BTV NEWS

សម្ដេចធិបតី អំពាវនាវដល់ជនរួមជាតិជឿទុកចិត្តលើរាជរដ្ឋាភិបាលដែលកំពុងធ្វើកិច្ចការងារយ៉ាងសកម្មស្វែងរកដំណោះស្រាយបញ្ចប់បញ្ហាព្រំដែនកម្ពុជា-ថៃ ឱ្យបានឆាប់រហ័ស

សម្ដេចធិបតីផ្ដល់អនុសាសន៍៧ចំណុច ដល់ក្រសួង-ស្ថាប័នពាក់ព័ន្ធឱ្យយកចិត្តទុកដាក់ក្នុងឱកាសទិវាអក្ខរកម្មអន្តរជាតិ ៨ កញ្ញា ២០២៥

សម្ដេចធិបតី៖ រាជរដ្ឋាភិបាលប្តេជ្ញាចិត្តយ៉ាងមុតមាំលើកកម្ពស់ការងារអក្ខរកម្ម និងបំពាក់បំប៉ន ជំនាញ និងឱកាសសិក្សាពេញមួយជីវិត ជាពិសេសជំនាញឌីជីថល

ប្រជាពលរដ្ឋត្រេកអរនឹងសមិទ្ធផលអាកាសយានដ្ឋានថ្មីដែលត្រៀមបើកដំណើរការ

នយោបាយ និង ការអភិវឌ្ឍន៍

សម្តេចប្រមុខរាជរដ្ឋាភិបាល នឹងសម្ពោធដាក់ឲ្យប្រើប្រាស់ជាផ្លូវការផ្លូវជាតិលេខ២១ ប្រវែង ៦៣,៦គីឡូម៉ែត្រ នៅព្រឹកស្អែកនេះ

ភ្នំពេញ៖ នៅព្រឹកថ្ងៃទី២៣ ខែមីនាស្អែកនេះ សម្តេចតេជោ ហ៊ុន សែន នាយករដ្ឋមន្ត្រី នឹងអញ្ជើញជាអធិបតីភាព ដ៏ខ្ពង់ខ្ពស់ក្នុងពិធីសំណេះសំណាល និងសម្ពោធដាក់ឲ្យប្រើប្រាស់ជាផ្លូវការ ផ្លូវជាតិលេខ២១ ប្រវែង ៦៣,៦គីឡូម៉ែត្រ (តាខ្មៅ-ជ្រៃធំ) ក្រោមឥណទានសម្បទាន ពិីរដ្ឋាភិបាល នៃសាធារណរដ្ឋកូរ៉េ។ផ្លូវជាតិលេខ២១នេះ សាងសង់ដោយក្រុមហ៊ុនកូរ៉េ Hanshin E&C Co., Ltd. និងត្រួតពិនិត្យបច្ចេកទេស ដោយក្រុមហ៊ុនអន្តរជាតិកូរ៉េ DASAN Consultants Co., Ltd ដោយត្រូវបានបើកការដ្ឋានសាងសង់ ជួសជុល និងពង្រីក កាលពីថ្ងៃទី២៨ ខែមីនា ឆ្នាំ២០១៦ និងបញ្ចប់ការសាងសង់នៅខែតុលា ឆ្នាំ២០១៧ ក្រោមកម្ចីឥណទានប្រមាណជាង៦០លានដុល្លារអាម៉េរិកពីរដ្ឋាភិបាលនៃសាធារណរដ្ឋកូរ៉េ និងថវិការបស់រាជរដ្ឋាភិបាលកម្ពុជា៕

កម្ពុជាធ្វើជាម្ចាស់ផ្ទះកិច្ចប្រជុំបណ្តាញវិទ្យាស្ថានសន្តិសុខ និងការពារជាតិអាស៊ាន លើកទី១៥

សៀមរាប៖ បណ្តាញវិទ្យាស្ថានសន្តិសុខ និងការពារជាតិអាស៊ាន (NADI) បានបើកកិច្ចប្រជុំប្រចាំឆ្នាំលើកទី១៥ របស់ខ្លួន និងកិច្ចប្រជុំចង្អៀតលើកទី៦ កាលពីម្សិលមិញ នៅខេត្ដសៀមរាប ក្រោមមូលបទ (ការរំឭកខួបលើកទី១៥ នៃបណ្ដាញវិទ្យាស្ថានសន្តិសុខ និងការពារជាតិអាស៊ាន ដែលកម្ពុជាធ្វើជាម្ចាស់ផ្ទះ។ កិច្ចប្រជុំនេះ មានការចូលរួមពីបណ្តាស្ថាប័ន និងវិទ្យាស្ថានការពារជាតិ និងសន្តិសុខ នៃប្រទេសជាសមាជិកអាស៊ាន ចំនួន១៣ស្ថាប័ន ដោយរួមទាំងវិទ្យាស្ថានចក្ខុវិស័យអាស៊ីផងដែរ។លោកជំទាវឧត្តមសេនីយ៍ឯក ណឹម សុវត្តី អគ្គនាយករងអគ្គនាយកដ្ឋាននយោបាយ និងកិច្ចការ បរទេស និងជានាយកអង្គភាពសេនាតេជោ ដែលដឹកនាំកិច្ចប្រជុំនេះ បានឱ្យដឹងថា NADI គឺជាបណ្តាញវិទ្យាស្ថានស្រាវជ្រាវ នៃប្រទេសសមាជិកអាស៊ាន ទាំង១០ ដែលត្រូវបានបង្កើតនៅឆ្នាំ២០០៧ ដើម្បីប្រមូលផ្តុំអ្នកវិភាគគោលនយោបាយ ដែលមានឯកទេសលើបញ្ហាការពារជាតិ និងសន្តិសុខ អ្នកសិក្សាស្រាវជ្រាវលើកិច្ចសហប្រតិបត្តិការការពារជាតិ និងសន្តិសុខ និងមន្ត្រីការពារជាតិ រួមគ្នាសិក្សាស្រាវជ្រាវ ស្វែងរកដំណោះស្រាយលើបណ្តាបញ្ហាប្រឈមផ្នែកសន្តិសុខ ដែលបានលើកឡើងនៅក្នុងកិច្ចប្រជុំកំពូលអាស៊ាន និងរដ្ឋមន្ត្រីការពារជាតិអាស៊ាន។លោកជំទាវ បានបន្ដថា កិច្ចប្រជុំប្រចាំឆ្នាំលើកទី១៥ នឹងពិភាក្សាផ្តោតលើប្រធានបទសំខាន់ៗ រួមមាន៖ ការវាយតម្លៃលើវឌ្ឍនភាព និងសមិទ្ធផលរបស់ NADI ក្នុងរយៈពេល១៥ឆ្នាំកន្លងមក។ លោកជំទាវឧត្ដមសេនីយ៍ឯក បានបញ្ជាក់ថា ដោយឡែក កិច្ចប្រជុំចង្អៀតលើកទី០៦ នឹងមានការ ផ្លាស់ប្តូរទស្សនៈ ក៏ដូចជាចក្ខុវិស័យក្នុងចំណោមស្ថាប័នទាំង១៣របស់NADI លើបរិបទ នៃការការពារជាតិ និងសន្តិសុខសហសម័យ និងការឆ្លើយតបទៅនឹងបញ្ហាប្រឈមរួមគ្នា ជាពិសេសការពង្រឹងកិច្ចសហប្រតិ បត្តិការយោធាក្នុងតំបន់ ស្របតាមមូលបទរបស់ ADMM នៅឆ្នាំនេះគឺផ្តោតសំខាន់លើការបន្ត និងនិរន្តរភាព ក្នុងកិច្ចខិតខំប្រឹងប្រែងកសាងសហគមន៍អាស៊ាន និងការប្តេជ្ញាចិត្តលើកកម្ពស់ភាពជាដៃគូប្រកបដោយមិត្តភាពសម្រាប់សន្តិភាព និងស្ថិរភាព។ក្នុងចំណោមយន្តការសន្តិសុខជាច្រើន ដែលត្រូវបានដាក់ឱ្យដំណើរការ NADI គឺជាយន្តការមួយ ដែលបានដើរតួនាទីយ៉ាងសំខាន់ក្នុងការប្រមូលផ្តុំការសិក្សាស្រាវជ្រាវ និងទស្សនៈ សម្រាប់ស្ថាប័នការពារ ជាតិអាស៊ាន។ ជាមួយនឹងទស្សនវិស័យជាសកល និងលទ្ធផលក្នុងតំបន់កិច្ចប្រជុំនេះបន្តដើរតួនាទីជា អ្នកស្វែងរកអនុសាសន៍ ទស្សនទាន សម្រាប់ការវិភាគ ដែលជាកម្មវត្ថុនៃការពិចារណា និងការអនុម័ត ដោយថ្នាក់ដឹកនាំ នៃADSOM និង ADMM ) ៕អត្ថបទ៖ ឈិត សាវី

ការសម្អាតសំរាមក្នុងទឹកទន្លេ នឹងពង្រីកវិសាលភាពនៅតាមទន្លេទូទាំងប្រទេសកម្ពុជា

ភ្នំពេញ៖ ការសម្អាតសំរាមចេញពីទឹកទន្លេ គឺនឹងពង្រីកវិសាលភាពរបស់ខ្លួន ទៅតាមបណ្ដាខេត្តដែលមានទន្លេទូទាំងប្រទេសកម្ពុជា។ នេះជាការបញ្ជាក់របស់អង្គការ River Ocean Cleanup ជាអង្គការមួយដែលបានផ្ដួចផ្ដើម យុទ្ធនាការជាមួយ Everwave សហការជាមួយគណៈកម្មាធិការជាតិវាយតម្លៃទីក្រុងស្អាត នៃក្រសួងទេសចរណ៍ ក្រសួងបរិស្ថាន និងសាលារាជធានីភ្នំពេញ។យុទ្ធនាការសម្អាតទឹកទន្លេនេះ គឺបានចាប់ផ្ដើមតាំងពីថ្ងៃទី ១៨ ខែមីនា ក្នុងភូមិសាស្រ្តរាជធានីភ្នំពេញ។ ការសម្អាតនេះ ធ្វើឡើងដោយក្រុមហ៊ុន Everwave GmbH និងអង្គការ River Ocean Cleanup របស់អល្លឺម៉ង់ ដោយប្រើប្រាស់ ទូកប្រមូលសំរាមបំពាក់បច្ចេកវិទ្យាថ្មី ដែលមានសមត្ថភាពប្រមូលសំរាម បានចំនួន ២០តោនក្នុងមួយថ្ងៃ។ ពាក់ព័ន្ធនឹងការសម្អាតសំរាមចេញពីទឹកទន្លេនេះ លោក នូ សុវណ្ណ នាយកប្រត្តិបត្តិអង្គការ RiverOcean Cleanup លើកឡើងថា ផ្តោតសំខាន់លើការប្រមូលសំរាមចេញពីទន្លេមេគង្គ ទន្លេសាប និងទន្លេបាសាក់ឲ្យអស់ ដោយមិនផ្តោតទៅលើទំងន់ទំហំ រឺរយៈពេលនោះទេ ជាពិសេសគឺនឹងបន្តសំអាតសំរាមក្នុងទន្លេនៅទូទាំងប្រទេស។រយៈពេលប៉ុន្មានថ្ងៃនៃការប្រមូលសំរាមក្នុងទឹកទន្លេនេះ លោកលើកឡើងថាក្រុមការងារកំពុងប្រមូលសំរាមចេញពីទន្លេបាសាក់ ដែលមានសំរាមជាច្រើនលាយឡំគ្នា ដោយមានទាំងសំរាមដែលបោះចោលជាច្រើនឆ្នាំ និងសំរាមបោះចោលថ្មីៗផងដែរ។ សំរាមមួយចំនួនធំ បានលិចដល់បាតទន្លេបង្កជាផលលំបាកក្នុងការប្រមូល ហើយចំពោះសំរាមដែលប្រមូលចេញពីទឹកទន្លេ គឺយកកែឆ្នៃប្រើប្រាស់ឡើងវិញ និងបញ្ជូនសំរាមដែលមិនអាចកែច្នៃទៅមជ្ឈមណ្ឌលញែកសំរាម។ ពាក់ព័ន្ធនឹងយុទ្ធនាការប្រមូលសំរាមពីទឹកទន្លេនេះ ឯកឧត្តម តុប សុភ័ក អ្នកនាំពាក្យក្រសួងទេសចរណ៍ លើកឡើងថា រដ្ឋមន្រ្តីក្រសួងទេសចរណ៍ក៏មានគោលបំណងចង់ពង្រីកវិសាលភាព ការសម្អាតសំរាមក្នុងទន្លេទៅទីតាំងទេសចរណ៍ និងទីបណ្ដាខេត្តផ្សេងដែលមានប្រភពទឹក ដើម្បីសម្អាតទីក្រុងរបស់យើងឱ្យស្អាត ជាគោលដៅទេសចរណ៍ស្អាត ស្របតាមយុទ្ធនាការប្រឡងប្រណាំងទីក្រុងស្អាត។ទន្ទឹមនឹងការព្យាយាមសម្អាតសំរាមក្នុងទឹកទន្លេនេះ ឯកឧត្តមអ្នកនាំពាក្យក្រសួងទេសចរណ៍ ក៏លើកឡើងឱ្យមានការចូលរួមពីប្រជាពលរដ្ឋគ្រប់រូបក្នុងការគ្រប់គ្រងសំរាម ធ្វើឱ្យគោលដៅទេសចរណ៍មានភាពស្អាត៕អត្ថបទ៖ គឹមហុក

អង្គការសុខភាពពិភពលោក ព្រមានពីការបន្តវាយលុកយ៉ាងខ្លាំងជំងឺរាតត្បាតកូវីដ-១៩ នៅអាស៊ីប៉ាស៊ីហ្វិក រួមទាំងប្រទេសកម្ពុជាផង

ភ្នំពេញ៖ យោងតាមការអង្កេតរបស់អង្គការសុខភាពពិភពលោកបង្ហាញថា ជំងឺរាតត្បាតកូវីដ-១៩ បាននឹងកំពុងបន្តវាយលុកយ៉ាងខ្លាំងនៅបណ្តាប្រទេសក្នុងតំបន់អាស៊ីប៉ាស៊ីហ្វិកនៅឡើយ ក្នុងនោះក៏មានប្រទេសកម្ពុជាផងដែរ។យោងតាមរបាយការណ៍ នៃយុទ្ធនាការអប់រំសុខភាព រួមគ្នាទប់ស្កាត់ការចម្លងវីរុសកូវីដ-១៩ ក្រោមប្រធានបទ « រួមគ្នាប្រយុទ្ធវីរុសកូវីដ-១៩ បំប្លែងថ្មីអូមីក្រុង ដែលឆ្លងលឿនខ្លាំងជាងមុន អាចបង្កឱ្យមានហានិភ័យធ្ងន់ធ្ងរដល់អ្នក និងគ្រួសារ »បានប្រកាសថា ប្រទេសកម្ពុជាបានបើកឡើងវិញ នូវសកម្មភាពសេដ្ឋកិច្ច និងសង្គមនានា ចាប់ថ្ងៃទី០១ ខែវិច្ឆិកា ឆ្នាំ២០២១មក ប៉ុន្តែអង្គការសុខភាពពិភពលោក នៅតែមើលឃើញពីការបន្តវាយលុកយ៉ាងខ្លាំងជំងឺរាតត្បាតកូវីដ-១៩ នៅបណ្តាប្រទេសតំបន់អាស៊ីប៉ាស៊ីហ្វិក រួមទាំងប្រទេសកម្ពុជាផងដែរ។ក្រសួងសុខាភិបាលកម្ពុជាប្រកាសថា ចាប់ពី«អូមីក្រុង»មានវត្តមាននៅកម្ពុជាពីពាក់កណ្តាលខែធ្នូ ឆ្នាំ២០២១ មកដល់ថ្ងៃទី២១ ខែមីនា ឆ្នាំ២០២២ ករណីឈឺ និងស្លាប់ដោយកូវីដ-១៩ បណ្តាលមកពីមេរោគបំប្លែងខ្លួនថ្មី«អូមីក្រុង»នៅតែរកឃើញជាបន្តបន្ទាប់ និងជារៀងរាល់ថ្ងៃ ដែលធ្វើឱ្យមានកំណើនសរុបករណីឈឺ និងស្លាប់នៅកម្ពុជា។ក្រសួងសុខាភិបាល បញ្ជាក់ថា ចាប់ពីថ្ងៃទី១៤ ខែធ្នូ ឆ្នាំ២០២១ ដល់ថ្ងៃទី១២ ខែមីនា ឆ្នាំ២០២២ កម្ពុជារកឃើញករណីវិជ្ជមានកូវីដ-១៩ ប្រភេទ«អូមីក្រុង»សរុបចំនួន ១៣.៥៦១នាក់ និងមានអ្នកស្លាប់សរុបដោយ«អូមីក្រុង» ចំនួន៥១នាក់៕

សម្ដេចក្រឡាហោម៖ CPP អភិវឌ្ឍន៍ប្រទេសតាំងពីបាតដៃទទេ មិនដូចការចោទរបស់ពួកប្រឆាំងថាមិនបានធ្វើអី

ព្រៃវែង៖ សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ថ្លែងថា គណបក្សប្រជាជនកម្ពុជា (CPP) បានរំដោះពលរដ្ឋពីសម័យ ប៉ុល ពត ហើយបានអភិវឌ្ឍន៍ប្រទេសជាតិឲ្យមានការរីកចម្រើនលើគ្រប់វិស័យ មិនដូចការចោទរបស់ពួកប្រឆាំងថា គណបក្សកាន់អំណាចបច្ចុប្បន្ន មិនបានធ្វើអ្វីនោះទេ ។ក្នុងឱកាសអញ្ជើញបិទសន្និបាតលទ្ធផលការងារ ឆ្នាំ២០២១ និងទិសដៅអនុវត្តឆ្នាំ២០២២ របស់រដ្ឋបាលខេត្តព្រៃវែង នៅថ្ងៃទី២២ ខែមីនា ឆ្នាំ២០២២ សម្ដេចក្រឡាហោម មានប្រសាសន៍ថា អ្នកនយោបាយមួយចំនួនតែង បានលើកឡើងថា គណបក្សប្រជាជនកម្ពុជា អត់បានធ្វើអ្វីនោះទេ ចេះតែធ្វើនៅពេលរៀបចំបោះឆ្នោត ដោយទៅសំពះសូមសន្លឹកឆ្នោតពីប្រជាពលរដ្ឋ, តើនេះជាការពិត ឬមិនពិត គឺទុកឲ្យពលរដ្ឋជាអ្នកវាយតម្លៃ ។សម្ដេចបន្តថា ប៉ុន្តែក្នុងឋានៈគណបក្សប្រជាជនកម្ពុជា ជាប្រតិបត្តិករ ជាអ្នកដឹកនាំផ្ទាល់បានដឹងច្បាស់ថា ចាប់ពីការទទួលបាននូវឯករាជ្យមក គឺមិនដែលមានពេលណាមានសុខសន្តិភាពដូចបច្ចុប្បន្ននោះទេ នេះជាចំណុចត្រូវកត់សម្គាល់ ដោយមានការបង្រួបបង្រួមផ្សះផ្សាជាតិ គ្មានពួកឧទ្ទាមកាន់អាវុធក្រៅច្បាប់ ដើម្បីប្រឆាំងរាជរដ្ឋាភិបាល ដែលកំពុងកាន់អំណាចចេញពីការបោះឆ្នោត ។សម្ដេច ស ខេង បានបន្ថែមថា នេះជាចំណុចពិសេស ដែលបញ្ជាក់ឲ្យឃើញថា គណបក្សប្រជាជនកម្ពុជាមិនមែនមិនចេះធ្វើអ្វីនោះទេ ចេះធ្វើតាំងពីប្រទេសជាតិនៅមានសង្គ្រាម ការបែបបាក់ខ្ទេចខ្ទាំចង់ធ្លាក់ដល់បាតដាល តែទីបំផុតបានស្រង់កេរ្តិ៍ឈ្មោះប្រទេសជាតិ តាមរយៈការបញ្ចប់សង្គ្រាម នយោបាយឈ្នះឈ្នះ ដែលមានសម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានផ្ដួចផ្ដើមគំនិត ហើយធ្វើឲ្យប្រទេសជាតិ និងពលរដ្ឋមានសុខសន្តិភាពពេញលេញ រហូតមកដល់ពេលនេះ ។រដ្ឋមន្ត្រីក្រសួងមហាផ្ទៃ បានសង្កត់ធ្ងន់ថា បើគ្មានសុខសន្តិភាពទេ ប្រហែលជាគណបក្សនយោបាយ ឬអ្នកនយោបាយ មិនមានឱកាសដើម្បីនឹងនិយាយ ដើម្បីនឹងថា ដើម្បីធ្វើសកម្មភាពបាននោះដែរ ហើយកត្តាសុខសន្តិភាពនេះ គឺគណបក្សប្រជាជនកម្ពុជា បានអភិវឌ្ឍន៍ប្រទេសជាតិ មានការរីកចម្រើនជាបន្តបន្ទាប់លើគ្រប់វិស័យ ៕

ក្រសួងសុខាភិបាល ប្រកាសយុទ្ធនាការជាតិ «វីរុសបំប្លែងថ្មីអូមីក្រុង ឆ្លងលឿនខ្លាំងជាងមុន អាចបង្កឲ្យមានហានិភ័យធ្ងន់ធ្ងរដល់អ្នកនិងគ្រួសារ»

ភ្នំពេញ៖ ក្រសួងសុខាភិបាល ប្រកាសបើកយុទ្ធនាការជាតិ «វីរុសកូវីដ-១៩ បំប្លែងថ្មីអូមីក្រុងឆ្លងលឿនខ្លាំងជាងមុន អាចបង្កឲ្យមានហានិភ័យធ្ងន់ធ្ងរដល់អ្នក និងគ្រួសារ» នាព្រឹកថ្ងៃទី ២២ ខែមីនា ឆ្នាំ២០២២នេះ នៅរដ្ឋបាលសាលាខេត្តកំពង់ស្ពឺ។យុទ្ធនាការជាតិ «វីរុសកូវីដ-១៩ បំប្លែងថ្មីអូមីក្រុងឆ្លងលឿនខ្លាំងជាងមុន អាចបង្កឲ្យមានហានិភ័យធ្ងន់ធ្ងរដល់អ្នក និងគ្រួសារ» ក្រោមវត្តមានឯកឧត្តម សាស្រ្តាចារ្យ ម៉ម ប៊ុនហេង រដ្ឋមន្រ្តីក្រសួងសុខាភិបាល, និងលោកស្រី វេជ្ជបណ្ឌិត Li Ailan តំណាងអង្គការសុខភាពពិភពលោកប្រចាំកម្ពុជា និងលោកស្រី វេជ្ជបណ្ឌិត Foroogh Foyouzat តំណាងអង្គការ UNICEF ប្រចាំកម្ពុជា។ឯកឧត្តម សាស្រ្តាចារ្យ ម៉ម ប៊ុនហេង បានថ្លែងថា មកដល់ខែមីនា ឆ្នាំ២០២២នេះ គឺរយៈពេលជាងពីរឆ្នាំហើយដែលយើងបានប្រកៀកស្មារួបរួមគ្នា ប្រយុទ្ធប្រឆាំងយ៉ាងខ្លាំងក្លាជាមួយជំងឺកូវីដ-១៩ ក្រោមការដឹកនាំចង្អុលបង្ហាញប្រកបដោយគតិបណ្ឌិតរបស់សម្តេចតេជោ ហ៊ុន សែន នាយករដ្ឋមន្ត្រី នៃកម្ពុជា និងទទួលបានជោគជ័យជាទីមោទនៈ។ ប៉ុន្ដែវីរុសកូវីដ-១៩ ជាប្រភេទវីរុសដែលងាយបំប្លែងខ្លួនថ្មី ធ្វើឲ្យវាមានលទ្ធភាពអាចបន្តការរាតត្បាតលើសកលលោក។អង្គការសុខភាពពិភពលោកបានទទួលស្គាល់ទោះបីអត្រាស្លាប់នៃជំងឺកូវីដ-១៩ បានថយចុះ ហើយប្រទេសមួយចំនួនក្នុងពិភពលោកបានបន្ធូរបន្ថយការអនុវត្តវិធានការសុខាភិបាលក៏ដោយ ក៏ការបញ្ចប់ការរីករាលដាលនៃជំងឺកូវីដ-១៩ អាចនៅវែងឆ្ងាយទៀតជាពិសេសជាមួយវត្តមានវីរុសកូវីដ-១៩បំប្លែងថ្មីអូមីក្រុង ដែលសព្វថ្ងៃនេះ កំពុងតែរាតត្បាតនៅលើពិភពលោកនៅឡើយ។ ដូច្នេះការកែរប្រែឥរិយាបទទម្លាប់រស់នៅពីទម្លាប់ចាស់ មករស់នៅតាមគន្លងប្រកតីភាពថ្មី របស់បុគ្គល គ្រួសារ និងសហគមន៍ដោយនិរន្តរភាពពិតជាមានសារៈសំខាន់ណាស់ ហើយជាក់ស្តែងក្នុងរយៈពេលពីរឆ្នាំកន្លងមកនេះ ប្រជាជនយើងក៏បានផ្លាស់ប្តូរទម្លាប់មករស់នៅក្នុងគន្លងប្រតីភាពថ្មីហើយដែរ ដូចជាការអនុវត្ត ៣ការពារ៖ ការពាក់ម៉ាស់ រក្សាគម្លាត លាងសម្អាតដៃ ៣កុំ៖ កុំទៅកន្លែងមានមនុស្សកុះករច្រើន កុំទៅកន្លែងបិទជិតគ្មានខ្យល់ចេញចូល កុំប៉ះពាល់គ្នា កុំចាប់ដៃគ្នា កុំកៀកស្មាគ្នា និងបានចូលរួមយ៉ាងផុសផុលក្នុងការទៅចាក់វ៉ាក់សាំងកូវីដ-១៩ ទាំងដូសមូលដ្ឋាន និងដូសជំរុញ ដែលធ្វើឲ្យប្រទេសយើងក្លាយជាប្រទេសឈានមុខដែលបានចាក់វ៉ាក់សាំងកូវីដ-១៩ច្រើនជាងគេដល់ប្រជាជន។ជាមួយគ្នានោះលោកស្រី វេជ្ជបណ្ឌិត លី អាយលែន បានសង្កត់ធ្ងន់ថា ក្នុងដំណើរឆ្ពោះទៅមុខ យើងត្រូវបន្តកសាងបន្ថែមលើភាពជោគជ័យនេះ។ យើងត្រូវបន្តវិនិយោគលើប្រព័ន្ធសុខាភិបាល និងកសាងសមត្ថភាពបុគ្គលិកថែទាំសុខភាព និងសមត្ថភាពសហគមន៍។ ខណៈដែលជំងឺកូដ-១៩ ជាសោកនាដកម្មសាកលមួយ ជំងឺកូវីដ-១៩ គ្រោះមហន្តរាយនេះក៏បង្កើតជាឱកាសផងដែរ។ ឱកាសទាំងនោះ រួមមានឱកាសក្នុងការបង្កើនសមត្ថភាពមន្ទីរពិសោធន៍ ពង្រឹងប្រព័ន្ធតាមដានជំងឺ និងឱកាសធ្វើឱ្យប្រសើរឡើងនូវប្រព័ន្ធសុខាភិបាលទាំងមូលសម្រាប់ការឆ្លើយតបនាពេលបច្ចុប្បន្ន និងសម្រាប់គ្រាអាសន្នសុខភាពសាធារណៈនាពេលអនាគត៕អត្ថបទ រដ្ឋា

ក្នុងខែកុម្ភៈសមត្ថកិច្ចថៃចាប់បញ្ជូនពលករខ្មែរជាង៥ពាន់នាក់ មកតាមច្រកខេត្តបាត់ដំបង

បាត់ដំបង៖ ក្នុងរយៈពេលពេញមួយខែកុម្ភៈ ឆ្នាំ២០២២ សមត្ថកិច្ចថៃបានចាប់បញ្ជូនពលករខ្មែរជាង៥ពាន់នាក់មកតាមច្រកព្រំដែននានាក្នុងភូមិសាស្រ្តខេត្តបាត់ដំបង ខណៈសកម្មភាពបណ្តាញមេខ្យល់នាំមនុស្សឆ្លងដែនចេញចូលខុសច្បាប់ និងប្រជាពលរដ្ឋលបលួចឆ្លងដែនខុសច្បាប់ចូលប្រទេសថៃនៅតែបន្តកើតមាន។របាយការណ៍របស់គណៈបញ្ជាការឯកភាពរដ្ឋបាលខេត្តបាត់ដំបងប្រចាំខែកុម្ភៈ ឆ្នាំ២០២២បានឱ្យដឹងថា អាជ្ញាធរ និងកងកម្លាំងចម្រុះការពារព្រំដែន បានធ្វើការទប់ស្កាត់ប្រជាពលរដ្ឋដែលបម្រុងឆ្លងដែនខុសច្បាប់ចំនួន២លើក មនុស្ស១១នាក់ ស្រី៦នាក់ អនីតិជន ១នាក់ និងសមត្ថកិច្ចថៃចាប់បញ្ជូនមកវិញចំនួន ១៦០លើក មនុស្ស៥.៦៩៦នាក់(ស្រី ២.១៤៨នាក់) អនីតិជន ៩៩៤នាក់៕

ប្រេសិតពិសេសរបស់ប្រធានអាស៊ាន ជួបភាគីពាក់ព័ន្ធ និងមន្ត្រីសំខាន់ៗនៅសហភាពមីយ៉ាន់ម៉ា

ភ្នំពេញ៖ ឯកឧត្តមឧបនាយករដ្ឋមន្ត្រី ប្រាក់ សុខុន រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ និងជាប្រេសិតពិសេសរបស់ប្រធានអាស៊ាន បានជួបភាគីពាក់ព័ន្ធ និងមន្ត្រីសំខាន់ៗ នៅសហភាពមីយ៉ាន់ម៉ា នៅថ្ងៃទី ២១ ខែមីនា ឆ្នាំ២០២២។ប្រេសិតពិសេសប្រធានអាស៊ាន បានជួបជាមួយឯកឧត្តម វុនណា ម៉ោង ល្វីន រដ្ឋមន្ត្រីការបរទេសមីយ៉ាន់ម៉ា, ឯកឧត្តម កូ កូ ឡាំង រដ្ឋមន្រ្តីសហប្រតិបត្តិការអន្តរជាតិ និងជាប្រធានក្រុមការងារស្តីពីជំនួយមនុស្សធម៌អាស៊ាន, និងឯកឧត្តមឧត្តមសេនីយ៍ យ៉ា ព្យេ រដ្ឋមន្ត្រីការិយាល័យរដ្ឋាភិបាលសហព័ន្ធ និងជាប្រធានគណៈកម្មាធិការសាមគ្គីភាពជាតិ និងកសាងសន្តិភាព។គួរបញ្ជាក់ថា កាលព្រឹកថ្ងៃទី ២១ ខែមីនា ឆ្នាំ២០២២ ក្នុងឱកាសបំពេញទស្សនកិច្ចការងារនៅមីយ៉ាន់ម៉ា ឯកឧត្តម ឧបនាយករដ្ឋមន្ត្រី ប្រាក់ សុខុន បានចូលជួបសវនាការចំពោះឯកឧត្តម នាយឧត្តមសេនីយ៍ជាន់ខ្ពស់ មីង អោង ឡាំង ប្រធានក្រុមប្រឹក្សារដ្ឋបាលរដ្ឋនៃសាធារណរដ្ឋសហភាពមីយ៉ាន់ម៉ា។ភាគីទាំងពីរបានពិភាក្សា និងផ្លាស់ប្តូរទស្សនៈស្តីពីការអនុវត្ត និងវឌ្ឍនភាពនៃការព្រមព្រៀងជាឯកច្ឆន្នប្រាំចំណុចរបស់អាស៊ាន ក្រោយពីដំណើរទស្សនកិច្ចរបស់សម្តេចតេជោនាយករដ្ឋមន្រ្តី ហ៊ុន សែន កាលពីខែមករាឆ្នាំនេះ៕

ទ័ពមួកខៀវកម្ពុជាជាង២០០នាក់ ហ្វឹកហ្វឺនត្រៀមចេញបេសកកម្មរក្សាសន្តិភាព Unនៅអាហ្វ្រិកកណ្តាល

ភ្នំពេញ៖ មកដល់ថ្ងៃពេលនេះកម្ពុជា បានត្រៀមលក្ខណៈរួចរាល់ ក្នុងការបញ្ជូនកងកម្លាំងថែរក្សាសន្តិភាពអង្គការសហប្រជាជាតិពីកម្ពុជាប្រមាណជាង២០០នាក់ និងគ្រឿងយន្តសម្ភារៈបំរើអោយការងារសាងសង់សំណង់ និងការដោះមីនជាច្រើនគ្រឿងទៀត បញ្ជូនទៅបំពេញបេសកកម្មថែរក្សាសន្តិភាពអង្គការសហប្រជាជាតិនៅអាហ្វឹ្រកកណ្តាល នៅក្នុងអំឡុងខែក្រោយនេះ។បើតាមនាយឧត្តមសេនីយ៍ សែម សុវណ្ណនី អនុប្រធានគណៈកម្មាធិការជាតិ និងជាអគ្គនាយកមជ្ឈមណ្ឌលជាតិរក្សាសន្តិភាព បានថ្លែងប្រាប់ BTV នៅថ្ងៃទី២០ ខែមីនានេះថា នៅពេលនេះ យើងបានត្រៀមលក្ខណៈសម្បត្តិរួចជាស្រេចក្នុងការចាត់បញ្ជូនកងយោធាមួកខៀវព្រមទាំងគ្រឿងសម្ភារៈបំពាក់សម្រាប់បេសកកម្មប្តូរវេនតាមអាណត្តិរបស់អង្គការសហប្រជាជាតិដែលតែងធ្វើឡើងក្នុងរយៈពេលមួយឆ្នាំម្តងនោះទៅកាន់តំបន់បេសកកម្មរបស់អង្គការសហប្រជាជាតិនៅសាធារណរដ្ឋអាហ្វ្រិកកណ្តាលដែលហៅកាត់ថា MINUSCA ។ក្នុងដំណើរចុះពិនិត្យការបង្ហាញសមត្ថភាពជំនាញកងទ័ពមួកខៀវ នៅសាលាហ្វឹកហ្វឺនកងកម្លាំងរក្សាសន្តិភាពពហុជាតិក្នុងស្រុកភ្នំស្រួច ខេត្តកំពង់ស្ពឺ ឯកឧត្តម សែម សុវណ្ណនី បានវាយតំលៃថា កងកម្លាំងយើងគឺមានសមត្ថភាពចំណេះដឹង ជំនាញសកម្មភាពរុករកគ្រឿងផ្ទុះថ្មីៗ ការប្រើកងសុនខហិតមីនពីភាពប៉ិនប្រសប់ ចេះប្រើប្រាស់គ្រឿងយុទ្ធោបករណ៍សម្រាប់ការងារបេសកកម្មរបស់កងកម្ទេចគ្រឿងផ្ទុះថ្មី (EOD) តាមកម្រិតស្តង់ដារកំណត់ដោយUN ។នាយឧត្តមសេនីយ៍ សែម សុវណ្ណនី ថ្លែងថា នៅក្នុងដំណើរបញ្ជូនកងកម្លាំងប្តូរវេននៅបំពេញបេសកកម្មនៅអាហ្វឹ្រកកណ្តាលនេះដែរ យើងក៏នឹងបញ្ជូនគ្រឿងបំពាក់ជាច្រើនទៀតដូចជា រថយន្តធុនធំមានប្រសិទ្ធការពារគ្រាប់កាំភ្លើងនិងការបំផ្ទុះដោយគ្រាប់មីន រ៉ូបូតដែលមានសមត្ថភាពចាប់និងបន្សាបគ្រាប់មីនព្រមទាំងគ្រឿងឧបករណ៍ជាច្រើនប្រភេទទៀតផងដែរ ហើយគ្រឿងបំពាក់ទាំងនោះ គ្រោងនឹងបញ្ជូននៅដើមសប្តាហ៍ក្រោយនេះ។សូមបញ្ជាក់ថា នៅដើមសប្តាហ៍ក្រោយនេះដែរ ក្រុមការងារមកពីអង្គការសហប្រជាជាតិ នឹងអញ្ជើញចុះត្រួតពិនិត្យកងយោធាមួកខៀវកម្ពុជា និងគ្រឿងសម្ភារៈបំពាក់ដែលនឹងត្រូវបញ្ជូនទៅបេសកកម្មនៅសាធារណរដ្ឋអាហ្វ្រិកកណ្តាល នៅវិទ្យាស្ថានឧដុង្គផងដែរ៕ អត្ថបទ ស៊ុម សុខជា

សម្តេចតេជោ ហ៊ុន សែន អញ្ជើញប្រកាសដាក់ឱ្យអនុវត្តកម្មវិធីជាតិសម្រាប់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ ដំណាក់កាលទី២

ភ្នំពេញ ៖ សម្តេចតេជោ ហ៊ុន សែន នាយករដ្ឋមន្ត្រី អញ្ជើញជាអធិបតីភាពដ៏ខ្ពង់ខ្ពស់ក្នុងពិធីប្រកាសផ្សព្វផ្សាយ និងដាក់ឱ្យអនុវត្តកម្មវិធីជាតិសម្រាប់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិដំណាក់កាលទី២ (២០២១-២០៣០) នៅរសៀលថ្ងៃទី២១ ខែមីនា ឆ្នាំ២០២២នេះ។ គួរបញ្ជាក់ថា កម្មវិធីកំណែទម្រង់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ បានចាប់ផ្តើមក្នុងដំណាក់កាលដំបូងជាប្រវត្តិសាស្រ្តតាមរយៈការបោះឆ្នោតជ្រើសរើសក្រុមប្រឹក្សាឃុំ សង្កាត់ទូទាំងប្រទេស និងការដាក់ឱ្យដំណើរការនូវប្រព័ន្ធគ្រប់គ្រងតាមបែបវិមជ្ឈការនៅថ្នាក់ឃុំ សង្កាត់នាឆ្នាំ២០០២ ស្របតាមច្បាប់ស្តីពីការបោះឆ្នោតជ្រើសរើសក្រុមប្រឹក្សាឃុំ សង្កាត់ និងច្បាប់ស្តីពីការគ្រប់គ្រងរដ្ឋបាលឃុំ សង្កាត់។ផ្អែកតាមបទពិសោធន៍ និងភាពជោគជ័យនៃការអនុវត្តកំណែទម្រង់នៅថ្នាក់ឃុំ សង្កាត់ រាជរដ្ឋាភិបាលបានពង្រីកវិសាលភាពនៃកំណែទម្រង់នេះទៅគ្រប់រដ្ឋបាលថ្នាក់ក្រោមជាតិ តាមរយៈការបោះឆ្នោតអសកលជ្រើសរើសក្រុមប្រឹក្សារាជធានី ខេត្ត ក្រុង ស្រុក ខណ្ឌទូទាំងប្រទេស និងការដាក់ឱ្យដំណើរការនូវប្រព័ន្ធគ្រប់គ្រងរដ្ឋបាលថ្នាក់ក្រោមជាតិតាមបែបវិមជ្ឈការ និងវិសហមជ្ឈការនាឆ្នាំ២០០៩ ស្របតាមច្បាប់ស្តីពីការបោះឆ្នោតជ្រើសរើសក្រុមប្រឹក្សារាជធានី ខេត្ត ក្រុង ស្រុក ខណ្ឌ និងច្បាប់ស្តីពីការគ្រប់គ្រងរដ្ឋបាលរាជធានី ខេត្ត ក្រុង ស្រុក ខណ្ឌ។កម្មវិធីកំណែទម្រង់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ ក្នុងដំណាក់កាលនៃការពង្រីកនេះ គឺមានវិសាលភាពកាន់តែទូលំទូលាយពាក់ព័ន្ធគ្រប់ក្រសួង ស្ថាប័នទាំងនៅថ្នាក់ជាតិ និងថ្នាក់ក្រោមជាតិ និងមានលក្ខណៈសាំញ៉ាំស្មុគស្មាញ ដែលទាមទារឱ្យរាជរដ្ឋាភិបាលត្រូវរៀបចំ និងដាក់ឱ្យអនុវត្តនូវកម្មវិធីជាតិសម្រាប់អភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិរយៈពេល១០ឆ្នាំ គឺចាប់ពីឆ្នាំ២០១០-២០២០ ដើម្បីផ្តល់ជាផែនទីបង្ហាញផ្លូវសម្រាប់អនុវត្តច្បាប់រៀបចំអង្គការពាក់ព័ន្ធនឹងការគ្រប់គ្រងរដ្ឋបាលថ្នាក់ក្រោមជាតិ៕

បណ្ដាញសង្គម

ព័ត៌មានថ្មីៗ

ឯកឧត្តម ចាយ បូរិន និងលោកជំទាវ ដឹកនាំមន្រ្តីរាជការក្រោមឱវាទ អញ្ជើញចូលរួមក្នុងពិធីសូត្រមន្ត ចម្រើនព្រះបរិត្ត សម្តែងធម៌ទេសនា ពិធីបុណ្យកាន់បិណ្ឌវេនទី៣ នៅវត្តបទុមវតីរាជវរារាម

ក្រុមឧទ្ទាមមានសម្ព័ន្ធជាមួយ ISIS សម្លាប់មនុស្សជាង ៥០នាក់ នៅឯពិធីបុណ្យសពភាគខាងកើតកុងហ្គោ

ប្រជាពលរដ្ឋនៅស្រុកកោះធំ ថ្លែងនូវការសប្បាយចិត្ត ទទួលបានផ្លូវបេតុងជាសមិទ្ធផលថ្មីក្នុងមូលដ្ឋាន

លោក Hegseth ៖ ការដាក់ពង្រាយកងទ័ពអាមេរិកនៅការ៉ាអ៊ីបមិនមែនជាការហ្វឹកហាត់នោះទេ

កយកាកម្ពុជា បានរៀបចំបទបង្ហាញដល់មន្ត្រីរាជការកម្ពុជា មុនចេញដំណើរទៅចូលរួមវគ្គបណ្តុះបណ្តាលនៅប្រទេសកូរ៉េ

កម្ពុជា ហ្វីលីពីន ពង្រឹងកិច្ចសហប្រតិបត្តិការ ធានានូវសន្តិសុខស្បៀង និងជំរុញកសិ-ពាណិជ្ជកម្ម

តុលាការ ICC បើកសវនាការព្រហ្មទណ្ឌប្រឆាំងមេដឹកនាំក្រុមឧទ្ទាមអ៊ូហ្គង់ដាលោក Joseph Kony

អ្នកនាំពាក្យក្រសួងព័ត៌មាន អំពាវនាវដល់ អ្នកសារព័ត៌មាន រាយការណ៍បញ្ហាជម្លោះព្រំដែន ប្រកបដោយវិជ្ជាជីវៈ

សកម្មជនកូរ៉េខាងត្បូងនាំគ្នាតវ៉ាប្រឆាំងការវាយឆ្មក់អន្តោប្រវេសន៍នៅសហរដ្ឋអាមេរិក

ទន្លេហូរប្រៀបច្រាំងបង្កជាទឹកជំនន់ធ្ងន់ធ្ងរនៅរដ្ឋ Gujarat ប្រទេសឥណ្ឌា

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877

នយោបាយ​ និង ការអភិវឌ្ឍន៍

កម្ពុជាធ្វើជាម្ចាស់ផ្ទះកិច្ចប្រជុំបណ្តាញវិទ្យាស្ថានសន្តិសុខ និងការពារជាតិអាស៊ាន លើកទី១៥

ការសម្អាតសំរាមក្នុងទឹកទន្លេ នឹងពង្រីកវិសាលភាពនៅតាមទន្លេទូទាំងប្រទេសកម្ពុជា

សម្ដេចក្រឡាហោម៖ CPP អភិវឌ្ឍន៍ប្រទេសតាំងពីបាតដៃទទេ មិន​ដូចការ​ចោទ​របស់​ពួក​ប្រឆាំង​ថា​មិន​បាន​ធ្វើអី

ក្នុង​ខែ​កុម្ភៈ​សមត្ថកិច្ច​ថៃ​ចាប់​បញ្ជូន​ពលករ​ខ្មែរ​ជាង​៥​ពាន់​នាក់​ មក​តាម​ច្រក​ខេត្ត​បាត់​ដំបង