៏ដូចជា​ការរៀនរស់នៅជាមួយកូវីដ១៩ នឹងការបើកកិច្ចដំណើរការសកម្មភាពសង្គមសេដ្ឋកិច្ចឡើងវិញ។គិតត្រឹមថ្ងៃទី ១៥ ខែមីនាឆ្នាំ ២០២២ កម្ពុជាគឺជាប្រទេសមួយដែលបានទទួលជោគជ័យក្នុង​យុទ្ធនាការ​ជាតិចាក់វ៉ាក់សាំង​ដោយសម្រេចបានអត្រាចាក់វ៉ាក់សាំង​ប្រមាណ ៩២,២៧% នៃប្រជាជនសរុប ១៦លាននាក់។ការនេះ​បានអនុញ្ញាត​ឲ្យកម្ពុជាបើកប្រទេសឡើងវិញ និង​រក្សាកិច្ចការនៃសកម្មភាពសង្គមសេដ្ឋកិច្ចពេញលេញលើគ្រប់វិស័យទោះបីជាការឆ្លងរាលដាលចូលក្នុងសហគមន៍នឹងបន្តមានក៏ដោយ។កម្ពុជារំពឹងថា នឹងអាចស្ដារនិងជំរុញកំណើនសេដ្ឋកិច្ចឡើងវិញ តាមរយៈការកែលំ​អ​នូវជន្ទល់​សេដ្ឋកិច្ច​សំខាន់ៗ​ដែលរងផលប៉ះពាល់ពីជំងឺកូវីដ១៩ នឹងការស្វែងរកជន្ទល់ថ្មីប្រកប​ដោយ​សក្តានុពល​ពីវិស័យ​ផ្សេងៗ។អំណោយសប្បុរសធម៌ដ៏ថ្លៃថ្លាវ៉ាក់សាំងកូវីដ-១៩ ប្រភេទអាស្ត្រាហ្សេនីកាពីសំណាក់ប្រជាជន​និងរដ្ឋាភិបាលហុងគ្រីនាថ្ងៃនេះ នឹងចូលរួមចំណែកដ៏សំខាន់ក្នុងការបន្តប្រយុទ្ធនឹងជំងឺកូវីដ-១៩នៅកម្ពុជា៕ អត្ថបទ មុត សុទ្ធ 

បណ្ដាញសង្គម

ព័ត៌មានថ្មីៗ

ឯកឧត្តមហ៊ុល សំអុន យកទៀនព្រះវស្សានិងទេយ្យទានប្រគេនព្រះសង្ឈ៧វត្តនៅស្រុកត្រាំកក់ខេត្តតាកែវ
07/12/2025 05:07 PM
Facebook Telegram Linkin
ឯកឧត្តម អ៊ឹង ឌីប៉ូឡា និងក្រុមការងារនាំយកទៀនវស្សានិងទេយ្យទានប្រគេនព្រះសង្ឃចំនួន០៧វត្តក្នុងឃុំត្រពាំងជង
07/12/2025 05:07 PM
Facebook Telegram Linkin
ឯកអគ្គរដ្ឋទូតអ៊ីរ៉ង់ប្រចាំនៅរុស្ស៊ី គូសបញ្ជាក់ពីបុរេលក្ខខណ្ឌ សម្រាប់ការពិភាក្សាអំពីបញ្ហានុយក្លេអ៊ែរ
07/12/2025 05:07 PM
Facebook Telegram Linkin
លោក Erdogan និយាយថា សករាជថ្មីបានបើកឡើងសម្រាប់ប្រទេសទួរគី បន្ទាប់ពីការរំសាយអាវុធរបស់ក្រុមសកម្មប្រយុទ្ធ PKK
07/12/2025 04:07 PM
Facebook Telegram Linkin
មន្ត្រីស្លូវ៉ាគី៖ កិច្ចសន្ទនាក្នុងចំណោមអរិយធម៌ផ្សេងៗ គឺពិតជាមានសារៈសំខាន់ណាស់សម្រាប់ការកសាងសន្តិភាព
07/12/2025 04:07 PM
Facebook Telegram Linkin
ការវាយប្រហារដោយយានដ្រូន និងមីស៊ីលរបស់រុស្សីនៅភាគខាងលិចអ៊ុយក្រែន បានសម្លាប់មនុស្សយ៉ាងតិច ២នាក់
07/12/2025 04:07 PM
Facebook Telegram Linkin
ប្រទេសលីបង់ស្នើឲ្យ UNIFIL បន្តអាណត្តិមួយឆ្នាំទៀត
07/12/2025 04:07 PM
Facebook Telegram Linkin
ប្រមុខការទូតនិយាយថា សហភាពអឺរ៉ុប ជំរុញអ៊ីស្រាអែលធ្វើឲ្យប្រសើរឡើងនូវស្ថានភាពមនុស្សធម៌ នៅតំបន់ហ្កាហ្សា
07/12/2025 03:07 PM
Facebook Telegram Linkin
អាមេរិក ដឹងអំពីការស្លាប់របស់ពលរដ្ឋអាមេរិក បន្ទាប់ពីរងការវាយដំដោយអ្នកតាំងលំនៅអ៊ីស្រាអែល
07/12/2025 03:07 PM
Facebook Telegram Linkin
UNព្រមានពីវិបត្តិដ៏វឹកវរនៃការបញ្ជូនជនភៀសខ្លួនអាហ្វហ្កានីស្ថានត្រឡប់មកវិញ ហើយអំពាវនាវឲ្យមានវិធានការអន្តរជាតិជាបន្ទាន់
07/12/2025 03:07 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.