BTV NEWS

រដ្ឋសម្រេចលុបបំបាត់កម្រៃស្កែនកុងតឺន័រទាំងស្រុងចាប់ពីខែឧសភាតទៅ ដើម្បីសម្រួលពាណិជ្ជកម្មក្នុងស្រុក

កូនផ្សោតទន្លេមេគង្គទើបកើតថ្មី ១ក្បាលទៀត នាំមកក្តីសង្ឃឹមសម្រាប់ការអភិរក្សនៅដើមឆ្នាំ២០២៦

ធនាគារជាតិ ដាក់ឱ្យប្រើប្រាស់ប្រព័ន្ធវដ្តករសាស្រ្តហិរញ្ញវត្ថុ ដើម្បីបង្កើនការយល់ដឹងដល់ភាគីពាក់ព័ន្ធ

គិតត្រឹមត្រីមាសទី១ឆ្នាំនេះ សហគ្រាស ក្រុមហ៊ុន រោងចក្រនៅកម្ពុជា កើនដល់ជាង ៤៧ ០០០ សហគ្រាស ខណៈចំនួនកម្មករនិយោជិតកើនឡើងដល់ប្រមាណ ២,៣លាននាក់

សេដ្ឋកិច្ច និង កសិកម្ម

កម្ពុជារកចំណូលបាន២៨០លានដុល្លារ លើការនាំចេញអង្ករ ទៅទីផ្សារអន្តរជាតិក្នុងឆមាសទី១

ភ្នំពេញ៖ កម្ពុជារកចំណូលបាន ២៧៩លានដុល្លារ លើការនាំចេញអង្ករមានចំនួន ៣២៧ ២០០តោន ក្នុងឆមាសទី១ ឆ្នាំ២០២២ កើនឡើង ១៦.៦៧ ភាគរយ ធៀបនឹងរយៈពេលដូចគ្នាកាលពីឆ្នាំមុន។ទិន្នន័យពីក្រសួងកសិកម្ម រុក្ខាប្រមាញ់ និងនេសាទបង្ហាញថា នុងរយៈពេល ៦ ខែដើមឆ្នាំ ២០២២ ការនាំចេញអង្ករមានចំនួន ៣២៧ ២០០ តោនកើនឡើង ១៦,៦៧ ភាគរយបើធៀបទៅនឹងឆមាសទី១ ឆ្នាំ ២០២១ ដែលមានចំនួន ២៨០ ៤៥០ តោន។អង្ករក្រអូបគ្រប់ប្រភេទមានចំនួន ២០៧ ២៧១តោន ស្មើនឹង ៦៣,៣៥% អង្ករសគ្រប់ប្រភេទមានចំនួន ១១៣ ៦១៧តោន ស្មើនឹង ៣៤,៧២% និងអង្ករចំហុយគ្រប់ប្រភេទមានចំនួន ៦ ៣១២តោន ស្មើនឹង ១,៩៣%។បរិមាណអង្ករបាននាំចេញទៅកាន់ទិសដៅសហភាពអឺរ៉ុបចំនួន ២៣ប្រទេស មានបរិមាណសរុបចំនួន ៩៨ ៦២៤តោន កើនឡើង ៤៦,៩០% ទិសដៅប្រទេសចិនមានបរិមាណសរុបចំនួន ១៦៨ ២៨០តោន កើនឡើង១៧,៤៤% ទិសដៅអាស៊ានចំនួន ៤ប្រទេស មានបរិមាណសរុបចំនួន ២៨ ៦៨០តោន កើនឡើង ៥,៦៩% និងទិសដៅដទៃទៀតចំនួន២៣ប្រទេស មានបរិមាណសរុប ៣១ ៦១៦តោន ថយចុះ២៦,២៨%។ក្នុងឆមាសទី១ឆ្នាំ២០២២ ការនាំចេញស្រូវមានចំនួន ១ ៧៣៣ ១៥៧តោន ទៅកាន់ប្រទេសវៀតណាម កើនឡើង ២,៣៨% បើធៀបនឹងរយៈពេលដូចគ្នានៅឆ្នាំ២០២១ ។ការនាំចេញស្រូវ-អង្ករ ពីកម្ពុជាទៅទីផ្សារអន្តរជាតិក្នុងឆមាសទី១ ឆ្នាំ ២០២២ មានទឹកប្រាក់ជាង ៦១៥ លានដុល្លារ កើនជិត ១០០ លានដុល្លារបើធៀបរយៈពេលដូចគ្នាឆ្នាំ ២០២១។ក្នុងឆ្នាំ ២០២១ កម្ពុជានាំចេញអង្ករទៅក្រៅប្រទេសចំនួន ៦១៧ ០៦៩ តោន ថយចុះ ១០,៦៧ ភាគរយបើធៀបនឹងឆ្នាំ ២០២០ ដែលមានបរិមាណ ៦៩០ ៨២៩ តោន៕ អត្ថបទ៖ វណ្ណៈ

កម្ពុជា ស្នើចិនរៀបចំ និងពន្លឿននិតីវិធីលើការនាំចូលម្រេច កៅស៊ូ និងទុរេន ពីកម្ពុជា

ភ្នំពេញ៖ រាជរដ្ឋាភិបាលកម្ពុជា បានស្នើប្រទេសចិន ពន្លឿនការរៀបចំនិតីវិធី ក្នុងការនាំចូល កសិផលសក្តានុពល និងបន្តការគាំទ្រលើការនាំចូលអង្ករពីកម្ពុជា នៅក្រោមកិច្ចសហប្រតិបត្តិការភាពជាដៃគូយុទ្ធសាស្រ្តគ្រប់ជ្រុងជ្រោយ។រដ្ឋាភិបាលកម្ពុជា បានស្នើសុំភាគីចិន ក្នុងជំនួបគណៈកម្មាធិការសម្របសម្រួលរដ្ឋាភិបាលកម្ពុជា-ចិន រវាងឯកឧត្តម ហោ ណាំហុង និងឯកឧត្តម វ៉ាង យី ទីប្រឹក្សា និងជារដ្ឋមន្រ្តីការបរទេសចិន ស្តីអំពីការអនុវត្តកិច្ចសហប្រតិបត្តិការភាពជាដៃគូយុទ្ធសាស្រ្តគ្រប់ជ្រុងជ្រោយ កាលពីសប្តាហ៍កន្លងទៅ ។ក្នុងជំនួបពិភាក្សាតាមប្រព័ន្ធវីដេអូ កម្ពុជាបានស្នើសុំភាគីចិន ឱ្យមានលើកលែងពន្ធលើការនាំចូលអង្ករពីកម្ពុជា ដែលមានកូតា ៤០ម៉ឺនតោនបន្តទៀត ព្រមទាំងពន្លឿននីតិវិធីចុះហត្ថលេខា លើពិធីសារអនាម័យ និងភូតគាមអនាម័យលើផលិតផលផ្លែមៀន គ្រាប់ស្វាយចន្ទី និងសំបុកត្រចៀកកាំ។ជាពិសេសជំរុញឱ្យភាគីចិន រៀបចំពិធីសារ និងអនាម័យភូតគាមអនាម័យ លើផលិតផលកសិកម្មមួយចំនួនជាកញ្ចប់តែម្ដង ជាជាងធ្វើពិសារតែមួយមុខៗម្ដង។ កម្ពុជាបានស្នើសុំវិនិយោគិនមកបោះទុនក្នុងវិស័យអាទិភាពមួយចំនួនដូចជា ការចិញ្ចឹមសត្វ វារីវប្បកម្ម កៅស៊ូ សម្រាប់នាំចេញទៅប្រទេសចិន ។ គួរបញ្ជាក់ថា រាជរដ្ឋាភិបាលកម្ពុជា និងរដ្ឋាភិបាលចិន បានប្តេជ្ញាពង្រីកទំហំពាណិជ្ជកម្មសម្រេចឱ្យបាន ១៥ប៊ីលានដុល្លារ នៅឆ្នាំ២០២៥។ យោងតាមទិន្នន័យគ្រឹះភូតគាមអនាម័យជាតិរបស់ចិន ៣ខែ ដើមឆ្នាំ២០២២ កម្ពុជាបាននាំចេញទំនិញកសិផលសំខាន់ៗទៅប្រទេសចិនមានដូចជា អង្ករចំនួន ៨៨ ៦៤៧តោន ខណៈផ្លែចេកស្រស់មានចំនួន ៩៨ ៥៣០,២៦តោន។ ជាមួយគ្នានេះ ការនាំចេញផ្លែស្វាយស្រស់មានចំនួន ២២ ២៤៤,៦៨តោន និងគ្រាប់ស្វាយចន្ទីមានចំនួន ១៣៦,៩៦តោន។សូមជម្រាបថា ក្នុងរយៈពេល ៦ខែ ដើមឆ្នាំ២០២២ ទំហំពាណិជ្ជកម្មទ្វេភាគីរវាង កម្ពុជានិងចិន សម្រេចបានក្នុងរង្វង់ទឹកប្រាក់ជាង ៥.៩៨ ប៊ីលានដុល្លារ ។ ទំហំនេះ បានកើនឡើងក្នុងអត្រា ១៩.៧ ភាគរយ បើធៀបនឹងរយៈពេលដូចគ្នាក្នុងឆ្នាំ២០២១ ដែលមានទឹកប្រាក់ប្រមាណ ៥ប៊ីលានដុល្លារ៕ អត្ថបទ៖ វណ្ណ

ត្រីប្រាកម្ពុជា នឹងអាចនាំចេញផ្លូវការទៅកាន់ទីផ្សារចិនក្នុងពេលឆាប់ៗ

ភ្នំពេញ៖ ត្រីប្រាកម្ពុជាគ្រោងនឹងនាំចេញទៅកាន់ទីផ្សារប្រទេសចិនក្នុងពេលឆាប់ៗ ខណៈបច្ចុប្បន្នឈ្មួញអ្នកនាំចេញកំពុងចុះសិក្សា និងជជែកបញ្ហាតម្លៃ ជាមួយម្ចាស់ផលិតកម្មវារីវប្បកម្ម ដើម្បីជម្រុញដល់ការនាំចេញនៅក្នុងកម្រិតសាកល្បង។លោក សុខ រ៉ាដែន ប្រធានសមាគមវារីវប្បករកម្ពុជា បានថ្លែងប្រាប់ភ្នាក់ងារអ្នកយកព័ត៌មាន BTV ស្តីពីផលិតកម្មវារីប្បកម្ម និងទីផ្សារនាំចេញត្រីប្រាកម្ពុជា នៅថ្ងៃទី ១៨ ខែកក្កដា ឆ្នាំ ២០២២ នេះថា ជុំវិញការចិញ្ចឹមត្រីប្រា កម្ពុជាមានទីផ្សារចិញ្ចឹមត្រីប្រាដ៏ធំមួយ ដែលពីមុនការចិញ្ចឹមត្រីប្រារបស់ប្រជាពលរដ្ឋ គឺសម្រាប់តែការចែកចាយទីផ្សារក្នុងស្រុក។ ការនាំចេញត្រីប្រានេះ កម្ពុជាអាចពង្រីកវារីប្បកម្មរបស់ខ្លួនកាន់តែធំ ដែលឈានទៅធ្វើការផ្គត់ផ្គង់បានរាប់ពាន់ រាប់ម៉ឺនតោនក្នុងមួយឆ្នាំៗ។លោក បន្តឲ្យដឹងថា បច្ចុប្បន្នចិនបានកំពុងចុះមកសិក្សា និងជជែកពិភាគ្សាគ្នា អំពីបញ្ហាតម្លៃ ដោយឲ្យតម្លៃត្រីប្រា ក្នុងមួយគីឡូ ចំនួន ៥ ៥០០រៀល ដែលតម្លៃនេះកំពុងជជែកពិភាក្សាគ្នាបន្ត ខណៈបច្ចុប្បន្នការចិញ្ចឹមមានតម្លៃថ្លៃដើមផលិតកម្មខ្ពស់ តែប្រសិនការបញ្ជាទិញមានចំនួនច្រើន និងមានកិច្ចសន្យាកក់ប្រាក់បានត្រឹមត្រូវ និងច្បាស់លាស់ តម្លៃនេះរំពឹងថា នឹងឈាននាំចេញត្រីប្រាជាលើកដំបូងផងដែរ។សូមបញ្ជាក់ថា៖ កាលពីថ្ងៃទី ៦ខែធ្នូ ២០២១ កន្លងមកនេះ ឯកឧត្តម Wang Wentian ឯកអគ្គរដ្ឋទូតចិនប្រចាំកម្ពុជា ថ្លែងលើកឡើងថា ជុំវិញទីផ្សារនាំចេញរបស់កម្ពុជា ប្រទេសចិនបានសម្រេចចិត្តធ្វើការសិក្សា និងវិភាគហានិភ័យលើផ្លែមៀន និងត្រីប្រារបស់កម្ពុជា ក្នុងនោះតាមកិច្ចប្រជុំវីដេអូពីចម្ងាយ គឺជាវិធានការសំខាន់មួយ ដើម្បីអនុវត្តតាមកិច្ចប្រជុំ រវាងថ្នាក់ដឹកនាំចិន និងសម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា គឺក្រៅពីផ្លែមៀនដែលអាចនាំចេញទៅប្រទេសចិន ចំពោះត្រីប្រារបស់កម្ពុជាវិញ ក៏នឹងអាចនាំចេញទៅទីផ្សារប្រទេសចិនផងដែរ៕អត្ថបទ៖ សុន រ៉ាឌី

ខេត្តកំពតប្រមូលផលនេសាទបានជាង ១ម៉ឺន២ពាន់តោន នៅក្នុងឆមាសទី១ ឆ្នាំ២០២២

ភ្នំពេញ៖ នាយខណ្ឌរដ្ឋបាលជលផលខេត្តកំពត បានបញ្ជាក់ថា សកម្មភាពការងារនេសាទ នៅតែមានដំណើរ ការល្អប្រជានេសាទ មានការយល់ដឹងច្រើនជាងមុន និងបានចូលរួមគោរពច្បាប់ត្រឹមត្រូវ មិនប្រើប្រាស់ ឧបករណ៍ហាមឃាត់នោះទេ សម្រាប់ឆមាសទី១ ឆ្នាំ២០២២នេះ ខេត្តកំពត ប្រមូលផលនេសាទបានជាង ១ម៉ឺន ២ពាន់តោន ។ នាយខណ្ឌរដ្ឋបាលជលផល លោក ស សុរិន បានឲ្យដឹងថា នៅក្នុងឆមាសទី១ ឆ្នាំនេះ រដ្ឋបាល ជលផលសម្រេចលទ្ធផលការងារជាច្រើន ក្នុងនោះ ផលនេសាទខេត្តកំពត ទាំងទឹកសាប និងសមុទ្រស្រស់ អនុវត្តបានចំនួនជាង ១២.១០៣តោន (ទឹកសាប ចំនួន២.៣០០តោន និងសមុទ្រ ចំនួន ៩.៨០៣ តោន) ។ ការធ្វើវារីវប្បកម្មសមុទ្រ បានចំនួន ៨៦០តោន និងផលវារីវប្បកម្មទឹកសាប បានចំនួន៦៧តោន ។ ផលនេសាទទាំងនោះ បាននាំចេញចំនួន ៣២៦តោន (កែច្នៃ ១៤៦តោន និងស្រស់ ១៨០តោន) ។ លោកនាយខណ្ឌរដ្ឋបាលជលផល បានបន្តថា ខេត្តកំពតមានស្ថានីយភ្ញាស់កូនត្រីមានសរុបចំនួន ១៥កន្លែង ផលិតកូនត្រីបានចំនួន ៥លានក្បាល។ ធនាគារក្តាមសេះ មាន០២កន្លែង (សហគមន៍នេសាទត្រពាំងរពៅ និងសហគមន៍នេសាទកែបថ្មី) ប្រមូលក្តាមពងដាក់ចូលធនាគារក្តាមបានចំនួន ៧៥គីឡូក្រាម ស្មើនិង ១.០៥១ក្តាម ។ លោក បានបញ្ជាក់ថា រដ្ឋបាលខេត្ត ក៏ដូចជាមន្ទីរជំនាញ បានយកចិត្តទុកដាក់ខ្ពស់ក្នុងថែរក្សាអភិរក្សធនធានធម្មជាតិសមុទ្រ និងបានបណ្តុះកូនកោងកាងបានចំនួន ២៩.៧០០ដើម និងបានដាំចំនួន ១៩.៦៨៦ដើម នៅតាមសហគមន៍នេសាទចំនួន៨ក្នុងខេត្ត។ខេត្តកំពតមានស្មៅសមុទ្រចំនួន ១១ប្រភេទលើផ្ទៃបាតសមុទ្រ ៨ ៤៣៥ហិកតា ផ្កាថ្ម ៩៥៣ហិកតា ព្រៃកោងកាង ១៩៦៦ហិកតា និងទីតាំងអភិរក្សមានចំនួន ១៣កន្លែង។ប្រជានេសាទ បានប្រាប់ឲ្យដឹងថា របរនេសាទគ្រប់គ្រាន់សម្រាប់ចិញ្ចឹមជីវភាពរស់នៅ និងបានសល់បន្តិចបន្តួច ប៉ុន្តែពិបាក ហត់នឿយ ហើយប្រឈមនឹងគ្រោះថ្នាក់ច្រើន។ តាមការបញ្ជាក់របស់ លោកនាយខណ្ឌរដ្ឋបាលជលផលថា ឆមានទី១នេះ ការបង្ក្រាបបទល្មើសអនុវត្តបានចំនួន ៤១ករណី ក្នុងនោះ រឹបអូស/បំផ្លាញចោលលបកន្ទុយកណ្តុរចំនួន ១៤ករណី , រឹបអូសនិងបំផ្លាញចោលឈឺបរុញដៃភ្ជាប់ឧបករណ៍ឆក់ ១៧ករណី, អប់រំណែនាំ ០៣ករណី និងករណីផ្សេងៗ ចំនួន៧ករណីទៀត៕ អត្ថបទ៖ អន សារឹម

បញ្ហាទីផ្សារ និងការចំណាយខ្ពស់លើថ្លៃដើមផលិតនៅតែជាកង្វល់របស់កសិករ

ស្វាយរៀង៖ បញ្ហាទីផ្សារ និងការចំណាយខ្ពស់លើថ្លៃដើមផលិត នៅតែជាកង្វល់របស់កសិករធ្វើស្រែចម្ការ ដែលពួកគេស្នើសុំឱ្យក្រសួង និងស្ថាប័នពាក់ព័ន្ធនានាជួយគិតគូរអំពីបញ្ហានេះឱ្យបានខ្លាំងក្លាផង។កសិករ នៅក្នុងខេត្តស្វាយរៀង បាននិយាយថា បច្ចុប្បន្ន អ្វីដែលពួកគេ កំពុងប្រឈមនោះ គឺតម្លៃកសិផល និងស្រូវអង្ករ មិនទៀតទាត់នៅលើទីផ្សារក្នុងស្រុក បណ្ដាលមកពីការទម្លាក់តម្លៃតាមចិត្ត ពីសំណាក់ឈ្មួញកណ្ដាល បញ្ហាតម្លៃដើមផលិត តម្លៃប្រេងឥន្ធនៈ ជី និងថ្នាំពុលកសិកម្ម មិនទៀងទាត់ ដែរ ធ្វើឱ្យពួកគេពិបាករកចំណេញ។ពាក់ព័ន្ធនឹងបញ្ហានេះ ប្រធានមន្ទីរពាណិជ្ជកម្មខេត្តស្វាយរៀង លោក មាគ ឆវណ្ណរុណ បាននិយាយថា កិច្ចការនេះ វាហួសពីសមត្ថភាពរបស់មន្ទីរ ។តាមរបាយការណ៍របស់មន្ទីរកសិកម្មខេត្តស្វាយរៀង ដែលBTV ទទួលបាន គិតត្រឹមថ្ងៃទី១១ ខែកក្កដា នេះ កសិករក្នុងខេត្តស្វាយរៀង បានធ្វើការប្រមូលផលស្រូវដើមរដូវ បានប្រមាណជាង ២០០ហិកតា ដោយទទួលបានទិន្នផលប្រមាណជាង ៧០០តោន។ ក្នុងនោះ កសិករ ក្នុងនិងក្រៅខេត្ត បាននាំស្រូវចម្រុះទៅកាន់ទីផ្សារវៀតណាម តាមច្រកទ្វារព្រំដែនអន្តរជាតិព្រៃវ័ល្ល ច្រកក្រសាំងជ្រំ ច្រកដូង ច្រកព្រៃតាអី និងច្រកទ្វេភាគី និងបុសមន ក្នុងមួយសប្តាហ៍ ប្រមាណជាង៥ពាន់តោន ដែលតម្លៃស្រូវក្នុង ១គីឡូក្រាម ចន្លោះ៩០០រៀល៕ អត្ថបទ៖ ភា សារិត

ទំហំពាណិជ្ជកម្មទ្វេភាគីកម្ពុជា-អាមេរិកមានតម្លៃជាង ៤,៨ ពាន់លានដុល្លារក្នុងឆមាសទី១

ភ្នំពេញ៖ ទំហំពាណិជ្ជកម្មទ្វេភាគីរវាងកម្ពុជា និងសហរដ្ឋអាមេរិក បានកើនឡើងដល់ជិត ៥ប៊ីលានដុល្លារ ក្នុងឆមាសទី១ឆ្នាំនេះ ខណៈទីផ្សារអាមេរិក នៅតែបន្តជាអ្នកទិញទំនិញធំជាងគេរបស់កម្ពុជា។ពាណិជ្ជកម្មទ្វេភាគីរវាងកម្ពុជា-អាមេរិក ក្នុងឆមាសទី១ ឆ្នាំ ២០២២ មានតម្លៃសរុបជាង ៤,៨ ពាន់លានដុល្លារកើនឡើងជាង ៥១ ភាគរយ បើធៀបនឹងរយៈពេលដូចគ្នាឆ្នាំ ២០២១។ នេះបើយោងតាមរបាយការណ៍របស់អគ្គនាយកដ្ឋានគយ និងរដ្ឋាករ ដោយបញ្ជាក់ថា ការនាំទំនិញពីកម្ពុជាទៅអាមេរិកបានហក់ឡើងរហូតដល់ ៥៤ ភាគរយ។ ទិន្នន័យស្ថិតិជញ្ជីងពាណិជ្ជកម្មទំនិញជាមួយនឹងប្រទេសសំខាន់ៗរបស់អគ្គនាយកដ្ឋានគយ និងរដ្ឋាករកម្ពុជា បង្ហាញថា ចាប់ពីខែមករា-ខែមិថុនា ឆ្នាំ ២០២២ ការធ្វើពាណិជ្ជកម្មរវាងប្រទេសកម្ពុជា និងអាមេរិក មានតម្លៃសរុប ៤ ៨១៦ លានដុល្លារ កើនឡើង ៥១,៨ ភាគរយ បើធៀបរយៈពេលដូចគ្នាឆ្នាំ ២០២១។យោងតាមទិន្នន័យខាងលើ ការនាំចេញទំនិញពីកម្ពុជាទៅអាមេរិក មាន ៤ ៦៤៨ លានដុល្លារ កើន ៥៤ ភាគរយ ធៀបនឹងឆមាសទី១ ឆ្នាំមុន និងការនាំទំនិញពីអាមេរិកមកកម្ពុជា មានមានចំនួន ១៦៨,២២ លានដុល្លារ កើន ៨,៧ ភាគរយ ។ តាមរយៈតួលេខនេះ គឺជញ្ជីងពាណិជ្ជកម្មកម្ពុជាមានអតិរេក៤ ៤៨០ លានដុល្លារ។ទីផ្សារអាមេរិក ឈរនៅលើគេក្នុងនាមជាប្រទេសទិញទំនិញពីកម្ពុជាច្រើន ដោយមានចំណែកប្រមាណ ៤០,៨ ភាគរយ នៃការនាំចេញសរុបរបស់កម្ពុជា ។កាលពីឆ្នាំមុនពាណិជ្ជកម្មរវាងប្រទេសទាំង ២ មានតម្លៃ ៧ ៨២៦ លានដុល្លារ កើនឡើង ៤០,៤ ភាគរយ ធៀបនឹងឆ្នាំ ២០២០ ។អ្នកជំនាញ លើកឡើងថា ការកើនឡើងនៃការនាំចេញទំនិញរបស់កម្ពុជា ទៅកាន់ទីផ្សារសេដ្ឋកិច្ចធំបំផុតពិភពលោក នេះ គឺដោយសារទំនិញកម្ពុជា មានគុណភាពខ្ពស់ និងផលិត ផ្គត់ផ្គង់តាមតម្រូវការទាន់ពេលវេលា ជាពិសេស ក្នុងវិបត្តិកូវីដ១៩ កម្ពុជាបើកសកម្មភាពសង្គមសេដ្ឋកិច្ចឡើងវិញ និងឈានដល់បើកដំណើរការខ្សែច្រវ៉ាក់ផលិតកម្ម ផ្គត់ផ្គង់ការនាំចេញ ខណៈប្រទេសផលិតមួយចំនួនមិនអាចដំណើរការសង្វាក់ផលិតកម្មបាន ដោយសារបន្ត រងផលប៉ះពាល់កូវីដ១៩៕ អត្ថបទ៖ វណ្ណៈ

កម្ពុជានាំចេញកៅស៊ូ មានទឹកប្រាក់សរុបជាង ២០០លានដុល្លារ ក្នុងឆមាសទី១

ភ្នំពេញ៖ កម្ពុជាទទួលបានចំណូលប្រមាណ ២១៥លានដុល្លារ លើការនាំចេញកៅស៊ូស្ងួត ប្រមាណ ១៣.៥ម៉ឺនតោន ក្នុងឆមាសទី១ ឆ្នាំ២០២១នេះ កើនឡើង ៣ភាគរយធៀបនឹងរយៈពេលដូចគ្នាកាលពីឆ្នាំមុន។របាយការណ៍របស់អគ្គនាយកដ្ឋានកៅស៊ូ បានឱ្យដឹងថា ប្រទេសកម្ពុជាបាននាំចេញកៅស៊ូស្ងួតចំនួន ១៣៥ ១៣៧ តោននៅក្នុងឆមាសទីមួយនៃឆ្នាំ ២០២២ កើនឡើង ៣ភាគរយធៀបនឹងរយៈពេលដូចគ្នាកាលពីឆ្នាំមុន។របាយការណ៍ បានឲ្យដឹងថា កម្ពុជា រកប្រាក់ចំណូលបាន ២១៥,៨ លានដុល្លារអាមេរិក ពីការនាំចេញទំនិញក្នុងអំឡុងខែមករា ដល់ខែមិថុនាឆ្នាំនេះ ធ្លាក់ចុះ ២,៩ ភាគរយពី ២២២,៤ លានដុល្លារ កាលពីឆ្នាំមុន។អគ្គនាយកនៃអគ្គនាយកដ្ឋានកៅស៊ូ បានបញ្ជាក់នៅក្នុងរបាយការណ៍ថា កៅស៊ូស្ងួតមួយតោនជាមធ្យមមានតម្លៃ ១ ៥៩៧ ដុល្លារអាមេរិកក្នុងរយៈពេលប្រាំមួយខែដំបូងនៃឆ្នាំ២០២២ ប្រហែល៩១ ដុល្លារទាបជាងតម្លៃក្នុងរយៈពេលដូចគ្នាកាលពីឆ្នាំមុន ។កម្ពុជា នាំចេញទំនិញកៅស៊ូភាគច្រើនទៅកាន់ប្រទេសម៉ាឡេស៊ី វៀតណាម សិង្ហបុរី និងចិន។របាយការណ៍ បានបន្តថា មកដល់ពេលនេះកម្ពុជាបានដាំដើមកៅស៊ូលើផ្ទៃដីសរុបចំនួន ៤០៤ ០៤៤ ហិកតា ដែលក្នុងនោះផ្ទៃដីចៀរជ័រកៅស៊ូ មានចំនួន ៣១០.១៩៣ ហិកតា ឬ ៧៧ ភាគរយ ៕អត្ថបទ៖ វណ្ណៈ

ការលក់ម៉ាស់ ជែល អាល់កុល រក្សាតម្លៃដដែលបើទោះបីកម្ពុជារកឃើញជំងឺកូវីដ-១៩បំប្លែងថ្មី

ភ្នំពេញ៖ ការលក់ម៉ាស់ ជែល អាកុល រក្សាតម្លៃដដែល បើទោះបីបច្ចុប្បន្នកម្ពុជារកឃើញជំងឺកូវីដ-១៩ បំប្លែងថ្មី ពពួកអូមីក្រុង ពួកអូមីក្រុង BA.4 និងBA.5។អាជីវករលក់ដូរក្នុងផ្សារ ក្នុងរាជធានីភ្នំពេញនៅថ្ងៃទី១៤ ខែកក្កដានេះ បានប្រាប់BTVឲ្យដឹងថា បច្ចុប្បន្ន ការលក់ម៉ាស់ ជែល អាកុល មានអតិថិជនមកទិញជាធម្មតា ទាំងមុន និងកំពុងឆ្លងជំងឺកូវីដសារ ឡើងវិញនៅពេលនេះ។ សម្រាប់តម្លៃទំនិញវិញ គឺរក្សាដដែល មិនមានការឡើងថ្លៃដូចកាលពីផ្ទុះជំងឺកូវីដ-១៩ នៅឆ្នាំមុននោះទេ។កន្លងទៅថ្មីៗនេះ ក្រសួងសុខាភិបាល បានចេញសេចក្តីណែនាំក្រើនរំលឹកដល់ប្រជាពលរដ្ឋ ឱ្យ បង្កើនការការពារខ្លួនពីការចម្លងវីរុសកូវីដ-១៩ ជាពិសេសពពួកអូមីក្រុងបំប្លែងថ្មី BA.4 និង BA.5។ក្រសួងសុខាភិបាល បានឲ្យដឹងថា ស្ថានភាពឆ្លងនៃវីរុសកូវីដ-១៩ នៅក្នុងប្រទេសកម្ពុជា មានការ កើតសារឡើងវិញ ចាប់តាំងពីថ្ងៃទី២៨ ខែមិថុនា ឆ្នាំ២០២២ ដោយមានអ្នកវិជ្ជមាន ត្រូវបានរកឃើញលើ អ្នកដំណើរមកពីក្រៅប្រទេស អ្នកនៅក្នុងសហគមន៍ និងអ្នកធ្វើតេស្តសម្រាប់ធ្វើវិញ្ញាបនបត្រ ក្នុងការធ្វើដំណើរចេញទៅក្រៅប្រទេសមួយចំនួន។ដើម្បីបញ្ចៀសនូវការរីករាលដាលការឆ្លងវីរុសកូវីដ-១៩ ដ៏ធ្ងន់ធ្ងរទៅក្នុងសហគមន៍ ទៅក្នុងគ្រួសារ និងស្ថាប័ននានា ដែលអាចកើតមានជាយថាហេតុ ក្រសួងសុខាភិបាល បានក្រើនរម្លឹកដល់ប្រជាជនទាំងអស់ (ទាំងកម្ពុជា និងជនបរទេស) ដែលរស់នៅប្រទេសកម្ពុជា ត្រូវនាំគ្នាបន្តអនុវត្តវិធានការ «៣ការពារ និង៣កុំ» ព្រមទាំងនាំគ្នាទៅចាក់វ៉ាក់សាំងកូវីដ-១៩ ទាំងដូសមូលដ្ឋាន និងដូសជំរុញ (ដូសទី៣ ទី៤ និងទី៥) ជាចាំបាច់ ដែលមានគម្លាតពីដូសមួយ ទៅដូសមួយទៀត មានរយៈពេលពី ៣ខែឡើងទៅ៕អត្ថបទ៖ ទូច សោភ័ណ

អគ្គនាយកដ្ឋានពន្ធដារ កំណត់ការប្រមូលចំណូលក្នុងឆ្នាំនេះ ឱ្យលើស ១០ភាគរយ នៃផែនការ

ភ្នំពេញ៖ អគ្គនាយដ្ឋានពន្ធដារ នឹងអនុវត្តការប្រមូលចំណូលពន្ធឲ្យសម្រេចបានលើសផែនការ ដែលកំណត់ដោយច្បាប់គ្រប់គ្រងហិរញ្ញវត្ថុ មិនតិចជាង ១០ ភាគរយនោះឡើយ នៅក្នុងឆ្នាំ ២០២២ នេះ ខណៈបច្ចុប្បន្នអគ្គនាយកដ្ឋានបានពង្រឹងនូវវិធានការគោលនយោបាយ និងរដ្ឋបាលសារពើពន្ធ ដើម្បីធានាដល់ប្រសិទ្ធភាពនៃការប្រមូលចំណូលពន្ធឲ្យបានល្អប្រសើរ។ឯកឧត្តម គង់ វិបុល រដ្ឋមន្ត្រីប្រតិភូអមនាយករដ្ឋមន្ត្រី និងជាប្រតិភូរាជរដ្ឋាភិបាល ទទួលបន្ទុកជាអគ្គនាយកនៃអគ្គនាយកដ្ឋានពន្ធដារ លើកឡើងនៅក្នុងកម្មវិធីបិទវគ្គបណ្តុះបណ្តាលស្តីពី “ច្បាប់និងបទប្បញ្ញត្តិពាក់ព័ន្ធ ជូនដល់ថ្នាក់ដឹកនាំ និងមន្រ្តីរាជការពន្ធដារដែលទទួលបាននីតិសម្បទា ជានគរបាលយុត្តិធម៌” នៅថ្ងៃទី១៣ ខែកក្កដា ឆ្នាំ២០២២នេះថា ការពង្រឹង និងបណ្តុះបណ្តាលធនធានមនុស្សគឺជាកត្តាសំខាន់, ដើម្បីពង្រីកធនធានឲ្យកាន់តែសំបូរបែប នឹងឆ្លើយតបតាមតម្រូវការ ក្នុងនោះការពង្រឹកផ្សព្វផ្សាយច្បាប់ និងបទប្បញ្ញត្តិស្តីពីពន្ធដារ កំណែទម្រង់ និងទំនើបកម្មរដ្ឋបាលសារពើពន្ធ និងបន្តពង្រឹងការផ្តល់សេវាជូនអ្នកជាប់ពន្ធ គឺជារឿងចាំបាច់ផងដែរ ដើម្បីឲ្យអ្នកជាប់ពន្ធទាំងអស់បានយល់អំពីកាតព្វកិច្ចនៃការបង់ពន្ធ។ឯកឧត្តម បន្តថា ជុំវិញការពង្រីកធនធានមនុស្សនេះ មន្រ្តីពន្ធដារអាចធ្វើសវនកម្មកំណត់ពន្ធ និងប្រមូលចំណូលពន្ធបានល្អប្រសើរជាងមុន ជាក់ស្តែងនៅក្នុងវិបត្តិនៃការរីករាលជំងឺកូវីដ ១៩ អគ្គនាយកដ្ឋាននៅតែបន្តប្រមូលចំណូលពន្ធបានលើសផែនការ ក្នុងនោះបើគិតការប្រមូលចំណូលក្នុងរយៈពេលជាង ៦ ខែ ឆ្នាំ២០២២ នេះវិញ អគ្គនាយកដ្ឋានពន្ធដារប្រមូលចំណូលបានជាង ៧០ភាគរយរួចហើយ នឹងបើតាមការគ្រោងទុក នៅក្នុងឆ្នាំ ២០២២ នេះ អគ្គនាយកដ្ឋានពន្ធដារ នឹងអាចប្រមូលចំណូលលើលផែនការក្នុងរង្វង់ជាង ១០ភាគរយផងដែរ។ឯកឧត្តម គង់ វិបុល បន្តថា ទាក់ទងការប្រមូលចំណូលបានល្អប្រសើរ ជាពិសេសនៅក្នុងឆ្នាំនេះ ដោយសារមន្រ្តីពន្ធដារបានប្រតិបត្តិការនិងបទល្មើសពន្ធដារមួយចំនួន និងផ្សព្វផ្សាយអំពីសិទ្ធត្រួតពិនិត្យ បទល្មើសបទឧក្រិដ្ឋ បទមជ្ឈិម និងបទលហុកំណត់អត្តសញ្ញាណ និងចាប់ជនល្មើស តាមច្បាប់កំណត់នៅក្នុងក្រមនីតិវិធីព្រហ្មទណ្ឌ នឹងកសាងសំណុំរឿងបទល្មើសទៅតុលាការជាដើម និងការបន្តកៀគរប្រមូលចំណូលឲ្យអស់សក្តានុពលផង និងពន្ធដារក៏នៅក្នុងក្របខណ្ឌសម្អាតប្រាក់ផងដែរ ដែលជាផ្នែកមួយក្នុងការជម្រុញប្រមូលចំណូលឲ្យបានល្អប្រសើរ។សូមបញ្ជាក់ថា នៅក្នុងឆ្នាំ ២០២២ នេះ រាជរដ្ឋាភិបាលបានកំណត់ការគ្រប់គ្រង និងមូលចំណូលក្នុងវិស័យពន្ធដារ ដែលកំណត់ក្នុងច្បាប់ហិរញ្ញវត្ថុ សម្រាប់ការគ្រប់គ្រង ក្នុងចំនួនប្រមាណជាង ១១ ៤១៩ ប៊ីលានរៀល ត្រូវជាង ២ ៨១៩ លានដុល្លារអាមេរិក ៕អត្ថបទ៖ សុន រ៉ាឌី

កម្ពុជាកំពុងពន្លឿនការរៀបចំផែនទីផ្លូវការអភិវឌ្ឍវិស័យយានយន្ត និងអេឡិចត្រូនិក

ភ្នំពេញ៖ រាជរដ្ឋាភិបាលកម្ពុជា កំពុងពន្លឿនការរៀបចំផែនទីបង្ហាញផ្លូវការអភិវឌ្ឍវិស័យយានយន្ត និងអេឡិចត្រូនិកនៅកម្ពុជា ដែលផែនការណេះ នឹងប្រែក្លាយកម្ពុជា ទៅជាមជ្ឈមណ្ឌលផលិតគ្រឿងបង្គុំយានយន្ត និងអេឡិចត្រូនិក ដើម្បីពង្រីកទីផ្សារនាំចេញទៅក្នុងតំបន់ និងសកលលោក។ឯកឧត្តម សុខ ចិន្តាសោភា រដ្ឋមន្ត្រីប្រតិភូអមនាយករដ្ឋមន្ត្រី និងជាអគ្គលេខាធិការក្រុមប្រឹក្សាអភិវឌ្ឍន៍កម្ពុជា នៅថ្ងៃទី ១២ខែកក្កដា ឆ្នាំ ២០២២ នេះ បានដឹកនាំប្រជុំពិនិត្យ និងពិភាក្សា លើសេចក្តីព្រាងផែនទីបង្ហាញផ្លូវការអភិវឌ្ឍវិស័យយានយន្ត និងអេឡិចត្រូនិកនៅកម្ពុជា ដើម្បីប្រមូលធាតុចូលបន្ថែមពីក្រសួងស្ថាប័នពាក់ព័ន្ធ លើសេចក្តីព្រាងផែនទីបង្ហាញផ្លូវ។ចំពោះការចូលរួមផ្តល់ធាតុចូល ក្នុងការរៀបចំសេចក្តីព្រាងផែនទីបង្ហាញផ្លូវ គឺមានសារៈសំខាន់ណាស់ ព្រោះរាជរដ្ឋាភិបាលបានកំណត់យកវិស័យយានយន្ត និងអេឡិចត្រូនិក ជាវិស័យអាទិភាព ដែលមានសក្តានុពលសម្រាប់ការចូលរួមទៅក្នុងខ្សែច្រវាក់តម្លៃតំបន់ និងសកល ក៏ដូចជាការលើកកម្ពស់ការធ្វើពិពិធកម្មសេដ្ឋកិច្ច និងចូលរួមស្ដារសេដ្ឋកិច្ចឡើងវិញក្រោយវិបត្តិនៃជំងឺកូវីដ-១៩ ស្របតាមមាគ៌ាដែលបានដាក់ចេញនៅក្នុង ក្របខណ្ឌយុទ្ធសាស្ត្រ និងកម្មវិធីស្តារ និងជំរុញកំណើនសេដ្ឋកិច្ចកម្ពុជា ក្នុងការរស់នៅជាមួយកូវីដ-១៩ តាមគន្លងប្រក្រតីភាពថ្មី សម្រាប់ឆ្នាំ២០២១-២០២៣។ ឯកឧត្តមបណ្ឌិត តាន់ មុនីវណ្ណ ប្រធានសម្ព័ន្ធឧស្សាហកម្មយានយន្តកម្ពុជា ថ្លែងនូវការគាំទ្រពេញទំហឹង ចំពោះផែនការរបស់រាជរដ្ឋាភិបាល ដែលបានគិតគូរគ្រប់ជ្រោយ និងច្បាស់លាស់ ហើយតាមរយៈផែនការនេះ ឯកឧត្តម រំពឹងថា នៅពេលខាងមុខ កម្ពុជានឹងក្លាយជាទីផ្សារផ្គត់ផ្គង់ នឹងនាំចេញយានយន្ត និងអេឡិចត្រូនិចដ៏សំខាន់មួយ នឹងជាប្រភពបង្កើនប្រាក់ចំណូលសម្រាប់សេដ្ឋកិច្ចជាតិកាន់តែខ្លាំងក្លាបន្ថែមទៀត។សូមរំលឹកថា នៅក្នុងកិច្ចប្រជុំនេះ មន្ត្រីជំនាញនៃលេខាធិការដ្ឋាន IDP នៃក្រុមប្រឹក្សាអភិវឌ្ឍន៍កម្ពុជា បានធ្វើបទបង្ហាញលម្អិត ស្តីពីទម្រង់ និងខ្លឹមសារនៃសេចក្តីព្រាងផែនទីបង្ហាញផ្លូវ ដែលបានរៀបរាប់ពីសាវតារនៃការរៀបចំសេចក្តីព្រាង, សក្តានុពលរបស់វិស័យយានយន្ត និងអេឡិចត្រូនិកក្នុងបរិបទនៃការអភិវឌ្ឍនៅកម្ពុជា, បញ្ហាប្រឈមក្នុងការអភិឌ្ឍវិស័យយានយន្ត និងអេឡិចត្រូនិកនៅកម្ពុជា និងវិធានការគន្លឹះដើម្បីដោះស្រាយបញ្ហាប្រឈមទាំងនោះ, យន្តការស្ថាប័នដឹកនាំអនុវត្តផែនទីបង្ហាញផ្លូវ ដើម្បីធានាប្រសិទ្ធភាពការងារ និងការកំណត់ពីក្រសួង ស្ថាប័នទទួលបន្ទុកការងារតាមដាននិងវាយតម្លៃផែនទីបង្ហាញផ្លូវជាដើម៕អត្ថបទ៖ សុន រ៉ាឌី

បណ្ដាញសង្គម

ព័ត៌មានថ្មីៗ

អធិការបតីអាល្លឺម៉ង់ និយាយថា អ៊ុយក្រែនអាចនឹងត្រូវទទួលយកការបាត់បង់ទឹកដី ដើម្បីសន្តិភាពជាមួយរុស្ស៊ី

សហរដ្ឋអាមេរិក ជំរុញសភាកោះតៃវ៉ាន់ ឱ្យអនុម័តថវិកាការពារជាតិទូលំទូលាយ

ទួកគីនឹងទទួលរៀបចំការប្រណាំង Formula One វិញនៅឆ្នាំ២០២៧ ក្រោយអវត្តមាន ៦ឆ្នាំ

ទីក្រុងញូវដែលី ក្តៅខ្លាំងក្រោមរលកកម្ដៅ ខណៈភ្ញៀវទេសចរស្វែងរកទីជ្រកតំបន់ភ្នំត្រជាក់នៃតំបន់កាស្មៀរ

ស៊ូដង់ខាងត្បូង និយាយថាមនុស្ស១៤នាក់ស្លាប់ ក្នុងគ្រោះថ្នាក់ធ្លាក់យន្តហោះនៅជិតទីក្រុង Juba

អ្នកនយោបាយ និងសង្គមស៊ីវិលមានសុទិដ្ឋនិយមថាសេចក្តីព្រាងច្បាប់ស្តីពីកាតព្វកិច្ចយោធា គឺមានសារសំខាន់សម្រាប់ប្រទេសជាតិ និងសម្រាប់យុវជន

រុស្ស៊ី ដាក់បន្ថែមសមាជិកសហភាពអឺរ៉ុបចូលក្នុងបញ្ជីខ្មៅ ក្នុងការឆ្លើយតបទៅនឹងទណ្ឌកម្មថ្មី

បទឈប់បាញ់ស្ថិតក្នុងហានិភ័យ ខណៈប៉ាគីស្ថាន និងអាហ្វហ្គានីស្ថាន រាយការណ៍ពីការវាយប្រហារឆ្លងព្រំដែន

កសិករគំរូក្នុងសង្កាត់រុនតាឯកតេជោសែនបង្ហាញបច្ចេកទេសដាំដើមទំពាំងបាយជូរឱ្យទទួលបានទិន្នផលខ្ពស់ តែទាមទារឱ្យមានការអត់ធ្មត់ខ្លាំង

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877