BTV NEWS

គណៈបញ្ជាការឯកភាពរាជធានី បន្តចុះបង្ក្រាប Online Scams នៅសង្កាត់ចាក់អង្រែលើ ឃាត់មនុស្ស១៦នាក់

ផ្តន្ទាទោសជនជាប់ចោទ ៦នាក់ ដាក់ពន្ធនាគារអស់មួយជីវិតពាក់ព័ន្ធនឹងករណីឃាតកម្មដោយមានទារុណកម្មលើនិស្សិតជនជាតិកូរ៉េខាងត្បូង

ឃាត់ខ្លួនជនជាតិចិន ៦១នាក់ ក្នុងប្រតិបត្តិការបង្ក្រាបទីតាំង Online Scams នៅខណ្ឌចំនួនពីរ ក្នុងភូមិសាស្រ្តរាជធានីភ្នំពេញ

រយៈពេល៣សប្តាហ៍ខែឧសភានេះ សមត្ថកិច្ច បង្ក្រាប Online Scams ចំនួន ៥០ទីតាំង ឃាត់ខ្លួនជនបរទេសសង្ស័យប្រមាណ ៣ ៣២០នាក់ និងបណ្តេញចេញជាង១ពាន់នាក់

សន្តិសុខ និង សង្គម

កុមារ៦នាក់បានស្លាប់ដោយសារកង្វះអាហារូបត្ថម្ភក្នុងមន្ទីរពេទ្យនៅតំបន់ហ្កាហ្សា

ក្រសួងសុខាភិបាលនៅក្នុងដែនដីប៉ាឡេស្ទីនដែលត្រូវបានឡោមព័ទ្ធដោយអ៊ីស្រាអែល បាននិយាយថា កុមារ៦នាក់បានស្លាប់ដោយសារការខ្វះជាតិទឹក និងកង្វះអាហារូបត្ថម្ភនៅមន្ទីរពេទ្យនានានៅភាគខាងជើងតំបន់ហ្កាហ្សា ខណៈតំបន់នេះរងទុក្ខពីស្ថានភាពមនុស្សធម៌ដ៏ធ្ងន់ធ្ងរបំផុត។ ក្រសួងបាននិយាយកាលពីថ្ងៃពុធថា កុមារពីរនាក់បានស្លាប់នៅមន្ទីរពេទ្យ អាល់ ស៊ីហ្វា (al-Shifa) ក្នុងទីក្រុង ហ្កាហ្សា ។ថ្មីៗនេះមានសេចក្តីរាយការណ៍ថា កុមារ៤នាក់បានស្លាប់នៅមន្ទីរពេទ្យ កាម៉ាល់ អាដវ៉ាន់ (Kamal Adwan)ភាគខាងជើងតំបន់ហ្កាហ្សា ខណៈមនុស្ស ៧ នាក់ផ្សេងទៀតស្ថិតក្នុងស្ថានភាពធ្ងន់ធ្ងរ។ អ្នកនាំពាក្យក្រសួងសុខាភិបាលលោក អាស្រាហ្វ អាល់ គូដ្រា (Ashraf al-Qudra)បាននិយាយនៅក្នុងសេចក្តីថ្លែងការណ៍មួយថាយើងសុំឱ្យភ្នាក់ងារអន្តរជាតិជួយអន្តរាគមន៍ជាបន្ទាន់ ដើម្បីបញ្ចៀសគ្រោះមហន្តរាយមនុស្សធម៌នៅភាគខាងជើងហ្កាហ្សា ស្របពេលការវាយប្រហាររបស់អ៊ីស្រាអែលលើតំបន់ហ្កាហ្សានៅតែបន្ត។សហគមន៍អន្តរជាតិកំពុងប្រឈមនឹងការសាកល្បងសីលធម៌ និងមនុស្សធម៌ ដើម្បីបញ្ឈប់អំពើប្រល័យពូជសាសន៍នៅហ្កាហ្សា។ប្រធានមន្ទីរពេទ្យ កាម៉ាល់ អាដវ៉ាន់ លោក អាម៉េដ អាល់កាឡូត(Ahmed al-Kahlout)បាននិយាយថា មន្ទីរពេទ្យបានឈប់ដំណើរការ ដោយសារខ្វះប្រេងឥន្ធនៈសម្រាប់ដំណើរការម៉ាស៊ីនភ្លើង។ កាលពីថ្ងៃអង្គារ មន្ទីរពេទ្យ អាល់ អាវដា (Al-Awda)ក្នុងទីក្រុង ចាបាលីយ៉ា (Jabalia) ក៏បានបញ្ឈប់ដំណើរការព្យាបាលអ្នកជំងឺដោយសារតែហេតុផលដូចគ្នានោះដែរ។នៅក្នុងវីដេអូដែលបានបង្ហោះនៅលើបណ្ដាញសង្គម Instagram និងត្រូវផ្ទៀងផ្ទាត់ដោយអង្គភាពផ្ទៀងផ្ទាត់សាណាដ (Sanad) របស់សារព័ត៌មាន Al Jazeera អ្នកសារព័ត៌មានឈ្មោះអ៊ីប្រាហឹម មូសាឡាម(Ebrahem Musalam)បង្ហាញទារកនៅលើគ្រែមួយនៅខាងក្នុងបន្ទប់ពេទ្យកុមារនៅមន្ទីរពេទ្យ Kamal Adwan ។ លោក Musalam បាននិយាយថា កុមារនៅក្នុងផ្នែកនេះកំពុងទទួលរងពីកង្វះអាហារូបត្ថម្ភសម្រាប់មនុស្សគ្រប់វ័យ និងកង្វះអាហារូបត្ថម្ភសម្រាប់ទារក ហើយឧបករណ៍ចាំបាច់ទាំងនោះបានឈប់ដំណើរការដោយសារតែការដាច់ចរន្តអគ្គិសនីជាបន្តបន្ទាប់ ព្រោះខ្វះប្រេងឥន្ធនៈ៕

កងរក្សាសន្តិភាពរបស់UN ចាប់ផ្តើមដកខ្លួនចេញពីប្រទេសកុងហ្គោភាគខាងកើតដែលហែកហួរដោយសង្រ្គាម

ក្រុមសារព័ត៌មាន AFP បានមើលឃើញថា អង្គការសហប្រជាជាតិកាលពីថ្ងៃពុធ បានចាប់ផ្តើមដកកងកម្លាំងរក្សាសន្តិភាពនៃបេសកកម្មរក្សាស្ថិរភាពរបស់UNនៅសាធារណរដ្ឋប្រជាធិបតេយ្យកុងហ្គោ (MON USCO) ដោយប្រគល់មូលដ្ឋានទី១របស់ខ្លួនឲ្យទៅនគរបាលជាតិ។ ក្នុងអំឡុងពេលពិធីផ្លូវការមួយនៅឯមូលដ្ឋាន Kamanyola នៅជិតព្រំដែនប្រទេសរ៉្វាន់ដា និងប៊ូរុនឌី ទង់ជាតិរបស់អង្គការសហប្រជាជាតិ និងប៉ាគីស្ថាន ដែលជាប្រទេសដើមនៃកងរក្សាសន្តិភាព ត្រូវបានជំនួសដោយទង់ជាតិសាធារណរដ្ឋប្រជាធិបតេយ្យកុងហ្គោវិញ។សាធារណរដ្ឋប្រជាធិបតេយ្យកុងហ្គោ បានទាមទារឲ្យមានការដកខ្លួនចេញ បើទោះបីជាមានការព្រួយបារម្ភពីអង្គការសហប្រជាជាតិអំពីអំពើហិង្សាដ៏ខ្លាំងក្លា នៅភាគខាងកើតនៃប្រទេសនេះក៏ដោយ។ទីក្រុងឃីនសាសា (Kinshasa) ចាត់ទុកកម្លាំងរបស់អង្គការសហប្រជាជាតិថា គ្មានប្រសិទ្ធភាពក្នុងការការពារជនស៊ីវិលពីក្រុមប្រដាប់អាវុធ និងកងជីវពលដែលបានបង្កបញ្ហានានា នៅភាគខាងកើតនៃប្រទេសដ៏ធំអស់រយៈពេលបីទសវត្សរ៍មកហើយ។ក្រុមប្រឹក្សាសន្តិសុខអង្គការសហប្រជាជាតិ បានបោះឆ្នោតកាលពីខែធ្នូ ដើម្បីយល់ព្រមតាមការទាមទាររបស់ទីក្រុងឃីនសាសាសម្រាប់ការដកខ្លួនបន្តិចម្តងៗរបស់បេសកកម្ម MONUSCO ដែលបានមកដល់ក្នុងឆ្នាំ១៩៩៩។បច្ចុប្បន្ននេះ កម្លាំងអង្គការសហប្រជាជាតិ បានដាក់ពង្រាយទាហានប្រហែល ១៣៥.00នាក់ និង នគរបាលចំនួន ២.០០០នាក់ នៅទូទាំងខេត្តភាគខាងកើតចំនួនបីគឺ Ituri, South Kivu និង North Kivu ។

តុលាការកំពូល រកមធ្យោបាយដោះស្រាយភាពស្របច្បាប់នៃបម្រាមរបស់អាមេរិក លើកាំភ្លើងកែច្នៃពាក់កណ្តាលស្វ័យប្រវត្តិ

ចៅក្រមតុលាការកំពូលរបស់សហរដ្ឋអាមេរិក បានព្យាយាមរកមធ្យោបាយដោះស្រាយ ជុំវិញទិដ្ឋភាពបច្ចេកទេសនៃកាំភ្លើងកែច្នៃពាក់កណ្តាលស្វ័យប្រវត្តិ កាលពីថ្ងៃពុធ ខណៈក្រុមចៅក្រម បានពិចារណាអំពីភាពស្របច្បាប់នៃបម្រាមសហព័ន្ធ ដែលដាក់ក្រោមរដ្ឋបាលអតីតប្រធានាធិបតី លោក Donald Trump នៅលើឧបករណ៍ទាំងនេះ។ ករណីនេះ ផ្តោតលើការរឹតបន្តឹងអាវុធផ្សេងទៀត បន្ទាប់ពីមានការពង្រីកសិទ្ធិប្រើប្រាស់កាំភ្លើង កាលពីឆ្នាំ២០២២។ ចៅក្រម បានទទួលព័ត៌មានការអះអាង នៅក្នុងបណ្តឹងឧទ្ធរណ៍ដោយរដ្ឋបាលរបស់ប្រធានាធិបតី លោក Joe Biden លើសេចក្តីសម្រេចរបស់តុលាការជាន់ទាប ក្នុងការគាំទ្រ លោក មីឈែល កាគ្រី (Michael Cargill) ម្ចាស់ហាងលក់កាំភ្លើង និងជាអ្នកតស៊ូមតិសិទ្ធិប្រើប្រាស់កាំភ្លើង មកពីទីក្រុង Austin រដ្ឋតិចសាស់ ដែលបានជំទាស់ទៅនឹងបម្រាម ដែលត្រូវបានអនុវត្ត បន្ទាប់ពីការបាញ់ប្រហារទ្រង់ទ្រាយធំ កាលពីឆ្នាំ ២០១៧ ដែលបានសម្លាប់មនុស្ស ៥៨នាក់ នៅទីក្រុង Las Vegas ។សំណួរជាច្រើន ដែលចោទសួរដោយចៅក្រម ពុំបានបង្ហាញសញ្ញាច្បាស់លាស់ ថាតើពួកគេនឹងដោះស្រាយករណីនេះដោយរបៀបណានៅក្នុងសេចក្តីសម្រេច ដែលនឹងត្រូវកំណត់ពេលនៅចុងខែមិថុនា។តុលាការកំពូល ដែលមានសំឡេងភាគច្រើន ៦ទល់នឹង៣ បានទទួលយកទិដ្ឋភាពដ៏ទូលំទូលាយនៃសិទ្ធិប្រើប្រាស់កាំភ្លើង នៅក្នុងប្រទេសមួយដែលបានបែងចែកយ៉ាងស៊ីជម្រៅ ជុំវិញរបៀបដោះស្រាយអំពើហិង្សាដោយអាវុធ។ ករណីបច្ចុប្បន្ន ផ្តោតលើថាតើការិយាល័យទទួលបន្ទុកគ្រឿងស្រវឹង ថ្នាំជក់ អាវុធ និងគ្រឿងផ្ទុះ (ATF) ដែលជាទីភ្នាក់ងារក្រសួងយុត្តិធម៌របស់សហរដ្ឋអាមេរិក បានបកស្រាយយ៉ាងត្រឹមត្រូវដែរឬទេអំពីច្បាប់ហាមឃាត់កាំភ្លើងយន្តខណៈមានការពង្រីកដល់កាំភ្លើងកែច្នៃពាក់កណ្តាលស្វ័យប្រវត្តិ។

UN និយាយថា ក្រុមប្រដាប់អាវុធ បានពង្រីកការគ្រប់គ្រង លើទឹកដីក្នុងប្រទេសកូឡុំប៊ី

របាយការណ៍របស់អង្គការសហប្រជាជាតិ បានឲ្យដឹងកាលពីថ្ងៃពុធថា ក្រុមប្រដាប់អាវុធខុសច្បាប់ បានពង្រីកការគ្រប់គ្រងរបស់ពួកគេលើទឹកដីប្រទេសកូឡុំប៊ី ក្នុងឆ្នាំ ២០២៣ ដែលស្វែងរកការគ្រប់គ្រងលើ សហគមន៍ ដែលបានឃើញថាសិទ្ធិមនុស្សត្រូវបានបំពាន។ប្រទេសនៅអាមេរិកខាងត្បូងមួយនេះ ប្រឈមមុខទៅនឹងជម្លោះផ្ទៃក្នុង ដែលបានអូសបន្លាយពេលជាងប្រាំមួយទសវត្សរ៍ ដោយមានចំនួនអ្នកស្លាប់លើសពី ៤៥០.០០០នាក់ ទោះបីជាការខិតខំប្រឹងប្រែងរបស់ ប្រធានាធិបតី លោក ហ្គាស្តូវ៉ូ ប៉េត្រូ(Gustavo Petro) ដើម្បីឲ្យទទួលបានសន្តិភាពជាមួយក្រុមប្រដាប់អាវុធខុសច្បាប់ ដូចជាកងទ័ពព្រៃ និងក្រុមឧក្រិដ្ឋជនក៏ដោយ។របាយការណ៍របស់អង្គការសហប្រជាជាតិ បានបង្ហាញពីការកើនឡើង ១៤,៤ភាគរយ នៅក្នុងទីក្រុងនានា ដែលទទួលរងអំពើហិង្សាពី ១៨០លើក ក្នុងឆ្នាំ ២០២២ ដល់២០៦លើក ក្នុងឆ្នាំ ២០២៣ ។សហព័ន្ធសិទ្ធមនុស្សអន្តរជាតិ រួមជាមួយអង្គការក្នុងស្រុក កាលពីថ្ងៃពុធ បានទាមទារឱ្យអាជ្ញាធរការពារជនជាតិដើមភាគតិច Viwa នៅតំបន់ជួរភ្នំ ស៊ីរ៉ា ណេវ៉ាដា ដេ សានតា ម៉ាតា(Sierra Nevada de Santa Marta) នៅភាគខាងជើង ខណៈសមាជិកចំនួន ៣០០នាក់របស់ខ្លួន ត្រូវស្វែងរកទីជម្រកនៅក្នុងទីប្រជុំជនផ្សេងទៀតដូចជាតំបន់ រីអូហាចា(Riohacha) ដើម្បីភៀសខ្លួនចេញពីការប៉ះទង្គិចគ្នា រវាងក្រុមប្រដាប់អាវុធ។

របាយការណ៍៖ ពាណិជ្ជកម្មថាមពលរបស់រុស្ស៊ីជាមួយឥណ្ឌា អាចនឹងមានភាពតានតឹង ចំពេលមានការដាក់ទណ្ឌកម្មថ្មី

ប្រភពជាច្រើន បានប្រាប់សារព័ត៌មានរ៉យទ័រថា ការដាក់ទណ្ឌកម្មចុងក្រោយបង្អស់របស់ទីក្រុងវ៉ាស៊ីនតោន ទៅលើទីក្រុងមូស្គូ កំពុងធ្វើឲ្យមានទស្សនវិស័យដ៏អាក្រក់សម្រាប់ពាណិជ្ជកម្មថាមពលរបស់រុស្ស៊ីជាមួយឥណ្ឌា។ប្រភពឧស្សាហកម្មអនាមិកចំនួនបី បានគូសបញ្ជាក់ពីការព្រួយបារម្ភកាន់តែខ្លាំងឡើងក្នុងចំណោមរោងចក្រចម្រាញ់ប្រេងឥណ្ឌាអំពីការរឹតបន្តឹងថ្មី។ ស្ថាប័ននានា បារម្ភថា វាអាចនឹងកាន់តែពិបាកក្នុងការស្វែងរកនាវា ដើម្បីដឹកជញ្ជូនប្រេងឆៅរបស់រុស្ស៊ី ក៏ដូចជាការបន្ថែមថ្លៃដឹកជញ្ជូនផងដែរ។នៅទីបំផុត កត្តាបែបនេះអាចកាត់បន្ថយការបញ្ចុះតម្លៃលើប្រេងរុស្ស៊ី ដោយកាត់បន្ថយការទាក់ទាញ ពាណិជ្ជកម្ម។ តម្លៃបារ៉ែលធូរថ្លៃជាង គឺជាហេតុផលសំខាន់ដែលឥណ្ឌា បានក្លាយជាអ្នកទិញដ៏ធំបំផុតនៃប្រេងឆៅពីសមុទ្ររុស្ស៊ីកាលពីឆ្នាំមុន ដោយបាននាំចូល ១,៦៦ លានបារ៉ែល ក្នុងមួយថ្ងៃក្នុងឆ្នាំ ២០២៣ ។ទោះបីជាការដាក់ទណ្ឌកម្ម មិនមែនជារឿងថ្មីសម្រាប់ទីក្រុងមូស្គូ ចាប់តាំងពីការឈ្លានពានអ៊ុយក្រែនឆ្នាំ ២០២២ ក៏ដោយ សហរដ្ឋអាមេរិក បានអនុវត្តយ៉ាងទូលំទូលាយកាលពីថ្ងៃសុក្រសប្តាហ៍មុន ដោយប្រារព្ធខួបលើកទី២នៃសង្រ្គាម និងដាក់ទណ្ឌកម្មរុស្ស៊ីចំពោះការស្លាប់របស់លោក អាឡិចសេ ណាវ៉ាល់នី ( Alexei Navalny) មេដឹកនាំប្រឆាំងដ៏លេចធ្លោ នៅក្នុងប្រទេសនេះ។ក្នុងចំណោមគោលដៅ គឺក្រុមហ៊ុនដឹកប្រេងឈានមុខគេរបស់រុស្ស៊ី Sovcomflot ជុំវិញការចោទប្រកាន់ថាក្រុមហ៊ុនបានរំលោភលើការកំណត់តម្លៃរបស់ក្រុមប្រទេសG7គឺតម្លៃ៦០ដុល្លារក្នុងមួយបារ៉ែលទៅលើប្រេងឆៅរុស្ស៊ី។ នាវាដឹកប្រេងចំនួន១៤គ្រឿងដែលមានទំនាក់ទំនងជាមួយក្រុមនេះ ក៏ត្រូវបានគេកំណត់គោលដៅផងដែរ ដោយបន្ថែមទៅលើបញ្ជីនៃនាវាដែលរងការដាក់ទណ្ឌកម្មកើនឡើង។

អាមេរិក ជំរុញឲ្យអ៊ីស្រាអែល អនុញ្ញាតឲ្យពលរដ្ឋមូស្លីមគោរពបូជានៅវិហារ Al-Aqsa អំឡុងខែបុណ្យរ៉ាម៉ាដាន

សហរដ្ឋអាមេរិក កាលពីថ្ងៃពុធ បានជំរុញឱ្យអ៊ីស្រាអែល អនុញ្ញាតឱ្យពលរដ្ឋមូស្លីមគោរពបូជានៅ បរិវេណព្រះវិហារ Al-Aqsa ក្នុងទីក្រុងហ្សេរុយសាឡឹម ក្នុងអំឡុងពេលខែបុណ្យរ៉ាម៉ាដាន បន្ទាប់ពីរដ្ឋមន្ត្រី ស្តាំនិយមម្នាក់ បានស្នើឱ្យរារាំងប្រជាជនប៉ាឡេស្ទីនពីតំបន់កាន់កាប់ West Bank មិនឲ្យអធិស្ឋាននៅទីនោះ។ អ្នកនាំពាក្យក្រសួងការបរទេស លោក Matthew Miller បានប្រាប់អ្នកសារព័ត៌មានថា ខណៈវាទាក់ទងនឹងវិហារ Al-Aqsa យើងបន្តជំរុញឱ្យអ៊ីស្រាអែល ជួយសម្រួលដល់ការចូលទៅកាន់ ព្រះវិហារ សម្រាប់អ្នកគោរពបូជាដោយសន្តិវិធី ក្នុងអំឡុងពេលខែបុណ្យរ៉ាម៉ាដាន ដូចដែលបានអនុវត្តកន្លងមក។ ខែនៃការតមអាហារ ធ្វើឡើងខណៈប្រទេសអ៊ីស្រាអែល ធ្វើយុទ្ធនាការយោធាឥតឈប់ឈរនៅតំបន់ហ្កាហ្សា ជាការឆ្លើយតបទៅនឹងការវាយប្រហារទ្រង់ទ្រាយធំដោយក្រុមហាម៉ាស នៅក្នុងប្រទេសអ៊ីស្រាអែល កាលពីថ្ងៃទី ៧ ខែតុលា។ ក្រុមហាម៉ាស បានអំពាវនាវឱ្យមានសកម្មភាពធំមួយនៅព្រះវិហារ Al-Aqsa សម្រាប់ការចាប់ផ្តើមនៃខែបុណ្យរ៉ាម៉ាដាន។ ប្រធានក្រុមហាម៉ាស លោក Ismail Haniyeh បាននិយាយនៅក្នុងសេចក្តីថ្លែងការណ៍តាមទូរទស្សន៍កាលពីថ្ងៃពុធថា យើងអំពាវដល់ប្រជាជនរបស់យើងនៅក្នុងទីក្រុងហ្សេរុយសាឡឹម តំបន់West Bank និងតំបន់កាន់កាប់ផ្នែកខាងក្នុងរបស់អ៊ីស្រាអែល ដើម្បីធ្វើដំណើរទៅកាន់ ព្រះវិហារ Al-Aqsa ចាប់ពីថ្ងៃដំបូងនៃខែបុណ្យរ៉ាម៉ាដាន ទៅជាក្រុម ឬតែម្នាក់ឯង ដើម្បីអធិស្ឋាននៅទីនោះ។ រដ្ឋមន្ត្រីសន្តិសុខជាតិអ៊ីស្រាអែល លោក អ៊ីតាម៉ា បេន គ្វ័រ(Itamar Ben Gvir) បាននិយាយថា ប្រជាជនប៉ាឡេស្ទីននៅតំបន់ West Bank មិនគួរត្រូវបានអនុញ្ញាត ចូលទៅក្នុងទីក្រុង ហ្សេរុយសាឡឹម ដើម្បីអធិស្ឋានក្នុងអំឡុងពេលខែបុណ្យរ៉ាម៉ាដាននោះទេ។ លោក និយាយថា យើងពុំអាចទទួលយកហានិភ័យ ដែលអនុញ្ញាតឱ្យមានការប្រារព្ធពិធីសម្រាប់ក្រុមហាម៉ាសនៅព្រះវិហារនោះទេ។ សហរដ្ឋអាមេរិក បាននឹងកំពុងជំរុញឱ្យមានកិច្ចព្រមព្រៀងមួយ មុនពេលខែបុណ្យរ៉ាម៉ាដានចាប់ផ្តើម ដែលអ៊ីស្រាអែលនឹងត្រូវបញ្ឈប់ការវាយប្រហារនៅតំបន់ហ្កាហ្សា ហើយចំណាប់ថ្នូរ ដែលត្រូវបានចាប់ នៅថ្ងៃទី ៧ ខែតុលានឹងត្រូវបានដោះលែង។

ការតវ៉ារបស់កសិករដ៏ធំនៅប្រទេសឥណ្ឌា បង្កឱ្យមានការអះអាងពីអំពើឃោរឃៅរបស់នគរបាល

លោក ហាឌីបស៊ីញ(Hardeep Singh) បានដើរដង្ហែរក្បួនតវ៉ាក្នុងចំណោមកសិករទៅកាន់រដ្ឋធានី Delhi របស់ប្រទេសឥណ្ឌា ជាអ្វីដែលរូបលោកគិតថាជាការតវ៉ាដោយស្ងៀមស្ងាត់ ប៉ុន្តែក្រោយមកការតវ៉ាទាំងនោះបានធ្លាក់ចូលទៅក្នុងភាពវឹកវរ និងមានការលើកឡើងពីការរងការបង្ក្រាបដ៏ឃោរឃៅពីនគរបាល។ ការបាញ់ប្រហារ និងឧស្ម័នបង្ហៀរទឹកភ្នែករបស់កងកម្លាំងនគរបាល បានស្រោចលើក្រុមបាតុករដែលធ្វើបាតុកម្មទាមទារឲ្យមានស្ថានភាពល្អប្រសើរ ហើយលោក ស៊ីញ វ័យ២៨ឆ្នាំបានរងរបួស។កសិករមកពីរដ្ឋពុនចាប(Punjab)ភាគខាងជើងរបស់ប្រទេសឥណ្ឌារូបនេះ បាននិយាយដោយចង្អុលទៅដីថា ភ្នែកខាងស្តាំរបស់ខ្ញុំ ត្រូវគេបាញ់គ្រាប់កាំភ្លើងជ័រចំ ហើយខ្ញុំបានដួលនៅទីនោះ ។ ភ្នែកខាងស្តាំរបស់ខ្ញុំឈឺខ្លាំងណាស់ ។លោកស៊ីញ គឺស្ថិតក្នុងចំណោមអ្នករងរបួសជាច្រើននាក់ ហើយយ៉ាងហោចណាស់កសិករម្នាក់បានស្លាប់នៅក្នុងអំពើហិង្សាដែលបានកើតឡើងបន្ទាប់ពីកម្មករកសិកម្មបានចាប់ផ្ដើមហែក្បួនពីភាគខាងជើងរដ្ឋ Punjab និង រដ្ឋ ហារីយ៉ាណា (Haryana) ឆ្ពោះទៅកាន់រដ្ឋធានី Delhi កាលពីពាក់កណ្តាលខែកុម្ភៈ។នគរបាលបានបដិសេធការអះអាងថាមានការបំពាននេះ ប៉ុន្តែរបាយការណ៍ប្រព័ន្ធផ្សព្វផ្សាយបាននិយាយថា យ៉ាងហោចណាស់មានមន្ត្រីពីរនាក់បានស្លាប់ និងរាប់សិបនាក់ផ្សេងទៀតបានរងរបួសក្នុងអំឡុងពេលចលាចលនេះ។ មន្ត្រីសុខាភិបាលរដ្ឋ Punjab បានកត់ត្រាការរងរបួសរបស់កសិករ និងសកម្មជនចំនួន ចំនួន១៧៧នាក់ ចាប់តាំងពីពាក់កណ្តាលខែកុម្ភៈមក បន្ទាប់ពីកសិករបានចាប់ផ្តើមការហែក្បួន ដែលមានឈ្មោះថា តោះយើងទៅកាន់រដ្ឋធានី Delhi។គួររម្លឹកថា ការតវ៉ារបស់ប្រជាកសិករឥណ្ឌា បានកើតមានឡើងបន្ទាប់ពីការចរចាជាមួយរដ្ឋាភិបាលស្ដីពីការជួយដំឡើងថ្លៃផលិតផលកសិកម្មរបស់ពួកគេឲ្យខ្ពស់ជាងមុនបានបរាជ័យ៕

អាជ្ញាធរខណ្ឌ៧មករា ទុករយៈពេល៣ថ្ងៃ ដល់ក្រុមអ្នកលក់ដូរលើផ្លូវលេខ ១៣៤ ឲ្យរើចេញ

កម្លាំងគណៈបញ្ជាការឯកភាពខណ្ឌ ៧មករា បានចុះរៀបចំសណ្ដាប់ធ្នាប់តាមបណ្ដោយផ្លូវលេខ១៣៤ ចំណុច មុខមន្ទីរពេទ្យបង្អែករាជធានីភ្នំពេញ ដោយធ្វើកិច្ចសន្យាទុក្ខរយៈពេលបីថ្ងៃឱ្យក្រុមអាជីវករលក់ដូររំលោភលើចិញ្ចើមផ្លូវរើចេញដោយខ្លួនឯង បើពុំដូចនេះទេអាជ្ញាធរ និងចុះចាត់វិធានការរដ្ឋបាល។ការចុះរៀបចំនេះ បានធ្វើឡើងនៅព្រឹកថ្ងៃទី២៩ ខែកុម្ភៈ ឆ្នាំ២០២៤ ដោយមានការណែនាំពីលោក ថេង សុថុល អភិបាលខណ្ឌ៧មករា បានចាត់ឲ្យលោក ក្រូច សុធន់ នាយករងរដ្ឋបាលដឹកនាំកម្លាំងគណៈបញ្ជាការឯកភាព ខណ្ឌចុះ ណែនាំនិងធ្វើកិច្ចសន្យា ដល់អាជីវកយកផ្លូវតាំង ដាក់ទូ លក់ដូរ និងទីតាំងផ្ញើម៉ូតូ ស្ថិតនៅអមសងខាងកំណត់ផ្លូវលេខ ១៣៤ ជាប់របងមន្ទីរពេទ្យបង្អែករាជធានីភ្នំពេញ មូលដ្ឋានសង្កាត់វាលវង់ ខណ្ឌ៧មករា រាជធានីភ្នំពេញ។ការចុះណែនាំធ្វើកិច្ចសន្យានេះ លោក ក្រូច សុធន់ នាយករងរដ្ឋបាលខណ្ឌ៧មករាបានឲ្យBTV ដឹងថា កំណាត់ផ្លូវនេះអាជ្ញាធរបានចុះអប់រំណែនាំនិងរៀបចំជាញឹកញាប់ផងដែរ តែក្រុមអាជីវករមួយចំនួនធំហាក់មិនចូលរួមសហការជាមួយអាជ្ញាធរឡើយ ដូច្នេះនៅថ្ងៃនេះអាជ្ញាធរចុះធ្វើកិច្ចសន្យាដោយទុករយៈពេលបីថ្ងៃឲ្យក្រុមអាជីវករលក់ដូររំលោភលើផ្លូវឲ្យរើតូបចេញ និងទីតាំងផ្ញើម៉ូតូ ចេញដោយខ្លួនឯង។ ក្នុងរយៈពេល ៣ថ្ងៃក្រោយបើមិនរុះរើតាមកិច្ចសន្យារបស់អាជ្ញាធរនោះទេរដ្ឋបាលខណ្ឌ និងចុះអនុវត្តវិធានការរដ្ឋបាល។លោកនាយករងរដ្ឋបាលបានបន្ថែមថា អាជ្ញាធរចុះរៀបចំនេះដើម្បីឲ្យ រក្សាបរិស្ថានអនាម័យ សណ្ដាប់ធ្នាប់សាធារណៈ មានសោភ័ណភាពនិងកាត់បន្ថយការកកស្ទះចរាចរណ៍ រក្សាចិញ្ចើមផ្លូវសម្រាប់អ្នកថ្មើជើង។ ដោយកន្លងមកក្រុមអាជីវករទាំងនេះបានយកផ្លូវធ្វើជាកន្លែងលក់ និងផ្ញើម៉ូតូបង្កការកស្ទះ ចរាចរណ៍ដល់អ្នកធ្វើដំណើរឆ្លងកាត់កំណាត់ផ្លូវលេខ១៣៤នេះ។ជាចុងក្រោយអាជ្ញាធរខណ្ឌ៧មករាបានសំណូមពរដល់អាជីវករលក់ដូរតាមបណ្ដោយផ្លូវលេខ១៣៤នេះនឹងអាជីវករលក់ដូរតាមដោយផ្លូវផ្សេងៗទៀត សូមចូលរួមសហការជាមួយអាជ្ញាធរ ដើម្បី រក្សាបរិស្ថានអនាម័យ សណ្ដាប់ធ្នាប់ឲ្យបានល្អប្រសើរ និងរំដោះចិញ្ចើមផ្លូវ សម្រាប់អ្នកថ្មើជៀសវាងអាជ្ញាធរចាត់វិធានការរដ្ឋបាល៕ អត្ថបទ៖ កុម្ភៈ

អ៊ុយក្រែន មិនធ្វើការចរចាអំពីការបិទព្រំដែនជាមួយប្រទេសប៉ូឡូញទេ

លោក អូឡេកសាន គុប្រាកូវ (Oleksandr Kubrakov) រដ្ឋមន្ត្រីទទួលបន្ទុកអភិវឌ្ឍន៍សហគមន៍ ដែនដី និងហេដ្ឋារចនាសម្ព័ន្ធនៃប្រទេសអ៊ុយក្រែន បានអត្ថាធិប្បាយលើការអះអាងអំពីការចរចា ដែលកំពុងបន្តជាមួយរដ្ឋាភិបាលអ៊ុយក្រែនអំពីការបិទព្រំដែនអ៊ុយក្រែន-ប៉ូឡូញ។«គ្មាននរណាម្នាក់ កំពុងរៀបចំការចរចាអំពីការបិទព្រំដែនជាមួយប៉ូឡូញ ក្នុងនាមអ៊ុយក្រែនទេ។ ប្រតិបត្តិការស្ថិរភាពនៅព្រំដែន គឺជាបញ្ហានៃការបន្តជីវិត នៅក្នុងសង្គ្រាមប្រឆាំងនឹង«អ្នកឈ្លានពានរុស្ស៊ី» ។លោកគុប្រាកូវ បានកត់សម្គាល់ថា អ៊ុយក្រែន «ចាត់ទុករដ្ឋជាមិត្តរបស់ប៉ូឡូញដោយការគោរព» បានស្នើឲ្យ មានការសម្រេចចិត្ត ក្នុងន័យស្ថាបនា និងបានចាត់វិធានការ ដើម្បីកាត់បន្ថយភាពតានតឹង នៅព្រំដែន។លោកបានសង្កត់ធ្ងន់ថា៖«យើងកំពុងរង់ចាំការសម្រេចចិត្តឆ្លើយតបដោយរដ្ឋាភិបាលប៉ូឡូញ ដើម្បីកុំឲ្យស្ថានការណ៍នេះ ឈានដល់ភាពជាប់គាំង។ លទ្ធផលបែបនេះ នឹងមិនមានផលចំណេញសម្រាប់នរណាម្នាក់ឡើយ ក្រៅពីសត្រូវរួមរបស់យើងនោះ។យោងទៅលើសេចក្តីថ្លែងការណ៍របស់នាយករដ្ឋមន្ត្រីប៉ូឡូញ លោក ដូណាល់ ថាស់ (Donald Tusk) កាលពីថ្ងៃទី ២៨ ខែកុម្ភៈ ប្រព័ន្ធផ្សព្វផ្សាយ RMF24 បានរាយការណ៍ថា អ៊ុយក្រែន និងប៉ូឡូញ កំពុងពិភាក្សាអំពីការបិទព្រំដែនបណ្តោះអាសន្ន និងបញ្ឈប់ពាណិជ្ជកម្ម។

ការផ្ទុះការតវ៉ាថ្មីៗរបស់ប្រជាកសិករបង្ហាញពីកម្លាំងធ្វើឲ្យរង្គោះរង្គើសហភាពអឺរ៉ុប

ក្រុមប្រជាកសិករទូទាំងសហភាពអឺរ៉ុប បានបន្តការតវ៉ានៅដើមសប្ដាហ៍នេះប្រឆាំងនឹងទំនិញឡើងថ្លៃ បទបញ្ញត្តិបរិស្ថានជ្រុលហួសហេតុ និងការនាំចូលទំនិញពីប្រទេសខាងក្រៅប្លុកអឺរ៉ុប មានតម្លៃទាប ទោះបីមានការលោងលោមថ្មីៗដោយក្រុមអ្នកនយោបាយសហភាពអឺរ៉ុបក៏ដោយ។ត្រាក់ទ័រ១ពាន់គ្រឿងបានបើកពាសពេញតំបន់នានា និងបិទផ្លូវទាំងអស់ជុំវិញរង្វង់មូលស្គូមែន (Schuman)របស់ទីក្រុងព្រុចសែល ដែលប្រមូលផ្ដុំដោយស្ថាប័នរបស់សហភាពអឺរ៉ុប និងបានបង្កការកកស្ទះចរចារណ៍។ លោក មូហ្គាន អូឌី (Morgan Ody) កសិករមកពីទីក្រុងប្រ៊ីតានី (Brittany) ប្រទេសបារាំង និងជាសមាជិកនៃក្រុមសម្របសម្រួលនិងការពារសិទ្ធិកសិករអឺរ៉ុប(ECVC) ដែលតំណាងឱ្យកសិករនៅក្នុងរដ្ឋជាសមាជិកសហភាពអឺរ៉ុបជាង ២០ប្រទេស បាននិយាយថា ការកៀងគររបស់កសិករនៅតែបន្តនៅទូទាំងទ្វីបអឺរ៉ុប ដោយសារក្រុមអ្នកបង្កើតគោលនយោបាយបានបរាជ័យក្នុងការស្តាប់អ្នកដែលចិញ្ចឹមប្រជាជនរបស់យើងនៅក្នុងទ្វីបអឺរ៉ុប និងអ្នកដែលស្ថិតនៅជួរមុខនៃវិបត្តិអាកាសធាតុ។ ការតវ៉ា ជុំចុងក្រោយនេះ បានធ្វើឡើងនៅថ្ងៃដែលក្រុមរដ្ឋមន្ត្រីក្រសួងកសិកម្មរបស់ប្លុកអឺរ៉ុបជួបគ្នានៅក្នុងទីក្រុងព្រុចសែល ពិភាក្សាលើការកែប្រែមួយចំនួនស្ដីពីគោលនយោបាយកសិកម្ម និងការកាត់បន្ថយសេវាលុយក្រោមតុ ដើម្បីបន្សាបកំហឹងរបស់ប្រជាកសិករ។ ខណៈដែលប្រជាកសិករភាគច្រើន មកពីប្រទេសបារាំង អ៊ីតាលី ហូឡង់ និងព័រទុយហ្គាល់ បានតវ៉ាដោយស្ងៀមស្ងាត់ កសិករនៅប្រទេសមួយចំនួនបានដុតសំបកកង់រថយន្ត និងគប់ស៊ុតជាដើម។ អ្នកបើកត្រាក់ទ័រមួយចំនួន បានដឹកស្មៅស្ងួត និងលាមកសត្វចាក់លើផ្លូវនានា ខណៈដែលមួយចំនួនព្យាយាមទម្លាយរនាំងនរគបាល។នគរបាលក៏បានឆ្លើយតបដោយប្រើកាណុងបាញ់ទឹក និងឧស្ម័នបង្ហៀរទឹកភ្នែក ទៅលើកសិករដែលកំពុងតវ៉ាដោយស្ងៀមស្ងាត់ផងដែរ។នៅថ្ងៃដដែលនោះ ក្រុមកសិករមកពីទូទាំងប្រទេសអេស្ប៉ាញ បានតវ៉ាដ៏ធំនៅក្នុងទីក្រុងម៉ាឌ្រីដ ប្រឆាំងទៅនឹងបទបញ្ញត្តិរបស់សហភាពអឺរ៉ុប។កាលពីថ្ងៃអង្គារ ក្រុមកសិករប៉ូឡូញរាប់ពាន់នាក់បានចេញតវ៉ាក្នុងរដ្ឋធានីវ៉ាសូវី និងបានបិទផ្លូវហាយវ៉េដ៏សំខាន់មួយឆ្ពោះទៅប្រទេសអាល្លឺម៉ង់។ពួកគេក៏បានបិទច្រកឆ្លងព្រំដែននានាជាមួយប្រទេសជិតខាងអ៊ុយក្រែនផងដែរ ដើម្បីតវ៉ាប្រឆាំងការប្រកួតប្រជែងការមិនស្មើភាពលើការនាំចូលផលិតផលកម្មសិកម្មមានតម្លៃទាបពីប្រទេសដែលមិនមែនជាសមាជិករបស់សហភាពអឺរ៉ុប៕

បណ្ដាញសង្គម

ព័ត៌មានថ្មីៗ

អាជ្ញាធរបីខណ្ឌក្នុងរាជធានីភ្នំពេញ ចុះត្រួតពិនិត្យ និងបង្រ្កាបទីតាំងបទល្មើសឆបោកតាមប្រព័ន្ធបច្ចេកវិទ្យាព្រមៗគ្នា

របាយការណ៍៖ អ៊ីស្រាអែលបដិសេធការទាមទារឲ្យដកទ័ពចេញពីភាគខាងត្បូងលីបង់

អនុប្រធាន សមាគមអតីតយុទ្ធ អញ្ជើញបើកវគ្គបណ្តុះបណ្តាល ស្តីពីលិខិតគតិយុត្ត អ.ន.ក. ខេត្តព្រះវិហារ

ប្រមុខការពារជាតិកម្ពុជា៖ ចាប់តាំងពីច្បាប់កាតព្វកិច្ចប្រកាសឱ្យប្រើប្រាស់ជាផ្លូវការ មកទល់ពេលនេះ មានយុវជនប្រមាណ ១ម៉ឺននាក់ហើយបានចុះឈ្មោះចូលរួមអនុវត្តហើយភាគច្រើនជាកូនថ្នាក់ដឹកនាំ

ឧត្តមសេនីយ៍អាមេរិកជួបជាមួយមន្ត្រីយោធាគុយបា នៅឆ្នេរឈូងសមុទ្រ Guantanamo

ប្រមុខការពារជាតិ៖ កម្ពុជាបង្កើនសមត្ថភាពយោធា ដើម្បីការពារបូរណភាទឹកដី គ្មានបំណងឈ្លានពាន ឬប៉ះទង្កិចជាមួយប្រទេសជិតខាងណាទេ

សម្ដេចតេជោណែ នាំមន្រ្តីមូលដ្ឋានខេត្តពោធិ៍សាត់ត្រូវធ្វើជាខ្នងបង្អែករបស់អតីតយុទ្ធជន និងគ្រួសារយុទ្ធជននៅសមរភូមិ

មន្រ្ដីជាន់ខ្ពស់ក្រសួងការពារជាតិកម្ពុជា និងមន្រ្ដីជាន់ខ្ពស់ ICRC បានគូសបញ្ជាក់ជាថ្មី អំពីសារៈសំខាន់ និងភាពចាំបាច់នៃការគោរពច្បាប់អន្តរជាតិ និងច្បាប់មនុស្សធម៌អន្តរជាតិ

ទេសាភិបាល និងគណៈប្រតិភូធនាគារកណ្ដាលហ្វ្រង់កូហ្វូន ចំនួន២៦ប្រទេស អញ្ជើញចូលទស្សនារមណីយដ្ឋានប្រាសាទសំបូរព្រៃគុក

ករណីបង្ក្រាប Online scam នៅកាស៊ីណូ យីងហ័ង ខេត្តព្រះសីហនុ សមត្ថកិច្ចបញ្ជូនមេខ្លោងចិន ៤នាក់ទៅតុលាការ និងបណ្តេញជនបរទេស ៦០នាក់ចេញពីកម្ពុជា

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877