នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
ឯកឧត្តម ប៉េង ពោធិ៍នា៖ «យើងត្រូវរួបរួមគ្នាជាធ្លុងមួយ​ទប់ស្កាត់ និង​បំផ្លាញ​មហិច្ឆតា​នយោបាយ​របស់​ក្រុម​ជ្រុល​និយមមួយក្តាប់តូច ដែលតែងតែបញ្ឆេះកំហឹងជាតិសាសន៍»
គណបក្សប្រជាជនខេត្តកំពង់ឆ្នាំង ប្រារព្ធពិធីអបអខួបអនុស្សាវរីយ៍លើកទី៧៤ថ្ងៃបង្កើតគណបក្ស
គណបក្សប្រជាជនកម្ពុជាជាកម្លាំងនយោបាយតែមួយគត់រួមសុខរួមទុក្ខជាមួយប្រជាជនគ្រប់កាលៈទេសៈ
គណបក្សប្រជាជនកម្ពុជារាជធានីភ្នំពេញ ប្រកាស​បញ្ចូល​សមាជិក​សមាជិកា​គណបក្ស​ប្រជាជន​កម្ពុជា ៥៧៧នាក់ ដែលជាអតីតសកម្មជនមកពីគណបក្សប្រឆាំង

នយោបាយ​ និង ការអភិវឌ្ឍន៍

រាជរដ្ឋាភិបាលកម្ពុជា មិនបង្អន់ដៃលើការងារបោសសម្អាតមីន ដើម្បីជោគជ័យឆ្នាំ២០២៥

2022/03/04 02:47:31 pm        883
Facebook Telegram Linkin
បាត់ដំបង៖ ដើម្បីទទួលបានជោគជ័យកម្ពុជាគ្មានមីននៅឆ្នាំ២០២៥ ឯកឧត្តមទេសរដ្ឋមន្រ្តី លី ធុជ អនុប្រធានទី១ អាជ្ញាធរមីន បានលើកឡើងថា រាជរដ្ឋាភិបាលកម្ពុជា មិនបានបង្អន់ដៃឡើយ លើការងារបោសសម្អាតមីន ការចលនាកៀរគរធនធាន និងការចូលរួមចំណែកពីគ្រប់ភាគីពាក់ព័ន្ធ ត្រូវតែដំណើរការដោយរលូន និងដើរទន្ទឹមគ្នា ។ឯកឧត្តមទេសរដ្ឋមន្រ្តី លី ធុជ កាលពីម្សិលមិញ បានដឹកនាំតំណាងប្រទេសម្ចាស់ជំនួយ ចុះពិនិត្យ កិច្ចប្រតិបត្តិការបោសសម្អាតមីនរបស់កងឯកភាពទី២ នៃមជ្ឈមណ្ឌលសកម្មភាពកម្ចាត់មីនកម្ពុជា (CMAC) ក្រោមការគាំទ្រគម្រោងបោសសម្អាតមីនដើម្បីលទ្ធផលដំណាក់កាលទី៤ នៅខេត្តបាត់ដំបង ដោយមានការចូលរួមពីលោកស្រី អេលីហ្សា ឆេកឃឺ (Allissar Chaker) តំណាង UNDP ប្រចាំនៅកម្ពុជា លោកលេខាទូតទី១ នៃស្ថានទូតអូស្រ្តាលីប្រចាំនៅកម្ពុជា និងលោកស្រីនាយករងប្រចាំប្រទេសនៃភ្នាក់ងារ KOICA ។ឯកឧត្តមទេសរដ្ឋមន្រ្តី លី ធុជ បានបញ្ជាក់ថា អាជ្ញាធរមីន ក្នុងនាមជាសេនាធិការឲ្យរាជរដ្ឋាភិបាល បាននឹងកំពុងបន្តកិច្ចខិតខំប្រឹងប្រែង និងបំពេញបេសកកម្មរួមគ្នាជាមួយដៃគូអភិវឌ្ឍន៍ ប្រទេស​ជាមិត្ត​ប្រតិបត្តិករបោសសម្អាតមីន និងភាគីពាក់ព័ន្ធ ក្នុងការគាំទ្រដើម្បីឲ្យកម្ពុជារួចផុត​ពីគ្រាប់មីន ព្រមទាំងបានអំពាវនាវដល់ដៃគូអភិវឌ្ឍន៍ ​និងប្រទេសជាមិត្ត ​ដែលបាននឹងកំពុងជួយ និងមិនទាន់​បាន​ជួយកម្ពុជា បន្តគាំទ្រនិងចូលរួមដើម្បីបញ្ឈប់វត្តមានគ្រាប់មីន និងដើម្បីភាគជោគជ័យ​របស់​កម្ពុជា។ឯកឧត្តមទេសរដ្ឋមន្រ្តី បានបញ្ជាក់បន្ថែមថា ការងារបោសសម្អាតមីន ​នៅតែបន្តទៅមុខជានិច្ច ហើយ​ការស្រាវជ្រាវទិន្នន័យ​ចម្ការមីនមិនបច្ចេកទេស ​(Non-Technical Survey) និងការពិនិត្យ​ឡើងវិញ​ នូវការប្រើប្រាស់ដី​ (Revisit) ​ត្រូវតែដើរទន្ទឹមគ្នា ​ដើម្បីកាត់បន្ថយផ្ទៃដី កាត់បន្ថយ​ពេល​វេលា និងកាត់បន្ថយការចំណាយធនធានបោសសម្អាត៕អត្ថបទ៖ នឿត សុភក្ត្រ

សម្ដេចតេជោ៖ រុស្ស៊ីនឹងយល់ដែលកម្ពុជា សម្រេចចូលរួមក្នុងមហាសន្និតបាតUNជាមួយប្រទេសដទៃទៀត

2022/03/04 01:55:37 pm        367
Facebook Telegram Linkin
ភ្នំពេញ៖ សម្ដេតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានថ្លែងថា មិត្តរុស្ស៊ី នឹងយោគយល់ចំពោះការសម្រេចចិត្តរបស់កម្ពុជា ក្នុងការចូលរួមជាមួយប្រទេសដទៃទៀត ដើម្បីចូលរួមនៅក្នុងមហាសន្និបាតអង្គការសហប្រជាជាតិ។សម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ត្រូវបានអង្គភាពអ្នកនាំពាក្យ រាជរដ្ឋាភិបាល ដកស្រង់ប្រសាសន៍ពាក់ព័ន្ធនឹងសង្គ្រាមរុស្ស៊ី-អ៊ុយក្រែន មកបង្ហោះលើទំព័រ​ហ្វេសប៊ុក​របស់ ខ្លួនកាលពីយប់មិញថា ដោយសារតែសភាពការណ៍នៅអ៊ុយក្រែន កាន់តែធ្ងន់ធ្ងរ ការស្លាប់ជនស៊ីវិលកាន់តែច្រើន ហើយមហាសន្និបាតអង្គការសហប្រជាជាតិ កំពុងតែ​ដំណើរការ​នោះ កម្ពុជាមានការចាំបាច់ដើម្បី បញ្ចេញនូវសកម្មភាពក្នុងក្របខណ្ឌអាស៊ាន និងក្នុងក្របខណ្ឌខ្លួនឯងផង។ ក្នុងក្របខណ្ឌអាស៊ាន គឺ កម្ពុជាកំពុងតែពិភាក្សាជាមួយសមាជិកអាស៊ានដទៃទៀត ដើម្បីនឹងចេញ​សេចក្តីថ្លែងការណ៍អំពាវនាវឱ្យមានការឈប់បាញ់ ​ព្រោះបើមិនមានការឈប់បាញ់ទេ ​ជីវិតមនុស្ស ទ្រព្យសម្បត្តិ ​នឹងត្រូវបន្តស្លាប់ និងបំផ្លិចបំផ្លាញ ហើយធ្វើឱ្យការចរចានោះ មិនអាចឈាន​ទៅ​មុខបាន។ ដូច្នេះកម្ពុជា ត្រូវតែសម្រេចដើម្បីនឹងធ្វើការ ​អំពាវនាវឱ្យមានបទឈប់បាញ់មួយ ដែលនេះ​ជាការចង់បានសម្រាប់ការចរចាមួយ​ ក្នុងការរកដំណោះស្រាយក្នុងនាមអាស៊ាន។សម្ដេចតេជោ បានបញ្ជាក់ថា ក្នុងនាមកម្ពុជា ប្រទេសជាច្រើននៅក្នុងពិភពលោក កំពុងតែថ្កោល ទោសទៅលើការធ្វើសង្គ្រាម ពីសំណាក់រុស្ស៊ី ទៅកាន់អ៊ុយក្រែន។ សម្រាប់កម្ពុជា ក៏ត្រូវគិតអំពីគោលជំហរ របស់ខ្លួនឱ្យបានច្បាស់។ ដោយមានការស្នើសុំពីជប៉ុន បារាំង អាល្លឺម៉ង់ ​និងផ្នែករបស់សហរដ្ឋអាមេរិក ហើយដោយយល់​ឃើញ​ថា វាមានការចាំបាច់ កម្ពុជាសម្ររេចធ្វើ co-sponsor ជាមួយនឹងប្រទេសដទៃ ទៀត ដើម្បី​ចូលរួម​នៅក្នុងមហាសន្និបាតអង្គការសហប្រជាជាតិ ​ ដែលនេះ គឺជាជំហរដោយឡែករបស់កម្ពុជា។ សង្ឃឹមថា មិត្តរុស្ស៊ី នឹងយល់ ព្រោះអ្វី ដែលបានធ្វើក្នុងរយៈពេលកន្លងទៅ គឺកម្ពុជា​ ផ្ទុយនឹងគោល ការណ៍របស់កម្ពុជាលើនយោបាយការបរទេស ​ក្នុងនោះ គឺមិនគាំទ្រឱ្យមានការបំបែករដ្ឋ នេះជា​ចំណុចទី១ និងចំណុចទី២ ​គឺមិនគាំទ្រ​ទៅលើការប្រើប្រាស់កម្លាំង និងការត្រៀមដើម្បីប្រើប្រាស់​កម្លាំង​ ឬគំរាមកំហែង​ នូវការប្រើប្រាស់កម្លាំង ​ដូច្នេះពិតណាស់ថា រុស្ស៊ី នឹងមានការខឹងសម្បារ​ចំពោះ​កម្ពុចា ក៏ប៉ុន្តែ កម្ពុជាជារដ្ឋអធិបតេយ្យមានសិទ្ធិនឹងធ្វើសកម្មភាព ​ដើម្បីការពារ​សច្ចៈធម៌ ហើយកម្ពុជា ​ក៏ត្រូវមានការទទួលខុស​ ត្រូវក្នុងឋានៈជាសមាជិកអង្គការសហប្រជាជាតិផងដែរ៕អត្ថបទ៖ យន់ វ៉ាន់ 

កុមារជាង ២០ម៉ឺននាក់ អាយុក្រោម១៨ឆ្នាំ រស់នៅភ្នំពេញ ចាក់វ៉ាក់សាំងដូសទី៣រួចរាល់

2022/03/04 01:01:21 pm        336
Facebook Telegram Linkin
ភ្នំពេញ៖ គិតត្រឹមថ្ងៃទី៣ ខែមីនា នេះ កុមារអាយុពី៦ឆ្នាំ ដល់ក្រោម១៨ឆ្នាំ ចំនួនជាង ២០ម៉ឺននាក់ រស់នៅភ្នំពេញ បានទទួលការចាក់វ៉ាក់សាំងដូសទី៣រួចរាល់ ខណៈយុទ្ធនាការចាក់វ៉ាក់សាំងនៅតែបន្ត។ស្ថិតក្នុងបរិបទជំងឺកូវីដ-១៩ កុមារមកចាក់វ៉ាក់សាំង នៅមន្ទីរពេទ្យបង្អែកច្បារអំពៅ ​រាជធានីភ្នំពេញ នៅថ្ងៃទី៤ ខែមីនានេះ បានប្រាប់BTVឱ្យដឹងថា បន្ទាប់ពីចាក់វ៉ាក់សាំងដូសទី៣រួច ជួយបង្កើនទំនុកចិត្ត កាត់បន្ថយ​ហានិភ័យ​ឆ្លងជំងឺកូវីដ-១៩ ​ពេលនៅសាលារៀន។ បើទោះបីចាក់វ៉ាក់សាំងរួចក្តី ការអនុវត្ត វិធានការសុខាភិបាល ​និងវិធានការ ៣កុំ ៣ការពារ នៅតែបន្ត។ ក្រៅពីនេះ ពួកគេ ​បានថ្លែងអំណរគុណចំពោះរាជរដ្ឋាភិបាល ដែលបានស្វះស្វែង​រក​វ៉ាក់សាំង​មកចាក់ជូនប្រជាជពលរដ្ឋ ដោយមិនគិតថ្លៃ។សម្រាប់ពលរដ្ឋមិនទាន់ចាក់វ៉ាក់សាំងបង្កាជំងឺកូវីដ-១៩​ ចាប់ពីដូសទី១ ​ដល់ដូសទី៤ ​អាយុពី៣ឆ្នាំ ឡើង អាចទៅទទួលការចាក់វ៉ាក់សាំងបាន ​នៅទីតាំងសុខាភិបាលសាធារណៈ ដោយភ្ជាប់ទៅ​ជាមួយ​កាតចាក់វ៉ាក់សាំង សំបុត្រកំណើត​ អត្តសញ្ញាណប័ណ្ណ និង​ឯកសារ​ពាក់ព័ន្ធ​ផ្សេងៗ​មួយចំនួនទៀត៕អត្ថបទ៖ ទូច សោភ័ណ

ក្រសួងវប្បធម៌ ត្រៀមរៀបចំមហោស្រពសិល្បៈជាតិ គំនូរវិចិត្រកម្មពណ៌ទឹក លើកដំបូងនៅកម្ពុជា

2022/03/04 12:41:41 pm        829
Facebook Telegram Linkin
ភ្នំពេញ៖ ក្រសួងវប្បធម៌ និងវិចិត្រសិល្បៈ តៀមរៀបចំមហោស្រពសិល្បៈជាតិ គំនូរវិចិត្រកម្មពណ៌ទឹក លើកដំបូងនៅព្រះរាជាណាចក្រកម្ពុជា ក្រោមប្រធានបទ «ជីវិត និងធម្មជាតិ ឆ្នាំ២០២២»។លោក ឈឹម សុធី ប្រធាននាយកដ្ឋានសិល្បៈសូនរូប និងសិល្បៈសិប្បកម្ម ប្រាប់BTV ព័ត៌មាន នាព្រឹកថ្ងៃទី៤ ខែមីនា ឆ្នាំ២០២២នេះថា ក្រសួងវប្បធម៌ និងវិចិត្រសិល្បៈ ជូនដំណឹង ដល់វិចិត្រករ សិល្បករ សិប្បករ សិស្ស-និសិ្សត​ មហាជនទូទៅទាំង​អស់ឲ្យបានជម្រាបថា នាថ្ងៃទី៧-៨-៩ ខែមេសា ឆ្នាំ២០២២ខាងមុខនេះ។ក្រសួងនឹងរៀបចំ​មហោ​ស្រព​សិល្បៈជាតិ ស្តីពីគំនូរវិចិត្រកម្មពណ៌ទឹក ​ក្រោមប្រធានបទ «ជីវិត និងធម្មជាតិ» ​នៅ​បរិវេណ​​សាល​សន្និសីទ​ចតុម្មុខ រាជធានីភ្នំពេញ។វិចិត្រករ ​អ្នកមានវិជ្ជាជីវៈផ្នែក​គំនូរពណ៌ទឹក ត្រូវ​បាន​ជំរុញលើកទឹក​ចិត្ត​ឱ្យ​ចូលរួម​ប្រលង​ប្រកួត​ប្រជែង​យក​ជ័យ​លាភី​​លេខ១ លេខ២ និងលេខ៣ ​ព្រម​ទាំង​មាន​រង្វាន់​លើក​ទឹក​ចិត្តផងដែរ។ ក្រសួងវប្បធម៌ ​និងវិចិត្រសិល្បៈ សង្ឃឹមថា វិចិត្រករ សិល្បករ សិប្បករ សិស្ស- និសិ្សត ​អង្គការ សមាគម​ សិល្បៈ​នានា នឹងអញ្ជើញ​ចូលរួម​ប្រកួតប្រជែង​ក្នុង​ពិធីមហោស្រពសិល្បៈជាតិ គំនូរ​វិចិត្រពណ៌ទឹក​ ក្រោមប្រធានបទ ​«ជីវិត​ និងធម្មជាតិ» ឆ្នាំ២០២២ ​នាពេលខាងមុខនេះ​ ឲ្យបានច្រើន​កុះករ ​ដើម្បីរួមគ្នាអភិវឌ្ឍន៍​លើក​ស្ទួយ​សិល្បៈ​វប្បធម៌​ជាតិ៕ អត្ថបទ រដ្ឋា

បក្សនយោបាយចាប់ផ្តើមចុះឈ្មោះបេក្ខជនរបស់ខ្លួន សម្រាប់ការបោះឆ្នោតឃុំ-សង្កាត់ ខាងមុខ

2022/03/04 12:24:22 pm        754
Facebook Telegram Linkin
ភ្នំពេញ៖ នៅថ្ងៃទី ៤ ខែមីនានេះ គណៈកម្មាធិការជាតិរៀបចំការបោះឆ្នោត (គជប) បានចាប់ផ្តើមដំណើរការចុះឈ្មោះបេក្ខជនរបស់គណបក្សនយោបាយសម្រាប់ចូលរួមការបោះឆ្នោតជ្រើសរើសក្រុមប្រឹក្សាឃុំ-សង្កាត់ អាណ្ណត្តិទី៥ ខាងមុខ។គណៈកម្មាធិការជាតិរៀបចំការបោះឆ្នោត (គជប) ចាប់ផ្តើមដំណើរការចុះឈ្មោះបេក្ខជន​របស់​គណបក្ស​នយោបាយនៅតាមទីស្នាក់ការគណៈកម្មការរៀបចំការបោះឆ្នោតក្នុងឃុំ-សង្កាត់នៅ​ទូទាំង​ប្រទេស សម្រាប់ក្របខណ្ឌរាជធានីភ្នំពេញ ​មានគណបក្សនយោបាយនានា បានអញ្ជើញទៅ​ចុះឈ្មោះ​បេក្ខជន​ជាបន្តបន្ទាប់។ ​ជាក់ស្តែងក្នុងថ្ងៃដំបូងនេះ ឃើញមានគណបក្សប្រជាជនកម្ពុជា និងគណបក្ស​ហ៊្វុនស៊ិនប៉ិច បានទៅចុះឈ្មោះ ​ក៏ដូចជាតំណាងបេក្ខជនគណបក្សរបស់ខ្លួនដែលឈរ​ប្រកួតប្រជែង​នៅតាមសង្កាត់ក្នុងរាជធានីភ្នំពេញ បានចុះឈ្មោះបេក្ខជននៅតាមទីស្នាក់ការ​គណៈកម្មការរៀបចំការបោះឆ្នោតរួចរាល់។លោក សឿង កុសល ប្រធានតំណាងគណបក្សប្រជានកម្ពុជា ក្នុងសង្កាត់ផ្សារថ្មី៣​ បានប្រាប់BTV ឲ្យដឹងថា ​គណបក្សបានបំពេញតាមការណែនាំរបស់ គជប​ ស្តីពីការចុះឈ្មោះបេក្ខជន​របស់ខ្លួន ដើម្បី​ចូលរួមការបោះឆ្នោតក្រុមប្រឹក្សាឃុំ-សង្កាត់​ នាពេលខាងមុខ។លោកស្រី ជួន ចាន់ធី មកពីគណបក្សហ៊្វុនស៊ិនប៉ិច ​បានឲ្យដឹងថា គណបក្សរបស់លោកស្រី​បាន​ចុះឈ្មោះបេក្ខជនក្នុងការប្រកួតប្រជែង សម្រាប់ការបោះឆ្នោតក្រុមប្រឹក្សាឃុំ-សង្កាត់រួចរាល់ និង​អះអាងថា ​ដំណើរការចុះឈ្មោះនេះ បានប្រព្រឹត្តទៅត្រឹមត្រូវ។ការបោះឆ្នោតជ្រើសរើសក្រុមប្រឹក្សាឃុំ-សង្កាត់​ នឹងប្រព្រឹត្តទៅនៅថ្ងៃទី០៥​ ខែមិថុនា ឆ្នាំ២០២២ និង​ប្រជាពលរដ្ឋ​មានឈ្មោះក្នុងបញ្ជីបោះឆ្នោតផ្លូវការ ​ចំនួនជិត ១០លាននាក់ ខណៈការិយាល័យ​ដំណើរ​ការរៀបចំការបោះឆ្នោត នាពេលខាងមុខ ​មាន​ចំនួនជាង ២ម៉ឺនការិយាល័យនៃឃុំ-សង្កាត់​នៅទូទាំងប្រទេស សរុបចំនួន ១៦៥២ឃុំ-សង្កាត់៕អត្ថបទ សេក ឧត្តម 

គណបក្សប្រជាជនកម្ពុជាស្រុកឱរ៉ាល់ បានចុះឈ្មោះបេក្ខជនចូលរួមបោះឆ្នោតក្រុមប្រឹក្សា ឃុំគ្រប់ទាំង៥ឃុំ

2022/03/04 12:15:58 pm        30
Facebook Telegram Linkin
កំពង់ស្ពឺ៖ គណៈកម្មាធិការជាតិរៀបចំការបោះឆ្នោត ហៅកាត់ថា គ.ជ.ប បានចាប់ផ្តើមចុះឈ្មោះ​បេក្ខជន​ចូលរួមបោះឆ្នោតក្រុមប្រឹក្សាឃុំ-សង្កាត់អាណត្តិទី៥ នៅថ្ងៃទី៤ ខែមិនា​ ឆ្នាំ២០២២នេះ គណបក្សប្រជាជនកម្ពុជានៅស្រុកឱរ៉ាល់ ខេត្តកំពង់ស្ពឺ បាន​បញ្ជូន និង​ចុះឈ្មោះបេក្ខជន​របស់ខ្លួន​គ្រប់​ទាំង៥ឃុំ ​ហើយ​ស្របទៅតាមនីតិវិធីរបស់ គ.ជ.ប.។ថ្លែងប្រាប់​ទូរទស្សន៍BTVតាមរយៈតេលេក្រាម នាព្រឹកថ្ងៃទី៤ ខែមិនា ឆ្នាំ២០២២នេះ អនុប្រធាន​ក្រុមការងារចុះជួយស្រុកឱរ៉ាល់​ និងជាប្រធានក្រុមការងារចុះជួយឃុំតាសាល ​ឯកឧត្តម យឿន យឿត បានឲ្យដឹងថា គ្រប់បណ្តាការិយាល័យរៀបចំការបោះឆ្នោតនៅតាមឃុំទាំង៥​នៃ​ស្រុក​ឱរ៉ាល់នេះ ​បានចាប់ផ្តើម​ទទួល​ការចុះ​ឈ្មោះបេក្ខជន​ឈរ​ឈ្មោះបោះឆ្នោត សម្រាប់ការ​បោះឆ្នោត​ជ្រើសរើស​ក្រុមប្រឹក្សាឃុំ-សង្កាត់ ​អាណត្តិទី៥ ឆ្នាំ២០២២ ហើយ​គណបក្ស​ប្រជាជន​កម្ពុជា​ក៏បាន​ចុះឈ្មោះបេក្ខជនរបស់ខ្លួន ​ទាំង​ពេញសិទ្ធ ​និងបំរុងចំនួន៦០រូប រួចជាស្ថាបពរហើយ ដោយ​បេក្ខជនទាំង​អស់នោះ​សុទ្ធតែមានសមត្ថភាព​ និង​ឆន្ទៈ មនសិការ​បំរើប្រជា និង​ផលប្រយោជន៍រួមទាំងអស់។ឯកឧត្តម យឿន យឿត ​បាន​ថ្លែងបន្តទៀតថា ​ការ​ចុះឈ្មោះ​បេក្ខជន​ដើម្បីចូលរួមបោះឆ្នោត​ជ្រើស​រើស​ក្រុម​ប្រឹក្សាឃុំ-សង្កាត់​នៅថ្ងៃនេះ​ បេក្ខជន​ទាំង​អស់​របស់​គណបក្សប្រជាជនកម្ពុជា ​នៅឃុំទាំង៥ នៃស្រុកឱរ៉ាល់ ​ខេត្តកំពង់ស្ពឺនេះ​បាន​គោរព​តាម​នីតិវិធីរបស់​ គ.ជ.ប.ផងដែរ។សូមបញ្ជាក់ថា ​ការបោះឆ្នោតជ្រើសរើសក្រុមប្រឹក្សាឃុំ-សង្កាត់ ​នឹងប្រព្រឹត្តទៅនៅថ្ងៃទី០៥ ខែមិថុនា ឆ្នាំ២០២២ និងប្រជាពលរដ្ឋមានឈ្មោះ​ក្នុងបញ្ជី​បោះឆ្នោតផ្លូវការ ​ចំនួនជិត ១០លាននាក់ ខណៈការិយាល័យ​ដំណើរការ​រៀបចំ​ការបោះឆ្នោត​នាពេលខាងមុខ​ មាន​ចំនួនជាង២ម៉ឺន​ការិយាល័យ​នៃឃុំ-សង្កាត់​នៅទូទាំង​ប្រទេស​សរុបចំនួន​ ១៦៥២ឃុំ-សង្កាត់នោះ៕អត្ថបទ៖ បាន ចក់

អាជ្ញាធរចុះពិនិត្យយុទ្ធនាការចាក់វ៉ាក់សាំងតាមរោងចក្រ ដើម្បីធានាការចាក់ដូសជំរុញបានគ្រប់គ្នា

2022/03/04 11:31:59 am        353
Facebook Telegram Linkin
ភ្នំពេញ៖ អាជ្ញាធរតាមខណ្ឌនីមួយៗ ក្នុងរាជធានីភ្នំពេញ កំពុងបំពេញការងារយ៉ាងសកម្ម ក្នុងការជំរុញការងារចាក់វ៉ាក់សាំង តាមរយៈការចុះទៅត្រួតពិនិត្យចំនួនអ្នកចាក់វ៉ាក់សាំងតាមរោងចក្រដោយផ្ទាល់ ដើម្បីជំរុញឱ្យកម្មករកម្មការិនីដែលពុំទាន់បានចាក់វ៉ាក់សាំងដូសជំរុញ ទាំងដូសទី៣ និងដូសទី៤ ត្រូវរួសរាន់ទៅទទួលការចាក់ រឺមានការរៀបចាក់ក្នុងរោងចក្រដោយផ្ទាល់។អាជ្ញាធររាជធានីភ្នំពេញ បាននិងកំពុង ជំរុញលើការងារចាក់វ៉ាក់សាំង ទាំងការចាក់វ៉ាក់សាំង​ជូនក្មេងៗ និងការចាក់វ៉ាក់សាំងដូសទី ៣ ដូសទី ៤ជូនមនុស្សពេញវ័យផងដែរ។ ពាក់ព័ន្ធនឹងការងារនេះ ការចាក់វ៉ាក់សាំងដូសទី ៣ និងដូសទី ៤ ជូនកម្មករកម្មការិនី ក៏ជាផ្នែក​សំខាន់​ផងដែរ ព្រោះថាទីតាំងរោងចក្រជាទីតាំងប្រមូលផ្ដុំ។ ចំពោះការងារវ៉ាក់សាំងដូសជំរុញសម្រាប់កម្មករ កម្មការិនី អាជ្ញាធរខណ្ឌដង្កោ​ រាជធានីភ្នំពេញ ចុះត្រួតពិត្យ ​នៅតាមរោងចក្រ សហគ្រាស ​នីមួយៗក្នុងភូមិសាស្រ្តរបស់ខ្លួន ដើម្បីដឹងច្បាស់ពី​ចំនួន​កម្មករកម្មការិនី ដែលបានចាក់ដូសទី​ ៣និងដូសទី៤រួចរាល់ និងចំនួនអ្នកដែលពុំទាន់​បានទៅចាក់​វ៉ាក់សាំង ។តាមការលើកឡើងរបស់លោក ជ គឹមស៊ អាភិបាលរងខណ្ឌដង្កោ លើកឡើងថា ការចុះត្រួតពិនិត្យ​រោង​ចក្រ​មួយចំនួនមកនេះ ​បានរកឃើញថា​ ចំនួនកម្មករកម្មការិនីភាគច្រើន បានចាក់​វ៉ាក់សាំង​ដូសទី ៣ដូសទី ៤រួចរាល់។ ចំណែកចំនួនអ្នកដែលពុំទាន់បានចាក់ ​គឺមានចំនួនតិចតួចប៉ុណ្ណោះ។ លោក បន្តថា ករណីនេះ គឺអាជ្ញាធរ​ជំរុញទៅរោងចក្របញ្ជូនកម្មករកម្មការិនីទៅទទួលការចាក់​នៅ​ទីតាំងចាក់វ៉ាក់សាំងទាំង ៨ទីតាំងក្នុងខណ្ឌដង្កោ។ ក្នុងករណីដែលរកឃើញថា ​ចំនួនកម្មករកម្មការិនី នៅរោងចក្រណាមួយ មិនទាន់បានចាក់វ៉ាក់សាំង​ដូស​ជំរុញ​ក្នុងចំនួនច្រើន​ អាជ្ញាធរ ​នឹងមានការរៀបចំក្រុមគ្រូពេទ្យជំនាញ ដើម្បីចុះទៅចាក់វ៉ាក់សាំង​ដល់ទីតាំងរោងចក្រដោយផ្ទាល់។រាជរដ្ឋាភិបាលកម្ពុជា ​ចាក់វ៉ាក់សាំងជូនប្រជាពលរដ្ឋទូទៅទាំងអស់ ​ដោយចាប់រាប់ពី កុមារ​ដែល​មានអាយុចាប់ពី ឆ្នាំឡើងទៅ។ ផ្អែកលើទិន្នន័យរបស់ក្រសួងសុខាភិបាល ​គិតត្រឹមថ្ងៃទី ​ខែមីនាឆ្នាំ ២០២២ គឺកម្ពុជាសម្រេច​បាន​ការ​ចាក់វ៉ាក់សាំងចំនួន ៩១,៦៥ % ​នៃចំនួនប្រជាពលរដ្ឋសរុប ១៦លាននាក់៕អត្ថបទ៖ គឹមហុក 

ព្រះមហាក្សត្រ និងហ្លួងម៉ែយាងទៅពិនិត្យនិងព្យាបាល ព្រះរាជសុខភាពនៅប្រទេសចិន

2022/03/04 02:21:59 am        586
Facebook Telegram Linkin
ភ្នំពេញ៖ ព្រះករុណាព្រះបាទសម្ដេចព្រះបរមនាថ នរោត្ដម សីហមុនី ព្រះមហាក្សត្រនៃព្រះរាជាណាចក្រកម្ពុជា និងសម្ដេចព្រះមហាក្សត្រី នរោត្ដម មុនីនាថ សីហនុ ព្រះវររាជមាតាជាតិខ្មែរ ក្នុងសេរីភាព សេចក្ដីថ្លៃថ្នូរ និងសុភមង្គល ព្រះអង្គទាំងទ្វេ បានសព្វព្រះរាជ ហឫទ័យ ស្ដេចយាងចាកចេញពីកម្ពុជា នៅព្រឹកថ្ងៃទី៤ខែមីនានេះ តាមព្រះទីនាំងយន្តហោះពិសេស ឆ្ពោះទៅកាន់ទីក្រុងប៉េកាំង នៃសាធារណរដ្ឋប្រជាមានិតចិន ដើម្បីស្តេចទាំងទ្វេយាងពិនិត្យ និងព្យាបាលព្រះរាជសុខភាពមួយរយៈនៅទីនោះ។យាងនិងអញ្ជើញថ្វាយព្រះរាជដំណើររបស់ព្រះអង្គទាំងទ្វេ នៅអាកាសយានដ្ឋានអន្តរជាតិភ្នំពេញ មានវត្តមាន សម្ដេចវិបុលសេនាភក្ដី សាយ ឈុំ ប្រធានព្រឹទ្ធសភា សម្ដេចអគ្គមហាពញាចក្រី ហេង សំរិន ប្រធានរដ្ឋសភា សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជា​ណា​ចក្រកម្ពុជា ​ឥស្សរជនសំខាន់ៗនៃស្ថាប័នជាតិ ព្រះរាជវង្សានុវង្ស និងមន្ត្រីអ្នកមុខអ្នកការជាច្រើន រូប។ដោយឡែក ឯកឧត្ដម Wang Wentian ឯកអគ្គរដ្ឋទូតចិនប្រចាំកម្ពុជា និងមន្ត្រីស្ថានទូតក៏មានវត្តមាន ក្នុងឱកាសនោះដែរ។នៅក្នុងព្រះរាជសាររបស់ព្រះករុណាព្រះបាទសម្ដេចព្រះបរមនាថ នរោត្ដម សីហមុនី ព្រះមហាក្សត្រ​នៃព្រះរាជាណាចក្រកម្ពុជា ដែលឡាយព្រះហត្ថលេខាកាលពីថ្ងៃទី​ ២៨កុម្ភៈឆ្នាំ២០២២បានគូស បញ្ជាក់ថា «ព្រះអង្គទាំងទ្វេ សូមព្រះអនុញ្ញាត និងអនុញ្ញាត​ពីសម្ដេច​ព្រះមហាសង្ឃរាជ​ទាំង​ពីរគណៈ និងព្រះថេរានុត្ថេរៈគ្រប់ព្រះង្គ សម្ដេច ឯកឧត្ដម លោកជំទាវ អស់លោក លោកស្រី លោកតា លោកយាយ មាមីង បងប្អូន ក្មួយៗ ជនរួមជាតិទាំងអស់ អវត្តមានពីមាតុប្រទេស ចាប់ពីថ្ងៃទី៤ ខែមីនាឆ្នាំ២០២២តទៅ ធ្វើដំណើរទៅទីក្រុងប៉េកាំង នៃសាធារណរដ្ឋប្រជាមានិតចិន ដើម្បីពិនិត្យ-ព្យាបាលព្រះរាជសុខភាព។នៅក្នុងឱកាសអវត្តមានរបស់ព្រះអង្គសម្ដេចវិបុលសេនាភក្ដី សាយ ឈុំ ប្រធានព្រឹទ្ធសភា នឹង​ទទួលជួយព្រះអង្គ ក្នុងឋានៈជាប្រមុខរដ្ឋស្ដីទី​ នៃព្រះរាជាណាចក្រកម្ពុជា»។គួរបញ្ជាក់ដែរថា នេះគឺជាព្រះរាជដំណើរយាងជាទៀងទាត់រៀងរាល់៦ខែម្ដង របស់​ព្រះករុណា​ព្រះបាទ​សម្ដេចព្រះបរមនាថ នរោត្ដម សីហមុនី ព្រះមហាក្សត្រនៃព្រះរាជាណាចក្រកម្ពុជា និងសម្ដេចព្រះមហាក្សត្រី នរោត្ដម មុនីនាថ សីហនុ ព្រះវររាជមាតាជាតិខ្មែរ ​ក្នុងសេរីភាព សេចក្ដីថ្លៃថ្នូរ ​និងសុភមង្គល ទៅកាន់រាជធានីប៉េកាំង សាធារណរដ្ឋប្រជាមានិតចិន ដើម្បីពិនិត្យ-ព្យាបាលព្រះរាជសុខភាព។ថ្នាក់ដឹកនាំ មន្ត្រីរាជការ កងកម្លាំងប្រដាប់អាវុធគ្រប់ប្រភេទ និងប្រជារាស្ត្រខ្មែរ បាន​បួងសួង​ដល់ព្រះបារមីនៃវត្ថុ​សក្តិសិទ្ធិ​ក្នុងលោក ​បារមីនៃព្រះមហាស្វេត្រឆ័ត្រ និងបារមី​នៃ​ដួង​ព្រះ​វិញ្ញាណក្ខន្ធ​អតីតនៃព្រះមហាក្សត្រ ​ព្រះមហាក្សត្រីយានីខ្មែរគ្រប់ព្រះអង្គ ជាពិសេស​ព្រះ​វិញ្ញាណក្ខន្ធ​អតីតព្រះបរមរតកោដ្ឋ​សូមតាមជួយថែរក្សាគ្រង​ ព្រះអង្គទាំងទ្វេ ​សូមមានព្រះរាជសុខភាពល្អ បរិបូរណ៍​ ព្រះជន្មាយុ​យឺនយូរ​ដើម្បីស្តេចគង់ប្រថាប់ជាម្លប់ដ៏ត្រជាក់សម្រាប់ប្រជារាស្ត្រ ​ជាកូន ជាចៅ​បានជ្រកកោន​ រស់នៅការពារ ​និងអភិវឌ្ឍន៍ព្រះរាជាណាចក្រកម្ពុជាឱ្យរីកចម្រើនថែមទៀត៕អត្ថបទ មុត សុទ

កម្ពុជាប្រាប់រដ្ឋជាសមាជិកទាំងអស់ត្រូវ​គោរព​អធិបតេយ្យភាព​ បូរណភាពទឹកដី​ក្នុង​បញ្ហា​នៅអ៊ុយក្រែន

2022/03/03 09:31:16 am        1504
Facebook Telegram Linkin
ភ្នំពេញ៖ តាមរយៈសេចក្តីថ្លែងការណ៍របស់ក្រសួងការបរទេស និងសហប្រតិបត្តិការអន្តរជាតិ ឲ្យដឹងថា ពាក់ព័ន្ធនឹងបញ្ហារបស់អ៊ុយក្រែន-រុស្ស៊ី កម្ពុជា​រក្សា​ជំហរ​ម៉ឺងម៉ាត់​របស់​ខ្លួនថា រដ្ឋ​ជា​សមាជិកទាំងអស់​ត្រូវតែ​គោរព​អធិបតេយ្យភាព​ បូរណភាពដែនដី និងឯករាជ្យភាព​នយោបាយ​របស់​រដ្ឋជាសមាជិកផ្សេងទៀត។បើតាមសេចក្តីថ្លែងការណ៍របស់ក្រសួងការបរទេស​ ឲ្យដឹងនៅថ្ងៃទី០៣ ខែមីនា ឆ្នាំ២០២២ រាជ​រដ្ឋា​ភិបាល​កម្ពុជា កាលពីយប់ថ្ងៃទី ០២ ខែមីនា ឆ្នាំ២០២២ បានសម្រេចចិត្តចូលរួម​ជា​ប្រទេស​សហស្ថាបនិក​នៃ​សេចក្តីសំរេចចិត្តនៃ​កិច្ចប្រជុំពិសេសបន្ទាន់​របស់​មហា​សន្និបាត​អង្គការសហប្រជាជាតិ​ ស្តីពី​ស្ថានការណ៍​នៅក្នុងប្រទេសអ៊ុយក្រែន។នៅក្នុងកិច្ចប្រជុំនោះ កម្ពុជាបានសម្តែងនូវការព្រួយបារម្ភយ៉ាងខ្លាំងចំពោះភាពធ្ងន់ធ្ងរ​នៃស្ថានការណ៍ ដែល​កំពុងតែកើនឡើង ​និង​លក្ខខណ្ឌ​មនុស្ស​ធម៌កាន់​តែ​អាក្រក់ឡើង ដែល​បណ្តាល​មក​ពី​អារិភាព​យោធាដែលកំពុងបន្តកើតឡើងនៅក្នុងប្រទេសអ៊ុយក្រែន។សេចក្តីថ្លែងការណ៍របស់ក្រសួងការបរទេសកម្ពុជា បន្តថា កម្ពុជា​មាន​ជំនឿចំពោះកិច្ច​សន្ទនា និង​ការទូត ដើម្បីទប់ស្កាត់​ស្ថាន​ការណ៍​កុំឱ្យចេញផុតពីការគ្រប់គ្រង និងដើម្បីស្វែងរកដំណោះស្រាយ​ដោយសន្តិវិធី ​ស្របតាមច្បាប់អន្តរជាតិ​ និងគោលការណ៍​នៃធម្មនុញ្ញអង្គការសហប្រជាជាតិ។ជាមួយនឹងការយោគយល់ដល់ការ​បារម្ភ​នៃសន្តិសុខដែលពាក់ព័ន្ធ កម្ពុជារក្សាជំហរម៉ឺងម៉ាត់​របស់​ខ្លួនថា រដ្ឋជាសមាជិកទាំងអស់ត្រូវតែគោរព​អធិបតេយ្យភាព​ បូរណភាពដែនដី និងឯករាជ្យភាព​នយោបាយរបស់រដ្ឋជាសមាជិកផ្សេងទៀត។ទាក់ទិននឹងបញ្ហារវាងរុស្ស៊ី-អ៊ុយក្រែន ​កាលពីថ្មីៗនេះ សម្តេចតេជោ ហ៊ុន សែន បានមាន​ប្រសាសន៍​ថា ជម្លោះប្រដាប់អាវុធរវាងរុស្ស៊ី និងអ៊ុយក្រែន​ នឹង​ក្លាយជាសង្គ្រាមដែលមានការរីកធំ ប្រសិន​បើ​អឺរ៉ុប​ធ្វើ​សកម្មភាពដូចពេលនេះ ​ឬអឺរ៉ុបនីយកម្ម​សង្គ្រាម​ លើទឹកដីអ៊ុយក្រែន។មកទល់ពេលនេះ ​មានរយៈពេល៧ថ្ងៃហើយ ដែលជម្លោះយោធារវាងរុស្ស៊ី និងអ៊ុយក្រែន​បន្ត​ប្រឈម​មុខដាក់គ្នា ​ខណៈតំណាងប្រតិភូភាគីទាំងពីរ​នៅមិនទាន់​មាន​ការ​ព្រមព្រៀង​គ្នា​ក្នុង​លក្ខខណ្ឌ​ណាមួយ​ជាក់លាក់នៅឡើយទេ៕អត្ថបទ សេក ឧត្តម

អាជ្ញាធរជាតិអប្សរា បើកវគ្គបណ្តុះបណ្តាលបទដ្ឋានក្នុងការរៀបចំដីធ្លី និងការគ្រប់គ្រង​សំណង់​ក្នុង​រមណីយ​ដ្ឋានអង្គរ

2022/03/03 01:56:04 pm        868
Facebook Telegram Linkin
សៀមរាប៖ អាជ្ញាធរជាតិអប្សរា កាលពីថ្ងៃម្សិលមិញ បានបើកវគ្គបណ្តុះបណ្តាលជំនាញស្តីពី «បទដ្ឋានក្នុងការរៀបចំដីធ្លី និងការគ្រប់គ្រងសំណង់ក្នុងរមណីយដ្ឋានអង្គរ» ជូនដល់មន្ត្រី-បុគ្គលិក នាមជ្ឍមណ្ឌលអាជ្ញាធរជាតិអប្សរា ស្ថិតនៅស្រុកប្រាសាទបាគង ខេត្ដសៀមរាប ដើម្បីពង្រឹងសមត្ថភាព និងផ្តល់ចំណេះដឹងបន្ថែមដល់មន្ត្រីបុគ្គលិកនៅស្ថាប័ននោះ។លោក ស៊ឹម ប៊ុនធឿន និងជាអនុប្រធាននាយកដ្ឋានរៀបចំដែនដី ​និងគ្រប់គ្រងលំនៅដ្ឋានក្នុង​ឧទ្យានអង្គរ ​មានប្រសាសន៍ថា​ វគ្គបណ្តុះបណ្តាលនេះ​ មានគោលបំណងពង្រឹងសមត្ថភាព និងផ្តល់​ចំណេះដឹង​បន្ថែមដល់មន្ត្រី ​បុគ្គលិកនៃអាជ្ញាធរជាតិអប្សរា ​និងនិស្សិត លើការងារ​ពិនិត្យវាយតម្លៃ​អំពីសំណង់ និងការស្វែងយល់​ស៊ីជម្រៅពីបទដ្ឋាន​ច្បាប់​នៃការគ្រប់គ្រង​សំណង់ក្នុងតំបន់​រមណីយ​ដ្ឋានអង្គរ​ ព្រមទាំង​នីតិវិធី​ក្នុងការ​ចុះសម្របសម្រួលការងារប្រកបដោយ​ប្រសិទ្ធិភាព ស្របតាម​ទិសដៅ​របស់អាជ្ញាធរជាតិអប្សរា ​ជាពិសេស​ដើម្បីអប់រំ និងផ្សព្វផ្សាយចំណេះដឹង​ដល់និស្សិត​លើ​កិច្ចការរបស់អាជ្ញាធរជាតិអប្សរា ​និងការគ្រប់គ្រង​រមណីយដ្ឋាន​អង្គរបេតិកភណ្ឌពិភពលោក។លោកថា ​មន្ដ្រី និងបុគ្គលិកនេះ​ ពួកគាត់មកពីនាយកដ្ឋានសណ្តាប់ធ្នាប់​ និងសហប្រតិបត្តិការ នាយកដ្ឋាន​រៀបចំដែនដី ​និងគ្រប់គ្រងលំនៅដ្ឋានក្នុងឧទ្យានអង្គរ រួមទាំងនិស្សិត​មហាវិទ្យាស្ថាបត្យកម្ម​នៃសាកលវិទ្យា-ល័យភូមិន្ទ ​និងវិចិត្រសិល្បៈ ​សរុបចំនួន ១០០នាក់។លោក ស៊ឹម ប៊ុនធឿន ​បន្ថែមទៀតថា ​ក្នុងសិក្ខាសាលាបានធ្វើបទបង្ហាញ ​៤ចំណុចសំខាន់​ៗ ​ដល់​សិក្ខាកាម រួមមាន៖ ១.ច្បាប់​គតិយុត្តិ ការគ្រប់គ្រង ​និងប្រើប្រាស់ដី ​ការ​បដិសេធច្បាប់សាងសង់ ការ​អនុញ្ញាត​ច្បាប់សាងសង់, ២.សំណង់​លំនៅដ្ឋានខ្មែរ​ លក្ខណៈទូទៅនៃផ្ទះខ្មែរ ប្រភេទ​សំណង់នៃផ្ទះខ្មែរ លក្ខណៈបច្ចេកទេស​ នៃការសាងសង់ផ្ទះខ្មែរ ​និងការ​តុបតែង​កែលម្អ, ៣.ការផ្លាស់ប្ដូរ​សំណង់ផ្ទះខ្មែរ និងទី៤. គោលការណ៍​របស់អាជ្ញាធរ​ជាតិអប្សរាក្នុង​ការគ្រប់គ្រង​លំនៅដ្ឋាន​ប្រពៃណីក្នុងឧទ្យានអង្គរ។ក្រោយពីបាន​បញ្ចប់វគ្គបណ្តុះបណ្តាលនេះ ​សិក្ខាកាមទាំងអស់ទទួល​បាននូវចំណេះដឹងនេះ ទៅ​អនុវត្តឱ្យមាន​ប្រសិទ្ធិភាព ​ដើម្បីធ្វើឱ្យប្រសើរឡើង​នូវបទដ្ឋាន​ក្នុង​ការរៀបចំដីធ្លី និង​ការគ្រប់គ្រង​សំណង់ក្នុងរមណីយដ្ឋាន​អង្គរ៕ អត្ថបទ៖ ឈិត សាវី

បណ្ដាញសង្គម

ព័ត៌មានថ្មីៗ

រដ្ឋមន្រ្តីក្រសួងសុខាភិបាល បន្តចុះពិនិត្យ និងគាំទ្រតម្រូវការជាក់ស្តែងចំពោះមុខ ក្នុងមូលដ្ឋានសុខាភិបាលជាប់ព្រំដែន នៅមណ្ឌលសុខភាព ស្រអែម និងមណ្ឌលសុខភាពសម្តេចអគ្គមហាធម្មពោធិសាល ជា ស៊ីម ខេត្តព្រះវិហារ
06/29/2025 08:06 PM
Facebook Telegram Linkin
ឯកឧត្តម ឌិត​ ទីណា​ បន្តជួបមន្ត្រីកសិកម្មឃុំ-សង្កាត់​ ដេីម្បីផ្សព្វផ្សាយគោលនយោបាយអាទិភាព "មានហូប​ មានប្រេី​ មានបាន​ និងមានរហូត"
06/29/2025 07:06 PM
Facebook Telegram Linkin
កងកម្លាំងរុស្ស៊ី បានប្រមូលផ្ដុំទាហាន ១១ម៉ឺននាក់ នៅជិតទីក្រុងយុទ្ធសាស្ត្ររបស់អ៊ុយក្រែន
06/29/2025 05:06 PM
Facebook Telegram Linkin
មនុស្សជាច្រើននាក់ ស្លាប់និងរបួស ក្នុងហេតុការណ៍រត់ជាន់គ្នា ក្នុងពិធីបុណ្យសាសនានៅឥណ្ឌា
06/29/2025 05:06 PM
Facebook Telegram Linkin
បាតុករសម្រុកតវ៉ានៅទីក្រុង Venice របស់អ៊ីតាលី ក្នុងពិធីមង្គលការរបស់ស្ថាបនិកក្រុមហ៊ុន Amazon
06/29/2025 05:06 PM
Facebook Telegram Linkin
UN៖ ជនជាតិអាហ្វហ្គានីស្ថានយ៉ាងតិច ១,២លាននាក់ ត្រូវបង្ខំឱ្យចាកចេញពីអ៊ីរ៉ង់ និងប៉ាគីស្ថាន នៅឆ្នាំនេះ
06/29/2025 05:06 PM
Facebook Telegram Linkin
មនុស្សជាង ២០នាក់ស្លាប់ និងជាច្រើននាក់បន្តបាត់ខ្លួន ក្នុងបំណាក់ដីនៅប្រទេសកូឡុំប៊ី
06/29/2025 05:06 PM
Facebook Telegram Linkin
ឯកឧត្តម ប៉េង ពោធិ៍នា៖ «យើងត្រូវរួបរួមគ្នាជាធ្លុងមួយ​ទប់ស្កាត់ និង​បំផ្លាញ​មហិច្ឆតា​នយោបាយ​របស់​ក្រុម​ជ្រុល​និយមមួយក្តាប់តូច ដែលតែងតែបញ្ឆេះកំហឹងជាតិសាសន៍»
06/29/2025 04:06 PM
Facebook Telegram Linkin
ឯកឧត្តម ហេង សួរ ឯកភាពជាមួយវិទ្យាស្ថាន CDRI ដើម្បីសិក្សាស្រាវជ្រាវពីវឌ្ឍនភាពតម្រូវការជំនាញនៅលើទីផ្សារ
06/29/2025 03:06 PM
Facebook Telegram Linkin
លោក Trump៖ បទឈប់បាញ់នៅតំបន់ហ្កាហ្សា អាចកើតឡើងក្នុងពេលត្រឹមតែមួយសប្តាហ៍
06/29/2025 03:06 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.