នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
សម្ដេចធិបតី អំពាវនាវដល់ជនរួមជាតិជឿទុកចិត្តលើរាជរដ្ឋាភិបាល​ដែលកំពុង​ធ្វើកិច្ច​ការងារ​យ៉ាង​សកម្ម​ស្វែង​រក​ដំណោះស្រាយបញ្ចប់បញ្ហាព្រំដែនកម្ពុជា-ថៃ ឱ្យបានឆាប់រហ័ស
សម្ដេចធិបតីផ្ដល់អនុសាសន៍៧ចំណុច ដល់ក្រសួង-ស្ថាប័នពាក់ព័ន្ធឱ្យយកចិត្តទុកដាក់ក្នុងឱកាសទិវាអក្ខរកម្មអន្តរជាតិ ៨ កញ្ញា ២០២៥
សម្ដេចធិបតី៖ រាជរដ្ឋាភិបាលប្តេជ្ញាចិត្តយ៉ាងមុតមាំលើកកម្ពស់ការងារអក្ខរកម្ម និងបំពាក់បំប៉ន ជំនាញ និងឱកាសសិក្សាពេញមួយជីវិត ជាពិសេសជំនាញឌីជីថល
ប្រជាពលរដ្ឋត្រេកអរនឹងសមិទ្ធផលអាកាសយានដ្ឋានថ្មីដែលត្រៀមបើកដំណើរការ

នយោបាយ​ និង ការអភិវឌ្ឍន៍

ប្រព័ន្ធសុខាភិបាលកម្ពុជា មានសមត្ថភាពគ្រប់គ្រង និងឆ្លើយតបនឹងជំងឺកូវីដ-១៩

2022/03/17 02:29:36 pm        598
Facebook Telegram Linkin
ភ្នំពេញ៖ រដ្ឋមន្រ្តីក្រសួងសុខាភិបាល ឯកឧត្តមសាស្រ្តាចារ្យ ម៉ម ប៊ុនហេង បានបញ្ជាក់ថា ប្រព័ន្ធសុខាភិបាលកម្ពុជា មានសមត្ថភាពក្នុងការគ្រប់គ្រង និងការឆ្លើយតបនឹងជំងឺកូវីដ-១៩ និងរក្សាបាននូវនិរន្តរភាព នៃការផ្តល់សេវាថែទាំសុខភាពសារវ័ន្តជូនប្រជាពលរដ្ឋ នៅក្នុងបរិបទនៃការរាតត្បាតដោយជំងឺឆ្លង។ឯកឧត្តមសាស្រ្តាចារ្យ ម៉ម ប៊ុនហេង ថ្លែងក្នុងពិធីបិទកិច្ចប្រជុំពិនិត្យ និងវាយតម្លៃ​សមិទ្ធផល​សុខាភិបាលឆ្នាំ២០២១ ​និងទិសដៅសុខាភិបាលឆ្នាំ២០២២ ​នាទីសី្តការក្រសួងថ្ងៃទី១៦ ខែមីនា ឆ្នាំ២០២២។ឯកឧត្តម រដ្ឋមន្រ្តី បានបន្ថែមទៀតថា វិស័យសុខាភិបាល បានចូលរួមចំណែកយ៉ាងសំខាន់​ក្នុងការ​អភិវឌ្ឍសង្គមកិច្ច-សេដ្ឋកិច្ច ​និងការកាត់បន្ថយភាពក្រីក្រនៅប្រទេសកម្ពុជា តាមរយៈការលើកកម្ពស់​ស្ថានភាព​សុខភាព​របស់​ប្រជាពលរដ្ឋកម្ពុជា ឲ្យកាន់តែល្អប្រសើរឡើង​ដោយ​បាន​ថ​យចុះជា​បន្ត​បន្ទាប់​នូវ​អត្រាស្លាប់របស់មាតា ​ទារក និងកុមារ ​និងអត្រាឈឺ​ និង​អត្រាស្លាប់​ដោយជំងឺឆ្លង ដូចជា ជំងឺអេដស៍ របេង គ្រុនចាញ់ ​និង​គ្រុនឈាម​ជាដើម។ វឌ្ឍភាព​វិស័យសុខាភិបាល​សម្រេចបាន ​អាស្រ័យដោយរាជរដ្ឋាភិបាលកម្ពុជា​ក្រោម​ការដឹកនាំដ៏​ប៉ិនប្រសប់​ ឈ្លាសវៃ ម៉ឺងម៉ាត់ ​និង​ប្រកប​ដោយ​គតិបណ្ឌិត​របស់​សម្តេច​តេជោ ​ហ៊ុន សែន នាយករដ្ឋមន្រ្តី ​រក្សាបានសន្តិភាព ​និងស្ថេរភាពនយោបាយដែល​ជាមូលដ្ឋានគ្រឹះនៃការ​អភិវឌ្ឍ ការរស់នៅ​សុខដុមរមនា​របស់ប្រជាពលរដ្ឋ ​ការដោះស្រាយបញ្ហាប្រឈម​ នៃ​ការរាតត្បាត នៃជំងឺកូវីដ-១៩​ និងការបង្កើនចំណាយលើប្រព័ន្ធគាំពារសុខភាព​សង្គម​សម្រាប់គ្រួសារក្រីក្រ និង​ក្រុមជាគោលដៅ​ដទៃទៀត។ជាមួយគ្នានោះលោកជំទាវវេជ្ជបណ្ឌិត យក់ សម្បត្តិ រដ្ឋលេខាធិការក្រសួងសុខាភិបាល បាន​ឡើងធ្វើ​របាយការណ៍អំពីដំណើរការប្រយុទ្ធប្រឆាំងជំងឺកូវីដ-១៩ ​បញ្ជាក់ថា ​ក្នុងរយៈពេល២ឆ្នាំ ក្នុងការ​ប្រយុទ្ធប្រឆាំង​ជំងឺកូវីដ-១៩​ ក្រសួងសុខាភិបាលធានាថា​ មិនខ្វះសម្ភារៈ​ បរិក្ខារវេជ្ជសាស្រ្ត និងវ៉ាក់សាំង​បង្ការជំងឺកូវីដ-១៩ នោះឡើយ។ឯកឧត្តម សាស្រ្តាចារ្យ ម៉ម ប៊ុនហេង ​សូមក្រើនរំលឹកដល់មន្រ្តី បុគ្គលិកសុខាភិបាល​គ្រប់​លំដាប់​ថ្នាក់ ​ការចម្លងរាតត្បាតនៃជំងឺកូវីដ-១៩ ​នៅ​តែជាបញ្ហាគំរាមកំហែងដល់​សុខភាព​សាធារណៈ វិស័យ​សង្គមកិច្ចសេដ្ឋកិច្ច។ ដូច្នេះ​ត្រូវពង្រឹងកិច្ចសហការឲ្យកាន់តែខ្លាំងក្លាថែមទៀត រវាង​វិស័យ​សុខាភិបាល​ វិស័យពាក់ព័ន្ធ ​និងរដ្ឋបាលថ្នាក់ក្រោមជាតិ ​ដើម្បី​បង្កើន​ការ​យកចិត្តទុកដាក់របស់​ប្រជាពលរដ្ឋឲ្យអនុវត្តយ៉ាង​ខ្ជាប់ខ្ជួន​នូវវិធានសុខាភិបាល ​និងសេចក្តីណែនាំនានារបស់​រាជ​រដ្ឋាភិបាល ​និងក្រសួងសុខាភិបាល​ ដើម្បីរក្សាសុខភាព​ និងបង្ការជំងឺ ​ជាពិសេសជំងឺកូវីដ-១៩៕ អត្ថបទ៖ រដ្ឋា

អ្នករាយការណ៍សិទ្ធិមនុស្ស​សរសើរ​កម្ពុជា ​ដោះស្រាយ​ដោយ​សន្តិវិធីករណី​អតីត​បុគ្គលិក​ណាហ្គាវើល

2022/03/17 02:18:48 pm        583
Facebook Telegram Linkin
ភ្នំពេញ៖ អ្នករាយការណ៍ពិសេសទទួលបន្ទុកស្ថានភាពសិទ្ធមនុស្សនៅកម្ពុជា បានសំដែងនូវការពេញចិត្តចំពោះវឌ្ឍភាពនៃការខិតខំដោះស្រាយរបស់ក្រសួងការងារ និងបណ្តុះបណ្តាលវិជ្ជាជីវៈ និងអាជ្ញាធរមានសមត្ថកិច្ច ដើម្បីឈានទៅរកផ្លូវចរចារបញ្ចប់ ករណីបាតុកម្មដោយអតីតបុគ្គលិកកាស៊ីណូណាហ្គាវើលដ៍ ដោយសន្តិវិធី។ក្នុងជំនួបការងារ រវាងឯកឧត្តមបណ្ឌិត អ៊ិត សំហេង រដ្ឋមន្រ្តីក្រសួងការងារ និងបណ្តុះបណ្តាល​វិជ្ជាជីវៈ កាលពីរសៀលថ្ងៃទី១៦ មីនាឆ្នាំ២០២២នេះ ​នៅទីស្តីការក្រសួង ​តាមប្រព័ន្ធអនឡាញ​ដោយ​មាន​ការចូលរួមពីឯកឧត្តម អាន សុខខឿន ​ឯកអគ្គរាជទូត និង​ជា​តំណាង​ស្ថានបេសកកម្មអចិន្រ្តៃយ៍​កម្ពុជា​ប្រចាំអង្គការសហប្រជាជាតិ លោក វិទិត មុនតាប៊ន ​អ្នករាយការណ៍ពិសេសទទួល​បន្ទុកស្ថានភាព​សិទ្ធមនុស្សនៅកម្ពុជា បានមានប្រសាសន៍ថា​ ចំពោះបញ្ហាទាមទារនានា នឹងត្រូវអនុវត្តទៅតាមនីតិវិធីច្បាប់​ និងនីតិវិធីនៃការដោះស្រាយវិវាទការងារជាធរមាន។ ឯកឧត្តមបណ្ឌិត អ៊ិត សំហេង ​បានជម្រាបជូនពីការខិតខំរបស់កម្ពុជា ក្នុងការអនុវត្ត​អនុសញ្ញា​អន្តរជាតិ​របស់អង្គការអន្តរជាតិខាងការងារ (ILO) គោលនយោបាយច្បាប់​លិខិត​បទដ្ឋាន​ពាក់ព័ន្ធ​នឹងសិទ្ធិមនុស្ស ​ដែលប្រទេសកម្ពុជាបានផ្តល់សច្ចាប័នលើអនុសញ្ញាចំនួន១៣ ​របស់ ILO រួមទាំងអនុសញ្ញាស្នូលចំនួន៨ផងដែរ ខ្លឹមសារនៃអនុសញ្ញាទាំងនេះត្រូវបាន​ដាក់​បញ្ចូល​ទៅក្នុង​រដ្ឋធម្មនុញច្បាប់ និងលិខិតបទដ្ឋាន​ពាក់ព័ន្ធ​ នឹងវិស័យការងារនិងបណ្តុះបណ្តាលវិជ្ជាជីវៈ លក្ខខណ្ឌការងារ​នៅកម្ពុជា​បានអនុវត្តល្អប្រសើរស្របតាមច្បាប់ស្តីពីការងារ និងលិខិតបទដ្ឋាន​អន្តរជាតិស្តីពីការងារ។ ពាក់ព័ន្ធជាមួយនឹងការខិតខំពង្រឹងសិទ្ធសេរីភាពអង្គការវិជ្ជាជីវៈ ក្រសួងបានសម្រួលនីតិវិធីនៃការ​ចុះ​បញ្ជី​សហជីព​ សម្រួលនីតិវិធីនៃការរក្សាបញ្ជិកា សម្រួលលក្ខខណ្ឌស្នើសុំទទួលស្គាល់ភាពជា​តំណាង​បំផុត ​លើកកម្ពស់សិទ្ធ ​និងតួនាទីរបស់សហជីព ដែលមានសមាជិកភាគតិចឱ្យកាន់​តែ​ច្បាស់លាស់ ដោយបន្ថែមការធ្វើជាតំណាងសមាជិករបស់ខ្លួននៅក្នុងការដោះស្រាយវិវាទការងាររួម ដែលមិនកើតចេញពីការអនុវត្តអនុសញ្ញារួម។ ឯកឧត្តម បានលើកឡើងបន្តថា ក្រសួងបានចេញប្រកាសចំនួន៨ ដើម្បីសម្រួលដល់ការអនុវត្ត​ស្តីពីសហជីព ​ជាពិសេសការចុះបញ្ជីសហជីព ការទទួលស្គាល់ភាពជាតំណាង​បំផុត និង​សិទ្ធសហជីព​ភាគ​តិចក្នុងការដោះស្រាយ​វិវាទ​ការងាររួម​នៅក្រុមប្រឹក្សាអាជ្ញាកណ្តាល។ ដែលជាលទ្ធផលគិតត្រឹមខែមករា ឆ្នាំ២០២២ អង្គការវិជ្ជាជីវៈបានចុះបញ្ជីសរុបចំនួនជាង ៥ ៧០០ ដែលក្នុងនោះ ឆ្នាំ២០២១ មានចំនួន ២៦២។ ចំពោះការខិតខំក្នុងទប់ស្កាត់ការជួញដូរមនុស្ស ​ជួញដូរកម្លាំងពលកម្ម រួមទាំងការងារដោយបង្ខំ គឺក្រសួង​បានផ្តោតអាទិភាពខ្ពស់ក្នុងការពង្រឹងការអនុវត្តវិធានការច្បាប់ ​និងពង្រឹងយន្តការការងារ តាមរយៈអធិការកិច្ចការងារ ​និងការសហការជាមួយគម្រោងរោងចក្រ​កាន់តែប្រសើរនៅកម្ពុជា ដែល​រហូតមកដល់ពេលនេះយើងអាចទប់ស្កាត់​បានមិនឱ្យមានការងារដោយបង្ខំទេ ហើយការប្រើប្រាស់​ពលម្មកុមារក៏ត្រូវបានទប់ស្កាត់​ជាបន្តបន្ទាប់ផងដែរ។ តាមរយៈកិច្ចប្រជុំនេះ ​ភាគីទាំងពីរ ​បានសំដែងនូវការពេញចិត្តចំពោះអ្វីដែលជាការពិត ដែលបាន​នឹងកំពុងខិតខំអនុវត្ត ​ហើយសង្ឈឹមជឿជាក់ថា​កិច្ចសហប្រិតបត្តិការក្នុងការលើកកម្ពស់សិទ្ធមនុស្ស និងសិទ្ធការងារ ​នឹងបន្តចូលរួមកាន់តែ​ ប្រសើរថែមទៀត​ពីសំណាក់គ្រប់ភាគីពាក់ព័ន្ធ៕ អត្ថបទ៖ ឈិត បូរ៉ាវី

ចំនួនអ្នកជិះរថយន្តក្រុងសាធារណៈ មានតិចតួច ទោះបីតម្លៃប្រេងសាំងបន្តកើនឡើងក្ដី

2022/03/17 01:27:23 pm        533
Facebook Telegram Linkin
ភ្នំពេញ៖ ក្រោយពីបើកដំណើរការសេវារថយន្តសាធារណៈឡើងវិញ កាលពីចុងឆ្នាំ២០២១ មកទល់បច្ចុប្បន្នចំនួនប្រជាពលរដ្ឋដែលប្រើប្រាស់សេវារថយន្តក្រុងសាធារណៈនេះ គឺនៅតែមានចំនួនតិចតួចនៅឡើយ។ ប្រជាពលរដ្ឋភាគច្រើន នៅតែប្រើប្រាស់មធ្យោបាយធ្វើដំណើរផ្ទាល់ខ្លួន ទោះតម្លៃប្រេងសាំងបន្តកើនឡើងក្ដី។​ចំនួនប្រជាពលរដ្ឋប្រើប្រាស់សេវារថយន្ត​សាធរណៈសព្វថ្ងៃគឺមានចំនួនតិចតួច​នៅឡើយ។ នេះជាការលើកឡើងរបស់ ឃ្លី នរៈ ប្រធានការិយាល័យរដ្ឋបាល នៃរដ្ឋាករស្វយ័តដឹកជញ្ជូន​សាធារណៈរថយន្ត​ក្រុង (City Bus) រាជធានីភ្នំពេញ។ លោកថាចំនួនអ្នកជិះ គឺមានតិចតួចនៅឡើយ ដោយសព្វថ្ងៃគឺស្ថិតក្នុង ចន្លោះពី ២ ៥០០ ទៅ ៣​ ០០០ នាក់ ក្នុង១ថ្ងៃ ដោយកាលពីមុននៅពេលមិនទាន់មានវត្តមាន កូវីដ-១៩ គឺមានអ្នកជិះចន្លោះពី ២៥ ០០០នាក់ ទៅ ៣០ ០០០ នាក់ក្នុងមួយថ្ងៃ។ លោកបន្ត ថាសព្វថ្ងៃ រថយន្តក្រុង ដំណើរការត្រឹម ៣០% ប៉ុណ្ណោះ ដោយមានផ្លូវរត់ចំនួន ៤ខ្សែ និងប្រើប្រាស់រថយន្តចំនួន ៦០គ្រឿង។ ពាក់ព័ន្ធនឹងចំនួនប្រជាពលរដ្ឋប្រើប្រាស់សេវារថយន្តសាធារណៈនៅមានកម្រិតតិចតួចបែបនេះ លោកបាន​លើកទឹកចិត្តនិងសំណូមពរឱ្យប្រជាពលរដ្ឋ ងាកមកប្រើប្រាស់សេវារថយន្តក្រុង​សាធារណៈឱ្យបានកាន់តែច្រើន ​ព្រោះវាអាចកាត់បន្ថយការចំណាយ កាត់បន្ថយបញ្ហាគ្រោះថ្នាក់​ចរាចរណ៍ ​កាត់បន្ថយការបំពុលបរិស្ថាន ​និងធ្វើដំណើរដោយសុវត្ថិភាព។ ការអំពាវនាវនេះ ​ក៏ស្របពេលដែលបច្ចុប្បន្ន តម្លៃប្រេងសាំងកំពុងមានការកើនឡើងជាបន្តបន្ទាប់។ ជាក់ស្ដែងសម្រាប់តម្លៃសាំងធម្មតា ​និងតម្លៃប្រេងម៉ាស៊ូត ​បានកើនឡើងដល់តម្លៃ ៥៣០០រៀល​ក្នុង១លីត្រ។ ប្រជាពលរដ្ឋដែលបន្តប្រើប្រាស់សេវារថយន្តសាធារណៈរៀងរាល់ថ្ងៃនេះ លើកឡើងជាការ​ពេញ​ចិត្ត​ចំពោះសេវានេះ។ ​ ពួកគាត់ថា​ ជិះឡានក្រុងរាល់ថ្ងៃ គឺទទួលបានប្រយោជន៍ច្រើនទាំងរឿង​សុវត្ថិភាព ​និងការចំណេញថវិកាផងដែរ។ សូមជម្រាបជូនថា ការធ្វើដំណើររថយន្តក្រុងសាធារណៈ គឺចំណាយត្រឹមតែ​ ១៥០០ រៀល​តែប៉ុណ្ណោះ។ ​សម្រាប់សិស្សនិស្សិត ​កម្មករកម្មការិនី​ កីឡាករកីឡាការិនី ​ចាស់ជារា កុមារ​កម្ពស់ក្រោម ១ម៉ែត្រ​ អាចជិះដោយមិនគិតថ្លៃនោះទេ៕អត្ថបទ៖ គឹមហុក 

តុលាការផ្តន្ទាទោស សម រង្ស៊ី និងគូកន២០នាក់ទៀត ទាក់ទិនរៀបចំផែនការ​ផ្តួល​រំលំ​រាជរដ្ឋាភិបាល​កម្ពុជា

2022/03/17 07:11:10 am        657
Facebook Telegram Linkin
ភ្នំពេញ៖ នៅថ្ងៃនេះសាលាដំបូងរាជធានីភ្នំពេញ បានប្រកាសសាលក្រមផ្តន្ទាទោសលោក សម រង្ស៉ី និងជនដែលរួមគំនិតចំនួន ២០នាក់ទៀត ដាក់ពន្ធនាគាររយៈពេលពី៥ឆ្នាំទៅ១០ឆ្នាំ ក្រោមការចោទប្រកាន់ពីបទ រួមគំនិតកក្បត់ និងបទញុះញង់ បង្កឲ្យមានភាពវឹកវរធ្ងន់ធ្ងរ ដល់សន្តិសុខសង្គម។នៅថ្ងៃទី១៧ ខែមីនា ឆ្នាំ២០២២នេះសាលាដំបូងរាជធានីភ្នំពេញ បានប្រកាសសាលក្រមផ្តន្ទាទោស លោក សម រង្ស៉ី និងមេខ្លោងចំនួន៦រូបផ្សេងទៀត ឲ្យជាប់ពន្ធនាគារម្នាក់ៗរយេៈពេល ១០ឆ្នាំ ព្រមទាំង​ផ្តន្ទាទោសជនរួមគំនិតចំនួន១៤នាក់ទៀត ឲ្យជាប់ពន្ធនាគាររយៈពេល៥ឆ្នាំ ប៉ុន្តែទោសនេះ​ត្រូវបាន​អនុញ្ញាត​ឲ្យព្យួរទោសមួយចំនួន​ ក្រោមការចោទប្រកាន់ពីបទ « រួមគំនិតក្បត់ » និងបទ « ញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម » តាមមាត្រា៤៥៣ មាត្រា៤៩៤ និងមាត្រា ៤៩៥ នៃក្រមព្រហ្មទណ្ឌនៃព្រះរាជាណាចក្រកម្ពុជា ។សវនាការនេះ មានសមាសភាពលោក រស់ ពិសិដ្ឋ ជាប្រធានក្រុមប្រឹក្សា លោក អ៊ឹម វណ្ណៈ និងលោកស្រី សឿង ចរិយា ជាចៅក្រមប្រឹក្សា និងខាងតំណាងអយ្យការមានលោក សេង ហៀង និងលោក សំម ឫទ្ធីវាសនា។ការចោទប្រកាន់ខាងលើនេះ ពាក់ព័ន្ធនឹងអង្គហេតុនៃសេចក្តីអំពាវនាវរបស់បុគ្គល សម រង្ស៊ី ដែលបានបង្ហោះតាមបណ្តាញទំនាក់ទំនងសង្គមហ្វេសប៊ុក ចុះថ្ងៃទី៥ ខែតុលា ឆ្នាំ២០២១ ដែលមាន ខ្លឹមសារបង្កប់នូវការរៀបចំផែនការផ្តួលរំលំរាជរដ្ឋាភិបាលកម្ពុជា ក្រោមឧបាយកលអំពាវនាវ​ញុះញង់​កងកម្លាំងប្រដាប់អាវុធ ​និងប្រជាពលរដ្ឋឲ្យផ្តួលរំលំរាជរដ្ឋាភិបាលស្របច្បាប់នៃ ព្រះរាជាណាចក្រកម្ពុជា៕ អត្ថបទ ៖ ប្រាក់ វ៉ាន់ដា

សម្តេចតេជោ បញ្ជាក់ជាថ្មីអំពីការលើកពេលប្រជុំកំពូលអាស៊ាន-អាមេរិក ដោយសារកត្តាពេលវេលា

2022/03/17 01:01:02 pm        457
Facebook Telegram Linkin
ភ្នំពេញ៖ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី បានធ្វើ​ការ​ពន្យល់​ជូន​ជនរួមជាតិ ជាពិសេសសារទៅកាន់ក្រុមអ្នកវិភាគមួយចំនួនដែលសម្តេចបានហៅថា ជាល្ងង់ទូ ​តែង​តែ​បាន​លើក​ឡើង​ថា ប្រធានអាស៊ានលើកពេលវេលាដោយសារមិនចង់ប្រជុំជាមួយ នឹង​អាមេរិកនោះ, សម្តេចថា​៖ ដូ​ចសម្តេច​ធ្លាប់​បាន​​ផ្ញើ​សារទៅរួចហើយថា៖ សម្រាប់ខែ៥ខាងមុខនេះ សម្តេច មាន​កិច្ច​ការជាច្រើ​ននៅក្នុងប្រទេសដែលត្រូវធ្វើ​ជាពិសេស​​ការ​បោះ​ឆ្នោត​ជ្រើស​រើស​ក្រុមប្រឹក្សាឃុំសង្កាត់បានមកដល់។ក្នុងឱកាសអញ្ជើញជាអធិបតីដ៏ខ្ពង់ខ្ពស់ក្នុងពិធីសម្ពោធដាក់ឱ្យប្រើប្រាស់ជាផ្លូវការនូវភូមិកុមារSOS ខេត្ត​ព្រៃ​វែង ​នា​​ព្រឹកថ្ងៃទី១៧មីនានេះ សម្តេច​បានមានប្រសាសន៍​ថា៖ សម្ដេចធ្លាប់បាន​មាន​ប្រសាសន៍​ហើយថា​ ឆ្នាំនេះ​ សម្ដេច​រវល់​ណាស់​ទាំង​នៅក្នុងប្រទេស និងក្រៅប្រទេស ទោះបី​ជា​មានការកាត់ចោលនូវកម្មវិធី ​ក្រៅប្រទេសខ្លះ​ដោយ​សារ​មាន​កម្ម​វិធី​នៅក្នុងប្រទេស ប៉ុន្តែ​កន្លងទៅនេះ ​គឺមា​នការ​បកស្រា​យដោយបំភ្លៃការពិត​ទៅលើការ​ប្រជុំកំពូល​ពិសេស ​អាស៊ាន​-អាមេរិក ដែលគ្រោងនឹងប្រព្រឹត្តទៅនៅថ្ងៃទី២៨ និង​២៩មីនា​។​ចំណុចនេះ ត្រូវ​បានបកស្រាយ​ខុសដោយ​មនុស្ស​មួយ​ចំនួនថា​ប្រធានអាស៊ានមិនយល់ស្របក្នុងការប្រជុំរវាង​អាស៊ាន​និង​អាមេរិចទេ។សម្ដេចតេជោ បានបន្តថា បើ​តាម​កម្មវិធីឃើញថា ​ប្រធានាធិបតីអា​មេរិក​មា​ន​កម្មវិ​ធី​ជាប់​រវល់​ចេញ​ក្រៅប្រទេស​នៅ​ថ្ងៃ២៤​ ដែលមិនអាចលើកពេល​បាន​ដោយមានការសម្របសម្រួល​ជាមួយ​នឹង​ក្រុមណាតូនៅអឺរ៉ុបរួចស្រេចទៅហើយ។ ឯចំពោះមេដឹកនាំអាស៊ានគឺប្រទេសនីមួយៗ​មាន​កម្មវិធី​រៀងរៀងខ្លួន។​អ៊ីចឹងទេ ​សម្ដេច​ក៏បានពន្យល់ចំពោះប្រជាពល​រ​ដ្ឋរបស់យើងសូមឲ្យយល់អំពីការ​ដែល​កម្ពុជា​ជាសមាជិកអាស៊ានម្នាក់ ​ប៉ុន្តែជាប្រធានអាស៊ាននេះ​ គ្មានសិទ្ធិ​ក្នុង​ការ​កំណត់កាល​បរិច្ឆេទ​ទេ។ ប្រធានអាស៊ានមានសិទ្ធិ​ត្រឹម​តែបញ្ចេញយោបល់​លើការសម្រប​សម្រួល​អំពី​ពេលវេលា​ដើម្បី​ឱ្យ​មានការ​ឯកភាពគ្នា(កុងសង់ស៊ីស)ក្នុងអាស៊ាន១០ ​ហើយអ្នកដែល​ត្រូវ​សម្របសម្រួល​គឺ​ឥណ្ឌូនេស៊ី ឯនោះទេ។ដូច្នេះ​សូម​កុំយល់​ច្រឡំ​ហើយសូមអ្នកដែលមិនយល់​ឲ្យ​ទៅ​រៀនពីការងា​រអាស៊ាន​ឡើងវិញ​ហើយសម្ដេ​ចសង្ឃឹម​ថា អស់លោក​ជាបណ្ឌិត​ ឬសាស្ត្រាចារ្យកិច្ចការអន្តរជាតិជាដើម។ល។ សូមរៀនសូត្រ ​ឲ្យ​ចេះ​ដឹ​ងច្រើនជាងនេះ​ កុំឱ្យគេហៅថាល្ងង់ទូ​ព្រោះ​ប្រទេស​របស់យើង​មានសេតវិទូ ទស្សនវិទូ​ ប៉ុន្តែ​ក៏មានល្ងង់ទូដែរ ។ សម្ដេចក៏បានបន្តថា កា​រ​ដែល​មិន​មាន​ការ​ចេះ​ដឹង​គ្រប់គ្រាន់​បែបនេះហើយ​ គឺធ្វើ​ឱ្យចេញទៅជា​មនុស្ស​បែប​បោកប្រាស់,ឧទាហរណ៍​ដូចជា​ការ​ទម្លាក់​កំហុស​មក​ឲ្យ​ប្រធាន​អាស៊ាន​ដែលថា​ប្រធានអាស៊ាន ​អត់ចង់ប្រជុំ ​រវាងអាស៊ាននិងអាមេរិកជាដើមនោះ៕ អត្ថបទ៖ មុត សុទ្ធ

កម្ពុជាលែងតម្រូវឱ្យអ្នកដំណើរមកពីបរទេសបង្ហាញលទ្ធផលតេស្ត PCR អវិជ្ជមាន និងការធ្វើតេស្តរហ័ស

2022/03/17 12:42:26 pm        284
Facebook Telegram Linkin
​ព្រៃវែង៖ ប្រទេសកម្ពុជា បានសម្រេចលុបចោល​លក្ខខណ្ឌ​តម្រូវឱ្យអ្នកដំណើរមកពីបរទេស​បង្ហាញ​លទ្ធផលតេស្ត PCR អវិជ្ជមាន ៧២ម៉ោង និងការធ្វើតេស្តរហ័សពេលមកដល់ ដើម្បីបើកឱ្យ​កាន់តែ​ទូលាយ និងសម្រួលឱ្យកាន់តែមានភាពងាយ ​ស្រួលសម្រាប់អ្នកដំណើរក្នុងការចេញ-ចូលក្នុង និងក្រៅ​ប្រទេស។សេចក្ដីប្រកាសរបស់ក្រសួងសុខាភិបាល នៅថ្ងៃនេះ បានបញ្ជាក់ថា យោងចំណារ​ឯកភាព​ដ៏​ខ្ពង់ខ្ពស់​របស់ សម្តេចតេជោ ហ៊ុន សែន នាយករដ្ឋមន្រ្តី នៃកម្ពុជា គណៈកម្មការអន្តរក្រសួងដើម្បី​ប្រយុទ្ធ​នឹងជំងឺកូវីដ-១៩ បានសម្រចលុបចោល​លក្ខខណ្ឌតម្រូវឱ្យអ្នកដំណើរមកពីបរទេសត្រូវបង្ហាញ​លទ្ធផល​តេស្ត PCR អវិជ្ជមាន ក្នុងរយៈពេល៧២ម៉ោង ​មុនពេលមកដល់កម្ពុជា។លុបចោលការតម្រូវឱ្យធ្វើតេស្តរហ័សនៅពេលមកដល់កម្ពុជា។ ​អនុញ្ញាតឱ្យបើកដំណើរការ ឡើងវិញ​នូវការផ្តល់ទិដ្ឋាការពេលមកដល់ (Visa on Arrival) ​សម្រាប់អ្នកដំណើរអន្តរជាតិទាំងអស់ ទាំងអ្នកដំណើរតាម ផ្លូវអាកាស ​ផ្លូវគោក និងផ្លូវទឹក។សម្តេចតេជោ ហ៊ុន សែន នាយករដ្ឋមន្ត្រី នៃកម្ពុជា នៅព្រឹកនេះ ​នៅក្នុងពិធីសម្ពោធភូមិកុមារ SOS ក្នុងខេត្តព្រៃវែង បានបញ្ជាក់ថា ប្រៀបធៀប​ដោយ​មោទនភាព​ រវាងកម្ពុជា និងប្រទេស​អភិវឌ្ឍន៍​មួយចំនួន ​ដែលមានអ្នកឆ្លង​ និងស្លាប់ ដោយសារជំងឺកូវីដ-១៩​យ៉ាងច្រើននោះ​ គឺកម្ពុជា ដែលជា​ប្រទេសតូច និងក្រ​ តែបាន​អនុ​វត្ត​បាន​ដោយ​ជោគ​ជ័យលើការ គ្រប់គ្រង និងចាក់ស្រោចវ៉ាក់សាំង​ជូនដល់ប្រជាពលរដ្ឋរបស់ខ្លួនបាន​រហូតដល់ជាង៩២ភាគរយ នៃប្រជា​ពល​រដ្ឋទូទាំងប្រទេស និងកំពុងដំណើរការចាក់ឱ្យកុមារអាយុ៣ដល់៤ឆ្នាំ បានជិត៥០ភាគរយហើយដែរ។សេចក្តីប្រកាសរបស់ក្រសួងសុខាភិបាល ​បានបញ្ជាក់ដែរ ​ទោះបី​មាន​ការលុ​ប​ចោ​ល​ល​ក្ខ​ខណ្ឌតម្រូវ​ទាំងពីរក៏ ​ដោយ ក៏អ្នកដំណើរទាំងអស់ ​គប្បីធ្វើតេស្ត​រហ័ស​ដោយខ្លួនឯង។​ អ្នកដំណើរទាំងអស់ ត្រូវបង្ហាញវិញ្ញាបនបត្រ​បញ្ជាក់ការ ចាក់វ៉ាក់សាំងកូវីដ-១៩​ នៅពេល​មក​ដល់កម្ពុជា។ ចំពោះអ្នក​ដំណើរដែលពុំបានចាក់វ៉ាក់សាំងកូវីដ-១៩ ពេញលេញ ត្រូវធ្វើចត្តាឡីស័ករយៈពេល១៤ថ្ងៃ នៅតាមទីតាំង ​ដែលកំណត់ដោយក្រសួងសុខាភិបាល​ ឬអាជ្ញាធរមានសមត្ថកិច្ច៕ អត្ថបទ៖ មុត សុទ្ធ

សម្ដេចតេជោ៖ ពីឆ្នាំ២០១៩ ម្ដាយនិងកុមារជាង២៥ម៉ឺននាក់ ទទួលប្រាក់ឧបត្ថម្ភ

2022/03/17 11:58:33 am        436
Facebook Telegram Linkin
ព្រែវែង៖ សម្ដចតេជោ ហ៊ុន សែន នាយករដ្ឋមន្ត្រី នៃកម្ពុជា បានថ្លែងថា ចាប់ពីឆ្នាំ២០២១៩មក មានម្ដាយដែលជាស្ត្រីក្រីក្រ និងកុមារប្រមាណជាង ២៥ម៉ឺននាក់ បានទទួលនូវសេវាឧបត្ថម្ភសាច់​ប្រាក់​ពីរាជរដ្ឋាភិបាល​ ចាប់ពីមានផ្ទៃពោះ​ រហូតដល់កូនអាយុ២ឆ្នាំ ។ក្នុងពិធីសម្ពោធដាក់ឲ្យប្រើប្រាស់ “ភូមិកុមារ SOS” ក្នុងខេត្តព្រៃវែង នាថ្ងៃទី១៧ ខែមីនា ឆ្នាំ២០២២ សម្ដេចតេជោ នាយករដ្ឋមន្ត្រី មានប្រសាសន៍ថា រាជរដ្ឋាភិបាលមិនត្រឹម​តែយកចិត្តទុកដាក់​លើ​កុមារ​ដែលបានកើតឡើង ​និងត្រូវគេបោះបង់ចោលយកទៅថែទាំប៉ុណ្ណោះទេ ​ប៉ុន្តែប៉ុន្មានឆ្នាំចុងក្រោយនេះ រាជរដ្ឋាភិបាលបាន​យកចិត្តទុកដាក់ទៅលើស្ត្រីក្រីក្រ នៅពេលចាប់ផ្ដើមមាន​ផ្ទៃពោះ ដោយ​មាន​ការ​ជួយឧបត្ថម្ភ ​ដែលនេះ​ជាកម្មវិធីអចិន្ត្រៃយ៍​ និងខិតខំធ្វើបន្ត ។សម្ដេចតេជោ ហ៊ុន សែន បានបន្តថា ការឧបត្ថម្ភនេះ គឺអនុវត្តនៅមុនពេលឆ្លងទន្លេត្រូវ​ឧបត្ថម្ភ​ចំនួន៤ដង ដើម្បីឲ្យពួកគេទៅទទួលយកនូវសេវានៃការទៅ​ពិនិត្យផ្ទៃពោះ ខណៈដែលការ​ឧបត្ថម្ភបែបនេះ​ នៅតាមផ្សេងៗជាច្រើនទៀត ​នៅមិនទាន់មាននៅឡើយ ។សម្ដេចតេជោ បានបន្ថែមថា រាជរដ្ឋាភិបាលនឹងបង្កើនប្រាក់ឧបត្ថម្ភបន្ថែមទៀត ​ដល់កម្មវិធីនេះ នៅ​ពេលសេដ្ឋកិច្ចកាន់តែមានភាពរីកចម្រើន ​ដើម្បីឲ្យម្ដាយ​ និងកុមារ បានទទួលការថែទាំពីរាជរដ្ឋាភិបាល ។ គួរបញ្ជាក់ថា រាជរដ្ឋាភិបាលចាប់ផ្ដើមអនុវត្តកម្មវិធីឧបត្ថម្ភសាចប្រាក់ដំបូង​ ជូនស្ត្រីមានផ្ទៃពោះ និងកុមារអាយុក្រោម២ឆ្នាំ លើគ្រួសារក្រីក្រ ​ក្នុងក្របខ័ណ្ឌគោលនយោបាយ​គាំពា​សង្គម ចាប់​តាំងពីថ្ងៃមិថុនា ឆ្នាំ២០១៩ ៕អត្ថបទ៖ បាន​ សុខ​រិទ្ធ​

សម្ដេចតេជោ៖ ទោះកម្ពុជាក្រ តែបានចាក់វ៉ាក់សាំងជូនពលរដ្ឋជាង ៩២ភាគរយ ទូទាំងប្រទេស

2022/03/17 11:54:31 am        140
Facebook Telegram Linkin
ភ្នំពេញ៖ សម្ដេចតេជោ ហ៊ុន សែន នាយករដ្ឋមន្ត្រី បានថ្លែងថា បើទោះបីជាកម្ពុជាក្រ ប៉ុន្តែបានចាក់វ៉ាក់សាំងកូវីដ-១៩ ដល់ពលរដ្ឋបានជាង ៩២ភាគរយ និងអត្រាអ្នកឆ្លងកូវីដ-១៩ ទាប ជាងប្រទេសមួយចំនួន ដែលអួតថា ខ្លួនមានវិស័យសុខាភិបាលជឿនលឿន និងទំនើប តែមានអ្នកឆ្លងជាច្រើនម៉ឺនករណី ក្នុងមួយថ្ងៃនោះ ។ក្នុងពិធីសម្ពោធដាក់ឲ្យប្រើប្រាស់ (ភូមិកុមារ SOS) ក្នុងខេត្តព្រៃវែង នៅថ្ងៃទី១៧ ខែមីនា នេះ សម្ដេចតេជោ ហ៊ុន សែន បានមានប្រសាសន៍ថា ម្សិលមិញកម្ពុជា បានរកឃើញអ្នកវិជ្ជមានកូវីដ-១៩ ប្រភេទអូមីក្រុង ជាង១៣០ករណី ខណៈនៅប្រទេសខ្លះ មានអ្នកឆ្លងជាច្រើនម៉ឺននាក់ និង​ស្លាប់រាប់រយនាក់ ​ដោយសម្ដេច បានដាក់ជាសំណួរថា​ តើបញ្ហានេះ ត្រូវវាយតម្លៃលើបច្ចេកវិទ្យា ឬការទទួលខុសត្រូវ ។សម្ដេចតេជោ បានបន្តថា បើវាយតម្លៃលើការទទួលខុសត្រូវ ទោះបីអ្នកកើតក្នុងប្រទេស ឬដឹកនាំ ប្រទេស ដោយមានបច្ចេកវិទ្យាទាន់សម័យ សុខាភិបាលទាន់សម័យ ​ក៏ប៉ុន្តែការគិតរបស់អ្នក អាចនឹងមានកម្រិត បើប្រៀបធៀបជាមួយនឹងសកម្មភាព ដែលកម្ពុជាប្រកាន់យក។ជាមួយគ្នានេះ សម្ដេចតេ ហ៊ុន សែន បានបន្តអំពាវនាវដល់ពលរដ្ឋ ត្រូវអនុវត្តនូវវិធានការ ៣កុំ ៣ការពារ ឲ្យបានខ្ជាប់ខ្ជួន និងទៅទទួលការចាក់វ៉ាក់សាំងកូវីដ-១៩ ​ឲ្យបានគ្រប់គ្នា ដើម្បី​ទប់ស្កាត់ការឆ្លង រាលដាល នៃជំងឺដ៏កាច់សាហាវនេះបន្ថែមទៀត ៕អត្ថបទ៖ បាន សុខរិទ្ធ

សម្តេចតេជោ ហ៊ុន សែន ស្នើពលរដ្ឋកុំស្តីបន្ទោស​រាជរដ្ឋាភិបាល​ចំពោះបញ្ហា​ប្រេងឡើង​ថ្លៃ​នាពេលនេះ

2022/03/17 11:47:44 am        472
Facebook Telegram Linkin
ភ្នំពេញ៖ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃកម្ពុជា បានស្នើដល់ប្រជាពលរដ្ឋទាំងអស់ កាត់បន្ថយការធ្វើដំណើរ ខណៈប្រេងសាំងកំពុងហក់ឡើងខ្លាំង ហើយសម្តេច ក៏បានស្នើសុំកុំឲ្យជេររាជរដ្ឋាភិបាលដែរ ព្រោះមូលហេតុ ដែលប្រេងឡើងថ្លៃនេះ គឺកើតចេញពីបញ្ហាសកល ពិសេសគឺសង្រ្គាមរុស្ស៊ី និងអ៊ុយគ្រែន។ក្នុងពេលអញ្ជើញជាអធិបតីសម្ពោធដាក់ឱ្យប្រើប្រាស់ «ភូមិកុមារ SOS» នៅក្នុងខេត្តព្រៃវែង នា ព្រឹកថ្ងៃទី១៧ ខែមីនា នេះ សម្តេចតេជោ ហ៊ុន សែន បានលើកឡើងថា ប្រសិនបើមិនមានករណី​ចាំបាច់ទេ ប្រជាពលរដ្ឋទាំងអស់គប្បីកាត់បន្ថយការធ្វើដំណើរ ​ដោយសារតែពេលនេះប្រេង សាំង​បានឡើងថ្លៃ ហើយការឡើងថ្លៃនេះ គឺបានកើតឡើងចេញពីបញ្ហាសកល ដោយមានការដាក់​ទណ្ឌកម្ម​ចំពោះប្រទេសរុស្ស៊ី ពីសំណាក់សភាពអឺរ៉ុប និងអាមេរិកជាដើម។នៅក្នុងឱកាសនេះដែរ សម្តេចតេជោ ហ៊ុន សែន ក៏បានប្រកាសជាថ្មីម្តងទៀតថា ​សម្តេច ​នឹងមិន​អនុញ្ញាត​ជាដាច់ខាតចំពោះប្រជាពលរដ្ឋខ្មែរណា ​ដែលចង់ទៅធ្វើសង្រ្គាមនៅប្រទេសអ៊ុយគ្រែន ដោយ សម្តេចបានបញ្ជាក់ថា ការធ្វើបែបនេះ គឺប្រៀបដូចជាការយកសាំងទៅចាក់​លើភ្លើងយ៉ាង​ដូច្នោះ​ដែរ។ពាក់ព័ន្ធនឹងបញ្ហាសាំងឡើងថ្លៃវិញ សម្ដេចតេជោ ហ៊ុន សែន បានបញ្ជាក់ថា សម្តេច ​នៅតែបន្ត សង្កេត​ឃើញរថយន្ត ​បន្តធ្វើចរាចរពាសពេញផ្លូវដដែល​ ទាំងរថយន្តធុនតូច​ ធុនធំ ​និងម៉ូតូ ជាដើម៕ អត្ថបទ៖ បាន ចក់ 

ការចាក់វ៉ាក់សាំងជូនពលរដ្ឋក្នុងខណ្ឌដង្កោ សម្រេចស្ទើរតែ១០០ភាគរយ

2022/03/16 03:09:11 pm        753
Facebook Telegram Linkin
ភ្នំពេញ៖ ប្រជាពលរដ្ឋរស់នៅក្នុងខណ្ឌដង្កោ រាជធានីភ្នំពេញ ស្ទើរតែ១០០ភាគរយ បានទទួលវ៉ាក់សាំងកូវីដ-១៩ ហើយអាជ្ញាធរនៅតែបន្តអំពាវនាវ និងផ្សព្វផ្សាយបន្ថែមទៅដល់អ្នកមិនទាន់បានចាក់ ឱ្យទៅទទួលឲ្យបានគ្រប់គ្នា ដើម្បីបង្កើតភាពស៊ាំក្នុងសហគមន៍ ទប់ស្កាត់ការឆ្លងជំងឺកូវីដ-១៩។លោកវេជ្ជបណ្ឌិត ផេង ផល្លីន ប្រធានមន្ទីរពេទ្យដង្កោ បានឱ្យដឹងថា ដើម្បីបង្កការងាយស្រួលដល់ ប្រជាពលរដ្ឋ អាជ្ញាធរខណ្ឌដង្កោ និងមន្ត្រីជំនាញ បានរៀបចំមណ្ឌលចាក់វ៉ាក់សាំងជូនពលរដ្ឋ ចំនួន ៨កន្លែង ហើយការចាក់ គឺអនុវត្តចាប់ពីកុមារអាយុ៣ឆ្នាំឡើងទៅ និងចាប់ពីដូសទី១ រហូតដល់ដូសទី៤។លោកវេជ្ជបណ្ឌិត បានបន្តថា ពលរដ្ឋនៅក្នុងខណ្ឌដង្កោ ដែលគ្រប់អាយុត្រូវចាក់វ៉ាក់សាំង មាន ប្រមាណជាង ១៣ម៉ឺននាក់ ហើយពួកគេស្ទើរតែទាំងអស់បានមកចាក់វ៉ាក់សាំង ប៉ុន្តែ​តាមមណ្ឌល​នីមួយៗ មិនត្រឹមតែមានពលរដ្ឋរស់នៅក្នុងខណ្ឌផ្ទាល់ទេមកចាក់ ​សូម្បីតែនៅខណ្ឌផ្សេងៗ ក្នុងរាជធានីភ្នំពេញ ​និងពលរដ្ឋនៅបណ្ដាខេត្តមួយចំនួនក៏មកចាក់ផងដែរ ។លោកវេជ្ជបណ្ឌិត ផេង ផល្លីន បានបញ្ជាក់ថា នៅក្នុងខណ្ឌដង្កោ ​កុមារចាប់ពីអាយុ៣ឆ្នាំ រហូត​ដល់​មនុស្សពេញវ័យក្រោម ​១៨ឆ្នាំ ត្រូវចាក់វ៉ាក់សាំងប្រភេទស៊ីណូវ៉ាក់ ​និងមានវ៉ាក់សាំង៣ប្រភេទទៀត គឺ Moderna AstraZeneca និង Pfizer ​សម្រាប់ចាក់ដូសជំរុញដល់ពលរដ្ឋចាប់ពីអាយុ ១៨ឆ្នាំឡើង ហើយ​នៅក្នុងខណ្ឌមាន​វ៉ាក់សាំង​គ្រប់គ្រាន់​ សម្រាប់ចាក់ជូនពលរដ្ឋ ។យោងតាមរបាយការណ៍ក្រសួងសុខាភិបាល​ បានឲ្យដឹងថា គិតត្រឹមថ្ងៃទី១៥ ខែមីនា ឆ្នាំ២០២២ អត្រា​ចាក់វ៉ាក់សាំងកូវីដ-១៩ នៅកម្ពុជា លើពលរដ្ឋអាយុពី១៨ឆ្នាំឡើង ​មាន១០២,៥៦% ធៀប​ជាមួយចំនួនប្រជាជនគោលដៅ ​១០លាននាក់, លើកុមារ-យុវវ័យអាយុពី ១២ឆ្នាំ ទៅក្រោម ១៨ឆ្នាំ មាន ១០០,០៥% ធៀបជាមួយចំនួនប្រជាជនគោលដៅ ​១ ៨២៧ ៣៤៨នាក់, លើកុមារអាយុពី០៦ឆ្នាំ ដល់ក្រោម១២ឆ្នាំ ​មាន១០៧,៤៨% ធៀប​ជាមួយនឹងប្រជាជនគោលដៅ ​១ ៨៩៧ ៣៨២នាក់, លើ​កុមារអាយុ ០៥ឆ្នាំ មាន ១២១,២៧% ធៀបជាមួយ​នឹងប្រជាជនគោលដៅ ​៣០៤ ៣១៧នាក់, លើកុមារអាយុ ​០៣ឆ្នាំដល់ក្រោម០៥ឆ្នាំ មាន៤៤,៣៩% ធៀបជាមួយនឹងប្រជាជន​គោលដៅ ៦១០ ៧៣០នាក់ ​ហើយលទ្ធផលចាក់វ៉ាក់សាំងធៀប​នឹងចំនួនប្រជាជនសរុប ​១៦លាននាក់ មាន៩២,២៧% ៕ អត្ថបទ បាន សុខរិទ្ធិ

បណ្ដាញសង្គម

ព័ត៌មានថ្មីៗ

រដ្ឋមន្រ្តីសុខាភិបាល អនុញ្ញាតឱ្យគណៈកម្មការប្រយុទ្ធប្រឆាំងផលិតផលក្លែងក្លាយ ដែលបង្កគ្រោះថ្នាក់មានហានិភ័យខ្ពស់ដល់សុខភាព និងសុវត្ថិភាពសង្គម ជួបសម្តែងការគួរសម និងពិភាក្សាការងារ
09/10/2025 08:09 PM
Facebook Telegram Linkin
រ៉្វាន់ដា៖ ការអំពាវនាវរបស់កុងហ្គោឲ្យ UN ទទួលស្គាល់មាន «អំពើប្រល័យពូជសាសន៍» គឺជាទង្វើ «ល្ងង់ខ្លៅ»
09/10/2025 08:09 PM
Facebook Telegram Linkin
វិមានក្រឹមឡាំងបដិសេធមិនធ្វើអត្ថាធិប្បាយ ជុំវិញឧប្បត្តិហេតុយានដ្រូន នៅប៉ូឡូញ
09/10/2025 07:09 PM
Facebook Telegram Linkin
ក្រុមបារាំងកៀរគរគ្នាដើម្បីបេតិកភណ្ឌកម្ពុជា
09/10/2025 07:09 PM
Facebook Telegram Linkin
នាយករដ្ឋមន្ត្រីអង់គ្លេស៖ ការរំលោភរបស់រុស្ស៊ីលើដែនអាកាសប៉ូឡូញ គឺជា «ធ្វេសប្រហែសខ្លាំងណាស់»
09/10/2025 07:09 PM
Facebook Telegram Linkin
សមាជិកព្រឹទ្ធសភាអូស្ត្រាលីស្តាំនិយម ត្រូវបណ្តេញចេញពីក្រសួងស្រមោល ជុំវិញការអត្ថាធិប្បាយប្រឆាំងឥណ្ឌា
09/10/2025 06:09 PM
Facebook Telegram Linkin
ក្រុងច្បារមន និងខេត្តកំពង់ស្ពឺ ទទួលបាន ជ័យលាភី “ទីក្រុងទេសចរណ៍គ្មានផ្សែងបារី”
09/10/2025 06:09 PM
Facebook Telegram Linkin
ក្រុមហ៊ុនអាកាសចរណ៍ JAL រងការព្រមានជាលើកទី២ ពាក់ព័ន្ធនឹងអ្នកបើកបរយន្តហោះស្រវឹង
09/10/2025 06:09 PM
Facebook Telegram Linkin
ប្រមុខគណៈកម្មការ EU បញ្ជាក់ថា លោកស្រីនឹងស្នើវិធានការថ្មីផ្ដោតលើអ៊ីស្រាអែល
09/10/2025 06:09 PM
Facebook Telegram Linkin
សំឡេងផ្ទុះបន្លឺឡើង ក្រោយរថយន្តផ្លូវដែកផ្ទុកដោយឥន្ធនៈ មានអគ្គិភ័យ នៅលីទុយអានី
09/10/2025 06:09 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.